All For Love (Chapter-8)

[Rebec Nunziri]

Chapter-8



Amelia Lalnuntluangi POV




Nicholas-a hnenah Cindy lo kal thu ka sawi kha a pawina ka hrelo, phone hmanga min rawn tawng el thin kha chu ka ngawih bo pui thei, mahse ka dawr ah leh zel min rawn kal chilh chu ka duh hauh lo. Eng ang pawn Nicholas-a nen lo khawsa dun pawh nise ka hriat a a rawn sawi kher a tul na ka hrelo ang bawkin midang pawn an hriat ka duh lo, khatiang thu a rawn sawi vang khan engmah a chhiat in a that phah lo, engtinge khatiang thu kha a rawn sawi ngam tih ka hrethiam lo zawk, mi pasal a ngaizawng mai bakah a nupui hnenah an khawsak dan a sawi ngam a nia, keimah mai pawh nilo hnathawk te leh customer te pawh an awm bawk, mualpho tur pawh kei nilovin a mah a ni tih a hriat ngei chu ka ring, nge ni a a pawi sa vak lo zawk.




Nicholas-an ka hnenah vawi tam tak a hming ti chhe lo zawnga khawsa turin min ti a nihkha, mahse enge thleng hi, amah leh a bialnu ngei chuan a hmingchhiat na tur thil an ti reng zawk si, diktak chuan khatiang thu Cindy in min rawn hrilh khan na chu ka tilo, mahse tlawm ka in ti a ni. Ka thinrim bawk, a tirah kha chuan Nicholas-a hnenah ka thinrim na te kha tih lan ka tum a, mahse enge sawt ang, chu ai chuan tha takin hrilh ila a thil tihsual chu a man a hre mai ang tih ngaihdan ka nei leh ta zawk a, ka duh ang takin thil a thleng bawk, a bialnu lo kal thu leh an khawsak dan a sawi tih ka hrilh khan tawng ngaihna hrelo in min en reng ringawt a nihkha, a thiltih sual ngei chu a hriat ka ring, a hmingchhiat na turin vawikhat mah ka la che ngailo, lo hmingchhe ta pawh nise a ma thiamloh a ni tihna a nimai.




Hun a kal ve zel a, Nicholas-a te company in an thil siam chhuah an tlangzarh hun tur pawh vawin zan hi a ni tawh, company neitu nupui ka nih avangin mipui hmaah zahawm taka lan ka ngai dawn tih ka hria, chuvang tak chuan ka kawr hak tur pawh Nicholas-an kal pui tura min sawm atang khan ka design nghal a. Kawrfual ka ke rek thleng a fual, a pawl tak a ni a, a ban tluan, a ngawng erawh tlem in a zau thung, ka kawng fek lang chiang tur a ni a, hmeichhe pian chhe zawk zawk ka nilo bawk nen kan han hak chhin vel pawn nalh ka in ti ve viau, in lamah nimin hna ka ban pah in ka hawn tawh thung. Dar 3 a rik chuan in lamah ka haw a, Nicholas-a erawh a lo la haw lo thung, ka inbual fai a, insiam nan a la hma bawk nen inhnuai lamah chhuk in U Tluangi nen chuan kan in kawm a, rawngbawl a hun a, U Tluangi chu ka pui a, Nicholas-a a rawn haw chuan chaw ei kan lo peih vek tawh, a inbual hmasa a, chaw kan ei kham ah insiam turin kan room ve ve ah kan lut a, U Tluangi chu a haw tawh thung.




Make up simple takin ka in bel a, ka sam chu ka ti kir bawk, sam ngil aiin a kir hi in hmeh ka in ti a, ka sam hi ngil chi a ni a, khawih danglam vak ka duh ngailo vangin ka ti kir vak ngailo thung. Kawr ka ha leh a, a mil pui turin pheikhawk sang ka bun leh bawk, ka in peih thawkhat tawh viau, ka clutch bag chu la in room atang chuan ka chhuak a, inhnuai lamah ka chhuk nghal, Nicholas-a chuan min lo nghak ran tawh, a coat hak chu a in hmeh hle, min hmuh chuan a thut na atang a ding chhuak a, a lam pana ka kal hnai chu mit khap miah lovin min lo en reng, min ti lai dawn lek lek mai. A hma zawnah chuan ka ding a, tawng pawh a la tum lo, "Kal ila" ka tih takah chuan a hawi sawn vut a, engmah sawi lovin pawnlam chu a pan nghal nal nal, a hnungah chuan ngawi rengin ka zui ve zel a.




