Political Love Story_Fiction
Chapter-15 Chhunzawmna
Ziaktu: Cck Lalchhuanawmi
(Mutthluk harh rualin ka lo dah, naktuk atang chuan ka zia tawh mai ang
) A mizia leh chezia a inthlak hlawk zel a, khum khata a mut pui ngei pawh hian a mize dik tak ka la hre thei lo.
Chuvang chuan, ka chhânna chu 'Aw' tih hi a ni.
"I ngawih rengna khan Chhânna dik tak min pe e. Dik loa min ngaitu zawng zawngte avang hian lunghnura lak ka tum lo. I awm avangin a ni. Tunah, min rin(ring) tlat ka lo Beiseina che Bang chu nangmah ngeiin, i ngawih rengna hmangin min tihchimsak ta a nih hi".
Sammy chu a tho a, a Office-ah bak kalna tur a nei lo.
Rin ka duh a, rin tumin ka insangmar nasa, nimahsela; min tih ang chiahin amah ngeiin, ka rin theihna tura Bang ka rem chu a tichim zel zawk alawm.
Umzuia insawifiah ka tum lo, inngaihtuah sela, ka rin loh chhan ngaihtuah chhuah tum rawh se.
Airport-ah Lalfela te chhungkua kan thlah a, Siamtea te unau thum School an kal avangin Sammy nen chuan kan haw hma.
Lal Fanu hi chu a bâng hma pawlah a la ṭang a, Siamtea leh Freddy-a te School bân hmaa hruai a ngai ṭhin.
Ka nu leh pa, Hriatpuia leh u Hmai te lo haw hma chu Sammy-an min thlêk vung vung.
Ka awmna bulah a inṭhuttir zel, ka hlau tawp si lo.
U Ngaia ka hre ru kar, ka chungah eng pawi emaw tak a khawih chuan u Ngaia ka mantir hmak dawn.
Thinlung phêkah Chemtêin ka ziah hnan tawh, Chemtêa ziak ka nih avangin Thisen a hnâm ṭiam ṭiam reng tunah hian.
"Sam, Lal.Fanu hruai ang hmiang", min chhâng loin mi melh kal.
Chokaah kan ṭhu a, Hmarcha ka siam. Haw huna Atta nuaia kan(kang) ni tawh mai. U Hmain a lo kang thut thei bawk a.
"I lo kal ve dawn em?", ka ti leh, "Khati khan i kal dawn em ni?", ka inenkual, "Ni mai, Dawrah ka pêng dawn lo a",
"Kal ang", a tho vut, a mawng phe ka hmu hman chang chang.
Motor ka thlen chuan Driver seat-ah a ṭhu fel diam tawh. Motor bulah Driver a ding ngawi reng.
Duhsaka, Airport-ah a la awm tak e.
"Sam, nangmahin i khalh dawn em ni?", a khalh lai ka la hmu lo, "Lo ṭhu rawh", a ti hmuk.
A hnung lam kawngkhar hawnga ṭhut luh pahin, "I khalh thiam ringawt mi le? Min accident pui vaih, ka hrânkhum chiang ang che chu", ka ti lang lang.
"Engvanga hnung lama ṭhu nge i nih?",
"Thiam lo chunga khalh i ni dawn a, ka invêng a nih hi", ka ti hlak.
Nge nina vei, âw nêm min hmankhum bik hleinem maw.
Sammy-an, "Ka thiam leh thiam loh hre turin ka khalhah i chuang tawh em ni?", a ti hluk.
Va han chhe zawt zawt tak.
Dim hlek loin, "Chutiang hre turin i khalh tawh mi? Driving Lisence-te i nei reng reng em? Ka chuang ngam hi lawm hle tur i ni", ka ti bawrh bawrh.
"Khalh chhuah hma hma", a ti thâwp sup.
"I suahsual tukkhum pâwna rawn kuk lawlh che i duh loh chuan khalh chhuak vat rawh. Lal Fanuin min lo nghak reng palh ang e", ka ti zet zet.
A khi sak ringawt, "Ka bulah i lo.insawn hma ka khalh chhuak dawn lo",
"Remsangpui", ka vin ṭhat.
Ṭha te tea biak a theih loh. Tunhnai phei chu a chunga lungnih lohna a lian si, min han fiam ngam zawk te hi ka ti.
"Hmar Hrangsie i koh chhuah hmain khalh chhuak vat mai rawh", vin tâwkin ka ti leh.
A ruka Driver nui kur kur ka la hmu zui.
