PATHLAWIA (NEVER LET YOU GO) Chapter 1-14

[Te-i Mrs Ambrose]

Pathlawia (Never Let You Go)
By: Te-i Mrs Ambrose



Chapter 7






Mami haw hnu pawh chuan ka khum aṭang ka la thochhuak peih meuh lo. Zing aṭang khan ka mu tawh a, ka hne hlui tawh, mahse, ka ṭhut leh eng emaw ka tih hlekin ka lu a na zel si a, ka mut hian a zia ber avangin ka tho lo law law.










Zan dar sarih velah chuan rin loh lutuk tak maiin Hmangaihzuala hnen aṭang message ka dawng hlawl.
*I zia deuh tawh em?* tih te mai hi. Ani lakah hian rilru seng lutuk tawh lo ila, ka tan a ṭhat ber ka ring.
*Imm,, ka zia tawh lutuk* tiin ka reply a, a seen nghal, mahse, min lo chhang let tawh lo. 'Eng chu nge maw ka beisei ve reng reng ni?' tiin ka phun sap.











Ka tho chhuak a, khawsik leh lu na pawh ka nei tawh lo. Chutih lai chuan ka nu chuan min lo ko a, "Bawihi, i ṭhianpa a lo kal, i room-ah ka lo luhtir mai dawn em ni?" a tih chuan "Ai, a ngai lo, ka thochhuak peih tawh alawm" tiin ka hmai ka phih a, sitting room lam chu ka pan nghal.











Daniel a lo ṭhu reng a, min hmuh chuan nui sukin "I dam lo sia, ka dam thei bik lo" a rawn ti nghal a, ner zeuhin "zei hi tum ṭhin sia" tiin a bulah ka thu thla a, "I van fel i lo kal vang vang a" ka tih chuan min nuihin "kei ber ka lo kal lovin tu tehlul chu nge lo kal ang?" tiin mit ko a san âk âk a, ka nui ve ringawt. Hepa bula awm hi chuan a thinrim theih loh. Han thinrim tum ve eng âng mah ila, a tawpah kan nui leh nge nge ṭhin.

"Thingpui ka lum ang che aw" tiin thawh mai ka tum a, min pawt ṭhu leh nghalin "a ngai lo, ka lo lum zawk ang" a tih chuan nui chungin "I zam lo sia e, tui deuhin va lum ang che" tiin ka ṭhu rem sauh sauh a. Chutih lai chuan kawngka an lo kik a, ka va hawn chuan rin loh lutuk tak maiin Ramdina a lo ding reng. Ka ṭawng hma chuan min ṭawng khalhin












"Ka dam lo kan tur ber chu ava dam hmel tawh ve" nui deuh chung hian a rawn ti a, "ka dam tawh alawm" ka lo ti ve mai, "leng lut tur pawhin min sawm dawn lo a mi?" a tih leh chuan kawngka zawnah ka ding reng tih ka hrechhuak chiah, "Sorry sorry,, lo lut rawh" tiin ka kian a, a lo lut ve mai bawk. Chutih lai chuan choka lam aṭang Daniel a rawn chhuak a, "Tunge a?" tiin min lo en, "Ramdina" ka tih chuan uluk zet hian a thlek a, mahse a en rei hran lo. Choka lamah chuan a lut leh nghal a. A hriat hmel lem loh.












Sitting room lamah Ramdina nen chuan kan inzui phei a, "I lo leng vang vang a, i van fel reuh" ka tih chuan "min naupang chhe biak riau" a rawn ti a, ka nui hak. Daniel chu thingpui chawiin a rawn phei a, hepa hi chu a tlangnel bawk a, thil kan dahna engkim a hre bel tawh bawk , a duh duhin kan inah hian a khawsa thei tawh. Ka nu leh pa pawhin ṭha takin an bia a, a tlangnel viau chhan pakhat pawh a ni.












Daniel-a'n thingpui a lo pek chuan Ramdina chuan "in awmpuipa chu a fel hle mai" thingpui lak pah chuan a ti a, ka nui chhuak chiang kher mai, Daniel lung chu a ni vak lo a ni ang "Ṭhianpa, thingpui sem nazawng hi awmpui an ni vek kher lo ania" tiin ka thingpui tur chu ka hmaa dawhkanah chuan min dahsak a, ka thingpui a dahna bul chiahah a thingpui no tur chu a rawn dah ve bawk, tray nen choka lamah a va let leh.













"In awmpui emaw ka tia" Ramdina chuan a lo ti sur sur, a inthlahrungin nuam a tih chiah loh hmel hle. "I hresual ve a nih kha, Daniel pawn a ngaihtuah zui bik lovang" ka tih lai mekin Daniel a lo let leh a, ka bulah a lo ṭhu nghal a, Ramdina chuan a melh zawk. Mahse, engmah a sawi lo.












Daniel zawkin "Min lo rel ami? Ka hming in sawi rik ka hria" tiin a thingpuino a ban nghal a, a dawt ri khalh bawk. Kan chhanna pawh nghak chuang lo chuan "Ûmm,, a van tui kher em" tiin ama thingpui siam a fak nghal zat. "Mahni infak leh sakhi ngalah engmah a bet lo" ka tih chuan uluk zeta min enin "Eng nge bet te chu i hrechiang alawm" a rawn ti awlsam then. 'A hmul a bet' a tihna ang vel a ni.













"Fak chawp hi i ngai lo reng reng, nangmah leh nangmah hi in promote ta la, i in promote ṭha thei ngawt ang" ka tih chuan thumbs up min rawn hmuh a, "Ka rawn kal chhan ber lah hian ngatan mah min tih hmel si lova" Ramdina'n a tih chuan a awm ve tih ka hre chiah, nuam ti zan lo chuan "Awi, Sorry, Daniel nena kan awm tawh chuan kan heti tlat zel a" tiin thupha te chu ka chawi a.













Daniel pek chuan "Eng atan mah tih pawh i ngaih loh kha, nang hian Chhingpuii hi i lo hope deuh em ni?" a rawn ti a, chutia a tih avang chuan a malah ka chum pawp, ti awm lo thei lutuk "mi beng ker kur suh" min la ti zui. Hepa hi chu a hahthlak a ni. "I ti awm lo em anih kha" tiin ka melh a, a hmui a pet sawi ringawt













Daniel leh Ramdina chu dar kaw rik dawnah an haw a, a tir kha chuan an inmil thei dawn lo emaw ka ti hman a, eng emaw sawi hlek se, an inkhak tawn reng a, mahse, kan ṭhu rei tual tual a, an inngeih chho telh telh a, chhuah kha chuan an inkuah chhuah tak nghe nghe kha.













Naktuk lama hna ka kal tawh ka ngaih dawn avangin zan ka mu hma a. Zing ka thawh chuan ka tho nuam hle. Inhnuai lamah chhukin ka nu eirawng bawl ka pui a, tukin anga thawh fuh hi chu ka ngah lo hle ṭhin.














Kan naupang ber Remrema lah chuan a rawn thawh tirh aṭanga ka nui hmel a hmuh vang nge "A u, bialpa i nei ami? I van hlim" min ti a, nui pah chuan "Bialpa nei ho chiah an hlim ṭhin a mi?" tiin a sam ka tuai thur sak a, a sam siam ṭhat pah chuan "mi sawi dan chuan hmeichhia in bialpa an neih chuan an hlim ṭhin lutuk an ti nangmah ang khan" a ti a, ve reuh hian, tu sawi tak chu a hria ni maw?












Hmangaihzuala te in lam pana taxi a ka chuan lai te chuan eng vangin nge pawh ka hre lo, ka nui phei deuh reng mai a, Hmangaihzuala te doorbell ka hmeh chuan an lo hawng nghal a, rin loh lutuk tak maiin Rinfeli khan min lo hawn a "E he, nangmah elo?" tiin mak min tih hmel deuh hian min melh a, ka nuih ringawt. Chutih lai chuan Jarson-a'n "Yes, Ama a lo thleng" tiin min rawn kuah a. Rinfeli chu a meng buai deuh nak mai.














"Bawiha min lo ngai em?" tiin a samah ka chul zeuh a, a lo bu nghat nghat " Nimin khan i awm si lova, Anî hi a lo riak a" tiin Rinfeli chu a en a, Rinfeli lah chuan keini pahnih chu mak a tihna mitmeng chuan min la melh reng. "Tinge Jarson hian Ama a tih che a?" tiin min zawt ta reng a, chhan tuma ka an laiin Hmangaihzuala chuan "A chhan chu ani kha ka bialnu a nia" a rawn ti anih chu!













Kei hi ka chiang lo em ni? Rinfeli pawh chuan kei ang tho in mak a lo ti ve a, "Eng a!Zual, nang hian bialnu! Awi a mak lutuk" a ti chul, mahse, reilote hnuah a mak tihna chu hlimna hmelin a rawn thlak a, "Ka u pawn ngaihzawng a nei ve leh ta" tiin hlim hmel tak chuan a sawi a. Kei erawh min la ṭhawn deuh vang nge, ka la ding ngawi reng.














Chutah Rinfeli chuan min lo en a, "Zuala rilru sakhat lutuk kha engtin nge i tih tuiral theih?" tiin zawhna mitmeng chuan min melh a, Hmangaihzuala rawn pen phei mek chuan "Kal tawh ang, vawiin chu kan buai viau dawn kha, ka haw hma duh dawn, kal hma ang" tiin Rinfeli chu a rawn hrilh a, Rinfeli lah chuan "Hmm.. Chhingpuii i hmuh hmat duh vang anih chu" tiin min lo en leh a. "Remchan hunah inkawm ang aw" tiin min siai zeuh. Lu ka bu ve ta ringawt.













Chutih lai chuan Hmangaihzuala chuan ka lama rawn inherin "Ka va kal tawh ang e, Bawiha nen hian nuam in tih dan danin in lo awm dawn nia, mahse ka sawi ṭhin kha, Chips ei hnem tir lutuk ka phal lo ania" a tih chuan ka bu nghat nghat a, chutah ka rin loh lutuk tak maiin Hmangaihzuala chuan ka chhip a fawp anih chu! Hepa hian eng chiah nge a hriat.













Hmangaihzuala chet dan chuan min ṭhawng hle. Ani kha a tho â em ni? Nge kei hi ka lo thovlova, mumang nuam lutukah ka cheng zawk? Hmangaihzuala leh Rinfeli chhuak chuan Jarson nen min bye lauh lauh a, ka bye let ve chuan ka hria.













An kal liam hnu chuan Jarson nen kan awm a, zing lama Hmangaihzuala awmdan khan min la ṭhawng reng, kan ṭhian pathuma kan awmna group-ah chuan ka va sawi ta tawp. Reilote hnuah group video call a lo lut nghal a, ka chhan chuan "Eng a! Hmangaihzuala chuan a bialnu a ti che maw?" Lalno-i chuan a lo ti nghal a, ka buk nghat chuan "Awi, eng nge a awmzia, anih hmana dawra a lo luhpui nu kha tunge?" Lalno-i bawk a ni. Mami chu a la ngawi reng thung.













"Ani kha a cousin a lo nia, zingah pawh khan a awm ve alawm, a la phur hmel em em zui" ka ti a, Mami chuan "Chhing, kei chuan hnaih vak lo la ka duh, a tih tak tak loh phei chuan" tiin a sawi zawm lova, kei pawhin ka bu nghat nghat. "Hepa lakah hi chuan beiseina neih loh hi a har ṭhin em a ni? A chet dan ho te avangin ka hlim a, chutiang bawkin a chet dan ho te avang bawkin ka na leh ṭhin" ka ti a, Hmangaihzuala zun ngah zia chu ka hrechiang lutuk. Mahse, a zûn aṭanga tal chhuah dan erawh ka hre lo.













Jarson chu ka lamah a lo kal a "Ama min pawm rawh" a tih chuan ka lo pawm ve mai, Mami leh Lalno-i chuan duhawm an lo ti dun nasa, "Hi Jarson" an tih chuan Jarson chuan hi vein a kutin a bye nghal lauh lauh a, Lalno-i'n "Jarson, keini hi i Ama ṭhiante kan nia" a tih chuan Jarson chuan uluk deuha enin "Ka Ama ṭhiante chu in hmelṭha" a ti reuh a.
He nau ṭawng thiam ṭhin dan leh fel ṭhin zia hi. A lawmawmna tizualtu a ni reng bawk.














"Jarson, I Ama kha lo duat rawh aw, I Papa kha lo velh tir miah suh aw" Mami'n a tih ve thung chuan bu nghat nghatin "Ka tlangval tawh alawm, ka Ama chu ka veng char char ang" a ti leh a, Mami leh Lalno-i chuan an lawm ngang mai. "Awi a duhawm emai, vawiin chhun chu lo chhuahpui rawh, lunch ei ho ang u" Lalno-i chuan a ti a, Mami pawhin a lo tuihnih nghak bawk.














Chutia an pahniha an tih chuan ka chak ve kher mai, kan ṭhian hova kan lunch loh na chin pawh ka hre tawh lo. Jarson lah chuan hrethiam ve fein "Ama kal ve ang aw, ka kal ve duh" a lo ti a, "I pa kan dil dawn nia" ka tih chuan ka pawmna aṭangin a chhuk a, hlim tak hian a zuang tawrh tawrh a. Ina awm reng chu a hne ve tawh a ni ngei ang.














Kan ṭhian hova kan inbiak tawp dawn chuan "Hmangaihzuala ka lo dil phawt ang a, rem a tih chuan group-ah kan sawi ho leh dawn nia kan eina tur dawr nen" ka ti a, ṭhiante pawhin an lo pawm khawp mai. Video call kan tihtawp hnu chuan Hmangaihzuala call tumin a number ka hmetchhuak a. Mahse, ka call ngam tlat lo. Lo phal lo ta se tih ngawt ka ngaihtuah.














A tawp a tawpah chuan ka call ta nge nge. A lo lak chuan "Imm...ka ngaithla e" a rawn ti a, dil chu ka hreh takzet. Mahse ka call ta sa sa tiin "Vawiin chu restaurant lamah Jarson nen kan chhuak thei ang em?" ka va ti thawr. Hmangaihzuala chu a ngawi deuh vang vang a, a phal dawn lo emaw ka tih avangin "a,, i phal loh chuan kan chhuak lo mai ang" ka ti a.














Hmangaihzuala chuan "ka phal lo pawh ka tih loh kha" a rawn ti a, hepa hi chu a ṭawng nelawm thiam hlawl lo. "Rei lutuk suh ang che u, pawn lama i awmpui reng chuan Jarson khan hritlang a la palh ang" a rawn ti a, a phal avang chuan ka lawm hle. "Aw le, ka lawm e" tiin call chu ka titawp a.












Chhunlai a ni ṭep tawh tho a tiin choka lam chu ka pan a, Ann-i bulah chuan "Ann, vawiin chu Jarson nen engmah siam sak kan ngai lo aw" ka ti a, min rawn enin "in chhuak dawn em ni?" a lo ti a, bu nghatin "duh zawngte i nei em? Ka lo hawn ang che" ka ti a, Ann-i nen hian kan innel thawkhat ve tawh hle.














"Imm,, I duh duh kha nimai, tunlai chu engkim ka ei tui vek, a theih chuan Momo ka duh aw" a rawn ti a, "Imm, ka lo hawnsak ang che" tiin ka room lamah ka lut a, Jarson a lo awm reng tawh, "Bawiha ka insiampui ang che aw, kan chhuak dawn nia" ka ti a. Hlim zet hian a bu nghauh nghauh.














A room lam kan pan lai chian ka ṭhiante hnenah chuan khawi restaurant berah nge kan chawlh dawn ka zawt a, min chhan let nghal mai loh avangin Jarson chu ka insiampui a, a insiam zawhin ka room lamah ka lut a, ka phone ka en chuan message a lo awm vang tawh. Kan chawlhna tur chu ka ṭhiante chuan an lo sawi a, tuna Hmangaihzuala te in aṭang hian motor chuan minute sawmhnih vel kal a ni.













Ka insiam zawh chuan Jarson nen chuan kan chhuak a, ka ṭhianten restaurant an sawi kan thlen chuan Mami leh Lalno-i chu an lo awm vang tawh a, Jarson an hmuh chuan an lo chhawnchhaih nghal a, Jarson pawhin a ngaina dun ve hle.













Thil kan ei pah chuan kan ti ti nghal a, ṭhiante bulah awm chu a hahdam thlak hle. Lalno-i chuan "I awm si lova, dawr pawh saw nuam ka ti tawh lo, ka hah thei si" tiin a hmui a ti pawrh a, "ka ring che a, ka awm lai ai khan i inhralh hnem zawk tih ka hria ania" ka tih chuan inchhuang tak hian "kei te chu ka khati ziah kha alawm" a lo ti a. Kan nui ho dar dar.













Restaurant aṭanga kan chhuah dawn chuan Ann-i tana momo tur ka pack tir chu ka la nghal a, Jarson pawna awmpui reng a ṭhat loh avangin ka hawpui thuai a. A hritlan palh chuan Hmangaihzuala hmuh hrehawm dawn emai.













Tlai lam dar thum leh a chan ve bawr velah Hmangaihzuala chu a lo haw a, nidangah chuan tun ang hunah hian a lo haw ngai lo. A lo haw hma chu mak ka ti reuh hle. A chhan erawh la zawt chuang hran lo. Rinfeli'n a lo zui ho lo kha ka lawm hle. Hmangaihzuala nen kan chanchin kha min zawt awm sia, chhan ngaihna ka hre dawn der lo.













Hmangaihzuala chuan Ann-i chu a haw hmat tir a, Ann-i'n "Ei rawng ka la bawl lova" a tih chuan "a ṭha hlei hlei anih chu, vawiin chu va haw hma mai rawh" tiin a haw tir a, Jarson a mut avangin tihtur ka nei chuang lova tiin choka lama Hmangaihzuala ei rawng bawl chu va pui turin choka lam chu ka pan a.














