All For Love (Chapter-22)

[Rebec Nunziri]

Chapter-22

(Monday zanah last chapter kan dah ang aw, chuan ka story dawt leh tur 'Perfect' tih chu prologue ka dah tawh a, min lo chhiar sak ve theuh ula, in duhzawng a nihchuan like leh comment kha min tihsak ve bawk ula aw)

Nicholas Ramnunpuia POV




Bawihi chu ka phone thin, a chhang thei bawk silo, a hnuah phei chuan switch off a in tih daih a, ka mangang tan tawh, ka ngaih a tha tawh hlawl lo chuan Zuali ka call ta ngawt a, a tlai tawh bawk nen a la thei mai lo, mahse ka tih nawn leh takah chuan a la ta hram a, "U Nicholas enge nita tun ang ah te min rawn call a?" a ti phak chuap a, "Bawihi'n ka call a chhang theilo a, a chungah thil thalo a thleng nge a muhil tawh min en sak lawk ta che" ka ti sup, a ri sat sat a, ka lo ngaichang ran, step a a pen chho ri te chu ka ngaithla reng a, kawngka kik dat dat in "U Amelia" a ti mawlh mawlh bawk, chhanna a dawng biklo, kawngka in hawng thawm ka hre leh a, "U Amelia-i chu a muhil tawh a nihhi" a tih takah chuan ka thaw huai the, ka call a chhang lo ngai silo a, ka hlauthawng deuh a tin ni. Lawmthu te ka hrilh a, phone kan dah hnuah sana ka en a, dar 2 a lo pel tawh.




Ka secretary Nunhlimi pawh a room lamah a let tawh bawk, ka inbual lai khan ka room ah a rawn lut a, engvanga ka room ah khan lo awm ngawt nge ka zawh khan file min pek theihnghilh thu a sawi a, ka phone a lo chhang tih ka hre bawk, Bawihi chuan a ngaih khawih loh hram ka beisei, ka muhil ve ta thuai a, party naah khan zu ka in hauh lo bawk, ka nupui in in lo tura min tih vangin, hmun hla taka awm mahila a thusawi ka hnial ngam lo, min thunun hneh zia hi a hre der silo a. Zingah chuan hma takah ka tho a, Mizoram lama ka haw tawh dawn vang chuan ka phur hle, Bawihi tan eng eng emaw ka lei a, nimin khan midang tir lovin keimah ngei ka bazar a, ka nupui thil tur chu keimah ngei a lei ka duh vang a ni, zingah khan ka call leh a, a tlang lo, a phone battery a thi a nih ka ring.




Ka thlen na room atang chuan ka chhuak a, Nunhlimi pawh a lo in peih fel diam tawh, hotel atang kan in zui chhuak a, airport lam kan pan nghal. Mizoram kan thleng a, hnathawh naah kal kawi lovin in ka pan nghal, ka secretary chu hnathawh na lamah a kal thung, Inchhung ah ka lut a, thawm a awm lo hrim hrim, in a in kalh bawk silo, khawiah nge maw an awm hlawm ang ni. Room ah ka chho a, Bawihi hmuh tur a awm lo, room atang ka chhuak leh vat a, ka haw dawn tih leh ka thlen hun tur kha ka hrilh chiang viau sia, Bawihi koh mai ka tum lai chuan in hnunglam atang thawm ka hria a, ka kal nghal vat, Bawihi leh Tluangi te pahnih chu huan ah an lo awm a, "Bawihi" ka ti sup a, an pathum chuan an rawn hawi nghal thap, "U Nicholas-a chu I lo thleng tawh elaw?" Tluangi chuan a lo ti vat a, "Aw.. ka lo thleng deuh chiah tumah hmuh tur in awm mai silo a" tih pahin Bawihi lam chu ka pan a.




