Perfect (Chapter-3)

[Rebec Nunziri]

Chapter-3



Lalchhandami POV




Class ka lak zawh chuan office lamah ka kal a, ka phone a ri ve chiah bawk, no hlang atang a ni a, ka chhan chuan tunge a nih ka hre mai lo, mahse a in sawi takah chuan Christ-a a ni tih ka hre nghal. A nau nen an lo kal mek thu a sawi a, zingah ka pa ka be tawh bawk a, buaina a awm loh thu ka sawi chuan a lawm hmel hle, class ka neih mai tawh loh avangin phone ka khawih a, Christ-a te an rawn thlen chuan kan in be khawmuang a. Ka pa room a kan luh chuan ka pa in a lo be vat a, a school luh na hlui ah a thiam thei pawl a ni a, ka pa pawh in kan school a lut turin a duh hmel khawp mai, admission te an tifel nghal vek a, ka class ah a awm dawn a ni. Christ-a nen kan in be leh a, a nau hnenah tha taka lekha zir turin a ti nghal bawk, second period thleng chauh kan la kal bawk a, exam a hnai ve leh tawh bawk nen vawin atang class a tan ve nghal dawn a ni.




Class thleng ka thlah hnuah ka chhuak a, chhun thil ei a hun tep tawh bawk a, Christ-a nen chuan ei dun kan tum a, kan school bul mai restaurant ah chuan kan lut a, eitur kan chah hnuah kan titi mawlh mawlh a, a nau chanchin te chu min hrilh a, mathematics a thiam thu a sawi chuan ka lo phur khawp mai, mathematics hi ka subject ngainat ber a ni a, chuvanga mathematics teacher ni pawh ka ni. Kan eitur a rawn thleng a, ei pah chuan kan la tawng mawlh mawlh, kei aiin kum 3 chiah in a upa a, an chhungkaw sumdawnna an motor zawrhna dawr chu a enkawl mek bawk, amah a hmeltha in a palian bawk si a, hmeichhe tamtak in an atchilh ngei ang tih ka hria, U Zonuna hi ka nunah rawn in lan lo se chu kei ngei pawh hian ka duh ngeiin ka ring, mahse thian ang bakin ka en thei tlat lo.




"I bialnu chu min la hmuh tir ve rawh aw" ka tihchuan a nui suk a, "Ka ti mai mai a nihkha, bialnu ka hmu zo ve lo, tuman min duh lova" ka ner nang, "I over e, hun reilote liam ta khan i bialnu chanchin min hrilh reng kha" ka ti hlak a, a lo nui chhuak hawk hawk, "Ka ti mai mai a nihkha bialnu ka neilo, a hma chuan ka nei thin a, mahse kan in then na a rei tawh, tunah chuan hmeichhe pakhat vei em em mai ka nei a, kan in hmuh na a la reilo, ka hmuh tirh atang ka mit a la in ka vei nghal em em bawk" tunge ka hre chak hle mai, chutiang takah a mit la tu hmeichhia chu a chhe theilo hrim hrim. Tawng ka tum lai tak chuan hmeichhe pakhat te that ri ka hria a ka hawi sawn vat, nula pakhat hian dawr a hnathawk ni awm tak chu a lo ankhum bawrh bawrh a, tunge a ankhum chu ka hrelo thung.




Ben tum a a kut a lek chhuak chiah chu ka thutna tang tho in an lam chu ka pan vat, chunu kutah chuan ka man chawt a, min rawn melh nghal dawrh a, "Tunge I nih phiangsen a, ka kut hi thlah nghal rawh" thinrim zetin a ti that a, "Ka pi, enge thleng chu ka hrelo, mahse kut chu thawh suh" dam dap chuan ka ti a, "Lo ngawi hmak rawh, i rawn in rawlh na tur pakhat mah a awmlo, he hmeichhe naupang hian enge a tih i hria em?" tih pahin a ankhum nu kha a kawk a, ka en chuan ka meng awk a, Tlanchhuahi a lo ni, vawinah school a rawn kal lova, hetah hian enge a tih. Ani pawn chuan min rawn en a, a kun lehnghal daih bawk, "Enge hetah i tih a, tinge school i kal loh?" ka ti a, "In in hria maw, a tha e, ka kawr ah thei tui a rawn ti bua a, engtia tih nge in tum, ka kawr hi man to tak a ni a, in chawi ngei a ngai ang" ka en lehnghal ngar a, "Ka pi naupang mai a ni a, bakah tih luih vanga I kawr a rawn ti bua a nih ka ringlo, ngaihdam pawh a dil ngei che in ka ring" ka ti let sak a.




