Perfect (Chapter-1)

[Rebec Nunziri]

Chapter-1



Lalchhandami POV




"Mate, chaw ei hmasa phawt rawh" ka nu in a tihchuan hmanhmawh zetin choka ah ka lut a, "Vawin atang hna i tan ve tawh dawn a ni a, tha takin I hna chu thawk ang che aw, nakin lawk a i enkawl tur a ni bawk a, engkim chiang taka hriat I tum dawn nia" ka nu chuan a ti dap dap a, kan school ah ka thawk dawn a, Pathian zarah kan vannei a, kan school hi Mizoram ah chuan a tha pawl a ni, class-9 atang a class-12 thleng a awm a, school naupang pawh an tam viau bawk. Chaw ka ei kham a, "Nu ka kal tawh dawn, ka pa a kal na a rei tawh bawk si, ka nikhat na tur a nisia, ka tlai chuan min hau ang" ka bag ak tha mawlh mawlh pah chuan ka ti a, "Awle, tha deuhin i thawk dawn nia" ka nu chuan kawngkhar thleng min thlah a, ka phur tawh takzet, ka naupan lai atanga ka tum leh ka nih chak ber chu ka pa anga zirtirtu tha tak nih hi a ni.




Scooty chu la chhuak in in atang ka in khalh chhuak a, school ka thleng a an la tan lo, zirtirtu in report na turah chuan ka in report leh phawt a, teacher's office ah lut in zirtirtu lo awm te chuan min lo lawm a, school ka kal laia kan zirtirtu te pawh an la awm nual a, a then chu pasal nei in an thawk tawh lo thung, "I lo thawk dawn tih kan hriat khan ka phur tlang teh asin" school ka kal laia ka zirtirtu ngainat em em Miss Hmingtei chuan a lo ti a, "Kei deuh, in bulah ka thawk thei tur ringawt pawh hi ka lawm a nia" ka ti var a. Zirtirtu te nen kan in biak hnuah ka pa room ah chuan ka kal a, kawngka ka kik karh karh a, lut tura min tih rualin kawngka ka hawng nghal, "Sir, ka lo in report dawn a" thu tura min tih rualin ka thu thla a, ka pa hi chu pa khirh ve tak a ni a, chhungkua leh hnathawh na lam hi dah hran duh tlat mi a ni, ka hna pawh hi fair takin ka dil a, in duhsak na tel miah lova ka hmuh a ni ve bawk.




"Awle, I ni khat na tur a ni a, harsat na i nei a nihchuan zirtirtu dang te pawh i zawt thei a, keimah pawh min zawt thei bawk ang, engpawh nise kan school rules chu I hre vek tawh a, in hrilh chawp a ngaiin ka ringlo, naupang te tha takin zirtir la an thiam thei lo a nih pawhin an thiam hma chu tha takin i hrilh dawn nia, vo a thinrim khum tur a nilo a, ka duh lo bawk, a chiang em?" min en ran a, "Chiang e" a nui a, "Awle, class tan a hun tep tawh, va kal tawh rawh le, i table tur chu zirtirtu ten an lo hrilh ang che" a ti leh a, keipawh chu ka chhuak ve nghal mai bawk. Ka dawhkan tur chu zirtirtu ten min lo kawh hmuh a, a nuam takzet, vawin ni thlen hun hi ka nghakhlel em em thin a, tunah ka duhthusam ber a thleng dik ta hi mumang te a ang rum rum dawn hial in ka hria, class-12 'Science' class teacher tur ka ni a, first period ka neih nghal dawn avangin lehkhabu chu ka la a, bell a rik tawh tho avangin office atang chuan ka chhuak nghal.




Class room ah ka luh chuan zirlai naupang te chuan min lo wish a, thu tura ka tih hnuah an thu thap a, "In class teacher thar tur ka ni a, ka hming chu Lalchhandami a ni a, Miss Chhante tiin min ko thei ang, chuan tumah hi ka la hre ve vak silo cheu a, introduction neih nan tun class hi chu ka hmang mai dawn nia aw, tlar hmasa ber atang khan in hming te han sawi ula, in veng awm na leh in kum zat nen" ka ti a, tlar hmasa ber atang chuan an ding a, mi 70 chuang an ni a, an vai chuan hriat an harsa ve deuh ang, introduction an neih zawh hnuah tlar hnunglam atang hmeichhe pakhat hi a rawn ding a, "Miss kum engzah nge i nih ve?" a rawn tihchuan ka nui sak a, "Kum 23 ka ni mek a, tun kum tawp lamah hian kum 24 ka pum ang" ka ti a, an lo zir chin te chu ka zawt a, an la zir thui vak lo, ka class a tawp hnuah ka chhuak a, a hlim awm in naupang ho bul a awm kha nuam ka ti takzet a ni.




