Politician nupui

[Cck Lalchhuanawmi]

(Thinchhia tih hi khawngaihtakin Hmar ṭawngin min lo hrilh teh u)
Politician Nupui Hring Nun
Political Love Story_Fiction
Chapter-12
Ziaktu: Cck Lalchhuanawmi




Tunah zawng, kum sawm an tlin rual rual hian ngaihzâwng neih tawh turah an ngai ka ti mai.


Ka fapa te pahnihah, Siamtea ka ngaihtuah lo. Freddy-a hi, ka vengthawng ta deuh ta..


Sammy-a ka hrilh a, "Ṭha ve", a ti ringawt.


"Bialnu neih a duh tawh tihnaah ka ngai, duh pawh nise, ka phal dawn hauh lo. Bialnu neih nan khua a tlai lo bakah, nei rual lah a la ni hek lo",


"Mipa a nia, mipa tan chuan a pawi chuang lo a",


"I thu lak dan chu", ka lu kân deuhin, "Chutiangin an ti ngai lo, mipa nih avanga bialnu neih ṭeuh thu leh, neih hma a pawina a awm ve tho",


"Han sawi ta poh che", mi cho khawp mai.


Diau bik tum hek lo i, Lal Fanu a muhil tawh a, ṭawng reng a hre tawhin a rinawm loh.


"Ka han sawi ang aw",


"Go on", Sap Ṭawng lah hi hmang thlazen zel mai a.


Khiangawia Film-a an sawi angin, Mizo leh Mizo inbiaknaah Sap ṭawng hman emaw rawlh thlak emaw zen a ṭul lo nasa a ni.


Ni leh si, Zokhaw Thunder zawk.


"Chhuanpui?",


"Nupui atan Bialpa ngah lo tak, inchhungkhur vawngfela Nu leh Pa tihlungawi thiam tak, chutiangin pasal tihlungawi dan pawh thiam, engkawng pawha zei tâwk tak in duh. Nangmahni lam reng in invawng leh si lo", a nuihza hmel chuan min tiṭang ṭun.


Tlawh zawt ka han nâp a.


Sammy chuan, "Min han hrilh zel ta che, i ngawih reng zawngin a dik thei na'ng, khaw var huna min hrilh i tum leh, ka nghak thei che a", a ti sup a.


"Chhe zet zawt e a", ka melh kal.


Puipuii ṭawngkam tih a hria, a ngai thei lo hle bawk a nih kha maw...


Rin ang ngeiin, "Khatiang ṭawngkam kha ka ngaina lo a nia, a Lalpuipuii thlak em mai", a ti deuh hmuk.


Duh lo ve tak chu a nih hi maw, tun dinhmunah erawh, runluih mi a ni lo thung.


A thin hi a awrh chhuak tlat zel a, a ruk thei ang bera awrh ṭhin tur a nia.


"Mipa i nia, keia sawi ngai loa i hriat sa a nih bakah, i lo paltlang tawh",


"Chhuanpui, i mi han tihdan chu, mi cho hle mai maw?", a inti haw(hua) lui tih ka hriat chuan ka thaw huai thei.


Thinrimna atan chuan a ho lulai reng bawk a, Nupa han infiam emaw han inchhaih emaw hun te a awm ve tur a ni dawn lo'm ni?


Sammy chu cho taka en karin, "Cho chiangbal mai, hlau lo tak che ka ni bawk asin. Thudik tak ka sawi a, i huat chuan i dik lo tihna a ni mai", ka hnâr a piai zauh.


"Hmar lunglien, hna min thawhpui tura ka duh che avangin muthilh zai rel ta ila tiraw?", a lukham a siam rem.


"I chhe zet zawt lutuk, ka sawi tur ang pawh min sawi zawhtir ta phawt ta la", nui chhuak lo tura a hmui a pet ka hmu chu, engtin emaw tak hian ka awm.


Sawi thiam a har, lungawi loa han inlantira, min thlêm theih tura han intihtauh kual ka châk riau pek.


Chu'ng em zawng, a thleng lul dawn si lo.


"Chhuanpui Darling, mu ang le, hun a la tam alawm, taksa leh rilru chawlh hahdamtir tawh ang", mi rawn fawp a.


Lukhamah ka lu nghah tirin, Lal Fanu nen chuan min kuah. Ka muthilh lai pawh ka hre lo e a.


Sammy-a Office-ah awmin a Lehkhabu bakah, File ṭhenkhat rem felin ka dah ṭhatsak.


Ka phone a lo ri a, Lehkhabu tam tham tak ka pawm lai a nih avangin Sammy bulah min chhân sak turin ka han ti a.


Sammy-a chu buai tak a ni, ka inthlahrung.
Mahsela, phone ri chu a tawp thuai.


Kan chhungte tu emaw ber an nih ring tawp ang, ka nu leh pa, Hnahthiala mi an nih a rinawm.


Lal Fanuin School a kai ṭan tawh si a, an tunu chu an ngaihsakin ngaihtuah an pe na ve em!


Nu tel loa an chawi len(lian) ni tlat hek le!


Phone ri leh chu, "Chhuanpui, i phone a ri leh ta",


"Sam, khawngaihin", ka nuih seih.


Kiai sakin a dawhkan kila ka phone a ban a, "Taiṭita", a tih chuan, ka thinphu a inthum rawn tluk tluk nghal!


Sammy chuan phone a han hmer vak a, inbengdai tumin a han thâw hawk.


Zahthlak lutukin Taiṭita chu ka ngai thar riau lehnghal a.


Phone ka chuh, a ri tawp thei bawk si lo, "Sam, ka han chhâng lawk ang e aw", tiin, Office aṭanga chhuah tumin ka inher a.


"Lalchhuanpui?", a vin nghal ṭhawt.


Ka phu nasa lutuk leh hlau lutuk chuan Zun mi chehtir ṭhelh a ni.


Inher let lehin, "Khawia kal nge i tum? Hetah hian be rawh",


"Sam, a rei dawn hleinem, ka tibuai palh ang che, ka rei lo ang", ka tlan chhuak.


Min umzui lo chu vannei ka inti kher asin.


Chokaah Taiṭita chu ka be ta a, "Chhuanpui, ka tibuai che em?",


"Buai mai thei, Sammy-a nen hna kan thawk a",


"Khaih khaih! A va han chi loh tak, Pawi lutuk, pawi lutuk. Ṭanpui theihna che u ka neih chuan min lo hrilh hreh suh aw", ka nui ver ver.


Taiṭita tak hi chu aw...


"Hrilh chiangsa, a thuhrimah, i tlawngawl rei tawh, Thlêng sil chhawktu tur che zawng rawh",


"Ka hmu daih tawh aw, khatin mi lo ti vel suh. Inpuan chiah a ngai tawh",


"Chuti, inpuang vat vat rawh", thu lo ve tak ka ni bawk si.


Sangsangi chu a la hrilh lo a ni ngei ang le. Hmuhpui a châkawm.


Taiṭitan, "Chiah maw? Min la hmuhpui ve ang chu, a ni em?", a lo ti chu, ka ṭim uai uai.


Hmuhpui duh hle mah ila, ka huphurh tlat.
Ka rilru puthmang ka thlak tawhah ka ngai a, Taiṭita leh Sangsangi te inngaizawng tura ka han ngaihruat chhin a, min vit zawk thei nia!


"Hmuhpui tehlul e, Taiṭit, naupang School bâng lam a hun hnai, nidangah inbe leh ang hmiang?",


"Lutuk, lutuk, Lal Fanu min lo biak teh aw, a ngaihawm lutuk ringawt",


"Ka lo biak ang che".