"I va han zaktheilo em em ve a, he hmeichhe naupang hian a ti lui chiang alawm" a au ring bawk si, dawr a chawl dang te chuan min en thup, mahse zahna ka neilo, a ni ber a zah loh chuan engvangin nge ka zah bik tehlul ang ni, "Tlanchhuah i tih luih em ni?" ka ti sep a, a la naupang bawk si, a zak bawk si chu a mittui a tling pam a, "Ka tihpalh a ni, ka kal na turah khan a ke a rawn dah a, ka lo in ring lawk bawk silo nen ka pal a, ka thei tui ken lai kha a kawr ah ka ti bua a" hawi pawh a rawn hawi chhuak ngamlo, dawt a sawi lo tih chiang takin ka hre bawk. Chunu lam chu ka hawi a, nula in chei nalh tak a ni a, mahse a mizia hi a thing ru riau, "Ka pi a tihpalh a nihchu, mahse i lungawi thei ngang lo a nihchuan pawisa engzah nge i phut sawi rawh, ka pe ang che" ka ti a.




"Kut dawh emaw min ti em ni?" a va buaithlak e aw, "Ka pi kut dawh ka ti hauh lo che, mahse i sawi tawh kha, kan chawi a ngaih tur thu I sawi a, engzah nge kan chawi ang tih ka zawt mai che a ni, chutah chuan buaina tur a awm em ni?" ka ti fak a, "Kim" chu aw chu ka hrechiang lutuk tlat, ka sir lam chu ka en a, U Zonuna chu a lo ding run, "Duhtak i lo kal maw, he hmeichhe naupang hian ka kawr ah thei tui a ti bua a" a ti nem duai a, nichin ah lem a aw rawl tawp tawp in a au a nia, "Kan tihpalh a ni ka tih tawh kha, buaina dang siam belh tawh lo hian i kawr man chu engzah nge sawi la ka pe nghal dawn che nia" U Zonuna chuan min en reng a, en let duh lovin a bula hmeichhia ding chu ka en char char thung, chuan he hmeichhia hi a bialnu a nih ngei pawh ka ring, a koh dan atang khan.




"Nang hian engtinge min pek i tum, eng ang pawn min pek tum la, i thei lovang, ka kawr man hi i thlakhat hlawh ai pawn a tam zawk tih hria ang che" ka ner sawk, a man zat chu min hrilh mai theilo em ni, engvanga inhnial na tur chawk chhuak reng nge maw a nih le. U Zonuna chuan a ban a kuah hnap tu hmeichhia chu en in a phun zui hluk a, a kut chu a lasawn nghal zat bawk, "Ka pi a man zat chu sawi mai rawh" fiah takin ka ti leh a, ka hne tawh takzet, ka in sum theih loh chin a thlen chuan a pawi viau ang. "Engpawh nise i nei zo ngai dawn lo min pek chu tum buai duh suh, tun hnuah chuan in lo fimkhur tawh dawn nia, i nau kha tha takin enkawl la nundan mawi zirtir angche" ka kut chu hum ruh tak ka ni, chutianga ka student chanchin a sawi ka phal reng reng lo, a mah zawk hian buaina a siam a, au chiam chiam lo nise hetiang teh hrep hian kan buai lovang, nundan mawi chu amah hian zir a ngai ber.




"Sawnu saw a zaklo e, tunge sawtianga a tih saw a hre miah lo a nih saw, Wisdom School neitu fanu a bia tih reng reng hrelo in sawtiang sawn a be ngam a nia, a kawr man te mai mai chu an chhungkaw thlakhat lak luh sawm a pakhat ai pawn a tlem daih zawk tih hria se chu a zak ve ngawt ang, ka nau hi an school ah a lut a, fel a ti khawp asin" ka hnaih ber a hmeichhe pahnih thu dun a a sam tawi zawk chuan a lo ti a, a thusawi chu a hre chiang hle tih hriat takin a meng kawk a, "Ka pi i kawr man chu sawi la, ka nei daih lo a nihpawh in nakinah kan la in pe dawn nia, tunah chuan ka neih ang ang ka lo pe phawt ang che" ka ti leh a, a mitah chuan ka en kar bawk. Nichina tawng tam hle si kha ka nei lo ang hmak in a ka a chip hmuk a, tawng tum awm pawh in a awm lo.