Class-11 leh 12 ka zirtir dawn a, Mathematics ka la dawn a ni, ka subject ngainat ber a ni bawk. Chawhnu lamah class-11 room ah ka lut a, ka first day a nihna angin lehkha zir lovin introduction neih nan kan hmang a ni, school ban a hun chuan in lamah ka in khalh haw a, ka pa aiin ka thleng hmasa, in ka thlen hnuah ka nu in chanchin te min lo zawt a, "A nuam lutuk, naupang ho an fel hmel hlawm bawk si, vawin chu lehkha zirtir lovin introduction neih nan kan hmang a, mahse an tam lutuk a, ka hre vek seng lo" phur zetin ka ti a, "Zirtirtu tha tak, naupang te tan en tawn thlak nih tum in I hna a thawk dawn nia, i pa hi a upa tawh tih i hria a, nakin lawkah chuan i la enkawl vat dawn, chuvang chuan i pa chak that lai hian a hnen atangin in zir tum rawh aw, ka fanu I ni a, ka ring em em bawk che a nia" ka nu chuan a ti a.




Room ah in thlak turin ka chho a, vawin ka hun hma dan te ka ngaihtuah let a, ka nui leh vur vur thin, a va han nuam tak, ka inthlak zawh hnuah inhnuai lamah chhuk leh vatin ka nu leh kan awmpui U Mami ka u ang chiah a ka en nen chuan rawng kan bawl ho a, ka pa chu sitting room ah chanchin bu a chhiar thung. Dar 5:30 a rik chuan chaw kan ei a, zanin chu thalai inkhawm zan a ni bawk nen hmanhmawh deuhin ka ei a, kan biakin hi a hla ve deuh bawk nen muangchang a chet chi a nilo, hmeichhia phei chu in siam nan hun kan duh rei thin bawk si, U Mami nen chaw ei na vel kan tihfel hnuah kan room ve ve ah lut in kan in siam a, ka in peih hnuah room atang ka chhuak nghal a, U Mami room ah ka kal a, a lo la in siam zo ve chiah bawk.




Kan room hi a in dawt chiah in a awm a, ka nute erawh inhnuai lamah an mu thung, inhnuai ah kan chhuk a, ka nu te chuan tv an lo en a, "Nu kan kal dawn nia" ka ti a, U Mami nen chuan kan chhuak nghal, dar hmasa a ri tawh bawk nen muangchang chi a ni tawh lo, scooty chuan biakin lamah kan in phur a, kan thlen meuh chuan minute 10 pawh tan nan a awm tawh lo, biakin chhung a kan luh hma in kan puan bih te kan siamtha a, kan lut nghal, zirlai zirna te kan nei a, inkhawm kan ban hnuah hla zir a awm vangin kan haw tlang lova, U Mami nen kan thu dun leh a, hla kan zir lai te chuan ka ham leh bai bai thin, ka mut a chhuak tawh hle, zan meng rei vak hi ka theilo a, dar 9 a rik dek dek hi chuan ka mut a chhuak nghal em em zel a ni tawp, dar 10 dawn ah hla zir kan bang ta a, in lamah kan haw tlang nghal, ka nute chuan min lo nghak a, reilote sitting room ah kan thut leh hnuin kan room theuh kan pan ta a.




