It Ends With Us : Chapter - 1

[Tlantlani Fanai]

Inchhawng sawmpahnihna chung sira thut paha Boston kawtthler ka thlir vel lai chuan mahni inthah chungchang ka ngaihtuah lo theilo.

Inthah ka tum tih na niloin. Hre chak ringawt turin ka nun hi ka la hmangaih ve hrih.

Miin engtinnge a nunna la tura thuthlukna a siam theih tihah ka buai zawk. An inchhir ve reng angem? An tlak tawh hnu , mahse lei an thlen hma chiah si hian nuamlo tihna a awm ka ring tlat. An hmaa an tlakna tur lei an hmuhin, "Thuthlukna thalo tak a nih hi, " ti tein an inngaihtuah ve thin angem le.

Ka ring chuang lemlo a.

Thihna chungchang hi ka ngaihtuah nasa ve thin a. A bik takin vawiin hian, darkar sawmpahnih liam taa Maine khaw mipuite'n an hriat tawha thlahna thu bawn ber ka sawi atang ngat phei kha chuan. A bawn ber pawh a nilo maithei. A buai chuar nuaih tih pawn a sawi theih a. Keimah emaw ka nu zawk in zawh atangin a hriat theih ang. Ka nu, vawiina atanga kum engemaw zah chhung min be duh tawhlo tu tur kha.

Lo ngai kawi chuanglo ula;inthlahna thu ka sawi kha chu Brooke Shields-i'n Michael Jackson vuinaa a sawi ang emaw Steve Job unaunu vuinaa an sawi emaw Patt Tillman unaupa vuinaa an sawi ang em kha chuan history a ziah tlak chu a tlinglo, mahse ama tawkah chuan a bawn ve khawp mai.

Mi hmingtha tak Andrew Bloom vuina a nih vangin a tirah kha chuan ka nervous ve khawp mai. Maine khaw mite ngainat em em mayor kha a ni miau a. Ram hralh lam eizawnna neitu lian tak niin Plethora a an zirtirtu ngaihsan em em Jenny Bloom pasal a ni a. Tin, hmeichhe naupang sam sen nei, chenna in neilo mipa pakhat a hmangaih vanga a chhungte ti hmingchhetu Lily Bloom pa a ni bawk.

Chuanin kei hi Lily Bloom chu ka ni a, Andrew chu ka pa a ni bawk.

Thlahna thu ka sawi zawh rual rualin Boston ah ka thlawk let leh nghal a, inchung ka hmuh hmasak ber ah ka lawn ru ve hmiah a, mahse inthah ka tum vang chu a nilo. Zuan thlak lam reng reng ka ngaihtuahlo. Chhawng thumnaa awm ka apartment,inchung neilo leh ka roommate ahni zai lai ngaihthlak nuam ti em emte awmna niloa boruak tha hip ka mamawh vang zawk a ni.

Mahse hetiang em ema a vawh hi ka ringlo a. Ka tuar thei mai a, mahse a nuam vak chuanglo hle. Khaw thiang tak leh vana arsi de tuar mai hmuh takah chuan mahni pa te thihna leh roommate thawveng tak leh inthlahna thusawi hriatthiam har tak mai te avanga nuamlo ka tihna te chu a ti reh ve ta deuhin ka hria.

Van zau takin te chem chema min siam te chu nuam ka ti hlei hlei.

Zanin hi nuam ka ti.

Aaa, ka awmdan te a chian deuh zawk nan past tense in kan sawi ange.

Zanin kha nuam ka ti.

A chhan chu vanduaithlak tak maiin ka awmna kawngkhar chu na zet hian a rawn inhawng a, step chuan mihring a rawn luak chhuak dawn emaw ka ti hman hial zawk. Kawngkhar chu inkhar lehin ka awmna lam sir lamah chuan a rawn phei a, hawi pawh ka lo hawichhuak lo. Kawngkhar sira ka lo awm chu hmuh pawh min hmulo ang. Hmanhmawh deuhin a lo chhuak a, amah chauh a ni emaw a inti a nih chuan ka thiamloh pawh a nilo.

Thawk lak hak pahin ka mit ka chhinga, ka hnunga bang chu ka ngheng ar ar a, mahni te a ka awm lai min rawn tibuaitu chu ka ngei reuh kher mai. Hmeichhia ni hram bawk se. Lian ve pangngai niin ka invenghim ve thei lutuk a, mahse zanlaia inchunga mipa nena awmdun tur chuan ka awmdan hi a nuam hrih mah mah. Nuam ka la ti sia, ka himna atana ka haw a ngaih ka duhlo.

Chu mi lo kal en tura ka hawichhuah chuan ka vannei hle a ni ang, a thla atang chuan mipa a ni tih ka hmu thei tlat. Railing a bawh chung pawh chuan a sang tih ka hre thei. A lu a dawm vang chuan a dar hlai tak pawh chu ka hmu thei a, boruak hip kawk kawk-a a thaw chhuak leh ham ham tih chu chianglo deuhin ka hre thei bawk.

Tlu sawp mai tur te pawh a ang. Ka awm ve tih a hriat theih nan tawngchhuah emaw khuh der ka tum zet naa, chutia ka tum lai chuan inher thutin a hmunga thutthleng chu a chhir leng pawp a.

Ka lo phu zuk a, mahse midang an awm ve tih a hrelo bawk aniang vawikhat mai duhtawk loin vawi engemaw zat thutthleng chu a chhir ta zawt zawt mai a. Mahse chhiat a hnekin chu chair lah chu a tawlhsawn hla tawlh tawlh zawk mai si a.

Marine-grade polymer atanga siam a ni ngei ang.