Kan ngawi reng hlawm a, tawng leh ka tum tawh lo, chunu pawh chu a ngawi reng a, Tlanchhuahi chu ka en a, a kut chu a sik niap niap a, nuamlo a tih hmel hle, "I bag vel va la la, kan in be dawn nia" ka ti sep a, "Mahse hnathawk lai ka nisia" inthlahrung tak chuan a rawn ti a, min rawn en zawk bawk, "School kal lovin hna I thawk daih a, exam a hnai tawh bawk si, engpawh nise restaurant neitu ka lo bia ang, I bag chu va la rawh le" ka ti leh , a kalsawn zui ve nghal mai bawk. "Chhanchhan" Christ-a chuan min rawn ko a, ka en nghal vat, a ni chiah hian Chhanchhan tiin min ko, ka thian dang te chuan De tiin emaw Chhante tiin min ko mai thin thung, "Christ Tlanchhuahi hi lo va chhuah pui la, ka rawn chhuak ve vat ang" Tlanchhuahi rawn chhuah rual chuan ka ti a, an chhuah hnuah U Zonuna te lam bawk ka en a, keichu chik zetin min lo en a.




"Ok.. hun ka nei tawh bawk silo a, heihi ka no a nia tah hian min lo be mai dawn nia" tih pahin lehkha ah ka phone no ka ziak a, hmeichhe nu kutah chuan hmeh bel in ka kal dawn chuan ka nui sak a, pawn ka chhuak a, Christ-a leh Tlanchhuahi te lo dinna lamah chuan ka kal a, "Chhanchhan ka kal nghal mai ang aw, dawrah buaina a awm deuh a ni awm a, ka kal vat loh chuan" Christ-a chuan a lo ti zung zung a, "Awle, va kal rawh, lunch min treat avangin ka lawm lutuk a nia" ka ti sep a, "Anih nakinah kan in be leh dawn nia, Tlanchhuah a nih aw" a ti a, Tlanchhuahi chu a lo bu zeuh a. A kal liam hnuah Tlanchhuahi lam chu ka hawi a, en pawh min en ngam lo, "Hmundang ah kal ila kan in be zawk dawn nia" hauh ka tum lo, eng emaw buaina a nei tih ka hria a, chuchu ka hre duh mai ani, puih theihna ka neih chuan puih ngei pawh ka duh bawk.




Hmun reh deuh laiah chuan kan kal dun a, a la tawng miah lo bawk, a inthlahrun hmel lutuk chu ka khawngaih zawk, thutna awm remchang ah chuan ka thut pui a, "Enga tinge vawin school kal lova hna I thawh chhan?" ka ti sep a, en pawh min en ngam lo, "Tlanchhuah harsatna i nei a nihchuan min hrilh la, ṭanpui theihna ka neih che chuan ka pui hreh miah lo bawk che a nia" ka ti leh sup a. Chutah engmah sawilo chuan a rawn tap chhuak deuh hawk a, min ti hamhaih letling viau, "Miss, englo" a sawi mai theilo, a tap khur dar dar a, ka va kuah tawp, ka rin dan kha a dik tih ka chiang ta hle bawk, eng emaw harsatna sawi chhuah ngam siloh chu a nei chiang alawm. A hnungah chuan ka chul sak a, a tah zawh hma chu engmah sawi lovin ka kuah tawp, a in tap thawl deuh hnuah chuan a awm hrang a, a mittui luan na a biang chu a tuai hul nghal bawk.




"I lo thawh hma khan ka pa a boral a, ka nu diktak hian kum 7 mi ka nih in min boral san tawh, chuan ka pa chuan min enkawl ta a, min hmangaih lutuk, kum 13 ka nih khan nupui dang a nei a, nupui a neih dawn pawh khan ka phur hle, nu ka awt em bawk a, a tirah chuan ka nuhrawn chuan min duat lutuk, fa pahnih a rawn chhawn lut nghal bawk a, unau ka nei ta chu ka lawm hle, a fa ang chiah in min hmangaih thin in ka hria a, mahse hun a lo kal a, ka pa hna vanga a zin chang te hian kut min thlak silo in min ti duhdah thei em em a, ka pa awmlai chuan min duat ber awm angin lem a chang thin bawk nen ka pa hnenah pawh ka sawi ngam ngailo, a chhan chu a nupui khan a fa diktak anga min en angah a ngaih vangin" a ti sep sep a, sawi zawm lo chuan a ngawi leh vang vang phawt a.




