Politician nupui S2

[Cck Lalchhuanawmi]

Politician Nupui Hring nun
S-2
Chapter-3
Ziaktu: Cck Lalchhuanawmi


Pindan aṭanga min lo.chhân takah chuan ka phei thuai a, khum chunga lo bawkkhup chu ka zu bawh.


Kan ṭhenawm Nuin Duhsaka awm dan a sawi chu, min tiṭim uai uai.


Sammy-a ka hrilh lo, a mu mai mai tih ka hriat chuan ka thaw huai. U Hmai ka bia a, A4 paper min lo hawn sak turin ka chah ta mai.


Office-ah kan innawr phei a, zêp reng theih a niin ka hre lo.


Kan inkarah zêp awm lo turin kan intiam tawh, kei aiin chin fel dan a thiam zawk ngei bawk ang.


Sammy-a chu ka hrilh ta a, "Lal Fanu min chuh a tum a ni mai lo'ng maw?", ka hlau em a ni.


Min rawn ban a, min pawmin, ka hnungah a bei a, min kuahna kut chu nghet takin ka hmer.


Kei chang ni loin, Sammy-a pawhin a hlau takzet.


Lal Fanu chauhin a tikhûr thei chiang alawm!


"Sam, eng em a thleng lo turah ngai ang. A chungah ṭhat kan chhuah a, mualpho takin kan chhuahtir lo bawk. Chung chu hriain, kan chungah zah a ngai ngei ang".


Dik tak chuan, ka inringtawklo.


Ka thusawi ngei mah nise, ka innghat ngamlo.


Duhsaka chu, kan Veng mai ni lo, mi zawng zawngin an hria. Sammy-a te tan Driver hna a thawhna a rei tawh em asin.


Kan Ṭhenawm Nuin, "Chemte a keng", a tih chu, ka ringhlello. Chemte nena min vâi erawh, hriatthiam har ka ti.


Ka dul a hmer salh a, "Eng thil ṭha lo mah a thleng dawn hleinem, ka awm alawm. Ka huaiin ka chak a, ka chhungkua venghim tur hian hlauh ka nei lo", ka ti nghet charh.


A dik, ka chhungkua venghim tur hian hlauh ka nei lo tlat.


Kan bulah Lal Fanu a mu duh tawh si lo, vawikhat tal Duhsaka ka be dawn mawni te ka ti tawh.


Chemte kenga min rikrap tawh lo turin hrilh ta ila, kan Ṭhenawm nu pawhin a hmu sual thei tho.


A sawi danah, a chiang hle bawk si.


"Sam, u Hmai hi hrilh ve ila, ka nu leh pa te kan hrilh loh pawhin, u Hmai tal hrilh ila, kan pahnih chauha vawng reng lo hian", a bân cream hnawih pahin ka ti a.


Lehlamah Politics ngaihtuah ngai, lehlamah Chhungkua ngaihtuah ngai bawk.


Buai ka intiduh lo nain, buai tak ka ni.


Chin fel dan leh ṭawngkam hman chhuah tur hre zawk hi, enkawl ngaiin a awm tlat atin ni.


"Dik takin, ka hlau em a ni. Ka hlauh ber erawh ka hre lo, hriamhrei nena min rawn luhkhung a, Lal Fanu a hruai ka hlau. Hlauh ka ngah i ti em? Mi ṭawngkam emaw, Duhsaka hnen emaw aṭanga an hriat hmain, u Hmai tal hrilh teh ang. Duhsaka kan chin fel loh chuan zin chhuah ka ngam tawh lo. Kan zin hlanah lo rikrap ta se, u Hmai leh naupang te, ka ngaihtuah ngam lo", a chek tlawk tlawk.


Hlauh ka ngah lutuk a, hlauh ber tur ka hre lo.


Lal Fanu min rawn chuh ka hlauh ber a ni a, chu chang a ni lo; Duhsaka a kalbo loh chuan kan chhungten an hriat ngei a ngai dawn a, an hriat huna min tih dan tur hre mah suh i; ka zuam lo.