A hma pawn ka pa in marine-grade polymer atanga siam dawhkan hi a su tawh a, a bumper a tihchhiatsak a, a dawhkar erawh chu a him pial thung.

A tawpah chuan awmzia a neilo tih a hre ta a ni ang, a thil chhir lai chu tâwpin kut inhumruh tunin a ding khawng reng a. Tlem chuan ka thik ve deuh. Ani chuan a thinrimna hrikthlakna tur a nei a, keimah ang chiahin ni duhawmlo tak a hmang ve a ni ngei ang, mahse kei ve thung chuan hrithla nghal loin chhungril lamah ka in up bet tlat thung.

Inhrikthlak nan huan tihfai hi ka chîng thin a. A hma kha chuan ka stress deuh chuan kan inhnung lamah kalin hnim hnah te ka pawt fai thin a, mahse kum hnih liamtaa Boston a ka insawn hnuah kha chuan inhnung emaw hnim hnah pawh tur engmah ka nei tawh lo.

Marine-grade polymer atanga siam chair thleh that theih lamah hian invest ve ka ngai te pawh a ni maithei a ni.

Chupa chu a dinna ngaia la ding rengin chair chu a en char char a. A kut chu hum ruh tawhloin a kawng a vuan thung tawh a. A che dawn nge dawnlo ka lo thlithlai reng a. Chutia ka en lai chuan a kawr hak chuan a ban puam chu hreng tawklo tep tih ka hmu tha thei chiah. A taksa dang zawngah chuan a tawk a, mahse a ban chu a lian tha kher mai. A kawr chu dap den denin a thinrim hrikthlakna tur dang niawm takin a 'joint' chu la chhuakin a tan a.

Kum sawmhnih pathum lai ka ni ve tawh a, college ah te pawh hetiang ruihtheihthil hi chu vawihnih khat vel chu ka lo ti ve tawh. Chuvang chuan a ruka hetiang a ti hi dem thei ka nilo. Mahse private deuhah a awm silo hi a ni. A la hrelo mai zawk a.

A 'joint' chu hip kawkin building hmawr lamah chuan a rawn kal ve a, a khu a tihchhuah pah chuan min rawn hmu ta a. Kan mit a intawn rual rual chuan a pen lai pawh chu a tawp ve chat mai. Min hmuh chuan mak ti awm emaw pawn a awmlo. Feet 10 velin kan inhlat a, mahse arsi eng avang chuan a mitin ka taksa a enkual den den tih chu ka hmu thei tho. Mi en kalin a hmui chu a chip hmân a, Mona Lisa male version te pawh a ang alawm.

"Tunge I hming?" a rawn ti a.

A aw chuan ka chhungril thlengin a rawn nghawr nghing a, thil tha a nilo tawp mai . Aw ri hi chuan beng chauh a thleng tur a ni a, mahse, a chang chuan aw ri thenkhat hi chu beng chauh nilo, taksa zawng zawng fan chhuak thei a awm a, chutiang aw chu a nei a ni. A thum tha a, a confi bawk.

Ka chhanloh avang chuan a thil zûk lai chu a pak khu leh talh talh a.

"Lily," ka ti chhuak a, ka aw ri chu ka ngei ngei mai. A zawi lutuk a, a taksa fan chhuah chu sawiloh, ka thusawi pawh chu a hre naw naw chauh ang.

Rawn hawichhuakin ka awmna lam chu a rawn en a. "Khata tang khan I chhuk thei hram angem, Lily?"

Chutia a sawi takah chuan a din dan chu ka hmu chiang ta deuh a, khawng deuh hlek hian a lo ding zum reng tawh a, ka tlak hlauh vanga nervous te pawh a ang alawm. A hmawr hi kephah tiat laiin a hlai ve a, inchung lam ka hnaih bawk a, ka tlak hmain ka invuanbet hman ang.

Ka ke lam chu bih thla zuaiin ama lamah chuan ka hawichhuak leh a. "Aih, ka lawm e. Ka awmna hi nuam ka la ti hrih khawp mai."

Min en chiang ngamlo niawm takin a hawisawn hret a. "Khawngaihtakin chhuk rawh." Khawngaih takin tih tawngkam hmang mah se thu min pe a ang zawk. "Hetah hian chair pasarih lai a awm ania."

"Paruk tep," ka lo ti tel zuk a, an zinga pakhat thah a tum tih hriat nawntir nan. Ka fiamthu chu a hrethiamlo te pawh a ni ang, a duhdan anga ka awm loh vang chuan vawihnih a rawn pen hnai a.

"Inches thum vel lekin I thihna tura I tlakna a dal a. Nikhat atan chuan ka duhtawk tawh hle a ni." Chhuk turin min rawn hui leh a. "Min ti hlauthawng ania. Ka ruihna daltu I nih chu sawiloh."

Ka meng kual rulh a. "Ho mai maia I 'joint' khuk ral tir chu a chi loh ang." Ka awmna atang chuan zuangthla auhin ka jeans hak laiah ka kut chu ka hrufai a. "Tha em?"

Chutia ka chhuk takah chuan a thaw hak a. Inchung sir lamah chuan thlirna tha deuh neih tumin ka phei a, chutia ka kalpelh pah chuan chiang zawkin chupa chu ka en a, a cute zia chu ka hmuh hmaihlo kher mai.

A cute tih ai chuan a tha lutuk ti zawk ila a dik ang. A fai han a, sum rim a nam chem chemin ka hria, kei ai a upa ve fe bawk ang. Min rawn en zawng chuan a mit tlangsir chu a chuar deuh a, a hmui chu tûm reng te pawh a ang. Engahmah ngailo ang deuhin kawnga motor tlan velte chu ka thlir dauh dauh a. A sam cut dan atang chuan mi duhzawng chi a ni tih a lang a, a intihtheihna belhchhahtu nih chu ka tumlo hle. Intihtheihna tur nei turin ka lakah engmah chu a la ti chuanglo na a. Mahse Burberry kawr a ha a, hetiang neia ha thei bulhnaiha ka la awm âwm pawh ka hrelo.