Motor kawngkhar te chu min hawn sak thlap a, ka thut luh hnuah khar in motor chu a kal hual a, ka lo en reng, a chhelo takzet, a rawn thu lut ve chiah chu motor a hniam sulh in ka hria. A la tawng lo hrim hrim, "I company ah a mi party chu awm dawn?" party na hmun tur ka la hre reng reng lo, "Aw.. ka chhungte pawh an thleng tawh, ka pi leh pu te pawh lo kal thei se a tha tur a nia" a ti sup a, ka nu leh pa te ka nau awmna lamah an kal a, Mizoram ah an awm loh lai tak a ni chu a pawi hle, "Nia, tlaiah khan kan in bia a, duhsak na min lo hlan sak rawh an ti tak a sin" ka ti a, "Kan awm rei dawn lo ania, tunlai i thawk rim bawk si, haw I duh hunah kan haw dawn nia" a ti a. A hmun kan thleng a, kawt velah pawh chuan mi an lo tam hle, motor atanga kan nupa kan chhuak chiah chu min en thup a, security pakhat bulah chuan chahbi a pe a, thil sawi sup bawk, inchhung lamah chuan kan in zui lut a, ka nute (Nicholas-a nu leh pata) ka hmu nghal.




"Bawiha in lo thleng maw, Amelia-i chu I va nalh ve" ka nu chuan a lo ti a, "Nang deuh alawm nalh" ka tihchuan a lawm hmel hle, kan in neih atang vawi thum chu inpui lamah chaw kan ei tawh, an fel hlawm a, ka nu leh pate diktak ang maiin ka ngaina a, an ni pawhin an fanu ang maiin min en ve bawk. Kan titi a, Nicholas-a erawh a thawhpui te nen an in be fal thung, mi pawh an tam khawp mai, ka pa chuan a thiante bulah keichu min in hmelhriat tir a, ka pa thiante chuan ka hmelthat thu te an sawi ve luam a, nuam ka ti ve viau, min fak der mai mai pawh nise fakna tawngkam hrim hrim chu hriat a nuam ve thin a ni. Wine chu ka dawm ve vang a, mahse ka in tam lem lo thung, Nicholas-a chu a rawn lang ve hlawl a, ka bulah chuan min si chet in a rawn ding nghal.




"Nu Amelia-i hi kan thawhpui te bulah in hmelhriat tirna te kan nei ve ange, an hmu ve chak a" a ti a, ka kawngah chuan a rawn vuan nghal, ka lo phu zawk zui. Nicholas-a ang rual mipa panga vel lo din khawm naah chuan min kalpui a, "Bawihi, an ni hi ka thawhpui te leh ka thian tha tak tak te Ropuia, Awma, Zira, Tlankima leh Siama te an nihhi, phai lamah an hun tam zawk an hman avangin kan inneih ni khan an lo tel ve theilo a, chuan thiante u a ni hi ka nupui Amelia Lalnuntluangi a nihhi" a ti sup a, a thiante chuan min chibai a, "Engtinge kan thiana hian nang ang hmeichhe hmeltha lutuk te a thlem thuk theih zawk che a" tiin Nicholas-a chu an fiam a, Nicholas-a pawh a lo nui ve suk suk mai.




