Patea te in kan thlen chuan kawngka bulah min lo nghak ṭhap a, bungrua vel chu an lo la nghal vat vat hlawm a, Wheelchair a awm tawh bawk si lo nen Ngaihdami chu Car aṭangin ka pawm chhuak a, a lo meng deuh kawk chu ka hmu a, ka nui ringawt.
"I ti mah mah" ka dah thlak rual chuan a ti a, leh lam hawiin a biang a dawm deuh vang vang a "Nuam lo i ti em ni?" ka tih chuan min chhang tawh lo, U Bebeti a lo lut zui ve ta bawk nen kan in be chhunzawm ve ta lo, U Bebeti nên chuan an ti ti siam siam a, an sirah ṭhu in ka lo en ve dauh dauh a, an ni chu kan awm ve tih hria ang pawn an awm lem lo thung.
"I dam veleh Bike in tlan siakna ah ka hruai ang che" U Bebeti'n a tih rual chuan "Hey" ka lo ti nghal vak a, U Bebeti chuan min nuih ṭha in min lo en a, kei erawh ka meng rum hle thung, "In tih thawven a mamawh dawn sia, ka sawi mai mai a nih kha" tiin min la nuih tlawn ngar ngar a, Ngaihdami chuan, "Awle chutah chuan ka kal ve duh" nui sâng in a rawn ti chhuak hlawl a, tumah chu min en lem chuang lo a, "A ṭullo" ka lo ti nghal hmuk, "Ka kal ve duh tho a lawm" a ti leh a, min en ta nge nge a, "A ṭha lo" ti hmukin ka chhuah san ta daih.
Ngaihdami's P.O.V
"Mak thei bet but si, thinchhe si" tiin a thla chu ka ṭawng a, ka hau mawlh mawlh a, a kal liam tawhna lam chu ka en reng bawk, "In tlan siakna ah a tel ve ṭhin a, a rawn kal tawh chuan kan pahnih in kan chhuak ru ziah" U Bebeti'n a tih ve chuan ka en vat a, "Nang tê pawh hi i hmêl en ang ai hian i ti kim zêk mai" nui chung a ka tih chuan a nuih za za ah a ṭang a, kan nui dun ta chiam kan bul ṭan dân in a zir bawk a, thil ho te te ah pawh kan nui dûn uar uar zel a, kan chhûngte ho an ngaih a lo ṭha lo viau maithei a ni.
"U Bebet, Patea'n lo kal teh a ti" Zomuanpuia chu kan awmna pindanah a rawn dâk a, U Bebeti chu a rawn en ram ram mai, naupang chhia deuh in, "Min hek a ni maw?" U Bebeti'n a tih chuan a duh lo ve hle, "Tlangval ka nih hi, mi hek hek rual pawh ka ni tawh lo" a ti hlur a, U Bebeti chuan kan in en a, kan nui leh chiam phawt, "Engnge maw in hriat ni? Kal vat vat rawh" Zomuanpuia chuan tiin a mah chu pindanah chuan a rawn lût a, U Bebeti ṭhutna bulah chuan a rawn ṭhu ve nghal a, kan in hnaih lutuk vang chu a niang, ka thaw ṭha leh thei tawh lo, Car aṭanga pindan thleng min pawm pawh khân ka thaw lo char char ang vel kha a ni a, a bula ka awm dân hi a dik miah lo.
"Tinge? I awm a nuam lo em ni?" hlauhthawn hmêl zet a tiin ka pang a rawn dek a, chu phei chuan min ti buai leh zual, "Ai,,, Aih ka ṭha" ti bah nak in a kut chu ka paih sawn vat a, ka awmdan vang chuan a hamhaih hle tih chu a hriat theih.