Ka bulhnaiha rawn ding ve in a thil ken lai a zu khu luih chu ka mitsirin ka va hmu a, a zuk zawh chuan min rawn pek ve a tum chuan ka lo hnial a. A âw ringawt pawh hi ruih tham a ni. A aw chu hriat nawn leh ka duh vangin zawhna ka zawt a.

"Chair sawn khatiang em ema I thin tirim turin engtinnge I pawi alo sawi a?"

Chiang fek fawk hian min rawn en a, ka thuruk zawng zawng hmu tlang vek thei te pawh a ang hial zawk. Hetiang anga mitmeng thim kak hi ka lo hmu tawh pawh a ni maithei, mahse amah a nih vang te pawh a ni ang, ka hmu tak lehzual. Ka zawhna chu a chhanglo a, mahse ka awmna nuam taka min chhuk luihtir avangin ka zawhna te hi min chhang turin ka beisei ve tlat.

"Hmeichhia ami?" Ka ti tan a. "I rilru a ti na ami?"

Ka zawhna avang chuan a nui hak a. "Ka buaina hi chutiang lek chu ni se ka ti." Ka lam a rawn hawi theih nan a bang chu a ngheng a. "Khawi floor ah nge I awm ve?" A kut chu liak huhin a thil zuk lai chu a tihlum a, a ipte ah a ak tha leh a. "Ka hmuh ngai che pawh ka hrelo."

"A chhan chu hetah hian ka chenglo a." Ka apartment awmna lam chu ka kawk a. "Saw insurance building saw I hmu em?"

Hmuh chian tum ni awm takin a mit chu a ti zim san a. "Aw."

"Saw mi bul chiah building ah sawn ka cheng a. Chhawng thum lek ania a hmuh ve theih loh a."

Ka lam chu rawn hawi lehin a kiu chu bangah a nghat a. "Sawta I awm chuan hetah hian enge Ilo tih? Hetah hian I bialpa emaw te an cheng ami?"

A thilsawi chuan min ti tlawm hle mai. Han en mai chuan chutiang ang lek sawi duh tur chu a nilo. Hmeichhe tha deuha nia a hriat tan a aia tha deuh sawitur a khek niin ka hria.

"Inchung nuam tak I nei a nih hi."

Hriat belh duh niawm takin a mitko chu a rawn sak ak a.

"Boruak thianghlim dawn ka duh a. Thil ngaihtuahna tur. Google Earth atang ka awmna hnaiha inchung nuam deuh tur ka zawng a."

A rawn nui sek a. "I che eco tal a, a tha e."

Ka lo bu nghat a, ka che eco a, a tha e.

"Tinge boruak thianghlim I mamawh a?"

*A chhan chu vawiin khan ka pa kan phum a, thlahna thu lawmawmloh tak ka sawi a ka thawk a ti nuamlo a tin ni*

Muangchanga thawk lak pahin a lam chu ka va hawi a. "Reilote chu kan ngawi thei angem?"

Bengchhenloh ka duh thu ka sawi vang chuan tlema inthlahdulin a hmaa lungrem chu a ngheng a, a ban chu a uai thlak tir a. Chutianga a awm char char chhung chuan ka lo en reng a, a hria tih ka hria, mahse engatan mah a ngailo a nih hmel.

"Thla hmasa khan heta tang hian mipa pakhat a tla thla a."

Ka thu sawi a zawmloh vang chuan ka ngei tep a, mahse ka hriat chak zawng tak a sawi tlat.

"Accident ami?"

A dar chu a san zeuh a. " Tuman an hrelo. Tlai thim thet theta thil thleng ania. A nupui khan a eirawng bawl laiin ni tla lai thla lak tumin a chho atia. Thlalatu ania. Thlalak tuma a hmawra a kalnaah a rap sual anga a tla a nih an ring a."

Inchung hmawr ka en chuan engtinnge accident a tla thei tur khawpa an awm theih tih ka ngaihtuah a. Mahse keipawh nichin lawk khan ka awm a nih kha.

"Ka unaunu in min hrilh laia ka ngaihtuahnaa awmchhun chu thla chu a la hman nge hmanlo tih hi a ni. A camera kha tla ve lo se ka tia, a chhan chu a uiawm dawn lutuk, I ti ve em? Thlalak tum vangin a thi a, chutah a nunna hialin a tuar phahna thla a lak tum chu la hman ta lo bawk se."

A ngaihtuahna a sawi vang chuan ka nui chhuak a, nuih tur a ni em tih pawh ka hre chuanglo. "I ngaihtuahnaa awm hi I sawichhuak phawng phawng zel ami?"

"Mi mai mai bulah chuan ni lo e."

A thil sawi chuan min ti hlim ru hle. Min hre ngai miahlo a, mahse mi mai mai a tih zingah ka tello ve tlat.

Bang chu nghengin a kuangkuah than a. "Hemi hmuna piang hi em ni I nih?"

Ka lu ka lo thing a. "Aih. College ka zawh hnuah Maine atang ka lo insawn a."

A hnar chu a ti che zeuh a, a inhmeh phian mai. Burberry kawr haa dollar zahnih man lai tur haircut a nei chunga a hmel a siam chhe lai hi.

