HLUSANGZUALI CHAPTER 21 BY REBEC COLNEY

[Rebec Felix]

HLUSANGZUALI







CHAPTER -21







Sawi hmaih theih loh ,a hma ka lo rilruk deuh ,inhnuai luah tur a siam tir ka tum kha thulh leh in kan in kawt ah dawr te tur ka siam tir ta zawk a ,kan ngaihtuah tlang chet chet hnu ah tha dawn riau a kan hriat tak vang a ni , kan awm na lam ah hian dawr hnai a awm lo a , mamawh chak khai lam tur pawn vengthlang lam ah kal a ngai daih thin , hla lutuk phei chu ni hran lo mahse ,hmanhmawh thil thu ah hian a buaithlak thin em a.





Dawr kan siam chuan hnai te ah khu lam kal ngai lo in an lei thei tawh dawn a , keini tan lah hlawk na a lo ni ve zel dawn bawk .





Ka biak buai tur neihchhun leh ka ngam tlak ber ka ka ni ka be pawh leh ta nge nge ,dawr bungrua tlawm na deuh min lo zawn sak tur leh min lo laksak mai tur in ka ti a , hnial buaina nei lo in a lo zawn tur thu sawi in min sawi phur pui thiam leh khawp mai.





"Inbiak dun kan ngai in i hre ve em ?" Rinsawma tang a ka dawn a ni , a reh vang vang hnu in min rawn be leh nawlh chu mak tih loh theih pawh a ni lo.





"I hmuh reng te chuan min rawn chhang let ve la aw , induh hun pawh a ni lo " chhanna tur ka ngaihtuah kual lai in a rawn ti nawn leh ,phone melh in ka nir nang mai , induh min rawn tih teh ngawt ni .





"Eng thil nge kan sawi dun a nga "ti in ka chhang let a , ka thinlung hian beisei a nei a, beidawng leh hma lam pan a kal ka tum pawn khawi emaw lai ah hian hma lam pan thei lo a min pawt bet tlat tu a awm thin.





Min rawn chhan let mai tak loh ah chuan status ka en kual a , mi status en kual nuam ti viau mah ila keimah tak hi chuan status te hi ka nei khat khawp ,thla khatah hian vawi 5 ka nei ve tawk mai thei tih vel a ni.





Doroi status ka en chuan ka hmet tawp chut ,sikul kawt a Rinsawma nen a inkuah chial a an lak dun na hi a hmang a , a hnuai ah





*A ni nen hi chuan eng kim hi a hlim awm zel zawng a nih hi "tih thu a hmang tel bawk , chiang deuh in ka en chiang a ,an pahnih a nui hmel chu a der ni lo in thinlung tak a nui an ni tih a hriat bawk , keimah ah che dawt a awm a , ka phurna ve te kha chu khu tah a awm leh daih tawh .





Nitin an inhmu thei tih ka hria ,thenawm lawk an ni a ,an in len pawh awl lo bawk ,chuta chhap ah Doroi sikul ah mi ai a kal lai tak a la ni zui.





Ka en reng lai chuan Rimsawpa a hnen atang message ka dawng a " kan pahnih inkar chungchang "tih te hi a rawn thawn a ,chhan let chak na ka neih hrih loh avang in phone dah in ka mu ta daih ...





Zing lam ah pawh min rawn wish ta thlap , chhan loh tawp ai ah ti in ka wish let ve a, ka nu pawh dam tawh in , duh ang ang in a che leh thei tawh , a chawhmeh huan ringawt a rilru ah a awm bawk nen, feh a tum leh ut ut thin erawh ka phal lo a , chawhmeh lak a hun leh thlawh fai a ngaih chang chuan keimah ka feh mai thin , Sikul kal loh ni anih chuan ka naute pahnih ka hruai tel ve thin .





Kan dawr te tur pawh Pu Hmuna kan kawmthlang a awm mistiri chu kan ruai a , a lian lutuk lo bawk a nihnih ah a peih fel hman vek , ka ni in dawr a zawrh tur a then then a rawn thawn chho tawh bawk nen a zan a zan ah kan unau in kan rem fel nghal vek a , dawr kan han hawng tur chu ka nau te pahnih hi kei ai ai an phur zual a ,nuam ve tak a ni .





