MANAGER MAMUANA Ch-36 by Ziki_nu

[Ziki_nu]

MANAGER MAMUANA
By Ziki nu


Chapter-36



"Tunah chuan thil a fel duak tawh a, U Mamuana nute lamin tha taka an lo dawngsawng thei che chu ka lawm hle mai, kawng engkimah puitling taka i awm tlat a ngai dawn a, Sangbawihi vangin i zahawmna a bo phah reng renglo ania, hei chen hi i thleng tawh a, I tuar chhuah tawh zawng zawngte kha ngaihtuahin hmalam pan zel ang che"
ka phone ka benga chuktuah reng chung chuan ka pi thil sawite chu uluk takin ka ngaithla a, ka biang huh hliam chu tuai hul tawkin ka tah nuih zui hak.



"Pi, ka hlim lutuk a ka mittui a tla ringawt" ka ti tuau a, ka pi erawh a nuih a zat hmel viau mai.

"Hlim I phu ve tawh bawk alawm, I pu hriselna erawh hei a hniam ve hret hret zel chu a ni a, tuk in pawh kan in kaitho thei meuhlo, a hnungzang leh khel ruh vel hi na a ti tlat a" a tih takah chuan "Doctor in bia em, a damdawi kan rawn lei haw nghal dawn nia" ka lo ti vat a, "Lei a ngai rihlo ang, a la ngah angreng alawm, I nu Ruati te chu lo tlawh ngei ngei ula, a rang lama lo haw vat in tum zawk dawn nia" a tih hnuah rei pawh inbe lovin phone chu a hmet tawp hmasa a, thaw chhuak ham hamin Bawihtei muhil tui lai chu ka en leh vawng vawng phawt a, ka pu hriselna in rilru a luah ve leh reng dawna hriatna ka nei chu ka duhlo viau.




"Changtupa chuan a kalpui hman ang che u maw, I lo inthlahrung ange" tukthuan ei laiin U Reubena chuan a ti leh sup a, vawi engzat nge min zawh tawh ang le...

"Umm hman a tia lawm,min lo sawm phei anga rei pawh kan leng lovang" Ka tih chuan lo bu nghutin dawhkan kila lo thu ve ka fanu a en leh a, "Kal ve lo mai rawh aw Sangbawih" a ti chiah chu a lo te nasa ngang mai. An pahnih hian an in chhaih tap reng a, an in ngai em em bawk a, U Reubena ang thian tha a nei hi U Mamuana pawh hian vannei a in ti ve thin ngawtin ka ring.




Dar 10 velah U Mamuana chu a rawn thleng phei a, motora a lo kal ka rin tehlul nen U Mami scooty a rawn khalh chhuak a, khua a lum tan tawh bawk nen pawi ka tilo khawp mai.


Ka insiam laiin Bawihtei nen an lo in pawm a, U Reubena erawh chaw ei kham hlim khan thil pawimawh ah a chhuak tawh a, a in chabi min kawl tir thung.




Ka tet deuh laia ka kal bak kha Vli te in ah ka la kal lo va, hman deuha kan zin ve lah khan thlen chu sawiloh, ka tlawh lo hrim hrim bawk nen ka bo deuh hlek a, Nu Ruati sawina lai bawra kan tlan laiin Vli nen kan in hmu ta hlauh a, zawn kual vak a ngailo chu a hahdamthlak khawp mai.



Vli'n min hmu chiah chu a phili nghal ruai a, Bawihtei chu min laksak sawk sawkin a chhaih nui hawr hawr phawt a, hlim deuh angin lang mah se a taksa cher leh a mitkhur tla dawk dawk chu ka hmuh hmaihlo nasa mai.



An in lamah kan in zui lut a, Nu Ruati pawhin min lo dawngsawng tha khawp mai, Bawihtei ei tur eng eng emaw a lo lei khawl teuh hi a lo ni a, U Mamuana nen tak pawh mumal deuha an la inhmel hriat loh avangin an in chibai a, kan boruak chhiatna ber kan dah bo ta bawk a, engkim chu a thawl deuh hawk ni ber hian ka hria.