"A nih chuan Boston ah i rawn inhrem a I maw, huh? Nuam dawnlo ve."
"Enge I sawi awmzia?"
A rawn nui sek a. "Khualzin hoin a hmuna chengsa angin an chei che anga, a hmuna chengsa te'n khualzin angin an chei ve thing che anga."
Ka nuih a. " Sawi chhuak thiam hle mai."
"Thla hnih lai ka awm ve tawh a, enhran em chu ka ka nilo a, chuvang chuan kei ai chuan I la ti tha deuh."
"Boston ah hian enge itih ve?"
"Ka rawn insawn a. Bakah ka unaunu a awm bawk a." A ke chu per chhet chhetin a tawng chhunzawm leh a. "Kan hnuai chiahah hian ania. Tech-savvy Boston mihlun nen an innei a inchung ber hi an lei a."

Hnuai lam chu ka melh a." Inchung zawng zawng maw?"
A bu zeuh a. "Vannei lutukin in atang hna a thawk a. A pajama pawh thlak miahloin hlawh tam tak a la lut a."
Vannei tak hle mai.
"Engtia luah nge I nih? Doctor ami I nih?"
A lu chu a bu leh zeuh a. " Neurosurgeon. Kum khat pawh tling tawhloah ka awmna hi a official tawh dawn a."

Chhelo, tawngkam thiam, leh fing. Chuanin englo a zu bawk a. SAT zawhna chu ni se engber hi nge tel lo ka zawt ang. "Doctor tan weed zuk chu a chi dawn em ni?"

A khi sak a. " Chiloh e. Mahse tih ve zeuh zeuhloh chuan heng hmawr atanga zuangthla hi tun ai hian an tam ang tih ka sawi ngam sak." A khabe dawm chungin hmalam chu a thlir a, thliin a rawn chhem chuan nuam tih hmel deuhin a mit a chhin san a. Tiang hi chuan a hlauhawm hmelloh.

"Hemi hmuna cheng ho chauhin a an thil hriat I hre ve duh em?"

"Hre chak tehreng mai," tih pahin a attention chu ka lamah a rawn pe leh a.

Chhim lam chu ka kawk a. "Saw building saw I hmu em? Inchung hring nei saw?"
A lo bu nghat a.
"Melcher-ah a hnung lamah building a awm a. A chungah chuan in a awm a. In tak tak ang hi, inchunga sak. Kawng atang chuan a hmuh theihloh a, bakah a building a sang lutuk a mi pawn an hre manglo."
Ngaihven hmel deuh hian a awm a. "Tak tak maw?"

Ka lo bu nghat a. "Google Earth atanga ka zawnin ka hmu a. 1982 daih tawh khan permit an lo pe tawh a. Building chung ber a chen nawm dan tur chu."
"Inchung zawng zawng I nei vek anga,"a rawn tih chhunzawm a.

Ka lo la ngaihtuah miahlo a. Ka ta han ni ngat se chu a chungah huan te ka siam ngei ngei ang.
" Chutah chuan tunge cheng?"

"Tuman an hrelo. Boston a thuruk lian ber ania."
Nuih pahin mi ngaihsan hmel deuh hian min rawn en a. "Boston a thuruk dang tha deuh ala awm em?"

"I hming." Ka sawi zawh rual rual chuan ka chal chu ka beng pawp a. Pickup line cheesy deuh te pawh a ang alawm, ka tih theih awmchhun chu mahni innuih mai chauh a ni.

A rawn nui sang a. "Ryle ania. Ryle Kincaid."
Ka thaw hak a. "Hming mawi tak a nih chu."
"Tinge I lungngaih hmel deuha I awm a?"
"Chhan chu hming nalh deuh neih nan chuan engpawh ka ti duh ang."
"Lily tih hi nalh I tilo ami?"

Hawi deuh ha in ka mitko ka san ak a. "Ka hming tawp hi... Bloom ania."
A ngawi reng a. Min khawngaihlo ang deuhin awm a tum a ni ngei ang.

"Ka hria alawm, a thing tih hi. Hmeichhe naupang kum hnih vel lek hming tur ania, nula kum sawmhnih pathum hming tur niloin."
"Engtiang pawn upa tawh mah se kum hnih mi naupang chuan a hming ngai reng a nei dawn a. Hming hi kan thanlen san mai mai theih an ni hleinem, Lily Bloom."

"Vanduaithlak takin ka tan chuan a nia, chu aia pawi zawk chu huan neih vel hi ka tui lutuk a. Pangpar te, thlai chin te hi nuam ka tia. Pangpar dawr hawn te hi ka chak thei lutuk, mahse mite'n ka hming vang mai maia pangpar dawr hawng leh ka thil tih chak tak a nilo anga an ngaih ka hlau a."
"Ni maithei, mahse enge pawi?"

"Pawi chu a pawilo, ang." "Lily Bloom's"ka ti sep a. A nui sek lai chu ka hmu thei. " Florist tan hming tha tak chu a ni ngei mai. Mahse sumdawnna lamah master degree te ka nei ve a, ka tlachhia a ang viau ah i ngai ve tho em? Boston a marketing form lian ber hnuaiah ka thawk bawk a."

"Mahnia sumdawnna neih hi tlakchhiatna a nilo," a rawn ti chhuak a.
Ka mitko ka lo sak ak a. "I tlachhe tak tak te a nihloh chuan."
A ngaihdan nih hmel takin a lu chu a bu nghauh nghauh a. "Kan tlachhe tak tak te a nihloh chuan," a ti ve leh a. "A nih leh eng nge I hming lai ah awm, Lily Bloom?"

Ka rum chhuah hak avang chuan a rawn ngaihven sawtin ka hria.
"A aia thing tihna ami?"
Kun lapin ka bu leh nghauh nghauh a.
"Rose maw?"
Ka lu ka thing nak nak a. "A aia thing."
"Violet?"
"Ni se ka ti," Ka tim uai uai a. "Blossom."

