Politician nupui

[Cck Lalchhuanawmi]

Politician Nupui Hring Nun
Political Love Story_Fiction
Chapter-14
Ziaktu: Cck Lalchhuanawmi


An awm ta lo bawk a, ka duh danin ka ṭawng thei ta.


Nu pahnih kan inhmachhawn ta ran mai le.


Manoin, "Anmahniin an insiam thiam em ni? I insiampui dawn lo em ni?", a ti a.


Tunhma rilru ka put thei tawh lo, Manoi chu lainatnain ka khat ta tlat. A pasal uiresanin, tunah; neih let tumin a bei mek chu a ni a.


"Siam pui an ngai tawh lo, mahniin an inenkawl thei tawh. Chaw kha ei la", ka han ti a.


"Heta ka lo kal hi i duh chiah lo em? Sammy-a be thei ila chu ka lo kal miah lo ang", Manoi chuan thinrimkhum turin min duh.


Thinrimkhum lam reng a lang lo, ka da ngawih ngawih.


"Sammy chu a zin a, a zin chhuah tawh chuan call a chhâng har thei lutuk. Min lo call hun kan nghak tawp zel mai", ka ti a.


Chaw ka ei pah, Manoi thung chuan chaw reng a ei lo. Thlêng pawh a inhun ngai ngaiin a inhung.


"An insiam zo ṭep tawhin ka ring, chaw kha ei vat la, School-ah kan thlah dawn nia", ka ti a.


Ka thawhsan daih.


"Ka rilṭam love", a ti bung deuh a, a inthiamlo deuh nge ni, "Lo kal hmain ka inhnawhpuar tawh alawm, ka lo sengfelpui ang che", a ti dam diai a.


Hnial ka tum lem lo, min sengfelpui a, a lawmawm zawk.


Duhsakan School-ah min hruai a, Manoi chu Seat hmaah a ṭhu. Freddy-an a Nu a be reng a, Lal Fanu lah a inrawlh ve ziah bawk.


Han khap em em tum hran lo mah ila, "Lal Fanu, a u tibuai tawh lo la", ka ti leh ṭhin.


A han ngawi ren rawn ṭhin a, a u bawk a be buai leh ṭhin. Siamtea thung chu a ngawi reng.


Manoin han be mah se, a chhâng duh lo a, chhâng tura han hrilh ka duh tlat lo pek bawk a. Huizzz.


School-a kan thlah hnuin, "Inbia ang", Manoi chu a pawr titih. Sawipui tur ka nei lo. Biak hi ka châk zawk zawk lo.


"Inbia ila", ti ve satliahin, Thingpui Dawrah ka luhpui a.


"Chaw eina a la rei lo bawk a, Thingpui in ang aw. Khawngaihin thingpui No hnih min lo pe", ka ti a.


Manoin a hnial lem lo.


Thingpui min lo pe a, "Han sawi la", ka ti vah a. Mak tizetin min en.


"Sawi tur i nei zawk lo em ni?", a ti hâ mai. Ka sawi leh pek ṭhin ang, tunhma rilru a bo zo tawh a, engtiang pawhin lo awm se, engthil pawh lo ti se, ka ngaipawimawh tawh lo.


"Nei nang, inbia ang i ti si a, i nei turah ka ngai", ka nui sâng a.


A mak ti chu hmuh hmaih theih a ni lo.


Manoin, "A nih, Sammy-a lo haw hunah min lo hrilh thei ang em??", a ti chu, "Hrilh thei lutuk e a, min lo call hunah call tur chein ka lo hrilh dawn nia", ka ti a.


Thikna pawh ka nei tawh lo, zângkhai takin ka chhâng.


Ka thin tihrim a tum ṭang ṭang, "Aizawla a awm hi chuanin, duh hun hunah ka ko thei mai zel asin, han sawi tawp mai ila; a duh hunah a lo kal tawp zel bawk a, nuam a tih angin a che tawp zel. Atan chuan, ka engkim hi ka hlan phal", intithei taka a ti chu, nuih a tiza.


Thingpui ka in zo a, "A ṭhat chu, naupang ka enkawl atalangah, a chang chuan min duhkhawp lo deuh hian ka hre ṭhin. I awm a, ka lawm lutuk", nui sângin ka ti a.