"A ngailo" ti mah ila Vli chu thingpui a lumtir ta tho a, U Mamuana'n titi na hun thawl min pek a tum chuan Nu Ruati zawkin a lo dang a, "In pahnih awm lai ngeia sawi ka duh alawm, zep leh chuang tur pawh a awm tawhloh hi" a ti hap a, ka khawngaih ve reng mai.



"I laka U Hmingmawia chetdan zawng zawngte hi tun thleng hian awih har ka la ti a, mahse a dik ngei bawk si" ti hmasa tete in za lo tih hriat deuh hian a nui zui hak a,
"In nufa laka ka tawngkam thlahdah thin zia leh chet mawiloh thin zia chu sawi nawn pawh a ngaih loh kha, Mary ka thiam lo takzet a ni, in mi ngaihdam ngawih ngawih ka ngai" a tih lai chuan lo pawt chat in "A thleng tur ang ang chu a thleng vek tawh a, huatna che ka nei hleinem" ka lo ti a.



U Mamuana zawk chu en lehin "Nangpawh Mamuan, Mary te nufa hi tha deuha I enkawl ngei ka ring a, kei leh ka pasalin in pawi kan lo sawi tawhna zawng zawngah khan min hrethiam teh u" a ti leh a, "Ngaihdam I dil tawh a, a tawk e" pakhat chuan a lo ti sup a, eng emaw tal a sawi belh leh ka rin teh reng nen a ngawi leh vang vang lawi sia.




Bawihtei leh U Mamuana te pawn lama an in pawm chhuah hlanin Vli chuan a pindanah min ko hrang a, khumah thu thla dawtin a thaw chhuak ham ham mai.


"I va cher em em ve, chaw I ei tha lo em ni?" ka tih chuan "Chutiang pawh a nilo" a lo ti sap a, "I hmelah I mut tlem zia leh thil I ei that loh zia a lang vek ania, ka pi'n hria se chuan a hau nasa ngawt ang che" ka ti duah a, "Ka pa hi... " a tih chuan a sawi leh tur ngaichangin ka lo nghak ran a,
"Tunah chuan jail ah a tang rih anga, ka nu nen hian engtinnge kan awm zel ang tih ka ngaihtuah a, kan exam mek a, kan chawlh hunah hian thingpui dawr siam ka rilruk deuh mawle" a tih chuan an ei hmuhna tur a ngaihtuah ve hle tih ka hrethiam a, Nu Ruati'n hnathawh lai engmah a neilo a, putea a awmloh phei chuan engtinnge an khawsak zel ang ngaihtuah tham tak a ni.


"I pi te lamin engmah an rawn sawi lo em ni?" ka tih chuan "Ka nu'n a hrilh ngam tawk chu jail ah a tang tih a ni mai a, I laka a chet dan phei kha chu sawi rik ngam a nilo, nimin ah ka nutei nen chuan kan in bia a, dawr siam chu kan duh tak tak chuan a thiannu dawr hlui a ruah thu min hrilh a, ka nu pawh ka la sawipui chuanglo, nangmah ka hrilh hmasa che anih hi" a ti duah a, ka bu nghat a, han sawi mai tur ka van rih deuh tlat. Nu Ruati te hi Aizawl khua an ni bik lova, a unaute erawh hmun hrang hrangah an awm darh ve tih ka hria.




"Thingpui dawr kher ngatinge I thlan a, Nu Ruati'n a duh I ring em ni?" ka tih chuan "Umm ei siam chu a nuam tih ve zawng ania, thiam pawh a thiam viau tih ka hria, ka pa awmloh chhunga eizawnna dang kan dap loh chuan ka tia, dawr dang vak ai chuan thingpui dawr neih chu pawi ka tilo, mahse bul tanna tur hi a hautak ve dawn a" a ti niah niah a, "Kha chu tihdan a awm mai ang, I nu chu lo sawipui chhin la, kan inbe zel dawn nia" ka tih chuan a bu ve nghat a, chawhnu lam dar 1 velah kan let a, Nu Maawmi'n kawi leh hram turin min beisei mah se kan lut kawi ta lo va, kan haw chuan U Reubena pawh a lo la haw lo.



