By Lszi Zadeng
Hlutei POV:
Exam kan zova, result nghah pahin kan ṭhianho kan zin a. William-a te hi an hausa ka tih tawh kha, a pa hian Pune, Maharashtra lamah min hruai a, relin kan kal a, zinkawng thui mah se a nuam phian mai.
Rela vai chaw te chu kan ei a, a hnuah nu pakhatin, "Rela an chaw siam te chu kan ei duh ngai hleinem! In ami hlir alawm kan ei! An siam dan a tenawm!" A rawn ti a, Marathi-a a ṭawng avangin kan lo hrethiam mai lova, mahse Will-a pa thawhpuipa khan vai ṭawng a lo thiam deuh hlauhva, min hrilh leh chuan kan pum te chu a na nghal ngawih ngawihin kan inhria.
Internet lamah vaiho thil siam ṭawpzia kan lo hre tawh bawk nen! Kan luak te chu a chhuak rum rum a, pum nuamlo ruih ang tlat hian kan awm thei.
Author: Hetihlai hian Gidion-a chu College thil avangin Mumbai lam panin, Hlutei te rel chuanna compartment bul lawkah chuan a lo ṭhu ve reng a. Mahse 1st class-a an ṭhut hlawm avangin rel dang angin an inkal pawh mai mai lova, Hlutei chuan a ngaih em em chu a bul lawkah a awm tih a hrelo a ni.
Kan khua leh Pune chu inthlau tak a ni! Mizoramah chuan kan thawkin boruak vawtah kan thaw lum a lo khu ṭhin a, hetah chuan kan thaw dek dek a Keimahni zawk kan thlan huh vek lo chauh! Ka vawi khat kalna a nih vang te pawh a ni ang, engtin nge vaiho hi hetiang boruak uap lutukah an chên reng peih le ka ti?! Boruak uap si, lum si, bengchheng bawk si!
Mizoram House tih velah kan thlen ka lo inring a, mahse a ni miah lo! Hotel motor changlang deuh hian rel station-ah aṭang min lo hruai a, kan tlan pah chuan ka vai film en ṭhin te, Savdhan India tih vel te ka ngaihtuah daih.
Tichuan Will-a pa chuan, "Thlawhna pawhin kan kal thei reng a, mahse rela zin hian zir tur leh thil tawn tur a tam zawk a, Adventure vek a ni mai! Chu chu ka duhpui zawk che u a, tikhan relin chuti zat khua chu kan kal tawh in ti thei dawn a ni! In duh chuan haw lamah thlawhnain kan haw dawn nia!" A ti ta mai! An va han hausa awm em em! A eiruk chu ka ring chiah si lova...
"Damnnn! Pa Paul-a chu! I bawn chianggg!" Moni-a chuan a lo ti a, Goldi'n,"Ni e! I ṭha ber!" A lo ti vat bawk a. Kan ṭhianhova zin kan ni bawk aaah, kan phur tlangin nuam kan ti ngeeei mai!
Author:Hemi kan zin ṭum hian Will-a pa te pawisa chauh an lo hmang lova, an chhungte pawisa tlem telin an zin reng a lo ni! An haw leh hnuah an hre chauh nghe nghe!
Ka ngaihtuah ah... Pawisa an nei phian tih chu ka hria a, mahse Will-a pa hian kan ṭhianho zinna sen so zawng zawng hi chu a phurh zawh vek chu ka ringlo a niii, eng emaw tak inthup chu a awm ngei ka ring. Ka ṭhiante hi sawipui chak hle mah ila, tunah chuan a la hunlo, nuam kan la tih hrih e mai!
...
Hotel kan thleng chu Will-a pa thawhpui ten hotel kawtah min lo nghak a. Mizo nu pakhat thauuu tih tur ni chiah si lo, taksa nei ve deuh nulh, inthazo hmel tak si, sam rawng buang, eye liner chhah zeta inhnawih hian nui sang hian min lo hmuak a, a Mizo ṭawng lam dan a sap viau danah phai ramah rei tak a awm tawh tih a hriat.
"Welcome! Welcome dearsss! Welcome! Awi! Bawiht-w-eeee! In va lian t-u-awh veeee! In chau vemmm? Snaaaacks tuiiii tawwwk ka lo siamnnn che u a niaaa!" Tih pah hian min kuah liam liam a, keini chuan kan chauh loh thu tein kan lo chhang. Goldi'n a lo endik leh zung zung tawh tih ka hria, mahse a mitmengah duhai a lang, duhai a en nasa mah mah a, ka nghawk zeuh. Ngawi rengin kan ṭhianho chu kan inmelh kar kar hlawm a, sawi lo mah ila kan rilrua awm chu a inang hlawm niin a lang. Nang pawhin min hrethiam ang
.Will-a pa chuan, " Naute uuu, hei hiii, William-a ni a nih hi." A tih chuan kan lo bu nghal nulh nulh. A lo ni dawn tak mawww?!
