PATHLAWIA (NEVER LET YOU GO) Chapter 1-10

[Te-i Mrs Ambrose]

Pathlawia (Never let you go)
By; Te-i Mrs Ambrose





Chapter 1






Kan ṭhian thum chuan dawr aṭang kan chhuak a, Lalno-i berin "Secondhand ka thing duh" a ti tlat sia, hei tunah kan thing zo thei hram a, ka chau hnawk mai. Lalno-i berin a duh a sawi tawh hi chuan kan ti lo ngam ngai lo, min kheuh seuh seuh reng a, a duh zawng kan tihpui hma chu min tur reng peih. Kan awm tinuam lo rawk khawpin a sawi peih bawk.







Dawr kan kalpel hnu feah Lalno-i chuan "Imm, ka kim leh ta biang mai, secondhand ka thing chak fahran a" a ti a, "Mizo ṭawng hmang dik ṭhin rawh, fahran i hmanna hi a dik lo thei emai" ka tih chuan min en a, "Sorry, mahse, a nuam laklawh a" a rawn ti a, ka bula ding Mami'n "a dik lo hman ṭhan chuan kan ngai neih tlat zel alawm, chuvang chuan hman dik loh chuan tihdik thuai thuai hi a ṭha ber, kan hnam ṭawng hi kan ti da zo takngial dawn" a rawn ti ve a, "Nia, a ṭhenin a dik lo a hman kan inkawhhmuh emaw tih tur khawpin kan ṭawng hi kan hmang dik lo lui tawh a" ka ti ve leh a.







Lalno-i chuan "Mm.. hman dik hram hram ka lo tum tawh ang, chuan nichina ka sawi kha, secondhand thin chakna rau khan min pawl a, keimah kha ka kim lo buang mai a, ruh nei ve tho a, thling nei lo ang kha ka nia, tunah chuan ka kim leh biang tawh" thawveng zetin a ti a, Mami nen kan in en a, kan nui tawp.








Kan ṭhian thum chuan Bus stand-ah kan ding a, kan hma lam ka thlir phei a, dawr chhung azanga lo chhuak mipa ka hmuh rual chuan ka lungphu a pangai leh ta miah lo. Ani saw ka duh chiang alawm, mahse, ka duh a thiang lo, ani saw chu chung lamin ka hnaih leh ka ta ni tura a siam a ni lo.







A fapa a pawm a, kan awmna lam chu a rawn hawi a, min melh chat chuan ka zam lutuk avangin ka bula ding Mami kut chu ka hmer vak a, kan kar hla viau mah se a mitmeng erawh ka chhiar thei lawi a, mak ka inti zawk.








A mitmeng hlauhawm tak phena lunglenna kha engtin nge ka hmuh theih ka hrethiam lo. Chutia khaw dang pawh melh lo va kan inen dun reng lai chuan bus a lo thleng a, kan ṭhian thum chuan kan lut a, ani kha hmu tawh lo mah ila, ka mitthlaah erawh a la lang chiang hle thung.








Engtin nge kan in ka thlen tih pawh ka hre mumal lo. Ani kha ka hmuh tawh chuan ka danglam nghal vek zel a, ka awmdan a thunun thei emaw ni chu aw tih tur khawpin ani kha ka hmuh tawh chuan ka danglam nghal vek zel.








Ngaihtuahna chuan kum thum liam ta kha a chhui let a, mipa ka hmuh tawh a zawnga ka lungphu tirang hmasa ber tu ka tawn kum kha a ni. Vawiina ka hmuh ang tho khan dawr aṭanga a lo chhuak lai ka hmu anih kha, a mitmeng dum fiah tak khan hlauhna ai mah chuan duhna min neihtir zawk a, ka en reng lai chuan a bulah hmeichhe hmelṭha zet naute pawm a lo kal a, a en dan aṭang chuan mi â ber pawhin a hmangaih ngawih ngawih a ni tih an hre ngei ang. Ka mipa duh hmasak chu mi pa a lo ni reng anih chu! Kan inkarah khan engmah a awm lo, min hre ngai lova, kei pawhin ka hmu thar hlim hlawl bawk, mahse, nupui nei lai a ni tih ka hriat khan ka na em em anih kha.








Midang chuan an duh an neih theih nan hun ṭha pek an ni ṭhin, a hmang thiamin an duh an neih phah ṭhin a, hun hmang thiam lo erawhin an thil duh chu an chan hlen ṭhin thung. Kei erawh ka duh ka neih theih nan eng hun ṭha mah pek ka ni ve lo. Ani avang khan 'tawntirh hmangaihna' an sawi ṭhin kha a dik a ni tih ka hriat phah a, mahse, kha ka duhna leh hmangaihna kawng kha kaltlangpui thiang lo, theinghilh ngai a ni nghal a. Amah Hmangaihzuala avang khan ka thil neih hlu tak chan ang maiin ka inhria anih kha.







Hmangaihzuala kha chu ka chan ngai loh tur mipa a ni a, ka tihtheih awmchhun chu a hriat loha a ruka lo vei mai kha a ni. Ka vei zia hrilh a rem lova, ka ta ni tura ka suangtuahna ringawt pawh thil thiang lo, siamtu kalh zawng a ni. Mahse, he ka suangtuahna hian thil thiang lo leh kalh tlat a nihna bang chu chhuchhiain suangtuahnaah tal tiin inthiam lo tak chungin ka ta ka nihtir ṭhin.







Ka hming chu Rochhingpuii a ni a, unau pali kan ni a, kei hi a upa lam pahnihna ka ni. Pathian zarah ka nu leh pate'n min la dampui ve ve a, kei chuan dawr ka nei a, ka naute pahnih erawh zirlai an ni a, kan upa ber Mimii hi Nurse a ni.







Hmangaihzuala ka hmuh aṭang khan kar a ral ve lek lek tawh a, ngaihtuah chhuah leh chang chu nei zeuh zeuh mah ila, a hma ang em erawh kha chuan ka ngaihtuah tam tawh lo. Dawr lama buai nen, Di ngaih lunglen tih vel chu ka nei hman meuh lo.







Dawr bungraw lo thleng thar ka rem fel mek laiin hnung lam aṭang "Chhingpui" ti a min lo kotu an awm avangin ka lehhawi a, ka mi hmuh chu ka awi thei lo, Daniel a ni, ka thiltih lai chu ka dah a, ka va kuah nghal a, ani hi kum hnih dawn lai ka hmu tawh lo. Ka mipa ṭhian neih hmasak ber a ni a, ka tan a awm reng ṭhin, Daniel hi ka tan chuan a hlu takzet.








Kan inthlah fel hnu chuan sawi tur kan hre lo ve ve a, kan khi dun deuh reng mai. Lalno-i a lo lang ve a "in inngai der si, eng emaw tal sawi ve ta che u" tiin ka bungraw rem ka chawlhsan tak chu a rawn rem chhunzawm a. Ka sawihmaih, Lalno-i hi ka dawrah hian a thawk mek a ni.







Daniel chuan "ngaihzawng te hi i nei ve tawh em?" min thlek vang vang hnuah a rawn ti a, a darah ka beng vak a, "ka tawng lo anih hi" ka tih chuan min nuih a, "Mangang suh, kei pawhin ka la hmu lo aw, ka hmuh hma chu hmu lo pawh ni la, a pawi miah lo" a rawn ti a, amah bawk chuan "chu lovah i chhe ve reuh sia, i hmu lo pawh hi a awm e, ka peih hunah ka bem ang che a, ngaihzawng kan nei rual dawn nia" a rawn ti a, ka chum ṭawlh mai.








"Rochhingpui, khatin mi chum ṭawlh ṭawlh reng suh, ka pil bo san leh hmak mai ang che, min ngai leh dawn teh mai ania" a rawn ti a, tun kan inhmu leh hi a ṭawngthei ka ti thar viau bawk. "Niel, ei sual i nei em ni? I va tawngthei sawt ve" ka tih chuan a khi hui a, midang hmaa puitling viau si kha ka bulah chuan a puitling thei hlawl lo.








"Nei deuh a ni ang, kei pawhin ka kam hi a kal ka ti lutuks" a rawn ti a, Lalno-i a rawn nui hak a, "Lutuks maw?" a rawn ti a, Daniel chuan "Ni e, Lutuks hi a nalh ka ti lutuks" a rawn ti leh a, kei ka dinna aṭang ka ner ka ner mai, chutah Lalno-i chuan "awi, ka nuih a zas" tih pahin a nui a, S a telh ve kher lehnghal.








He mite pahnih hi an inkawm tam a him lo tawp ang. an inkawm tam zawngin a chi loh, an â dun dawn leu luau lutuk. "No-i kha i ni tiraw?" Daniel chuan pangai takin a hnuah a rawn ti a, Lalno-i'n "Ni chiang e, min hre tawh lo emaw ka ti hman tawh a" a tih chuan Daniel-a'n min melh zeuh pahin "kei chuan Chhingpuii hi ka hre ber zel, ka besty hi ka hre ber" a rawn ti a, min nuih vur vur zui.








"Nia, i ṭhianṭha ber hi min ngaisang ve chiang alawm" ka tih chuan lu bu nghatin "Imm,, ka idol hmuhchhuah thar i ni" a rawn ti a, ka nui ve tawp. An hotel chungchang vel chu ka zawt a, an tluan lai tak anih thu te a sawi ve luam a, ka bulah chuan han naupang chhia viau thin mah se, hna lam anih tawh chuan a puitling thei hle a, a hna a tlin hle bawk









Chhun chawlh a hun tawh tho avangin ei tur ka chah a, kan pathum chuan kan ei ho a, a ei zo hmasa berah ka ṭang leh tawh, ka phone ka phawrh a, ka bih lai mekin kawngka inhawng ri ka hria a, customer kan nei anih hmel e, ka hawichhuak a, lo lut mek ka hmuh chuan ka khawng lo chauh, ka lungphu a rawn rang a, ka aikaih thei mai dawn in ka hria. Ka lung chuan sawt chhuah a tum ta emaw tih mai theih tur khawpin a phu nasa a, thawk ka'n la hrawih a.









Hmangaihzuala te pafa lo lut chuan min rawn hmu ve nghal a, engtikin nge ka din tih reng reng ka hre lo. An lam chu ka pan a, Hmangaihzuala pawm lai a fapa chu a pa pawmna atangin a chhukthla a, kum li bawr vel a ni tawh ngei ang, a pa a chhun hle a, a hmel a ṭha hle. Hmangaihzuala fapa chu ka lamah a rawn tlan ter ter a, min lo kuah nghal tawp a, a ngaihna ka hre lo hle, a ngaihna ka hriat lohna rawn belhchhah turin Hmangaihzuala fapa chuan "Ama" min rawn ti a, a ngaihna ka hriat loh lutuk avang chuan ka ṭap lo chauh.








Min kuah mektu chu ka'n en a, a men deuh par a, a mitmengah chuan min ngaihna ka hmuhsak a, ka khawngaih lutuk. Ka pawm kang a, "Bawiha tunge i hming?" ka tih chuan a mittui a rawn luang a, ka en reng ringawt, ka bulah Hmangaihzuala chu a rawn kal a, a perfume hman rim pa zet chu ka hip lut hmasa ber.








Ka bula a lo din meuh chuan boruak a uap churh a, a huhang chu na tak a ni. Ka bulah a rawn din chiah hian a palenzia ka hriat belh a , inlenhleih tak kan ni.








Ka pawm meka chuan "Ama ka hming i hre tawh lo mi?" a rawn ti a, a mitmengah chuan natna ka hmuhsakin ka hria. "Tihpalh a ni kha, Jarson hian a nu emaw a tih vang che anih kha, i lo hrethiam dawn nia" Hmangaihzuala chuan a rawn ti a, a fapa chu lak mai a tum a, mahse Jarson chuan apa pawm a duh lo tih hriat zetin ka ngawngah a kut te ve tak chu a rawn suih zawm a, a hmai pawh a phum nghal hmak bawk.








Hmangaihzuala chuan zawi si, mahse chang si hian "Jarson" a rawn ti leh a, "ka pu, a pawi lo, dawra in awm chhung chu ka lo pawm mai ang" ka ti ta ringawt a, ka bula ding mek lah chuan " 'ka pu' ni lovin Hmangaihzuala " a rawn ti bung deuh nghut a.








An thil lei duh an en chhung chu ka zui dat dat mai, Jarson lah chuan a khat tawkin 'Ama' min ti reng a, thil ho deuh deuh min hrilh seuh seuh reng a, a hma ang khan tap pur hmel a pu tawh lova, a hmel a hlim sarh mai a a lawmawmin a fel takzet.








Dawr aṭanga chhuah an tum chuan Hmangaihzuala chuan Jarson chu pawm a tum a , mahse, Jarson-a'n a duh leh ta tlat lova, apa'n a tihluih ngial pawhin "Ama bulah ka awm duh tawh" a ti zel a, a nuam lo duh khawp mai, a fapa in min ngaih hmel bawk si, apa lah a thinrim a insum tih a hriat bawk si, nuam lo duh tak a ni. Pawnah chuan kan in zuichhuak hlawm a.









"Bawiha hna ka thawh lawk a ngai a, tlaiah ka lo haw ang aw, tunah chuan ka buai rih lutuk a, papa bulah kal phawt la, tlaiah ka rawn haw dawn nia aw" ka tih chuan fiah zet hian "Did you promise?" a rawn ti a, ka kal dawn lo tih chu ka chiang nasa mai a, mahse, a kal duhna tur anih avangin "Promise" ka ti a, a pa bulah chuan thuawi takin a kal a, Hmangaihzuala chuan Jarson chu car lam a panpui a, hmeichhe pakhat hian a lo la vat a, tunge a nih ka hre mai lo. A nupui kha chu a ni lo tih erawh ka chiang thung.








Hmangaihzuala chu a rawn let leh a, amah chauhva ka bula a din takah chuan a hma zawng ai khan a huhang a nâ a, Jarson ka pawm lai kha chuan ka pangai thei mai a, mahse, tunah chuan ka pangai thei hauh lo.









"Ka fapa reilote chhung atan pawha hlimna i lo thlen avang leh i buaipui avangin ka lawm e" a rawn ti a, "Ihh...ihh..engmah a nih loh kha" bah deuh naka ka tih chuan a vei nuih suk a "ka thil tihtur avang hian i mi hriatthiamna ka dil e" tih leh rawn kun paha ka chal fawh a rual a. Ka lungphu chu a rawn thlawkchhuak mai dawnin ka hria. Tuna thil thleng mek hi a tak nge mumang ram tih pawh ka thliar hrang thiam meuh lo. Car lam aṭanga kut beng ri ka hria a, Hmangaihzuala chuan din ngil pahin "Jarson-a'n min phut miau a, min hrethiam dawn nia, a thleng dawn tawh lovang" tih leh min hnungchhawn a rual a.









Car lam pan chuan a pen vuk vuk a, Jarson chuan min lo bye lauh lauh a, ka bye let ve a, nuih chu ka tum, mahse, ka nui ta em tih erawh ka hre lo. Hmangaihzuala chu car-a a luh dawn chuan a rawn hawilet a, mitmeng hriatthiam harsa zet hian min melh a, mahse, a hnu lawkah car-ah chuan a ṭhu lut a, an tlan liam hnu thleng pawh chuan che chang lovin ka ding reng.









Hmangaihzuala tan chuan a thiltih kha a ho viau pawh a ni thei a, keia tan erawh chuan theinghilh tawh loh tur thil a ni.








Hmangaihzuala kha a nupui nen an inṭhen em ni? Nge.. a.. engmah ka hrethiam lo. Car-ah hmeichhe dang a phur a, kei ka chalah min fawh sak thung a. A chungchang engmah hriat ka nei lo, ani khan a nupui chu a phatsan em ni? A fapa Jarson-a'n a nu ka ni emaw a ti ringawt a, an pafa avang chuan ka ngaihtuahna a kalthuiin ka ngaihtuahna an tibuai nak mai.








Dawra ka va luh leh chuan Daniel chuan mak tih hmel zet hian min melh reng a, Lalno-i erawh chuan nuihza hmel min hmuh thung "Nu lo ni ta ngawt te kan awm a" Lalno-i'n a tih chuan ka melh no lem lo khawp mai. Daniel-a mita mak tihna erawh a reh thei meuh lo. A hriat achinah mipa ka la ngaihven ngai lova, vawiina thil thleng khan a ṭhawng hle a ni ngei ang, amah Daniel-a'n min hriat dan nen ngaihtuah chuan mak a ti pawh hi a awm viau e.









Lalno-i bawk chuan "Eh...pathlawi maw i lo ngaihzawn a, a zei si, a chhe lovin a hot tel em em zui, engtikin nge in lo inzui hman a, i inzep thei hle mai" a rawn ti a, "I ngaihtuahna anih chu, ani nen khan kan in ngaizawng lo" ka ti deuh hmak. Lalno-i bawk chuan "hmm..inneih in tum hnai tih ka hre mai e, a fapa pawn 'Ama' a tih danah che in inzui rei thawkhat tawh tih a hriat" a rawn ti leh a.