"Ka chau ve hle mai, tinge mawni?" ti supin U Mamuana chu sofa ah a thu thla dawt a, Bawihtei chu ngawi rengin thutthleng awlah chuan a bawk ve nguai bawk a, a hnute tur ka siam sawk sawk hnuah TV on sakin ka pe a, U Mamuana chuan naupangchhia zeta a bula thu tura min tih hnuah nui hak hakin ka thu thla ve a,
Ka darah duhdah deuha kuahin min ngheng zui ar ar a, "Keimahni vangin in buai si a, in chau hlawm ngawt ang" ka ti sap a, "Kan innei tep tawh em?" a lo ti daih chu ka thil sawi lai nen a in milloh em avangin ka chhuk en deuh hu a,



"Kan buaina a reh tawh a, chhungkaw lamah pawh kan rem thlap tawh, I in peih hun hunah palai ka lo tir ang" a ti leh a, ka hau hian ka la en reng.



"Ka pi leh pute engtinnge an lo awm ve ang?" ka tih chuan thaw chhuak suai suaiin "Kan enkawl pah thei ang" a ti mauh mai, awm anglo lutuk.






"Chutiang chu ka duhlo, ka pi leh pute pawhin an duh lovang" rang zet hian ka ti a, "Tihdan a awm mai dawn alawm, min neih duh phawt chuan" a ti leh a, "Nei duhlo che ila hetiang chen chen hi ka thlen pui lovang che, a thu hrimah, nei duhlo tur khawp chea mawl ka ni hleinem, mahse ka pi leh pute hi ka tan chuan ka neihchhun ve liau liau an ni tawh a, kalsan tawp chu ka theih ka ringlo" ka ti ta tawp a, engtik ni ah emaw chuan pasal ka neihsan ngei an la ngai dawn tih chu ka hria a, mahse tunah mai chuan ngaihdan leh thutlukna engmah ka siam thei rihlo, ka pu hriselna a hniam zel bawk nen nawr tut tut chi ka ni rihlo, chu chu hrethiam se ka duh.




"Ka hria e Pekhlu" a tih chuan phawk deuh hian ka melh leh a, a mit sir a min rawn melh ve rulh pahin "Pekhlu ka ti ziah tawh ang che, a mawi" a ti leh a, ka ner khum nang nang chu a hmu a niang a nui chhuak hawk a, a lama min pawm bet hnai sauhin "Kan nula sawn chance min pe ve deuh aniang" Bawihtei TV en lai chu melh zawkin a ti sap a, ka nui ve leh ta hak.


In ngaizawng e tilo chuan a fala awmdunna leh titi din na hun kan nei ngailo a, ka ngai ve thin.

"Tlai lamah ka nu te ka lo sawi pui ve anga, inneih lam pawh chu an hriatthiam ka ring, a rem chuan naktukah kan chho nghal dawn nia" a tih laiin a phone a rawn ri a, chek hlak chunga a kekawr ipte atanga a phone a phawrh chuan Jacoba hming chu ka hmu ve ran a,

"Hello" tih leh speaker on a rual a, "U Mamuan, Papuia hi kan veng reng ning tawh ania" Jocoba ngei mai chuan a rawn ti lung lung a, U Mamuana pawh a in thlahrung ve deuh aniang "A zialo hle mai" ti chhuak halhin min rawn melh zawk a,
Lehlam atang Jacoba bawk chuan "A la te si, I zinsan dawn te chuan lak rihloh mai tur ania, ni khatah vawi 3 vawi 4 lai tlawh a ngai a, a ninawm ee lo haw vat teu" a rawn ti leh a, a thinrim hmel nasa mai.


