THE HEIRESS Chapter - 7

[Bethseby Nu Pachuau]

The Heiress




Chapter - 7





Kawng a nawm mai bakah a hlat lutuk loh avang chuan reilote ah camping na hmun tur chu kan thleng thuai a.A hmun chu a nuam in sava leh rannung hram thawm te chuan min ti hahdam tak zet!





"Hey hmeichhia,kan chawlh hahdam chhungin kan chhun chaw tur va siam rawh"





Engtik lai pawh in hna hian min bawm reng mai anih hi second reilote chhung pawh hahdam na hun awm thei reng reng lo!





"Master Nick,hei hi i tan liau liau a ka sangha hem hmin sak che a nia...Khawngaihin han ei chhin teh" hmeichhe pakhat hian ka bul mai lounge chair a hahdam zet a mu Nick chu a nuih sen sen a.





"Sangha ka ngai na lo,kal bo rawh" Chu nula zak leh hrehawm ti hmel chu ka lo en reng a.He pa nungchang mawi hriat loh zia hi aw...





Ka hrethiam thei lo a ni!Eng vanga he mihring Nick O'Connel te ang mipa chapo leh mahni inchhuang lutuk mi hi hmeichhe ho hian an atchilh theih zawk?A nih na dik tak hi hmu ve hlawm ngat se chuan tumah hian an duh theih ka ring lo!





"Pute u in ei tur chu ka peih tawh e..."





"Wow,Sangha hem hmin maw?A rim tui tak zet" an ei tur ka pek lai chuan hlim deuh hian anlo ti sap sap a.





"Aw ni chiah e...Tui ti tak khan in ei dawn nia" kal mai ka tum lai chuan "Khawnge ka ta ve tur"Nick chuan a rawn ti pawr nghal hlur a.





" Oh Master Nick,Min bia em ni?"





"Khawnge ka sangha hem hmin ve tur chu?"





"Nichin khan sangha hem hmin I ngainat loh thu I sawi sia,ka siam ve duh ta lo che anih kha...Ka kal phawt ange,mamawh dang I nei anih chuan min lo hriattir leh mai dawn nia" amah ngaihsak lo deuh chuan ka ti liam puat a.A lungawi loh hmel kher mai!A ruk a nui tut tut chung chuan ka kalsan ta daih a.





Khua a lum bawk nen lui a inchiah dai tur a ka kal lai chuan kawngah hian rul sei deuh mai hi a lo inkual ruih a.Chu rul lah chuan lei chhuah zuk zuk chung hian min la en run zui..Mangang zet hian ka au ta chul a.





Vanneihthlak deuh in ka awmna bul hnai ah chuan Nick chu a lokal hlauh a."Young Master,min tanpui hram teh!" Ka lo ti nghal thuai a.





Ka thusawi hre lo der hmak a kal leh mai a tum rual chuan "Nick O" Connel min tanpui hram teh"ka ti vin leh that a.





"Oh min bia em ni?Kei ang mi te chu I be duh lo emaw ka tia" ngeiawm deuh hian a kiai suk a.





"Nang mi tenawm...Chutiang sawi hun pawh anih loh hi...He rul hi lo la sawn hram teh"





"Ka thusawi I awih phawt loh chuan ka tanpui lo ang che...A nih min be duh lo leh angem?"





"Ai...ai.."





"A nih ti tur a ka tih apiang che I ti tawh angem?"





"Aw...aw...Ka ti vek ang!Khatia min be khawmuang reng lo khan he rul hi rawn la sawn vat teh" ka ti nghal chul a.





Chutah Nick chuan chu rul chu rawn pir sawn lawp in a that zui nghal a.Nick an chu rul a thah zawh rual chuan ka lo thaw huai thei!"My God,tlem a tlem ah ka thi lo chauh alawm le!"





Zanah chuan meipui chhep alh hluah in thlahrang thawnthu te kan sawi a,a dawi fal deuh ho chu a khat tawk hian kan te leh thawt thin a.





"Awle tunah gut competition kan nei tawh ang.Thum vawrin kan teammate tur te kan thlang dawn a ni.Mahse team khatah mi pahnih bak in awm thei lo ang.Chu in teammate te nen chuan minute nga chhung zinkawng in zawh dun dawn a ni!Chuan he lai hmun a kan let leh hunah kan thil tawn te kan in share ho dawn nia." Kan hotupa in a tih rual chuan phur deuh hian kut kan beng nghal dar dar a.





Ka phur ve tehreng nen Lia min haw em em tu nen a teammate kan ni dawn tih ka hriat rual chuan ka hnual nghal rawih thei.He nu chapo leh in tivei deuh nen ber kher,vanduaithlak hian!





