Pilitician nupui S2

[Cck Lalchhuanawmi]

Politician Nupui Hring nun
S-2
Chapter-5
Ziaktu: Cck Lalchhuanawmi


Lal Fanu kum sarih a tlin hunah chauh a phal kha a ni si a, ka hrilh dawn reng reng lo, a sût palh ang.


Copper-T la chhuak tura kal ni lekin!


Hmingi pov...

"U Chhuanpuii hi, lo kal leh se ka ti e",


"Ngati maw?",


"Kan ei a tui deuh a", Hriatin a ti chu, ka ner nak.


Thu ṭha tak a sawi tura ngaih nak laiin.


A la nau hlek a ni e. Tak takin, Chhuanpuii lo kal se ka ti ve, a induh lel lul lutuk hi, ka la kuk ral ngei ngei ang.


"Lo lêng rawh", Hriatin a ti a. Dawra lo lut ka hmu chu, ka mit vâi emaw ka ti dawn.


"Eng Lehkhabu nge i zawn?", Hriatin a ti leh a. U Hriatpuia chu ṭawng a tum si lo. A hawi kual hru hru ringawt.


Ka lamah a lo tawlh hrut hrut a, "A â mile?", a phun sep.


"A beng a chhet a niang",


"Ni maithei", Hriatin a ti sep. Ring tawk tawkin a be ngei ang le.


Hriatin a va pan hnai a, "Ṭhianpa?", ring tawkin a han ti a, u Hriatpuia phu nasa lutuk chu, a thlawk chhuak lo chauh.


Min lo en a, a beng a ṭhat vak loh thu zaizirin ka hrilh a, ka phun bawk.


Hriati bawkin, "Eng Lehkhabu nge i zawn?", a ti leh a.


U Hriatpuian, "English Novel in kawl em?", ring tawkin a han ti a. "Kan ngah lutuk alawm", Hriatin a ti leh.


Ring tak takin an inbia a, an hmuh lohin ka nui kur kur. Ka bawl hlawhtling. An hriat hunah min nau nasa ngawt ang chu.


English Novel awmnaah Hriatin a hruai a, Lehkhabu chu pakhat te tein a sawifiah. A Bu chhung thu tlangpui a hrilh keuh keuh.


U Hriatpuian min lo melh leh zawk ṭhin a, ka hre lo lui ngat.


Nizan thleng kha chuan, Hnahthialah a awm thu min hrilh a. Tunah lem, a rawn lang nawlh.


Chhuanpuiin Aizawlah a awm tih tinge min hrilh loh le?


Zawtin han chhuahchhal mah ila, "Ka buai lutuk a", ti hian min hnial thlazen reng a.


A intibuai thei em em ringawt a, a intitheiah ka ngai tawh.


Nupui pasal neih hnu hi chuan, hman a har a nih hi maw.


Hriati leh u Hriatpuia te inbia ngaithlain ka nui kur kur. Hriati leh Hriata, an inhmeh dawn lutuk.


Ka nau-i hi, Pathlawiin an veh thluk ka phal tawh reng reng lo. Ka sawirem dawn mawni aw...


U Hriatpuia chuan a tuar thei tawh lo a ni ang, "Nidangah ka lo kal leh ang", ring fahranin a han ti a.


Lo hawi let hauh loin a chhuak nal nal.


Hriatin tui a in khawlh khawlh, a in zo chu, a nghawng a dawm a, "Ka Dang hi, a thler dawnin ka hria", a ti ṭeng chhuai.


Ka kuah a, a hnung ka chul heuh heuh. Lainatawm hnup hnup hian. A hlimawm phian mai si a, an tan chuan a hlimawm loh.


Phone a ri a, ka en chu, u Hriatpuia a ni.


Âw thian kharhin ka chhâng a.


"Hello?",


"I lo chhuak hman em? Lunch Time a nia, ka show ang", ka ner salh salh.


"Vawi engzah nge ka hrilh dawn che, Sap Ṭawngin min be ziah suh. Mizoramah a nih hi i awm. Mizo Pain Mizo Nu i bia a, Mizo ṭawngin ṭawng ṭha mai rawh", ka ti nghek.


