Chapter - 31
Ziaktu : ilefi imoz
(Recap : Kei lah ka sam a thur bem bum a, ţâwn ve tho siin ka bek veilam ami phei chu an rawn uai thla suau suau a, hnawihsen tal pawh tuman kan pâi si lo. Kan hil bêm hlawm a, lan ţhat ngaihna kha a awm hlawl hleinem. Ka û emaw te min lo ti mai mai lehnghal a, û ka nei awzawng lo ve!)
Exam kan han ţan ta chu hrehawm duh ngar ngar tak a ni. Khawlum vanga thlan a tlâk mai piahlamah thiam loh luatah thâw a pik hluah hluah a, han ziah ve par par te a châkawm tehlul nen rilru chuan ârbo a zawng takmeuh meuh a ni. A harsa a, ka zir dan ngaihtuahin vui thei ka ni mawlh si lo.
A hunlai te khân zanah chauh zir tur emaw ka lo ti ţhin a. Chhûnah hun âwl kan neihin ka lo mu vel der der ţhin kha ania. Inchhirin awmzia a nei tawh lo. Ka thatchhiat man ka hmu tih bâk rilruah a awm tawh lo reng reng.
Exam hall pawh thawpik deuhin ka chhuahsan a, school hnunglama Sir Isaac-a lo ţhutna lam ka va pan chuan Op-a pawh a lo ţhu tawh. Eng eng emaw sawiin an lo titi dûn mawlh mawlh a, min hmuh veleh Sir chuan, "eng nge i an?" Tiin min lo zawt lauh a. "Keimah bawk kha ka la ang" ka tih chuan min tin deuh uaih a, "Zet zawt che hian" tiin a nui hak bawk.
"Ka fail êm chu ka ring lo a, mahse har ka ti ve reng. Tlêmin lo zir ţha ve peih deuh ila chuan awl ka ti ngawt ang" an sîra ţhutthlâk dat pah chuan ka ti sep sep a, "Zingah mipangngai angin kaihthawh ve theih hek lo cheu mawle.. In ţhiante thluak in pha lo lutuka result chhuah hunah in men puai puai lovang tih pawh a sawi theih loh." Sir-in a tih leh mêk laiin Op-a a rawn inrawlh vat a, "vawiin chu khawlum lutuk khan min tibuai ve bawk a ni" tiin min rawn chhan keuh. A va smart ţhin tak.
"Ka zun a chhuak ê, Op min va zun pui" Zun In lam melh zauh paha ka tih chuan bu nghatin a rawn thochhuak a, kan inzui phei hnak hnak a, sawitur erawh ka hre chuang lo. Amah vêngthâwnga sâwm ve ngawt kha ka nia. Han inngaihzawn ve tâkah chuan beisei te pawh a neih ve ka ring a, hun thâwl te, a fâl ve deuh hleka awmdun te pawh.
"Tukin zing kha.." A tih rual chuan, "engmah a thleng lo ania aw" ka lo tih khalh zung zung a, naupangin a thil tihsual thup tuma dawt a sawi zet zet hi ka ang berin ka hria.
"A thleng ka ti hleinem.." Nui deuh ruh ruh chungin a lo tilêt khauh a, minti dang lel mai.
"Exam zawh nîah lêng ila, tlâiah chaw i lo ei nghâl ang a. Inhriat ţhat nan te pawh a ţha ve hrim hrim ang" zun In kan thlen dawna a tih leh tâkah chuan ding datin, "tehreng.." Ka ti hman zet a, tukin zinga u Arona'n chaw ei min sâwmna kha hrechhuak lehsiin, "Exam zawh nî tak chuan ka hman dawn lo a.. Nidangah aw" ka ti leh ta zawk a. Pangngai tak chuan min bûk khum ve tho e.
"Malsawmzel mi luck lutuknu! Letter i dawng leh tawh ania" rawn tiphei lâwng lâwngtu kan Vanlalchâmi chuan ka sîra ding Op-a hi a rawn hmu miah lo em mawni? Meng mang hlei lova nui ţhen ţhâw chunga a rawn phei chu mitmeiin ka lo khap zawt zawt a, awmzia a awm thui lo nasa mai.
"Sawlaia hmeichhe pathum ţhu te sâwn min rawn tîr a. Chhiar pawh ka la chhiar bik lo han chhiar ring teh. Ee, Op, i bialnu luck zia chu maw, practical kan exam nî pawh khan letter a dawng tawh. I chang lo ţep ania ţan la rawh" ti deuh zung zung chunga lehkhathem min rawn pek chuan Op-a ka melh ralh phawt a. Thîk hmêl âwm lo taka a lo nuih suk suk avang chuan tlêmin awm a nuam deuh.
