Chapter - 30
Ziaktu : ilefi imoz
(Recap : "Mâwli, mâwlchâwllonu!" Tia nui ve hak hakin a ngawi zui daih a, min melhna mitmeng chuan thu tam tak a sawi thung. Nuin a fâ na tuar lai tih theih nei si lova a thlîr ngawih ngawih hmêl hi ka chan ber a, ni e, ka ţhiannu mitmengah chuan hmangaihna thûk lutuk leh lainatna nasa lutuk infawnkhâwm ka hmu tel miau a ni.
"I dam leh ang" a ti sep a.
"Ka beisei takzet a ni.")
"Tho ru tho ru.. Nizan hma deuhah ka muttir cheu a kaihthawh in la harsat ţâlh chu le! Tho rawh u ka ti. Exam dâwn tûka kaihthawh theih miah loha awm ka hre ngai lo reng reng!" Tia Sir Isaac-a âu ţial ruai thâwm chuan min kaiharhin ka inlet tap a, ka mut theih loh avanga dar 3 rîk dawna ka han thawh chhuah te khân khua vâr vat vat se la, engkim chu ka mumang vek lo ni daih mai se la tiin duhthu ka sâm a. Khawvâr dawnah lo chhîng ve sekin min kaitho zui leh mai chu ania. Men a harsa viau a ni.
Châmi'n u Arona te chanchin min hrilh aţanga kâr hnih meuh a liam hnu pawhin ngâi ka awh hleithei lo va, inngaihtuah ngut nguta thâwk ka lâk leh hap ţum a tam khawp mai. Chutih rualin an chanchin tak tak, palai chu an tîr ta rêng em tih erawh kan la hre thei lo va, tîr ni se tuman an thup ka ring lo. An sawi chhuak ang a, ka classmate te ho hian an sêp rawtui viau ţhinin ka ring.
"Malsawmzel! Vanlalchâm! A va mak ţhin tak êm aw! Tho rawh u ka ti, ka dîm dawn lo cheu ania in exam nî a ni tawh. Che zung zung ta che u mawle!" Tih thâwmah chuan peih lo zeta che ţual ţualin ka inlet leh tap a.
"Ka sawi zing ta!" Tih ri kan hriat leh ruala min rawn thâm tho nawktu chu Sir Isaac-a ngei a ni!
"In phih harh ula, Mualah zuk kal rawh u. In zir peih tak tak chuang lo bawka in chawhmeh tur Nukili dâwrah zuk la ang che u. Che zung zung ru aw tuia leih in duh loh chuan!" Dorm aţanga pên chhuah vut paha a tih leh lai chuan, "Exam dâwn tûka intirh te chu a!" Châmi'n a lo ti nâng nâng a.
"Tîr lo cheu pawh ni ila in zir teuh lo mai. Ngawi rengin va inphih harh ula a thlawhin thlâwk thla rawh u" ei rêlna In lam pan nul nul paha Sir Isaac-an atih hnu chuan, "Thla te chu nei ila i sawi ngâi lovin kan thlâwkbo daih tawh ang!" A lo ti leh hrâm a, ka ţhiannu hian tû ţawngkam thlâwn mah a ba duh lo tih ka chiang ve thawkhat bawka ka nuih liam ringawt. Hau eng ang mah ila a duhdan tê anih loh chuan a zilh sim theih chuang loh.
"Tanky bulah sahbon ka theihnghilh tih ka hre chiah, va ring tlang mai ang, kan kal nghal dawn nia" tiin Tanky lamah ka kâiphei dat dat a, "Ngati nge mite hian pangngai deuha min hmuh theih ve ngâi miah loh le? Kan pangngai tehreng nen!" A ti zui nang nang tho.
"Ngaihzawng nei lo ho hi min hmu soft mah mah em mawni tih tur ania" te a ti vel a, a sawi zâwnga min rawn melh ralh ralh ţhin te chu nuihpui loh chi pawh a ni lo. A zîngkâr hmêl phak lutuk pawh kei chuan ka hmu ţha zo vek tawh a, ka ţhian anih chhung chuan ka mitah ani tluk an awm thei ngai dawn lo anih hi!
"E e ê.. An la kal lo cheu ka ti! Zuk kal thuai thuai ta che'u mawle in zîng chawhmeh tur ania. Ei pawh in ei hman dawn emni? Tlan nal nal rawh u" ei rêlna In kawta kan kal mêk lai chuan Sir Isaac-a bawkin min lo âu leh lâwng lâwng a.
"Min lo hmu lo der ve mai rawh" ti hmarh hmarha Châmi'n min kaih thlâk avang chuan engmah sawi ngâiah ka ruat ve tawh lo. Ka duhdan thlapin a chhânga kei chu ngawih mai mai ka inhmeh berin ka hria.
