"Nunu ila inpeih nange?" Kimkimi a rawn lang hlawl! Ala in ak bawr em em zui lehnghal a! "Engti turin?" Ka tih rual chuan hahthlak min tih hmel fe hian a thaw deuh hliai.
"Ka text te kha i en lo mi? Vawin atangin Football tournament a awm dawn a,alu papawr min zawrhpui rawh ka tih kha" a ti deuh hlar a,kan inhriatna ala reiloh tehlul nen min ngam nghal sarh sarh khawp mai.
"Ka ph kalo la enlo hrim hrim, ka pa te an chhuak deuh chiah a; chhuat nawh kalo tum mek asin" ka chhuat nawhna lek kân zeuh pah chuan ka ti a.Ka pa leh ka nau Aizawl lamah an inphurthla fel deuh chiah a, room lam te tihfai ka ngai.Laldindini a zîng buai leh chung tawh a,thawmhnaw ahai darh chiam tihfel ngai atam lutuk ringawt.
"Chutiang keipawh in kala tifel lo, haw hunah kan ti mai dawn lawm.Dar thum vel thleng bak an khel lo ang" a ti deuh tlat.
"Kimkim khawia kal maw in tum a" bathroom atang Hmingmuana pawm chungin ka nu a rawn chhuak a,an inbual zo ve ta hram alawm.Hmingmuana inbual duhlo lutuk hi chu tihngaihna tak pawh kan hre tawhlo! Khaw lum em em thlan ina min bual huh dup lai te pawn tuilum a inbual takngial pawh zu han duh ngailo a mawle!
"Nu Hma Nunui hian alu papawr min zawrhpui se ka tia, i phal em?"Kimkimi'n alo ti nghal var a,"phal loh tur thu awm hleinem, mahse reilo ula tlai rawngbawl thulh khawp khawp te khan va zuar lo ula" ka nu chuan alo ti mai a, chhuah peihloh veleh hian aphal leh nawlh zel a.
Kan chhuak dawn ta ro ro tiin ka thawmhnaw ka thlak ve hrim hrim a, vawin tak phei chu boruak a uap zual nen han chhuah pawh apeihawm loh takzet. Kimkimi rawn inthuam dan atang tournament pawh nise mi an inchei vak dawnlo anih ka ring a, kekawr var loose hnelhhnawlh tak ha in croptop dum taksa phuar deh nuam zet si chu achunglam ah ka ha bawk.Lukhum khumin ka sam ka tawn a,ka tawn chung pawn ka kawng ala hawlh pha tho mai; tan then chu angai lehtawh ani.
Kan kal nghal mai dawn emaw tih laiin an in lamah akawi leh hmasa te te a.Thuthlenghniam pahnih nen a rawn chhuak leh! "Thil kan zuar pah dawn sia, thutna tur a awmdawn silo thuthlenghniam hi keng tel ang" apahnih hnih chuan min pe nghal zat.Kan tournament en dan tur adangdai dawn khawp mai.
Field kan thlen chuan mi anlo thahnem tawh viau, khawthenawm thlenga ahuam vej vang aniang chhun nisen sat lai pawh a an tam em em ni.Field chu grass phah ala nive lo a,azau tha viau chungin thli a rawn thawt chuan kotlang lamah pawh lei a rawn chhem nuaih nuaih tho.
Field kotlang chu asat em vangin kan chhukthla zel a, inkhel tibuai tur silo kan tan pawha en nuam tur tho siin Tengtere kung lian zet hnuaiah chuan kan in nghat.
"Ka keng hnem vaklo,tlai lamah chuan engthawl deuha en ka duh a,zahnih man tur awm vel bak ka siam lo" a ti a, tiffin lian zet hian alu tui nei ka ti mai 'aluchop' te kha ati ve tak nangin Nu Liani siam nen chuan danglam tak ani.
Inkhel an tan a, under 16 in an khel hmasa phawt.Kei football aia aplayers te ngaisang zawk tan chuan naupang inkhel chu ahmuhnawm loh duh viau mai. "A Goal " an tih rualin kut kalo beng ve tawp a,akhawilam in nge ti goal tih hrelo khawpin ka ngaihsak lo.