Ka inthlak zawh ah bathroom ah in tifai turin ka lut leh a, ka chhuah hnuah khumah ka mu nghal, mut chhuak hle si kha khum ka thleng chiah a, ka mut chhuak te kha a reh vek emaw tih mai tur a ni, ka meng leh kar tawh a, ka hun kal tawh te ka ngaihtuah let a, ka lung chu a rawn leng thar leh em em a. Ka hming chu Lalchhandami a ni a, ka nu leh pate fanu neih chhun ka ni, ka nu hi Lalmuansangi niin ka pa hi Lallawmawma a ni thung, ka pate school ah hian ka nu a thawk thin a, chuta tanga in tawng chu an ni bawk, ka nu hian kei ka pian hnuah nau vawihnih ngawt a pai leh a, mahse a chhiat ve ve, ka nu hrisel na atan a pawi theih avangin fa neih lam chu an tum tawh lova, chuvang in unau dang ka nei ta lo a ni, ka nu hi chuan fa neih leh a duh tih ka hria, a pai theih tawh loh vangin ka pa lakah pawh a in thlahrung hle thin, mahse ka pa hian a hnem thiam a, ka pi leh pu (Ka pa nu leh pa) te an fel bawk a, ka nu hnenah thu hriat nuam lo an sawi ngailo.




Ka pi leh pu ten min la dam pui ve ve a, kan hnenah an awm lo thung, ka pa lama ka pite hi ka pate unau zing a naupang ber ka pate Hruaikima te nen an cheng ho a, ka nu lama ka pite ve thung hi chu ka pute Liana'n a enkawl thung, kan vannei a, chhungkaw hung ve tak kan ni a, mahse kan in ngeih in kan in ngai hlawm viau bawk. Ka tleirawl tirh te khan ka nunah ka mipa duh em em mai chu a rawn lut a, khatih hunlai khan ka la naupang bawk a, ka pasal tur ang hial ah ka ngai a, a tirah chuan duh na em em ka nei ngailo, hun a kal a, ka duh ta em em a, mahse kan duhthusam angin thil a thleng vek lo an tih angin a ni nen chuan in hauh na pawh awm lovin kan tawp ta a, a tirah khan tuar dan ka thiamlo, khatiang teh tawp a min ti kha hriatthiam harsa ka ti a, na ka ti hle bawk, ka la naupang bawk nen tuar dan ka thiam hlawl lo, in thenawm chiah kan ni bawk nen a nute ka hmuh ringawt pawh khan ka tah a chhuak a, a hma chuan an inah ka kal nitin thin kha a nia, mahse kan inkar a tawp hnu kha chuan an ina kal te kha ka ngam ta vak lova.




Ka kal ngai tak loh avangin a nu chu a lo kal hial, tunah chuan kum 5 dawn zet a lo ral ve tawh bawk nen an inah pawh ka leng lut tam a, nuam lo ka ti em em tawh lo, chuti chung chuan kha mipa na taka min kalsan tu kha ka la theihnghilh chuanglo, ka nun a ka mipa duh hmasak ber a nih vang te pawh a ni ang. Zingah chuan hma takah ka tho a, ka inbual hnuah inhnuai ah ka chhuk a, ka nu a la tho lo, U Mami nen chuan rawng kan bawl mawlh mawlh a, U Mami hi kum 6 zet kan inah a awm ve tawh, kum 27 a ni a, a chhungte hi thingtlang lamah an awm thung, an khawsak a harsat em avangin zirna chawlh san in Aizawl ah hnathawk turin a rawn kal ve rawih a, ti hian kan inah a awm ta a ni, awmpui ang pawhin kan en lo ka u ang chiah in ka en a, unau ka nei bawk lo nen ka ngaina in harsatna ka tawh te ka hrilh a, min lo hnem thin a, ka tan chuan ka unaunu ka pian pui ang maiin a hlu a ni.




Ka nu a rawn tho chhuak a, ka pa pawh a rawn tho ve nghal, kan chhungkua ah hi chuan ka pa hi a tho tlai ber zel, chaw ei kan peih tawh bawk a, a hma lutuk tawhlo bawk nen chaw kan ei a, school kal turin ka insiam nghal, in atang ka chhuak a, vawin chu ka scooty tlan loh ni anih avangin ka pa rualin ka kal dawn a ni, ka pa nen chuan kan chhuak a, "I class naupang te chu an fel hmel em, enge an an hmel I tih?" ka pa chuan a ti a, "An fel hmel ka ti, mahse ka la hrechiang lo hlawm em a, kan la in hrechiang ve zel turah ngai ila" ka ti sep a, "Ni e, i class naupang turte hi chu teacher dang te pawh in an fak thin ania, nang in i zir phawt chuan lehkha tha takin an zir anga mi fel tak tak ah an la chhuak ngei ang, i pawimawh hle tihna a nihchu, an entawn tlak tura i awm a ngai tihna a nihchu" a ti leh sup sup a, school kan thleng nghal a ni der.