Lehkhathawn chu ka han hawng a, a hawrawp chu hmannia mi tho kha a ni tih ka hre mai. Tu tak ni ang maw?
"Chhiar zung zung la i rei e.. Khawi keiman ka lo chhiar zawk ang!" Tih leh ka kuta mi lehkha chu rawn pawhthlak a rual leh ta mai a, cheng chawng ţhin hian! A phûrthak leh hûrh tawh aniang chu.
"I û ai khan i hmelţha zawk daih. Ţhang ţha ka ti hlê tak tak che.. Tih a inziak anih hi eheu! Kei chuan ka hrethiam ve ta hauh lo mai. Insawifiah ngei chu i ngai ang, tiraw Op?" Châmi bawk chuan a ti leh lûng lûng a, a pumraw têt ngaihtuaha a âu ring thei phian lawi si hi engtia han tih chi nge maw anih dawn ni?
"Tu rawn thawn che nge ni a i hriat deuh?" Thupui fûn deuha Op-an a tih tâk supah chuan Châmi nui hmêl a tâwp riai riai a, keiin chil ka lo lem ri khalh thung.
Ka han ngaihtuah a, û chungchang vel a rawn sawi khân minti hamhaih hman dawn dawn a; mahse ka hrechhuak! Zirtirtupa kha!
"Awi ka duh lo.." Tih ţhat paha Châmi leh Op-a ka melhtawn zak zak tâkah chuan, "eng chu maw?" Tiin an lo mengphâwk ve hrû a.
Lehkha min thawntu ni theia ka rin ka han sawi chu Châmi a nui nasa ta mai!
"Exam hall-ah te khan in indinchilh rei bik ka lo ti rêng a! A vei a vei a, i ţhutna bul velah khan a rawn tei sek bawk sia ka lo khawngaih hman tak tak che.. A mak teh daih ê! Pathlawi a ni hrim hrim ang, a lerh ka ring tlat. Op, i strong hlê a ngai dawn tihna anih chu aw" tiin a han nui uar sauh a, Op-a leh keia tan chuan ngaihţhatthlâk duh lo tak a ni.
"Zirtirtu ve sî ah chuan a timak ka lo ti ve deuh mai mai a" tih zawng chu Op-an a sawi ve a, thil dang sawi tuitam vak a tum lêm lo anih hmel.
"Ka duh dawn chuang lo tih i hria tiraw?" Hlauthawng rilru taka ka tih chuan nui hak hakin, "hre mah mah" a lo ti hlauh a, ka lâwm tak tak a ni.
"Ka kalsan phawt ang che u. Vawiin chu ka û-in min rawn phur a, tlâiah lo lama kal thlâk leh hrâm a duh sia haw hmanhmawh a ngâi. Ka kal aw, ţha deuhin in zir dawn nia," tih zawm zatin min hawsan a, a kal tâ chu engtin emaw a thawventhlak. Lehkhathawn vanga kan boruak mai piahlamah zingkara kan boruak kha a sawichhuak ang tih ka hlâu hman lutuk a, ka insangmar ţeuh reng alawm mawle.
Hun chu rin aia chakin a liam ve zung zung a, tun aţanga kar khat a liam meuh chuan mi exam zo, mithawveng, mi huau huau kan ni ve dawn ta reng mai.
Political Science chauh kan bâk tawh a, zanah rei deuh mengin zingah tho hmâ hlê ţhin mah ila karleh lawka duhtawka zalen tawh tur kan nih kan hriat miau avangin tumah kan thatchhe phal tawh bik lo. Subject danga kan tih ţhat lutuk lohte khuhmawi nan Pol.science chu hman kan tum fur hlawm a. U Arona pawh a lâwm ve ţhinin ka hria.
Zanlâi dar 12 a ri thuak tawh a, a tam zawk chu an mu rêm tawh. Châmi'n dorm-ah a chhiar tlauh tlauh a, keiin corridor-a ka zir ţhin naah tui bottle lian deuh inchhawpin ka chhiar ve bawk a. Kan ţang dûn khawp mai.
"I va zir rei ve!!" School hnung panna corridor aţanga rawn tiphei sur surtu vang chuan ka phu uih a, ka chair nghenchhanah ka hnung ka sawh dawt a, ka hmui ka hup rang viau bawk.