Chair pawtchhuakin ka ṭhu a, Taiṭita laka ka rilru puthmang danglam lo chuan min hnawh tawt up up.


A ṭha lo tih hre reng chunga, rilru danglam pu hlek loa, thikna te ka han nei chu.


Ka bul lawkah ka pasal a awm a, chuti chunga mipa dang ka han ngaihmelh mai chu a ni si amaw!


Ṭi dâkin Office kawngkhar hawngin ka lut a, "Sam, chawl lawk ta che, Lal Fanu hruai a ngaih bakah, chhun thil ei a hun tawh a", a sira dingin a kokiah ka vuan a.


A ṭang ṭung mai.


Inhmuhchhuah ka ngai, chumi atan min han ânkhum hrep se ka va ti em!


A nih loh pawhin, min vua se emaw, kut min thlak emaw se a ṭha ang.


Dam thlup tê hian, "Duhsaka hrilh la va hruai mai ta che u. Hna a laklawh em mai", a ti a.


Han sawi nawi tum loin, Duhsaka nen Lal Fanu kan hruai.


Dawrah pawh kan chawl lo.


Sammy-a chauh a awm si a. Lal Fanu nen Noodles aiah Chow kan kang. Soup tui tâwk kan siam bawk.


Taiṭita nen inbe chhunzawm ta lem lo mah ila, Sammy-a mizia a inthlak leh ta deuh.


Mawlhtu nei ang mai hian a awm a, sawi thiam a har.


Sammy-a muthilh hlanin ka inngaihtuah rauh rauh, ka buaina bul ber chu Taiṭita a ni ta.


High School hun lai mai maia kir thei ka ni tawh lo, Hun a kohkir theih tlat lo alawm.


Sangsangi a duh a, keiin pasal leh fa ka nei tawh bawk. Inbia pawh ni ila, High School rilru pu thei ka ni tawh lo.


Vawikhat na na na chu, ka pasal hian mi chhuahchhalin kut hial min thlak teh se.


Chumi aṭangin Kar a liam a, phur taka Lal Fanu School kal hmuh chu a nuam ngei mai.


A tir aṭang rengin School kal tura innawrhlui a ngai lo.


School kalkawngah, "Sam, exam a hnai tawh si a, Lal Fanu hi pakhatna ni hlauh se tiraw?",


"Pakhatna a ni dawn alawm", hma lam aṭangin a lo ti a. "Aih, Pakhatna chu ka duh lo", Lal Fanuin a lo ti.


Freddy-an, "Pakhatna a ṭha ber asin, ngati nge i duh lo a?", tiin a lo zawt.


Lal Fanuin, "Pakhatna chuan lâwmman pakhat chauh a dawng thei a, ka duh lo alawm", a ti mai a nih kha.


Freddy-a chu uar takin a nui a, Siamtea pawh nui chhuak inthlahrungin a nui kur kur.


Bei a dawng duh a nia.


Sammy-a chuan khi sûngin, "Princess sawi chu a dik chiah alawm, Pakhatna chuan Lâwmman pakhat chauh a dawng thei a, duh miah loh tur", a ti a.


Lal Fanu a lawm a nia.


Pakhatnain Lâwmman pakhat aia tam a dawng zawk ṭhin a ni ngai a. Ka fanu ngaihtuahna tak hi chu aw...


Dawr kawt kan thlenin, "Sam, vawiin chu Dawrah ka lo awm ang e, Lal Fanu hruai a ngai tho a, Dawr aṭangin ka hruai mai ang", ka chhuk a.


A lo chhuk ve, Dawr chhungah kan inzui lut a, Hriati leh Nancy te nen an inchibai.


Han biak chhunzawm dan an hre bik lo, an inchibai zawhin, "Lehkhabu rem fel tur a awm a, kan va remfel lawk ang e", an kalkiang daih.


"College ka va tlawh lawk ang e, ka awm rei ka ring lo, Lal Fanu bân hmain ka lo thleng hman ang".


Sammy chu a chhuak leh thuai.


A chhuah hnu rei vak loah, Taiṭita a lo lut hlawl mai a nih kha.


Hriatin, "Khaiiiii, Lal Taiṭita pui roh chu! Eng nge i lo tih dawn? Mi hi ngai thei viau suh", a lo ti nghal duah.


Taiṭitan min lo melh zawk a, "Min hria elo? Chhuanpuii hmu turin ka lo.kal a, ka hriat ngai mi i niin ka hre lo tlat, min hrethiam rawh", a ti a.


Hriati a ṭhu tlum hmak.


Nancy a nui rah rah.


Taiṭita chu, "Hlawl che chuan, eng Lehkhabu ber nge i duh ve teh khiah?", nui varin ka ti a.


Khi sukin, "Lehkhabu Cial tak, hnawl nih loha inpuan dan ṭha tak chuanna", lo hnai hlekin, "I hriat kha", a ti sup.


"Kan ngah lutuk", mitko san keuhin ka ti a.


Taiṭita pawna inbiak.lawk a rawt chuan kan chhuak a.


"Chhuanpui, in pain a hau em lo ang che chu tiraw?", Coffee No chawiin, "Ringawt chuan, min hauh chhan tur a awm lo", ka ti a.


Vawihnih inin Coffee no chu ka dah thla a.


Mi en chet chetin a nui sâng bawk si a, ngaih a tiṭha lo nghal ringawt.


Nuam ka ti lo, "Sangsangi chu", titipui tur ka hriat chhun.


"Chhuanpui, Sangsangi hi rin ang a lo ni lo", a ṭhut dan a siam rem a, a rukin Beng ka chhi hnai sauh bawk.


Âtthlak zawk hian, Taiṭitan, "Ka duh tak takin i ring em?", tih min zawt chu, chhân dan tur bangbo tak ka ni.


"Chutiang min zawh, a hrechiang bertu i ni alawm. I duhthlanna leh thutlukna ka lo ruatsak thei lo che a, thurawn erawh ka pe thei thung che. Zawm dawn lem lo mah la", ka nui a.


Taiṭita pawh a nui ve mai.


"Biak a nuamin a ṭawng a dam thlap mai a, a felin lawm zâwng lah sawi a thiam narawh. Zûn a ngah phian a, vei zui vawng vawng thamin a duhawm zêk. Chumi avangin keipawh hian ka vei zui a ni ang", Taiṭita chu a kun deuh a, a lo hawi chhuak zauh ṭhin.


Sangsangi chu duhawmna tinrengin an bawm a nih ring ang.


Taiṭita hian a sawi thiam riau, vei zui vawng vawng thama duhawm chu a ni ngei ang.


Taiṭitan, "Ti daih ila", a ti hluai a, min tiphu lek lek.


"Min tiphu dawn alawm", ka ti vah.


Sangsangi chungchang kan sawi dawn emaw tih laia, thudang sawi a tum chu ka hre thiam lo lek lek.


Taiṭita chuan, "Sangsangi chu nangpawhin i hria?", a ti leh daih.


Vawiina a awmdan hi mak e, ka chik deuh a, Sammy-a ang chiahin mawlhtu eng emaw tak a nei.


"Taiṭit, ti daih ila ti siin, Sangsangi ka hriat thu i sawi daih. Tu Sangsangi nge i sawi a?", Synod School-ah hian High School chauh ka kal si a.


Sangsangi an awm reng ka hre pek lo, Class danga mi a sawina pawh a ni thei.