"Thil hriatsual palh a awm anih kha, Jarson khan a nu emaw min ti tlat a" ka tih chuan nui ruh ruh chungin Lalno-i bawkin "anih pawna chal lo infawh vel kha" a tih leh chuan sawi tur pawh ka hre tawh lo.








"Engtin daih nge Hmangaihzuala nen an inkawp hman a" Daniel-a chuan mak a ti tih la hriat zet chuan min zawt a, "Amak, Daniel nang lehzel chuan kan inngaizawng lo tih hrethiam ve ta che" ka ti hluai mai, han sawi vak tur pawh ka hre tawh lo. "Engtin nge Hmangaihzuala chu i lo hriat zawk a?" tia ka zawh chuan "Tuna Mizorama hotel changtlung ber neitu hi Hmangaihzuala alawm, a hmaa hotel changtlung ber lo ni ṭhin 'Bryan hotel' neitu nen hian an iner reng ṭhin a, kum hnih chhung ngawt ram danga a awm hnuah a lo let leh a, a elpui ber ṭhin Bryan hotel a rawn khum nghal zat a, keini hotel lama business lo run ve tu tan chuan hriat loh ngaihna a awm lo" a ti a.









"Tinge Bryan hotel nen chuan an iner a?" tia Lalno-i'n a zawh chuan "Amak mang e aw, I hre lo mai sia, Hmangaihzuala nupui boral ta Lenny leh Bryan hi an inkawp niin an sawi a, chuta ṭang chuan hotel neitute pahnih hi an iner em em tawh alawm" Daniel chuan a ti leh mai a.









"Hmangaihzuala nupui chu a boral maw!" mak ka tihna chu ka thup thei ngang lo a ni. Hmangaihzuala chu a nupuiin a boral san tih ka hre lova, chuan a nupui chuan Hmangaihzuala, ka chan phak loh, vana rah anga ka ngaih kha a phatsan a maw!! Engtin nge a phatsan phal mai zawk le?? Ka thil hriat ina min thawn dan chu pui tak a ni ringawt.









"Boral tawh e , nikum hmasa khan a boral tawh alawm, a boral hnu lawkah Hmangaihzuala te pafa kha ram dangah an awm nghal alawm. Aaa.... mipa ve si hi kamdak deuh ka ang dawn tlat, engmah min zawt tawh suh u" tiin Daniel chuan a kut a kuangkuah than a, "Hmm,, kan hriat duh chin chu i sawi vek tawh tho sia" tih leh kut kuangkuah ve chu Lalno-i chuan a rual a.








Kei erawh ka la pangai mai lo, a awmzia chu ka mipa duh nei ve thei turin hun ṭha ka nei ve dawn tihna a ni mai ang em? "Chhingpui, ṭhu teh, ṭhu teh. Tih phuthlim âng mai, i meng phawk hru ringawt a, rawn ṭhu rawh" tih leh min pawh ṭhut a rual a "in inngaizawng lo tak tak maw? I meng phawk reuh sia, thudik i sawi em ni? In inngaizawng miah lo maw? " Lalno-i chuan a ti a, "Aw, aw kan inngaizawng lo..." tiin ka thluk duai a, Daniel nen an ṭhen ṭhaw ringawt.








"In la inngaizawn thuai dawn chu, in inhmeh emai a fapa lah khan 'Ama' a la ti zui che a, in la innei thutin ka ring" Lalno-i bawk chuan phur zetin a ti leh a, kei erawh ka thaw halh ringawt. Beiseina ka insiam thlawn mai mak ka hlau a ni. Nichina thil thleng kha ka mang lam pawha ka man ngam loh a ni. Nichina thil thleng avang khan beiseina thar ka nei phah a, mahse ka beiseina chuan beidawnna ruama min hnuk ka hlau a ni.









Daniel-a haw hnu chuan bungraw dang chu ka rem leh a, Hmangaihzuala ngaihtuah reng ka duh lo vanga rem ka ni pakhat. Dawra customer an lo lut ve zut a, Hmangaihzuala ka ngaihtuahna tur min dal a, chau ve deuh mah ila, ka lawm letling viau thung.









Dar thum bawr velah Mami a lo lang hlawl a, min hmuh rualin "Lalno-i thlalak min lo thawn kha eng nge a awmzia?" a rawn ti a, "eng thlalak maw?" ka lo ti hu. A phone a phawrh a, a hmet nuap nuap a, ka hmaa a phone chu a rawn lek a, ka en chuan keimah leh Hmangaihzuala thlalak a ni a, keiin Jarson ka pawm bawk, Lalno-i chuan engtikin nge a lo lak hman ni?









"Hei hi Hmangaihzuala leh a fapa an ni lawm ni?" a rawn ti a, lu ka bu nghat. "Eng nge in awmzia?" a rawn tih chuan "aa, Jarson-a'n a nu emaw min ti tlat a" ka ti a, min la en reng danah ka chhana kha a duh khawp lo tih ka hre mai. Thil thlendan chu a tir te aṭangin ka hrilh a, a rawn thaw deuh hak a.









"Engtin chiah nge i awm?" a rawn ti leh a, ka thaw deuh hak tawh thung, "ka hrethiam lo, beiseina thar ka neih phah a, mahse, ka beisei thlawn ka hlau" ka ti a, Mami chuan min en deuh vang vang a, "Hun her hian i tan hunṭha lo herchhuahpui se ka ti takzet" tiin ka kut a rawn hum a, ani hi chuan Hmangaihzuala ka duhzia engkim a hre vek. Lalno-i hi chu kan thian thum bik rau rauah a naupang ber a, amah a naupang chhia tel kher nen thil engkim ka hrilh lo, chutia ka tih avang erawhin amah ka en hrang bik tihna a ni lova, thurawn ka lak theihna tur zawk Mami hnenah thil ka thlen hmasa a, a hnuah Lalno-i pawh ka hrilh ve leh ṭhin.









"Amak e, engtin nge Jarson pawh chuan anu anga a ngaih theih che le!" min bia pawh ni lovin amah a inbia a ang zawk mah, a awm ve tho e, Jarson-a'n mi tamtak zingah kei ber kher a nu anga min ngai tlat pawh kha thil mak a ni.









Mami chu darkar chanve dawn a awm hnuin min hawsan a, Lalno-i lo kal chu ka melh ralh a, engmah hre lo ang hmak chuan a awm a, "Engtikin nge thla kha i lak hman a?" ka tih chuan "Ka hre tawh lo, ka la ṭeuh mai, min shock em a, Mami kha a ṭhawn ve thuah tiin ka thawn ve a" a ti a, engtia han in tih chi vak lah a ni si lova. "Imm,, a ṭhawn khawp kha" ka ti a, a nui heu a, thildang min tihsan leh nghal a.









Chhun lama thil thleng kha ka ngaihtuah let a, a hun lai kha chuan ka zam em em ringawt a, tuna ka ngaihtuah let erawhin nuam ka ti, ka mipa veu ruk em em ṭhin bul chetah ka kal a, a bula ka kal chhung a rei lo, mahse, ka theinghilh leh tawhin ka ring lo.









Ngaihzawng pakhat mah ka la nei lova, ka mipa vei ve hmasak ber lah chu mi pa a ni bawk a, duh dang neih ka tum chhin ngai lova, ka thei lovang tih ka hrechiang hle bawk. Amaherawh chu, ka duh avang khan va hnaih ka tum ngai lo, an nupa inkar kha tihchhiat ka hlau hle ṭhin.










Mahse, vawiinah erawh ka mipa duh em em ṭhin kha mi pa a ni tawh lo tih ka hria a, beiseina ka nei thar a, mahse, beisei bo ka beisei erawh ka hlau a, beisei loh tum eng ang mah ila, ka beisei daih tawh a, chuvang chuan ka tihtheih chhun chu ka beiseina neih tawh hi beiseina thamral a chan mai loh nana ṭawngṭai a ni.









Dar li leh a chanve dawnah dawr ka khar a, midang chu an haw vek tawh, keimah ngeiin dawr hi ka khar thlap ṭhin, a ṭul viau chang erawhin Lalno-i ka khar tir ṭhin thung.








Pawna ka mi hmuhte avang chuan ka meng bial kawk mai, min ṭhawng takzet, Hmangaihzuala chu car nghengin a ding a, Jarson a pawm bawk, Jarson-a'n min hmuh chuan a pa pawmna aṭang a chhuk a, ka lamah a rawn tlan a, ka lo pawm kang ve mai, Jarson chuan ka sam khawih pahin "Ama, apa nen hian kan rawn hruai dawn che a" a ti a, ka meng phawk nghal hra mai, Hmangaihzuala chu ka va en a, za lo tih hriat lutuk chuan min nuih a, engmah sawi a tum hmel loh.










Rei ve fe ka din hnu chuan mipa aw thian kharh ri ka hria a, ka hawichhuah rualin Hmangaihzuala nen kan mit a intawng nghal chat a, ka mit chu la sawn rang tak ka ni. "Car-ah lo lut phawt la, tuna thil thleng ang hi a thlen nawn tawh loh nan ka lo khuahkhirh deuh ang" a ti nghut a, car lam chu kan pan a, ka luhna turin kawngka min hawnsak a, ka lut ve mai bawk.









Hmangaihzuala mitmeng khan min thunun ni maiin ka hria, mipa dang chu ni se ka zui dawn loh tehreng nen, dawr ka khar fel hian khawi dangah mah peng kawi lovin kan in lam ka pan nghal chat ṭhin, vawiinah erawh Hmangaihzuala avangin kan in lam pan ta lovin an in lam ka pan ve dawn ta chu ania! Amak a ni! Ani hian engtin nge heti khawpa min thunun theih ni. A bulah han awm hnem ila, ka chhia leh ṭha hriatna pawh ka hman mumal theih ka ring lo.









Jarson chuan ka awm a ngheng a, a mut a chhuah hmel viau bawk, "Ama" zawi deuh tak hian a ti a, ka chhang mai lo, Hmangaihzuala chuan car chu kalhualin driver seat-ah a rawn ṭhu a, Jarson bawk chuan "Ama" a ti leh a, "Mm,, i mut a chhuak tawh em ni?" ka ti ve ta nge nge a, lu a rawn bu nghat nghat a, "anih chuan muhil rawh aw, ka lo pawm tlat ang che" ka ti a, rawn dak chhoin min rawn en a, a rawn nui a, ka lo nuih let ve a, ka awm bawk chu ngheng lehin a mit a chhing nghal a.









Hmangaihzuala chuan car chu tinungin a tlanchhuak a, kan in be lo hrim hrim. Ka awm nghenga muhil mek Jarson chu ka en a, thlamuan hmel deuh hian a thaw sak sak a, a vawikhat min hmuhnaa min ngaina lutuk leh a nu ka ni emaw a ti tlat chu mak ka ti tawp thei lo. Kum hnih vel lek anih laiin a nuin a boral san a, nu a thlahlel hle tih ka hriat sak a, tunah a nu ka ni emaw a ti a, a hlim em em a, mahse, a nu ka ni lo a ni tih Jarson-a'n a hriat hunah engtin tak awm ang maw?









Car a din chuan ka hawichhuak a, in nalh leh ropui zet hmaah kan lo ding reng tawh. Hmangaihzuala chu a chhuk a, car rawn kalhualin kawngkhar chu a rawn hawng a, ka pawm lai Jarson chu rawn pawmin a dingngil nghal a, kei erawh a rawn kun laia kan inhnaih lutuk avang khan ka lungphu a rang dawt dawt thung.









"Lo ṭhu la, Jarson hi ka mut fel tir hnuah ka lo let ang" tiin min inhersan nghal a, a ṭawng bung nghut ṭhin leh a chezia avang chuan hawihawm lo ka ti thar thut, mahse, a chezia leh tawngkam chu ka duhna tipungtu peng khat a ni thung.









Minute sawmhnih hnu velah Hmangaihzuala chu a rawn let a, ka lo muthlu hman lehnghal, ka men meuh kha chuan ka bul driver seat-ah a lo ṭhu fel der tawh. "Ka rawn hruai ngawt avang che leh helama ka hruai ngawt avang chein ngaihdam ka dil e, Jarson-a'n hruai che a ti tlat a, ka lo hruai ta mai che anih kha, min hrethiam dawn nia" a ti a, engmah han sawi tur ka hre lo.









Amah Hmangaihzuala bawk chuan "Ka fapa hi min awmsak thei ang em?" a tih chuan ka meng phawk hra a "Maw!!" ka ti vak ringawt. A thusawi kha ka hresual a nih ka ring. "I hlawlh let hnih ka pe ang che" a rawn tih leh chuan a thusawi kha ka hresual lo a ni tih ka hre chiang chiah.










"Ka fapa hi min awmsak la, i duh chuan a mut hnuah i haw ṭhin mai ang a, anih loh pawhin i riak thlang thei a, i thu vek a ni, i duh chuan i hlawh let thum pawh ka pe ang che, ka duh ber chu ka fapa hlimna hi a ni, chuan ka fapa hlimna chu nang hi i ni bawk" a rawn ti leh a, engtia han chhan tur nge tih pawh ka hrethiam lo.










Tuna ka dawr neih hi dawrkai nih ka chak ṭhin em avanga neih piah lam pawh puka ka chhungte'n min hawn sak a ni a, kei pawhin nuam ka ti viau bawk, dawr hi khar a, thildang tihsan ka tum ngai lo. Mahse, tunah ka hmaah hnaih ka chak em em ṭhin mipa ka hnaih theihna kawng a rawn inhawng a, a thusawi kha ka pawm chuan a kiang, a bul hnaihah ka awm dawn a, mahse, ka dawr ka han ngaihtuah leh a, ka rilru a buai map mai, engtin nge ka tih ang?

[Te-i Mrs Ambrose]

Never Let You Go
By: Te-i Mrs Ambrose



Chapter 2








Rei fe ka inngaihtuah hnu chuan "Ih,, min hrethiam la, ka thei lo ni mai teh se" ka ti ringawt, Hmangaihzuala chu a thaw hrawih a, "Ka va thlah phawt ang che, i thuthluakna i sawhsawn duh chuan min lo be thei reng ania" tiin card pakhat hi min pe a, car chu tinungin a tlan nghal a.










A card min pek chu ka en a, a number a inziak a, Hmangaihzuala chuan "khawi lamah nge in awm?" a rawn ti a, kan in awmna chu ka hrilh a, a inkhalh chhuak nghal a, tim deuh dai hian "Jarson kha amahin em ni a awm?" ka ti a, a lo hawi zawk a, mahse, a hma lam bawk chu a en leh nghal a, "Ai, a awmpuitunu nen an awm" tiin min chhang a. Engmah kan sawi belh tawh lo.










Kan in zawnah tak Hmangaihzuala chu a ding a, a chhuk hmasaah a tang leh tawh! Ka thutna lam kawngkhar chu a rawn hawng a, ka chhuk thla ve nghal a, Hmangaihzuala chuan min en deuh vang vang a "I phone call dawn ngei ka lo inbeisei ang" tih leh car kalhuala driver seat lama luh a rual a, a tlanliam thleng ṭhak chuan ka en reng ringawt. A fapa awmpui tura min sawm khan ka hnar chiang viau lo emaw ni le? A duh chin zawng a sawi a, a sawi zawhin midang pawh ngaichang tawh lem lovin a kal nghal daih ringawt mai.










Îna ka luh chuan ka chhungte chuan chaw an lo ei mek tawh a, a mak ka ti hle, a chhan chu kapa hian chhungkuaa chaw ei khawm hram hram a duh ṭhin a, îna lo haw tlai deuh kan awm pawhin kan innghak hram hram ṭhin. Chhungkuaa chaw ei khawm hian kan inpawh zual sauh ṭhin niin ka pa hian a sawi ṭhin, dawhkan khat kil a, in khata cheng na nâ na chu kan inpawh bikin kei pawhin ka hre ṭhin.










"Min lo eisan daih elo?" ka tih chuan ka nuin "Call i chhang thei bawk si lova, hei i pa nen khawhar in lama in lan ve kan duh avangin kan eisan ta mai che. Insil hmasak i duh lem loh chuan lo ei ve nghal mai la, zan lam chu mitthi lumen turin i lo inlan ve ngei a ngai a nia, i lo lan hma chu ipa nen mitthi in lamah kan lo awm reng ang" a ti a, mitthi kan nei tih pawh ka lo hre ve hauh lo.










"Mitthi kan nei maw! Ka lo hre ve hauh lo" ka tih chuan "Zo-i fapa Muanzuala khan a natna a do hneh tawh ngang lova, tlai dar thum bawr vel khan 'a chat thla ta' an ti anih kha" tia ka nuin min lo chhanna avang chuan ka chek tlak tlak mai.