U Mamuana'n chhan ngaihna a hriat loh hmel em avang chuan "Midangin an tih pui lo che em ni a? Hautak vak tur pawh a la awmloh kha" ka lo ti ve a "Teuhlo nasa lutuk, Spa a hmanlo ziah a, Puia'n call a la duh ngailo, Lalmuankimi leh Hlimpuii lahin 'lehkha ka zir' an ti ziah a, ka fail chuan mawh in phur ang" a rawn ti vin hluk hluk tawh.


"Naktukah kan lo haw tawh ang, I fel bik emai engnge I duh?" U Mamuana chuan a ti ta ringawt a, ka melh vak chu hriatthiam loh hmel deuha dar chhin akin "Tunah Papuia bulah chuan I awm em Jacob" tiin Jacoba zawk chu a zawt leh daih a, "Awm e, I be duh em ni?" tiin pakhat chu a ri zui tawk tawk a, "Ka pu ti rawh le" a ti a, a reh zui vung vung a, "Mawl mawl lo teh Jacob, vawk an tawng theilo" ka lo tih hlak laiin ka bul ami chuan "Lo ngawi lawk rawh a ngûk ve thei alawm" a lo ti a, "I lo dam tha em Papui" a tih zawm zat bawk, ka va han hne dun tak.



Ka thutna atanga tho in Bawihtei bulah chuan ka va insawn daih a, kan sawi ril ve dawn chiaha Jacoba'n a rawn call leh kher chu ka haw hlur mai, awm dunna hun kan neih khat tehreng nen, chance kan sawi ri dek dek a vawkah bawk kan tawp leh tawh, ka ning.









**
Naktuk zanah kan zawm dawn nia aw,,, ka buai deuha min hrethiam rawh u

[Ziki_nu]

ZAWMNA


"Chaw ei ve nghal rawh, Mary khan eirawngbawl a thiam teh mai ania" tih pahin U Reubena chu inchung chhohna kailawnah a chho zui hlawk hlawk a, a rawn haw chiah a, a hah hmel em em chu ka hrethiamlo.


"Chaw chu ka eilo zawk ang, ka nu leh U Mami'n zanah rawn leng leh hman hram la an duh a, mahse Sangbawihi nen in ni bawk si a, lo kallo mai rawh u, zingkarah kan chhuak anga, khi lama thlen hma a tha zawk ang" min en pah hian a ti sup sup a, lo bu nghatin "Ka pu a tha vak lo a" ka ti leh hnuhnawh, vawk chungchang ngawt sawiin Jacoba nen khan an in be reng a, ka lo mangnghilh lek lek alawm le.




"A zia lo hle mai, damdawi lei ngai a awm em?" a tih chuan "Ka pi khan a la ngailo ang a tia, a buai sia ka khawngaih reuh khawp mai" ka ti leh a, "Imm kan haw vat dawn alawm, a hma thei ang bera thlen kan tum dawn nia" tih leh a thutna atanga thawh a rual a.


"Ka kal dawn ania Reuben" ti hlukin inchung lam chu a melh chhoh pah vung vung a, rei vak lovah U Reubena chu a rawn chhuk thla leh a, a thlan fim chhuak tak tak mahse a nuih sung avangin ngaihthat lohna pawh ka nei chuanglo.


"Chaw chu ei rawh" a ti leh tawh a, "Ei lo mai ang, ka nu ten min ngai ve thin em mai" a ti ve ngei a, kawtzawl thleng kan zui chhuak chu Baiwhtei chuan a ngen leh tlat pek a, tunlai chu mi ngen a thiam thar riau a, a buaithlak tak tak a ni.



"A lo kal leh vat dawn alawm" ka tih pawhin a mal ah a kuah bet tlat a, nui hawk hawka pawm kang lawpin U Mamuana chuan "Ka hruai haw anga, zanah U Mami nen kan lo dah mai dawn nia" a ti leh ta nge nge a, ngaihtuah viau mah ila ka fanu te chu lungawi hmel deuhin U Mamuana darah chuan a bei hle hle a, an in hruai haw leh ta nge nge.




