HLUSANGZUALI CHAPTER 19 BY REBEC COLNEY

[Rebec Felix]

HLUSANGZUALI







CHAPTER -19







Rinsawmpuia







In ka thlen veleh ka chhungte pawh be lo in ka pindan ka pan tlang nghal ,zanin zet zawng mipa pawh ka pa zo meuh lo chu a nih kha ,min auh lawm lawm na ri kha ka beng ah chiang tak in a cham a , hre reng mah i la mipa tih a mawi lo in ka hrelo der lui tlat , ka hawi let leh chuan tha tak in ka kal tir thei lo ang tih ka hlauh vang a hawilet duh lo ka ni .







Min hnar hlawm tawp bik lo tih chu a mitmeng leh che zia atang in ka hre thei , mahse kan in kawp tirh lai ang khan ka lak ah a thlamuang thei tawh dawn in ka hre lo a,keimah avang a hlauthawng reng reng a nun hman tir lah ka duh hek lo.





Thutlukna atthlak zet ka siam avangin ka hmeichhe hmangaih rilru na in ka siam tih ka in hai lo, kum tam liam tawh mahse keimah a inthiam loh na nasa tak awm te erawh in tlem te tal pawn kian zai an rel thei lo.





Inchhir sawt tawh lo mahse ka damchhng hian in chhir reng reng in hun ka hmang dawn ta chu a nih hi .





Bang ngheng dawt in ka chhing a, hun liam tawh hnu chu ka mitthla ah nimin ang mai a chiang im an lo lang zut zut





Pastor nih tum a zir mek , chantawk a lungawi em em ka ni thin , ka bialnu hmun hla tak ah hna thawk mahse ka ring tawk a , harsatna leh buaina kan tawk lo ....Mahse mihring hian kan hma lam hun ah eng nge kan tawh dawn tih kan hre lawk si lo.





Krismas a hnaih tawh avang in kan thil zir pawh kan chawl lai lawk tawh a , Duhnoi awm lo.mahse ka thiante nen hmang ho in nuam kan ti thin viau a, Duhnoi nen pawh kan inbe awl lo bawk ,hmun dang ah chhungte bul lo a an hmang kha ka lainat in ka khawngaih thin hle .





Ka hmeichhe hriat tawh ah chuan a tuarchhel in ,a huaisen em em a , a chhungkaw tan a hun tha zawng zawng pawh khawhral a ui hek lo.



.

Ka hmangaih leh lainat em avang in ka thil zir ah pawh tumna tak tak nen ka bei a, zir chhuah vat a,nupui ah sawm a, nun nuam tak chen tir tluk a chak leh duhthusam ka nei ngai lo .





Reilote chhung lek in ka duhthusam te chu an tham ral ta si , krismas leh kumthar kan hmang zo aizawl lam ah chhuk leh in , hostel luh a la hun loh avang in ka pu te in ah ka awm hrih a , motor chuan na ka chau nen Duhnoi pawh ka be hrih lo , tun ah bia pawh ni ila hna a thawh lai a nih vang in a en hman chuang in ka ring lo,.





Zanriah ei hma thleng chu ka mu ta nghek , ka motor chuan na ka lu ni deuh luk pawh a zia hawk tawh.







Ka pu inkhawm tur chu biakin a hlat tham deuh avang in scooty in ka thlah a ,tar chaklo a ni tawh nachung in inkhawm hi a ngai pawimawh em em a ,ke a kal hah a zo lutuk tawh lo nen motor emaw scooty in kan thlah mai thin,ka inkhalh let leh lam chu ka pu ka phur ta lo bawk a , kal lam ai a chak in ka khalh a , chu tih lai chuan min sul pel zawnga bike chak deuh rawn tlan in ,a side loh lam ah a rawn tlan avangin kei ma tan lo in sa seng na hman awm tawh si lo ,kan in su ta bur , kawngpui thlang lam ah chuan scooty nen chuan kan tleng thla tih bak ka hre zawm tawh lo .





