Politician nupui

[Cck Lalchhuanawmi]

Politician Nupui Hring Nun
Political Love Story_Fiction
Chapter-13
Ziaktu: Cck Lalchhuanawmi


Politics a ngaihtuah nasat luatah, a fate a hrechang tawh lo.


A faten Taiṭita bula awm nuam an tih zawkna chuan a tina ngang a ni ang. Office-a inkhung miah loin a fate bulah a awm char char.


"Apa, hna i thawk dawn lo mi?", Lal Fanuin a ti a.


Sammy-a chuan, "Thawk dawn lo e, chhunah ka thawk zo tawh alawm. Zanin chu, chhuatah mu ang u aw", a fate a kuah khawm a.


A tuh rah a seng ṭan ni maiin a lang.
A fate chu a kuah ngawih ngawih. Chân a hlau tak zet zet.


"Chhuanpui, zanin chu, kan pindanah mutna siam tur aw. Kan chhungkuain kan mu ho leh ang. Ka Lal Fanu hian a pa bula mut a duh em?", Lal Fanu biangah a fawp zuk zuk a.


Lal Fanu hi chu, Nunna Thar a neihna a ni bawk a, chân a hlau bikin a hriat.


Lal Fanuin, "Apa, Elsa khum chu, min pe tawh la. A u te pawhin khum an nei, khum min pe ve rawh", a ti hmuk.


A hmui a tipawrh a, a inti lungnilo kual kikawi nasa lutuk.


Sammy-an ngaipawimawh zetin, "Naktukah kan ngaihtuah nghal ang aw, Lal Fanu tan Elsa khum kan siam ang", a ti a.


Lal Fanu pawh a lungawi leh ta e.


Kei aiin, a fate a hmangaih hliah hliah a, chân a hlau tak zet a ni. A kuah chhen a, an biangah a fawp awl lo.


Duat taka an lu tuai chang lah a ngah.


A lainatawm zawk asin!


Dar kua a rik chuan, Choka lama êng tithim pahin, "Mu tawh ang u hmiang, ha te han nawt fai ṭan pafa ula", ka ti a.


Sammy-an, "Anu thu awih ang u", a ti a. Nui ar arin an pafa thumin pindanah an inzui lut.


Êng ka tihthim zawhah pindanah ka lut a, mutna ka siam mawlh mawlh.


Bathroom chhungah thawm a ṭha mai sia. An lo chhuak a, an inhruhul mawlh mawlh.


"A mut theih e", ka ti a. "Apa bulah ka mu duh", Freddy-an a ti thuai. "Keimah, Apa bulah ka mu dawn", Lal Fanuin a ti ve bawk.


An pahnihin an han inhnial bap bap a.


Sammy-an an pahniha kuahin, "Ka bulah in mu ve ve dawn nia", a ti a. An dulah a dêk a, an nui khêk chel chul.


Siamtea nen thung chuan lukham kan siamrem.


Mut dawn tak takah chuan, ka bulah Lal Fanuin mut a duh tho. Euh euh mai hian.


A sirah Siamtea a mu a, a dawtah kei, a dawtah Lal Fanu, chuan Freddy-a, chuan Sammy-a.


Sammy-a leh Siamtea te chu a sir ve veah an mu.


A fate tui taka an muthilh hnu pawhin, a muhil ve thei lo. An mut dan a siam rem loh leh, an lu a tuai sek ṭhin.


"Sam, muhil rawh. I tiharh zawk ang", ti mah ila, min zâwm duh lo.


Ka bula mu Siamtea chenin a lo ngaihven peih nia mawle. Hetiang reng chuan, a tlaivar takngial dawn.


Ka ṭhu chhuak a, Freddy-a lukham sâwi a siamrem leh tur chu a kutah manin, "Sam, muhil ta che. Keima'n ka lo ngaihven ang", ka kut a vai sawn.


"Tihnat an nih loh nana venhim hi ka tihmakmawh a ni", mak ka ti lutuk chu, ka thinphu a chawl ṭhelh!


