HLUSANGZUALI CHAPTER 16 BY REBEC COLNEY

[Rebec Felix]

HLUSANGZUALI







CHAPTER-16







La muhil mai thei lo in ka ni nen kan inbiakna te ka ngaihtuah kai leh "Aizawl lam ah hian dawr kan siam dawn a nia,i Pa Bda hian hlawh a lak a piang hian ka hming in bank ah pawisa tlem tlem min dah luh sak thin a , ka ngaihven lo zawng a nih avang hian engzat chiah nge a dah tawh tih phei chu ka hriat pui lo,mahse a tam tham ve viau tawh chuan ka ring ,nang pawn khawl sa te chu i nei dawn a ,thawmhnaw dawr emaw, thil dang pawh hlawk deuh hlek tur kan ngaihtuah a nga kan ti dun dawn nia" phur deuh in a rawn sawi thawi tawh a , rilru ka la siam fel hlei thei lo thung .





Sumdawn lampang hi chu ka ti mi vak in ka inhre lo thin a, naupan lai a thil kan han zawrh pawh a,"in lei duh em "tih bak sawi ngaihna hre vak lo ang chi ka lo ni nen , rilru a ti buai duh khawp mai.





Nizan lam ah ka muhil har bawk nen ka thawh chhuah ve meuh chuan an lo tho vek tawh a , Rinengi'n eirawng a lo bawl peih tep tawh, Simona pawh hna kal tur in a lo in peih at tawh ,hmai a uang lo duh ngei mai.





" Min kaih thawh ve awm che u "tui in tur la chhuak in ka ti nghat, , an ni pathum lah chu an thawhna a rei tawh tih hriat lutuk in an harh tha hlawm tawh khawp ,kei ve ka la ham ka la ham thung.





Rinengi chuan a thil kan chawh mawlh mawlh pah in " In neitupa ber hian a phallo tlat a lawm naw le "ti in Simona dawhkan bul a ding a, laptop khawih mek chu a melh zeuh





" Nupui a tan i tlak dawn loh tawp mai ,thawh i hre lo e mai "Muanpuia'n a lo tih zawm zat chuan ,ner khum nang in " Ka pasal tur i ni lo hi ka lawm a sin , i tawngthei si ,i thawveng bawk si, dawt phuahchawp i thiam si"ka tih chiam chuan a thianpa lam chu hawi vut in





"Ka thiana , nupui a tan hian ka duh dawn ta lo tlat mai che " ham ham hian a, Simona lah chu min rawn en in a nuih ruh ruh duh lek chauh ...







Tukthuan kan ei zawh in chhuak tur in kan in siam zawm nghal a ,Simona erawh office tur in a chhuak tawh thung .



.



Auto la in bazar lun lam kan pan a , thil man tlawm si a ,mamawh lo pui pui pawh lei mai a awlsam khawp ang .





Kan thil hawn theih tur leh kan awh zawng te chu kan lei hnem hlawm khawp, a mipa ber hian a lei hnem ber ang.





Kar leh lam mai a chhoh tum kan ni bawk nen , kan hman hlawm bawk a , nitin deuh thaw kan leng khaw thawng a, hmun nuam leh chhinchhiah tlak tak tak hmun kan tlawh kual hnem hman khawp mai.





"In khua a i let leh hun chuan, di hlui zun ngaih a na thar leh in nia ka lo rin" min fiam deuh ti tih ,thutak tel ru ran chungin Simona'n a ti zuk zuk a





"I ngaihtuah ho ve sia, chutiang lam ka rilru ah awm lo "





"A nih leh eng lam nge awm" ti leh in min nuih ruh ruh, a chang hi chuan a uang ve thei khawp .Thu ho deuh deuh hmang a min tih thinrim te te hnu a duat tak a min thlem hi nuam a ti thin





Ka thinlung zawng zawng hi a lam ah hian pe thei ila ka ti thin, ka tan innghahna tlak tak mipa nghet tak a ni a, ka khawhar chang leh lungngaih chang lah in min ning mai lo in zawldawh tak leh hriatthiamna nen min thlamuan in min hnem thin.