Ka harh leh chuan damdawiin khum ah ka lo mu reng , ka ban leh ka ke chu a intuam var luk a , ka chhungte ho in min lo bial thap bawk.Ka nu hlauthawng phei chu a in sut ri leh hraih thin .Thil thleng kha chiang lo ruai in tlem tlem chauh ka ngaihtuah chhuak thei.





"Ka insut pui pa kha a tha em , " ti a ka zawh chuan ,ka pa in dam dup in "hliam neuh neuh chu a nei ve , mahse a na lutuk lo ni in ka hria , a chhungte ho pawh rawn kal in ngaihdam te min rawn dil a ,keini lam pawn eng mah sawi buai nei lem lo in kan lo ngaidam mai , an in thiamlo khawp a , an khawngaih thlak zawk , " a ti mai a





Pa tha ngang a ni bawk a,a tir in thinrim ve viau mahse sawi buai a ,case a lak tih lampang phei chu tul a tih ka ring lo a, a fapa min hmangaih loh vang lam ni lo in,tu pawh in thil ti sual thei kan ni tih hre chiangtu a ni a, he lei a ngaihdamna hlu tak kan pek chhuah theih tluk a Pathian kawng kan hnaih na a awm kher lo ang a ti thin.





Ka hliam dang ten dam lam an pan tawh lai in ka ke erawh a che hlei thei meuh lo, khum bet a han awm reng mai chu nin chang ka ngah , tihtheih erawh ka nei tlem hle thung si ,ka tihtheih chhun Pathian hnen a dilna thlen erawh ka hmaih ngai lo.





Harsatna a lo thlen chang a Pathian dem mai ching mi nih ka duh lo a , ka rilru kalsual tur pawh theihtawp a thunun ka tum thin .





Ka chhungten min lainat hmel tak a doctor nen an inbiakna min hrilh chuan ka mittui ka khap per ve sak , a hma zawng a dam tha reng , duh duh a vak kual thei , mihring a zawng a hrisel ber ni thin kha ka kal theih mai an rin loh thu min han hrilh hriat zet zawng , intih pachan a va har talh talh tak.





Rilru mumal pu thei lo in ka awm a, Duhnoi pawh ka be ngai lo , ka hma chhawp ten kian zai an rel a ,ka suangtuahna te puitlin theih a ni dawn ta lo.





Pastor nih ka tum na pawh ka bansan a tul a , chhungte puih ngai reng tawh tur han nih mai chu pawm thiam a har takzet, ka nu lungchhe insum zolo pawh in min tah khum chiam , a fapa a innghahna tak meuh meuh ka ni tih hai tur khawp a mi mawl ka ni si lo , ka pa erawh mipa a ni a , ka nu ang in a lungngaihna tah chhuah pui lo mahse a na hle tih ka hai bik lo.





Rilru fim tak hmanga thil ngaihtuah a har a , Duhnoi ka ngaihtuah na ah a cham reng bawk , ka thil tawn te hi hria se , min khawngaih in a rilru a na dawn tih ka hria , mi fel leh mi tha tak a ni a, pasal a min neih a min enkawl pawh a zuam ngei ang mahse keimah avang a a hma hun a tih chhiat ka duh lo a , a chhungte a enkawl a ngai a ,ka kiang a rethei leh rilru hah reng reng a hun hmang tur in ka duh hek lo.





Harsa ti tak chungin dawt ka hrilh a , kan inkar ka titawp ta bawk , ka vannei nge ka vanduai ka ti dawn , ka damdawiin awmna hi Babyi thawhna a ni a , a remchang nen Babyi chu hmanrua ah ka hmang ta a ni ...





Ka tihchhan engkim hrilh loh mah ila , "kan inngaihzawn lai a ka phatsan avanga ka ngaihdam dilna ah che i ngai dawn a nia "ti in ka ruahmanna chu pawm in min pui ta kha a nia .





