CHAPTER-24(LAST)
Mo thar tuk a thawh hai ka hlauh avang in nizan lam ah alarm ka set lawk vek a , kan tho chhuak chu ka taksa a na deuh thum mai .
Rinsawma chu bawk khup a mu in a la thaw suk suk a , kan pindan atang chhuak in choka lam ah ka lut phei a ,Rinsawma nu a lo tho daih tawh hi a ni , min hmu chu
"Mate , i va tho hma ve, nimin lam ah i chauh awm tehreng nen ,la mut mai mai tur che a lawm " a lo ti thuai , nu fel leh tawng duh tak a ni a , kei pawn ka nel viau.
Ka chauh loh thu a chhang in , thingpui in pah in eng emaw sawi in kan nui dun leh hak thin , harsa ti lo tak in nu ti in ka ko nghal mai thei bawk a , nakin a ka buai loh nan an thil dah na leh an chhungkaw kal phung tlem min hrilh hre bawk .
Midang pawh an rawn tho chhuak sap sap hlawm a, Rinsawmpuia chu ka bul chet ah rawn thu in "Duhno, i va tho hma awm ve" a rawn ti sup chu Nautei'n in a lo hria a niang , kan lam rawn hawi in
"Au Mama chu ko duat vel ve "a rawn ti pat pat ,midang an awm ve thup nen ka zak lek lek mai.
Ka bul a mi lah chuan a nau thusawi chu chhan en ah pawh a en lo a niang , a nui suk duh chauh .
Rinsawma te chhung hmun dang atang a inneih hmang tur a lo kal ho an la awm nual a,a then erawh inneih ruai theh zawh hnu ah an haw tawh thung.
-----
Nitin sikul kal in Rinsawma a chhuak a , in ah ka nu leh pa te nen kan awm mai thin, a chang in zawngtah huan ah kan feh ve leh thin bawk a , ka pa hi huan lam ah a che tla tam ber a,a man nuam a ti bawk nen in awm ni a nei meuh lo .
Nautei erawh aizawl lam ah a pu te in ah awm in college a zawm a , rilru tha ngang chhungkua an ni bawk a ,tu man min en hran na nei lo in , ka nu leh pa pawn an fanu ang mai in min en a ,Rinsawma unau te nen pawh kan in pawh viau.
Chhun ah U Sangpuii an naute nen an rawn leng a ,a ni pawh a pasal hna thawk a a chhuah bo daih thin avangin ,Celini sikul bang nghah pah in an rawn kal ni tin thin , a tawng duh in fiamthu a duh bawk a ,a bul a awm chuan kan nui deuh reng mai a ni.
" In va rawn bang hma ve "Rinsawma lo lut ka hmuh chuan ka lo ti thuai , ka zawhna chhan pawh nidang a an ban hun a la ni lo miau a.U Sangpuii te nufa pawh nichin lawk khan an haw chauh.
Zawi zet a thuthleng ah thu in ,a mitmeng te chu a sen ram " ka nuam chiah lo emaw ni "zawi te a a tih chuan a chal chu ka va deh sak nghal , a lo sa vur mai .
" I pang a sa lutuk ,nachhawk na ei rawh aw"ti in damdawi bawm a nachhawk na chu la in ,tui nen ka ei tir a ,kan pindan ah kuah phei in khum ah ka mut tir , a bul a ka thu chu "lo mu ve rawh " a tih tlat tak ah chuan kawngka va kalh tha sawk sawk in , a bul ah chuan ka mu ve a.
Ka nu leh pa te aizawl lam ah Nautei tlawh pah leh Rinsawma pu a that loh deuh avang in nimin khan an chhuk thla a, an rawn haw theih hun tur tak pawh an la sawi chiang thei lo.
Sir zawng a mu in ka kawng ah a rawn kuah hlun , vawt a ti em tih ka zawh chuan lu a thing mai , ka awm ah hmai rawn phum a ,a thawk tak siai siai ah chuan be zawm tawh bik lo in , a lu chu ka chul sak ta hliau hliau.