"Hlauh i ngah lutuk", ka kun deuh ngâih, "Ka kutah dah rawh", a ti leh.


U Hmain min duat lutuk a, ka pangchang vek. Sammy-a chu mit tui tling piauin ka melh, "Lo kal teh, lo kal teh",


"Ka duh lo, cream inhnawih vat vat ila, mu ang. Zan a rei tawh", ka insût ri hrawih a.


Pangchan ka inhmeh lo ngawt ang.


Min pawt a, a âwmah ka bei hnâp. Pangchanna tur a awm chuan, pangchan mai pawh a pawi loin, a hlimawm tlat.


Ka bek a dawm a, "I sawi dan takah, Chhungkaw Pa ka la dam ve hi",


"I sawi mai mai lo tiraw?", ṭap ṭuauin ka han ti a. Ṭap rual ka ni tawh lo asin le. Ka zak hnuhnawh chu, a âwmah bei leh hnâpin ka inthukru.


Kan ngawi dun ta reng a, ngaihtuah chu ka nei ve ngei, ka ngaihtuah erawh ka hre hauh lo thung.


Ka muhil a ni chek ang chu, ka harh chuan Sammy-a âwmah ka la bei reng. Ani pawh, a muhil ni ngei tur a ni.


Tukverh parda aṭanga a lan danin khua a vâr hnai lam tawh a ni.


Kaitho chuang loa mut ṭhattir tuma kuai thluk ka tum chu, "Ka muhil lo", a rawn ti. A rawn meng chhuak hliai a, ka phu nghek zui.


"Chuti, mu ṭha rawh", ka ti a. A tawlh thla hrut hrut.


Min pawt thlu leh a, thawh buai ka tum lo. Ka pangchang laklawh tlat.


U Hmai thawm ka hriat takah ka tho ṭhem ṭhem a, a muhil ta a ni ang. A che chang tawh lo.


Thawm dim thei ang berin u Hmai a lo che mial mial, "U, i va tho hma ve. Nu Papuii a lo la thlen loh hi",


"A lo kal thei dawn lo, nizanah min rawn hrilh a",


"Ngati nge? A dam ṭha lo em ni?", a hma chuan min hrilh ve thlap ṭhin kha a nia.


Chu loah, a Mo zawk thawh tlai zawng, a nuam fahran lo tlat.


U Hmain, "A hnung a tina deuh a ni awm e, chawlh a mamawh ve tawh em a ni", a ti a.


Dik ka ti reng, "Naupang va kaitho ta che, tunlai chu, mut an duh hlawm tlat. An nu an chhun a", elsenna pakhat mah tel loin min ti a.


Nuih tlawn ver verin, "A nî Hmai a awm tho kan ti a", kimki chiaiin ka ti pek a.


U Hmain, "Ka kuk hma chein i fa te ho va kaitho rawh", Cooker chhinin min tin uaih a, "Ka kal ka kal", ka intitlanchhia a.


A nui ar ar.


Pindana ka lut chu, Siamtea leh Freddy-a chuan an Dawhkanah Zirlaibu inchhawpin an lo inbengkang fel der tawh.


"Morning", ka ti lut a, Freddy-an min hmuh veleh, "Anu, ka zung phawt dawn, ka zun a chhuak lutuk", tih leh tlan chhuah a rual.


"Zunram thiar loin ngahnge lehkha in zir?", Siamtea ka zawt a.


"Zir tur a tam chuang lo a", Siamtean a ti mai bawk.


Lal.Fanu chu, a u te thawm pawhin a tiharh zo ngang lo a ni ang, a muhil chiah chiah.


Siamtean, "Anî-in kaitho lo turin min ti a", a lo ti thuai. Kan duatin kan hmangaih tlang em asin.


