Chapter - 32
Ziaktu : ilefi imoz
(Recap : "Hre lutuk tlat, exam zawh veleh u Muanzova thingpui dawrah ka duh duh ka ei dawn kha, i pawisain" ka lo tih chuan a nui hak hak a, "ni e ka pawisain i ei ţeuh ang. Naktuk chhûnah ka rawn chho ang a i ei ţeuh dawn nia" tiin min kuah salh a. Engtizia nge mawni vawiin chu Op-a hi a ngaihawm riau mai a, a zûnah ka uai ve tak tak tawh dawn pawh a ni maithei! U Arona âi mahin a bula awm ka thlahlel hial alawm mawle!)
"Sawmzel! Rawn phei rawh u le khutah thil kan in eipuar ang a kan haw nghal dawn nia" piah deuh fê aţanga min rawn âu lâwng lâwngtu chu u Arona a ni. Op-a nen kan inmelh zawk a, a nui a, kei erawh ka nui ve lo. U Arona laka tê bîk riaua a inhriat ţhinna hian minti awm nuam lo ţhin a.
"Phei ang, kan rawn chhukthla ve tawh lo mai ang aw keini chu. Naktukah kan inhmu dawn nia, zingah te khân chaw pawh lo ei lo hial rawh. Chhûn thil ei hnem tîr che ka tum viau ania" tiin min kuah phei dat dat a, a perfume inkah rimtui chêk chêk chu ka feel phei veng veng mai.
Thlifîm thaw heuh heuhin ka sam a rawn chhêm lêng siau siau ţhin chu ka bengah min zehsakin, "Ngaihawm reuhnu! Ka tellova exam zawh i enjoy viau tur hi chu tlêmin ka hrethiam lo deuh a, mahse naktuk nghâkin ka ngaithiam hram hram ang che" a ti sup sup a, ka chalah rem lo zetin a rawn fâwp zauh bawk. Engvang tehkher nge mawni vawiin a thusawi leh ţawngkam te, a chezia te chu a ngawihnawm bik a, a ngawihawm veng veng mai.
"Kan kalsan mai ang che u. Exam zawh manah nula kan va rîm ang e." U Arona te ho an lo din khâwm laihna hmun kan thlen chuan a ti a, piah deuha a ţhianpa Peksanga lo dinna lamah chuan pheiin a rawn inher leh vut a. Flying kiss min rawn pe ve ngei!
"Tluang deuhin aw, fimkhur ula" tiin ka chah ve thlap a, chutih laia u Arona min lo melh dan pawh mitsîrin ka va hmu thei! Mitkhap miah lova min en rûn rûnin ngaihtuah thûk hmêl takin a ngâwi vung vung a, mahse ani chu puitling ania, a awmdam siamrem nan hun a duh rei lo thung.
"Chhuk ang u le" tiin an khaw mualah kan inzuithla ţhâm ţhâm a, kan chuanna motor 407 pawh a lo ding vâng tawh.
Thingpui dawrah lûtin kan in eipuar leh te te a, exam zo tawh nihna rilru thawveng nen, chawlh chhûng rei tur nen kan sâhâwk kual chho vel vek a, thingpui in in puar tawh ţhenkhat te chu motor-ah lâwnin puan an phah a, card te an lo han dêng vel! Nuam an ti hlawm khawp mai.
"Nang hi ka rin âi daihin i phawhawr lo! Kan kal dawna i phûr teh hâwrh nen exam kan han zo fel chu i cool ruih mai a. Ngati nge? I chhâng ţha vak lo emni?" Kan thil ei zo vântlâng Zun In lam pana kan phei lai chuan Châmi'n min zâwt ta khauh a. Ka awmdan cool raih mai chu engvang nge tih ka hre bik lo!
"Châm! Op-a hi ka duh ve ţan tak tak tawh dawnin ka hria, a mak lutuk tun hmain hetiang hian ka la awm ngai lo. Ka ngaihtuah reng a vawiin chu, kal lam aţang tawh khan, ka ngâi veng veng maiin ka hria. A bula ka awm te khân ka thlâ a muang. Vawiin atan chuan ka zêp lo, u Arona ai a lang lian zawk!" Ka ti ta ngawt a, thil nihna dik tak a ni. A mak khawp mai ka hriat loh laiin Op-a zûn hian min lo phuar daih tawh anih ka ring ta ber.
