Amelia Lalnuntluangi POV
Inchhung ah chuan kan lut a, ka pasal in ka thlavang a hauh vang khan ka lawm takzet a ni, diktak chuan thil thlen dan kha a rawn hmu ve vek lova, min rin loh ka ring zawk a nia, mahse ka ngaihdan chu a diklo tih ka hrechiang hle. Inchhung kan luh hnuah pawh Nicholas-a chu ka en reng a, "Bawihi, ka chhelo tihchu ka hria a, mahse khatia min en reng chuan ka lai ve thei tho a nia" a ti sup a, ka nui hak, "Nichin a i rawn chet dan kha, engmah I hre bawk silo a, mahse ka lam kha i tang tho bawk sia" ka ti sep sep a, a nui suk, "Ka nupui i ni a, ka hrechiang che alawm, an sawi ang mizia kha i nilo tih hrechiang turin kan cheng dun rei ve tawk tawh bawk, an phu tawk chiah an hmu a nihkha" a ti nghat a, "Ka lawm e, ka pasal duhtak" a biangah ka han fawp zeuh a, U Tluangi te awmna lam kan pan nghal.
Siama te nen chuan an lo in in be mawlh mawlh a, Siama'n Nicholas-a a hmu chiah chu a tho nghal zawk a, "Thu rawh, hnathawk lai pawh I nilo a, khatia awm kher kha a ngai hleinem" ka lo ti vat a, a ni pawh chu a thu thla leh ruai ruai, U Tluangi chuan nuam a tih hmel khawp mai, Zuali erawh a lo thu tum bur a, enge maw awmzia ni, "Tinge I va tum nasa ve?" a bul a thut thlak pah chuan ka ti a, "Kha Matthew-a nen an in bia a, an in hnial leh a nihkha" U Tluangi chuan nui hak hak chungin a lo ti a. Zuali lah chu a lungawi loh hmel nasa si, Matthew-a pawh hi hauh a ngai a ni, Zuali hi a fiam peih lutuk mah mah, hetiang reng reng chuan nakinah an la in sual duh mai ang, Siama chu a fel em em a, U Tluangi nen an in mil nghal em em bawk si, la hre rei lo hle mahila ka mipa rin zawng tak a ni.
"Siama hian U Tluangi hi a beisei deuh in ka hria, an in hmeh bawk sia, U Tluangi lah a naupang chhe zawk zawk tawh lo bawk nen in ngaizawng daih se ka ti" ka pasal beng bulah chuan ka han phun sap sap a, a nui nghawr dat. Dar 12 vel ah kan haw a, Siama chuan polite takin min mangtha a, U Tluangi hnenah a phone no a dil bawk, Nicholas-an naktuk lamah a hmuh duh thu a sawi a, eng tak chu ni ang maw. In kan thleng a, a tlai tawh bawk nen U Tluangi pawh a riak nghal mai dawn a ni, kan room ah kan lut a, ka thawmhnaw hak te ka phelh sawk sawk a, a fan thei ha mahila ka pum chu a tawn mar tang a, phelh hlan ka nghakhlel tawh lutuk ringawt. Khumah kan mu a, ka chau bawk nen reiloteah ka muhil nghal thuai a, ka pasal tawng sup sup ri chu ka thil hriat hnuhnung ber a ni.
...
Ka nau neih thla a ni tawh a, Nicholas-a chu inah a awm deuh chawt tawh, tukin atang khan ka pum a na riai riai a, mahse a nat reng loh avangin ngaih han tih that loh na vak pawh ka nei chuanglo, Nicholas-a chu a chhuak lawk a, a lo let tep tawh in ka ring, room atang chhuak in inhnuai step chhuk thlak naah chuan muangchangin ka chhuk a, step chanve vel ka chhuk hnu chuan ka pum chu namen lovin a rawn na a, hetiang ang em em hian a la na ngailo, ka then chawk chawk a, ka kut pakhat chuan ka pum ka dawm a, pakhat zawk in step chhuk naa vawn na tur chu ka vuan bet tung bawk, U Tluangi te koh ka duh mahse ka tawng theilo, ka thawk thleng in a harsa zo vek tawh, ka thlan a rawn bawl chhuak tiam tiam bawk a, thaw chham ang mai chuan thawk ka la hawlh hawlh bawk.