"Zir vat vat rawh, a harha a tihbuai hma chein", a tukkhum ka tuai a. A zir ve mai. Freddy-a a rawn lut a, harhvang tih takah, a dawhkan a thlen hmain a han inchhuih thlu bawk thlawp pek a.


A ṭhen sak, "Bawiha, a na em?", kaihthawh tuma ka kun chu, "Na lo rapthlak, a ho em mai", tiin, rang mangkhengin a inperh tho nalh.


A khup tuai heuh heuhin dawhkan a pan a, a ṭhu fel chu, "A va na e!", a ti zawi sup.


"Tlangvalna a nih kha", ka tihsak a, "Nia", awih vak lo hian a ti chuai ruih. Siamtea a nui rah rah.


Lal Fanu ka thlek a, a harh hlawllo.


Mut reitir lutuk zawng, a ni theiin ka hre lo.


Freddy-an, "Anî-in dar thumah pawh thawnthu a la hrilh", a lo ti. "A va meng rei ve", ka ti a.


"Anu bulah ka kal duh a tia, Anî-in a phal lo a", Freddy-a bawkin a ti leh. "A ṭap nasa lutuk", Freddy-a bawk a ni.


Siamtean, "A ṭap nasa lo, a mit tui a tla ringawt alawm", a lo ti ve bawk.


Kaihthawh ka duh leh ta lo, ka bula kal duh na na na, u Hmain chungah ka vui chuang lo e.


A rawn chet ṭual ṭual takah, ka mu thla ve a, chiang vak loin a rawn meng, "Nu", pangchang tak hian a ti chhuak a.


"School i tlai dawn", ka ti chu, a zuanin a zuang tho.


"Ngati nge min hrilh loh?", khum chungah a nuar a, a zuang vak vak. "A u te paw'n min hrilh lo a, in sual e", a ti nang nang.


Freddy-a leh Siamtea an nui kur kur.


A lu a thur si, sam tam chi a ni a, paih ṭhensak a ngai leh dawn a nih hi.


Ka pawm a, "Inah awm mai rawh, kan pahnih chauhin kan awm anga, Noodled leh Kimchi kan ei ṭeuh dawn nia", a ruk thei ang berin ka hrilh a.


"Ka ei ve duh", Freddy-an a lo ti.


A beng a vâr tak tak a ni.


"School ka kal duh zawk", Lal Fanuin a ti chu, "A nih, zanah ka bulah i mu ang",


"Apa nen maw?",


"Apa nen kan inkarah",


"Yesss!", ka mal chungah a zuang a, a na lutuk. Ka pawm hle hle.


Ka kuah vawng vawng a, kan inkar a hla ka ti ngam chiah lo nain, ka ngai takzet zet.


Dawra pênkawi a ngaih avangin ka insiam a, U Hmai leh Sammy-a inawm ve tawh thung rawh se.


Ka insiam laiin, "Puipui?", tia min kohna chu, ka chhâng lawk lo. He hminga inkohna hi ka ngaina chang ni loin, he hminga min koh apiang hian mi thar ni maiin ka inhre ṭhin.


Mi thar mai ni lo, mikhual angin!


"Chhuanpui?", tiin min ko leh a, ka chhâng ta chauh.


'Puipui' tia min koha ka chhân lohna chuan mak a tihtir ngei mai, a chalah chiang takin a inziak.


"Tlaiah ka lo haw chauh ang. Party Office-a kal a ngai lo a, hnathawh tur a awm vak tawh lo bawk a, Lal Fanu nghah pahin Dawrah ka han kal ang e", lungchim takin min thlek a.


Darthlalangah a lang vek.


Lungchim taka min thlek tawh chuan ka thin a phu nasa thei lutuk, ka chet hi a lâi vek zel.


"Apa, School ka kal peih lo e", a pa mal chungah a kai a, a pa lahin a lo kuah ve mai.


A insiam vek tawh a, ṭhulh leh mai a chi loh.