"Thil tam tak ka ngaihtuah , mahse i hriat ve chi a ni lo thung a " amah melh ralh chung a ka tih chuan a nui huk a, ka biang ah a rawn piai pah kher bawk





Kar lo ah mizoram a let kan tum ni a rawn her chhuak a , Simona'n min ngaih tur thu sawi ngun viau mahse, keini pathum lah chu mizoram a let chu phur tak te in kan phur tawh thung .





Khaw hran theuh kan nih avang in inhmuh leh mai chu a harsa tawh dawn ,Rinengi phei hi chu kan khua leh an khua chu chhim leh hmar ang vel a in hlat a ni a .





Muanpuia nen erawh khaw thenawm mai kan ni bawk a , in hmuh mai chu a harsat ka ring lo thung .





Simona pawn "Ka rawn chhoh theih veleh , in khaw lam ah ka rawn zin ang " ti in min thlah thlap a , amah te a awm tur chu ka khawngaih ve khawp mai ...





Simona te hi chu aizawl a awm nghet an ni a , a ma sawi dan in Kulikawn lam ah a nu leh a unau te nen an khawsa tlang thin a, a pi leh pu in an la dam pui bawk.





Simona'n an airport thleng min thlah thlap a a ,chu mi hnu ah hna kal tur in a tlang zawm leh nghal.







"In khua ah in awm tawh dawn avang in biak theih loh te khan awm kher lo ula , ka ngaih chang a piang che u in ka rawn be buai ziah dawn che u "Rinengin in a ti a ,bu nghat nghat in ka kuah vang vang .





Thil eng kim ka hrilh ngam na awmchhun a ni a ,mal tak a ka awm lai a min hnem a, thiam lo tak chung a min fuih kal tu te zing a mi a ni , ka hringnun thawnthu ah hian eng tik ah mah a hming hi thai chhiat theih a ni tawh lo ang .





Kan thlawh chhuah hun tur a la thlen loh avang in , airport piah dawr ah thil te kan va ei leh te te hnu in kan thlawk chhuak ve ta chauh.





Rinengi a chuang fuh vak lo a, a luak chhuah thu sawi leh thin in , a thu zawi hniang reng a,a khawngaih thlak tak tak a ni.





Tluang tak in Lengpui airport kan thleng a,Mizoram leilung ngei kan rap leh thei chu kim hliah hliah in ka in hria,







A lo rei ta hle mai , hma lam um a hlawhtlinna chan ngei tum a he lai hmun ka chhuah san lai te kha mitthla ah chiang tak in a rawn lang a, Mi te ang in ropui deuh in let leh lo mah ila ,ka theih tawk leh phak tawk ah hlawhtling tak in ka let chuan ka in hria .









Kan chhung ten min lo hmuak thap hlawm, ka nu leh ka naute pahnih ka han hmuh chuan insum hman lo lek in ka mittui a tla zung zung , thinlung kil khat ah hian ka pa awm ve a ,min lo hmuah ve rinna mak tak ka nei a, mahse chu erawh thil thleng thei lo tur a ni si ....







Ka nu hmel chu ka rinai in ka hmu tha a , kan inhmuh tawp ber ai khan a lo thau deuh bawk a ,sawi hmaih theih miah lo ka naute pahnih pawh chu an lo lian in an lo tleirawl chhuak ve tak zet tawh .Duata phei chu kei ai a sang daih tawh zawk a, naupang en a ka la en viau chung in a in la tleirawl tawh khawp mai.







" Mate , i chau em , taxi kan rawn hmang a ,in hlang fel ila kan kal dawn a nia "ka ni chuan min rawn kuah in a ti zung zung , Peki pawh in ka kut ah min lo kai vat bawk ,hei pawh a lo nula tawh tak zet .





" Ni ,ka thian te saw ka va thlah ve phawt ang nge aw"ti in Rinengi leh a nu te lo awm na lam chu ka pan phei a, an kiang ah Muanpuia te chhungkua an lo awm ve bawk .





A nu bul ah chuan min in hmelhriat tir in,phur deuh in min fak zung zung a, a zahthlak lek lek a ni .







