HLUSANGZUALI CHAPTER 14 BY REBEC COLNEY

[Rebec Felix]

HLUSANGZUALI



CHAPTER -14





Krismas chu lungleng ru tak chung in hlim tak in kan hmang ve a ,Hotuten chawlh min pe zing ve viau nen len thawven na hun pawh kan ngah ve khawp.




Muanpuia leh Rinengi an hman loh chang pawh in Simona nen kan chhuak dun mai thin a , a fel in , a puitling a,mi ningkhawng a man chak riau nen ,kan in kawm thei fu a .




"I bialpa chu then la ,kan pahnih in inngaizawng daih ila , keini chu kan inhmu reng thei bawk a , a nuam daih zawk ang " fiamthu a tih a ching a ,kan in tin leh uai mai thin.




Rintluang erawh hi chu a thawveng u chuak lutuk thin hi ka zo lo deuh thin a , thian dang te an tel loh chuan ka zui chhuak ngai lo ,Vai hmelthai nen pawh an la in be reng a ,inngaizawng ang erawh in an la in be lo thung .Han zawh chian lah hian sawi nuam hi a ti thei thin khawp a ,tawng na hun kan chang tawh ngai lo.





Krismas vuak vet chhungin ka nu in min rawn be zing malh malh khawp mai , sawi leh chuan ngai lo in ka pa a ngai tih lah a hriat reng a , a khua a har viau maithei a ni .Kei pawn ka ngai tak zet a, koh kir leh theih a ni tawh si lo .







"I thian te ho pawh urlawk zan ah rei lo te an rawn leng a ,khawhar an hnem lutuk " a rawn tih te chuan ,ka lawm tak tak , ka thiante lah in kan in a an len tur thu pawh an rawn sawi hlawm miah lo a ,Rinsawma takngial pawn a rawn sawi lang miah lo




Kum thar kan han chuang kai a , thil duhawm lo leh zahthlak tak thil a thleng ta tlat , kan mizo pui he ta hnathawk ve tho Malsawmi chu a rai ta tlat a , hetah awm za zel thei a ni si lo a ,karleh lam ah haw a tum a ,




Rinengi nen phei chuan tu nge a pa tih rin dan kan nei thiam lo, midang ho erawh in an hriat hmel viau a, zawh tumna erawh kan nei chuang lo.




Mi tlem te nundan khawloh a vang in hmun dang a hnathawk ho zawng zawng hi kan hmingchhe tel ve tlat thin a,




Rinsawma nen kan inbiak chuan kan inhnial deuh a "Hlutei nen in in zui nasa an ti tlat , ka hriat ve loh thil thleng a awm em ni "



Zikpuii'n min rawn hrilh a , a tir chuan ka ring lutuk lo ,mahse thlalak nen lam min rawn thawn tak hnu ah chuan ka awih ve leh ta deuh .





"Thian kan nia ,zui pawh kan in zui kawi nasa ,mahse tun a i ngaihdan ang erawh chu a ni lo thung , min hriat chian kha tiang ang rilru ka put duh i ring pawh hi mak ka ti , " a rawn ti deuh hmak a , ka va ringchhe nghal ngawt bik lo a sin le, thil awmzia zawh chian ka tum mai a ni a




"Chutiang lam hawi zawng in ka sawi loh kha , ka rilru a nuam famkim thei chiah lo a ,ka rawn zawt chiang mai che a ni,lungloh a lak chi pawh a ni lo " a rawn thaw chhuak hawk a , rei tak chu tawng lo in kan ngawi dun reng .




Ka ngaihruat na mai nge ka hre lo, a hma kha an ang thei tawh lo a , inpawh tak leh inhriatthiamna sang tak kan neih thin te khan tlak hniam lam a pan ni in ka hria , kan inkar ah hian phurna thil a awm tawh lo ni mai ten ka hre thin.





"A chang chuan a hahthlak in a hrehawm ka ti thin " a rawn tih chuan lung a den dawp ang mai in ka nghing dawt a , rilru ah thil tam tak a rawn lut nghal zung zung .