Ka duh ang ngei in thil chu a thleng ta reng , mahse Hlusangzuali be lo a awm te chu ka tan thil na mai a ni lo , nitin ka ngai zual a, inlamlet duh chang nei mah ila " nun nuam tak tawng tur in ,a hlawhtlin theih nan a lawm i kal tir ,nang chu buaipui ngai reng tur leh chhawm dawl ngai tur mihring i nih tawh hi "ti in keimah leh keimah ka infuih ru mawlh mawlh thin







Damdawi in kan chhuah hnu ah kan khaw lam ah let in hun ka hmang zui ta a , nupui nei tawh tur a ka than miau avang in ka thianten thil awmzia min zawh pawh in chhanna ka pe ngai lo ,Duhnoi an lainat avang in min biak that duh loh chang pawh an nei a ,a bik in Hmingi leh Zikpuii te ,an awmdan chu awm ka ti a , min dem viau pawh nise sawi buai ka tum ngai lo.





Hun a liam a ,wheelchair ah thu in nitin ni ka hmang liam ve zel ,nupui ka neih leh tak mai lo ah chuan ka thiante nen pawh kan in be tha leh vek tawh ,Hlusangzuali chanchin min sawipui tum a an rawn len chang erawh in ka tuang ti chhah lui in chhanna an duh ang ka pe ngai lo thung.







A kum a kum an vei leh hnu ah chuan that lam ka pan ve ta zel , wheelchair hman ngai lo in tiang hawl in ka kal thei tan a , kohhran lam ah ka theih ang ang in ka inhmang leh tawh , vanneihthlak deuh in kan khaw English school ah Principal nihna dinhmun chelh in ka awm ta a , ka nun pawn hmasawn na lam a pan ve leh tawh .





Matei theihngilh ni ka nei lo a , kan khua a awm chung hian a lo haw hun ka la nghak reng a , Mahse ,Zikpuii hnen atang a bialpa a neih thu ka hriat tak ah chuan rilru na tak chumg si in pawmthiam dan ka zir leh a ,ka kaltir hmasak a nih avang in amah demna ka nei hek lo .





Khuanu ruat kan nih chuan kan la inhmu leh ang a , daltu awmlo a kan inkawp leh ngei ka ring ,kan lo ni ta lo a nih pawn rilru dam tak a pawmthiam tur in ka rilru ka siam sauh sauh thin.





.......







Tun ah erawh awmdun tur a ruat kan ni lo ang a ka ngai nghet hmiah tawh .





"Mama tho tawh rawh , sikul i tlai a nge " ti a ka pindan kawngkhar beng a ka nu a rawn auh tak ah chuan mit kham tun chung in ka tho chhuak a ,nizan ah engtik lai in nge ka mutthilh ka hre lo , dar 1 a rik pawn ka la muhil lo tih erawh ka chiang .





Pindan atang a ka chhuah rual in"Nidang ah tiang chen chen i mu ngai mang si lo"a lo ti a,a sawi dik reng bawk zing dang ah te chuan dar 6 leh chanve rik hma in ka tho ziah a, pawn ah boruak tha dawn pah in ka ke ka sawi zawi thin ,tiang hawl lo pawn in buaina ka nei tawh lo a, ka bike khalh chhuah erawh ka nu in a la phallo bur .





Ka nau nen eirawng an bawl a , ka pa erawh chhim veng lamah chem chher tir tur in a kal thung, buh hmun nei lo mah ila huan hnai ah zawngtah leh thingthupui huan kan nei a ,antam leh thlai dang eng emaw ching in ka nu nen hian an chhuak nitin ve thin .A hmun sam fai a ngaih chin ah erawh hlawh fa kan la mai thin.





"I pa chu a va thangrei leh ang, i nau nen khan chaw ei ula in tlai ang "ti in chaw ei chu min siam sak nghal zung zung .





" U , U Matei bialpa kha i hmu ve tawh em "Nautei chaw ei chu ka melh run, Matei nau nen an inkawm thin a , Hlusangzuali nen kan chungchang hi an sawi dun ve thin ni awm a ni, eng eng emaw min zawh leh khut chang a nei thin.