"Ka unau hrawn te pawh chuan keichu min hmusit ta em em a, ka pa khan a fa ang chiah in a hmangaih a, ka neih ang engkim an nei ve vek zel, kei aiin an upa ve ve a, mipa leh hmeichhia niin mipa zawk chu a upa zawk a nia, kum 22 ani ve tawh, chuan ka u chiah chu kum 20 a ni thung, collage a kal ve mek bawk, kum tirah khan ka pa chu accident vangin a boral ta hlauh mai a, khata tang khan kan inah ka lenglo a ni ber, in ka awm chuan min hau reng a, chuan ka u mipa chuan keihi tenawm tak tak in min fiam a ching bawk a, ka nu bulah ka sawi in keimah zawk min hau zel bawk a, ka pa khan ro zawng zawng ka hmingin a dah a, chuvang chauh a in atang la chhuak lo ka ni, ka school fee leh mamawh te chu keimaha in tum turin min ti a, chuvang a nia school pawh ka lo kal khat chhan ni, engmah pawisa min pe duh ngai bawk silo, in a ka awm chuan kut ka tuar reng a, a hreawm takzet, ka nu leh pa te khan tinge min kalsan hma bik em em le?" a mittui chu a rawn luang leh ngiai ngiai a.




A thil tawn te a sawi takah chuan keimah a khawngaih na awm zawng zawng chu a rawn chhuak a, Tlanchhuahi chu lainat zetin ka en a, sawi mai tur pawh ka hrelo, kum 18 mi lek a la ni a, chutiang ang tuar tur chuan a la naupang mah mah a ni, "Lungngai reng reng suh, ka awm alawm, in inah awm I duh tawh lo a nih pawhin kan inah I awm thei reng ania, a nihloh pawhin i chhungte chu be turin min duh em?" ka ti a, lu a thing nghal nawk nawk, "Aih.. miss kan chhungkaw chanchin ka hrilh che tih an hriat chuan an thinrim dawn lutuk, chuvang chuan engmah sawi chhuak suh aw" hlauhthawn hmel zet chuan a ti bah nawk nawk a, a chhungte hriat a hlau lutuk te chu ka khawngaih hluah hluah. "Awle, tu bulah mah ka sawi lovang, chuan school chawl lovin rawn kal la, i mamawh ang te chu ka tihsak zel angche, hna thawk tawh lovin i zirlai ah chauh rilru i pe dawn nia, chuan harsatna i nei a nihchuan min hrilh zel bawk la" ka ti a.




"Ka lawm e Miss" a tap a, keipawh chu ka mittui ka hru zeuh zeuh a, rei fe kan in biak hnuah an in lamah ka thlah a, taxi atang a chhuak a, an in lam chu a pan mai lo, a hmel atang chuan ina haw a chak loh mai piah lamah a hlauthawng hle tih a hriat. An in lamah chuan a kal hnak hnak a, "Ka pu min lo nghak lawk ta che, ka lo let har lovang" taxi driver bulah chuan ka ti a, a lo rem ti ve mai. Taxi atang chuan ka chhuak a Tlanchhuahi chu an inah a lo lut hman tawh, kawngka kik ka tum chiah chu hmeichhe aw vin that ri leh thil tla keh ri ka hria a, kawngka chu ka kik nghal dawt dawt, nula kei aia la naupang tur chuan a rawn hawng a, a unaunu hrawn a sawi chu a ni ngei ang, "Tunge i nih?" min en haw a, ka nui lui sang, "Tlanchhuahi te class teacher ka nia" ka tihchuan inchhungah min luh tir a.