Naupang an inkhel zo a, under 16 ah pahnih chiah an awm a a chak zawk kha pakhatna an ni deuh tawp nghal.
Puitling lam inkhel turin an inpuahchah tan a, Pavillion hma ah te chuan in warmup nan an ti nge an tlânkual zak zak.Patlin hmel tak tak te,la naupan hmel tak tak te an inpawlh nawk hlawm a;en reng reng pawh a dulhmul puar lah thei khawpa dulkiar an awm bawk.Tournament nilo in friendly match te pawh a ang zawk, mahsela an inkhel chu en a châkawm ru riau.
"Awi ka ning eeee" Kimkimi'n a rawn ti deuh hluai!
"Enge a?" Kalo ti thuai.
"Kawr eng ha lama keeper tur saw ka pa nih saw" a tih rual chuan ahawina lam ka hawi ve vat a,dulkiar zet ka sawi ngei kha alo ni. "Ninawm miin tikhan min chhaih nan an hmang leh anga, inrawlh chikim lutuk.A kum in a upat san a,thalai tih ang hi tithei emaw ala inti tlat zel" a ti deuh hlak hlak.
"Aho lutuk, upat tawh vanga ina tawm kur reng tur tihna ani hleinem.Kum upa lam hlei hlei hian intihhlimna an mamawh zawk;thalai te chuan intihhlimna tur kanla ngah zawk a.Ngaihtuah vela an tan chuan nun hi aho dawn em asin,an vanglai ngai reng reng in an awm dawn ania" ka ti deuh luam.
Upate hi ka ngaisang a, an tan naupan thatleh atheih tawhlo tih hre reng chung leh an chakthatlai an vanglai a liam tawh tih hre reng chungin thih hun nghakin an awm deuh tawp a.Kawm hlim a intihhlimna tur an mamawh ve tho, an nun hi a boring lutuk dawn hian ka hre thin.Tar chaklo tawh tak tak te phei hi chu an duh duh in an chesawn thei tawhlo a, an ni ang rual ho inkawmhlimna hmun te hi siam ka châk ania aw..
An inkhel tan ta mai chu ka kâ hi ka chîp theilo reng reng.Minute sawm pawh anla inkhelh hma atang ball ûm peih tawhlo pawl an awm nghal a,thenkhat phei chuan field chu zau an tih hmel ngang mai.
"Aw...Bethlehem lam keeper kha khawnge a awm daih ni?" Commentator in a rawn ti chiah chu lehlam goalban lam kan hawi nghal a,Kimkimi pa chu alo awm reng renglo! "Aw Pu Thazo kuhva i ei tawh chuan in goalban lam ah khan let leh tawh la,i pawlte an mangang ania" nuih huah huah pahin commentator chuan a rawn ti leh a, Lalkimkimi pa chu inkhelh laklawh lai lai in field ko ah kuhva alo han ei anih chu! Anva han la thutak lo em em bawk ve mawle aw!
Half time atang chuan kan en tha hman meuh tawhlo, aluchop chu an rawn lei ta nak nak hlawm a; kan buai chho viau.Khua alum in nî asa bawk nen player te pawh chu an chauh hmel tawh ngang mai.
"Ka rin aiin kan inhralh thei daih mai a!" Apawisa dawn remthat mawlh mawlh pah chuan Kimkimi'n a ti a,sawmnga man bawr vel ala bâng.
"Pingi enge in zawrh a?"
"Ehe i inkhel ve dawn ami?"ti a achhan lai chuan U Raymonda mawlh chu kalo en, a jersey hâk te chu inhmeh tak hi ni ringawt.A chhiat hi chu a chhelo mawle, a sâng tha in no hluak nisilo hian avun hi ango a;tenawm khawp erawh ani leh chuang miahlo.
"Ka tel lo chuan chak zawh an inring ngang lo ani" a awmdawm chung hian uang zetin a ti.