Ka ngei tlat alawm.


Call chu sawi loh, message-ah ngial pawh Sap Ṭawng a telh.


"Sorry", a lo ti sup a. "Ka pawm lo", ka ti hlak. A intih Sap ṭawng thiam thlak lutuk mai a!


Duh ila'ngin, kan thiam ve lutuk alawm. Hna zawn nan kan hmang chhuak thiam lo mai pawh a.


Broken deuh deuh chuan ka thiam ve em mai a!


"Ka tihpalh. I lungawi em le?",


"Ei tur min leisak dawn chuan",


"Lo chhuak rawh".


Hriati hnenah a ei duhzâwng ka zawt a, a sawi ṭeuh mai.


Dawr aṭanga hla vak loah a lo ding run.


"Engtikah nge i lo thlen?",


"Ni thumna a ni tawh", a ti chu, ka nui tawp chiang a nia.


Hauh nek ka tum a, "Chuti, ei tur tuihnai tak tak min lei thei", ka ti ta ringawt. Hauh chiamin a sâwt dawn lo nasa.


A duhna ber Restaurant-a min chawlhpui a tum chu, "U Hriatpui, hmun dangah kal zawk ang",


"Hei hi a ṭha ber, lo kal rawh", ka kut a rawn chelh a, ka lo thing thla. "A changkang em mai ka duh lo. Dawr chauh a changkangin ei tur man a to ringawt a, a tui tak tak lo. Pawisa a uiawm", ka ti tlat.


A dik em asin, Dawr changkang apiangah a man chauh a to a, an ei in siam a tui tak tak ngai lo.


U Hriatpuian min hnial duh lo, ka melh rum ṭha ve em bawk a.


Keimah zawkin hma ka hruai ta a, Chow satui leih ka eipui. Dawr pawn leh chhung a changkang lo a ni mahna, ei tur leh in tur a tui bik hliah hliah.


"A va han tui em em, Chow satui leih ka ei tawhah a siam tui pathumna an ni", u Hriatpuia pawhin a ti.


"Pathumna maw? A chhan han sawi teh",


"Ka nu leh ka u Hmai ten an thiam em a, a hmasa ber ka nu, a pahnihna ka u", a ti a.


"A nih chuan, ka siam i ei hunah a palina ka ni dawn nimaw?", ka fiam zeuh. Ka thiam loh a rin thu a sawi ka ring.


U Hriatpuia chuan, "I siam ka ei hunah chuan, tu dan rual lohin Pakhatna i ni ngei ang", a ti khauh a.


Mak ti takin ka en. Rin loh lutuk thu min han fah vei chu! Chow a ei mial mial sia, keiin mak ka tih tehreng nen.


Ka hre ta, min fiam chiang.


"Pakhatna ka nih leh nih loh i sawi thei lo ang. Ngati nge, ti teh",


"Ngati nge?",


"I lei(tongue) i lem daih dawn a", ka mitko ka kân ak. A khi suk suk a. Dik a ti chiang mai.


Engtin tak min fiam let ang maw tih laiin, "Dawra ka lo kal khan ngati nge min biak miah loh?", a ti daih.


Min chhuahchhal hmel a pu lehnghal a, min chhuahchhal nia mawle.


"Ka buai em kha, Hriatin a biak ṭhat tho che kha maw", nuih a la za.


"A ri hriatna a ṭhalo tak tak em ni?", min dâwp chhuah tum ang hrimin min melh khaih.


Ka fing ve em mai a, "Engtikin nge a ṭha lo ka tih?", phakar min ti tih hriat takin a phawk hra.


"Zaizira mi hrilh kha", a ti thawp sup. Nuih a za em mai a. Ka sawi ṭha dawn chuang lo.


"Chutiangin ka ti lo",


"I engtihna nge?",


"I va dilchhut mai mai tak, khatiangah buai suh. Hriatin Burger leh Coffee a duh a, i leisak thei a nia aw", a han bu nghat a.


A leisak ang.


Burger leh Coffee chauh a sawi lo, tawk mai rawh se. Burger chu pakhat chauh ni lo, panga lei se a ṭha.