"Awii... Amelia engtinge I awm?" U Tluangi'n min rawn hmuh takah chuan min rawn pan vat a, ka chhang theilo, ka pum chu ka dawm ngawt ngawt ringawt, chutah ka kap lam a rawn lum deuh pup a, ka tui bawm a kek tih ka hrethiam nghal mai, "Zuali lo kal teh" U Tluangi chu a au tuar tuar a, Zuali pawh chu a rawn lang ve nghal vat, "Inchung ah han chho la, naute thil tur kan pack sa kha han la rawh, damdawi inah kan kal vat a ngai, U Nicholas-a pawh hi a va rei em em ve" a ti nghal zung zung a. Zuali chu inchung ah a tlan chho a, "Amelia, tang fan fan rawh aw, U Nicholas-a ka be tawh a, a lo thleng tep ang" ka chet sawn theih miau loh avangin ka awm ngai chuan ka la awm reng a, U Tluangi chuan min veng deuh ran bawk, Zuali chu inchung lam atangin a lo chhuk a, a ni pawh a hlauhthawn hmel hle.
"Bawihi" Nicholas-a chu hmanhmawh zetin a rawn tlan chho a, "Engtinge I awm, a na viau em?" tih pahin ka pum chu a rawn dawm ve vat a, "U Nicholas, damdawi inah kan kal vat a ngai ang" U Tluangi'n a tih takah chuan dim zetin min pawm kang a, pawn lamah chuan min pawm chhuakin motor chhungah dim zetin min hlang leh a, Zuali chu hmalam ah a thu lut a, U Tluangi erawh a hnungah thu in a malchungah ka lu a nghat a, "Bawihi tang hram hram rawh aw, kan thleng tep a nai, Zuali kan chhungte kha lo hrilh la, chuan ka pu hnenah khan kan thlen har loh tur thu leh lo in ring sa turin hrilh rawh" a ti nghal zung zung a, a aw ah chuan a chiai zia leh a hlauthawng zia chu a hriat hmaih theilo, kei erawh ka pum a nat em avangin ka tawngthei tawh lo.
Damdawiin kan thleng a, doctor in min check nghal, ka pa pawh a lo awm a, ka nute an rawn kal mek thu a sawi bawk, doctor chuan nau neih ka hnaih tawh thu a sawi a, nau neihna room ah min luh pui nghal. Doctor leh nurse te chuan sang turin min fuih sauh sauh a, ka aw pawh ka chhuah theilo, ka pum nat dan hi ka sawifiah thiamlo zawk. "A lu a rawn lang tawh a nia, han tang leh deuh teh le" doctor chuan a ti a, ka thei tawh lo, ka tha a zawi vek tawh, "Tang rawh le" an tih pawh chuan ka thei tawh ngang lo. Ka chau a, nurse leh doctor te min biak na pawh chu ka hre hla tial tial, "Hetiang chuan a tha dawn lo tawp mai" doctor chuan a ti a, "A pasal kha va ko lut rawh u" a ti lehnghal zat bawk, reilote hnuah Nicholas-a hmel ka hmu a, ka kut ah chuan nghet takin a chelh a.
"Bawihi, tang rawh leh, kan tan leh kan fa lo piang tur tan" ka pasal chuan a ti a, ka pasal aw ka hre chiah chu ka chak na te a rawn let leh nimai hian ka hria, ka theihtawp in ka sang leh vak a, naute tap ri ka hriat chuan ka dam huai in ka hria, "Mipa a ni e, a hmeltha lutuk" doctor chuan a ti a, mahse ka awmdan hi a la dik theilo, san ka la pe reng a, "Lalpa leh, phir in nei dawn a nihhi" Doctor chuan a ti hluai a, ka sang leh ta vak a, minute 5 hnuah fanu kan neih thu chu min hrilh leh a, ka dam sawng sawng ta mai, ka pasal chu ka hmu phe ruai a, a mit chu a hnawm chhap a, "Bawihi ka lawm e, fanu leh fapa duhawm tak min pek avangin, ka hmangaih che" tiin ka chal ah a rawn fawp vang vang a, ka chhang let theilo, ka chau lutuk tlat, a hnu reiloteah chuan engmah ka hre zawm ta lo.