Sammy-an, "I nu dil rawh", a ti a. Intipangchang taka min enin,,"Anu, please, tun chiah hi. Apa ka ngai e", a hmui a tipawrh kual kawi a.


"A theih loh, School kal ngei ngei tur. Zirtawpni a thleng ṭep",


"Please!", a pa nen an ti a. Ka phallo bur.


School chawlh hi a nuam a, chawlh laklawh a awm zel a, a buaithlak.


Ka phal tlat lo a, kan intiṭap em lo. Thlem erawh kan inthlem.


U Hmai leh Sammy-a ten min vai lawp lawp a, "Apa, lo dam ṭha rawh aw", Lal Fanuin a thlah a.


Dawr ka thleng a, Hriati leh Hmingi an lawm ngang mai.


Min ngaih thu an sawi nasa a, kei tak hian ka ngai.


"In ngaihawm lutuk", ka tih lahin, "Dawt, min ngai hlawllo", an ti tlat. Dawt an ti tlat a, ka ngaihzia an hre lo mai mai.


Lehkhabu leh Zirlai mamawh hrang hrang lakkhawm belh tur min hrilh zung zung a, lehkhapuanah ka chhinchhiah nghauh nghauh.


Chutih laiin, Book Bouquet a rawn thleng leh ta tlat.


"Chahtu hi Lalchhuanpuii a nia", a ti a.


Sammy-a a ni chiang lutuk. Ka chah tlat lo. A hmain a lo chah tawh a nih kha. Pangpar aiah Lehkhabu ka dawng, a Romantic dan a dangdai em asin.


"Kan lawm e", a man pek a ngai lo.


Hmingin, "I chah a nih ka ring lo, tu hnen aṭangin nge? In pa a nih ka ring si lo, tu emaw te te hnen aṭangin a ni chiang", a mit ko a san ak ak.


"Aw Lalpa, Book Bouquet min pe ṭhintu tur pasal min pe ve, Bialpa pawh pawi lo", Hmingi chuan chung lam hawiin, a âwmah a kut pahnih a suih a.


Hriati lahin, "Keipawhin ka duh ve, mahse; kei chu Rose Bouquet min pe ṭhintu tur", chung lam hawiin a ti ve bawk.


"In va han uang peih mai mai tak", ka ti deuh hluk a. Engah tehchiam an ngai lo. "Tak takin, in pa hi chu, a zei ngawt ang", Hmingin a ti a.


Hriatin, "Pathlawi zei lo an awm lo ngai lo, Suar leh Hling paltlang a, Tlang sâng tak tak lawn chhuak tawh, Rose hlingin a chhun nat theih tawh loh khawp leh; Ram hnim leh hling te phei chu ke lawnga rap ngam ngat an ni tawh a", a ti mai chu, Hmingi a nui chhuak hak hak a.


Ka insum thei bik lo.


Dul dawm meuhin, "Pathlawi nen in inngaizawng tawh chiang ", Hmingin a ti a. A ke a per vak vak.


A kut a beng vak vak thul, "Ngaihzawn kher a ngai hleinem, a hriat mai alawm", Hriati lahin a ti. A nui duh bau lo.


"I ngaizawng chiang lutuk", nui chungin ka ti ve a. Ka biang ki a kham vek.


Nuih loh theih loh si, ka insum deuh a, nuih a za ting mai bawk si. Sammy-a hrilh hlan ka nghakhlel tawh lutuk.


Engtin tak ngai ang maw?


"Ngaihzawn kher a ngai lo, an dinhmun aṭangin tawn hriat an neih leh neih loh a hriat mai alawm. Fa pathum lai a nei a, Pathlawi zei tak a ni tih a chiang mai alawm", Hriatin a ti khar khar.


Sammy-a a sawina, fa pathum lai a nei tawh a, a zeina em em ka hre ve lo.


Naaa, ka ngaihtuahna hi a dik lo. Book Bouquet min leisak a, a zei lutuk tlat. Pangpar aiin ka duh zawk tih a hre kar a.