Ka ei ve duh.


Kan Chow eina man a pe a, Lassi ka leitir leh hram.


"Engtikah nge i haw dawn?",


"Naktukah", a ti chu, ka melh kal. Ni thum a awmna tur a ni a, naktukah a haw dawn bawk.


Chutiang ni si, tunah chauh ka hria chu, ka lungawi lo kher asin.


"I van timak, ngati nge engmah min hrilh ve loh? WhatsAap-ah kan inbe reng a, i lo kal dawn tih min hrilh lo a, ni thum i chamna tur leh i haw hnaihah chauh min hrilh. Kawngpuiah hian ka keuh thlu tawp dawn che mawni? Thin i tirim em mai", ka sawi zawngin thâwk ka la nasa a nia aw.


U Hriatpuia chu a kiai sak sak ringawt.


Min chhâng loin a kiai sak sak a, hma lam enin muangchangin a kal.


Thinrim rei theih pawh a ni lo, ka thinrim bengdai nan, "Ka thiam loh a ni e", te ti ve se tih nak laiin, "Chaw eiah min sâwm dawn lo.em ni?", a tukkhumah ka bêng ta nge nge.


"A va buaithlak tak", a ti ringawt. Ka inthiamlo leh sia, "Sorry", ka ti sep. Miin min en ṭhup mai tawh sia, min kal pel apiangin min en hrek hrek.


Inthunun hi chu, zir ka la ngai takzet a nih hi.


U Hriatpuia chuan a tukkhum a tuai heuh heuh a, "Chaw eiah chuan min sawm lo mai rawh. Sorry tih kha ka pawm lo bawk a nia",


"Ka tihpalh, a thuhrimah; engmah min hrilh si lo a, ka thinrim ve alawm. Engti turin nge i lo kal reng reng?", ka zawt ṭha leh ngat.


U Hriatpuia chuan, "MBSE Office dawr a ngai a, ka lo thlen tirhah hrilh che ka tum; han ṭhawn(ṭhawng) che ka duh avangin ka hrilh ta lo che a ni a. Office dawr chhung a rei ta mai si a", inthiamlo takin a ti a.


"A nih chu mawle, a na viau em? Ka tihpalh lutuk aw", a tukkhum ka khawih a. Kei aiin a sang tam pui lo.


U Hriatpuia chuan, "Na lo e, naktukah ka haw dawn a, chaw eiah chuan min sawm rawh", a ti leh.


A ngaihtuahna a tawi nge ka hre lo.


"Duh viau mah ila ka sawm thei lo che, mahni chauha awm ka ni a, ka chhungte mipa ka hruai lut a nih ngawt loh chuan, ṭhenawm mitmei ka vengthawng. Min hrethiam mai rawh, Chow satui leih kan ei dun tho hi", ka ti duah a.


"A man ka tum", a ti chu, lâi deuh takin ka nui a, "Kei aiin pawisa i ngah", ka ti hmak.


A ngah reng bawk a, Headmaster lai ni thei te chu a.


Burger leh Coffee a lei a, Dawr thlen hmain kan ding a, "Khawiah nge i Car?",


"Sawtah", ti ringawtin min chhâng. "Helai hnaiah hi chuanin, Park-na tur a awm lo em mai",


"Kein i lo kal ta a", a bu nghat. A va han inpe zo tak. Chaw eiah ka sawm dawn mawni aw...


U Hriatpuian, "I ṭhiani a ril a ṭam tawh ang, zanah ka lo bia ang che. Zanin chu, call-in inbia ang hmiang", a ti a.


Message-in kan inbe char char ṭhin a, kut a kham duh em mai.


"I hman hunah min lo call dawn nia, kei chu; engtiklaipawhin ka hman reng. A nih aw", ka ti vah a.


Dawra ka luh dawnin min lo thlir reng chu ka bye bye.


Hriatin, "Bialpa i nei law?", min lo ti nghal.


"Nei mai mai lo, kan ṭhian alawm. Kha le, ei ṭeuh mai teh", Burger leh Coffee ka pe a. Ice Coffee a ni a, a tui dawn lutuk.