"A dik al-u-awmm! William hi chu ka awm nasssa thei lutttuk! Hman ni pawn ka lo zin al-u-awmm! In gang pictures te kha William hian min hmuh vek zel alawm, a sawi ṭhin cheu a, ka lo hre lutuk cheu alawm!" Will-a ni chuan a ti nghal liam a, min rawn hui a, a kalna lamah chuan kan zui ve zel.
Lift-a kan luh lai chuan, "Oh yes! Ka hming ka la hrilh lo tak che u!" A rawn ti thut! Kan phur chiang hlawm eee! Moni-a phei chu a lo over deuh a, bangah lo bet kar dawr ngeeei!
"Joline ka nia, Aunty Joline... Mahse Jojo min ti ṭhin a. Aunty Jojo min ti mai ru awww, Ni Jojo pawh a tih theih chu!" A kut phar vel auh auh chung hian a ti, nuih sang bak tih tur vak kan lo hre lo a. A awm vel danah pasal fanau a la neilo a nih hmel... A la inchei nulain a changkang em em bawk si a, hna zahawm tak a neih ka ring.
E chuan, lift ah hian kan leng vek si lova, Will-a te pafa leh Dudua, Sangtei, Ruhmawiha, Vanlala ten lift dang an pan kha a ni a, Moni-a leh Vanlala lah chuan naupang chhia ang maiin, "Tu aw thleng hmasa sa!" An ti a cheng sawm an inchawi nghal ringawt!
Chu vang te pawh chu a ni ang, Moni-a chuan, "Ka rin ai daihin lift hi a ṭuan a muang... Kan thlen khalh loh chuan awww, ka cheng (ṭenggg) sawmmm!" Insum ru ṭulh deuh hian a ti a, Mer-thangi chuan, "Cheng sawm maiiii mai eng nge i ui! Ho lutttuk!" A lo ti vat. "Ahh... Cheng sawm te chu ka ui lutuk pawh a ni loo... Mahseeee, Vanlala hian ka pawisa a ba hnem tawh lutuk aaa, ka cheng sawm ka pek daih tennn!" Ui hmel fahran chuan a ti. A ni reng tak ang! Vanmala pui hi haihawt deuh chu hi a nia, Moni-a hi pocket money ngah ve thei tak hi a nia, kan puksak leh lawp lawp zel a. Chu chu Vanmala hian hman aṭang tawh a la pe let lo hrim hrim ni tur a ni!
"Engzat nge a bat tawh che kha?" Ka lo tih chuan, "Ele! Tunah chuan, hman ni ₹20 Sting lei nan a hman nen khan, Sawmruk, za, za sawmmm... Eeee! Hmela hi! Ka ₹280 lai a ba!" A tih chuan a au vak a, kan phu leh tuar! Tun ṭum chu Aunty Jojo-i zawk kha phu zawkin bangah a bet thlawp! Kan nui leh hnuhnawh vel a.
"In ṭhianpa chu zilh a ngai a nih chu!" Ding ṭha leh te te pah chuan Aunty Jojo-i chuan a ti. Awkward deuh hian kan lo nui haw.
Kan chho rei kan tih em chhan pawh chhawng sawm leh pahnihnaah kan pindan tur a lo awm vang chu lo niin! Kan khuaah Millinium Center lift vel mai mai ai chuan eee! MC-ah te zawng chhawng thu chho velah kan kawi zung zung mai kha a niah! Ti hi chuan Movie velah pawh lift-a an awm chhung rei ṭhinzia kha ka hrethiam ta deuh... A chhawng leh chhawnga insawn chhung hian hun a lo duh ve em a nih hi!
Kan pindan tur kan thlen phat chuan a chhung chu a lo vawt thler! Ac an tihniam hle ni turah ka ngai. Vai rama awm chu, pawnah Sahara thlalerah kan awm a, inchhungah Antarctica lamah kan awm leh daih zel! Vai ram kal tawh chuan an hria ang. Motor lah ni se, a chhung a vawt mah mah ṭep a, lu na dawn dawnin kan awm a, pawn kan chhuak chiah- a thaw lum puat!
Kan khumah te chuan kan han mu chhin a, kei a bawh nghal thlawp rualin Sangtei leh Goldi chu an sawt nghal tawp tawp a, "Awiiii! Dup eeem em!" Tih pahin Mer-thangi pawh a rawn sawt ve auh auh! Nuam an ti ngeeei mai! A nuam em bawk a ni!
Thlang lam kan thlir a, "Awiii! Vai ram chu leh! A va han zawk eeem em!" Sangtei chuan dak vauh vauh pah hian a ti nghal chul chul. "Awi en teh u! Khu metro! Nakinah la Chuang ve ang u aww guys! Reels te siam ve ang u!" A la ti ham ham zui. Mer-thangi chuan nu chan changing, "Aww, awle awle! Kan la chuang em em ang!"
Aunty Jojo-i chuan Marathi-ho chaw tui tak tak, Biryani te chicken curry leh neuh neuh hi a lo lei ṭeuh chu lo niin! A rimtui si! Tuihmel bawk si! Mahse pawi ta chu Ruhmawiha pui hian thak a ngam tlat lo! Kan chaw ei tur hi chu a thak hmel ropui si a!