An titi na bulah chuan ka lo awm ve reng,a changin min be veleh zeuh thin bawk, an thusawi chu lo zawm ngaihna ka hre lo, ka nute bulah khan let leh daih mai ka duh rum rum a, mahse Nicholas-a hian ka kawngka a chelh ran mai bawk si. Stage ah chuan Nicholas-a chu a chho a, kan lo en thap, an thil siam chhuah te chu a sawi a, mipui hmuh turin a ti lang a, kut kan lo beng dar dar a, a rawn chhuk leh chuan ka bulah a rawn ding a, ka nute pawh reilote an awm hnuah an haw a, haw ve tawh mai ka duh a, mahse a la hma deuh vang chuan haw ka la sawi duh lo thung. Nicholas-a chuan min kal hlat san lo hrim hrim, ka bulah chet a awm a, a chang leh mamawh ka neih leh neih loh min zawt reng a, min ngaihsak em avang chuan ka lawm hle, midang hmuh a a ti a nih ka ring, lamchan vang mai mai a min ngaihsak pawh nise hetia min ngaihsak taka a awm hian nuam ka ti.




Kan pahnih chiah a kan din lai chuan "Bawih" ti ri kan hria a, kan sir lam atang chuan Cindy-i rawn kal phei chu ka hmu nghal zat bawk. Nicholas-a chu a rawn kuah a, Nicholas-a erawh in engmah a la sawi lo thung, "Ka lo thleng ve chiah a, vawinah shooting kan nei bawk sia, ka lo thleng hma theilo a, ka tihpalh a ni" a ti leh zung zung a, keichu min hmu ang pawhin a awm lo. Nicholas-a chuan engmah sawi a tum lo tih hriat takin a ka a chip tlat a, kan in awm hnaih bawk nen a ban lehlam ah Cindy in a kuah tlat bawk si, ka awm chu a nuam zan lo khawp mai. Cindy pawh chu ngawi rengin kan bulah a ding ve ta reng a, Nicholas-a ka en thin, nidang chu nise a ngaihsak leh viau tawh anga, mahse zanin chu a dang riau, Cindy-i lo kal ve chu a lawm hmel vak lovin ka hria.




Oh.. enge maw ka hriat ni, midang mit hmuh ah kan awm ania, engtinge lawm hmel leh ngaihsak hmel takin a awm theih tehlul ang ni?... Nicholas-a thiante pawh chu an lo kal a, Cindy-in Nicholas-a thiante a hmuh chuan a hre sa tih hriat takin a lo be nghal a, "I lo kal dawn ta lo emaw kan lo ti a" Tlankima chuan a ti hluk a, a aw chhuak chu nichin a kan in biak lai nen a in ang lo khawp mai, "Kei ber ka lo kal loh te chuan Nic hi a lungawi lo lutuk dawn asin" nui har har chungin a lo ti nghal zat a. "Amelia, Nicholas-a hi engtinge i tih bik a, in lo thlen tirh atangin i bulah a awm char char a, nidang ah chuan kan bulah a awm deuh chawt a, mahse zanin chu a thiante hi min ngaihsak hlawl lo, a chungah hian eng dawi nge i hman bik, hetiang khawp a hmeichhia a ngaihsak hi kan la hre ngailo" Awma chuan nui hawk chungin a ti a.




Chhan ngaihna ka hriat loh em vang chuan ka lo nui ve ringawt, min ngaihsak tih chu ka hre tho a, mahse midang hmuh atan bak a nilo tih Nicholas-a nen ka hrechiang thung, Cindy-i pawh chu ngawi rengin a ding a, keichu huat hmel zetin min en bawk, engah ka ngai lemlo. An thian ho chuan kan bulah an awm ve ta reng a, min be ve reng bawk nen keipawh nichin a nuam lo ka tihna kha tlem in a zia ta deuh, Cindy thung chu a ngawi reng a, Nicholas-a a melh leh zeuh thin bawk, vawikhat mah Nicholas-an a la be lo. "Chu hla chu, Bawih kan lam ve dawn em ni?, he hla ah hian kan lam dun nasat theih em kha" min rawn melh kher chung chuan a ti a, "Cindy, I tawngkam kha fimkhur rawh, Nicholas-a hi nupui nei lai a ni tih i hriat kha, chuvang chuan khatiang khan ko tawh suh" Zira chuan a lo ti a, Cindy pawh a ngawi chiang hle.