Biak chu sawi loh nichin a min en zawk tih loh kha chu min en leh tawh lo hrim hrim, "Bawihi" ka ti leh sup a, "Enge?" bak zetin a lo ti hlar a, zaidam zawk zawk a nilo a, a rai hnu ngat phei chuan a thin chhiat a zual a min vin reng mai ni, "Min lo ngai em?" nui suk chungin ka ti a, "Engvangin nge ka ngaih ngawt ang che?" a ti hlar a, "Min lo ngaih viau tawh ka ring a, min ngai miah lo tak tak amaw, keichuan ka ngai lutuk che a hna pawh ka thawk tha theilo" ka tihchuan rum zetin min en a, "Dawt sawi lo mai teh" tih pahin inchhung ah a lut daih a nihchu. Ka en zui vang vang a, a awmdan chu mak ka ti hle bawk, "Vawin chu a mood a tha vaklo aniang, zing atang khan a la tum bur mai" Tluangi chuan nui hak hak chungin a ti a.





Inchhung ah chuan ka lut ve nghal vat a, sitting room ah chuan a lo thu a, a bulah ka va thut ve chuan a lo tawlh sawn nghal vat a, "Bawihi tinge hetiang hian i awm a, i lung tih awi lohna ka nei em ni?" zaidam tak chuan ka ti a, a tawng leh duh tawh lo, ngawi rengin hmalam chu a melh char char a, "Bawihi" ka tih leh chuan ning hmel zetin min en a, "I ninawm min be reng suh" a ti that a, eng emaw chu lungawi lohna a nei chiang alawm. Tawng leh ka tum chiah chu a tho lehnghal daih, a hnungah chuan ka zui ve zel a, step a a chhoh lai chuan ka lo veng ru reng a, room ah kan lut a, "Tinge le,.. enge i thinrim chhan enge tihsual ka neih?" ka ti lehnghal a, "Enge chutiang min zawh i hria ang chu" a ti leh hmak a, "I sawi loh te chuan ka hre hleinem, han sawi teh le" ka ti leh a.




"Nizanah i phone lo chhang tu kha tunge?" a ti ta fak a, "Ka secretary thar Nunhlimi a nihkha" ka tihchuan "Engvangin nge i phone a lo chhang, nilo enge i room ah khan a tih?" "File min rawn pek a tum a, chuvang chuan a lo kal a nihkha" ka tihchuan "A va pawimawh awm ve, khatiang ang zan tlai tawh takah khan file chu a pek ngei ngei che a ngai amaw, chuan i phone pawh a lo chhang a" ngeiawm zetin a ti a, "Bawihi ngaih kawih tur a awm lo, file min rawn pek hnuah a chhuak lehnghal alawm, kan inkar ah engmah a awmlo" a nui hak a, "A nihchu" bathroom ah a lut tau hmak a, engtia han tihtur nge pawh ka hre tawh lo, hetiang em em hian a thikthu a chhia tih ka hre lova, mahse chhungril takah chuan ka lawm a ni.




"Bawihi" bathroom kawngka chu ka kik a, min chhang lo hrim hrim, a rawn chhuah hun chu ka lo nghak a, rei nghah a ngailo, "Hnaah I let dawn lo a mi, a la hma em hi, va kal rawh, hmu chak deuh tu che pawh an lo awm thei a" mei nei deuh chuan a ti leh a, en pawh min en lo hrim hrim, "Ka nupui hi ka ngai lutuk a, hna lam pawh ka ngaihtuah theilo, chau takin inah ka rawn haw a, mahse ka nupui ka ngaih em em lahin min lo thinrim khum bawk sia, enge i lungawi nan ka tih ngai ang?" ka ti sup a, "Min be lo la a nimai" tiin a mu daih, "Ka va in tifai ve anga, ka rawn mu ve nghal ang, ka chau riau a, hahdam ka mamawh" ka ti sup a, chhan pawh min chhang lo. Bathroom atang ka chhuak a, boxer chu in thawlh sawk sawk in ka nupui bulah chuan ka mu ve nghal.