Thawm ri deuh nak nak ah chuan ka harh a, ka hawi kual a, ka chhungte chu an lo awm kim thap a, an hmel ah chuan hlimna hlir a ni ka hmuh, "Bawihi" ka pasal chuan ka harh tih hria in min rawn pan vat a, "I tha em, na te I nei em?" a ti zung zung a, "Ka tha, khawiah nge kan naute?" ka ti sep, chutah ka nute pahnih chuan kan fate chu an rawn pawm hnai a, kan fanu zawk chu ka pawm a, kan fapa erawh Nicholas-an a pawm thung, "A mak e, phir i pai tih kan hre miah lo a nia" an ti hlawm a, keipawh hian mak ka ti a, kartin ka in check up a, ultrasound kan tih pawhin phir ka pai thu doctor in a sawi ngai miahlo, a ni pawh khan mak a ti ve tho tih nau ka vei lai khan ka hria. Ka fate chu ka en vang vang a, an hmeltha takzet, kan fapa chuan keimah min chhun thu an sawi a, kan fanu erawh in Nicholas-a a chhun thung.
Nau ka neihna ka hliam nasat deuh vangin damdawiin atang kan chhuak thei mai lova, ka pasal chuan min awmpui deuh chawt a, hna pawh a kal ngailo, kan chhungte a bikin ka nute pahnih hi chhun lamah an rawn kal thin a, Nicholas-a hnenah ka nute awm chhung chu hna kal turin ka ti thin a, mahse a duh thak lo, a fate hi a atchilh khawp a, a pawm reng mai ni. Karkhat hnuah damdawiin atang kan chhuak thei ta a, in kan thleng chiah chu kan inchhung chu hlim a nui ri hlir in a khat a, kan fate hming phuah tum chuan an in hnial a, ka pa (Keima pa) in kan fapa hming atan Zoliansanga tih a sa a, Nicholas-a pa in kan fanu hming atan Lalawmpuii tih a sa thung, kan fate hming chu nalh ka tiin sawisel na tur ka neilo.
..
Kan fate pawh thla thum lai an ni ve tawh, a pa hian a atchilh bawk a, hna pawh a rawn bang hma ziah, an hnute hnek tur choka ah ka siam a, an pafa hovin room ah an awm thung, hnute tui ka neih tlem em avangin an pahnih chuan an kham bawk silo a, siam chawp an hnek chang a tam khawp mai, Pathian zarah an fel a, an tap ngai manglo, a bikin kan fanu Awmpuii, kan fapa ve thung hi chu zan rei ah tah a ching leh zeuh thin thung. U Tluangi leh Siama pawh an in ngaizawng ve ta nge nge a, tunah chuan Siama pawh ka pasal secretary a ni ve tawh bawk. Matthew-a a rawn lang zing hle bawk a, kan fate vang a rawn kal angin in sawi thin mahse Zuali vang a ni zawk mah in ka lo hre thung, a chhan pawh Zuali a hmuh loh chuan a awmna min zawt vat thin a tin ni.
Room ah ka chho a, Nicholas-a chuan a fate pahnih chu a lo pawm a, an pa in a pawm tih hre awm fahran in an nui ver ver a, an hmuhnawm takzet, hnute an hnek zawh ah an in muhil a, "Nicholas mu mai mai teh, i khawih reng chuan an harh leh ange" ka ti hlak a, an biangah a chul reng a, an harh vang bawk si, an harh vat ang tih ka hlau a ni. A ni pawh chu a mu tha ve mai a, "Chhana te chu an in be fel thei ta em?" a ti sup a, "Chanchin min rawn la hrilh lova, zanin khan an chhungte an hrilh tur thu chauh kha min rawn hrilh a, naktuk lamah min rawn hrilh mai ka ring" ka ti a, Chhana leh Thakimi hi an in zui na a la reilo hle, mahse an in hmangaih tawn hle tih kan hre bawk, tunah hian Thakimi nau thla khat a upa a pai mek a, a lang chhuak vat dawn tih an hriat avangin zanin khan an chhungte an hrilh a ni.
Rem tih lohna tur a awm in ka hrelo, ka muhil lai chu kan fapa tap ri vangin ka harh hlawl a, Nicholas-a a rawn harh ve nghal zat bawk, kan fapa chu ka pawm a, kan fanu erawh muhil si lovin a lo meng kar a, tah pawh a tum lo, a pa chuan a pawm ve nghal vat a, hnute ka pe a, a muhil lehnghal, kan fanu erawh a muhil duh leh tawh lo, chhun lamah a mut theih ngai bawk siloh nen ka mut chu chhuak tawh tak a ni. "Bawihi muhil rawh, ka lo pawm ang" ka pasal chuan ti ve bawk mahse ka in thlahrung a, a ni pawh hna a thawk a, a hah tih ka hriat vangin ka muhil duh bik lo, "Hnute ka lo pe ve ang, a muhil vat mai ang" ka ti a, kan fanu chu ka pawm a, hnute chu a hne dawk dawk a, a hnek pahin min en kar bawk a, kan fapa ai hian kan fanu hi a fing zawk a tih theih ang, a mitmeng te hi a fiah kal a, kan fapa hi chu a buang tur ang chi kha niin ka hria.