Pahnih chauh chuan chaw ei teuh teuh chu a har thin khawp mai, zanriah ei laiin door bell a rawn ri ral ral a, kawngkhar in hawng ri in a zui nghal zat bawk.



Nula pakhat, te reuhte, kei ai mah pawhin a te ang tih tur hi choka lamah chuan a rawn lang nghal zat a, nui sangin a thil khai lai chawhmeh leh thei vel ni awm tak chu dawhkanah a rawn nghat a,

"I lo kal dawn tih I sawi si lo va" U Reubena chuan a lo ti thum bul a, a thleng chu ei zawh lohin a thawh pui nghal daih bawk.



Nula chuan min rawn melh zawkin "Sawi lawk kher a ngailo emai, tunge I mikhual hi" tih leh tap a kut sil chu a rual a, he inchhunga chetla thang tawh tih hriat zetin thleng leh bowl chu a la sawk sawk a, U Reubena thawh San takah chuan a rawn thu ve nghal zat.



"Mary anih kha, Mamuana nupui tur" ti liam puatin pakhat chuan fridge a tui vawt chu a la chhuak a, ka hawihai lutuk chu a lo hmuthiam a ni ang "Ka thiannu Zotei anih hi, a tet ang ai hian chaw a heh ania" a lo ti leh a, ka nui sak ringawt.
Ka thiannu a han ti ve tak na in a bialnu anih ka ring zawk mah a, chu erawh zawh chian kher ka tum hranlo.


"Lalmuanpuia nen in innei dawn maw? Sawmna ka va dawng ve lo ve?" tia ka bula thu in min en ha lai chuan lu lo thing vakin "Engmah kan la sawi chiang hleinem" ka ti sap a, ka riltam vaklo bawk nen a zak hmel vak chuangloa tiin ka khamsan thuai a, sitting room lama ka pheisan hnuah pawh an pahnih chuan an tawng bul bul reng a, engnge an sawi tak phei chu ka hrethei lo.




Bawihtei ka ngaihtuah deuh avangin U Mamuana ka call a, a ring ral thak hnuah U Mami zawk ka call leh ta ringawt.


Ka ngaihchan vang vang hnuah U Mamuana zawkin "Hello" a rawn ti thum leh dut lawi a, "Tinge I phone zawk la lovin U Mami phone zawk I lo lak daih a" ka tih chuan "Ka phone ka charge a, U Mami phone chu ka bulah a awm" a lo ti thum dut ringawt.

"Bawihtei ka ngaihtuah deuh a, a tibuai viau cheu em?" ka tih leh takah chuan "Buai lo, ka nu nen chaw an in ei tir mek a, U Mami'n kan ei tur a siam mek" a lo ti a, ka thaw huai mai.



"Nu Maawmi barh chu a duh ve mai em ni?" Tim ang reng taka ka tih leh chuan nui hawkin "TV ah naupang zai a chhuah sak a, an in chhaih nui hawr hawr mai, lo ngaihtuah suh chaw te kan ei fel anga, U Mami nen kan rawn dah ang" a tih chuan ngaihtha deuhin ka aw ve nghal a, chaw an la ei ve dawn chauh bawk nen rei pawh kan in be lo.




Kan chaw eina thleng seng tuma ka tho leh chu Zotei chuan a lo sengfel vek tawh hi a lo ni a, U Mamuana nen khan kan in biak rei vakloh teh lul nen, a thawm pawh engmah ka hrelo chu ka inthiamlo ru ang reng khawp mai.




"Tinge I lo tih duh a, khawi keiman ka lo sil ang" tih paha a thleng sil lai chhawk ka tum chu "A ngailo" a lo ti vak a, a tawng ring lutuk bawk nen ka che lai pawh ka tawp chiang ngang mai.




Hrilhhai deuha U Reubena va melh lai chuan beidawn hmel zeta thaw chhuak hawkin "Bengchhet kan awm lo Zothanpar, mi beng bulah au vak vak zel suh" a lo ti a, "Hrethiam rawh aw Mary, a la naupang ve a, sil tir mai mai rawh a tam chuanloh kha" ti lehin min nui suk a.