"Nu Kilte, Sir-in chawhmeh zuk lam ru min tia!" A dâwra pên lut zâl zâl chungin a thil zawrh ţhenkhat chu kan melh kual dan dan a, plastic thil chi hrang hrang leh make-up te, naupang lâwm chi eng eng emaw leh puitling thawmhnaw thlengin a dâwrah hian chikim tak a ni. Kan khuaah rau rau chuan a dawr han tluk pha tur an awm lovang.
Chawhmeh erawh a zuar hauh lo thung! A chawhmeh zuar lo ber dâwra min han lam tîr tlat te chu ania kan hriatthiam loh ni.
"Isaac-a tirh te emni in nih a?" Choka lam aţanga rawn tiphei chhar chharin Châmi nen min rawn thlêk thuak a, kan lo bu nghat nghat.
Amah hi khawchhak lam mi niin tuna a dawr pawh hi mî inchung a luah hawh a ni a, thlanglam deuh hlekah room leh choka ni kawp nghâl turin Purdah-in a inping dang ve thlap a, a hmalam, hmuh theih chin zawngah dawr bungrua a awm thung. A dâwra kan kal tawh chuan eng emaw tal kan lei haw ngei ngei ţhin. Sawi tawh angin a inzuar chikim a, nail polish aţanga hnungzâng thak hiahna chena a kawl vâng te pawh a ni mahna!
"Tukin zing chu in thaw nam thar thar dawn a ni maw?" Nui deuh pût pût chunga Nu Kiltei'n a thil khâi min rawn pêk chuan kan lo ka hau ringawt a.
"In exam dawn an ti emaw tia, exam dawn tûka hetiang inhmehpui te chu a zia duh âwm lo em mai, in Sir pawh han hau nasa rawh u" nui hak hak chunga min fuihpawrh lehna pawh pawm dûn tak kan ni!
Nghapih pack lian chi pack lî ngawt la turin kan kal tih reng reng kan hre lo! An tuamna polythene lah chu a langtlang thei vek chi ania, a dum te pawha han tuam ve âwm! Mi zawng zawng hmuhah kan khâi chho vâwk vâwk dawn anih hmel e!
"Nu Kilte polythene dum talin min han tuamsak teh.. Hetiang teh ngawta khâi chhoh te chu a nuam duh dâwn lo ê! Hnâr kan hmu lian lutuk dawn!" Ka ngaihtuahna ang chiah a lo ngaihtuah ve nge mawni dawn, Châmi chuan men pûr chungin a dîl ta thlâwt a, nu Kiltei lah chuan Polythene hrim hrim a neih miah loh thuin min la chhâng zui. Nuam duh lo tak a ni.
"Hei in Sir-in min rawn call anih hi. Han chho vat rawh u" a phone ri ral ral a pick-up rual chuan a ti zung zung a, polythene dum a neih miau si loh chuan kan hreh emaw hreh lo emaw, kan khâi chhoh tho tho a ngâi si a, minâwlpui thawh hmain chho hlawk hlawk ila a tihchi zawkin ka ring e a.
"Kal ang kal ang" tih leh dawr aţanga Châmi pawh chhuah ka rual a, keiin pack hnih khâiin ani pawn pack hnih ve tho a khâi a, Bazâra ţhu nûho leh bazar tura kal hote chuan min en deuh hâ hâin kan han hre tlat pek a. Vanneihthlak angreng taka zingkarah tlangval hmêl hmuh tur a vâng erawh lawmawm duh tak a ni.
"U Kâwlte u Kâwlte!"
Hnunglam aţanga rawn ti lâwng lâwngtu aw a hriat rualin Châmi chuan, "awi ka duh thei lo Lalkham! Ai chakin ai chakin!!" Tih leh min tlânpui a rual ta mai a! Kan tlân chhan hre ve hek lo, ka ţhiannu a tlân miau avang chuan ka tlân ve hlawk hlawk ringawt a, mî in kawta ui mu ho kan pal harh a ni chêk ang, min bauh zui tluar tluar a, kan hnunga bullet ri thûm dut dut chu kan tlânsan anih ka ring ber tawh.
"Ding ang ding ang, ka kâah boruak a lût tawh lo reng reng!" Thaw hlâwi hlâwi chunga ka tih pawh chuan min ngâithla duh miah lovin a tlân zêl a, "i hnârah khân luhtir rawh!" A ti a a thaw hlawp hlawp bawk.