"Rinengi thiannu maw i nih , i chanchin hi min rawn hrilh awl lo a sin ,a rawn fak thei khawp che, kan fanu i lo kai hruai in, a lungleng te i lo hnem thin a kan lawm khawp a nia "a nu chuan min chibai in a ti malh malh ,a fanu ang chiah in a ni pawh hi mi rilru tha tak a ni tih a hriat theih ..







Rinengi te nen kan inthlah fel hnu in,Muanpuia te chu an khaw lam an pan chho nghal dawn nge dawn lo te ka zawt luam bawk, a chhungte chu an mahni motor a rawn kal an nih vang a zawt ka ni.





Naktuk lam a chhoh an tum zawk thu a min chhang in, kan inthlah liam veleh a ..





Ti hian ,inhmuh leh theih hun nghak hlel tak leh in ngai tak chung si in mahni tuanna mual ah theuh 'damtakin'ti a inthlah liam chung in kan inthen darh a lo ngai dawn ta







Mihring nun hi chu a kal liam zung zung a,mi tamtak in hringnun hoh zia sawi mahs se , a ropui em em thung si.





Hla phuahtu pawh in ''Then na ram khawvel " a lo tih ang in , hmun hran hran ,tlang hran hran ah hmalam hun suang tuah chung in ke pen chhuak in ,kan inhmuh leh theih hun tur thlir chungin kan inthlah liam ta a ni.







Ka ni te in kan thleng a , thut khaw muan hnu ah ka thil hawn ho chu kan hawng a , Duata ta tur a ka hawn sak pheikhawk nalh leh to zet chu lei a inchhir awm loh khawp , ha hip in nalh a tih zia leh a duh thu a sawi reng mai....







Midang pawh ka thil hawn sak chu an lawm thiam hlawm khawp a, an hlim hmel leh lungawi hmel tluk a hmuh nuam hi a awm chuan bik ka ring lo.







Ka chauh deuh avang in ka mutsan ta rih a , aizawl kan han thleng leh ta chu mumang a ang rum rum mai a lawm ,





Goa ka kal hma a Rinsawma nen kan len chhuah dun lai te chu tun a ka hun tawn mek ang mai in mitthla ah a lo lang zut zut a , ngaihzawng ka nei tih inhre reng mah ila ka ngaihtuah lo thei si lo .





Ka ni te in kawt thleng min thlah thlap hnu ah ngaihngam tak in kan inthlah liam kha a nia , mahse tun ah erawh engkim chu a dang zo tawh si .





Kan inthen atang kum khat mai pawh ni lo , kum khat chuang fe a ral tawh ,ka hmangaih na pawh in kiam lam a pan tawh bawk ,mahse eng emaw chang a ngaihtuah chhuah leh zeuh erawh ka la bansan thei lo zawng a ni.









Zanriah ei dawn ah min rawn kai harh ta chauh a , pa Bda pawh a lo haw daih tawh hi a lo ni, min hmuh chuan "e,ram dang a awm i ngeih hle mai , i thau sawt sawt mai a lawm " a lo ti ve hlut ..







Ka phone rawn ri chu la vat in Simona hming ka hmuh rual in kan thlen tawh thu ka hrilh lo tih ka hre chhuak nghal , engtin nge ka theihnghilh theih zawk ni ,a zia lo tak zet







"Ka tihpalh ,ka chau deuh nen ka lo mu hil tlang nghal daih a " ka ti nghal zung zung a , thinrim ah rawn lak mai ka hlau a ni .





Min hrethiam tak in "a pawi lo ,i chauh ka ring sa hrim hrim a, thlawhna chuan hi chu ngai ah i nei thei dawn lo a nih hi " a rawn ti dam thluam a, motor rui ngai miah si lo hian thlawhna ka chuan hi chuan ka ni muai thin , rui phei chu ka in ti duh chuang lo .





"In ka haw chu a lo reh ta thiap nen , ka awm thiam lo lek lek " lunglen hmel zet in a rawn tih zawm zat ,kan awm ve lai kha chuan a hna bang a rawm haw hi chuan kan lo ri nuai nuai thin kha a nia .