"Ka va insil thuai thuai ang a, ka lo zawm ve nghal ang che u" tih leh room lam pan ka rual a, U Muanzuala ka ngaihtuah chuan ka khawngaih hle, mi fel tak a ni a, tuna a boralpui tak a natna hi a kum a kum tel teh meuh a lo bei let ve tawh, mahse, vawiin niah erawh chuan a natna avangin a boral ta mai chu a ni sia, dam ṭhat a chakzia chu a hre lo fa kan awm mang lo. A niin dam a la thlakhlel em em laiin a natnain a ei awngrawp telh telh a, midang a la dam ṭha lai te erawhin an nun pawh thlahlel zo lovin hrualhrui an ban a, an nunna an chhat a, kan khawvel hi chu a mak ngawt mai.











Kan duh loh kan nei a, kan thil duh ngawih ngawih erawh kan nei thei leh lem si lo. Thil ṭha kan beisei a, thil ṭha lo in min lo hmuak thung ṭhin a, mi ṭhenkhatin an nun a thil ṭha an tawn zozai aiin thil ṭha lo an tawn chhun tlemte an hre zawk a, an beidawnpui a, an bula anmahni puih duhtu an hmu thiam lova, an mahni chauha khuarkhuruma awm angin an inngai a, an beidawn tawpah hruihrual an ban a, an nun an titawp mai ṭhin. Kan khawvel hi a lo mak anih hi!









Ka insil zawhin zanriah ka ei ve nghal a, ka nu leh kapa erawh an ei kham tawh thung. U Mimii chuan min rawn sik zeuhin "Rawn thlahtu che kha tunge? Nakinah engkim min hrilh vek ang che" a rawn ti sa sa a, ka bu zeuh, mahse, hrilh erawh ka phur lem lo. U Mimii hi chu a strict hle a. Ngaihzawng neih ve dawn pawhin a phalna hi lak thlap a ngai ang tih tur khawpin a strict. Mipa ler deuh phei hi chu "An Ori tawh lo, an secondhand tawh" a ti tlat zel a, tun thlengin ngaihzawng pawh a neih loh phah.










Chaw kan ei kham chuan u Mimii'n thleng a sil a, keiin hmun ka phiat bawk a, kan naute erawh zirlai an nih avangin kan awl thung. Hmun ka phiah zawhin ka pindan lamah ka lut a, ka insiam nghal.










Zan dangah chuan u Mimii nen kan kal ṭhin, mahse, zaninah erawh a hna lama a kal ngei ngei a ngaih avangin a lo kal ve dawn lo thung. Ka insiam mek laiin u Mimii chu a lo lut a, ka khumah ṭhuin ka insiam lai chu min en kar mai "rawn thlahtu che chu tu maw?" a tih chuan ka chil ka lem ri khawlh mai "Ih, Hmangaihzuala" ka tih chuan u Mimii chu a rawn meng phawk nasa mai. "Hmangaihzuala, Midnight Rose hotel neitupa kha maw?" a tih chuan ka bu zeuh.










"Engtin nge in inhriat a? Chuan tinge a lo thlah che? Nilo, tinge, eng vanga lo thlah ve ngawt che nge a nih? In lo inzui reng em ni? Engtik aṭang khan?" zawhna min zawt hnem lutuk, a eng ber nge ka chhan dawn pawh ka hre lo. "U, kan inngaizawng lo, thil hriatsual vang a ni. A fapa khan a nu ka ni emaw a ti tlat a, tlai lamah a fapa bawkin min hruai a tih tlat avangin min lo hruai a, chuan min lo thlah leh bawk a, chu zawng chu a nimai" ka tih chuan hmui a pet sawi a, a ke lehlam, a bawp chunga a hlan chu a chet hliau hliau a , hetia a awm tawh hi chuan ka thusawi a awi lo tihna.









"U, thudik alawm ka sawi, kan inkarah engmah a awm lo" ka ti hliai, "A ṭha anih chu, hnaih reng reng suh ang che, hmeichhia hi play kual vel mai mai atan bak a duh lo ania" u Mimii'n a tih chuan ka bu zeuh ringawt. U Mimii bawk chuan "A fapa pawh chuan eng vanga a nu emaw ti ringawt che nge anih le? Hmangaihzuala chuan sawi a nei em?" a tih chuan lu ka bu nghat a.









"A fapa awmpui turin min duh a, tuna kan dawr aṭanga ka lak luh a let hnih pawh min pek a inhuam thu a sawi a" ka tih chuan "engtin nge i chhan?" a lo ti leh vat, "ka hnar ta mai" tiin ka puan bih tur ka zawng nghal a, "imm,, a ṭha anih chu" tiin u Mimii chu a chhuak zui a.









Ka insiam zawh chuan mitthi in lam panin ka kal a, Mami ka call a, Mami nen hian veng khat kan ni a, kan in erawh a inhlat hle thung, call a pick rual chuan "Mam, zanin mitthi lumen i tum ve em?" ka ti nghal a, "Imm,, tum deuh e, mahse, ka rawn kal hma thei dawn lo thung a" tiin min rawn chhang a, "kei chu tunah ka kal mek tawh a" ka ti ve a, "Imm, lo kal hmat ka lo tum ang" a ti a, "Aw le" tiin phone call chu kan titawp a.










Lalno-i ka call ve thung a, "Yeap, ka rawn kal dawn" a lo ti nghal a, "Imm, ka thlen khalh dawn che" ka tih chuan a thaw vak ri ka hria, "hmm,, nge ni vak, kan intlansiak emaw, intihsiak pawh ni hlei lo" a rawn ti a, reilote kan inbiak hnuin call kan titawp a.










Mitthi in ka thlen chuan inchhung lamah ka lut nghal a, inchhunga ka mipa hmuh avang chuan ka ding deuh chawt. Mahse, a hnuah ka inthing harh a, ṭhalaite ṭhutna lamah chuan ka va thu ve a. Hmangaihzuala chuan min hmu ve ang pawhin a awm lo. Ka rawn luh tirh khan min hmu tih ka chiang hle, mahse, min hre lo der hmak thung.










Mite tal chu a hriat der ve ka ring a, mahse, vawikhat pawh mi a rawn melh chhin tawh eih lo. Hmangaihzuala mizia ang hi ka hriatthiam loh chi leh ka mize ngainat loh chi tak a ni. Mahse, tuna a mize neitu hi Hmangaihzuala a nih vang nge, ka duhna tipungtu a ni leh mauh mai.










A fapa ka awmsak duh loh avang khan min hre lo der emaw ni le? Eng vanga a fapa awm tura min sawmna kha hnar nge ka nih ka hre miah lo? Mahse, ka inchhir chuang lo bawk.










Zai kan ṭan a, Muanzuala nau Siamtei ka hmuh chuan ka hnuk a ulh tun mai. A u dam loh chhung zawnga buaipui ṭhintu kha a ni a, ka lainat takzet. A u Muanzuala chu ngaihtuah ngai a ni tawh lo, ani chuan a natna tawrh ṭhin kha tuar leh tawh ngai lo turin a khawvel taksa a thlah tawh a, a thlarau pawh a hahdam tawh bawk. Amaherawh chu, a la dam a nau zawk erawh hi chuan a u kha a la thlahlel ngawih ngawih dawn a, a u chuan hahdamna a chang tawh a ni tih hre mahse, a thlakhlelhna a reh dawn lova. A u a hmuh tawh loh tur ringawt pawh chuan a tina dawn lutuk.









Mihring chuan kan la dam chhung na nâ na chuan fam ngaih lunglen kan nei reng dawn, khuarei hian mi a hnem ṭhin an ti a, mahse, khuarei chu engtikah nge a rawn thlen dawn kan hre lo thung. A kal hmasa an vannei a ni mai a, hahdamna an chang a, an taksa chu thawhleh nia tho leh turin a la muhil rih a, keini a damate erawhin a kal hmasate hahdamzia tur hre reng chungin kan bula la awm ve reng turin kan duh a, kan khawvel ṭhat loh zia leh natna kan tawh nasat zia kan hria, mahse, kan khawvela kan kianga la awm tur erawhin kan la duh em em thung. Mihring kan ni miau a, kan rilru hi a lo mak zawng anih hi!










Siamtei avang chuan zai pawh ka zai hleithei lo, ka hrawkah hian min hnawh deuh tlat a, a hnu phei chuan ka mualpho takngial dawna ka hriat avangin pawn lamah ka chhuak ta ringawt. Pawnah chuan nula leh tlangval thingpui lumin an lo awm nual a, an piah a thim lam chin deuhah chuan ka va kal a, boruak chu am zetin ka hip lut kawk kawk a.










Ka piah lamah chuan tu emaw hian zial a lo zu khu hlat hlat a, amah pawh ngaihven lem lo chuan hnungchhawnin boruak thiang chu ka hip lut leh kawk kawk a, tu emawin min pawh her tawp chuan ka auchhuak teuh kher mai, "Eng vanga min rawn zui nge i nih?" chu aw chu ka hrechiang khawp mai, ka awmna piah lama zial zu kha Hmangaihzuala ni rengin, a chhuak ve tih pawh ka hre hauh lo.










"Ka zui lo che" rei fe hnu chuan ka chhang let ve ta hram. "min zui lo ni la, nula mahnia thim tham lam pan ngawt thu a awm lo" a rawn ti a, eng vanga ka zui chu ring tlat nge maw a nih le? "I chhuak tih pawh ka hre lo" ka ti deuh hmak, Hmangaihzuala chu rawn nui hukin "A ni mahna, a hnuk ulh deuh ṭun hmeichhia kha chuan ka chhuak tih pawh a hre dawn lo tak e" a tih chuan ka melh nghek, amaherawh chu inchhunga ka awm lai khan min en ve tih ka hriat avang erawhin ka kawchhung lama ka lung chu a phu rang sauh thung.









Rei fe kan ngawih hnuin "kal tawh rawh, a him lo" Hmangaihzuala chuan a rawn ti a, min hnungchhawn nghal bawk, kan awmna aṭanga piah lam deuh hleka mipa lo ṭhu khawm dul chu ka hmu ve chiah, ka rin sual loh chuan damdawi an khawihin ka hria, nidang chu ni se, ka hlauh avangin kal mai lovin ka tlan nal nal hial zawk ang, tunah erawh ka bula mipa vang hi a ni chek ang chu, hlauhna pawh ka nei lo.











"Let tawh rawh ka tih kha" Hmangaihzuala chuan lehlam la hawi reng chung chuan a sawi a, a hnung lam aṭanga melh nghek chungin " Aw le, aw le, i thu vek alawm" tiin ka inher a, ka kalsawn nghal a, mipa nui ri suk ri chu ka hria, mahse, lehhawi tawh lovin mitthi in lam chu ka pan a.










Ka va luh leh chuan a hmaa ka ṭhutnaa ṭhu tawh lovin tlar hnung lamah ka ṭhu a, Lalno-i a lo thlen tawh leh tawh loh en chuan ka hawikual a, a hmel awm reng reng ka hmu lo. A lo thleng har ka ti khawp mai. A hnu feah ka bulah mi an rawn ṭhut chuan ka en nghal a, Ramdina a ni. Ramdina hi college kan kal laiin kan senior an ni ṭhin a, miin an star ṭhin êm avangin ka star ve ringawt bawk. Mahse, tunah chuan ka star tawh lo.









"Chhingpui, nula hmelṭha rim ka rawn chhui a, i bulah ka rawn thu hlawl mai asin" a tih chuan ner nawng chungin "I hnar a ṭha lem lo anih dawn chu" ka ti a, nui suk chungin "Huizz, naupang ho tak hi chu aw" tiin lu a thing nghut a "ka nula ve tawh aw, kan senior i ni tawh bawk si lova, min junior en viau suh" ka tih chuan "a ṭha zawk daih, kan junior i ni tawh lo chu" a rawn ti let a. Inbe tawh lem lo chuan zai chu kan zawm ve ta zawk a.










Hmangaihzuala chu darkar chanve a ral hnu pawhin a lo la lut lova, a haw tawh anih ka ring ta ber. Amah avanga lo kal pawh ni si lo kha amah a awm loh meuh chuan ka kim lo riau mai a, ka awm dan vel chu ka inzahpui ru hle, mitthi in lehzela hetia lo awm chu hmeichhia pangai chuan an in zahpui ve vekin ka ring.











Dar kua leh a chanve dawnah Mami a lo lut a, Lalno-i a lo la lut lo cheu. Ka bul, Ramdina ṭhutna nilo lam zawkah a rawn ṭhu a, a rawn ṭhutfel rualin "awi, Ramdina nen lo ṭhu dun reng che u in" a rawn ti sa sa a, "a lo lang ve hlawl a" ka ti let ve a "in inngaizawng ṭep tawh ang, in inhmeh dawn hnik hnek si, ni ru, ni ru" a rawn ti leh a. A mala sik vak chungin "ka duh thertê lo, ani pawhin eng atan mah min ti bik lo, ka thengthawngah a thawk lova, a thengthawngah ka thawk hek lo" ka ti a, a rawn nui ringawt.










"Tinge Lalno-i hi, a lo la thleng ve lo reng reng" ka tih daih chuan Mami chuan "a, a bialpa khan a rawn bia a, a chhungte inhmelhriattir a duh a, niminah a hrilh tawh reng a, Lalno-i pui roh khan a lo theinghilh a, hmanhmawh chuk chukin a insiam a, a kal anih kha" a tih chuan mitthi in e ti lovin ka nui chhuak teuh kher mai.










Kan ngawih hnu reiloteah Ramdina chuan "ani kha maw i ring i lo fan uk uk chhan chu, mipa vang emaw ka lo tia" a tih chuan Hmangaihzuala lo luh leh luh loh enin ka ring ka lo fan a nih tih ka hre ve chiah. "Ka ring ka lo fan tih pawh ka lo hre reng reng hleinem" tiin ka nui lui sak a.











Zing lam dar khat veleh chuan intiharh turin kan pathum chuan kan inzui chhuak a, pawn hmun thim lam deuh, a hmaa Hmangaihzuala awmna lam chhu amah Hmangaihzuala hmuh pawh inbeisei lem lovin ka va en zawk a, Hmangaihzuala ka hmuh chuan min ṭhawng reuh hle, darkar tam fe sawlaiah sawn a ding chu a ni awm sia!










A bulah chuan hmeichhe pakhat a ding ran a, a smart zaih a, a inchei dan aṭang a zirsang thawkhat hle tih a hriat a, a ṭawng siam siam a, uluk lutukin Hmangaihzuala chuan a thusawi chu a ngaithla ran mai. Chu thil ka hmuh chuan ka hawi kher kher chu ka inchhir a, ka chhunglam hi a na deuh zawk bawk.










Engtia han awm tur nge tih pawh ka hre lo, Mami chuan ka kut chu a rawn hum a, Hmangaihzuala te kha a hmu ve tih ka hria, Hmangaihzuala ka duhzia a hria a, amah Hmangaihzuala avanga ka buai chang apiangin Mami hian min buaipui ziah a, Hmangaihzuala beiseiawm lohzia ka hriat avanga ka nat chang apiangin ani Mami hian min hnem reng ṭhin.










Hmangaihzuala bula hmeichhia chu ka va en leh zawk a, hla tak aṭang pawhin a lang ṭha hle a, a hmel ṭhat dan chu make-up avanga ṭha ni lovin natural ṭha a ni tih ka hria. Ka thik phak rual a ni lo, Hmangaihzuala chuan kan lam a rawn hawi zawk a, mahse, min hmu lo ang hmakin a bula hmeichhia chu a melh leh a, ka thin zawn hi a rawn na leh zawk.










An mahni en tawh lo chuan thawk ka la vang vang a, a fapa awmpui tura min sawmna ka hnar kha ka lawm takzet. Lo pawm ila chuan tuna a bula ding mek hmeichhia nena an awmdun lai ka hmuh fo a ngai ang a, ka na rengin ka ring.









U Mimii thusawi kha ka hrechhuak a, 'hmeichhia hi infiam nan bak a duh lo' a tih kha, ka awi ta lek lek mai, vawiin chhun lama ka dawra a fapa nen an lo kal ṭumin hmeichhe dang car-ah a phur a, tunah hmeichhe dang bulah a awm leh bawk a. Amah hi ka hrethiam lo.









Rei fe pawna kan awm hnu chuan inchhung lamah kan pathum bawk chuan kan inzui lut a, zai boruak a ṭha a, keipawh a hma ang ngawt kha chu ka ni tawh bik lo. Ka pangngai ve viau tawh.









Dar ruk bawr velah chuan kan haw a, in ka thlen chuan ka insil a, ka insil zawhin khumah ka bawk thlawp, ka phone a lo rik chuan peih lo zetin ka ban a, number hlang a ni, mahse, zing lama min lo call tu chu tiin ka chhang a, "Hello" ka ti chiah a, lehlama mi aw ka hriat rual chuan ka harh kawk mai, "Thutlukna chu i siam fel ta em?" Hmangaihzuala a ni.