Engtik lai in nge ka lo mutthilh hman ka hre lo , ka harh chuan hnai zet ah min lo en in min nuih a ,"i khawsik a la awm em "ka ti chhuak hmasa ber , ka lo mu rei viau a niang , bang a sana tar na lam ka en chuan dar 5 a lo hnai thuak tawh.
" Awm tawh lo ,ka pangngai leh var var tawh "ti a nui in ka hmui ah chuan a rawn fawp zeuh , thawh chhuah tum a ka che chu ka chung ah a rawn in nem khalh run , bangbo tak a ka en chuan " thil tih chak deuh ka nei "ti sup in min rawn fawp leh ,
A awm ah lo nam tang tang in " eirawng pawh ka la bawl lo a nia "ka tih chuan " a hmanhmawh thlak loh"lo ti mai in ,a ngai ang bawk in ka hmui chu a rawn fawp zawm leh , a kut pawh a rem lai lai ah a vah kual tir nghal ,
Hnial pawh ni ila ka hnial hneh dawn lo tih ka hriat avang leh pasal te tih lungawi chu ka duh ber anih avang in phur tak in ka lo dawng sawng a ,a tir a hnial deuh tu zawk kha ka phur ta zawk emaw tih mai tur in ka che a , a thaw ri leh hrawk thin te chu tun ah tak chuan rimawi ang mai a mawi a ni
A awm ruak kang ah chuan ka bawk hle hle , "damlo si ah chuan i in fit hle mai " a nui huk , kei tak pawh ka thusawi avang chuan ka nui ve hak a ,
Ka sam ah rawn fawp vang vang in min hmangaih thu a sawi sup ,tlem a awm kang deuh in lungawina a khat a min en tu ka pasal chu a hmui ah ka fawh sak ve zeuh ,"min hmangaih thu kha hriat nawn reng ka duh ngei ang , "ti let in a sam kir ,phir deuh sang chu ka tuai mam sak thuak thuak , rei pawh mu tawh lo in kan in ti fai dun a ,chu mi hnu ah zanriah tur kan buatsaih hman ta chauh
Choka ah lo awm ve reng in, kan pahnih in kan bawl dun a ,a kar lak ah min lo ti buai in min lo chhaih fiam thul , choka chhung zim te ah chuan kan in um kual leh thin , puitling pui tawh tleirawl inngaizawng ang mai a kan han khawsa chu nuihzathlak lam ah kal deuh tlat mahse a hlimawm em em thung si.
Innei hlim hlawl ni tawh lo mah ila, kan inneih atang in kum pawh a la vei lo nen tun ah hrih chuan kan la induh in, kan la inthlakhlelh mai bak ah ,kan la hlim dun viau zel a,tiang ang reng in kan hlim reng thei dawn lo tih hre mah ila , a kut vuan chung a engkim hmachhawn ka inhuam tlat ang hian ,a ni pawn engtik ah mah min thlah ka ring bik lo.
Zan lam ah naupang exam paper check in a buai khawp a , a bul ah lo thu ve in Zikpuii nen kan in bia ,thla hmasa khan nau a pai thu min rawn hrilh a, an pa a lawm viau thu te, leh ei tur a lei sak nual thu te kha phur tak in a rawn sawi kha nia ,tun ah erawh rai no hreawm zia a hlir a rawn sawi tawh thung .
" Chaw ka ei thei bawk si lo, zing ah ni se ka uak deuh reng a , ka chau ngawih ngawih ,U Hmachhuana hian min duat lo phei se chu a hreawm zual ngawt ang , chhungte lak ah pawh a inthlahrun awm zawk , ka che peih mang si lo "a rawn ti duah , tawn hriat la nei biklo tih tak ah han sawi zui luam dan ka hre vak lo " i rai chhung zawng khatiang in i awm bik nang, a reh ve tep tawh ang,dam te a kan awm a nih chuan ka la rai ve awm sia , ka huphurh lawk "ka tih ban charh chuan Rinsawma chu lo nui huk in
" Nang chu raino luak chhuak nei lo tur in uluk deuh in kan saim dawn nia "a rawn tih zuk chuan, ka melh rawm rawm, la nui reng chung chuan a paper chu a check zawm leh mai bawk a.