"A lawmawm êm chu! Cool pui tur chi pawh a ni lo. Hlima lâwma lâm hut hutna tham anih chu! U Arona aia i hmangaih zawk hun tur nghâkin hei chen i ngaichâng ve a, tunah a hun dik tak a rawn thleng dawna i lo dawngsawng thiam leh si lo. I timak ve chu ka ti, tlâiah a lawm nan kan inah chaw i rawn ei sak ang a u Arona tih thîk nan hrim hrim pawh ka duh!" Nui hawr hawr paha min nem kal dat dat chungin a ti a, a thusawi chuan dikna chen tam tak a nei a ni.
A hnenah ka sawi a, ka dîl a. Ka rilru dam hun min nghahpui turin ka ngên hial anih kha! Tunah ka dam ţan mêk a ni a, a lakah ka luangliam ţan hial bawk. Mahse ngati nge eng emaw kim lo awma ka hriat tlat mai le? Thinlung ruak, tu emawin a chhûn khah hun nghâka vân ruai angah ka inchan tlat a, lunglenna leh khawhar veng vengnain min tuam tlat bawk si. U Arona chân tak tak ka la phal chiah loh vang a ni thei ang em le?
"Lo kal khawm tawh rawh u le. Motor-ah lâwn ula kan haw ang." U Arona'n motor phên aţangin a rawn ti lûng lûng a, lukhum hmathlâwk a khum deuh vah bawka chhe lo lehpek tak a ni.
"Kei chu vawiin kan exam kha ka lungawi vak lo. Ka ţhutpuinu kha ka hmuh leh hun hunah ka spin dawn" Fabiana'n a lo ti lûng lûng a, a lungawi loh hmêl tak tak hlê lehnghal.
"A hrilh ţha vak duh lo che a ni maw?" an bul kan va thlen rual chuan Chami'n a'n ti zauh a, "hrilh ţha duh se spin ka tum nâng!" A lo ti hmak mai. A hmêl a ţhat vak loh chu thuhran, a han thinrim ve leh chhâwng chuan nuih pawh a tiza lo, ţah a tichhuak.
"Exam hmasak khan ka sawilâwk ve vek a, long answer ho zawng min hrilh la short leh mcq chu ka hnunga mi ka ring tawh mai ang ka ti ve vek a, min hrilh te chu sawi loh ama ta tur takngial pawh a ziak hleitheilo. Tiang khawpin ţhutpuiten kan ringa kan zir loh phah ve vek tawh a, lo zir bîk loh rêng rêng!" A ti leh hmarh hmarh chu kan nuihpui ţhâw hlawm a, a hrilh duh lo ve hrim hrim pawh ni lovin hrilh tur a lo hre bik lo hlê tihna anih dawn chu. Hahthlak dûn ngat ngat khawp mai.
Tluang takin kan khua kan thleng phei a, Vengthlang lamah chhukin Châmi te In lam kan pan thla a, kan thlen thlâk veleh ka nute min call sakin, zanah u Arona'n min thlah chhoh mai tur thu an hrilh vek a. Exam zawh hlim te a ni bawka an lo remti ve khawp mai.
Chaw ei dâwnah u Arona pâ'n chhung inkhawm a hmang a, tluang taka exam kan zawh avanga lawmthu sawina leh kan hma hun atana min awmpui turin Pathian a dîl a, a kutah min hlân thlap bawk. A thlamuanthlak a, result ţha tak kan neih phah ngei ka beisei. Ţawngţai hian chak lo a pui ţhin an ti a, chak lohna nei lêm lo tân phei chuan a thawk na vut vut viauin ka ring ţhin.
Chaw ei lâi chuan titi khawchâng sawiin puitling ho an ţawng bawrh bawrh a, a kil lamah Châmi nen thu hran hlak sawiin kan lo titi tui ve khawp mai.