"Eng nge tlânchhiat kher a ngaihna?" Tih ri leh kan sîra Bullet rawn ding thâwm chuan min pawtding ka ti lo thei lo. Speed laklawh pawh awm eih lova Châmi ding chawt chu kei ka speed a lo lâi kual vek tawh bawk nen ka su phei deuh buan buan a, ka thil khâi laiin tu emaw lû a tlâk ri fawk tih lohah chuan, lei châra ka tlûkna avanga ka khûp thip ser ser chu ka thil hriat leh hmasak ber a ni.
"A va mak dûn buan buan ve mawle!" Nui hul haka min rawn pawt tho lawp tu chu Châmi star kumhlun U Toma, u Arona ţhianpa kha a lo ni a! Hei vang anih dawn hi baklênga min lo tlânchhiatpui ni!
"U Kâwlte, i hnang em i hnang em?" Tih zawm leh zata vut kâra mu hlâwm reng Châmi a kaihthawh leh lai chuan inthiamlo deuh takin hnunglama u Arona'n a lu a lo tuai vut vut chu ka va melh ralh a, ka nghapih ken kha a thlâwh thui viau ka ring rêng a, a lû-ah tak a va dêng anih hmel khawp mai.
"Nangni pawh!" Pâwr fêa a thawmhnaw bâl ben fâi thawk thawk pahin Châmi chuan a rawn ti ţeu hlar a, "Kan tlânchhia tih in hriat te chuan min rawn ûm hrâm loh ve mai tur cheu alawm mawle! Kan balh vek phah hi. Mî tlân ve hle hle lai han ûm ţalh ţâlh che u! Haw ru" tih zawm leh zata a nghapih khâi a zawn kual vut vut lai chuan hnunglamah u Arona a lo nui khûr deuh dar dar a, a lû pawh a na lutuk lo aniang a tuai rei lo.
"Eng nge i zawn hê hê?" U Toma'n a tih leh pawh chuan, "i hriat ve zel a ngâi lo Lalkham! Ka chhang kham che ania," a tilêt leh êrh a, zîngkâr aţanga mood fuh lo a ni bawka han thinrim thar leh vel chu nuam a tih hmêl tîk têk khawp mai. A lawmpuiawm zawk. A thinrimna kha tu chungah emaw a hrîkthlâk tal loh chuan nilêngin a mood a chhia ang a, exam hall-ah chhe deuha a chhân a hlauhawm zawk.
"I nghapih khâi lai kha i zawng anih chuan i kut veilamah a awm tih ka lo sawi ve mai mai aw" u Toma bawk chuan a'n ti leh zauh a, a kut veilam a han en chuan a lo khâi fel thên sia, nghapih bâwmin tu lû emaw a dêng dawt ri kha a hre ve si ang a, ama khâi lâi zawk emaw a ti anih ka ring.
"Nghapih ka zawng lo hrim hrim.." Ka chhan beisei fêa min rawn melh lai chuan u Arona nghapih khâi lai chu a va hmu fuh nge mawni, tifuh intih hmêl zetin, "Sawmzeli nghapih thlâwk zawk kha asin ka zawn!" A ti ve zaih a, huat chi pawh a ni lo a khawngaihthlak letling zawk.
U Toma a star ve theihzia ka hrechiang a, vanneihthlak taka a û ţhianpa a lo ni kher kher te kha nuam a ti ţhin. Nghapih kan khâi nî berkhera kan intawng hlawl kha a zak ve deuha min tlânpui ta chiam mai tih a hriat reng a, chuta kârah hmâi paw phuk khawpin vaivutah ka delh bet leh bawk si, a thawh hlimah sam khuih peih lovin mualah kan chhukthla leh nghâl mai bawk nen, atan chuan zahthlak ve duh tak tur a ni.
Ka tan tak pawh a nuam lo. U Arona ka hnungah dingin a ngâwi ngul reng a, ka thil khâi lah kha a han thlâwk thui âwm mai mai khawp ah! Hnunglam zâwng khera a thlâwk te kha tu emaw tihluih ni mai âwma mawi a ni. A nat thu takngial pawh a sawi duh si lo, a hmaa kan boruak, palai tirh tur thu vel nen rilru na deuhin ka inthiamlo.
"Nghapih khâi tâk vang maia tlangval han hmuh ngam loh.." Nui deuh pût pût chunga u Toma'n atih leh lai chuan U Arona kan lam panin a rawn kal chhut chhut tih a pên thâwmah ka hre thei! Ka la hnungchhawn tlat avangin a hmêl awmdan erawh ka hre thei mai lo thung.