Chokaa ka luh chuan Hmangaihzuala chu a lo che mek a, pa tak ni si a ei rawng bawl a hreh lo te chuan amah chu min ngaihsan zual tir a, chutia ka en reng lai chuan Hmangaihzuala chuan min en ve lem lovin "khatia min en reng ai kha chuan min lo pui ve la" a rawn ti a, ka phu deuh zawk mai.














"Engtin nge ka en che tih i hriat a?" ka tih chuan min la en chuang lem lo hian "chokaa i rawn luh tirh aṭang khan ka hre tawh alawm" a ti a, ka zak reuh hle. Ei rawng kan bawl dun lai chuan Hmangaihzuala chuan "ka thil sawi kha i ngaihtuah let ve em?" a rawn ti a.














A eng thil sawi ber kha nge tih pawh ka hrethiam lo. "A eng thil ber kha maw?" ka tih chuan ka lam a rawn hawi a, uluk zeta min enin "ka bialnu ka tih che kha" a tih chuan chil ka lem dawk mai. Hmangaihzuala lah chu pa tak hian a khi suk anih chu.

[Te-i Mrs Ambrose]

Pathlawia (Never Let You Go)
By; Te-i Mrs Ambrose




Chapter 8








A eng thil sawi ber kha nge tih pawh ka hrethiam lo. "A eng thil ber kha maw?" ka tih chuan ka lam a rawn hawi a, uluk zeta min enin "ka bialnu ka tih che kha" a tih chuan chil ka lem dawk mai. Hmangaihzuala lah chu pa tak hian a khi suk anih chu.













Sawi mai tur hre lovin ka ding ngawi reng a, Hmangaihzuala khuh kharh ri ka hriat chuan tum loh lutuk tak maiin amah chu ka en nghal a, a mitmenga eng emaw lang chu ka hmu thei, mahse, eng nge a nih ka hre lo thung.














Hmangaihzuala chuan uluk zeta min enin "mi hmaah ṭum khat mai pawh ni lova ṭum hnih ṭum thum ka bialnu ka tih chhan che hi hriat i duh lo em ni?" a tih chuan ka rilru in 'chu chhanna aia hriat duh dang a nei hleinem' a ti a, mahse, ka tluak lam thung erawh chuan 'hre duh suh, he mipa laka hian beiseina engmah insiam tawh suh, i nâ ziah' a ti thung.













Chutia ka ngawih reng avang chuan Hmangaihzuala chu eng emaw sawi tumin a rawn âng zawk a, "i bialnu anga min sawi ṭhin chhan ka hre lova, chuan ka hriat kher a ngai em ni?" ka ti a, Hmangaihzuala chuan ka zawhna avang chuan mit a kân âk a, "I hriat kher ngaiin i hre lo em ni?" tiin min zawt let ta khauh.














Hmangaihzuala chungchang thuah kher hi chuan ka rilru leh thluak an thuhmun thei lo. Thluak lam chuan englai pawhin hlat turin min duh a, rilru lam erawh chuan amah hnaih theihna kawng a awm phawt chuan engmah a hnial lo.














"Kei hian..." a tih rualin "Ai, ka hriat kher ngaiin ka hre lo. I thilsawi pakhat lek kha ka buaipui chuk chukna chhan tur ka hre lo" ka tih chuan Hmangaihzuala hmel chu a inthlak hlawk. "A ṭha alawm, hriat i duh loh chuan i thu thu" tiin a thil siam lai chu a siam chhunzawm leh nghal a, min melh tawh eih lo.














A thin ka tirim em ni? Mahse, ka thilsawi avang khan a thinrim ngawt chhan tur engmah ka hre lo. Chutia a ngawig reng avang chuan nuam lo ka ti deuh a, inthlahrung deuh takin "Eng nge ka lo tih ve ang" ka ti a, Hmangaihzuala chuan melh pawh min melh lovin "Jarson bulah va awm rawh" a ti hmak anih chu.














Hepa hi a thinrim tak tak emaw ni le? "I thinrim em ni?" ka tih chuan "Ai" a ti hmuk a, mahse, a chhanna avang chuan a thinrim a ni tih ka hrechiang ve ta chiah. "Ka thil sawi khan a tithinrim che em ni? Tihthinrim che ka tum lo ania" ka ti a, chutah ka lama rawn inherin uluk zet hian min melh a















"Nangmah avang tehlul hian ka thinrim i ring em ni? Nangte chu thinrim pui tham pawh i ni lo, thinrim pui tham tur khawpa ṭha i ni lo. Ka hnuaia thawk, awmpui ve mai i nih hi. Sum i mamawh ka pe che a, chuan nang chu ka hnuaia thawk awmpui i ni, awmpui hmeichhe pakhat ve mai avang hian ka thinrim ang maw? A teuh lo lutuk, awmpui pakhat avang maia ka thinrim lai ka la hre lo" a tih chuan ka thin zawn a na veng veng.














A tan khan tlemte tala pawimawhna nei ve ka ni emaw ka lo ti hman a, mahse, ka lo nei lo chiang khawp mai. Awmpui ang lekin maw Hmangaihzuala hian min lo en ṭhin. Tlemte chuan a na ve deuh hret lo maw.













Ka khawhmuh a rawn fiah lova, ka hmaa ding Hmangaihzuala chu ka hmu phei deuh vek. Ka mittui tling chu a hriat lo hram ka beisei. "Ka tihpalh, i thinrim emaw ka tih vanga zawt che ka nia" tiin ka inhersan a, ka mittui a rawn tla nghal.














Choka ka chhuahsan fel hma chu ka mittui pawh ka hru lo. Hmangaihzuala khan ka mittui hruk lai min hmuh ka hlau. Jarson mutna bulah chuan ka ṭhu a, tum lo zetin Hmangaihzuala thusawi kha ka ngaituah let a, ka mittui tla chu ka hria, mahse, hruk pawh ka tum buai peih lo.













Tu lak aṭang mahin khatiang ṭawngkam kha ka la dawng ngai lo. A sum ka puk thu kha a sawi a, ni e, puk ang chu ka ni ngei alawm, mahse, eng vanga khati zat zat pawisa kha a lak aṭanga la nge ka nih a hre lo.













Hmangaihzuala khan a pawisa min pek tam zet kha ka hnar chhin eih loh avang khan tunah khati khan min ṭawngkhum phah a, ani khan eng harsatna chiah nge kan tawn a hre lo. Chuan khati khan min ṭawngkhum a, khatiang ṭawngkam kha dawnsawn dan ka thiam lo va, ka dawng ang tih ka la inngaihtuah chhin ngai bawk hek lo.
















A hnuaia thawk, a fapa awmpuitu mai mah ni ila, khatiang khan min ṭawngkhum kher a ngai em ni? A thinrim leh rim loh ka zawh avangin khatiang khan min ṭawngkhum a, khatianga min ṭawngkhum tur khan dikna a nei reng em ni? Hmangaihzuala hi ka nuna a lo lan aṭangin amah avangin hlimna ka tawng mang lo, mahse amah avang chuan ka ṭap zing thung.
















Hepa ka hmu kher kher hi chu ka nuna thil thleng pawi ber a ni. Hun hi auh kir theih chu ni se, kum tam liam taa Hmangaihzuala ka tawn ni kha thleng lo turin ka au kir ang a, tuna ka awm ang hian ka awm tawp lovang. Amah avang khan tu mipa lakah mah rilru ka pe thei lova, kan inkara engmah awm si lo khan ka thinlung min ruksak a, chupa lah chuan engmah hre si lovin min tina reng mai si.
















"Ama i ṭap ami?" thophang aw zeta rawn titu an awm chuan ka en a, Jarson a lo harh tawh chu niin, rawn ṭhuchhuakin a kut tê tak te chuan ka bianga mittui tla chu min rawn hruksak a, lu thin pahin "Ai, ṭap love, ka mitah bawlhhlawh a lut palh a" tiin ka nui lui a, Jarson chuan "a nâ em? Ka chhem sak ang che aw, a dam daih mai ang"tih pahin ka mit chu a rawn chhem a. A der ni lovin ka nui ta tawp.















Room-ah chuan Jarson nen kan awm reng a, ani pawh chuan ka rilru nâ chu hrethiam ve ni awm takin a nguai ve hle a. Chutia kan awm reng lai chuan Hmangaihzuala chu a rawn dak a, "zanriah ka peih tawh" a rawn ti a, Jarson nen chuan choka lam chu kan pan a, Hmangaihzuala chu dawhkan kilin a lo ṭhu fel der tawh, Jarson nen chuan kan thu ve nghal a.















Chaw ei lai chuan tumah kan ṭawng lo. Jarson ber pawh chu a ṭawng miah lova, ei khamin kan eina chu sengin ka sil a, Choka aṭang chuan sitting room lam ka pan a, Jarson chu a pain a lo pawm a, a pa chuan a tihdan fo angin laptop-ah hna a thawk pah thung. Jarson-a'n ka lut min hmuh chuan a pa pawmna aṭangin a chhuk a, ka lamah a rawn kal a.















Ṭhutthlengah chuan ṭhuin Jarson chu ka pawm a, ka ṭawng peih mang lo. Jarson ṭawng mang lo chu ka lawm zawk hle. A chhan chu tuna ka dinhmuhah hi chuan nui hmel lem ka pu thei dawn hlawl lo. Zan dang aiin Jarson chu a mu har a, a mutfel rualin haw tumin ka bag vel ka la a, ka kal nghal.















Kawngka aṭanga ka chhuah dawn chuan ka bana chelha mib pawtlettu avangin ka rak deuh ṭhat. Hmangaihzuala nen chuan kan inmelh nghal a, a hmel pawh rei ka en lo. Ka en rei chuan ka mittui hi a tla leh mai ang.















A hmel pawh en lo chuan "Sawi duh i nei em ni? Nge hnathawh tur a awm zawk?" tiin hnuai lam chu ka melh ngar a, Hmangaihzuala'n "tihpalh" a tih chuan amah chu ka en zawk, a mitmeng aṭang chuan nuam lo a tihzia ka hmuhsak, "Engvang chuan maw?" tiin ka nuilui sang, "Nichina ka thilsawi avang khan" tiin chiang zetin ka mitah a rawn en a, ka mit ka lo lasawn nghal vat thung.















"Ngaihdam dilna chhan tur engmah i nei hleinem. Sawi sual leh sawi dik loh engmah i nei lova, ka laka ngaihdam dilna chhan tur i nei lo" ka ti a, kal mai ka tum chuan Hmangaihzuala'n ka kut a la chelh reng tih ka hre chiah.














"Khawngaihin min thlah tawh la, ka haw tawh a ngai" tiin ka kut chu laksawn mai ka tum a, mahse, Hmangaihzuala chuan a chelh nghet sauh. "I rilru tihnat tuma sawi ka ni lo, ka thinrim avangin ka sawichhuak palh a nih kha" a tih chuan ka thin a rim thut














"Ka rilru tihnat i tum lo tih ka hria alawm, mahse i hriat atana ka duh chu, miin an thinrim lai hian an rilru diktak an sawichhuak tlangpui, chuan ka laka i rilru puthmang avang khan ka lawm e, min thlah thei tawh em?" tiin min chelhna kut chu la melh a, Hmangaihzuala chuan lu a thing nghut anih chu.














"Khatianga ka sawi chhan chu..." a tih lai mekin "Aw, khati khan ka rilru min tihnat sak leh i tum em ni? I lak aṭanga ka thu hriat khan min tina tawk viau, hriat belh leh ka duh lo, khatiang ṭawngkam kha i lak aṭang bakin ka la dawng lo, chuan dawn nawn leh ka duh tawh lo. Ban ka duh, I lak aṭanga ka pawisa dawn ho kha chu rulhlet dan tur che ka lo ngaihtuah ang" tiin min chelhna chu ka thing sawk a, mahse a la thlah lo cheu. Ka thinrim lutuk chu ka ṭah te lam a chhuak ṭun.














"I bang thei lo" a tih nghut chuan "Ka thei, chuan ka bang bawk ang" tiin a mitah tak ka melh, " i bang dawn hauh lo, chuan ka phal lo bawk" tia min chhan chuan ben ka chak. "Apui ka thusawi hi ngaithla rawh" aw zaidam tak hian a ti a, mahse ka ngaithla duh lo "Ai, ngaihthlak ka duh lo. Haw ka duh" tiin ka kut bawk chu lak ka tum leh. "Min sawi tir phawt rawh" vin zet hian a rawn ti thut anih chu.














Ṭawngkam vin a hman ka lo ring lo bawk nen ka phu chiang lutuk. Hmangaihzuala chuan ka dar tawn tawna vuanin "Ka thusawi hi ngaithla rawh, i ngaihthlak duh loh pawhin ngaihthlak luihtir dan che ka hria" tiin min aukhum leh nghek a, tunah tak hi chuan Hmangaihzuala kalsan vang vang ka duh. Amah hi ka hlau. Ka mittui rawn tla chu eng vang nge ka hre lo. Ka hlauh lutuk vang anih ka ring.













Chutah rin loh lutuk tak maiin Hmangaihzuala chuan min kuah a, aw dam ruih hian "Tihpalh, tihhlauh che ka tum lo. Tihpalh" tiin duat takin ka samah a chul a, chu chuan ka rilru no a kaitho tlat pek . Hmangaihzuala awmah chuan ka hmai chu ka nawr a, ka mittui pawh a la dir zung zung.















Hmangaihzuala chuan duat taka ka sama chulin ngaihdam min dil deuh reng a, chutia rei deuh fe kan din hnu chuan ka talhrang a, ka mittui luanna chu ka tuai a, Hmangaihzuala chuan ka bianga rawn khuap ve vein ka chal a fawp anih chu! Zanina Hmangaihzuala awmdan hian min ṭhawng deuh reng mai.















"Duhawm lutuk mai" tiin ka biang chu a nul leh zeuh a, hepa awmdan hi ka hrethiam lo. "Tunah chuan ṭha takin ka thusawi i ngaithla thei tawh ang em?" a ti a, ṭawngkam vin engmah a hmang tawh lo. Lu ka bu nghat a, aw thian kharhin














"Nichina ka sawi ang khan i rilru tihnat ka tum lo, mahse i chungah khan ka thinrim em a, I laka ka thinrim a ni tih ka pawm duh loh avangin ka awmpui mai i nih thu ka inhrilh mawlh mawlh a, awmpui avangin ka thinrim ngai lo tiin i laka ka thinrim avangin keimah leh keimah ka inhrilh. Mahse, chutia ka inhrilh lai chuan ka thinrim chhan berin min rawn be leh si a, tum loh lutuk takin khatiang kha ka sawichhuak a ni. I rilru tihnat ka tum lo. Chuan i tap lai leh i rilru na hmel hmuh ka duh lo.













Ka chungah thinrim tawh suh. Chuan ban pawh tum bawk suh, bang turin ka duh lo che" a tih chuan "kei aia i fapa awmpuitu tur ṭha i hmuh zawh i rin loh vangin maw?" ka ti a, lu thing nghutin "ai, bang turin ka duh lo che, ka fapa awmpuitu angin ka en ngai lo che, ka tan chuan awmpui mai mai i ni lo, i pawimawh lutuk" tiin a mitmeng dum tak zet chuan min melh a.














Ka ṭawng hmain Hmangaihzuala bawk chuan "Hriat i duh loh kha a chhanna hre tho turin ka duh che, eng vanga ka bialnu anga sawi che nge ka nih..." a tih laiin "Hriat ka duh lo ka tih kha" ka ti nghal, Hmangaihzuala chuan "ka hrilh dawn tho tho che" a rawn ti a, "Hriat ka duh lo ka tih chuan hriat ka duh lo a ni mai" tiin lu ka thing vak. Hepa avang hian rilru buai zeta awm ka duh lo.














"Rochhingpui ngaithla rawh" a aw ki a dam lo hle. "Hmangaihzual, ka haw lutuk che" tiin ka inhersan a, ka pen nghal "Mahse, ka duh thung che alawm" a tih chuan ka pen lai ka tawp chawt. Hmangaihzuala lam chu ka hawi nghal a, tunah khan ka hresual chiang lutuk.














"Rochhingpui, ngaithla rawh, kei hian ka duh che , chumi avanga ka bialnu anga sawi che ka ni, a chhan chu ka bialnu tak i nih theih nan engpawh tih ka huam dawn avangin midang bulah chuan ka bialnu angin ka sawi lawk che" a tih leh chuan ka awi lo lutuk ka nui tawp.














"I hresual anih chu nang hian ka rilru i tihnat avanga i inthiam loh avangin ka lakah khang thu kha i sawi mai mai a ni" ka ti a, ani hian nichina ka ṭahkhum avang leh ka rilru a tihnat avang bakin khatiang thil kha a sawi lo. Ani hian min lainat avangin leh ka laka a inthiam loh avangin kha thu kha a sawi mai mai a ni.














"Ka sawi mai mai lo, kei hian ka duh tak tak che" a tih chuan ka nuichhuak leh hak. "Keimah min bum mai a ni lo, nangmah i inbum tel a ni" ka tih chuan Hmangaihzuala chuan chiang zet hian ka mitah a en a, "chiang takin ka mitmeng hi en rawh, engkim i hre mai ang" tiin ka darah chuan a kur hnihin a chelh a, mahse ka en duh lo.













"Ai" ka tih chuan Hmangaihzuala chuan min thing leh nawk tawh "Ngaihtuah chiang rawh, chaw ei hma khan tuna ka thil sawi ho hi sawi ka tum. Mahse nang hian i hriat duh loh thuin min chhang a, ka bialnu anga ka sawina che pawh engah mah ngai lo angin i ṭawng a














kha khan ka thin a tirim a, chumi avanga khatianga ṭawng kha ka ni a, tuna ka duh che ka tih hian i rilru a nat avanga sawi ka ni lo, i rilru ka tihnat hma pawh khan sawi ka tum tawh, mahse sawi thei lo turin khati khan kan awm ta si a, tunah ka sawi thei chiah,














I rilru tina lo pawh ni ila, tunah ka duhna thu ka hrilh che hi chu ka hrilh tho ang che, ka bum lo che a, i rilru na thawi dam nana sawi ka ni hek lo. Chuan keimah leh keimah ka inbum lo bawk" thumal tin kha ka hriat loh hlau ni awm hrimin chiang leh fiah takin a sawi vek.