Aunty Jojo-i chuan, "Eeee! Bawihaaa a ni maww! A nih nang chu, Domino's kan hnaih alawm! Kan chah sak ang che! Kha i duh lo thlang rawh!" A ti ta mai! A va han hausa awm eeeem em!
Goldi leh Sangtei ka en chuan an lo ang phuau tawh, Mer-thangi ka va en leh, a mitmeng aṭang kan thil ngaihtuah a inang tih ka hre mai! Mipaho lah an bang lo!
Ruhmawiha lah chuan, "Awi! A tui hmel hlawm si! Thlan tur ber ka hrelo!" Chil lem dual pah hian a ti! Sangtein a bekah a lo beng chawrh! A â em bawk a ni! Hetiangah te chuan awm dân mawi tawk te hriat ve tur a ni ngai a!
Tichuan Ruhmawiha chuan pizza a ei laiin keinin chaw tui tak, thak bawk si, tui bawk si chu kan lo ei si ve huam huam a. Chaw kan ei lai chuan Aunty Jojo-i chuan T.V-ah Netflix a lo hmetchhuak zui! An van hausa awm eeem em!
Inah khan chuan smart T.V kha chu kan nei ve tho. Mahse ka pa khan Netflix tih vel chu sum a hek a ti tlat pek! Mahse ka dem hran lo, kan chhungten kan pawisa an puk nasa bawk si pek let leh nachang hre hlawm si lo, a unaunu te lah ni se chuti bawk, kei chu ka zia laaaai tak a ni zawk maw le!
A tukah chuan Will-a pa chuan water park-ah, a naute venna hnuaiah min dah a, amah chu hna lam buaipui turin an Office pui lamah a lo va kal dawn a ni.
Luh dawnah chuan security kal pelh phawt a ngai a, kan in-line rei hle... Will-a chuan, "Sawlaiah sawn thil lo va ei ru, tui chhungah thil ei an phallo a nia, in chhuak nghal peih dawn miahlo." A ti a, hmeichheho chu kan phit rang hle!
Vaiho ei tur zawrh chu kan han en diat diat a, Mer-thangin a thianghlim a tih deuh chauh min ei pui duh a, a bak chu, "Kha chuuu ei lo ang u, a ṭawp hmel si! Tu mawngkaw uih nge kan ei tel dawn hriat zu ni suh!" A ti nghuk zel a. Mahse a awm tho, min fimkhurpui mai bakah, hmuhsitna lam ni lo se,vaiho intihfai peih lohzia kan hre vek. An vai chuan an ni vek kher lovang, mahse thil zuar ṭhenjhat hi chuan "Sanitation" ṭha an neilo hle tih a hriat.
Puar spengs spengs-a kan va let leh chuan an lo la in-line thui hleee!
Sangtei chuan, "Kan reiiiiiii rei nen! An vah- an va hannnnnnn muang eeeem em!" Tiin a phun a phun nghal! Mer-thangi pawn, "Eng ang security nge ni ngaaai???" A lo ti a, Will-a te bul kan thlen hnu thleng chuan kan phun zui malh malh, kan chek tlak tlak reng mai a. Kan phei aṭanga 20 mins velah kan lut ve thei ta hram.
Kan lut chiah chuh! WOW hi a ni tawp!
Water-slide sang pui pui san zawng leh kul dan zawng inang lo an tam a, a thuk lai deuha tlakna tur te, a thuk lo deuh, naupang tana him chin te pawh a awm. Khua a ṭha si a, engkim khan min tiphir tlang vek! Bual In lam kan pan hma kha chuan...
Ka hriat ngai loh leh ka rin phak bakin a lo ṭawp! Bual In chhung tunah chuan tui a lo tling deuh pur hlawm a, locker te awm ve neuh neuh mahse a chhungah engmah kan dah duhlo, a bal tlat!
Goldi chuan, "Engtin nge tiangah kan inthlak angaa??? Engtin nge kan inbual ang?! Tenawm lutuk!" A ti cham chi a, Sangtei a lo uak bawrh bawrh! Chutah vainu pakhat hian, "Mary! Is there a Mary in here?" Vai awphawi deuh hian a rawn ti lauh lauh a, Mer-thangi chu kan kawk nghal vat.
"Ma'am,Mr. William is waiting for you outside, sooo, please come, you and your friends. Come, with your things please." A rawn ti ta mai! Eng nge thleng dawn chu ka hrelo! Mahse min rawn kotu hi a lo luh tirh ai khan ka hmu hmelṭha sawtin ka hria! Ka lawm ru hleee a ni.
Bual In aṭanga kan chhuah chuan Will-a chuan kuangkuah hnap hian min lo en a, Goldi a bulah a va kal vat,"A chhung saw a bawlh em awww! Engtin nge hetah intifai se min tih? Kan bal vek zawk dawn asin! Hei Sangtei pawh a luak lo chauh tawh a niaa!" A ti nghal chung chung.