"Min ngai hlawm a ni maw "





"Ngai hlawm khawp mai che u , a bik in nang mah " a rawn ti thluk duai , ka sawi tawh kha a ni bak a tha hi chu an awm theih ka ring tawh lo ka thinlung tak hian pawh in ,a hnen ah in tu lut thei ila ka thin ...Mahse ka thinlung hi duh duh a ka thunun theih a ni tlat si lo.







Rei tak kan in be lo a , mi rilru le lo ang mai in ka bialpa lo zawk midang in min rawn chen chilh leh tur chu duh lo in ka chhungte awm na lam ah chuan ka phei ta vat .





"In sa tha lo in helam ah rawn in beng bel ve mai ula ka tih nen , thingtlang lam ai chuan helam ah eizawnna tur a tam zawk a,zirna ah lah ni se a tha zawk bawk " ka ni chuan a lo ti barh barh , ka nu erawh in chhang lo in a nuih liam pui mai thung







Ka ni sawi pawh chu a dik khawp mai , ka nau te an lo lian zel a nga , an zirna lam ah pawh hma an sawn chhoh zel te a nih chuan aizawl lam a awm thlak vat an la ngai thuai dawn tih chu chiang sa a ni , kan khaw lam ah chuan higher ai a sang a la awm tlat si lo.Chu tiang a nih rual chuan ka nu hi chuan kan khua hi chu a chhuahsan thei dawn lo tih ka chiang a, ka pa thlan nghah na a lo ni bawk nen , aizawl lam a awm thlak phei chu a duh ka ring lo hul hual , chungte avang chuan a bul ah pawh ka sawi lang duh lo hrim hrim a ,rilru buai deuh a awm tir kha ka duh lo a ni.







"Mate, dawr chu siam ve ila I pa Bda pawn min phur pui teh a nia " ka nu bul te a ka thut thlak rual in a rawn ti leh , a thil vei zawng leh chak zawng hi chu a tih hlawhtlin hma hi chuan a vei et et reng mai thin .





"Ka lo inngaihtuah dawn nia " tih bak chhan na pek dan tur ka thiam hrih lo .Ka nu hi pangngai tak a a bul a sawi a ,thurawn lak ve phawt te ka duh .





Pindan awl ah ka nu leh Peki te nen kan mu dawn a , Duata erawh thuthleng sei a chuh thung .





Phone games buaipui hunlai a ni bawk a , ka nu phone hi Peki nen hian an in chuh deuh thin ni awm tak a ni ,ka awm ve hnu ah erawh ka phone chu a ta neih ta bur mai a,zan mut na ah pawh a man a kawl mai thin , Simona'n min rawn biak chang phei hi chuan a lo ning ve em em mai thin a ni .





Kan lo upa deuh ta a niang , tleirawl ang mai a whatsapp a inbiak reng te kha kan ti ngai lutuk tawh lo ,mahse in be ngai lo tawp chu kan ni bik chuang lo a tlangpuiin ,phone call hian kan in be tawp mai zel , chhun lam ah hna a thawh thin a vang hian biak buai hman a ni lo hrim hrim bawk a.







Chhuat ah mutna chu phah in ka nu chu a lai ah a mu a, Peki erawh a muhil tawh thung , kan khaw lam ai in aizawl lam hi nuam a tih thu a sawi leh zeuh zeuh thin, Duata erawh in khaw lam a ngaih tawh thu a sawi awl lo thung.







"I thian te nen in in be ngai lo nge , i rawn haw tur thu ka hrilh khan ,an bangbo dun khawp a ,i lo hrilh hriat daih tawh zawk ka ring a " ka nu thil sawi chuan ka beng a verh zar mai ,an number ka nei tawh lo ka tih kha , ka lak a an lungawi tlat loh avang a va be buai lo kha ka ni bawk ,a dang leh ah chuan ka rilru natna te hrethiam duh lo a , Rinsawma lam an tang tlat kha ka lawm loh vang pawh a ni tel tho bawk .