"Haw ka duh tawh" ka tih leh chuan ka dara min vawnna chu a thlah hlawk a "Eng vanga haw chu duh em em nge i nih? Chuti kova haw i duh chuan haw rawh, kawngka a inhawng reng alawm" tiin min inhersan a, a pindan lam a pan nghal a.














Ka sana ka en chuan dar kua leh chanve a lo pel fel der tawh. In aṭang chuan ka chhuak a, motor pawh a khat ve deuh tawh, chuan tunah hian ka hlau, driver ṭha lo ho ka tawng ang tih ka hlau takzet.














Ka hnung lam aṭanga horn a rawn rik chuan ka phu zawk, ka lungphu a rawn rang nghal a, lehhawi pawh lehhawi ngam lo chuan ka hma lamah chuan ka pen mawp mawp. Chutah horn bawk chu a lo ri leh a, hlau tawh tak ka ni. Ka pen chak sauh a, ka awmna lah kawng reh lai tak anih bakah motor lah an tlan khat si. Ka hlau lutuk hi a ni tawp mai.














Tu emawin min pawhlet sawk chuan ka ṭe ṭhat, tu emaw awmah ka intauh nghal a, min kuah nghal bawk. "Dawi lutuk mai" chu aw ka hriat rual chuan ka kuah let ve nghal tawp. Tun ang em em a hlauh kha chu ka nei khat lutuk. Hmangaihzuala chuan nui nghawr deuh datin ka chhipah a rawn fawp a, chu chuan ka thla a timuang suai suai.














Ka hlauhna a kian deuh hnu chuan a kawnga ka kuahna kut chu ka phelh a, Hmangaihzuala pawh a awmhrang ve ta mai bawk. A hmel pawh chu ka en ngam lo. Min nuih dawn tih ka chian lutuk vang pawh a ni maithei.














Hmangaihzuala chuan ka kuta min chelin min letpui a, kawng sira a motor lo ding reng awmna lam pan chuan min kai a, car-a kan luh hnu chuan nichina horn lo hmettu kha tu dang ni lovin Hmangaihzuala hi a ni tih ka hre chiah. Amah avangin ka hlauh phah hrep a, ka ngei leh dawn dawn mai.














"Thlah che ka tum a, nangmah tein i lo kal nal nal a" a tih chuan "min thlah dawn tih i sawi lova, chuan min thlah tum awm pawhin i ṭawng lo anih kha" ka ti a, Hmangaihzuala chu a nui tawp. "Dawizep reuh si" a tih chuan ka melh nghek "chuan i duhawm" a tih chuan ka biang a sa hat hat. Car chu a tinung a, kan in lam pan chuan a khalhchhuak nghal a.














Ka nu chuan min lo call a, "Bawihi i lo riak dawn em ni?" ka lak rualin a lo ti nghal, "Ai nu ka lo haw mek" tiin ka chhanglet nghal , Hmangaihzuala chuan uluk zet hian car a khalh a, ani hi chu a pa thlawt a ni. Eng vanga min duh thu kha sawi mai nge a nih ang le?













"I lo haw har sia, i lo riak dawn emaw ka ti hman alawm" ka nuin a lo ti leh a, "kawngah kan awm mek, ka rawn thleng har lovang, duh leh lo mu ula, kawng chu ka kalh mai ang" ka ti a, call kan tihtawp hnu chuan ka sana ka en a, dar sawm a hnai thuak tawh.













Hmangaihzuala chu ka en a, "Jarson amah te chauhvin a awm âwm sia" ka ti a, lo harh thut ta se, a hlau dawn lutuk "Ka thlah zawhah che ka let leh nghal dawn alawm" a tih laiin "vawikhat mah min thlah tawh suh ang che" ka ti nghal a, Hmangaihzuala chuan "engvangin maw?" lungawi hmel vak lo hian a ti a














"Jarson ka khawngaih alawm, amah te chauhin inah a awm a, lo harh palh ta se, a hlau dawn asin, min thlah tawh suh ang che" ka ti a, Hmangaihzuala chu a nui suk, "khavang khan alawm ka fapa nu atana ka thlan che" a ti sup. "I mumang anih chu" tiin lei ka chhuah zeuh.














Kan in kawta car a din chuan chhuah mai ka tum a, Hmangaihzuala chuan ka kuta manin "Zan lama ka thilsawi ho kha uluk zeta ngaihtuah chiang turin ka duh che, nangmah mai bakah keimah ka inbum loh zia chu i hriat ka ring, i lo inngaihtuah chiang dawn nia" a ti a, ka bu nghat.













"Min thlah tawh la" ka tih chuan thaw hawkin a nui deuh sup "vawiin hian eng vanga haw vat vat chak viau nge maw i nih le?" a ti a, kei pawhin chhanna ka hre bik lo. Ka kut erawh a thlah ve mai "muttui aw" tiin chhuah ka tum, min pawt let leh tawh, ka chalah chuan fawp vang vangin "kha pawh kha lo ngaihtuah tel ang che" a ti a, engmah sawi lovin ka chhuak a, Hmangaihzuala pawh in turn-in a tlan nghal.


(Eng nge a ân chhoh dawna in rin comment keuh aw)

[Te-i Mrs Ambrose]

Pathlawia (Never Let You Go)
By: Te-i Mrs Ambrose


Chapter 9







In chhung lama ka luh chuan ka chhungte chu an lo mu deuh vek tawh a, U Mimii erawh a la meng thung. "I lo va haw har ve" a mut a chhuak deuh tawhin ka hria. Min lo nghak hram hram a, ka lawm reuh hle. "Zanin chu Jarson a muhil duh mai lova, rin aiin ka lo haw har phah a, u va mu tawh la" ka ti a, ani pawh ham bai bai chungin a room lam a pan ve mai.















Kawngka ka kalh fel hnu chuan ka pindan lam ka pan nghal a, ka in wash zuai zuai, ka khumah ka ṭhutfel rualin ka tihdan ngai te bawkin Bible ka chhiar leh a, ka ṭawngṭai nghal bawk.















Vawiin lama thilthleng ho ka ngaihtuah let a, Hmangaihzuala awmdan engkim mai kha ka ngaihtuah let zawng pawhin min fan raih raih mai. Ka chal chu ka tawk leh zeuh a, nidangah kha chuan ka chal a fawh khan a fapa avangin a fawp ṭhin, mahse zanin erawh kha chuan ama thu ngeiin a fawp a, chuan ngaihtuah zui tur khan min ti bawk anih kha. Ani khan 'Ngaihtuah zui suh' min ti pawh ni se, ka ngaihtuah zui tho ang. Ka biang chu a rawn sa hat hat a, hepa hian ka duh tih a hre tawh ang a, min fiam mai mai a ni ang a!















Tlai lama thilthlengte chu uluk zawkin ka ngaihtuah a, Hmangaihzuala thusawi mal tinte kha ka ngaihtuah nawn leh bawk a, ani khan a sawi dikin ka hre ta! Zanriah bawl lai khan khati thawt thawta lo chhang lo khan lo ngaithla hle hle ni ila, khati khan ka rilru a na lo ang a, tin, Hmangaihzuala nen kan buai phah hrep lo bawk ang. Engkim mai kha ka thluak duh dan ka zawm vanga thleng taah ka ngai ta ber.














Anih chuan Hmangaihzuala khan min duh thu a sawi a, ani hian min fiam mai mai nge min duh ve tak tak zawk? Min lo duh anih chuan ka tan chuan duhthusam lo thleng dik a ni dawn a, mahse, min lo fiam mai mai anih erawh chuan ka kehchhe chiang khawp ang. Chuan Hmangaihzuala hi mi thinlung infiam nana hmang duh mi anih ka ring lo. Amah ka belhchian aṭanga ka hriat ve danah chuan mi tak ngul mai a ni a, a cool a, zanina ka hriat thar tak erawh chu a hot ru hle tih hi.














Hmangaihzuala avang chuan ka ṭawngṭai leh ta nge nge, ani khan ka thinlung hi infiamna atana min hman sak lo hram turin Pathian ka dil a ni ber mai. Pathian hnenah ka inkawltir tawp a, a tirte aṭanga Hmangaihzuala lo duh ngawih ngawihtu tan chuan zanin thilthleng bak baka hlimna tur dang kha a awm tawh mawlh lo. Chung lam khian a duh ang angin ka ṭhatna tur atana min relsak turin ka ngen a, Ani in rem a tih chuan kan la inkawp ve thei mial mahna.














Vawiin lama thilthleng ho ngaihtuah let rauh rauh chungin hlim ru takin ka mu a, ka duh ber chu Hmangaihzuala hian min fiam mai mai lo se tih hi a ni. Hmeichhe der dep ve tak ka ni a, inngaihzawnna kawngah ngat phei chuan fiam tlak ka awm lo, min lo fiam a, kei ka lo thutak si chuan na lua awm lovin ka na ngei ang. Chuan chutiang thil chu thleng lo hram se ka duh bawk.













Zingah chuan ka harh hma viau, zan lama ka mumang chuan min kam deuh ṭun a, ka awm pawh a nuam thei meuh lo. Hmangaihzuala leh Jarson ka lo hmu a, inhnaih taka kan awm ho laiin vawi leh khatah Hmangaihzuala leh Jarson chu ka lak aṭang an hla dawrh a, ka au a, let turin ka au a, mahse, an awm hla tial tial a, kei lah ka dinna aṭangin ka pen sawn thei bawk si lo. Chutia mangang taka ka awm lai chuan ka harh phut anih kha.













Ka phone ka ban a, dar zat ka en chuan dar nga a lo la ri lo deuh a, rin loh lutuk tak maiin Hmangaihzuala message ka la hmu zui. Zing kam dar li leh a chan ve bawr vela min lo thawn kha a ni. Ka nui var var a, ka awm nuam lo pawh a reh nghal vek a, zing min lo wish-na message erawh chu ka wish let hran lo. Tuna thil thleng vel hi chu suangtuahna thleng dik a ni ka ti lo thei lo.















Ka hmai vel ka phih zawhin inhnuai lamah ka chhuk a, ka nu chu a dan ngai te bawkin a lo tho leh der tawh. "Bawihi i va tho hma ve, thingpui i duh em?" min lo ti nghal a, ka buk zeuh chuan thingpui a siam sa chu min thlitsak a, min pe nghal. Thingpui ka in zawhin ka inna no ka sil a, tukṭhuan bawl nana a la hmat deuh hlek avangin pawnah chhuakin exercise ka la a.
















Thlan deuh hluamin inchhungah ka lut leh a, nidanga ka thawh hma ṭum pawhin midang exercise la angin ka tlanchhuak ve ngai lo. Kan in kawtah hian ka la mai zel. Mahse, exer chu la khat ve tak ka ni. Ka room-ah lutin ka inbual a, nuam tak a ni. Ka inbual zo ka chhuah phei chuan ka u pawh a lo tho ve tawh a, kan pathum chuan tukṭhuan chu kan bawl ho a.















U Mimii chuan "Chhingpui, a hreawm em?" a rawn ti deuh tawp mai a, "eng chu?" hrethiam lo zetin ka en, min nuih chung hian "Aw, i hnathawh chu?" tiin mit ko a san deuh âk âk, ka nu pawh chuan "Nia, i va thawhna chungchang hi i sawi ngai mang lo" a lo ti ve a. "A hreawm lo, ka dawra ka kal ṭhin lai ai pawh khan ka hahdam zawk, ka nau awm ber hi a fel a, a hahdam thlak lutuk" tiin ka nui var var. Jarson ka mitthla vang a ni deuh ber.















"Anih i thawhna pa hi eng nge a an?" ka nu bawk chuan a ti leh a, "Ani pawh a fel lutuk, hna dang pawh thawh a rem ti vak lo zawk, a ṭawng tlemin a ṭawng bung deuh nghut ṭhin tih lovah chuan ani pawh a ṭha vel vek mai." ka ti leh a, Hmangaihzuala hmel ka mitthla erawhin ka awmdan a rawn danglam nghal vek. Nimin zana a thilsawi ho mawlh kha!















Tukṭhuan kan ei hmat deuh avangin nidang zawng aiin ka chhuak hma a, ka dawr lam tlawhkawi ka duh vang a ni ber. Lalno-i ka call khan a inhawn ṭep tawh thu kha a sawi a, dawr ka thlen leh ani in dawr a hawn chu kan innan tawk vel ka ring. Ka phone a lo rik chuan ka la nghal a "Aw Mam" ka tih rualin Mami chuan "Lalno-i khan tukin chu dawr lamah i peng dawn a tia" a lo ti nghal a. "Imm.. ka hman hma sia, dawr lama pen ka lo rilruk a, bungraw thar chah ho pawh en ve chhin hrim hrim ka duh a" ka ti ve a.















Mami chuan "Imm,, anih ka lo kal ve dawn, thawmhnaw thar ho pawh en ve a chakawm alawm" a rawn ti a, lo kal ve ngei ngei tur chuan ka chah a, kan inbiak zawh chuan Taxi pharin dawr lama tlan tur chuan ka hrilh a, dawr ka thlen chuan Lalno-i pawhin dawr chu a lo hawng fel tawh.















Dawr ka luh rual deuhthawin call ka dawng nghal a, ka en chuan Hmangaihzuala a lo ni! Mak ka ti reuh hle, ani nen hian ṭum khat tih loh chu phone call-a kan inbiak awm pawh ka la hre lo. Ka chhan chuan lehlama mi chu a ngawi deuh vung vung a, a hmetsual a nih ka ring ta ber. Off mai ka tum chuan















"Tukin zing chu i lo kal hma thei ang em?" a ti a, phone chu ka en zawk a, ka bengah chuktuah leh nghalin "keimah em ni i biak?" ka ti a, lehlam ami lah chuan "aw nangmah kha ka bia che, nangmah Rochhingpuii kha" a rawn ti a nih chu. Deuh duah mai a.















"Oh, dawrah ka awm asin..." ka sawi zawh hmain "khawi dawrah maw?" a lo ti nghal. "Ih, keima dawrah" ka chhan zawh rual deuhthawin Hmangaihzuala chuan "Jarson hi kha lamah khan lo hruai nghal mai ila a pawi ang em?" a rawn ti a, a rawn hruai peih chuan a pawi lo zual ngawt ang. Ka dawrah ka awm rei ve thei deuh dawn a.
















"Imm,, i buai loh chuan lo hruai mai la, engtik velah nge i lo thlen hman ang" ka ti a, "Kan lo chhuak nghal a ni mai, kan lo thleng har lutuk lovang" tiin reilote hnuah call a titawp nghal a. Lalno-i chuan "tunge a? Ka biak che pawhin min en miah lo" a rawn ti a,, "Hmangaihzuala" tia ka chhan chuan a meng deuh kawk.
















Khawi maw thawmhnaw thar lo thleng ho chu ka tih chuan a lo khai fel deuh vek tawh a, ka en kual den den, Bungraw dang ho pawh ka en zung zung."Ka lo thleng" Mami aw ka hriat rualin la hawichhuak a, dawrah a lo pen lut ve mek bawk. "Mam, lo kal rawh, tihian Lalno-i khai sa hi en kual nghal mai ang" ka ti a, kawr vel chu Mami nen chuan kan en hlawm a, Mami chu mit changkang deuh tih takah kawr nalh a inhmeh tur zawng a thlang thiam hle.
















Kawr kan en lai chuan Jarson aw in "Ama kan lo thleng" a ti a, ka inher leh rualin min lo kuah fel der tawh. "In lo va thleng hma ve" tiin ka pawn kang a, Hmangaihzuala leh Rinfeli chuan kawngka an lo lut fel ve chiah bawk. A hmaa an inngaizawng emaw ka ti kha tunah chuan awm lo ka ti tawh hle. An hmelah sawn inanna an ngah lutuk tlat , unau cousin an ni tih a hriat ngawih ngawih.
















"Tikhan i duh hunah letpui mai rawh aw, Duati nen hian hna chinfel ngai kan nei a" Hmangaihzuala chuan a rawn ti deuh sup.Jarson chu ka pawmna aṭanga chhuk thlain naupang lawm zawng kan remna lam chu a va pan a. Rinfeli chuan kawr vel chu a lo en mek a, "Zual, kawr hi pahnih khat lek ka en lawk dawn, tikhan in nu bulah khan lo awm rih rawh" a ti a, ka biang a sa nghal hat hat. Hmangaihzuala lah chuan min nuih deuh suk anih chu.















"I biang a sen vek ania" tia ka biang rawn khawih mai a tum chuan a kut chu ka lo beng sawn nghal a, "ka titai alawm" tiin ka pha nghal. "Ka rawn luh hma khan a sen reng reng lo. Duhawm reuh lutuk" tiin ka biang chu a piai a, ka ṭhiante khan min lo hmu chiang ang em le? Min lo hmuh chuan ka zak dawn lutuk. Bialpa ka la nei ngai lova, min chhaih vel ang a, ka duh lo reng reng.















"Tikhan min ti suh, miin min hmu ang e" ka tih lah chuan pawisak loh hmel zetin "Kha aia tam kha ka la ti zel dawn alawm, i hmui te pawh" a tih chuan ka hmui ka hup nghal. Hepa hi a nghal ru zek. Hetiang mizia hi a neih ka ring ngai lo.















Hmangaihzuala chuan Rinfeli lam chu hawiin "hmanhmawh deuh rawh" a va ti a, Rinfeli lah chuan "an nei nalh hlawm em alawm, ka hmanhmawh chuk chuk thei lo. Chhingpui in nei nalh thei e" keimahni ber pawh chu min en chuang lo. Ka nui tawp. Ka bula ding Hmangaihzuala lah a phun hluk a. "Kan hun i khawhral hnem chuan i hlawh tur ka cut ang" a tih avang chuan tum hmukin Rinfeli chuan a rawn melh a. Ka lam lo hawiin















"Chhingpui, i bula ding pa kha min lo dilsak teh. Hmeichhe tana thawmhnaw pawimawhziate chu i hriat kha. Khapa per pur khan a hrethiam ve lo anih kha." a rawn ti a, ka nuih leh ringawt tawh. "lo hman tangkai tum suh" Hmangaihzuala lah chuan a lo ti deuh hmuk a, an pahnih inhnial chu ka melh tawn deuh chhen. "Aw, min lo be tawh suh. Min biak ai zawng zawng khan en ila, ka thlang fel daih tawh ang" Rinfeli chuan tih leh pahin kawr chu a en zawm leh nghal zat a.
