Thakimi leh Chhana te pawh nau a lo ken tawh vangin an chhungten a rang lam a inneih an rawt ta a, Chhana chu phur surh surh tawh tak a ni ringawt, kan thian hovin kan fiam luai luai a, Thakimi a laih hle laiin Chhana erawh in nuam a ti hle thin. Thakimi'n mo thian a min hman a tum viau a nia, mahse nau pawm lai ka ni bawk nen a rem lo em a tiin Sawmtei a hmang dawn a, Chhana pawhin Puia a hmang dawn bawk. Naktuk mai hi an in neih ni a ni tawh bawk a, kan phur hlawm viau mai, kan thian dang te pawh hian an tih hnai ve tawh mai ka ring, an naupang chhe zawk zawk tawh lo bawk a, chuvang chuan in nei vat hlawm teh se, Zuali'n kan fate a awm a, kei erawh in kan room ah kan thawmhnaw suk tur awm ang ang ka su thung, bathroom a ka awm lai chuan kawngka in hawng ri ka hria, Nicholas-a a nih ka ring.
"Bawihi" tih pahin bathroom luh na bulah chuan a ding a, "I lo haw tawh maw, suk tur a tam tawh riau a, ka lo in su a nihhi" ka ti zung zung a, nau puan vel a nih vangin kut in ka su a ni, "Khawiah nge naute te?" a ti a, "Zuali'n a awm a nihkha, nichin khan an thawm ka hre reng sia, an reh e mai an muhil a niang" ka ti zung zung a, ka in suk zawh hnuah kan nupa chuan in hnuai ah kan chhuk a, Zuali room ah ka kal a , Nicholas-a erawh sitting room lamah a awm thung, Zuali leh naute te chu khumah an lo mu a, an muttui hmel hlawm hle, ti harh duh lovin ka chhuak leh ta daih a, Zuali pawh dawr hawn ve a tum a, kan phur pui hle, a thiam bawk a, mahse kan in chhuah san kan phal chuanglo, awmpui ang pawh in kan en tawh lo, kan nau angin kan en a, chuvang chuan kan inah hian rei thei ang ber awm se kan ti a ni.
Thakimi te inneih ni a ni bawk a, zing atang kan buai hle, kan fate chu ka siam vek tawh a, ka insiam ve mek bawk, ka hman ve leh in atang kan chhuak nghal a, biakin kan thleng chuan an lo kal khawm nual tawh, a chhungah kan thu nghal a, Bawihpuia ka pawm a, Bawihtei Nicholas-an a pawm thung, Thakimi chu a pa in a rawn kai lut a, ka lo en reng, thutiam an chham a, tunah chuan nupa an ni ta, pawn ah kan chhuak a, Bawihpuia chu a tap a, midang awm tam vak loh naah kal in ka awi a, a muhil nghal vat, ka let leh chuan Bawihtei pawh a pa awm ah a lo bei chial a, a mut a chhuak tawh tih a lang reng, a meng dul ruih a, Chhana te inah kan kal a, Zuali hmuh tur a awm lo, khawiah nge a awm ang aw, kan thlen tirh kha chuan kan bulah a la awm ve reng kha a nia, Matthew-a nen an bo daih, an ni pahnih hi zep an nei chiang a ni.
Zuali POV
Matthew-a chu ka en reng a, ka beidawng tawh takzet a ni, a ni lah chu beidawn a tum mai mai lo tih a hmel ah a lang chiang bawk si, "Matthew ka ti tak tak a nia, kan pahnih in karah hian engmah a awm theilo, beidawng tawh zawk rawh" ka ti leh sep a, awmzia a awm dawn lo tih ka hrechiang hle thung. "Engvangin nge a awm theih lovang, eng buaina nge i neih, nang hian min duh ve a ni tihhi ngatinge i pawm mai loh?" thinrim aw khauh zet chuan a ti a, ka thaw chhuak halh, "A theih loh" ka aw chu a zawi hle, diktak chuan Matthew-a hi ka duh alawm, ka duh lutuk mahse ka phu lo a ni, kei sulhnu chhe tak nei tawh hian a ni ang mipa tha lutuk hi ka phu lo a ni, a nun hlui te hre ta se a ni hian min pawm thei hauh lovang.