"Ka ring thei lo ani!Nang nen teammate kan ni hi!" Ramhnuai lam pan a kan kal lai in Lia chuan a ti teu hlar a.





"Ka duh bik I ring em ni?" Ka lo ti let ve sak a.





Chutia kan tawng dun mawlh mawlh lai in kan bul lawkah chuan thawm ri sun sun hi kan hria a.Kan inmelh nghal vat a.





"Chu eng thawm nge ni" ka lo ti thuai a.





"Eng thawm pawh chu lo nise,I hlau em ni?"





"Nang zawk" hlau ru deuh chung hian ka ti ta daih a.





"Eng vang chuan nge ka hlauh ngawt ang" chapo deuh hian a rawn ti deuh kher a.A sawi zawh rual in kan bul mai hnim buk kar atang chuan ramsa hram thawm hi kan hre ta mai!Hlau zet chuan kan tlan chhe ta chul a.





Thui fe kan tlan hnu chuan "I hlau lo emaw ka tia" thaw hlawp hlawp chung hian ka ti leh hram a.





"Ka tih loh kha"





"I tih reng kha"





"Nang mi zak thei lo nu,nangmah anih kha ka hlau ti tu chu" tih leh ka awm a rawn nam chu a rual nghal a.Kan awm na lah chu a lo awih deuh bawk nen thlang lam kham ah chuan tla in vanneihthlak deuh hian hrui ah chuan ka uai tang hman hlauh a.





"Lia min rawn tanpui hram teh" mangang zet hian ka kut lehlam chu ka phar chhuak tawk tawk a.Lia lah chu rilru buai hmel deuh a min rawn en vung vung chung chuan milim ang maiin a ding ngawi ta reng a.Chutah muang chang hian a kut chu a rawn phar chhuak a.Mahse min rawn vawn hma in khamah chuan ka tla thla ta vawn vawn a.Mahse vanneihthlak deuh hian lei vung ah chuan tla in ka in sawh na lo hlauh a.





Nikhaw hre lo in ka lo awm ani ngei ang!Muang chang in ka awm na hmun thim tak atang chuan taksa sil thum hian ka tho chhuak tuih tuih a.Ka tlak na lamah ka ke ka lo tina hman nge a la na em em zui!Thui pawh kal hleithei lo in lei ah chuan ka thu bawk sawp nuai a.A dawih mi ka lo ni bawk nen ka awmna hmun reh leh thim zet chuan min ti thlabar tak zet!





"Ka nu,ka pa,ka ngai lutuk che u!Eng vangin nge in atang khan ka lo chhuah kher le?" Ti sep in ka mittui chu a lo luang nghal ngiai ngiai a.





Ka awm na hmun reh leh fal zetah hian tuman min rawn zawng awm silo,engtin nge ka tih tak ang!





Chutia rilru mangang deuh a ka awm lai chuan ka hming a min rawn au thawm hi ka hre ta thut a.Chutih lai a ka hlim zia chu pui tak a ni!





"Lucy khawnge I awm?"





"Heta hi ka awm" ka theih anga ring chuan ka ti ta chul a.





"Lucy,I tha em?Min ti mangang hman lutuk asin" Ka hma a mipa chuan hlauhthawn hmel deuh hian min rawn kuah nghal thlawp a.





"Aw ka tha e" a dar hlai pui a min kuah bet hlu hlu chuan ka hahdam nghal sawng sawng thei!Hlim zet chuan ka lo kuah let ve nghal vat a.





"Nick nge I nih John?Tu zawk nge maw I nih le?" Tia ka inngaihtuah buai rilruk lai tak in a coat hlai pui chu min rawn sin tir thuai a."John I ni maw?Ni e,Nick chuan eng vangin nge min rawn zawn ngawt ang" ti rilru nauh nauh chung chuan " Master John,min rawn zawn avang hian ka lawm lutuk " ka ti chhuak sep a.Reilote ah ka lu chu rawn na nghal ut ut in "Nang hmeichhia,a ni kha ka ni hauh lo" tih ri chu ka mang hriat vel ruai ruai a.





Ka harh chhuah leh meuh chuan puan in chhungah ka lo awm der tawh.Ka bula John lo thu reng chuan "I lo harh tawh maw?Enge I an?"min ngaihtuah hmel deuh hian a lo ti thuai a.





"Master John,ka tha tawh e...Min rawn zawn avang khan ka lawm lutuk!Awm lo la chuan ka ngaihtuah thui ngam lo zawk" hlim zet hian ka lo ti var a.