A lo thaw sak sak tawh a, ka lamah chuan pawt hnai in ka kuah a, a rim nu chek chu ka hip zui vang vang bawk, ka nupui bulah ka awm chiah chu ka hahdam sawng sawng thei, thawm ri deuh sat sat ah chuan ka harh a, Bawihi chuan min tih harh hlau zetin thawh chhuah a lo tum hi a lo nia, a thu chhuak tur chiah chu ka kuah ta thut a, a phu zawk mai, "I van mawl tak" ka banah chuan a rawn chum taih a, "Bawihi thinrim tawh suh aw, Nunhlimi kha chu ka secretary mai a ni, nanglo chu ka mitah hian hmeichhia an awm lo, nang chuah hi I ni, ka chungah i lungawi lo tih ka hriat hian hreawm ka ti, chuvang chuan thinrim tawh suh aw" ka ti sup sup a, "Mahse ngati nge i phone kha i chhan tir kher?" a thik hle tih a chiang zual.




"Ka phone a chhang tih ka hrelo alawm, bathroom ah ka awm daih a, ka chhuah hnu khan min rawn call thu a sawi a" ka ti a, "Tun chiah ka ngaidam ang che, chuan hmeichhe dang i phone i chhang tir tawh tur a nilo" a tih takah chuan ka thaw huai thei, "Chuan min lo ngai ve miah lo amaw?" a nui hak a, "Ka ngai lutuk che a ka a hman tep" a tihchuan ka lawm tawk a tling leh em em mai ni. In hnuai kan chhuk a, kan mu rei bawk a, chaw ei a hun tawh, chaw kan ei a. Zuali chu a room ah a awm a, Tluangi erawh ka lo haw tawh tho vangin riak lovin a haw thung, "Ka sawi theihnghilh daih, naktuk ah dawr a kal ka ngai a nia aw" a tihchuan "Enge i tih dawn?" ka ti ngal vat, a pum a lian tawh bawk si nen chhuak ka phal vak tawh lo, a che sual ang tih ka hlau a ni.




"Kan client pakhat nen in hmuh kan ngai a, a rei lovang, kan in biak zawh ah ka haw lehnghal ang" a ti nghal zung zung a, "Ka hruai dawn che nia" ka ti ta sup a, "Kan naute lo chhuah hun tur hi ka va han nghakhlel tawh tak em" tih pahin ka nupui pum chu ka chul a, a rawn che dat dat a, "Bawihi tunah khan a che a nia" ka thu chhuak hluai a, "Chhun lamah phei chuan a che nasa thei lutuk a, ka pum a na lek lek thin" a ti a, thla li a nih atang khan ka nupui hian a che a ti a, a che lai hi ka la nang fuh ve ngailo, tun kha ka hriat vawikhat na a ni, ka hlim veng veng mai, a rawn chet leh hun ka chang ran a, ka nupui chu a nui hak hak, "Rawn mu mai mai rawh, a che reng hleinem" a ti a, "A che leh dawn tih ka hria alawm, a pa kut hi a hai thei lo" ka sawi zawh rual rual chuan a rawn che leh ta a, ka nui chhuak hawk hawk, "A tlawh nat dan atang hian mipa a nih ka ring a" ka nupui chuan a ti sep a.




"Mipa nge hmeichhia i duh?" ka ngawi vang vang a, "Engpawh nise ka duh vek, mahse nangmah ang hmeichhe hmeltha leh duhawm zet hi ni thei se ka ti" ka ti sup, "Keichu mipa ni se ka duh a, ka strict nasa ngawt ang, a pa anga mipa lerh a nihloh nan ka zirtir tha viau bawk anga" ka rum nghut a, Bawihi chu za zetin a nui chhuak har har a, a nghawng ah chuan ka dek a, "Hey.. a za ania, duhtawk rawh ka tlawm" a ti a, kan nupa chuan kan hlim hle, hlim taka a nui lai chu thlir nin harsa ka ti a ni, a hnuah chuan a thaw hak hak a, "Ka hah vek alawm" a ti reng bawk, ka awm hnai a, ka thiltih chak em em chu ka ti ta a, a hmui no chek chu duhthawh zetin ka keih buan buan a, min rawn chhang let ve vat bawk.