Tuin nge, naupang pawisawilo tina duh ang?


"Tumahin an tihnat ka phal lo, tu lak aṭang maha venhim an ngai hek lo, ka awm alawm",


Freddy-a biang chulin a thlêk ngawih ngawih, "Sam, muhil tawh rawh",


"Muhil zawk rawh, ngaihtuah ka ngai lo", a ti hmak.


Luhlul chhuah hun a ni lo.


"Sam, i thu ka awih loh avangin Lehkhabu ka chhiar tlaivar a, a rah chhuah i hriat kha. Ka thu awih la, muhil tawh rawh", ngen tak têa ngen ka ni tih hriain, a bu nghat nghat.


Inkuangkuahin, ka lam hawiin a saisir a, a meng kur.


Hlauhawm lutukin min en, "Muhil rawh ka tih kha", ka ti a. A che eih lo, a mit pawh a khap lo mawle.


"I muthilh hma chu ka vêng ang che", a ti khiah.


Chhâng duh loin, ngaihsak duh tawh loin ka mu ta daih. Luhlul chhuaha ka men(meng) reng chuan ka chau mai mai.


A tuka ka harhin Sammy ka en zat a, a lo awm tawh lo.


Bathroom-ah a awm a nih ringin, "Sam?", ka kik a. Chhângtu ka nei lo. Bathroom kawngkhar chu pawn aṭangin a inkalh lo a, ka nam deuh a, chhung lam aṭang pawha a inkalh loh avangin a inhawng.


Ka hmuh mai loh avangin Bathroom-ah chuan ka lut ta nge nge.


Ka chhuah chuan a lo mu leh diam chu niin! Awihlo lutukin ka thlêk ka thlêk. Min fiam a nih ka ring.


A mut tui a rinawm loh, a meng tlang mai thei bawk.


Nizan khan hnial luiin muhil turin ti tlat ila chu, a mut tui ka ring.


Mut lehna chi-ah ngai loin, Chokaah ka phei a. Nu Papuii lo thlen nan a la hma ve em bawk.


Chaw tui tur tuilum ka chhuang a, a thara chawhmeh siam a ngaih bawk avangin, chawhmeh siam tur la chhuakin dawhkanah ka chapdarh.


Alu kâwr vel mek laiin Sammy a rawn kal.


Thawm a neih loh avangin ka phu nghek a, Alu vel mek lai ka thloh phah.


"Sam, thawm nei ta che", Alu tla ka chhar pah a. Ka bula Chair pawt chhuakin a ṭhu.


Half pant vâr a ha a, tshirt vâr nghawng bial nen. Ka rilru a lêt tawh a, eng tehualah ka ngai thei tawh lo.


Dawhkan chungah a kiu nghatin min thlêk vung vung.


Engah mah ngai duh loin, melh pawh ka melh lo. Ka tihtur ṭhulh nan hman ka tum lo bur.


"Chhuanpui?",


"Sawi la",


"Min en teh", ka en chuang lo. Min ko lehin, en tur bawkin min ti leh.


Vawithum nan, "Chhuanpui?",


"Ngeee",


"Min en teh", a beidawng âw khûr ta mai si chu, ka en a, a khi vur vur.


Ka melh kal a nih kha, "Ka en tawh che, eng nge i sawi duh?",


A lu a thing nawk nawk, "Engmah",


"Engmah loah min ko tawh suh", ka bulah a rawn tawlh phei hrut hrut.


Min kuah ta mai chu ka phu zuk, "A mak e aw, Alu kâwr ka vel hi", min kuah nghet sauh.


Ka biangah te, ka nghawngah te leh ka kokiah te min fawp zuk zuk.


Tal laihin, "Sam, a mak e aw. Awm ṭha teh", ka tih pawhin min kuah bet nasa mai si a, tal chhuah chu khawilamah, ka kut ka tiche thei lo.