"I hre lutuk, in inbe fo alawm", Taiṭita chu a nui sâwng a. Awm a tinuam lo.


Sangsangi tih hmingpu hmelhriat ka nei, Thenzawla mi daih a ni a. Kan inbe ngai lo tluk a ni.


Tu tak chu ni ang maw aw...


"Sawi ṭha mai mai teh, Coffee te kha in la, a dai vek dawn", ka tih hnuah, Coffee min pek hnua a in vawikhatna.


Mak thei ngei mai.


Kan pahnih inkara Boruak lah chu, a rit ru riau lehnghal. Kei phei chu, ka ṭang lutuk a, dawhkan hnuaia ka khup chungah ka kut pahnih nghatin ka hum ruh vak a, ka pharh leh duai ṭhin.


Coffee in tura chelek chhuah bak, ka kut ka dah bo hmak.


"Sammy-a chauh ngaihtuah rawh", tiin ka infuih nasa bawk a, Taiṭita hmachhawn mah ila, ka zia viau.


"Sangsangi chu min inhmelhriattir ngei a ngai dawn a nia, i fak thiam si, min inhmelhriattir loh chuan ka lawm lo viau ang",


"Kei ai mahin i hre ṭha, hmân deuh lawk aṭanga inbe ṭhin mai chauh kan ni. Mahse, mipa pakhatin a nihna dik tak min hrilh ta si a, tun thleng hian a call leh message ka chhâng duh ta lo", Artui tiatin ka meng bial chiang alawm.


Hmân deuh aṭanga inbia an nih chuan, keiin ka hriat ṭhat hle thu a awm lo.


Taiṭita chungah chuan ka lawm lo dawn dawn.


"Nun hlui duhawm lo tak a nei i ti tiraw? Eng ang nun hlui nge ni? Taiṭit, i thusawi hi hriat thiam har ka tih tluk zetin nang ngei pawhin i hriatthiam ka ring lo. Nun hlui duhawm lo tak a neih hriain i duh tho a, tunah lem; mipa pakhat thu hrilh che avangin a call leh message i chhâng duh ta lo chu a ni a, a mak ka ti".


A ngawi ngal, ka chhuahchhal angah a ngai a ni mahna.


Ngai mah se, pawi ka ti lo.


Mi rilru nghet leh puitling tak turah ka ngai a, mipa pakhatin a thu hrilh chu dâwt a ni thei.


"Min chhuahchhal titih a nimaw?", za fe hian a khi suk a. "Chhuahchhal a ni mai ang chu. Mipa pakhat thu chuan i duhna a tibo thei a nia, a mak em alawm. Ngun takin han ngaihtuah mah la, Nun hlui duhawm lo tak te chu kan nei ṭheuh, Nun hlui duhawm lo tak a nei tih a hrilh che a, i hriat reng chu mipa pakhatin a hrilh hre leh mai che chu a nih hi".


Taiṭita chu a inngaihtuah nimaw, kun ngâihin a ngawi ngul.


Hetiang mi hi alawm ngeiawm chu, mi pahnih inkara inrawlh phet tum ho hi, engtianga tih chi nge ni ang?


A chhungril a hlim ang em aw...


Taiṭita chu lo hawi chhuakin, "A dik alawm, chu mipa chu a pasal hlui a ni a, a pasal hnena a kir leh theih nan kei hi hmanruaa min hman tumin, a nihna leh hmingte thlakin min vehthlêm a tum a ni", a ti a.


"Pasal hlui maw? Sangsangi i tihna maw?", nihna leh hming thlak te a ti.


Taiṭitan, "Min hrilhtupa chu a pasal hlui ka tih tawh kha, Sangsangi chuan a bulah tuna a nupui leh kei hi min inngaihzawntir, ni lo; a nupui nen uirena suala kan tluk theih nan min insawiremtir a tum a ni awm e, ha ha", a ti chu, bo ṭha miah miah tak ka ni awm mai asin.


"A chhan i hre duh em?", dawhkan chungah a kut nghatin, ka lamah a rawn âwn deuh a, "Sangsangi pasal hlui nupui vanneihzia i hre duh em? Uiresan pawh nise, a ṭhen dawn loh thu leh, kumkhuaa a bula awm tir reng a tum thu a sawi asin", a ti leh.


Ngaih ṭhat lohna nei lian tawh tak ka ni.


Min en chiang fak mai a, a meng rum ul ṭan ta mai bawk.


"Taiṭit, Sangsangi chu tu nge a nih chiah?", huai tâwk tak inti ve mah ila, Sammy-an min ṭhawng thut thut reng zel a, chumi azarah ka dawih vek tawhin ka hria.


Taiṭita pawh chu ka hlau.


"I hre chiang lutuk, a pasal hlui pawh chu i hria, i hre chiang mah mah zawk ang. Chhuanpui, High School kal laiin duh deuh mai ka nei a, Pawl Sawm hnu lam chu School dangah a insawn daih. Phone kan neih loh avangin han biak chhunzawm dan tur ka hre tawh si lo", a awmzia hriat tumin ka ngaithla kar.


Beng kî vahin, ṭang nasa tak ka ni.


"Tun hnai lawk khan kan inhmu leh a, pasal leh fa a lo nei tawh. Mahse, High School-a ka lo duh rukna te kha a rawn thar leh a, a hma aiin a duhawm zual ta si. Kawppui la nei lo se chu, min pawm theih nan ka bawhzui ngei ang", a nui suk suk.


Nuihzatthlak a va han awm lo tak em!


Min tibuai, a rui a ni chiang.


Tak fea melh kalin, "I rui elo?", ka han ti a, "Rui mai ang", a han ti ngawt pek a.


"Fiamthu hun a ni lo",


"Ka fiamthu hauh lo a nia", a ti bawk si.


Rui se chu, a rim aṭangin a hriat ang ti ila, rim thupna tur a tam tawh.


A chezia aṭangin a rui si lo.


A thu min hrilh zawng zawngte chu, ngaihruat thiam a har.


Tute nge a sawi a, a Chepa kai aṭanga min hrilh leh a ngai.


Lal Fanu School kai lam a hun mai avangin ka chhuahsan a, a la ṭhu rengin ka hria.


High School kai hun lai te a sawi a, tu chu nge maw a lo duh nimaw?


Kawppui la nei lo se chu, a bawhzui tur thu te a sawi a. A duhawm zual a tihte nen.


Taiṭita khan, Pasal ka neih hnu hian duhawm min tih thu a sawi tawh tak e.


Taxi chhungah ka ṭhu ngil zawt, "A ni thei lo, chutiang a ni lo. Ni lo, ni lo, ni lo, keimah ka ni thei lo", mahni hriat phak lekin ka phun sep sep.


Duhawm min tih avang ngawtin High School-a a duh ruk ka ni tihna a ni lo.


A ni lo hulhual.


Sangsangi nihna dik tak leh a pasal hlui tihang rengte chu ngaihtuah duh loin, ka fate chauh ka mitthla.


Ka fate chauh ka ngaihtuah tur a ni.


Dawrah kal tawh loin, Lal Fanu ka hawpui. Sammy-an call a chhâng thei si lo.


***Sam, inah kan awm tawh aw, call i.chhâng thei lo a, message hmangin ka lo hrilh che a nih hi***


Taiṭita nen kan inhmu tih Sammy-an a hre lo turah ngai ila. Hriain min hau se ka duh zawk.


Ka mipa biak apiang thik kual leh se, a nuam dangdai riau asin.