"Châmi hi phur chho la chawhmeh hi han thlenpui thuai rawh u. An zîng chawhmeh tur anih phei chuan an tlâi lutuk ang. Vawiin an exam nî a ni lehnghala tlâi chi an ni miah lo. Au Sawmzeli nen zawimuangin kan rawn chho dawn nia" ka dâra rawn vuan thak chung chuan a ti ta mai a. A ţawng zâwnga ka taksa che dar dar ţhin chu engtin emaw takin nuam ka ti riau a, inhnaih leh ta lua angah ka inngai bawk!
"Lo kal rawh u Kâwlte, i lâwn thei ang em? I bânruh i bawh tliak lo kha lawmthu sawi mawlh mawlhna tham a ni aw. Nang aia a lêt dâwna ritin a delh tawp mai che ania.." Tih angreng u Toma'n nui huk huk chunga a sawi hnu chuan inkhalh chhuakin min tlân chhohsan a, kei leh u Arona chauh kan bâng ta! Kan pahnih chauhin, zingkarah! Mi nazawng thawh hmâin kawngpuiah kan ding dûn a, sawi mai tur ka han hriat loh em em dân lah chu a..
"I khûp kha a pilh em? School-a i chhoh hmâin haw la, tuilumin dep lawk rawh. I enkawl loh chuan a pûn ang a kal a harsat phah thei aw" ka hnunglam aţanga a ti bul bul thâwm chu harh chhuahpuiin, "kal ang" tih leh kalsan ka rual a. Ka hnungah min rawn zui ve tho tih erawh ka hria.
"Eng nge zingkar karah in tih reng reng a?" Ngawih reng âiah tiin ka han zawt leh hrâm a. Bazâr tura an chhuah thu min hrilhin an in bazar zawh vek tawh thu a sawi zawm leh a. Ka sîr lawkah rawn kalin min si deuh chêt bawk.
"Kan inhmu khât hle mai tiraw?"
"Nia!" Ka ti ringawt a, ngaihtuahna a vahkual hnem poh leh nupui min neihsan dawn tih hlîrin rilru a luah a, ngaihtuah thui viau e ti lovin ngaihtuahna tak tak erawh a titawi tup lawi si. Sawitur hriat loh luatah dang a ro huam huam thei alawm le.
"Ihmaw u Aron.." Sawi chhuaktua ţang hreh si, sawi loh tawp dawna thawpik bawk si ang hian ka awm tlat a. Ka theiha hun ţha ka neih lai hian zawh chiana engkim hriat fiah law law ka duh!
"Yesi.. Helhkam lian tak nei hmêl i pu ania, eng nge ni ta?" Zângkhâi vaha a tih tâkah chuan in tihuaisenin thâwk ka la vak a, thaw chhuak leh ham hamin, "u Muani nen inneih tak tak in tum tawh tih hi thudik a ni em? Palai in tir dawn tak tak emni?" Ka ti ta phawng a. Ka sawi zo chu ka eng emawti thawven phah deuhin ka hria.
"Ngati nge chutiang min zawh?" A tih chuan, "ka hre duh a, ka zawt che!" Ka lo ti mai a. Hre duh lo ila ka zâwt tawp lovang.
"Aa.. Kan la.. Ni e, kan la innei ve ang chu Pathianin rem a tih phawt chuan, palâi tirh te pawh rilru chuan a tinzâwn ve ţan tawh chu ania..!"
Ka ding chawt a, hmalama sumo rawn tlân chu ngawi renga melhin mit ka khap fak fak a; ka mitin hmu mah se ka suangtuahna chuan eng dang a hmu lo! A ruak vek a, nun hian awmzia a nei ta lo hialin ka hria! Engkim chu an ngâwi ţhuap a, pangpar leh hnim hnah dâwng hluahte chuan nunna leh takna rêng an nei tawh lo. An chul a, an chuai a, an ro rup a, an vuai zo ta ni ber hian ka hria!
"Sawmzel!" Min rawn thing nawkin kawngthlangah min pawt thla lawp a, motor horn ri tuar thâwm leh chû motor-in chak zeta min tlânpel thâwm chuan suangtuahna ram ata min kaiharhin ka thih teuhzia chu ka hre ve chauh a ni. Ka vâi ruai ti ila chu chuan ka awmdan a sawifiah chiang berin ka ring e.
"Eng nge i hriat a? I thi ţep anih kha. I hmu ve reng emaw tia!" Tih paha min rawn sâwi nawkin ka hmâi bul chêtah a rawn thaw lum ham ham a, ka dâr a vawnna kut khûr deuh dar dar chuan ka ţah a tichhuak tlat bawk si.
"Ka hmu ve reng alawm.." Hnuk ulh ţeuh chuan ka ti sep a, a kut chu thin thlâksakin ka kalsan zui bawk.