Mahni tawk ah kan buai dun em em a ,inngaizawng dang te ang in inhmuh na hun leh hunthawl tha kan nei ngai hek lo , kan hmachhawp thil te tih puitlin dan tur in kan rilru a luah khat reng bawk nen , a thil rawn sawi chu kei ngei pawn pawm pui na lai chen chu ka nei a lawm ,





"Kan kar a hmangaihna rawn piang hi kan chhem alh hma mah mah ni in i hre ve em " zawi raih in ka ti a , kan pindan chung zawl ah thutna keng chho in ka thu a, boruak lah chu an uap em em leh nghal , thli thaw heuh heuh dawn tur pawh a awm lo .






"Kan nih tur ang ang kan nih hun ah te lo inkawp ta ila , hei ai hian kan in kar pawh a nawm zawk ka ring ," ka ti leh a, ka sawi lai te chuan ka na tun reng tho, kan inzawmna hi tiang ringawt a nih chuan rei min daih pui lo ka hlau a , rilru tawt tun in ni ka awm ni .




Kan nih tur ang ang kan nih hnu ah ,kan duhthusam te leh hmachhawp kan tih hlawhtlin vek hnu ah kan kar a hmangaihna hi lo chhawm nung ta chauh ila , hmun hrang a awm ngai lo in , lunglen leh hrehawm pawh kan tuar lo mai tur.






Mahse , chutiang tur pawh chuan kum tam tak a ngai ngei ang , chuvang in kan hun hman mek ah hian kan lungawi tawn a ngai , hun kal tawh ah kan let leh thei miau si lo a tin ni.




Ani erawh chuan "Harsatna kar ah pawh kan inzawmna chu a nung reng tur a lawm , i rilru ka rawn ti buai ni in ka hria , ka sawi awmzia tak chu i hmel leh i taksa dek thei lo a awm kha a hrehawm ka ti a, a chang chuan ka ngai lutuk che hi mut theih loh chang te ka nei thin a , inthen lam chu ka rilru ah ka la dah chhin ngai lo tih hre hmasa phawt rawh , ka nupui tur a ka duh ber i ni a , ka fate nu tur atan a ka ngaihtuah chhuah hmasak ber i ni bawk , eng harsatna pawh tawk ila ka thinlung ah hian nang lo chuan hmun an chang ngai dawn lo tih hre rawh " eng tik lai in nge ka mit atang mittui a rawn tlak ka hre lo , a thusawi te khan ka thinlung a fan a , min hneh em em bawk ,ka in sut ta hraih a .




"I tap ngawt e law " rawn ti hluk in , a nui huk a,eng vang a tap ngawt nge maw ka nih le , mittui ngah deuh ka ni ngai lo sin .



"Tah na chhan tur ka nei lo ,nge ka tah ngawt ang " ti mah ila a awi erawh ka ring lo.




A thusawi khan min hneh em vang a tap ka nih loh pawn a kiang a awm ka thlakhlelh em vang a ni ngei ang .






"Karleh kar tir lam ah kei pawh aizawl lam ah chhuk thlak leh tawh ka beisei a ,a phurawm hran lo khawp mai " a tawp lam chu a rawn thluk vak kher a , a peihloh tur zia chu ka lo hre thiam ve mai .





"Chawlhni ah chuan mizo ho inkhawmna thin ah khan va tel ve ziah tawh rawh u ,mizo kha lam a awm ve te nen pawh in in be nel thuai a nga , in tan pawn a nuam ang "min ngaihtuah tak in a rawn ti leh mawlh mawlh , a chang hi chuan pa in a fa thu a hrilh hi kan ang in thin .





Krismas leh Kumthar kha Goa a mizo awm te nen kan hmang ho a , kan inkhawm ve bawk , mi thar kan nih na ah min lo be tlangnel thiam hlawm bawk nen nuam kan ti tlang viau.





Rinsawma hian hman remchan chuan inkhawm tur hian min rawn hrilh thin , ka inkhawm ve tawh hi chuan a lo phur thei thin khawp a, kan inbiak a kan hrilh te hian min rawn fak der ve nasa thei khawp .






Aizawl lam a a chhuk atang biak theih in a awm lo a, zan ah te hian biak tum in ka beina sa viau thin , chanchin engmah min rawn hrilh loh chu ka lungawi lo khawp .





A chhuk hma zan te kha chuan a thlen hun ah ,phone calll hmang in ka biak hman dawn loh avang in msg ah lo hnutchhiah mai tur in ka chah a , a ni pawn min rawn hrilh a tum thu a sawi ve reng si a .