"A theih loh nachhan chu sawi ta che, engvang in nge ka duhna che hi i pawm theih loh?" a ti ṭhawt a, hnuai lam bih in ka mittui tla tur chu ka dang tawk tawk a ni, "A theih loh a nimai, min zawt nawn tawh suh khawngaihin" tah aw lek lek in ka ti a, "Zuali ngatinge ka duh na che hi i pawm theih miah lo le, ngatinge min duh ve theih mai loh?" a aw chu a zawi hle, "Ka tihpalh a ni" ka ti leh sep. Chunglam hawiin a thaw chhuak hawlh a, a hmai a tuai puat bawk, "Engpawh ni rawh se, ka beidawng lovang, nanghian min duh ve tih ka hria, chuvang chuan ka beidawng dawn lo" tum ruh tih hriat zetin a ti leh hrawih a, "Beidawng zawk rawh, eng ang pawn bei mahla kan in karah engmah a awm thei ngai chuang lovang" ka ti a, ka kalsawn nghal daih bawk.
U Chhana te inchhung ah chuan ka lut a, U Amelia-i ka hmuh takah chuan ka kal hnai vat, "Khawiah nge i lo kal daih a?" a bula ka thut thlak rualin a lo ti a, "Pawn ah ka awm a" ka ti sep ringawt. Zanah kan haw ta chauh a, ka chau ve bawk nen ka room ah ka lut tlang nghal, Matthew-a chu ka ngaihtuah char char a, engvangin nge ka vanduai bik em em le, ka mipa duh em em pawh ka hnaih theilo chu a ni si a, ka nun hlui tawp tak kha a hrelo tih ka hria, chuvanga hetiang rilru pu pawh hi a ni, ka nun hlui a hriat loh vangin bul lo tan pui ringawt ila mahni hmasial lutuk ka ni dawn si, Matthew-a ang mipa tha lutuk hi kei hian ka phu lo a ni, keichu khawvel a hmeichhe tenawm ber ka ni si a, fa hial ka ti tla tawh tih a hriat phei chuan min hnaih chu sawi loh ka hmel tak ngial pawh hi hmuh a duh tawh dawn lo tih ka chiang.
Khumah chuan ka mu a, ka mittui a luang ngiai ngiai bawk, ka chunga khatiang thil a thleng chhan ah khan Pathian ka dem dawn thin mahse dem thei ka nih loh zia leh min hmangaih zia ka hrechiang a, ka dem ngam lo, chuti chung chuan engvanga khatiang thil ka chunga thleng bik nge a nih tih ka zawt fo thin, mahni nunna lak duh hial khawpin ka beidawng a, ka fa la piang ve hman lo ka tih tlak tak vang pawh khan keihi dam tlak ka nih loh zia ka hria, vawi tam mahni nunna lak tumin rilru ka siam fo thin, mahse Pathian hnenah ka beidawng tawp ah ka tawngtai a, chham tur em em ka hre ngailo, chuti chung chuan ka tawngtai na te chu a chhang thin tih ka hria, ka nunna lak ka tum apiangin Pathian in min hmangaih zia hi a takin ka hmu leh thin a ni, chuvang in Pathian hi ka kal hlat san ngam lo.
Mahni in sit reng reng in nun ka hmang a, chuti chung chuan ka la dam ve zel a, Pathian hian ka thih a la phal lo tih ka hria, hun te han kal se hetiang reng chuan ka nung bik in ka ringlo, mahse tunah hrih chuan tu mipa mah ka hnaih ngamlo, a chhan chu ka fa ngei ka thisen ring a ka pum chhung a awm ngei ti tla tu hian mipa tumah phu ka in tih loh vang a ni. U Amelia-i leh U Nicholas-a ten ka tan theihtawp an chhuah a, an chungah pawh ka lawm hle, an ni hi awm lo se engtinge ka nun ka hmang ang ka sawi theilo. Ka ngaihtuah na ka kawm melh melh lai chuan ka phone a rawn ri a, screen a hming in ziak ka hmuh chuan ka en reng ringawt, a tawp hnuah pawh a rawn ti leh zel a, ka phone chu ka silent ta ringawt a.
