HMANGAIHTU DIK ( CHAPTER-14 ) BY LALNUNNGHETI TETEI

[Lalnunngheti]

HMANGAIHTU DIK
STORY OF:
LALNUNNGHETI TETEI




CHAPTER-14

_______________




ZOPUII POV:



Inchhung a lo luh atangin vawikhatmah Hriatzuala chu ala tawng lo, U Isac-a erawh ati ti siam siam renga a ni pawhin anau chu abe bik lo bawk. An che zia leh an awmdan hmang atang reng reng pawhin unau inngaih tak chu an ni lo tih tun tan pawh ahriat theih ang, an thup miau lova, Ruby zawkin Hriatzuala chu abe deuh renga a hnu deuhah chuan a ni pawh ati ti zui ve mai a, Ruby hmeichhe fing tak tih takah kawm hlim dan pawh athiam viau.




" Hna thawhlai i nei hrim hrim em "? Ruby bawkin a zawt a, keipawhin ka lo ngaihven vat. Khatianga anun hma zawng khan eng chu nge a lo tih ve thin chiah, chu chu ka hriat chak lam tak pawh a ni ve. " Ka pa Hotel lamah ka thawk ang, " a tih chuan ka pa in hotel lian tak anneih thu asawi kha ka hrechhuak, Aizawl pawn lamah a nih avangin khualzin vei vak ho pawhin an tlawh tam viau tih keipawhin ka hria, ka pa in asawi tirh kha chuan mak kati viau a nih kha.




Khatiang taka hotel lian leh changkang neitute chu miharsa chu an ni mawlh lo, " nangni chu hotel lian tak innei a, hnadang pawh zawn buai angai lova invannei " a tih leh chuan Hriatzuala pawh a nui tawi tak mai, " kan vannei hleinem, keipawhin police hna anih hi ka zawm tak daih " U Isac-a pawhin an ti ti chu azawm ve a, " iduh zawk vanga police hna chelh i ni lo em ni, "? Ka ti let ve a, a tawngdan hmangah chuan police a tan chu ama duhthlanna a ang lo riaua hriatna ka nei.





" Ni love, ka pa in a hotel enkawl tur chuan a naupang zawk hi aring tawk miau a, kei chu police ni turin min duh zawka, " a sawipah chuan a nui deuh suk suka, a mitmeng erawhin thildang a sawi daih thung. Apa duhthlanna avanga police hna azawm mai chu a lungawi zan lo anih hmel, chutih laiin Hriatzuala zawkin hotel chu a enkawl leh dawn si a, an unau buai chhan pawh a nih ngei ka ring, itsikna a ni.





" Zopui kei chu ka haw hmasa mai ang, file pawimawh vel endik tur ka lo hawn nuala chung ho chu en fel te ka la duh, " tipahin U Isac-a zawk chu a ding hluaia keipawh ka ding ve vat, " thlah kher ka ngai lo " a tih pawh chuan pawnthleng tal chu zui chhuah ka tum tal tho, kan inleng te reng reng chu kan thlah thlap zel a kan tihdan than a nih avangin keipawhin ngaiah ka nei tawh. " A harsa lo e, buai chung chungin i lo lenga thlah ve che chu ka tih tur alawm, " ka sawi zawh rual chuan pakhatpa zawk chu a lo rum nghuta ka melh deuh zawk.




A mitmengah lah chuan apawi ka sawi ta emaw tih tur a ni, min melh ngura ka tihsual ka hre der bawk si lo. " Nih chuan kal la " ti pahin U Isac-a chuan ka darah min lo vuana kawngkhar lampan chuan min hnuk kal dawt dawt ka ti mai, ka nu te an awm lo hlauh chu a tih zia kher mai, ni lo se chu hetianga min tih hi ka zak viau ang, " Zopui thil ka zawt ang che anga chhanna dik tak min pe rawh aw " kal ta mai lo chuan a ti leh a, a thutak vei phian bawksi, rilru bet zan lo chuan ka bu nghat nghat a, chu vel leh.