Reilote chu a reh duk a. "Ehe," a rawn ti chhuak a.
"Aw, Blossom hi ka nu hming atanga lak ania, chuvang chuan ka nu te hian an hming inang chu khuanu remruat niin an ngai a, ka lo pian khan hming atan pangpar lampang an ruat nghal chat a."
"I nu leh pa te chu an sual hle aniang."
Pakhat zawk chu ni e. A ni thin. "Tunkar khan ka pa a thi a."
Min rawn melh zuk a. "Awm ang hle mai. Ka awi dawn chuanglo."
"Tak tak alawm. Chuvang ania zanin paw'n heta ka lo kal. Tah hrep ka mamawhin ka hria a."

Min rinloh hmel deuh hian min rawn en vang vang phawt a. Ngaihdam min dil chuanglo na a hriat chak hmel deuh hian min rawn melh a. "In inpawh em?"
Zawhna chhan harsa tak a ni. Ka khabe dawm vang vang pahin kawngpui lam chu ka melh thla a. "Ka hrelo," ka ti bul tawp a. "A fanu ka nihna ang chuan ka hmangaih a. Mahse mihring mihrinna atang chuan ka haw takzet."

Min rawn en vang vang a, a hnuah chuan a rawn tawng chhuak a. "Thukhuh nei lemlo a sawichhuah I chîn dan hi ka ngainat zawng tak."
Ka lai tepin ka hria.
Ka ngawi dun leh vang vang a, amah bawk a rawn tawng chhuak hmasa leh a. "Mi ho hi hei ai hian langtlang lehzual se I ti thin em?"
"Engtin?"

Bang rawng khawk chu a kuta la in a hmet kual a. A pen thla a. "Mi zawng zawng hi anmahni nihna nilo, lem deuhin an nung ni ber hian ka hria, chhungril takah chuan kan chhe vek a. A then hi chu kan inthup thiam mai pawh a."

A thil zuk khan hna a rawn thawk tan nge hetiang rilru hi a pu ve hrim hrim ni.
"Tlema han inthup hi chu a pawiin ka hrelo," ka ti a. "Thudik langtlang tak takte hi a chang chuan a ngainatawmloh fo ania."

Min rawn en vang vang a. "Thudik langtlang," a rawn ti ve leh a. "Ka duh zawng tak." Inherin inchunga a laihawl velah chuan a phei a. Thutna chu remthain a thu thla a. Nghen theih chi a nih vangin a ban chu nghengin van lam chu a thlir a. A bula thutna awlah chuan thu thla ve in a tih ang chuan ka ti ve a.

"Thudik langtlang min han hrilh teh, Lily."
"Eng lampang?"
"Ka hrelo le. I inchhuan theihna lampang ni lo. Chhungrila ti tawm chawih chawih thei tur che."

Ka chhanna nghah pahin van lam chu a thlir vang vang a. A khabe ruh kual, a biangki te leh a hmui te chu ka en dan dan a. Ngaihtuah muk tak nei ang maiin a mithmul chu a awm bawk a. A chhan chu ka hrelo a, mahse hetiang lampang hi sawipui a mamawh tlatin ka hria. A zawhna chu ngaihtuah chiangin chhanna diktak tur ka ngaihtuah a. Ka hriatchhuah hnu chuan amah ka enna atang chuan hawisawnin van lam chu ka thlir ve a.

"Ka pa hi mi kutthlak hmang ania. Keimahah nilo in-ka nu chungah zawk. An inhauh chang hian a thinrim lutuk hian kut a thlak thin a. Chutiang a thlen chuan kar hnih chhungte siamthat tumin a bei leh thin. Pangpar a leisak loh leh zanriah tui tak ei tur ten min hruai chhuak thin. An inhau thin hi ka duhloh zia a hriat vangin a chang chuan keipawh thil min leisak thin a. Ka naupan lai kha chuan an inhauh zan kha ka lo chang thin. A chhan chu a hnu karhnih vel a nawm thin vang ania." Ka chawl det a. Chu thu chu ka pawm tawh ngai em tih pawh ka hrelo. "Thei ni ila chu kutthlak tir loh ka tum ngei ang. Mahse an inneihnaah kha chuan loh theihloh a nia, tihdan phung pangngai anga kan ngaih ania. Ka lo len hnu hi chuan engmah ka lo ti ngailo kha ka inthiamlo thin a. Misual tak a nih vang khan ka pa kha ka damchhung deuhthaw hian ka hua a, mahse keipawh ka fel vak bik em tih ka hrelo. Kan pahnih hian misual kan ni ve ve te pawh a ni ang."

Ryle chuan ngaihtuah muk hmel deuh hian min rawn en a. "Lily," a rawn ti fak a. "Misual kan tih ang hi an awm tak taklo. A chang a thil tisual leh mai thin mihring mai alawm kan nih."

Chhan tumin ka ang zuau a, mahse a thil sawi avang chuan ka ngawi chiang hle. *. A chang a thil tisual leh mai thin mihring mai alawm kan nih.* A dik viau in ka hria. Mi hi an sual ber lo a an fel ber chuang bawk heklo. A then hi chu suallo tura insum tang tang thei mai chauh an ni.

"I sawi ve hun."
A reaction atang chuan ama game siamchhuahah chuan tel chaklo tak a ang. Thaw hakin a dam chu a tuai thuak thuak a. Tawng tumin a ang zuau a, a hmui chu a chip leh a. A ngaihtuah leh fe hnu chuan a rawn tawng chhuak ta a. "Zanin khan mipa naupangte pakhat thi lai ka hmu a." A aw chu a chakloh hmel hle. "Kum nga chauh ala ni a. A nau mipa nen an nu leh pa te room-ah silai an chhar a. A nau zawk chuan la in a kap palh a."