"Kei chu kârleh velah hian kan khuaah ka haw phei dawn a. Phone lo nei hman tawh la ka ti reuh, chuti lo chu inbiak zung zung a harsa a, i nu rawn phone fuh lah hian a ţêk ve thei bawk si" tiin a haw tur thu vel a sawi luam a, ka ngâi nghâl ringawtin ka hria! Ka hnuk te a ulh vel! Vawiin hi ka dik lo, Op-a lah kha ka ngaiin ka ngaihtuah êm êm a, tunah Châmi ka ngâi lâwk leh viau bawk a, khawtlâng lunglên ka nei ve ngawt em mawni? Nge ka period dawn zawk?
"Khati'n men nghâl puai puai suh kan inhmu tawh lo hlen dawn tihna pawh a ni hleinem.. Result te han chhuak se kan pass ve hlauh chuan college kan kal dûn leh ang chu. Ka bestie i nia chuti maia hmuh tawh loh che ka tum lo hrim hrim" ka mitmeng nûr nâng a hmuh rual chuan chaw min rawn khawrh belh sawk sawk a, henu hi chuan hlimna leh lungngaihna min thlen ngun ve ngawt mai! An result a chhuah dawnin huphurh luatah ka mu thei lo a, a han fail a ţahpui leh deuhthaw a ngâi a. A buaithlak.
"Sawmte, in exam chu in chhâng ţha meuh maw? I ţhiannu ve hian awl a rawn ti nasa mai ţhin si a?" U Arona pa'n a tih chuar chuar tâkah chuan ţhu ţha sat satin, "a pangngai a.."
Ka sawi zo hman lo! YMA information center mic a rawn kîu vung vung a.
"Khawtlâng mipuite hriattur kan han puang ang e. Vawiin lama exam tura kal chhuak, Lalawmpuia, a pa Ngurliana leh Lalpeksanga, a pa Vanmawia te chu khaw kâr kawngah bike-in an accident a, kawngthlangah lumin an lumna khâm hi a sân êm avangin anmahni hmuh an la ni lo va, nula leh tlangvâl a thei thei thawkchhuaka zawng turin kan insawma, kan inhriattir a ni e..!"
Ka ding chhuak zawt a! Ţawng pawh ţawng thei lovin ka ngawi ngal a, ka taksa chhûnglam aţanga ka tiril rawn khûr hlawk hlawk leh ka hriatna vâi ruai avang chuan din pawh ka ding ngîl hleithei lo! Dawhkan tlâng chu vuanin nghet fêin ka hmer ngawt ngawt a. Châmi'n ţhutthlengseia min ţhuttir lai pawh ka mang lam hriat ruai a ni ber!
"Awi aw.. A vahan zia lo ve Op-a te chu! Engtin nge anmahni tih an hriat theih a? An hmêl pawh an la hmuh loh te chuan.. Khawtlâng group kha whatsapp-ah han en teh ţhiana!" Nu Dingmawii'n a ti bawrh bawrh thâwm chu ka hre reng a, chêt nachâng erawh ka la hre lo!
"Thim hlim khân Engmawii te nufa thingphur hawin an hmu a, an dinna piah lawkah an rawn tlân liam a ni âwm e hei, an sawi hmangin.." U Arona pa chuan a ti bul bul a, ka mittui luangin ka biang a hnâwn lai pawhin ngaihtuah ber tur pawh ka hre lo! Ka bîng chûk chûk a, mumang rama chêng ang mai ka ni. Mangchhe tak, tumahin man nawn leh atana kan duh tawh loh ang hi!
"Hey hey, hlauthawng suh engkim a ţha leh vek ang. A thih ka ring miah lo, a ţha vek mai ang.. Intipachang hram hram rawh Sawmzel!" Min thing nawk nawk chungin Châmi'n a ti chûl a, "Accident nazawng an thi kher lo. An dam âwm em mai" a tih leh pawh chuan lû ka thing ringawt! Ka hrawk chhûng a sa huam huam a, boruak tlachham ang maia awmin ka tâwt up up a, ka thi thei mai dawn tein ka hria!