Hmingi a nui tawp hleithei lo.


Hriati hnung a bêng thak thak a, "Ka nau duh tak, insawi fihlim i tum nasat poh leh, i inpuang zual tih i hre lo a ni", a nui ringin a nui bal si.


"Ka dam chhungin Pathlawi hi ka ngaizawng tawh lo ang", Hriatin a ti ta khauh.


Kut ka bêng hlak a, Hriati ka kâwk.


Hmingin, "Kha maw, kha maw, Duati; chu Pathlawi chuan a kawp che nge, a bum che nge; inṭha ṭhen em ni in nih? Fa engzah nge a neih tawh? Pathlawi a nih avangin i chhungten an duhpui lo che nge?", a zawt ṭeuh.


Hriati chu a thaw hap a, "A nupui hlui nen an inru mawle",


"Ai ai ai, awi, awi, ka duh lutuk", Hmingi chu leiah a ṭhu hnawk a, a ṭhu hle hle thei lo. A tal tawp tawp hi a ni ber.


Ṭhut hle hle theih ni nghal loh, "Khawvelah Pathlawi veh thlem a nat ber bakah, bum hmang leh dawt sawi hrat ber an ni", Hriati chu a nui duh bau lo.


Ka en ṭhin a, ka lainat bawk si, ka nui tawp thei bawk si lo.


"Ka nau, lo kal teh", Hmingin a kuah a, "Tun achinah, Pathlawi veh thluk theihin lo awm tawh suh ang che", khi ṭhaw chungin a ti sep a.


Leiah a tal leh tawp tawp.


Kei zawng, eng thu mah ka sawi chhuak thei lo.


"Fa pakhat an nei hman a, induh reng chunga inṭhen an ni bawk nen. A buaithlak vek alawm, ka chelh nasa ve tehreng nen, kan inngaihzawn lai rengin a nupui hlui min ruksan a, ka ngei a nia aw", a ti leh nang nang.


Tlem chuan nuihzat a bo deuh ta.


Hmingi pawh a inhui ṭha a, a inbêng fai sawk sawk. A khi ver ver tho.


"Tlangval an tam em mai, lungngai mah ta che. Ka zawnpui ang che", a ti a. Hriatin a ei loh hmel a nia, a ner sâwng.


"I ta tur pawh hmu hlei thei lo hian, khawia mi Tlangval mah min hmuhsak hlei lo'ng nge", a ti hmuk a.


Hmingi a ner ve nasa.


"Min ring tawp mai rawh. Rinna lian tak neih hi a ṭha ngai e", intipuithu takin Hmingin a ti a.


Hriatin a ei lo lutuk.


Hmingi leh Hriati te zarah ka hlim mang e. Pathlawi mawlh chu, Hriatin a hre chiang ngang mai si a, Sammy-a ngaih dan ka hre châk tawh lutuk.


Lal Fanu nen in kan thleng a, "Sam, ka u?",


"Apa, Anî?".


A reh duak, an chhuak ti dawn ila, kawngka a inkalh si lo.


Pindanah leh Office-ah kan en a, an awm lo. "Khawiah nge Apa hi?",


"Ka'n call ang e aw".


Phone phawrhin ka call a, Office aṭangin a lo ri chhuak. Office-ah kan kir leh a, dawhkan chungah a lo awm.


"U Hmai ka'n call leh ang e",


"An lêng a niang a?", Lal Fanu chu a pa ṭhutnaah a ṭhu a. A intithei a nia.


U Hmai ka call a, inah a hnutchhiah bik em lo e. Min chhâng thei lo thung.


Lal Fanu ka pawm a, "Noodles chhum tur lei daih ang",


"Yesss".


Office aṭangin kan inpawm chhuak a, "Takah, inthlak phawt ang",


"Aaa, Anu, Noodles chhum ka ei châk tawh", a dulah ka dêk a. A nui ar ar.