Ka pum chu a rawn ni nghulh a. Ka duh aiin a langtlang mah mah em aw.

"Inzaina dawhkan a rawn thlen meuh chuan tihtheih engmah a awm tawh lo a. Nurse te leh doctor te chuan naupangte chhungte chu an khawngaih hle a. 'Nu leh pa khawngaih thlak tak' an ti vek. Mahse innghahna rooma an fa in a nunna a chan ta tih hrilh tura ka kal chuan khawngaihna chhete mah ka nei lo. Tuar ve tur in ka duh. Naupang rilru thianghlim takte awmnaa tladah taka silai in load sa an kawl avangin hrehawm ti takin awm se ka duh a. An fa pakhat nunna an chan mai niloin silai hmet puaktu tan pawh a hma hun a chhe vek a ni tih hria se ka duh."

Lalpa leh. Hetiang em em thu dawng turin ka lo onpeihlo asin.
"Naupang khawngaihthlak tak chu le(h) ," ka ti chhuak a. "Chu thil thleng avang leh a hmuh vanga a chunga thil thleng tur ka ngaihtuah thiamlo zawk."
Ryle chuan a kekawr a thil kai engemawni chu a pen thla a. "Kumkhuain a nun a tihchhiatsak tawh ang."
Amah en turin a lam chu ka hawi a. "A hrehawm em? Nitina chutiang hmuh chu?"

A lu chu an lo tein a thing a. "Hrehawm tur chu a ni, mahse thihna lam ka tawn hnem poh leh ka nuna bet tel tawh angin ka ngai tial tial a. Engtia tih chi nge pawh ka hrelo." Ka mitah tak min rawn melh leh a. " A dang min han hrilh leh teh, ka ta hi nangma ta aiin a buai chuarin in ka hria."
Ka pawmpui lo, mahse darkar sawmpahnih vel chauh la rala thil thleng te pawh ka hrilh alawm.

"Ni hnih liamta khan ka nu in vawiina ka pa vuinaa thlahna thu sawi turin min ti a. Ka chak chiahloh thu leh midang hmaa thu sawi ti harsa tur khawpa ka tah nasat ka rin thu ka hrilh a-mahse dawt vek ania. Thlahna thusawi hi chu mitthi zah deuhtu emaw te sawi turah ka ngai a. Keichuan ka pa hi ka zah vaklo a."

"I ti em?"
Ka lo bu nghat a. "Aw. Tukin zing khan." Thu thain ka ke chu ka kuah a. "Ka tihdan I hre duh em?"
A lo nui a. "Hre chak tehreng mai."

Ka kut chu ka mala nghatin thawk ka la hak a. "Sawi tur pawh ka hrelo. In vui hma darkar chanve vel la awmah ka nu bulah ka tih duhloh thu ka hrilh a. A awlsam thu leh ka pa pawhin a duh tur thu a sawi a. Din chhuaha ka pa thatna panga vel chauh sawi a ni mai atia. Chuvang chuan....a sawi ang tak chuan ka ti a."

Ryle chuan a aia hriat chak lehzual hmel deuhin min rawn en a. Ka hmel atang chuan thil a buai zia pawh a hriatthiam ka ring. "Awi leh, Lily. Eng thil nge I tih?"

"Tihian ka'n hmuhtir che ange." Ka chair bulah chuan ka ding chhuak a. San hmel tak leh tukin zinga mi tamtak ka hmuh ang hmu ang takin ka awm a. Ka aw chu ka thian kharh a

"Chibai ule. Ka hming chu Lily Bloom niin kan chân tak Andrew Bloom fanu ka ni a. A vuinaa lo tel tura in hun hlu tak senga in lo kal avangin in zavaia chungah lawmthu ka sawi e. Ka zah zia lantir nan in zavaia bulah hian ka pa thatna panga hrilh ve che u ka duh a. A hmasa berah chuan..."

Ryle chu enin ka dar ka san zeuh a. "Tikhan a zo."
A rawn thu tha a. "Enge a awmzia?"

Ka thutna ah chuan thu thlain ka thluang leh ar ar a. "Thil dang engmah sawiloin minute hnih vel ka ding ngawi reng a. A chungchang tha lam sawitur engmah ka hrelo miau a-chuvang chuan ka nu leh ka patea'n ka thiltih an hriatchhuaha ka dinna atanga min hruai thlak hma chu ngawi rengin midang ho chu ka thlir reng mai a ni."

Ryle chu a thle bek a. "I ti tak tak ami? I pa vuinaah thlahna thu chutiang chuan I sawi maw?"
Ka lo bu nghat a. Ka inchhuanpui viau lemlo. A niin ka hria. Thei ni ila chu mi fel tak nih tirin khatah khan dingin darkar khat vel thu ka sawi ang."

Ryle chu a mu tha leh a . "Wow," a lu chu a thing na na a. "Ka hero duh chi tak I ni. Mitthi tawh I roast hmiah mai a."
"Mawilo tak tak a ni."
"Nia. Thudik langtlang chu a ngainatawmloh fo asin."
Ka nui a. "I sawi ve hun."
"Ka lehthal thei tawh lo ang."
"A teuh tal chu a awm ang."
"Ka hrelo le."

Ka lo meng kual kawi vel a. "I hria ang. Kan pahnih inkarah a sual zawk min nihtir lul suh . Miin an sawichhuah ngamloh tur tun hnaia I rilrua awm min han hrilh teh."