"I khelh lohna a rei tawh awm ropui si,tlân pawh i tlân thei tawhlo ang" an inbiak lai chuan ka lo ngawi reng ringawt. "Luite Lalnu tinge ka biakna che min reply loh a" a rawn ti deuh thut a, nui sângin min en bawk si, khawlum nen ka sen tawlh tawlh ngei ang.Nge maw ka laih ve em em ringawt le?
"Khatin min ko suh" ka ti fak a, min be leh se ka ti ru viau thung.
"Ni chiah mai, hmingphuah hi hrât viau suh Nunu ti ve mai rawh" Kimi'n alo ti ve bawk.
"Kimkim in alu zawrh chu a tui maw? Kalo dawr ve dawn cheu mi?" Pa pakhat hian a rawn ti a,ka pa rual tur vel niawm ani.
"Leisak rawh Pa Hruai, hei atui aniang alei tawh te'n an rawn lei nawn leh tawh ngailo" U Raymonda chuan alo ti hmanhmawh.Mahse a tidik tak tak,ka hriat chinah a lei tawh te ho khan an rawn lei nawn tawhlo hrim hrim!
"Ati ve mai mai nih kha,a tui aniang hei kan hralh zo tep alawm.Sawmnga man bâk a awm tawhlo" Kimkimi chuan alo ti nghal zung zung ."kalo lei ang" pawh a tih hmain sarâng ah apack nghal mawlh mawlh.Sûmdawng mi tur tak ani.
U Raymonda chu a team mate ten an rawn ko a, a kal zui nghal.Tlangval hawklak awmtha duhlo pawh a anglo, infiam mi taksa uluk tak te pawh a ang zawk daih! Midang kârah pawh chuan alangsar lawr lak a, anuihmel te chu mawi tak ani! Kei hi ka star ringawt emawni? Âaaa ahmelthat em vang bak anilo ang.
"Nunu enteh maw U Raymonda inkhel tur hi amak e!"
"Mak vak ami, ipa ang rual te pawh an tel tho alawm" kalo ti mai thung. "I hrelo anih kha, highschool leh Higher akal lai chuan inkhelh thiam ti a lâr hat khawp ania, mahse tunhnai ah vawikhat pawh a inkhel leh tawh ngailo.Khêlmual arah chhun chu a thiante nena an ruih châng chauhin ani mai, tinge a rawn tel ve leh thut le?Kan khaw thenawm te nen hian kan intum thin a,achaklo zawk kan nih ziah vangin nikum pawh khan kan VC te tlawmngai in U Raymonda hi tel ve turin an sawm a,a lo hnial fithla thak! Sual viau mahse an khawsa thei a, midang ruihhlo ti te ang em em in mi hian an ngaimawh lo hlauh zawk" atawng laklawh lai chuan "Ruihhlo akhawih maw?" Kalo ti sep.
"Khawih ang, a rui tak hi chu kala hmulo a mahse ruihhlo ti hlir alawm akawm.Buaina a awm apiangin ahming a ri tel ve ziah bawk alawm" a ti leh a, ka hnîm nghal ruih mai.Kalo ngaizawng tak tak reuh emawni?
Pangai taka inkhelh en ve tawh tumin Kimkimi tiffin lian zet chu bag ah kan khung a, tengtere zâr ah kan bang nawlh.Kan awmna atang chuan en a nuam bawk a insawn lo in kan thu deuh ât.Thuthleng hniam kan keng te chu a fuh phian a, lei lawnga thut tawp ai chuan kan bal lo deuh nge nge.
Inkhel an tan dawn hnai a, U Raymonda te team chu kan awmna lam an chang hmasa dawn anih hmel,kan lam panin an rawn phei hlawm.Tuntum inkhel tur ho chu an pangai hlawm viau, uangthuanga han tel hmel pawh an pu lo.
"Lehlam ho saw vêngsang Team an nia,U Raymonda te lam hi chu ka hrelo vêng ang pawn an khel dawnlo aniang" Kimkimi chuan alo ti mawlh mawlh.
