Politician nupui

[Cck Lalchhuanawmi]

Politician Nupui Hring Nun
Political Love Story_Fiction
Chapter-17
Ziaktu: Cck Lalchhuanawmi

Lalchhuanpuii pov...

Siamtea te unau School an kal a, chutih chhungin Sammy-a hmu turin kan kal a, Lock-up-ah a la awm reng.


Ka pa ten Ukil be mah se, u Ngaia thuneihna hnuaiah chuan an la chhuak thei chuang lo.


Chuvang chuan buaina a awm ṭan ta, man a nih chhan fiah taka puan chhuah a nih loh avang te leh, Ukil takngial pawhin a lak chhuah theih loh avangin Sammy-a ṭantu te chuan u Ngaia chungah thubuai thehluh hial an tum a.


A chhan chu, Sawrkarin a ruai lo a, DGP leh Sammy-a unaupa ni mah se, a DGP nihna chu Rajasthan, Kota District-ah chauh a ni a, chutah chauh chuan a thuneihna a hmang thei.


U Ngaia nen a fala inbiakna hun kan nei a, "Hei hi", lehkha min pe a, "Tuna an puhna ata a fihlim tih finfiahna a ni a, eiruk theihna kawng hrang hrangah chuan a fihlim e", u Ngaia chu ka en a.


A nau a nih avangin dâwt min hrilh a tum kher lo, dikna duh mi a ni a, a chhungkhat laina te ngei pawh ni se, an dik loh chuan a hrem dawn tih ka hria.


A lehkha min pek chu ka keu ka keu, hetianga fihlim chiang bal si, engvanga insawifiah tum lo nge a nih?


Mi bulah insawifiah kher lo mah se, kan sawi dun zan khan sawifiah ang hmiang.


Ka ring lo tih a hriat avanga sawi duh lo a nih ngat zawngin. Sawi mai tur alawm. Âng phiar phiarin sawi ta se, khatih lai khan ka ring chuang lo ang.


U Ngaian lehkha min pek chu a dik ngei mai. Thil pakhat, hriat duh ka la nei.


"Ka nu hnena pawisa a pek chhan min zawhsak leh rawh",


"Nangmah ngeiin zawt tawh ta che", u Ngaia chuan a ti dam dup mai a.


Zahawm ka ti, ka zah ru tlat. U Venpuiin a zah em em chhan ka hre tawh. A intizahawm chawp lo a, huai takin a ding mai a.


Miin an sawi dan turah a buai lo, thudikah a ṭang tlat a, dâwt hmanga din chan a tum lo.


Sammy-a nen inanna an nei ngei mai.


Mahse, mahni nupui ngei duat leh ngaihsaka enkawl a tum lo.


U Ngaian heti hian min ti ta a, "I hriat angin, Sawrkar rawih ka ni lo a, ka duh thua ka lo inrawlh ngawt chhan tur a awm lo. Ngun takin ngaihtuah ang che. Jail-a tâng ngei ngei tura i duh chuan, nangmah ngei ina FIR i thehluh a ngai ang, kut a thlak ṭhin che avang emaw, i duh loh chunga nupa nun emaw a hmanpui ṭhin che avangin thubuai i siamsak thei. Hmeichhe dinhmun a ṭha a, thudik emaw dâwt emaw i sawi a nih pawhin Sawrkar chuan a humhim chein i lamah a ṭang tlat ang. Thutlukna i kutah a awm a, nangmah bakah, Siamtea te unau a nghawng dawn tih hre tel bawk rawh. Amaherawhchu, eng thutlukna pawh titlu la, i lamah ka ṭang ang".


Engto nei loa Lal Fanu muhil thaw sât sât chu thlirin, a bul lawka lungkham reng nei loa muhil bawrh bawrh Freddy-a chu ka va kuah.


Chiang takin Lal Fanu hi a fanu a ni lo tih a hria a, Freddy-a thung hi, tun thlengin a hre lo.


Rin ngaihna a hre lo zawk ang.


Nu leh Pa Thlain a uap loh an ni a, Sammy-a chu an Pa dik takah an ngai nghetin, an Pa lo atan chuan an ngaingam tawh lo zawk ang.


Keiin, an Pa duh tak ka tân tir lehzel chuan, an retheiin an fahrah zual ngawih ngawih dawn.


Lainatawm hian!


Sammy-a lo dah ṭha ta ila, Siamtea pi leh pu te hian, an tupa leh tunu te hi an fapaa fa hrin an ni lo tih hre chhuak ta se, an fapa hnenah thlauhthla turin an ti mai lo'ng maw?


Sammy-a nena an inkar chu eng pawh nise, midang inkawpsan lo zâwnga awm hram tum tur asin.


Manoi ka dem bik lo a, Sammy-a ka dem bik hek lo.