"Ka tihpalh, i fapa chu ka awm sak thei lovang che, tuna ka dawr hi hman aṭanga neih ka chak em em ṭhin a ni a, chuti maia thildang tihsan ka thei lo" tiin ka chhang a, lehlam ami chu a ngawih vang vang hnuah "a ṭha alawm, i thutlukna chu ka sawhsawn sak thei hleinem che, i thutlukna chu ka zahsak ang che" tih leh phone tihtawp a rual a, ka phone chu ka melh nghek ringawt.









He mipa ṭawng bung thei lutuk leh induh thiam bawk si hi eng vanga duh tlat nge maw ka nih le? Mipa dang te chu ni se ka ngei ngawih ngawih awm sia. Amah Hmangaihzuala anih avang ngawta ka haw miah lo a mak a ni.










Kan mi duhzawng kan sawi reng rengin an mizia aṭangin kan duh leh duh loh kan teh a, an miziain min hip a, kan duh a, an zia avangin kan duh tihna anih ber chu. Mi ṭhenkhat erawh an dang a dang thung, kan mize duh loh leh miziaa kan huat em em pawh kha an mahni kan duhna avangin an zia nen lam kan duh leh lawi.









Dar riat dawn velah chaw ei tur
in min rawn kai tho a, chaw kan ei laiin ka nu leh pa chuan thu ṭha min fah hlawm mawlh mawlh mai. Kan ei khamin thleng ka sil zung zung a, ka insiam a, ka insiam zawhin dawr lam ka pan a, dawr lam ka pan lai chuan ka ngaihtuahnaah Hmangaihzuala hlir a lo lang a, a sawmna kha pawm ila, a nuna hmun ka chan ve theih nan hun tha a rawn inher ang em le?








Lu ka thing nghut nghut, a hmaa ka ngaihtuahna kha a chhanna ka hrechiang ngang mai, a chhanna tur pawh AIH tih a ni. A nuna hmun chang pha turin ka tling hlawl lo, hmeichhia hi infiam nan bak a duh lo an ti a, kei phei chu a infiamna atan pawh min duh dawn lo.









Kei hian Hmangaihzuala hi ka theinghilh a ngai, a harsa dawn tih chu ka hming ka hriatchian tluk zetin ka hrechiang. Mahse, ka theih a ngai. Tunah a ral aṭang ringawt pawhin amah avangin ka nâ a nia, han hnaih phei ila, ka nat turzia chu ka chiang, chuvangin a ral aṭang pawha ka nat tawh loh nan ka theinghilh a ngai, harsa mah se, ka thei ngei ngei tur a ni.

[Te-i Mrs Ambrose]

Pathlawia (Never Let You Go)
By; Te-i Mrs Ambrose




Chapter 3








Kar khat chhung zawng khan Hmangaihzuala theinghilh ka tum, mahse, ka hlawhchham chiang hle, theinghilh ka tum nasat poh leh ka hrechhuak ngun ting mai a, chuvang chuan amah theinghilh chu tum pawh ka tum chhin peih tawh lo.










Dawr ka thleng chiah a, midang erawh an lo la thleng lo thung. A la hma viau nangin vawiin chu inhawn hma a, khar hmat ka duh vang a ni. A la hma bawk a, customer pawh an la awm lo. Chutia customer pawh neih loh avanga ka phone ka en lai chuan mi an lo lut a, ka hawichhuah chuan hmeichhe hmelṭha zet hi a rawn lut a, a hmel hmuh tawhna ka neiin ka hria. Ka ngaihtuah let a, mahse, khawiah nge ka hmuh tawh erawh ka hre lo thung.










A hnunga a rawn zuitu mihring ka hmuh ve chiah chuan ka khawng mai dawnin ka hria, tinge Hmangaihzuala ka hmuh hian hetia ka tal buai fo le? A huhang a nâ lam mah a ni ṭhin. Chutia Hmangaihzuala ka hmuh takah chuan hmeichhia pawh mitthi in piah lama Hmangaihzuala bula ding kha a ni tih ka hre ta nghal a.









"Lo lut rawh u, eng lam nge in duh deuh?" ka ṭawng pangai thei chu ka lawm hle. "Duati, i duh thlang la" Hmangaihzuala chuan thum deuh dut hian a ti a, thum mahse, a awah erawh duatna ka hre telin ka hria, chu chuan min ti na ve em em ringawt.










Duati a tih chu ka zui a, a nui sang reng a, a nelawm viauin ka ring. "Thawmhnaw in va'n nei nalh em em, lo kal ziah tur anih hi" tiin thawmhnaw ho chu a en kual den den a, a mit a changkang hle a, thil nalh a hre khawp mai. Thawmhnaw a thlan ho chu Hmangaihzuala bulah chuan "Zual, heng ho hi ka la dawn asin" tiin a khai va va hlawm a, Hmangaihzuala chu a bu nghut a. A wallet a phawrh nghal zat.










A duat hmel hi ka ti lutuk, a hma khan ka thik titih a, tunah erawh thik pawh ka thik ngham tawh lo, an inhmeh lutuk ringawt. An chhuah dawn chuan "I hming min hrilh lawk thei ang em?" hmeichhia chuan a ti a, "ih, Chhingpuii, Rochhingpuii" ka ti a, min nuih sen senin "ka rawn kal leh ziah ang, Hmangaiha ve hi chuan thawmhnaw pawh min en pui peih ngai mang lova, ka rawn kal leh hunah min buaipui chawt ṭhin rawh aw" a rawn ti a, nuih let vein "imm, ka lo kal leh ṭhin rawh, ka lo buaipui hrep zel ang che" ka ti ve a, kan bulah Hmangaihzuala chu ngawi rengin a ding thung.










"Min lo dawr leh ṭhin dawn nia, kan lawm lutuk ania" ka ti a, Hmangaihzuala chu a bu nghauh a, a bula hmeichhia chuan "imm,, lutuk, lutuk, kan rawn kal leh ṭhin ang" a ti a, an kal chhuah dawnah chuan Hmangaihzuala kut chu a chelh a, an inhmeh takzet. A hmeichhia a felin a hawihhawm si a, thik malek lo tur ka ni, an inhmeh em mai.









Dawr kawngka an thlen dawnin hmeichhia chu a rawn hawilet a, "ah, ka hming ka hrilh theinghilh daih che lawm, Lalrinfeli ka nia, ka lo kal leh hunah ka hmingin min ko chat rawh aw" tia ban min vai khumin a chhuak a, ka nui tawp. A nelawm ka ti lutuk, khatiang khan ka nelawm ve thiam ngai dawn lo tih ka chiang hle.









An chhuak fel chiah tihin Lalno-i a lo lut ve nghal a, "Tuna kal chhuak tate kha Hmangaihzuala te an ni em?" a rawn ti nghal a, ka bu zeuh "Ehe! Hmeichhia kha a bialnu em ni?" mak tih hmel zetin a rawn ti a, ka hriat loh zia lantir nan dar ka kan ak a, kawngka lam chu a thlek zeuh a, "hmeichhia khan a banah te a kai bawk sia" a ti leh a, tun ṭum chu kei min bia ni awm pawhin ka hre lo.










"a bialnu a nih ka ring, mahse... ahh..ka hre lo e a" ka ti hap, ka buaina tur a ni lo, an lo inngaizawng ngei anih chuan an lawmpuiawm ngawt ang. "I thik em?" Lalno-i chuan a lo ti leh a, dar ka kan leh ak, a chhan chu ka thik rualin ka lawmpui miau a, ka lawmpuina nge ka thikna hi lian zawk ka hrethiam miah lo.









"Awi, ka hrechhuak, nang hian Hmangaihzuala i duh thu ka lakah i va zep rei ve" a rawn ti hliai, ka ṭhe nlui deuh sak a, "ka tihpalh" ka ti sep, "ka titau rei viau ang" tiin kut a kuangkuah nghal than a, ka thlem leh fe a ngai dawn anih hi.










Chhun chawlh hun dawn tawhah Ramdina a lo lut ve hlawl a, "Chhingpui, min lo lawm der ve ta che" a rawn ti nghal ham ham a, ner nangin "ka lo lawm der a che" ka tih chuan ka chal a pen nghal fawk anih chu. "I nghal man anih kha" min la ti zui. "Lalno, i va tum nasa ve, utum i ang reuh" tiin Lalno-i chhun chawlh hun tawh dawn avanga tau thar leh chu a fiam nghal a, ka nui tih Lalno-i'n a hmuh chuan Ramdina'n a fiamna pawh hre lo ang hmakin "lo nui suh" a rawn ti nghek, Ramdina chuan Lalno-i chu en vung vungin "I va thinchhe reuh e, ka fiamna che pawh i hai der hmak leh nghal" a ti leh a, Lalno-i chuan rum eltiangin Ramdina chu a en a, "Ka tau mek anih hi, min lo tibuai suh" a ti hmak.










"No-i, ei tur ka treat ang che" ka tih chuan Ramdina zawkin "keipawh, keipawh" a rawn ti chiam a, ka ner nang nang a, ka chhan hmain Lalno-i zawkin "a hna sang zawk chelhtu hian mi treat pawh tum lova mi in treat tir lo tum chu a" a rawn ti a, Ramdina hmuh turin lu ka bu nghauh nghauh a, Ramdina chuan "Nge, Chhingpuii treat nih ka duh ve ni mai lawm" a rawn ti sam et.









"A ngai fahran lo, hmeichhia in treat tir reng reng suh, a gentleman hna lo emai" Lalno-i bawkin a ti leh a, "Pawi lo, Ladyboy hna nimai lawm" Ramdina'n a ti ve leh bawk a, ka thaw hak a, "inhnial leh inkhak reng nge in duh, lunch?" ka tih chuan lo hawi rualin "Rei lote" an ti rual a, Lalno-i'n "Minute nga lawk" a rawn ti nghal bawk a, lu thing nghat chungin ka phone ka bihsan ta daih.









"Hey, kan inhnial zo, thil va ei ang u" tiin Ramdina chuan ka hmaah a kut a rawn hmet ri khep a, "Aw, ṭhenawm restaurant-ah sawn chawl mai ang u" tiin ka ding nghal a, Lalno-i chuan "keimah chiah min treat ang che, Ramdinliana hi treat ve reng reng suh ang che" tiin a kut tum min hmuh a, "Aw le, aw le pi ber" tiin kan chhuak hlawm a.










Dawr chhunga kan thil chah kan nghah lai chuan "Ama" ka bul maia titu an awm avangin ka hawi a, Jarson a lo ding reng, min lo nuih vur vur zui a, a inchei smart ve than a, a sam buk ve zetah chuan chul sakin "Bawiha, eng nge i tih, khawiah nge i pa?" ka tih chuan kan dawhkan opposite hla ve deuh hleka apa ṭhu chu a kawk a, Hmangaihzuala mitmeng ka hmuh chuan engtia awm tur nge tih pawh ka hrethiam lo.









Eng vanga tuna a mitmengah sawn thikna ni awm tak hmu nge ka ni tih ka hre lo. Ka lak aṭang a mit a la sawn a, Ramdina chu a melh leh nghal chat a, a hnu reiloteah "Jarson, lo kal rawh le, i ei tur a lo thleng" tiin a fapa chu a hmel nena inawm loh lutukin dam dup hian a ko a, Jarson chuan lu thing nghutin "Ama lo kal ve hunah ka lo kal ang" tiin ka kut chu a rawn kai a.










Ka ṭhiante ka en chuan Lalno-i chuan eng ngaihtuahna nge a put pawh ka hrethiam lo, amaherawh chu Ramdina thung chuan mak a ti tih chiang takin ka hria "Ama, ka ril a tam, kal ang" tiin Jarson chuan ka banah a pawt dat dat a, chutah Hmangaihzuala chuan "Jarson lo kal vat rawh" a hma ang kha chuan a aw a nelawm tawh hauh lo. Jarson ka en chuan a mittui a parawl kuang a, a ṭap mai dawna ka hriat avangin "No, Ramdina nen hian lo ei mai ru aw" tih leh din ka rual a.










Hmangaihzuala ṭhutna lam chu hreh ru zetin Jarson-a kai chung chuan ka pan a, Hmangaihzuala lah chuan nichina min melhna mitmeng ngai chiah chiah khan min la melh zui. Ka zam lutuk chu ka khup a sai dar darin ka hria. "Ama, ka bulah ṭhu rawh aw" Jarson chuan a lo ti a, lu bu nghatin Jarson chu ka ṭhuttir nghal a.









Hmangaihzuala lah eng mah a sawi bawk si lova, ka awm dan chuan lai tak ka ni. Eng ngati nge tun hnaihah hian Hmangaihzuala hi ka hmuh theiha a awm reng, a hma ang khan a reh hmakin hmuh tur a awm lo thei leh lo em ni? Hetia hmuh reng hi ka duh loh teh reng nen, eng emaw ti ti hian ka hmu nawlh zel mai bawk si.










"Min barh rawh, min barh rawh" tiin Jarson chuan a ei tur plate chu min pe a, ei tur chu lain ka barh ve mai a, Jarson chuan eng eng emaw hi a sawi leh sep sep zel a, ka chhang tih bak Hmangaihzuala chu a la ngawi reng. Thil ei kham chhuah dawn chuan Hmangaihzuala chuan rawn khuh deuh kharhin "ka fapa hian a rawn tihbuai tawh loh nan che ka lo khuahkhirh deuh tawh ang" a rawn ti a, counter lam chu panin ei tur man chu a va pe a.










A rawn let lamah chuan Jarson chu a rawn pawm a, "I theih chuan" tiin pawn lama zui chhuak ve tur chuan min mitmei a, ka va zui chhuak ve mai. Jarson chu car-ah a ṭhuttir hmasa a, chumi zawhah ka lam rawn panin "ka lawm e" tiin a kut hnung lam aṭang chuan paper bag hi a rawn phawrh a, a ngaihna hre lo zet chuan ka en tawp, "I laka ka lawmthu sawina" tiin bag chu ka lamah a rawn khai hnai a, a tawngkam teh thlawt thin a, a pawt chat laklawh thei si.










"Ai, a ngai lo" tiin lu ka thing a, min en reng a, a thil ken chu lak let leh pawh a tum hmel loh khawp mai. "Ka kutin a nghak che" a tih leh takah chuan lu hiat nauh nauh chungin "a ngai lo asin le" tiin ka ban a. "Ka fapa hian a rawn tibuai tawh lovang che, chuan a hma aṭanga i lo buaipui tawh ṭhinna avangin ka lawm e" tiin min inhersan nghal a.









A motor-ah chuan a chuang lut a, Jarson chuan min lo enin "Ama, i lo lut ve dawn lo mi?" tiin min melh kiau a, "sorry lutuk aw" ka tih chuan "Ai, Ama, lo kal ve tawh rawh, i bula awm ka duh ve tawh" tiin a mittui a tla zung zung a, ka ṭap ve thei mai dawn. Hmangaihzuala chuan "I Ama chu a hman lo" a ti nghut a, a fapa aw zaidama a biak loh ka hriat awmchhun a nih vang nge? Min ṭhawng reuh hle.









"Apa chu i sual emai, ka Ama ka duh tawh, a lo haw ṭep tawh i tih ṭhin kha, ka Ama hi lo haw turin hrilh ve rawh" tiin a ṭap bai bai a, pawn aṭang ka en reng, engtia tih tur nge ka hrethiam lo. "Ai, a theih loh" tiin Hmangaihzuala chuan car chu a tinung nghal a. "Ama, i bulah min hruai ve rawh, i bulah ka awm duh" tiin rawn chhuah a tum a, chutah Hmangaihzuala chuan vin zetin "Jarson" a rawn ti ṭhat, Jarson erawh a ṭap uar sauh thung.









Hmangaihzuala chuan car chu a khalh chhuak nghal a , aw dam deuha "tihpalh Bawiha..." a ti chu ka hre hman hram. Jarson chu ka khawngaih hle. Lo awmpui ta hle hle ila, tun ang khan a ṭah leh apa in a vin a ngai awm si lova. Ka khawngaih lutuk chu ka khaw hmuh thlengin a phe vek.









"Chhingpui" tia ka dara an lo vawn chuan ka en nghal a, Ramdina a lo ni. "Ka khawngaih e" Lalno-i chuan a lo ti ve nghal a. "Ni e tiraw. Nu hmangaihna a mamawhzia kha" tiin ka bianga mittui luang thla chu ka hru zeuh a. "Eng nga tinge Hmangaihzuala fapa khan Anu anga a koh che?" Ramdina ṭawng dan teh tawp pawh chu. "aw, a ko ve nimai lawm, buai chiam a ngai lo" Lalno-i zawkin a chhang.









"Dawrah let tawh ang u" ka ti ta daih, Ramdina lah chuan 'a chhan min hrilh ngei a la ngai ang' tih melh tak hian min melh a. Dawra kan let hnu pawh chuan ka hlim thei tawh der lo. Engpawh ti ila, ka mitthla atang Jarson a chhuak thei lo.