Thiani nen kan inbiak zawh hnu chuan phone pawh khawih zawm peih lo in Rinsawma thil ti lai chu ka ti buai leh thin , a malchung ah ka ke ka va dah chuan min rawn en in a nur nang, kei in ka lo nuih var var,
" Hmingi te rawn leng leh se"ka ti chhuak sep , dawr nghak a a buai thin avang leh kei lah pasal ka nei ve tawh nen, a hma ang a inkawm reng te kha a har a, a hman chang erawh in a rawn leng lut ziah thung , Rinsawma sikul a kal hlan in a dawr ah ka va lang ve zeuh zeuh bawk.
Doroi nen pawh kan inbe tha leh tawh a, kan inhnaih bawk a inhmuh fuh chang a tam a, inbiak loh reng theih ni hek lo , Rinsawma nen inpawh deuh a an ti ti pawn thikna rilru ka pu tawh ngai lem lo.
"Kan pahnih chauh a kan awm dun hian ka che romantic thei a,nuam ka ti a sin " min en lem lo in a rawn ti sup ,
Ka ke chuan a pen ken na lam chu ka va tlawh ,min rawn en ve leh "i thil tih lai ah ringawt i rilru i pe a, ka biakna pawh min chhan that hman loh kha " ka ti nang nang , phone khawih peih reng ang chi ka ni si lo a,a ni a buai deuh phei hi chuan ka khua a har deuh thin.
Ka sam ah rawn tuai in"Umm , ka hrethiam ka zo tep aw Duhno , ka ti zo thuai a nga , ka duat ang che "ti in ka hmui ah rawn fawp zeuh , tunlai a lak ah ka pangchang lutuk thin hi keimah ngei pawh mak ka in ti , a duat hi ka thlahlel ngawih ngawih reng a , thinrim tak tak si lo a a lak a tih tauh leh bar bar thin lah ka hrat .
Ka nu te aizawl kal pawh kar hnih ngawt an cham tawh , inrinni a rawn haw chhoh tum an ni a , mahse ka pu in a chelh rih tlat avang in an la awm leh deuh dawn a .
Chawlhni chawhma kan inkhawm a , inkhawm ban ah thiante leh Rinsawmna thawh pui te ho an rawn lut khawm sap sap a, chhun ei tur atan ti in suji kan siam teuh bawk .
Hmingi bul ah chuan " saw saw ti raw , Pu Duha te chhung ,U Hminga ai a sikul a thawk kha "ka ti a ,a lo bu nghut, ka pasal nen chuan in bia in eng nge maw ni an sawi dun ni, midang ngaihsak lem lo in an nui dun leh thin.
" Miss Sawmsangi a nih saw , a fel khawp mai , hmun dang atang rawn awm mah ni se ti hian KTP ah a rawn tel nghal a , kan khua ah pawh a tlangnel tawh khawp ,amah pawn kan khua chu nuam a tih thu a sawi a sawi mai "a rawn ti a.
Miss Sawmsangi chu nula lian lo tak ni mahse a hmel chu a fai veng a , a vun chu a nung sar bawk , a hmai vun mam han mai chu hmeichhe tam tak in neih kan chak ngawih ngawih ang kha a ni.
Kan ei tur siam kan ei zawh hnu in , chawhnu inkhawm tur in an kal zui leh hlawm a, an kal hnu lawk ah min hringtu ka nu te in lam ah zanriah ei tur in kan nupa in kan chhuak phei ve thung ,kawng lak ah min lo be tu an awm ve leh zeuh thin nen kan kal sawt lo khawp.
Pasal ka neih tak hnu khan dawr chu ka nau Peki'n a enkawl ta chawt a, kum lam a la nau deuh na na chu a tir lam ah harsa ti deuh mahse , tun ah erawh eng kim dawr bungraw lak leh thlan lam ah pawh buaina a nei hran tawh lo.
Ka nu pawh ram lam a hnathawh kan phal tawh tak tlat lo ah chuan , in ah a awm ni tin a, a hnu ah erawh in a eng vak ti lo a awm reng chu a peih ta ngang lo aniang in bul huan chu ti fai in thlai chi eng eng emaw tuh in a buai pui ta a , chu erawh kei ni pawn kan khap tawh bik lo.
