Mikhual Hunter - 8

[Vtei Jahau]

Zomuanpuia's P.O.V






"Min hrethiam ula ka zawhna hi dawnsawn a nuam lutuk lo maithei a, mah se in nula hian damdawi a ti ṭhin em ni?" Doctor chuan Kapi zawk chu en lo in keimah min en a, kapi nen chuan sawi tur kan hre lo nasa, Ngaihdami lo haw chhoh aṭangin thla khat em pawh a la liam si lo a tin ni, "Doctor kan tunu hi kan bula a rawn hawna a la rei lo a" kapi zawk chuan a lo ti a, kei erawh ka kha chu a chih vek a, engmah ka sawi thei lo, "A nih chu, chutiang a nih chuan a damdawi ei hi kan siak chhuak ang nga a ṭha ve leh mai turah chuan ngai ang" Doctor in a tih takah chuan kan thaw deuh huai a, Doctor chhuah veleh chuan kapi chu thaw deuh huai in a bula ṭhutthlengah chuan a ṭhu deuh hnawk a.






"Kapi, lungngai tawh suh aw, Doctor in a ṭha dâwn a tih kha" tiin kapi chu ka hnem a, a bu ve nghat nghat, chumi zân chuan kanu in a lo hrilh a ni ngei ang, Aizawla kapa ute chhûng chu an lo lang hlawl.






"Ehe, Pate engtinnge in lo hriat zawk" tiin ka chhungte chu an kutah vuan in ka chibai diat diat a, Patea nupui chuan, "Nia, in lo thlen rual khan inu in min lo bia a, bungraw thawn chhuah lâk lawh kan lo nei bawk sia duh angin kan lo kal hma thei lo zawk a nih hi" a lo ti vat a, kapi chu a hawihai ang reng tih ka hmuh rual chuan, "Pi hei Kapa u Pate Hruaia a nia, chuan heihi annu Nute Engi a nih hi, chuan hei an fanu Upa ber U Bethsy a ni bawk a" tiin ka in hmelhriat tir ta zung zung a, Patea chuan, "Chibai leee, kapi chu min hre tawh lo a ang hle mai" tiin a chibai a, a nui sâng bawk, kapi chuan, "Nia, ka hriatna hi a chhe tawh lutuk a, mah se Muanpuia'n a sawi leh takah chuan ka la hria che a lawm" a lo ti ve vat bawk.









"Aw a nih chu maw le, kapi damdawiin a riah i tân a harsa awm sia, hei Bebeti hi zanin chu lo riak rawh se kan tia, in rawn kalna ah i chau awm si a" Nutei zawk chuan a ti zung zung a, Bebeti a tih chu an fanu upa ber U Bethsy a ni, kei aiin Kum 5 vel in a upa bawk, Kapi chuan, "Ni lo e, a ngai lo, Duati bulah hian riah ka duh a lawm" kapi chuan ti ve bawk mah se Patea chuan, "Kapi kan bulah chuan in thlahrun a ngai miah lo a nia" Patea chuan ti mah se kapi chuan Ngaihdami bula awm a duh tlat si vangin Patea pawh chuan a hnial tawh lo, Nurse ho bulah chuan mi pahnihin kan awm pui theih nân min dil sak bawk a, Nurse ten an phal takah chuan kapi nen chuan zanah chuan kan riah pui leh ta a.







Kapi chu zânah chuan muhîl tûrin ka hrilh a, Duati khum bula khum ruak awm ah chuan hreh deuh chung hian a mu a, mah se kan kalna kawng velah khan a chau ve hle a niang, reiloteah chuan a muhil nghal mai a, kei erawh Ngaihdami kiangah ka ṭhu a, Ngaihdami chu ka en ngun hle, a nghawng a duk kual ruih ka hmuh leh takah phei chuan ka thinrim thar leh a, hriat chhuah zawk neiin Ngaihdami kut chu ka keu nghal sawk sawk a, ka rin ang ngeiin in zaina hnu hma a lo awm nual bawk, heng zawng zawng hi engvanga ti nge a nih ang, Apa chuan lo sawi sa nasa ṭhin in zu te hial pawh lo zuar mah se hêng aia thil rapthlâk zawk hi a chungah a thleng em ni ang?