"Keipawh hian ka duh lutuk che asin, mahse i tan ka tling silo a ni" ka mittui chu ka hru a, mahse ka biangah chuan a rawn luang thla leh zel tho, ka room kawngka kik tu an awm vang chuan ka mittui chu ka hru hul sawk sawk a, lut turin ka ti nghal vat bawk, U Amelia-i a rawn lut a, ka bulah chuan a rawn thu thla a, chik zetin min en bawk, "I tap em ni?" a ti a, ka lu ka thing ringawt, "Zuali ka lakah engmah zep nei suh, i u angin min en a nilawm ni?" a ti leh a, "U Amelia-i nun hi a harsa a ni" beidawng aw zet chuan ka ti sep a, min rawn kuah nghal vat. Ka u anga ka en in min hnem tum a min rawn kuah takah chuan ka in sum theih na te chu hloh in ka tap chhuak ta hawm hawm a, engmah sawi lovin min kuah ta reng, rei fe ka tah hnu chuan ka thawl huai in ka hria, min kuah na a tang chuan a in la hrang a.
"Ka nau in thil awmdan min hrilh a" a ti sep a, ka lung chu a phu nghal dup dup a, "Zuali ka nau hi i duh ve em?" tlang takin a ti a, "U Amelia Matthew-a te chu ka thian angin alawm ka en" harsa zet chuan ka ti a, ka thusawi chu a awih loh hmel hle, "Zuali ka hrechiang che, dawt min hrilh suh, ka nau hi i duh ve tih ka hria alawm" ka ngawi reng a, "I duh tih ka hria chuvang chuan engvangin nge i hnar tlat?" a ti leh a, "U Amelia diktak chuan Matthew-a hi ka duh alawm, ka duh takzet, mahse i hriat kha kei ang hmeichhia hian Matthew-a hi ka phu lo a ni, chuvang chuan kan inkar ah engmah a awm theilo" ka aw chu a khur lek lek. A Amelia-i chuan min en vang vang a, "I nun hlui chu engpawh ni rawh se, i duh vanga khatiang tawk kha I ni hleinem, chuvang chuan mahni in sit kha bansan la Matthew-a hi i duh tak tak a nihchuan bul tan pui a a sawm na che hnar suh, hlim i phu alawm, i phu takzet" a ti a.
"Mahse fa hian ti tla tawh hmeichhia ka nihhi, a hriat chhuah hunah chuan keihi min hnaih duh tawh hauh lovang" ka ti tial ruai a, "Engkim tlang takin hrilh rawh, chuchu a tha ber, ka nau hi ka hrechiang i nun hlui vang mai mai in a kalsan hauh lovang che, a duh tak tak che a nihchuan i nun hlui ah a buai lovang, chuvang chuan in ngaihtuah chiang la ka duh a ni, i hlimna tur chu pan rawh, hreawm taka nung reng tur i ni hleinem" a ti a. U Amelia-i chhuah hnuah chuan ka in ngaihtuah vang vang a, a thusawi kha a dik a ni, Matthew-a chu ka bia anga, ka hun kal tawh te pawh zep awm hauh lovin ka sawi bawk ang, in zawmna neih a duh lo a nih pawhin ka dem hauh lovang, min la pawm duh a nih erawh in hnar ka tum tawh bik lo bawk.
Matthew-a hnenah chuan naktuk lama in hmuh ka duh thu ka sawi a, a lo pawm ve mai, zing lamah ka muhil ve ta chiah a, ka tho tlai hle nghe nghe, ka harh meuh chuan dar 8 a ri tep, hmanhmawh zetin room atang ka chhuak a, choka a ka luh chuan U Tluangi leh U Amelia-i chu an lo che malh malh a, ka inthlahrung hle, "I lo tho chhuak tawh maw, chaw ei kan peih tawh a, Nicholas-a hnaah kal hma a ngai bawk nen chaw kan ei nghal mai dawn nia" U Amelia-i chuan a lo ti nghal zung zung a, "Thawh ka hai a, ka tihpalh lutuk a ni" Ka ti sep a, "A ho lutuk, nizan I mut that ka ringlo a, kan kaitho duh lo che a nihkha" nui sen sen chungin a ti leh a, U Amelia-i tluk a hmeichhe fel hi a awm theih tawh pawh ka ringlo.