Class chu pangai takin ka la a, in hlei chu lo awm ve bawk mahse ka hauh chuan tumah an in hlei tawh biklo, chawh tur ka pe a, hmeichhe pakhat tlar hma ber a thu chu a rawn kal a, chawh tur ka pek ang te a chawh zawh tawh thu a sawi chuan ka check a, a ti dik vek, a thil chawh pawh en a nuam bawk , midang te pawh chuan min rawn en tir a, chawk thiamlo pawh an awm nual bawk. Chawk zo hmasa ber nu kha ka ko chhuak a, a hming ka hre leh mai tawh lo, board ah chuan ka chawh tir a, ka sawifiah tir nghal vek bawk. A thiante chuan an hriatthiam loh lai te chu an zawt a, lai zetin a hrilhfiah ve zel bawk, class a tawp dawn hnaih chuan an homework tur ka pe a, ka chhuah hnuah office ah ka lut nghal, class ka nei leh tawh mai loh avangin ka chair ah chuan thu in chawhnu lama class-11 a ka zirtir tur chu ka en lawk a, dar a rik chuan zirtirtu dang te chu an tho chhuak sap sap a.




"Lunch ei ve phawt ila" Sir Madawnga chu ka table hmaah a rawn ding a, teacher dang te chu an lo chhuak vek tawh, ka lehkhabu en lai chu ka dahfel a, "Ka ril pawh a tam vak lo asin" ka ti sep, "Tun bak chu thil ei na hun a awm leh mai mai dawn lo ania, ban hun a la hla si, eng emaw tal ei rawh" a ti a, office atang kan in zui chhuak a, teacher dang te hi senior ve tawh tak tak vek an ni a, Sir Madawnga hi kei ai upa mahse midang ai chuan a la naupang ve tho, kei ai kum 5 in a upa in ka hria, a fel bawk a, kan in kawm ngeih nghal hle bawk. Canteen ah chuan kan kal a, teacher dang te chu kan va zawm ve nghal, eitur te kan chah a, kan thil ei pah chuan kan titi a, kan thawm pawh a tha ham ham viau mai, thil kan ei zawh chuan ei man pek ka tum a, Sir Madawnga chuan ka treat ang che a ti deuh tlat a, ka hnial ve tang tang hnuah pawh a tih luih tak tlat avangin ka hnial ta lo.




Bell a rik hnaih avang chuan office lamah kan kal lehnghal hlawm a, class-11 room lam chu ka pan a, ka luh chuan min lo wish leh sap sap hlawm a, mathematics ka chawk a, uluk deuh a ngaithla turin ka hrilh ngun hle bawk. Chawh tur ka pek chu tu vak mahin an chawk theilo, keimah chuan board ah chuan ka chawk a, an hrethiam ve mai zelin ka hria, a hrethiam lo ho chu an thutna ah kal in ka hrihfiah leh a, an thiam ve nghal zel mai, class ka neih zawh chuan office ah lut in ka chair ah ka thu hnawk a, ka chau ve deuh a ni, ka mut lah chu a la chhuak em em zui, ka ham deuh bai bai a, sana ka en chuan dar 2:30 a ti tawh, ban a hun tep tawh e. Kan ban hnuah ka pa chu ka nghak a, zirlai naupang chhungte a hmuh vangin a rawn la chhuak lo, ka phone chu ka khawih a, thlalak hlui te ka en a, college kan kal lai a mi te ka en a, ka thiante ka ngai takzet, a tam zawk nen la in kawm mahila a then hi chu an khaw lamah hnathawk ten an awm tawh a, kan in hmu reng thei tawh lo.




Darkar chanve dawn zet ka pa ka nghak a, an rawn la chhuak lo, ka thawh ve hma khan in sual an awm a ni awm e, an chhungte nen an in bia a, an thu a in hmu theilo pawh a ni maithei a ni. Thlalak chu ka en zel a, a hnuaiah chuan kum 5 liam ta a mi ka mipa duh em em mai Zonunsanga nen kan thlalak dun na chu a lo awm a, en loh ka tum zet na in ka insum thei thlawt lo chu ka en leh ta nge nge, a hmel chu chiang zetin ka en a, a hlim hmel takzet, duh hmel zetin min en bawk a, a hunlai kha chuan kan hlim dun thin a sin, kum 6 in kan in thlau a, kan in ngaihzawn ve lai kha chuan ka la naupang chhia bawk a, ka duh duh hunah a chungah ka lungawi lo ringawt thin a, ka lungawi hma chu min thlem ngat ngat thin kha a nia, nikhat lek pawh min be lova awm thei ngailo kha kum 5 dawn zet min be lovin a awm ta chu a ni sia.