Ka kut chu hnuai lamah sawn thla in a hnute a rai vang a lian zual sawt chu ka tham tawn tawn a, a hmui atanga in sawn in a biang a nghawng leh ir te chu ka fawp kual dan dan a, kei ang bawkin a awmdan a danglam tih ka hria, a thaw chhuak hawk hawk a, a pum in min do avangin a sirah ka awm thung, in sum chu harsa tawh tak a ni, rei fe chutia kan awm hnuah chuan ka awm hrang ve thei ta hram. A awm ah hmai ka phum a, ka thaw chhuak zui kawk kawk bawk, "I tha em?" ka lu rawn chul pah chuan a ti sep a, "Tha e, in sum a harsa deuh tih mai loh chu" ka ti sup, a nui hak a, keipawh ka ni tho, Bawihi pum a lian in a taksa ah in sawisel na a neih atang khan nupa nun kan hmang leh ta miah lo kha a nia, mut tawh hnuah bathroom ah ka lut zing thin viau.




Bawihi dawr kan thleng a, a kal lohna a rei ve tawh bawk nen hnathawk te chuan an ngaih thu an lo sawi liam liam a, Bawihi lah dawr kal ka phal loh vanga lo kal ngailo a nih thu te a sawi a, "Heihi in lamah lo en fel la, dik lo leh fel lo lai i tih te i rawn sawi dawn nia" Terina chuan a ti zung zung a, Bawihi office ah kan lut a, a client hmuh tur pawh a rawn thleng har lo, nu pakhat in chei nasa ve tak hi a ni a, a fanu ni ngei tur amah ang zet nula la naupang te nen an ni a, chu hmeichhia lah chuan min en duh em em lehnghal. Ka nupui leh a nu chu an in be mawlh mawlh a, kei erawh couch ah ka lo thu thung, nula chuan min rawn en leh thin a, ka ngai theilo viau kum 20 pawh a la ni em dawn emaw ni tih mai tur a la ni a, a mitmeng lah chu ka ngainat loh zawng tak a ni.




"Kan lawm lutuk e, i duh ang tak chuan kan tihsak ngei ang che" Bawihi chuan nui sangin a ti a, "I fanu em ni?" tiin nula naupang te chu a en a, "Aw.. nihhi, a kawr tur pawh hi kan rawn order thuai ang" a ti a, "A nihchu, a hmeltha hle mai, Duhtak min lo kai tho lawk mai ta che, kan in leng te hi pawn thleng kan thlah ange" tiin Bawihi chuan min rawn en a, chutiang chuan vawikhat mah min la ko ngailo, ka melh haw a, "Lo kal vat la" a nui seih a. Nula chuan kan nupa chuan min en tawn zak zak a, "Nupa in ni tih ka hre miah lova, i unaupa emaw ka lo ti zawk a" a ti sep a, "Ka pasal a nihhi, hei fa pawh kan nei ve tep tawh" Bawihi chuan nui hak hak chungin a ti a, chunu pawh chu za lo deuhin a nui a, pawn thleng a thlah hnuah a rawn lut leh a, min la melh rum em em zui.




"Lerha" a rawn ti ringawt a, "Enge ka lerh na?" ka tihchuan "Kha hmeichhe naupang en dan che kha ka hrelo turah I ngai a mi?" a ti hmak, "Oh.. Bawihi engtin mah ka en ve chuang hleinem" ka thusawi avang chuan a hma ai mahin min melh rum, "Nuam I tih hmel em kha, khanu pawh kha lerh lutuk mai, a la naupan hmel tehreng nen engtinge khatiang fa ko a a en che ni, hrim hrim in ka pasal i ni tih engtinge a hriat loh theih, ka unaupa emaw a la ti zui che ania, ka pum a puar luah tawh a, mimawl ber pawn ka pasal i ni tih an hria ang chu" a ti hlak hlak a, a ang lai chu ka en reng ringawt, tawng chi pawh a ni tawh lo, chuti lo chu keima chungah a tuan leh daih mai ang. Coffee kan in a, a la lungawi thei meuh lo, keihi ka thikthu a chhe viau emaw ka tia, ka nupui zawk hi a thikthu a lo chhe fe zawk tih ka hrechiang tawh bawk, mahse nuam ka ti em em lawi si.