U Hriatpuia chuan khua a tihar ringawt nia mawle!


WhatsAap text hlirin kan inbe ṭhin a, hmaichhan leh âwka ngeia kan inbiak vawikhatna, pangngai takin.


Chuvang a ni mahna, khua a tihhar ni.


Ka lo ralkhat ngaih aiin a nelawmin, ka zâi a ngaithiam si. A chang chuan, Headmaster a nihna hre lo lek khawp hian ka sawisain, fiamthu thawh nan ka hmang a, amah lah chu, a lawm berah ṭangin a nui nasa thei berah a ṭang ṭhin.


Zanriah ei chungin ka chhungte ka bia a, u Hriatpuia ruala haw mai ka duh.


A thlawna haw theihna a ni dawn a. Haw pawh ni ila, Aizawla kal leh tho a ngai dawn.


Chhuanpuiin chawlh min pek duh pawh ka ring lo e a.


U Hriatpuian min lo biak hun ka chang ta ngat ngat. Ka phur mah mah a ni. WhatsAap group-ah ka va inrawlh ve chhen ringawt.


Sticker hman hi nuam ka ti a, thawk aphit hian ka theh chhuak leh ṭhin.


Abikin, Sticker hman phal lohna Group-ah hian hman ka châk ṭhin. Ka insum theihna bang ṭhiata hman chang ka ngah.


Admin-te ho ka tithinrim thei a nia aw, "Last Warning", min ti luai luai zel. Min remove-ah min vo nasa thei lutuk.


Luhlul chhuahin ka hmang zel tho, min remove Group an awm a, min enliam Group an awm bawk.


Keimah avanga Sticker hman phal lohna Group-in, 'Sticker hman phal' tia Group Dan thlak hial an awm bawk.


A nuam thei a nia aw...


U Hriatpuia chuan min lo call ta a, ka chhâng rang lutuk chu ka chal ka bêng hlak ringawt.


"I hman tak hle mai", min ti chiang reng bawk.


Nui hakin, "Ka sawi kha", ka ti a.


Ka chawhmeh min zawt a, an chawhmeh min hrilh.


"Nangni aiin ka hmeh tui",


"Noodles leh Kimchi kha, chawhmehah ka chhiar lo", a lo ti deuh hmuk kher ka duh lo mang e.


U Hriatpuia vekin, "I puarna a nih phawt chuan a ṭha vek e", a lo ti a.


"Noodles tel loin chaw ka ei thei a, Kimchi tel lo chuan chaw ka ei thei tawh lo", tiin, Noodles leh Kimchi ka duhzia ka hrilh hrep.


Chhuanpuii ka sawikai, henu pawh hian duh tak a ni.


Pasal a neih hnu pawh hian a la ei zel tho ka ring. U Sammy-an a phal loh chuan a ei thei dawn lo a, a phal leh, a lawmawm a ni mai.


"Ka uin Noodles leh Kimchi ei a phaksak lo a, i Ṭhiannu chuan a ei ngai lo",


"Chhuanpuii chu thu a awih alawm. Kei chu, ka pasalin han phal lo chiah teh se, ka mâ nghal ang", u Hriatpuia a nui hak hak.


Tak takin, ka pasalin a phal loh chuan ka mâ a ni mai.


Noodles leh Kimchi tel loin ka awm thei tawh lo, pasal tel lo erawh chuan ka awm thei thung.


U Hriatpuian, "Nupuiin pasal an mâ ngai lo, Sum an chhuah zawk a, Pasalin nupui an mâ ṭhin", nui chungin a lo ti a..


"Chutiang a ho, Noodles leh Kimchi tel loin ka nung thei lo. Ka Oxygen leh ka Hydrogen-te an ni",


"Oxygen leh Hydrogen awmzia i hre ringawt em ni?", a rawn ti chu, ka âng phuau.


Min va han chhuah chhe em em!


"Lalhriatpui, BA, 1st-a pass ngat ka nih hi aw. Khatin min ti mai mai suh. Oxygen leh Hydrogen hre lo an awm lo. Wadi naupang pawhin an hria, chuta karah keiin ka hriat loh ten, i tizahthlak em mai", ka ti hlak hlak.