Kan ding reng bawk nen ka chawn a kham vek tawh, hmeichhe chhelo zet zet mai hi kan lam panin an lo kal a, Tlankima te chu lampui ah an rawn sawm, an in hre sa a ni ngei ang, an ni pawh chuan an lo pawm ve mai a, kan pathum chauh chuan kan awm leh ta reng mai. "Ka ke a kham, thut naah sawn ka va thu teh ang" Nicholas-a bulah chuan ka ti a, "Awle, keipawh ka rawn kal vat ang, Cindy min rawn zui rawh" Cindy-i melh ran chung chuan a ti a, pawn lama an kal chhuak lai chu ka en zui reng, thut na lam chu ka pan a, ka thut thlak rual rual in ka chawn kham ut ut chu ka hmet nghal neuh neuh a, Nicholas-a te khan enge an tih dawn chu ka hrelo a, mahse an rei loh hram ka beisei, a lo let vel ah haw ka duh thu ka sawi ang, tunah chuan in a awm a, mut hahdam vang vang ka duh, wine ka in bawk nen ka lu a hai deuh bawk a.




Darkar chanve chuang ka nghah hnuah pawh Nicholas-a leh Cindy te hmel reng reng hmuh tur a la awm lo, ka sana bun lai chu ka en zeuh a, dar 12 a ri hnai tawh, an va han rei em em ve mawle, mipa pakhat hi ka bulah a rawn thu a, "Ka lo thu ve chu pawi I ti em lovang chu maw?" a ti sup a, "Ti love" Ka ti ringawt, "I pasal hi hmuh tur a va awm lo ve" a ti leh a, "Nia... pawn lamah mi be turin a chhuak a" han biak dan tur vak ka hriat loh avang chuan ka ngawi leh vang vang a, "Aaa... in hmelhriat tirna pawh ka la nei lo a, keihi Lalrinsanga ka nia, i pasal nen hian school kan kal ho thin" a ti leh a, kan han in biak tak zel ah chuan a lo fel reuh phian a, Nicholas-a nen chuan middle an nih atanga Higher thleng school an kal ho thin a, mahse an in kawm ngai em em lo thung.




"A tlai tawh bawk sia, ka kal mai ange, in pa chu biak ka duh nen mahse a pawi lo, a buai zia ka hria a, nakinah ka hmu mai ang" tiin a ding a, kan in mangtha hnuah keipawh chu ka ding chhuak a, Nicholas-a te chhuah na lamah chuan ka kal a, ka la hmu mai lo zui, thim deuh laiah chuan ka kal zel a, thawm ka hriat takah chuan ka ding chawt. A thim deuh avangin tute nge an nih chu ka hre thei mai lo, ka kal hnai leh deuh a, eng in tlem a rawn chhun takah chuan ka hmu chiang thei ta. Lalpa leh, engtinge sawtiang sawn an awm theih zawk, ka in her vat a, inchhung lamah chuan a tlan in ka tlan lut zui nghal, ka thut naa ka bag kalsan chu la in pawn lamah ka chhuak nghal, engtinge ka haw tak ang, tun ang zanlai tawh ah chuan taxi hman mai tur pawh a awm tawh awm silo a.




Ka rilru chu a hah takzet, ka hawi kual a, motor tlan hmuh tur a awm lo hrim hrim, helai te chu hmun ual au lutuk ania, engtinge nge motor tlan pakhat mah hmuh tur a awm loh theih zawk ni, building hnuai garrage Nicholas-an security motor a park tir na lam atang chuan car a rawn tlan chhuak a, Rinsanga a lo ni, ka zawn a rawn then chuan motor a ti ding a, "I haw dawn em ni?" a ti a, "Aw.. mahse haw na tur" ka tih lai mek chuan "Ka hrethiam e, Nicholas-a ka hmuh loh danah a la haw ve hman lo a ni ngei ang" a ti leh a, "Nia.. a la buai deuh a, ka lu a na riau a, haw san mai ka lo tum a" ka ti a, "Um.. ka rual in lo haw ta che, in in lamah ka kal dawn tho a" a tih takah chuan hnial ka tum lem lo, haw na tur ka nei tlat lo a ni, a motor a ka lut tur chu Tlankima'n min rawn ko a, "In pa nen in haw rual dawn lo a mi?" a ti a, "Aw.. nia, englo ka haw san thu min lo hrilh sak ta che, ka nuam lo deuh a" chhuan lam dang siam tur ka hrelo.