"Inah ka thlah phawt che anga hnaah ka kal leh mai ang" motor kan thut luh hnu chuan ka ti a, "A ngailo, i hnathawh naah ka rawn zui dawn che, engtinge hna I thawh ka hmu duh, nula te I lo chhai kual mai mai em tih te ka hre duh bawk a" thut that pah chuan a ti a, "Bawihi leh" nui hawk chungin ka ti a, "Kal vat rawh" a ti hmak. Nui vur vur chungin motor chu ka kalh a, hnathawh na kan thleng a, building chhungah kan lut a, Bawihi chu a hawi vah a. Office kan luh hma chuan Nunhlimi lo thut na lam chu a pan a, ka zui ve vat bawk, "Nanghi em ni nizan hmasa a ka pasal phone lo chhan sak tu kha?" Bawihi chuan Nunhlimi melh ran chungin a ti a, "Aw.. ni e" a lo ti sep, "Nula pangai tak i ni a, chuvang chuan zan rei ah mipa room ah luh tawp ching tawh suh, nupui nei tawh room ah ngat phei chuan, bakah min lo chhang dan kha ngaih kawih theih tur deuhin min lo chhang a, vawikhat mah ching tawh suh" a ti fak a, office ah a lut zui nghal.




"Eitur min chah sak teh, ka ril a tam teh mai nia" ka lut ve chiah chu a lo ti nghal, "Awle, boss" tiin ka phone ka ban nghal a, eitur rawn thlen hma chuan phone a khawih a, keipawh hna ka thawk mawlh mawlh bawk, eitur a lo thleng chiah a, a phone chu dahin a ei nghal mawlh mawlh, a ril a lo tam tawh viau aniang, "Min lo nghak dawn emaw ka tia" a bula thut thlak pahin ka ti a, "Ka riltam tawh lutuk alawm" thil hmuam tun chungin a ti a, ka nui ringawt. Eitur kan ei zawh chuan hna kal thawk lehnghal a, Bawihi nen kan ni bawk si nen ka hmanhmawh viau, ka en leh zeuh thin a, couch ah chuan a mu a, phone a khawih pah mawlh mawlh bawk, ka thiltih tur tul ang ang ka tih zawh hnuah Bawihi ka va en chuan a lo muhil daih chu niin ka pan hnai vat a, a bianga ka khawih chuan a ner deuh nang a.




Sana ka en a dar 4 a ri hnai tawh, haw tawh mai pawh a pawi tawh lovang, "Bawihi" ka nupui chu ka sawi dat dat a, peih loh hmel zetin a rawn meng chhuak riai riai a, "Kan haw tawh dawn em ni, in ka thlen hunah I mu leh dawn nia" ka ti sup a, a rawn tho chhuak tur chu ka lo pui vat. Office atang kan chhuak a, Nunhlimi chu a thutna atangin a tho chhuak thuai a, Bawihi chuan melh pawh melh eih lovin a kal nghal a, motor a kan chuan lai te chuan a ham leh bai bai thin, in kan thleng a, inchhung kan lut chiah chu Tluangi te bulah a kal a, a tawng lehnghal mawlh mawlh a, a mut a chhuak viau emaw ka tia. Room ah in thlak turin kan chho a, "I secretary kha ka ngainat zawng a nilo" a ti a, "Engvang chuan maw?" min en ran a, "A mitmeng kha ka ngainat zawng a nilo" a ti leh ringawt a, engmah a sawi zawm tawh lo.




A rai vang hian a phun chiar deuh a, tunlai phei chu an na tur ringawt a zawng a tih theih ang, mahse ka ning phal chuanglo, ngawi rengin a ang lai chu ka ngaithla mai thin, karleh ah party kan huai hawt dawn a, Bawihi hi a kal peih chuan hruai ngei pawh ka tum, mut hmunah chuan ka sawi pui a, a lo phur khawp mai. Hun a kal ve zel a, kan party huai hawt tur leh kan thawhpui te nen a inrem na kan siamthat te avangin kan buai hle, hnathawh na lamah pawh ka awm hman meuh lo, chhuah reng ka ngai a, Nunhlimi nen kan in zui chhuak nitin thin, mi hian min sawi duh a, ka secretary nen kan chhuak dun te chu an lo sawi duh leh khawp mai, ka nupui pawh ka lak ah a lungawi lo thin viau, mahse ka sawifiah hnuah a lungawi ve leh mai zel.