"Eng nge tûn ang zân rei tawhah i rawn tih dawn?" A ngaihna hre lo fê chuan ka ti hê hâw a, tun ang zân tlâi tawh taka Op-a a rawn lan hlawl nachhan hi ka hre lo takzet a ni.
"Fabiana nen kan inbia a, i la meng atia ka rawn chho ve tawp" thâwm dîm taka ka bula rawn din pah chuan a ti sur sur a, pâwna chair pakhat inhûng chu a rawn keng phei tel bawk.
"Fabiana'n phone a keng ru tihna emni?" Ka tih chuan a bu nghat a, Fabiana berkherin chance min siamsak chu a awihawm lo hial zawk alawm mawle. Ngaihdam te min dîlin han ngaidam ve tho mah ila hmân ang em em khan a kip a kawiin kan inzui tawh lo va, tlêm tlêmin kan hrang hlek hlek tho.
"Lo kal chhan êm êm i nei lo tak tak maw?" Ka tih pawn a rawn kal mai mai thu bâk a sawi duh lo va, lehkha zir tur tal pawh a rawn ken loh avangin ka zirlai chu zir ve tawp mai turin ka han hrilh a, pawi a ti bik lo aniang zawitê tê chuan a chhiar ve kauh kauh a, engtikah nge Op-a hi thinlung leh tih tak zetin ka hmangaih ve theih ang le? A khawngaihthlak zozai tawh êm mai..
"Thil ka lo keng a, i ril a ţâm ka ring" a polythene khâi tih rîk rak rak paha a tih chuan, "eitur rawn ken kher a ngai lo asin.." Ka lo ti thuai a, mahse polythene chu dawhkanah nghatin, "i chêr tawh lutuka hmuh i hrehawm lek lek zel" a ti ta mai a. Min ngaihtuah leh lutuk te hian a laka ka inthiam lohna a tizual ţhin tih a hre lo zawk em mawni?
"I van rawn keng hnem em em ve, a to hlawm si!!" A hriat phâk tur leka tiin ka awki erawh ka sân angreng viau a, energy drink eng emaw zat leh cake te, taksa tana ţha tur chi eng eng emaw a rawn keng nual mai.
"Nangmah chauh ngaihtuah hleihtheih pawh i ni lo. Vanlalchâmi khân nang aia ei hnem leh a tum emaw a ni ang a, i chan lehpek loh ka hlaua ka rawn tih kêp deuh ţeuh anih hi" nui hak hak paha a tih chuan ka nui ve nasa hlê a, ka nihna ang anga min pawmtu mai ni lo, ka ţhiannu thlenga pawm tel vek theitu a nihna te hlei hlei hian hmangaih a phûzia a tilang a, kei lah ka bûrna lamah ka lo bûr nghet ve churh tawh si. A buaithlak ţhin zawng anih hi.
"Swiss roll hi ei ila, lion nen kan hmeh ang a" tiin swiss roll pack chu ka kheh sawk sawk a, amah tak pawh hi a ril a ţâm ang, tun ang zân rei tawhah Mual aţangin a rawn chho vang vang ania, a ril a ţâm hlê loh vêk pawhin a hah ngawt ang, energy drinks tal a mamawh.
"Titi phunglêng mai mai sawia vân thlîr te ka châk a, kan inhmu khât lutuka ka ngâi bawk che a, inhmuh ve chhunah haw hma ka ngâi bik zêl ţhin bawk si." Lion in pap paha a tih chuan nui hakin, "kan exam zo teuh tawh ê, exam zawh hunah i lo lêng ţhin ang a, sunday tlâiah te phûl hmunah kan lêng ve ţhin dawn nia" ka ti a, ka theihtâwpa hmangaih ka tum dawn anih rau rau chuan a tam thei ang ber hmuh a, a tellova engmah lo mai ka nihzia ka hriatchhuah a ngâi niin ka hre tawh.
"Enteh arsi te khi! An mâwi i ti ve em? Lunghlû ang maiin an de sep sep vek mai a" min rawn kuah thak a, a hawina lam hawi chho ve tura min duh ni âwm takin ka khabe a kuai dâk hlek bawk.
Ka puannuam sin lâi sintir ve sat sat chungin chunglam chu ka hawi chho ve a, corridor pâwnlâng taka zir ka nih avangin vân chu lang chiang tak a ni. Ka lo thlîr ngai lo mai mai zawk a.
"Mitthite hi an thih hnûah arsi-a an chan tak tak i ring em?" Ka ti a.