Zan lam ah hian ka lung a leng zual thei khawp , zantin Rinsawma nen inbe thin kan ni bawk nen ,tia an reh daih hi , mak ka ti a , ka awmthiam lo lek lek thin .




Zikpuii nen kan inbiak chuan thu mak deuh ,ka awih ngam chiah si lo chu min rawn hrilh a "A thil zir kha a chawlhsan an tia , a chhungte ho pawh aizawl lam ah an chhuk khat tawk reng ,chanchin han ngaihchan lah in tha deuh in min chhang a, a chawlh san na chhan tak an sawi leh chuang si lo" a rawn ti a , kar hnih zen zawn ka biak theih tawh loh thu ka sawi phei chuan kei ai in mak a ti zawk emaw tih mai tur a ni





"Thil dang leh ,rinhlelh awm in an awm ang tihna lam chu ni lo mah se , Babyi nen khan an chhuk tur kha an chhuk rual a , Hlutei lah hian thutak deuh hian an inkawp that leh thu a sawi thin a , kei phei chuan ka awih lo bawk nen ,rilru nuam deuh in ka awm reng a , hrilh pawh ka rawn hrilh loh na chhan che a nia " a rawn tih leh tak ah chuan eng ber nge rin tur ka hrethiam tawh lo.




Hlutei thil sawi chu lo dik ta tehreng pawh ni se , kei nen a kan inkar chhu chat fel lo a ,midang kawp duh tur chi a ni in ka hre thei thlawt lo a , ka ngaihtuahna a buai kual nuai mai .





Pastor nih tum ruh em em in a zirna vawi leh khat a a bansan mai pawh chu thil mak a ni , pastor a nih hun tur te sawi in ,hmalam hun ah duhthusam tam tak ruahman lawk kan neih te kha a thamral dawn a va ni mai awm ve .





Hmingi leh Chhana ka biak pawn Zikpuii sawi ang bak sawi tur an hre chuang lo , rilru buai zet in ka awm reng thin a , beisei na tlem nen nitin hian min rawn biak hun hi ka chang reng thin .





A ni erawh chu theh hmeh ang mai in a reh tlawk tlawk a, amah ah chiah rinna nghat ngam tu hmeichhia hi min rawn hre reng tawh lo a nih rin chang ka nei a , chu chuan keimah bawk a ni min ti na nawn leh thin .





Tiang a ngawi reng a reh ngawih ngawih loh hian ,a chinchang min rawn hrilh hriat a , kan inkar tihtawp a duh a nih pawn chiang tak a min rawn hrilh ka la phut tlat reng a , a aw ka ngei hmang a , a rawn insawifiah ka beisei ru reng thin




Mahse a ni chu a reh tlawk tlawk mai a ni , biak tum in vawi engzat nge a no hi ka hmeh chhuah tawh ,beidawnna ti zual tur mai in a hnen atang chhanna ka dawng ngai lo , msg lam ah ni se biak tumin thu tam tak ka thawn ,a in seen ngai reng reng lo.






Thla khat chhung kha engtiang in nge hun ka hmanral tak tih pawh ka hre lo ,ka nun khawhar lutuk avang a dai sual lek lek chang lah ka ngah , Rinengi pawn ka mize dang chu mak a tih zia ka hai lo, mahnia awm chang in thil ngaihtuah vung vung ka hrat a, hnathawhna hmun ah lah ni se, hmel hlum put luih ka harsat a, tawng lo in ka thil tih tur chu ka ti mawlh mawlh mai thin .




Muanpuia pawn tiang a ka awm chhan min zawt leh zeuh thin ,chhanna erawh ka pe ngai lo mahse sawi lo mah ila eng emaw chen ah chuan rindan a neih thiam ka ring a , Zikpuii nen an in be zeuh zeuh thin nen ,a lo hre vek tawh hial mai thei.




Zan ah thian te'n chhuah ho an rawt pawh in ka tel loa kal mai tur in ka ti a ,mahni a awm in khum ah ka mu meng kar ,thil tam tak rilru ah a rawn lut zung zung a , min lo biak loh chhan tur awm ang ka ngaihtuah kual fe hnu pawh in a chhan tur awm ang ka hre thlawt lo.