A mi zawhna chu chhang lo in "an rawn leng ngai em " tih ka zawt ta daih , rinloh tak in ka nu chuan an rawn tlawh zeuh zeuh thin thu a sawi mai a .Ka rilru a hahdam huai phei chu ka hre chuang lo.







Rinsawma chungchang leh a awm chhoh dan hre chak viau mah ila ka zawt duh lo a , hriat ka ngaih na chhan tur lah a awm hek lo .





Ka ni in khaw lam a la chhoh mai a phal lo a, Ka nu in Pa Bda lak a inthlahrun awm zia te chu sawi ve mahse , a rilru a sawh sawn duh chuang lo,Pa Bda lah in awm ve reng hrih tur in min ti bawk nen ,kar khat zet kan cham belh leh hnu in kan chho thei ta chauh







Ka ni leh Peki phei chu an awm dun chawt kha a ni mai a , khawi ah chhuak dawn se an in zui dun rial thin , Peki chu la cham tir hrih tur in ka ni in ka nu bul ah a sawi na chu, sikul an luh hnaih tawh a vang in a phal lo ta thung a .







Kan khaw sumo counter lam chu taxi in dar 12 vel ah kan pan phei a , ,ka ni pawh in counter thleng min rawn thlah leh thlap , kan khaw mi haw chho tur an lo awm ve nuk bawk.







Dar 1 ah kan khaw lam pan in kan chhuak ta a , ka pian ka seilenna , ka hringnun a ka hlim na ber leh hun chhinchhiah thlak tak tak ka tawn na thin hmun ah ngei chuan kum 6 hnu ah ka let leh dawn chu a ni a, Ka zam ve tak zet .







Kawng lak ah kan chawlh zeuh bak chu kan chawl lo a , Pekin motor a rui deuh a ,midang erawh kan chuang nuam viau.







Kan in sak that hma ah chuan ka ding ta vang , rawng te pawh an lo hnawih thar diam tawh hi a lo ni, a lang mawi ka ti tak zet a , a kawt ah chuan pangpar a in hung fir fer bawk nen hmuh a nuam zual tak zet bawk. A chhunglam erawh a la ruak viau , la chei that loh a ni bawk nen bungrua tih tham a la awm lo .







Thenawm hnai vai ho an rawn leng lut nak nak hlawm a , naupang ho in mak ti hmel zet leh min hriat ngai loh melh tak a min melh hlawm chu ka nuih a za deuh a ,khua ka chhuah san kha chuan an la te sip sep hlawm em a , min hre lo chu a awm tho mai







Chatuan sweet leh thil dang kan lei chu kan pe hlawm a , an lawm hlawm ngang mai .







"Mate ,kal leh te i tum em , awi ,ihmel a tha zual sawt a nih hi , sap nula te pawh i ang a lawm " kan thenawm nu Nu Rovi'n a rawn tih chuan awm ang lo ti lutuk in "Nu Rovi chu a, sap nula an ngawt thu awm lo , i ti zahthlak ''ti in ka nui hak hak , ka kal leh kal leh loh tur thu ah erawh ka la hriat chian loh thu in ka chhang thung ..





Ka thiante min lawm tur a an lo kal beiseina sang tak ka nei a , mahse an ni erawh zan kan mut hnu thleng pawh in thawm an rawn nei ta lo thung .







Ka phone ka tih bo a ,phone thar leh sim thar ka hman vek tak hnu te khan an lak ah thinrim lo in an number ka nu dil tir in ,lo be tha ta hle hle ila , kan thian inkar pawh hi a chhe lo mai tur tih tlai khawhnu ah ngaihdan ka nei thar leh , mahse a hun lai khan a harsa em a , ka natna tawrh in min hneh bawk nen,biak loh a ka tlak ta tawp kha a nia.







Pawn chhuah a dawr ka kal te hian min be tu neuh neuh ka tawng zut reng a , a tlang puiin ka haw chhoh ni min zawt leh, ka kal leh hun tur min zawt an ni tlang pui vek .







Thenkhat erawh in Prakasha nen a kan thlalak an hmu ve tih hriat tak a , min melh hrek hrek tawk lah bo lo , kum ve a fei tawh chung pawh hian mi te chhiat na lai leh an tih sual thil te hi chu theihnghilh a lo har a nia nge.