"Eng nge khatah in lo kal dawr dawr?!" A nuih a za nge a thinrim tih pawh hriat theih mang hleih loh hian a rawn ti, "In lo kal thawt thawt zel aaa... Keini chu public restroom kan hmang dawn hleinem, private-ah sawn alawm..." Dam diaia a tih chuan kan thaw huai! Kan lawmzia mai chu eee!
William-an a kawhna lam pan chuan hmeichheho chu kan va tei hnep hnep nghal. Private room kan lo nei hi a lo ni a! An van hausa awm eeem eeem!
A chhung chu chutin a changkar vak bik lova, mahse private a nia, chuan a fai bik hlar bawk. Bual In kan va en chuan a lo fai khawp mai tak aaa, hmeichheho chu kan lawm lutuk a kan au chel chul mai!
Will-a chuan, "Tah hian in inthlak anga, keini pawh in bang lehlam lawkah hian kan awm aww. Fimkhur thu hlaah hmeichhia leh mipa pawh kan awm hran a ngai ve tho a." A ti a. Mer-thangin, "A! Chung te chu Chiang sa alawm! Kan bulah i inthlak vel chak hrim hrim a nih kha!" A lo ti. Sen ṭun ṭun pah hian, "A ni lo Merthang! A ni lo!" A tia a chhuak daih. Eng nge maw a hriat leee???
Kan inthlak zawh hnu chuan kan chhuak a, kan sawi theih awm chhun
"Awiiiiiiiiiiiii..." Ka heuva kan tih pah chuan kan hma zawna water slide pui tak tak te, an waterfall lem lem te, naupang infiamna bik te chu kan en a, tuia luh vat vat tawh chu kan chak a ni! Mahse... Mahse tihna tur a awm leh tlat! Mipui an tam lutuk! Ṭawng huat thu lovah, vai an zi luih luih mai!
"Awiii! Vaiho zun leh thlan tui, zak kha leh ek, kap leh zak khak tuar inchawhpawlh karah kan han cheng ve dawn chu a niah!" Goldi'n a tih chuan Sangtein, "Ek em em te chuuuu..." A lo ti. Mer-thangi ve thung chuan, "A bawlhhlawhzia a sawi uarna maaaai mai a nih khaaa!" A lo ti vat.
Kei chuan, "A ho emai! Cheng ang u cheng ang u! Zing a la nia a la thiang deuh anga, nakin tlaiah chuan thil kan ei daih mai dawn nia.
Naupang infiamna laiah chuan kan va kal phawt a, thla te kan la leh hrih. Kan mipaho chu tui chhungah an lo lut fel der tawh!
Will-a chuan inla pa fahran hian, "Di! Lo kal vat rawh! Tui hleuh ka lo zirtir ang che!" A rawn ti lauh lauh a, Moni-a leh Vanlala nen an han nui leh chuk chuk ṭhin ah! An va mawl tak!
Chutah leh! Goldi pawh chuan, "Aw ka lo kalll!" Tih pahin tunah chuan an zuang lut pawp mai ah! Tui hleuh te mai mai chu a lo hnehsawh teh eee! Will-a te bul a thlen dawn chuan a thiam ang angin nalh tak takin an hleuh vel a, mermaid hleuh kan tih ang te, a hnung zawnga hleuh te! "Khai aaa! A van bawn tak!" Ruhmawiha chuan kan bul lawkah ding pah hian a tih chuan kan en ṭhup!
Tui chhung aṭanga a chhuah leh pah chuan Goldi chuan dah vah pahin a sam a rawn vawrh a, a hmai tui awm a hui thlak pah chuan a rawn nui sen a, a pian lah chu an nalh eeem em! Kawng dek bawk, awm bawr nalh pangai ve tak, leh a mawi lai ber a khel bawr vel lian tak chu lehhh!ava han chhelo chiang tak! Will-a hi chu a inchhir lo ve ang. Saw saw ka ṭhiannu a nih saw! Ka chhuang a nia! Hmeichhe tam pawh en vauh vauh tham alawm a nih leee...
"Ti nge hetah i awm? Zuk lut ve ta cheee!", Sangtein a tih chuan, "Nahh! Ka hleuh thiamlo... Duh leh nakinah ka rawn inchiah huh ang..." Kawng dawm paha nisat avanga ner nuk chung hian a ti.
"Chuti a nih chuan Goldi leh mipa dang tih loh chu hleuh kan thiamlo vek tihna a ni maww!" Ka ti a, "Ruhmawiha te chu hmeichhia alawm a nih! Goldi ai a ni mai!" Sangtein a lo ti leh a, kan han nui leh har har phawt ṭhin a.
Will-a te kan va en leh chuan Will-a chuan Goldi a lo tihtauh khum ni ngei tur a ni! Goldi chuan Will-a a pawt ngawng ngawng a, "Nih leh khaaa! Min lo zirtir rawwwh! Ka thiam leh lo! Ka thiamlo niaaa! Tui hleuh ka thiamlooo! Min lo zirtir rawwwh!" A ti deuh chul a, midanghovin kan lo nuihsawh dun put put hlawm bawk a.