Chhuah mai mai kan thei tlang tawh dawn si lo ti in Chhana te in ah kan thianho a thil tih khawm kan rawt a , dawr ka hawng tan dawn a ni a ,kei phei chu a tan tir a ni dawn nen inzir chawp tak meuh meuh a ngai dawn a ,dawr hawn reng duh dawn phei chan chhuah vah vel chu a harsa tawh in ka ring bawk.







Rinsawma lah ni se krismas kan hnaih tawh a ,naupang ho exam zawhna tur siam a lo ngai dawn nen an buai zual hun lai tak a ni ve dawn a , chutin Chhana pawh an nu nau neih a hun tep tawh , chhuah san reng chi a ni tawh biklo ,





Hmingi leh Zikpuii pawh an mahni tawk ah an buai ve em em a , Hmingi phei chu an dawr a ti lian belh zel nen keini zawng ai hian a buai emaw tih mai tur a ni, ngaihzawng han buaipui hman pawh in a khawsa lo.







Zikpuii lah krismas a hnaih tawh avang in kawr thui tur a ngah a , nileng hian khawl nen an inthut chilh nileng zak thin.





"Nakum lam chu pasal ka neih san tawh mai thei che u a ni " kan thut khawm thep thawp laiin Zikpuii chuam a rawn ti chhuak hlawl, hmeichhe ho chu kan te deuh that, ka awm bo hlan khan aizawl ah puan thui a zir a ,a bialpa pawh aizawl lam mi ni in hmaichhan ah la ve hmu chiahlo mah ila,





Hmingi hian a sawi fel em a a, ani hialin fel ti a a fak chu a fel hle turah ka dah hmak ,a kum erawh a naupang zawk zawk tawh bik lo hle thung .





Chhana chuan "Hmeichhe ho zing ah i fing hmasa ta ber a nih hi ,pasal neih hreh tak tak hma hian neih tur zawng a neih vat tur chu ti lo zawng ,mahni in ah duh dan dana khawsa in , midang in a va lawi luh leh te hi in hreh phah ang a , in leng senior thak mai ang ,keipawh chuvang a nia ,kan nu hi ka neih vat " ti in a tawp lam chu a rawn fiam thu a, midang kan nuih hawk hawk hlawm lai in an nu erawh a nui tha duh der lo.







"Chhana sawi kha a dik riau a nia , kei ni pawh Hlusang kan ti ve huk mai dawn em ni " U Sanga'n min melh in a rawn ti





Fiamthu bawk a chhang let in "Thiani pasal neih hma in tih khalh ila a that dawn chu ''ka lo ti let a ,nui chung a ka hawi kual chu Rinsawmpuia nen kan inmelh fuh ta chat , midang an lo nuih lai in thinrim mitmeng tih hai rual lo in hmun dang pawh melh lo in min lo en reng ,a bul a thu Doroin a biak pawn en pawh en lo in a chhang hmuk hmuk a, ka hawisan ta daih.





Rinsawmpuia'n min la melh reng avang chuan ka sa hat hat a , ka biang dawm in ka thaw hak , a melhna ringawt pawh ka lak ah nghawng a la neih nat dan chu a ngai reng.





Eitur kan siam lai in Rinsawma chu ka bul te ah a rawn thu thla , dawhkan ah a kiu nghat in a khabe a dawm a





" Thiana , khati em em a hnai ah va melh lo la ,a chet i ti khawr vek a lawm "Chhana tui in tur choka lam a rawn kal chuan a thianpa awmdan chu nuih zat hmel tak in a rawn ti lang lang ,





" Nang ni hi e nge in awm zia "hrilhhai hmel tak in Hmingi pawn a rawn ti ve bawk , kan inkawp tha leh tawh emaw an ti tih an mitmeng atang ka hrethiam vek .







Ka bul a mi lah in eng mah sawi a tum si lo ,kut nen meuh a tang kawp in " in ngaih ang kha a ni lo . "ti a kan inngaihzawn loh zia thu sawi ka tum chu Rinsawmpuia thu rawn sawi avang in ka ngawi ta daih...





" Kan inkawp tha leh dawn "a rawn ti nih chu ,a mal a ka va sik hlak , ka kut lak let leh ka tum chu vuan bet in a hum a ,a malchung ah a dah hmak ,pawh chhuah tum a ka che ka che chu ka beng bula te zawi te thum fiah tak si hian ''awm hle hle rawh ,ti lo chu " ti in ka hmui chu melh ran in a then sak ,ka che ka tawp chiang teh a sin aw.