Duata leh Rinsawma chu inkhel en in an thu dun a , an en tui dun ngang mai .
Ka nu zo ar tui lai thau tha zet kan hmeh a ,a hang tui dap dap bawk a ka ei hnem khawp mai , kei ai Rinsawma'n a la ei hnem zawk a, tui a ti ve ngang a niang zo ar tui bik zia chu ka nu bul ah a sawi deuh reng mai a ni .
Zing kar luak chhuak ka neih reng avang leh thla hmasa ka hun bi ka awl avang in ka in ringhlel deuh a , test kit ka kawl sa hmang a in test in, ka rinhlelh ang ngei in ka lo rai ta ngei , ka hlim lutuk chu ka mittui a rawn tla hial.
Rinsawma hrilh hlan mawlh chu a ni ka nghah hlelh tawh ,ka pum chu tuai in keimah in ka nui leh ver ver thin.
Chhun ah U Sangpuii Celini sikul bang nghak in an naute nen an rawn kal a,a fapa te reuh hian min ngai ve khawp a , tun ah pawh ka malchung ah pawm in ka chhaih nui uar uar mai.
"Ka nu leh pa hi khaw nge an kal a , an va reh teh diak ve "a tih chuan huan a an kal thu ka sawi a, Ka pu kan a an zin kha thla khat deuh thaw an zuk awm pui hnu in an rawn let leh tawh a.
Celini leh a putea chu an rawn haw rual a ,zirtawp ni a nih avang in chawhma chauh sikul an kal a, a nu leh kei min hmuh rual in a kut a thil ken chu rawn ti lang va va in"A putea'n barbie min lei sak a " a rawn ti zang vah ,barbie thar a nei chu a hlim tih hai rual a ni lo.
U Sangpuii te an haw hnu in Rinsawma pindan a inthlak mek bul ah chuan ka va ding ,ka kawng ah dawm in ,a mah si chet in min pawt hnai a,ka bek ah a fawp zeuh in ka chal ah a fawp leh ,inla hrang deuh in "min lo ngai tawh em" thum zawi dup in a rawn ti a,rang deuh a ka lo buk chiam chuan kiai suk in
"Keipawn ,class lak lai pawn ka nupui hi ka ngaihtuah char char che " mitmeng tak run a min en in a ti ril ruih ,a mitmeng mawi tak a min melh vang vang tawh hi chuan ka lai leh nge nge thin.
A awm ah kut nghat in "thil hrilh tur che ka nei " hlim deuh in ka ti ta a,mit ko san zeuh in "ka hre chak tawh hle mai " lo ti ve sup in ,ka kut chu la kangin a nghawng ah min kuah tir .
A hmeltha tak chu melh chho a ,thawk ka lak vang vang hnu ah "nu leh pa ti a min ko tu tur naute ka pai mek " ka ti zo chiah chu ka hmai ah a rawn fawp kual nghal mawlh mawlh , eng thu mah sawi lo mahse a hmel ah chauh pawh a hlim zia a hriat theih vek .
"Hmangaih loh har nu " a hnu fe ah rawn ti in ,min pawm lawk a, khum ah min nghat in a ni pawh a rawn mu thla ve nghal ,ka pum chu a chul kual hauh hauh a , ka inhriat chhuah dan te chu min zawt in , keipawn phur tak in luak chhuak ka neih leh thin thu leh , thla hmasa ka period lo tih ka hriat hnu a ka in test tak chuk chuk thu te chu hlim tak in ka sawi a.
Ka nu te huan kal rawn haw chu kan lo hrilh ve nghal thuai ,an ni pawh an lawm ve hle a ,ka pa in a lawm nan ti in thenawm lawk a sa zuar te in ah vawksa rep va lei in kan siam tlai khaw hnu leh a,Rinsawma pawh a hlim viau a niang zanriah kan ei lai te chuan min en in min nuih leh suk suk thin.