Tlanchhuahi chu sitting room luh na bulah a lo ding a, a kut chu a dawm vang vang bawk, "Bawihte tunge ni a?" nu pakhat chu kan lam a rawn hawi a, a nu hi chu ka hmu tawh, "Tlanchhuahi te miss ka nia" ka ti a, "A nihchu lo kal rawh, enge i lo tih dawn a?" Nem diai hian a rawn ti a, a fel hmel takzet, mahse a mizia awm ang tur chu ka man thiam nghal. Thutthlengah chuan ka thu thla a, "Tlanchhuahi rawn ngaihven turin ka rawn kal mawle, vawinah a dam that loh vangin kan rawn haw hma tir a, amah chauh in a rawn haw bawk nen ka ngaihtuah deuh a, ka rawn umzui a nihhi, Tlanchhuah I tha tawh maw, I kut chu I ti na em ni" a ke bula glass tla keh darh nuai chu ka en nghal zeuh a. "Kha a rawn haw kha thingpui pek ka tum a, a in tih buak palh a nihkha, a zialo tak tak a ni, Bawihte, i nau no tih keh hi rawn tifai ta che, chuan Bawihi nangpawh i nawm loh chuan han mu hahdam la" a ti leh zung zung a.




Tlanchhuahi'n an tih thin dan te sawilo nita se nu fel tak hmuh in ka hmu ngei ang, "Tlanchhuah naktuk chu school i rawn kal peih angem, exam a hnai tawh si a, mahse i la nawm loh viau chuan rawn kal luih kher a ngailo a nia" ka ti a, "Ka lo kal thei ang" hnuai lam chu a bih ngar a, "Bawihi, in miss a lo kal hi ding reng lovin lo thu ve la, Bawihte thingpui rawn lum ta che" a fanu chu a au zui lang lang a. A nuhrawn nen chuan kan in be ta reng a, diktak chuan biak hi ka phur fahran lo, mahse ka awm ve chuan Tlanchhuahi hian nuam a tih hmel deuh a ka hriat vang chauh a la awm ka ni, a nuhrawn nen kan in biak mawlh mawlh lai chuan mipa pakhat hi kawngka atang a rawn lut a, "Mama, hei i nau miss a nihhi, i nau a damlo a, a rawn ngaihven a nihhi" a nu chuan in hmelhriat tirna te a lo nei zung zung a, mipa chu a rawn kal hnai a, kan in chibai lai chuan a nui sung a, ka mipa ngainat loh chi tak a ni.




A nu leh unaunu hrawn te ka hmuh ringawt pawh khan ka ngaih a tha tawh lo a ni a, a unaupa hrawn ka hmu leh chiah phei kha chu ka chhunglam ah chawp leh chilh in hlauhthawn na a rawn awm nghal. An in atang ka chhuak a, an in ka luh hnu lawkah taxi driver hnenah kal leh in ka awm rei tur thu leh min lo va let san mai turin ka ti ringawt kha a nia. Ke in ka kal a, Tlanchhuahi ringawt chu ka rilru ah a awm. Taxi lo tlan remchang chu ka phar ding a, ka kal duhna lam chu ka hrilh a, a tlan chhuak nghal, school kan bang a, extra class pawh ka lakpui lo, ka pa aiin ka haw hma, in ka thleng a, ka nu min lo biak na chu a rul tawk lekin ka chhang a, room ah ka chho nghal daih. Tunah engtinge a awm a, a unaupa kha mi tha a nilo tih ka hmuh tirh phat atang khan ka hre nghal thei, nilo a chen pui te ah khan mi tha tumah an awm lo zawk.




Chaw kan ei lai te chuan ka tawng lo hrim hrim, chaw pawh chu ka ei mumal lo, ka nu ngaihtha lo chuan ka damlo ah a ngai a, min zawt fiah nghe nghe, ka dam thu in ka chhang a, chaw ei na hmun hnawk vel U Mami nen kan tihfel hnuah room ah ka chho a, ka rilru chu a buai takzet a ni, ka nu leh pa te hi ka hrilh mai dawn nge, kha inah khan Tlanchhuahi hi rei a him dawn lo tih ka hrechiang si. Rei fe ka in ngaihtuah hnuah ka nu leh pate bula sawi chu tha ka ti ta a, inhnuai ah ka chhuk a, ka chhungte chuan Tv an lo en a, U Mami pawh a lo la awm ve bawk. An bulah chuan ka kal a, "Pa thil hrilh tur cheu ka nei a" ka tih takah chuan ka chhungte chu ka lam an rawn hawi thap, ka thusawi tur ngaichang tih hriat takin min en ran hlawm a.