Tichuan slide lian leh pui takah chuan kan han tawlh ve dawn ta a, vawi khatah mi pathum an Chuang thla thei a, kei, Mer-thangi leh Goldi te kan tawlh hmasa a, kan hnungah Sangtei, Ruhmawiha leh Moni-a. A hmasa berah min la ṭhut tur zui! Keimaaah chiah a hmasa berah ṭhu ngam awm chhun ka nih vang te pawh a ni thei ang...
(Caution! : ten chhe deuh tan helai chu skip rawh u.)
Pool lai tak kan zuk thlen chuan pool tui ka lem pawp! A lum al thang puat! "Awiiiii! Pool tui hi ka lem!" Tih leh uak tuar tuar a rual a, ka ka ka ang a, chil ka chhak thul! Vai ek! Vai zun! Vai hnap! Nichinah pawh vai khak chhak lai Duduan ka hmu a la ti zui! Awiii! Ka pum duhtakah chung thil tenawm tak tak te chu an awm mek chu a ni siah! Awiiii! Ka ten den ultra pro max! Awiiiii! Luak a chhuak nghal! Ka uak nghal tuar tuar! Ka ten lutuk a e!
(Mahse in chhiar chak a in chhiar lui tho tih ka hria...)
"A pawi lutuk bawihteee!" Goldi'n a tih chuan Mer-thangin, "I kam va ṭhuah vat rawh eki! Awi ka ten lutuk!" A ti a min nam nghal dawr dawr!
Chil ka lem ka hlau khawp ah! Chil hmuam pur chungin ka va phei a, kan bual in lamah chuan ka va kal. Ka Kam ka ṭhuah zawh chuan ka phone ka en zuai a, Gidion-a chuan Mizo mi si lo, Northeast mi ni tho si ni awm tak mipa nen hian thla an lo la a, a bulah chuan hmeichhia a a ding ve bawk a, khawilaiah nge an awm a hriat theih mai loh. Caption-ah, "Old buddies!" Tih te a dah bawk. Eng lungkham vaklo chuan ka ṭhiante bul lamah chuan ka va let a, ka phei pah chuan Gidion-a nui mawi zet kha ka mitthlaah a cham reng. Sawi lo mah ila, tilang lo mah ila, amah ngaihtuah kher lo mah ila, ka thinlungah hian a cham reng a, a reh ngai dawn silo...
Kan bul thing zar kara ni zung rawn lang chuan khaw hmuh a tinuam em em a, vai ram khaw lum kara thli thaw heuh heuh te, naupang pakhat puarpuleng ham chhuah vana thlawk chiai chiai te chu ka thlir reng a. Adidi, tunah eng nge i tih ang le? Ka thinlungah hian i thi theilo asin... Nanga thinlung kha chu ka luah pha ve silo a tiraw???
Van lam en renga ka lo ding vung vung chu hnung lam aṭang Moni-an min rawn beng nghing dut a, ka awm dawr! Hawi pawh hawi lo chuan ka sir melh rum nghal hlur a, ani lah chuan tihsual neilo rilru thianghlim ber awm ziazang hian, "Eng ngeee, eng nge i lo melh vung vung aaa? Kha ice cream i duh ve em? Seh rawh." A ti a, a ice cream ei lai chu ka hmai zawnah a rawn dah. Vanilla hlang a nia, ka ei peih em em lo. Mahse min bem manah ka ti a, "Aw duh!" Tih pahin ka chhuhsak nghal daih! Ka kalsan pah chuan ka hnunglam aṭang, "Heyyy! Seh rawh ka tih ringawt khaaa!" A rawn ti lauh lauh. Ka ei zawh sak nghal vek! "Bleeeeeeh!"
...
"Naktukah Mumbai lamah kan insawn dawn aaa, motor-in zing karah kan phei ang." Will-a pan a tih chuan kan lo yess rual vat hlawm! Tu nge Mumbai, kan film star lar te tamna leh kan tetlai aṭang tawh a, M U M, mum, B A I, bai, Mumbai, ti lauh lauha kan lo zir ve kha a ni miau a!
"Mu hma ru aw, in thil te kha in theihnghilh ang e!" A tih pahw chuan awle kan ti vek! Mahse mut hma chu khawiah! Kan ṭhenawm lawm Field-ah chuan Justin Bieber a rawn concert a, zaithiam dang DJ Snake tih te, Marshmallow tih ang reng te leh a dang dang te an rawn che a, kan bathlar atang kan hmu thei vek si a, lo chhin ve ang mai kan ni!
JB-an Ghost tih hla a sak phei kha chuan ka lung a khawih sawk! A hla zûnah ka lo cheng lutuk a ka ṭap ṭep! Ka mittui chu a far ve sak kha.
Inchung dangah kan awm a, phai zawlah kan awm avangin kan bul vel in te, tlang te chu kan hmu phak vek a, veng hla tak tak pawh kan hmu thei ṭeuh mai! Thla a eng mawi em em a, arsi chu an eng ve chuan ka hria, mahse khawpui boruak vang te pawh hi a ni ang, an lang chiang vaklo. Chutah kan hmuh phak lawkah concert an rawn la nei zui a! Nuam her her tak a ni! Zu leh sa tlan ṭhin tan phei chuan zan duhthusam a ni mahna tih vel thleng ka ngaihtuah!