A bialnu thar chuan a ti hlim awm hle mai, ka dem lova hlim takin awm se ka duh, mahse ka ngaihtuah chang hian hmeichhe dang nen an hlim tih ka hriat hian ka na em em tho si, ka hma ka sial vang te pawh a ni mahna, amah vangin tu mipa mah ka la hnaih theilo tih te hi a hre ve awm der silo, kan hun kal tawh te chu ka ngaihtuah let a, ka mittui a rawn hnam tiam tiam a, tah ka duh loh avangin ka mittui chu ka dang tawk tawk ani ber. Ka pa room atanga thawm ka hriat takah chuan ka in siamtha vat a, ka pa leh nu upa lam pahnih leh pa upa lam pahnih an rawn chhuak a, ka pa hnenah chuan lawmthu an sawi mawlh mawlh bawk, "Mate, min lo nghak rei tawh em, rin aiin kan rei a, kan kal nghal mai dawn em ni?" a ti a, "Nghak rei vak love, kal ila" tiin ka phone chu ka bag ah ka thun lut nghal a, ka pa nen chuan office atangin kan inzui chhuak a.




"Pa ka muhil lawk dawn, in kan thlen hunah min lo kaitho mai rawh aw" ka ti a, ka thutdan ka siam rem nghal zat bawk, ka muhil dawn ka ti tak na in ka mut erawh a chhuak hauh lo, U Zonuna ringawt ka rilru ah a awm, a bulah naupang chhia tak takin ka che fo, khati chung khan min ning hmel pawh pu lovin ka duh ang apiang min tihpui thin zawk a nihkha, ka ngai takzet a ni, kan in then hnu khan a reh hmak a, keipawh in theihnghilh tumin amah ka hriat chhuah theihna zawng zawng tih bo tumin kan thlalak dunna te a phone no thlengin ka delete a nihkha, mahse awmzia a awm tam lo hle, tun thlengin a phone no pawh ka la hre reng, kan inthen tirh khan kan that leh mai kha ka beisei a, mahse a reh hmak te khan min ti na em em a nihkha, ka thiante phei chuan ngei tak te in an ngei, an thiannu amah vanga ka nat em em laia a reh hmak kha mak an ti a, a ni ai mipa tha an tam thu in min hnem thin bawk, mahse ka tan chuan a ni aia mipa tha kha an awm silo a ni.




In kan thleng a, inchhung ah ka lut nghal, "Bawihte, I nu Zualtei chhun lamah khan a rawn leng a, Zonuna a rawn haw tur thu a sawi asin, zanah an inah leng phei turin a ti che a, chaw eikham ah va kal rawh aw" ka nu chuan a ti a, U Zonuna a rawn haw dawn amaw, ka thin chu a phu nghal dup dup a, kum 5 chhung ka hmu tawh lo a, tunah kan in hmu leh mai tur chu awih harsa ka tiin hmuh pawh ka duh em ka hrelo, ka nu chu ka chhan mai loh avang chuan min ko a, "Aw.. ka va kal dawn nia" harsa zet chuan ka ti chhuak thei hram a, ka room ah hmanhmawh zetin ka chho nghal bawk, khumah thu in ka thaw hawk hawk a, ka thin chu phu rang tak a ni, tinge rawn haw a tum le, oh.. a thil zirlai a zir zo tawh a ni maithei, a chanchin engmah ka hriat zawm tawh lo kha a nia.




Nu Zualtei hian a chanchin chu ka chhungte bulah sawi ve fo mahse a chanchin engmah ka hriat duh loh vangin ka kalsawn daih zel kha ania, ka room kawngka kik tu an awm chuan ka in siamtha vat a lut turin ka ti nghal sep bawk, U Mami a rawn lut a, ka lo en reng, ka bulah chuan a rawn thu thla a, ka kut ah a rawn vuan nghal zat bawk, "Mate, I tha em?" a ti sep a, ka lo bu zeuh ringawt, a nui seih a, "I ṭhalo tih ka hria alawm, mahse kum 5 lai a liam ve tawh bawk a, engtik ah emaw chuan i hmuh a la ngai dawn tho tho, hun kal tawh chu engpawh nise tun hun hi a pawimawh ber a ni, chuvang chuan hahdam takin awm tum rawh" ka thaw hak a, "U Mam, hmu turin ka in peih leh peih loh pawh ka hrelo, ka awmdan hi ka sawifiah thiamlo a ni ber" ka tawng ring lo, ka hrawk a in hnawh tlat.




