Doctor ni si hi a hriselna a ngaihtuah meuh lo! Inchhung chet te hi ti tawh loh tura ka tih paw'n a lo ti leh nge nge zel a, nitin kan in veng seng lo bawk nen dik tak chuan kan chhiat mai te hi ka hlau ṭhin.
Thla 7 kan tlin chuan hna ah pawh a kal tawh lo a, kei erawh exam kan hnaih telh telh vangin ka kal hram hram a, a chang phei chuan kal tawh loh tawp mai te ka duh ṭhin. Mahse pa ni mai tur ka ni a, ka fa leh nupui enkawl theih ngei ka tum bawk a, theihtawp ka chhuah hram hram a ni.
Aizawl lama kan chhungte'n Rempuia kaltlangin min rawn be ziah a, biak vak ka duh ngai lo! In lamah Sangpuii mahni chauh a a awm chu ngaihngam taka class kal a har a, ani a lo fimkhur lo leh zel bawk nen! Kan chhungte chu biak a,chah thlak mai te ka duh ṭhin mahse sawi leh sawi hnu, thlauhthlak tawh ka ni a, Pathian zarah kan nupa in kan khawsa ve thei zel a, min tuithlartu te puihna ngai a khawsak hi ka tum bau lo.
In check up na ah hruai ngei ka duh vangin class ka bang hma a, in ka thlen chuan a lo inpeih diam tawh bawk.
"Ilo haw duh kher a,mahni paw'n ka kal thei reng alawm"
"Hruai ngei che ka duh sia"
Lawmsangpuii POV
"I chiang maw?Tu emaw lak aṭanga min ven I duh vang a ni chiang" Darthlalang aṭang nui suk suk pah a la va melh chuan min melh rum nasa mai.
"In inbiak leh vaih chuan hospital dangah kan kal tawh ang" Kan in checkup hmasak khan ka thawhpui doctor tho mipa nen kan inbia a, thik tur phei chu engmah kan sawi lo. Naute pian hun tur vel leh rai ka inhmeh thu min hrilh a ni mai a, mahse Remsanga pui hian a thik tlat! Haw kawngah min be duh ṭhak lo a, mipa sang thlerh thlawrh lrh pa nimai tur ni si hi a titau bar bar a nih kha.
Hospital kan thleng a, dr Shweta in min lo lawm thiam leh khawp mai. Ultrasound kan tih lai chuan Remsanga chu ka en ṭhin,a mitah chuan lungawina leh hlimna ka hmu zut zut a, screen ah chuan a mit a fu chat a, khaw dang reng a hawi thei lo.
"In nu hi I duat a niang, naute reng a hrisel mai" Dr in a tih chuan kiai sukin min rawn melh a, a lai leh reuh emaw ni?
Dr chuan naute bakah kei pawh ma ṭhat thu min hrilh a, ei leh inah pawh inthlahdah lo turin min ti a, in chhung chet pawh ti vak lo tura min hrilh chuan Remsanga'n a lo thlawp leh khawp mai, min hrilh ngun ber kha a ni bawk a.
Haw pahin naupang thil zawrhna ah kan kal nghal a, pawn ka la chhuah theih lai hian mamawh lam khawm ila a ṭha ber. Remsanga hian a rawn lei ṭhin a, hmeichhe naupang pheikhawk hlir a ni. Lei tawh lo tur emaw mipa thil lei tura ka tih paw'n a zawm chuang lo. Hmeichhia a nih ngat chuan pheikhawk chu ngah tawh tak a ni.
"Mipa thil kha en ve deuh rawh aw,mipa a lo nih hlauh chuan kan buai lutuk ang" Hmeichhe naupang kawr fual inkhai fel at mai a enkual leh dan dan lai chuan ka ti a, melh pawh min melh lo. Kei erawh chuan mipa leh hmeichhia hak ṭawm thei tur ang chu ka en a, kan la hnem bawk a, thla 6 a nih thleng chuan min daih chiang ngawt ang. Naute puan erawh tlem a zawng kan la a, hemalah hi chuan naupuan an hmang vak lo a, thla an tlin phei chuan kawr an hak tir tawh ṭhin vang a ni.