Kan bul lawkah Will-a leh Goldi inkuah veng veng te chu ka hmu a, Sangtei leh Ruhmawiha, Ehe! Mer-thangi leh Vanmala thlengin! Ka bul ami te chu kawppui an lo nei vek a nih hiii! Ava buaithlak! Min, 1, 2,3,4,5,6, min lo 7th wheel tir a nih hiiii! Hmelho hi leee!
"Eee! In va han tenawm hlawm tak si ve! Hmelho leh!" Ka tih chuan lehlam lehlamah Dudua leh Moni-a ten min lo kuah a, min han kuah nghat dun ngat ngat khawp leh nghal! Anmahni nam sawn dawr pah chuan, "Khawimaw ka thaw theilo!", ka ti vak. An vaia min lo en ṭhup takah chuan ka thinrim ka insum a, Dudua leh Moni-a te chu an ban kuahin hma lam ka ensan daih. Midang pawh chu pangai takin an awm leh mai a, hla chu kan tuipui hlawm nak nak khawp mai!
...
A tuk zing hma tawwwwkah, Mer-thangi chuan hmeichheho chu min rawn kaitho hlawm a. Engtin nge ka khumah hian ka zuan luh ta hre ta hauh lo mai!
Zing dar 4 a ni, khua a var ve ṭan tawh a, vaiho chu an lo zi luai luai tawh. Hengho hian mut an thlahlel ve chiam lo emaw ni? Nge khawpui lun laia kan awm vang zawk?
Kan insiam nghal sawk sawk a, Reception counter lamah kan chhuk vat. Motor pathumin min lo nghak a. Ahmasa ber chu Will-a pa leh a ṭhiante ṭhutna tur a ni, a dawt leh ah chuan Will-a te nupa leh Sangtei te nupa, Moni-a telin an lut a, kan motor hman hi mi paruk lenna chi a ni. A dawt lehah Mer-thangi te nupa, kei leh Dudua nen kan phei veleh thung.
Kan chuan pah chuan ka ṭhiante chu an muthlu nghal sap sap hlawm a, kei chu hla ngaihthlak pahin tukverhah chuan ka dak vauh vauh.
Mumbai kan panna kawngah chuan lui lian tak pakhat hi, khaw chhungah vek kan kan pel a, zing ni chhuak chuan a rawn ên tle va va a, hmuh a nuamin mit a tihah dam khawp tak mai!
Tichuan khua aṭang kan chhuah chuan lei verhah eng emaw zatah kan lut tlang a, lei verh leh lei verh inkarah te chuan in hlui tak tak, kan nu te pian ve hma daih tawha sak ni awm tak tak, hnah hringten an zâm hnan chiai tawh te, tui khawh thla mawi tak tak te kan kal pel a, an va han mawi hlawm tak!
Happiest Girl- Stephen Dawes hla ka ngaithla mek.
...
Mumbai kan thlen chuan Hotel changkang tak tih hriat takah tho hian kan thleng leh a, tun ṭum chu swimming pool te pawh an lo nei a, building hrang hrang awmin, anmahniin pool hran an nei vek! Kan thleng chiaha, Breakfast tui tak kan pindanah an lo chhawp : Pancake te, omelette sandwich te, thei tui hrang hrang te leh fruit salad te. Henglai ami te chu an changkang a, zing karah chaw ei lovin hetiang hian an lo ei mai ṭhin a ni awm e, nimin zing pahw khan chaw kan ei awm ka hrelo reng a ni! Zing thingpui leh neuh neuh deuh tlawng kha a ni mai.
Will-a pa chu hmeichhe pindanah chuan a rawn lut a, " Bawihi te u, in duh leh mu leh hrih rawh u, zing lamah meeting ka nei a, dar 10 velah ka lo let anga mawww, chuannn, Mumbai kan fang dawn nia awww!" A tih chuan hmeichhia tih takah hlim leh phur avangin kan au rual leh dual!
Will-a pa a chhuah hlan chuan kan ṭhianho chuan Hotel chu kan lo fang a. Inchung ber lift-a kan pan pah chuan lift-a darthlalangah chuan kan inen a, Sangtei chuan a darthlalang chu a nih hnai dik duk. Moni-a chuan, "Sangpawng, khati vaka in uluk kher a ngai ami leee? Hmeichheho tak hi chu aww!" A lo ti a. Sangtei ve thung chuan, "Ah-aihhh, chu lam a ni lo Moniii, camera thuhruk a awm nge awmlo tih ka en alawwwm." Pawisawi lo aw zet hian a lo ti mai.