Kan haw kawng ah chuan Rinsanga'n min be leh zeuh zel a, tha tak chuan ka chhang ve mai zel, ka thil hmuh avang khan ka la pangai theilo, ka luak a chhuak deuh hlui bawk a, in thlen vat vat tluk a chak ka neilo, "Ka lawm lutuk a nia aw, awm lo la chu haw na turah ka buai hrep awm sia" ka ti a, kan in zawn ah motor a tih din dat rual chuan kawngka hawn na chu ka vuan nghal a, "A ho lutuk, I chauh hmel emai, mu hahdam vang vang rawh" a nui sang a, kan in mangtha hnuah a ni pawh a tlan chhuak ve nghal. In chhung ah ka lut a, mahni chauh in ka awm ngun ve tawh bawk a, ka hlau tawh hran lo, kawngka chu kalh lovin ka khar tha a, ka pheikhawk bunin ka ke a nawt deuh bawk nen ka bai euh euh a, ka room ka thlen chuan ka thawmhnaw hak te chu phelh sawk sawk in in tifai turin bathroom ah ka lut tlang nghal.




Ka zawh hnuah ka chhuak a, bathrobe ha chungin mut kawr chu ka la chhuak a, ka ha nghal sawk sawk, ka sam huh chu ka hru thuak thuak bawk. Ka sam ro deuh hnuah chuan khum lam ka pan a, ka chau bawk nen muthilh vat ka duh, ka mu chiah chu muthilh chu hnai lo tak a ni, party neih na hnung lama ka thil hmuh te chu ka mitthla ah a rawn lang uar uar a, engtinge khatiang khan an chet theih zawk ni, tenawm lutuk mai. Kei lahin engmah hrelo in an lo let hun ka lo nghak a nia, ka ngaihtuah chiang hian ka thinrim a, tlawm ka in ti ngawih ngawih bawk, engtinge kei a nupui inchhung lama ka awm reng laiin hmun thim tham ah sex an lo hman theih, na tih na chu ka neilo, mahse Cindy-i min hmuhsit na belh chah leh tur avangin ka thinrim em em a, Nicholas-a ka ten hle bawk.




Nupa dang angin khum khat ah mu lo mah ila a nupui ka nih na ang tal chuan min zah ve ka ring a nia, mahse ka rindan sual zia zanin khan ka hrechiang tawk tawh. Pawn lamah ka hmuh phak leh ka awm ve loh naa an khawsa dun a nih pawhin ka hrethiam mahse zaninah kha chu hriatthiam harsa ka ti, kan pahnih in in atang kan chhuak dun a, a nupui ka nih na ang tal chuan min ngaihsak in khatiang khan hmeichhe dang a bialnu pawh nise a awmpui tur a nilo hrim hrim. Ka ngaihtuah chiang telh telh a, ka thinrim na a zual zel bawk, Nicholas-a nen hian nupa hlim tak kan nih theih chu ka ring ngailo, mahse thian ang tal a kan awm theih chu ka ring a nia, mahse min zah lo lutuk chuan in ngeih taka awm pawh a tul na ka hre leh ta lo, mu chunga ka ngaihtuah na ka kawm melh melh lai chuan room pawn lamah thawm a awm a, Nicholas-a bak a nih ka ring lo.




Ka room kawngka chu a rawn hawng a, a rawn lut zui nghal zat bawk, engmah sawi lovin ka lo en ran a, ka khum sir ah chuan a rawn ding a, "Tinge min lo nghah loh, engvanga lo haw daih nge i nih?" a ti chhum hmuk a, a thinrim hmel hle bawk. Ka ner sak a, engvangin nge a ni nuam tawl mai mai kha ka nghah tehlul ang ni, "I rei em a, ka haw a nihkha" ka ti sam et a, ka thinrim na te chu sawi lan ka tum lo, mahse a tul a nihchuan sawi lan pawh ka hreh lo thung, "Kan kal rual a, nupa kan ni bawk, mipa dang nen in haw dun tih miten an hriat khan mak an tih dan tur i ngaihtuah pha miah lo em ni, Lalrinsanga ber kher nen lehnghal a in haw dun kha ka lungawi ring hauh suh" a ti leh nghut a, vin lo mahse a aw chu a chang tha fak fak hle.