Bialpa ka nei ngai lo a, duat leh ngaihsak leh thikna ka dawna ka tawrh hmasak ber.


Hahthlakin hrehawm chang awm mah se, a nawmna lai awm ve tlat.


"Anu, exam hunah min lo hruai ang tiraw?", Freddy-a tak hi chu aw...


"Hruai dawn chiang, i pass chuan Noodles kan chhum ang", a beng bulah ka ti a.


Min kuah ngawih ngawih.


Remsangpuia vang vekin Noodles chhum kan ei theih loh phah.


A bial fangin zin chhuak leh tawh se aw...


Zan dar kuaah a rawn haw ta mai a, call a chhâng thei lo a, zanriah kan eisan tawp a nih kha.


"Sam, Call i chhâng thei lo a, min timangang alawm", a kawrchung leh Bag ka kensak a.


A inphelh mial mial, "Party Office-ah kan buai deuh hlek a, phone ka khawih hman thlawt lo atin ni", a ti a.


Towel lain Bathroom-ah a lut daih.


Lal Fanu a mut tawh avangin thawm a dim.


Bathroom kawngkhar kik dat datin, "Sam, chaw ei ka siam ang em?",


"Ka ei tawh", a rawn pawr ta lutuk chu ka tawlhhnung dawrh thei.


Chhâng ta chuang loin ka kalsawn.


Khum chungah ka ṭhu a, a phone chu lo ri thutin ka phu nasa lutuk.


Missed call lek hi a lo ni a. A êng off ka tum chu Message pakhat lo thlengin, notification bar aṭangin a lang kuau.


Thlalak hi a lo ni a, a inhawn nghal bakah, notification bar ni mah se, chiang takin ka hmu thei.


Taiṭita nena kan thlalak, Coffee in paha kan inbiak lai.




Bathroom kawngkhar ri-ah pindan aṭanga chhuak rang tak ka ni.


Zanina a mizia tidanglamtu chu, Taiṭita leh keimah a ni tihna. Min zui ru tur a ruai tihna nge?


Thlalak lo thawntu kha number hlang ringawt a ni a, a ruai lo mai thei. A nih loh pawhin, number a save lo tihna a ni thei tho bawk.


"Anu, Lal Fanu hi a muhil a nia", Siamtean min lo koh takah, an pindanah ka va lut a, Lal Fanu chu a lo muhil tak tak.


A muhil laklawh si, tihharh a chi miah lo. A lu a na bur palh ang. "Tihharh loh tur aw, tihian, muhil law law rawh se. Homework in zo tawh em?", Lal Fanu mut dan siam ṭhain, puan ka sintir.


Siamtea khumah a mu a, a pualin khum a la nei ve si lo. Mu tui tak a ni.


"Zo tawh", an ti a. An lehkhabu rem felin, pindan aṭangin kan chhuak a. Lal Fanu thawm ka ngaichang ru reng tho.


Fai ser sawrin Sammy a rawn chhuak, ka hmu chu lehlam hawiin ka nui ru kur kur.


Half pant vut rawng hain, a taksa khuh mawi tâwk tak tshirt dum ha lehin, ngal chen mawza dum bunin chapal a bun bawk a.


A intitlangval thar tlata hriatna ka neih chu!


Taiṭita dah nil a tum chiang.


Hetianga a inthuam hi ka vawikhat hmuhna. Ka nu leh pa te pawhin hmu ta se, mak an ti ngawt ang.


"Siam, khaw'nge i nau Princess?", an bulah a ṭhu thla a, Freddy-an a pawm.


"A muhil, Anuin tihharh loh tur a ti a", Siamtean a ti a.


Sammy-an eng mah a sawi tawh lo.


A fapa te Cartoon en chu tui takin a enpui ve mai.


Nu Papuiin, "Remsangpuia chu, i va intitlangval hlarh hlarh ve a, nupui leh fa i la nei lo emaw tih mai a awl dawn alawm", a han ti a.


Sammy-an, "Kum sawmparuk chauh alawm ka la nih", hma lam en ngurin a lo ti ve bawk.


Va han âtthlak ṭhin tak.


A fiamthu thawh dan a ni ve chêk ang a, tlangval chiah chiah alawm a nih hawt le.


Hmmm, ka pasal chu ka ngaizâwng thar tlat.


Nu Papuiin min hawsan hnu rei vak loah Zanriah kan ei. Freddy-an, "Apa, Thenzawlah kan kal leh ṭep tawh em?", a ti chu, "Exam in zawh hunah kan kal ang", Sammy-an a ti a.


Siamtea nen chuan ngawi rengin chaw kan ei. Lal Fanu muhil laklawh lutuk chuan, zan min men reitir ngei ang le.


Dawhkan hnuaiah Sammy-an ka ngal a rawn tlawh mai a nih kha, ka va han melh rum ṭha tehreng em!


Min tlawh lo ang hmakin a inawmtir zu nia mawle!


"Sam, kha aw", a thlêngah chaw ka khawrh ṭeuh mai a nih kha, "Ei ṭeuh rawh", mi melh Sakhi nia.


Chaw chu dah ṭhen emaw han sawi nawi emaw nei loin, a ei buan buan. Lal Fanuin chaw ei tur a neih loh phah ta tlat.


Cooker ruak chu bih vung vungin, "Lal Fanu tan No khat tal chhum mai rawh", a ti chu, "A teuhlo mai, a ei zotu i nia, nangma'n chhum rawh", dawhkan ka tifel daih.


Thuawih takin Cooker tê, no thum len tawkna la chhuakin No khat lek a chhum ta a.


Kalsawn awm hi a nia, a han dinchilh a. Alu leh Dal kan a zawh(zo) loh avangin a han chhuang lum leh tê tê.


"Sam, thlêng sil pahin a en theih, lo va ṭhu hahdam rawh. Siamtea leh Freddy-a te nen Ice-cream ei ula", hmun phiah dah ṭhain, dawhkan hruk faina tur la pahin ka ti a.


A ding ngawi reng, ka chhir zawt dawn mawni.


Min chhâng tawh lo tura ngaia thu dang sawi loa dawhkan ka hrukfai laiin, "A hmin har lo ang", a ti.


Ka ngei lutuk chu, dawhkan hrukfaina puana a tukkhum suahsual pawn vilik lai taka vawm ka châk lutuk.


Ke per tarhin, "Vanlalchaw, Hmin har rawh", ka phun sep.


Sammy-an a hria nimaw, "Hmin har lo ang", a ti hlak. A thinrima ka hlauh loh ṭum tak.


Thlêng ka sil a, ka be lo. A tih dan danin ti teh se.


Lal Fanu ka bih dêk dêk, a la mu tui nasa mai sia aw... Men rei inring renga muthilh lawk ve mai ka duh.


Sitting room-ah lehkha kan zir phah.


Exam a hnai tawlh tawlh a, Freddy-a mawlhin min luah khat.


Entawn loh tur tih ang chu hrilhnawn ka tum tawh lo. Math leh Science a harsat piahah, GK(General Knowledge) leh IQ(Intelligent Qoutient) lamah hian a hnufual bik bawk.


Nimahsela, a ṭang em em a, a taima thar hle bawk.


Chu chuan min tilawm a ni.


Vanneihthlak takin Lal.Fanu a harh pawhin a suakbak zawngin a awm lo a.


Sammy-an chaw eipui lehin, rei vak loah a muhil zui leh mai.


Sammy-an Taiṭita nena kan thlalak a dawn chungchang a sawi lo a, min hauh hrep nan a hmang hek lo.