"Pu Hmangaih, en tir rih mai la" ka tih chuan rum lutuk tak mai hian min lo melh a, a eng pawi nge ka sawi ang tih ka ngaihtuah hman vek. Chutah lo kun hniam deuhin "I pu rual hmel ka pu em ni?" a rawn ti anih chu . Chutia a tih avang chuan ka nui chhuak hak mai. "Sorry, nidangah pawh khati tho khan ka ko ṭhin che sia" ka ti nghal a, "nidang chu nidang ania, nidang leh vawiin chu a inang tawh lo. Tun aṭang chuan min Pu tawh suh ang che" a rawn ti a, ka bu nghat. Mahse, ka ko ṭhang tawh sia, han pu lo chu ka thiam dawn mang tlat lo.















Hmangaihzuala te an chhuah hnu chuan dawhkan kilin kan ṭhian ho chuan kan ṭhukhawm a, Jarson ka pawm tel bawk. Lalno-i chuan "Eng nge in awmzia?" tiin min zawt a, thilthleng vel ka hrilh chuan an ngaithla uluk dun khawp mai. "A duh che tih a sawi maw?" Lalno-i'n a tih leh chuan a hmelah pawh mak a tihzia chu a lang reng.















"Imm.. nimin zan khan min hrilh alawm, kei pawhin a tir kha chuan ka ring bik lova" ka ti ve a. "Ti tak tak hram se aw" Mami chuan a ti a, kei pawhin ti tak tak se ka ti takzet. "Avan nuam awm em em, engtin nge i awm a duh thu che a hrilh lai che chuan?" Lalno-i chuan a lo ti leh. Henu thil hriat chipchiar duh ṭhin lutuk hi chu.















"Min ṭhawng lutuk a, chuan thil kha khati rem rum khan a thleng bawk nen, ka awmdan pawh kha ka sawi thiam lo, ka awi lo tih zawng kha a nimai" ka ti a. Mami thung chuan "Anih a duhna che chu i chhanglet ta tihna em ni?" a ti a, lu ka thing nghat nghat.















"Imm, la chhanglet nghal mai suh. A duh tak tak che em tih fiah ve a ngai. Engmah ngaihtuah mang lova i chet deuh tawp tawp chuan a tawpah i na palh ang. Tin, chu lo rengah a tira i chhanlet nghal mai chuan in inthihthiam loh nikhuaah engmah chapopui tur i nei ve lovang, a ngaih danah che pawh hmeichhe awlsam lutuk i ni palh ang.















Nang chuan i duh em avang leh i rin avangin i chhanglet nghal pawh a ni thei, mahse, mipa chuan chu chu an rawn hrethiam ve tawh lo. Hmeichhia chu nun uluk ngai reng kan nia, mipa in min zuam theih turin kan awm lo emaw kan tih lai pawhin kan inthlahdahna eng emaw avang lek khan mipa tan chuan zuamawm kan nih theihna lai a awm ṭhin ania,














Chuvang chuan nangpawhin ngaihtuahna fim tak hman tum la, thil ti buan buan lovin i thlan kawng khan eng nge a thlenpui dawn che ngaihtuah ang che. Chapo rawh chu ka ti lo che, mahse, Pride nei ve rawh, indah san ve a ṭul chang te a awm chawk ania.















Hmangaihzuala hi a tir aṭang khan duh tawh mah la, awlsam takin thutlukna siam mai suh. A tawpa natna pawh i lo tawng mai thei, engkim uluk takin ngaihtuah phawt la, chuan thutlukna siam chauh ang che" a ti dap dap, lu ka bu nghat nghat. Mami thilsawiah hian engmah dik lo lai ka hre lo.















"Amah avangin ka nat phah ka hlau, mahse, a tir aṭanga nat hlauh avanga chhan let loh ka duh bawk si lo. Engtikah emaw 'khatih hun lai khan a kut ka lo chelh lo a ni' tia ka inchhir loh nan vawikhat chauh tal chu a kut chelh ka duh a ni" ka ti a, Mami pawh chuan bu nghatin "A dik alawm, i na dawn ni a i hriat pawha vawikhat tal a kut chelh sak theitu nih i duh a, i lo na ta anih pawha i inchhir loh nan 'ka theih tawp ka chhuah ve alawm' i tih theih nan a kut i vawn chu a pawi hleinem. I lo na ta anih pawhin tawrh thiam tur aw. Mahse, chumi avang chuan i na dawn ka ti kher lo ania, hlimna nei reng turin ka duhsak che" tiin ka kut chu a rawn hum vang vang a.















Mami chuan a kawr duhzawng chu a la ve a, a haw hnu pawhin kei leh Jarson chu kan la awm reng. Jarson berin dawra awm nuam a ti miau sia, kan la awm ve reng a, customer lo lut ho ka biak laia lo biak ve zeuh zeuh chu nuam a tih hmel viau mai.














"LalChhing, dawra i awm te chuan min hrilh ve ta che, ka ngaih ṭhin tehlul che nen, min ngai lo ṭhin si" Daniel a ni chiang lutuk, a lam ka hawi chuan Daniel ngei a lo ni. "Awi, kha a va duhawm ve" ka bula ding Jarson chu a rawn chhawnchhaih zui nghal bawk a. Jarson pawh chuan a ngainat hmel khawp mai.















"I Ama ṭhian ṭha ber ka nia, chuvang chuan min be ṭha rawh aw" Jarson bula a tih chuan a darah ka beng pawp. "Ṭul lo lutuk" tiin ka phun zui bawk. "Nge, naupang an awm laiin khatin min beng pawp suh, nidangah midang bula awmdan mawi a thiam lo ang. Naupang chuan ṭha lam aiin a chhe lam lak an awlsam zawk ania" a tih chuan hmui ka petsawi nang nang mai.














"Jarson te chu a felin a fing emai, chutin chutiang zia ṭha lo leh mawi lo a la dawn lo. Khati khan thil ṭul lo deuh sawi tawh suh ang che" ka tih chuan lungawi hmel vak lovin "Aw le a ṭha alawm, naupang ina a ngaina che hi a mak, a mak thlawt" tiin Lalno-i awmna lam chu min pansan nghal a.














"Niel, hna i nei tih hi ka awi lo ṭhin, i hman thei si, dawr lamah hian i lo lawr sek zel mai" Lalno-i chuan a bula Daniel kal mek hnenah chuan a ti nghal a, Daniel-a lungawi lo laklawh lah chuan "Aw, a ṭha alawm, min hne tawh anih kha, ka lo kal tawh lovang, a biak pawh min biak tum suh ang che u" tiin chhuah mai a tum a, Lalno-i chuan umzui nghalin "I haw daihte chuan a nuam tawh nang" tiin a va pawt let.














"Imm,, I haw daih te chuan a, ka ṭhianpa te chu a tauh ve ngai loh kha" ka ti ve nghal a, "Chhunah Lalno-i nen in thil ei man ka tumsak vek dawn che u nia" ka tih chuan rawn nui ṭhawin "Chutia I tih chu ka ring reng alawm" tiin a nui vur vur, keipawh ka nui ve tho.















Jarson nen kan haw meuh chuan dar sawm pakhat a ri dawn hnai tawh. "Ka lo thlen khan tumah in awm bawk si lova, mak ka ti reuh lutuk a"Ann-i chuan a lo ti nghal a, "Nia, dawr lamah Jarson nen kan awm a, kan lo haw hma ta lo anih kha" ka ti ve mai a. Ann-i chuan inchhung sekrek khawih chu a chhunzawm leh a, Jarson a fel tho bawk a tiin ka pui ve a.















Chhunah chuan kan pathumin chaw chhun kan ei ho a, Jarson chu a mut a chhuak deuh tawh a ni ang. A mitmeng a dul ruih tawh a. Thil kan ei zawh hnu reiloteah a room lamah kan inkai phei a, ka room zawn kan thlenin "Ama, i room-ah mu ang" a tih avangin a room-a lut lovinb ka room-ah kan lut ta zawk a.














Khuma ka muttir chuan mu ve tura min tiin thawnthu a ngaihthlak chak thu a sawi bawk a, thawnthu ka hrilh chuan keimah zawk chu ka ham bai bai mai. Thawnthu ka sawi tawp lam phei chu engmah ka hre mumal tawh lo. Ka hriat chhun zawng chu Jarson puan ka sin that tir tih tê mai chauh kha a ni.














Ka bianga nultu an awm avang chuan ka meng a, Hmangaihzuala'n a kut lum thur thurin ka biang a lo nul chu niin. Ka ṭhuchhuak nghal a. Jarson nen kan mu tih ka hrechhuak nghal, a harh hlau zetih Jarson chu ka en nghal a, mahse, a lo muttui hmel phian.














"I muttui em?" a tih chuan ka bu nghat a, ka phone ban nghalin sana ka en a, dar hnih leh a chan ve chiah a ni. Hmangaihzuala chu ka en nghal a, "I bang tawh em ni? Nge thil I theinghilh a, i lo lam zawk" tiih ka sana bawk chu ka en leh a, Hmangaihzuala chuan ka chala fawp zeuhin "ka lo bang hma" a ti a. Ka chal a fawhna chu tawk zeuhin














"Eng vanga ka chala fawp ve ngawt nge i nih?" ka tih chuan a meng buai deuh nak mai. "Aw, ka fawp" teh tawp mai a. "Chu reng chu alawm, ka phalna tel lovin ka chalah hian fawp tawh suh" ka tih deuh hmak chuan a ngaihna a hriat loh hmel khawp mai.















"Phalna ka mamawh kher em ni?" a tih chuan ka bu nghat nghat a "Ka chala fawp turin eng dikna mah i nei lo, ka chala fawp thei tur hian ka bialpa i ni lova, chuan i bialnu ka ni bawk hek lo" ka tih chuan a mitmeng chu a thim deuh khup mai. Ka zam lek lek. Mahse, engmah sawi dik loh ka nei miau lo. Ani hian min duh thu chu min hrilh ngei a, mahse, a bialnu ni turin min sawm lova, tin kei pawhin ka duh let thu ka hrilh lo bawk.














"Ka duh che ka tih kha" a tih chuan ka nui chhuak deuh hak mai. Mi hian pathlawi ho hi an zei viau thu an sawi zhin. Mahse, tuna ka hmaa ding mek erawh hi chu a zei lo nge? A hre lo lutuk zawk pawh ka hrethiam lo. "Min duh thu i sawi ringawt anih kha" ka tih chuan a nui chhuak hawk mai, mahse, a nui zo hmel erawh chu!














Hepa lakah hi chuan ka tuiral reng mai dawn anih hi. Tuna a mitmeng mawlh phei hi chu, tu hmeichhia pawh melh se, an tuiral hrim hrim ang. "Chuan ka duh thu ka hrilh che a, tawk lo i tih danah ka sawm kher che i phut em ni?" tiin a kiai suk anih chu! Heti hian a awm dawn tih hria ila, ka sawi hauh lovang. "Aw le, a ṭha e" tiin khum aṭang chuan min kai thla a, a mitmeng aṭang hi chuan thil thleng tur ka tinzawn thiam deuh ruak.

[Te-i Mrs Ambrose]

Pathlawia (Never Let You Go)
By: Te-i Mrs Ambrose


Chapter 10



(a hmasain, tunah hian khual khuaah ka awm mek a, in comment te ka lo hmu a, nuam ka lo ti ve khawp mai. Mahse, fb Group pui lam atangin ka insawifiah tawh kha aw. Ka story in chhiar ve duh pawh hi ka tan chuan a lawmawm lutuk, in han phun ve deuhte pawh kha ka tan chuan a lawmawm zawk. A chhan chu in chhiar peih mang loh thawnthu avangin in phun dawn lo tih ka hre miau a. Keia story ve mai in chhiar ve chak a, in vuihla te pawh khan min ti phur zawk hle. Hei tunah mi in atangin nuam lo ti vak lovin ka type a, Nang mahni avang liau liauin ka rawn dah e aw❤)


Hmangaihzuala lakah hi chuan ka tuiral reng mai dawn anih hi. Tuna a mitmeng mawlh phei hi chu, tu hmeichhia pawh melh se, an tuiral hrim hrim ang. "Chuan ka duh thu ka hrilh che a, tawk lo i tih danah ka sawm kher che i phut em ni?" tiin a kiai suk anih chu! Heti hian a awm dawn tih hria ila, ka sawi hauh lovang. "Aw le, a ṭha e" tiin khum aṭang chuan min kai thla a, a mitmeng aṭang hi chuan thil thleng tur ka tinzawn thiam deuh ruak.











"Ai,, min sawm turin ka phut lo bawk che" tiin kalsawn nghal ka tum a, mahse, ka aiin a che rang tlat. Min pawt letin ka kawngah a chelh nghal hmiah, kan inmelh ta siah mai. "Min thlah rawh, Jarson a harh dawn hnai tawh ania" ka tih pawh chuan min chelhna tha chu a la ngai reng.











"A nu ni tur hmeichhia hi a nu a nih theih nan ka bialnu atan ka sawm dawn mek alawm" tiin a kiai suk a, kei erawh ka lungphu a rang zaih zaih thung. Hetiang hian tu mipa nen mah kan la inhnaih ngai lo. "Sawm ka ngai reng reng lo, khawi maw min thlah teh" tiin ka kawnga a chelhna chu lakthkak ka tum. Mahse, min chelh nghet lutuk tlat.











"Apui, i hria em? Ka hmuh hmasak ber tum che chu i ṭhiante nena bus stand a in din lai kha a ni a, ka hmuh ni aṭang che khan ka thinlung kil sirah hian ka thai reh theih lohin i cham reng a, mahse, min hriat ang hian nupui sun tawh ka ni a, midang chuan kan inṭhen tawh ti ṭhin mahse, ka tan chuan Lenny kha ka nupui a ni reng. Ka damchhung zawnga ka theinghilh theih leh midang ka neihsan theih ka rin ngai lo.











Mahse, nang i lo lang a, khami ni aṭang khan hmuh leh che chaknain ka khat a, Lenny hnenah pawh ka inthiam lo ṭhin, a chhan chu ka rilrua ka pai reng ṭhin vang che in. Bawhzui loh che ka duh a, mahse, ka fapa hian ka thinlung a hre thei nge? Nang hnaih lo thei lo tur chein min siam a, Anu emaw a tih che khan ṭha taka i lo biak ve mai avang khan a pa tan chuan kha thil tluka hmuhnawm kha a awm lo.











Nang ka hlat theih nan che hian ka tihtheih zawng zawng ka ti ṭhin. A chhan chu Lenny-i'n van aṭanga min lo hmuh a, a rilru nat ka hlauh vang a ni. Mahse, tunah chuan ka thinlung duh dan ka zawm a hun ve tawhin ka hria. Nang hlata awm reng ka duh tawh lo. I bulah, i kiangah awm a, i mamawh changa i kianga awm reng ka duh a, chuan kei pawhin englai pawha ka bula awm ve renga , ka hmeichhia ni turin ka duh che.











Ka duh che ka tih hian ka ti mai mai lo, hmeichhe dang chu an tam. Mahse, nang ang erawh an awm lo. Hmeichhe dang laka changkai ka tum ngai lo, i lo inlan hma zawng kha chuan. Mahse, i lo lang ta a, ka engkim ni turin ka duh che, Ka bialnu i ni duh ang em?" a tih chuan ka mittui a tla thei mai dawnin ka hria. Ka tan hei bak baka damlai pialral hi a awm thei tawh dawn em ni?











Hmangaihzuala chuan ka chhanna chu a nghak tih hriat zetin ka mitah tak a melh ngar a, a hmelah chuan hlauthawn rukna, phurna, zamna leh thildang pawh ka hmuhsak nual. Engtin tehlul nge ani hi ka hnar theih ang. Ka tan chuan ka nuna mipa lo lut hmasa ber a ni a, inzawmna engmah nei si lo khan ka nunah pawimawhna a ngah hle a, ka kianga a awm hlekin min aikaih a, min thinnun ta emaw tih tur khawpin ka awm dan phung pangai ka hloh ṭhin, amah avangin ka ṭap a, ka hlim bawk ṭhin anih kha. Chutiang mipa lakah chuan kei hian a nuna hmun chan ve theihna hun remchang ka nei a, eng tin nge ka hnawl phal tehreng ang ni.











Mahse, tunah chhanna pek nghal ka duh lo. Mami thusawi kha ka hre ve kar a, chuan sawi dik loh a neihna lai engmah ka hre hauh lo. Awlsam taka neih theih thil chu awlsam takin a riral mai ṭhin a, chuvang chuan ani pawh hi tuna chhanna ka pek nghal mai chuan hmahun tur ka hre lawk si lova, chuvang chuan chhana hi tuna pek nghal mai ka duh lo.











"Ih,, inngaihtuah nan hun ka mamawh" ka tih chuan min en reng a, a mitmeng chu a dul nghal vekin ania ka hriat. "Tun thil hi chu naupang infiamna ang mai mai a ni lova, uluk taka inngaihtuah ka duh" ka tih leh chuan a bu ta nghat a. "Mahse, min inngah rei tir lutuk lo la aw" tiin ka chalah a chal chu a rawn nghat a, a thaw zui ham ham. Keipawh ka chuti tho chu.











"Ama" chu aw ka hriat rual chuan ka hnung lamah ka tawlhsawn dawrh mai. Hmangaihzuala lah chuan min nuih zui. Jarson chu mit nuai chawt chawt chung hian a rawn ṭhuchhuak a, "Ama" a tih leh leh rual chuan a bulah ka va ṭhu a, min rawn kuah nghal.










