The Mafia And His Obsession Chapter-15 (Book II of The Mafia series) by Calm Bird

[Calm Bird]

Chapter - 15
The Mafia And His Obsession
Book II of The Mafia Series
by Calm Bird



Amber's pov:-


"Evan...?" Tiin Evan chu ka sawi dat dat a, a khat tawkin a pang chu ka dek leh țhin. "I khua a sik a nia, damdawi hi ei lawk la, i mutthilh zawm leh dawn alawm." Tiin tihharh tumin ka sawi leh dat dar. "Sweetheart" tisupin peih loh hmel zetin a rawn meng a, a mitah chuan a chauh zia a lang chhuak. "Ka țha. Damdawi a ngai lo, nangmah hi ka damdawi chu i ni mai." Tiin min pawt mu thut a, ka au chhuak țhelh a ni. "Evan khawmaw...." a awma chum taihin ka ti a, inbengkan ka tum chuan a hma ai maha nghetin min kuah bet leh a, a awmah chuan ka bei thlawp reng ringawt. "Damdawi ei rawh, i khawsik a sang a nia!" Ka ti leh a, engtinmah min chhang lovin ka chalah chuan min fawp a, ka ner nawk.




"Ka damdawi i ni ka tih chu." Ti leh nghutin ka chungah a rawn innam khalh thut a, a kut lehlamin khumah a innem khalh a, lehlamin ka biang chu a rawn dawm a, a hmelțha tak zet. A khabe ruh kual leh biang velah te chuan hmul a țo siar siar a, chu chuan a tilang pa zual tak zet bawk. Muangchangin min fawh tum chuan a rawn kun hniam zel a, min fawp dawn chiah tihin a awmah ka nam a, a rum nghut. "Sweetheart, kan tih lohna chin a rei viau a nia. Ka mamawh che." Zep țet țut lo chuan a ti a, ka lu thingin, "A theih loh, i dam lo." Ka ti a, a lungawi loh hmel ngang mai. Tuna a hmel awmdan hi a duhawm reuh lutuk. Dik tak chuan duh lo bik pawh ka ni lo, tuna a hriselna hian a tawrh phah ka hlau a ni. A khawsik a sang lutuk mah mah! Keini ni ila kan mu ang a, a tlunin kan tlun ang.




"Khawi le, mu țha tawh la, damdawi ka lo pe ang che." Ka tih chuan rilru bet lo zetin a mu thla leh mai a, a hmuh loh hlanin ka nui suk. Ka tho chhuak vat a, inhnuai lamah chhukin damdawi ka zuk la a, ka chho leh nghal vat. "Kha, ei rawh." Tiin damdawi mum chu ka pe a, ka khum sira ka chhawp tui bottle chu ka pe nghal zat bawk. Țha te te chuan a ei ve mai a, a hmui sir kak ka hmuh chuan en chiam tumin ka kun a, a lo hawi sawn nghal daih. "Tinge?" Ngaihtuah zetin ka ti a, tui bottle chu chhinin dawhkanah chuan a dah a, puan sin țha mawlh mawlhin a mu ngjal daih a nih chu! "Evan Lancaster!" Ti vakin khumah chuan ka lawn kai a, a puan sin lai hlih ka tum chuan a lo țang ve tlat a, ka thei hauh lo "Evannnnn" hahthlak tizetin ka melh reng a, a lo hawi chhuak ve ta hram. "I biang pawh a duk deuh a nih hi" tisupin a biang chu ka tawk a, chiang zetin min lo melh ngur thung. "Tinge?" Ka tinawn leh a, thaw chhuak hawkin a rawn țhu chhuak a, khum lu lama nghenna awm chu a ngheng a, min melh ngur chung chuan, "Kan insual" tih zawngin min chhang.




