Politician nupui S2

[Cck Lalchhuanawmi]

Politician Nupui Hring nun
S-2
Chapter-2
Ziaktu: Cck Lalchhuanawmi


"Lal Fanu, i pa Taiṭita kha duat hle rawh aw".


An pahnihin an awm a, hah a dam deuh.


Ngaih erawh zawng, ka ngai bâng dawn lo a ni. Ka hmangaih te an ni tlat a.


"Puipui? Puipui?", ka inthunun thei lo.


Ka kâ a chîp tlat a, ka âng thei lo. Ka meng fiah hle thung. Siamtean ka khabea thisen luang a hru mawlh mawlh a.


Freddy-an ka kut leh ke a hmet nuap nuap a, Sammy-an min ân tir a tum mek bawk.


Chung zawng zawng chu ka hria, ka rilru ka thunun thei lo. Ka hmui ka seh ngat ngat.


Inkhel kan en tui tehreng nen.


Doctor-in Postpartum Depression ka neih thu a sawi a, dik ka ti lo. Ka rilru ka inthunun thei lo mai chauh a ni a.


Tun hma kha chuan, hetiang hi ka ni ngai lo asin!



(Hun liam taah khan...)


U Hmain, "Duhsaka hi, a lo kal har mang e. Chanchin a rawn sawi si lo", a ti a.


A phone chu a benga dah hnaiin a dah thla leh ṭhin. "Call a chhâng thei bawk si lo", a ti leh.


School kal turin an inpeih thlap tawh a, Lal Fanuin, "School kan tlai ang e aw", a ti a.


"Tlai lo e, Driver a lo thleng ṭep tawh alawm", tiin, u Hmai bulah, "U, ka hrilh theihnghilh daih che, Duhsaka a bâng tawh",


"E he! Ngati nge?", u Hmai chu a ṭhawng nasa mai.


Naupang ho pawhin, "Tinge?", an ti ve bawk. Sammy-a pawhin min en he hâw.


"An chhungkaw lama rokhawlhna an neih avangin a nia, Driver kan ngah tho tiin, ka pawm sak ta mai a nih kha", u Hmai a bu nghat nghat.


Driver dang chu a lo thleng ta a, Duhsakan a khalh ṭhin ngei mai midangin an khalh tur chu, ka ngaithiam lo ve det.


Hmun danga kaltir a ṭha zawk.


U Hmai te chu an kal ta a, "Eng nge i duh a?", min melh sexy mai bawk sia. Ka zâm lek lek.


Wheelchair-a a ṭhu chu a zaka dawmin ka din pui a, "Duhsaka", a ti chu, "Ka sawi kha, chhungkaw lam rokhawlhna avangin chawlh a duh alawm", Sofa chungah ka nghat chawrh.


Ka thlah lui hrim hrim, "Min dim lo hle mai",


"I rit em alawm", a vei nui suk.


A zâng lutuk ringawt, duh angin Buh a la ei thei lo lutuk a.


"Engtin nge exer i lak ṭhin?", hei hi ka hre duh.


"Duhsaka chu, ka hnenah engkim min thlenin, min rawn thlap zel asin. Chutah, ka chinfelpui ṭhin", a ti leh.



Duhsaka chawl chu a thinrim dawnin ka hria. A bum tih a hre reng sia, ṭan chu a ṭan lo ang.


"Ka rawn hmasak loh che avangin i thinrim em ni?", thinrim pawh nise, ka chawlh tir tawh.


Hruai kir turin min ti mah se, ka hruai kir dawn lo.


Sammy-a chuan, "Chhungkaw rokhawlhna an nei khât khawp asin", a ti a. Min en chik hle bawk.


"Hriat i nei a ni tiraw?",


"Eng chu maw?", wheelchair nawr sawn ka tum a, "Ding rawh", a vin lek lek.


"Pawhdawh i hawng tih ka hria, Duhsaka i chawlh tir avangin-",


"Ka chungah i thinrim ta tihna em ni? Tum reng vanga kha pawhdawh kha hawng ka ni lo, Puipuii zawn hmuh theihna tur a awm takin tih thua hawng ka ni", ka lo ti zung zung.


Thiam ka inchan a ni ang chu.


Sammy-a chu a thle deuh bak a, "Ni lo e, lo kal teh", a kut a lo phar a, ka ban duh lawk lo.


Nizanah hun nuam tak kan hmang a, kan hmang chhunzawm reng ang chu tih nak laiin, Duhsaka vang vek.


A kut a dah thla a, a ṭawng thei ta lo.


Sawi tur a ngah, ka tan ṭawngna hun a inhawng ta chiah.