Rinai takin rai no chu ka la na zek a , thla hnih chhung chu chaw tui ti tak a ka ei pawh ka hre meuh lo , keimah pawh hmuh theih khawp in ka tla ta dawk reng a , ka pasal in min ngaihtuah viau ,ka ei theih tur ang chu a dap kual vat vat thin , a chang hian ka vin leh khar khar thin a , a hnu ah erawh keimah zawk ka inthiam lo leh ziah thin .
Ani erawh in huat ah a la ngai lo a , ka rai no avang a thinchhia ka ni tih a hria a ,min dawm thiam viau .
Ka nau pai thla li a nih atang erawh in thil eng pawh chu ka ei tui viau tawh ,zingkar luak chuak pawh ka nei tawh ngai lo .
Mut hmun ah Rinsawma hian ka pum puar ve ak tawh chu a chul leh heuh heuh thin , zantin ka rai tirh atanga a tih dan a nih avang in ngai ah ka nei tawh,a chang phei chuan ka pum ah a lu nghat in a be vel thul ,a lo puan chhuah hma hawt atangin kan hlim pui nghal em em mai a ni.
Tlai lam ah Rinsawma thawhpui pa in a fapa piancham a lawm dawm avang in an sikul ban veleh rawn haw zawk in veng chhak lam ah a bike in a in khalh chho leh nghal a, a bul ah kal ve tur in min sawm na chung in ka nawm sam loh deuh avangin ka lo hnial thung ,ani pawn a rawn haw hma tur thu sawi in a kal ta kha a nia.
Nautei nen kan in bia a , nau ka pai hnu atang hian min rawn be zing zual , naute thamhnaw a lei thu te leh naute a pawm chak tawh zia te,rawn piang vat vat tawh se a tih thu te a rawn sawi nasa viau,kan inbiak zawh in Rinsawma biak tum in a phone number ka hmet chhuak a,rawn haw hma a tum ve sia ,tun ah dar 8 a pel dawr tawh.
A rawn lak rual in "I lo va haw har tawh ve " ka ti nghal hlar ,a ngawih vang vang hnu ah "a muhil a , kan kai tho ang aw " hmeichhe aw sin zet in a rawn tih chuan ka biak mek chu ka pasal a ni lo tih ka hre zawm nghal , lehlam pang atang a an rawn tih tawp tak daih ah chuan engmah zawh chian na hman pawh ka nei lo.
A phone lo chhangtu khan a muhil a tia ,eng nge awm zia pawh ka hre lo , rai lai chuan an thik thu a chhia a , an rilru a no bawk tih zawng zawng kha ka nei zo emaw tih mai tur a ni , ka rilru a nuam lo in ,thil tam tak ka ngaihtuah kual hman vek a nih chu.
Ka nu leh pa tv en na lam ah pawh thu phei peihlo in kan nupa pindanah ka mu meng kar a , ka nuam sam chiah lo tih an hria a, min rawn ngaihven leh zeuh zeuh thin.
Reilo ah ka nu te leh Rinsawma in be thawm ka hre zui .
"A nuam sam chiah lo a , a mu nih kha , rinai i rawn haw har zek a " ka nu in a ti a ,a chhanna tur hre chak in ka beng ka tun hra tawh .
Rinsawma'n "kan thawhpui pakhat nuam sam lo ka thlah kawi a ,rei lo te ka thu khawmuang ve bawk nen ka rawn haw hma thei ta lo a ni " ti a a chhan chuan awi lo zet in ka phun chhuak sup .
Kan pindan a a rawn luh lai pawn kawgka lam chu ka hnung chhawn lui tlat a , ka muhil lo tih chu a hriat vek tho ka ring.
"I nuam deuh tawh em,i eng lai tak nge na " a in thlak nghal a niang a ri sut sut a , min bia tih hre reng mah i la ka hre lo der lui tlat .
Ka phone a min lo chhangtu kha a thawhpuinu U Hminga ai a kal kha a ni tih ka hria a.
Thinrim loh ka tum pawn ka thei ngang lo chu a ni , hman ni Hmingi te dawr ah Doroi nen kan len tum in , Miss Sawmsangi hian Rinsawma chanchin a ngaihven thu leh a sawi peih thu an sawi chhuak zeuh tawh a, an thil sawi ho nen a ka hmeh bel kual phei chuan ring hlel dun bur si lo in ka ngaihtuahna hi an ti buai tak zet .