"Lucy,ka..." A sawi zawh hma chuan Lia chu rawn lut thutin "Lucy,I tha em?" A rawn ti nghal chul a.





"Aw ka tha...Enge hetah hian I rawn tih dawn?" Lungawi lo deuh hian ka lo ti bul hmuk a.





Ka hma ah chuan rawn thingthi thutin "Lucy,min ngaidam rawh!Ka thiam loh vek a ni" a rawn ti ta mai!





Lia te ang hmeichhe chapo leh induh lutuk miin thingthi meuh a ngaihdam min dil avang chuan mak ti zet hian ka lo en hau ringawt!Chutah rawn tho chhuak in "Thian kan ni thei angem" in thlahrun hmel deuh hian a rawn ti chhuak sap a.





"Thian maw?" Hmel ma nih reng ai te chuan thian nih chu a tha daih zawk alawm ti rilru chung chuan "Awle,tun atang chuan thian kan ni tawh dawn nia" ka sawi zawh rual in Lia chuan hlim deuh hian min rawn kuah nghal chung chung a.





"Lucy I tha deuh tawh em?" In lam pan a kan haw laiin Oliver chuan aw pangai zet hian a lo ti vei sup a.Hepa chu'h!Engtik lai mai pawh a aw vin deuh a min be reng thin tu kha a ni sia!





"Aw ka tha tawh lutuk...Kham a ka tlak lai khan vanneihthlak deuhin lei vung ah ka tla palh hlauh a.Chuvangin hliam na em em ka nei hran lo...Ti daih ila, khawnge Nick hi,tukin zing atang khan ka la hmu leh lo reng reng?"





"Nick chu nizan khan inlam ah a let tawh"John chuan a lo ti thuai a.





" Zan zan ah maw?" mak ti rilru deuh chuan ka lo ti leh sap a.





"Aw ni e...A lan dan ah chuan a mood a fuh vak lo anih hmel!A chhan pawh kan hre lo,a haw nghal hmak a"Oliver chuan ei loh hmel deuh hian a lo ti ve vat a.





Eng vanga zan zan a haw daih nge maw anih le?Ka ti rilru nghal nauh nauh a.





"A tawp ah chuan in kan thleng ta" hlim zet hian car atang chuan ka chhuk nghal vat a.





"Chawl hahdam ang che" John chuan rawn ti zui nghalin...Eagan leh Oliver te pawh chuan ka bungrua vel chu min ken sak bawk a.





In kan thlen chuan music ri bengchheng tak karah nula hmeltha leh nalh tak tak te chu thawmhnaw tawng chham zet ha hian anlo tei suau suau a.





Swimming pool sir a lounge chair ah Nick chu hahdam deuh a lo mu deng deng in hmeichhe pathum vel hian anlo din hual thap a.A champagne keng chung hian " Ka lo lawm a che u" nuam tih hmel zet hian a lo ti vei suk a.





"Hmela,swimming pool party neih i duh vang hian maw nizan zanlai ah khan chhan engmah sawi lo a I haw?Min ti mangang hman alawm"a thiante pahnih chuan vui aw deuh hian anti nghal thuai a.





" Nizan lam thil sawi pawh angaih tawh loh chu...Lo kal ula,lo intihlim ve nghal rawh u" ngaihsam zet hian a lo ti liam puat a.





"My God,he pa mai mai chu'h!Swimming pool party a neih duh vang mai hian maw a lo haw hmat daih a!Ka lo ngaihtuah ve hman em em a" thinrim lungawi lo deuh chuan ka kal tau nghal sawk sawk a.





Ka thinrim luatah kawng ka lo en lo deuh nge hmeichhe pakhat ke chu ka va rap deuh chawrh a.





"Hey hmeli,I mit a del em ni?Kawng en ve ta che" a lo ti teu nghal hlar a.





"Ka tih palh"





"Tihpalh a...Ka chanel pheikhawk hi engzah man nge I hria em ni?"





"Ka tih palh lutuk" ka taksa chau leh zawi nen henu han inhnial pui tur hian chakna pawh ka nei tawh lo!




Chutia a teu bak hlar lai chuan Eagan chu lokal in chu nu ke ah chuan a rawn rah sak veleh a.





"Hey nangpa kha ..Eng vanga min rawn rap nawn leh kher nge I nih?" Thinrim zet hian a ti vin thawt a.





"Oh,ka lo hmu lo che a" Eagan hmel a hmuh rual chuan hlauh hmel zet hian a kal sawn nghal daih a.