Chumi aiah, half pant hak a intiching a, intihtlangval thar a ching thung.


Min ngaihsak ṭha em em a, tlangvalin a bialnu a ngaihsak tak tê hian min ngaihsak ka ti mai.


Hetianga a awm hi chuanin, ngaih ṭhat lohna ka nei tawh avangin, a hmuhah chuan lawm lo anga awm si loin, a ruk hian ka khûr ṭhin.


A chhan chu, inthlan hnaiha min nghaisak dan kha ka theihnghilh thei tlat lo.


Taiṭita nen inhmu tawh lo mah ila, kan intext zeuh zeuh ti ila, min lo biakna message min lo thawn hi chhân loh aiah tiin, a rul tâwk lekin ka chhâng a, a ni mai.


Dawra kan inhmuh chungchang ka sawipui lo, khang a thu min hrilhte kha hriatthiam tumin ka la ngaihtuah leh miah lo a, hriatthiam ka duh nahek lo.


Thu awmze nei lo, Sangsangi laka a rilru puthmang a felhlel em avanga buaiah ka ngaih sak ang.


Siamtea te unauin exam an ṭan ta a, "Thenzawlah kan kal thei ṭep tawh e", Freddy-an nui vur vurin a ti a.


Lal Fanu pawhin Thenzawla kal chu a châk tawh.


An unauah Freddy-a rilru a chak lo ber a ni ta.


Ka rin loh deuhin, Lehkha zir kawngah Lal Fanu rilru a chak phian. A hriatthiam mai bakah, a vawn(vawng) tawh a theihnghilh mai mai tawh lo.


Lehkha zir zawha an mu tur chu, Lal Fanuin a u Siamtea chu a khum aṭangin a hnawt chhuak.


"Ka khum a nih hi, hetah hian ka mu char char tawh ang", a mu fel thân.


Kan nui rah rah, Freddy-a khumah Siamtea a ṭhu a, "I khumah mu rawh, i mang a chhe si, ka bula mu turin ka duh lo che", Freddy-an a ti leh hmak.


"Upa ber ka nih hi, ka duhna hmunah ka mu thei", Siamtea lahin a lukham dah ṭha sauh sauhin a ti a.


Freddy-an, "Chuti chu, chhuatah mu rawh", a ti leh deuh hmak. A uang tih ka hria, Siamtea lahin a ngai thutak lo.


Lal Fanu a nui nasa mai, "A u Siamtean mutna tur a nei lo e, a u nen chuan kan nei bik bik a", uang fahran hian a ti a. A nui ver ver.



"Lal Fanu, a u hi kan bulah muttir miah lo ang aw", Freddy-an a ti a, "Tehrengs", Lal Fanuin a lo ti.


An va han ṭangrual tak em aw!


Sammy nen chuan ngawi rengin an unau thuma che tla leh inchhaih kan thlir.


Hmangaih an phu hliah hliah, an hmuhnawm lutuk ringawt.


A tawpah chuan, Siamtea chu chhuatah a mu dawn ta lo e. Lal Fanuin, "A u, Thawnthu min hrilh dawn chuan ka bula i mut ka phal", a ti ta roh.a.


Awm hmunah ka lo khi ver ver.


Sammy bulah, "Fb khawih i phal em? Account thar siam ngai loin, a hlui password ka la hria a, chumi chu ka hmang char char thei ang",


"Thei e, Politics chungchang post siam vak vak lo la, thlalak lah post zung zung suh ang che", a thupe tawh mai ṭhin sia.


"Post zung zung lo ang", ka ti vah. Mahse, "Sam, ka pasal hnathawh chungchangte leh, ka fate chu ka post thei lo em ni?",


"Post zûr kuai reng loh tur tihna", a ti sup a. "Of course", ka han ti nghat a. Rum nghutin, "Muhil tawh rawh", min fawp zauh a.



Muhil tura min ti siin, lukham leh a tukkhum an indeh rual rualin a chatthla nghal hmak.


Sammy-a a hman loh avangin Siamtea Exam turin ka hruai a, Freddy-a leh Lal Fanu te chu Sammy-an inah a awmpui.


Hmingin min lo call. Duhsaka hriat theih ngei turin, "Aw, Hming, eng nge ni ta a?", ka ti a.


Ka ngaihbel nge phei chu ka hre lo, Duhsakan Hmingi hming ka lam a hria chu, a beng a ki deuh.


"Chhuanpui, Aizawlah khan hnathawh tur min lo zawnsak teh, Dil ven(veng) reng chu a hneawm, Sanghain min rimtu a hnawt ṭiau zel", a lo ti nang nang.


Lainatawm hnup hnup reuh lutuk.


"Lungngai duh suh, ka lo zawnsak ang che, Sanghain rimtu che apiang hnawt ṭiau mah se, Sangha pawhin a hnawh(hnawt) ṭiau theih loh tur i la tawng em em ang", Duhsaka mitsir zeuh zeuhin ka ti a.


Hmingi chu a lo nui nasa mai, a lâi ngawt ang.


"Hming, Siamtea exam turin ka hruai a, Duhsaka hian bengchheng a tih luatah min accident pui palh ang, nakinah kan inbe dawn nia", ka ti a.


Duhsaka hming a hriat rual rualin, "A hruai ṭhin che u mi?", a lo ti.


Min hruai ṭhin tihte chu, a hre reng sia aw...



Duhsaka lahin, "Bengchheng lo e, ngaihngam takin be rawh", a lo ti dam thlup mai bawk.


"Chu chu amah a ni em?", Thenzawl aṭangin a lo ti thuai.


"Aw, ni e", ka ti chu, a rak ṭhat. Lalhmingi tak chu...


Hmingi chu a nuin a koh avangin loh theih lohna avangin inbiakna tihtawp a ngai ta si a.


Duhsaka hian Hmingi a ngaihsak ve deuh hlek a ni ang, "Au Chhuanpui, Atta kang thiam deuh kha em ni?", phone ka dah rual rualin min lo zawt nghal vat.


Hemi te pahnih hi, suihzawmin an la awm khawp ang.


An inrualin ka hria, Hmingi aiin kum khatin ka upa a, mahse; ṭhian inkawmngeih tak erawh kan ni thung.


School kan thleng a, "Exam Hall-a i luha i ṭhut fel hnuah, vawithum thaw chhuak hawk la, chuan, I ṭawngṭai dawn nia. Zawhna an pek ve leh che, i chhiar chhuak vek ang a, chumi hnuah i thiam hmasak apiang, zawhna number dik taka ziakin i chhâng dawn nia", ka ti a.


Min kuah vawng vawng a, chuti chhungin rilruin ka ṭawngṭaisak mawlh mawlh.


Dawr ka thleng a, "Au Chhuanpui, nghah i ngai dawn em?",


"Ngai lo mai rawh se, inah lo va haw la, i puin kei aiin a mamawh zawk ang che".


Hriati leh Nancy-ten Dawr chhung aṭangin min lo hmu a, an lo chhuak. "Au Chhuanpui, lo lêng rawh", Hriatin ka bânah min kuah a.


Duhsaka tlan liam hnuah kan lut ta a, Nancy-in Nescafe, Ina a siam lo kengin min thlitsak ve a.


A tui lutuk ringawt.


"Hrehawm tihna in neih chuan sawi ula aw, hlawhte hi a tlem in tih chuan sawi hreh lo bawk ula, kan insiamrem zel dawn nia", Nescafe in pahin ka ti a.