Amelia Lalnuntluangi POV



Zanin hi party a kan kal hun a ni tawh a, ka in siam peih vek tawh, Nicholas-a erawh a rawn haw na a la reilo bawk nen a in bual mek chauh, a kawr hak tur ka lak chhuah sak a, a insiam nghal zung zung, a hma tawh lo bawk a, a insiam zawh rualin in atang kan chhuak nghal, U Tluangi leh Zuali pawh an tel ve bawk, party na hmun kan thleng a, Nicholas-a chuan a thawh pui thar te min in hmelhriat tir a, U Tluangi leh Zuali chu ka hlat deuh hlek ah an awmdun thung. Ka titi mawlh mawlh lai chuan Nicholas-a secretary kha a lo kal a, a kawr hak ka hmuh chuan ka ner sawk, sawtiang em em a taksa lang tam thei kawr saw a hak a ngai amaw ni, "Sir, min lo zui lawk thei angem, thu pawimawh tak a nia" a ti a, "Bawihi, kan kal lawk ange, ka rei lovang" a tihchuan ka bu zeuh ringawt, sawnu saw a hmel ka hmuh hma atang tawh khan ka ngaina tawh lo, ka pasal a melh dan saw ka hriat hmaih lo bawk.




Nicholas-a hian a hnuai a hnathawk ang bakin a en lo tih ka hriat avang chauh a la ngawi mai mai ka ni, Nicholas-a chu a rawn let leh vat a, "U Tluangi te bulah sawn ka va awm hrih ange, tikhan lo in be rawh u aw" ka ti a, ka kalsawn zui nghal. Zuali te bul ka thleng a, an bulah chuan ka va thu ve nghal, "Sawnu saw U Nicholas-a secretary kha a nilawm ni?" Zuali melhna lam chu ka melh ve thuai a, Nunhlimi a lo ni, ka pasal a lo la melh char char zui, "U Nicholas-a nen in din dun lai te khan a lo en reng cheu mawle, nichin atang tawh khan ka en tawh, U Nicholas-a hi a duh chiang lutuk, a nasat hmel bawk si, U Nicholas-a ngaihsak a phut hmel bawk si" a ti hlak a, ka ngaihdan chiah a ni. Nicholas-a a la en char char, a hawi sawn a, kan lam a lo hawi chuan kan lo melh reng bawk si nen hmundang a hawi sawn leh rang khawp mai.




"Nuam in ti hrim hrim em?" ka ti ta daih a, "Aw.. ti lutuk, U Tluangi hian star tu a nei a" Zuali chuan phur zetin a ti a, "Thil nilo lo sawi suh" U Tluangi chuan a lo ti hlak, "Tunge?" ka lo ti vat, "A ti mai mai a nihkha" a lo ti leh vat, "Ka ti mai mai lo, U Amelia saw saw laia mipa ding saw" tih pahin min mit mei zeuh a, ka hmu tawh, mahse ka hrechhuak thei mai tawh lo thung, Nicholas-a hnuai a hnathawk a ni tih erawh ka hrechiang thung. "A hmelchhiat loh saw" ka ti a, U Tluangi nen hian kan in hriatna a rei va thawkhat viau tawh a, mipa lam hi a la sawi ngai miah lo thung, "In ninawm, in lerh lutuk" a ti leh ringawt a, Zuali nen chuan in en in kan nui ringawt, "Saw a lo hawi leh tawh a nia" Zuali chuan a ti leh a, "Sawi reng suh" a lo ti hmak a.




"U Tluang, i upa ve tawh ania, nang ai ka naupang a mahse hei pasal leh fa ka neih khalh mai dawn che hi, chuvang chuan mipa lam te hi han ngaihven ve tawh la" ka ti a, "Ka peih lo" a lo ti leh hmak, eng ang pawn sawi pui mah ila ka thusawi a awih dawn lo tih kan hriat avangin kan ngawi ta ringawt a. Nicholas-a chu kan bulah a rawn kal a, "Bawihi, Pu Bta nen hian inchung lamah kan han kal lawk ange aw, thil pawimawh sawi dun tur kan nei a" a rawn ti a, "Aw.. han kal rawh, tah hian kan lo awm ang" a kal ve leh nghal mai a, "Taka nizanah Matthew an min rawn be ve teh nawlh a, kan in hnial hrep lehnghal" Zuali chuan a ti hluai a, "Nangni pahnih hi in ngaizawng daih mai teh u, in in hmeh riau" U Tluangi chuan nui ver ver chungin a ti a, "A teuhlo, ka duhzawng a nilo, a tawngthei si, mipa tawngthei deuh hi ka ngaina lo" Nur nangin Zuali'n a lo ti ve nghal zat bawk.




