Mikhual Hunter - 9

[Vtei Jahau]

Zomuanpuia's P.O.V







"Ni hnih vel awm leh ula, a hriselna kan enthla pah a nga, chuan tun thla chhûng Kar khatah vawi khat lo kal bawk ang che u, Thla leh ah chuan in haw thei tawh mai ang, mah se chu erawh Ngaihdami hmasawn chak danah a in nghat thung ang" Doctor chuan a ti leh a, ka lo bu nghut nghut a, "Doctor chuan a hriatna lam hi" ka tih laiin Doctor chuan, "Kha lam kha chu hre tur in nawr lui suh u" Doctor chuan a ti a, "Awle" ka lo ti mawl ve tawp a, a office chu ka chhuah san zui ta nghal.








"Muanpui, i duh chuan lo va haw ve tawh la, hei Bebeti nen kan awm dâwn tho a" Kapi in a tih chuan, "U Bebet Kapi hi lo va hruai haw zawk la" ka ti a, U Bebeti chuan ka hmelah thil dik lo a awm in a hria a ni mah na kapi bulah chuan eng eng emaw a sawi a, an pahnih chuan an bag te khaiin an chhuak ta vat a, Ngaihdami chuan hrilh hai hmel zetin min en thung, "Kapi kha a haw elo?" tiin kawngka lam chu a thlek vung vung, "Imm" tih ringawt chuan ka chhang a, "Damdawi ka la ei zo lo a" tiin a khum bul dawhkan a a damdawi lo la awm nual chu a kawk a.








"A kha lutuk a ka ei peih tawh lo" tiin a ner nawng nawng a, a hmel ka hmuh chuan ka nui deuh hawk a, a ni pawh ka nuih takah chuan a lo nui ve bawk a, "Enteh ka ei lo angnga mah se kapi te hrilh lo la" a rawn ti a, ka lu thing nak chungin, "A theih loh, i dam vat vat a ngai a lawm" tiin damdawi chu ka ban a, ka pe a, a lo la duh lo, "I dam vat vat loh chuan damdawiin i chhuah san thei dâwn lo a nia" ka ti leh a, "Pawi lo ka awm rêng mai ang, a nuam ka ti min duat hlawm si" a ti a, a mah chu ka en reng ringawt.






"I thinrim em ni?" a rawn ti leh daih a, ka lo nui miah lo a niang, "Aw, damdawi hi i ei loh chuan ka thinrim lehzual ang" ka ti a, a tum deuh bar a, mah se ka thinrim chu a hlau ve a niang damdawi chu rawn ban in a ei a, a hnar hup chung chuan a ei zo vek a, ka khawngaih reuh lutuk, "Ih maw, kan pahnih in Bike in kan accident i ti si a, mah se hliam te kan nei miah si lo a" Ngaihdami chuan zawhna ngah hmêl deuh chuan min en a, "Nia a mak a lawm" ka lo ti ringawt, "Keima'n ka lu chauh ka sawh tihna em ni?" a tih leh chuan "Aw i lu i sawh a, keipaw'n hliam chu ka nei tho, mah se I harh lo rei em a a lo dam hman daih tawh a lawm" ka ti ve leh a, a bu ve leh nghat nghat.








"A nih chuan kan pahnih hian engnge kan nih a? Kan in ngaizawng em ni?" ti leh in ka mitah tak chuan min en kar a, ka chhang mai thei lo, keipawh in a mitah chuan ka en ve reng ringawt.







"Mawhh" tiin a mit ko chu a sân ak a, "Hmelma ka nia, ṭhian kan ni bawk a" ngaihtuah chiang mang lo a tiin a hmel chu ka va en a, a lo kîr deuh nang, "Ṭhian te chu an in ti ti thiam lo ve ṭhin a, i hriat kha, kan in hau reng zêl" tiin ka sawi fiah leh vat a, "Ṭhian kan ni ti ve mai la, i sawi kual lutuk" a ti nâng nang a, chhang lo in ka nui ringawt a, Towel huh ka siam in Ngaihdami chu ka hru leh a, a la zawi hle a, a la chau lutuk tih chu hai rual a ni lo, "Kapi kha i haw tir daih a" in thlahrun hmel tak chuan a rawn ti a, a mah chu ka en nghal vat, "Ngatinge na i nei em ni?" tiin uluk lehzual chuan ka en a, a lu a lo thing vat, "A nih chuan tinge" ka ti a, ka mit a min melh kiau chung in, in thlahrun hmel tak hian, "Ka zun a chhuak lutuk a" a ti a, ka ding ngil nghal awt, ka hawi kual nghal ruai a, tumah min pui tu tur ka hmu mai lo.