"Ka hrethiam che alawm, mahse hmeichhe chak tak I ni a, hlauh tur emaw hmuh hreh nachhan tur I nei hleinem, tunah chuan tleirawl mai ni lovin nula pangai tak leh huaisen tak I ni a, chuvang chuan hlauhthawnna tur i neilo, ka ring che a ni, I hun kal tawh vangin hreawm takin awm duh tawh suh, mihring te chu hmalam pan tur alawm kan nih" a tihchuan ka thawk deuh huai in ka hria, ka nui ta var var a, "Ka lawm lutuk e U Mam nanghi awm lo la chuan engtinge ka awm ang ka hrethiam lo" ka ti a, "Ka nau alawm i nih, harsatna i neih apiangin min hrilh la, puih theih na che ka nei a nihchuan ka pui zel angche" a ni ang u ka nei hi ka vannei takzet a ni. Chaw kan ei kham hnuah Nu Zualtei te inah ka kal ta a, min hmuh chuan a lo phur khawp mai, a awm ve reng, a fapa a ngaih em em a lo haw tawh dawn a ni si a.




"I lo kal ta maw, i U Zonuna lo haw tur thu kha i nu in a hrilh tawh che em?" a bulah min pawt thu a, "Aw.. hrilh e" engdang mah sawi tur ka hrelo, "A lawmawm tak tak a ni, helam ah hna a thawk thei nghal dawn a, kan hmuh phak lova a awm kha chuan puitling pawh ni tawh mahse a nu leh pate tan hi chuan ngaihtuah a na thin em mai a". a ti siam siam a, darkar khat chuang ka awm hnuah in lamah ka haw ta a. Ka nu te bulah pawh thu khawmuang lovin inchung lamah ka chho thlang nghal daih, room ka luh rualin khumah chuan ka bawk thla nghal thlawp a, ka mit ka chhing nghal vang vang bawk. Hun kal tawh bawk chu ka ngaihtuah let leh a, U Zonuna hmuh hlan chu ka nghakhlel ve takzet alawm, mahse ka huphurh tho bawk si, ka awmdan pawh hi ka hrethiam tawh lo, mahse min tih nat tawh na zawng zawng te avang khan a hma ang kha chuan ka nel in a bulah thlamuang takin ka awm thei tawh dawn lo tih erawh ka hrechiang hle thung.



Flashback


"Kal lo mai la, I tel lovin engtinge ka lo awm ang?" ka mittui chu min hruk sak a, "Ka lo haw leh vat dawn alawm, chumi hma zawng chu rinawm takin min lo nghak la, ka lo haw leh hunah chuan i zirlai te I lo zir zo ve tawh anga, nupui ah ka nei angche" a tihchuan tlem in ka rilru a nuam ta deuh, mahse engtinge a tello in ka lo awm theih ang. Ka mittui chu a la luang ngiai ngiai reng tho, "Tap tawh suh le, i tah chuan awm ngaihna ka hre thin lo tih i hriat kha" nui suk chungin a ti leh a, "I awm loh chuan a reh dawn lutuk" ka ti leh tiau a, "Ka lo be ziah dawn che alawm, le tap tawh suh, nula an tap bui bui ngailo" a tih leh chuan a hnungah ka chum pawp a, nui hawk hawk chungin min kuah nghal hlun a, kan chhungten min rawn call takah chuan in lamah kan haw a.