Zan rei lam ah Chhanan min rawn bia a ,"Thiana nen inin be be tawh em "a rawn ti a , a tawng chu a sak talh talh viau mai , rilru tibuaitu nasa tak nei ang mai a ni ,a aw ri te chu a dik lo in ka hria .




Kan inbiak lohna rei tawh zia sawiin , ka lungawi loh thu ka sawi tel bawk ,





" Vawiin ah an in ah ka va kal a , aizawl lam ah rei lo te chhung awm an tum ni in ka hria , thianpa chanchin ka zawh lah in a inpeih hun nghak tur in min tia ,min ti bang bo khawp mai ."a rawn ti hulh , a thianpa in la hrang tlat chuan a ti lawmlo ve hle chu a ni.






"Buaina a tawk a maw ni le ,i theih ang ang lo hriat tum teh ,tiang ringawt zawng " beidawng zet in ka ti a , tiang ringawt a a reh leh biak theih pawh a awm lo tlat chuan min ti hnim ruih reng mai.






Kei mai ni lo in kan thiante lak ah pawh a in la hrang chuan tlem in ka awm a ti nuam deuh a ,kan inkar thu vang ni in ka hre ta lo ,harsatna lian tham atawk a nih ka ring ta ber .







Mahse, ka rilru chu a nuam rei lo ngawt a sin , a tuk leh lam a ka thu hriat chuan beisei a bo tawh zia min hriat tir ni mai in ka hria ,tiang bak a inphatsanna tenawm hi a thlen leh theih pawh ka ring tawh lo m





Eng thu nge ka hriat maw !!?



Rinsawmpuia leh Babyi te inneih tur thu a ni .Beisei leh tur chuang ka nei tawh lo , ka thinlung natna chuan min hmet chau zo a , ani lo chu ka tih ve tlat thin mipa tha ber a ka ngaih , nun dik tak nei tu a ka hriat khan a lak a rinna nghat tlat tu hmeichhe khawngaihthlak tak hi kawng kawi ah min pen san a , mahni mai a hmachhawn tur in chakna tam tak a nei lo tih hre chung in kawng dang zawh a thlang ta zawk si.





A nupui tur a keimah chauh min suangtuah thin tu khan , a thil sawi pawh hun tam a la ral hma in ,midang nupui a neih a tum a ,.





Kan hma hun kan suangtuah dun thin ngei te khan tak ram chang ni an nei ve tawh dawn si lo .




Suangtuahna a nih ang in tak ram thlen pui hma in a tham ral riai riai dawn chu a nih tak hi .





Nileng in khum ah ka mu chawt a , hna pawh hotu te lam rem ti vak lo chung chawlh ka dil ta tawp kha a nia , Rinengi leh Muanpuian min sawipui lo phei se chu ka chawlh theih ka ring lo .






Rinsawma call tum in a number te chu ka hmet chhuak leh thin , mahse be loh bawk in ka dah leh thn .




Biak a zawh chian duh viau mah ila , min dang tu thil rit tak a awm tlat a ,a ai a rilru natna thuk zawk a min hruai thei thil hriat ka hlau te pawh a niang .



Chu lo ah , a hma ang bawk in min chhan leh duh ka ring chuang lo ang.





Khum ah chuan phone chu ka dah sawk a , dan hman lek loh in ka mit atang mittui a rawn luang thla zung zung , ka awm ah thil lian tak in min delh emaw tih tur in a thip vung vung a, insum lek lo in ka in hnit ta faih faih , ka pa boral hnu a ka tah nasat leh na ber a ni ngei ang .






Rinsawma biak duh na ka la nei fan a , mahse min rawn be ta cheng chu , a hma zawng ai in ka rilru a na thar leh emaw tih mai tur a ni .





"Ka tihpalh " chu thu chu a hnen atang a ka hriat chak ber a ni lo , tihpalh tih vang mai mai in ka chhungril natna hi a kiam phah dawn lo , tu mihring mah ka rin leh theih pawh ka ring tawh hek lo






"Eng tin nge i tih theih , tiang hi eng tin nge ka chung ah i tih theih ka tih chu , min lo hmangaih ngai miah lo em ni ,min hmangaih loh chuan eng vang in nge inkawp tur a bul min tanpui " ka ti nawk nawk a , ka rilru buai lutuk chu phone chu na zet a hum in lukham ah chuan ka hmai ka nawr ta vak





Ring thei ang ber a tu mah dawn lo a au chhuah chiam tluk a chak ka nei lo .