An pahnihin ka dem ve ve. Sammy pawhin Politics a ngaihtuah nasa a, a chhungkua theihnghilh khawpin a zin chhuak tih a hriat reng reng.


In lama a nupui leh fa te khawhar taka awm a dâwn pha tawh lo ṭhin.


Nu Papuiin, "Chhuanpui, zan i mu thei em? Muthilh theih loh nana hman hlek loh tur, a fihlim tih hi ka chiang a ni. Min ring tawp rawh, ka fapa hi ka zilh nasa a, a Nu a tilawmlo dawn lo tih hi ring tawp rawh", a ti sep sep.


Sammy-a a hmangaihna chu a der a ni lo, a fanu Puipuii ang chiahin a hmangaih.


Hmangaihna hi chu aw, mahni hrin loh te pawhin kan thinlung an luah.a ni a!


Manoi thawm hriat tur reng a awm lo, in aṭanga ka nam chhuah, Sammy-a man a nih aṭangin hmuh tur a awm leh ta lo a, a chanchin reng hriat tur a awm lo.


Kan boruak hun tawn dan zir zel hian a inlâr ni ber hian a hriat tawh.


"Ngaia, engtin nge kan awm zel dawn le?", Sammy pa zawkin a ti a.


"Tih theih ka va nei bik lo ve maw, vawiin hian kan fel turah ngai teh ang", u Ngaian a ti a.


Keimahah a innghat ta hmak mai le!


Eiru tak tak se chu, a eirukna hmangin a hrem theih dawn a. Hrem ka duh chuan, puan hnuaia inthup phawrh chhuah a ngai dawn thung.


Sammy chauhin a la tuar dawn lo cheu, kei leh naupang thleng thlengin kan tuar thei tlat.


Siamtean a Pa a ngaih thu sawi chhen lo mah se, Lal Fanu leh Freddy-a hi chuanin an Pa an ngaih thu hi sawi nasa tak an ni.


An Pa an ngai hi an ṭap kher zel a, inthlêm hrep a ngai.


School kal tura Lal Fanu ka siam laiin, pindan kawngka u Ngaian a lo kik a, lo lutin, "Chhuanpui, i thutlukna chu eng nge ni ta?".


Thaw hapin, "Lal Fanu, Apa i ngai tawh tiraw?", ka ti a. Uar fe hian a bu nghauh nghauh.


"Engtikah nge a lo haw dawn?",


"Vawiinah, Apa Ngaia hian a lo hruai haw dawn alawm", u Ngaia ka en a.


Ka thutlukna a lo man thiam nghal.


Sammy-a hruai turin a mipa chin zawng an kal a, a hmeichhia chin zawng inah an awm a.


Kei leh naupang ho erawh School kan kal. School-a ka thlah zawhah Dawrah ka tlang.


Nilengin Dawrah ka awm a, Sammy-a ka ngaichang reng tho.


Hmingin, "Vawiin chuan a chhuak thei ang maw? Thenzawlah khan kal i tum tiraw? Kut a thlak che em ni?", a ti seuh seuh.


Han hrilh ta vek ila, mak a ti ngawt ang.


"Ka pangchangin tlan tauh ka tum.a nih kha, buai ve reng reng se, in chhunga Nu ber hlutna hre ve se ka ti alawm", ka ti pek a.


Hmingi chuan, "Um, i sawi hmangah chuan in inhauh chhan ka hrethiam mai e. Ani chu Politics avangin a chhuak reng a, nang; inah i awm tawp a, i nuamsa leh lutuk a, awm ngaihna i hre lo zawk a ang", a ti lang lang.


Hriati awm ve reng mah se, zahah ka la lo.


A fiamthu pah tlat a.


Ka han nui hlek chuan min tithawl huai thei nia! Nuih te hi a lo ṭha a nih dawn hi.


U Ngaian min lo bia a, "Police Station aṭangin kan chhuak e, mi hmuh theih loh ber turin kan lo chhuak a, Media hriat loh turin Police ho ka hrilh nasa khawp mai. Naupang ho nen in lo haw hunah chuan a lo hmuak ang che u", a lo ti a.


Ka nghilh dup theiin ka hria.


Hmachhawn ka la duh lo, Thir ban chhunga ka hmuh khan ka lainat ngei mai.


Mahsela, hmachhawn ka la zuam lo a ni e.


Lungchhe vankaia ṭah khuma, lungchim taka kuangkuah lam a ni lo, a chunga ka lungnih lohna hi a la bo tak tak thei lo.


Eiruknaa fihlim lo tura ka ngai kha a lo fihlim reng a, ka nu hnena pawisa a pek lah MLA Fund aṭanga ni loin, kan chhungkaw pawisa a ni!


Tin, MLA a nih theihna tura tenawm taka min hman avangin ngaihdam min dil lo.


A inchhir awm tun thlengin ka la hre lo.