Midang kâ aţanga hriat leh ama kâ ngêi aţanga hriat chu a dân a indan hleih lutuk tlat!
Ka nun hi ka chîk ţhin. Ka duh apiang nei theiin ka inngâi ţhin a, ka tih châk zâwng apiang tithei leh ka tum tawh tihlawhtling ngei ngei ţhin hmeichhia niin ka inhria! Mahse ka hmangaih ber midang tâna a vullâi thlîrtu mai chauh ka ni tawh dawn a, tih theih nei lova thlîr liamtu nih hrehawm turzia chu ka ngaihtuah thleng pha lo pawh a ni lo, a ngamin ka ngam lo zawk.
Vawitam tak ka theihnghilh tur thu leh a tawpna tak tak anih thu ka hrilh tawh a, tun thlenga ami tawhna leh a thusawiin keimaha awmze thûk tak a la neihfo chhan erawh ka hmangaih êm vang a ni tih ka chiang lawi si. U Arona hi chu aw!
"Min lo nghak rawh" ka lam pana a rawn tlân thâwm ka hria a, nghâk lêm lovin kal mawp mawp mah ila min rawn umpha har chuang lo.
"Chuan, u Muani chu a râi tak tak tihna a ni maw?" Zâwitê, fiah fak siin ka ti sep a, "aw" tia min chhânna chuan thinlung hi a dêng nâ asin! Beisei a bo takzet tawh. Awmzia a awm tawh lo!
"Ihmaw u Aron, nikhat lek pawh nangmah hi nih chhin ka châk! Eng nge i ngaihtuah ve ţhin a, eng thilin nge hlâua siam ţhin che? Engthil nge nangmahah hian tla na ber ţhin a, nikhat chhunga i rilru luah hnem ber thil hi eng nge anih tehreng ka hre châk ţhin. Reilote chhung tal i ngaihtuahnaah hian ka châm ve ţhin em tih te ka hre châk a, nikhat lek tal chu theih ni se, nangmah nih hi ka hnial hauh lo ang mawle" ka sîra muangchanga a rawn kal ve tâkah chuan ka lo ti sep sep a, "Châk lo zawk teh" tih chauhin min chhâng!
Ka nui lui hap a, ani erawh a ngawi ngul thung. Kan kâr boruakah chuan eng emaw ka sawifiah thiam si loh hi a lêng chem chem a, nî êm pawh chhûmin a hliah vanga a chhuah theih loh laiin kan kâr boruak erawh a ipik a, a lum hluah hluah a ni.
"Ka rawn chho ve tawh lo mai ang. Vawiinah ţha deuhin chhâng la, short period memory full neih loh hrâm hrâm tumin exam hall-ah theihtawp i chhuah dawn nia" school pêng kan thlen chhoh chuan ka dâra min rawn beng det det chungin a ti a, thâwk a la deuh ham ham bawk.
"Ka kal ang e.. Ţha deuhin" tih zawm leh zata a inher lai chuan sawitur leh zawh châk tam tak ka la nei asin mawle! Mahse ka ngâwi reng a, âu zeuh ila chuan a ding ang a, a rawn inher ngei ang tih ka ring. Mahse eng ber nge ka sawi tawh chuan ang? Ka theihtawp ka chhuah ve ţhin chung pawhin a engmah ka hlawhchhuak zo ve tak tak chuang lo a, awmzia a awm chuang lo êm a ni. A kal liam tur bâk thlîr theih ka nei miau si lo.
"E.. Au Sawmzel!"
A rawn inher thut a, ka lo la en zui reng tih a hriat vang nge mawni, a nui lui deuh hap mai.
"Exam zawhah chaw rawn ei la" deuh nghâl thâwr chuan a!
"Kan la zo har dawn em mai" lu hiat nuap nuap chunga ka lo tih chuan a nui leh hak a, "ni e tiraw?" A ti sup a, eng emaw sawi duh chu a nei mawle!!
"Ka lo nghak ang che. No no, ka sawi awmzia chu, kan chhungkuain kan lo nghâk ang che, in exam zawh hun. Châmi pawh exam zawh te chuan an khaw lamah a haw phei duh ve ang a, inkawmna hun in nei mai mai tawh dawn lo ania" bah neuh naka a tih leh lâi chuan chiang fahranin ka lo melh rân a, eng emaw sawi duh nei, sawi chhuak ngam chiah si lova riat kual vel mai mai a ang ka ti.
A khuh deuh kharh kharh a, a lu tuai puat chunga nui sêih chung chuan min rawn melh ve ralh a, a lâi ve reuhin ka hria! Mipa an lâi ve ngâi emni?
"Sawmi!"