" Eng atan nge i tih ''





"Peki'n a hmeltha a tia mahse maw ,nangmah hmeltha a tih zawk thu che a sawi a "a ti niah niah chu ka kiai suk .





Peki hian min nel a, , a u chanchin min hrilh hriat a hrat a, a u awmbo lai pawh in ka zawh ngai miah lo in a chanchin min hrilh a, nghaihven lo ang tak in chhang liam puat thin mah ila , a chanchin ka hriat ringawt pawh in ka hlim na tawk a tling viau thin .







"Chaw kha ei vat rawh,i tlai a nge " ka tihsan ta daih , Hlusangzuali nen hi chuan inlaichinna thar kan siam leh thei in ka ring tawh lo , nizan atang khan a chiang mai awm e.A mah hmangaih tu leh hna tha tak chelh bialpa a nei tawh a , lo inrawlh chhen ka tum buai tawh lo .





Ka tih chi ni vak lo a ka ngaih leh ka tuina pawh ni ngailo zirtirtu kan ni ve ta mai chu a ni a , rinai tak in ka tui viau tawh thung , Pastor nih tum a zir leh lam ka rilru ah awm pha tawh meuh lo.





Sikul ka thlen chuan naupang kawt zawl a infiam ho in min lo wish sap sap hlawm , kohhran sikul a nih avang hian naupangte enkawlna leh inkaihhruaina lam ah pawh kan khauh ve khawp a , a tam thei ang ber Pathian thu hrilh nan kan hmang bawk thin .





"Vawiin chu nang ang lo tak in i tlai reuh hle mai " Pi Chhuani chuan a lo ti a, thawh ka hai thu leh ka mut a la chhuah thu ka sawi chuan nui hak in "A lawmawm ah ngai ang , thlamuang deuh a kan mu thei te hi Pathian malsawmna , mi thenkhat taksa na nei si lo rilru lam natna nei ,mutthilh duh si muhil thei lo an tam hi "a ti var a, a thil sawi chuan ngaihtuah a ti thui duh hle mai.





Tunlai ah phei chuan rilru damlohna depression ,anxiety kan tih te a hluar hle a , hre chiang mang hlei lo in ,awm awl lutuk vang te kan intih sak mai mai a ,chutiang ngawt ni in ka hre lo , kan chung a harsatna thleng kan hmachhawn dan a inang lo a thenkhat tan a ho deuh ni si kha , thenkhat tan nat pui ngawih ngawih theih tur thil a lo ni daih thei ,depression a neih vang a va hmuh mak ringawt te hi kan sim a tha , kan mihring pui te hriatthiam na kan neih loh chuan nun hlim na tawng buak a har .







Chawhma lam chu class pangngai in kan kal pui a chawhnu lam erawh naupang ho in game an rawn sawi chhen avang in kan game pui ta ngei a, naupang ho in nuam an ti khawp mai





Zan lam ah Chhana te in ah ka leng phei a ,nupui a nei tawh bawk nen a hma ang tak tak a inkawm a har tawh ,





" Thianpa , eng nge in chanchin ni zel ta,inkawp that leh lam in awn theih hmel em "ti a min zawh chuan lu thing nghut in" nizan khan ka thlah liam fel tawh "ka ti nghut , an in chung ah thu dun in thingpui kan in a , ka thil sawi chu mak a tih hmel ngang mai.





" Thiana ,i beidawng hma deuh lo maw "a ti leh , Hlusangzuali ka hmangaih zia a hria a , ti mai a ka kal tir leh mai si hi mak a ti nih pawn a demawm hran lo .





" Mi pahnih inkar a lo inrawlh ve chhen zawng , a nunrawn thlak "ka ti mai a , nizan ah kalsan tur in rilru ka siam fel vek tawh chung in, ka thinlung ah erawh a la khat liam tha ngang mai ,chu erawh ka tihlan a rem tawh lo .