Naktuk ah Delhi lam a pan tawh dawn avangin chaw kan ei khawm dawn a, in thenawm kan ni a, kan in a in si lek lek, a tirah chuan u angin ka en a, min duh thu min hrilh pawh khan min fiam mai mai emaw tiin ka lo ngai thutak lova, mahse a tih mai mai loh zia min hrilh a, ka la chhang lawk chuang lo, kan inah a rawn leng lut ngun viau a, ka chhungte nen pawh an in pawh viau, chutiang bawkin a chhungte pawhin fanu ang chiah in min en. Kan chhungten kan in kar an hre ve vek a, engmah an sawi buai lo, mipa fel lutuk tia sawi tur a nih hauhlo, a tawng tlem em em a, han nui ve thin mahse a ri in a nui khat khawp mai, a mizia hi ka ngainat zawng a ni ngailo, mahse tunah chuan a tello a awm harsa ka ti a, hmundang a a awm tur thu a sawi ni atang khan kan awm hran hun tur ka ngaihtuah thin a, ka lo huphurh lawk em em thin.




Naktuk mai ah a kal tawh dawn chu a ni sia, chaw pawh ka ei tam lo, kan chhungte nen chuan kan thu khawm a, a thil zir tura rilru pe turin leh tha taka a zir chhuah theih nan ka pa chuan a fuih mawlh mawlh , engmah ka sawi ve lo, ka nu ten haw an rawt takah chuan kan chhungkua chuan kan ding chhuak a, rawn ding chhuak ve vat in kan chhungte nen pawn thleng min thlah a, naktuk ah airport thleng kan thlah ve dawn a, zan tir lamah kan in be tawh tho sia tiin kan in be tawh lem lo, tha takin kan in mangtha a. Ka zawi em em a, ka chhungte sitting room a an thut khawmuan laiin room ah ka lut tlang a, khumah ka mu dawn chiah tih ah ka phone a rawn ri a, ka la vat, ka room tukverh a dak tura min tih vang chuan parda chu ka keu a, a hmel ka hmu nghal, kan room hi a in zawn a, ti hian zanah phone a in be chungin kan in en reng zel.




"Bawiha, tluang takin I kal dawn nia aw, i zirlai ah rilru pe la, kan lo tawngtai pui reng thin dawn che nia" Nu Zualtei chuan a ti mawlh mawlh a, keichu engmah ka la sawi ve lo, ka tawng chhuak theilo a ni zawk mah, ka hrawk a in hnawh tlat, "Bawihte, ka lo haw leh vat dawn ka tihkha aw, tha takin lehkha lo zir la, ka thusawi kha hre reng rawh aw" ka hriat tham lek hian a rawn phun sup a ka chal ah a fawp vang vang bawk, ka lo bu zeuh ringawt, airport chhung a a luh dawn takah chuan ka mittui chu a hnam tiam tiam a, ka nu ban chu nghet takin ka vuan bawk, a chhunga a luh hnuah a rawn hawi let leh a, tah ka duh loh vangin ka in sum hram hram a ni, a kal liam lai chu mit khap eih lovin ka en liam a, ka hmuh phak lova a awm chiah chu ka lung a leng nghal em em ringawt.




In kan thlen hnuah pawh ka zawi em em a, room ah chho in ka mu nghal, puan chuan in khuh in ka tap a, U Zonuna ka ngai nghal lutuk chu awm ngaihna ber pawh ka hrelo, nikhat lek pawh a la ral lo ania, engtinge kum 5 lai in hmu lovin kan awm theih ang, a zirna zawh vat a duh vangin chawlh lai pawhin a rawn haw theih dawn loh thu a sawi bawk si. Tlaiah pawh chuan chaw ka ei peih loh vangin room ah ka in khung tawp a, zanah pawh chuan ka muhil theilo, U Zonuna min rawn biak hun chu ka lo ngaichang ran a. Dar 10 vel ah min rawn call ta hlawl a, ka la rang teh a sin, a thleng tluang thu leh min ngaih thu te a rawn sawi a, ka tap lehnghal ringawt, "Ka ngai lutuk che, I awm silo a, a reh vek" tap pur chung chuan ka ti a, a rawn nui chhuak hawk hawk a, "Bawihte, tap tawh suh le, i tah chuan hreawm ka ti thin tih i hriat kha, a rei dawn lo, ka lo haw leh vat dawn alawm" a ti a.