"Ihh tihpalh" kan ti leh ringawt a, a bu nghut ringawt, "Heta awm chu i huphurh em? I hriatchian loh vek an ni hlawm si a" a tih chuan ka ngawi deuh vang vang phawt a, a hni fe ah, "A dik a dik chuan keima pi pawh ka hre lo a, ka hming takngial pawh ka hre lo a ni a, hrilh chu a hai duh khawp mai, keimah pawh hi ka tan chuan hmelhriat loh ang vel ka nia" ka ti duah a, ṭawng lo in ka thusawi ah chuan a lo bu nghut nghut ringawt a, ka sawi zawm zel, "Ka thil duh emaw ka huat zawng tak pawh ka hre lo a" ka tih leh lai chuan "A ṭha zawk" a lo ti sup ni maiin ka hria, a ṭawng zawi lutuk a, a thusawi ka hre ṭha thei lo.
"Maw?" tiin ka melh ha a, a lu lo thing nak chungin, "Engmah ni lo e" a ti leh daih a, "Awle, a nih chuan dawt sawi miah lo in sawi la eng ang mizia nge ka neih? ka sual nge ka fel? Ka ṭawng duh nge ka ṭawng tlêm?" ka ti a, ka rilru a zawhna awm zawng zawng ka la sawi lo zawk a.
"I fel lutuk" tih ringawt in min chhang a, ka duh khawp lo hle, "Zomuanpui, ka uang lo a nia" ka tih lai chuan ka zawhna pehhel tum in, "Ehe Nutei chuan i pindan tur chu a lo va chei mawi ve a, hei te hi pangpar a ni maw" a ti daih a, "Zomuanpui, ka be tawh lo mai ang che" ka tih lai chuan kapi in a lo ko ta daih a, rang zet chuan a tlanchhuak nghal daih a.
Zomuanpuia's P.O.V
"Muanpui enteh, Duati hi ka ngaih a ti ṭha thei lo, aputea nên pawh kan in bia a, a ni pawh a ngaih a ṭha lo ve tho a, kan dawt hrilh zo zai hi hrechhuak ta se mi haw ngei ang" Varanda-ah chuan kan ding dun a, kapi chu a ṭap hlawp hlawp a, ka lo kuah vat, "Pi chutiang in ngaihtuah suh tumah hi min haw lo ang, a ṭhat ba atâna ti vek kan ni a, a hrethiam em em ang" tiin ka lo hnem ve bawk a, "Naupang tê a a thil tawn hi rapthlâk ka ti em a ni" kapi chuan a ti leh a, sawi ve tur ka hre tawh lo, kapi chu ka kuah tawp a, ral lehlam chu ka thlir ta daih a.
"Dik tak chuan a hriatna hi nei lêt lo mah se a pawi ka ti lo, a nun a lo hman tawh ah kan hriat chin pawh a rapthlâk a nia, kan la hriat loh a awm phei chuan tun a a thil tih ang hi a tih nawn leh mai ka hlau a ni" kapi chuan a ti leh a, ngaihdan thar ka nei a, "Pi Ngaihdami pa hi helamah Jailah an rawn thawn thla tih ka hria a, kan zuk hmu dawn em niang, eng ang pawn sual mah se apa a ni a, a fanu thil tawn chu a hriat pui ve ngei angnga, min hrilh theih te a nei maithei a sin Ngaihdami enkawl dân te pawh kan hriat phah a nga" ka ti a, a mah hmuh chu peih lo viau mah ila Ngaihdami tan a nih chuan hramhmuna kal pawh ngai se ka kal hreh lo ang.
"Awle, Muanpui, iPutea pawh ka'n bia anga ka'n rawn ve ange" Kapi chuan a ti leh a, Ngaihdami a mah a awm tîr rei chi a nih loh vangin a pindan lam chu ka pan leh vat a, mah se kawngka bul ka thlen rual chuan ka ding chat, Ngaihdami chuan a kawng ban tlawn kan hak tîr chu a lo phelh a, darthlalang hmaah chuan a taksaa a ser te chu a lo en kual chu niin "Ngaihdam" ti ṭhawt in ka chhia leh ṭha hriatna a rawn lêt rual chuan pindanah chuan ka lut a, puan la in a taksa chu ka khuh vat a, eng emaw a hriat chhuah phah ka hlau takzet a ni.
