HMANGAIHZUALI POV
"U tho tawh la,chaw ei ang" ka nau in minlo sawi dat dat paha atih chuan ka meng ve riai riai a.Ṭhuthleng a kalo mu mai mai kha kalo muhil tlang daih chu niin,sana ka en chuan dar nga ari thuak tawh.
Ka nau in chaw ei alo siam fel diam tawh a, "naktuk chu lehkha zir chawlh kan nei a,naktip ah subject pakhat kan exam leh anga kan zo animai," chaw bar mawlh mawlh pahin Omom'in ati siam siam a.
"Naktip ah chuan eng subject nge intih dawn," kalo tive deuh sep. "Science" alo ti awlsam et a,a subject awl tih ber ani bawk nen ka ngaihtuah hranlo. "Hriatloh ineih chuan min zâwt dawn nia," ka tive ta tho a.
"Ei thleng vel chu kalo seng fel mai ang,lehkha va zir rawh" chaw a eikham hnuah pawh a awm ve tak rengah chuan kati a. "Exam zawh ah ka haw chho ve lawk dawn ania,kalo pass hlauh chuan college heti lamah ka zawm leh mai ang," atih chuan kabu nghat.
"Nia,han awm thawveng ve rawh,kanu pawn a exam zawh ah lo chho rawh se ati hrim hrim a, college chu kal duhna bik te inei em," tih pahin thleng ka seng fel zung zung a, "nei lemlo, Dorothy nen a in ang a kal kan duh a,kanla thlang fel thei rihlo" atih chuan ka chhang chhunzawm tawh lemlo.Dorothy hi kan inah pawh alo hruai fo tawh a,an inkawm ve nasa tih ka hria,an hmel te pawh a in ang reuh lutuk.
"Lehkha kava zir leh phawt ange," atih hnuah a room ah a lut zui nghal a.Thleng ka sil zawh ah keipawh awm khawmuang tawhlo in ka intifai sawk sawk a,Ruata lah chu ala reh vang vang mai bawk sia,anla thleng lo nge mawni.
Naktuk ah damdawiin lamah nileng in hun hman angai leh tûr chu ka huphurh ru khawp mai.Ka trainning puite ho zingah a thiam thei pâwl ka nive a,in zaina room ah pawh min luh tîr ve zeuh zeuh tawh.
Vawiin lam ka motor chuan na ka chau deuh nge ka meng hleithei tlat lo,mutchhuak in min rawn zem leh chiai chiai a.Ka nau thil chhiar ri pawh ka hre pha reng,meng luih ka tum ngial pawn ka theilo,ka phone ka khum bulah dah in ka mu ta nge nge a.
************
"U,damdawiin lamah i kal dawnlo ami," ka nau in min sawi dat dat paha atih chuan ka harh chiang khawp mai.Sana ka en a,dar nga vel chiah ala ni,thawh ka hai amaw ka ti hman a,ka nau in min kaitho lo se chuan ka tlai ngei ngei ang.
Hmai ka phih hnuah eirawng ka bâwl a,Ruata Message pawh alo awm leh vang tawh.Nizan a minlo call na a awm nual a,kalo hrelo ani ngei ang,Aizawl alo thlen tawh thu leh a hman veleh a alo len tur thu asawi a.Ka reply hnuah chaw ka eizui nghal,ka nau school lamah a kal dawnlo bawk a,ala hma bawk nen a eipeih ka rinloh vang ani.Room lamah a awm deuh chawt bawk sia,tih buai ka duh lemlo.
Trainning lai ni mah ila form kan ha ve deuh ṭhlap a.Mahse damdawiin kan thlen hnuah kan inthlak mai ṭhin, "Om'i ka kal ania aw,lehkha lo zir ṭha la," ring ve angreng taka ka tih chuan "aw" alo tive mai a.
Kan in luah na chhak lawk hi taxi stand ania,a remchang phian mai,mahse nitin kal chuan pawisa erawh a hek duh khawp mai.Haw lamah chuan ka ṭhiannu Adeline'in min thlah haw chang a ngah a,lirthei alo nei bawk nen a remchang phian a,hnial ve ṭhin mah ila ani hi zawng a duhdan anih tawh chuan tuman an dang theilo.
Taxi stand ka thlen chuan ka vannei khawp mai, passengers dang anlo awm nual tawh a.Pakhat chuan theihna chiah chiah alo awm tawh, "civil hospital lamah aw" tih paha ka pan phei chuan lût tûrin minlo tivat a.