Hmangaihzuala thil min pek chu ka hawng a, a chhungah chuan perfune rimtui zet mai, en reng reng pawha man to tih hriat zet hi a lo awm a? Eng vanga min pe nge a nih ang tih hriat ka chak. Ka tana a lei anih ka rin loh lutuk vang a ni ber pakhat.










Dawr chu dar li velah kan inkhar a, in ka thlen pawh chuan ka la nui thei tlat lo. Kha naupang duhawm lutuk tak mai khan a nu hmangaihna dawn kha a chak ngawih ngawih a, a nu ber lah a awm tawh bawk si lo. 'Kei talin awmpui kha lo rem ti mai ila' tiin ka inngaihtuah hnuhnawh a, mahse, lehlamah Hmangaihzuala a awm miau si a, ka tan beiseina beidawnthlak ka insiam ka hlauh avangin mahni hma sial takin Jarson awmpui chu ka thei hlawl lo a ni.









Dar sarih velah pawh ka pa a lo la haw lova, ka nu a tei kual chhen tawh a, kan call lahin a ring ral ṭhak ṭhak mai a, tun ang hunah hi chuan a lo haw tawh ṭhin si a, chutia ka pa kan nghah ṭhup lai chuan ka pa call a lo lut a, kan thaw deuh huai hlawm mai. Ka nu chuan a chhang nghal a, mahse, reilote a ngaihthla hman chauh ang tih chuan ṭhutthlengah a ṭhu thla hnawk a.









Ka u chuan phone chu a la nghal a, ka nu bulah ka ṭhu thla nghal a, ka nu mittui tla ka hmuh chuan engtia awm tur nge tih pawh ka hrethiam lo. U Mimii chuan "Nu va insiam rawh" a ti a, amah pawh a buai hmel nak mai. "U eng nge a awmzia?" tiin ka en nghal a, "ka..ka pa a accident" a tih chuan ka nghing lawih mai.









"Inah hian kan naute hi lo awmpui la, ka nu nen damdawiin lam kan pan ang a, chanchin ka rawn hrilh ang che" tiin a bengah phone a chuktuah nghal a, "aw, driver, min lo lam hman ang em?" tiin a pen sawn nghal a, kei erawh ka bing chuk chuk ringawt. Engmah han tih ngaihna leh tihtur ka hre der lo.









U Mimi leh ka nu chu pawn lamah an chhuak nghal a, Taxi-a an lut te chu ka thlir mawl tawp a. U Mimi leh ka nu chu an chhuah hnu thleng pawhin rilru fim ka la pu thei lo. Inchhungah ka vei tawn sek a, ka naute pawh ka buaipui hman lo. Eng ber nge ka ngaihtuah tih pawh ka hre chuang lo.









Darkar chanve pawh a ral hmain u Mimii'n in a lo thleng a, nichin chhung zawng khan min lo call lo hrim hrim. "U eng nge chanchin?" ka zawhna hre lo ang hmakin ka nu leh pate pindan lam a pan nghal a, ka va zui chhunzawm ve nghal zat bawk. Ka nu leh pate'n pawisa an dah chu a la chhuak vek a, hmanhmawh tih hriat zet chuan a chhiar nghal a.









"U, engmah min hrilh i tum nange?" ka tih chuan u Mimi chuan min la chhang lo cheu. Pawisa a chhiar zawh chuan beidawng zetin a thaw halh, "A la daih lo engtin nge kan tih ang? Ka pa chu ICU ah a awm mek, chuan tunah hian pawisa kan mamawh takzet" rilru hah hmel zetin u Mimi chuan a sam chu a tuai chho puat a.









"U, kan mamawh hnem viau a mi?" ka tih chuan lu a bu nghat a, keia dawr aṭanga ka lakluh lah a tlem si, thla tir a la ni a, ka sum a chanve vel zet chu dawr bungraw chah nan kan hmang vek si. Ka tei kual a thil pakhat ka hrechhuak zawk. Hmangaihzuala kha.









A card min pek kha ka zawng nghal a, ka purse-ah a lo la awm hlauh. Inngaihtuah buai hauh lovin a number chu ka dial a, ka call nghal. Mahse, a rik chiah erawh chuan ka lungphu chu rang tak a ni. A rawn chhan ngat phei chuan ka lungphu chu a rang lehzual sauh.








"Tunge aw?" a aw thum zet ka hriat chuan buai hman ka ni lo tiin ka inhrilh ru mawlh mawlh a, "ih keimah.." ka dang a awk titih, ka sawi zawh hmain "Tu nangmah maw?" a rawn ti leh nghal a "ih, Chhingpuii, Rochhinhpuii" ka ti a, a ngawih deuh vang vang hnuah "eng thil nge ni ta?" a rawn ti a, thaw halhin








"kan inhmu lawk thei ang em?" ka ti phawng, "khawiah nge i awm?" a rawn tih chuan "kan inah, i awmna hmun min hrilh theih chuan ka lo kal ang" ka ti nghal a, "in veng lamah ka inkhalh mek a, in in kawtah lo awm rawh, ka lo lam ang che" a ti a "aw le, ka lawm e" tiin phone chu ka dah a.









"U, pawisa chu ka neih theih ka ring" ka ti a, U Mimi chuan min en reng, "eng thil chiah nge tih i tum? Tumaw i biak kha? Enteh, engtin nge pawisa tam lutuk chu awlsam taka i neih theih i rin thu i sawi theih, nang hian mahni inhralh" a sawi zawh hmain "Ai, chutiang ka tum lo, U min ring tawp rawh" tiin pawn lamah ka tlanchhuak nghal a. Tunah hian Hmangaihzuala bak hian min puih theih ka ring lo.









Mahse, a fa tur awmpui thar lo nei tawh ta se, vawiina a ṭawng dante ka ngaihtuah leh a, a hma khan ka lo hnar khanglang tawh si a. Lu ka thing nghut nghut a, chutiang ngaihtuah hman ka ni lo, a ṭul chuan ka ngen mai tur a ni, ka pa tan vek alawm.









Pawnah chuan Hmangaihzuala chu ka nghak a, minute nga vek a ral hman chauh ang tiin ka zawnah chuan car dum tle kuk mai hi a rawn ding a, glass a in down chuan Hmangaihzuala nui hmel pa zet ka hmu hmasa ber.






(Story hi zan khat dan zelah dah ka tum a, a sei thei ang ber lo dah ka tum thin dawn nia)

[Te-i Mrs Ambrose]

Pathlawia (Never Let You Go)
By: Te-i Mrs Ambrose



Chapter 4








Hmangaihzuala chu lo chhuah tum ni awma ka hriat avangin "Ai lo chhuak suh, ka lo lut ang" tih leh kawngka chelh chu ka rual a, lu a buk nghauh takah chuan ka hawng a, ka lut nghal.










"Engthil nge ni ta?" a rawn tih chuan chil ka lem dawk a, "ihh" ka ngawi ren rawn a, ka inthlahrung hle, mahse, ka pa avanga ka inthlahrun loh der a ngai. "Jarson awmpuitu tur chu i la tawh em?" tiin zahtheih loh chhuah chuan ka zawt phawng a, "La la lo" a tih chuan ka thaw huai thei, "ihh" ka thil sawi tum ka sawi ngam leh ta lo.








Amah Hmangaihzuala zawk chuan "A hmaa ka sawmna che kha, i chhan letna ka la nghak reng ania" a rawn ti hloh a, ka lawm hle.








"Aw, i fapa chu ka lo enkawl ang, mahse" tiin ka han ngawi leh deuh hlek , "mahse,," Hmangaihzuala chuan ka sawi ang chiahin a rawn sawi ve a "ka thla thum hlawh tur min pe lawk thei ang em?" ka thil sawichhuah hreh ber ka sawichhuak ta!








A nui deuh suk a, min ngaih dan tur ka chhut thiam der lo, chu mai bakah min ngaih dan tur ka ngaihtuah hman hek lo. Hmangaihzuala chuan awlsam zetin "a ṭha alawm" a ti nghal a, thutlukna a siam hma ka ti viau nangin ka lawm hle.









"ka va chhuak tawh ang e, zanah hlawh chungchang vel chu kan sawifel mai dawn em ni ang? A theih hram chuan zaninah.." ka sawi zo hman lo, ka sawi tum chu a man a ni teh chek ang chu. "aw le, zaninah chuan le, i mamawh ang zat chu zaninah ka lo thawn ang che" a ti a, a car aṭang chuan ka chhuk a. Kan in lam hawi chuan ka ke pen ka rual a.









Hnung lam aṭanga ring vak lova "I rilru i thlak deuh thut chhan hriat a chakawm hle mai" a ti a, ka lehhawi chuan nui sukin a car a tinung a, a tlanchhuak ta nghal a.









"U, kan pawisa mamawh belh zat chu naktukah kan neih theih mai ka ring" ka ti a, "Eng thil ṭha lo mah ti i tum lo tiraw? Engtin nge awlsam zeta kan sum mamawh zat chu i neih theih ang, i kum chanve dawn lai hlawhin a daih ṭawk tur pawisa chu engtin tehlul nge zaninah i neih theih ang?" U Mami a ti a, "U naktukah engkim fiah takin ka hrilh ang che, tunah chuan damdawi in lamah let tawh rawh, ka nu a ngaihtuahawm lutuk palh ang, ka pa chu a ṭha ang. A ṭha em em ang, keini hi min kalsan dawn lo" ka ti a, ka pa chu an zai hlawhtlin ngei ka ring tlat a ni.










Ka naute mutna lam chu ka pan a, An lo la muhil lova, min hmuh rualin "U Pui, ka pa chu a ṭha ang tiraw?" Denzil chuan a rawn ti a, a awah a mangang hle tih ka hre thei. Nichina ka buai nen, tunah chuan rilru fim tak ka pu thei tawh a, vai ruai ang khan ka awm tawh lo. "Imm,, engkim ti thei Pathian kan nei alawm, ka pa chu a ṭha em em ang" ka ti a, Denzil leh Morris chu an thaw deuh huaiin ka hria.









An room ka chhuhsan fel chiah U Mimi chuan "engtin nge pawisa chu i neih ang?" a la kal lo tih ka hre chiah, a kal tawh ang chu ka lo ti kha ania. "Hmangaihzuala hnen aṭangin" ka ti tawl, U Mimi chu a meng bial nasa mai "nang hian i taksa te hralh i lo tum a ni lo maw?" a zawhna avang chuan amah ai mahin ka meng bial zawkin ka ring.









"U, chutiang ti duh hmel ka pu em ni?" ka tih khum nghek, ka inthiam lo chawpchilh nghal a, ka u hi aw ka viin ka chhanglet ngai hauh lo. Aw dam deuh zawkin "U, ka pa avangin kan mangang tlang tih ka hria, mahse, chumi avanga ka nu leh pate'n an phal ngai loh thil tih tumna rilru ka pu lo, pasal ka neih hma chu ka zahawmna ka humhim tlat dawn" ka ti a.










Ka U chu a pangai hmel ta deuh, "Damdawu in lamah chuan let tawh rawh, ka nu buaipui a lo ngai palh ang" ka ti a, U Mimi chu bu nghatin a chhuak a.









Ka u a kal liam fel hnuin kawngkhar ka kalh a, ka pindan lamah chuan lutin ka khuma Bible chu ka la kang a, ka chang duh lai ka chhiar zawhin Pathian hnenah ka pa tan ka dilsak a, ka ṭawngṭai zawh meuh chuan ka thla a muang huai.










Ka phone ka bih chuan Hmangaihzuala message a lo awm vang mai a, pawisa kan inthawnna tur vel kan inhrilh fel hnu chuan message ka dawng nghal a, pawisa ka account a lo lut zat ka hmuh chuan ka meng bial nghal kawk. Ka thla thum hlawh atana min lo thawn chu a hmaa a sawi ang ngei khan thla khata ka lakluhzat let thum lawih a ni!









*Ava tam em em ve*
tiin message ka thawn a, Hmangaihzuala hming hnuaiah chuan Typing... tih a lo lang nghal a,
*a hmaa ka sawmna che kha a ngai reng alawm*
tih a lo thlenga, chumi zawhah
*ka fapa tan chuan engmah ui ka nei lo*
tih a lo thleng leh nghal bawk.










Ka rin dan kha chuan hlawh min pek lawk pawhin ka hlawh pangai let khat pawh khan a pun ka ring vak lo ania, mahse, tunah hi chuan chutiang ngaihtuah ka duh lo, engkim hi ka pa tan vek a ni.









Zanlai dar sawmpahnih a pel deuh hlek ang tih chuan U Mimi hnen aṭang call ka dawng a, ka pa chu an zai hlawhtlin thu leh rin aia hmaa a dam vat doctor te'n an rin thu te chu a sawi a, ka lawm lutuk chu rilru in Pathian hnenah lawmthu ka sawi nghal mawlh mawlh. U Mami chuan damdawi ina ka nu nen an riah nghal tur thu leh naktuk zing lamah amah a rawn haw tur thu chu min hrilh a.









Zing ka harh chuan dar nga vel a lo ni a, tho chhuakin imchhung chet ka ṭan nghal a, dar sarih rik dawnah U Mimi chu a lo thleng a, a lawmzia a hmel aṭanga en pawhin a hriat theih.










Eirawng kan bawl dun lai chuan "engtin maw Hmangaihzuala lak aṭanga chutiang zat zat chu i hmuh theih theih" a rawn ti a, engkim chu fiah leh chipchiar takin ka hrilh a, engmah sawi lovin uluk takin a ngaihthla a.









A hnu reiloteah chuan "chutiang anih chuan mi ina awm dan tawk i thiam hle dawn nia, a theih chen chenah Hmangaihzuala chu hnaih loh hram tum la, thla thum lai an inah i awm dawn a ni a, i lo luanliam hman a, a zuna i uai chuan a na tur chu tudang ni lovin nangmah ngei hi i ni dawn, chu thil chu a thlen loh nan Hmangaihzuala hi a tul tawpkhawkah bak hnaih suh ang che" a ti a.









Ka rilru chuan 'U, a hma aṭang khan a zuna ka uai tawhin ka luangliam fel der tawh alawm, chuan kan inkara engmah awm si lovin amah avangin na ka tuar ṭhin asin' a ti mawlh mawlh.









Ka pa chuan dam lam a pan ve zel a, ka naute nen kan pathumin tlai lam an school banin ka pa awmna damdawiin lamah kan kal a, ka pa chu a muhil a, ka pa hmel ka hmuh chuan ka mittui a tling par mai. Nidanga nui reng ṭhin kha a hliam leh na han hmuh chu thil hrehawm berte zinga mi a ni .










A tuk dawra ka awm lai chuan rin loh lutuk tak maiin Daniel leh Mami an lo lang hlawl a, Mami chuan engdang sawi lovin min hmuh rualin "eng nge message kha a awmzia, i thawk dawn tak tak ami?" a lo ti nghal a, ka chhan hma hauhin Lalno-i zawkin "thawk dawn anih kha" thil rem fel pah chuan a lo chhang a.









Mami bawkin "Chhingpui, i tan a hrehawm lutuk ang e" a ti leh a, ani hi chuan Hmangaihzuala bul hnaiha awm hi min duhsak vak ngai lo, amah avanga ka nat hi a phal lo bur. "Ka pa avang chuan natna te chu tuar ka huam alawm, sum ka mamawh laia ka mamawh min phuhruksaktu hnenah chuan a duh ka tihsak ve ngei tur a ni" ka ti a.










Daniel-a engmah hre ve lo chuan "Ka man love" tiin counter ruak huaiah chuan a va ṭhu nghal thak a "min pui dawn em ni khata i ṭhut?" ka tih chuan "Darkar chanve chu ka pui ang che" a ti a, ka nuih var var mai. Hepa hi chu a fel ania.









"Ngaihzawng nei la aw" ka tih chuan "ngaih zawngte chu nei ve e, mahse, a ngaihzawng ka ni ve em ka hre lo, a hria pawhin ka ring lo, a mawl reuh emai" a tih chuan a bulah kal hnaihin "Tu nge tu nge?" ka ti ser ser, a hmui pet sawiin "ka la hrilh dawn lo che, i hre ve mai ang" tiin ka biang a piai hlak.









Mami chuan ka bulah "Lalno-i sawi kha a bialnu chu a ni tak tak ang em le? A lo nih thut chuan i hmudun reng ang a, amah avangin i na ang tih ka hlau ania" a rawn ti leh a, henu rilru ṭha lutuk ṭhin hi chu. "Mam, i ṭhiannu hi ka chhel tawh lutuk ania" ka ti a , chutih lai chuan ka message tone a lo ri a. Ka en chuan Hmangaihzuala hnen aṭang a lo ni.









Ka lungphu a rang leh ringawt tawh, hepa zun ngah lutuk hi chu. Ka ngai neih theih ka ring lo, ka buai phah reng bawkin ka ring. Ka open a, *engtik aṭang nge i hna i rawn zawm ang?* tih te mai hi a ni. *Naktuk aṭang ka rawn zawm ang* tiin ka chhanglet nghal a. A hma khan hna ka ṭan hun tur kan lo sawi lo hrim hrim.