Inthlak lo chuan kan chhuak leh ta a, ṭha takin kawng ka khar. Khawiah tak chuan, kal unau nimaw?


Dawr aṭanga kan hawin kan Ṭhenawm te inah kan pêng phawt.


Duhsaka a la hmuh leh hmuh loh ka zawt a, Lal Fanu hriatah Duhsaka hming ka lam ri lo.


A hming sawi lo mah ila, kan Ṭhenawm Nuin a hrethiam pha vek.


"Hmu tawh lo, a mak khawp mai. Ka hrilh che aṭanga ni hnih hnu aṭangin ka hmu tawh lo. In zilh turah ka lo ngai a", ka hmel ka tidanglam lo.


Zilh turin kan ko lo hrim hrim.


A rukin, Sammy-an a zilh te a nih ngawt loh chuan.


"Theihtawp kan chhuah chu a nia, thu ringawt chuan a bengdai ka rin loh avangin a nia ka zawh che. I hmu leh a nih chuan min hrilh ngei ngei rawh aw",


"Hrilh em em ang, ka lo hlauhthawnpui hman che u alawm".


Rei vak lo kan titi a, "Anu, ka ril a ṭam tawh", Lal Fanuin a pum khawih pahin a ti a.


Kei pawhin ka ril a ṭam tih ka hre chiah bawk. Chhangchhiatthlak mang e.


Kawngka hawn ka tum chu, chhung lamah eng thawm emaw hi ka hria a, ka hawng vat.


Khûr nasa tak ka ni. Chhun pachang lai a ni hlauh a, Zan chu nise, ka hawng ngam lo ang.


Kan lut a, ka mit ka lên ruai mai bawk.


Kan inah Sazu an awm lo a, Zawhte leh Ui kan vulh hek lo.


Tukverh hawn sa tih loh hawn belh a awm lo bawk. Ka bengchhe ri ni turah ka ngai ta a, Lal Fanu thlaka sil fai zawh hnuah Noodles kan chhum ta a.


Kimchi awm se, a tui zual ngawt ang.


"Anu, Apa lo haw hmain ei vat vat ang",


"Ei vat vat ang, i pa a khirh si".


"Kimchi awm se",


"Nakinah kan la siam dawn nia, lei ngai loin ka siam thiam alawm", ka ti a.


Lal.Fanu a phur lutuk.


"Kan pahnihin siam ang aw",


"Lutuk, kan pahnih chauhin kan siam ang a, tumah kan eitir dawn lo nia", ka ti leh a. Lal Fanu a phur nasa tawh lutuk.


Sammy-a leh u Hmai kalna ka hre si lo, hmun dangah kal nise, kawngka kalh awm tak hi a nia.


Noodles chhum ei pahin u Hmai ka call leh a, min chhâng thei lo.


"Anu, tui ka in duh", ka tho chiah chu, kawngka bula tukverh keh darh chuaih khawpin lung an rawn vawm lut ta mai.


"Anu!", ṭhutthleng aṭanga Lal Fanu tla tur ka dawm hman ṭawk ṭawk.


Ka nghawngah min kuah a, ka thin a phu nasa lutuk.


Lung ka ti tak naa, lehkhapuan hrual hi a ang mah a ni.


Motor thawm bak hriat tur a awm si lo.


Lal Fanu pawm chungin leh, hlau chung chungin chhuata leng mum bam chu ka chhar a, lehkhapuanin lung an hrual hnan.


Lehkhapuanah inziak a awm, tiparhin ka chhiar a, *** I enkawl mek Freddy-a leh Remruatfeli te kha ka fa te an ni a, ka bulah ka hruai dawn. Lo inring ang che*** tih hi a ni a.


A ṭum hnihna atan lung a rawn lut leh ṭhuai, hnung zawngin ka tlu a, Lal.Fanu a na lo.hlauh.


Han au chhuah mai ka tum a, ka thei tlat lo zu nia!


Lungah chu lehkhapuanin an hrual leh.