In kan thleng a, thlanin min bual hneh em vangin kan 2 in kan inbual dun leh a,min bual a ni zawk mah ang chu. Inbual zawh ah pawh ka mamawh min lak khawm sak zung zung a, min tih ang ang chuan ka awm tawp a, naupang ang mai ka ni. Eirawng bawl hmain kan thil lei te ka dah fel a, naupang hak tih takah a tê hlawm em em a, hengte hi a ha ve ngei anga, seh a chakawm ngawt ang.
October thla kan chuang kai a, thla leh mai ah naute kan neih tawh dawn a,ka phur rualin ka huphurh deuh a, kan nupa chauh ka nih bakah keimah zawk pawh hi nau khawih vel la ti ngai lo ka nia, ka huphurh chhan ber pawh a ni. Remsanga a hah ṭhin em vang hian piang vat vat tawh se ka ti a, theih ang anga pui ve ka duh a ni. Lehkha zir a ngai a, lehlamah kei leh naute min buaipui a ngai bawk a, phun nawi lovin a timai zel a, a lakah inthlahrun a nâ takzet.
Zanrei tak tak thleng a zir a, zanlai ka zung tur ka thawh te hian a lo la zir a, toilet thleng min hruai hnuah khumah min muttirin puan min sin ṭhat tir leh thlap a, ka chalah fawpin thuk rawih hian 'Ka hmangaih che u' tiin a zir zawm leh mai a, zingah ni se min thawh khalh ziah bawk. Piang nawn leh dawn pawh ni ila amah bak hi pasalah ka thlan chuan ka ring lo,ka intawn tirh ah a naupan vanga amah ah rinna ka nghat theih loh lai te kha ka ngaihtuah a,ka lo ring sual chhia va a ni.
Mahni tawkah kan buai thei em em a,exam dawn hnaih ah chuan huphurh tak tein a huphurh a, zan mut hmunah ka titi te hian 'tun ṭum chu ka exam lo maw dawn maw ni le?' te hi a ti leh ringawt zel a, a inbuatsaih ṭha hman lo ngaihtuah chuan exam lo mai tura tih te ka duh a mahse tawn hriat ve nan hrim hrim exam ve ngei se ka ti bawk a, a bulah phei chuan engmah ka sawi lem lo.
Form chu a fill up leh ta tho a, huphurh hle mahse Zoremsanga-a ko a tihtur tla te,eng anga harsa pawh ni se ti ngei ngei ṭhin a ni miau a, exam tur chuan a insiam ta ngei bawk.
"Inah lo awm la, khawi ah mah chhuak suh aw..in dim bawk la" tiin min kuah a, a thaw leh hak ṭhin. A zam tih chu a chet dan aṭang ka hre tawh, tuk dang ai hmain a tho a, biak pawh a hre lo. Chaw pawh tlem te chauh a ei a, a vei tawk sek bawk a nih kha.
"Ṭawngṭai phawt I duh em?" Ka tih chuan min kuahna thlain sofa awmna lamah min kai phei a, min ṭhuttir nghal zat.
A kut vuan chung chuan Pathian hnenah ka ṭawngṭai a, mihring lam aṭanga thlir chuan beisei a sang lo a, kan inbuatsaih hun chhung reilote nen. Mahse ka dil apiang min pe zel a, tuna ka dil pawh hi min tihhlawhtlinsak ngei ka ring a, kan nupa tan hian thil ṭha tak min ruatsak ngei ang tih ka ring tlat a ni.
"Ka hmangaih che..hei pawh hi ka hmangaih" tiin ka dul chu a fawp a, naute a lo che leh zel bawk nen a hmelah chuan hlimna ka hmu a, hmuh a nuam takzet.