Phur tak hiam "awi, in inkawp that leh hi lawm kan duh ber , inthen tawh lo in innei tawh ngei ngei ang che u in hria em ,Thiani saw ka va hrilh ve teh ang" Hmingi chuan ti hluai in Zikpuiii te awmna lam ah chuan a phei nghal, auh zui tum a ka che chhuak tur chu Rinsawma chuan ka kut a a hmer deuh vak a nih chu , ka en chu a lo nui vur vur , a nui mawi teh sawng leh nghal.





"Inbiak fal in mamawh ka ring , sitting room lam ah ka lo va phei a nge ,Mate ka thianpa thusawi kha ngaihthlak sak la , in inkar siam tha leh mawlh teh u , chuti lo zawng a leng tar mai ang " ti in Chhana chu a kal sawn ve leh, Rinsawma lo phun hluk chu rawn hawi let in a rawn la nuih hram .





Kan pahnih chauh a kan awm ta chu boruak a dang ta zar,, zam miah lo leh zak lo ang tak a awn lui tlat in ka melh a "nichin i sawi awmzia kha " ka tih chuan ka kut la kang in a hmui ah a nawr si vang vang ,hahdam ta huai ang mai hian maimit chhing in a thaw chhuak siai siai a,a chezia chu hmuhnawm tak a ni .





Chutah rawn meng chhuak leh riai riai in "kan pahnih inkar hi siam that leh ka duh " zawi sup hian a rawn ti chhuak , chhan na pek dan tur ka thiam lo , duhlo bik chu ka ni lo ,mahse hlauhna leh rinhlelhna hian min rawn chen chilh leh thin .





Doroi nen an inkar pawh zawh fiah ka duh a , a awmdan ka chik a ,tun ah ngat phei hi chuan an inkawp loh zia ka hre tawh ,mahse zawh fiah chian erawh ka duh tho .





"Doroi nen hian " tih te chu ka sawi chhuak , han zawh dan tur kha ka baih vai leh riau pek a ,chiang tak leh mitmeng de sat sat in min melh reng nen lai rual ni tawh lo mah ila ,kum a tam hnu pawn a kiang ah chuan ka la lai ve tho chu a nih hi,





A mithmul chung lam kan zeuh in "sawi zawm la " ti in a thutna chu min hnaih leh zual tur in a siam rem , kan inthut hnaih ta lutuk te chu nuam ka ti chiah lo,midang an rawn lut thut ang tih hlau reng reng in ka meng kual hrek hrek .





Chhana chhungte chu in ah an awm lo tih chu ka hriat sa a nia , an ni chu eng nghelh ber ah ka nei lo , a la tlai chhe lo a ,an rawn haw vat ka ringlo bawk , kan thiante tu emaw ber an rawn lut thut ang tih chu ka hlau ta ber in ka hria .





"Min hnaih chilh lutuk " ti in ka tawlh hnung hret ,min si chet a a thut mai bak ah ,ka kut hum in a a khabe ka lu chung ah a nghat vang vang nen ka thaw dep dep a,





Eng ah mah ngai lo in a awmdan ngai in a awm lui reng tho "Doroi chu sawi zawm la " dam dap in a rawn ti chhuak sup .





"In inkar ah eng inlaichinna nge awm , ka sawi awmzia chu , thian ni lo " ka ti bah nuai , nui ruh ruh a min melh in "ka ruahmanna kha a thawk ni maw " a rawn tih leh sup chuan ka bang bo viau mai , eng ruahmanna nge a sawi hi ka hrethiam chiah lo.





"Tun hi chu sawi hun tak a ni in ka la hre lo , hei ai hunthawl tha kan neih hun ah ka hrilhfiah ang che "ding in ka kut chu a hmer zeuh a , a thlah ve ta bawk .





Sitting room lam ah kan phei a , Doroi bul ah a thu leh dawn a maw ka tih lai in ka bul chet ah rawn thu thla in " Kan thil ei tur siam chu ei tawh dawn ila "midang melh kual in a ti zang vawh , kan thil ei lai leh a hnu lam thleng pawn ka kiang ah a awm ta chawt, chu tia awmdun mang ngai lo kan han awm dun chu puitling thil man thiam thah awm khawm vek kan ni bawk a, rindan tawk an nei theuh ang.





Doroi pawh in min ngaihven tih hairual a ni lo , kan lam a rawn thlithlai deuh reng te chuan nuam lo min tih tir deuh ,mahse nula fing tak a ni a ,midang tana ngaihbel theih tur in a khawsa lo , chik viau lo ila keipawn Rinsawmpuia a duh tih ka rin thiam theih ka ringlo.