A tukkhuma a ban dahin ka mitah tak min rawn en a. "Ka ti chak che."
Ka ka chu ka ang huau a. Ka chip leh hmak a.
Sawitur ka hrelo takzet.
Engmah sawilo ang deuh hian min rawn en a. "Tun hnaia ka rilrua awm sawi turin min tia, ka sawi a nih kha. I chhelo a. One-night stand vel duh la chuan inhnuaia ka bedroom-ah ka hruai che anga ka ti ang che."

En pawh ka en ngamlo. A thilsawi khan thil chi hrang hrang min feel tir thei alawm le.
"Ah, one-night stand lam hi a ti mi ve vaklo a."
"Ka ring a ni," a ti a. "I sawi ve hun."
Min ngawihtir hmak lo ang maiin a awm thei a nih chu.

"Khami hnu ah chuan ngaihtuah fe ka ngai ang," nui deuh chung hian ka ti chhuak a. Thil awiawmloh deuh tur kan ngaihtuah ngial a, mahse a thilsawi kha ka ngaihtuahnaah a rawn lang leh thin. A la sawi chhuak zui. Neurosurgeon a nih vang nge mi fing tak a nih vang zawkin hetiang lam tawngkam hi a hman ka rinloh vang pawh a ni maithei.

Kan inngaihtuah kual a, ka sawi tan leh a. "Awle, sawi takah chuan... Mipa sex ka hmanpui hmasa ber hi chenna in neilo ania."

Rang deuh hian min rawn melh nghal a. "Awle, he thawnthu hi a aia chiang ka hriat a ngai dawn tlat mai."

Ka ban chu pharin ka tukkhum nghahchhanah ka hmang a. "Maine a piang leh seilian ka nia. Veng changkang ve taka awm kan nia, mahse kan veng piah erawh hi chu a tha vaklo. Kan inhnung lamah hian in rauhsan tawh pahnih hi a awm a. Chu in rauhsana rawn awm mipa pakhat Atlas tih hming pu nen chuan kan inkawm thin a. Keimah tih lohah chuan chutah chuan a cheng tih tuman an hrelo. Eitur leh a mamawh hrang hrang ka pe thin a ka pa in min manchhauh hma kha chuan."
"Eng thil nge a tih?"
Ka insehruh teuh a. Ngaihtuah lo tura nitina ka inhrilh ve nasat thin nen engvanga sawichhuak ta thut nge ka nih pawh ka hrelo. " A sawisa a." Ka duhdan taka langtlanga ka sawi theih dan a ni. "Nang ve thung. "

Ka sawi aia tam kha sawi tur ala awm tih hria ni awm tak hian a ngawi vang vang a. Mahse a hawisawn a. "Inneih tih thu hi ka ngainat loh zawng tak ania," a ti ve leh thung a. "Kum sawmthum ka tling tep tawh a nupui neih chakna reng ka neilo. A bik takin fa neih. Ka thil duh awmchhun chu hlawhtlin hi ania. Nasa taka hlawhtlin. Mahse midang hnena ka sawichhuah chuan inchhuang angah min ngai thin a."

"Hna lama hlawhtlin nge nihna lam?"
"A pahnihin. Tupawn fa te chu an nei thei a. Tupawh an innei thei a. Mahse tupawh hi neurosurgeon an ni theilo a. Ka inchhuanpui reng bawk a. Neurosurgeon mai mai niloin ka field-a a tha ber nih ka duh bawk."
"I sawi dik. I inchhuan hmel em a nih chu."
A nui sek a. "Ka nu hian hnathawka ka nun ka hmanral hi a hlau thin a."
"Neurosurgeon I ni a I lakah I nu chu a la lawmlo maw?" Ka nui a. "Lalpa leh. Nu leh pa te hi an fa te chungah hian an lawm tak tak ngai angem le? An tha tawk angah te hian an ngai thin angem le?"

A lu chu a thing a. "Ka fa te chu an nilo ang. Ka tumruhna ang hi tupawhin an neilo a, chuvang chuan an hlawhchham mai mai dawn a. Chu ai chuan neihloh ka thlang zawk."

"A ngaihthiamawm ka ti, Ryle. Mi tamtak hi chuan fa nei tur chuan mahni hma an sial mah mah thin tih hi an pawm duh thinlo a."
A lu chu a thing a. "Oh, fa nei turin mahni hma ka sial mah mah a. Ngaihzawng nei tur phei chuan ka hma ka sial leh zual."
"A nih chuan engtinnge I tih? Ngaihzawng I neilo tawp mai ami?"

Min rawn en leh a, nui hmel ang deuh hi a pu a. "Hun ka neih chuan ka mamawh phuhruk tur hmeichhia an awm a. Khami lamah kha chuan tlakchham ka neilo, I zawhna a nih chuan. Mahse hmangaihna lam hi chuan min hip vaklo. Thil dang zawng aiin a buaithlak bik."

Hetiang hian hmangaihna hi ngai ve ila ka ti, ka nun hi a ti awlsam sawt mai tur ania. "Ka thik hle mai che. Ka tana mipa perfect lutuk hi an awm anga rinna ka nei a. Ka duh ang tak ka hmuh ngailoh vang hian ka lungawi thei ngailo a. Ka zawng kumkhua thak dawnin ka inhria."

"Ka tihdan ang te hian ti ve la."
"Engber maw?"
"One-night stands." Min sawmna niawm takin a mitko chu a rawn san ak a.

Ka hmai chu a sa vek a, a thim hlauh a ka vannei. "Hmalam hun ka hmuhloh chuan mi ka mutpui mai theih ka inringlo." Ka ti chhuak a, mahse ka thusawi chuan a lakah chuan nghawng a nei vakin a langlo.