"In bulah hian ka lo thu ve thei angem?" nichin a mipa U Tluangi nen a kan hmeh bel pa kha a lo ni a, "Lo thu rawh" tih pahin Zuali chu ka bulah a rawn tawlh hnai a, "Ka hming chu Siama a nia, Miss Amelia-i hi chu ka hmu fo tawh a, in pahnih hian ka la hmu ve ngai miah lo che u" a ti a, Zuali chuan in hmelhriat na a lo nei thuai a, U Tluangi erawh a thu ngawi ran thung, Siama chuan U Tluangi chu a beisei deuh tih a en leh zeuh thin danah ka hre nghal mai, kan titi ho tak zelah chuan U Tluangi pawh chu a tawng ve bawrh bawrh tawh a, "Zuali washroom lamah min kalpui lawk mai ta che" ka zun a chhuah vang chuan ka ti a, "U Tluang Siama nen khan lo in kawm mai rawh u aw, kan rawn let leh vat ang" ka ti a, washroom lamah chuan kan kal nghal.




Toilet atanga ka chhuah hnuah Zuali chu a lut ve nghal zat a, Zual building hnung lamah hian ka kal dawn aw, ka lo let leh vat ang, U Tluangi khan nuamlo a ti palh ang, lo va let mai rawh" ka ti a, pawn lamah chuan ka chhuak nghal a, hmeichhe pahnih in be thawm ka hriat chuan an thusawi a pawimawh hmel em avang chuan kalsawn ka tum a, mahse an thusawi avang chuan ka pen lai ka tawp chawt, thawm dang a awm loh avangin an tawng ri chu ka hrechiang hle bawk, ka din na a thim bawk a, min rawn hmu mai dawn lo tih ka hria a, an thusawi chu ka ngaithla reng, "Mahse Sir Nicholas-a te chuan a nupui kha a duh lutuk, a kalsan mai mai teuhlo" tuna tawng nu kha tunge a nih ka hrelo, mahse pakhat zawk saw chu ka hrechiang lutuk tlat, Nicholas-a secretary Nunhlimi kha a ni.




"Engpawh nise beidawn mai ka tum reng reng lo, nangpawh in i hriat chian kha, Nicholas-a hi ka duh zia chu, nupui a neih hma daih atang khan ka duh tawh, a nupui saw a nei rei tawh tawp lovang, enge ka tihtur hi lo en tawp rawh, Nicholas-a secretary a ka tan theih nan ka thawh rim zia i hriat kha, beidawn mai mai ka tum lo, eng ang pawn Nicholas-a hian then duh lo mahse saw a nupui duhlai em em sawn a then ngei ngei theih nan hma ka la dawn, hman zana ka ruahman na kha hlawhtling lo mahse tuna ka thiltih tur hi chu a hlawhtling ngei ngei tawh dawn tih ka chiang, a nupui in la ve tak sawn Nicholas-a hi ringhlel lo theilo turin ka siam dawn alawm" tiin a nui har har a, ka lo in hum ruh ngawt ngawt, "An man chhuah che chuan Sir Nicholas-a hian a en liam mai mai dawnlo che ania" a thiannu bawk khan a ti leh a, "Lungngai suh, min man chhuak dawn lo" in ring tawk fe hian Nunhlimi chuan a lo ti leh nghat a.