"Englo a nia, ka class ah hian hmeichhe pakhat Tlanchhuahi a awm a, kha U Mam nangchu ka hrilh tawh che kha" ka ti sep a, U Mami chu a lo bu nghat a, "An chhungkua ah harsatna lian tak a nei a, ka class naupang a nih mai bakah amah kha a fel bawk si nen engtia han tih tur nge ka hre chiah lova" ka ti a, "Han sawi chiang deuh la" ka pa in a tih takah chuan vawina Tlanchhuahi'n ka hnena a sawi zawng zawng leh an ina ka kal thu te chu ka hrilh a, an chhungte ka hmuh dan zawng zawng nen ka sawi lai chuan ka chhungte chuan uluk takin an lo ngaithla a, ka sawi zo chiah chu ka pa ka en a, enge a ngaihtuah awm ang tur ka hre theilo. Ngawi run chungin hmalam chu a en char char a, "A va han khawngaih thlak em em ve, a la naupang bawk si a" ka nu chuan a ti vawng vawng a, "Ni e, a chhungte ka biak sak dawn leh dawn loh ka zawh te khan a hlauh hmel em a, ka ngaihtuah takzet a ni, an inah khan va lut lo phei ila chu kha ai na khan kut a tawrh ka ring" ka aw chu a zawi hle.




"Engpawh nise lo ngaihven deuh la, a chungah thil thleng a awm a nihchuan min hrilh zel dawn nia, kan school naupang a ni a, chuvang chuan kan ngaih thah ngawt theilo ang, engpawh chu nise i ti tha lutuk a nia, i class naupang te i ngaihtuah hle tih a hriat a, hetiang reng hian i hna thawk ang che" ka pa chuan a ti sup sup a, ni e, tunah rih chuan engmah tihtheih kan nei biklo a tin ni, mi hrang kan ni a, an chhungkaw thilah lo va in rawlh ve ngawt kha thil mawi a ni silo. Tlanchhuahi chanchin kan sawi leh hnuah mu turin kan room ah kan lut hlawm a, ka hmai ka phih zawh in room atang chuan ka chhuak a, ka phone ri tawp chiah chu ka hre hman zuai bawk, ka en chuan no hlang atangin a nih vangin ka callback ta lem lo, a pawimawh chuan min rawn call leh mai ang, ka hmai ah cream ka hnawih lai chuan a rawn ri leh a, no hlang atang bawk a ni.




"Hello" ka ti sep a, min chhang tu an awm lo, a reh vang vang a, ka aw an hre theilo pawh a ni maithei a ni, hello ka ti char char hnuah pawh thawm a awm tak lovah chuan call chu dah ka tum a, mahse lehlam atang aw ka hriat leh si avangin ka beng zawnah ka phone chu ka dah tha leh a, "Tunge aw?" thawk chhuak hawk ri chu ka hria a, tunge maw a nih le, min rawn fiam a tum zawk nge ni, "Tunge i nih a, min rawn call a I ngawi leh vang vang bawk si" ka thin in a tuar leh tawh lo, "Bawihte" chu aw chu ka hrechiang mah mah, U Zonuna aw ngei a ni, chuan amah lo chuan chutiang chuan min ko ngailo bawk. Ka ngawi ta reng a, "Bawihte" a rawn ti nawn leh sup, veranda zawn ka hawi a, parda ka zar hlauh, "Enge i duh?" harsa tak chuan ka ti chhuak thei hram, ka hrawk te hi a ro vek nimai in ka hria.




"Bawihte, en.." a thusawi lai chu lo pawt chat in "U Zonun khawngaihin khatiang khan min ko tawh lo thei angem, ka ngaina teh chiam lo a nia, bakah puitling kan ni tawh a, in zawmna kan neilo bawk, chuvang chuan ka hmingin min ko rawh" ka ti a, "Vawin thil thleng avang khan ngaihdam ka rawn dil e" a ti sup, a mak hle mai, tu hnenah mah ngaihdam a dil duh ngailo kha ania, a bialnu chu a duh awm hle mai, amah vangin ngaihdam min rawn dil a nia. Ka ngaihtuah na vang chuan ka chhungril hi a na vawng vawng mai, hun lo lutuk, "Keimah ni thiamloh zawk a nihkha, min hrethiam zawk dawn nia, mahse i bialnu hnenah khan lo sawi la, nung chang mawi lo zir deuh rawh se, mi tamtak awm laiin ka student zak takin a siam naah erawh ka lungawi lo hle tih i lo hrilh bawk dawn a nia, chuan a kawr man kha min rawn hrilh ula ka lo pe ang, amah nen buaina kan nei a, chuvang chuan amah min rawn biak tir dawn nia" tiin phone chu ka dah hmak a.