"Ka tihpalh "




"Kha thu kha sawi tei vet suh , ka dam chhung hi chuan ka lak atang ngaihdamna thu hriat in ring suh " ka ti tuar , tun ah chuan hmeichhe nasa tak ang mai in ka tawng chhuak a lawm , mahse ka indem lo ,ka in dem phal hek lo ,hetiang a min siamtu mihring hma ah hian insum theihna ka tlachham a , biak that phu in ka hre hek lo.





A taksa khawih thei ngat phei ila chu , a hmai ah vawikhat tal ben a nia ka duh .




Zaidam tak leh min ngaihtuah ber ang mai a "nang chu hmalam hun thui tak i la nei , kei mi laktlak loh vang mai mai hian i nun ti chhe suh , i beidawn lek lek chang a piang in ,ka tihnat na che hi rawn hre chhuak la , min diriam theih nan hlawhtling tak a ka hma a ding chung a i hawi san vah theihnan beidawnna ata i tho chhuak leh thin dawn nia ,Pathian in a awmpui tlat che tih i hre dawn nia " a rawn ti leh chiah chu ,a hma ai zawng in ka na in ka thinrim zawk a ,insum hman lo lek in ,







"Nang hian Pathian hming pawh lam ngam tur ni in i inhria em ni , Pastor nih tum a i beihna i bansan chu a tha khawp mai ,chu ti lo zawng Pastor lem ber , rinawmna pawh nei lo ,ringtu der i ni ringawt dawn a sin "ka tawngkam hman zet chu le ,phone atang a in bia ni mah ila ,nasa tak a a rum nghut ri chu ka hre pha a , nuam lo chu ka ti ve, mahse ka chapo na avang in ka thusawi chu sut leh tum na lah ka nei tawh hek lo .






" I nupui neih tur ah ka lawmpui a che , hlim tak in le "harsa zet in ka ti chhuak thei hram , ani hi ka huat tluk zet in ka hmangaih a , ka hmangaih in nupui a nei tur chu harsa tak chung pawh in lawmpuina hlan chu ka tih ve tur ah ka ngai ,




" Ka lawm e "a aw chu a tham chhel a,a nupui neih tur chu a aw ki ah reng reng a hlim tih hriat theihna tur ka zawng ngial a ka hre lo .




Ngaihtuah lo teh a hlim ang ,a hlim ngawt ang a hmangaih hmasa ber a lawm nupui ah a neih dawn , a hlim leh a hlim loh chu i lo ngaihtuah tur a ni lo, nang a bialnu ni mek ngaihtuahna nei lek lo in a nih hi nupui a neih dawn , nang pawn theihnghilh tum in hma la rawh ,ka rilru chuan ka ti mawlh mawlh a .





Hei hi kan inbiak tawpna tur a ni tawh ngei bawk a nga , a tawp nan chauh he thil hi ka tih tir ngei ngei ka duh ,



"Rinsawm ''




" Umm"ti chhuak hulh in "enge ni ta " a rawn tih zawm zat .





"Vawi khat chauh ,min koh dan thin khan min ko leh thei a ngem,i lak atang hei bak ka beisei tawh lo ang" ka chapo leh huat na dah tha in , zah hre lo ang mai in a ni ka dil ni , a lak atang hei bak hi chu ka phut tawh lo.




Nakin ah chuan mi pasal duat lai a ni tawh a nga ,dam te a kan awm a kan inhmuh leh te a nih pawn ,hmelhriat satliah chan bak kan chang tawh dawn si lo .




"Duhno " a rawn tih ril ruih rual in phone chu ka hmet tawp a , insum tawh lo in ka tap chhuak ta zawih zawih , ka thin na vawng vawng ah chuan ka tham tawn tawn , thawk chhuah har khawp in ni a nat ni .





Rinengi chu ka bul ah lo kal in khawngaih hmel deuh a mi melh chung in min rawn kuah a ,ka hnung ah a beng dat dat bawk , midang kan bul hnai mai a an awm ve avang in thawm chhuah rin hlau tak in ka tap khur ngat ngat .