" Hriatzuala hi i duh em "? a ti ta mai. A zawhna chu ka rin loh lutuk a nih avangin ka chhan dawn te chuan ka hamhaih bawk nen ka tawngchhuak lawk thei lo. " Aa..ai duh lo, a ni te chuan kathian alawm. I hriat kha ka U nen anin laichinna thin pawh, kha vang ringawt pawh khan katan chuan duh chi a ni hleinem, " ka ti nawi niai a, tun tum chu tumdang a ka duh loh thu awlsam taka ka sawithin ang kha a ni hauh lo tih keimah ngei pawhin ka chiang, Hriatzuala ka duh ta tihna lam ni lovin, ka duh loh thu ka sawikhan keimah ah hian ka hriatthiam si lohvin che dawt a awm.




" A ni in lo duh ta che se, " eng vanga zawhna awm ang lo lutuk min zawt reng nge maw a nih dawn ni, tuna a zawhna phei kha chuan Hriatzuala'n min hriatchian hma si a min duh thu asawi kha min hriatchhuah tir a, ka thinphu aranga ka sa deuh hat hat bawk, eng vanga ka awmdan chu danglam ta viau nge tih keipawhin ka hrethiam love. " A awm ang lo em mai " ka ti deuh hliaia, U Isac-a erawh a lo nui hawk thung, nuihzat tur ka thusawiah a awm ka hre der lo.




" Anih tui deuhin i mu dawn nia, " tipah chuan ka samah a lo chula, atih dan vel chu (h)! Naupangchhia ah min ngai nimaiin ka hria, " tunai hma hian lo intawng ila " a thusawi te lah hi hriatthiam har ka ti thin ngawt mai. Anin lampan chuan achho hnak hnaka keipawh inchhung lamah ka zui zui ve vat. Ruby chuan Hriatzuala chu a lo be siam siama, Hriatzuala pawh chuan a mizia nena inmil lo zetin fiamthu deuhin achhang let ve thei zel bawka, ka la hriat miah loh mizia thup then a nei nualin ka ring.




" Nutei'n leitura mintih kha ka lei leh ta miah lo, ka va kal lawk ang aw Joe " Ruby chuan ti deuh hliaiin ading vut a, ka chhan hma in achhuak deuh vut bawk. " Joe chu i hming em ni "? Hriatzuala chuan a lo ti ta chiah, khatiang khan midang awmlaia koh ka duh ngai lova Ruby hmanhmawh lutuk khan min ko a, a hre lo turin an hriat phah. " Jolie zawk ania, a awlsam zawngin Joe minti thina " a hriat vek tawh tho avang chuan ka ti ve a.




" I mizo hming nen a inrem viau mai " ka rin loh lam daiha atih chuan ka awi lem hlei lo, " Jolie Zopuii tih teh tawp te chu, a inrem pawh ka ti viau lo " uar zet hian ka ti a, a lo nui chhuak ve hawk. A nui hmel hmuh nawm zia chu, " ahming neitu nangmah i nih chhung chu a nalh " a inla zei ve ngei emaw ni, kha pawh a mizia ka lo hriat thin nen a in mil lo, minti lai ve viau thung. " Ka U in eng pawh sawi mahse keiman ka hrilh che a nih loh chuan eng thu mah awi lo la ka duh, " a tih tak daihah chuan kan boruak chu adang ta deuh.




" Englam pang maw ? Chutiang anga pawimawh tur thil eng mah U Isac-a'n min hrilh ngai lo, " a mah melh ran chung chuan ka ti a min hrilh ngai lo reng bawk a ni. Haw tuma athawh tak uai ah chuan keipawhin ka zui chhuak ve leh a, zan dang ang lo takin kan pahnih chauha kan awm chu zam ruk riauna ka nei, ngaihzawng nei thar hlim lai deuh tut ang hian ka awm ka sawifiah thiam danah chuan. " Ka nunhlui te avangin min pawm thei lo tih ka hria, mahse vawikhat chiah ka nunhlui te theihnghilha min en ve turin ka duh che,



i U nena kanin zawmna thin avang chauha min buaipui lovin, i bialpa ibula awm reng tur angin min ngai ve chhin la ka duh. " A thusawi chuan min thawnga sawitur ber minti hre lo leh tawh, ka mizia athlak danglam hret hret tih kei ngei pawhin ka inhrethiama, chutih rualin min phuar tlattu hi ka phelh mai thei si lo, " naktuk atang chuan mipa in abialnu tur arim ang tak takin ka rim tawh ang che, i ngaihdan tur ka hrethiam hun arei anga nang pawhin zawi muanga min duh ve theih ka ring tlat a ni, " a tawngkam chhuak reng reng chu ngaihthlak nuam tak vek a ni, a dam dap mai.