Thil tha kan tih chuan kan tih lai in min fak hluah a , tu man an hre zawm tak tak ngai lo , hmingchhiat na leh kan thil tihsual te erawh dam chhunga hriat sak reng kan ni tawh thin.







Pawn ka chhuak hi hlauh nei ang mai hian ka rilru hi a thlamuang ngai lo , kawng lak ah Rinsawma ka hmu thut mai ang tih ka hlau thei khawp .





Zikpuii erawh ka hmu tawh a , biak tum a a lam ka pan lai in min nuih suk a,a hnu ah an in pan na lam ah a let leh ta daih , an in a va kal a biak zawm erawh ka tum lui duh ta bik lo.





Min be duh lo ni in ka hria a,a tak ah ,hmaichhan ah ngei han tawn meuh chuan rilru chu a na ve veng veng mai.





Chawlhni chu inkhawm tur in ka in siam ve a ,kawr dum design nalh zet mai chu ha in ,puan rawng lar lam pang a zeh mawi ka tih deuh chu ka bih bawk , ka kawr dum hak chuan min kap eng ve khawp in ka hre bawk.





Lawng a kan thawh lai khan pheikhawk sang lam kan bun vek thin a vang khan ,ngai ah ka nei deuh tawh a ,keimah ka sang e ti lo hian pencil heel sang zet te hi bun nuam ka ti tawh zawk a, inrintawkna tam tak min pek belh ni in ka hre thin .







"I va in bun sang ve ,i kal pui thei ang maw" ka nu chuan pindan atang a ka insiam zo ka chhuak chu a lo ti a , bu nghut in kal pui theih tur thu a ka chhan hnu ah kan inzui chhuak a,tun a ka bun tak hi chu sang tih hluak tur a ni lo keimah ka lo sang sa nen a hmu sang vel mai mai ni in ka hria .







A hma in ka thiante pahnih rawn lang lo lo kha mak a tih thu a sawi tawh a , zep leh chuan ngai a ka hriat loh avangin kimchang lo deuh in a thuak thuak ka hrilh ve ta ngawt kha a nia ,min hrethiam viau na chung in keima thiamlohna chen a awm thu min hrilh tel in, min fuih mawlh mawlh ta kha a nia .







Kum lam ah puitling ni tawh mah ila , nu te kiang ah hi chuan puitlin tak tak hi chu a lo har a ni ,nu duatna te hi ka la thla hlel khawp mai a , a kiang ah awm nuam ka ti in, ka bul a a awm chuan ka thlamuang thin







Kawng ah min lo be khawmuang tu kan tawk leh thin nen , kal a sawt mawh khawp , Khua ah awm lohna a rei tawh nen mikhual ta duk bik a in hriat a awl khawp .





Kan khua a kan han awm ta chu ,thil danglam tam tak hmuh thar tur leh hriat belh tur a awm a, thil engkim chuan hma a sawn tih hai rual a ni lo.





Ka hmelhriat tha thenkhat phei chuan nupui pasal an nei fur tawh .Khawlai a an fa te kai chung a an leng hmuh hi chuan nula naupang tak kan ni tawh bik lo tih a hriat theih viau awm e





Rinsawma te in kan pel chiah chu ka in rin hma hauh in ka thlir let leh thuak a, eng tak nge hmuh ka beisei phei chu ka hre lo , ka tello a a hlim a nih chuan ,a tello a ka hlim ve theih zia tluk a hmuh tir chak ka nei lo .







Nula len ah chuan ka thu a,ka bul a rawn thu ho pawh ka hmelhriat te an ni hlawm a,a zia phian , midang tam zawk erawh hriat loh ka nei nual tawh ,kan khua a rawn awm thar an ni nuk hlawm a ,a then te erawh an nu leh pa te hnathawh avang a rawn pem ta te an ni bawk .





Kan kohhran Pastor pawh a lo dang tawh a , a hma mi ang lo tak in kum upa lam tawh a ni a , ka nu in a sawi dan chuan fa pawh pa li lai an nei ni awm a ni , pa hnih zirna avang in aizawl lam ah an awm a , pahnih erawh he lam ah an awm ve thung.