"Ring hauh lo. Mizote Christian kan nih hmâa an rinthu mai ania, kei chu, pialralah tal tia mite an inthlah pawh hian ka hnuk an tiulh ve ngai lo." A ti deuh khawl a. A pa bik rep rep hlê mai.
"Mahse, piannawn lehna te hi a ringtu zîngah tel ve hauh lo mah ila, piannawn leh chu ka châk ţhin." A tih zawm leh tâkah chuan, "ngati maw?" Tiin ka lo zawt lêt thuai a.
"Tûna keimah angah tho hian piannawn leh ka châk a. Mahse thi thei tawh lo thung ila"
"I timak reuh em mai" nui hak hak chunga ka lo tih chuan a kiai ve suk suk a, "thih hi ka hlâu ngawih ngawih kei chu" thâwk la halhin chil a lem khalh a, ngaihtuah thûk hmêl taka van lam melh vung vung chungin ka beng a khâl niap niap bawk.
"I pâ lo em mai" ka tih chuan, "pâ lo tak ka ni. Thihna chungchâng ka suangtuah ringawt pawh hian ka tâwt ţûn a, ka thaw te hi a chham thei mai dawnin ka hre ţhin. Aiah, kha.. Tunah pawh khan ka thaw a rawn hah ringawt" tiin a thin a'n dawm deuh vung vung a. Hepa hian min chhaih kual vel mai mai anih dawn hi..
"I over lutuk aw.. Mipain thihna an hlau tak tak lovang" a âwm chumsak dat dat chungin ka lo ti ve a, a nui hak a, a hmêl erawh a la thutak ngul thung. Min tihhlauhthawn a tum ve hlê mai.
"Piangnawn leh ta ila chuan, ka tawng duh tawh miah lo ang che." Rei vak lo kan ngawih hnu chuan a ti ţha leh a.
"Engati nge? Min lo van hmangaih âwm lo em em" lungawi lo der velin ka melh chho hâ a, ani erawh vân lam hawiin, ha lang miah lovin hreh hmêl zet hian a nui hak a, thâwk a la hap bawk.
"Hmangaih lutuk che ê, ka hmangaih êm che avangin kan piannawn leh hunah chuan mahni hmâ ka sial tawh lovang. I hmangaih ber tel lova hringnun i hman ka phal tawh dawn lo va, chutih hunah chuan i hmangaih tana i vul ve theihna turin ka theihtawp ka chhuahpui tawh ang che. Kei chuan râlkhat aţangin mawi taka i vûllâi ka lo thlîr tawh che ang a, i hlimnaah hlimin i lâwm châng apiangin ka lo nui ţhin ang. He kan khawvelah erawh mahni hmasial takin ka thlah phal lo che a, ka tâ tura ka duh êm che avangin i hlimna tur kawng i pannaah pawh ka hnawksak ţhin hlê anih hi. Mahse min hrethiam la, vanneihthlak taka kan lo piangnawn leh hlauh anih phawt chuan itan theihtawp ka chhuah ang tih ka tiam a che" a rawn ti ta mai a!
Ka awmdan chu ka sawi thiam lo, ka ni hûih a, ka hnâr a thîp vùt a, ka mittui a parawl kuang bawk. Op-a hian ka hlimna dâltu niin a inhria a, chu erawh a dik chiah em ka hre lo. A rawn lan aţanga u Arona nena kan kâr zâu ta sawt te chu a lo hre reng a, a haider lui mai chauh zawk. Mahse a pawi chuang emni? U Arona nen khân kan kâr a zîm tak tak ngâi lo, kan lo inhnaih tak tak ngâi miah lo zawk anih kha.
"Chutiang lampang chu sawi tawh lo teh ang. Tunah hei ka bulah i awm a, chu chu a tâwk" tiin kan thusawi lâi chu pawhchah ka han tum a, "tunlai chu ngati nge mawni ka lung a lêng riau zel. Ngaih veng veng hi ka nei ţhin a, eng nge ka ngaih ber ka hre thei bawk si lo. Nangmah i nih ringin a zân a zânin ka rawn kal ve tawp a, i kianga ka han awm tâkah chuan ka lung pawh a lêng tawh miah lo hei. Ka lo ngâi hlê che anih ka ring" tiin nghet zetin min kuah ta hlû hlû a, kei ve tehlulin a lung te ka lo tilêng ve a, a lunglên ka lo hnêm ve te chu a inchhuanawm rum rum hial alawm.