"Sam, Lal.Fanu a harh ṭep tawh, va kal thuai rawh",


"A harh hunah a lo ko mai ang che", a ti a. Dim têa ka khabe hmera min kuai deuhin ka hmui a fawp.


Min thlah a, "Zan lama tihtur, zing lamah ti ziah suh", ka ti chu, nui hak hakin a ding chhuak a.


Hnung aṭangin lo kun hniamin ka kâwngah min pawm. Ka biang a seh sawk sawk, "Remsangpui", ka ti hlak.


"Hmar lunglien aṭangin Hmar Hrangsie i ni tawh ang",


"I duh duh hian hming min phuahsak suh",


"Ka nupui i nih hi maw", hnial peih vel lo.


Ka bu nghat ringawt.


Nu Papuii a lo thleng a, ka bianga fawp zeuhin a kal nal nal. Va han phakar tak em aw...


Nui rah rahin, "Zing in tho nuam maw?", Nu Papuiin a ti a.


Kan tho nuam a ni ang, Lalsammy-a ker kur kha, a va mu leh dawn a ni ang. A tho ta sa sa, ei rawngte min bawlpui awm a nia.


"Tho nuam a ni ang", ka han ti ringawt a. Nu Papuii pawh a nui ver ver.


An pafain an lo inzui chhuak diah diah, Fianpui keng vah chungin, "Mutna in siam fel nghal em?", ka han ti a.


An inenkual hrek hrek, eng thu mah sawi loin pindanah an inzui lut hnak hnak.


Nu Papuiin, "A va han hahthlak tak em aw", a ti a. A nui kur kur. "Exam an zo tawh a, an tho tlai thei tawh khawp mai", ka ti mai a.


School ṭan hunah, zingah inkaihthawh erawh a ngai leh dawn thung.


"Chhuanpui, fate avang hian nupa hlim lo tak te pawh an inpawm ṭang ṭang ngai a ni a. Samuel-a nen hi chuanin, fate avang ni loin nupa inpawm hlim tak leh inawmtlei tak han ni teh ula aw ka ti mang e".


Awi ka nu le?


Nu Papuii chu aw...min tibuai dawn alawm.


"Nu, ṭan kan han la chu a nih ve hi", ka ti mai a. Nu Papuii chu a tihlim tak zet tih hai rual a ni lo.


Kan tan Nu a nih lohna tur a awm bik chuang lo a, duhsaka a thu min hrilh chu ka vawng reng.


Nu Papuiin fate avanga nupa hlim lo inpawm ṭang ṭang a tih chu, phat rual loin dik ka ti.


"An nupa an hlim loh tehlul nen, inṭhen mai sela an tan leh an fate tan pawhin a nuam zawk ang", tih te hi ka lo zeldinna a ni ve ṭhin.


"A pasal a sual tehreng nen, kut a thlak nasat theih nen, engtin nge a chhuahsan loh zawk le? Kei chu ni ila, ka chhuahsan vang vang ang", tih te hi, pasalin a nupui kut a thlak ka hmuhin ka lo zeldin ṭhin.


Zeldin leh a tak ram inthlauhzia ka tawng mek chu a ni si.


Ṭawngkam dengkhawng tak tak ka ngaithla a, bungrua ang maia Thinlung leh taksa hliam ka ni bawk.


Ka pasal hi chhuahsan vang vang tawh tur ka ni.


Mahse, tun thlengin ka la chhuahsan lo chu a ni bawk si.


A chhan pawh, kan....kan....


Beram pathumte, kan fate avangin a ni!


Aw khaih aw...!


Fate hi chu, an lo va hluin an lo va zahawm tak em!


Taiṭita nen kan inhmu thei tawh lo. Message-in kan inbe thei ṭawk. Call lah a hman ṭhat theih fumfe lo.


Sammy-an min vêng hneh em a ni.


Min vêng ka ti lo thei lo, hmanhmawh thil emaw pawh ni loa chhuah a ngaihna tawh phawtah chuan min hruai ziah.


Min tihlawm loh hlau reng renga khawsa a ni ber.