Kan inkhawm bang, chhak lam thingkung hnuai ah ka nu ka lo nghak a,chutih lai chuan kan piah a mipa aw in Zikpuii leh Hmingi a ko ri chu ka hria a, a ko tu aw lah chu ka tan hai theih a ni lo.







Ka hawi phei vat a,a ni pawh ka lam a rawn hawi , min en vung vung hnu ah a hawi sawn ve leh mai ,a hma zawng ai in a hmel pawh a lo lang fiah zual tawh a, a ngo deuh hlek tawh bawk , a hma ai erawh in a cher deuh em ni aw tih theih a ni thung, chu zawng ai a mak ka tih chu zak zeh tiang , kal lam a harsatna nei ten an hmang thin ang a hmang chu a ni ,ka insum thei thlawt lo in ka hawi phei leh a, ka thian te pahnih leh Chhana an awm a , an zing a hmeichhe hmeltha zet awm tel ve chuan Rinsawma chu a ban ah a kuah hnap bawk .







Midang ho chuan min rawn hmu ve em ka hre lo a , an nui ho dial dial leh , an hlim nui ri chu ka beng ah a cham a , an kiang a awm a ,an hlimna ,lawm na tawmpui thin kha tun ah chuan an lak atang mihrang ka ni ta mai si a







A mawi tal a tu emaw ber pawh in an zing a kal ve tur a min sawm lo chu ka thinlung chhungril ah na ka ti ru tak zet a ,an mahni va pawh tur in huaisenna chhete mah ka nei hek lo.





Rinsawma'n nupui a nei leh dawn lo ti a ka thiante pahnihi'min rawn hrilh chu a dik a nih ka ring deuh tan a, a hmel ka hmuh leh chiah a ka rilru a thil lo awm erawh chu ka duh lo ,







"Inthunun rawh , bialpa nangmah hrethiam em em tu leh hmangaih em em tu che i nei a , a ni saw chuan eng a tan mah a ti lo che , i rilru ti paukhauh tlat rawh ,hmeichhe chak tah i nih kha" ti in ka in fuih ru mawlh mawlh .









Ka nu lo chhuah ve leh in lam pan in kan haw dun nghal ,ka thil tawn ho te khan min hmet chau zo vek thei in ka hria .



Haw lam ah ka nu ka zawt chiang a ,ka thiante zing a tel ve nula hmeltha zet kha tun a kan pastor fanu a lo ni a .





Simona nen kan inbia a, ka inkhawm thu te sawi in , a ni pawn a thil tih a rawn sawi ve zung zung bawk ,





''Chawlh ka lak tur kha sawn hlat leh a ngaih hmel , "lungnih loh hmel zet in a rawn ti hluk a , kar thar lam ah chuan mizoram lei lung a rawn rap ve tawh ang chu tih nak lai a .







" Hna a rawn in thuah khawm tup tup a , sumdawng dang te nen thawh ho na thuthlung an ziak leh hnuhnawh bawk nen ,chin fel ngai thil a tam khawp"a rawn tih zawm leh hawk , ka khawngaih ang reng , he lam a rawn chhoh te a phur ve tawh teh reng nen







Mihring lo remruat lawk sa thil te hi chu eng mah lo mai ah a chang leh thin zawng a nih hi







Han hnem vak dan ka hre lo ,chutiang ang chu ka lak atang in a phut ka ring hek lo , kan inngaihzawnna ah hi chuan amah hi a pe chhuak tu a ni char char char a , kei in lawm tak in ka lo dawng mai thin , .





Midang te inlaichinna ang hi kan pha ve lo tih chu kan hrethiam ve ve , mahse amah zawk hian a hrethiam lo lui tlat a , midang te ang a thuk tak a inlaichinna kan siam theih nan tan a khawh tlat thin.





Mahse, awmzia vak a la awm thei rih lo thung, chu pawh keimah vang in.Amah lam ah chuan engkim a inpeih fel sa vek tawh a ,kei in ka la thei ve lo thung.