"Mite ngaihdan tur ka ngaihtuah si se lo, haw ka duh a, a ni a lo haw dawn chain a, a remchang nen a rual in ka haw mai a ni, chuan chhuak tawh rawh, ka chau viau a nia, mutthilh vat vat ka duh" ngeiawm zet chuan ka ti a, "Lalnuntluang, khatiang khan engvanga awm nge i nih hrep a?" ka awmdan chu ngaithei lo tih hriat zetin a ti ta hrawk a, "Engtinge ka awm, ka chau ka ti mai a nihkha, chuan chhuak vat teh" ka ti leh a, "Engvanga min lo nghak lo nge i nih, engvangin nge mipa dang i in thlah tir, nge ni a nang hi hmeichhe sih hnip tak, mila ten an duh duh naa an hruai kawi theih I ni zawk?" a sawi zawh rual rual chuan thinrim zetin khum atangin ka tho chhuak a, engtinge a bialnu nen khalai hmunah khan sex an hman hnuah engmah ti sual lo ang maia min la ṭawngkhum ngam zawk ni, nge ni a keihian engmah ka hrelo emaw a ti zawk?..




"Min vin hauh suh, chuan khatianga min ṭawngkhum tur khan enge i nih bik, Cindy nen in thiltih kha ka hrelo bik turah I ngai a nihchuan i tisual hle ang, duhthawh taka in che dun lai kha ka mit ngei hian ka hmu che u, chuvang chuan mipa fel ber awm zia zang khan min ṭawngkhum lo mai teh, tunge tenawm zawk chu kan hrechiang ang chu, i lakah hian ka lungawi hi inring bik em ni?.. Nupa tak tak nilo mah ila kan pahnih in kan chhuak dun a, chuvang chuan min ngaihsak ve ka phut a sin, mahse enge i tih kha, kei i nupui ngei inchhung a ka awm ve reng laiin thim tham ah i bialnu nen nuam in tawl a nilawm ni, lu na ut ut chungin in rawn let hun kha ka lo nghak reng cheu asin, mahse in rawn let mai silo a, In kalna lamah khan ka rawn kal ve a, in pahnih a in khawsa dun lai kha ka rawn hmu, chuti chung chuan nanghi ka lo nghak ang che maw?" a au in ka au a ni ber.




A mitmengah chuan in thiamloh na ka hmu a, mahse a ti der bak a nih ka ring lo ve, an khawsa lai ka hmu tih a hriat takah chuan a zak nge tawng mai lovin min en a, a mitmeng pawh a khup deuh lap mai, "Chhuak rawh, I hmel i engkim hi ka ten a nia, chuan ka phal na tello chuan ka room ah hian rawn lut leh tawh suh ang che" ka ti leh fak a, "I thil rawn hmu..." a tih lai mek chuan "Engmah sawi suh, I in sawifiah kher a ngailo, i hriat chian kha a hming mai chauh a nupa kan ni, i bialnu nen khan in duh ang ang chuan in khawsa thei alawm, mahse maw, a hming ang tal a i nupui ka nihna laiah min zah ve ka ring asin, ka awm ve reng laia i bialnu nen in khawsa dun khan min ti tlawm hle tih hria ang che, ka hria in hmangaih emaw in duh vanga in nei kan nilo tihchu, thian tal kan nih theih ka lo ring a, mahse ka rin na dik loh zia chu ka hrechiang tawh nang nen hi chuan engtik ah mah thian emaw nupa diktak kan ni ngailo ang" ka ti leh a.