"Ih maw, ka mumangah khan hla deuhah i kal a" a ti a, min kuah nget reuh hle bawk. He naupang hi ka khawngaih takzet. A samah chuan chul sakin "mumang mai mai anih chu, i bulah ka awm reng dawn alawm tiraw. Ka kalsan miah lovang che" ka tih chuan a nui ve leh thei ta. Ani rilru hi tihnatsak ka duh lo.











Zan anih chuan Jarson-a'n a bula mu ve turin min ti tlat a, Hmangaihzuala chu ka va melh ta ngawt. Ani lah chuan ka melhna chu a hre lo der hmak a, a laptop chu a bih ngur. Hepa hian eng nge a hriat reuh ni. Jarson chuan a mut hun pangaiah pawh thawnthu ngaithla chakin a meng kar a, a bulah la ṭhu a, min melh fiah viau danah a mut a chhuah hun meuh chuan a tlai duai tawh ang. Ka hawtlai dawn chuan Hmangaihzuala lah hian min thlah a tum leh ngawt ang a, Jarson amah chauha ina hnutchhiah lah a nawm loh zia a hre ve reng. Hrilh ve tur a nia.










Chutia Jarson berin a bula mu tura min tih tlat avang chuan ka mutpui ta nge nge. A muthilh fel meuh chuan dar sawm leh a chanve a lo pel fel der tawh. Thinrim ru ṭunin Jarson room aṭang chuan ka chhuak a, Pawnah Hmangaihzuala chu a lo ding reng. Min ena nui deuh sukin "a tlai tawh emai, hetah riak mai rawh" a tih chuan ka melh rum ṭha ngang mai. Ani lah chu a nui deuh suk suk reng. Hepa nui hi a hma kha chuan ka hmu khat hle a, tunah chuan a nui hmel hi hmu zing mawlh mawlh khawp mai.












Ka chhan mai loh avang chuan "Riak rawh ka tih che kha aw. Zan hun hi chu hmeichhe tan a him lo. Ka thlah che chuan Jarson hi amah chauhin inah hnutchhiah a ngai dawn sia, nanglah nangmah chauha i haw chuan a him bawk si lo va, tun ang hunah phei hi chuan driver ṭha hmuh fuh loh palh a hlauhawm. Chuvang chuan riak mai rawh. I nu pawh ka hrilh tawh" a tih chuan rang zetin "Ka nu i hrilh a maw!" ka tum aiin ka la sawi ring zui.










"Shttt" a hmui zawnah a kut chu a dah a, keipawhin ka hmui ka hup nghal. Jarson ka kaiharh lek lek alawm. Zawi tein "Engtikin nge ka nu chu i hrilh a, chuan eng tin nge ka nu number te i neih theih?" ka tih chuan dar a kan ak a, "engngati nge ka neih loh zawk ang, i nu number te chu ka neih ngei ngei a ngai alawm" tiin mit min siai zeuh.











Zawhna zawh leh tuma ka an lai mekin ka nu hnen aṭang phone call a lo lut a, Hmangaihzuala chuan a rawn bih zuk a, sitting room lam min pansan ta nghal a. Call ka chhan chuan ka nuin "Bawihi, i thawhna pa Hmangaihzuala khan a rawn call a, i riak dawn a rawn tia" a rawn ti a, ka chhan hmain amah bawk chuan "I pu chu a fel khawp mai, min lo hrilh a, a tlai tawh si a, i rawn haw leh kha chuan în i rawn thlen hma chu ka ngaihtuah dawn che sia, i rawn riah khan a pawi lo ania" a rawn ti leh nghal a. Ka thaw huai. Mahse, helaia riah hi ka duh em em lo asin.










"Imm,, nu zanin chu a tlai tawh bawk sia, ka lo riak mai ang aw" ka ti a, call kan titawp zui a ni deuh mai. Call ka hang up hnua ka hawi chiah chuan ka phu nghek mai. Ka hnungah Hmangaihzuala a lo ding reng anih chu! "Min ti phu alawm" tiin ka awm zawn ka dawm vang vang. "Sorry, sorry" tiin a rawn pen hnai deuh a.










"Zaninah lo inngaihtuah la, naktuk lamah chuan chhanna min pe thei la ka duh khawp mai. Mahse, chumi avang chuan i lo buai phah ang e, ngei ngeiin ka ti lo va, tur hmanhmawh thut thut che ka tum hek lo. Mahse, a theih hram chuan nghakhlel tak leh hlauhthawng ru taka rei tak min siam loh hram ka beisei ania, muttui le" tiin a lamah min pawt hnai nghal a, ka chalah fawp zeuhin engmah ti lo ang maiin min inhersan a, faifuk ruih ruih chungin a pindan lam a pan a. Ka chal chu tawk zeuhin ka pindan lam ka pan ve nghal.










Zing lamah chuan chhana ka pe lo. Hmangaihzuala lah hian min bialnu chei leh thut hi a ching a, hna a kal dawn pawhin ka chalah a fawh leh tak kha. Mahse ka hlim ru veng veng. Chhunah chuan Jarson chhuahpuiin ka dawr lamah kan kawi zawk a, chutah chuan Daniel a lo awm ve leh tawh a, min hmuh chuan "Chhingpuii leh a fapa a lo kal e" a rawn ti a, Daniel chu biak fal ka duh avangin Lalno-i hnenah chuan Jarson chu awmpui lawk turin ka ti a, Jarson pawhin Lalno-i bula awm chu a duh ve mai. Kei leh Daniel chu inbe turin dawra bungraw kan dah khawmna lam chu kan pan a.











"Eng thu pawimawh fakau nge min sawipui i tum a, a hran hiala min hruai tak mai, nang hian min bem i tum a ni lo maw?" a tih chuan a hnungah ka beng pawp mai. "Ka mumangah pawh bem tur chein ka inngaihtuah peih lo" ka ti a, a nui hawk hawk mai.










"Hmangaihzuala leh a nupui hlui chungchang kha a hma aia fiah zawkin min hrilh teh" ka tih chuan min melh deuh vang vang a, "Eng atan nge i tih?" tiin min zawt mauh mai. "Min hrilh mai mai rawh" ka tih chuan min en leh ren rawn a, chutah











"A hmaa ka hrilh tawh ang che khan a ni deuh ber mai. Hmangaihzuala nupui hlui Lenny leh Bryan Hotel neitupa Bryan hian inzawmna an nei tiin an sawi ṭhin, Lenny hian Hmangaihzuala hi a phatsanin, pasal nei reng chungin Bryan nen khan an inzui a, an inngaizawng tihna a nih chu! Chuan chu thil chu Hmangaihzuala hian a lo hria a" a tih lai mekin










"Engtin nge Hmangaihzuala chuan a tih" ka lo ti nghal, Daniel lah chuan ka chal kuk fawk pahin "Ka sawi dawn reng, ka thusawi lai rawn pawtchat suh" tiin min melh khui khui. Lu ka bu nghat nghat mai.











"Chuan chu thil chu Hmangaihzuala'n a hria a ni tih Lenny-i'n a hriat chuan a inchhir hle niin an sawi a, Hmangaihzuala bulah pawh ngaihdam a dil chiam nghe nghe, Hmangaihzuala lah hian a ngaidam nghal mai bawk. Chu chu a hretute zawng zawngin mak an ti a, mi ṭhenkhat phei chuan Hmangaihzuala chu Hmangaihna in a bual at tak avanga thudik pawh hmu thiam lova, a nupui a atchilh em avanga a tihdik loh pawh hmuhsak thei lotu an ti hial a ni.











Mahse, chung thil zawng zawng chu Hmangaihzuala hian eng atan mah a ti lo. A nupui leh a fate nen an hlim phawt chuan a duhtawk hle. Chutia an inngaihdam hnu chuan Bryan leh Lenny pawhin chanchin thar an nei tawh lova, mahse, thla thum vel a liam ang tihah chuan Lenny leh Bryan bawkin thuthar an bei leh ta a. Hemi ṭum hian Hmangaihzuala leh Lenny chu an inṭhen phah ta a. Mahse, thil mak deuh mai chu Lenny zawkin inṭhen a rawt an ti, Hmangaihzuala hi chuan ṭhen loh hram a duh a, Mahse, Lenny zawkin inṭhen a duh thu sawiin a nawr chiam a, an inṭhen ta nge nge a ni.










An inthen hnu hian Lenny hian a fapa pawh a awmpui lova, Hmangaihzuala bulah a hnutchhiah tawp, a fapa chu a ngaihven zui tawh lo. An inṭhen aṭanga thla khatna hnu velah chuan Lenny chu a caccident avangin a boral a, mita hmutute sawi dan chuan a boral zan khan Bryan hotel aṭanga a chhuak lai an hmu a, hotel-a thawk te phei chuan Bryan nen room khatah an awm thu an sawi.











Chutia hotel pindan aṭanga zan tlaia in lam a pan lai chuan tawhsual a tawk a, a borak zui mai bawk. A boral hnu chuan Hmangaihzuala chu ram dangah a fapa nen an awm nghal daih a, kha a hmaa ka sawi ang khan kum hnih hnuah a rawn let leh a, a hotel pawh a hma aia changtlungin a thuam ṭha vek a, a hmaa a ber hohtu ni ṭhin Bryan Hotel chu Midnight Rose in a rawn khum ka tih che kha, chung zawng chu a ni mai" a tih chuan ka bu nghat nghat.











Chuti khawp chuan maw Hmangaihzuala'n Lenny chu a lo hmangaih, tun thleng pawhin a nupui hlui chu a nupui ang maiin a la sawi a, ani hian a nupui hlui a theinghilh ngai lo. Mahse, eng thu nge min hrilh kha, a nupui hlui thlarau laka a inthiam loh avangin a hma zawng khan min hnaih duh ngai lova, mahse, tunah chuan a thinlung duh dan zawma min hnaih thu a sawi anih kha!











Jarson ka ngaihtuah leh a, ani khan nu hmangaihna kum hnih vel chiah a dawng hman a, chu pawh chu a nausen deuh lai anih avangin tunah chuan khang a nausen deuh laia a nu hnen aṭanga nu hmangaihna a dawn ṭhin kha a awmzia pawh a hre tawh dawn lova, a nu takngial pawh a mitthla thei tawh dawn lo.










Kha mipa naupang duhawm zet, nu hmangaihna dawn chak ngawih ngawihtu khan min thlahlel em em a, a bula ka awmin a hlim hle ṭhin anih kha. A nu emaw min tiin min ngaina a, min thlahlel a, min hmangaih ve a, ani khan nu a mamawhna hi a nu tak ang chuan pe thei dawn lo mah ila, ka theihtawpa duat a, enkawl a, ka hmangaihna hi pek ka duh a ni.











"Hei hei hei, i ât hmel lutuk" ka hmaah Daniel chuan kut a lo hmet ri khep. "Ka at hmel pawn ka â lo tih i hria alawm, khatia tih kher ka ngai lo. Khawi kal ang, Jarson-a'n min lo zawng palh ang." tiin kan chhuak zui nghal a.











Jarson leh Lalno-i chu an lo ti ti ve barh barh a, Jarson hi a la naupang viau nangin biak hian mi a chhanglet ve nghal zel a, intuha lo deuha min chhan chang lah a ngah. Mahse, a fel em avang hrim hrim pawh hian a lawmawm em em a, a bula nilen hun hman pawh a hneawm ngai lo reng reng.












"Bawiha" ka tih chuan min lo en nghal vat a, min hmuh chiah chuan hlim tih hriat zet hian a rawn nui a, a hmel ka hmuh chuan ka khawngaih hle, tunah kum nga a la tling lova, a nuin kum hnih a nih laiin a pa phatsanin a kalsan a, khatih lai phei kha chuan naupangtê mai a ni a, zanah a nu te kha a zawng ve ruai ṭhin awm sia. Engtin nge hetiang naupang duhawm lutuk tak mai hi a nu khan a kalsan phal zawk!











Tun achinah chuan ka theih ang tawkin ka duat ang a, a tan chuan ka tihtheih engpawh ka tihsak ang. "Bawiha, haw tawh ang aw" ka tih chuan a rawn nui a, "Imm,, Ama haw ang" tiin Lalno-i'n a ṭhuttirna aṭang chuan a rawn zuang thla tharh a, ka kutah a rawn kai nghal bawk. "No-i kan va haw mai ang aw" ka tih chuan a rawn bu nghat nghat a.










In kan thlen chuan Ann-i pawh a lo awm leh reng tawh. "In lo haw elo?" a tih chuan ka bu nghat a. " I lo thlenna a rei tawh em?" tia ka zawh chuan rawn bu nghat chungin "Imm, ka lo thlenna pawh a rei leh deuh tawh" a ti a. Kan pathum chauhin awm mah ila, in chu a reh lo khawp mai, Jarson a ṭawng ve ang lang lang ṭhin a, kei leh Ann-i'n kan chhawn reng bawk. Jarson chu a toys ho nen a awm hnawk nuai a, amah chauhin mah ni se, a tlei khawp mai.










Tlai lamah Hmangaihzuala a lo haw a, a hmel aṭang engmah ka chhiar thiam lo. Min hmuhin nuih khat pawh min nuih chhin eih lo. Nge ni a, kei hian ka lo phut sang mah mah zawk. Min duh thu a sawi a, chuan a bak engmah a awm lo. A fapa ka bula ding mek chu a chalah a fawhsak zeuh a. "I lo fel em?" a tih chuan Jarson chu a bu nghat nghat. Kei chu awm lo ang hmaka min ngaiin vawi khat tê pawh min melh chhin eih lo anih chu. Nge a ni hi ka lakah a thinrim zawk.











Jarson a mut hnu thleng pawh chuan Hmangaihzuala chuan min be lo hrim hrim. Ka ṭah a chhuak vek. Min duh thu a sawi a, chhanna ka pek loh avang khan a thinrim em ni? Mahse, lo thinrim pawh ni se, hetia intih kher?











Haw tumin ka bag ka la a, kawngka ka hawng dawn chiah tihin Hmangaihzuala chuan min pawtlet thut a, keia lo inring lo bawk si nen, a awmah ka intauh chawrh mai. Ka kawngah a ban a rawn suihzawm nghal a, "Engthil nge i tih?" ka tih chuan a rawn rum deuh hawk anih chu! "Ka kuah che" tih te chauhvin min la chhang zui.











Tlaia a chet dan te kha ka ngaihtuah let a, ka thin a rawn rim thut. "Min thlah rawh" tiin ka tal nghek. Min kuahtu lah chuan min thlah lo nasa mai. "I thinrim em ni?" nuihza aw deuha a tih chuan a hnungah ka chum deuh pawp. A ri meuhin a rawn nuichhuak a "Duhawm lutuk mai" tiin a phun zui sup bawk.











"Chhanna min pe thei tawh em?" a tih chuan lu ka thing a, "What?" a ti hluk bawk. "Tlai aṭang khan min be lo char char a" ka ti chiah chu ka chalah fawpin a rawn nui lum huk a, "Sorry sorry, mahse, ka biak loh char char che khan ka lakah eng rilru nge i put tih hriat ka duh a, chuan i thinrim a, i lungawi lo ngei bawk. Eng atan maha kan ngaih lohte chungah kan thinrim ngawt ngai lo. A dik em? I tan pawimawhna ka nei ve" a tih chuan mit ka chhing tawp.











"Khatiang zawnga infiah kher" ka tih chuan ka chalah chuan a hma aiin a nawr na sauh a, "Anih chuan min chhang thei tawh em?" tiin min kuahna thlah a, min nawr hla deuhin ka mitah tak a en bawk. Lu ka buk nghat chuan "lu inbuk khum chiah maw chhanna atan ka dawn dawn?" a rawn ti deuh hluk. Ka nui hak a, "Aw" ka tih pawh chuan a la duhkhawp loh hmel khawp mai.











"Hmangaihzual, ka duh ve che, chuan i bialnu atana min sawmna kha ka pawm" ka sawi zo chiah chu zah lutuk avangin ka hmai ka hup nghal. Tu hmaah mah khatiang thu kha ka sawi karing ngai lo. Cringe ka ti tlat zel a, tunah khan Hmangaihzuala hnenah khan engtia sawi ngam nge ka nih pawh ka hre hrep lo.











"Duhawm lutuk" tiin a lamah min pawt hnai leh nghal a, Min kuah vang vang chungin "Ka bialnu, ka ta chiah i ni" tiin a kut lehlamin ka hmai hupna kut chu a rawn lasawn a, a hmuiin ka hmui a bawhthuah nghal zat bawk. (Awikareiiiii,, Story ka ziah lohna a rei tawh bawk sia, Kissing scene hi kumina ka vawikhat thlenna a ni hialin ka hria, ka ZAK lutuk)











Dim tein min fawp a, a rei deuha, a duhthawh telh telh. Chhanglet turin min duh tih ka hria. Mahse, ka chhanglet thiam teuh lo mai. Mit ka chhing ringawt. Hmangaihzuala lah infawhah kher kher chuan a lo zei nasa mai. "Min thlah tawh rawh, ka thaw ṭha thei lo" tiin ka sik vak. Nui lum huk chungin min thlah a, "Ka ta chiah inih hi aw. Chuan heipawh" ti lehin ka hmui bawk chu a fawp leh a, mahse a rei tawh lo. A hmui a lasawn nghal dawn emaw ka tih laiin ka hmui hnuai lam a la pet zui.











"Ka haw duh tawh" ka tih chuan a meng nur khawp mai. "Haw kher a ngai em ni? Riak mai la" tiin min nuih a, min nuih tlawn deuhin ka hre tlat. "Ai, ka haw duh alawm" ka ti tlat, "Anih chuan ka kiss leh phawt ang che" a mitmeng a de nghal sawr sawr anih chu. "Ka duh tawh lo" ka tih lai chuan ka sawi hre lo ang hmakin "A hma zawng ai khan a rei dawn ania" em em an a, ka thawk a chham dawn asin.











Ka inrin hma hauhin ka kawng a chelhna tha a rawn pe na sauh a, min fawp leh nghal der. A hma zawng ai khan a la duhthawh zui. "Bawihi, min chhang ve rawh" min la fawp reng chung chuan a rawn ti anih chu, ka meng deuh kawk mai. In kiss lai rengin a ṭawng theih ang tih ka lo ngaihtuah ngai lo. Hmangaihzuala lah a la rawn nui lum leh huk zui.