"Thingpui ka in zo tawh a, ka kal mai ang. Kan in man chu ka han pe ang e", Manoi chu han nui mah se, a lungni lo zâwng emaw thinrim emaw zâwnga ka ṭawngkhum lo chuan a ṭhawng tih ka hria.


A ho lutuk, an nun a ni a, an duhthlanna a ni a, an duh danin an hun hmang ang hmiang.


Puitling ṭhuau kan ni a, kan tana ṭha leh ṭha lo tur kan thliar vek thei tawh.


Manoi ṭawngkam khan min tina lo ti ila chu, dâwt a tel. Zaa bial lekin ka na thung.


Hmachhawn dan leh dawnsawn(dawngsawng) dan ka zir mai a ni.


Motor-ah ka chuang lut a, Phone a ri. Taiṭita ni rengin.


Ani pawh hian min bumah ka ngai tawh, mute-in, "Duha, Dawrah pêng ang aw", ka ti a.


Dawr panin kan chhuak.


Taiṭitan vawithum min call pawhin ka chhâng duh lo. Sammy, Manoi te leh amah nen lam hian an ṭangrual vekin ka hre tawh.


Nancy leh Hriati ten Nescafe an lo in a, min thlit ve nghalin, "Au Chhuanpui, i lo kal chu ka va han lawm tak, hrilh tur che ka nei a", Nancy-in a ti chu, "Eng thil nge ni ta a?", ka lo ti a.


"Bân a tum, nizan aṭangin ka dang ṭang ṭang tawh", Hriatin a lo ti hmanhmawh. Nancy-in a hnungah a bêng hlak.


A chhan ka zawt vat, "Singapore-ah hnathawk turin ka kal dawn, ka Nutêin Passport leh Visa min lo siamsak vek ang. Chubakah, chhungkaw dinhmunin a zir lo ve bawk nen. Au Chhuanpui, vawiin chauh ka lo kal thei tawh ang, naktuk aṭanga chawlh ka ngai", Nancy chuan a ti dap dap a.


Chawlh a huphurhzia a sawi niah niah bawk, Singapore-a hna hlawh aiin, kan rama hna hlawh hi chu a tlem em bawk atin ni.


"I ngaihawm dawn hle mai, tluang takin kal la, dam tak leh hlawhtling takin lo haw leh rawh aw", ka ti a.


A hlawh bituk zât aia sâng hret ka pe a, "Hlawh kan lak tawh kha, a mawi lo em mai", min hnar nasa.


"La rawh, tihsak theih che ka neih loh em hi, theih chu nise; chhungkaw din chhuah theih rawkna tur Hna te hi inpe thei ila ṭha tur. I ngaihawm dawn lutuk", a bag-ah ka khung sak.


Sen ṭan ṭanin, "Ka lawm lutuk, ka lawm tak tak a ni. Heta thawh reng ka duh nen, tun dinhmunah zawng; hmun hla lam pan ka ngai hle a ni, Au Chhuanpui, ka lawm rualin pawi ka ti", a mit tui a hnâm ṭiam ṭiam.


Ka unaunu han ni hlauh sela aw...


Pan hnaiin ka kuah a, "Chhungkua hi a pawimawh ber, i ti ṭha lutuk ringawt", hei bak sawi theih ka nei bik lo.


Tlai bân dawnah, Cake leh Coke(Sprite emaw ang chi) kengin, kan nufa zain Dawrah kan kal.


Nancy thlahna hun kan hmang, "Ka ngai ngawt ang che, I miss you!", Lal.Fanuin a ti a. Nancy nen an inpawm vawng vawng.


Siamtea leh Freddy-a chuan an hre vak lo naa, "I ngaihawm dawn e", chu an ti ve.


Nancy-in, "In Nu chungah hian ka lawm teh a nia, nangni deuh in ngaihawm. Au Chhuanpuii thu lo awih ṭha ang che u. Chuti lo chu, ka lo haw hunah engmah ka hawn lo ang che u", a ti hmiah hmiah.


Hriati nen kan nui kur kur.


"Kan awih dawn lutuk, thil ṭha deuh min lo hawn rawh aw", Siamtea leh Freddy-an an ti ve mai.