A kal dawnah chuan kawngka thleng ka va thlah a, kal lawk lovin rei ngial min fawp leh a, a duhthawh lutuk chu min ei zawh vek a tum emaw ka ti hial!
Exam tur chuan a kal a, kei pawh inah awm mah ni ila ka rilru a nuam thei lo! India ram chhung, state hrang hrang aṭang a thiam rual an exam dawn a nia, exam tur mihring an tam a, seat an inchuh tur lah chu a tlem bawk si. Rempuia'n min lo bia a, ani pawh kei ang thoin a lo huphurh ve viau mai a, a sawi dan chuan Remsanga exam chu a chhungte dang pawhin an hre deuh fur a, awih pawh an awih lo hial a ni awm e. A chhungte tan chuan a awihawm lo ve bawk em a, kam chhe tleuh nan leh an hauh ngun berin India rama exam pui ber a hmachhawn ve ta chu a nia, awih a har dawn lutuk. Ka tih theih chhun a ni tih hriain ka ṭawngṭai leh ringawt zel a, dar kâr thum pawh chu rei ka ti takzet.
Dar 2 velah in a lo thleng a, engmah ka zawh hmain 'Ka tling lovang,beisei sang suh aw' a ti ringawt a, thil dang zawh zuina chi niin ka hre lo a, ka zawt zui ta lo.
"Exam kha chu a zo tawh a, ngaihtuah zui suh aw..I tlin leh a lawmawm anga, tlin loh paw'n duh duh I ti dawn nia,duh leh I zir zawm anga" Ka tih chuan a bu nghut a, chaw ei kham chuan a hmel pawh hmu a nuam ta deuh.
Thleng ka sil zo room ah ka luh chuan khumah a lo mu a, puan pawh sin lovin a ban chu a chalah a nghat a, ka thawmah a chet miah lo vang chuan a muhil a nih ka ring. Zan dangah a mengrei ṭhin si a, a chau rimtawng a ni ang. Puan ka sin tir a, kei erawh ka mut a la chhuah lo vangin room light off in ka chhuahsan a, sofa ah ka ṭhut thlak chuan Trixie in min rawn hnaih leh nghal zat.
Phone ah Amy nen kan inbia a, lo zin a chak thu a sawi a ,lo zin tura ka tih lahin 'a chi lo,head hi a hlauhawm emai' a ti leh ang lawi a, rul thlah,rilru chhe zet pa kha an la hrawn char char a nih hmel. Civil a ka hna ka bansan kha a tirh chuan ka ui ve viau a, a chhan pawh sawrkarah luh a har em vang a ni. Mahse tun hnu hian tifuh ka in ti a, hna kha lo bansan lo in Aizawl ah lo awm ta reng ila Remsanga hi a exam thei kher lovang.
"Hello" Rempuia hnen aṭang call ka dawng a, chanchin engmah ka la hrilh lo tih ka hrechhuak.
"Sangpui Kanu'n a be duh che a,lo be rawh aw" A rawn ti thawr a, aw leh aih tih hman pawh a ni lo.
"Sangpui in dam ṭha maw?" A rawn ti dam thluam a, Remsanga dam lo lai a hospital ah a lo kal ṭum kha ka hrechhuak. Biak pawh min be ngai lo a nih kha.
"Aw kan dam ṭha" Kei a pawh chu ka zam ve deuh emaw ni,a zawhna bak engmah ka sawi thei lo.
"Bawiha vawiin lamah a exam tih ka lo hria a, nangmah vang liau liau a nih tih ka hria a, I chungah ka lawm lutuk a nia aw...a exam te chu eng nge a an?Sawi te a neih em?"