Oxygen leh Hydrogen awmzia min la zawt ngar ngar.


"Ka bulah awm la chuan maw, i tukkhumah ka bêng leh tawh ang che",


"I bula ka awm lo chu vanneihthlak mang e. Min han hrilh teh le, Oxygen leh Hydrogen chu, ka hre ve lo",


"Teivet che hian, kei aia i zir sanna i chhuang nimaw? BA thleng chauh zirin, Degree hrang hrang nei lo mah ila, ka kawr nghawng aiin ka Knowledge a zau aw", a thaw chhuak hawk.


"I ngaikawi a nih kha, ka zir sanna ka chhuang hek lo. Heng Degree mai mai te chu, eng tham an ni hleinem", a ti dam dup a.


A rukin ka nui rah rah, ṭawng sual a intiin, a inthiamlo hma thei lutuk hi ni, fiam a nawmna.


"I la awm em?",


"Awm e, ka fiam che a nih kha. Chhuanpuiin a duat che em?", ka ti ta daih a.


Group-a an lo post nuihzatthlak tak tak te, Sticker ka ngainatzia te ka hrilh seuh seuh a, ka zarah a nui nasa mai.


Kham lo tak chungin kan inbiakna kan titawp, mahni chauha awm ka ni bawk a, khua a har nghal vawng vawng.


Chhungte an mu vek tawh dawn a, Chhuanpuii biak theih a ni si lo. Hriati ka va text a, dar sawm ri tawh mah se; a la online avanga text ka ni.


***Ka ṭhianpa nen kan inbia a*** a lo ti a.


Tihbuai ka hlauh avangin ***Naktukah kan inhmu dawn nia, mu har lo la*** ka ti ta a.


Group-ah ka pâwt ta mai mai.


Mimal taka biak tur ka nei ta lo. U Hriatpuian call a titawp hma lutuk a, ka ngei thar thut.


Muthilh tumin puanin ka inlukhuh a, Hla ka ngaithla a, ka muhil thei chuang lo.


Sawmpahnih rik hnaih lamah phone a ri a, phun nuah nuaha ka en chu, u Hriatpuia a ni.


Ka chhâng rang leh lutuk, khua a har em a ni.


"Hmingi, ka muhil thei lo a, ka lo call tawp che. I muhil tawh em?", ka ham a, phak chap hian, "Muhil tawh, ngati nge i muthilh theih loh a?", ka ti a.


Dâwt vâr ka sawi ringawt.


"Ka hre bik lo le, naktukah ka haw dawn si a, zanin chu; inbe char char mai teh ang. Ka ngai dawn em mai che", mak ti deuhin phone ka en.


Speaker-ah ka dah a, ka la mu reng, saisirin ka mu thung.


"Min ngai dawn maw? Ngaihtlak kan nih loh tehlul nen, keini akara min ngai duh chu ka laqm hle mai", ka ti duah.


Min ngaih tak tak ka ring lo e a.


Hnahthialah bialnu ṭha deuh a nei thei a, engpawh nise, min ngaih duh phawt chuan min ngai rawh se.


Sava Thlawk lai alawm kan nih le!


U Hriatpuia nen chuan kan titi leh char char, ka ṭawng char char a, u Hriatpuian min ngaithla hi a ni ringawt.


A rawn nui hawk hawk leh ṭhin a.


Hnahthial a thlen hunah zanin ang hian kan inbe thei awm si lo. Ka duhâm ve a, kan inbiakna ka titawp duh mai bik lo.


U Hriatpuian a titawp a nih ngawt loh chuan.


Lalchhuanpuii pov...


Hriatpuian u Hmai hruai haw phet a tum a, u Hmain a duh der lo. Sammy-an a phal lo bawk.


"Chutia ka nu leh pa i ngaihtuah viau chuan nupui nei rawh", u Hmain a ti a. Hriatpuia a meng phawk hru mai.


Sammy-a chu a nui kur kur.


Freddy-an, "Dik chiah, Anutei kan duh", a lo ti a. Hriatpuian, "Ka la zawng mek a nih hi", a ti bawk.