Time Skip




Damdawiin ah pawh kar khat dâwn kan awm leh tawh a, engvang teh hrep nge maw ni, Ngaihdami chu a la harh thei lo a, Doctor pawn sawi mai theih a neih loh thu a sawi hial a, kapi pawh a mah in a ṭap ru ṭhin tih ka hria a, mah se midang hmuh lai chuan beiseina sâng tak nei angin a awm ṭhin thung, "Mi zawng zawng hrilh i ti hai a nia aw, keipawh" tiin a kut chu puan huh a hruk sak pah in Ngaihdami chu ka be mawlh mawlh a, "Tun a i thi a nih vaih chuan ka ngaidam miah lo ang che, i thurûk hriat duh te, ka thurûk hrilh duh che pawh ka la nei a, chung zawng zawng ka hriat a, min hrilh hma loh chuan min kalsan thei lo a nia" ka ti leh mawlh mawlh a, kapi chu in tifai turin Patea rualin a haw thung a, chutia ka lo ṭawng mawlh mawlh lai chuan U Bebeti chu a lo lut hlawl, "Hetiang a hmeichhia i ngaihsak hi ka vawi khat hmuhna a ni" tiin nui vur vur chuan a thil khai nen a rawn lût a.






Chhan pawh chhang lo chuan ka lo en tawp, U Bebeti nen hian kan in kawmngeih ve a, a rawn zin chang emaw ka zin chang pawh in kan in zui deuh chawt ṭhin, "Tak tak, heta i bialnu te ho ai pawn i ngaihsak zawk, i bialnu thar em ni?" a ti leh a, "Ni lo e, ka bialnu a ni lo" ka ti a, Ngaihdami chu ka hrufai zui leh mawlh mawlh, "I duh a ni maw?" nui chungin min rawn en a, keichuan mak tiin ka melh thung, "Thil hi i man chak thei si" ka ti ta ringawt, "A chungchâng i sawi erawh ka la hre ngai hauh lo" a tih leh lai chuan Ngaihdami kut ka hum sak ran chu a rawn che deuh hian ka hria a, rang takin a kut chu ka en nghal vat a, rei fe ka en leh hnu chuan a rawn ti che leh, "Aw U Bebeti Doctor ko vat teh, a kut hi a rawn che a nia, a harh dâwn a niang" tiin hlim zet chuan U Bebeti chu Doctor ko tûrin ka ti chûl a, a ni pawh chu rang zetin a tlân chhuak nghal.









U Bebeti a chhuak fel chiah tih chuan Ngaihdami chu a rawn meng ta diar diar a, ka mit chu chhing nghal vang vang in "Lalpa ka lawm e" tiin ka phun chhuak sep a, Ngaihdami chu a meng a ruai a, chutih lai chuan Doctor leh U Bebeti chu an rawn in zui lut ve ta bawk.









"Ka ṭawng hi i hre thei a nih chuan i mit kha lo khap rawh aw" zaidam fe a Doctor in a tih chuan Ngaihdami chuan a mit chu a lo khap ve fak fak a, a mitmeng erawh kei tak ngial pawn a buai zia ka hmu thiam, Ngaihdami chu Doctor chuan a ṭhut tîr a, "I ṭawng ṭha thei em?" Doctor in a tih lai chuan Ngaihdami chu a âng zuau zuau a, harsa tih hmêl zet hian, "Ka tui a hal" a rawn ti bah nawk a, rang takin Nurse chuan lapua in tui chu a hmuiah a rawn far sak a, Ngaihdami chuan, "Tunge i nih?" tiin Doctor chu a melh ha, Doctor chuan "Tu emaw tal hriat i nei em? Ipi emaw i ṭhiante pawh" tiin min rawn en a, Ngaihdami pawh chuan muangchanga min rawn en ve in, mah se a mitmeng chu a buai nak thung.