"Beisei tisang lo turin min hrilh a, a ti ṭha vak lo a nih hmel"
"A lo ni maw?Eng pawh chu ni se a exam tawh a, a ṭha mai alawm,engtikah maw naute chu in neih dawn?" A rawn tih chuan chhang mai lovin ka ngawi kar a,ka zak deuh tlat.
"I hre thei em?" A rawn tih chuan aw thian kharh in tun thla a nih thu ka sawi a, 'A khaiii' a rawn ti chul! Awmpui ka ngaih leh ngaih loh vel min zawt a, pawisa kan neih leh neih loh te pawh. Engmah ka zawt ve lo na chungin an chanchin a rawn sawi tho a, Remsanga pa pawh a thisen a sang leh thut ṭhin a ni awm a, damdawi inah an lut zing viau a nih hmel.
"Bawiha chu eng nge a tih a?" Inbiak chhunah tiin a duham ve deuh nge a la dah mai lo.
"Ani chu a muhil tawh a" Ka rilru chhia a chhuak leh nge 'Ka lo kai tho ang,lo be rawh aw' ka ti duh bik ṭhak lo.
"A nih chu.." a ti fan raih a.
"Nu a tawk tawh, mut te pawh a duh ve ang..nang pawh damdawi ei I ngaih kha" Rempuia aw ka hre zawm zat a.
"A nih muttui phawt aw,naktuk lamah kan inbe leh dawn nia" tiin call chu a dah ve ta hram a, sana ka en chuan dar 10 a lo ri tawh a, dar kâr khat leh chanve lai kan lo inbia a nih chu mawle!
Kawngka te kalh felin light ka off a, choka lam chiah ka ti eng thung.
"Ilo awm lo va" Room kawngkhar ka hawng tur chiah chhung lam aṭang lo inhawngin Remsanga'n a rawn ti nghal a, a lo tho leh hman chu niin.
"Ka rawn mu dawn chiah" Ka tih chuan ka darah min kuahin khum lam min panpui a, a mitmeng chu a kham hmel ngawih ngawih.
"Mu leh rawh, Ilo tho duh kher a ni"
"Kuah che ka tum a, ilo awm lo alawm" a tih chuan mipa naupang ang ka ti lutuk a, ka nuih chiam ringawt a mak min tih hmel ngang mai.
Kan nupa chuan inkuah rialin kan mu a, muhil leh tura ka tih chuan a mut a chhuah tawh lo thuin min chhang a, a mu tlem bik ngawt mai.
"I nu nen kan inbia a" Ka tih chuan a kut che lai chu a tawp chat a, a hmel hmu chiang lo mah ila min en ngur tih chu a thawk zawnga ka hmai za mer mer aṭang chuan ka hre thei.
"A hau leh che em?Nidangah chuan be tawh reng reng suh"
"Hau lo e, nangmah chanchin min zawt a, a ngai viau che a ni ang. I pa nen an dam ṭha lo a, damdawi inah an lut zing viau a nih hmel"
"An phu tawk chiah a nih chu,kan rilru hmin ngei an tum a, nang paw'n hre ve kar rawh. Eng pawh thleng se kan let tawh lo ang, Pathian zarah anmahni mamawhin kan awm bik lovang" a tih chuan a rilru chhiat lam ni lovin a thlamuanthlak hliah hliah.
"Awmpui kan ngaih leh ngaih loh pawh min zawt tak asin" Mahni a nausen mai,chu pawh fa hmasa ber lehnghal han khawih vel chu ka zuam hlawl lo a ni. Remsanga lah mipa a ni a, kan ngaihtuah awm lutuk tlat.
"Awmpui chu I duh em ni?" Min zawt ta khauh a, ka rilru dik tak hrilh hun niin ka hria.
"Aw zep loh chuan ka huphurh deuh a, I nu a awm chuan naute a buaipui thei dawn a" Ka ti niah niah a, chhawr ka duh vang ngawr ngawr pawh a ni lo, ka chhungte lam zawk hi beisei a bo em a ni.