"Nia lo awm mai mai rawh ka sil zo tep, eee ka thei lei kha lo bawl la, tunlai chu ka period dawn aniang thei thur hlir ka rilru ah a awm" a ti leh hlut a, dawhkana a thei lei ho ka en chuan "Eng ber nge ka bawl ang?" tiin ka zawt hmasa leh te te a.



"Nimbu kha bawl rawh, a kawr kha paih vek rawh aw, a hiar emai ka ei tel peihlo ania" a ti zat zat a, a te ve reuh sia, a tawng ring ang reng bawk si.

A sawi ang chuan ka ti ve mai a, ka zai lep zawha chi leh hmarcha vel ka telh lai chuan "Hmarcha ka ei ngamlo" a lo ti vak a, ka phu leh chiam tawh.



"Awi engtinnge ni ang ka telh vek tawh sia, ka van tlaw tak I ei ngam leh ngamloh zawh hmasak tur che ania" ka ti sawk sawk a, tum bura U Reubena a en chuan dar lo chhin akin "I khirh sia nangman ti ve mai ta che, engahmah ngai suh Mary, a duh leh a ei tur chu siam ve mai rawh se" tiin min rawn en a, ka siam sa chu kengin sitting room lamah a phei pui a, nuam ti lo deuhin ka zui phei ve ta ringawt.



"Zotei chu a la nau deuh a, in inrual lek lek mai thei, a rilru a la naupangchhia ve bawk nen hriatthiam hi a ngai ve thin lutuk a" a ti sup sup a, a ni pawhin hmarcha chu a ngam vak biklo a ni ang vawi khat a ei a, a si a si mai.


"I thiannu pangai nge, I bialnu...?" zawh tumlo deuhin ka zawt ta tho.


A nui hawk a, "A nih ve kha" a ti ringawt na in a sawi tum chu ka hrethiam tho mai.


Ka nui ringawt, ka sawi zawm lemlo.

Rei vak lo ah plate dang rawn keng in U Reubena bulah chuan a rawn thu ve leh a, hmarcha vang khan thinrim hmel pawh a pu leh tawh chuanglo,
"Tinge hetah I thlen daih chhan ni reng reng a, U Reubena hian a sawi tawh tho na in, chhungte in nei ve lo em ni?" a thei thur ken lai ei tuam tuam pah chuan a ti a, mitmeiin a bul ami chuan lo khap vat mah se eng teh ualah a ngaih hmelloh khawp mai.


"Chhungte chu nei ve e" tih zawngin ka chhang a, a zawhna min zawh dan hi ka tan chuan thil pangai leh chhan awlsam tak a nilo tih a hrethiamlo a ni mahna.


"In thubuai te kha chianglo deuhin ka lo hre ve ruai ruai a, fa kha I nei tawh tiraw, I rawn hruai ve lo em ni?" a ti leh zel a, "Zothanpar" tiin lo khak ve bawk thin mah se awmzia a awm nep hle.


"U Mamuana ten an la phei a, nakin deuhah an rawn dah ang" tih zawngin ka chhang leh a, min zawt zawm ta lo hlauh e.



An pahnih chuan in si rialin an awm reng a, an bula lo awm ve reng chu ka hnawk ang tih hlauin ka tho deuh hluai a, u Reubena'n phawk deuha min rawn en lai chuan "Pawnah boruak tha dawng pahin Bawihtei te ka lo va hmuak ange, an lo thleng tep tawhin ka ring" Ka ti ta ringawt a, ka rilru a hria aniang min dang lem lo.




Veranda a thutthleng an hunah chuan thu in hmalam chu ka en vang vang a, U Reubena awmna lai hi chu hmun lun lutuk a ni lemlo bawk a, boruak a nuam tawk khawp mai.



U Mamuana te lam va phone chhen ka hreh avangin ka thiante ka be ta zawk a, group video call in kan inbia a, Hlimpuii pawhin a lo la ve khiah a, kan kim khawp mai.