Remsangpuia bakin a tuar dawn chuang lo, "Nupui ngam lo", tiin, Driver-an a sawi chhuah phei chuan an khêl luai luai ang a, a nuam ngawt ang chu.
"Ṭha lawm", phun hlukin a tinung a.
A khalh thiam tih ka hre miah lo, thin phu dêp dêpa ka awm pawh a zia hret hret.
Inbe leh miah loin School kan thleng, School kawtah Lal Fanu a lo ding reng tawh.
"Nangmah vang", ti hlakin ka chhuk a.
Lal Fanuin min hmu chu, lo tlanin min pawm vawng vawng. Sammy pawhin kan bul lo thlengin, "Haw hma ang u", thawt thawt hian a...
"Princess, eng nge i ei duh?", kun hniamin a zawt a, "Ice Cream", KFC a ti lo chu, a vanneihthlak mang e.
Ice cream lei turin Dawrah kan lut a, Sammy-an ka nu leh pa leh u Hmai te kêpin, Polythene-ah a khaiin a khai.
A man a pe, kalsawn a tum chu vei lamah sir zawngin a let ringawt!
"Sam?",
"Apa?", Lal Fanu nen kan pan thuai, "Sam, i ṭha em?", a meng kual ruai a, a hmui a inchip tlat mai.
Ṭawng tuma ân a tum a ni ngei ang, a hmui a tiche nasa ngang.
Midangin min pui a, hmun kil deuha zangthalin an muttir. A bân leh dar bawr vel ka hmet nawk nawk.
A ṭhat phah dawn pawhin ka ring lo.
"Damdawi inah hruai ila",
"Ambulance ka lo ko ang aw", an ti luai luai.
Ka hnial duh lo, "Aw, khawngaihin min koh sak teh u", ka ti chu, Sammy-a a rawn ṭhu chhuak hlawl!
"Ka ṭha", a ti thûm dut.
A ṭha chiang bal a nih hi.
"Apa, i ṭha maw?", Lal Fanuin a ti a. A kuah hle hle.
Min timangang hman alawm. Khatianga han tluk tawp, hrisel ṭha sen suah a nih vei nen.
Rilru hah hun lai a ni sia, chumi avang a ni mahna. A thluak a hmang rim dawn sia.
Inenkawl ṭhat a mamawh hle.
Lal Fanu nen a hmaah kan ṭhu ta a, Sammy chu a ngawi leh reng tawh.
U Hmain Atta a lo kang a, ka nu leh pa te an inbual mek thung. U Hmai chu zo lam ni mah se, ka pui tho.
Zanriah ei laiin, "Naktuk chu kan haw ve tawh ang e", ka pain a ti a.
"Boruak hi a reh lam a ni ta a, thu thar a awm tak leh, Chhungkaw inhmuhkhawm kan nei leh mai dawn nia", ka pa bawkin a ti leh a. Kan nui ham ham.
A nuam e, Sammy-an buaina tâwk leh se. Rilru chhiatthlak mang e.
Zingah ka tho hmaa, Hriatpuia tho hma chuan min ṭhawng a nia. A tho hma si lo. Alu kâwr ka velna bulah a lo ṭhu ve.
"Tho hma ve, mu tui meuh maw?",
"Um", ti ringawtin min chhâng. Remsangpui siar siar chuan a...
Nu Papuiin, "Thirbel ka chhuansak dawn che em?", a lo ti a. "Chhuang rih lo ang, ka la vêl zo lo deuh".
Hriatpuian, "Chhuanpui, thil.pakhat min tihsak teh a", kimki chiaiin a ti roh a. "Sawi la", a ngawi ren rawn.
"A ngai leh lo, a ho lutuk", a ti a. A kalsawn daih.
Nu Papuiin, "Hemi te unau hi chu aw, hriatthiam an har", a ti ve tawp. "Nu, Sammy-an Sum a tihchingpen i ring ve em?",
"Maw?", Nu Papuiin a ti hû. Marble tiatin a meng zui.
"Teh daih a, kei chuan ka ring lo. A naupan lai aṭangin Chief Minister nih tum ruh em em a nia, eiruk emaw mipui chan ai emaw chhuhsak a duh lo bur. A eisak dawn lo tih lah ka chiang", inring tâwk takin Nu Papuii chuan a ti nasa mai.
A ṭang na hle bawk.
Sammy-a naupan lai aṭangin a enkawl tawh a, a hrechiang thawkhat ang.
Zawt zui ta loin, "A kan theih ta, Nu, Thirbel min lo chhuansak, ka han silfai lawk ang e", ka ti a.
Min chhuansak ve mai bawk.