"Hm.. In la mu nange kha!"
Chu thâwmah chuan kan phu dûn chiang ngang mai! Hlauthawng zeta thâwm rawn chhuahna lam kan ve melh chuan Principal office kawt aţanga Zun In pana kal mêk u Arona kan va hmu a! Ani erawh engmah hre zawm tawh lo ang maiin ngêng ngalh hian a kal nul nul thung. Ka hnâr ka hmuh len dân chu rapthlak zawk tak a ni!
"A zia lo hlê mai a.. Ka haw san phawt ang che hei, a tlâi tawh lutuk dar khat a ri thuak tawh alawm" kan puannuam sinlâi theh hlîm sat sat paha Op-an a tih tâkah chuan ding chhuak ve vatin, "ka lo thlah ang che" ka ti a, school hnunglamah kan inzui phei boh boh a, sawitur a vâng duh kher lehnghal.
"Lêt leh tawh rawh, a tlâi tawh tak tak ania zir rei lo la, i mut nghâl daih theih phei chuan a lawmawm ang. Muttui aw" kan kal dun reng lai chuan min dinpui datin ka lamah a rawn inher vut a, dîm têin ka chalah a rawn fâwp zauh bawk.
"Anih leh, muttui aw" tia kalsan mai ka tum lai chuan nghet deuhin min lo chelhbet leh ang lawi a. Inngaihtuah mûk hmêl takin hmalam a melh leh ngar tawh.
"Enteh, dik tak chuan, ka thîk lo ti ila dawt muhlûm sawi ka ni ngei ang. Mahse eng nge tih theih ka neih? I hnenah ka sawi tawh a, i nunhlui leh sûlhnu ka chhui lo ang a, ka hmangaih ngawih ngawih ang che ka tih kha ka la hre reng. Harsat châng awm ţhin mah se ka tuar zel ang. Tunah tak phei chuan a chan aiin ka chan hi ka duh zawk daih tho mai. A hminga neitu che nihna ka chan vang te hian ka lawm.. Ka hmangaih che, ka hmangaih ngawih ngawih che." A ti a, engmah ka sawi ve hman lo, min rawn fâwp thut anih chu!
Ka hamhaih lutuk vang nge ka lo beisei loh lutuk thil anih vang zawk pawh ka hre lo, ka khawng awt a, ka thluaka thazâmte chu khawi khawiah emaw an bung ta a ni ang tih tur khawpin an function lo! Hun chu a kal ta lo mai emaw tih tur hian a muang delh delh a, ka nuna a vawikhatna atan mipain ka hmuiah min fâwp ve anih chu!
Reiloteah in lahrang vutin min hnungchhawn zui a, kei lah ka lo la vâi ruai mai bawk nen ka ding ngâwi reng a, ka thinphû, phu rang zawih zawih erawh keimah aţanga kilometer hnih bialchhunga awmte chuan an hriat phâk vek ka ring hial a ni.
"Ka.. Ka tihpalh, ka tum lâwk a ni miah lo. Ka, ka.. Eng lo, ka insûm zo ngang lo a ni" bah deuh naka Op-an ngaihdam min dîlna awkâ chuan min thingharh nawk ni maiin ka hria! A lamah pên pheiin a hmaah tak ka ding a, ani erawh inthiamlo tih hriat takin hnuailamah a kûn tlat a, a inpetruh fan fan bawk. Thlâ a êng êm a, a hmêl chu chiang vak lovin ka hmu thei a ni.
"Min hua em?" Ka en reng laia a rawn tih leh chuan lu thing vak vak chungin a dul zâwnah ka pawm thlawp a, a hamhaih hlê tih ka hre thei.
"Min haw lo i tihna emni?" A aw ah chuan hlauthawng leh inthlahrung aw hriat tel tur a awm.
"Haw lo Op, ka haw lo che. Keimah leh keimah hi ka inhaw zawk a ni. Engtin nge nang ang mipa famkim lutuk rilru hi ka tihnat fo theih zawk le? Ka tihpalh takzet a ni min ngaidam rawh. Hmangaih tlâk loh i hmangaih tlat hi hrehawm ka ti a, ka lainat takzet che a ni. Keimah ni lo, hmeichhe dang, hlim taka siam theitu tur che i lo tawng hmasa lo hi pawi ka ti ngawt mai. Kei chuan natna leh rilru hahna bâk ka pe tak tak ngâi si lo che a" tiin nghet lehzualin ka pawm vawng vawng a, a rimtui inkah pa hrâk chu ka hîp lût vang vang bawk.