"Tunah U Reubena inah chuan i awm mek ami, a rukin lo ti lang teh ka hmu chak" Engtheii'n a rawn ti lang lang a, khumah lehkhabu a inchhawp ruih a, a zir hmelloh khawp mai.


"Pawnah ka thu daih alawm, tawng ring vak suh u" ka tih laiin Spa chuan "Tlaiah khan Jacoba hian min rel ami?" a lo ti bul ve hmuk a, a lungawi loh hmel khawp mai.


"Amah kha zawt la" ka lo ti daih chu Jacoba hmel a pha nghal dui a, amah chauha vawkte a buaipui kha chu ka ringlo hrim hrim, kan thian hoah pawh a zawmthaw ber leh phawk ber nia, midangin an peihloh chuan a ni phei chuan a peihlo bur ang.


"Ka uang anih kha" a ti vin nghal hlar a, Puia pawh a nui tawp.


"Tlaia in inbiak lai kha chuan kan haw San a, ka nu inkhawm duhin chaw ei hma a rawt tlat a, Jacoba hian keimahin ka lo veng rih ang a tih vangin Puia nen kan haw San anih kha, a phakar ve sia" nui vur vurin Spa chuan a ti leh a,


"Jacoba hming a lan ve tawh naah chuan a phakar dawn tih hre tawp rawh u, niminah pawh a leng kawi duh sia a school bag ka hawn sak a, tlaiah a rawn lam theihngilhin a nu bulah ka pe duhlo angin a lo sawi leh daih a, a tihsualah midang min puh ziah, tiang chuan ka kawm reng theilo ang" Engtheii'n a lo ti ve duah a, sawi chhung zawngin a nui lo va, 'ka kawm thei tawh lovang' a ti kher chu na a ti ngang aniang Jacoba chu a ding hluai a, "Min kawm tawhlo ula ni mai lawm, ka kawm chak biklo cheu emai" a ti a, a off zui nghal daih a, a tau rei dawnlo tih kan hre chiang tlang bawka engah teh vak kan ngai lo.




Kan inbiakna kan tih tawp hnu deuh lawkah kawtzawlah chuan U Mamuana car ngei mai a rawn tlan lut a, U Mami leh Bawihtei rawn in pawm chhuak chu nui var varin ka lo pan hnai a, ka fanu pawh chuan min lo ngai tawh aniang min lo ban ve vat mai.





"Tinge pawnah i lo awm a?" U Mami'n a tih chuan ka chhan hma hauhin pakhat chuan "Min lo hmuak anih kha" a lo ti sup a, nui hak paha min melh tawn zak zak hnuah Bawihtei kai chung chuan inchhungah an inzui lut a.



U Mamuana nen pawnah kan la ding khawtlai leh rih a,
"Ka thiante nen kan lo inbe zo chiah a, Jacoba a tau leh tawh" nui chunga ka tih chuan "Naktukah kan thlem mai dawn nia" tih leh motor kawngkhar chu hawn a rual a.



"Hei hi ka nu in I hawn turin min thawn a" a ti zet tawh chu a lu thaklo pui hiatin a hawi vual vual a,
"a... Ka motor tho hian kan haw dawn si a, tinge zaninah thawt thawt ka lo ken le" a ti sup a, a at hmel lutuk ringawt.



"Engnge ni hrim hrim a?" thlek ha paha ka tih chuan "Thuamhnaw leh hmai hnawih velte a niin ka hria, I en duh kher em, nge motor ah hian ka dah leh rih dawn" a tih chuan "En chu a tha viau a, mahse lo dah tha leh rih zawk mai rawh, lawmthu min lo hrilhsak dawn nia aw" ka ti a, nui sukin min rawn din hnaih deuh a, ka dar tawn tawna dawmin a hmuiin ka chal chu a rawn nawr si vang vang a,
"Ka chhungten an pawm thlap tawh che a, I inpeih velah palai ka lo tir ang" zawi te hian a ti sap a.






End of chapter-36