Min thlah hnu chuan "a lehpekah chuan min chhang let ve tawh turin ka duh che" a rawn ti a, kut humruh vak chungin "ka thiam lo" ka ti nghek. Hmangaihzuala chu a rawn nuichhuak thut anih chu. Ka thin a rim hlur mai. Mi ka kiss ngai lova, engtin nge khatianga in kiss a chhanlet dan kha thiam se min tih theih zawk?











Min kuahna ata chu ka talhrang nghal a, Hmangaihzuala'n min pawh leh mai a tum chuan a banah ka lo bensak vak. Min nuihsawh kha ka duh reng reng lo. Ka rilru a na deuh bawkin ania ka hriat.











"Bawihi tihpalh" a rawn tihte chuan ka rilru a na emaw ka tih kha a rawn tina ta tak takin ka hria. A chhan pawh ka chhanglet lo hrim hrim. Hmangaihzuala chu en pawh en tawh lovin ka inher a, kawngka ka vuan chiah tihin a tir ang khan min pawt let leh a, a ngai te bawkin a awmah ka intauh leh bawk.










"Thinrim suh Bawihi" a tih chuan "Ka thinrim tih ka sawi lo" ka ti hmak. "Ka nuih chhan chu" a tih rualin "Insawifiah a ngai lo, haw ka duh tawh" ka ti nghal, min kuahtu erawh chuan ka sam a chul heuh heuh thung. "I ngaihthlak ngei ngei a ngai. Ka nuih chhan chu ka hlim em vang a ni" a lo ti a, "I hlim a maw?!" eng laiah mah khan hlimna tur a awm âwm ka hre lo.










"Aw ka hlim, a chhan chu i hamhaihin min chhang let lo emaw ka tih vang ania, mahse, min chhanlet i thiam loh chuan i first kiss ka nih vang, nang hian midang i la fawp lo, chumi avanga ka kiss che chhanglet thiam lo i ni" a rawn tih chuan ka lungawi nghal mai anih chu! "Bawihi ka lawm e, i nuna a hmasa ber ka ni" tiin ka chhipah a fawp deuh vang vang.










"Ka haw a ngai tawh ania" ka tih chuan min nawr hla deuh vut. "Thawt thawt a che. Anih chuan a tawpnan tak tak aw. Min chhanlet thiam hunah phei chuan tun ai hian a nuam ang" tih leh min fawh a rawn rual leh a, "Apa, eng nge intih a?" chu aw kan hriat rual chuan kan inthlah nghal a, aw lo chhuahna lam kan hawi nghal bawk. Jarson chuan mit nuai chawt chawt chungin min lo en kiau anih chu.











Ka zak lutuk chu ka sa vek. Hmangaihzuala rawn hawi lah chuan min la nuih zui. "Bawiha, i Ama hi an inah thlah ang le" a tih chuan Jarson chuan mit la nuai deuh chat chat chung chuan a rawn bu nghauh nghauh a.











Car chhungah chuan Jarson chu ka pawm a, Hmangaihzuala nui deuh suk suk lai ka hmu ṭhin. Kei pawh eng ka ang bikin ka ring lo. Kan veng kan thlen chuan Jarson chu a lo muhil leh der tawh. Kan in kawtah car chu a ding a, Hmangaihzuala chu a chhuk hmasa a, Jarson ka pawn lai chu rawn lain car hnunah chuan rem takin a muttir a, keipawh ka chhuk ve nghal.











"Ka lawm lutuk ania, muttui u aw" tia kal mai ka tum chuan Hmangaihzuala chuan ka kutah a rawn man a, "Tikhan min kalsan mai i tum maw?" a rawn ti a, hrethiam lo deuha enin "Ka kal mai loh te chuan" ka ti a, a kiai suk anih chu. Ka hmuiah a rawn fawp zeuh a, "Goodnight kiss anih kha, kha kha lo ngaihtuah zui reng ang che." a tih chuan ka nuih seih.











Car-a a luh leh thleng chuan in lama lut lovin ka en ta reng. Car chu tinungin a in turn a, a tlanliam chiah kan in lam hawiin ka inher nghal a. Inchhung ka luh rualin U Mimii chu ka lam panin a rawn ka nghal. "Nang leh Hmangaihzuala kha in inngaizawng a maw?" a rawn ti nghal a. A va hre hma ve!










Lu ka buk nghat chuan ka u chuan a sam chu a tuai chho deuh pawk. "Engtik atang khan?" a tih chuan "Vawiin" tiin ka chhang a. Mahni u te bulah mah ni se, mipa chungchang hrim hrim ka sawi ngai loh avangin nuam ka ti lo hle.











"a la rei loh chu. Ṭhen nghal ang che" a tih chuan ka u chu ka melh deuh kawk mai. "U timaw?" ka tih chuan ka u chu a thaw deuh hak a. "A hmain a chungchang ka hrilh tawh che kha. Tinge hre reng chunga a laka i lo luanliam a, thlah nghal ang che" a tih chuan lu ka thing deuh nghat nghat.











"U i sawi ang mipa kha a ni lo" ka ti a, "Chu pawh ni se, thlah nghal hmak ang che, hetiang a nih dawn chuan i hna pawh i bang ang" a tih chuan ka u chu ka melh ngawt ngawt. Eng vanga ani ka hnaih chu duh lo em em nge a nih. "U eng vanga ani kha ka hnaih phal lo em em nge i nih a? Ani te chu a ṭha lutuk alawm" ka tih pawh chuan u Mimi chuan lu a thing nghat nghat.











"Hnaih ka phal lo a ni mai" ram deuh hmara a tih chuan ka melh ngawt ngawt tawp. A nau hian tu mipa mah ka la hnaih ngai lo. Chuan tunah a ṭum khatna atan ka nunah tu emaw a lo lut a, min lawmpui a hnekin min duhpui lo nghal ngawih ngawih a. "Chhan ṭha a awm loh chuan ka hlat dawn lo" ka ti ve ta hmiah.












Ka u chuan rapthlak min tih hmel fe hian min melh a "Kha mipa avang khan i u hi khatiang khan min bia a maw? Thlah rang la a ni mai, naktuk aṭang bang nghal ang che" a tih pawh chuan lu ka thing deuh nghat nghat "Ka bang dawn lo, chuan chhan ṭha a awm loh chuan ka hlat dawn lo bawk." Hmangaihzuala te pafa hi chhan tha tak vang anih loh chuan ka kalsan dawn lo.











Ka u chu inhersanin ka kalsan a, khatia ka u laka che tur kha ka ni em tih ka hre lo. Nuam pawh ka ti chuang lo. Mahse, a nau hian mipa a vei em em ṭhin chu hnaih theihna hun ṭha a nei ve a, min lawmpui a hneka thlah tura min ti khan min tina em a ni. "Kan la hria ang chu. I hna aṭang pawhin i bang khawp ang" U Mimi'n hnung lam aṭanga a lo tih pawh chuan ka kalsan lui nghat.



(Ka lo sawi tak ang khan khual khuaa awm lai ka nih miau avangin a dang rawn dah leh kha chu a harsa tawh dawn a, chuanin typing mistake ka ngah leh ngah loh te min lo hrilh ula, chuan... Mizo tawng dik lo pawh kha aw.

Khawngaih takin dawhtheina nen min lo nghak hram hram dawn nia)

[Te-i Mrs Ambrose]

Pathlawia (Never Let You Go)
By: Te-i Mrs Ambrose

Chapter 11







Zan ka muthilh dawn thleng pawh chuan ka u thilsawi ho chuan ka ngaihtuahna an chhuahsan thei lo. Eng vanga Hmangaihzuala chu hnaih tura min duh lo em em nge a nih? A hma aṭang tawhin mipa ah hi chuan a duhkhirh ṭhin tih ka hria, chuvang renga tun thlenga ngaihzawng pawh nei lo a ni, ama ngaihah chuan Hmangaihzuala chu Pathlawi, fa pawh nei tawh a ni a, chumi avanga min duhpui lo viau em ni a nih ang.









Zing ka harh chuan tuk danga ka thawh hun a pel duai tawh tih ka hria. Ka tho a, ka insil zawhin ka pindan aṭang chuan ka va chhuak a, ka pa pawh sitting room-ah a ṭhuchhuak ve peih tawh a. A hmaa accident a tawh hnu khan sitting room lamah lo chhuah pawh a harsat deuh a, pindanah a awm deuh reng zel mai a ni.









Choka lama ka luh chuan u Mimii leh ka nuin eirawng an lo bawl mek a, ka nu chuan min lo hmuh rualin thingpui min lo pe nghal a, u Mimii nen chuan tukdang ang lo takin kan inbe hauh lo. Thingpui ka in zawh chuan ka pui ve nghal mai a, u Mimii pawh chuan min biak hmasak chu a tum hmel lem lo.










Chaw kan ei lai chuan "Bawihi ban i tum hnai em ni?" ka nu chuan a lo tichhuak hlawl a, "Eng nga!" ka rin aiin ka aw ki pawh a sang. Mahse, thinrim vang ni lovin mak ka tih lutuk vang zawkin a ni. Ka nu chuan "I u Mimii hian ban i tum hnai tih a sawi a, engtik aṭangin maw ban chu i tum, hei thla thum pawh a pum ṭep tawh bawk a" a tih chuan u Mimii chu ka melh reng ringawt.









"Nu..." ka tih lai mekin u Mimii chuan "thla thum pawh a ral ṭep tawh a, i hnathawh ṭhinna pa pawhin a hrethiam em em ang che. Chu lovah mi ina awmpui ni tura i thawk daih pawh hi ṭhenawmte sawi sep i kai nasa tawh lutuk, i ban thuai a finthlak ber" a tih chuan ka chhungte ho pawh chuan an pawmpui hmel khawp mai.









Engtin chiah nge maw ka tih dawn ni? "Ni e, ka fanu in midang ina awmpui hna i thawk ringawt hi kei chuan ka pawm dam thei hlawl lo. I chhungte kan la awm vek a, nang pawhin a hming a mawiin dawr pangai tak i nei ve bawk. A laka i bat chu engzah pawh ni se, kan rul thei em em ang" ka pa meuhin a lo tih phei chuan ka ṭap lo chauh.









"In hrethiam lo anih kha" ka ti tawp. A eng ber nge sawi ka tum tih pawh ka hrefiah tawh bik lo. Ka kham hnu thleng pawh chuan engmah ka sawi tawh lo. Zanah engkim fiah takin ka hrilh zawk mai ang. Tunah hi chuan engmah pawh ka sawifiah hlei thei chuang lovang.









Ka chhuah dawn chuan ka nuin "Bawihi, I thawhna pa kha hrilh la, a theih chuan ban thuai a phal theih nan lo nawr ve deuh teh aw" a rawn ti a, thaw hapin "Nu zanah fiah takin engkim ka hrilh ang che, ban ka tum lo" ka tih chuan ka nu chuan mak a tih hmel hle, " 'ban ka tum lo' ā ni?!" a rawn sawi nawn ta reng. "Imm, nu hriatsual in nei anih kha. Ka lo haw hunah ṭha takin engkim ka hrilh ang che u" tih leh chhuah ka rual nghal a.









Hmangaihzuala te in kawtah chuan ka ding ta reng mai. Ka hriatchhuah tak chu thla thum a ral lek lek tawh a, thla thum a ral hnu hian engtin nge Jarson chu a lo awm tak ang? Chuan keipawhin ka awm thiam ka ring lo. Nitin an pafain ka hmu a, thla thum a ral hun meuh chuan tuna ka hmuh ṭhin ang hian ka hmu reng thei tawh dawn lo.










Thawhzawm zel lah thil tih chi tak a ni si lo, keimahin dawr ka nei ve reng a, helama awmpui ni tura awm reng pawh thil tih mi a ni bawk si lo. Chu lovah Hmangaihzuala nen kan inkar hetiang hi a nih tawh si chuan miin sawi nuam an ti dawn lutuk. Ṭhenkhat phei chuan awmpui anga an ina va awmin an pa ber ka lem angin an sawi ang a, hei hi awmpui leh a pu inngaihzawnnaah chuan miin sawi nuam ber an tih ber tih theih theih hial a ni.









Ka thaw hap a, chu tih lai chuan kawngkhar a lo inhawng a, Hmangaihzuala chu lo chhuakin engmah pawh ka sawi hmain min lo kuah a. Kei pawh a awm zawn lam aṭangin ka lo thaw ve hle hle ringawt.
"Ban i tum hnai niin i u khan min lo hrilh a" a tih chuan ka u chu ka ngei lek lek ta mai. Ka ngawi reng a, engmah pawh ka sawi lo. Hmangaihzuala chuan ka chal a fawp deuh vang vang a.









Inchhunga kan luh hnu rei loteah Hmangaihzuala chu hna lama kal turin a chhuak a, biak pawh ka be mang lo. Engvang u Mimii chuan lo hrilh thawt thawt nge a nih? Heti em ema a kal thui chu ka ring lo asin. Ka nunah inrawlh thei turin ka u chu a ni meuh mai. Mahse, heti em ema thuk hi chuan a inrawlh ka ring ngai lo. Ka duhthlanna takngial pawh min zahder sak eih lo.









"Ama" min titu aw avang chuan ka ngaihtuahna aṭangin ka harh zawk mai. Jarson chuan mak tih hmel zet hian min melh a, nuihluih chungin "Imm, eng nge ni ta?" ka ti a, "Engmah" tiin a nui ver ver, ka ngaihtuahna pik lutuk pawh a nui hmelin min chhem kian sak hawk mai.









Hmangaihzuala hnenah chuan thil engkim ka hrilh dawn nge? Ka hrilh lo zawk ang tih thuah ka rilru a insual nasa mai. A hnu phei chuan kan ṭhian ho group-ah ka va sawi ta ringawt. A tu a mah mah chuan min reply lo, an la buai ve viau anih ka ring. Hmangaihzuala hnuaia ka thawh aṭangin thla hnih a pel fel der tawh a, thla thum a pum nan chuan kar khat leh tlem chiah a awm tawh.









Chhuna ka phone ka en leh chuan Mami message a lo awm reng tawh a, ani pawh chuan u Mimii chu a hriatthiam bik loh thu leh thurawn eng eng amaw hi min lo pe a, Lalnoi ve thung erawh chuan min tihnuih a tum tih hriat zetin u Mimii chu vuak a duh thu a rawn sawi chiam a, a takah erawh chuan Lalnoi hian ka u hi a zah ve hle.









Rin loh lutuk tak maiin Hmangaihzuala chu a lo haw hlawl a, "Awi! Tinge a, chhun lamah i lo haw ngai bawk si lova?" ka tih chuan "Ka fapa nen hian chhuahpui che u ka duh" tiin Jarson chu insiam turin a ti nghal a, "eng nge kan tih ang a?" tia ka en chuan "a ṭum khatna atan ka bialnu hi ka chhuahpui dawn che" a tih chuan ka sa hat hat.









Kan pathum chuan car-ah kan ṭhu a, Hmangaihzuala chu eng emaw ngaihtuah hmel hi a pu. "Eng nge i ngaihtuah a?" ka tih chuan min melh lovin motor kkawng chu uluk zet hian a melh a, "I u thilsawi kha ka ngaihtuah" a tih chuan nuam lo ka ti kher mai.









"Ih, thla thum a ral ṭep tawh avangin a rawn sawi anih kha" ka ti ringawt. Ka u nena kan inkar hi hrilh ve kher ka tum lo. "Thla thum a ral hunah kei leh ka fapa hi engtin nge kan lo awm ang?" tiin min rawn melh zawk a, a mitmengah chuan hmuh eng emaw ka nei. Mahse, ka chhiar hmain min melhna a mit chu la sawnin motor kawng bawk chu a melh leh nghal daih.









Kawngah chuan eitur vel leiin kan ding zawk a, khawiah nge min kalpui dawn ka a sawi hauh lo. Darkar khat dawn kan tlan hnu chuan hmun pakhatah hian a ding ta hlawl a, ka hawichhuah chuan a boruak a nuam hle . Chuan tunah hian Aizawl khaw dai lamah kan awm bawk.









Car aṭang chuan ka chhuk a, "A nuam lutuk" ka tih lai mekin Hmangaihzuala chuan thil a lei ho chu a lo phawrh mek a, Jarson pawhin nuam a tih hmel khawp mai. Kan hma lamah chuan in pakhat hlui lam tawh hi a awm a, a sak dan han en mai chuan a simple ru hle a, a chhehvel hmun nen a inchawih nalh hle.









"Helai ram hi ka lei a, chuan min hmuhpui hmasa ber turin ka duh che, heilai hmunah hian nakinah in kan la sa ang a, chutah chuan nang, kei leh ka fapa te kan awm ang a, tumah chimbuai phak lovin" a rawn ti a, ka nuih var var mai. Kan puan ken chu kawt zawl laiah chuan kan phah a, thli a thaw tam a, nuam tak a ni.










Tlai lam dar li rik dawnah kan haw chauh a, Jarson phei chu a muhil daih tawh. Hmangaihzuala chuan ka kut chu a hum deuh vang vang a, "Bawihi a la rei lo tih ka hria, mahse, ka fapa nen hian kan mamawh si che a, inneih nghal rum rum mai ka duh" a tih chuan amah chu ka melh nghal kawk.
A la hma lutuk.









Ka chhang lova, chutah Hmangaihzuala bawk chuan "I duh lo a mi?" a rawn tih chuan "inneih te chu, dam chhung daih thil ania, tun thawt thawtah te chuan... kan zia kan la inhrechiang lova" ka tih lai mekin "kei chuan nang anga ṭha hi ka tawng tawh dawn lo tih ka chiang alawm" a rawn ti nghal a, thinlung lam a nui ver ver.