Ka hlauh ang ngei chuan eng emaw a hrechhuak tih hriat zet chuan a lu chu na tih hmêl zet in a dawm a, a hnunga bang chu a ngheng rawk rawk a, a lam pan chuan ka tlan phei nghal vat a, ka pawm bet nghal, "Ka duh lo, tawp rawh, khawngaihin tawp rawh" a ti mawlh mawlh a, a tal velna lamah bungrua a ti tla rum bawk nên midang ho chu pindanah an rawn lût ve vat a, "Engnge thil awmzia?" tiin Nutei chuan min rawn pan nghal a, kapi hmêl pawh ka hmu ve nghal bawk, "Khumah ka'n mut a nge" tih leh pawm kân ka rual a, midang pawh chuan min lo zui vat a, Ngaihdami hnar chu a rawn thi leh a, muangchâng in nikhaw hre lo in a awm zui ta a.
"A ser te a hmuh khân eng emaw hriat chhuah chu a nei a ni" kan thusawi a lo hriat palh hlau in pindan aṭang chuan kan chhuak a, kawngka bulah ding mah ila kawngka chu phui takin kan khar thung, "Kha mi ah kha chuan tih theih kan neih pawh ka hre lo, eng ang pawn lo zep mah ila a ser te a hmuh sâwn eng eng emaw hriat chhuah chu a nei zel ang, a ser te ti reh vek tur sâwn tih theih kan nei si lo a" Patea chuan a ti charh charh a, kapu rilru hah lutuk chu a lang tar zual sawt sawt ni ber in a lang.
"Helai hmuna awmpui reng ai chuan kan khaw lamah haw pui vat ila a hriat tur ang ang chu hria pawh lo ni se, a pawi pawh ka ti tawh lo" kapi chuan a ti a, a mah mai a he buaina hmachhawn hi harsa a ti a ni mah na, "Ni e, a ṭhat zawk ka ring keipaw'n, Aizawl ai chuan in khaw lamah boruak te pawh a ṭha zawk anga a dam hma zawk ang" Nutei pawh chuan a lo ti ve a, kapi chu a dârah a kuah deuh ran bawk.
~~~~~~~~~~~~~~~~~~~~~~~~~~~~~~
"Engnge i lo tih dawn?" Ngaihdami pa chu a hmelah a lungawi lo tih a chiang reng, "Duati chanchin i lo hre ve tawh em?" Kapi chuan a ti deuh sap a, Ngaihdami pa hmelah erawh kapi thusawi a hrethiam lo tih a lang reng, "Khami tlai khân Duati chu anu thlan bulah a lo in khai kan va hmu a, tunah chuan a ṭha tawh a, mah se engmah a hre tawh lo" kapi chuan in seh ruh ṭun chungin a ti a, kei erawh in Ngaihdami pa hmêl chu ka lo en deuh ran ran thung, a tîr lamah chuan a hmelah danglam zawk a awm ve tih ka hria mah se a in siam ṭha vat a, kapi ngawih hnuah, "A thil tih zahpuiawm tak tak te engmah a hre tawh lo chu a tih zia a nih chu" a ti a nih chu, kan bulah Police te awm ve lo se chu ka khawih hrep duh ang, "A hringtupa i nih kha, i fanu dinhmun kan hrilh chung che pawh in chutiang chauh chu maw i sawi dawn" kapi chuan aw khur dar dar in a ti a, kei erawh ka ngaihdan a pelh em vangin ka ding deuh hluai a.
"Pi kal ang, hetiang mihring hi biak biak a ṭul tawh lo, mihring pawh a nih nek loh hi" tiin kapi chu ka kai a kalpui nghal ka tum a, "Kha mihring khân eng thil nge a tih pawh in hria em ni? Anu ang chiah a nih kha, hmeichhe tenawm" a tih leh chuan ka in her vut a, kapi chuan a theih tawp a min lo dawm beh vangin thei mah ila kapi tihnat ka hlauh vangin ka tal chhuak lo.