An fel hrim hrim nge phei chu hriat va ni suh, "Tlem lo rapthlak, hrehawmna pakhatmah a awm lo. Lehkhabu hralh ṭhat loh hian a inthlahrunawm ve a, a ni mai", an ti a.


"In inthlahrun avang mai mai a nih chu, Lehkhabu Dawr a tam bakah, Lehkhabu chhiar kan peih ta meuh si lo a. Hralh ṭhat loh pawhin inthlahrunna tur a awm lo, lo inthlahrung tawh reng reng suh u aw".


Hriati leh Nancy chu an nui ver ver.


Nancy chuan, "Lehkhabu aiin, Pen leh Box tih angreng kan hralh thei zawkin ka hria", a ti ve sep bawk.


Hriati aiin a inthlahrung bikin ka hria, a ṭi dak mai sia.


Kei chuan, "A dik, Lehkhabu hi chu, lei ngai loin Library-ah te hawh tur a awm tawh nen", ka ti a.


Hriatin, "Nia, District tinin Library kan neih bakah, Veng tinin kan nei bawk si a", sawi zawm tumin a han âng zuau a, a chip leh daih a, a hnuah, "Ka sawi tum ka theihnghilh daih", a ti thlawt.


Nancy nen kan nuih ver ver, Taiṭita nelawmna tak pawh, a ṭawng dan kha a ni ṭhin. Sawi tur nei, sawi tura âng zuaua ngawi leh hmak ang kha.


Ṭhian dangte pawh khan, "Va han ngeiawm teh kil kel tak, eng nge sawi i tum?", an tifiamthu ṭhin.


Taiṭita ka ngaihtuah leh ta.


Nancy-in, "Takah, Au Chhuanpui, Pu Sammy-a thawhna College-ah kan nau pakhat a kal ve asin, Pu Sammy-a fel a tihzia a sawi nasa thei lutuk. Inthlanah a tling tih a hriat te khan Cake a lei hial alawm",


"A va lawmawm tak, kan va phu lo em aw! I nau bulah chuan lawmthu min lo hrilhsak mawlh mawlh rawh aw. Cake chu aw...Sammy-a ka han hrilh ang a, a lawm viau ang", Sammy-a a lawm dawn lutuk.


Mit tui tlak theihna tham a ni.


Chutianga duhsaktu, Cake hial leitu kan lo nei ru reng mai ka ti!


"A bân a ngai ta si a, tunah chuan; a uizia ngawt a sawi leh tawh. Bân hlen a tum dawn em?", Nancy-in a ti leh a.


Ka chhân hmain Hriatin, "Minister-te pawh a la ni ang chu", a ti a.


CM a nih ka duh zawk a, MLA a nih avangin a bâng a, a bâng hlen chu a ni maiin ka hria.


Kan pathum tê chuan Politics kan han zeldin kual chho ta rek rek a, Dawrtu kan neih chuan kan chhâwn pah tho bawk.


Siamtea hruai a hun mai avangin inthlahin ka chhuahsan ta a. Chhuna an ei tur, an duhzâwng tak leina tur ka pe.


Siamtea chuan report a pe zung zung, "Naktuk tuk leh chiah a ngai tawh e", seat hnung a ngheng ar ar.


"Hma tâwkah i mu thei ṭep", ka ti ve bawk.


In kan thleng a, Sammy-a te pafain in chhung an tihhnawk dan chu, pui tak a ni.


Kawngka bulah dingin, kâ hoin ka melh kual tlawk tlawk.


Choka a hnawkin, Kawngka bulah te thawmhnaw a darh niaih nuaih.


Maida ang tak te chhuatah a vâr iar uar bawk.
"Anu, ngati nge a? Khawiah nge Apa te hi?", an reh diak a, an thawm hriat tur reng reng a awm lo.


"Anmahniin an tifai vek ang", ti sepin, "Sammy?", tiin ka au vak.


Kawngka bulah Siamtea ka dinpui char char. Hetiang ang em ema in chhung han tihhnawk mai chu(h).


Chhângtu ka neih loh avangin, "Sammy?", tiin, vawikhat dang ka han ko leh.


Kan pindan aṭangin hmai paw phak phakin an lo chhuak pafa mai a nih kha!


Ka insum hman thlawt lo, Siamtea pawh a ni tho.


Mit tui tla phung leh, dul na urha nuiin chhuatah ka ṭhu tawp.


An meng ker a, an meng phawk hra. Kekawrbul vâr leh tawnzau vâr an ha vek a, ke lawngin an la awm zui.


Freddy-a leh Sammy phei chu an sam a chho vek a, Maida ngei mai chu a kai nuaih.


Lal Fanu sam lah chu, Maida an phul emaw tih tur a ni.


"Nangni pafa mai mai chu aw...", ṭawng a harsa. In chhung an tihhnawk avangin lungawiloh tum nen, chân loh khânah mi han nuihtir nghek chu.


Siamtean, "In inhmeh lutuk", kut bêng meuhinṭ ke per chhak chhakin a nui vak vak.


An inthlahrung nasa mai bawk si.


Tifai tura ka tih avangin, thuawih takin an pafa thumin an tifai a, Siamtea lah a uniform thlak chuang loin, kan nufain kan nui dun ker ker.


Tun hmain hmun leh chhuat a lo tifai a ni mahna, kan inneih aṭanga hmun a phiah a, chhuat a nawhfai lai ka hmuh vawikhatna.


Lal Fanu leh Freddy-an thawmhnaw an dah hnawk Basket-ah an khung a, "Apa hian Momo siam ang u a tia, kei chuan, Noodles chhum zawk ang u ka ti a. Apain a duh tlat lo a", Freddy-an a ti zuah zuah.


Nuihah a kal tawh, mahse, "Maida-in in inbual tihna mi? Thawmhnaw te kha, engvangin nge chhuatah a darh nuai a?", nui chhuak lo tura ka insum nasat dan chu a...


Freddy-an, "Kan infiam a", a ti a.
"Apain min um a, kan invawm vel. Anu, kan inbihruksiak a, a u Freddy-a nen kan biru a, Apain min zawng", Lal.Fanuin a ti ve leh.


"Apain min hmuhin Maida min hnawih a, a bihruka kan zawn hmuhin kan hnawih ve a. Anu, pindanah lut mah teh", Freddy-an a ti chu, pindan hnawk dan tur ka mitthla nghal thuai thuai.



Rang lutukin Sammy-an, "En a ngai lo", a lo ti.
Runluih ngatin, "Ka han en teh ang, Maida hmanga infiam pafa awm chhun in ni ang", ka tawlh hma hrat a, Chhuat nawhna dah thlain Sammy-an ka kâwngah min pawm bet.


Ka tal a, "Min thlah teh",


"Thlah lo ang, tihian", Ṭhutthlengah min nghat chawrh, dûp lo se chu, mawng a na ang chu.


"Awm mai mai rawh, ka tifai mai ang", a kalsawn daih.


Pindan en ka châk tlat avangin, ding chhuak thutin, pindan panin ka tlan phut a, kawngka vawnchhan ka ban hman tawh, Sammy-an min pawm sawn leh vawn vawn.


"Sam, min thlah teh, a awmlo lulai em mai. Min thlah teh", Sammy-a pawh a nui tawh.


Ṭhutthlengah min nghat leh chawrh a, a lo kun hniam avangin hnar insi ranin kan inhmachhawn.


A nui vur vur a, kei lah ka nui ver ver.



"Anu, kan hmu reng che u a nia", ka zak lutuk.chu, Sammy-a nam sawnin ka ding hluai a, "In hi, tifai vat vat rawh u".