"Aih tumah ka hre lo" min en reng chung chuan a ti a, keipawh chuan a mitah tak ka lo em ve kar a, "Awle, lo hahdam rawh le" tiin a mut theih nân Doctor chuan a pui leh a, a mah zui chhuak tur a min tih angin Doctor chu ka zui chhuak a, U Bebeti a lo awm ve thung, "A vannei khawp mai" Doctor chuan a rawn ti hluai a, "Engnge a awmzia?" ka lo ti vat, "A tîr khan ka hlauthâwng hman deuh a, hetiang ho ka lo hmuh tawh tlangpui hi chu an thluak lamah nasa taka fel lohna awm in rualban lo ah an chhuak duh khawp mai, mah se Ngaihdami hi chu a ṭawng pawh a felfai a, a ṭha in ka hria" Doctor chuan hl hmêl tak chuan a ti leh a, "Mah se min hre si lo a" ka lo tih ve leh chuan Doctor chuan "Saw aia a rawn harh chian hun saw nghak phawt ila Chumi hnu chuan a rawn pângngai ve leh mai ang" a tih takah chuan keipawh chu ka thaw veng huai, "Doctor kan lawm e" ka ti a, "Kei a thil tih a ni reng reng lo" in ngaitlawm tak leh nui sâng chuan a ti a, chung lam chu kawk zauh in ka dârah a rawn beng leh thak thak a, "Ṭha deuh in lo in enkawl rawh u, kan damlo ten damna an chan hian an chhungte tlukin kan lawm ve tho a nia" tiin nui sâng chuan min kalsan a, kapi chu rang takin ka call nghal a, "Pi a rawn harh tawh a nia" tih chuan kapi chu chhan pawh min chhang lo in a ṭawngṭai nghal mawlh mawlh a, a ṭawng ri pawh ka hre vek thei, "A biak theih tawh em?" kapi chuan ṭap aw ṭiau hian a rawn ti a, "Aih la biak theih rih loh, a la harh chiang lo lutuk a, hriat pawh min hre mang lo" ka lo ti vat a, "Awle, a rang thei ang berin kan lo tlanphei nghal ang" kapi chuan a ti a, kan in biakna chu ti tawp in Patea ka call lehnghal, kapi khan Patea a pun hreh vangin a mah in Taxi vel a rawn kal ka hlauh vang a ni, "Pate, Ngaihdami a rawn harh tawh a" ka ti te te a, Patea pawh chuan a lawm zia a rawn sawi ve luam a, "Pate, kapi kha a hman veleh i rawn tlan phei pui thei angem? Ka hrilh tawh a, a pun hreh leh dâwn si che u a, ka rawn sawi sak tawp" ka tih chuan Patea chuan lo hrethiam in an lo kal vat tur thu chu a sawi ve nghal a, kan in biakna chu ka ti tawp ta nghal a, Cabin lam chu ka pan leh a, Ngaihdami chu a lo muhîl leh hman tawh chu niin.








"In in bia em?" tiin U Bebeti chu ka en a, a lu chu a lo thing deuh nar nar, "Ka bia a, mah se min chhang lo, a melh ngai a melh char char a, chuan a mit a chhing a, a muhil chu a ni mai" tiin kimchang zet chuan min hrilh a, a nui var var bawk, "Doctor chuan engnge a sawi zawk?" a ti leh a, "A harh chian loh vang a tia, a ṭhat hmel viau thu a sawi bawk" ka tih chuan U Bebeti chuan min en chung in, "Imm i hmel aṭang khan ṭhu ṭha lam a ni dâwn tih chu a chiang reng a lawm" a lo ti a, keipawh chu ka nui ve tawp, Ngaihdami chu ka en leh a, ka pan hnai a a bul a ṭhu in a sam a hmai zar tu chu ka hûi kian sak bawk a, "A chanchin chu ka hre miah lo a, mah se ka kawm chiang chhin chak khawp mai" U Bebeti chuan a lo ti leh khauh a, "Keipawh hian ka hre chiang duh khawp mai" tih zawng in ka lo chhang a, tlai lamah chuan kapi te chu an lo thleng.