Khumah chuan thin sa up up in ka mu a, U Zonuna leh kha hmeichhe nasa zet kha ka mitthla ah an rawn lang a, hriat chhuah zawk ka nei, kan in then khan bialnu dang a neih vanga min then a ni a, a chanchin engmah ka hre zawm duh tawh lo kha a nia, mahse ka thianten a bialnu thar nia an sawi kha Kimkimi an tih tak kha, vawin khan Kim tiin a ko a, kha hmeichhia ngei kha ani ngei ang kei min then a a pan zawk nu chu, engpawh nise ka buaina tur a awm lo, kum 5 lai a liam tawh. Mahse ka buai lo theilo a ni, nilo chu thil ka ngaihtuah chhuah ringawt pawh chuan ka thin hi a rawt up up thei, na taka min siam hnuah kha hmeichhia nen khan hlim takin an awm dun chu a nisia, keiin amah vanga mipa dang ka hnaih theih loh laiin a ni ve thung chu hmeichhe dang nen hlim takin an awm bik a, ka tan chuan a tlawm thlak lutuk mah mah a ni.




Zing ka harh chuan tuk dang ang lo takin walk turin ka in siam a, ka in siam zawh hnuah in atang ka chhuak nghal, midang tlan ve te nen chuan kan in tawk leh nawlh thin a, ni rawn chhuak eng set set mai chu ka en vang vang a, ka hnunglam atang thawm ka hriat chuan ka hawi let vat, U Zonuna chu niin ka hnung lawk ah a lo awm reng tawh, engtinge hetah a lo awm ve daih theih ni. Ka en reng lai chuan a rawn kal hnai a, ka bulah chuan rawn dingin ni rawn chhuak chu a en ve a, "A mawi takzet" a ti sup bawk, kalsawn ka tum chu ka kutah a rawn man a, ka hawilet vat, "In be lawk ang" a ti a, diktak chuan ka be peih lem lo, nizan ka thil ngaihtuah chhuah avang ringawt pawh khan tunah chuan biak chu sawi loh a hmel pawh hi ka hmu peih lo.





"I sawi duh chu sawi vat la, hun ka nei tamlo ania" ka ti a, amah pawh en lovin ka hmalam chu ka en ngar a, "Nimin thil thleng avang khan thupha chawi leh ka duh a" ka nui lui sak a, "Nizanah ka sawi vek tawh kha, sawi nawn leh ka duh tawh lo, chuan i bialnu hnenah khan kan pawisa chawi tur ang zat chu min lo hrilh se tih i lo sawi dawn nia, a nih ka kal phawt mai ang" ka ti her a, a thu rawn sawi avang chuan ka ding leh chawt, "A ni kha ka bialnu a nilo" a ti nawn leh sup a, "Oh.. i bialnu emaw ka ti a, min hrethiam dawn nia" engah mah ngailo ang tak chuan ka awm a, a thusawi kha ka awih chhete lo bawk, a thaw chhuak hawlh, "I lo danglam takzet tawh a nihhi" nui suk in a ti leh a, "Danglam ve bawk ang chu, mihring te chu a ngai ang rengin kan awm thei hleinem, kan hun tawn a zirin kan in siam rem mai zel alawm" ka kalsawn nghal daih bawk.