"Ka hmangaih che ka tih tawh kha, ka damchhungin nang lo hmangaih neih ka tum lo. Ka thâwk ve ţêk ţêk chhung chuan nang chauh i ni reng ang. Min haw lo tih ka hriatna ringawt pawh hian ngaihţhain min awmtir" tiin min pawm lêt ve vawng vawng a, rei ngial chutia kan din dun hnu chuan inlahrang hmasaah ţangin, a tlâi tawh avanga haw tawh turin ka hrilh a.
"Ka hmangaih che" ti leh zauh chungin a kal liam ta a. A liam tâ chu khua a tihar ve ruih mai.
Inherin dorm lam ka pan phei chhat chhat a, thlifîm thaw heuh heuhte chuan ka vanduaina phêna ka vanneih lehlinzia min hriattir an tum emaw tih turin min chhêm delh delh a, Op-a tâ ka nihna hi ka vanneihpui a, ka la vanneihpui ngawih ngawih dawn chauhin ka hria. U Arona laka ka rilru a lêt hunah chuan khawvela hmeichhe vannei ber leh hmeichhe hlim thei ber ti a sawi te pawh ka la ni maithei asin. Min hmangaihtu hmangaihna hi engtikah tak rûllêt ve thei ang i maw?
"In va inthlah rei angreng ve a!"
"Minti phu nasa lutuk!" Bang kil lam chuh rawk rawk paha ka tih chuan ka lam panin a rawn kal phei chhat chhat a, keiin ka thin zâwn ka dawm vang vang thung.
"Zân tlâi tawha mipa nena khawsak dan tâwk i thiam ngei ka beisei ngawt a" a awki chu leh! Hmuhsitna aw ki a tel tlata hriatna ka nei! Nge ni a ka ngaihbel mai mai zawk?
"Sawmzel.." Ka chhânna nghâk ni âwm hrima a tih leh tâkah chuan, "i buai lohna turah lo inrawlh suh" ka ti hmak a. U Arona anih chhung chuan tih takzetin ka haw thei tak tak ngai dawn lo tih ka hria, mahse a langah tal engatanmaha ngai lo angin ka awm duh.
"Ka inrawlh pawh a ni chiah lo. Ka duty lâi ania, zân tlâi tawh takah hmeichhia leh mipa an kalhrang lai ka hmu a, lo ngaihvena lo thlîthlâi chu ka tihtur ve rêng niin i hre lo maw?" Min rawn hnaih leh hrut chungin a ti sup a, a awki ah chuan inhmuhsitna ka hre tel tak tak alawm! Chutiang chu a lak aţang hian vawikhatmah ka la dawng ngai lo. Vawikhattê mah.
"Anih leh, i sawi dawn em? Zirtirtu dangte hnenah i sawi dawn lo tiraw?" Hlauthawng ru takin ka zawt a, a hmêl enin a thutak bawk si, lungawi hmêl a pu lo bawk êm a, ka ţi zo vek tawh. Midang hnena a sawi mai te ka hlâu!
"Sawi pawh ni ila eng nge awmzia awm chuang? In inhmuh chen tur in inhmu vek tawh a, ka sawi vanga inhmu lo leh thut tur chu ni ula ka sawi khawp ang. A lehpek erawh awm tawh rih lo se, duh leh in exam zawh hunah in inrîm zawk ţhin dawn nia" a tih tâkah chuan ka thawveng huai a. A ţawngkam mei nei erawh ka helh ru leh riau tawh.
"Ka kal dawn, a tlâi tawh sia ka va mu ang e" tia kalsawn ka tum chuan ka bânah a rawn vuan chawt a, a lam hawi turin min kuaiher sawk bawk!
Ka hamhaih hlê a, kan inmelh hnâi nasa mai si! Eng nge a chungah hian thlenga hetianga a chêt tâk mai le?
"A bula i awm hian na lo lo tur a na ve ziah, ka rawn duty chhûng tê chauh chu nangma tlat tlatin tla rawh. Mipa tel lovin. Chu chu ti la ka lawm ngawt ang" ka kut a vawnna thing thla nawk chungin a ti khur khur a, inherin office lamah min kalsan nul nul anih chu! Ka hrethiam lo. Mipate hi zan reiah an â hûih ţhin zawk emni? Ngati nge maksak deuh deuha an chêt vel a?
Chumi kâr tluan chuan Châmi bulah ka tâp deuh châwt a, kan zir nasa lutuk chu kan inzir â thei mai ang tih te a hlauhawm zawk.