Ka lungawi loh na te ka sawi chhuak vek chu ka thawl huai in ka hria, "Chhuak vat teh, I hmel pawh hi ka hmu hne ngawih ngawih" ka ti leh nek a, in thiamloh hmel takin a in her a, ka room atang a chhuak chiah chu ka thaw hak a, "Zaktheilo lutuk, engtinge khatiang khan min ṭawngkhum ngam zawk ni?" ka la phun hlak hlak a. Zingah pawh chuan nidang aiin ka tho tlai, zan lam ka mu thalo bawk nen ka mit a kham thum lehnghal, in tifai in ka in siam nghal a, hna kal thei nghal mai tur chuan inhnuai lama ka chhuk a, choka ka lut chu U Tluangi min lo be nghal vat, ka chhang let tih loh ah chuan ka tawng mang lo, chaw ka ei lai chuan Nicholas-a pawh chu choka ah a lo lut a, a ni erawh a la insiam lo thung.




A rawn luh lai a ka melh zawk tih loh chu ka en leh tawh lo, chaw chu ka ei mawlh mawlh a, min rawn en leh zeuh zeuh thin tih ka mit sir in ka hmu thei. Chaw ka eikham chuan ka tho tharh a, ka kut te chu silfai in "U Tluang ka kal nghal mai aw, kal hma ka ngai a" ka ti a, "Awle, I lo tlai leh dawn a nimaw?" a ti ve a, "Aw.. lo haw hma vak lovang, kan buai deuh bawk sia" choka atang chuan ka chhuak a, ka car chhung a ka lut tur chiah chu Nicholas-an min koh avangin ka hawi let a, "Nizan thil thleng kha ka thiam loh a ni tih ka hria, khatiang kha a thleng nawn leh tawh lovang" a ti sup a, "Ka sawi tawh kha, in duh ang ang in che rawh u pawi tihna ka neilo, mahse ka awm ve reng lai chuan khatiang kha thleng tawh suh se, chuan hmingchhiat i hlau hle bawk a, in fimkhur dawn nia, nizan te khan kei nilovin midangin rawn hmu ta cheu se in hmingchhe hle dawn tih i hriatthiam ka ring" dam dap chuan ka ti a, motor ah chuan ka lut zui nghal daih bawk.




Karhnih lai a liam leh tawh, Nicholas-a nen chuan kan in be ngai lo a tih theih ang, in khat ah cheng mah ila kan in hmu khat em em a, a ni ai hna ka haw tlai a, chaw ei ah erawh min lo nghak ziah thung, ngawi rengin chaw kan ei a, biak ka tum ngailo, chaw kan ei dun tih loh ah chuan kan in hmu ngailo, ka room ah ka tawm deuh chawt a, a ni pawh hna a thawk rim tih ka hria, in ah hian office a nei a, tah chuan hna a thawk thin. Karleh mai hi show kan neih hun tur a ni a, kan in peih thawkhat tawh viau bawk, zaithiam lar tak tak kan sawm bawk a, midang duh ang ngeiin keipawh model angin ka in lan dawn a, Terina a phur fal hle, midang thawn thut kan duh avangin kan la sawi chhuak lo thung, show kan neih dawn avangin karhnih chhung lai order kan la tawh lo bawk a, kan buai pawh a zia deuh.


....


Show kan neih ni a ni a, kan chhungte pawh an rawn tel kim hle, ka nau a rawn haw tawh bawk a, ka pasal chhungte pawh an rawn kal tam khawp mai, ka phur rual rual in ka zam a, model ang a ka in lan dawn miau avangin mipui lo kal khawm te pawh ka be mumal theilo, a tawp ber ah ka in lan dawn a, midang an in siam vek tawh laiin kei erawh show tan a nih hunah mipui hmaah ka in lan a ngai dawn a, ka la insiam ve lo thung. Terina chuan a host a, min koh takah chuan ka chhuak vat, mipui lo kal khawm te chu an lo au a, kan thawmhnaw tih chhuah tur ang te chu ka sawifiah a, ka rin ai takin mi an lo kal tam, thla la tute pawh an awm far a, camera chu a de chuai chuai a, mit a ti vai lek lek hial thei, ka thusawi tur ang te ka sawi zawh chuan stage hnung lamah chuan ka lut a.