"Awmpui tur chuan Lalfeli ka hrilh dawn nia, Kanu lak aṭang chuan beisei neih lo law law zawk ang" a ti ta daih a, Lalfeli te chu kan danglamna a awm lo hrim hrim.
"Lalfeli te chuan thiam a neih lovang,lo khawih tawh ṭhin pawh a ni hlei nem"
"Lungngai suh,I duh leh midang kan zawng dawn nia,Kanu ni lo"
"Kanu I han be vel ange" A biak chuan a chi lo viau ang.
"Be lo e, ka biak te'n ka ngam lo ang che" a tih chuan ka nui dun hak hak a, eng eng emaw sawiin kar lovah ka muhil chu a ni der.
Zoremsanga POV
Lalfeli ka han bia a, vanduaithlak takin exam a neih lai a lo ni a, midang awmpui tur kan zawn chhungin Dr in hospital a in admit hun tur a tih chu kan thleng ta mai! Tum anga thil a kal thei ta lo chu nu ber thin a chhe em em mai a, min melh rum reng mai a ni. Hospital khumah a mu a, a che ṭha thei tawh bawk si lo nen a ban phak a thil awm te nen min vawm a, sakei ang mai a ni.
"I nu chu ka lo bia ang,nangmah a buaipui dawn lo che keimah lawm min buaipui dawn" Mi a biak hlauin phone pawh ka ahsak daih a, hman min dil ngun viau mahse ka pe ngai chuang lo.
"I nu ka be zawk mai ang"
"A ngai loh! I biak chuan ka kal bo ang" A ti veleh tlat a, hetiang dinhmunah pawh kal bo a la sawi chu a nia.
"Kal bo sawi tawh reng reng suh,ka awm a, keima'n ka buaipui vek ang che,min ring tawp mai rawh..I nu biak I duh loh ang chiah khan kei paw'n Kanu ka be duh lo tih hria la, ani biak chu theihnghilh hmak rawh. Huphurh lutuk tur pawh a ni lo,mite paw'n an tithei a, ka ti ve thei ang..ka tiam a che"
"Ka ring chuang lo che" a tih chuan hahthlak ti zetin ka thaw hak, mi hi a ring lo thei si.
Zanah chuan damlo awmpuitu te mutna tura khum an dah ah chuan ka mu a, a thawhna hospital a ni bawk a, thawktu dang te pawh hian an ngai pawimawh bik khawp mai. A dinhmun check turin nurse ho an rawn lut zut zut reng a, a doctor ber pawh kan hmu zing malh malh hle.
"Remsang..Remsang harh teh" Ka ban a rawn pawt zat zat a, mit ka men chuan ka mit a kham ṭhum mai.
"Ka pum a nâ lutuk!" A rawn ti ta mai, banga sana ka en chuan zing lam dar 3 chauh a la ni.
"Doctor ka va koh ang aw" A hmel ka en chuan nâ a ti tih hriat takin a ṭhen chak chak a, a thlan vek bawk.
Hmanhmawh takin cabin aṭang ka chhuak a,nurse ka hmu hmasak ber hnenah chuan chanchin ka hrilh a, hmanhmawh zetin a tlan let nghal a, cabin ka thleng chiah tih ah doctor leh nurse te pawh an rawn thleng ve nghal a, hmanhmawh takin cabin aṭang chuan a mutna khum chawpin an nawr chhuak a, ka kut a hum tlat bawk nen ka zui ve zel bawk.
"Remsang a nâ lutuk" a tih chuan rilru a hah kher mai, tihtheih lah chu ka neih der si lo. Theih ni ngat se zawng a tuar ai chu ka tuar ngei ang.
"Rawn lut ve mai rawh" Dr in a tih takah chuan i he lovin ka zui lut ve nghal a, he dr hian kan nupa chanchin a hre bawk a, min hrethiam zel zawng a nih hi.