Mu tura kan intintuah hnuah, Sammy-an min lo call.


Lal Fanuin, "Apa-in a lo call", tiin, a nui ver ver.


Amahin a be hmasa ber, "Apa, I miss you", a ti a. Sap ṭawng hman(hmang) an uar dawn tlat.


Ka lo ngaimawh ṭhin.


"Anu awm em?", a zawh ka ring reng a, "A inthiar", Lal Fanuin a ti a. Sawi turin ka hrilh miah lo.


Hmâa mi kha a la hre reng ni fahmiang.


Loud Speaker-ah ka dah a, mu chungin Lal Fanu leh Freddy-a ten an be char char. Siamtea a ṭawng ve miah lo.


A hma chuan a be bawrh bawrh ṭhin kha a ni a, tukina Manoi lo kal avangin a ni ang em aw?


Sammy-an, "Muhil tawh rawh ule, Good Night", a rawn ti a.


Lal Fanuin, "Apa, a u Freddy-a Nu a lo kal a, chaw te a ei a, School-ah pawh min thlah", a ti ta.


Min ṭhawng lutuk chu chêt lawk nachang ka hre lo.


Sammy-an, "A u Freddy-a Nu maw?", a lo ti hmanhmawh.


Lal Fanu beng bulah, "Kha chu sawi loh tur, Shhh", ka ti a. "Mahse, Anu, a lo kal kha", a ti mauh.


Hrethiam rual a la ni si lo.


Freddy-an, "Keima Nu chu Nangma Nu a ni ve tihna, Apa, Lal Fanu Nu pawh a ni tiraw?", a ti leh pek.


Sammy-an, "In-", a ti chiah tih leh, ka kâ ka âng chiah tihah, Siamtean, "A ni lo, Lal Fanu Nu a ni lo", a lo ti hmuk.


Phone ka ban thuai, "Le, Apa mangṭha tawh rawh u, naktukah in inbe leh dawn nia", ka ti a.


Ngui nghiaiin, "Ka la be duh asin le, Apa, mangṭha aw. Good night", an ti ta a.


Mut ṭhattir hle hlein, "Tumahin Nu bik in nei lo a nia aw, chuvang chuan, tui tâwkin han mu teh ule",


"Anu, nang chu keima Nu bik i ni tiraw?", ka biangah a fawp zauh.


Manoi hi a Nu a ni tih engtin nge ka hrilh ang le?


Engtikah mah ka hrilh theiin ka ring lo. Ka hrilh thei ngai lo ang.


"Lal Fanu Nu bik liau liau ka nih hi", ka fawp let a. Freddy-a biangah fawp vein, "A u Freddy-a Nu pawh", ka ti a.


An khi vur vur.


Siamtea ka ban a, "Muhil ve tawh ta che, i nau te pawh an muthilh tawh hi",


"Aw le".


Keimah ber muhil thei loin ka meng kur, Sammy-an min rawn call hun ka nghak zawk mah.


Min rawn call ta nge nge, Chokaah ka phei a, Siamtea a la muhil lo atin ni.


"Zothangmawii ka bia a, a lo kal tawh lo ang", a rawn ti nghal.


"Ngati maw? A call i chhân theih loh avanga rawn kal a nih kha, Sam; a fate avanga lo kal ni loin, a call i chhân theih loh avanga lo kal a n. Biak che a duh a", a lo thaw hawk.


A fate hmu tur ni loa, a pasal hluiin a call a chhân theih loh avang chauha lo kal a ni si.


Mak ka ti, thin a sa thar thut.


Sammy-an, "He Khawvel tak hi chu aw...", a lo ti vawng vawng.


A beidawng ta lutuk chuan min khei zak, "Chutin ti mah ta che, i cho chhuah a nih hi. I, i, i-", ka puak darh dawnin ka hria.


Eng thu mah ka sawi thei tawh lo.


Phone ka off hmak. Thinrimna, thinrimna tur hlir.


A bula ka awm reng zawngin, ka â thei takngial dawn.


"Anu", Siamtean min rawn ko thut a, ka phu nghek.


"Bawihte, lo kal teh, i la muhil nange?",


"Apa nen in inhau mi?",


"Lo kal teh", a rawn kal hnai a, ka bulah ka ṭhuttir.