"Engvang maw? Tu nen maw?" Ka ti hluai a, mipa puitling a ni a, engvanga insual ngawt nge maw a nih le? Chhan țha tak a awm ngei ka ring tlat. "Cyrus Marchese nen. Theihnghilh rawh, thu inhmuh loh vang mai maiin a nia kan insual, a ho lutuk. Kan chingfel tawh e." A ti a, awih lo zetin mit tizim sun chuan ka melh a, a thaw chhuak leh hawk. "Ti teh Sweetheart, min ring rawh. Kan inah zanriah pawh a rawn ei dawn, chutiang serious engmah a awm lo. Ka tiam a che." A tih takah chuan tlemin ka awih ve ta deuh. "I damdawi ei khan i mut a tichhuak em?" Ka ti ta zawk a, "Imm" tih zawngin min chhang. "Muhil rawh, chuan dam țha ver vawrin i lo tho chhuak dawn nia." Ka tisup a, ka sawi zawh rualin a biangah ka kiss a, awihloh hmel zetin min rawn en haw. "Eng nge?" Nui chunga ka tih chuan, "Ka inring hman lo, tuna i thil tih zawh chiah kha ti nawn leh teh." A ti a, ka nui chhuak hak. "I dam hunah." Tih leh thawh ka tum a, ka ban puamah min vuan chawtin min pawt let a, a awmah ka bei leh nghal thlawp. "Ti nawn leh rawh." A aw sexy leh pa em em mai chuan a ti sup a, lai zetin a biangah ka kiss nawn leh. Mitmeng de sawr sawra min en in ka hmuiah min rawn fawp vang vang a, ka chhang let ve mai. Rei ve tawk tak kan infawh hnu chuan kan duhtawk a, lungawi hmel fahran hian a kiai suk. "Mu tawh rawh." Tih leh thawh chhuah ka rual a, min dang tawh bik em love.




Inhnuai lamah ka chhuk thla a, ka nu leh pate pawh hmuh tur an lo awm leh vang tawh. "Good morning Bawihte" ka pa chuan min hmuh rualin a ti a, couch-ah țhuin a laptop a khawih a, ka wish let ve sap. Banga sana ka en a, zing dar 6 leh a chanve a ri tawh. "Evan ala tho lovem ni?" Chokaa ka luh phei rual chuan ka nu chuan a ti a, ka lu bu nghatin a khua a sik thuin ka chhang a, damdawi ka pek tawh leh tawh loh min zawt vat. Ka pek thuin ka chhang a, chair pawt chhuakin ka țhu thla a, ka nu che vel chu ka en reng. "I nu leh pate i ngai ngai em?" Ka nu chu ka zawt deuh phawng a, min rawn melh zawkin a ngaih thuin min chhang a, "Kei chu ka awm thei miah lo ang." Ka tih chuan a nui suk ringawt.




"I birthday kar leh a ni der tawh mai, kan lawm dawn em ni ni ang?" Ka nu chhan phur hmel fahran hian a ti a, "Yes i phal ami?" Phur zetin ka ti nghal hluai. "Phal loh thu a awm hleinem. I kum sawmhnihna birthday tur te a ni sia." Tiin ka hmaah bowl pakhat hi a rawn chhawp a, "Eng nge?" Ka tih hu chuan, "Soup a nih kha. Nakinah Evan i pe dawn nia. A daia in tur a nia, tikhan lo dai mahse a pawi lo. A harh velah i pe mai dawn nia." A ti a, ka bu nghat. Dar sarihah breakfast kan ei a, Evan erawh a la rawn tho chhuak lo. Ka ei kham rual chuan ka nu soup siam keng chung chuan room ah ka chho a, room ka luh fel rual chuan Evan khuma lo mu bam chu ka hmu a, ka nui sak. Kawngkhar kharin khum awmna lam ka pan a, khum bula dawhkanah chuan soup chu nghatin khumah ka țhu thla a, Evan-a pang ka dek a, a sa tawh lo.