"Hlauthawng suh aw, I bulah ka awm reng a nia..thawk la la" Ka kut a hmer ngat ngat a, room chhung chu Bawihi au ri leh dr aw in a khat a ni ber.
"Sp sang leh rawh le, a lo chhuak ṭep a nia" Dr in a tih chuan a sang leh vak a, a hmel en ringawt paw'n ka lo hah ve vek thei.
"Remsang ka ti thei tawh lo" A rawn ti ṭiau a, a hmai chu mittui leh thlanin a bual a, ka khawngaih takzet.
"Babe ṭang fan fan rawh, a lo chhuak ṭep a nia aw...ka rualin lo ti ve zel rawh" tiin ka thiam ang ang chuan tihdan tur chu ka hrilh a, a lo ti ve zel tih ka hmu chuan beidawn mai a tum lohzia ka hmu tel a, he hmeichhia hi ka hmangaih a ni.
"Thawk la la...no. ka sawi apiangin I thaw chhuak leh ang aw" ka tih dan zelin a ti a, vawi 5 vel thawk kan la hman ang tih velah a sang leh ta vak a, a lu a nghah thlak dawt rual chuan naute ṭap riin room chhung chu a luah a, a tawp tawpah pa ka ni ve ta!
"Hmeichhia in neih e, ka lawmpui lutuk che u" Naute ṭap ngak ngak chu a nu awmah chuan an rawn mut a, Bawihi pawh ṭap chhuak hawkin naute leh kei chu min melh tawn zak zak a, tuna ka hlimna hian van a tawng pha hial ang. Ka fanu chu ka tan lunghlu ang mai a hlu a ni a, ka mitah chuan ani aia mawi chu an vang ngawt ang.
"Ka lawm e aw fanu min hrinsak vangin" A hmuiah chuan ka zuk fawp a, mawi leh mawi lo pawh ka thliar hman tawh lo,ka hlim em a ni.
Cabin ah kan indah lut a, nurse in min awmpui deuh chawt bawk. Bawihi'n kan fanu chu hnute a pe a, a chet lawk thei ka ring lo kha a nia mahse ani'n 'naute hmel ka hmu kha ka natna zawng zawng kha ka theihnghilh vek tawh' a ti tlat si a, rin aiin kan leikang viau.
"I fanu chu hmelṭha I ti em?" A tih chuan ka fanu aṭang mit ka la sawn ve chiah.
"Ṭha lutuk ringawt"
"A nu nge ṭha zawk naute?" A ti leh zel a, chhanna harsa tak a ni.
"A nu a ṭha zawk" ka tih chuan a nui suk suk a, a hringtu nu a ni miau a, fanu cu eng anga ṭha pawh ni se a hringtunu chu a tluk thei meuh lo a ni.
Lawmsangpuii POV
"A hmingah eng nge I sak ang?" Ka fanu hnute pek pahin a pa chu ka be mawlh mawlh a, Remsanga hlimna aiin ka hlimna hi a nep bi chuang lo. Ka thu ni lo mahse a duh ang tak fanu ka hrinsak thei hi ka lawm em a ni.
"Bimbemtei ka tih kha" Tiin a fanu hmui che ve niap niap chu a zu tawk a, a awmdan chu nuih te lam a za.
"Bimbemtei chu kan ti tak tak dawn ami?" Ka tih chuan nurse min awmpuitu chu a rawn nui huk a, tun aṭang paw'n mi nuih a tiza tawh a nia, a ti duh tak tak mai ang tih ka hlau. A nulat hunah a zak dawn lutuk asin.
"Tinge nalh I ti lo em ni?"
"Nalh te chu nalh e,ka sawi awmzia chu hming pangngai deuh te ti ve la?"
"Ka fiam che a nih kha, nalh deuh ka sa ang. Fiam che hi nuam ka tia" A tih chuan naute ka pawm tih hre lek lovin ben ka tum leh a, ani'n min lo dang vat.