Sammy-a chu nui hakin, "Lo ṭhu hle hle rawh", a ti a.


An pafa thuma inchhaih paha an tihhnawk an tihfai laiin, Siamtea nen Maida hmetin kan lo kang.


Momo siam mi a ni lo reng reng, a rei dawn em mai. Lal Fanuin, "Ka ril a ṭam", a ti chhen tawh si.


Momo siam chhungin Tlai ei rawngbawl a hun mai dawn.


Hmarcha kan siam bawk a, Thingpui paw thlum tui tâwk nen.


Kan ei zawh meuh chuan, an pafa thumin an han muhil leh ṭhap a. Chhir thawh zawt an châkawm.


Sammy-an Fb khawih a phal ta bawk a, an muthilh lai leh, Siamtean an exam hmabak a en chhungin ka online.


Chanchinthara an puan tel miah loh thu thar pakhat ka hmu chuan min ṭhawng chiang kher mai.


Sammy-an min hriat theih lohna turah kalin, muhil mah se, a harh palh thei tlat.


Ka nu ka call nghal a, a awm awl lai tak a ni mahna, min chhâng rang khawp.


"Ee, Chhuanpui, eng nge ni ta?",


"Nu, Sammy-an pawisa a pe che u nge pe lo che u? Thudik tak min hrilh rawh".


MLA-te hian Fund an nei tih ka hre ve, chumi aṭangin an Bial chhung atana ṭangkai tur hna thawh nan emaw, an Bial chhunga ṭanpui ngai emaw te puibawm nan an hmang tur a ni.


Chu chu Sawrkarin a hriatpui ngei a ngai bawk.


Sammy-a pawh hi a hnathawh ṭhenkhat ka hriatpui, Ka Nuin Puan Tah zirna a hawn puibawmna turin Sammy-an pawisa a pe tih ka hre hauh lo.


A nupui leh an fanu ngei hian, Fb-a Chanchinthar Group aṭangin ka hria maw?


Awih har ka va han ti teh lul em?


Phat mar tum angin, "Chhuanpui, ih e, chutianga tam tham pawh a ni lo", tam tham leh tham loh ka buaina a ni lo.


Ka buaina leh hrehawm ka tih ber chu, ka hre ve miah lo chu a ni.


Sawrkar hriatpuina ngeia dawng an nih chuan pawi tihna ka nei lo. Sammy-an min rawn der ve sela.


"Nu, eng dinhmunah pawh dingin khirh eng ang mah ila, kan lakluh chu dik takin zel le kan tih ṭhin kha",


"Aa, Chhuanpui", ka mit tui a tla tawh.


Dik taka nung tura min fuih ṭhin tuin, tu hriatpui hauh loa dawn(dawng) a nei chu Na ka ti lutuk.


"In dil nge, a thuin a pe che u?", tunah tak hi chuanin, ka pasal ni mah se, Sammy-an ama thua a pek a nih thu hria ila ka duh ber.


A nih loh vaih zawngin, ka pasal lakah ka mualpho nasa dawn lutuk.


Ka nu chuan, "Chhuanpui, a thuin min pe lo", a rawn ti chu, "Nu, ka pasal lakah min timualpho chiang kher mai, ka hmachhawn ngam tawh hleinem maw. A pawi em mai, a pawi lutuk!",


"Chhuanpui, pawi ka ti lutuk ania aw. Min ngaidam rawh, ka pe let leh vek ang",


"Pek let lehin ka mualphona ata min chhanhim thei dawn chuang em ni?", phone off-in ka âwmah ka hmer vawng vawng.


Sammy-an engtiang takin nge min hmuh ang aw...


Fb Group hrang hrang kan luah mek a ni a, a ṭha lam aiin a chhe lamin a la ni zui.


Sammy-an ka chhungte pawisa a pe tih chu engtin nge midangin an lo hriat?


A zahthlak ngawih ngawih.


Bungrua mai maia min ngaih tawh sa nak alaiin, min va han hmusit dawn tak em!


Min hmusit turin ka duh lo.


Ka nu nen kan inbe zo chu, Lungpui lian takin Tuhrik a delh bet tlat ang ka ni zo ta vek.


A tuk zinga ka harh te pawh chu, eng thawk mah suh i, hah hluah hluah tak ka ni.


Thâwk a sak ṭalh mai a, Sammy-a chu muhil mah se, en harsa ka ti.


Lal Fanu a che hrut a, a harh chu a ni mai. A harh hma thei si, a harh tawh chuan thawhpui ngei ngei a ngai bawk.


Sammy-a tihharh hlau takin kan tho a, kan intihfai zawhah chokaah kan tawm.


Lal.Fanu hi chuan exam a zo tawh a, Freddy-a pawhin a zo tawh. Siamtea chauh a ni ta.


Siamtea chu a chawl a, exam atan a inbuatsaih tlauh tlauh. A naute pahnihin an veng.


Sammy pawh a Office-ah a inkhung nileng.


Momo ka siam zawh chuan, "Sam, Thingpui in ang u hmiang, lo kal rawh", a bulah ka ding a.


Ka kâwngah min kuah a, ka dulah a chal a nghat vang vang.


"Sam, kan ṭha em?",


"I ṭha zawk em?", ṭha lo tak ka ni.


"Ka ṭha, ka hmel pawh a ṭha, ka ṭha vel vek", a nui hak hak.


A lo hawi chho a, "Hmar lunglien tih i inhmeh zia hi i hria em?", ka hmui ka tipawrh.


Tumahin 'Hmar lunglien' min ti ngai lo.


Eng ti tia hetianga min koh ching tlat nge maw a nih le?


Min koh erawh chuan nuam ka ti lawi si. A lo ding chhuak a, ka en ngam thlawt lo.


Ka hnar chu a hnara lo tawk zauhin, "Chhuanpui, kan nupa inkar hi a zau i ti em? Engtin nge ka siam ṭhat ang le tih hi ka ngaihtuah fo. A tizautu ka ni si a tiraw?", ka nuin kan inbiakna te kha a hrilh mawni aw?


Amah vêkin, "Chhungkaw hlim tak kan ni nameuh mai, engtikah nge Nupa hlim tak kan nih ve ang?", a ti a.


"Min kalsan ka hlauh luatah, rawng takin ka lo che leh ṭhin tih ka hria, tun thlenga min la tlansan loh avang pawh hian ka lawm a ni. Mi tuarchhel tak i nihna theihnghilhin, min hmangaih avanga tuar hram hram i ni emaw ka ti leh ṭhin asin", a mitah tak ka en a, lungngaihna nasa tak ka hmu thei.


Inchhirna leh sim tumna erawh a hmuh theih loh.
Chumi avang chuan ka ring ngam rih lo, a thu min hrilh chu a va ṭha teh kher em!


Luanliam zawih zawihna tham a ni bal.


Politician a ni a, thusawi thiamna a leiah a bet tawh tlat.


A chanvein ka ring a, a chanvein ka ring lo. Rin ngam pum hlum mi-ah ruat loin, rin fithla turin ka ngai ngam lo.


Nui seihin, "Sam, Biathu infah hun a nih loh hi, Thingpui thlum tak inhlui dun zawk ang, tirawh; min lo zui rawh", a kutah ka kai a.


Ani pawh nui sukin, min zui ve mai.


Mi tuarchhel tak ka ni tihreng ka lo inhre ngai lo.
Mi tuarchhel tak ka nih tih theihnghilhin ka hmangaih turah a lo ngai a nih hi maw!