"Engtia rei nge ka nghah che ngai ang?" a tih chuan hrethiam lo zetin ka melh. "ka sawi awmzia chu, engtia rei nge inngaihzawn i duh? Inhriat chian nan engtia rei nge i mamawh a i inrin? Kei chuan ka chiang a, ka thlang sual chein ka ring lo" a ti dap dap a, hman aṭanga ka lo duh tawh ṭhin mipain min thlan sual loh tur thu a sawi mai chu ka tan chuan thil nuam tak a ni.










"Kan inhmangaih si lova" ka tih sep chuan a rawn nui huk mai. Sawi loh tur ka sawi em tih ka ngaihtuah nghal. "Bawihi, ka hmangaih lo che ka tih lai ka hre lo" a tih chuan "Maw" ka ti nghal ṭhawt. Hmangaihzuala chuan car chu a tiding a, ka lam rawn hawiin ka kut a vawnna kha a hma aiin a tinghet sauh a.










"Kan inkar kal thlangpui ka huam chhan leh, ka nupui hlui pawh ngaihtuah duh lova i kut ka vawn chhan chu ka Hmangaih vang che a ni. I zia a eng ber vang hian nge ka hmangaih che ka hre lo, mahse, ka hriatchian erawh chu ka hmangaih che tih hi" tiin ka hmui a rawn fawp zeuh a, ka lungphu a rang zaih zaih.









"A tirte aṭang khan hnaih che ka tum lo. A chhan chu Lenny khan van aṭanga min lo thlirin na a ti ang tih ka hlau a, hmeichhia lak aṭang hian ka inthiarfihlim hmak zel. Mahse, nang chu a dan a dang. Hnaih loh thei lo chein he I mizia zawi tak phena rilru tluang leh ṭha hian min hip a, i nui hmelin min zem a, hnaih lo thei lo tur chein i lamah min pawt bet a, mahse, chumi chung pawh chuan ka hmangaih che tih ka hriat hma kha chuan ka hnaih ngai lo che, ka hmangaih che tih ka hriat chhuah aṭang khan nang hnaih tur chein thinlung ka siam fel a, ka hmahun suangtuahah zawng zawng pawh i tel ve vek. Ka Hmangaih Che" tiin ka bekah a rawn zen a, dam ruih mai hian min fawp a.









Car a tihnun leh hnu pawh chuan engmah a sawi zui tawh lova, mahse, ka kut erawh a la hum reng. Jam avanga kan tan laiin rin loh lutuk tak maiin Ramdina chu kan zawnah a bike in a rawn ding hlawl a, "Chhingpui, i rim hi ka hrefuh thei e" a rawn ti nghal a, ka kut chelh mektu a hmuh chuan a hmel landan a dang tih ka hria, a chhan erawh ka hre lem lo.










"I ninawm" ka tih chuan min nuih suk a, "Nih ka tlansan ang che u, two Wheeler hi chu kan awlsam ania, zanah ka lo leng ang" tih leh tlan a rual a, two wheeler tan chuan traffic chu tawt tham em em anih loh avangin a tlan thei mai. "Tunge?" Hmangaihzuala'n a lo tih thum dut chuan ka melh nghal a "Ramdina anih kha" ka ti ṭha ve mai.










"Ka zawhna che i chhang lo, i tan tu chiah nge a nih?" a rawn tih chuan chiang zetin amah chu ka en a, a hmel a dur khup maiin ka hria. Chuan a hmel hi ka nel lo. "Ka ṭhianpa, college kan kal laia kan senior ṭhin" ka tih chuan ka kut a vawnna chu a thlah a.










"Hnaih tawh suh ang che" a tih hmuk chuan nuam ka ti lo hle. "Ka ṭhianpa ania, ka thlah ngawt thei lo" ka tih chuan min melh deuh hrawk a, chuan ka kut a thlah ringawt pawh khan hrehawm min tihtir hle. Hmangaihzuala chuan melh pawh min melh tawh lo chuan hmalam chu a melh ta ngur a, engmah tihdik loh ka neih ka hre lo a, chuan min thinrim khum ngawt chuan ka rilru a tina bawk. Chupawh ka ṭhianpa vang mai maiin, tihdik loh ka neih te chuan thu hran a nia.









Horn chu a hmet vak a, "Hmanhmawh ta che u" a aw aṭang pawhin a thunrim tih chu hai rual a ni lo. Sir lam ka melh ve ta daih a. Vawiin hi kan inngaihzawn aṭanga kan chhuahdun hmasak ber ṭum a ni a, a tum khatna atana kan chhuah ve ṭuma min thinrim khum ngawt ka hi tana a nawm loh tur zia pawh a ngaihtuah hauh lo.










In kan thlen thleng chuan min be tawh lova, car a tihdin pawhin a chhuk a, a hnung lama Jarson mu chu a pawm nawlh a, inchhung lam a pan nghal daih bawk. Car-ah chuan ka ṭhu reng, a hnu deuhah car aṭang chuan ka chhuk a, gate lam ka pan nghal bawk. A tlai lam tawh bawk a, Jarson a mut tho avangin ka hawsan mai ang. Ani thinrim hmel kha hmuh ka duh lo.










Gate ka vuan chiah tihin "Eng nge tih i tum?" tih aw vawt ruih avang chuan hmanhmawh lehzualin gate chu ka hawng a, ka tlanchhuak nghal daih. Taxi lah ka hmu mai lo lehnghal. Nidanga taxi an tam ṭhin nen, tun a taka taxi ka hmu lo te chuan ka thin a tirim dawn dawn mai.









Hmalamah chuan kein ka kal a, Taxi ka hmuh hun hunah ka phar ang a, ka chuang nghal mai ang. Hmangaihzuala thinrim hmachhawn a, a thinrimna ka chunga a leihbuak hma ngeiin hawsan vang vang ka duh.









Hnung lam aṭanga min pawt lettu an awm avang chuan ka vir zawk. Min kuah nghal a, "Thinrim suh, a thleng nawn leh tawh lovang, thinrim tawh suh" Hmangaihzuala aw tih ka chiang lutuk. Chuan he a aw hian ka ṭah a tichhuak. Nichinte kha chuan min ngaihven hlek lova, chuan min hrawk hrep duh hmel a pu bawk anih kha. Ka ngawi reng a, engmah ka sawi lo. Ka ṭawng chuan ka ṭapchhuak mai ang.








"Tihpalh Bawihi, thinrim suh aw" tiin aw dam thlup hian a rawn ti a, ka sam a chul heuh heuh bawk. In lamah chuan min kailet leh a, ka zui ve mai chhan hi ka hre lo. Mahse, a aw a nuam tih lohna ka hriatchian em vang khan a nih ka ring. In kawta ṭhutthleng awmna lamah chuan min hruai a, a ṭhutthlak hnuin a bulah chuan min ṭhuttir ve nghal a, ka lam a rawn hawi bawk.










"Bawihi, engmah i la sawi lo ania, i thinrim pawhin min hau la, min vin bawk la, duh chuan i kut pawh thawh mai rawh, mahse, ngawi reng suh" a rawn tih pawh chuan amah chu ka en reng ringawt. Engmah ka sawi lo. "Bawihi" beidawn hmel zeta a tih chuan "I thinrim vak ringawt anih kha, ka awm tih hre lo ang hmakin i che bawk a" ka mittui a tla nghal ringawt.










Hmangaihzuala chuan rang lutukin ka mittui chu a rawn hru nghal a, ka hriat leh chu a mal chungah min lo pawm der tawh. Ka chalah a fawp vang vang a, "ka tihpalh, a thleng nawn tawh lovang, ṭap tawh suh" tiin ka chhipah a fawp vang vang a, ka ṭah a tichhuak zual sauhin ka hria. "I ṭhianpa i ṭan zawk avang khan ka thinrim alawm" a tih pawh chuan "ka tan zawk loh kha" ka lo ti nghal, nui nghawr datin "Imm, chuan ka tihpalh, ṭap tawh suh aw" tiin ka chhipah chuan a nawr na zual sauh.









"Tuna i rilru no tak avang hian alawm duat che ka chak a, tumahin an tihnat theih loh tura venhim che ka chak, mahse keimah berin i mittui ka tlaktir sia" inthiam lo aw zet hian a ti a, ka nui var var tawh "a lehpek a awm tawh dawn chuang hleinem" ka tih chuan "Mm, a awm tawh lovang" a lo ti ve nghal a.









Chutia kan ṭhut rei deuh hnu chuan "Vawiin chu ka haw hma thei ang em? Jarson a mu tawh tho sia" tiin ka en a, ner suka "min ngai lo si" a tih chuan ka nuichhuak hak hak mai. "Chhun aṭang i bulah hlir anih kha ka awm, ngaihna hun che pawh a awm loh kha" ka tih lai mekin "kei thung chuan ka bula i awm lai mek pawhin ka ngai che a" tiin ka kawng a chelhna chu a tina zual sauh a, "a za ania" ka tih chuan a tha pek pawh a thlah ve nghal mai.









"Min ngai lo bawk sia, ka hawtir che i duh chuan tih phawt tur i nei" a ti a, ka en laiin a hmui a liak hnawm zeuh. "Min fawp phawt la, chuan ka hawtir ang che, i haw hmaa ka ngaihtuah zui tur engmah min hnutchhiah loh chuan i haw lovang" a tih chuan ka ner nang nang, ka ngam hi a ring reng reng em maw ni le?









"Vatin anih loh chuan ka phal dawn lo ania" a tih leh chuan ka thaw halh, "nih i mit chhing rawh" ka tih chuan atthlak tih hmel zet hian a nui a, mahse, a chhing nghal mai bawk. A hmuiah chuan ka fawp zeuh a, awmhran ka tum rualin rang lutukin ka tumkhumah a rawn man a, min fawpzui nghal ngawng ngawng. Kan inthlah leh meuh chuan ka sa hat hat a, ka thawk a rang vek.











Kawng sirah chuan Taxi min nghahpui a, ka kut a kai tlat reng bawk. Nichina a thinrim lai ang kha hmuh ka duh tawh lo. Kei chuan tuna ka bula ding mek Hmangaihzuala chiah hi hmuh ka duh. Taxi kan phar hnu chuan Hmangaihzuala chuan driver hnenah him taka kan in min thlen ngei turin a chah a, driver pawh a bu nghauh nghauh.










Kawnga kan tlan laiin driver chuan "I bialpa chu a felin a ngaihtuah hle mai che" a rawn ti a, ka nui var var. "Tunlaiah ngaihzawng ṭha hi tawnfuh an har tawh a, a bikin min ngaihtuah deuh tu leh min zahtu hi tawn an har tawh, nang chu i vannei takzet" a tih chuan ka bu nghat nghat a, kei pawhin vannei ka intihzia chu ka hrilh ve a.








In ka thlen chuan ka nu chuan mak a lo ti hle, tun ang hunah ka haw ngai miau lo. "I va bang hma ve" min ti rēng bawk a. "nu u Mimi hi a lo la haw na nge?" ka tih chuan a lo bu ve nghat nghat a, ka nu chuan eirawng chu bawl zo dawn tawh mah se, ka pui ve nghal tho.









Ka nu in ka ban hun tur vel min. zawh chuan "Nu, thla thum a ral hma chu ka bang dawn lo. Tuna ka hnathawhna te pafa hian min mamawh lutuk, naute phei saw chu a nuin a awm loh san tawh avangin min mamawh zual a, ka ban hun aia hmaah bansan ka tum lo" ka tih chuan "Aw, i u khan ban i duh tawh thu a sawi vang ania keini pawhin bang mai tura kan tih che" a tih leh pawh chuan "U Mimi khan ka thusawi a la fuh lo palh anih kha, a hun hma chu ka bang lovang" ka ti a, ka nu pawhin bu nghat chungin









"a ṭha alawm, a tir aṭanga in thu delhkhilh sa hrim hrim kha ania, nanga tan pawh a hun hmaa ban chu thil mawi pawh a ni lo, chu lovah a fapa pawh chu a lainatawm ka ti, i puin a phal chuan vawikhat tal i lo hruai ve dawn nia. Naupang ka lawm lohna chin pawh ka hre tawh lo" a tih avang chuan ka thaw huai. "Imm, remchang hmasa berah ka lo hruai ang" ka ti ve a.










Chaw ei laiin ka pa pawh chuan ka ban tur chungchang bawk chu a lo sawi ve leh a, ka nu zawkin ka chhan hmain ka pa chu a lo hrilhfiah nghal a, ka pa pawh a bu nghat nghat mai. U Mimii erawh a lungawi hmel tehchiam lo.









Zan dar sarih bawr velah kawngka kik ri ka hriat chuan ka va hawng nghal a, pawnah Ramdina chu a lo ding reng. "Nang maw?" ka tih chuan "Aw keimah tlaiah ka lo leng dawn ka tih kha" a tih chuan "I tih tak tak ka ring lova" ka ti sep. "Ka tih tak tak vangin hei tunah i hmaah ka ding mek, chuan min luhtir rawh" a tih chuan ka hrechhuak, a luhna tur ka kian lova, lut turin ka sawm hek lo.










Sitting room-ah chuan kan inzui a, ka pa chu room lamah a awm a, ka naute pahnih pawh room-ah tho an awm. Ka nu chuan Ramdina chu a lo be nghal a, u Mimii erawhin a pindan lam a pan daih thung. Ka nu pawh kan bulah rei a awm lo "Ramdin tikhan lo inkawm ula, pindan lamah ka luhsan mai ang che u, Bawihi ṭha deuh khan lo kawm la, thingpui te i lo lumsak dawn nia" tih leh room lama min luhsan ve a rual a.









Rei lote hnuah kawngka kik ri avang chuan Ramdina chu ka thawhsan a, kawngka ka hawn chuan Hmangaihzuala te pafa an lo ding reng anih chu. Jarson zawk chuan "Ama, nangma awmnaah khan kan lo kal dawn tih Apa khan a sawi a, chuan ka kawrte min thlak sak a" a tih chuan Hmangaihzuala chu ka en reng.










Hmangaihzuala chuan lo luh pahin ka chal a rawn fawp zeuh a, "ka hmu chak tawh che a" a rawn ti sup, ka biang a sa hat hat mai. "Jarson ka lo hruai sia..." a tih chuan "Imm, lo hruai lo la chuan ka hau ang che" ka ti a, chutia ka tih chuan hahdam ta tih hriat tak hian a rawn thawchhuak ham ham a, a lo kalna lehzela a fapa a hruai ve zel ngai chuan nuam a tih tir vak lo anih kha ring.










Sitting room lama kan inzui phei Ramdina'n a hmuh chuan mak a tih hmel khawp mai. Hmangaihzuala erawh chuan Ramdina a hmu chu mak a tih ve hmel lem lo. Ṭhut rei tak tak hmain thingpui lum turin ka thawhsan a, Jarson-a'n min lo zui ve nghal. Ka chhuah ruala Hmangaihzuala awin "ka bialnu te chu, ka rim thiang alawm" a tih chu ka hre hman.

[Te-i Mrs Ambrose]

(Niminah story dah ka tum kha ania, mahse, khaw chhia, thli leh ruah nen an thawk kawp chiam mai a, phone nih takngial pawh ngam awm lo khawp anih avangin ka lo dah ta lo ani)

(story hi mar khatah 3 tal dah ka lo tum âng aw)


Pathlawia (Never Let You Go)
By: Te-i Mrs Ambrose


Chapter 12




Thingpui ka lum lai mekin Jarson chuan "Ama hetah hian nangmah i awm ṭhin a mi?" a rawn ti a, ka buk nghat nghat chuan "Tinge keimahni bulah khan i lo awm ve lova, keima ṭhiante nu leh pa chu an awm ho ṭhin a" a tih chhuan chhan mai dan tur hre lovin ka ngawi deuh vang vang. A hnu deuhah "I pu a dam lova, he lama ka awm rih a ngai a" ka ti tawp, chutia ka tih chuan hriatthiam ve hmel tak hian a bu nghauh nghauh a.










"Keima pu chu a dam hunah in khatah kan awm ho tawh dawn a mi?" a tih chuan ka bu nghat nghat a, a nui ve var var mai. "Khawiah nge a pu te chu?" a tih chuan an mut tawh thuin ka chhang a, a pu te hmel a hmu lo chu pawi tih hmel ve tak hian a chal a beng thek a, ka nuih hak hak mai.










Thingpui chawi chung chuan sitting room lam kan pan a, Hmangaihzuala chuan min lo hmuh rualin min nuih suk a, ka nuih let ve mai. An thingpui tur ka pek zawh chuan tray pawh chu choka lama letpui lem lovin dawhkanah chuan ka dah rih a, Jarson lah chuan an bula ,hut ka tum lo tih hria ni awm hrimin "Ama kan bulah lo ṭhu la" a lo ti a, ka en nghal vat. A pa bul ṭhutna chu a beng ve thek thek ang reuh a.










Ramdina chuan nuam a ti chiah lo a ni ngei ang. "Chhingpui, ka va haw tawh mai ang, pawn thleng chu min lo thlah ve la" a tih chuan "I va leng rei lo ve" tiin ka en, "Imm, I thingpui lum chiah in tura lo kal ka nia" a tih takah chuan ka ding chhuak ve nghal mai. Kan pahnih chuan kan inzui a, pawna kan din hnu chuan "Bialpa i neih te chuan min hrilh ve tur che nia" lungawi hmel vak lo hian a lo ti a.










"Tihpalh, hetiang lam thil hi kan sawi dun ngai si lova" ka tih chuan "A pawi khawp mai, ka lo duh maithei che sin le, hun pawh ka nei ve tawh si lo" zawi zup hian a ti a, a thusawi avang chuan ka meng chhuak kawk "Maw!" ka ti nghal vak bawk, mak ka ti lutuk hi a ni ringawt "Â lutuk mai, ka fiamthu anih kha ka duh lo che" nui hawk hawk chungin ka sam a lo tuai a, ka hahdam sawng sawng mai. "Nih va lut tawh rawh, i bialpa thikthu chhiat hmel zet khan min lo thik tawh ang" tiin a bike ah chuan a lawn a.