Ka nuin a hriat tirh kha chuan a phal vak lo hle a, mi ina awmpuia va awm atan chuan min phal lo hle anih kha. Mahse, ka pa avangin ka thawh ngei a ngai si a, a hnu chuan min dang ta lo kha ania, hna ka zawm hun tur min zawh khan ka hre lova, Hmangaihzuala nen kan sawi loh avangin a nuih ka tiza hle anih kha. Ka nu chuan a rang lama zawm a, thla thum chu ral vat vat se a tih thu min hrilh anih kha.









Chhun chawlh hun awm velah chuan dawr kharin kan ṭhian ho chuan thil ei ho a, bazar kan tum a, thil kan ei hmasa te te a, a chhan chu chhun chawlh hun vela kan inkhar vang a ni. Thil kan ei zawhin thil lei tur chuan bazar pui lam kan pan a, lei tur mamawh em em kan nei hran lo , mahse nidangah chuan tun anga ka hman tawh dawn loh avanga min bazar pui mai mai an ni.









Kan dawr luhna aṭanga kan chhuah dawn chuan kan hma chiah dawrah chuan Hmangaihzuala'n a hmaa a hmeichhe rawn hruai leh mipa pakhat hi ka hmu a, chupa chuan Rinfeli chu a hmuiah a fawp zeuh a, Rinfeli pawhin a haw lo tih hriat zet chuan a nuih a, a mak ka ti chu ka ding reng.








Ani saw Hmangaihzuala bialnu kha a ni lo em ni? Hmangaihzuala pawhin 'Duati' a ti a, ani hian Hmangaihzuala hi a kawp em ni? Engmah ka hrethiam lo. Lu ka thing nghat a, ka buaina tur a ni lo rilru in ti tak mah se, thinlung lam thung erawh chuan Hmangaihzuala chu a nat a hlau ngawih ngawih thung.









Darkar khat dawn lai kan tei tawh hnu chuan Daniel-a'n "hmeichhe bula bazar chu ninawm e, in en uluk thei si, in la tawh dawn emaw tih thawh hnuah pawh 'dawr danga kan va en leh lawk ang aw' tiin in kalsan daih zel lehnghal, kei chu ka chau" tiin a thaw hawk a, a chauh hmel tak tak hle.








Kan thian hmeichhe thum chuan kan nui tawp, a mipa ber Daniel lah a chau der mai si a, han bazar pui leh viau tum pawhin a peih tawh ngang lova kan haw ta tawp. Zanah chuan ka insiam a, naktukah Hmangaihzuala te inah a fapa awmpui ni turin ka thawk tan dawn a, a sawi dan kha chuan duh leh a langin ka kal thei a, duh chuan an inah ka pindan tur pindan ruak a tam thu min hrilh a, a langa ka lo kal anih pawhin ka hah huna ka awmna tur bik room hran min lo siamsak tho tur thu min hrilh.









Dar riat leh a chanveah chuan Hmangaihzuala te in kawtah ka ding ta vang mai, thaw deuh hapin kawngka lam chu ka pan a, doorbell ka hmeh chuan min lo hawnsak nghal a, Hmangaihzuala chuan min lo hawn niin, a bulah Jarson a ding ve bawk. Jarson chuan phur zet maiin "Yes, Ama a lo thleng" tiin min kuah nghal a.









Hmangaihzuala ka en chuan Coat dum khup mai hain min lo en ve reng a, kan mit a intawng chiang lutuk chu ka sa hat hat a, ka mit chu a lasawn hmasa zawkah ka ṭang a, a mitmeng pa let leh cool ruih mai erawh ka mitthla aṭang a chhuak thei lo.









Hmangaihzuala chuan aw thian khurhin "I lo thleng tawh bawk a, ka kal tawh mai ang, Jarson chiah hi lo awmpui la, inchhung sekrek dang engmah i khawih a ngai lo, chhun lamah Ann-i hna thawk turin a lo kal mai ang, hna dang thawk tura lo kal i ni lova, i lo kal chhan ber Jarson hi tha takin i enkawl tur a ni" a tih chuan ka bu nghat a, a ṭawng kha a khauh hle a, a fapa chu ṭahtir palh te pawh a hlauhawm.









Chhuah tum chuan kawngka chu a hawng a, a chhuah hmain a lo hawi let leh a, "Jarson kha a ṭap tur a ni lo, i kianga a hlim ka rin avanga ruai che ka ni a, ka rawih chhan ang ngei chein ka fapa hi a hlimin i nuihtir reng tur a ni" a hma ai maha khauhin a ti leh a, chil ka lem dawk a, lu ka bu nghat.









A chhuah chiah chuan ka thaw hak mai, a va han strict awm em em ve mawle. Engtin nge naupang chu ka nuihtir reng theih ang, an nui a, an ṭap bawk a hei te chu naupang tinte tih dan vek ania, a nuih chiah han nuihtir mai chu a! Rapthlak lutuk.









Jarson chuan "Apa, Ama hi goodbye kiss pe rawh" a ti a, tun ṭumah kher kher hi chuan Jarson-a sik vak ka chak. Nitin apa ka hmu dawn a, hetia a tih reng te chuan. Awi, ka atchilh zual bur palh ang.









Hmangaihzuala chu a lo let leh a, a hmaa a tih ang bawk khan ka chal a fawp leh a, keipawh a hma ang bawk khan ka lungphu a rang leh zaih zaih tawh a, Hmangaihzuala chu vawikhat pawh lo hawilet tawh lovin a kalchhuak ta nghal a .









Jarson chuan "Ama, apa khan 'I Ama a lo thlen hunah a room tur lamah lo hruai ang che aw' a ti a, kal ang" tiin min pawt dat dat a, an inchhung chu a zau hle a, ka room tura an tihah chuan kan lut a, a nuam kher mai. Mahse, bang thil inbel ka hmuh rual chuan ka ner sak mai. Jarson ka enkawl dan tur time table a lo tar anih chu.









Ka ner ka ner a, a hnuai berah "engkim hi a hunah chat ti vek ang che" tiin lian leh tak bik zetin a inziak zui. He thil hi a tar laiin awm ve ngat ila, ka chhuthlu ngei ngei ang. Hetia tar kher hi a ṭulna pakhat mah ka hre lo.










Jarson nen chuan kan awm dun rak rak a, a khawhar thlak phian, awmpui Hmangaihzuala'n a sawi Ann-i a lo thleng a, a reh lutuk tawh lo deuh. Ann-i chu ka en a, hmuh tawhna nei tlatin ka inhria, mahse, tunge a nih ka hre thei bawk si lo.








Jarson chu thil ka eitir a, thil ho te te hi min zawk sek a, a chang lahin sawi tur ber pawh hre lovin "Ama" hi a ti leh ngawt zel.










Tlai lam dar thum rik dawnah chuan Jarson chu a ham bai bai tawh a, muttir turin a khum lam ka panpui a, mahse a room thlen hmaa ka room tur an tihah chuan luh a duh avangin ka room turah chuan ka luhpui a "Bawiha, mu tawh rawh aw" ka tih chuan men deuh parin "Ama, ka mut laiin i lo bo daih ang dm?" a ti a, ka khawngaih lutuk, nu a nei tawh lo tih a inhre si lo.









"Ka bo dawn hleinem, i kiangah ka awm reng dawn alawm, mu tawh rawh le" tiin a bula mut pah chuan ka kuah a, min rawn kuahlet ve thak a, reilote hnuah chuan a muhil tawh tih hriat zetin Jarson chu a thaw sak sak tawh a, thawh mai ka tum chuan Jarson chuan min kuah nghet reuh hle a, tho ta lo chuan mu chungin phone ka khawih a.








Ann-i hmel ka mitthla deuh thut a, ani hi hmuh tawhna ka nei, ka ngaihtuah chet chet hnu chuan ka hrechhuak ta. Ani hi hmana Hmangaihzuala car-a lo thu, Hmangaihzuala'n Jarson a pawmtir nu kha a ni. A bialnu emaw ka lo ti kha ania.









Thil dang ka ngaihtuah leh a, Rinfeli dawra a rawn hruai nu khan mipa dang kawp lai a nei a, ani pawh kha a bialnu a ni lo enaw ni le? Hmangaihzuala hi ka U sawi anga mipa, hmeichhiate infiam nana hmang thin ang kha a ni dawn emaw ni le? Nge ni a, kei hian a ṭhatna lai chiah ka hmuhsak zawk mai mai. Rinfeli kha chu chiang tak khan 'Duati' a ti kha ania, engmah ka hre thiam tawh lo. Ani kha a bialnu nge ni a, a bialnu a lo ni lo zawk?

[Te-i Mrs Ambrose]

Pathlawia (Never Let You Go)
By: Te-i Mrs Ambrose




Chapter 5








Ka harh chuan ka hmaah Hmangaihzuala a lo ding run a, a hmel leh mitmeng aṭang engmah ka chhiar thiam lo, min en ren rawn a, ka zak lutuk ringawt. Ka phone ka bula let reng chu ka la kang a, dar sarih a ri dawn der tawh! Ka phu zuk mai.











"Vawiin lamah a lo hlei viau em?" tiin Hmangaihzuala chuan aw pangai takin min zawt a, ka ṭhuchhuak a, sam hui mam pahin "ai, a fel lutuk" tiin ka lo chhang a, ka tho phang hmel nena han hmachhawn chu a nuam em em hran lo.











Reilote hnuah Jarson pawh a rawn harh ve nghal a, engtia tun ang hun thleng thlenga tui em em la mu thei nge ka nih pawh ka inhre love.










"Apa, Ama nen kan mu a, Ama bula mut chu a nuam lutuk" tho phang aw zet hian Jarson chuan a sawi a, a nui var var bawk. "Ama bula awm chu a nuam lutuk, min duat si" tih zawm lehin min en a, min nuih var bawk, kei pawhin ka nuih let ve nghal a.











Hmangaihzuala chuan "Jarson-a chaw ei a hun tawh dawn, i lo chhuahpui dawn nia, chuan keini tan pawh chaw ei a hun tawh" tiin a inher nghal vut, a chhuak nghal a, Jarson chu enin "Bawiha, inphih fai lawk ang aw" ka ti a, lu bu nghat nghatin ka kutah a rawn kai a, washroom lam kan pan a.











Kan inphih fai zo kan chhuah chuan choka lam kan pan nghal a, choka kan luh chuan ka inthlahrung viau. Hmangaihzuala chuan chawhmeh vel a lo chhawp mek a, awmpuinu Ann-i kha a awm tawh lova, chutia a hmeichhia zawk ka awm ve reng laia a mipa zawkin chawhmeh vel a suak han hmuh chu thil nuam a ni hauh lo.











Hmangaihzuala chuan keini pahnih inkai phei chu min en a, "lo ṭhu rawh u" a ti a, hepa hmel aṭang hian engmah ka chhiar thiam lo, a meng thim deuh khup reng a, a mitmeng thim khup phena lunglenna ni awm tak erawh hmuh loh a har ṭhin viau thung.











Chaw ei tur chuan dawhkhan chu kan pathumin kan kil ṭhap a, chawhmeh ho zozai chu ka en a, Ann-i siam nge ni anga, Hmangaihzuala siam tiin ka lo ngaihtuah leh neuh neuh tawh.











Jarson chuan fel takin a ei ve mial mial a, a changin a ṭawng leh ṭhin a, ani ṭawng kan chhang tih loh chu Hmangaihzuala nen engmah kan sawi ve lo. "Zanin haw i tum em?" rin loh lutuk tak maiin Hmangaihzuala a rawn ṭawng chhuak ve hlawl.











"Imm,, ka tum deuh a" ka tih chuan tih tak hmel fahran hian "hetah riak mai rawh" a ti a, mak ka tihna ka thup hman lo a ni chek ang, amah bawk chuan "khua a nuam lo a, thli a thaw vuk vuk bawk si, kan in leh in în inkar a hla a, zanin chu riak zawk la a ṭha ka tih vang ania" a ti leh nghal thuai a.











Chutia min ngaihtuah ve anga ka hriatna chuan min tilawm hle. "khua a chhia elo?" ka ti ha. Kan mu char char sia, zana harh kan nih avangin khaw chinchang ka hre lo reng reng. A vawt ka ti deuh tih te mai kha a nia.











Ṭawng ka tum laiin Jarson chuan "Yes, ama i bulah ka mu ang aw" a rawn ti nghal a, Hmangaihzuala chuan "Ama kha tihbuai tawh lo tur aw, a chau ve tawh ang" a ti a, Jarson chu a ngui hmel nghal bar a, a pa chuan "Boy, tlangval i nih tawh kha, mahniin i mu ngam tawh tiraw?" a ti a, bu nghat nghatin "Yes,, kei chu ka tlangval tawh" tiin a nui thei leh nghal mai a.











Eikham chuan ka seng fel a, thleng sil leh ka tum chuan Hmangaihzuala'n "engmah i tih a ngai lo ka tih che kha Jarson ṭha taka i awmpui theih chuan a tawk, naktuk zingah Ann-i'n a sil mai ang" a rawn ti a, Hmangaihzuala en chung chuan "Hna dang engmah thawh phal loh tih chu Order em ni?" ka ti a, lu thing nghutin "Order chu a ni chiah lo" a ti a, "chutiang a nih chuan ka sil mai ang" tiin ka sil chhunzawm nghal a.











Hmangaihzuala chuan Fridge chu hawngin tui sik chu a lem khawlh khawlh a, Amah Hmangaihzuala chu en tawh lo mah ila, ka bek zawn za mer mer aṭang chuan min en tih ka hre thei, chu chuan min tilai ringawt a nih chu. Reilote hnuah ke pensawn ri ka hria a. Ka hawilet chuan Hmangaihzuala reng reng a lo awm tawh lo.










Ka nun hman dan vel chu ka ngaihtuah a, hman aṭanga ka lo duh ruk em em ṭhin, ka chan ngai loh tura ka ruat mipa inah khan tunah ka awm mek a, hun inher zelin ka nuna a thil rawn herchhuahpui chu ka tan thil mak a ni a, beisei phak loh thil lawmawm leh duhawm lo thleng a ni.











Thleng ka sil zawhin sitting room lam ka pan a, Jarson chu a toys ho nen a lo awm hnawk nuai a, a tlei viau bawk, a bul dawhkanah Hmangaihzuala chuan laptop hmangin hna a lo thawk mek a, ka va luh chuan a tarmit vuah chhan aṭangin min lo en a, min nuih zui nghal suk bawk. Chu chuan ka awm a tinuam nghal veng veng.










Jarson bulah chuan ka va ṭhu ve a, "Ama, min infiampui rawh" a ti a, ka infiampui chuan nuam a ti tih hriat tak hian a nui leh ṭhin a, chu chuan keipawh min ti hlim ve veng veng mai.










A hnu chuan a vawh deuh avangin tukverh ho kalh tur chuan tukverh lam ka pan a, ka dah chhuah chuan van chu a dum kuk mai a, arsi reng reng a lang lo, thli lah a thaw vuk vuk a, tun ang huna haw chu a chi loh khawp ang. Mahse, riah em chu ka duh bawk si lo.










Chutia van lam ka en dauh dauh laia "haw lo mai rawh" rawn titu avang chuan ka thlawk chhuak lo chauh a ni. Chutia ka phut em avang chuan Hmangaihzuala chuan min nuihin "Sorry, tihphut che ka tum lo, a tlai tawh si a, i himna tur ka ngaihtuah avang ania" a ti duah.










Ka rin ai daihin Hmangaihzuala hi a ṭawng thui, ṭawng bul deuh deuh bak a hman ve ka ring ngai lo kha ania, "ṭawng duah i thiam ve" ka tih chuan min nuih hawk hawkin "ka thiam ve alawm" a ti a, "I riak dawn ta em?" a tihzawm zat chuan "ka chhungte ka hrilh ve phawt ang" tiin ka chhang a.










Eng vanga riak tura min duh em em nge a nih le? Chutia riak tura min tih avang chuan thinlung lam chu a nui ver ver. Hmangaihzuala min en rengna lak aṭang chuan ka kalsawn a, ka nu chu ka call nghal.










"Nu" ka tih rualin ka nu chuan "Hello Bawihi i lo haw ṭep tawh em?" a ti nghal a, riah tur thu hrilh chu ka inthlahrung viau. "Ih nu, khua a chhe sia.." ka tih chuan ka nu chuan nui chungin "Aw Bawihi, ka hrethiam e, khua a chhe sia, lo haw lo mai turin hrilh che kha ka tum hman a, mahse, I hreh viau ka rin avangin ka sawi tum ni loh pui ka zawt che a" a tih chuan ka thaw deuh huai.