"Eee! Niaa... En chhin ang!" Tih pahin ka va bih ve nghal vat. Mahse kan en kan en pawh chuan engmah kan hmu mai lo. A chhung a hmuh theih loh takah chuan camera thuhruk a awmlo angah kan ngai mai. "In va han honest suk tak!" Hnar thak nuai hruk hruk paha Ruhmawihan a tih chuan Sangtein a darah beng chawrh pahin, "Ringawt a che! Miin i thu lova I thlalak an neih I phal ami? Fimkhur tur engkimah hian!" A bialpa a biak tak avanga a aw tino deuh chung chuan a ti. "Kei ve teh lul thlalak an lo duh te chuaaaan, ka phal luttttuk alawm!" Ruhmawiha lah chuan a lo ti hmak! A mawl a nia awww he pa hi chu! Engtin nge maw Sangtei hian a duh theih zawk ni?!
Inchung kan han thlen chuan tumah an lo awm lo hlauh a, keimahniin kan tla vel mai mai a ni ber. Will-a iPhone ngei mai khan thla kan han la ta suau suau a, amah lah chuan a inphal mai siah! Reels te kan han siam thul, tunlai mi te tih dan vek! Mahse ni a sat deuhhlek avang leh a lum em avangin kan chhuk leh daih! Inchung awmlo tawp chu a ni lo a, thut hah damna neuh neuh pawh a awm, mahse a lum em a ni! Zanah haw thawveng paha awm nan a nuam khawp ang...
Hotel bul vela ei tur te chu kan va ei leh chuk chuk a. "Pawisa in heh ngeiii mai!" Tih pah chuan Vanmalan ₹150 man vai alu kan leh chhang chu a rawn lei ngal. "Tiin maw pawisa chungchang sawi ve khanglang a?!" Goldi'n a lo ti zaih. Tiang vel kha kan nia kan ṭhianho chu, ei tur a awm hi chuan kan neih zat a tam emaw a tlem emaw, kan pum a tlaina tur a nih phawt chuan hreh kan neilo. Vaiho thil lah chu tui ka'n ti eeem em khawpah! A thak sia, a khal dan a tawk chiah vel si, a tui ngang a ni mai! Pani Puri mawlh kha, Mer-thangin a ten chung chungin kan ei ṭeuh! A tui em a ni! Kan thih phah em lovang!
...
Tlai lamah chuan Mumbai dang tur chuan kan chhuak ta ngei. Mall-ah kan kal phawt a, engmah phei chu kan lei lo. Arcade-a kan kal chuan games hrang hrang kan khel a, pawisa kan man ṭeuh! Kan mipa te bike khalh ṭhang an ni bawk a, bike race lamah an phur em em ringawt! Will-a chuan Goldi nautelem duhawm deuh mai a dawnsak a, Vanlalan Mer-thangi Rubik's cube limited edition ngat, a dang pawh a dawnsak thei reng, mahse Mer-thangi khan a duh tlat a... Ruhmawiha ve thung chuan Sangtein chu lollipop bak a dawnsak theilo... Sangtei zawkin Ruhmawiha chu hot-wheels a dawnsak daih!
"Kan Ruhmawiha chu lehhh! A Thai boy tlat!" Moni-an a lo ti a. Kei chu Moni-a leh Dudua an awm aaa, kan pathumin thil lei theihna ticket tam tak kan dawng a, Duduan nautelem min mansak a, Moni-an Stress Ball Smiley face awm min dawnsak bawk. Ka hlim loh hlau reng rengin hemi te pahnih hian min buaipui a nih hi! Ka lawm tak tak!
Tichuan Planetarium lamah te kan kal a, kan thil hmuh chu leh! Arsi chanchin kan han hmuin kan ngaithla nghek! A chhung kha a thim vek avangin ka hlau ru hle a, ka bula ṭhu chu tu nge pawh ka ngaihtuah lo, a kawr ka man bet a, nghet tawwwkin ka man bawk! Light an on hnu chuan ka bula ṭhu chu ka en mai dawn a, a lo awm lo! Lalpa leh! Ramhuai kawr ka man te hi a lo ni thei mai ang em?! Ni lo turah ngai ang... huihammm... Hlute, a ni lo ang...
Kan chhuah pah chuan, "Ka fing nghal vekin ka hria! Ka thluak hian thiamna tak tak a nei tih ka hre thei! Kan la hmuchhuak lo mai mai a ni!" Ban vai auh auh paha titu chu tu dang ni lovin Moni-a a ni! A ngaihnaa! Pakhatah chuan a thluak hi a thawl ve em a...
A tawpah, tlaiah chuan Gate Way of India kan va thleng ta a, thla kan lakpui vel sap sap lai chuan ka hmuh tawh hnu ang deuh ka hmuin ka hria!
Goldi hnenah chuan, "Di, sawwww!" Ka ti chhuak ṭawk! Ka hawina lam chu midang zawng chuan an lo en ve a. "Gidion-a a va ang ve! Hetah te eng nge a tih le?!" Vanlalan a tih chuan Adidi-a mipui kara a bo ṭep chu ka lo va um daih tawh!
Adidi-a lu chu hnung lam aṭang ka en char char a, kamis a para ṭial hi a ha a, kekawr bul var nen... Mipui zi mer mer karah chuan a hnung chu ka va zui zel a, mi te chu ka nek nawk nawk!
"Adidi..."
Thawk la hap hap pah chuan,
"Gidion! I ni em???"
"Adidi... Adidi..."