Rilru nâ leh lunglên hre hman lo lêka lehkhazir a ngaih tak tak hun chuan a lo patlin theih khawp mai!
"Tho rawh u le, exam tûk a ni a, rei deuh in mut chuan exam hall-ah in inhmuchhuak leh sup sup mai ang. Tho ru tho ru, zalenna paper fill up ve zuk châk ho tan a thawh theih!" Corridor aţanga u Arona âu lâng lâng thâwm chuan min kâiharh vek a, vawiin aţanga zalên tawh tur kan ni tih inhriatna nen tûk dang ang lo takin kan inperhtho sap sap hlawm a, kan phûr hûrh vek maiin ka hria.
"A nuam dawn hawr hawr lutuk hi ka ngaih a ţha lo zawk" kan Châmi meuh pawn a ti ve hûih a, zîngkâr aţangin a mood chu fuh rem rem tak a ni.
"Vawiin tlâiah chaw i rawn ei dawn kha aw.. Theihnghilh lo la, i nu te hrilh sa la, kan exam chhungin kan bungrua vel an lo sengfel vek dawn tho a. In ina haw chho tawh tingtang lovin kan inah rawn tlang nghal daih rawh. E, hrilhna tur phone a awm lo tak, tlaiah kan phone anga kan hrilh mai dawn nia" a ti zung zung a, hmannia u Arona'n chaw ei min sâwmna chauh kha sawmna chu dawng ila ka ei kher lovang. Mahse nu Dingmawiin chiang fek fawka min sâwm avangin ei ngei ka tum. Op-a pawh khan chaw eiah min sawm a, ka hnar ta kha ania. A inthlahrunawm duh lehpek khawp mai.
Tukţhuan eikham veleh khaw ţhenawm lam panin motor kan chuang ho leh dial dial a, Op-a chu a ţhianpa Peksanga nen bike-a inphurin kan hmâah an tlân a, mumal tak pawn kan la inbe hman lo.
A hmun kan thlen chuan kan lut khâwm nghâl ţak ţak a, love letter min thawnthu khaw ţhenawm lehchhâwngte zirtirtupa kha a lo duty ve leh khuau a, min lo melh dan te chu ka lungten zâwng tak a ni.
"Vawiin chu tihian ti rawh, 'min star viau pawn ka bulah rawn tei char char suh midang ka zawhna i dâl' ti la, a duh tak tak che chuan entawnna hun a siamsak ve hrim hrim ang che" Châmi bawk a ni. Henu hi chuan min chîk a, ka hlimna tur, ka himna tur te hi a ngaihtuah âwl lo ţhin. Mahse a thurâwn min pêk erawh pawm tlâk a vâng ţhin khawp mai.
Exam kan han ţan chu kan ţang bawka kan thiam hlîr a chhuakin ka hria! Kan hun neihin min daih loh ka hlâu hial zawk a, ka hmanhmawh lutuk chuan ka pencil te, ka scale te ka titla nawk nawk a, chhar pawh ka chhar hman mang lo. Pencil phei chu pathum ka titla tawh a, ka la chhar lo vek! Ka zawh vek hunah a hlâwmin ka chhar mai ang. Eraser pawh a kil lamah a tla a, a lum phei daih.
"Va ţang awm riap riap ve.. Chhar hman lo lêkin" zirtirtu duty pakhatin ka hnuaia kûn kât kât paha min biakna pawh ngaihtuah hman lovin ka thil ziahah ngawt ka insawrbing a, pencil pathum, eraser pakhat leh scale sei pakhat ka dawhkana a rawn dah khâwm rûih tâkah chuan ka hawi chhuak ve hrâm a.
Khâ zirtirtupa kha a ni dawn emaw tih laiin U Arona'n min lo melh rûn a, a khi vur vur bawk!
"Thiam bawk em?" Mitko sân âk chung hian a lo ti a, ka bu nghat e tih lohvah chuan chhân pawh ka chhâng hman tawh lo. Ka thil ziah chu ka zo hman lovang tih ka hlâu lutuk tlat!
"Ka lawm e ka zalên ta!"
Ring fêa Hmangaihropuian a tichhuak lauh lauh chu a hnungah zuiin ka bêng dawt dawt a, zirtirtu, office kawta lo ţhu ţhap te chuan khi ţhâw chungin kan lam an rawn hawi a, Puipuia lah zak hmêl a pu leh chuang miah lo! Nuam a ti hah hah êm a, a zak lo pawh chu a âwm lo hran lo.