"Nurse te ka'n ko ang" ka tih chuan a lu a lo bu nghat nghat a, Cabin chhuah san in Nurse duty room chu ka pan vat a, Nurse lo awm la naupan hmel tak chu ka ko a, nui sen sen chung chuan kan awmna cabin lam ah chuan min zui phei ve mai a, Ngaihdami pawh chu a lo la ṭhu ran, "Enteh a chhuak tawh lutuk" a bul ka thlen rual chuan a lo ti sep a, a zah hmel bawk si a ka khawngaih kher mai, "I kal thei angem" tiin ka din tîr chu ka tum a, a zawi bawk si a, a cheh hman ang tih ka hlauh ve tho bawk si chuan a dinchhuah hun pawh nghak lo chuan ka pawm ta ringawt a, a ni pawn a mit a lo chhing ve ringawt bawk.







Bathroom thleng chuan ka pawm phei a, a bak chu ka Nurse koh chuan a pui ta a, kei erawh in pawn lamah ka lo nghak thung a, "Ṭhianpa kan zo tawh a, i lo pui leh mai dâwn em niang" ti a Nurse in min lo koh chuan rang takin ka lût nghal a, Ngaihdami lo ding zawi hniang chu ka va pawm vat a, "Chhuat kha a nal reuh lutuk a, tluk ka hlau a, ka in vuan bet tawp a lawm" ka pawm chhuah lai chuan a lo ti siam siam a, ka nuih sûk rual chuan a lo nui chhuak ve hak a, a hmel chu ka en vat a, min en chungin a lo nui leh a, "Wheelchair a awm reng sia, la la tah khuan min nawr mai rawh i hah lutuk ang" a ti leh a, "Ka hah lo" ti chauh in ka lo chhang thung a.







"Engtikah nge damdawiin aṭang hian kan chhuah ang" khum a ka nghah rual chuan a ti a ka nui chhuak hawk, "I rilru a va in thlâk hms ve, damdawiin a la awm rih i duh emaw ka tia?" ka tih chuan min lo nuih lêt ve in, "Ka ngaihtuah chiang leh a lawm, nuam ka ti leh vak si lo a, bakah inbual te ka inbual chak tawh" tih pah chuan a sam ro deuh chhup chu a khawih a, nuam lo a tih hmêl leh tawh lutuk, "Harh chiang deuh la ka sûk pui ang che" ka lo ti ve mai a, a nui lehnghal var var.







"Enteh zawhna ka ngah sia min ning em?" ṭhut ṭhat sauh sauh pah chuan a ti a, ka mit ah tak min en kar bawk, "Ning lo e" ka ti ve mai a, chutih lai chuan kanu in min lo call vangin la tûrin ka chhuah san a, a rawn thinrim khawp mai, "Chanchin te min rawn hrilh ve ta che, Chanchin min hrilh tu ah tiin ka kal tîr ve em em che a" a rawn ti nghal bawrh bawrh a, chhang lo in ka nui ringawt, "Chatuantawi, ka ṭawng i hria em?" a tih takah chuan "Imm Ngaihdami bulah ka awm a, min rawn hau vak vak suh" tiin Ngaihdami chu chhuanlamah ka hmanga a bulah va kal leh in speaker chu ka on a, Ngaihdami chuan min lo en ringawt, "I bulah Duati a awm a maw?" a tih leh chuan "Imm" ti chauh in ka chhang.






"Duati dam vat vat la lo haw leh vat rawh aw, i ei duh tur thil tui deuh deuh kan siam dâwn nia" a ti leh a, ban charh in Ngaihdami chuan "Awle" a ti a, a hre lo a ni tih chu a chiang tak zet, "Nu kan hman tawh lo ka dah dâwn nakinah kan in be leh dâwn nia" ka ti a, kan in biakna chu ka ti tawp ta daih, "Tunge a?" Ngaihdami chuan a rawn ti chiah reng a, "Kanu a nih kha" ka ti a, a mah bawk chuan "Kanu hi khawnge a awm ve?" a rawn ti heu mai, sawi dan tur ka hriat loh em vang chuan ka ngawi reng a, damdawi pe tûrin Nurse a lo lut ta hlauh a, Nurse chuan a damdawi Doctor in a thlâk thu te a rawn sawi a, damdawi lei tur paper ah min rawn pe a, Nurse awm chhûng tiin damdawi lei tur chuan ka kal vat a, ka lêt leh chuan Ngaihdami chu a lo muhîl sâk sâk tawh an damdawi pêk vang a ni ngei ang, a bulah chuan ka va ṭhu a, a sam a hmai zar buai tu te chu ka hui kian sak a, a hmai la da deuh bai chu ka en reng a, a hmui pawh chu a dâng vek bawk, amaherawhchu ka mitah chuan hmeichhe hmelṭha tak a la ni reng tho.