A kal liam thleng chuan ka thlira, ka U theihnghilh thakin ka awm mai dawn em ni ? Duhna ka nei anga ka inhriat miah loh laiin min thunun hneh zia erawh ka hre chiang telh telh thung si, a bula awm nuam ka ti tan a anui hmel hmuh reng duhna te hial ka nei, hei hi amah ka duhna intanna a ni thei angem. " Joe tinge i melh ngai i melh reng "? Ruby dawr kal lo haw chuan pawna ka ding chu min lo bia a, ka ngaihtuahna ka lo vah kual tir nasa bawk nen ka phu deuh zuk nghe nghe.




" Eng mah ni love, tirawh lut ang " ka ti sep a, kanin zui lut a " Hriata chu ahaw tawh em ni "? atih chuan âw ka pawh vat. Room lamah chuan kan awm ta daiha ka ngaihtuahna ah lah chuan Hriatzuala ngawt a awm a, eng nge maw ka hriat zawh tak ni. " Hriatzuala hi iduh em ni "? ani pawh chu, ka melh vata thu tak zet hian minla en zui, " ti nge min zawh vek hlawm le, thian ang bakin kanin en lo " chhanna ngai bawk chu ka pe leha ka awmdan chu adang leh deuh tawh.




" Amah hi chuan aduh deuh che a ang " mak tak maiin ahmel chu angui deuh riaua hriatna ka nei, " a ni pawhin thian angin min en, ka U nen anin kar i hriat kha chutiangin min en lovang " ka tih takah chuan abu deuh nghata " ni tak e, " tipah chuan a nui deuh hak a keipawh ka then ve sak, ka nu te an lo haw hnu pawh chuan ka chhuak leh ta chuang lo. Lehkha zir tum chuan dawhkan ah chuan ka thu a, Ruby erawh phone khawihin khumah a mu thung, atirah chuan ka rilruah alut vak lova a rei deuh hnuah erawh ka rilru ah alut duh ta viau.





Ka hriat theih lai chu chuhin ka mengrei hle a mut tuma khumlam ka pan meuh chuan zan dar 11 a pel fel der tawh. Ka tawngtai zawh hnuah ka phone chu ka hmet eng a, number hlang atanga message ka dawn chu ka seen a ka rin loh lam daih a ni, * Keimah Hriatzuala * tih teh tawp hi ania, chhan loh ai ah * Um * tih tawp chuan ka reply let a min chhan let ka rin tawh loh nen, typing tih a lo lang lehnghal.



* Iva mengrei ve * a message chu nuih zat tur a awm loh nen ka nui var var tho, ahmel ka mitthla a hetianga message hmanga mibiak vel chu a inhmeh lo ka ti tlat pek, lehkha ka zir zawh chiah thu a chhangin min lo chhanlet hun chu ka nghak ren rawn a, minute 10 dawn hnuah pawh min lo chhan tak lo ah chuan phone chu ka dah a, message lo luh hun chu ka la chang ru deuh reng tho, ka inngaihtuah chianga eng vanga a message chu lo nghakhlel ve viau nge maw ka nih ngawt chu le, ka tih ngaihna hre lo lutuk chu ka nui leh tawp.





Zing ka than harh rualin ka phone ka ban vat a Hriatzuala message lo awm vang ka hmuh chuan ka hlim ru veng veng mai, seen lem lo chuan ka tho tharha bathroom lamah ka lut tlanga zingkar atang mood afuh chuan ka nileng hun hman pawh anuam ngei ang. Ruby nen college kal tura kanin siam lai chuan Hriatzuala message chu ka seen ve ta chiah a, * College in ban hunah in hmu lawk ila * tih a ni a a ka chham dan tur ka ngaihtuah deuh vang vang phawt a, * aw le * tih chuan ka chhang let a ka bag ah ak tha in room atang chuan ka kal chhuak nghal.







( NIZAN LAM MITTHI LUMEN NAAH KA KAL VE A TLAIVAR CHIANG KUANG BAWK NEN KA TYPE BELH PEIH LO. NIZANAH KHAN LO DAH NGHAL KA TUMA SIGNAL KA NEICHHE OVER-A VAWIN LAMAH THLAN LAIHNA AH TE KA KAL VE LEH BAWKA, KA INDAIH LO A NIH BER CHU )