Kan innghahkhâwm ţak ţak hnuin zirtirtu duty te an rawn chhuak ve a, u Arona sira khaw ţhenawm zirtirtupa kal ve chuan kan lam rawn hawiin eng emaw a hrilh ru sur sur a, an nui dûn hak hak bawk a, ka chungchang a sawi loh hrâm ka beisei!
"Op-a i lo hmu em? Zawh vek a hun tawh sia khawiah nge a awm ang le? Helai kan thlen hnuin ka la hmu leh miah lo" khi vur vur chunga min rawn pan mêktu Châmi hnenah chuan ka lo zawt thâwr a, ani lah pek chuan, "Ka hriat tirh aţang Op-a i zawn ve vawikhatna! A va mak ve!" A rawn ti har har a, a mood a fuh leh lutuka ka ngeih lo lek lek dawn alawm mawle.
"A ngaihawm ve alawm.. Exam te kan zo ve tawha hmuh ngei ngei ka ngai" a huat tur tâwk leka ka tih chuan a hmêl a siam chhe nasa khawp a, a hnâr erawh vang hawk khawpin a chuar tup lawi a, men pawh a meng leh tawh mang lo.
Châmi'n min chhân hma chuan, "Sawmzel!" Piah deuh aţangin an rawn ti lauh a, amah Op-a ngei a ni. Sawi lai mek mekin..
"Ka lo zawng mêk che a, lo kal rawh hetah.." Tiin ka hûi lauh lauh a. "Chansi ka pe ang che u" tih paha ka dâr rawn bêng dat datin Chámi'n min kalsan ta bawk.
"Khawvel boruak nuam leh thawveng lutuk hi i feel em?" A rawn ti phei ve barh barh a, a hlim lutuk hmêl chu ka hmu ţha riau lehnghal!
"Khawvel boruak nuam leh thawveng lutuk hi nuam ti tho mah ila i ngaihawm reuh ka ti" ka lo ti zeuh chu a hre fuh ngang ni tur a ni, a rawn thlen hun aia hmâah a rawn thleng phei a, a rawn tlân titihin ka hria.
"Sawi nawn leh lawks" te a ti vêl a, "ngaihawm min ti ve tak tak maw?" Te a ti thûl, chutiang khawpa ka ngaih nih nuam a ti te chuan rilru a tina zawk.
"Ka ngai ve tak tak che, nichin pawn Châmi hnenah i awmna ka lo zawt a" a kuta vawnsak thek pah chuan ka ti a, ka ngâi ve tak tak vawiin chu.. A ngaihawm riauin ka hria a, ka bula a awm hian him leh thlamuang riaua inhriatna ka nei. Hmâna u Arona bula ka awmdan ang khân!
"Ngati nge ka awmna te midang i zawh? I thinlung kha zâwt ta che. Tah khân ka awm reng ţhin alawm" tih leh ka thin zâwn rawn khawih zauh a rual a. Ka lo ţê ţhat thung. A inla zei ve thei bawk sia maw..
"Tlâiah chaw i lo ei hman dâwn bawk si lo va, vawiin chu in rualin ka haw lo mai ang. Peksanga nen khaw lehlamah sâwn kal kan lo tum a, a bialnute khua a ni âwm e. Ka va rîmpui lawk anga kan rawn haw har deuh maithei. Hmâna kan inchawina kha i la hria em?" Thlanglam thing buk hnuaia kan ţhut hnu chuan ka kut khâl niap niap chungin a ti a.
"Hre lutuk tlat, exam zawh veleh u Muanzova thingpui dawrah ka duh duh ka ei dawn kha, i pawisain" ka lo tih chuan a nui hak hak a, "ni e ka pawisain i ei ţeuh ang. Naktuk chhûnah ka rawn chho ang a i ei ţeuh dawn nia" tiin min kuah salh a. Engtizia nge mawni vawiin chu Op-a hi a ngaihawm riau mai a, a zûnah ka uai ve tak tak tawh dawn pawh a ni maithei! U Arona âi mahin a bula awm ka thlahlel hial alawm mawle!
(Kârtawpah ka riahna ka sawna internet signal a chhe lutuk a maw, ka rawn dah thei thlâwt lo anih kha min lo ngaidam dawn nia.. Chuanin, kan thawnthu hian a hmâwr a bâwk ţêp tawh e aw, comment hnutchhiah ve hrâm la)
End of chapter - 31