Mah se a rawn harh chiang telh telh anga zawhna a rawn ngah telh telh dâwn a, chung a zawhn te chu engtinnge kan chhan tak ang, mit a a hmuh theih ah ringawt pawh entirnan a taksa a ser te, a chhan dik tak ka hre bik tlat si lo a.





A muhil chu rem changah la in a muhil thaw sêk sêk chu ka hnaih a, a chal chu ka hmui in ka sik tîr vang vang a, min ngainat hmel taka min en ṭhin hi hmuh a nuam in a duh takzet a ni, mah se a hriatna hloh hi remchang an ka la thei lo ang, a hriatna a neih lêt leh hunah a hma zawng aiin min hua ang a chu chu kei hian ka tuar thei lo bawk ang.







Ngaihdami's P.O.V






Zanah chuan U Bebeti a rawn kal leh a kapi a lo kal tello thung, min riah pui ve ziah si a, a chau ve a ni mah na, mah se Muanpuia a haw dawna a mah lo hruai tur a hmeichhe lo kal vang chuan ka nguai zo vek in ka hria, "U Bebeti saw saw tunge a?" tiin ka awmna Cabin kawngka bula an in bia chu ka kawk a, U Bebeti chuan nui chung hian "Ruati a nih saw, Aizawl a rawn kal tawh chuan an in zui reng zêl a lawm" nui chungin a ti a, ka nui ve thei der lo, a chhan pawh ka hre lo.







"I thik em ni a?" a tih chuan ka en vat a, min lo en kar chu niin a la nui reng bawk, "Teuh lo mai, a ni pawn ṭhian kan ni a tia lawm" ka lo ti bah nawk nawk a, U Bebeti chu a lo nui hawk hawk a, "Awle Awle" a ti bawk a, ka thusawi chu a ring lo niin a lang.






Ka thil ngaihtuah chu thlak tum in ka ngawi ta ran a, ka thil theihnghilh zawng zawng chu ngaihtuah chhuah leh vek tum in ka melh ngai melh in ka ngaihtuah lêt a, mah se engmah ka hrechhuak thei lo, ka lu chu a rawn na ut ut a, engtin emaw hian ka awm muai muai ni hian ka hria, "Awi Duati i ṭha em? Muanpui, Duati hnar hi a thi a nia" U Bebeti chuan a ti deuh chûl a, au tawh lo tur a hrilh tum in min rawn vawnna ban chu ka vuan a, mah se Zomuanpuia chu a rawn thleng fel der tawh, "I ṭha em? Nurse kan ko a nge" tiin ka biang tawn tawn ah a rawn vuan a, kal nghal mai chu a tum a, mah se ka lo vuan bet vat.







"Ka ṭha e, thil ka lo ngaihtuah nasa deuh a, chuvang a niang" ka tih chuan Zomuanpuia chuan "Engmah ngaihtuah tawh suh i hun kal tawh te kha i tân ṭangkai pakhat mah a awm lo, i tawhsual tawh khan i taksa ah eng ang chiahin nge nghawng a neih pawh kan hriat loh hi" tiin min vin tuar a, ṭi dai chuan ka lo en a, ka thin chu a phu deuh dawt dawt bawk.







"Zomuanpui, i a em ni? A hlauhthâwn em kha i hmu lovem ni?" tiin U Bebeti chuan Zomuanpuia chu a lo hau vat a, ka bul aṭang chuan a nam sawn a, Zomuanpuia chu thaw deuh hawk in a hmai a ruai puat a, Cabin chu a chhuahsan ta daih a, a mah rawn lam tur a hmeichhe rawn kal khan a ûm zui ve nghal bawk.