"Hlauthawng miah suh aw Au Sawmzel.. Kan kal dawn alawm, dam takin kan rawn hruai kîr leh ang. An thi dawn lo hrim hrim, MAN an thi thei hleinem." Ka dâra rawn bêng thek thek chungin u Arona paw'n a ti ve a, min thlamuan tumin an theihtawp chhuah ve bawk mah se kei chuan thlamuanna ka nei thei tawh lo! Ka hlauthawng a, ka ngâi a, ka kuah vawng vawng châk.
"Ka ngâi em em lutuk te, ngaihţha lo deuha ka awm nilên chhan te kha a nih i ring ve tho em?" Tia Châmi ka zawh chuan, "chutiang ngaihtuah suh, engkim a ţha leh vek ang" tiin min lo kuah a, "an kal dawn khân fimkhur turin ka chah asin." Ka ti leh hap a, ka ţap chhuak hawk hawk bawk.
"Hlauthawng suh u in ţhianpate chu an dam em em ang, i u Ron-a te, khawtlâng nula leh tlangvalte an kal dawna an va chhanchhuak em em ang. Ţap lo khân duh leh an In lamah an chhungte lo han ţâwiâwm zawk ula, an thlaphâng nasa dawn si" nu Dingmawiin a rawn ti ve leh a, chu êm zawng ka ngam lo! Anni ai aiin ka ţap uar emaw a ni ang a, khawtlang hriata nula leh tlangval inngaizawng kan la ni bîk si lo. Dinhmun laklawh takah ka ding mêk a, chu aia hrehawm chu Op-a ka ngaihtuahna nasa lutuk hi a ni.
U Arona a kal chhuah hnu chuan ka thlaphâng zual a, thlabâr takin khâmah a inhamtâng ang a, chhantu a neih loh vangin a tla thla riai riai ang em tih te thlengin a ni ka ngaihtuah ni! Nge tunah pawh hian nunna nei tawh lovin a awm zawk ang? Ka hlauthawng a, ka chî-âi a, ka sahâl huam huam a, ţah vaka veng hawk thei thil a ni si lo! Pathian dem rum rum mai pawh awl tak a ni.
Zan dar riat tlângah pawh eng thâwm mah hriattur awm lovin khawchhûng chu a reh tlawk tlawk a, a boruak erawh a rit chûrh lawi si!
Châmi chuan varendah-ah min hruai pheiin, ţhutna atana an dah ţhutthleng sei nghenchhan nei lovah chuan min ţhutpui a, thla êng no nghulh leh a chawih mâwi tura chhûm lang paw chiai te chuan lunglênna ruam thûk takah min hruai lutin, rilruin hun kal tawh a chhuikîr zut zut reng a, ka tlâi lutuk ta niin ka hria!
"Chu, mic a ri leh tawh, an hmu aniang" information center aţanga mic rawn kîu vung vung thâwm chu ngaithlain kan beng kan chhi dûn rân a. Ka khûr hlawk hlawk reng bawk si, Châmi chuan min kuahbet ta ringawt a, chuti chung pawn kan pahnih chuan kan khûr hlawk hlawk tho.
"Khawtlâng mipuite hriattur kan han puang ang e, chhiattawh thu! Lalawmpuia, a pa..."
Ka ngâithla ngam tawh lo! Ka beng ka hup a, ring fêin ka khêk tuar tuar a, mû leh mal nei lo zetin varendah chhuat thingphelah chuan ka tâl nawk nawk niin ka hria!
"Ka ring thei lo. A thi lovang!" Tiin a thih tak tak te chu ka han ring lo lehlawi a! A thi tih kan hriat hma zawnga a thih ring em emtu khân a chanchin kan han hriat meuh chuan ka ring phal leh si lo!
"A theih loh reng reng, hetiang teh ngawtin mihring a thih theih loh! Amah a ni lo aniang, midang an ni tal ang!!" Tiin ka ţê ruai ruai a, ka ring thei lo a ni. Tiang ringawt chuan a theih loh alawm. Ka lak aţanga a beisei hmangaihna pumhlûm pawh a la dawng hman lo! A theih loh, ka mumang a ni zawk tal ang!