A fing a, a lakah chuan thuruk a thuhruk reng theih dawn loh.


Siamtea zawkin, "Apa i hua em? Kei chuan ka hua, Anu pawh ka hua. An pahnihin ka hua, awm lo la chuan Hnahthiala Api leh Apu bulah kan awm daih ang. Ngati nge, Apa hi i neih a?", a ti mauh mai.


A nu leh pa a huat chhan chu engtak ni ang maw?


Sammy-a ka neih chhan chu, Nu leh Pa thuawihna avang chauhin.


"Siamte, i pa nen lo inṭhen ta ila, ka bulah i awm duh tak tak ang maw?",


"Chhuahsan daih rawh",


"Siamte",


"Anu, chhuahsan daih rawh. Inṭhen ang i tih chuan Aih a ti dawn a, keini min ngaihtuah loin min chhuahsan rawh. Mahse maw, ka ngai ngawt ang che", min kuah thlawp a.


A insut hlawp hlawp.


Siamtea hian, engthil emaw tak hriat a nei ngat mai le.


A hnung chul heuh heuhin, "Bawiha, hlau miah suh aw. Min han hrilh teh le, Freddy-a leh Lal Fanu nen, in pathumin ka kalna hmun apiangah ka hruai zel ang che u. Engthil nge thleng, Anu hi min han hrilh teh".


Siamtea chuan, "Ih maw, Freddy-a hi nautê a nih laiin, zanah ka zun a chhuak lutuk a, Apa a zin daih a, min awmpuitunu ka kaitho a, a harh thei si lo kha, pindan aṭangin ka chhuak tawp a. Chuan, kawngkapui a inhawng ka hmu a, Bathroom-ah ka kal peih lo a, pawnah ka zung mai ang ka tia, ka kal hnai zel a, Anu ṭawng ri ka hre ta a", a ti a.


A kut chelh tlat ka ni a, a khûr tih ka hre thei.


"Engtin zel?",


"Anu chuan Towel chauh hi a veng a, a hmaah mipa pakhat hi a ding bawk", Siamtea kut ka hmer vawng vawng.


Ngaihthlak a ngamawm loh hle, hun rei tak a lo vawng tawh chu a ni si.


"Sawi zel rawh le",


"Mipa pawh chuan kekawrbul chiah a ha", a Nu uire lai a man chhuak a ni maw?


Freddy-a nautêt lai chuan ani pawh la naupang tak a ni dawn.


"Mipa hmel chu i hmu em?", a lu a thing nar nar.


Siamtea chuan, "Mipa chuan, Freddy-a hi ka fapa a ni tiraw?", a ti a. Anu chuan, "Aw, ni e", a ti", a ti leh.


Siamtea hmaah chuan ka ṭhingṭhi tawp, ka kuah a, "Sawi zel rawh, Bawihte, sawi zel rawh".


Naupang thu hla mai mai tia hnawl ngawt a rem lo.


Dâwt ai mahin, nu leh pa thuruk vawngtu an ni chiang em asin. Siamtea pawh hi, Sammy-a a ni nge ni lo fiah ka châk ta zak mai.


"Ka zun a chhuah em avangin Bathroom-ah ka kal daih a, an sawi ka hre tawh lo. Chuan maw, Anu pum chhungah Lal Fanu a awm laiin, zanah tho ka zun chhuak lutuk kha ka harh leh a, Bathroom-ah kalin, ka zung zo, kawngka ka hawng kha Anu leh Apa an lo inhau a".


Hrehawm ka ti mang e, naupang hmuh leh ngaihthlak atan chuan a lutuk mah mah.


"An thusawi ka hrechiang thei tawh lo, Apa khan, "I duh leh mamawh apiang ka pe che a", zawitê hian a ti a. Apa chuan Anu a hau ngai lo a, zawtê tein a be ṭhin. Anu chuan, "Ka pasal thinlunga hmeichhe dang awm reng chunga chenpui reng hahthlakzia i hre tawp nang", a ti a.