Ka khum bulah kan fanu chu a mu a, a pa hian a mutsan phal meuh lo. A en ngawih ngawih a, tim tih hriat takin a zu tawk de de a, a kut a la leh rang hle. Kg 3 leh gram 800 in a rit a, nausen mai a la nih vangin tunge a chhun pawh ka hrethiam lo.
Kan fanu chu a pian aṭang ni 3 hnuah pawh hming a la nei lo va, a pa lahin 'Bimbemtei' tia koh chu a duhtawk em em mai a, engtia tih chi nge pawh ka hre tawh lo.
"A hming chu sa tawh rawh, a ni em em tawh lo, certificate siamtir te kan duh dawn" Naute pawmin a awi hlu hlu a, pawm a zawngchhang ang tih mawlh chu ka hlau.
"Zosangzuali ni rawh se" A tih chuan sawi awlsam ka ti ang reng.
"I chiang maw?I thlak leh duh ange aw" Ka tih chuan lu a thing a, a rilru a thlak lo turah ka ngai. Tunah chuan Zosangzuali nu leh pa kan ni ta!
Inah kan haw a, awmpui pawh chu kan la ta chuang lo. Zan 1 na aṭang a ṭap nghal ringawt a, a ṭah lahin a bang duh mai si lo a ,min timangang takzet. Nâ a neih a nih ringin dr Shweta chu zanlai ah te ka va bia a, ani'n min rawn pan chuk chuk a, nâ chu neih bawk si lo. Kar 1 lai zan tin a ṭah takah chuan a ṭahbelh chi a nih kan ring ve ta hmiah bawk.
"Zanin chu ṭap tawh lo se aw" Dar 9 bawr velah hi chuan tui takin a muhil a, dar 1 velah ṭah a ching a, mitchhingin a ṭap char char a, a ṭap uar ṭhin si a, a mittui te hi a luang ve ngei zel.
"Ka lo buaipui ang, mu tawh rawh" Mut hmain mamawh a la khawm zung zung a, tuilum thlengin khum bulah hian a lo chhawp diam zel.
"Bimbemte ṭah loh tur aw" Remsanga ṭawng ri ah ka harh a, an pafa chuan an lo inpawm leh mek chu niin.
"A ṭap leh ami?"
"Ṭap lo e, zun a cheh a" a tih chuan ka ner nawng, vai ram khawlum kumtluanna a ni hlauh a, Mizoram te chu ni se tun ang hun hi chu a vawt ngawt ang.
"Ka lo thlak ang"
"Ka thlak tawh a,hnute pe phawt rawh, a rilṭam ka ring" Ka hriat lovin a fanu a lo buaipui chu a nia, awmpui kan zawn laia a thusawi kha a hlen takzet. Rin aiin nau khawih vel a zei a, kan fanu a la te si, a pa a lian sia, a kutah a awm hi chuan ka hmu tê leh zual.
Nau kan neih hnuah ka ngaihtuah vel mai mai chu naute kan neih hma a Remsanga a lo exam hman kha a lawmawm takzet! Chuti ni lo se chuan a exam hman ka ring lo, keimah chauhin naute ka buaiphi thes si lo a, zanah men a ngai bawk a, a lo exam hman kha a fuh ka ti thlawt.
A tukah chuan ka thawhpuite'n kan fanu Zosangzuali chu an rawn en a, thil pek an rawn keng ṭeuh bawk a, malsawmna a dawng takzet. Ka phone a Bawihtei thlalak chu Rempuia ka thawn a, Remsanga hriatpuina tel lovin. Hria se chuan a duh leh dawn lo chiang sa a, Aizawl lam mi te lahin an lo hmu chak ve si a, ka thawn ve ta tawp mai.
Fanu a neih hnu chuan a inla patling sawt em em a, a hminga koh hian min eih duh tawh ṭhak lo a, 'Apa' tia koh chiahin zu han eih a mawle.
Ads click