Nicholas Ramnunpuia POV




Kan nupa in kar chu a hma aiin a hla sawt a, ka thiamloh a ni tih ka hria, engvanga lo insum zo lo nge ka nih, Amelia-i khan min hmuh ka ring miah lo ania, Cindy nen kan in zui chhuah khan kan inkar tawp tawh thu chiang taka sawi ka tum kha a ni a, mahse min hre chiang em a, ka chakna ti so sang tura chet lak dan a thiam lutuk tlat, ka lo lem ve sek tawh bawk nen ka insum thei lo khan khatiang thil kha ka ti ta kha a ni a, inchhir in sawt na a neilo tih ka hria, mahse kan nupa inkar hla ta sawt chu hreawm ka ti. Amelia-i tawngkam te khan ka sawifiah thiam loh natna min pe bawk, Cindy-i lah chuan min zar buai lehzual a, nitin ka office ah a rawn kal thin, kan inkar tawp tawh thu ka sawi hnu a khatiang thil ka tih leh vang a ni a, engmah sawi buai theih leh tuma dem tur ka neilo.




Amelia-i biak ka duh a, mahse a tan engmah ka nih loh zia chu a tuk lama a tawngkam atang khan ka hrechiang lehzual, Cindy-i nen kan duh ang ang a kan awm theih thu leh engah mah a ngaih loh zia a sawi te khan ka na zawk a, mahse engvanga nge ka nih erawh ka hrelo thung. Nge ni a keihian Amelia-i hi ka lo duh reng tawh zawk, ka rilru put hmang pawh hi ka hrethiam tawh hrep lo ve. Show a neih ni a nih avangin company atang ka chhuak hma a, a hmun ka thlen chuan an lo tam khawp mai, ka chhungte bulah chuan ka thu a, rin phak bakin a ropui. Show an tan a, Amelia chu stage hnunglam atang chuan a rawn chhuak a, a nalh takzet, a nui sang a, a thusawi atang chuan a in rin tawk zia a hriat theih.




Show an tan a, an thawmhnaw rawn pho chhuah te chu a nalh hlawm takzet, mipui kal khawm te chuan an phone lek chhuak in video in an la a, ka nupui hi designer satliah mai mai a nih loh zia a thawmhnaw design atang a hriat theih. Zaithiam an sawm nual bawk a, an thawmhnaw rawn pho chhuah zawng zawng te hi hralh a kal dawn hle tih ka hre nghal, tunlai hmeichhia te thawmhnaw duhzawng tak vek ni chungin a zahawm a, taksa lang tam thei lutuk ang kha a nilo. Terina a host a, a zei bawk nen mipui kal khawm te chuan nuam kan ti dar dar viau mai, show tawp na atan hmeichhe kawrfual party naa hak chi an rawn pho chhuak dawn a, tunlai zaithiam lar em em mai thalai te duh rawn in thiam takin hla a rawn sa nghal zat bawk.




Model te chu an rawn kal zel a, a tawp na ber a rawn kal chhuah takah chuan mit tla lo chauh in ka lo en a, model angin a in lan dawn tih reng reng ka hrelo, a kawrfual hak a vun nen a in rem zet te nen chuan thlir nin har tak a ni. Zei takin a kal a, camera hmaah chuan zam hauh lovin a in pose a, chulai hmun a kal khawm te chuan mit tla lek lovin kan en thup, model pangai te ai pawhin a kawr hak chu a in hmeh in a zei zawk bawk. Ka lam chu a rawn hawi a, a nui sang bawk, stage hnung lama a luh leh thleng chuan ka en zui reng. Terina a chu a rawn chhuak ve leh a, show buaisaih tu leh kawr design tu ni bawk chu a ko chhuak a, ka nupui ngei mai chu a kawr hak ngai nen chuan a rawn chhuak leh a, hlim hmel zetin a kut chung lamah a phar a, hmundang ka hawisawn theilo, ka nupui chhelo em em mai chu ka en ngawih ngawih a ni ber.


Cont....


Click a that viau chuan naktuk zanah ka dah leh ang aw...