Rilru a lêt tawh tlat a, eng he hu-ah a thawk tawh si lo a, lainat taka thlîr vawng vawng a ni mai.


A hma kha chuan, min bawh hiam huam tawh chuan ka nêm a, ka ring thei hle a nih kha.


Tunah zawng, khatiang rilru kha ka pu thei tawh lo.


Beram pathumte chauhin min tihlim a, min nuntir tute ber an ni.


"Chhuanpui, naktukah ka zin chhuak dawn a, min lo zui rawh aw", Gas bula ding ka ni a, ka hnunga bei thlawp khawpin min kuah.


Nu Papuii a awm ve reng, ka zak peih tawh lo.


Ka kâwngah min kuah nghet lutuk ringawt.


"School an ṭan leh tawh hi, engtin nge ka lo zui theih ang che", ka ti dam diai a.


Biak chhiat hlur ringawt chu ka duh bik lo. Chutiang turin âwki sâng a hmang bik si lo a.


Ka nghawng a fawp dan dan a, a thaw leh ham ham ṭhin.


"A nih, ka lo haw hma ang", a ti ta a. Kokiah a chal a nghat.


Ka dul zawna a kut chu vawn(vuan) hnanin, "Thil ṭha tâwkin ka lo hmuak ang che", ka ti sep.


"I chiang maw?",


"I chiang zawk em?", a lo hawi chhuak a, a nui suk suk.


Ka biang a fawp vawng vawng.


Nu Papuii a khuh kharh kharh, "Insum hram hram teh u, Lal Fanuin Chhang(unau) a nei dah ang e", a lo ti.


Sammy pekin, "Nu, Lal.Fanu chuan Chhang nei tawh mai sela tiraw?", a han ti.


Nu Papuii chu a khi ṭhaw, "Nei tawh rawh se, Tu hmel hmuh leh a châkawm alawm", a ti leh.


Sammy chu a nui vur vur.


Naupang School kan hruai a, chumi zawhah Dawrah kan pêng.


Nancy-in a nauin Cake a lei thu ka hrilh tawh avangin, Sammy-an cake leina tur a pe a.


A nau hnena lawmthu hrilhsak turin a chah mawlh mawlh.


Kan haw a, a Office kan tifai dun.


"Chhuanpui?", min ko leh ta.


"Nge, min koh reng a?", ka ning lutukin ka vin ṭhat.


A nuih a za em em mai lehnghal a. "Engmah", a ti leh ta.


"Sawi tur i hriat loh chuan min ko tawh suh", ka hmui a khûr dar dar.


A nuihza insum hmel chuan min tikhûr zual. Ṭul lo lutuka inkoh vak vak zel mai. Sawi tur hre ngai tawp si lo.


Lal Fanu hruai a hnai a, insilfaiin ka insiam malh malh.


Ka insiam zo a, Sammy insiam mek chu ka chhuahsan daih. Mi hi koh peih lutuk a, ka ning zozai.


Pindan aṭanga a lo chhuak chu, "Chhuannnn", a rawn ti dek dek a, "Remsangpui", ka auna lamah ka hah vek thei.


Rang mangkhengin pindanah a tlan lut.


"Lo chhuak vat rawh", tiin, pawt tâwkin ka au zui a.


Ṭi dâkin, nui tat tatin a rawn chhuak.


"Khati pui khan awm suh, naupang i nih loh kha", a koki a sân ak ak chu a tawp chat a.


A khi ṭhaw chu, "Khiang rah i nih loh chuan tûm hmuk rawh", ka ti a. A tûm hmuk.


"Ka bêng châk lutuk che", tia ka kut ka phar chhuak uaih chu, a lo indang.


Bên ka tum tak tak tawp si lo, "Kan tlai dawn", ti hlakin, ka hnungah min zui ve mai.


Lal Fanu hruaiin, haw kawngah Traffic jam-an kan tâng ta tlat.


"Anu, Glass down ang", a ti a.