Inchhung lut hmasa lo in dawr ah chuan ka luh pui a ,ka hnial deuh na chu sawi dun tur kan nei ti a atan tlat avang in an in ah haw lo in min zui haw a , ka chungte an mut tawh ka rin avang leh a hma tawh hran loh avang in in a luh pui lo a, dawr a luh pui ta ka ni .





Dawr a thutna tur kan dah ah chuan a thu thla a, a bul ah ka thu ve bawk ,dawr chhung chu en kual in" dawr a zawrh tur thil te i nei nghal thlap a law "a ti he haw chu, ka ni ka chah lawk thu in ka chhang mai a ,





Dawr chhung a kan rem erawh tam a la ni lo , naktuk lam ah emaw a tuk leh lam ah rawn thawn chhoh leh hman a tum a,, pawisa ka thawn zat in a daih zat zat a lei mai dawn a ni.





A ngai te bawk in ka kut ka malchung a ka dah chu a pahnih a rawn dawm in a hmer kawp vang vang ,mitmeng beiseina khat a min melh in " in inkar ah engmah a awm tawh lo tak tak em , "tih min zawt a, ka lo buk nghat chuan a ha var lang that in a nui .





" Bul kan tan thatna dal tu an awm tawh lo tih na a ni mai lo mi ,ti hian kan inkar chu inngaizawng ti a sawi theih kan ni nghal"a ti awlsam then , hlim hmel tak in a nui leh thin.





" Doroi kha " ka lo tih zeuh chuan ka biang chu a kut a rawn nul zeuh in "i rilru hriat nan ka hmang a nih kha , ka rin ang ngei in i thik bawk a, " a tih chuan ka ner nang nang , lui kan kal a min biak duh loh dan te ,Doroi ngaihtuah lutuk ang a a awm te kha ruahman lawk vek a lo nih chu a .





"Mahse , ka auh na leh kal lo tur a ka tihna che hre duh lo der in , hlim tak a awm tur leh ka nun a rawn inrawlh tawh lo tur thu i sawi si a " ka tih chuan a thaw ham ham , ngaihtuah tam tak nei hmel a rawn pu a,kha zan kha ngaihtuah let leh tih hai ruallo in hrehawm tih hmel tak in a thaw chhuak ta hawk ,







A rilru ang tho hi ka pu ve ,kha zan zet kha chu a hrehawm in a hahthlak tak zet , ka mipa hmangaih ka nun atang kal bo tur auh let tum a zah pawh sawi lo a ka auh vak lai te ,tlai khaw hnu ah ka la hmangaih zia ka hriat chhuah leh tak lai te , Simona nen kan inkar ka tihtawp tak lai thleng chuan ka mitthla let uar uar thei , kha zan zet kha chu ka tah hnem ber zan a ni ngei ang , khatiang thil , buai chuar leh lungchhiatthlak lutuk kha chu hmachhawn nawn leh pawh ka duh tawh lo ,ka inhuam tawh hek lo bawk.







"Kha thu ka sawi lai kha chuan ka ti tak tak , i mitmeng ah min la theihnghilh bik loh zia ka hmu a , chu mi den chhen a rawn be thin che pawh ka ni , mahse thil hriat chhuah ka nei ta a,i thinlung nasa tak a hliam tawh tu ka lo nih avang in ka lak ah rinna i nghat ngam tawh lo a , ka kiang ah lo let leh pawh ni la,min thlamuan pui theih ka rin tawh loh avang leh Simona nen khan in nghet viau tawh ni in ka hria a , tihbuai tawh loh che a , hmalam pan tum ta ka ni " a thinlung chhungril ber atang a chhuak ni mai awm a nghet in a ti ban charh ,





Zawi te in"mahse tun ah tiang hian i che leh bawk si "ka ti sep , ka nun ah inrawlh tawh lo a inthiar fihlim a tum a , mahse tun ah kan inkar siam tha tur in hma a la leh si.







A chal ti chuar tap in " sawi ang ngawt a awlsam a ni leh lo te pawh a niang , tun thleng in i tello chuan hmalam ka la pan thei lo chu a nih ber hi a , " rawn ti nghut in ka dar ah kut rawn nghat in a awm ah rem leh rem lo in min kuah bet ,hnial tum na ka nei lo , hetiang a min kuah lohna chen rei tawh zia ngaihtuah ran chungin thlamuang tak in ka bei ta hle hle .