Kan piah lawk ah chuan an rawn innghat a,an tih tak tak hmel khawp mai tui case khat tawp te an inchhawp ve.Inkhel hmasa te kha uangthuang mai mai a inkhel an nih vangin kalo ngai holam khawp a, mahse uangthuang lo pawl pawh an awm tho anih dawn hi.
"Players te Pavillion hma ah rawn intlar ru le" tiin Commentator a rawn au lauh lauh a, kan piah a thu players te pawh an tho nghal sap sap. U Raymonda pawh in zo zetin a inperh tho a, athiante ruala akal ve nghal mai dawn emaw kan tih laiin kan lam panin a rawn phei daih!
"Khawilam nge i tan ?" Ka hmaah rawn dingin min melh chhuk ngur chuan a ti a,keini kanlo thu bawk si kan melh chho e ngar ngar nangin nisa in min chhunkhalh bawk nen men chu har tak ani.
"Inpawl lo lam kan tan dawn, Vengsang te chu an thiam a tuntum pawh khawthenawm te nen final ah an intum leh tho ang" kimkimi zawkin alo chhang.
"Nang ka zawt lo che Pingi, Luite Lalnu khawilam nge chak se i duh" tiin keimah chu min zawt leh a, nisa min dinhliah nghal zat.Ahmel pawh ka hmuchiang thei ta deuh alawm. "Tan tur pawh ka hrelo e a " ka ti sap ringawi.
"Min tan chuan ka pawlte ka chakpui anga ,lehlam i tan chuan ka chak tir ang" a va han confi tak! "Raymond" a thiante'n an rawnau lauh lauh.
"In chak chuan ka tan ang cheu" ka ti ta tawp a, han chhân dan tur avaâng ve bawk em ani.Nui sukin "minlo en rawh goal nga ka thun ang" ati a,Pavillion lam pan chuan atlân phei zui nghal.
"Enge ka hriat veloh thil a awm em?" Min melh kur chung chuan Kimkimi'n a rawn ti zat, "chutiang engmah awmlo" kalo ti hap a, "eh! Alai vel kha i sen vek alawm i star chiang lutuk" a tih lehlek phei chuan lai tak ka ni! "Awihawm loh lutuk" ka ti deuh hlar nangin ka thusawi chu keimah pawn ka awih biklo.
"Ho lutuk, U Raymonda te chu chhelo ve lawm .Keipawn chhelo chu kala ti reng, mahse minti zak ngun tawh em a han ngaihzawn en ah hian ka en duh tawhlo.Star tu angah teh mai nia " a ti zui a, ka chhang tawhlo.
Inkhel an tan a, U Raymonda dinna hmun atang chuan striker ani dawn tih te chu ka hre thiam ve."Tuna inkhel tur Jersey vâr asen atial mawza dum bun te hi Vengsâng team an ni a,Jersey dum ha te hi Simple...Dum..Simple enge heihi?" Commentator in a tih chuan mipui kanlo nui ri hawk "minlo ngaidam ula thingtlângpa lei tân lam a harsa deuh ani " commentator chuan mipui han tihhlim vel dan a thiam viau mai.
"Aw jersey dum ha te hi ' Simple Dimples' an ni e " mike a off tawh emaw a ti nge "eng tihna nge" a tih chuan kan nui leh ham ham hlawm. "Alo la in on anih hi a" a rawn kiu nghal vung vung. Anuam chho viau mai, hetiang taka inkhel ka en laia ka nuih hnem kala hrelo reng reng.
Inkhelh chu an han tan tak tak ta a,ka beiseiloh zetin U Raymonda chu atlân chakin a tlân thei zek! Ball ala thiam em em zui! "Kimkim U Raymonda chu ava thiam ve pathum pawn an vil hnehlo anih saw" ka ti nawk nawk.
"A thiam ka tih kha" sawi dik inti fe hian uar fahranin alo ti a, tan bik ka nei nghal sa diam tawh.