"Hmela, i ka bawlhhlawh khân vawi khat mah Ngaihdami hming emaw a chungchang pawh lo sawi ve tawh suh, a bul a i hmêl i rawn lan leh a nih chuan keimah hian" ka tih lai chuan a rawn nui chhuak a, "A duh a ni maw, ka hrilh ang che, hmeichhe tenawm a nih kha, sawnpai tawh a sâwn pai pawh duh tâwk mai lo a ti tla leh tu a nih kha" a ti leh chiah chu ka in sum hman tawh lo, ka hnek nghal chawrh a, a thal tawh hnu chu bawh zuiin ka hnek deuh chawrh chawrh a, Police duty te chuan min lo dang vat a, chuti nilo se ka....
Ngaihdami's P.O.V
"U Bebet khawnge kapi leh Zomuanpuia hi" U Bebeti'n ka chaw tur a rawn ken vang chuan ka lo zawt a, kapi leh Zomuanpuia bakin chaw min pek ngai loh vang a zawt ka ni, "Chhuahna tur pawimawh an nei a, an kal lawk a nih kha an rei lovang" tiin nui sâng chuan min chhang a, a nui hmêl chu ka lo en vang vang a, hahdam thlak ka ti takzet, mi hlim taka an nui hmêl ka hmuh hian nuam ka lo ti ve em em ringawt zel a chhan pawh ka hre lo, ka nui khât a niang.
"Takin chaw hi ei zo la, kan in kawt velah ka tei pui mai mai ang che aw, kal zir pah a ni mai a" a tih takah chuan ka phur hle, chaw pawh chu ka ei vat vat a, U Bebeti chuan ka hak a lo hlauh em vang chuan ka bowl te min lâksak tawp, kan nui dun leh hak hak ṭhin bawk a, a bula awm hi chu a thlamuanthlâk takzet ṭhin.
Chaw ka eikham chuan a sawi ang ngeiin min hruai chhuak a, a mah chu kuah in a mah rinchhan chuan ka kal ve bek bek a, pawn boruak ṭha hîp chu nuam ka ti takzet, "Nimin a nikhaw hre lo a i awm khân hriatchhuah i nei em?" ṭhutna lo awm hmasa ber a min ṭhut pui pah chuan a ti a, ral lam chu en deuh vang vang in ka mit ka chhing a, ka mitthla a thil rawn lang fiah lo tak tak te kha ka ngaihtuah lêt leh a, "Tu emaw hian kut min lo thlak chiam a, chuan..." ti leh in ka ngawi deuh vang vang a, "Ka hrethiam niah nuah lo, ka hrechiang lo lutuk a, mah se hêng ser te ka neih chhan chu a chiang hle in ka hria" ti a U Bebeti ka en chuan min lainat hmêl tak hian min en niin ka hria.
"A nih leh i thil lo tawn tawh te kha hriat chhuah leh vek i duh nge hriat i duh tawh miah lo" a tih chuan chhan thiam har ka ti hle, "Ka hrethiam lo, nimin a ka thil hriat te ka hriat hma kha chuan ka hre chak a, mah se nimin a ka thil hriat chhuah ṭhenkhat te vang kha chuan ka hre chak lo, khatiang hlîr kha a nih dawn phei chuan" ka ti a, nuih luih chu har tak a ni.
Zomuanpuia's P.O.V
In ka luh dawn chuan in piah lama ka mi va hmuh te vang chuan ka ding deuh chawt a, ka en reng ringawt, Apa thusawi te kha thu dik a ni angem? Nge ni a Ngaihdami sawi chhiat a duh vang mai mai ni ang? Ni e ka thu hriat te khân min ti na takzet a ni, mah se khatiang mi kha Ngaihdami a ni theih ka ring phal bawk si lo, a ni lah in a thiamthu sawi turin engmah a hre tawh der bawk si lo.
Chhunzawm leh tur.
In sawifiah leh lawkna
Hman zan khan ka dah ang ka ti rêng a, mah se ka phone ka ti bo a, ka rawn dah thei lo a, tunah ka hmu leh tawh a, ka rawn dah nghal a ni e, rei tak ka dah loh vangin min ngaidam dawn nia.