Thawk la hakin a inlet thawk a. "Tiang hmeichhia chu I nilo a nimaw?" Lungawiloh hmel deuh hian a ti chhuak a.
A lungawilohna ang chi chiah ka nih chu. Bul han tan se chu ka hnar pawh ka ring chuanglo, mahse chu thil thleng thei tur chu ka ti chhe vek tawh.
"I mi tawn chiah I mutpui duhloh chuan... " Ka mitah tak min rawn melh leh a. "Engtia thui nge thlen I duh?"


Chumi chhanna tur chu ka neilo. A mi en dan avanga ka rilru thlak nai thei dinhmuna ka din vangin ka inlet ve leh thawk a. Ka duhlo viau pawh a niin ka hrelo. Min sawmtu ka la tawnloh vang mai zawk niin ka hria.
Tun thleng hian. Ani pawh hian min sawm rêng em?

Ka thutna hmawr chu a rawn vuan a. Vawilehkhatah na lutuk pawh niloin ka thutna chu pawt hnaiin a thutna chair nen chuan a insiktir a.

Ka khawng nghal at thei. Khaw vawt kara a thaw lum ham ham hre thei khawpin kan inhnaih tawh. Han en dawn ngat ila chu kan hmai hi a insi lo chauh ang. Hepa chungchang hi thudik langtlang thenkhat tihlohah chuan engmah hriat ka nei lo a, ka en chuan min fawp ngei awm si a, chuvang chuan melh pawh ka melh ngamlo. Mahse ka dula a kut lian tak a rawn nghah chuan ka chhia leh tha hriatna a tibo duakin ka hria.

"Engtia thui nge I thlen ang, Lily?" A aw chuan ka ketang thlengin a fan nghal vek thei nia.
"Ka hrelo," zawitein ka ti chhuak sep a.

A kuttang chuan ka kawr hmawr chu a rawn si a. Ka dul tlem a lan thleng chuan a muangchangin a pawt chho a.A kut lum thar tharin ka dul a chul lai chuan "Lalpa leh," ka ti chhuak sep a.

Ka tumloh deuhin a mitah tak chuan ka en a, min hip nghal ngawih ngawih ni berin ka hria. Beiseina nei leh riltam hmel tak leh mahni inrintawk hmel deuh hian a awm a. A kutin ka kawr a pawh chhoh tial tial lai chuan a hmui chu a pet tel bawk a. Ka thinphu dep dep chu a hre thei tih ka hria.

"A thui mah mah em?" tiin min zawt a.
Engvanga ti nge ka nih chu ka inhrelo, mahse ka lu chu thingin, "Teuhlo," ka ti chhuak a.

Nui sen chungin a kuttang chuan ka bra chu a rawn si det det a, ka lo mur chhuak sung sung a.
Ka mit ka chhing chiah tih chuan thil ring zet hi a rawn ri thut a. Phone ri, ama phone ri ngei a ni tih kan hriat chuan a kut che lai chu a tawp chat a.
Ka darah a chal chu a rawn nghat a. "Pawi ve leh."
Ka kawr atanga a kut a laksawn chuan ka hmui ka lo tipawrh a. A bag atanga a phone a lakchhuah hnu chuan kalsawnin phone call chu a chhang a.
"Dr. Kincaid," a ti chhuak a. Uluk taka ngaithlain a nghawng chu a kut lehlamin a hmer a. "Engatinge Robert te? Tunah hi chuan call tur pawh ka ni hleinem." Rei fe a ngawi leh a. "Awle, minute sawm min pe rawh. Ka lo kal nghal."

Call chu ti tawpin phone chu a bag ah a ak leh a. Ka lam a rawn hawi chuan a lungawiloh hmel kher mai. Kawngkhar lampang chu a kawk a, " Ka kal a ngai a..."
Ka lo bu nghat a. "A pawilo."

Min rawn en leh vang vang hnu chuan a kut chu a rawn phar chhuak a. "Che suh," a tih hnu chuan a phone chu a la chhuak leh a. Rawn kal hnaiin ka thla la tur niawm tak hian a awm a. A chhan pawh ka hrelo, mahse kalo phallo tep a ni. Kawr chu ka ha vek, mahse engemawni avangin chutiang chu ka ang lo.

A phone screen chu melh vang vangin a nui chhuak sek a. A thla laksak ve chu ka chak viau a, mahse mi ka hmuh leh tawh ngailoh tur hriatrengna thil tur ka duh reng em tih pawh ka hrelo. Chu thil chuan ka ngaihtuahna a tibuai.

"Hmuh che a nuam hle mai, Lily Bloom. I dream te I tihhlawhtlin theih ngei ka beisei."

Ka nui a, mahse chumi rual chuan hepa vang hian ka rilru a buaiin a ngui bawk. Hetiang ang mi-keimah anglo tak leh lakluh nei tha tak bula hun ka hman ngai pawh ka hrelo. A thlen leh tawh pawh ka ringlo. Mahse kan danglam vek lemlo tih hriatchhuah chu a nuam hle mai.

Tih mai tur hrelo awm taka dingin a pheikhawk chu a en vung vung a. Ka bula thil sawi duh nei leh kal ngai tawh si inkarah a ding mek niin a lang. A tawp nan min rawn en leh a-tun tum chu a hmel a pangngai ve ta. Lehlam hawia a kal hma chuan a hmui ah chuan lungawilohna tlem ka la hmu thei. Kawngkhar chu hawngin step-a a chhukthlak paha a ke pen thawm ri zawi tial tial chu ka ngaithla a. Inchungah chuan mahniin ka awm leh ta a, mahse mak tak maiin a hma aiim tlemin nuam ka tilo ta deuh.