"Sawmzel, fimkhur teh rângvaah hian i in ât hlauh ang e. Hawh inchhungah lût ang, an inah kan han chho ve dawn nia. U Arona rawn haw se kan inhruai chhohtir ve dawn nia" tiin Châmi'n inchhungah min kâi lût a, nu Dingmawii leh u Arona pain lainat hmêl taka min lo enna mitmeng pawh ka hmu phê ruai tawh. Hetiang teh thlâwt hi chuan min kalsan thei lo asin mawle Op!
"I lo thleng maw? Eng nge chanchin? Peksanga zawk chu eng nge a an a? A na viau em?" U Arona kawngkhara a rawn pên luh rualin Nu Dingmawii'n a lo zawt zung zung a. Kei chuan melh pawh ka melh ngam lo, rilruah Op-a hlîr a awm a, u Arona te chu ka ţahkhum vak mai ang tih ka hlâu.
"Peksanga pawh a ruh a tliak nual a, Champhai lamah an phur phei nghâl anih kha. Ani chu thingţangin a lo bât a, a lum hla lo hlauh zawk. Awmpuia erawh khûtah, kawngpui thlanglamah a lo zuk lum thleng ţhak alawm. A ring ruh..."
"Sawi tawh lo teh!" Ka lo ti tuar a! Mite min ngaihdan tur ka care hman lo, Op-an na tak tuarin min thihsan tih ka hriatna ringawt pawh chuan ipik ţûnin min siam a, a chêtsual dan, a natdan tur leh a thih dan thleng thleng chuan ka hre duh tawh lo! Ka lainat em mai!
"Aa.. Ni e, an in lamah i naute hi han chhohpui ve la a ţha ang. An ţhianpa, an classmate a ni a, a ruang menpui te pawh an duh ve ang chu. Sawmtei nu leh pa pawh kan lo phone ang a thil thlen dan kan lo hrilh dawn nia" u Arona pa chuan a ti chuar chuar a, thildang an sawi leh hmain u Arona chuan min phur chho nghâl a, an in kawtah chuan mipui an lo tam hlê tawh.
Nutling leh patling ţap rawng rawng thâwm te, an fapa hming lama âu khêk tuar tuar thâwm te chuan awmngaihna hre lovin min siam a, motor aţanga Op-a ruang an rawn hlân thlâk lai te chuan chêt nachâng pawh hre lovin kilkhat aţang ka lo thlîr ngawih ngawih a. Ruang han kîl ve êm turin an laina hnâi tak ka ni ve si lo! Ka awmdan chu a hrehawm tih piahlam daih a ni ka ti lo thei lo.
Zankhuain pâwnah kan ţhu ve a, bang kil thim chinah ţhuin ka ţap tlaivar ve ţhak a ni. Khawhar hlâ an sa thâwm leh a chhungten kîr leh tura an auh lawm lawmna ri te chu beng hupsan daih pawh ni ila, ka thluakah hian a châm tlat a, tlânchhiatsan theih a ni lo. Ani chu a awm tawh lo va, kan thlahliam mai a ngâi dawn ta tih ka hriatna ringawt pawh chuan min tina ngut ngut a, leia awm ve tawh lo mai tur atan chuan a uiawm luâ ka ti!
Ka sîr tawn tawnah u Arona leh Châmi an ţhu a, an thiam ang anga min hnêmin min thlamuan a, Pathianin kan tana ţha lo turin ro a rêl ngâi lo tih min hrilh bawk. Chu erawh rin harsa ka ti! Kan ţhatna turin tumah an thih ka ring lo. Lunglenna te, khawharna te min hnutchhiah tur maiin a ni mî nunna a lâk ţhin ni!
Engati nge miţha tak tak te hian hmâ tak takah min kalsan ţhin tih hi ka hrethiam thei lo. A duh ngawih ngawih ţhin ka lak aţanga hmangaih lêtna a dawn ve hman lohte kha a liampui a, vawikhattê mah ka hmangaih thu ka la hrilh lo! Ani chuan a thlahlel ţhin a, nghakhlel takin min neih pumhlûn hun tur a ngâichâng ţhin kha a ni si a. Engtin nge min mangţha miah lova a kal theih zawk le? "Ka damchhung zawngin nang bák hmangaih ka tum lo" a tih ţum te kha aw! Op, mipa dik tak, a thusawia ding nghet tlat ţhin mi i ni tih hi ka hriatna a rei tawh asin!