Ka hmangaih him tak a awm nan ka thlah liam fel tawh , mipa tak in ka thutiam ah ding ngheh ngei pawh ka tum ...





Ka ban puam lai tak chu rawn hnek dawt in " a nih a hnu , Doroi hi i nunah lak luh tum rawh , ti khawp hian i chung a a rilru puthmang a tilang tawh a ,keini i thiante pawn kan hai lo , Matei bansan i tum ta ro ro , a thlaktu atan Doroi hi a tha ber ang,a hmeltha a, a fel a ,reilo ah i duh chawp ve mai lo ang tih pawh a sawi theih loh "ti in a nui a, chhanna ka pelo thung





A sawi dik erawh ka ti viau, kum in upat lam a pan zel a ,nupui neih hmabak mai tur ka ni dawn, ka nu phei chuan nupui nei tur in min tur tan der tawh, ka nupui tur a ka suangtuah thin ber nen kan inkar ah eng thil mah a awm thei tawh ngai dawn loh avang in hmalam pan a ke ka pen chu a hun tawh lutuk tlat.







Kohhran in a lo rel tawh ang in biakin sak that lam kan awn tan a,kan biak in sakna atan KTP ho pawh biakin ah hnatlang tur in kan chhuak khawm luih luih thin, vawiin pawh hnatlang an ko leh a , inrinni a nih avang in keipawh ka thawk hman ve dawn , sikul kan kal ni ah erawh ka thawk chhuak hman ve thin lo a ,kal loh ni erawh in ka tel ve ziah thung .







HLUSANGZUALI









Hnatlang tur in ka insiam a , ka nau te an awm dawn tho a ka nu chhuah san pawh ka hreh lutuk lo , ka nu pawh a dam tha ve zel a , khum erawh a la thawh chhuah san meuhlo .





Ka ni pawh ka be fel tawh a ,aizawl lam ah chhuk tur in min duh tawh viau mahse ka nu heti hi a ni si a, min rawn ti lui em bik lo .





Abul ah pawh tha deuh in " ka nu damlo rawn chhuk san leh ngawt chu a ni thei in ka hre lo ,ka nau te enkawl a ngai a , a ni lah a chak tawh lutuk lo nen ,eng tin nge maw ni dawn ni "ti in ka rawn pah deuh a , ka naute leh ka nu ringawt han kalsan leh chu tih chi in ka hre tawh lo , tun ah lah ka nu che thei mang lo in a awm leh nghal





" A va buaithlak e aw , keimah mai chuan dawr han siam leh enkawl chu ka zuam si lo, nang lah rawn chhuk tawh rawh tih ngawt chi i ni si lo , Mate dawr hawn kan tum hi kan thulh leh mai dawn em ni niang , ka sawi lang lo na chu I Pa Bda pawh hian rem a ti leh chiah lo ni in ka hria , min hnial na thu chhak chhuak lo mahse min phur pui chiam tawh lo emai, "a ti ta a , keimah vang a a thil chak a ti puitling lo tur cu ka inthiam lo ru ve khawp mai.





"Dawr luah tur te kha i be fel vek tawh bawk si a ,eng tin nge niang " ti a ka zawh chuan "kha lam kha chu lungngaih na tham a ni lo ,a man kan la inhlan lo a,chu lo ah pangngai tak a inbiak fel pawh a la awm lo, kei nin luah lo mah ila luah duh tur dang an tam a," a rawn tih leh tak ah chuan ka thaw huai , a nih chuan dawr hawn chu tum ta lo law law ila a that chu.





Kan inhnuai luah tur a siam ka ril ruk ta thung , thla tin tlem tal pawisa a lo luh chuan ,hnathawh lutuk ngai lo in kan khawsa ve naw naw thei ang, inhnuai siam lah thil har a ni dawn lo a , sum sen vak pawh a ngaih ka ring lo.





