Politician nupui

[Cck Lalchhuanawmi]

Politician Nupui Hring Nun
Political Love Story_Fiction
Chapter-15
Ziaktu: Cck Lalchhuanawmi

(Ziah sa a zo tawh a, ziah chawp a ngaih tak avangin a seia ziah dawn chuan hun a duh rei ve nen, tawi tak tak ni chuang loin, a hma aiin a tawi ta ṭhin dawn a, min lo hrethiam dawn nia)


A u Police a ni a, Sum a tichingpen tak tak a nih chuan, a nasa lo teh ang chu aw...


Kan MLA Samuel Remsangpuia mai mai chu!


Intifai turin Bathroom-ah a lut a, "Khawiah nge Apa?", mut chhuak âw ṭeuhin Lal Fanuin a ti a.


"A inbual lawk a, Lal Fanu, i mut a chhuak tawh em ni?", ka pawm a, "Chhuak, Apa bulah ka kal duh", a meng hleithei tawh lo.


Lehkha zir hi chuan, mut a chhuak hma thei a nia.


Sammy a rawn chhuak a, "Lal Fanuin a zawng nasa lutuk che, han âwi mu teh", ka ti a.


A rawn ban ve mai.


A pawm a, Lal Fanu chu a mut a chhuak hle a ni, a Pa âwmah beiin a harh eih lo. "My Princess, tui takin muhil rawh aw", Sammy-an a hnung a chul heuh heuh.


"Mutna ka lo va siam ang, Siamtea te pawh an zir zo tawhin ka hria",


"Ka va en ang e".


Sammy chu a fate pindanah a kal a, kei kan pindanah.


Khum ka siam fel a, rei loah a lo lut. Dim takin a mut a, puan a sintir leh thlap.

"A u te pahnih i mangṭha tawh em?",


"Mangṭha tawh, Office-ah reilote ka awm dawn a nia, min lo mutsan rawh aw", a ti a.


Siamtea leh Freddy-a mangṭha turin ka kal a, "Anu, Apain mut ho a phal tawh lo mi? Ka ngai asin le", Freddy-an a ti khauh.


Zanin chu, mut ho loh a him ber. Inhauh inring rengin ka awm tlat. Inhauh ka cho zek zek a ni mah zawk.


"Bawiha, hna thawh tur a ngah hlek a, naktuk zanah te kan mu ho thei alawm", ka ti a.


Ngui nghiai hian, "Tak tak aw. Apain min ngai ve lo mile?", a ti leh.


Siamtean, "A chau dawn lutuk, Anuin naktuk zanah a tih kha, hriatthiam tum ve rawh", a lo ti dam thlup a.


Min Chhanhimtu a ni ringawt.


Ka mangṭha zawh hnuin êng ka tithim a, Sammy Office a êng teng teng. Phun bul bul thawmte ka hriain ka hria.


Kawngka bulah dingin Beng ka dawh hnai a, "Dâwt ka tih chu", sehchilh nawka tiin dawhkan chung a hnek a ni ang, a ri chawrh a, ka phu nasa nghe nghe.


Dâwt a ni nge ni lo amahin a hrechiang ber ang.


A cho chhuah ti tawh mai ang, MLA ni tura a Campaign danin zir miau hek lo. FIR thehlut tute awm se, man daih se nia ka tih.


Mutsan turin min ti a, mutsan hmak ila.


Zanlaiah ṭhangharhin, Sammy ka hmu lo chu tho ṭhem ṭhemin a Office-ah ka va en.


Dawhkanah innemkhalin a lo indawm kun ngâih ngâih.


"Sam?", kawngka hawng paha ka ti chu phu nghekin, "Ngati nge i lo kal?", a mit a sen rûm mai.


"Lo mu tawh la, khua a vâr ṭep",


"A chhuak lo a ni e, lo va mu zawk rawh", a dawhkan chunga lehkha hnawk niaih a intihfeltir.


U Ngaian a biak ka ring a, an inbe tawh hrim hrim ang.


"I mut loh chuan ka mu thei bik lo, lo kal rawh", a kokiah ka kuah a, min hnial ṭang ṭang.


"Thil ṭha tâwkin a hmuak che a, i hnar mai ang maw?", ka han ti a. "Hnar mai ang, lo va mu rawh", a ti mauh mai.