Tukṭhuan ei kham hnu, Siamtea te unau School kal tura insiam fel vek hnuah, Hnahthiala haw turte chu kan thlah liam ta.
U Hmain min awmpui a tum tehreng nen, Hriatpuian a phal tlat lo.
School-a kan inthlah hnuah, "Sam, Dawrah ka kal dawn a, inah i haw dawn nge?",
"Ka haw ang, lo haw har lo la", mi.pawh en loin, pawn a thlir char char.
In aṭang hian a chhuak tam lo, a zak tih a hriat. A zahthlak ve em a ni. Mahse, an puhna chu dâwt a ni tih a hriatchian tho chuan zahna tur a awm lo ka ti ve tlat.
Mahniin kan dik tih kan inhriatchian tluka hlu a awm lo.
Dawr kan thleng, ka chhuk hmain, "Sam, lo lut la, kan rei dawn lo nia", kawngkhar ka hawng a.
Mi pawh en chuang loin a lu a thing.
"Lo haw har lo zawk la", min rawn en ta. Ka bu nghat.
Ka chhuk a, an tlan liam hnuah Dawrah ka lut. Hmingi leh Hriatin min lo hmu a, nui ver verin min hmuak.
"H² (eich square), in dam maw?", an pahniha kuah tuma ka kut pahnih ka phar uaih chu, an vaisawn.
An va han ho tak.
"Tute nge H²(eich square) chu?", an inkuangkuah hlun. An lawmawm reuh em mai. Ka hlau teih teih lo.
An pahnihin ka kâwk a, "Min kâwk tel suh", an ti ve ve.
"In ni, in ni", nui sângin ka ti a.
An nui dun hak hak, H² te bula awm nilên a châkawm.
Dawr pawn thleng Hmingin min thlah, "Teh, Chhuanpui, Sammy-a nau Hriatpuia mawni kha, a haw tawh em?",
"Tukinah an haw, tinge a? A tibuai che em ni?", a tibuai a nih zawngin, pasalte nau a nihna haiderin ka zilh hrep ang.
Hmingi chuan, "Tibuai deuh", a ti ta a. "Engtin? Min hrilh vek rawh",
"Eng lo, naaa, zanah ka lo text ang che. Lal Fanu hruai i ngaih kha, kal tawh rawh",
"Zanah min rawn text ngei ngei ang che, min hrilh loh vaih, ka bân che ni mai", a ner sâwng.
Ka chala min namin, "I chawh a nih chu, haw rawh. Khawiah mah min bân lovang e", a ti a. Dawr chhungah a lut daih.
Lalhmingi Nun hi chu, a Hring bik mang e.
Hriatpuian engtin nge a tihbuai ang le. LalSammy-a te unau hi a(h). Mi tihbuai chang an thiam.
Lal Fanu nen kan haw a, School-a a hun hman dan min hrilh zung zung.
Sammy chu a Office-ah a lo awm a, dawhkan a lo bawh.
Lal Fanuin, "Apa, i muhil mi?", a sâwi a. Vawithum a koh hnuah Phak phek phawkin a lo dâk chhuak.
"Lal Fanu, apa hi thingpui in turin lo hruai rawh aw".
Pindan aṭanga ka chhuak chiah chu, Choka thleng rawkin ka nui dir char char. VanlalSammy-a hmel nuihzatthlak lutuk khan, min nuih tawp tir thei lo.
A chilthli thlohna thlâ a lang kuau a, a sam a delh sual nimaw, a chhipa mk tak Sam a ding chho vah.
Mak thei a nia.
Ka phone a lo ri a, number hriat ngaih loh ni mah se, ka chhâng.
"Hello?",
"WhatsAap message en rawh", Robot âw hian a lo ti.
Ka phone chu ngunthlûk taka thlêk vang vangin, WhatsAap message a rawn thleng ta.
Noti Bar aṭanga a lan danin video a ni tlat. WhatsAap-a lên luh peih loh nak laiin, ka off hmak.
Video ṭha tak khawilamah va ni suh. Thlalak dukdak lo ang khan a ṭhat a rinawm loh.
An pafain an lo inkai chhuak a, Sammy-an mut a kham lo.chiang a ni.
Inhnawhpuar aṭanga rei loah an pafaa inbualna tur ka siamsak a, an duh lo chung chung Bathroom-ah ka nawr lut.
A tawpah, ka nawrlut thei ta a, "Keiin ka bual che u in duh loh chuan inbual rawh u", ka ti a.
"I bual kan duh", an la ti rual zui.
"Ka hman lo, inbualna tur ka siam zo vek tawh, vatin; inbual nghal rawh u", ka kalsawn a.