"Kum 5 lai i awm dawn a, chuchu reilo i ti maw?" lungawi lo zet chuan ka ti a, "Nilove, chuchu ka sawi tum a nilo, mahse kan tan alawm ka kal, ka nupui I nih vat theih nan tha taka lehkha zir ka ngai tih i hriat kha, helam ah rim takin lehkha ka zir anga, nangpawh tha takin lehkha lo zir la, kan in nei vat thei dawn alawm, i hriatthiam tiraw" a tihchuan "Aw.. mahse ka ngai che" ka mittui chu a reh theilo, ka hruk hnuah pawh a rawn tla lehnghal zet tho. Rei fe kan in biak hnuah kan ti tawp a, khumah chuan ka mu a, ka muhil theilo, ka in let tawn sek a, a hnuah chuan ka khumah atang tho in U Mami room lamah ka kal a, kawngka ka kik karh karh a, a rawn hawng har lo, "I bulah ka lo mu" ka tihchuan a nui hak hak a, a khumah chuan kan mu dun a, U Zonuna nen kan inkar kan chhungten an hria ka tih tawh kha, U Mami bulah chuan U Zonuna ka ngaih thu chu ka sawi sep sep a.




U Zonuna nen chuan kan hman apiangin kan in be ta reng a, zanah te chuan video call in kan in bia a, ka muthilh thleng in kan in be thin, in hmu theilo mahila kan in biak theih reng avangin hreawm ka ti em em lo, mahse hun a lo kal deuh a, Delhi a awm atanga thla 5 vel a liam hnuah chuan a awmdan a danglam tial tial a, nitin in be thin kha min rawn be khat em em a, zanah te chuan lehkha zir a duh vangin kan in be ngai ta mang lo. Keipawh chu ka zirlai ah theihtawp ka chhuah a, hma ka sawn em em bawk. U Zonuna chuan min rawn be khat ta em em a, ka call lah in thiltih tur a neih thu sawiin rei pawh kan in biak hmain phone a dah daih zel a, ka ngai thin hle, zankhat chu a status ka en a, hmeichhe pakhat hmeltha deuh nen thla an lak dun na hi a rawn status a, caption erawh a nei lo thung, ka rilru chu a nuamlo hle, min rawn biak hun ka nghak a, mahse thawm a rawn neilo hrim hrim.




A tuk lamah pawh chuan a la reh tlawk tlawk a, karkhat lai min rawn be tawh lo, zankhat chu ka tuar thei tawh thlawt lo ka va phone a, a la thei mai lo, mahse ka ti nawn char char a, vawi 10 dawn lai ka call hnuah a la ve ta chauh. Thil awmdan te chu ka zawt a, min rawn be ngai bawk silo a ka ngaih zia thu te ka sawi a, a ngawi reng, "Ka tawng i hre thei em?" ka tih hnuah a thaw hawk ri chu ka hria a, "Bawihte" a rawn ti zawi sup a, "Enge sawi la, rilru hahna I nei em ni?" ka ti leh a, "Kan inkar hi ti tawp ang" a thusawi chuan min thawng lutuk a, tawng mai nachang pawh ka hrelo, "I rilru a na ang tih ka hria, mahse i la naupang a, kei ai tha mipa i la tawng em em ang, i nun tha takin hmang la keichu min theihnghilh I tum dawn nia, kan in kar kha chu naupang chhe in ngaihzawn ang lek a ni a, bialnu ka nei a, ka duh hle bawk, min theihnghilh in nun nuam tak i hmang dawn nia" a sawi zawh hnuah phone chu a off ta daih a.




A thusawi chuan min la thawng lutuk a, tawng mai nachang pawh ka hre lo, a hnu fe ah chuan ka rilru a rawn fim tial tial a, U Zonuna chu ka call leh a, mahse a la theilo, a hnuah phei chuan ka call tlang thei lo ta hial a. Hun a kal zel a, U Zonuna chu a reh hmak, chaw ka ei thei lova, ka zirlai ah lah rilru ka pe theilo, damdawi inah ka awm a ngaih phah hial a, mahse ka chhungte bulah engmah ka sawi lo, U Mami chuah chu ka hrilh a, a thinrim hle, damdawiin atang ka chhuak a, U Mami chuan min vil deuh chawt thin, ka thiante pawh an thinrim hlawm khawp mai, thlakhat tal tawp awm ze nei lova ka awm hnuah ka in ti chak a, ka rilru ka siam fel thei ta a, engpawh thleng se U Zonuna vanga in dawm kun ka tum tawh lo, ka nun chu nuam takin hmang ka tum ta zawk a, mahse a harsa takzet thin a ni.

End Of Flashback


Cont...

A ngaihnawm hmel in ti em, comment lamah khan in lo sawi theuh dawn nia aw..