Apain, "Hmeichhe dang a? Ka hmeichhe ngaihzawn hmasak ber i ni a, ka nupui i ni bawk-", a tihin, "I sawk dik alawm, i hmeichhe ngaihzawn hmasak ber leh nupui hmasa ber ka ni. I hmangaih erawh ka ni hleinem. I hre tawp nang, tun thlengin Lehkhabu chhungah a thlalak i thukru a, hmanni lawkah atana i thuziah ka chhiar fuh leh bawk. I hre tawp nang, kan inneih zanah ngei lehnghal, "Puipui, min ngaidam rawh aw, nupui ka neihsan che avangin", i ti asin, i hre tawp lo ang, ṭawngvai satliaha ngaih chi a ni lo. Ka uiresan che, ka pha lo, ka inpawm, ka tisual tih lah ka hai lo. Mahse, uire lo thei loa min siamtu chu nangmah hi i ni, kan inngaihzawn lai aṭang renga inneih hnu leh, fa kan neih hnu thleng pawhin nang hian min uiresan char char. I thinlungah hmeichhe dang i khung tlat hek", Anuin a ti a. A ṭap nasa lutuk".


Siamtea chu a ṭap chau a ni ang, a muhil thuai.


Kum tam a lo vawn(vawng) tawh a sawi chhuak a, zinga a harh hunah chuan a thawl hawkin ka ring.


A thinlung a ruak tawh ang a, zângkhai takin a awm thei tawh ang.


Naupang tê si a, hetiang thil bawn lutuk mit ngeia a hmuh a, a hria hi pawi ka ti.


Tlaivar chiang tak ka ni, Manoi chuan hrehawm a lo va han ti thei dawn tak. A lo tuar nasa ve hle mai ti daih teh ang.


Tuna neih let tuma a bei pawh hi a demawm ta chuang loh.


Sammy-a chuan a thinlungah hmeichhe dang a khung tlat a, tunah a la khung tlat ang em le?


Khung tlat ang, Manoi leh kei chu, a bungrua mai kan ni tihna chu ni lul suh se!


A thinlung aṭanga a chhuahtir phal loh hmeichhia chu, tu tak ni ang maw?


Manoin Lehkhabu chhunga a thlalak a thuhrukzia a sawi a, khawi Lehkhabuah nge ni ang?


A la awm ang em?


School kawta kan din laiin, "In dam maw?", Taiṭitan a lo ti. Kan nufa zain Taiṭita lam kan hawi ṭhap.


"Apa Taiṭit", an ti a, an tlan a, an kuah chung chung.


Apa Taiṭita chu an ngai ve hle mai maw.


"Khawiah nge i awm a?", lungawilo fe hian ka ti a, "In awmnaah tho hian", a lo ti.


A biangsum pahnih leh a ha ṭo thuah lang ṭhat ṭhatin a nui sun sun.


Taiṭita nen hian intawng tho tur kan nih chuan, Sammy-an ka nu leh pa hnena nupui atana min rawn dil hmaa a lo lan loh le?


Ani pawhin a rukin min lo duh ve reng tho a, ngati nge, a hma khan min hrilh mai loh?


Ka pawm a rin loh avang nge ni ang a? Kan inṭhianna a chhiat a hlau zawk?


Zawhna ka va han ngah tak em!


Chhânna erawh ka hmu thei si lo.


"Beram pathum te u, School chhungah lut tawh rawh ule, in bân hunah KFC kan ei dawn nia", Taiṭitan a ti a.


Beram pathumte chuan, "Yess, Promise?", an ti a. An han intiam liam liam.


"Inbiak nan hun i nei ang em?",


"Nei lo tlat, Nancy a bân a ṭul a, Hriati thawhpui tur a ngai",


"A sawi tak asin, min chhawr mai ta che", ka nui sen sen.


Ka chhawr tak tak dawn mawni?


"Ka lo ngaihtuah ang, nih aw",


"A nih le".


Min lo thlir zui vawng vawngin ka hria.


Khang hun lai khan a rukin ka Star-in, ka duh em em a. Ka ṭhian a nih bakah, hmeichhia ka nih avangin hrilhah ka ruat lo.


Tunah, a rukin min lo duh ve reng tih ka hre ta a.


A rem tawh lo, a rem tawh mawlh lo a ni e.


Hriati chu amah chauhin a awm a, a khawhar thu min hrilh chamchi.
Ka hriatthiampui.