Thoin ka en leh a, eng thu mah a inziak tawh lo. Thlalak pakhat a ni.


U Hmai, Sammy-a leh Manoi te.


Inhmatawnin Sammy-a leh Manoi an ṭhu a, u Hmai an inkarah.


Ka rilru tinatu mai an ni, u Hmain Manoi bek a.chulsak a, Sammy-an Manoi kut a vuan bawk.


"Anu, Apa khawiah nge? Ka hlau a nia",


"Lal Fanu, a lo haw ṭep tawh ang", ka hrawk hi rektu a awm.


Darthlalang keh darh chu ka tifel duh lo. Lung pahnih pawh chu chhuatah ka dah a, lehkhapuan leh thlalak erawh ka hum ran thung.


Duhsaka ka call a, ani pawh chuan min chhâng thei lo.


Taiṭita ka call a, rei a ni lo, min chhâng thuai.


Taiṭita âw ka hria chu, ka mit tui a tla ta!


"Khawiah nge i awm?",


"Hetah, Office-ah. Engtizia nge i âw chu? Chhuanpui, thil dik lo a awm em ni? Ka rawn kal nghal dawn a nia. Khawiah nge i awm?",


"Inah",


"Ka lo kal", tih leh, phone dah a rual a.


Taiṭita lo thlen hmain Sammy-a rawn haw hman se ka ti fan. Taiṭita ai chuan Sammy-a ka beisei zawk.


An kalna tur min hrilh si lo, Office-ah Taiṭita a awm chuan, Manoi te nen an awm ho tihna a ni ta phawt mai.


Rei loah Taiṭita a rawn thleng, "Chhuanpui? Engtizia nge Darthlalang hi?", pindan aṭangin kan chhuak chauh.


Lal Fanuin Taiṭita a hmu chu, "Apa Taiṭit", a ṭap a, a ban nghal.


Taiṭita pawhin a rawn ban nghal vat bawk. A mit tui tla te a hruksak a, "Ka Beram notê hi tinge a ṭah? Apa Taiṭita ka lo thleng tawh, ṭap tawh suh le!", min lo en a, "I ṭha em?", ka bu nghat.


"Eng thil nge thleng? Khawiah nge Pu Sammy-a?", thil thlen dan sawi ka tum a, min dangtu an awm.


Ka ṭawng chhuah chuan ka ṭap dawn tlat. Ka mit tui avangin Taiṭita ka hmu phê ruai tawh.


Lal Fanuin, "Anu nen Noodles chhum kan ei laiin lung an rawn vawm a, ka hlau lutuk a, ṭhutthleng aṭangin ka tla ṭep. Anuin min man hman a", ṭap ṭeuh chungin a ti a.


Taiṭita chuan min rawn kuah a, awm sawn ka tum lo. Ka hlau ve em a ni.


Lehkhapuana thu inziak leh thlalak te khan min tihlau zawk mah.


"Chhuanpui, a ṭha vek a nia, hlauh tur a awm lo", ka bu nghat nghat. Min la kuah reng a, Lal.Fanu chang ni lo, kei ngei pawh hian ka thlamuanpui hliah hliah.


"Lalchhuanpui?", tih âw fiak ṭha lutukah Taiṭita min kuahna lak aṭangin ka kat dawrh.


"Apa?", Lal.Fanu chu Taiṭita pawmna aṭangin a chhuk thla thuai a, a Pa a va kuah.


Ka dinnna ngaiah ka ding reng.


Sammy-a chu Wheelchair-ah a ṭhu miah lo. Hriatpuia dara kuahin a ding. Hriatpuia, e he!


U Hmai leh Hriatpuia chu ka en ngam mai a, Sammy-a thung chu ka en ngam lo. Vin lutuka min koh chuan, a mit phei chu, Indopui Pathumna chawk chhuak hial thei a ni ang.


"E kha, in lo haw a nimaw? An Nufaa rikrap tuar turin in kalsan daih alawm", Taiṭita chu a lungawi fahran lo.