Minute nga pawh aliam hma in U Raymonda chuan a ti goal dêr nia! Tiang khawpa tlânthei saw ruihhlo atihloh rinna lian tak ka nei.Ruihhlo ti tân chuan sawi tianga tlân chak ngaihna saw a awm dawn hian ka hrelo lutuk.Nge ka rin thu mai mai zawk ni? Game atang chho viau a, U Raymonda chu an vil deuh chawt hlawm ani ber tawh. Ball achan apiangin lehlam pawl ami panga vel in an bawr nghal luih zel a, atan pawh chet zung zung ahar talh tawh mai.
Kan lamah chuan ball a rawn kal khât em em a, kan lama keeper phei chu daihlim chinah te alo thu thûl, chutiang vel chuan lehlam goal ah ball atam.
A goal leh ta! U raymonda bawk!
Commentator chuan lam harsa a ti ve ngang ni tur ani "aw tunah khan 'simple' lamin goal hnihna an thun leh der mai! A pet goal tu kha Raymond Zoremsanga bawk ani.Vengsâng team hian an la rawn lehpel thei dawn em aw?" A ti a,Vengsang tan lam mipui te chuan "aw " anlo ti dual mai.
U Raymonda apawl ten ball an pass leh rual chiah chuan lehlam pawl in an bawr nghal tup a, lei ah a tlu ta hnawk mai! Ka thu hle hld theilo ding meuhin thil awmdan chu ka en.Refree in hamrik hamin U Raymonda pal thlu tu chu hmaah chuan akawr eng hak chu akawk a, mipui anlo au dual! Yellow card ah a kawr eng hak chu ahmang tihna mawni?
"Aw Laltlanzoa'n tunah khan yellow card ahmu e"Commentator in a rawn puang a, ka hrethiam ve chiah. A kawr chu alo hmangtangkai ngei e.
U Raymonda chu tha viau mahse apawl ten ball an pass hleithei tawh meuhlo, lehlam ten an check hneh bawk em a.Kan lama ball a rawn kal rual chuan keeper pawh chu a dingtha nghal a, hlauthawng zetin kalo en tawp. Lehlam pawl chuan ball chu goal zawnah a rawn pet a, awi awi awi keeper chu angaihna awmlo! Ball awmlohna lamah a dive daih anih chu! A goal ta! T(r)an man anva awmlo ber chiang tak.Keeper tha deuh te neih ve tur ania.
Ka lo au nasa ve viau ni tur ani, ka hrawk chu athîp deuh hlar a.Kan tuipai azo tawh bawk si ka hrawk ka thian ka thian mai.
Half time ani a, U Raymonda te lam pawh an chawlhmun lam an rawn pan sap sap.Leia mu zâl hnawk te pawh an awm.An manager ni ngei tur chuan an khelh that thu alo hrilh mawlh mawlh hlawm a, an hah bawk aniang an Jersey hâk te pawh ahuh hluam hlawm mai.
An tui in in ve châk zeta kalo thlir dauh dauh lai chuan U Raymonda chu kan lam pan bawkin a rawn phei leh a, "in rawh i hah tawh ang" tiin ka hmaah bottle chu a rawn lek kang zeuh.
"Ka lawm e" ti sepin kalo ban ve mai bawk.
"U Raymond i van khel tha, hman hman ah te khan lo khel tawh la tha tur" Kimkimi chuan alo ti a, anui suk duh chauh. "Goal hnih thun kala ngai a,lo awm ve reng ang cheu" a tih chuan goal nga thun chu a tum tak tak tih ka hrethiam.A fiamthu mai mai ni tur ah ka ngai a.
"Tui hi" kalsawn atum rual chuan ka ti sep a,"kawl rawh ila in leh duh ang" ti supin a thiante awmna lamah chuan akal leh nghal.
"Chhiat hi chu a chhelo mawle, ka star leh takngial dawn"
"I duhloh kha"
"Eh...kan va hauhna tan ve" ka ka ka chip hmak.A duh leh ang tih mawlh ania ka hlauh ni, âaaa duhleh pawh nise kalo buaina tur a awmlo,'Vanlalmuanpui harh teh'.