"Ka lo zawng ang, i ṭhian te zingah thawk duh te an awm lo em ni?", Hriati chu a han ngawi deuh a, "Awm lo, awi, mahni buai buai hian kan buai tlang a ni e. Au Chhuanpui, i hre zawk lo mi?", chu min la ti zawk zamah.


Buai a na a ni e.


Pawn lam ka hawi a, Duhsaka ka hmu chu Hmingi ka hre chhuak ta.


A ṭha lutuk, a va han ṭha teh kher em.


Hriati bulah, "Lo lungngai suh, naktuk aṭang chuan thawhpui i nei tawh ang. Thenzawl mi a nia",


"Mipa ni se", a biang a tai têk.


"Mipa chu buaithlak, Pu man kan ei hma lutuk palh ang", ka ti a. A nui khêk chiam.


Nui mawi lo ve tak a ni, kei ang chiahin.


Nui mawi tehchiam a ngai lo, kan nuih laia hmelṭha min tih chuan kan nuih a za tawk lo tihna a ni mai.


Hriati chuan, "Tak takin, tu nge?", a ti a.


"Hmingi a nia, a ṭawng duh lutuk, fiamthu a duh si", ka ti a. "A nuam dawn e, LalNancy min hriatchhuahtir",


"A ngaihawm khawp mai", ka lo ti ve.


Nancy ngaihawmzia sawi dunin, Lal Fanu School bâng hruai a hnaih avangin, Hriati nen inthlahin, School panin kan tlan.


A chhun thil eina tur ka pe a, a puar turah ngai ang.


Zana Chanchinthar ka en chu, Pi Lalchhuanawmin, "Serchhip Bialtu MLA Samuel Remsangpuia chuan, Thenzawl khuaa Puan Tahtute ṭanpuina tur Sum a tichingpen niin, Eptu Party President Pu Hrângvungan a sawi", a ti ta mai.


Chanchinthar ka hmet sawn thuai.


Siamtea te unauin an ngaithla lo hlauh a, ka lawm.


An muthlilh hnuah Chokaah awm lehin Sammy-a ka call. Zanin chu min rawn call miah lo.


Min lo call loh avangin chhuanlam ka siam phah.


Vawi sawm aia tam ka call pawha min chhân theih loh avangin ka nu ka call.


"Nu, Sammy-a a awm em?",


"Aw, awm e, i pa leh i u te nen an titi a. Lo ngaihtuah suh aw, a ṭha vek a nia", a lo ti sep.


"Min lo biak tir rawh aw, ka lo nghak ang. Min lo biak hma chu ka mu dawn lo a nia", ka ti a.


Chanchinthar meuha han puan(puang) dum dum mai chu(h)!


Ka phone ri chu Sammy-a emaw tiin ka en vat, Taiṭita lek niin. Beisei loh lam daih.


Ka chhân loh avangin message min lo thawn a, ***Chanchinthar ka lo hria a, pawi ka ti lutuk***


A delete leh nghal daih, Noti Bar aṭangin ka chhiar hman tho tho.


***Lal Fanu min lo biak rawh aw, a ngaihawm em mai, mut tui ule*** tih a rawn thawn zawk.


A ṭha hrim hrim e.


Chokaah ka awm reng, Sammy-a chuan min rawn call ta nge nge.


"Chhuanpui, i la muhil nange?",


"Ka nghak che",


"I muthilh ka ring a, ka call ngam lawk lo che alawm", thatchhe zet hian a lo ti a.


Khum chungah a mu ang a, a mit a chhing ang a, a chalah a kut a nghat vang vang ang.


"Sam, Chanchinthar ka lo hria a, engtizia nge ni le?",


"Engtizia mah ni lo e, dâwt mai mai a nih kha, lo ngai thutak suh. Party inbeihna mai mai mawle. Finfiahna an nei chuang hleinem",


"Chutiang ringawt, Chanchinthar meuha an puan chuan awm a awm a ni mai", ka ti hram.


Awm a awm a, an sawi a ni mai.


Ei rukna lehkhaa a hming a ziah hnan te, ka nu hnena pawisa a pek te, khangte kha ka hre ve kur tho a, thâwk a ipik.