Duhsakan min lo hruai a, Hmingi leh Hriati chu mangṭhain School kan pan.


"Sammy-a a rawn haw tawh em?",


"Aw, haw tawh e. Naktukah Press Conference an nei dawnin ka hria", Duhsaka chuan a ti a.


Mipui hmaah a insawifiah dawn a ni ang.


Zaninah, ka hmaah a insawifiah hmasa phawt tur a ni a, namen loin ngaihdam min dil bawk tur a ni.


School kan thleng a, Lal Fanu ka pawm lut thuai.


Tlaiah chuan u Hmain Siamtea leh Freddy-a hruai ve tawh mai rawh se.


"Anu, Apa a lo haw dawn tak tak em?",


"Tak tak e, inah a awm tawh", ka ti chu, "Yesss", tiin, seat chungah a ding a, min kuah chung chung.


In kan hnaih zel a, thinphu a rang ṭha ngei mai.


Duhsaka chu muangchangin a ding ta a, Sammy-a rim ka hre thei. Cinthol Sahbawn ngaina miau hek.


"Apa", tiin, Lal Fanu a tlan lut a, chau leh beidawng âw thûm ṭha lutuk tak mai hian, "Princess, ka Lal.Fanu", a ti a.


La hmu lo mah ila, a tar leh buai ang chu.


Lal Fanu School bag ka ak lut a, an pafaa inpawm ngawih ngawih ka hmu hmasa ber.


Sammy-a ka hmu chu, u Ngaia hnenah, "Man rawh", tih leh ka châk a nia aw...


"Chhuanpui?", ka nui sêih a, Lal Fanu pawm chunga min lo pan a tum chu a tlukpui ta mai!


Lal Fanu a pawm nghet hlauh a, a na lo.


"Sangpui?",


"Sam?",


"Apa?", tia ko chulin, u Ngaia leh Hriatpuian an kaitho a. Ṭhutthlengah an chawi chho.


Dawra a tluka a awm dan ang chiahin a awm leh tawh.


A taksa ka hmet nawk nawk, a kâ chu ân tumin a tiche nasa mai a, min melh ngawih ngawih mai bawk.


"Sam, i ṭha a nia", a mit tui luang ngiai ngiai ka hruksak.


A mit tui tla ka vawikhat hmuhna!


Doctor-in, "Scientist ropui tak, Stephen Hawking-a natna kha i hria em? Motor Neuron natna a vei a nih kha. Chu chuan a taksa zawi tir vekin, a ṭawng ṭhattir thei lo a, a Rilru ngaihtuahna fim kar siin, a taksa a hmang thei lo a nih kha. I pasal pawh hian Motor Neuron natna a vei a ni. Wheelchair-a a hun hman a ngai tawh dawn a, amaha engmah a tih theih dawn loh avangin tihsak zel a ngai tawh ang. A dam chhung zawngin", a ti chu, ka thaw chhuak halh halh.


Motor Neuron natna maw ni a?


A dam chhung zawngin engmah ti thei loin, Wheelchair-ah a hun zawng zawng a hmang dawn maw ni a?


Pathian leh!


Hun reilo tê tak meuh meuh hrem ka duh mai chauh asin.


A tua te mai chu ṭawng reng kan awm lo.


Cabin pana ka kal chu, ka bing muai muai. Ngaihtuahna a tawi tûk mai a, ka hmaa awm tinreng chu ka hmu phé vek.


Sak ṭalha thawin kawngka ka hawng a, khum chunga Sammy-a mu ngawi reng bulah ṭhuin, ka kun hniam a, "Sam, hetiang hian i awm thei lo, ka hmaa ṭhingṭhia ngaihdam min dil turin ka duh che. Chu hun a thlen hma chu ka ngaidam dawn lo che, i hria em?", a lu chawi kângin ka thlah thut a, lukhamah a innghat chawrh.


A mit vun phu uih uihah a harh tih ka hria, "Sam, min han en teh", ka ti a.


A meng duh lo chu a biang vei lamah ka bêng chawrh a nih kha. Dam ṭha pangngai chu nise, a rum nghut ang a, a meng chhuak ngei ngei ang.


"Sam, Remsangpui, meng rawh ka ti. Min han en teh, Remsangpui?", a bekah dawmin a lu ka tiche vak vak a.


A meng duh ṭhak lo. A va han luhlul tak em.


"I harh tih ka hria nia, min en rawh ka ti. Min en rawh, Remsangpui, meng la min en rawh. Ngaihdam min dil rawh, a nih loh chuan ka tlanbosan ang che, min zawn hmuh theih lohna tura ka tlansan dawn che", a kawr nghawngah ṭhamin ka sâwi vak vak.


Ka beidawng chu ka kuah thla thlawp a, ka ṭahkhum nghek ringawt.


Reilo tê tak chauh chauh hrem ka duh mai a ni, a dam chhung ni loin.