"khua a chhe sia, tun ang hunah hi chuan tawhsual tawh a hlauhawm si a" ka ti a, ka nu bawk chuan "Ni e, tawhsual tawh palh a hlauhawm alawm, riah i hreh loh chuan lo riak mai rawh, i pu chu a fel em, chuan naute pawh kha" a tih chuan an fel thu leh ka chunga an that thu te chu ka hrilh a, ka hahdamzia leh hna pawh min thawhtir phal loh thute chu ka hrilh a, ka nu chuan,










"Bawihi, mahse, hmeichhia i nih kha hre reng la, eng ang pawhin hna thawh loh tir che tum mahse, inchhung chet a ngaihna oai apiangah mawng zang takin che zat zat ṭhin ang che, hmeichhe awm awl lutuk chu hmeichhe ṭha an ni ngai lo ania" a rawn ti a, lu bu nghatin "aw, nu ka hria alawm" tiin ka chhang a.










"Nu vawiin lamah ka pa in eng nge a lo an?" tiin ka pa chungchang chu ka zawt a, ka nu chuan ka pa chu a ṭhat viau tawh thu leh kar thar lamah chuan damdawi in pawh an chhuahsan theih mai a rin thu a sawi a, kan inbiak tawp dawn lamah ka nu chuan "anih Bawihi, khatah khan lo riak mai rawh aw, i hreh lutuk lo bawk a, hetiang khaw chhe hnuaiah hi chuan ka hlauthawng ru emai" a ti a.










Kan inbe zo call kan hang up hnu chuan ka dak a, ruah a lo tla cher cher tawh a, Hmangaihzuala chuan a laptop bawk a bih leh ngur tawh a, Jarson lam chu ka pan a, a bulah chuan ka thu ve nghal a.










Darkar chan ve dawn a ral leh hnu chuan ruah chu sur nasa buan buan tak a ni, ṭek leh thli nen an thawk kawp a, ka haw lo kha ka inchhir lo hle. Jarson chuan "Ama, i bulah ka mu ang aw" a ti a, bu nghatin "Imm,, kan mu dun dawn nia aw" ka ti a. Jarson chuan hlim zetin "Yes, ama...kan mu dun dawn" a tih chuan Hmangaihzuala'n










"I Ama kha tihbuai loh tur, nangmahin i mut ngam tawh kha" tiin Jarson chu a rawn hrilh a, a awmdan aṭang hian ka lakah a inthlahrung tih ka hrethiam mai. "A ho lutuk, min tibuai dawn hleinem, ka bula a mut chu ka duh zawk mah, bakah khua hi a chhe sia, ka..." ka sawi zo lo. Hmangaihzuala chuan nui chungin "Aw le, i hlauhte chuan..." a ti a. A hmelah chuan a nuih a zat hmel viau.










Jarson chu a lamah a ko a, Jarson a kal chuan a mal chungah a pawm nghal a "Bawiha, Ama bula mut dawn chuan mut hma tur aw, chuan zanah Ama tihbuai loh tur" a ti a, Jarson chu fel zet hian a bu nghat nghat a.










"Chuan zan mut hmain zun theinghilh loh tur" a tih leh chuan Jarson-a'n rang zeta min lo enin "Ama, i room kan luh hunah zung ang aw" a rawn ti a, nuihin "Imm" ka ti a, Hmangaihzuala bawk chuan "chuan zanah i Ama lo ku ah nghet ang che aw, a hlau a" a tih chuan rang zetin "hei, ka hlau leh lo" ka ti thuai. Hmangaihzuala erawh chuan min nuih mai thung. Hepa hi vawiin tlai a lo haw aṭang khan a nui hmel ka hmu tam riau. Mahse, a nuam ka ti veng veng thung.










Jarson chuan mak tih hmel zeta min lo enin "Ama i hlau maw?" a rawn ti a, lu ka thing ringawt, chutah Jarson chuan a pa en chungin "Apa, ka tlangval tawh lutuk, Ama chu zanah ka lo kuah ang a, a hlau tawh miah lovang" a ti a, ka nui ta ringawt. "Good boy" Hmangaihzuala chuan tiin a samah a chulsak a.










Dar kua leh a chan ve velah chuan mu turin Jarson nen kan mutna tur pindan lam kan pan a, Jarson chuan room kan luh rualin "Ama, zung ang" a lo ti nghal a, ka zunpui a, a fel leh a pa thu a awi lutuk chu a mak ka ti zawk.










Ruah lah chuan han zai a rel duh lo emaw tih turin a la sur buan buan a, Jarson chuan a kut te ve tak chuan min kuah ve chial a, ka nui hak mai. "Ama, thawnthu min hrilh la" a tih chuan ka ngaihtuah neuh neuha "eng lampang nge i ngaihthlak duh a?" tiin ka zawt let a, thawnthu hi hriat pawh ka nei mang lo.









"ka hre lo, ka mut a chhuak, Ama thawnthu min hrilh rawh" a tih leh avang chuan ka ngaihtuahnaa awm ang ang chu ka hrilh a, ka sawi zawh meuh chuan Jarson chu a lo muhil fel der tawh. A fel em avang hian ka khawngaih thin, a hringtunu in a boral san tawh a, a lo ṭhang puitling zel ang a, nu a mamawhna a sang zel ang a, a ṭhiante'n a nu leh pate an koh/auh laiin ani chuan nu tia koh tur a nei ve dawn si lo.











Chutiang ngaihtuah rauh rauh chung chuan ka phone chu ka ban a, sana ka en chuan dar sawm a ri dawn hnai tawh. Vawiin nilenga ka ni hman dan chu ka ngaihtuah let a, a nuam ka ti a, Jarson bula awm chu a hlimawm takzet.










Chutih lai chuan message ka dawng hlawl a, Ramdina hnen atangin a ni
*i chanchin ka hriat hi a dik em?* tih te mai hi. Ka eng chanchin tak chu ni ang maw ti nauh nauhin
*ka eng chanchin maw?* tiin ka chhang let nghal. Ramdina chuan a seen nghal a, reilote hnuah
*Hmangaihzuala te inah a fa awmsak turin i awm tih hi* a rawn ti a, ka thaw hak mai, thildang daih a ni dawn emaw ka tia
*aw dik e* ka va ti a.










Randina chuan a fapa ka awmsak daih chu mak a tihzia te a lo sawi a, kei pawhin ka thian anih avangin engkim chu ka hrilh a, ani hi chu ka rinngam avanga thil engkim hrilh ka ni. Ramdina chuan
*chutia pawisa in mamawh viau te chuan min lo hrechhuak ve la ni tur ania, ka pui ve thei mai dawn che asin le* tiin a rawn thawn a, a lungawi vak lo tih ka hre mai.










Keipawh ka i ngaihtuah a, khatih hun lai khan ka ṭhian dangte tumah ka ngaihtuahnaah an lang lo Hmangaihzuala kha ka ngaihtuahnaah a lo lang hmasa ber a , chuan amahah chiah khan beiseina ka nei bawk anih kha. Mak ka inti hnuhnawh viau.










Kan ṭhian ho group-ah chuan ka lut a, Lalno-i leh Mami message a lo tam ngang mai, Lalno-i chuan ka awmma chu a nawm leh nawm loh vel hi min lo zawt sek a, Mami pawhin min ngaihtuah ve hle tih a message aṭangin ka hre thei. Ka chhang let dun a
*A nuam lutuk Hmangaihzuala pawh ka chungah a ṭha a, Jarson phei chu a duhawm belh sauhin ka hria* ka ti a, Mami chuan a rawn type nghal a










*a nuam i ti anih chuan ṭhat nasat chu, ka ngaihtuah lutuk che lawm* a rawn ti a, ani hi chu kan ṭhian ho bik rau rauah a puitling a, min ngaihtuah thei viau. Lalno-i ve thung erawh hi chu a â ve buang a, a naupang chhiain thil pawh a thlir thui vak lo.









Lalno-i pawh a lo la online a ni ngei ang,
*vawiin in che romantic thei em?* a rawn ti a, ka sawi kha, a naupang chhia viau zel, a ngaihtuah te hi a ho thei bik riau, mahse, kan hlimpui viau ṭhin thung.
*a fapa, alawm ka awmpui, chu tin kan romantic lo* ka ti a. A hnu deuhah
*Tunah a fapa nen kan mu a, min kuah ve chial mai* tiin sticker nui lem chu ka va thawn a.










Hmangaihzuala te ina ka riak chu mak an ti dun viau. Nia, a mak an ti reng ang, ka khum lova mut ka thiam mang tlat lova vawiin chhun lama ka mutui viau te kha mak ka inti ve reng a ni.









Minutes sawmhnih vel group-a ka va lan hnuin ka out a, ka data chu la off nghal. Vawiin chhun lama ka mut nasat tawh nen, ka mut chhuah avang chuan mak ka inti viau zawk. Jarson chu kuah ve pahin ka mit ka chhing nghal a.









Hmangaihzuala te inah chuan kar khat dawn lai a fapa ka awmpui ve tawh a, zan lamah erawh a zan khatna ka riak tih loh kha chu ka riak tawh ngai lo. Ka nitin nun hman dan chu a ngai chho char char a, a hahdamthlak viau nangin a boring ṭep ṭhin. Mahse, Jarson bula awm nuam ka ti a, tin, Hmangaihzuala chu ka chungah a ṭha a, mahse, a changa min en dan avangin ka ngaihtuahna a kal thui thei viau.









'Min duh ve a ni ang a' tiin beiseina ka nei dawn dawn ṭhin a, mahse, beiseina thlawn insiam ka duh loh avangin a chetdan engah mah chuan beiseina ka insiam duh lo. Chuan a awmdan ka ngaituah chian apiangin beisei tur tak tak a awmin ka hre lo leh hnuhnawh ṭhin.










Inrinni a ni a, Hmangaihzuala chuan "Apui, vawiin chu insiam la, kan chhuak ho dawn nia" a ti a, Hmangaihzuala hian 'Apui' min ti ṭhin, Jarson chu a au nghal, "Bawiha, insiam rawh le, vawiin chu kan chhuak dawn nia" a ti a, Jarson chuan hlim zetin "Yes, Ama min insiampui rawh aw" a rawn ti a, bu nghatin "imm, kan insiam dawn nia"ka ti a, Jarson chu a pindan lamah a tlan nghal a.










Zui ve nghal mai ka tum chuan Hmangaihzuala chuan ka kut a lo man a, mak ti taka ka en laiin "Nalh takin inchei rawh aw, mi kan hmuh tel a ngai dawn a, nalh takin inchei rawh aw" a tih chuan a ngaihna ka hre lo hle.








"Tumaw kan hmuh dawn?" ka ti ha a, Hmangaihzuala chuan "I hre ve mai ang, chuan i pindanah i kawr tur ka dah aw, kawr sen i inhmeh ka ti" tiin min chhuahsan a, ka biang a sa hat hat mai. Eng tak chu min hmuhtir tum ang maw?

[Te-i Mrs Ambrose]

Pathlawia (Never Let You Go)
By: Te-i Mrs Ambrose




Chapter 6








Jarson room lamah chuan lutin ka insiampui a, a thawmhmaw bawm ka en chuan ka nui tawp, coat suit a lo ngah ve viau a, an te hlawm si a, duhawm tak a ni. "Bawiha eng lam nge i hak duh" ka tih chuan rang zetin min chhang a.











A hak duh zawng ang ka haktir a, a inhmeh reuh hle. A rawng dum lam a thlang a, amah a cute in a smart a, tuna a hak hi inhmeh tak a ni. "Ama i la insiam ve lo, va insiam ve tawh rawh" tiin min nuih a, a nuih chiah hian a pa a ang lehzual anih hi.












Ka room lamah ka lut a, ka khuma paper bag lo awm reng lam chu ka pan a, Hmangaihzuala lo dah chu anih ka ring. Ka hawn chuan kawrfual sen hi a lo awm a, a dumin a pawlh zeuh bawk. Nalh tak a ni, a man pawh a tlawm ka ring lo.











Ka nui var var a, hepa lakah hi chuan ka luangral reng mai dawn anih hi. Shower ka nei zuai a, thawmhnaw ka hak chuan ka tawk chiah chiah a, ka pian a tilang chiangin pian a ti lang nalh viau. Mahse, hetiang thawmhnaw hak hi ka thiam lo, ka duh angin ka confi thei ngai lo.











Room aṭanga ka chhuah chuan ka room kawtah Hmangaihzuala leh Jarson an lo ding reng tawh a, Hmangaihzuala chu melh zeuhin " ka inthlak leh zawk mai dawn em ni ang? Hetiang kawr hi ka ha ngai lova" ka tih chuan uluk zeta min thlekin "I inhmeh lutuk" a rawn tichhuak a, chu chuan min ti confi phah ta sawt.











An pafaa ka en chuan coat dum ve ve an lo ha a, an inhmeh dun hle. Ka ngaihtuah a, kan zavai chuan chhungkua kan ang takzet. Ka thil ngaihtuah avang chuan ka nui sak.











"Kal tawh ang u" Jarson chuan a pa nena min kai chung chuan a ti a, apa pawh chuan lu bu nghatin min en a, "I hman tawh tiraw?" a rawn ti a, ka bu nghat a hmuh rual chuan ani pawh bu ve nghalin a ke a pen nghal a.











Kan zavai chuan step-ah kan chhuk ho a, ka ngaihtuahnaah Drama a lo lang daih thung. Ka ngaihtuahna ho te avangin ka nuih a la za em em zui. Kan chhuk thlak dan te chu slow motion in ka ngaihtuah a, a drama lutuk tak tak.











A car-a kan luh dawn chuan Hmangaihzuala chuan a tih dan fo ṭhin angin kawngka min hawn a, a hma lamah Jarson nen kan ṭhu dawn a, hei hi Jarson-a'n ka pawm a duh tlat vang a ni. Kawngkhar a khar hma chuan hriatthiam har zetin min melh a, ka chak ber pakhat chu Hmangaihzuala mitmeng chhiar thiam hi a ni. A chhan chu a mitmengah hian chhiar thiam loh thil tamtak ka hmuh ṭhin vang a ni.











Car chuan rang lutuk lovin kan tlan a, tunah hian dar nga a la ri lo deuh a, zanriah kan kil ho dawn a ni. Hmangaihzuala khan mi hmuh tel tur kan nei kha an tia, tunge a nih ka hre hauh lo. "Tunge kan hmuh tel dawn a?" inthlahrung deuh tak hian ka zawt, Hmangaihzuala chuan ngun takin kawng a en a, min rawn en lem lova "ka nupui Lenny nu leh pa te" a tih chuan ka lung zawn chu a rawn na zawk mai.











Ka thik, a nupui awm tawh lo mahse, a pasalin a la hmangaih zia ka hriat chuan chhung lam a na veng veng. Chuan tuna ka awmdan hi ka in zahpui hle bawk. Midang chu lo thik pawh ni ila, a la ziaawm deuh, mahse, Lenny kher kher chu thik tur ka ni lo asin. A thlarau zah saka a pasal hian a hmangaih hle pawha thik lo tur ka ni. Chuan tunah khan rilru chhe tak ang maiin Hmangaihzuala'n 'ka nupui' a tih avang khan ka thik anih chu! Eng ang hmeichhia nge maw ka nih le?











"Tinge min hruai tel ve a? Mihran daih ka ni bawk si" ka tih chuan min la en chuang lovin "i hre chhawm zel mai ang" a ti a, engmah ka zawt zui tawh lo. Mahse, ngaihtuahna chuan a dap thui khawp mai. Eng vanga a nupui boral ta nu leh pa bula min hruai ve ngawt nge a nih ang?











Restaurant changkang tak zawnah car chu a ding a, Jarson lah chu a hmaa phur viau si kha a zawiin a ngui riau a, motor a chuang fuh lo nge ni dawn ni? Jarson ber a nguai lap sia, keipawhin nuam pawh ka ti mang lo, Lenny nu leh pa kan la hmu dawn zui. Eng tin tak awm ho ang i maw?











Hmangaihzuala chu chhuak hmasa leh berin car kawngka min hawnsak a, Jarson ka pawm chu a rawn pawm nghal bawk. Jarson a rawn lak laia kan inhnaih lutuk chu ka thaw awm pawhin ka hre lo. Ka chhuah ve chuan Hmangaihzuala chuan car kawngkhar chu a nem phui a.











Jarson chuan a pa pawmna aṭanga chhuk thlain "Ama min kai rawh" a rawn ti a, nuihin ka kai nghal a, Jarson erawh a la nguai hmel viau tho. Restaurant lamah chuan kan inzui lut hlawm a, dawhkan kil lama lo ṭhute lam chu kan pan a, Lenny nu leh pate an ni ngei ang.











An lan danah chuan an tar viau hran lo, pa zawk hmel chu nelawm hran lova, mahse chutin a nelawm loh hmel chuang lo bawk. An nu erawh a nelawm hmel hle. Kan pathuma kan inzui min hmuha an hmel landan dang viau pawh chu ka hrethiam hran lo. Eng vanga Hmangaihzuala chuan min hriau ve nge a nih ang tih chiah ka ngaihtuah.