Thiani sawm thla in hnatlang tur chuan kan kal a , Simona nen kan inkar pawh ka hrilh a, ka then chhan ber erawh ka sawi lang duh lo thung ,Simona sawi hi chuan keimah ka inthiam lo nghal ngawih ngawih thin , khati khawp khan min buaipui a ,kei lah in na theihtawp in ka siam thung si , ka lak ah engthil pawh ti se , dem thei ka ni lo thil tisualtu ka ni miau .









Kha zan Rinsawmpuia men kan inbiak zan atang khan kan la inhmu leh miah lo a, phone atang biak tum ut ut chang nei mah ila ka la insum thei hram hram .





A ni pawh a reh ta hmak kha a nia ,mipa ngang a ni a ,kei ang in a rilru tibuai tu atan a hman ve ka ring lo ,





Hmingi dawr nghah a ngaih avang in a ni chu a hnatlang hman ve dawn lo a,hmeichhe ho in rawra kan chhu a ,mipa erawh an thawk kual duah thung .





Doroi chuan "Ka pa hmun dang a an sawn chhuah leh hun ah pawh ,in khua a awm reng mai hi ka duh , "a ti a , kan khua nuam a tih zia a sawi zui leh siam siam a, hmun dang a pem kual reng ninawm a tih thu a zep tel zeuh bawk.





Apa pastor a ni a, awmna ngai rengah awm theih ngawt a ni si lo , hmun dang dang ah an sawn kual reng nen,pastor nupui leh fate tan hian ninawm ve deuh tur chu a ni.





" Chuti chu,kan khua ah awm reng i duh a nih chuan , kan khaw tlangval pasal ah i neih mai a ngai dawn nih chu "Thiani'n a ti a , kei pawh in ka lo sawi zawm zat bawk.





Nui ar ar chung hian" duh deuh bik te i nei tawh em , hma kan la tan nghal ang chu " a tih zawm leh ,





" In ho e mai ,"ti hliai in Doroi chuan a hnung lam a hawi a, a kut a vai lauh lauh mai , a hawina lam ka hawi ve chu Rinsawmpuia nen kan inmelh fu nghal chat , kha zan kan inbiak hnu a kan inhmuh leh na hmasa ber a ni a , ka zam ru tlat pek , a ni erawh a lang pangngai viau thung .







A hnathawh thawmhnaw hak chu a taksa phiar lam mah a ni a, a lang lian zual khawp ,ni sa hnuai ah an thawk bawk a ,a hmai chu a sen deuh tul a, a nghawng ah puan te a awrh a , a thlan tla hruk na tur a nih ka ring .





" In va chhu hnem tawh ve ,Doroi hah tawh em "rawn ti in kan bul ah an rawn thu thla a , rawra chhu kan ni bawk a ,a bengchheng viau , tlem a tawng ring loh chuan tawng pawh hriat a har





Doroi a rawn ti bik kher chu ka lo la na deuh nge ni min ti hnual nghal rawih thei .





" Hah lo e , in thiar thla zo tawh em ni "a lo ti let vat , mipa thenkhat in rawra an chhut ve lai in,a then in cement an thiar thla a, kan thil ei tur lo siam pawl an awm bawk, kan insem zai thiam khawp mai.







"Aw zo, a thiar thlak na a thui lo a , tih a sawt khawp mai " a ti mai a , ka lo melh leh thin , mahse a ni erawh in nichin a kan inmelh fuh bak kha chu min la melh nawn miah lo .







"Mate ,i nu chu a tha zel maw" Chhana min zawh na chu tha deuh in ka chhang a , a that tawh thu leh zia awm lam a pan zel thu ka sawi chuan "a lawm awm a nih chu , rawn tlawh leh tum reng in ka awm a, hun ka nei thei si lo a,hman remchang veleh ka rawn la tlawh leh ang " ti in kan thianho a lui kal a chak tawh thu a sawi zawm a.





Thiani chuan "awi kei pawh ka chak tawh , karleh lam hi tin zawn chhin ila , Rinsawm nang i ke kha lui i kal pui ngam tawh a ngem " a ti a , a phur zia chu a hmel ah a lang vek.