Min khawngaih si ,min hnem dan tur hre vak si lo chung in"i bialpa chu a mawl ngawt ang ,nang ang hmeichhe hmeltha lutuk a kalsan thei che hi , nakin ah chuan a la inchhir dawm hrim hrim ,lo ngai reng rawh "an ti ngawt thin a , hun dang chu ni se ka nuih pui thei ngei ang ,tun ah hi chuan ka rilru ah eng dang mah a leng lo ,ka ngaihtuah thei hek lo .




'Khawvel a ka mipa hmangaih awm chhun in kei min thlauh thla in a bialnu hlui nupui ah a nei dawn a , tiang a rilru natna tawp khawk tawng tur hian a lak ah eng nge ka tihsual , min ngaihtuah na chhe te mah nei lo in hmalam pan in chhungkaw thar din a tum ni si .'




He thu hian ka rilru leh thinlung zawng zawng a luah a, min ti na em em bawk.





Ka tah ban hnu pawh in khum ah chuan a mu ve reng a,tlem tlem chanchin a hriat ve tawh avang in tun a ka tah chhan awm ang pawh a hrethiam ruai a nga , hriat belh chak deuh in min melh mahse engmah chu min zawt zui bik lo.





" Zanin chu ti hian riak dun ang "a tih tlat avang in kan mu dun rial a , zan a ka tah leh a hlau te pawh a niang .





Tui tak a a hnar suk suk hnu pawh in kei chu ka la mu hil thei lo, Rinsawma ka ngaihtuah chhuah leh rual erawh in beidawnna leh natna bawk in min chen chilh leh thin





A sar hu lai a ni bawk a , min nghawng khawp thil ka ei tha thei lo in thathona reng reng ka nei bawk hek lo , zan mut ka harsat zual a, zanlai dar 12 ah pawh sanghate rep ang kar ka la ni thin .




Mut that lohna na hi chuan kan lo chau in kan lo harhvang zar lo nen hnathawh na ah pawh min hau zeuh zeuh reng mai .







" A va mak ve , tiang ang mipa a ni lo a maw ka ti a , Pathiam thu te kha a zir i ti in ka hria a , Pastor pawh lo ni ta teh reng se ,rin pawh kan ring ngan tawh nang ,"Muanpuia chuan a ti hluk hluk a , a tawng ring ang reng si a , thil ei tur a rawn chawl ho pawh an rawn hawi zuk zuk mai




A ban ah chuan beng in"tawng zawi rawh "ka ti hlak , glass no sial zet zet chu ka hru fai zawm leh nghal a,




" Ruang kal thei te pawh i ang a lawm , kha , i dang bel a ,ruh kawl hlang hi i ni ringawt "deuh teh chiam zel chuan, mahse han phat ngaihna erawh ka hre lo thung , thil ei tha bawk si lo ,mu thei bawk si lo chu ka taksa ah rawn lang tan in ka rih na a tlahniam chak khawp mai .




Phone tak ngial pawh ka khawih tha peih lo a ,midang bul a awm ai in mahni te a thil ngaihtuah melh melh duh chang lah ka ngah , Phone ka khawih chuan Rinsawma min rawm biak mai rinna ka nei thin a , chutiang ang ngaihtuahna neih chu duhlo viau mah ila, ka thunun theih phak bak a ni si .





Amah ka hriat chhuah theihna tur ang ang chu paih chhuah vek a,theihnghilh ka duh , mahse tun ah hrih chuan ka theih ka in ring lo , a number pawh ka delete lo a , ka block hek lo , ti ta tehreng pawh ni ila ,ka phone atang in ka paih chhuak ringawt a nia nga , la thinlung ah erawh a cham reng thung dawn si .




A hmuh phak lo a ka lo awm hi tunah chuan ka lawmna a ni tawh zawk, ka hmel a hmuh a , ka tawrh nat zia a hriat kha ka duh lo a , hmeichhe dang nen a hlim tak a an awmdun lai hmuh pawh ka duh hek lo .





Mihring te hlimna hi chuan rei a awh ngai lo a nih hi, kan hlim ve dawn chauh a ,phurh zawh rual loh natna in min luh chilh leh thin , hlim na tluantling tawng baw tur hian kan hun liam ta ah khan eng thil tha tak nge tih ngai ang le ?