Khawvar hnu chuan kan classmate tam zawkte an rawn thleng khâwm ve a, a ruang tal khawih ve duhin kan intlar pât hlawm a, pheichheh erawh zâng duh lo tak a ni!
Kei chuan ka hreh ngawih ngawih a, a hmasa berah min kaltir tum mah se a hnuhnung berah ka ding lui tlat a, ka hmaa miten kê an chheh suau suau pawhin kei chu ka kal thei lo. Ka keah chuan thîr rit tak an vuah bîk emaw tih turin a rit lûk a, ka lû lah kahpathîr chang taka chhut hrep ang maiin a na ngut ngut bawk si.
"Lo kal rawh ka kalpui ang che" ka bân rawn vuan chunga u Arona'n atih chuan ka hmaah tumah an lo awm tawh lo va, mite mit chu keimahah a fu ţhup tih ka hria. Mahse maw, a bul hnâia han kal ringawt pawh chu harsa ka vahan ti sî êm!
Zawimuangin kan phei chhet chhet a, a ruang kîla lo ţhu a nuin min lo hmuh rual chuan theihtawpa ringin min lo ţahkhum hawm hawm lehnghal! Ka insûm zo leh ta bik lo! Ka ţap a, ka sûn a, ka sûn mawlh mawlh a, ka sûn zo thei chuang lo!
Lumna nei tawh lo a biang hit thler chu ka han tawk a, a hit satliah a ni lo, a nêm niak a, a heh duk vek leh a hmâi, hmun tina ser awm thliah thluahte chuan a tawrh nat dan tur min hriattir a, ka tawrh âi pawhin a na zawk ang tih ka ring! Thihpui hial khawp natna chu eng ang taka nâ ni ang maw?
"Hetiang teh thut hi chu ka ring ngâi lo asin Op! I lak aţanga ngaihsakna te, khawngaihna leh lainatna te, hmangaihna rulh zawh sên rual loh ka dawn ţhin avang khân lawmthu pawh ka la hrilh hman lo che a. A nachâng kha ka lo hre lo va, thil engkim kha a nihdan tur dik taka thleng ve mai emaw tiin ngâiah ka lo neih vek a. Mahse ka hre tawh asin, i duhsakna avang khan ka mâwi a, i mi ngainatna avang khân ka mal ngâi lo va, i hmangaihna tâwp chin nei lo avang khân mivanduai tak ni ţhin kha ka lo vannei ta em em zawk asin! Engkimah ka lâwm e, kan intawng leh ngeiin ka ring. Arsi-ah ni lovin, pialralah pawh ni hek lovin, kan piangnawn dûn leh ang a, kan inzawngchhuak leh ang. Hetiang mai hian kan tâwp tawh lo ang a, khawvela mipa vannei ber i nihzia ka hâilansak tawh ang che" tiin a ruang chungah chuan ka kun tlawk tlawk a, ka rilrua thu tam tak awm hi sawichhuak dawn ila nilêng hun pawhin min daih lovang.
Mihringte chu kan lo piang a, thihna hmachhawn nghâl mai tur kan ni tih inhre reng mah ila tumahin thih kan tum tak tak ngâi lo. Dam chhûng nî chu tawitê a ni tiin kan inzirtir fo va, mahse tâwitê tak tak tur atan chuan hringnun hi kan thlah phal chuang lo. Bible-in mihring dam chen tur a sawi mah rei lo kan ti a, chu aia hmaa boral tâ te nun han tâwi bîkzia hi aw!
A kala te chu an kal a, an liam mai a. An kalsan tâkte hriatrengna erawh an liampui ve chuang si lo. Sûlhnu leh nunhlui tam tak an hnutchhiah a, lunglênna leh khawharnaa khat turin an hmangaihte an kalsan ţhin si a. Hringnun hi chu a râwng êm a, ka cho ve meuh lo a ni kei chuan.