Ka in sum thei tawh lo, an lam pan chuan ka kal a, min hmu thut chu mak an tih hmel viau, "Kan nupa inkar tih chhiat I tum amaw, hre rawh nang a tih chhiat mai mai theih a nilo, Nicholas-a hi ka then ngai dawn lo tih hria ang che, chuan i hna atang hian ban nghal i ni bawk" ka ti fak fak a, "Enga, tu ah nge i in ngaih a ka hna atanga min ban ngawt turin, i hnuai a hnathawk nilovin Nicholas-a hnuai a thawk zawk ka ni" Nicholas-a ka bula a awm lai kha chuan en pawh min en tha ngamo kha a nia, "I sawi dik, chuan Nicholas-a hi ka pasal a ni a, a ta chu ka ta a ni bawk" ka ti leh sak a. A nui hak a, "I pasal a ni tawh lo tep alawm, Nicholas-a hian a la kalsan vat ang che" a sawi zawh rual rual chuan a biangah ka beng nghal pawp a, a thle sawk bawk.




"Ka tihpalh a ni Miss" Nunhlimi chu a tap nghal hlawp hlawp a, a awmzia ka hrelo hle, "Enge thleng?" ka hnunglam atang Nicholas-a aw ka hria a, ka hrethiam ta chiah, "Sir, Miss Amelia-i hi ka thiannu nen kan in biak laiin a rawn kal a, nangmah hnaih lo tur che in min ti a, hna kan thawk dun a engmah kan in karah a awm loh thu ka sawi pawhin a ring duh tlat lova, hna atang min ban bawk a, mahse i thu tello chuan ka bang ringawt theilo tih ka sawi khan kut min thlak ta mai a ni" dawt a sawi hneh sawh lutuk chu engmah sawi mai tur pawh ka hrelo zawk, engtinge khatiang dawt chiang lutuk kha a sawi nghal mai theih zawk ni, "Chuchu thudik a ni em?" Min en ran a, a hmelah chuan enge a ngaihtuah naah awm a hriat theih loh.




"Ni lo, thudik a nilo.." ka sawi zawh hma hma chuan "Sir, Miss Amelia-i hian Nunhlimi hi a rawn ankhum vak ringawt a, Nunhlimi hian tha taka a chhang chung pawn Miss hian a ngai kawi zel bawk sia, kut hial a thlak alawm" a thiannu khan a lo ti a, "Engvanga dawt sawi nge i nih, thil thlen dan engkim i hmuh vek kha" ka ti that a, "Miss ka thil hmuh ang chu ka sawi reng alawm, thudik ka sawi tih chu nangpawn i hriat chian ka ring" ka thinrim lutuk chu ka tha a khur dawt dawt thei hial. "Ka nupui thusawi laiin engvanga rawn in rawlh ngam nge i nih?" Nicholas-a chuan kha hmeichhia kha a en ran a, "S.. sir englo ih" a ti nawi nak a, "Sir buaina ka thlen avangin min ngaidam rawh, ka thiamloh vek a ni" fel ber awm zia zangin Nunhlimi chuan a ti leh a.




"Ka nupui hian bang tura a tih che chuan i bang mai tur a ni, ka ta chu a ta a ni a, tuna in thusawi kha pakhat mah ka ringlo bawk, ka nupui hi ka hrechiang, tuna in thusawi zawng zawng kha a mizia a nilo tih ka hria, chuvang chuan dawt sawi hmang hi ka hnuai a hnathawk atan ka duhlo, naktuk atang I rawn kal leh a ngai tawh lovang" Nicholas-a chuan a ti a, hmeichhe pahnih te chuan an beisei lo zet tawngkam an dawng tih hriat takin an meng kawk a, "Mahse Sir" Nunhlimi chuan a ti sap a, "Ka sawi tawh kha, engmah sawi a ngai tawh lo" Nicholas-a chuan a ti nghet leh charh a, "Chuan nangpawh kha ban nghal i ni, ka nupui dawt a I puh vangin" Nunhlimi thiannu bulah chuan a ti leh a, hmeichhe pahnih te chu an rin loh lam daih a thil a kal vangin engmah sawi nachang pawh an hre tawh lo, an ding ngawi kar ringawt, "Bawihi, lut ila" dam zetin Nicholas-a chuan a ti a, ka bu zeuh, inchhung a kan luh leh hma chuan hmeichhe pahnih te chu en in ka nui sak a, an phu tawk chiah an hmu a ni.


Cont ..