"Thiannu, Rinsawma te an pem dawn a maw ni kan tih kha a ni leh lo a ,a nau te pawh he lam ah sikul an la kal reng ,mahse a nu leh pa leh amah chu aizawl lam ah an awm a ,a naute chu U Sangpuii te in ah an awm " Hmingi chuan a rawn ti a ,min rawn biak tawh hi chuan Rinsawma chungchang hi a sawi lo thei thin lo chu a ni.





"Ka ngaihtuah lam zawng a nih loh tawp chu a " ka ti liam puat a, Rinsawma chungchang a rawn sawi hi chuan ka be tam peih thin lo , midang pawh an ni vek tho , bumtu hming an rawn sawi lan tawh chuan ka chhan hmuk hmuk loh pawn kan inbiakna ka ti tawp ziah .





"Babyi nen pawh khan an innei leh " a sawi zawh hma in



"Chutiang lam ka hre chak lo ,a chanchin sawi tur in mi min rawn biak " ka ti hlar , a chek tlak tlak ri hre zawm mah ila , ka ngaihthlak sak chuang lo ang , hmalam pan tum a harsa tak a ka beih lai a,a chanchin an rawn sawi teh fo thin hi ka ning lek lek chu a ni .





Mi tam zawk chuan ka zaidam zia an sawi thin , mahse mi zaidam chu ka ni bik lo , ka tih loh tawh ah chuan ka luhlul in , ka tuang ka tichhah tlat thin , midang in an nawr kal mai mai theih hmeichhia ang nih kha ka tum ngai hek lo .





Min hrechiang bawk a ,a rawn sawi zawm ta lo "I nu i be khat a ni maw ,nimin ah ka va leng a , i biak khat zia thu leh a ngaih thu che a lo sawi luam a lawm " thu dang ah a rawn pa kai ta daih , ka tang tung pawh chu ka inthlah dul ta riai riai .





Rinsawma hming an rawn lam rik tawh chuan , ka thu awn duai lai pawh ni se ka thu tung nghal at thin reng a ni .




A rawn sawi lang tak ah chuan ka nu leh nau te ka biak khat zia ka inhrechhuak mawlh mawlh ,ka inthiamlo viau bawk .






Rilru nat tawngkhawng lai pawh in an ni chu ngaihthah miah loh tur ka nih nen , khawvel a ka la dam ve chhan leh ka neih chhun liau liau te an la ni si .




Hmingi nen kan inbiakna ti tawp in ka nu chu ka call a ,rei pawh a in ring hma in a rawn la nghal vat ,






"Mambawih ,biak tlang i va har ve , in buai zual lai a mi " a rawn ti dam dap a , ka nu aw kan hre leh meuh chu ka lung a chhe thar em em mai a, tah mai ka chak zia chu,mahse ka tah chuan min ngaihtuah zual in ,a mangang nasa dawn tih ka hre si,.




"Buai em em.lo e ,in tha tlang maw,Peki ,Duata te pawh "ka ti a ,tah ka insum nasat lutuk na lam ah ka aw pawh khur ru dar dar.




Nu te bul ah hi chuan kum tam ve viau tawh mahse kan lo la pangchang nge nge a nih dawn hi, ka bul hnaih te ah chuan awm ila,lungchhe tak in ka tah khum tawh hial ka ring.




Ka nu chuan " i naute pawh an dam tha , inchhung chet ah pawh min awl fo tawh zawk , rinai tak in an fel zek a , ka feh haw te hian tui te lo lum in ,eirawng te an lo bawl dun thin a "sawi nuam tih hmel takin a rawn ti siam siam .




Rem ka ti vak tawh lo chung ka nu hian thlawh hma a la leh a ,mahse a zau lo thung ,buh phei chu kan ching tawh lo , chawhmeh hmun ang chauh a nih mai chu .A hmun a hla lo bawk a , hahdam te a thlen mai theih a ni .




Thlawh hma neih loh tawp kha a ngai ngam thlawt lo a,in a awm mai mai lah a peih si lo nen chawhmeh hmun a siam chu a hlimpui viau mai .





##Comment liam liam ila ##