An inbual turah ngai ang.
Fai ser sawra an inbualfai chu, an hmelṭha sawt sawt mai alawm.
Sammy-a hmel ngurchuai lutuk lah a bo hmak.
An Party lamin an lo koh avangin chhun thil ei zawhah a chhuak zui nal nal.
Thâw a veng huai thei nia!
Sammy-a chhuah karah Manoi a lo lang. Ka ning a nia aw, a duh hun hunah a rawn lang a, a rawn lan tawh chuan buaina a chhuak ziah bawk.
"A chhuak chiah", ka han ti nghal ringawt a. "Chhuak lo se chu, ka lo lut ngam dawn hleinem", a ti mai bawk.
Min cho hle hian ka hria, bul ṭantu a ni a, cho ve ar tak ka ni.
Tuna, Sum tihchingpen buaina pawh hi, Sammy te nen ṭangruala an tih a nih a rinawm.
Ni se, ni lo se pawh nise, an hmel hmuh hi ka ningin ka kham hluah hluah.
Lal Fanu chu pindanah a awm a, ko chhuah ka tum lo.
Ṭhu tura ka tihin a ding tlat, "Ka awm rei dawn lo", a ti a. He In chhunga thuneitu a lo ni ve tawh a, tuna he In chhunga thuneitu chu Kei ka ni ve leh tawh.
A ṭhut duh loh a hnu, ṭhu malek se ni mai.
"Sammy hmu tura lo kal i nih loh chuan, eng nge i duh?", Lal Fanu hmuh a duh tih chu sawi reng reng suh se.
A sawi zawh rual, ni lo; a sawi lai mekin a kâ ka zai thler ang. Ka ngam khawp mai.
Manoi chuan, "Kan inneih lai chuan ka chhungte hian mualphona an thlen ngai lo, nang chu; i chhungte avangin a mualpho tawh a. Vawikhat dang leh, in khaw hnaisailo tak avangin a mualpho leh tawh", a ti hmiah hmiah.
"Eng nge sawi i tum ber?",
"Buaina i siamsak reng a, i ning lo em ni?", nui sakin ka inkuangkuah.
Ka bêng châk e.
Engtikah nge buaina ka siamsak?
"Ngaithla rawh, ka in chhungah a nih hi i awm. Dâwta min puh hmain Thudik tak hriat tum hmasa rawh", ka ti let.
"A thuhrimah, i duh loa i chhuahsan hnu hi lo ngaihven thar tûk lo la, i zahawm zawk ang", ka ti leh. Manoi chu a intimualpho peih mai mai ka ti.
Manoi chuan, "Nang zawk hian i chhuahsan lo a nih chuan, i zahawmlo zawk. MLA-a a tlin chhan te chu kan hriat vek kha", ngeiawm zet hian a nui pah.
MLA-a Sammy-a tlin chhan, a ni thei lo; khami hmunah khan a awm ve.
Sammy-an min nghaisak dan zawng zawng a hmu ve vek tihna.
Keimah pawh ka inring hman lo, Manoi chu a biang tawn tawnah ka bêng a, "He In aṭang hian chhuak nghal rawh, tunah chhuak rawh", nasa takin ka taksa an khûr a.
Hlauhna leh zahna avanga phu rang em em Lûng chu a thlawk chhuak mai dawn.
"Nangmah zawk hi chhuak rawh", a ti vah. Ta deuh deuh chuan a.
"Anu, ngati nge?", pindan aṭangin Lal Fanuin a lo ti.
Engtikah mah Lal Fanu hnenah a nu A nihzia ka hrilh ngai lo ang.
Manoi chu a namin ka nam chhuak.
Pindanah lutin khum chungah ka ṭhu a, ka thâw hluam hluam. Ka pian a hnu lamah hetiang renga thinrim ka la nei ngai lo.
"Anu", Lal Fanuin ṭap chungin min lo pan.
Ka pawm a, "Anu bulah i awm duh ang em?", ka ti a. "Duh", ṭap ṭeuh chungin a ti a.
Khum aṭanga thoin Lal Fanu ka siam sauh sauh a, keipawh ka insiam.
Trolley Large la chhuakin, Lal Fanu nena kan thawmhnaw ka khung. A tam lo, hak thlak pathum tur vel lek.
Makeup tlem nen.
Pindana tukverh kalh ṭhain, Siamtea te pindanah Trolley nen Lal Fanu nen kan lut a, Freddy-a nena an thawmhnaw ka khung leh mawlh mawlh.
Siamtea leh Freddy-a te School bân rual rualin, Thenzawl ka panpui nghal ang.