Kan tlanchhuak deuh chiah tih ah ka phone ari deuh ral ral a,minlo call tu chu Ruata bawk ani, "aw hello" ring vaklo chuan kati sep a. "Damdawiin lamah ikal tawh em," alo ti ṭial ruai a,a mut a chhuah hmel lutuk ringawt.
"Aw ka kal dawn chiah," ka ti ṭha veleh mai a. "Zan velah kalo leng phei ang,i phal chuan" atih hnuah thawm ari zui sat sat a. "Phal e,ilo leng dâwn nia" ka ti ve mai a,anu nen an inbia nge nutling ṭawng lawng lawng thawm te a awm nuk mai.
"Zanah chuan kalo kal ang,ka dah phawt ang aw,hei inlêng an awm sia" atih chuan kalo aw ve vat.Keipawh damdawiin bulah ka chhuk a,pawisa te ka pêk leh tête hnuah damdawiin lam panin ka pen chho nghal pawk pawk.
Keimah ni batch bik timai ila,kan batch ho hi chu kan vânnei a,Mizoram lama kan zir hma in vai ramah kûm hnih dawn kan zir hrep tawh bawk nen,inzai na room velah pawh kan lut ve zeuh zeuh tawh a.Keini ai junior anlo awm veleh zêl bawk nen,anni erawh Mizoram lamah chiah zir anni bawk a,class anla la thlap thlap thung,kan batch ho bik hi chuan doctor hnung zui leh kan senior te hnung zui kha kan tih dan ani rih tawh mai a,tun kum chhûng zawng kala nei ka tive ringawt a.Kan batch bik chu kanlo zo ve ṭep tawh mai,chuvang te pawh chu aniang an buai zual ni phei chuan damlo serious em em lo chu kan kutah te pawh an dah ve ngam tawh.Mahse doctor pakhat tal in min vêng ziah thung.
Kan inthlak na room ka thlen chuan Adeline'i alo la thlenglo ani ngei ang,a locker pawh ala in kalh form la chhuak in ka inthlak zung zung a.Midang pawh anlo thleng ve nual tawh,ka in peih fel deuh chiah tih ah ka ṭhiannu pawh thlan hluam in alo thleng ve ta nge nge a, "traffic a jam nasa lutuk a,awi ka thi lo chauh" tih pahin a locker a hawng zui nghal rawk rawk mai.
"Midang hi an kal vek tawh ami,pawilo kan in partner tho,e chuan taka doctor Rinpuia kan zui dâwn a,ani pawh kalo thlen khan alo thleng ve deuh chiah,hmanhmawh vaklo ang," inthlak pahin a ti zui zât zat mai.
"Keichu hlawh kan neih ve hun tur mawlh hi ka nghakhlel,tihian kan thawk ve thei ṭep tawh chu ani mai sia,mahse zan lama duty ngai tur ber hi ni ka peihloh chu,nang chu keiai ila huai zawk tal a,ICU lamah te hian min duty tîr ang tih ania ka hlauh,thlarau an inpel suau suau hian ka ring tlat" inthlak na room aṭang a chhuah pahin ati leh zat zat tawh.
Adeline'i hi chu ngaina lo pawh hi an awm ka ringlo,amah te hian ate ve reuh sia,aṭawng duh in a mawng azang si a.Keipawn kan inhmuh tirh aṭang phat in ka nel nghal a,vairam lama kan zirlai pawh khan Adeline'i nên hian kan in roomate char char, "hawh saw midang bulah sawn va awm ve ang, doctor Rinpui'a alo phei ṭep ang" ka tih takah chuan alo aw ve mai a.
Kan khaw lam chanchin ringawt min zâwt leh tawh,engtik ah emaw chuan kala hruai ve ngei ngei ang.Alo zin ve chak sia asawi ve ziah a,ka u sumo service lai ngei hian la hruai ve ila aṭha ang.
"Zonunthari leh Malsawmdawnga te inzai na roomah minlo zui lut ru," rum lam lek lek a tih ri kan hriat chuan Zonunthari leh Malsawmdawnga nilo mah ila kan hawi nghal ṭhap mai.
A coat hak dan aṭang doctor senior lampang ani tih ka hre nghal chat thei,mask a vuah avâng in a hmel erawh ka hmu chiang theilo thung.A mit chu apa in analh takzet,a hawikual thuak thuak a,kan lam alo hawi chuan kalo zak ve em em ringawt,Zonuni leh Sâwma pawh ding chhuak vatin doctor chu an zui vat a,an kal liam thleng chu ka enzui reng.
Kan bul ami te pawh chuan anlo en ve ni ngei tûr ani,a kal hnu pawh chuan an phun zui sap sap a, "in zaina room te atih danah kha chuan surgery lam doctor anih hmel sia,avan hmelṭhat hmel em em a mitmeng amawi tawp," Adeline'i pawn alo tive ta chiah reng a,kei erawh chuan engmah ka sawi ve lemlo.