Ka pasal chu ka ring , mahse a hmeichhia zawk kha ka ring lo bur..
"Ka lo haw hma leh loh avangin i lungawi lo em ni " rawn ti dut in ka hnung lam atang min rawn kuah a,ka hmel en thei tur in a lu chu a rawn thle phei pah bawk .
"I ngawih reng chuan ka awm i ti nuam lo a nia"
A rawn tih leh pawh in la la ngawi reng , ka pum ka dawm na kut chu rawn dawm hnan in "naute ,a nu hi a lungawi theih nan eng nge kan tih ang" nui nghawr dat in ka nghawng chu a hmui in a ti si leh vang vang .
Beisei loh tak a ka pum a rawn chet tak ah chuan "i hre ve ti raw " ka lungawi loh na theihnghilh vek khawp a phur in ka ti a ,
"Naute pawn i ngawih reng chuan nuam a ti bik lo a nih kha " nui vur vur a rawn ti in dim zet in min kuai her ,
"Lem ,eng ber in nge lungawi loh na thlen che han sawi teh ,ka rawn haw tlai vang ngawt ni in ka hre ta lo " dam dup a ti in ka kha be chu a tuai pah heuh heuh
"Biak che tum in ka rawn call che a , mahse hmeichhia in min rawn chhang in , i mutthilh thu a rawm sawi ,eng thil nge in tih dun " pawr deuh in ka ti hlar , Miss Sawmsangi a ni tih hre mah ila a hming ka sawi lang lo thung .
Rawn nui chhuak hawk in "eng thil nge ti dun se min tih reng reng ni" ti in ka hnar ah a rawn piai , a kut ka lo ben thlak sak chuan a ai uar zawk mah a min nuih leh in "i rai hi i thinchhe zual ngawt mai "a ti chu ka melh na ngang mai .
Ka pum ah a kut nghat leh in " naute a nu hian thil a lo ngaihtuah kual leh vak tawh a nih hi ,min ring chhe thei si "nur nang in a ti chhuak sup , thinrim a sawi phei chu a ni lo.
Ka pum a melhna atang a rawn insawn chho in min melh a " Miss Sawmsangi a nuam lo deuh a ,ka rawn haw tur in ka rawn thlah kual lawk maw le ,a inluah kan thlen hnu ah damdawi ei nghal in a mu mai a, rawn haw san nghal ngawt chu thil mawi ni in ka hre lo a, rei lo te ka thut pui ve leh chhungin , ka lo chhing sek hman a lawm maw le"a ti mai a , dawt a sawi lo tih ka hria a, tha deuh chuan fa enkawl dan tur te sawi in ,kan ti ti dun leh ta reng .
Fa enkawl hi thil na mai a ni dawn lo , kan ril a rah kan fa te ngei chu kan hmangaih vek ngei ang mahse an than len chhoh zel a, sual kawng dai lo tur a enkawl tur chuan nu leh pa kan tan rual that hi a pawimawh dawn khawp , an tet te atang in an rilru ah taimak na leh rinawm na te tuh sak hi kan nupa in a fa kan neih hun a kan tih tur te zing a hmasa ber pawl a ni, .
Nupa dang te hian mut hmun ah in kuah chial chung in fa enkawl dan a ni emaw ,an vei zawng leh nitin hun an hman dan an sawi tlang ve thin a ngem le , kei ni nupa chuan a tur reng ah kan dah deuh tawp tawh a , kan pahnih inzawmna pawh a ti nghet zual in in pawh na tha zawk min siam sak ka ti lo thei lo.
Ka pum pawh a lian ve telh telh a , naute pawh a rawn che nasa tawh khawp mai , zing kar ah Rinsawma'n kawng dung vel ah exer la in min vei harh pui thin a , a thiam ang tawk leh theih tawk in min duat ve viau , ka ei chak zawng kan khua a awm lo ho pawh aizawl lam a mi min ngaihtuah sak vang vang thin .