"Duh angin kan rawn hmanhmawh thei lo a, kal kawngah buaina siam an awm a" Patea'n a tih laiin kapi erawh in "Duati chu engnge a an a" tiin Ngaihdami muhil thaw sak sak chu a en a, a mitah chuan mittui a tling pam bawk, "Nichin deuh a a rawn harh tih loh kha chu a la mautlang char char, Darkar hnih vel chu a ni leh tawh ang" ka lo ti a, Doctor thusawi te pawh chu ka hrilh ve ta vek a, kapi hmelah chuan a hlîm zia chu tu te pawn kan hmu thei vek in ka ring a ni, a fanu Ngaihdami nu kha a pasalin a sawisak na vang liau liau in rualban lo ah a chhuak tawh a, rei lo te ah an chan zui ta bawk a nih kha, a tunu leh zêl khatiang dinhmun a ding tur emaw chân leh tur a a in ngaihtuah khan a rilru ipik lutuk kha vawi khat phei chu ka bulah sawi in a ṭap zawih zawih a nih kha.









Chutia kan lo din deuh ṭhap lai chuan Ngaihdami chu a rawn harh leh hlawl a, a harh chiang ta deuh a ni ngei ang, a mah chuan rawn ṭhu chhuak in a hawi kual ruai a, keini ho chu min hmu ang pawn a awm lo, "Nu, nu" a ti mawlh mawlh ni maiin ka hria, zawi te te chuan a phun sap sap a, kapi chuan a va hnaih vat a, "Duati min hria em, keimah ipi ka nih hi" kapi chuan tiin Ngaihdami kutah chuan a vuan a, Ngaihdami chuan "Kapi i ni a maw?" bah nak a a tih leh takah chuan ka ngaih chu a ṭha lo a, Doctor ko tur chuan ka tlân chhuak nghal a, Doctor duty zo haw lo tum chiah chu ka va nang hman hram a, Ngaihdami min lo en sak lawh lawk mai tur a ka tih chuan a ni pawh chuan hmanhmawh takin min zui ve nghal a, Cabin kan va luh chuan kapi chuan beisei neih loh hmêl zet chuan min lo melh kiau a, a mittui chu a khap per sak sak bawk.








"Nula, tûmah i la hrechhuak thei lo em ni?" Doctor chuan tiin light te chuan a mit chu an chhun kual leh vel a, "Tumah ka hre lo" tiin Ngaihdami chu a hawi kual leh ruai a, Doctor chuan kan vaiin min ko chhuak a, "Test hrang hrang kan neih tawh ah khan a lu a sawh awm engmah a lang lo a, tun a engmah a hre lo saw a damdawi lo ei tawh ṭhin vang leh khatiang a chung a thil thleng thut vang te pawh kha a ni thei a, engvang pawh lo ni se a tan a accident dan dik tak kha hriat a nuam dâwn lo a, kha chu in thu thu ni se, mah se a rilru hahna tur te a rilru nawm loh na tur te engmah thu chutiang lam chu hre lo se, a nih loh chuan a hriselna hial pawn a tuar thei dâwn a ni" a tih chuan kan bu tliar tliar hlawm a, Doctor kal hnu chuan Cabinah chuan kan lut leh dial a, Ngaihdami pawh chu a lo la ṭhu ve rân, min lo melh leh kar tawh.






"Min lo hrethiam ula, helai ah hian engvang a awm nge ka nih" a tih chuan ka rilru a ka lo ngaihtuah lawk ang chuan ka chhang a, "Kan accident a" ka ti a, kan chhungte ho chuan min lo melh ṭhap, "Engtin?" zawhna nghah hmêl tak chuan a ti leh a, "Bike in" ka ti leh ta tawp a, ka in hum ruh nasa hle, a awih loh ka hlau a ni deuh ber, mah se Ngaihdami chu a lo bu nghat nghat thung.








"Duati i ṭha tiraw, na lai i nei lo maw?" kapi chuan ṭhut hnaih pah chuan a ti a, Ngaihdami chuan nui sâng hian "Ka eng mah a na lo e" tiin fel fai tak chuan a lo chhang a, a mah a danglamna awm chu ka hmu ta chiah, tawhsual a tawh hma kha chuan kapi te ho bul a a nui hmel pawh kha a lem riau khan ka hre ṭhin a, a dik a ni tih tûnah hian ka hre chiah a ni, tun a nui hmel hi a tak tak zawk chu niin ka hria, nia a ni ang, a rilru a awm rêng ṭhin a thil lo tawn tawh te kha engmah a hre lo miau a ni.







Chhunzawm leh tur.