Nî a tlângsâng a, chhun dar 12 a rik meuh chuan Pastor-in vuina hun hmangin a ruang chu thlanmualah an zâwn chho ta! Mi â ang maiin kuang chu ka zui zel a, chutih lai chuan tunge ka bulah kal a, tuin nge min vêng tih pawh ka hre lo. Ka vâi riai a, mihring, nunna nei tawh si lo ang mai niin ka inhre hial a ni.
A thlân, khur thûk tak an laih chu tlangval tlâwmngaiten leivûngin an han chhilh ţan a, ngawi rengin a thlîr liam theih loh! Kan âu a, kan ngên a, mittui nen uina thu kan chham a, chu meuh pawh chuan a ko kîr zo tawh si lo.
A thihna chuan laina hnâi hnuk Chauh a tiulh lova, a hria apiangte lainat leh khawngaih hlawhin mî mittui tam tak a kochhuak a ni!
"Op, vawiin hi u Muanzova te dawra min chawlhpui i tum nî kha ania sin! I ruang nî a la ni ang tih kha nangpawn i ring ngâi bik miah lovang tiraw? Op, lawmthu ka sawina tur ka sawi hman loh zawng zawngah khân ka lawm e aw, rilru nâ leh khingbâi taka vanram i luh chhan ka ni tur erawh min ngaidam mawlh mawlh ang che. I taksa nâ aia hliam thûk zawk hnutchhiahtu che ka nihna hi ka theihnghilh tawh lo ang a, i lakah kumkhuain ka inthiam tawh ngâi lovang. I hmangaihna kha ka hre reng ţhin ang a, i tawrhchhelna pawh ka tu leh fate thinlungah thleng ka tuh ang. Keimah ang chiah i nihna thinlung sak tak kha ka hnualsuat ngâi lo ang a, khawvela mit ka men ve chhûng zawng chuan ka theihnghilh tawh ngâi lovang che. Mangţha aw. Piangnawn leh ang che!" Tiin ka phun sep a.
"Sawm, intiharh la, eng emaw tal ei tum rawh. Engmah i la ei bawk si lo i ţâmchhâwl ang e" ka khum tlânga ţhu chungin Châmi'n eitur min barh luih ngial a tum a, engpawh ei ila ka luak chhuak vek thovin ka ring. A nih loh vêk pawn ka lem thei chuang lovang.
"Châm! Op-a khân thih a hlâu asin. Ka hnênah a sawi a, thihna a ngaihtuah zâwng ringawt pawhin a ipik ţûn ţhin. A sawi lâi khân ka lo nuih liampui mai a, ka lo van mâwl tak! Kha mi zân te khan a lunglêng lutuk awmngaihna hre lovin min rawn pan a, kei lah khân engmah han sawipuia lo hnem vak dan ka hre dêr si lo. A lunglên em em chhan te kha tun ang boruak kan thlen dawn vang hi a lo ni hrim hrim ang. Op-a kha keimah vanga thi a ni tih ka hria asin!" Ka inkhuhna rizai hlih pawp paha ka tih chuan Châmi'n min lo dawm vat a, min ţhut ţhattir thuai bawk.
"Exam zawh nîah an ina chaw ei turin min sâwm a. Mahse u Arona bula chaw ei ka thlâkhlelh zawk avangin ka hnar! Ka hnar tâkah chuan an ţhiandun khân an lêngkâwi ta kha ania. Lo hnar lo ila kan rualin an haw ngei ang a, khami zan te khan hlim takin an inah chaw ka ei âwm sia!" Ka ti leh sep sep a, ka ţhiannu chuan ngawi rengin ka thusawi min lo ngaihthlâksak a, a mittui parawl kiang chu hru zauhin ka sam a chûl a, "engkim a ţha leh vek mai ang, mahni inthiamlo duh suh. A nih tur ang ang a ni zo tawha awmzia a awm lo ania" a ti sep sep.