Ka nghawng chu a hmui in a rawn nawr leh ne ne thin mai bakah ka hnung chu a kut a chul thla riai riai in " In inkawp tawh loh thu i sawi khan keimah ah cho na thar lian tak a lo awm a, nang men hma hun ka lo suangtuah thin ang kha tawng thei tur a tan lak bak ka ngaihtuahna ah a awm thei tawh lo "ti sup in nghet tak in min kuah bet zui a.







Kan pahnih hmahun kan duan lawk leh suangtuah thil te kha harsatna kar ah ti hlawhtling tur in, invuan dun tlat chung in ke kan pen dun thei tawh ang a , kan hmalam hun a kan thil lo tawn tawh zo zai te khan chakna thar min pe in , beidawnna kar ah pawh beiseina mei de zeub zeuh chhawm nun zel hlut zia hre fiahtu te zing ah kan tel theih ngei ka ring





Rinsawma nen pawh sawi buai awm lo in inngaizawng ti a chhal theih kan ni leh tawh , kan thiante pawh in min lawmpui hlawm viau a, a chang erawh in kan nunhlui leh kan inthen boruak sawi a min chhaih an ching thin erawh , za lo deuh in kan nuih liam pui ve zel ,an sawi chak zawng ber a ni tlat nen khap sen pawh an ni thin lo.





Kan dawr ah pawh thil chi hrang hrang kan zuar kim thawkhat viau tawh ,beisei phak loh khawp in dawr tu kan hmu tha phian zel te chu a lawmawm in min tiphur thin khawp mai.





December thla kan han chuang kai chho a , boruak a dang ta zar , mitin rilru ah krismas lo thleng tur bak a awm meuh tawh lo, kum tir phat atang a kan nghahhlelh thil a ni bawk a,boruak ken tel tam tak a nei , mi thenkhat in hlim tak a kan nghah thil ni mahse ,thenkhat erawh in an hmangaih mual liam ta te ngai a in dawm kun reng an awm bawk.





"Zanin chu ka rawn leng hman lo ang , KTP branch committe an ko a " a rawn ti dut dut , a hman chang apiang hi chuan a rawn leng a ,kum lam a kan naupang chhe zawk zawk tawh lo bawk a , a hma a kan inngaihzawn dan ang ngawt kha chu kan ni tawh lo ,thu ho mai mai a inhnial leh thinrim tih vel pawh a awm tawh lem lo.





"Pawilo inleng ka ngah tho , ka lungleng hman bik lo tur ah ngai ang " ka ti zeuh chu a rawn pawr leh hlar"Hlusangzual ,ka rilru nawm loh nan a thil sawi hi thiam viau suh aw "a rawn ti nghut nghut chu ka lo nuih san,







Kan veng tleirawl rual ho hi dawr kawt a thuthleng kan dah ah hian zantin deuh thaw rawn thu in ,games an rawn khel khawm thin a , ninawm chang awm thin mahse an han awmloh chiah hi chuan khua an ti har lek lek zel.







" Ka fiamthu mai mai nih kha "la nui reng chung a ti in " I bialnu hlui helam ah a rawn awm rih tih ka hria a nia ,nang hi chu lam a len tum in committee i rawn chhuan lam chiang "ka tih zawm a, zanin chu ka phawk a chhuak emaw ni , han fiam kual vel chu nuam ka ti tlat.





Rawn chet hluk in " Ruih i nei emaw ni , thil ni lo lo rawn sawi suh "" a rawn ti ta hmuk a , a insiam pah emaw a ri leh deuh sut sut thin.





"Ka hmuh hun ah che ka duat hlak ang che " amah bawk chuan a rawn tih zawm leh , min hmu thei lo tih hre reng mah ila ka hmel ka lo siam chhe nasa, a kal a hun tep tawh avang in rei pawh kan inbe zawm ta lo .





Zan dang ang in dawr pawh ka hawng rei lo a , mutchhuak in min zem chiai chiai reng a, ka men luih hlei theih tak miah loh avang in Rinsawma committee zo min lo biak leh hun pawh nghak chhuak zo lo in ka muhil ta daih .





Chawlhni chawhnu inkhawm ban ah Rinsawma nen kan leng dun a , a ke a dam chiang tawh bawk a a bike in ni kan in phur chhuah.