"Tih sual ka nei em ni?" tiin U Bebeti chu ka en a, a lu a lo thing mat mat a, "A hlauthâwng lutuk a nih kha, a ngaihtuah vang che in, bakah nangmah kha in nawr lui tawh lo la, i thluak kha chu a kal dan dan khan kal tîr tawp rawh, lo nawr lui ve lo la, i taksa hriselna khan a tuar phah thei bawk a nia" tiin zaidam deuh chuan min hrilh a, bu deuh nghat in ka lo nuih ta ringawt a.







"U Bebet i fel eee, kan in hriatna a rei tawh em?" ka ti leh phawng a, a lo nui leh hawk hawk, nuih hi a duh ve chiang a lawm, "I damlo ka enkawl che hi kan vawikhat in hriatna" a ti a, âng phiau in ka lo bu nghat nghat ringawt, "Kan khua a ka haw theih hunah chuan kan rual in lo kal ve rawh aw" ka ti leh a, U Bebeti chuan "Awle tehreng mai, kan haw ho vek ang chu le" a ti ve mai a.


~~~~~~~~~~~~~~~~~~~~~~~~~~~~~~


"Doctor in a rawn check leh che ang a i dinhmun a zir in kan chhuak thei tawh ang" chaw ei mawlh mawlh chungin a ti a, ka ei ve peih lem loh vangin ka lo en tawp ringawt, "I ei peih lo tak tak em?" min ngaihtuah hmel taka a rawn tih leh ṭhin chuan ka nuih a lo za a, mah se kawngka aṭanga Zomuanpuia a rawn lut kan hmuh rual chuan U Bebeti'n ka plate tur a a dawh sa chu min rawn pe nghal sawk sawk a, keipawh chuan ka lo ban vat a, ei ang deuh chuan ka lo awm, mah se Zomuanpuia lungawi lo hmel chu kan hmachhawn ta tho.







"Chaw i ei peih lo leh em ni?" a ti hmuk a, ka lo chu ka lo bu nghat nghat, "Enkawl pawh i ngaih tawh hmel loh, i duh dan dan in i awm tho a" a rawn ti kher a, chhan chu ka chhang lem lo a, ka ngei ve deuh a thinchhe lutuk hi a ninawm hmelṭha viau mah se.






"Engnge i ngaihtuah" a tih laiin Doctor chu min en tûrin a rawn kal a, ka bp te a ṭha vêk tih la report a a hmuh chuan keimah chu min en chiang leh a, ka chhuah theih tawh thu chu a sawi ve ta hram a, mah se kar tawp apiang a in check up tur a kal tûrin tun thla chhûng min ti thung, Doctor chhuah veleh Zomuanpuia chuan "Motor ka lo keng a, in siam fel ila kan haw nghal thei e" tlêm a nem deuh chuan a ti ve ta a, U Bebeti nen chuan kan in melh deuh zawk a, Zomuanpuia chuan paper bag hi min rawn pe leh a, a khai lai pawh ka lo hmu lo, "Engnge a?" en pawh en lo chuan ka ti a, Zomuanpuia chuan "Thawmhnaw a nih kha in thlâk rawh" a ti a, Cabin chu a chhuah san a, mah se kawngka bulah a ding tih erawh ka hria.






"A thinchhe eee" tiin U Bebeti chu ka en a, "Engnge a awmzia ni, hetianga a awm hi ka la hre ngai lo" tiin kawngka chu a en phei ve a, "Min ngei a niang" ka lo tih chuan "A a suh" a lo ti vat a, kan in en a, kan nui dun hak hak, tûnah chuan keimah pawh ka châk ve leh deuh tawh in ka hria, kal erawh ka la harsat deuh thung vangin Wheelchair in min nawr chhuak a, ka ke a la khurh der der vang a ni.






"Muanpui, keichu dawrah min drop nghal mai rawh aw bungraw lo thleng a dik lo an tia, en dik sak an ngai a" a ti a, a bu nghut ringawt, a bulah chuan ka ṭhu ngawt ve reng a, car a her kualna a ban thau chhe awm miah lo a, sek phiar fat mai chu ka en reng a, a nalh ka ti takzet, ka rilru dik lo lutuk chu kei pawh in zahpui hial, chiang takin ṭhian kan nih thu min hrilh kha a ni si a.







Zomuanpuia's P.O.V






Patea te in kan thlen chuan kawngka bulah min lo nghak ṭhap a, bungrua vel chu an lo la nghal vat vat hlawm a, Wheelchair a awm tawh bawk si lo nen Ngaihdami chu Car aṭangin ka pawm chhuak a, a lo meng deuh kawk chu ka hmu a, ka nui ringawt.






Chhunzawm leh tur.