MINE ALL MINE

[Kennelly Bawitlung]

Chapter-17


Kan insiam zo chhuak tur chu "Daniela chu a nuam sam vak lo a ni awm a...Khumah a mu hlun mai" U Bena'n a tih chuan "A ni reng dawn a sin! Tun ang khaw vawtah tunge tui cheng ngai" Lilyi chuan a lo ti ve vat "Kalsan vek chu a chi awm si lova, ka tel loin in va kal mai dawn a mi" U Bena'n a tihleh chuan "A ni thei lo! A hrechiang ber tu i nia engtin nge i tel lo te chuan kan kal thei ang?" Lilyi chuan a lo ti leh vat




Chutah "Keiman ka lo awm pui mai ang" ka ti nghal zat. Min en deuh thupin "Ka kal paih vak lo hrim hrim a... Bakah ka luna te paw a la reh loin ka hria" tiin ka lu te chu ka dawm leh hnuhnawh."Kan kal lo mai dawn a mi i nawm sam loh chuan" U Kima'n min ngaihtuah hmel taka a rawn tih chuan



"Ni love! Keimah vanga kal loh ringawt te chu a ni thei nang... Ni dangah pawh a la kal theih tho alawm, va kal rawh u ka kan ngaihtuah awm lovang" ti nghal vatin "A nih leh le, damdawi kha Daniela lo pe mai rawh aw" tiin Lilyi chuan an kal hmain min chah a.Motor a an kal liam chu en zuiin an tlan liam velah inah chuan lut nghalin Daniela mu lai bulah chuan ka va thu lut nghal




Engmah sawi loin a chalah chuan ka dep a. A khua chu sik deuh ser ser in damdawi leh towel huh ka la nghal vat. "Dan, tho la damdawi hi ei rawh" tia ka hrilh chuan muangchanga rawn thu chhuakin damdawi chu a ei ve mai. Ngawi reng chuan a mu lehnghal




Towel hnawng chuan a chal chu ka dep sak a. "Ka tihpalh lutuk i duhtawkin min hau thei ang ka thiam loh vek a ni" a hnunglam atanga kuah chung chuan ngaihdam ka dil mawlh mawlh "Engtin nge keiai a upa te ka hauh thei ang?" a tih chuan ka nuk hak. A thinrim lo chu mak ka ti zawk.Keichu ni i la karkhat chhung tal chu ka titau ngei ngei ang.




"Vawt i ti em? Puan Ka'n lak belh ang nge" tia thawh ka tum chuan "A ngai lo ti hian min kuah reng rawh a nuam" a rawn tih chuan ka ke pakhat zawk chuan khawkherin duat takin ka kuah vang vang. Rei vak lovah chuan a muhil a ni tih hriat takin a thaw sak sak a.




A dim thei ang ber a tho chhuakin room atang chuan ka chhuak a. Choka lama Daniela thawh huna a ei tur siam tur chuan ka kal nghal. Mahse Lilyin tui a lo in lai ka hmuh chuan ka phu nasa lutuk! "Eng lo a nia nizan ka in nasa lutuk kha ka pumin a tuar lova....Ka lo let leh ta ngawt mai" tiin a lo kir leh chhan chu min hrilh vat a.




"A va zia love damdawi te i ei tawh em?" insiam rem vatin ka zawt nghal "Aw ka ll ei zo chiah a, Daniela chu eng nge a an?" a tih chuan "Damdawi ka pe tawh a tunah chuan a muhil mek" ka tih chuan chiang zet a min en kar chung hian "Daniela vang a ni tiraw kan rual a kal i duh loh chhan chu" a rawn ti ta mai.




"Teuh lo mai! Vawiin chu ka lu na nen ka chhuak peih lo hrim hrim alawm... I ti mak thei em mai!" ti ve tlat in za lo deuh chuan ka nui chhuak hak "Dawt sawi lo mai rawh nizanah Daniela nen in infawp lai ka hmu vek" a tih chuan ka meng phawk kher mai. Engkim a lo hmu vek a maw!




"Lily.... Ih... Daniela leh kei hi... " ka sawi lai mek chuan "Ka lawm pui lutuk che!" nui sang chung hian min rawn kuah dawrh, ka hrilhhai lutuk chuan chet ngaih na pawh ka hre lo ka ding khawng tawp ringawt. "A tawpah chuan ngawihzawng i nei ve ta hram alawm...Mipa i ngaihsak lo lutuk hi a chang chuan patil i ni emaw ka ti rum rum thin a... Mahse tunah chuan a awm ang ve tawh lutuk e" a tih chuan "Ih... Pawi i ti lo a maw?!" ka tih deuh hu chuan




"Engvang ngawt chuan nge pawi ka tih ang! Ka cousin leh thiantha ber mai inkawp hi ka hlim lutuk ringawt! Mahse Daniela hi a la naupang chhia viau lo maw? Buai na te a thlen thin che em?" ti deuh zung zungin sawi mai tur pawh ka hrelo ka lawm lutuk chuan Lilyi chu ka kuah nghal nawk nawk.




A ni pawh chuan min lo kuah let ve in kan pahnih chuan kan ri chul mai. "Mahse U Kima hian a la hre lova... Aizawl kan let hunah hrilh ka tum tawh a" tia ka sawi chuan "Ni e... A duh na che a rei ve tawh sia a rilru a na viau mai thei a ni. Mahse engtikah emaw chuan a hriat a la ngai dawn tho a" Lilyi chuan a lo ti ve bawk.





"Tinge i thawh daih a nuam ka la-" Daniela chuan Lilyi nen min hmuh dun chuan a tawp nghat chawt. "Tinge hetah i awm?" Lilyi chu a zawh zawm nghal chat "Nang hi i lo zei ve tawh hle mai ka ti Rimzuali te ang i chhai tlu thei a nia!" Lilyin Daniela kuah dawr dawr pah chuan a ti "Eng thu nge maw i sawi le?" Daniela chuan a rawn ti chhuak tawk.




Chutah Lilyi chuan thlah in "Engkim ka hre vek tawh. Chuvangin zep buai a ngai lo" a tih chuan Daniela chuan mak ti tawkin min rawn en. A dik a ni tih chian nan ka lo bu nghat. Chuveleh ka bula rawn thu phei nghalin "Ka ril a tam lutuk ei tur min siam teh" Lilyi pawh chu awm ve lo ang mai in pangchang tawkin ka darah a rawn bei nghal. Lilyi nen chuan in en in ka nui tawp.





Ei tur ka siam lai pawh chuan a kal sawn duh tawh reng reng lo min kuah bet deuh tlat. Lilyi chu ka va en zeuh choka a dawhkan kil chuan min ei lo tawkin a lo thu ngawi kur."Lilyi awm ve reng hi... Lo va thu rawh" ti deuh su su in "A hre tawh tho alawm... Tihian zalen deuha kuah che hi ka duh alawm" a lo ti ve tlat. Ka dem hran lo keipawhin nuam chu ka ti ve reng.



Written by
Kennelly. B