Min rawn âutu avang chuan hawi chhuak vatin, piah deuh hleka Op-a lo ding vûng chu ka va hmu chawpchilh a, keimah ka ni tih a chian tâk vâng a ni maithei, min rawn panin a rawn nui phei vur vur a, tukin boruak atan chuan hmuh ka hreh ber te zîng ami ania sin mawle. Boruak buai sa a rawn chawh buai belh ang tih te ka hlau!
"Eng nge helamah te i rawn tih a? Zingkâr kârah lehnghal" tiin keimah zawkin ka lo be hmasa sawt sawt a, ka biak paha U Arona hmêl ka va en chuan hnuailam bihin a lo kun deuh lup a, a chal tichuarin thâwk a la hap bawk! Nuam a ti chiah lo anih ka ring.
"Ration la turin ka rawn kal a, saw an la inhawng si lova ka nghâk rih anih hi. Nangni zawk eng nge in tih a? Camp lai laiin?" Kan pahniha min melhtawn zak zak pah chuan a ti sup a, ka duhzia leh veizia hrechiangtu a ni bawka ngaihţha taka awm chu har deuh tur a ni. Ka hrethiam lutuk. Mahse a hmêlah huatna emaw, thîkna emaw engmah a langchhuak lo va, ţhian inbe satliah ang maia a namnûl thiam tlat chu fakawm ka ti. Ka ngâisang bawk! Ka tih theih ve reng reng loh tur a ni.
Sir Isaac-an muala min tirh dan vel ka sawi lai chuan piah deuh aţangin a pa'n a rawn âu lauh a. Retailer an inhawng anih hmel e.
"Ka lo phei.. Ka kalsan phawt ang cheu, vawiinah kan inhmu dawn nia" tih leh min kalsan a rual a, a kal tâ chu vawikhat pawh a rawn hawilêt lo. Pangngai tak anga lan tum mah se a harsat dan tur ka hria! A bialnu leh a bialnuin a hmangaih mipa kan ding dun ania, tuin nge thlamuang leh ngaihţha takin kalsan thei bik ang ni?
"A hre vek âwm si a, a va puitling ve Op-a chu!" Ka ngaihtuahna hre thei ni âwm hrima U Arona'n a rawn tih tâk khauhah chuan nui lui hapin ka inpetruh fuat a, "Ani chuan min ngaihtuah ţhin. Mi puitling tak ania, a hlim nan midang a tina ve ngai lo. Duh leh mamawh a nei hrang thlap ve lo bawk a" ka ti nghat a. A rilru tihnatsak ve hrim hrim ka bâin ka hria! Ka tina phâ em tih erawh ka hre bik lo le.
"A lawmawm nasat chu. Chutiang mi ngei chu i phû alawm, ka hrilh tawh che kha, chelh tlat la, thlah ngâi suh. I tan a ţha ber tih hriain fing ru khiau la, i hlata a awm phal ngâi suh! Hmangaihtu hi an hlu ania.."
"Chutiang thu te min hrilha min fuih ve tur chuan tu chiah nge maw i nih le? I tih theih loh thil ti tura min nawrluihna angah ngaiin, 'ka lawm e' ka ti zawk mai ang!" Pâwr angreng fê chuan ka ti ta thlâwt a. Ka sawi dik chiah bawk.
Hmangaihtute hlutzia a sawi a, amah hmangaihtu erawh min hlut leh chuang si lo. Min zilha ka hmakhua ngâi tak anga a lan hian amah leh amah a inpuang mualpho mai mai tih a hre lo zawk em mawni?
"Ka ngaihlu che alawm, lunghlu ang maiin. Mahse thil hlû nazawng kan neih phâk an ni vek si lo va.." A rawn tih leh chuan bân vai thuak pahin, "sawi lo zawk teh!" Ka lo tih khalh hmiah a. A kâ aţanga hnâwlna thu thlum tak tak dawn reng hi ka kham tawh, tlâwm pawh a tlâwm thlâk zozai tawh alawm mawle!
"I ban phâk te chu sawi loh, lei si lek lek khawpa hniama awm i ban duh lo va, a ai sânga mi banin i kal zawk anih kha. Thil hlu hi engvanga hlu nge tih pawh i hriatthiam ka ring tak tak lo. A vân êm vanga hlû ni a ngâi ho zingah i tel hial ka ring! A hmutu mit leh thinlung a zira hlû a ni zawk. Vawk tân tuikeplung a hlu lo, hnim hnah mai mai pawh a hlu zawk daih." Tih zawm lehin ka kalsan nal nal a, kan school pênga ka liam chhoh dawn chuan a rawn âu leh hrâm!