"Puipuii ka ni tih leh, min hmangaih tih min hrilh daih tawh ni la chu, engkim a fel vek tur. Pawhdawh pawh ka hawng miah lo ang. I thiam loh chu ka ti miah lo, chhetêin thiam lohna i nei", ka ti khar khar a.


A ṭawng thei tawh si lo, nuam ka va han ti tak.


A bulah ṭhu thlain, "Ka nu leh pa bula pawisa i pek te kha, min hrilh ve tur alawm. Sam, i nupuiah min pawm ngai lo tiraw?", a meng phawk nasa mai a.


A nih lohzia sawi a tum.


"Min pawm la chu, tunah hian; Duhsaka vangin ka chungah i thinrim miah lo ang. Ka lakah zêp i nei tlat zel a, midang emaw Media emaw aṭang chauha ka hriat hian nuamlo ka ti. A chang chuan, ka hlau thei lutuk che", ṭi dakin ka han ti a.


A ngaih a ṭha tawh lo, sawi tur a nei, a âng deuh zuau ṭhin.


"Duhtawk ang, hmabak ko tak a awm, ṭha taka hlen chhuah kan tum tur a ni".


Thawh ka tum a, ka mal a rawn hmer vak, "A na!", ka rak chul a. Center table-a lehkhapuan a melh zuk zuk.


Insawifiah a tum, ka hre thiamlo lui tlat dawn.


"Exer la ang, nizanah ka rawn thleng hlim hlawt a, mut hahdam te ka duh", thawh ka tum leh chu min hmer leh vak.


Nuih a za mang e ka ti.


Taiṭita hming han lam ri teh ang, "A na!", ti pahin a kut ka dah sawn a, "Takah, Taiṭitan Beram pathumte min lo biak rawh a ti tak asin, Lal Fanu te ka hrilh theihnghilh daih", rang lutukin ka nghawngah min kuai a, a âwmah min kuah bet.


Ka nui tet tet, "Min thlah teh", min thlah duh lo.


Thikthu a la chhe tluang zel e.


"I huaisenna avangin ka lawm e", a ti chhuak ta. Min thlah a, ka hawi chhuak, "Sam, engah chuan maw?",


"I hriat vek kha", a ti ringawt a, a ngawi leh hmak.


Hriatthiam a har.


"Politics-a i ai ka awh vang nge, Duhsaka ka chawlh tir avangin?", lungchim takin min thlêk a.


A pahniha a tihna a ni mai ang em le?


"Tunah chuan, kan inkarah zêp awm tawh suh se. Kan hmaa paltlang tur awm apiang kan pahnihin pal dun tawh ila, kan kalsan tawh hnuah rilru i pe tawh lo teh ang".


Min pawmpui ni ngei tur a ni, ka biang a tawk zeuh.


Nia, naktuka thleng tur kan hre lo.


Kan inkarah zêp awm tawh lo sela, pum khat kan nihna ang takin awm zel tawh ila, a fel vek mai ang.


"Sam, min hmangaih thu min han hrilh leh teh", a hawisawn hmak nia.


"Nang hi", ka kuai her a, a hawisawn ṭang ṭang..


A bekah dawmin hnai tawkah ka en, "I sawi dawn nge dawn lo?", a lu a thing nawk nawk nia.


"I va han sual e", ka vin deuh a. A nui suk suk.


A hmuiah ka fawp zuk zuk a, ka nui sâng, mak a ti lutuk. Ka kâwngah min hmer a, min fawp let turin a che ṭha thei lo.


Ka piai nawk nawk a, a hmuiah te, a biangah te ka fawp kual zuk zuk. A hlimawm em mai.


A exer lak dan a sawi duh lo.


Rin dan ka nei, u Hmain pindanah a awmtir dawn. School-ah naupang a thlah a ngai a.


Chutih laiin, Sammy-a chu, khum kotlang rinchhanin emaw din chhuah tumin a bei a ni ngat mai.


Amahin a kut emaw a lu te tihchet a tum dawn a.


Ṭawng chhuah ngei tumin a bei dawn bawk. U Hmai ka zawt a, ka rin dan a dik chiah bawk.


Pi Zami bulah kan kal zeuh zeuh, kal loh tawp a, ngaihngam taka awm ka thei meuh lo.


A dinhmun hi hriat thar reng ka duh.


Sammy-a nen kan inawm ta chawt.


Office-ah hna kan thawk dun a, kan Bial chin kan ngaichang reng bawk. Anmahni'n, "Ṭanpui kan ngai e", min lo tih hmain, keimahni ngeiin, "Kan lo kal dawn e",



"Hma kan rawn la ang",


"Lo lungngai suh u", kan tih theih nan.


Duhsaka chu a reh ta vang vang. A ruka Hmingi a biak ka hlau a, ka zawt nghe nghe.