In atang ka chhuak a, Matthew-a nen kan in hmuh na tur hmun ka thlen chuan a lo awm der tawh, "Coffee kan in dawn mi?" ka thut thlak rual chuan a ti nghal zung zung a, "A pawi lovang" ka ti sep, waiter hnenah chuan coffee a order a, ka la thu ngawi reng, Matthew-a chuan min en reng a, ka thaw dep dep mai. Ka thu hrilh tur hian a tawng viau in ka ring, min hmuh a duh tawh loh thu pawh a sawi maithei, mahse ka rilru ka siam fel tawh a, ka hrilh ngei ang. Coffee a rawn thlen hnuah ka in a, "Ih.. hmuh che ka duh chhan chu thu pawimawh tak hrilh tur che ka neih vang a nia, ka thu hrilh tur che i hriat hunah chuan min hmuh i duh tawh lo maithei" ka ti a, ka ngawi leh vang vang a, thaw chhuak hawlh in ka hun kal tawh te chu ka sawi ta a.
Ka sawi zawh hnuah chuan Matthew-a chu ka en ve ta chiah, min lo en ve ran a, a ngawi reng a, a rilru tur awm ang chu ka hria, min ngaihdan turte nen lam, "Ka hun kal tawh zawng zawng zep awm lovin ka hrilh vek tawh che a, mak pawh min ti maithei, min hmu duh tawh lo a nih pawhin ka dem lo che, engmah hun kal tawh chhuan tur neilo hmeichhia hian nang ang mipa hi ka phu lo che tih ka hriat vang a nia ka hnaih ngam lo che a ka pehhel hram hram thin che ni, engpawh nise i thutluk na ka pawm vek" ka ti a, en pawh en ngam lovin hnuai lam ringawt ka en a. Ka bulah chuan a rawn kal hnai a, ka khabe ah rawn dawm in min kuai dak a, kan mit a in tawng chat, "I hun kal tawh chu engpawh ni rawh se, ka buai lo, ka duhna che hi a kiam phah bawk hek lo, chuvang chuan nun bul tan tha ang, nang leh kei kan pahnih in" a ti sup a.
"Ka hun kal tawh hre vek chungin min la pawm duh amaw?" ka tap mai dawn in ka hria, a nui suk a, "Tehreng mai, i thiamloh a nilo tih ka hria alawm, chuan mahni in sitna nei tawh reng reng suh, ka mitah chuan nang anga hmeichhe thianghlim hi an awm lo, i hun kal tawh vangin ka duhna che hi chhete mahni a kiam phah lo bawk, Zuali tun atang hian nang nen nun bul tan ka duh a ni, min pawm duh angem?" a ti leh a, ka tap chhuak ta nge nge, "Aw.. Tehreng mai" ka in sum theilo, ka mittui chu a la luang reng a, "Tap tawh suh le, midangin min en duh teh mai ania, ka vel che emaw an ti ange" a nui suk a, ka mittui chu min hruk sak a, tunah hian ka hlim takzet a ni, U Amelia-i thu ka zawm chu ka in chhir lo bawk, tun atang chuan ka nun hlim taka hman ka phu ve tawh, ka mipa duh em em ka bulah a awm chhung chuan ka hlim ang.
4 Years Later
Amelia Lalnuntluangi POV
"Lalawmpui" ka ti vin tuar a, ka fanu chu a phu zawk a, "Engvangin nge ka kawr thleh fel tawh sa I lo tih hnawk leh, vuak i duh em?" ka ti a, mittui tling pam in min en a, ka fate pahnih hian min ti hah lutuk, ka awm awl hman lo hrim hrim, han en lo hlek ila eng maw an lo ti hnawk hman ziah, a chang leh an in ti berh vek a, ka fate harh lutuk hi tunge an chhun pawh ka hre tawh lo, keilah ka nu in ka naupan laia ka fel thin thu a sawi a, Nicholas-a bak an chhun lovang. Bawihtei chu a che ngam lo hrim hrim, Bawihpuia erawh a pa hnathawh naah a zui a, ka buai lo deuh ang chu tih nen ka fanu harh lutuk vang hian ka la awm awl hman lo hrim hrim, chutah ka pum a lo lian ve tawh bawk si, ka tan chet a harsa tawh nen ka thin a chhe hlur mai ni.