Game an tan leh a,tanhmun an inthlak bawk nen kan lamah chuan ball a rawn tam ve ta deuh.
U Raymonda'n ball achan rual chuan Kimkimi nen kanlo au ve vak vak a,a goal li na a thun chiah chu kan lawm lutuk kan râk nawk nawk.Kan lam hawiin akutzung tang pakhat hi a rawn ti pir va a, goal khat chiah ahmabak tawh a tihna ah ka ngai.
Minute sawmpanga dawn ah a khung leh a, penalty hmangin ani ve thung. A duhtawk a thun tawh ani hmiang,U Raymonda chu a chhuak ta daiha! Midangin an rawn thlak.5-1 ania hun atam tawhlo nen in lehthal ngaihna a awm tawhlo.Chak tur zawk chu ahriat nghal vek tawh.
"Pingi minlo star leh hman pek em?"kan bul a rawn thutthlak dawt pah chuan a ti kher!
"Kal teh a, nangkher hi chu ka star tawhlo ang che" Kimkimi'n alo ti hlar a,U Raymonda erawh anui mai thung.
Ka bul chiah ah a thu a, lehlam ah Kimkimi a thu bawk.Ahma angin ka au ngam tawhlo reng reng.Ka thu ngawi reng ringawt tawh.Kan bula a rawn thut ve hma a kan au rin nen aw, ka che a ti khawr zo vek!
"Tinge ilo chhuah daih a?" Game lam pawh ka ngaihven tawhlo.
"Chuchiah lehlam sawn an lehthal ange" kimkimi pawn alo ti ve bawk.
"An chau ve ve tawh a,an lehthal hman tawhlo ang.Bakah ka duh zat ka pet goal tawh alawm" tiin min chhang mai a, kan hmalam chu a thlir dauh dauh bawk.
Hun atawp a,U Ramonda te lam chu 5-3 in an chak ta ngei mai.Vengsâng team lam chu an chaklo zen zenlo nge an hmel a ngui ruai hlawm a, an khawngaihthlak letling.
"Kim rawngbawl ka ngai dawn sia, game dawtleh chu ka en hman tawhlo ang" ka ti ta sep a, Kimkimi pawhin "haw tawh mai ang" a ti ve mai bawk.
"Minlo nghak ru, kalo haw ve nghal ang" U Raymonda'n tiin a thiante awmna lamah aphei zui a, kan bag tengtere kûnga kan bân kanlo la ve bawk.Kal lam ang bawkin thuthlenghniam pahnih chu ka pawm a, Kimkimi'n a bag lian zet a ak bawk.
U Raymonda kan bula a rawn thlen leh rual chuan engmah pawh sawi lo in ka thil ken chu ala lawk a,ka lo melh deuh haw chu "kal ang u" a ti zui sup.
"Einchh athil ken te akensak vel" Kimkimi'n alo tih chuan lei ka chhuah khum zeuh. Nuam ru mai mai tak ani.
Field kotlang kan thleng chho a, "U Raymond thla kanlo lak pui che" tleirawlte hmeichhe pahnih hian anlo ti! Milâr pawh ani tawp silo.
"Angailo ka lawm e"ti a U Ramonda'n a chhan chuan Kimkimi nen kan nui chhuak thawt a, tleirawl pahnih te chu an hrilhhai hmel ngang mai.
"Lakpui ve mai mai ta la, i engmah a hek phah dawn der silo" kan ti leh hnuhnawh a, "ka zak" ati tawi tup ringawt.
Hawlam chu kan kalpuinu anung tha vet vet bawk a kan ri chho deuh lung lung.U Raymonda leh Kimkimi chu ui leh kêl ang vel an ni, an inhnial chho char char.Nizan lamah arawn sawi "kan khua ah hnial hnehloh ka neilo" a tihkha ani thei dawn lutuk hian ka hria a, Kimkimi pawh a tawngkam tawi te te in ahnial char char peih.