"Pahnih an hlim chuan a dang an nat a ngai. I hlim nan midang an nâ ang. An hlim nân i nâ ang. Chutiang chiahin keipawh.."
A thusawi chu bengkhawn duh lo luiin ka chhohsan a, ka rilru ti chîrî nuaih nuaih tur thil ka tawng leha exam hmachhawn pawh ka huphurh leh vek tawh! Ngati nge tukin zing angah te U Arona ka hmuh reng reng le??
"Rawn kal vat teh in vahan rei em em!" Corridor-a ka kal mêk laiin Châmi'n min rawn âu lauh lauh a, Dorm kawngkhar aţangin bân min rawn vai khum lauh lauh bawk.
"Eng nge a? I hmêl hêrh hûrh chu leh!" Dorm chhung ka luh ruala ka tih chuan a hapui zawng zawng lang vek khawp hian a nui ţhâw a, a mit te chu a meng tawh pawhin ka hre lo. A chhîng tlat a, "tiang khan min melh hâw kher lo la" te chu a la ti tak deuh deuh a, ka en leh en loh pawh a hmu tak tak tawp em mawni?
"Nichina kan inphurh chhoh khan eng emaw a thleng a..." Phûr lutuk tak maia a tih tâk chûlah chuan zuang tawr tawr chungin ka ţhiannu chu ka lâmpui hawh hawh a, a hlim êm êm danah henu hian ngaihzawng a nei ve ta anih dawn hi.. Ani chuan a duh leh star ruk em em, u Arona ka star laia a lo star ve tawh u Toma kha a chang bik a. Kan nun nen chuan in ang lo tak a ni.
"Chuan chiang deuhin min hrilh vat teh. Engtin vel nge a bêm che? Zei deuhin nge, zei vak lovin? A ti ve deuh tawp tihna nge awi ka hre châk e ka phûrthak vek tawh ania" tih chûl paha a kut ka sihsak nawk nawk lai chuan ka kut a vawnna chu thingthla nawkin a ding ngil awt a. Mûk hmêl fêin hmalam a melh ngar bawk.
"Eng nge?? A kawp che i hlauthawng deuh tihna mi??" A ngaihna hre lo fê chuan ka ti leh hrâm a. "Min bem tih ka sawi loh kha!" A ti ram deuh hmak anih chu!
"Eng nge chu chu a awmzia? Good news i nei a ni lomni??" Ka lâm lâi chawl ve chawt paha ka tih chuan, "ti ee" a ti lawi bawk si. Henu hi ka hrethiam lo. Inbêm sîsê awm lovin an inngaizawng ve tawp tihna zawk nge mawni??
"Ka good news chu i rin loh dam deuh aniang.."
"Anih chuan han sawi vat ta che mawle.. Hre châk em emin kan awma induh hun pawh anih loh hi!" Ka ti hmak tawh a, hetianga awm hi a chîng ve hrim hrim..
"U Toma'n ka birhtday min zâwt a!!"
"Engmaw??"
Amah aia ring mah chuan ka ti hluai a, mak ka ti nge ka ti lo lutuk zawk pawh ka hre tawh lo e a.. Chutiang mai mai han ngaih ropui viau chu le! Anni emaw lo tih ve hman tawh laia birthday mai mai lo la inzawh, a ho tawh lulai ê!!
"A zawt ve tawp che tihna mi? Chutiang te anih chuan i birthday-ah present pek ve che a tum te pawh a ni thei a" ka rilru dik tak thup tum tak chung chuan ka'n ti leh ta zawk a. A birthday a lo zawt tak taka a lo chhinchhiahsak khiau anih chuan a duh lêt ve deuh tihnaah ka ngai ang.
Min chhân lawk loh vang chuan zawt nawn lehin, "a zawt ve tawp che emni ka tih chu??" Ka ti leh chûl a.
"Awi a teuh lo mai!!" Nui huah huah chungin a rawn tia nih chu!
"A birthday ka zawt a, min hrilh a. Ka birthday min zawt ve a ka hrilh ve.." A tih leh pawh chuan ka chhâng peih tawh lo. A tak ram kan la hlat dûn em mai keini chu kan chawrchhuak ve tak tak chuang lovang.
"Min duh ve deuh anih ka ring ta tlat. Chu ni lo se min zâwt lêt miah lovang" te a ti vel a, a awihawm loh êm mai a.. Ka awih thertê lo.
"Insiam ula chaw ei an peih tawh ania. Ei kham veleh Mualah kan chhuk anga exam turin kan chhuak ang" corridor aţanga sir Isaac-an a rawn tih hnu reiloteah roommate te an lo lût khawm ţak ţak a, Châmi nen pawh a fâla han inbiakna hun a awm leh ta lo.