Seat hnungah kan pathumin kan ṭhu. Sammy-an min vêng ka tih tawh kha.


Darthlalang ka tihniam a, mahse; hmuh loh tur ka hmu ta. 'Kan' ti zawk teh ang. Sammy-an, "Princess, helama Glass hi down zawk ang hmiang", ti pahin, ka lama Darthlalang chu a tichho.


Eng ka hria nimaw, Sammy-an Darthlalang a tichho chu dan(dang) tuma kut han phar chhuah mai ka duh.


"Apa, ka lo down", Lal Fanuin a ti a.


Sammy-an min ngaikhawlo ang tiin, hre lo ang hmakin ka awm a.


Lal Fanuin Darthlalang a tihniam tur chu, "Ka lo pui ang che", ka ti a. Sammy bulah ka tawlh phei.


Lal fanu chu Darthlalang ka tihhniam pui a, Traffic jam pawh chu a thawl hret hret.


Kawngsira Taiṭita leh Manoi te indinchilha, titi siam siam chuan emgtin emaw tak hian min run!


An pahniha an inhriat awm ka hre si lo.


In kan thleng a, Siamtea leh Freddy-a hruai tura kal a phal tawh lo.


Sammy pawhin a hmu chiang em a ni.


Manoi kha a nui sen sen a, a inchei nalh bawk si. Taiṭita pawh khan, Manoi kha lungchim takin a thlêk chiang a ni.


"Sam, kan lo kal ve ang", Lal Fanu ka pawm a, "Inah lo awm rawh u, Siamtea leh Freddy-a an rilṭam thut thei, ei tur lo siam zawk ta che", a âw chu ngaihthlak a nuam lutuk a, ka muthlu ṭep alawm.


Hnial loin, a thu angin ka awm.


Lal Fanu nen kan inbualfai a, ei rawngbawl a la hun loh avangin khum chungah kan mu mai mai.


Ka phone-ah Youtube a en a, Taiṭita leh Manoi ka hmuh dun chhan ka ngaihtuah rauh rauh.


Chutah, Coffee in paha Taiṭita nen kan inhmuh ṭum a, a thu min hrilh zawng zawngte chu, hrilhfiah ngai tawh loin, chiang takin ka hmufiah ta vek.


Taiṭitan Sangsangi a tih chu Manoi niin, a pasal hlui a tih chu Sammy-a.


Muangchangin ka tho, "Sangsangi ka duh", Taiṭitan a ti a. A nihna takah, Manoi a duh zawk tihna.


Taiṭitan High School-a duh ruk a sawi te, keimah maw ni a?


Aw Lalpa le!


Manoi chuan kei leh Sammy-a kan inṭhen theih nan Taiṭita-ah a ṭuan a, Taiṭita nen lo induh pawh ni ila, Sammy-a chuan min ṭhen ngai dawn lo tihna!


Thaw a pik lutuk chu, au vak vak ka.châk lutuk.


"Lal Fanu, ice cream lei ang, a u te an lo hmain", ka ti a.


A duh ve mai.


Chhuah harh loh chuan, ka â thei mai dawn.


Engtin nge ni zel dawn le?


(Zawmna)
Sammy te pafa an lo haw a, "Anu, ka ril a ṭam", Freddy-a a lo tlan lut a, min hnu chu ka kâwngah min kuah thlawp.


"Ei tur tui tâwk a awm", ka kuah let a.


Siamtea pawh a lo lut khi vur vur. KFC a lo khai lut a, Sammy-an Sprite bur lian mangkheng pathum lai a lo pawm lut bawk.


An inbual zawh veleh KFC kan ei a, zanriah ei a har ngawt ang le.


"Sam, zanin chu Nu Papuii lo kal lo mai se ka ti, KFC avang hian chaw kan ei theih ka ring lo", ka ti a.


"Ka'n hrilh ang e", tiin, a tho a. Nu Papuii a be nghal.


An unau thuma an pa hoa lehkha an zir laiin, kan ei hnawkna leh a hmunhma ka tifel a.