Ka hnungah chuan a rawn kal ve zel a, engah ngailo in ka kal chhunzawm char char, ka phone a rawn ri a, in ka thleng tep tawh, Christ-a a lo ni, a la hma tehreng "Hello, Christ I va tho hma ve" nui chungin ka ti a, "Nia.. nizanah ka nau hi a natna a rawn chhuak leh a, damdawi inah kan kalpui a, an lo admit ta sia, school rawn tan chauh mahse a chawlh rih a ngai dawn a" a rawn ti zung zung a, "A nihchu a va zialo ve, lo dam thuai thuai rawh se vawinah ka rawn kal ang" ka ti a, a nau natna tak hi ka hriatpui lova, mahse a serious hle tih erawh a thusawi dan atang khan ka hrethiam thung. An damdawiin awmna te min hrilh a, "Hun i neih loh chuan rawn kal kher a ngailo a nia, rei a awm lovang a chhuak leh vat thei tho ang" inthlahrun aw tak chuan a rawn ti a, "A ho lutuk, ka ngaihtuah alawm, hun chu ka nei mai ang, chawhnu lamah rawn kal ka lo tum dawn nia" kan in biakna kan ti tawp a, kan in zawn ka lo thleng der tawh.




Ka hnunglam chu ka hawi a, U Zonuna chu a lo kal ve zel, a hmel landan chu ka hrethiam lo, a lungawi loh hmel ka ti dawn nge a hmel chu a chang deuh rut a, chiang zetin min lo en dan bawk. Biak pawh be lem lo chuan gate chu ka hawng a, ka lut nghal zat bawk. Ka pa hnenah Christ-a nau damloh thu leh damdawiin lama an in admit thu ka sawi a, pawi a tih hmel hle, chawhnu lamah tlawh ka tum thu ka sawi chuan min lo pawmpui khawi mai, chaw te kan ei kham hnuah in siam turin ka room ah ka lut a, ka in siam zawh hnuah chhuakin school lamah ka in khalh chhuak lehnghal. Tlanchhuahi pawh school a rawn kal a, nimin a an ina ka kal khan a ban vei lam kha a lo dawm a nihkha, ka en ru deuh a, a lo duk kual ruih a, ka ngaihtuah hle, hetiang reng chuan ka awm tir thei lovang, kut an thlak nasa thin tih lah hai theih a nilo.




Chawhnu ah class ka nei a, mahse zirtirtu pakhat hnenah lo la mai turin ka hrilh a, a lo pawm viau mai, school atang ka chhuak a, damdawiin lam ka pan nghal, ka thlen chuan Christ-a nau Mary pawh a lo that hmel khawp mai, ka thil ken sak te chu ka pe a, Christ-a nen chauh an lo awm, darkar khat vel ka awm hnuah damdawiin atang chuan ka chhuak a. School ah ka kal leh a, ban a hun hnai lehnghal mai, darkar chanve chiah a awm tawh, extra class chu darkar hnih ngawt ka kalpui a ning hmel pu an awm lo. Naupang ho an haw hnuah office ah ka kal leh a, ka bag te ka lak hnuah office atang ka chhuak a, school enkawl tu nen kan in tawk a, reilote kan in biak khawmuan hnuah ka motor dahna lam chu ka pan a, scooty ka ti nung tur chu a theih thak lo, khua lah chu a thim tan der tawh bawk si.




Ka kick pawhin awmzia a awm chuanglo, "A nuar a nimaw?" ka hmaa U Zonuna car chu a rawn ding a, "I scooty chu ti hian hnutchhiah mai la, ka rual in rawn haw mai rawh" tih nun a tum pawhin a nung thei bik chuanglo. Duh thlan tur awm hek lo le U Zonuna motor ah chuan ka chuang lut a, ngawi rengin kan thu dun. "Naupang te i nih lai atang tawh a i nih chak em em I ni ta chu nuam I ti em?" kawng chanve vel kan tlan tawh, "Nuam ti e, nuam ka ti takzet" ka nui seih a. "I thawk rim bawk a i phu takzet a ni" ka chhang tawh lemlo, nun hlui sawi chhuah reng ka duh loh vang a ni pakhat. Mit ka chhing a, ka muhil dawn tep tih ah a rawn tawng leh a, "Bialpa I nei em?" engtia chhan tur nge ka hrelo, ka ngawi deuh vang vang a, amah vangin mipa tumah ka hnaih theih lo tih a hriat ka duh hauh lo, "Nei e" dawt ka sawi ringawt, pawi tihna pawh ka nei chuanglo, a ngawi ta reng a, ka en leh zeuh thin, steering chu nghet zetin a vuan a, in kan thlen thleng chuan engmah a sawi tawh lo.


Cont....

Comment leh click a that chuan Wed ah dah leh kan tum dawn nia...