Sammy-an, "Zan a rei tawh em mai, mu tawh rawh. Naktukah ka lo haw dawn a, kan sawi ṭha dawn nia", a lo ti a.


"Aw le, tluang deuhin lo haw rawh aw",


"Chuannn, thil ṭha tâwkin min lo hmuak dawn ta em?",


"Lo haw phawt rawh", ka ti hlak.


A rawn nui nasa mai, "Hmar Hrangsie, ka rawn haw ang",


"Rawn haw rawh, mut tui", phone ka dah daih.


Kei aiin Hmar Ṭawngte hi a thiam.


Lo haw teh se, Chanchinthara puan ngai khawp khawpa hna a thawh ṭhat loh vei. Ka'n ṭim nghek ang e.


Hnahthiala ka nuin min lo bia, "Samuel-a chu engtizia nge aw? Dâwt a nih ring phawt teh ang, i pa nen kan lo kal dawn e aw",


"Ni e, ka nu, dâwt a nih ring phawt ila, a hma thei berin lo kal rawh u aw", ka ti a.


Sammy-a aiin lo thleng hma se ka ti.


Siamtea te unau School-a an lut fel chiah tihah, "Chhuanpui?", Taiṭita a ni.


Tunah tak chuan, inbiak ka duh vak lo asin le.


"Khawiah nge i kal?", hnathawh a nei lo emawni tehreng?


Taiṭita chuan, "Inbe lawk ang, Thingpui in man ka tum ang a", a ti chu, "Sawi tur ka hre lo", ka ti khauh.


"Keima'n ka hria, lo kal rawh", a nui sâng a.


Sawi tur ka hre lo tak tak, "Sangsangi chungchang ka hrilh che kha i la hria em?", a rukin ka nui hak.


Manoi a tihna a ni si.


"MLA Samuel-a nupui kha a ni em?", tia hmeichhe pakhat sawi ka hre fuh ta. Hnung lam aṭangin a ni.


Hmeichhe pakhat dangin, "A pasalin a eiru a, a nupuiin mipa dang a hmu bawk a", a ti a. Min nuihzat hle a ni.


"Chhuanpui, engah mah ngai suh, mi sawisel tur zawng reng renga khawsa ho hi chu, kalpah mai mai tur", Taiṭitan a ti sup.


Kalpah mai mai tur pawhin ka ṭhut tlat hi maw.


Awm rei a thiang lo, Sammy chang ni lo, ka mualpho tel dawn tlat.


"Sangsangi chu eng nge, han sawi tawh la", sawi vat teh se. Haw ka duh tawh.


Chutih nak laiin, Hmingi ka la be lo tih ka hre chhuak. Manganthlak eee.


Taiṭitan, "Sangsangin a pasal hlui leh a nupui inṭhentir tuma ṭan a lak tawh lohna turin ngaihzawn ka tum a, nizanah inngaizawng turin ka sawm tawh. Min chhâng lem hlei lo a", a ti chu, ka hmaa Tui hian han leih huh chuaih ka nâp a.


"Ngati maw?",


"A nupui chu chang thei lo mah ila, hlim turin ka duh", tehhrep chuan a...


Lalhriatchhunga mai mai chu!


"A nupui i duh avangin maw?", sak ṭelh ṭawlhin ka ti a.


Âw nêm hman chhuah ka tum lo.


Keimah avangin Manoi ngaihzawn a tum tih a sawi, âtthlak hle mai.


Tichuan, mahni a intihrehawm tur chu keiin ka lo hlimpui ang a, a va han hnai lo tehhrep em!


"A ni mai ang chu, hlim turin ka duh takzet, a nui hmel hmuh reng ka duh. Sangsangi nen kan inngaihzawn theih chuan, tibuaitu a nei dawn lo a, a hlim chuan ka hlim", dawhkan chungah ka kut phah ka nghat chawrh.


Taiṭita chu a phu nghek.


"Taiṭit, keimah avang chuan i hlimna tur tichhe suh. Ka ngen che a ni e, khawngaihtakin keimah avangin i hlimna tur tichhe lul suh",


"Chhuanpui, i sawi awmzia-",


"Ka hre vek tawh, Sangsangi chu tudang ni loin Manoi a ni. Tawp rawh, chuan, Manoi hnaih tawh suh. Kei ngei pawh, kan Chhungkaw buainaa midang lo inrawlh turin ka duh lo che. Taiṭit, High School zirlai kan ni tawh lo. Dawra kal ka ngai a, a nih phawt".