Mu tura min zui mai ka ring a nia, min ṭhawng chiang kher mai.


Ko ko pawh ni ila, a sawhsawlawt dawn chuang lo, "A nih, Sam, lo mu thuai rawh aw", ka ti a.


Muhil thei tawh bik hek lo i, ka inlet ka inlet.


Mu turin a lo kal miah lo. Office-ah ka kal thuai a, a ṭhutthleng hnung ngheng ar arin a ṭhu meng kur.


"Sam?", min chhâng lo.


A khap fap fap a, a hma zawn a en ngawt ngawt.


"Sam, mu turin lo kal rawh ka tih che kha", ka sâwi hlak a, a thaw chhuak hawk.


"Chhuanpui?", ka kâwngah min pawmin, ka dulah a hmai a phum.


A lu ka tuai a, "Mut hahdam i mamawh", ti mah ila, tun dinhmunah muthilh chu tih theih loh tluk a ni.


"Anu, Apa?", Lal Fanu ṭap ruai ruai ka hriatin ka tlan chhuak a, pindan kawngka bulah a lo ngik feih feih.


"Lal Fanu, lo kal teh", ka pawm kâng. Sammy-an min rawn chuh.


Lal Fanuin a ban reng reng a, "Sam, nizanah i riah bosan daih sia, a ngai lutuk che a nia", ka ti a.


An pafaa inawm turin ka kalkiang.


Puan Tahtute Chanvo tihchingpen chungchang sawipuina hun ka nei thei lo.


Party Office-a a kal loh leh, a Office-ah a inkhung a, Dawhkan chung a hnek ri ṭhuai ṭhuai zel.


Chanchinthar-ah vawihnih an puang leh hman. Sammy-a nau Lalfela, Phaia awmte chhungkua an rawn chho a, Hnahthiala ka nu leh pa an lo thleng tawh bawk.


Lalfela chuan fanu pahnih a nei a, Siamtea chhâng an ni a, Freddy-a u te an ni thung.


U Hmai pawh a lo tel a, ka hahdam sawt. Lal Fanuin min hlat duh lo chu thuhran, Siamtea leh Freddy-a a pawm chawt a, hahdam zual tak ka ni.


Lalfela nupui Robawihi nen lah sawi tur apui kan ngah.


Lehkhabu chhiar peih ve tak, Thawnthu chhiar peih ve tak a lo ni reng a!


Sammy chungchang an khêl luai luai.


Eptu Party lamin an khêl nasat ang huin, FIR thehluh an tum lo. Finfiahna nei ṭha tâwkin an insawi chamchi ringawt.


Sammy lahin, "MLA hlawh pawh hi kan kham lutuk, eiruk duh avanga Politics-a zuang lut ka ni lo", tiin, ṭan a khawh tlat bawk.


Eptu lamin FIR an thehlut si lo, Sammy chu a ṭanawm zawk ta.


Ka pain, "Ngaia hnenah chhûi chiang turin ti teh ang, dâwt a nih leh, dâwt thehdarhtu te a man ang a. Keini hian, min tihmualpho tum tiin FIR thehlut hlauh teh ang", a ti dup dup.


U Hmain, "Ka pa, a ṭha dawn lutuk. Finfiahna nei ṭha anga insawi siin, FIR an thehlut hleinem maw. Min tihmualpho tumna angin Sa i barh ang u", a ti ve bawk.


Sammy a ngawi reng, kei pawh ka ngawi reng. Kei chuan man se ka ti a, zan khat tal Jail-ah riak se ka ti.


Ka pasal a ni ka hria, rilru ṭha ka pu thei thlawt lo. Ka chunga a thiltih zozai ngaihtuah chuan, heng te lek lek Tuhrik tiat ni hlei lo.


Ka pa bawkin, "Fela te hi, chhuk thla ula a ṭha ang. Heti fakaua chhungkuaa buai rum rum tham a nih loh hi", a ti leh.


Zan a rei telh telh a, rilru ngaihtuahna a fim tih mai tur a ni.


A tirin kan han ri hlut a, ka pa sawi angin buai rum rumna tham a ni lo deuh. Sammy-a tan chuan manganthlak tak tur a ni.