An inpeng kan thlen chuan "naktuk ah semifinal kan khel dawn min rawn en leh ula" a ti sup a, kimkimi zawkin "kan hman tawh kherlo maithei" tiin alo chhang nghal.
"Hman intum leh hrâm dawn nia" nui suk a tiin "anih u" ati zui a,keini pawh kan inzui chho ve mai bawk.Kawngkawi kan thlen hma deuh chuan hnunglam ka hawi let zeuh a, U Raymonda kâwn lam a akal thla nul nul chu hrethiamlo zetin ka mitko ka san zeuh.
"Ehe! Nunu U Raymonda kha abike khan alo kal sia! Ke in a rawn haw leh daih bawk sia!" Kimkimi chuan a rawn ti chhuak nulh a, kâwn lama achhuk leh chhan anih dawn chiah chu. "A keng tih atheihnghilh aniang" ka ti tawp.
"Awihawm loh ee, i ruala a haw duh vang bak anilo ang.Abike te chu ahmangaih hmasa ber alawm anih" min chhaih pah deuh hian a ti, ka hnial peihlo ka hnial hneh dawn chuanglo.
In ka thlen chuan rawng ka bawl nghal zung zung a, ka nu leh Hmingmuana bazar turin an chhuak ve thung.Kan hmanloh châng leh zîng lamah hi chuan ka nu hian rawng abawl mai a.Mahse kan hman tho chuan Dindini nen kan bawl thung.Nula awmno satliah kan nih hi aphallo ani ber, "in lawina in tur a hriat loh a, mizo nû in a athiam tur chi chu in thiam ve vek tur ani" a ti deuh bur.Kum sawmpahnih kan nih atang buhthap min zirtir a,a thlei tak hi chu tun thlengin kala thiam meuhlo thung.Dindini erawh chuan athlei lam chu a thiam viau mai,ka tlukloh na pakhat aniang;rawngbawl lamah lâktlân miau heklo.Bai te phei chu asiam anih phawt chuan chaw ei te hi minti châklo vek thei hial! A chawhmeh siam ve thin lah hian mihring hmel ang deuh deuh pû te hian a chhuah thiam a! Ei hi achákawm thlawt thinlo.
Tiau an chu hring nghulhin ka tlak a, a tak tlem suak chhuakin hmarcha muh in ka thak bawk.Mizo in a kan chawhmeh kan tih chin ho hi ka ngaina viau a, alu kan ai te hian bawkbawn kan te hi ka duh zawk daih.Anhlîng tlak tihte, Lambak tauh tih te hi ka ngaina viau.Tin chhang leh nepnawp tih vel te hi chaw atan hian ka ring hleithei thinlo, a tul tawpkhawk ah chuan ka thei tho a;mahse chaw anga rin tur chuan mizo chawhmeh leh vaibuh chhum ngei ka duh.
Nimin zîng lama kan vawksa chhum chu atak suak chhuak in ka kang ro a, sa thing hi chu kan ro leh loh hi chuan ngaihngam taka ei aharsa ka ti deuh tlat.Hmarchapui rawhin tomato leh nghathu nen ka rawt pawlh a,a dang siam belh vak angai tawhlo.
Ka pa chu thim thet thet ah a rawn thleng a, dawhfawh lian zet a la rawn zui.Freezer ah dah ila avawt ngeiin ei ila a tui dawn lutuk.
"Dinsangi chuan rawn zui haw leh mai che te a tumlo maw?" Zanriah kan kil mawlh mawlh laiin ka nu'n a rawn ti a, ka pa chuan a chaw thial lai lem zeuhin "zahthlak tak ani,ka rawn haw san tur chiah kha tap chungin min ngen mawle!" A ti deuh hluk.Kalo nui hak thung.
"Midang an awm ve nual a,azahthlak duh reuh khawp mai.A duhlo chung tihluihna hmanga dah te pawh ka ang zawk" a tih leh lek phei chuan ka hmui hupin ka nui khur ngat ngat.An inngên lai vel tur ka mitthla a,Dindini mizia nen ngaihtuah tel phei chuan "pa min kalsan suh" a tih duh hial ka ring.