Alu kâwr ka vel lai bawkin, Sammy chu ka bulah a rawn ṭhu a, bengchheng loin Alu kâwr min velpui ve.


"Chhuanpui?", ka chhâng lo a, ka ngawi reng. "Hmar Hrangsie(thinchhia tihna) kha i ni em?", Manoi leh Taiṭita te awm dun hmu lo ta ila, hetiang hian a awm tho ang em le?


Min ko tawh lo a, ngawi rengin Alu kâwr a vel.


Ka ngaithiam leh si lo, "Lehkha va zirpui ta che", en chuang loin ka ti a.


Mitsir erawh chuan, ka biak avanga a lawmna a hmuh hmaih lo.


"An thiam lutuk", a ti liam ringawt. "Zanriah tui mangkheng kan siam dun dawn alawm", a ti leh.


"I la inbual lo",


"Hun a tam em mai", a nui suk.


"Naktukah i zin chhuah dawn kha", ka ti leh hram. "Chutiang a ho",


"A ho lo, va inbual rawh, a nih loh chuan hei hi ni mai", chemtê ka kenin ka tin.


Hlau awm ang takin a meng phawk a, tho tharhin, "Aw le, Hmar Hrangsie".


A kal hnuin ka han nui sak, min koh reng khan ninawmah chang mah se, min koh reng loh chuan ka awm thiam lo.


Chaw ka chhum tam lo a, KFC kan ei nasa bawk a, tuna ka chhum pawh hi a chanve kan ei tlingin a rinawm loh.


Rimtui chem chemin Chokaah a rawn kal, "Fai ṭha maw?", ka ti a.


A duh lo vel lutuk, min rawn panin min kuah a, "Thawmhnaw min lo siampui la", ka nghawngah a hmui nghatin, boruak a hip lut kâwk.


A hnungah ka bêng hlak, "Chaw ei hmain insiam ila", a ti a.


Khum chungah min ṭhuttir a, a insiam lai min thlirtir. Ho tak tak a ni.


Amah leh amah a inbe thul, nuih sen senin ka thlir a. Ṭah a chhuak zawk. Nidang ang chu nise, fiamthu nan a inhmang a, ka tipunlun ngei ang.


Fiam ngama a awm lai tak.


Engin nge ka rilru tichawmawlh ta pawh ka hre lo.


"Ka insiam zo ta e", a kâwng dawm meuhin a han ti a, a hah bik hliah hliah.


Min kaitho a, "Chaw ei ang u hmiang, ei tur tho tho a nia, a tlai zel e", a ti a. "I sawi dik chiah, Pu MLA", ka ti chu, a nui hak hak.


Ṭawngkam bungrua hman tur a ngah em a ni. A thiam bawk si.


Chaw chu kan ei thei lo tak tak a, ka chhum tlem chu lawm tak ka ni. Lal Fanu chauhin a ei ṭeuh. A chawhmeh duhzâwng tak a awm tlat a.


A tuk chaw ei khamah Sammy chu a zin chhuak tawh a, Duhsaka min hnutchhiah.


"Hruai mai mai rawh, midang an awm tho a", ka tih pawhin, "Duhsaka chu ka ring ngam alawm", a ti mauh mai.


A chhan zawh ka tum lo, ka hrethiam nghal vek chu mak ka inti letling.


Mipaah a Driver Duhsaka a ring tihna.


Driver dang ho pawh awm se, ka ngaizâwng duh dawn tawp si lo.


"Chuti, ngaihngam deuhin kal ang che. Ṭha takin hna thawk bawk la aw", ka kuah a.


Eirukna lehkhaah a hming ziah hnan tawh lo se ka ti mang e.


A hnathawh ka ngaihven lohna lah, a va han rei tawh tak em aw...


School aṭanga ka haw hnuin Thenzawla ka nu nen kan inbia. Sammy-a hnena pawisa an dil chhan ka hre duh.