Mi lo kal te chu ka nek tawp tawp a ni ber mai!
Nu pakhat phei chuan vai ṭawng hian min an khum nghal char char! Mahse, chu lamah rilru pe hman ka ni tawhlo! Ka thil mamawh taka tuihalin, ka mamawh tak chu ka pan a ni! Adidi! I ni em? Lalpa! Ani lah chuan ka auh hre lek lovin min kalsan vang vang si...
Mipui zi mer mer kal pel chuan hmun khatah chuan ka um pa ngei chu, a camera en malh malh pah chuan a lo ding zul a. Thawk la la huk. Ka hahdam deuh huai, ka hlauh hman emaw ka ti hman tawh a.
Thli thaw herh herh leh tlai ni tla turin a en a vang chuan a mawi em em a, suangtuahna lalfapa ni awm ang maiin, a mawi em em!
A bul pan chuan muangchangin ka va pen a, ka tha a khur...
Mahse min hmu ve si lo a, ka din lohna lam chu hawiin kal leh mai a tum!
"Gidion!!!" Tiin ka au vak! A bul ami te pawhin min lo en ṭhup! Ka zak leh hnuhnawh...
Ka lam a rawn hawi a, mak ti takin min en ta reng.
"Nang maw?" A rawn tih chuan ka bei a tidawng lek lek. Min hmuh a beisei lo tih chu ka hria... Mahse, a sawi dan key-ah kha chuan maw, min hmu kha a nuam a tih hmel viau lo...
Diktak chuan maw, tunah hi chuan va kuah pawp a, a hmui no tak saw va fawhsak nghal mai ka duh! Ka ngai che asin! Min ngai ve lo em ni? Min hmuh hi i thlahlel lo viau em ni? Ka thlakhlelh ang che hian min thlahlel ve lo em ni?! Ti nge engmah i sawi loh?!
Ṭawng lo pawh ni ila, ka mitmengah engkim a chhiar thiam vekin ka ring. Nge, min huatna khan a mit a tidel zawk?
A mit chu chiang takin ka en a, ka kutzungte a rawn za khur leh mer mer tawh! Ka zâm vang a ni. Ka ngai em a ni! Ka zak lutuk chu thil sawi mai nachang pawh ka hrelo! Ka bahlah nuai mai! Chhân pawh chhang lo chuan hnuailam ka ensam daih! Ti nge ka ṭawng chhuah theih miah loh a?! Adidi-a tho kha alawm! Lalrohlu! Ṭawng rawh!
Chutah, "Te, eng nge hetah i tih a?" Aw dam diaia hian a rawn ti ta a. Tun ṭum chu ngawih reng ka tum biklo... "Kan ṭhianhovin kan zin." Ka ti a, a mitah tak ka va en a, "Nang?" Tiin ka zawt let.
"College thilah ka chhuk lawk. Kan hotupa te nen dawrh tur kan nei a..." A ti a, aw dam diaiin min la chhang a, mahse min ngaih ve na khawiah mah ka hmulo, a tilang eih lo, a confi hmel em em ringawt! Ka ngei lek lek a ni.
Diktak chuan, eng indawrhna? Tute nen? Tu tu nge zin ve che u? Engtia rei nge in cham dawn? Tih te chu ka zawt chak lutuk! Mahse, ka induh ve deuh a ngai. Ka insum hram hram... Min ngaih ve hmel lo em mai!
"Umm a nih chu..." Ka ti ve ṭawk.
Kan bula tuipui chu ka thlirsan daih a, ni chu a tla ṭep tawh a, Arabian Sea an tih chu hei hi maw lo ni a? Ni tla tur chuan tuipui chu a ên tle sar sar a, tuipui chuan inthen dul dul chungin ni tla tur hnenah chuan, " mangṭha le, naktukah, kan inhmu leh dawn nia!" A ti a. Vana ni eng sen mawi tak chuan, "Ni e, naktukah kan inhmu leh dawn nia, thla kha min lo biak dawn nia..." A ti a, muangchangin a liam ta a.
Adidi-a nen chuan ngawi rengin ni tla lai chu kan thlir dun a, engmah kan sawi lo, kan ding dun reng tho.
Tua mah chuan eng kan sawi lo. Mahse inkalsan kan tum chuangin a langlo.
Ka mitsir chuan Adidi-a chuan thla min lo laksak tih ka hre thei. Ni tla tawh mah se, a la eng vek tho. Ka inring lo nasa mai siah! Mawla chuh!
"Hey! Lo la Suh! Ka la inring lo! Hey!" Tih pahin a camera ka va ban sak. Anin thiam takin min lo bum! "Hey! Hey! Delete nghal rawh! Eng nge ka thla i lak ve rikngawt!" Tiin ka rak nghal chiam! Ani lah chuan nui huk huk pah chuan min lo bum leh zel!
Chutah, "EHEEEEEE!" ... Goldi au vak thawm chu kan hria a, kan inchuh ta lo. Kan hawi let chu, ka ṭhiantehovin min lo en ngat ngat! Dudua chuan flash on ngat hian thla min lo laksak nghal! Hmela chuh!