A hla hran lo bawk a , in ngaizawng leng an lo awm ve zut mai , kan khaw mi ai mah in khawdang mi an tam mah zawk.





Tlem a fal deuh ah chuan kan thu dun a ,hun thawl tak kan nei khat bawk a,tiang a kan pahnih te a tu ma chim buai phak lo a kan han awm chu eng emaw kawng zawng tak in a hahdam thlak tak zet .





"Lo tawlh hnai rawh" a tih rual deuh thaw in ka chet pawh ngai lo in ,a hma ah a mah si chet in min pawt phei a ,min kuah zui than bawk.





"Ka zawt ang che ka tia ka theihnghilh leh thin " ti te te in ka nghawng chu a rawn tuai zeuh "engtik ah mah phelh suh ti a ka thi awrh tir che kha i la kawl tha em " a rawn ti chu nuam lo ka ti tak tak , inthlahrung ru tak chung chuan "kan inthen tirh kha chuan ka la dah tha reng a ,mahse lawng a ka thawh tak hnu khan kan zin chhuahna tuipui ah ka paih bo daih "zawi tak hian ka ti sep .







Kha thi ka paih bo dawn khan thutiam deuh reuh ka nei a ,Rinsawmpuia theihnghilh a nun bul tan that tum in ka intiam a nih kha .







Min kuah nghet zui salh in ''umm, ka hrethiam , ka thiamloh vek a ni, rilru na tak in ka siam che a, min ngaidam nawn mawlh mawlh teh " aw khur lek lek in a ti a, ka sam chu hui kiang in ka nghawng chu a hmui lum thar thar chuan a ti si vang vang,







"Tun ah chuan i rilru natna thlen sak leh che ka tum tawh lo , i beisei phak bak hlimna pek ngei che tum in ka bei ang " nghet charh a ti in ka khabe ah a dawm a, a lam hawi a min kuai her deuh in "Nitin hian i hmeltha zual emaw ni " a thusawi avang chuan hnuai lam melh zeuh in a nui huk , lai ru deuh in ka lo nui ve , chiang tak leh hnaih chilh tak a ka hmuh apiang in amah ang tho hian a hmelthat zia ka hmuchhuak thar leh thin ,





"Nangpawh i hmeltha " zah lam a lang tawh lo , a hmelthat zia hi in hre ve se , midang in hmeltha an lo tih ve kher ka mamawh hran lo , kei in hmeltha ka tih chuan chu thil chu a tawk em em mai a ni.





"Tak zet " a mit a ti zim sun a ,uar tak a ka lo buk nghut nghut chuan ha hmai lang tha a nui in a ka hmui hnuai lam chu a tuai heuh heuh , "Ka lawm e ," ti a ka hmui chu rawn fawp in , dam leh ril zet in a chet zawm a ,a tawp mai dawn emaw ka tih lai in reilote chawl zeuh in, a thaw chhuak ham ham ,a chezia thlir reng chung a ka lo thaw ve dap dap chu ngainat awm zet in min nuih a, ka tukhum ah dawm in min rawn fawp zawm leh mial mial , ka hmui ka tihchet ve chuan thaw hrawk in a ai uar mah in a chet zawm a , kan khawvel siam chawp a chuan tu dang kan ngai bik lo , hringnun hi a nuam a , ani nen chuan engkim hi a mawi zual thin.







Ka hmui hnuai pet zeuh a inla hrang in "zei ve tawh hle mai " a ti chiah chu a awm ah ka beng ri thlawp , mitmeng hriam lam mah a ka melh chuan nui huk in a lu a thing "ka fak che a nih chu , lawm rawh " teh ngawt thin a , ka biang leh lam leh lam ah dawm a, a piai chu duh lo in a taksa rem lai lai ah ka lo beng ve a, eng teh vak ah mah a ngai lem lo a niang ka biang a piai na pawh a thlah phah lo hrim hrim .





"Duhno " ti hluai in a kut a dahthla a, amah hmachhawn zawng a min thut that tir leh te te in "kum thar kan ah chuan inneih lam rilru ah dah tan ila " ka sam thli in a rawn chhem darh nuai chu min siam rem sak mawlh mawlh .







La inpeih lo deuh mah ila sawi buai lo in ka bu ve ta nghat tho , rilru in ruahman na tam tak a lo nei ve na chungin ,kan pahnih duhthusam te dan tir nan a hman tur khawp a pawimawh a ni in ka hre lo thung.