Chhan ṭha tak a ni ngei tur hi a ni ringawt.


"Nu, ka uin Sangha Dil aṭangin a la lut ṭeuh a, nangin Puan Tah Zirna i hawng bawk. Ka pa lahin pension hlawh a la a, ka awm lai khan Lehkhabu Dawr aṭangin ka la lut bawk. Ka awm loh hnu pawh hian nghei thei dinhmunah in ding lo, engtizia nge ni ngai?", ṭah a chhuak ṭun.


Pawisa hi a hlu takmeuh mai, mahsela; dik lo taka lak luh hi chu tih mi a ni lo.


Ka nu chuan, "Chhuanpui, kan duh avanga dil kan ni bik lo asin", a lo ti a.


Rin ngam harsa ka ti tawh.


"Nu, kei chu lo indah ṭha ta ila, Sammy-a in timualpho der alawm. MLA a nih hmaa an sawiselna zawng zawngte i hriat ve vek kha, tunah; mualpho takin a awm leh tawh", ka ngawi ta a.


Sawi ṭeuh duh mah ila, pasal thlavang hauh kan ni dawn. Ka hauh der tawh zawk.


Tin, ka nu a nihna a la bo.chuang lo, a.chunga ka lungnih lohna zawng zawng hrilhhriatin a sawhsawlawt dawn chuang si lo.


"Nu, pawisa in dil chhan a awm ngei tur a ni, i fanu ka ni a, min han hrilh ve teh. Nge ni a, pasal ka nei ta si a, i fanu ka nihna a bo ta tihna em ni?",


"Chhuanpui, ka fanu i ni a, engtiklai pawhin ka fanu i ni ang, i ni reng bawk ang", ka nuin a lo ti thuai thuai.


Ka nu chang ni loin, keia pawh chu ka lung a chhia.


"Chuti, min hrilh ve rawh. Nu, min hrilh ve teh, ka pasal hnena pawisa in dil chhan hriat ka phu ve lo vem ni? Maw, ka nu, min hrilh ve rawh", ka ti ngawih ngawih.


A duh chuan Sammy-an min hmusit thei, a tilang lo mai pawh a, min va han hmusit dawn rua em aw...


Pawisa indil hian chhan a nei a, chhan awm loin pawisa kan indil emaw inpûksak emaw ngai ngawt lo.


Ka nu chuan min hrilh thei lo, eng fakauin nge pawisa chu an mamawh ang aw?


Sammy-a reng reng pawhin min hrilh ve eih lo chuan, min tithinrim ṭun tawh.


Han zawh dawt ka ngam mai bik si lo, ka hria tih a hre tawh ngei ang. Ka nuin a hrilh loh leh, Fb ka khawih tih a hria a, chuta aṭangin ka hria tih a hria ang.


Naupang ho muthilh ṭhep ṭhawp hnuah Sammy-a nen kan inbia a, a Bial Fan chungchang ka zawt.


"Nangpawhin i hriat kha, mi zawng zawng lawm zâwnga awm hi chu a theih loh. Party dang an che lo thei lo bawk si a", a lo ti a.


A ngui nghiaiin ka hre mai.


Tun hnai têa ka thiltawn hian min tichawmawlh em a, duh angin ka ngaihsak ṭha fumfe lo mai chauh a ni a.


Serchhip Bial a zau a, mipui zawng zawng a tilawm thei dawn lo tih chiang sa.


"Sam, ṭanpui tur chein ka awm reng a nia aw",


"Yes, of course, I know. Ka Hmar Hrangsie i ni tlat a", a nui tat tat.


Hming maksak deuh deuh hi min phuahsak a ching riau.


"Hrangsie awmzia i hre ringawt em ni?",


"Thinchhia tihna", a lo ti sam et.


Kei chuan, "Hmar nupuia min nei hi i intithei nge, min elsen?", ka ti a. Min chhân dan tur ka hriatsa avangin, "Ka intithei", a tih chu, a sawi rual chiah chiahin ka lo sawipui.