Doctor Rinpuia alo thlen takah chuan keini pawh kan ding ve vat a.Doctor hmasa pa anglo tak khan ani erawh a nelawm hle a,anui deuh sang reng mai.
Ward D lamah kan pathum in kan inzui phei a,nau neih na ward lampang ani bawk a,naute an ṭap ri chuah chuah mai, "nau pakhat tal in chhar tawh em," kan lama lo hawi pahin doctor Rinpui'a ati hlawl a. "Chhar lo,in zaina lampang ah bak kanla kal chhin lo a" kalo tivat a.
"Vawiin chu nau neihna room lamah inlo lut ve ang, Adeline'i doctor Sangpuii bulah i phei dâwn nia,Hmangaihi ka bulah" doctor Rinpui'an atih chuan kan bu deuh nghat nghat a.
Nau nei tûr chu an tam ngang mai,a vei mek te a ṭhen anlo in dâwm kun deuh tluk tluk a,a ṭhen nei zo hlim tih hriat takin anlo nawr chhuak mek bawk a.Doctor Rinpuia nen chuan room lamah kan inzui lût vat.
Tuna kan nau chhar tur nu chu ala naupang hle tih a hriat,chuan a au ring hle bawk,a fa pakhat na ni ngei tûr ani. "Alu alang e,kapi sang leh vak rawh" Doctor Rinpui'an atih chuan "ipi rual ka nilo" pakhat lah chuan ati vin deuh hlar bawk sia,nau avei nat lai pawn kapi tih chu a duhlo ve khawp mai.
"Aw,aw alo chhuak dawn Mami han sang leh vak teh" doctor in atih leh takah chuan theih tawp in asang ta vak a.Naute pawh alo chhuak zawt mai,ka rinai in nau a harlo, "Hmangaih a lai hi lo chep rawh le,a in hliam ve nual a,a ṭhui dan ka hrilh ang che u" atih chuan ka phei ve vat a.Mahse min koh thut bawk sia ka zam chhe der mai, "hlauh tur a awmlo ania,lo ti vat vat rawh" atih takah chuan nau lai cheh dan te chu kan zir vek tawh bawk nen,ka zamna paih bo hram hrâm in kava ti ta nge nge a, "aṭha lutuk kha kha animai,i thiam lutuk" atih chuan ka thaw huai thei.
"Naute hi va tifai rawh" tih paha minlo pêk chuan ka ban ve vat a.Ka rinai in a bal phian mai,mipa ah chuan a ngo pâwl tak ani,nau an pai laiin sex an hmang nasa ve deuh ni ngei tûr ani,nau pai laia sex an hman nasat hian naute hi an bal duh khawp mai a,ka naute pawm lah chu aṭap uar nasa mai bawk sia.
Ka tih fai thuak thuak hnuah a nu awmna lamah ka phei a.a hliam vel anlo ṭhui mek, "naute kha anu ipe thei tawh ang," a lu bûk nghut paha Doctor in atih chuan a nu bulah ka pawm phei a,a fapa ahmu chu anui ve ver ver mai.
Ka naute chhar hmasak ber ani bawk nen hmelṭha hi ka tive hliah hliah mai ni,anu kan nawr chhuah lai chuan a chhûngte niâwm tak hian pâwnah anlo nghâk deuh ṭhup a.A mutna tur vel ka buaipui fel vek hnuah doctor Rinpuia awmna lamah ka phei leh vat a.
"Tikha chuan emergency ah pawh nau chhar chu i thiam tawh mai dâwn anih kha," min nuih vur vur paha atih chuan ka nui ve sak.Ka ṭhiannu pawh room pakhat aṭang nui vur vur chungin patient pakhat arawn nawr chhuak a,a hmel chu a in chhuah hmel lutuk ringawt.
"Keichu nau neihna ward lamah ka duty chawt angai dawn a,ward pangai lamah va phei rawh u,damlo drip thlâk ngai te an awm nual ang,sawti lampang saw an indaih lo ve thei sia,va pui rawh u ala hma emai," doctor berin atih takah chuan Adeline'i nên kan inzui phei a.
"Zanin ah Ruata alo leng dâwn asin," ka ti chiah chu a meng phâwk khawp mai. "Tak tak ami,awi engtin vairam ah khan ala awm amaw ka tia," ati deuh hluai a,Ruata leh Adeline'i hi keiai an inhre hmasa daih a, Adeline'i min tih pui hi ani bawk.