"Lucy,I la dam chiang bawk silo...Kal la va mu hahdam rawh.I bag vel hi chu keiman ka lo ken sak mai ang che " Eagan chuan aw zangkhai leh hahdam zet hian a lo ti vat a.





"Ka lawm e Master
Eagan" Hepa pawh chuh! Eng vanga ka lak a tha ta viau hlawm nge maw an nih le?





"Young Master Nick,saw nu saw tu nge?Master Eagan sawn a bag te a ken sak bik ania...A duat hmel tawp,a tan mi pawimawh tak a ni ngei ang" Kal mai ka tum laiin Nick nula khawi ho chuan ka hnung lam atang hian an rawn ti nghal sap sap a.





"Kan chhiahhlawh satliah ve mai anih saw" Uang thuang zet a ti pah chuan a nui ri hak a.Chutia an pu ber Nick an min tih tak ah chuan hmeichhe dangte pawh chuan fiamthu thawh nan a min hmang zuiin an nui nghal dar dar a.





"Oh in chhiahhlawh satliah ve mai maw" min hmuhsit hmel zet a tipah in ka lam pan hian hmeichhe pahnih chu anlokal nghal a.





"Hey chhiahhlawh nu,Cocktail intur min va lak teh...Cuan ka thiannu tan hian Cake ei tur rawn la tel bawk la!"





"He mite pahnih pawh chu an pu Nick ang mai!He lai hmunah hian intihlim tur a lokal nge annih a min hmusit tur a lokal annih pawh ka hre nek lo e...





"Awle" hahthlak ti zet hian ka thaw chhuak hak a.





Rang zet hian Oliver chu ka hma ah chuan lo ding in" A ni hi kan in nghaktu maid ania in chhiahhlawh ni lo in,chuvang chuan in duh duh a tirh kual theih dan in nei lo" a rawn ti pawr hlur a.





"Kan tih palh lutuk Master Oliver" hmeichhe pahnih te pawh chu an in thiar fihlim nghal vat a.





Engti zia nge vawi leh khatah heng misual ho hi an fel tak thut mai le!Chian loh deuhna annei te hi ani lo maw tia ka ngaihtuah rilruk lai tak chuan "Ei tur tui deuh min va lak teh" a rawn ti zui leh nghal zat a."A ngai te bawk chuan"ka ti chhuak hak a.





Oliver ei tur pek tum a ka kal lai chuan hmeichhe pakhat ke chu pal palh in pool ah chuan ka tla ri ta bawrh a.Tui hleuh ka thiam lo bawk nen hlauthawng leh mangang zet chuan "Min chhan ru" ka ti ta chul a.





John chu rang zet in tuiah chuan rawn zuangthla in min pawm chhuak nghal vat a.Eng vanga he thil hi thleng tawh tlat a hriat na nei nge maw ka nih le ka tih rilruk lai chuan tuia ka tlak lai a min rawn fawp tu mipa hmeltha zet chu ka ngaihtuah chhuak nghal uar uar a.





Tui atanga min lak chhuah rual in Nick chuan hlauhthawn hmel deuh hian "I tha em" a lo ti nghal thuai a.





"Aw ka tha" khuh bawrh bawrh chung chuan ka ti sep a.





John chuan ka thawmhnaw huh zawr vek hliah khuh nan a kawr hak lai chu phelh in min rawn khuh vat a.A unaupa ang lo takin hepa te hi chu a ngilnei reuh ngawt mai!





"Party a tawp,in zavaiin he lai hmun atang hian chhuak nghal vek rawh u"John chuan lungawi loh hmel deuh hian a ti ram hmak a.Chu lai a hmeichhe awm ho chuan enge thleng ta,ngati nge anti nghal sap sap a.





Nick chu John hma takah chuan lo ding in "John he party hi ka buatsaih ania atih tawp hun tur pawh ka thu...I lo sawi ve theih a awm lo!" a ti chang fak a.





Nick leh John te awm dan chu a ngaihna hre lo deuh hian ka lo en hu a.Eng vanga unau si hetia in ngeih lo ta thut nge maw an nih le?Kei chauh nilo chulai hmun a awm ve dangte pawh chuan an awm dan chu mak ti zet hian an en ve reng hlawm a.





Chutah John chu thaw hak in "Lucy,kal ang" tih leh min rawn pawm chu a rual nghal a.Nuam lo ti rilru deuh chung hian John darah chuan kuah in Nick lam chu ka va hawi zeuh a.Thinrim leh lungawi loh hmel zet a min rawn thlir reng ka hmuh rual chuan ka hawisawn nghal thuai a.