"Kalpui ngam loh thu awm hlei nem ,a chakawm tawh ngawt zawk a lawm,chu lo ah min veng tu tur a awm , hlauhthawn awmloh 'ti in mawi ka tih thin dan deuh in a nui a , an pahnih in chhaih zui chu en reng peih lo in ,chhuan lam siam in ka kal sawn ta hrih .





Lung an dah sa kan chhu zo tawh a ,nimin lam ah pavalai ho hnatlang in an chhu ve a , nimin lam a an tih zawh loh keinin vaawiin lam ah kan tih zawm lwh a ni a , lung lak sa a tam tawh lo nen beisei ai daih in kan zo hma ta a ni ,





Ka kut paw phuk ka sil fai hnu ah tui in tur in cooler awmna lam pan in ka phei a,ka bul ah Hlutei rawn ding ve in min nuih a





" Mipa hi chu an mak ti raw " a rawn ti teh ngawt , hrethiam lo zet a ka en chu Rinsawma leh Doroi te nui dun lam min kawh hmuh in a nui leh suk .





"Engti zawngin maw, mipa chauh hi mak bik an ni hlei nem hmeichhia pawh hi kan mak thei ngawt a sin" ka ti liam puat , min melh in an ner nung a ,hun a liam hnem tawh tawh nen a hmel chauh a thlak danglam a nih hi , a hma a a rilru kawi zet ang kha a la pu reng .





"Hun liam ta thil ngaihtuah la , in nih that lai ngei ngei in Babyi vang in a then che a,in nei tur thang in a sin an than hial,mahse Pastor thar kan khua in kan neih hnu lawk ah ,ti hian a fanu nen sawi zawm an ni leh a , Rinsawmpuia hi ka rin ang mipa a lo ni miah lo " a ti ta chiam , an thinrim hmel em em leh nghal a , lo thinrim ringawt na chhan tur a neih loh teh reng nen hian aw .





A chhan ber a ka hriat tak chu, Rinsawma a duh si ,tun hma atang reng in Rinsawma lah in a lam a awn ngai si lo , chu a la na in tlawm thlak a ti ni mai in ka hria , lehlam kawng zawng tak ah chuan a khawngaihthlak zawk.





"Chutiang lam ngaihtuah lo in , pasal tur tha deuh zawng daih rawh , senior lam kan hnaih tawh hi " nui chung a ti in ka kal sawn san ta daih , min ngei leh ngawt in a nia ka rin.





Kum tam a vei hnu pawn danglam na hmuh tur a la awm lo a nih kha , a mak ngawt mai mi nun itsik reng reng a hun hman ral mai chu , a hahthlak ngawt ta ve ang ,a hrisel loh em em chhan te hi a nih ka ring ta .





Rilru lam a hrisel miau loh chuan taksa pawh hian tuar chin a nei nge nge thin.





Rinsawmpuia leh Doroi nui dun leh hlim tak a an infiam vel te kha hmuh hrehawm ka ti ve tho ,mahse Hlutei ang a mi bul a an chanchin chhiatna sawi a ,va rel tum tal ang erawh ka tih ngai loh tur te zing a mi a ni.







Doroi mitmenga duhna langchhuak kha ka hmeichhiat pui a nih na ang in ka hmu thiam a , Rinsawmpuian eng rilru nge a put ve tih erawh ka hre lo thung ,an lo induh tawn a nih chuan in rawlh buai ka tum lo a , tha deuh a enliam mai kha ka duh dan a ni .







Hringnun ah hian kan lungngai reng lo a , kan hlim reng bawk lo , tun ah lo na mah ila , chu natna chuan dam hun a nei dawn ,harsatna tawk in nun thlakhlelh na chang hre tawh lo mihring pawh lo ni ila , kan harsatna te khan kian hun a nei dawn ,hnehna nun nei tu ka nih hun tur suangtuang chung a kal zel in ka natna te inhmeh chi mit tir tum lo tur in ka infuih mawlh mawlh reng thin ang.











































"