Chutiang a ni thei dawn em ni?


Siamtea te unau avang chauha nung ṭawk ṭawkah ka inchan ber tawh.


Keia pawh chu, Sammy ang chiahin number hriat ngai loh aṭangin thlalak pahnih lai ka dawng.


Sammy chu a Office-ah a la awm a, Lal Fanu chu a mu tui tawh lutuk. Sammy-a leh Manoi te an ni a.

Thlalak.pakhatah, Manoi kutin Sammy-a hmui a tawk, thlalak pakhatah thung chuan, inhaw lo tih hriat takin an kut an invawn sak.


Restaurant chhung a ni a, an ṭhutna a biru hlek bawk.
Tu khawkhain an hriain an hmu lo a ni ang e, nuam an ti ang chu aw...


Number ka hriat ngai lohin thlalak min lo thawn chu, thinrim ai mahin nuihzat lamah a kal.


Sammy-a bulah Taiṭita nena kan thlalak an thawn tawh bawk a. Number erawh hi chu a dang. Sammy-a thawnthu number kha a ngialin sawi chhuak thei lo mah ila, ka hre nel nual.



Taiṭita message ***Naktukah inhmu ila, Lal Fanu nen inngaihawm tawh*** tih chu *** KFC Dawrah aw*** ka va ti a.



***KFC Dawrah ngei mai mawle*** a lo ti nghal.



Ani pawh, a ngaihawm lutuk ringawt.
Sammy thawm hriain, phone ka off a, Bathroom-ah insilfai turin ka lut.



Darthlalang hmaa ha nawtin, hmâna rilru, "Ka fate chauh ka hmangaihin, an tan chauh ka awm ang", ka tih kha rawn kir lehin, chu chu ka thutawpnaah ka nemnghet ta e.



Manoi nen an inhmu reng reng a, inhaw lo takin an awm bawk a.



Taiṭita ka hmuh theih loh bikna tur ka hre lo. Sammy-a ka hmaizah avangin a message takngial pawh ka chhâng ngam ngai lo a nia.



Anni ve. Ka nui hak, naktukah Taiṭita nen kan inhmu dawn a, a ruka kan thla latu khan la lehin, la ṭeuh teh se. Sammy-a thawn leh rawh se.


Sammy-an eng a sawi chuang lo. Sawi pawh nise, Manoi nena an thlalak ka nei ve tho.



Taiṭita nena kan thlalak aiin, an thlalak a mawi lo feee.
Siamtea pawhin exam a zo tawh a, kan nufa thumin KFC dawrah kan kal. Taiṭitan min lo nghak reng tawh zawk.



"E he! Pa Taiṭit", an ti a.


Taiṭita lahin, "Beram pathum te u", tiin, a lo kuangkuah ve mai bawk.


Ka fa te pawh hian 'Taiṭit' tiin an ko tawh. Taiṭita lahin 'Beram Pathum' tiin a ko bawk.



Siamtea hi Beram pakhatna, Freddy-a pawh Beram pahnihna. Lal Fanu hi chu, a changin Beram pathumna a ti a, a changin 'Lal Fanu' tiin a ko ve ṭhin.



"Chhuanpui", a thle bak a, "Thau i inti em?", ka nui lai ka tawp hmak.



Beram pathum ten min nuih.



"Thau inti ve e, chaw ka heh em alawm", ka ti a. "Anu pum chhungah nautê tam tâwk a awm a", Lal Fanuin a lo ti.


Taiṭita nui hmel.a tawp deuh a, a dur nghal khup.


A insiamrem thuai thung, "A ni maw? Nautê in nei dawn a ni maw? Nuam dawn lutuk", Lal Fanu hnar piai zauhin a ti a.



Lal Fanuin a lu a thing nawk nawk, "Nuam dawn lo, nautê tam tâwk Anu pum chhungah an la awm a, an lo chhuak har tawh e", a ti ngâih.



Taiṭitan min lo en a, "Lal Fanu, lungngai reng reng suh, Elsa nautê i neih kha tiraw? Anu pum chhung aṭangin lo chhuak lo.pawh nise, Elsa nautê i nei tho a", a ti a.
Lal Fanu nen an inkâwm tâwk maiin ka hria.


An hmuhnawm dun si, Pafa niawm tak an ni.



Phone ri enin Sammy a lo ni a, chhân loh tuma off ka tum chu, "Chhâng ta che, beng ka lo hup ang", Taiṭitan a han ti kher chu, ngei zet hian ka melh.
Beng bulah ka dah a, "Hello?",



"KFC dawrah in awm tih ka hria, tunah hian khalai hmun aṭangin in haw dawn nge, ka lo hruai chhuak dawn che u?", a va han chhe zet zawt tak.



Inah awm loin, Party Office-ah a kal a.
KFC dawrah kan awm tih hrilhtu a nei a ni phawt.



Kei chuan, "Nuam kan la ti, kan duh hunah kan haw mai ang. Ṭhiante nen kan inhmu a", dam zetin ka ti a.
Hrechiang tâwk tawhin ka hria, a inseh ruhin, a inhum ruh nasa ngawt ang chu.



"Lalchhuanpui, Ṭhiante tih tur a nih loh kha, mipa ṭhian tihna em ni?", a âw a tinêm deuh hlek.



"Nia, Taiṭita nen a nia. Beram pathumte pawh an awm", ka ti leh.
Taiṭita leh Beram pathumte chuan min en ṭhup.



"Nge, KFC kha ei mai mai r'u, chumi zawhah ice cream ei turin kan chhuak dawn nia", ka ti a.



Taiṭita ho hoin thuawih takin an bu nghat nghat. Sammy chu a rawn thaw chhuak hawk.



"Beram pathum a? Lalchhuanpui",



"Inah kan inhmu dawn nia", tih leh phone dah ka rual.
A thu angin ka va han awm awm lo tak e aw...



Ka mi hmuh tur leh biak tur min thlansak thei lo. A nupui ang pawhin min ngai hleinem maw!



Zanriah ei laiin, "Vawiinah in lêng em ni?", Beram pathumte chu a zawt a.
Annnin phur takin, "Aw, leng. Apa Taiṭitan KFC min leisak ṭeuh a, ice cream pawh tam tâwk min leisak", an ti sang sang.
Nawm an tihzia ngawt thu an sawi bâng lo.



"Apa bula awm aiin Apa Taiṭita bula awm a nuam zawk nimaw?", nelawm takin han nui suk mah se, mi melh hriam teh kher asin.



"Sam, chutiang thu âtthlak an inzawt ngai lo", ka ti sep a. Cho takin ka melh kal ve thung.



Manoi nen an inhmu char char a, Taiṭita nena kan inhmuh theih lohna bik tur ka hre lo.



A nupui hlui a hmu ṭhin a, chu pawh ka hriat pui lohin. Pasal hlui chu sawi loh, bialpa hlui pawh ni lo, a ruka ka Star ṭhinzia pawh hre lo nen kan inhmu mai ṭhin zawk a nia.



Freddy-a lah hi aw..."Apa, dik tak chuan maw, Apa Taiṭita bula awm nuam ka ti. Nangma bula awm pawh a nuam tho. Apa Taiṭita chuan min infiampui peih a", a ti mai a nih kha.



"Bawiha, Apa chu a hnaah a buai thei em alawm. A hman chuan a infiampui reng ṭhin che u hi", ka ti tak naa.


Sammy-a hmel a êng thei tawh lo.
Politics a ngaihtuah nasat luatah, a fate a hrechang tawh lo.