SMERALDO (Ch-12)

[Kennelly Bawitlung]

Chapter-12


Andrew-a te in kan thlen chuan khua a thim lek lek tawh a, an inbul velah chuan a nu pangpar phun te chu an vul chuk hlawm bawk. A hnungah chuan ka zui phei ve zel a, a khat tawkin a hahchhiau leh thawt thin a, a kut lehlamin a helmet chu a keng a, a hnar a hup duh thak lo lehnghal. Ka khawngaih reuh tak tak a ni.





Inchhung kan lut chiah chu Andrew-a nu a rawn tlan phei nghal rawk rawk a, a fapa ber pawh chu nem sawn daih min rawn kuah nghal thawr mai "Mavie bawihte ka ngai thei lutuk che a... I rawn kal dawn tih ka hriat khan ka phur lutuk a nimin atang ka in buatsaih char char alawm! Uii han in enteh i va cher tawh ve.. Ka van khawngaih reuh tak che em.. " ka biangah chuan dawmin min thlek dan dan a.






Olivia-i nu ang thoin Andrew-a nu pawh hian min ngaihsakin min duat em em a, ka nu te ang mai in keipawhin ka en thin. Hetiang taka min min ngaihsak tu ka tawng hi vannei ka in ti hliah hliah. "A mak thei huam huam a nia... Thut tir ve phawt ta che" Andrew-a pa chuan thutkhawmna hmun atang chuan a rawn ti lang lang a.Football khel a en leh tawh a niang "Ni e lo thu rawh ei rawng chu ka bawl zo vek tawh a kan ei vat dawn a nia" ka hnungah chuan min kuah a.






Pawn lama pangpar a tam ang hu in inchhung lamah chuan pakhat mah hmuh tur a awm lo thung "Ka rawn leng khat sia thilpek ka rawn keng sak che a" daisy chu ka pe a, a hmuh rual chuan a lawm hle tih ka hmu thei "A va han mawi em em ve... Daisy hi ka lei ang ka ti fo thin a.. " pangpar chu a hnim deuh vang vang a "Hei chu kan room ah ka khawi daih ang" nuisang hian a tih chhunzawm a.






Thutkhawmna lamah chuan kan phei a, Andrew-a erawh phone hmangin a chhuak leh rih "Hun i nei lo ve thei sia ka ko buai duh vak ngai lo che a... Mahse ka ngai tawh lutuk che a Andrew-a ka rawn hrilh tir che a nih kha.. Diktak a sawi chuan i chunga thil tleng vel ka hriat khan rawn hmuh che ka duh lutuk a, Andrew-a'n hun pe rih rawh a ti tlat avangin ka rawn kal ta lova... Ka ngaihtuah thei lutuk che" ka kut pahnih a dawm chungin a ti dap dap a.






"Tunah chuan ka tha vek tawh... Andrew-a leh Olivia-i ten min buaipui nasa a... An chungah ka lawm tak tak a ni" ka lo ti ve vat a "Khami zan khan i hawng lo tih a hriat rual rualin lam zirna hmunah khan a rawn kal a... Zan pawh a mu lo hrim hrim a chhui zui nghal char char alawm.. A ngaihtuah ve lutuk che a nia aw.. " a ti charh charh a.Min ngaihsak tih chu keipawn ka hai bik lo "Kha misual pa mai mai khan a phu tawk hremna chu hmu mawlh rawh se!" a ti leh deuh hluk a. Ka nuih chu a lo za ang reng lutuk.






"Nu chaw chu kan ei nghal mai dawn a mi?" a phone ak pahin Andrew-a rawn lut chuan a rawn ti a "Aw in ei duh tawh te chuan a ei theih tawh reng alawm... Ka'n siam nghal ang nge" a tho vut a, keipawh ka ding ve nghal zat "Ka lo pui ang che" ka tihchuan khi sangin choka lamah kan inzui phei a. Andrew-a erawh a pa bulah a thu thla thung. Nu Emma-i nen chuan eng eng emaw sawiin kan titi bawrh² a, a bula awm hi chuan tawng hnem a awl khawp mai, kawm a nuamin a rilru a zau bawk si.






"Nang ni pahnih kha chaw ei kan paih tawh a nia rawn phei vat rawh u!" Nu Emma-i chuan a ti lang lang a. Andrew-a leh apa pawh an rawn lang ve vat "Zanin chu khuallian kan nei bawk a chhungpuinu in ruai a buaisaih a nih hi" uang deuh takin Andrew-a pa chuan a dawhkan kil pahin a ti sup a "Mavie-i ber a lo kal tawh te chuan loh theih nang... " nu Emma-i chuan a lo tih zawm zat "I nu Emma-i hian kan pahnih chauh a kan awm chuan eirawng pawh a bawl mumal ngai lo.. Engtikah nge hetiang a tui hi ka ei leh dawn a hriat si lova zanin chu Mavie lo kal manah ka'n ei theuh ang nge" Andrew-a pa chuan ti lehin a ei tan nghal mawlh².Nu Emma-i chuan lo melh rum hlein Andrew-a pawh a lo nui suk ringawt.