"A thikthu a chhe kher lo" ka tih chuan nui hawk chung hian " I hre lo anih chu. Ani aia thikthu chhia ngaihzawng i neih tawh loh ka beisei, nih aw" tih leh tlanchhuah a rual nghal a. Ka va luh leh chuan Hmangaihzuala chuan a bulah min pawt ṭhu a, "I thlah rei lutuk, min ngaihven ve miah lo" a rawn ti a, Ramdina thilsawi ka hrechhuak thut a, ka nui hak mai. "Thil nuihzatthlak ka sawi lai awm ka hre lo" a ti deuh hmuk. "Ramdina khan i thikthu a chhiat thu min hrilh a, chuan a sawi dikin ka hria" ka tih chuan a lungawi hmel vak lem loh.









Darkak chan ve dawn an ṭhut hnuin "Anih Bawihi kan haw mai dawn. Hei Jarson pawh a mut a chhuak tawh sia, min lo thlah la" tih leh din a rual a, a fapa mutthlu lek lek tawh chu a pawm nghal bawk.










A car-ah chuan Jarson chu rem tak hian a ṭhuttir a, chumi zawhah ka lamah a lo hawiin, "Mipa lo inrim tir tawh suh ang che" thu pe aw zeta a tih chuan "I thu ber alawm" fiamthu deuh reuh hian ka lo ti ve. A lo nui ve suk a, ka hmui fawp zeuhin "zan hun pumin ka hmu dawn lo che chu ania" a rawn ti a, ka ner sak, a muhil dawn tho sia. An inah awm tehreng pawh ni ila min hmu tawp lovang .










An inkhalh chhuah thleng chuan ka thlir a, an tlan liam takah chuan ka ruak huai maiin ka hria. Inchhung lama ka luh leh chuan u Mimi a lo awm reng tawh a, "I ngaihzawngpa chu a zak thei lo reuh hle mai. A chhangchhiat thlak bawk si, inrimnaah a fapa a lo hruai zui" a tih chuan ka thin a rim kher mai. "u tikhan sawi tawh suh. Naupangte kha a khawngaihthlak asin, mipa naupang dang ang lo takin nu a nei tawh lova, a pa hi a neihchhun a ni, a zui lohvin amah in em ni a lo awm ang. Lo chhangchhe pafa pawh ni se ka tana an hlut dan a danglam chuang lo" tih leh ka pindan lama luhsan ka rual a.










Hmangaihzuala zawk chu engtin pawhin lo sawi se, ka tur dam thei mai ang. Mahse, Jarson chungchangah kher hi chuan ka tuar dam theih ka ring lo. Naupang te a la ni a, a rilru a la no lutuk, tumahin a rilru an tihnatsak ka phal lo.










Ka muhil dawn tawh tihah chuan call ka dawng hlawl a, Hmangaihzuala a lo ni. "Mm" ka ti ringawt. Lehlam ami nui sup ri chu ka hria. "Bawihi, i mut a chhuak tawh em ni?" a rawn ti a, a awah pawh nuihzatna a la chambang deuhin ka hria. "lutuk lo" ka ti a. Phone call hmang hi chuan kan inbe vak ngai lo a, sawi tur ka van ngei mai.










"Bawiha a muhil fel chiah a" a rawn tih laia, "a va mu tlai reuh ve" ka tih chuan "Mm, min titipui ve char char a" a lo ti a, a chhanna avang chuan ka nui hak hak mai. A awm lutuk tlat. He nau hian titipui theih loh tumah a nei lo ang. Jarson hi kan biak tak tak chuan a biak ve theih fu a, mahse, naupang tih takah a chhanna a nawi viau zel.










"I hria em?" a rawn tih chuan "eng maw?" hrethiam lo zet hian ka ti a, lehlam ami chu a nui huk mai. "Bawihi i muthlu tih sawi miah suh" a rawn ti a, ka mutthluk awm ka hre lo reng reng. "Ka muthlu lo" ka ti nghal, "engtin nge ka thusawi pawimawh zet kha i hriat loh theih" a rawn tih chuan a chhana tur ka hre lo reng reng. Engtin nge ka hriat loh tih ka hre miau lo.










"Sawi nawn leh mai la" ka tih chuan a ngawi deuh vung vung. "Ka bulah zan tin mu tawh la ka duh" a rawn ti a, ka sa hat hat mai. Hmaichhanah chuan awm ngat phei ila, zah leh laih lutuk avangin ka kalsan duh hrim hrim ang. Kan inbiak zawh hnu pawh chuan a thusawi ho khan ka ngaihtuahna an luah ngut ngut reng. Engtin nge kei leh Hmangaihzuala teh daihin khatiang thu sawi khan kan inbiak ve theih. Thil thleng thei ngai lo tura ka ruat ho zawng zawng kha tunah chuan tlem tlemin a thleng mek zel chu a ni sia.










Hmangaihzuala te in ka thlen chuan Hmangaihzuala chu kalchhuah inpeih atin a lo awm reng tawh, tukin chu nidang zawng aiin ka tlai a, Hmangaihzuala a lo la awm ve pawh hi thilmak a ni. Nidang te chu nise, tun ang hunah a awm tawh ngai teuh lo. "I kal tawh ka lo ring a" ka tih chuan "kal tawh ila i tih vang em ni i lo thlen tlai" a lo ti ve thung, a hmelah engmah ka chhiar thiam lo.










"Traffic jam ah ka tang a" ka ti sep. Ka lam a rawn pan a, "hmu hmasa zet lo chein kalchhuah ka tum reng reng hleinem, i lo thleng tawh bawk a, ka va kal tawh ang" tiin ka chalah a fawp zeuh. Hmangaihzuala'n ka chala a fawh tawh hi chuan ka thla hi a muang huai huai zel.









"Vawiinah Jarson hi ka lenchhuahpui thei ang em?" ka tih chuan min en zawk a, "I duh leh peih phawtte chuan" a lo ti ve mai. "Kan inah a nia" ka ṭawng zawih lutuk avang chuan a hria ang em tih pawh ka hre lo. A meng deuh awk a, "Aa..." a ti ban charh laiin "ka nuin hmuh ve a chak lutuk a" ka ti leh sep.










Ka hma ami chu a thaw suai suai a, "a tihbuai che chuan" a tih laiin "a fel tawh alawm, ka nu hian a chungchang ka sawi hian a lo lawm thei lutuk a, hmuh ve hrim hrim a chak a" ka lo ti a, a inthlahrung deuhin ka hria. Pathlawi fa nei tawh a nih avang hian thil engkimah a inringtawk vek thei lova, a fapa tel ven tawhnaah ngat phei hi chuan a inring tawk lo hle tih ka hria. Chuan hetianga awm lo tur hian ka duh bawk.










Keimah zawkin dingdihlip deuhin a hmuiah ka fawp zeuh a, ka fawp hmasa chuan a ṭhawng ve deuh anih ka ring. "Ka nu te chuan an lawm dawn lutuk, i sawi ṭhin kha, a nu tak ka nih hunah chuan ka nu te pawh a pi tur an ni dawn a" ka tih chuan hahdam tih hriat tak hian a rawn thawlum ham ham. Ka hmuiah a fawp a, "ka lawm e" a ti sup.










Hmangaihzuala hnaa a kal hnu aṭanga reilote hnu chuan Jarson chu ka siam a, kan in lama kan kal tur thu ka sawi chuan a phur khawp mai. "Yes, ka granma leh granpa ka hmu dawn" a ti reuh a, "tinge a pi leh pu i tih zawk lova" ka tih chuan "api leh apu chu an sual. An ina apa tel lova min hruai daih an tum a" a ti ve reuh, ami chhanna avang chuan ka en reng, Lenny nu leh pa a sawina anih ka ring.










Jarson ka siam fel hnuin Ann-i bulah chuan "Ann, ka lenrepui dawn bawk sia, nangmah chauha lo awm chu a hrehawm ang, duh leh i haw mai dawn nia, zanriah chu ka haw hunah keimahin ka lo bawlsak mai ang" ka ti a, Ann-i chuan bu nghat pahin "Imm, anih chuan tihtur zualpui ka tih zawhah ka haw ang. Kan awm ho zing tawh sia, in thawm hriat loh hlek chuan khua a har hman tawh ṭhin." a lo ti ve a.









"Enteh, i lo kal hnu aṭanga pu Hmangaiha inthlak nasatzia hi, a nui hmel ka hmu ve ta fo mai bawk, a nunah eng i rawn ken luhsak ni berin ka hria" a tih chuan "ti awm lo reuh e, a nuna rawng awm sa a rawn vul zual vang mai mai alawm" ka ti ve nghal a, "Ai, i lo inlan hma leh i lo inlan hnu chu dang tak hi a ni ringawt. A tirte chuan hrawn kha a hahthlak reuh lutuk, ka lo ṭawng duh ve sia, ani lah a ni hmuk mai a, a nuam lo thei rap.










Tunah chuan a hmaa ṭawng thei lo emaw ka tih dawn hial mipa kha a ṭawng ve tawh mial a, chuan maw,,, a melh dan mawlh che hi, a duh hmel thei che e, i thikawmzia i hre miah lovang, pu Hmangaiha kher hi chu hetiang lam, inngaihzawnna kawnga inhamna a neih lai ka hre ngai lova, tun in thlenchin ringawt pawh hi a ropui zawk, hmeichhia a hre lo emaw ka ti hman alawm" a tih chuan thinlung pam a nui var var tawh.










"A, ka ṭawng hnem mah mah zel, in kal duh tawh ang, chahbi pakhat hi ka kawl ang a, a dang hi nangman lo kawl mai rawh aw, kan haw hun a inrual dawn si lova" tiin chahbi spare chu min pe a, kei leh Jarson pawh chu kan chhuak ve nghal a.










Kan in kan thlen chuan ka nu leh pa chiah an awm tawh a, ka nau ten school an kal a, ka u hnaah a kal bawk. Ka pa pawh sitting room-ah a ṭhuchhuak ve a, Jarson'an ka nu leh pa a hmuh chuan a lai ve hle. Ka nu chuan "Bawiha ka lo pawm ang che, i pi bulah hian lo kal rawh" a ti a, lai tak chung chuan ka nu bulah chuan a va kal a.










Kan awm rei deuh hnu chuan a tlangnel ve ta viau, ka nu leh pa chuan an chhaih deuh reng a, nuam a tih hmel khawp mai "ka granma, nimin khan apa nen kan lo kal a, mahse, in lo mu daih a, Jarson kha min hmu ve lova" a tih chuan ka nu leh pain an lawm hmel khawp mai. "in lo kal tih kan hre lova, engmah kan hriat loh vang anih chu, i lo kal tih kan hriat hunah chuan kawngka bulah kan lo ding tawh ang, nangmah hmuak tur che in" ka pa zawk chuan a ti a, Jarson chuan nuam a tih hmel lutuk.









"Min lo hmuak dawn maw, Yess" a ti deuh chul a, ka nu zawkin "imm, kan lo hmuak ang che aw" a ti a, Jarson pawh a bu nghat nghat. Kei chu ṭhutthleng dangah ka ṭhu a, an pathum chuan ka en reng hlawm. U Mimi pawh awm ve ngat se, Jarson hi a haw rei thei lo tawp ang. A ngaina viauin ka ring zawk.









"Granpa, i dam lo ami? I dam ,ep tawh em?" Jarson chuan ka pa en chung chuan a zawt a "i lo kal a, ka dam tawh lutuk alawm" tiin ka pa chuan a nuih, "Engtin nge ka dam lo tih te i hriat a" a tih leh chuan "Ama khan i dam lo atia" tiin min lo en a ka nu leh pa chu an meng phawk nasa mai. A nu angin min ko ṭhin tih ka la hrilh lo tak.










"Nu ka hrilh theinghilh daih che u" tiin ka melh dun a, Jarson chu ka lama auin ka phone a games ka khelhtir a, chutih lai chuan zawi deuh tak, mahse, ka nu leh pain an hriat theih ngei tur chuan Jarson'an anu anga min koh ngawt chhante chu fiah leh chipchiar takin ka hrilh a, ka sawi zawh meuh chuan ka nu leh pa chuan Jarson chu lainat hmel tak hian an en a, kei pawhin he naupang hi ka hmuh tirh kha chuan ka lainat ve hle anih kha.









Ka nu leh paten Jarson an ngaina ve chu ka lawm em em ringawt. Jarson chuan a tirin 'Grandma, Granpa' ti mahse, a rei deuh hnu chuan 'Pipi, Pupu' a ti ta zawk a, ka nu leh pain an lawm hle a, ani pawhin an lawm tih a hre ve hle a ni ang, nuam a ti lutuk. A changin ka nu hnaih chetah ṭhu a, a changin ka pa a ti ti pui ve malh malh zel.










Kan haw meuh chuan dar hnih leh a chanve a hnai ruak tawh. In kan thlen phei chuan dar thum a hnaih ruak tawh ka ring. Motor-a kan chuan laiin Jarson chu a muhil der a, chhun lamah a harh bawk a, a chau ve hle anih ka ring. Ka awmah beiin hahdam tih hriat zet hian a thaw sak sak a, a chalah ka fawh sak zeuh.









In kan thlen chuan ka chet sawk sawk a ngai ngei ang. A vanneih thlak a, Jarson a muhil hlauh, ni lo se chuan zanriah bawl nen, ani buaipui ngai bawk nen, ka bawl zo hman kher lo maithei. In kawta taxi a din chuan ka chhuk a, chuan man ka pek zawhin in lam ka pan nghal, kawngka hawn ka huhphurh ngei mai, Jarson ka pawmlai a mut vang a ni deuh ber.











Gate inhawng sa ka hmuh chuan mak ka ti reuh hle. Hmangaihzuala lo haw hun lah a la ni si lo. Ngaihtha lo zetin in lam chu ka pan a, kawngka bul ka thlen chuan Hmangaihzuala aw ka hria, ka thaw huai mai. Mahse, ka luh hmaa hmeichhe aw ka hriat avangin ka ding deuh chawt.










"Engtikah nge Apuii nen chuan in inneih ang?" aw chu Rinfeli aw a ni. Ka thla a muang huai. Hmeichhe dang aw chu ni se, tunah hian ka hlauthawng ngawtin ka ring. Lut mai lo chuan ka la ding rih. Ka awm loh laia ka chanchin a sawi dan ka hriat duh vang a ni ber.










"A rang lama neih ngei ka duh. Nawr lutuk anga lan ka duh lo. Mahse, ka neih thuai thuai a ngai, anih loh chuan ka fapa hi ka chan theihna chance a sang tawh lutuk, chuvang chuan a rang lama neih ka duh" a tih chuan ka nghing lawih mai. Ka rin loh lam daih a ni a sawi ni. A sawi kha ka hresual emaw ka ti hial zawk. Hmangaihzuala hian a fapa chan a hlauh avangin min hmaih em ni?











"Nei thuai thuai rawh, Jarson chan hi ka duh lo ania, api leh pute lah hian eng eng emaw finfiahna hi an dap kual a" Rinfeli'n a tih lai mekin "ka hria alawm, chuvang renga Apuii hi neih vat tum ka ni. Ka fapa ka chan dawn ai chuan min nei turin ka nawr ve deuh tawh mai ang. Anu pawhin tuna ka thiltih avang hi chuan min dem ka ring bik lo." a tih leh ngat phei chuan ka pawn lai Jarson chu ka thlauh/Thloh (khawngaihin comment lamah a dik zawk min lo hrilh ru aw) lo chauh tawh.











Hmangaihzuala hian min lo hmangaih ve ngai miah lo tihna maw? Engkim kha lemchan vek! A tak vek emaw tiin ka hlimpui em em a, mahse, khang a chetzia te, engkim kha a lem vek maw? A fa chan a duh loh avangin min hnaih a, min hmangaih angin lem a chang a, a takah erawh chuan a nupui hlui Lenny kha a la hmangaih hle.









Min neih duh thu a sawi laite khan min thlakthlelh avang leh ka bula awm a duh vang emaw ka ti a, mahse, a fapa chan hlauh avanga sawi lek a ni si. Hmeichhe â lutuk, duh hun huna bum theih lek ka lo ni anih dawn hi. Min hmangaih angin a insawi a, mahse, a nunah chuan mi pahnih chiah an awm, a fapa leh a nupui hlui. Kei chuan chhete mahin pawimawhna ka nei ve lo. Ni leh lo, a fapa a chan loh nana mi pawimawh tak angah chiah Hmangaihzuala hian min ngai.









Tinge ka thinlung hi infiam nana min hmansak kher. A tir a,ang khan lem chang vel lo khan thudik hrilhin a fapa chan a hlauh avangin ṭha takin amah pui turin min sawm ve mai thei lo em ni? Hetia min bum kual a, min hmangaih anga lem a chan kher hi a ngai em ni?









"Hmangaihzual, i va nunrawng ve, infiam nan mai mai maw min lo hman, i infiamna tlak pawh ka nih loh hi" tiin ka biangah mittui a luang thla pap. Ka tawn ang tawng vetu bakin ka tawrhna hi an hrethiam lovang.











Han inchan chhin teh, mi tu emaw duh leh vei ngawih ngawih i nei a, mahse, chu mi chu suangtuahnaah takngial pawh i ta nihtir i ngam ngai lo. I phu lo tih i hrechiang, i chan ngai loh tur a ni tih i hria. Mahse, chuti chung chuan i thlah thei lova, hmalam i pansan thei hek lo.









Chu mihring, suangtuahna ram aṭang takngial pawha suangtuahn i dinpui ngam loh ngei mai chuan a duh thu a hrilh che a, chu thil tluka lawmawm leh hlimawn chu i tawng tawh hauh lovang tiraw? Nikhua a rei hnuin i mi duh em em, i suangtuahna, duhthusam ram thlentirtu chuan a bum che tih i hrechhuak a, i na ang tiraw? Aw, i na dawn lutuk, chu chu a ni tuna ka dinhmun chu.









Ka na tih hian ka natzia a sawifiah zo lova, ka thin a rim hauh lo. Hmangaihzuala hian ka nunah hlimna tam tak min pe a, eng ang chiaha nasa nge tih amah ngei pawh hian a hre lovang. Tuna ka chunga a thiltih ka hriat hnu hian ka na tih chauh lo chu engmah sawi theih ka nei lo.