"Che lovin tikhan ding reng ang che" ka fanu chu bang lam hawiin ka din tir a, a tap feih feih a, ka thlem duh chuanglo, hrem ve deuh hi an ngai thin, pawn lam atangin Nicholas-a motor ri ka hria a, ka fanu chu a che hrut a, mahse ka lo en reng avang chuan bang lam bawk chu a hawi lehnghal a, Nicholas-a leh Bawihpuia an rawn in zui lut a, "Bawihi, ngatinge Bawihtei chu?" ka fapa chuan min rawn kuah nghal thak a, "A harh lutuk a, ka hrem a nih saw" ka ti a, "A va buaithlak thin, Bawihte hetah lo kal teh" a pa chuan a ti dam dap a, Awmpuii pawh chuan a pa chu a pan vat a, a pa awm ah a bei rual rual in a tap nghal, ben hrep mai a nia ka duh ni, "Tinge Anu thu I lo awih lova" Nicholas-a chuan a mittui chu a hruk sak a, "Pa.. Anu chu a sual emai" uar zetin a tap a.
"Thu awih nila ka hrem lovang che, thu i awih lova chuvang a nihkha" ka ti hlak hlak a, "Bawihi naupang mai a la nihhi, khatia tihkha a tha ber lo" Nicholas-a chuan a lo ti hluk a, "Ka hauh deuh hlek in I lo tan zel a, chuvang a nihhi an sual em em, naktuk atang chuan i hnathawh na lamah hruai ve ve tawh angche" ka ti a, inchung lamah ka chho nghal daih bawk. Kan fate hi kum 4 lek mah nise an luhlul a, an duh an sawi tawh chu tih ngei ngei a ngai thin, Nicholas-a hi ka dem lo theilo, ka han hauh deuh hlek hian an thlavang a lo hauh ziah a, an pa hian a duat tih an hre lutuk a, chuvanga sual em em pawh an ni. Room kawngka chu a rawn in hawng a, ka ngaihsak duh lo, "Bawihi" ka pasal chuan a rawn ti dut dut a, ka chhanglo hrim hrim, ka hnunglam atang chuan min rawn kuah a.
"Min kuah lo teh, a lum si, in thlak vat rawh" ka tal a, min kuah nghet sawt, "Bawihi, i lungawi lo em ni?" ka biangah chuan a rawn fawp a, "Lungawi lo ve, kan fate hi an thlavang i hauh hlur ringawt a, han hau deuh ila i lo tan zel bawk si, an sual tawh em hi, an luhlul bawk si" ka ti hlak hlak a, "An puitling chho anga, an fel mai dawn lawm, kan fate hi misual an ni dawn lo tih ka hria alawm" a tih leh phei chuan rum zetin ka melh a, "Khatiang vang tak khan alawm an sual em em ni" ka tih leh hlak a, "Awle, engpawh nise i pasal hi chau takin ka lo haw a, min thinrim khum lo la, ka nagi che ania, chuan helai a mi pawh hi ka ngai" tih pahin ka pum chu a rawn chul a, thlaleh mai hi ka neih hun tur a ni leh tawh.
"Ka ti tak tak ania aw, ka hauh chuan lo tan tawh miah suh, hetiang reng chuan an sual chho telh telh dawn" a kawrkilh chu ka phelh sak a, inbual turin bathroom ah a lut tlang nghal, a inbual zawh ah inhnuai ah kan chhuk a, chaw kan ei a, tunah chuan chhungkaw tak tak kan din ve ta a, awmpui kan nei tawh lova, nau ka neih tep tawh avangin awmpui thar lak kan tum a, U Tluangi pawh Siama nen nikum hmasa khan an in nei a, fa an nei tawh bawk. Tun kum tir lamah khan ka nau leh Zuali an in nei bawk a, an ni erawh nau an la pai lo thung, chaw kan ei kham a, kan chhungkaw te chuan tv kan en leh a, dar 9 a rik chuan room ah kan chho a, kan fate chu an tawng leh nasa tawh mai, an muthilh hnuah zawi te in Nicholas-a nen kan titi a, "Ka hmangaih takzet che, ang leh kan fate nen hian kumkhua in ka hmangaih ang che u" a ti sup a, "Keipawn kan fate nen hian ka hmangaih lutuk che u" ka ti ve sep, ni e ka pasal leh kan fate hi ka hmangaih takzet, ka khawvel an ni si a.
A TAWP TA.
Ka story min ngaih hlut sak a, min chhiar sak tute in za vai chungah thinlung takin lawmthu ka sawi e, ka story dawt leh tur 'Perfect' tih chu prologue ka dah tawh a, in duhzawng te a nihchuan comment na lamah khan lo sawi ula, min lo chhiar sak leh theuh turin ka sawm bawk a che u