Tuk dang ang bawk in zing kar ah kan vei chhuak leh a , kan let leh hma in kei ma nu te in lam ah leng lut zuai in, thingpui te kan in a.
Peki'n dawr a lo hawn dim diam tawh lai in Duata a erawh a lo la mu thung .Tleirawl thang lai tih tak ah mut te hi duh tak a ni.
Zikpuii pawh in naute chum zet mai a mipa a nei tawh a, a thlalak min rawn thawn ka en chuan a nu ai in a pa a ang mah zawk in ka hria .
Rinsawma ka hmuh tir ve chuan a ni pawh in a pa a an zawk thu sawi ve sup in ka pum puar ve ak tawh zawn ah thu hniam in "tereuh te ,nang pawh lo chhuak vat rawh aw, kan hmu chak tawh che a nia , i nu leh i pa hmel rawn chhun chhuak viau la , naute fel i ni nghal mai " dam dup a ti in ka pum chu a fawp zeuh , a pa biakna chu kan naute pawn a hre ve a niang ka pum chhung atang in a rawn che ve dat dat mai .
Kan chhungkua a hlim na nasa tak rawn thlen tur leh a pa hmangaih em em ni tur in fanu duhawm deuh mai ka hring chhuak a , kei ai mah in a pa a rawn chhun nghal em em bawk.
A hming atan a pu in Anna Malsawmtluangi tih a sa a , naute tah belh lo tak ni in , zan lam ah pawh mut duh loh tih vel a nei vak lo a ,kan hahdam phian.
A pa hian a duh khawp a , a hming pawh a ko phal lo in ka pum chhung a a awm lai atanga a koh thin dan ang in" tereuhte"a ti mai zel a .
Sikul kal a a chhuak tih loh chu a fanu bul ah a tal chawt a , chutiang bawk in a pi leh pu te pawh , Duata sikul kal tur pawn a tunu hmu chak in a rawn peng ta ziah thin a ,ka nu pawh a tu nu awm tur in a hman chang apiang in a lo leng ziah bawk .
Hnute a hnek lai tih loh chu ka chang meuh lo ,nau pawm zing a hahdam ber leh buai lo ber ka ni ngei ang
Nautei exam zo a rawn haw atang phei chuan midang hian an pawm hman meuh tawh lo ,a man a kuah chawt a ,Annai lah naute fel tak ,tap mai mai ngai lo a lo ni nen an in awm thei dun khawp mai.
Zan lam ah erawh a pa in pawm chawt lo leh a mutpui a, a lo tah tak hlauh leh "Tereuhte,a pa'n ka pawm hlu hlu ang che ,tap tawh lo la" ti dut dut in kan pindan chhung ah chuan an in awi dur dur zel a ,hmuh an nuam pafa thei a nia aw.
Kan Annai lah in a pa pangtilum a hre hrang tawh em em a, hnute pek hmasak kher ngai lo in an in awi mu leh mai thin.
Keimah Hlusangzuali ,hmeichhe naran mai,chhuan tur eng mah nei lo he ti khawp a min hmangaih tu, min dawm thiam em em tu pasal min pe hi chung lam hnen ah lawm thu ka hrilh bang thei lo hial ang , Ka pasal hi nun awm zia min hriat tir tu leh min hmuh tir tu a ni a , chutiang bawk in hmangaihna awmzia min hriat fiah tir tu a ni bawk.
Kan hma hun ah eng in nge min chim buai dawn tih hre lo mah ila ,nupa kan ni tawh a , eng harsatna pawh tawk ila bei a hmachhawn dun zel tur in kan chak tawk .Thihna in kan chung a ro a rel hma chu rinawm tak a awm dun reng tur in rilru kan siam thar ni tin thin.
##A hmawr kan bawk ta , a tawp zan te a nih ang in comment kha han hnutchhiah liam liam ila.
Exam ka neih dawn avangin thla khat vel chhung chu ka reh vang vang in ka ring a, ka hman veleh an fapa te thawnthu rawn ziah leh te pawh ka rilruk deuh a.
Eng pawh chu ni se ,story thar kan neih leh hma zawng lo dam in lo hrisel em em reng rawh u