"Tinge inchhungah pangpar i khawi tawh lova?" nu Emma-i chu ka melh ran a "E! Andrew-an allergy a nei sia inhnunglamah ka dah chhuak vek alawm... A tam ve ropui sia keimahin ka seng luh leh vek a ngai dawn a nih hi" a thusawi tawp lam chu a zuih ralh mai "Khati zat zat inchhunga khawi reng reng,hman ni thil deliver a lo kal pawn pangpar dawr emaw a tia a man zat min zawh kha" Andrew-a pa chuan a lo ti bul bul a "Kan let leh hmain ka seng luh pui dawn che a nia" Andrew-a chuan a lo ti ta nge nge a "A dah chhuah chhan berin engtin nge maw i seng luhpui theih ang le i hahchhiau tap pur mai tur asin" apa bawk chuan chaw ei mawlh mawlh pahin a lo ti leh a.






"Keiman ka tihpui dawn che a nia.. " ka tihchuan nu Emma-i pawh a rawn nui leh sang tawh.Hlim tak chuan zanriah chu kan ei chhunzawm hlawm a, kan eikham hnuin thu khawmin nu Emma-i yogurt siam chu kan ei leh a, ka ei lohna a rei tawh bawk a ka ei tui khawp mai "I ngaina tih ka hria a ka siam theuh alawm i hawn then turin" nu Emma-i chuan a lo ti var a "I fapa ve hi" hrilhhai deuhin Andrew-an a lo ti bur a "I dah chhe leh mai mai ang" a lo tihsam et thung. Andrew-a chu a tum deuh bur mai.






Amah a khawsa ve tawh thoin unau dang a nei lova, a hna vangin a nu leh pate pawh a tlawh hman ngai meuh lo.Mahse chhungkua inhmangaih leh inngaihsak tawn tak an ni reng tho. An bula ka awm chang hi chuan ka hlim a, an chhungkaw zinga tel ve ngai maiin ka in hre thin.





Pangpar ho chu thiar lutin kan rem fel mawlh mawlh a.Andrew-a pawn lo thut mai mai chu duh bik lovin a helmet khum bur chungin min pui ve bawk a. Andrew-a pah lahin "Kha laiah kha chuan dah tawh suh ka chhuih ziah helai ah hian dah zawk rawh" tiin a lo kawk kual zut zut a. Nu Emma-i lahin rum theih tawpin a melh khui khui reng. Kan zawh fel meuh chuan dar 9 a pel daih tawh,nu Emma-i chuan ka hawn tur eng eng emaw a pack teuh a. Ka ei that loh hi a hlau em a ni.






Kan tlan liam dawn tlengte chuan in enkawl tha turin min chah lawm lawm a.
Zan boruak a Andrew-a pangtilum ngheng ngei mai a han tlan phet fua fua chu nuam duh tak a ni. Thlifimin ka sam te chu a chhem phe hlawp hlawp a, ka hahdam siai siai a ni ber e.





"I hawng tlang nghal dawn a mi?" bike atanga ka chhuk hnu chuan ka zawt a,bike ngheng chung chuan ka hmaah a ding a.. "Mmm zanin chu ka hawng tlang nghal ang.. Mut ka mamawh ve tlat" nui suk hian a ti a. A mimeng ah te chuan mut a mamawh ngawih ngawih tih chu ka hmu thei "Khalh fimkhur rawh aw i chesual palh hlauh ang nge...Mu hman lek lo hian i thawk thin a i hriselna in a tuar ang nge" ka ti ve luam a. Tunlai phei chu ka hmu cher deuh te hian ka hria...





"Min ngaihtuah bawk a ka dam sawt" kiai suk hian a ti a "Ka ti tak tak a nia in enkawl tha viau rawh aw... " thutak zet chuan ka tileh. A mit chu a khap diar diar a, a chauh hmel chu ka ti ngawih ngawih.A chal te chu khawsik a neih leh neih loh chian nan ka dek deuh vang vang a,khawsik em chu a nei love. Ka kut chu rawn vuanin a en zui a, a kut khing hnihin a hum rauh² bawk. Rei vak lo chhung chu engmah a sawi lo, keipawn ka kut chu ka la sawn bik chuanglo, a khawih ang ang chuan ka dawh tawp.