Felan, "Ni e, naktuk lamah kan chhuk thla ang e, naupang School kaina bakah Hnathawh a khaihlak ṭan dawn tlat. Pa, ka nu nen in la awm dawn nge, u Hmai pawh hi?", a ti a.


"Hriatpuia a lo kal dawn a, a rualin kan haw ang", ka nuin a lo ti.


U Hmain, "A intiHeadmaster lutuk a, in khata chêng ho siin biak a har ṭalh mai ni", tiin, kan nui ham ham.


"Naktukah a lo kal ve dawn kha, Sangpuia zarah Chhungkua kan inhmukhawm thei a, Pathian Mal sawmnaah i ruat teh ang. Keinin, Lungngaihnaa kan ruat, a Hmangaihna lantirtu tih angin", ka pain a ti dap dap a.


Rilru a khawih ngei mai.


Lungngaihna, manganna leh beidawnna tâwk ṭhin mah ila, a Hmangaihna lantirtu a ni ṭhin.


Mut hmunah ka pa thusawiin min zêm chiai chiai, a sawi dikna chen a awm.


Chanchinthar hiala puan ngai khawpin hmingchhe ta lo se, Fela te an lo chho lo ang.


Hriatpuia a rawn thleng ang a, Chhungkaw kim chuan kan awm ngei dawn e.


Hmingi pawh a lo thleng tawh a, a lo thlen hmain Duhsakan a in luah tur a zawn hmuhsak vek.


School aṭangin Dawrah ka kal a, "Hriati leh Hmingi te, in lo dam maw?", ka ti lut a.


Lalhmingin min kuah chung chung, Hriati pawhin chuti tho. An pahnihin min kuah chung chung.


Taiṭita avangin Hriati hi chuan min ngainat phah ka ti lo thei lo.


Hriatpuia a lo thleng a, a lo thlen tukah Fela te Phaiah an chhuk thla dawn a, a lo thlen zanah Hotel Floria-ah Zanriah ei turin kan kal.


Sammy-a bulah Hmingi hruai ka dil a, a phal nasa mai.


Kan chhungkua bakah Hmingi te nen kan ni. Chhura rual kan ni chiang alawm. Hmingi chuan nuam a ti chiah lo, a duh lo chunga hruai lui ka ni bawk nen.


Sammy-an Duhsaka hnena, "Hmingi kha lo va thlah la", a ti chu, "Keimah zawkin le", Hriatpuian a lo ti khauh.


Hmingi lawm hman tawh nen nen, min sik hlawk hlawk.


Ka hriatthiampui lutuk.


Duhsakan, "Ka thlah thei alawm, Hmingi, lo kal rawh", ti pahin, motor kawngkhar a hawng a, î hê loin Hmingi a ṭhu lut thuai.


Hriatpuian a lu thak lo pui a hiah phah.


Engin nge min mawlh tehreng, Hriatpuian Hmingi chu a ngaizâwng tlatin ka hre ta mai.


Vawikhat an inhmuhna chauh a ni si.


Mahse, Hriatpuian lo ngaizâwng pawh nise, Hmingin a ngaihzâwn let loh nan ṭan ka khawh ang.


Hmingi hi chuanin Sammy-a leh a chhungkua hi lo hnaih ve lo se ka duh.


Hriatpuia ai chuan Duhsaka ka la duhpui fe. Headmaster leh Driver inthlauhna ka hre ve lem lo.


Sammy-an, "Hmingi kha, a puar hauh lo ang. Chaw a ei tlem em mai", Lal Fanu chal tuai heuh heuh pahin a ti a.


"A duh lo chung ka hruai a, nia; a zakin a inthlahrung dawn lutuk. Lo hruai loin, chaw order-in a inah va pektir ta mai ila tih te ka ngaihtuah hnuhnawh",


"Kan chhungkaw bil nen kan la ei chhuahpui leh dawn nia", a ti a.


Lal Fanuin enin a nui suk suk.


"Sam, Puan Tahtute ṭanpuina Sum kha",


"Ka tihchingpen i ring em?", ka chhâng lawk lo.


A mizia leh chezia a inthlak hlawk zel a, khum khata a mut pui ngei pawh hian a mize dik tak ka la hre thei lo.


Chuvang chuan, ka chhânna chu 'Aw' tih hi a ni.