"Darthlalang keh hi", U Hmain a ti a.


Taiṭita bawkin, "An nufa chauha kalsan a finthlak hmel loh riau", nêm tak si, lungni lo takin a ti leh.


Lal Fanu chuan, kan thil tawn dan zawng zawng a sawi leh vek.


A pain a pawm a, "Apa, ka hlau lutuk. Khawiah nge i awm daih a?", Sammy-an, "Dawrah kan kal lawk alawm, hlau tawh suh aw", a ti mai a.


Min rawn ko se ka tih rualin, a bul hnaia awm ka duh lo.


"Chhuanpui, i ṭha tiraw?", ka bu nghat. Haw tawh se ka ti.


"Pu Sammy-a te an lo haw tawh a, ka hawsan ang che. Mamawhna min neih chuan nichin ang khan min lo call zel dawn nia, eng hunah pawh ka lo kal ang", ṭul lo lutukin ka chhip sam a tuai a.


Ka hawi chhuak ngam tawh reng reng hleinem.


Taiṭitan, "Huai takin awm rawh", tia min thlah chuan, min tihawi chhuak ngam thei ta.


Dik lohna ka nei hleinem.


Taiṭita nen lah, engtin mahin kan awm lo. Thiam ka inchan ve tlat.


"Hriatpuia chu, engtikah nge i lo thlen a?", ka ṭawng chhuak thei ta. Ka âw-ah erawh ka khûr tih a hriat.


U Hmain, "Min lo call lo a nih kha", a ti a. Darthlalang keh leh lung a tifel.


"Ka lo call nasa lutuk che, min chhâng thei lo. Sammy-a lahin a phone a kalsan daih si a. In kalna tur in sawi si lo, kawngka kalh loin in chhuak daih a. Rikrap kan tawh takah, Taiṭita ka ko ta mai a nih kha", ka ti ve ngat.


Hriatpuian Sammy-a a kalpui seuh seuh chu panin, Sammy-a kut lehlam chu ka darah ka nghat a, "Sam, muangchangin aw", ka ti a.


U Hmain a phone a en, "Awi, Chhuanpui, pawi ka ti lutuk. Silent-ah a awm daih alawm. Hliam in nei em lo tiraw?", Lal Fanu a pawm a.


Kan neih loh thuin ka chhâng thuai.


Chhung lamah hliam a awm thung!


Ṭhutthlengah kan ṭhu a, "A hmel i hmu em? Tu nge a nih i hria em? A sâng nge tawi? Khabe hmul a nei nge nei lo?", Hriatpuian min zawt nghal zung zung.


Ka hriat loh thuin ka chhang vek, "Ka hmu lo, lung a rawn vawm ringawt. Naupang ho School an kal vek a, naupang puh thluk a rem chiah lo", ka ti a.


A bu nghauh nghauh.


Banga Sana intar a melh a, "Siamtea leh Freddy-a ka va hruai ang e".


Hriatpuia a chhuak a, u.Hmai leh Lal Fanu an inpawm. Lehkhapuan leh thlalak kha Lal Fanu Mattress hnuaiah ka dah ringawt a, u Hmain a hmuh hmaa ka lak a ngai a ni.


Thawh ka tum chu Sammy-an min pawt, "Min hua em?", a âw chu, a khûr titih.


"Sam, huat chhan tur che ka nei hleinem",


"Min mamawh hunin ka awm ngai si lo a", min rawn en a. Thikna nasa tak karah, min hriatthiamna leh min chân hlauhna a inpawlh nuk bawk.


"Ka huat theih i ni hleinem",


"Dawt i sawi", ka hawisawn.


Tunah tak hi chuan, thlalak leh an kalna tur sawi loa an kalbo avangin ka lungni lo hlek.


Rei a ni lo ang, ka lungawi leh vat mai ang. Lehkhapuan leh Thlalak awmzia ka zawt ngei bawk ang.