"Be ngai lo, ih maw; kan inbiak lohna hi a rei tawh lutuk. Keipawhin ka Star tawh lo. Min duh lohna hi a tilang chiang thei lutuk a, ka inthlahrung thei lutuk. Chu ai chuan, u Hriatpuia hi biak a nuam ka ti", Lalhmingi ta pek chu.


"I u Hriatpuia chu ka mi hriat hi a ni em?",


"Ni ang chu, amahin alawm min rawn be hmasa. Ka number i pe turah ka ngai a. Kan inbiak kan inbiak takah ka zawt a, i pasal khan a pe a nih chu. A nau chu a hmangaih hle mai", a lo ti teh duah.


Ka bula ṭhu Sammy-a ka melh.a, TV a en.


Kan inkarah Lal Fanu a ṭhu a, Grape min hmawm tir zung zung. Grape-in min tipuar mai dawn alawm.


"Hming, nakinah kan inbe leh dawn nia".


Phone ka dah a, Lal Fanuin lehkha a zir zo tawh a. U Hmain zir zo lo pahnih a ṭhutpui.


U Hmain min awmpui hi ka hahdam phah ve tlat.


Politics-ah ka buai han ti ila, han chhuah ngaih chang hian, min duat bawk si, Nutling pui hi, pangchan a awl ṭhin a nia aw.


Beram pathum te pawhin nuam an ti.


Hmingi leh Hriatpuia te inbiak ṭhinna ka ngaihtuah neuh neuh chu, thil pakhat ka ngaihtuah chhuak ta.


Ka zak lutuk chu ka ṭhu hniam riai riai a, ka hmai ka hup.


Hmingin hria se, min hau nasa dawn lutuk.


"Anu, eng nge a?", ka kut laksawn a tum. Lal Fanu a nui uar uar, "Ka inbihruksiak"" ka ti phei chu, "Ka tel ve duh", Lal Fanuin ka kut laksawn a tum ṭang ṭang.


Sammy-an, "Lal Fanu, i nu khan biak tur ṭha deuh a nei a", a lo ti.


"Ka nei bawk lo",


"Vawiinah a sawi vek", Sammy-an a ti leh. Taiṭita ka sawi tak kha, a la thik mawni?


Sawi chhuahna tur a awm tawh lo e.


"Lal Fanu, Apa Taiṭitan min lo biak rawh a ti che. 'A hmelṭhain a duhawm si, ṭha takin lehkha lo zir sela, exam hunah a pass chuan, a School bag tur ka leisak ang a ti", ka ti dek dek a.


Sammy-an, "Naupang hnenah beiseiawm loh tiam suh", a lo ti hmiah.


Lal Fanuin, "Paaa, School bag thar ka duh", a ti a.


"Kan lei dawn nia", Sammy-an.a lo.ti.


Sawi belh zel ka tum a, ka insum leh ta zawk.


Sammy-a nena kan inkarah inhmuhthiam lohna te a awm tawh lo a. Tlang leh fiah takin a awm ni maiin ka hria.


Theih angin exer ka lakpui a, Dr Saxena rawn thei lo mah ila, Dr Zami kan hmu reng reng.


Chutiang chuan, kum chanve kan awm a, MLA lam hna pawh ka zei tawh lutuk.


U Hmain Naupang School kai thlah pahin a bazar a, A4 paper kan neih tawh loh avangin, lei turin ka chhuak.


Kan ṭhenawm Nuin min ko peng a, in kawngkhar ka khar em pawh ka hre leh tawh lo.


"In Driver Duhsaka nen khan intithiam loa inbân em ni in nih?",


"Ni lo e, chhungkaw lamah rokhawlhna a nei zawk.a", kan ṭhenawm Nu hmel chu a dik zan lo.


"Thil dik lo a awm em ni?", ka tih chuan, "En teh, zanah in Driver Duhsaka kha ka hmu ṭhin. In bulah a vei thuak thuak a, chemte te a keng a nia aw", a ti chu, ka phu nasa lutuk.


Inah Sammy-a chauh a awm.


"I hmu tak tak maw?", ka ti hluai a.


A chiang em em mai bawk si.


Kan ṭhenawm Nu hnenah hriatthiamna dilin ka tlan chhuak hmiah.


Rang lutukin inah ka tlan lut, kawngka ka khar ṭha sawk sawk. Kawngka ka khar lo tak tak.


"Sam? Sam?", ka ko chul a, min chhâng har si, ngaih ṭhat lohnain min man nasa tawh mai.


Pindan aṭanga min lo.chhân takah chuan ka phei thuai a, khum chunga lo bawkkhup chu ka zu bawh.


Kan ṭhenawm Nuin Duhsaka awm dan a sawi chu, min tiṭim uai uai.