"A zir chhuak ve tep tawh alawm, anaupangchhia thei lutuk hi chu buaithlak. puitlin zir se atha ang " ka nu in a ti deuh hlak a, sak deuh anga langin âng hlawk hlawk mahse angai ber ani leh ziah tho.
Beisei loh zetin thleng ka sil mawlh mawlh lai chuan Upa Chhuana leh Upa Zuala an rawn leng lut nawlh a, "lo leng ru" ka pa'n alo ti thuai bawk.
Sitting room lama an thut vangin an thusawi ka hre hleithei lo a, mahse ka pan "Nunu i hman chuan rawn phei lawk la" a tih takah chuan ka kut hru hul thuakin ka va phei ve nghal.Anlo thutak hmel hlawm ngang mai.
"Hei Upa Zuala te hian Kohhran school lamah thawk turin an rawn sawm che anih hi" an kianga ka va thut ve rualin ka pa'n alo ti nghal.
"Âaaa trained chhuak pawh ka ni silo a " ka ti deuh sep.
"Nih chu ani viau a, mahse tunlai chu zirtirtu ho an indaihlo a.High school lam S.S zirtirtu lâk tur kan hmu mai lo nen, i remchân tak hlauhin kan tia kan rawn sawm tawp che anih hi" Upa zuala chuan a ti var.
"Nunu zirzawm leh lam ila ngaihtuah lo bawk a,an mamawh che chuan thawk la ava tha ve.Rawngbawlna zel ania " ka pa'n alo ti dap dap a, hnial chi ah ka ngai tawhlo.
An mamawh hmanhmawh bawk a naktuk atanga thawk tan nghal mai turin min ti a, tournament en kala châk asin le aw..Naupang mize inang lo tak tak han zirtir pawh chu ka thiamlo ang tih ka hlau viau mai.Ka nin chinah ka vaw deuh pawp pawp ang tih te nia ka hlauh, Kohhran school ani a school dang anga strict thehthawh a awm a chi dawn der silo.Keini highschool luh ve lai te chuan homework thiamlo leh lehkhabu kenglo ringawt te bangah min beh tir thin ania, achangleh dawhkân te hnuaiah mi panga te inhnawh turin min ti thûl.
Muthmunah vawinlam ngaihtuah in ka mu meng kar a, U Raymonda ka ngaihtuah nasat pauh leh ka duh telh telh.A Jersey hâk inhmeh lutuk mawlh mai te kha! Aaaaa ka va ning tak.
Muhil thei heklo whatsapp status chu ka en kual mai mai a, kan awmna hmasa lama ka thiannu pakhat Remi status chu enin ka nui khûr dar dar, tunlai zaithiam rawn lârthar pakhat zai lai chu ahmang a, a caption ah "zai ve mai dawn mawle" tih ahmang bawk.A hman berkher chu a zaithiamlo ve bawk em ani,alar phian zui a 'ingaisang ve ngawt mai' ti in ka reply zeuh; a duhlo leh mai mai ang chu.
U Raymonda message a rawn lut nawlh a"naktuk chu?" Ala rawn ti. Anb chu ka save hmasa te te phawt a "Kohhran school ah Zirtirtu an in daihli a, naktuk atang ma thawk lawk dawn a" tih ka thawn let nghal.
"Tlai lamah ania, i rawn en hman tho ang" ala rawn ti hrâm a, "ka hrelo le" ka ti ve nghal.En leh chu achâkawm khawp mai, amah chuan khel dawnlo se ka châk hawrh hawrh kher ka ring lo.
"Aw hriat hi inei tlem si" pangai takin kan inbe reilo hle mai, ka reply tawhlo tawp.Anawi chho leh ngar ngar dawnin ka hria.
#fb lamah athei thei in min comment sak ula, share te kha atheih phei chuan apawina awm reng renglo