"Va lut tawh rawh chawlh hahdam i duh ang" a rawn ti dat a, ka mitah chuan min enzui zat bawk. Engmah sawi lo chuan kan in en vung vung ringawt "Kal tawh ta che!" a mitko san at pah a a tihchuan ka kut chu melh thla zeuhin "Min vuan bet tlat a.. " ka kut chu ka chet dat a. Hrechhuak thut ni awm takin a nui chhuak hak a "Tihpalh" ti sup pahin ka kut chu la kangin a fawp zeuh a.







"Muttui" nuisang hian a tizui bawk.Building chu a lo eng uar tawh a, generator pawh a tha tawh a nih hmel. Ka lut tur ka hawi let chuan min lo la enzui reng a, nui sukin ka ban ka vai zui zeuh, a ni pawhin rawn vai let vein a helmet a khum a, a tlan liam nghal zat. A chauh hmel ropui sia ka ngaihtuah ngawt mai naktuk chu va tlawh ila thain ka hria..





Current kan nei tawh chu ka lawm ngawt mai. Naktuk chu chawlh ala ni bawk a, ka inbual kham chu towelin ka lu ka tuam bur a,ka silk mut kawr leh kekawr bul chu hain movie en tumin tv ka hmet eng zui zat bawk. Light chu ti dimin puakzo leh in tur ka inchhawp ran bawk. Ka en tan dawn chiah tihah chuan ka in kawngkhar chu a rawn ri dut dut a, ka phu chiang ngei mai!





Tang hra hian kawngkhar chu ka en tlawk tlawk a.Thawm a reh leh tak daih avangin building a cheng ve zu rui mai mai a nih ringin ka ngaihsak zui lem lo. Mahse ka thla a muang dawn tan chauh tih ah a aia ring mahin a rawn ri leh ta dut dut mai. Chutah zet chuan ka ding hluai a, "Tunge!" ka ti chhiak tuar, chhanna ka dawng lo. Kawngkhar lam chu ka pan phei dem dem a,ka bag a pepper spray chu ka la chhuak nghal vat bawk.






Kawngkhar chu ka din chilh ren rawn a,thawm ka ngai chang reng. Tuin emaw rawn chum ri leh dawtin "Maven!" ring vak lova ti thum dut ri ka hriat chuan Andrew-a kha a rawn let leh a nih ringin kawngkhar chu ka hawng nghal vat a. Mahse le.. Ka mi hmuh chu Andrew-a a ni aw zawng lo!
"Rune! E eng nge hetah i rawn tih?!" hrilhhai zet chuan ka en chho ha a.





Eng sawi set set loin a rawn pen lut rawk rawk a kawngkhar kharin a kalh zui nghal zat bawk. Keichu ka tawlh hnung nghal dawr dawr a, ka hrilhhai lutuk chuan sawi tur ka hamhaih zo vek! Kawngkhar a kalh zawh hnu chuan thaw halhin ka lam a rawn lehhawi a, rawn pen phei chhuih chhuihin hnai ren rawn ah min ding chilh a ka en chho chuan chiang zet hian min lo en chhuk run tawh.






Ka zamin ka khur lek lek tawh,a chal ti chuarin a meng zim san a,zawi muangin ka lamah a rawn âwn tla ruai² a. Lo dawm vatin ka theihtawp a na a nemin ka ding ngil tir leh "Hey Rune! Ka sawi i hre thei em? Tinge hetah i lo-" ka sawi zo hman lo a rawn âwn thla a, a lu ka darah a nghat zui bawk. Keimah chawpin kan tlu lo chauh a ni "Rune! Tinge tiang hian i awm!" nem sawn tuma a nak hnuai ka nem chuan eng emaw thil huh hi ka khawih fuh a.






"Thisen!" thleileh theih lohvin thutthlengah chuan ka kuah phei a, ka tha zawng zawng ka hmang a ni ber. A thlanfim a chhuak nasa in a coat ka han keu nak chuan thisen a lo awm nuai mai "Lalpa leh!" ka tawlh hnung dawrh thei.In ti harhin ka pan hnai a, a kamis kawrkilh chu phelin vihna hnu hma rap awm zet ka hmuh chuan ka mur chhuak ve a, ka hlau hle bawk. "911 ka'n call nghal ang nge!" ka phone lak tuma ka ding uai chu ka banah rawn chelh bet thutin "Kal suh.. " a rawn ti chhuak tawk.






Thu hniamin "I hliam hi enkawl vat a ngai a 911 ka call dawn alawm" ka tih pawh chuan min chelh nghet sauhin a lu a thing zeuh. A va han atthlak tak! "Tinge i duh lova i thi mai dawn asin!" ka tih hluk pawh chuan min tlah duh thak lo,thisen mah hlauh nak a laiin engtin nge a hliam hi ka buaipui theih ang!





SMERALDO
BY
KENNELLY.B