"Op-a tluka min hmangaihtu hi chu an awm tawh ka ring lo. Ka lak aţangin hmangaihna a dawng lêt ngâi lo chung pawh khân a vui lo va, a thiam dan ang ang khân min hmangaih mâwl ve tawp ţhin. A duhawm tiraw? A nui mâwi si. Ngati nge hun ka neih lâi khân ka lo hmangaih ve ngawih ngawih mai loh le? Rilru bet lo leh kim lo zetin a thi chu a ni âwm si a. Mahni hmasial takin kei chuan ka hmangaih theih hun tur min nghahpui tur te khan ka sâwm a maw.. Ka lo van ti khawngaihthak thei tak! Engkim hi ka thiam loh vek niin i hre ve em?"
"Chutiang zâwngin ngaihtuah suh. Hmangaih che kha a thlang a, nangin midang i lo thlang hman tawh si a. Han ngaih huat tur thil engmah a awm lo. I hmangaihna a rem ve hun tur nghâkin a hmangaih tawp che a, amah ang chiahin tu emaw i nghâk ve a ni mai. Ani pawn a hriatthiam ţhin êm che kha. Ani chu hmangaihna thianghlim leh famkim tak nen vanramah a awm tawh alawm. Leia la awm te hi chu min rawn awt lo zawk ngawt ang" tiin min chhâng a, chu thu chuan tlêmin min hnêm ve deuh! Mahse a famkim si lo.
"Kâr khat lai liam tawh mahse thinlungah a thi thei tak tak lo va, mit ka chhîn rual apianga inchhirna leh mahni inhuatnaa ka khat ţhin hi asin hrehawm ka tih chu! Inngaizâwng hmingpu ve tho si khân ka duh dan danin ka chhâi kual a, ka chaih let a. Chapona a neih ve te pawh ka lakah a lanchhuahtir ngam lo ţhin. I hria em? Inngaizâwngten an tihtur nia kan hriat ve te pawh min vênthâwn avangin engmah kan ti ve lo va, phûl hmuna kan pahnih chauha hun hman te kha ka suangtuahpui asin. Mahse engmah lo maiah an chang zo tawh. Ani chuan ka lak aţanga natna chauh dawnglêt chungin min kalsan! Min haw lutuk tur ka ngaihtuah ringawt pawh hian thih ka hreh! Kan intawn leh huna min thinrim khum tur te ka ngaihtuah a maw, tawn tawh loh mai ka duh rum rum a. Mahse ka tawng leh châk si! Vawikhat tal a hmêl hmu leh ila tiin duhthu erawh ka sâm fo lawi a, ani vanga ka tawrhna hi nge kei vanga a natna kha na zawk ang le?" Mumallo zet chuan ka riat kual nawk nawk a.
Ka mit aţanga mittui rawn luang thlain ka biang a hnâwn lâi pawh chuan che lovin hmalam ka melh ngawt ngawt a. Ka mitin hmalam melh mah se thinlung erawh chuan hun kal tawh hlîr a ni a thlîr ni!
"Ţap ţap mah ila a lo kîr tawh dawn lo va, mittui hmanga auh lêt theih a ni tawh bawk hek lo. A thlarau tân theihtawp chhuahin ţawngţai ţhin ila, Pathian hnenah kan dîlpui ţhin dawn nia. Kan theihnghilh ngâi lo ang a, kan hre reng tawh ang. Ani chu Pathianin a hnena châwl hahdam tawh turin a duh a, a hruai a, khawvel buaina leh hrehawmna lak ata a zalên tawh tih hi pawm pui ila, ani pawn chutianga kan tih chu a duh ngei ang" nghet deuha ka kut rawn hmer vang vang chungin Châmi chuan a ti leh a.
Ni e, ani chu keiin ka thlen ţhin natna leh hrehawmna lak ata zalenin, nun thar nen bul a ţan thei tawh dawn a. Tawn leh ngei duhin beisei mah ila, khawvelah lo piangnawn leh pawh ni se, kei ai chuan kei aia a lêt tam taka ţha hmeichhia a phû ve tawh a, chutiang hmeichhia chu a tawng anih phawt chuan lâwm takin, thlamuang leh ngaihngam takin ka kaltir ngei ang! Hringnun tharah chuan hlimna zawng zawng a phû ve tawh si a!
(Comment ţheuh ang aw)
End of chapter - 32