Heng ho ina min tihbuai dan hi, Pasal ka neih hma chuan hetianga buaina hi ka tawk ngai lo.


Pasal ka neih hnu hian buaina a inchhawrdawh chho zut zut.


Thâwk ngaihna ka hre lo ṭep tawh.


Hmingi ka call, "Aizawlnuin min la hre ve maw?", a va han ngeiawm tak.


"Hria, hria, hria, hnathawh tur ka hmuhsak che",


"I ti tak tak em? Ka va lawm tak. Lalchhuanpui, thudik lo min han hrilh vaih teh, Aizawlah ka rawn kal ang a, ka ru bo ang che. A nuam e, hnathawh tur ka hmu ta", a naupangchhia thei si.


Tikhan, a zuang leh vak vak mai ang.


Hmingi bulah chuan, "Kan Lehkhabu dawr kha i hria em? Min lo thawhpui rawh, ei leh in ka lo tumsak vek ang che, kan bulah i chêng bawk ang", ka ti a.


"I chawh, chutiang a nih dawn chuan ka lo kal lovang e. Hlawh duh avanga hnathawh tur zawng na na na", a lo ti nuah nuah.


A lungni lo hmel hmuh a châkawm.


"Hlawh i nei dawn, lo kal rawh. A hmanhmawhthlak, Hriati chauhin a nghak, kan ṭhiannu Nancy loh theih lohna avanga a bân a ṭul a, nang lo chu khawngaih han dil tur ka hre thlawt lo",


"A va Politician ṭawngkam ta ve", a lo ti thûm dut.


Lalhmingi tak hi chu aw...


Vin deuh hlekin, "I lo kal dawn nge dawn lo, a hmanhmawhthlak si, midang zawn ka duh", ka ti a.


"Lo kal dawn, vawiin leh naktuk min pe lawk la. Mahse, in luah tur min lo zawn hmuhsak diam rawh",


"In luah tur maw ni a, ka lo zawng ang. Takin, kei aiin Duhsakan a hria ang, ani chu chhuak rengah. Ka lo zawt ang", Duhsaka hming a hre ringawt pawh, a lo, "Awiiiiiiiiii", chiam.


A lo thlen hun a huphurhawm dawn..


Hriati hnenah ka sawi a, "Ka va lawm tak, lo thawk thuai thuai tawh se".


Haw lamah Duhsaka hnenah in luah tur min zawnsak turin ka hrilh ve leh.


Hmingi len tawkna tur, tui leh êng ṭhatna bakah Bathroom ṭha tak awmna nise.


Ka duh dan angte ka hrilh a, "Ka lo zawng dawn nia", a ti mai bawk. Hmingi tan a ni a, in luah tur ṭha tak a hmu dawn tih ka hre ru kar.


Nu Papuiin, "Samuel-a chu, a lo thleng tlai dawn nge le aw? Chaw chhum kep a ngai ang em le?", a ti lang lang.


Call a chhâng thei lo a, a chin ka hre tawh lo.


"Nu, chhum kep phawt teh ang. Party Office-ah a tlang a ni ngei ang".


Chaw kan eisan, lehkha zir laiin a lo haw ta a, kei ni loin a fate a ko hmasa ber a, a kuah hmasa ber bawk.


Pawi ka ti lo, a fate pawhin an ngai em asin.


"Sam, chaw ei ka lo siam ang aw",


"A pawi miah lo ang".


Intifai hmasa loin chaw a ei a, a rilṭam ngang a nia nge, a ei ṭeuh mai.


"Call i chhâng thei lo a",


"Ka mute alawm, call chhân ka peih tehchiam lo. U Ngaian a lo bia che em?",


"Be nang, tinge a?", tiin zawt mah ila, u Ngaian a hre dawn a, a hlauthawng deuhin ka hria.


Tihmangan tan tal pawhin min lo call ka ti dawn mawni?


A u Police a ni a, Sum a tichingpen tak tak a nih chuan, a nasa lo teh ang chu aw...


Kan MLA Samuel Remsangpuia mai mai chu!