"Nia,chawlh kala a,kalo chho lawk atia" ka tih chuan anui deuh ver ver a, "lo be ṭha hle rawh,i pasal turah dah tawp la,Ruata te chu fel hmel em kha" ati ve sep sep a,ka chhang zui tawh lemlo.
Kan batch dang ho nen kan intawk leh zeuh ṭhin a,mak tak maiin nichina surgeon doctor kha hmuh leh ka chak deuh tlat,mahse Adeline'i erawh engmah ka hrilh lemlo,bialpa ka nei tih a hria a min ngai khawlo lutuk palh ang.
"Hawh hetah hian ṭhu ang,damlo min mamawh deuh an awm chuan a hriat theih tho,vawiin chu class kan la mumal dâwn chuanglo" Adeline'in atih takah chuan a bula ṭhutna awmah chuan ka ṭhu ve mai a.
"Kum thum vel dawn lai kan trainning a,engkim kan zir ve vek tawh a,min ring ngamlo hi ka tia,exam ah lah nise kan pass ve zel tho sia,ngatinge nge maw thla nga dang hi trainning an tih leh kher ni,a ho ka ti tawp keini phei chu nau chhar na ward lama duty tam ber tur kan nia, surgery ho ai pawn kan thiam daih ang chu hlawh neih vat vat ka chak ka ning a" Adeline'in ati leh deuh duah a.A thin te hi a chhe ve reuh sia,a nuihzatthlâk zawk.
"Aw hetia trainning thla nga kan neih leh hian aṭha mai alawm,kan thiam chiang dâwn tihna animai a" nuih têt tet paha ka tih chuan ala lungawi lo nasa mai, "trainning anti rei lutuk a,damdawi hming pawh ka hriat pawlh hman vek dawn" atih chuan ka nui deuh hak.
Nileng in eng eng emaw tiin damdawiin lamah hun kan hmang zo veleh mai a, Adeline'in min thlah dâwn avâng in kan chhuk thla rual a.Step a kan pen thla chu nichina surgeon doctor pa nên khân kan intawk leh hlawl mai,ka mitah chiang zetin min melh kar a,a mitmeng chu mawi tak ani,chuan a mit bulah khuavang amawi tawk lekin anei bawk.
"Ruatfel,iva hmanhmawh ve,minlo nghak rawh ka tih kha" tih pahin step ah doctor Mangur'i arawn chho ve chiah a, doctor Mangur'i leh ka hma a ding mek pa hi kan senior te veve ani tih ka hai hauhlo.
"Adeline'i leh Hmangaihi chu,in haw dawn tawh ami" doctor Mangur'i chuan min hmuh rualin ati sep a,anui sang bawk min hriat chhan pawh kan class ah arawn kal tawh miau a.
"Nia hei kan va haw tawh ange,min release tawh bawk a" Adeline'i zawk chuan alo tivat a,ka hma a ding pa lah chu ameng rum nasa tawh mai sia, Adeline'i awmna lamah ka tawlh phei hret hret a.Chupa pawh chu arawn pen chho ve mai a,min kalpel dâwn a a kut in ka kut a dik chuan ka lum deuh pup mai,eng vanga zam chhe em em nge maw ka nih le.
"Va phei rawh u,keipawh kan kal ange" UMagur'in atih ri ka hriat chuan ka harhchhuak zawk, Adeline'i chuan ka kutah alo vuan a,step ah chuan min chhuk thlâk pui deuh pawk pawk.
"Awi!!engtin nge kalo hriat loh theih zawk,khapa kha UMagur'in Ruatfel atih khan ka hre chiah,ahma pawn ka hmu tawh reng sia,apa pawh hi doctor tho ania hemi damdawi inah hian a thawk ve tho,awi pafa a doctor nih veve chu avan nuam dawn tak,an senior veve tawh dawn sia ngaihtuah teh an hlawh hnem tur zia chu" kut zaizir meuha ṭawng pahin ati hluai a.
"Awi iho emai,min va thlah vat vat la min thlah dâwn chuan,i haw na tur a tlai vek palh ang" ka tih chuan a helmet a khum ṭha sat sat a,amah te chuan ala phun bul bul maiin ka hria.
Adeline'in kan inkawt thleng min thlah a,a tlai ve deuh tawh avang in ani erawh alo lut velo thung,inchhung ka lut kawngka ka hawng chiah chu ka meng deuh kawk thei, "engtin!!" Ka tichhuak deuh halh a.Ka awi theilo zawk,engtin nge alo awm ringawt theih!!
Chapter-2 pawh ala boring deuh maithei a,mahse a ngaihnawm chho ve zel turah ngai ang aw
kalo regu em em dâwn tih hre phawt ila