Kan zavai chuan dawhkan khat kilin kan ṭhu ho ṭhap a, tu vak mah kan ṭawng lo, dawhkan khat kil siin ngaihtuahna inang lo theuh kan nei a, chu kan ngaihtuahna theuh chu kan kawm niin ka hre ber. Nidanga ṭawng ve bar bar ṭhin Jarson lah a ṭawng hauh lo va, eng vanga nguai ta riau nge a nih ang, ka sawi ang tak tak khan motor a rui deuh emaw ni?











Chaw kan kil ho lai chuan Lenny nu leh pa chuan Hmangaihzuala chu an be zeuh zeuh a, Jarson chu rawn be ve ṭhin tak mah se, Jarson berin a chhan pawh a chhang peih mang lo va , a hnu phei chuan an be ta lo law law. Mak tih deuh ka nei a, chu chu Jarson chuan a pi leh pu hi a nel miah lo.











"Ama chaw min barh rawh" Jarson rawn tṭwng chhuak avang chuan ka en nghal a, "Imm,, ka barh ang che aw" ka ti a, Hmangaihzuala chuan "Bawiha nangmah khan ei la, i Ama pawhin a ei ve duh ang" a ti a, Hmangaihzuala en chuan ka nui a "ka puar tawh alawm" ka ti a Jarson thleng chu ka chawi nghal la.











Lenny nu chuan " 'Ama' a ni?" tiin za lo tih hriat zet chuan a nui a, a hmel nelawm tak hi ka nel thei mang tlat lo. Chuan Jarson-a'n chaw barh tura min ti chu ka lawm takzet. Tihtur dang ka neih phah a, ka thawk zing lutuk pawh a reh deuh zawk ngei ang.











Rei deuh fe kan ngawih hnu chuan Hmangaihzuala'n "Hei hi Jarson-a nu tur a nih hi" a tih chuan Hmangaihzuala chu ka va melh kawk. Eng thu nge a sawi kha! Ani khan kei hi Jarson nu tur min ti em ni. Ka hresual a ni ngei ang. Chutah ka hresual lo a ni tih rawn tichiang turin Hmangaihzuala chuan











"Ani hi ka fapa nu tur a ni" a ti leh a, ka lungphu a tlawk chhuak dawnin ka hria, "Chaw ei khamah ṭha taka inhmelhriattir che u ka tum a, mahse, tunah ka hmelhriattir mai ang che u, ani hi ka fapa nu tur, ka nupui hual Rochhingpuii, Bawihi a ni" a ti leh a, kei chuan Jarson thleng ka ken chu ka melh ngar ngar. Ani hian eng vanga a nupui hlui nu leh pa bula a nupui la ni mai tur anga min sawi nge a nih.











Hmangaihzuala chuan "Bawihi, tum aiin ka inhmelhriattir hma che u sia, ka sawi tawh ang khan anni hi ka nupui hlui Lenny nu leh pa an ni, i duh chuan Nu Mawii emaw Pa Sawma i ti thei ang" a ti a, hepa hi ka hrethiam lo tak zet. Car-a kan awm lai khan Lenny kha 'ka nupui' a ti a, tunah lah 'ka nupui hlui' a ti leh bawk a, amah leh a nupui nu leh pa te inkar hi a tha vak lo em ni le?











Chutah Lenny nu Nu Mawii chuan "Chutiang anih chuan keini pawhin kan lo kal chhan tak leh kan kohchhuah chhan tak che chu tum aia hmain kan sawi ang e, Jarson hi kan hnenah kan hruai tawh dawn " an ti a, Hmangaihzuala bek chu a pawng ṭalh ṭalh mai "tih theihna dan in nei hauh lo" a ti chang fak.











Lenny pa erawh kha chu a ṭawng ve hauh lo. "Court-ah kan inkhing ang chu" tia Lenny nuin a sawi leh chuan Hmangaihzuala'n "a pa ka la dam ve reng laiin a pi leh pu hian in chang ang maw, a theih loh hulhual a ni" thinrim sehchilh zet chuan a ti a, Lenny nu bawk chuan "kan chang khawp ang, nang hian i fapa pawh i enkawl ṭha hman lova kan chang khawp ang" a tih leh chuan Jarson chu ka en a, ka thin a rim ve phat











"Min hrethiam la, Jarson hi enkawltu nei lo a ni hleinem, englai pawhin a bulah ka awm dawn, ani hi naupang a nih hi, bungrua chutia inchuh phar vel tur a ni lo" tiin Lenny nu chu ka en a, ka inrawlh vena tur a ni em ka hre lo, mahse Jarson-a bungrua ang maia pawh kual vel a tum chuan ka thin a ti rim em a tin ni .











Hmangaihzuala chuan min ena nui sukin "In hriat ang khan Bawihi a awm a, Jarson pawhin a ngaina bawk, reilote hnuah a nu a ni mai dawn bawk a, Jarson chu in lo ngaihtuah a ngai love" a ti a, chutah Lenny nu bawk chuan "a nu tak tak ni lo hi nang hian a nu a ni tih i rintir avang chauha ngaina a ni" tiin tur zetin min melh a, Jarson chu melh leh nghalin











"Bawiha api te bulah lo awm ve rawh aw" tiin kan inbiak laia a hmel awmdan nen inthlak hlawkin nelawm hmel hluah hluah hian Jarson chu a en a, Jarson chuan min lo kuah nghalin "Ka Ama bulah chiah ka awm dawn" a ti a, a samah ka lo tuaisak.











"Ama haw ang u, hetah ka awm duh tawh lo" a ti a, Lenny nu chuan huatna mitmenga min melhin ṭawng tum ni awm takin a âng zuau a, Hmangaihzuala zawkin rawn ṭawng khalhin "Jarson-a'n haw a duh tlat sia, kan va chhuak hmasa mai ang e, Bawihi kal ila" tiin ngainat awm zetin min melh a, kan pathum chuan kan inzui chhuak a.











Car-a kan chuan thleng pawh chuan tumah kan inbe tawh lo. Hmangaihzuala chet dan te ka ngaihtuah let a, a sawi lai kha chuan ka ngaihtuahna a mang vek a, tuna thil ka ngaihtuah chian theih hnua ka ngaihtuah let chuan ka thin a rawn rim thut.











Ani hian remchangah min hmang mai mai niin ka hria. Khawiah nge a bialnu kha a awm? Hmangaihzuala hian Lenny nu thinrim hmel hmu turin a bialnu aiah kei min hruai mai mai niin ka hria.











In kan thlen hnu chuan Jarson chu a lo muhil fel der tawh a, Hmangaihzuala chuan a room lamah a mut a, kei erawh ka thin a la rim thung. Mahse, engmah ka sawi lo. Hmangaihzuala a lo let hnu chuan "tihpalh" tih te chauh hi a sawi a, hrethiam lo derin "engvangin maw?" ka ti a, Hmangaihzuala chuan











"Ka fapa nu tur anga ka sawi che avangin" a tih chuan "eng vanga i bialnu tak kha hruai lo nge i nih?" ka ti a, Hmangaihzuala chu rawn nui chhuak hawkin " Tu ka bialnu maw?" a lo ti a, a hre lo der chu ka ngei hlur mai "Aw Rinfeli" ka ti a, ka sawi hma leh a bialnu vel ka sawi hma kha ka ngai vawng vawng.











Hmangaihzuala chuan nui hawk hawkin "Ani kha chu ka lawyer leh cousin anih kha" a rawn ti anih chu! Engmah sawi ve tur reng reng ka hre ta lo.











Ka ngawih deuh vang vang hnu chuan "Eng vanga Jarson nu tur anga min sawi nge i nih?" he zawhna hi a chhana hriat ka duh takzet. Hmangaihzuala chuan thaw hawkin "Ka nupui Lenny nu leh pate hian a hma aṭang khan Jarson hi min laksak an tum tawh a, nangmah ka hruai che chuan Jarson pawhin nu leh pa enkawlna a dawng ve thei tawh dawn tih hriaa min chhuh zui ka rin tawh loh vanga hruai che ka nia. Mahse, rin aiin thil a thleng pawi ta sia" ro halha nui chung chuan a sawi a.











Zawhna dang ka la nei cheu "Eng vanga Jarson chu lak tum maw an nih?" ka tih leh chuan "I hriat tur chin chiah hriat tum rawh " Hmangaihzuala chuan a ti hniam ruih a, a thin a rim ta thut chu mak ka ti a, chuan ka hlau ru takzet bawk.











"Zanina Jarson thlavang i rawn hauh avangin ka lawm a, chuan ka nupui tur anga ka inhmelhriattir avang chein ka tihpalh bawk, mahse ka nunhlui engmah min zawt suh, i ngai chin chu ka hrilh mai ang che" a ti leh a, a ṭawng dan pawh a la hlauhawm reng.











"Ka va haw tawh ang e" tih leh kalsawn ka rual nghal a, chutia min biak avang chuan ka hlau a, mi thinrim hmachhawn dan ka thiam lova, an bula awm ka duh ngai hek lo. Ka mittui lah a rawn hnai kuar. Kei hian beiseina ka lo nei leh hman a ni hrep kha, mi bulah a nupui tur anga min sawi avang leh Bawihi min tih avang khan a nunah pawimawhna nei angin ka lo inngai hman a, a lakah engmah ka nih loh zia ka hriatna chuan min tina a ni.











Kawngka aṭanga ka chhuah fel rualin Hmangaihzuala'n ka banah chelin "keiman ka thlah ang che" a lo ti, min lo zuichhuak tih reng reng ka hre lo. Ka aw thununin "A ngai hleinem, Jarson lo awmpui zawk rawh" tiin amah pawh en lo chuan min chelhna chu ka pawt tla a, gate lam pan chuan ka kal nghal a.











Keia rei fe ka kal hnuin Taxi min tlanpel tur chu ka phar ding a, ka luh fel rualin ka mittui a tla ringawt anih chu! Ka muttui chu hruin driver hnenah chuan kalna tur ka hrilh a. Driver chuan sideglass aṭangin min rawn en a, mak min ti deuh a ni ngei ang. Hmangaihzuala nuna pawimawhna nei ve tur anga ka inngaihna khan tunah heti hian ka mittui a ko chhuak a, chumi avanga a laka beiseina insiam duh ngai lo kha ka ni. Mahse, zanin erawh kha chuan beiseina ka lo nei hman a, kha khan tunah min tina mek anih hi.











In ka thlen chuan ka nu bulah ka chauh deuh thu sawiin mut nghal ka duh thu ka sawi a, ka pa chu a lo chhuak tawh nangin room-ah a la tawm chawt a ni. Ka nu chuan mu mai tura min hrilh chuan ka room lam ka pan nghal a. Ka khumah ka bawk thlawp. Darkar chanve dawn ka bawh hnuin in wash turin ka thochhuak a.












Ka in wash fel ka mut leh hnu chuan Hmangaihzuala ka mitthlaah a lo lang nghal a, zan lama min ṭawngkhum dan ka ngaihtuah let phei chuan a nuna ka pawimawh loh zia leh engmah ka nih loh zia ka hriatthar leh avangin a biang a lum thla nghal pap. Mipa avang hian ka ṭap khat asin le. Mahse, tunah ka ṭah phah ta ringawt a. U Mimi'n hnaih lo tura min tih khan a na tur ka nih thu a sawi a, chuan tunah ka nat phah ta reng a. Hepa ka nuna a lo lang hi chu pawi ka ti takzet.












Zinga ka harh chuan ka pik luk a, ka lu a na ngut ngut bawk. Ka pang ka dek a, a lo sa vur bawk. Ka sana ka en chuan dar sarih a lo ri dawn tawh a, ka nu chu ka room-a lo lutin min rawn kaithawh a tum a, ka lo meng tawh tih a hmuh chuan mak a ti tih a mitmeng aṭangin ka hria. A chhan chu ka harh tawh chuan ka thawh nghal ziah vang a ni.












Ka nu chuan "Bawihte i ṭha em?" a ti a, "nu ka khua a sikin ka hria" ka tih chuan ka nu chu a hlauhthawn hmel kher mai. Ka pang a rawn dek nghal a, "Damdawi i ei tawh em?" tiin min en a, a hlauthawng hle. Lu ka thin chuan damdawi min laksak nghal a, ka ei zawh chuan ka lu a la nat em avangin ṭhut pawh thu rei peih lovin ka mu leh nghal.












"Vawiin chu hna kal lo mai rawh" a ti a, Hmangaihzuala te ina ka kal a ngai tak e! Ka lo mangnghilh daih. "Keiman ka lo biaksak ang che" ka nu bawk chuan a ti leh nghal a, ka hnial buai peih lo, Hmangaihzuala hmel hmuh ka peih lo hrim hrim. Ka dam lo te chu ka lawm zawk ṭep a ni. Mahse, Jarson ka ngaihtuah erawhin ka khawngaih hle. Min ngai ve ṭhin si a, tunah te hian min lo nghakhlel viau tawh awm sia.












Ka nu chuan ka phone a Hmangaihzuala number chu a dial nghal a, a kal hla deuh bawk. An inbiakna chu uluk takin ka lo ngaithla ve reng a, A lo phal a ni ngei ang, ka nu chu ka bula a lo kal chuan "I hnathawhna pa chu a fel hmel khawp mai, chawl turin a ti che anih che anih chu" a ti a, tawi tein ka nuih a, ka chu chuan reilote hnuah min chhuahsan a.











A chhuah hnu reiloteah phone call ka dawng leh a, ka en chuan Hmangaihzuala a ni, ka lung a phu dut dut a, eng tak rawn sawi ang maw tiin hlauthawng ru zetin ka chhang a, mahse Hmangaihzuala aw ni lovin Jarson aw zawk ka hriat avangin ka thaw huai.











Lehlam ami chuan "Ama i dam lo a mi? Apa khan i Ama a dam lo atia" a rawn ti a, "Imm,, i Ama hi ka lu a na lutuk a" ka tih chuan "Ama a na viau em?" a rawn ti leh "tlemin a na" ka ti a, "kei chu ka tlangval tawh a, ka lu pawh a na ve lo" a rawn tih chuan ka nui hak a, "Bawiha vawiin ka rawn kal dawn bawk si lova, min lo ngai ang em" ka tih chuan a ngawi deuh vang vang a.












"Imm,, ka ngai ang che, mahse, Ama ka ṭap miah lovang" a rawn ti a, "imm,, tlangval an ṭap tawh ngai lo, fel deuhin lo awm rawh aw, naktukah lo kal ka tum ang" ka ti a, "imm ama lo dam thuai thuai rawh aw, Apa pawhin a ngaihtuah lutuk che" a rawn ti a, ka lungphu a rang leh tawh.












Jarson nen kan inbiak zawh chuan ka mit ka chhing vang vang a, thla thum hi ral thuai se ka ti takzet. Hmangaihzuala hi ka hnaih leh tawh dawn lo, hnaih ka duh tawh lo. Ani kiangah hi chuan hlimna ka hmuh aiin natna ka hmuh a tam zawk ngei ang. Min duh ve lo tu duh reng natzia chu a tawngte bakin an hrethiam tak tak lovang. Mahse a mitmenga min melhna ka hriatthiam ṭhin loh erawh kha chu ka mitthla let reng tawh ang.












Chhun lamah chuan rin loh lutuk tak maiin Mami a lo lang hlawl "I dam loh te chuan i dam lo thu te min hrilh ve ta che, i nu lo be lo phei ila chu ka hre miah lovang" a ti nghal a, thupha ka chawi a, a nui leh thei mai "Hmangaihzuala'n i chanchin te a rawn ngaihven em?" a tih chuan lu ka thing nghat nghat a. "A ngaihven chhan tur a awm hleinem" ka ti zawi sep.










Mami chuan min kuah a "Ani zunah i uai kher kher hi chu aw" a ti vawng vawng, Hmangaihzuala avanga ka nat ṭhin zia hrechiang ber tu a ni bawk a, a lakah chuan insumna tel lovin ka ṭap ngam a, engkim ka thlen ngamna a ni bawk.












"Mam, ani kha bansan ka duh ve lutuk asin, mahse, he thinlung hian ani chiah kha a thlang si, tunah hi chuan amab hlat bak engmah ka duh lo" ka ti a, Mami chuan ngun zeta min enin "thil thleng a awm em ni?" a rawn ti a, nimin zan lama thil thlengte chu ka hrilh a, uluk takin a ngaithla a, Hmangaihzuala mizia mak a tih chu leh a mizia a hriatthiam theih loh thu min hrilh a.












Keipawhin Hmangaihzuala mizia hi chu mak ka ti a, ka hrethiam ngai bik lo, a changin min duh ve ta emaw tih theih tur khawpin ka chungah a ṭha a, min melh leh vung vung ṭhin a, a chang lahin a dang leh hlawk a, a lakah beiseina neih phah thei tur khawpin a che a, mahse, beisei tur tak erawh a awm ngai si lo. Hepa mizia hi engtikah tak hrethiam ang i maw?