Khaw ţhenawm kan va thlenphei chuan a lo lum hiam hiam khawp mai a, kan khua ngaihtuah chuan tuilumna bêl chhûnga liluh ang ngar ngar kan ni. Exam hall te hlei hlei chu a lum. Fan takngial pawh a awm si lo, thiamsa kan thlanah a chhuak zo dawn hialin ka hria.
"A luma lumzia hi tihngaihna pawh a awm lo. Exam leh hunah chuan fridge inchhawp a ngâi ang" hall chhunga rawn luh pahin Fabiana'n a rawn ti deuh lâwng lâwng a, khaw dang dang aţanga kalkhâwm kan ni bawk si a tlêmin ka lo îp deuh. Amah ber lah chu a han zah loh hmêl êm êm khawp a. Zak ve thei hmêl pawh a pu lo rêng rêng.
"Ngawi tawh ru le. Question paper kan sem dawna khawngaihin inbiak loh te, inzawh loh te in tum hrâm hrâm dawn nia!" Zirtirtu duty pakhatin a rawn tih chuan hawi chhuakin paper an sem lai chu ka melh thuak a. Question paper te chu a chhunga thu inziak a tam hmêl riauin ka hre tlat pek! Ka huphurh lutuk vang pawh a ni mahna le.
Paper an rawn sem zawh chuan kan hming te kan fill up a, kan roll number leh registration card nen lam. Kan fill up lai mek mek chuan zirtirtu duty ten an rawn check zel a.
"I admit card ka lo en lawk" ka hmâi bul sêt aţanga rawn titu vang chuan phu nghekin ka ţhutna pawh a tîng euh a. Khaw ţhenawmte ţhenawm lehchhawng, chumi te zirtirtupa chu a lo ni a. Patling anih ka ring. Nupui a la neih loh vêk pawhin vâl senior chu a ni tawh hrim hrim.
"Lawk aw" ka thin zâwn dawm vang vang paha tiin ka kut lehlamin dawhkan hnuai ka zen rak rak a, admit card chu ka pe vat bawk.
Card hmalama ka passport thlalak a melh vang vang hnu a, "i ni meuh maw?" A rawn ti mai chu hnâr hmuh len a awl duh asin aw!
"I û aiin i rawn exam te a ni lo maw in va inang lo ve!" A ti lehzel a, mahni lo maha zah tawh sa nâk alaiin min rawn ti nervous vek alawm mawle.
"Keimah ka nih ve ngei kha" ţi deuh taka ka tih leh hnu chuan nui sukin, "i ţhang ţha hlê mai â, a lawmawm lutuk" a ti leh kher a. Ka mi ngamtlâk deuh chu ni se a lû a ri fawk ang.
A kalsawn hnu chuan inngaihtuah lêtin keimahin ka zak ngar ngar a. Hmangaihropuia pa ka huatna a thar leh viau bawk.
Ani hi kan khuaah chuan hetiang passport te siam ţhin hi a ni a, nikum, Class 12 kan nih tirh khân zirtirtuten kan hriat lohvin an lo kova, uniform nena kan lanna passport an duh avangin kan infiam balh lai tak khân min rawn ko thut a, a maltê tein office kawtah min dintir pheuh pheuh a, kan hnâr nena indâi thuak khawpa a camera hnunga min han tin mai kha chu e, lang ţha viau ila a awihawm loh zawk ang.
Kei lah ka sam a thur bem bum a, ţâwn ve tho siin ka bek veilama mi phei chu an rawn uai thla suau suau a, hnawihsen tal pawh tuman kan pâi si lo. Kan hil bêm hlawm a, lan ţhat ngaihna kha a awm hlawl hleinem. Ka û emaw te min lo ti mai mai lehnghal a, û ka nei awzawng lo ve!
("Story hi a kalmuang e, a boring tawh" ti ho tan note ka'n siam ang e. He thawnthu hi inngaihzawnna thawnthu kan tih ang zinga mi kha a ni ve lo ania. Hmeichhe pakhatin duh deuh mai a nei a, chu a mipa duh hmasak ber chu a neih theih nan theihtawp a chhuah ve. Chu a theihtawp chu a lo tâwk meuh em? Engtin nge ni zel dawn? Tih te kha kan ziah chhan zawk chu a ni a. A tak rama an luh hma hian mi ţhenkhat chuan zum leh hriam an pal nasa ţhin hlê ania aw. Chuanin, chapter thui a awm tawh lova, 2/3 vel lek a awm tawh tih kha hre ta ila, engkim a nihdan tur dik tak a rawn lang chhuak ţep tawh e!)
End of chapter - 30