A nui hak hak, "Engtin nge ka sawi tum i hriat theih zawk a?", a lo ti khauh.


"Ka pasal i ni a, hrechiang tur che chu ka ni dawn lo'm ni?", a lo nui leh hak.


A dik tih a hriat, dik a tih loh pawhin a dik tho tho. Mahni pasalte chu, kan hrechiang ve bawk ang chu le.


Kum hnih chuang lawih kan innei tawh a, mahse; hrechiang inti hle chung hian, min ṭhawng leh thut chu a nih ṭhin hi.


Tukṭhuan ei laiin kawngka an lo kik, Nu Papuiin theihnghilh a nei emawni ka ti hman.


"Lo lut rawh", ka ti a. Nu Papuii ni tura ka lo ngaih chu Manoi lek.


Dawhkan aṭangin ka tho lo, ka ṭhu reng.


A mawi tehchiam si lo, "Lo lêng rawh", ka han tisatliah a. A kimki deuhin ka hria.


Freddy-an, "E he! Anu chu", mak ti zet hian a ti a. A ngai thlu ngang a ni ang, a ṭhutna aṭanga thoin a va kuah.


Siamtea chu a ṭhu ngawi reng. "Siamte, Anu a lo kal hi, va chibai la. Mano, lo ei ve nghal ta che. Kan ei laklawk si, ei pahin kan titi ang a", ka ti chhuak thei ṭawk.


"Nidangah ni rawh se, a fala Sammy-a biak ka duh a, phone call.a chhâng thei si lo, ka lo kal tawp a nih hi", a ti ve mai bawk.


Freddy-an, "Anu, chaw chu ei ve la. Mawh, Keima Nu sawn chaw a chhum thiam lutuk", a ti a. Min lo nuih ver ver.


"Anu, Api saw, a uin Anu a ti a nia. Nangmah pawh, Anu a ti che sia, eng nge awmzia?", Lal.Fanuin a ti heu mai.


Ka tâng ta chiang khawp mai le.


Deusawh takin Manoin min la melh kal zui.


Sammy-a awm loh a châng chiang a ni.


"Lal Fanu, Nu zawng zawngte hi kan Nu vek alawm", Siamtean a lo ti.


"Siamte, nakinah keima'n ka hrilh dawn nia. Mano, thlêng ka lo lak ang che, chaw lo ei ve rawh", thlêng ka laksak a.


Nui ver verin Freddy-a chuan Manoi chu dawhkana lo kalpuiin, a bulah a ṭhuttir.


Lal Fanu pekin, "A u, Nu i neih tawh kha, keima nu Anu ti tawh suh. Keima Nu bik bik a nih hi", a ti leh tawh.


Manoi chu chaw khawrh thuai thuaiin, Lal Fanu bulah ka ṭhu thla thuai, "Lal Fanu, khatiangin an ti ngai lo. McDonald hi ei daih rawh", ka ti a.


Beram pathum te hi awm lo se chu, dam takin âw ka chhuah lo ang mawle.


An hmuha âw sâng hman(hmang) a, Manoi hnawhchhuah ka duh si lo.


"Ka nu a ni ve tho, Anu, ka nu i ni ve tho tiraw?", Freddy-an a ti leh ta. Buaina a inṭan leh dawn ta e.


Manoin, "Bawihpui, a u Siamtean a sawi tawh kha. Nangmahni Nu te ve ve kan nih hi. Tiraw, Siamte?", a ti kher chu, ka lo ngaimawh.


Siamtea chuan a chhâng duh lo, vawihnih chaw a bar a, "Anu, ka puar, ka insiam dawn", tih leh thawh a rual.


"Keipawh, ka puar", Freddy-an a ti a. "Keipawh", Lal Fanuin a ti a.


An unau thumin insiam turin an tho dial.


Manoin a thlir zui vawng vawng.


An awm ta lo bawk a, ka duh danin ka ṭawng thei ta.


Nu pahnih kan inhmachhawn ta ran mai le.