U Hmain, "Zawng la chu i hmu tawh ang, i la zawng lo tih a hriat", a ti mauh mai.


Tukṭhuan ei laiin kan nui bâwk bâwk a, nuam tak a ni.


Hriatpuia chu kan thlah ta a, u Hmain naupang School a hruai zat bawk. Sammy-a nen inah kan awm a.


Kan Tukṭhuan eina ka tifel zung zung.


Kawngka kik ri thawmah ka hawi phei a, Duhsaka ka hmu chu, ka phu nasa lutuk.


Han ânkhum chiam ka tum a, "Pu Sammy-a a awm em?", Duhsakan a ti hmasa a.


Sammy-an a ko a nih ngei hi.


"Awm e, lo lut rawh", ka ti a. Hlim hmel ka hmuh lo a, phih darh vek duhna hmel ka hmuh.


Sammy-a bulah kalin, "Sam, Duhsakan a hmu duh che", ka âw a nêm lo. Ka lungawilo em a ni.


Duhsaka chungah ka lungawilo sa a, ka hriat loha Sammy-an Duhsaka a koh avangin a chungah ka lungawilo bawk.


"Chhuanpui, Office-ah min hruai lut ta che, khawngaihin".


Office-ah ka nawr lut a, "Lo kal rawh", kawngka bula ding ngawi reng Duhsaka ka ko.


A luh hmain, "Eng thil pawi mah thlentir suh ang che", hriam hraiha melh chungin ka ti a.


Min en ngam lo nge ni, a kun ngur.


Office-ah a lut ta a, an thusawi ngaithla lo turin ka inthunun hram hram.


Chokaah ka awm chawt, u Hmai a lo haw ang tih ka hlauh em avangin pawnah lah ka chhuak awl lo.


Dawhkan chungah ka indawm kun ngâih a, chutah; bungraw lian tak tlu thawm ka hre ta.


Office-ah ka tlan phei thuai, kawngkhar hawn ka tum chu, Duhsaka zawkin mit tui tla zawih zawihin a lo hawng.


Eng thu mah sawi loin a chhuak nal nal.


Ka umzui lo, pawimawhna a nei lo em a ni.


Office-ah ka lut a, Dawhkan a lo let a, chhuatah Sammy-a, lo zangthal der ka hmuh hmaih lo.


"Sam, i harh em?", ka mal chungah a lu ka nghat a, a hmai ka bêng thek thek.


Vâi ruaiin a lo meng a, "A lo tibuai tawh lo ang che", muangchang hian a ti a.


"Aw...Sam, min tifamkimtu i nih hi. I Puipuii hian nghakhlel takin ka thlir reng che a nia, ka tan han ṭang teh".


Theihtawp chhuahin kan inkaitho.


Wheelchair-a ka nghah fel hnuin, Dawhkan tlu ka tifel leh a. Tu tihtluk nge ka hre mai lo.


Sammy-a a nih ka ring a, a tha hmang ṭha hleithei lo mah se; a thinrimnain a hman chhuahtir thei tlat.


Duhsaka ka ring tho bawk, zak map loa chemte nena min vehtu chuan Dawhkan namtluk te lek lek, a tan a tê lua lutuk.


Sammy-a sawi ang ngeiin, rikrap chu sawi loh, Duhsaka reng kan hre tawh lo.


U Hmain min la awmpui reng a, Sammy-a chu Doctor Zamin, "Pawna chhuak tam vak chi a ni rih lo, inah han awm deuh chawt phawt teh se", a tih avangin, Bial chhunga zinnaah ka hruai thei ta lo.


Ka zin hlanah, u Hmai leh a fate ho nen theihtawp chhuahin an lo ṭangin an lo thawk a.


Sammy-a chu, Tiang rinchhana a din theih ṭep tawh thu, hahipa Siamtean min hrilh zan phei chuan, lawmthu sawiin ka Ṭawngṭai tlaivar ṭhak!


Politician Nupui nih chu sawi loh, a ngaihtuah lah ka ngaihtuah ngai eih loh, Mizoram Legislative Assembly House-ah, Sammy aiawhin ka han ding rawih a nih kha!