A luah chuan duat zetin ka chul sak a, a sam ka khal neuh neuh bawk. "Ka hmangaih che." Ka tisep a, "Kei pawn." A rawn tih thut chuan ka phu zawk. "I harh alaw?" Ka tih chuan a rawn meng chhuak a, min nuih nghal suk. "Min hmangaih thu i sawi laia mutthilh ka duh hleinem." A tisam et a, ka ner sawk. "I harh sa tiraw?" Ka tih chuan "Aih" tisupin ka hmuiah min rawn kiss a, a inla hrang a, mahse a duhtawk ngang lo aniang rei tawk fang min rawn kiss leh a, ka biangah a inlak hran pahin min piai nghal zeuh bawk. "E, kha, hei hi in rawh. Ka nuin a siamsak che a." Tiin soup chu ka pe a, a rawn țhu chhuak a, soup chu a la ve mai. Soup chu a en a, huphurh hmel zetin a en reng a, kei lah chuan "In vat rawh." Ka lo tisek. "In kher a ngai ami?" A tih chuan ka nuih a, "Aw aw aw, in rawh." Ka ti a, a tawp a tawpah a in ve ta hram. "A khak dan a va ropui ve." A tih chuan ka nui chhuak hak a, chutia ka nui lai chu min lo thlir reng thung. "Khatiang mitmeng khan min en lo teh." Lai zetin ka ti a, "Eng mitmengin maw?" Min melh dan ngai renga min melh chung chuan a ti a, kan ngawi dun ta reng.




A mitmeggah chuan min hmangaih zia te leh thil dang dang a lang chhuak a, min hmangaih zia hi tihlan a hreh ngai lo reng reng. "Vawiinah inah kan haw tawh dawn ania." A țawng chhuak hmasaah a țang hlauh a, khum ațanga tho chhuakin ka buk khum zauh. "Breakfast kan lo eisan che a, inha la i rawn chhuk hunah i ei ve nghal mai dawn nia." Tiin kawngkhar lam ka pan a, mahse thil hre chhuak thutin ka hawi let a, a mitko a lo san nghal ha. "Vawiinah hnaa kal i tum em?" Ka ti a, a kal tur thua min chhan chuan lungawi lo zetin ka nur nang a, engtinmah chhang tawh lovin room ațang chuan ka chhuak tau hmak. A dam lo tih a inhre reng a, tinge hnaa kal a la tum hram ni. Amah vang chauh pawh nilovin keiman ka ngaihtuah vang tal pawn țhulh ve mai awm. CEO a nia, a thu ber a, a duh chuan kar khat chhung pawh a chawl thei ang.




Sitting room a couch-ah chuan ka țhu thla a, ka pa pawh an room ațangin a lo chhuak ve chiah. Ka va melh a, a nghawnga lipstick kai ka hmu nghal zat. Thil thar a ni lem lo, a khat tawkin ka U nen kan hmu reng zel. "Khawnge Evan chu?" Ka pa chuan choka lam thlek phei pahin a ti a, "Hnaah a kal dawn a nih kha." Ka tiram hmak. Ka nu pawh chu a lo chhuak nghal a, f**k. Eng nge a nghawnga ka hmuh saw? Ka nu leh zel pawh maw?! A nghawngah hickey a awm a, a awm tih pawh a hre leh tawp nang.




Ning zetin ka meng kual rulh a, ka thaw hak bawk. Ka pa chu hnaa kl turin a chhuak a, pawn lama ka nu leh pate an inthlah rual chuan Evan a lo chhuak ve chiah a, min la nuih ruh ruh zui. "Min ngaih vangin hnaah ka kal i phal lo tih sawi ve mai la..." ka bianga min rawn piaiin a ti a, a kut ka ben sak hlak. "Kal rawh, kal nghal rawhhh." Awki sang vah chuan ka ti a, ka nu a lo lut a, ka thusawi a hre hman aniang min melh ha. "Eng nge ni Bawihi?" Ka nu chuan a rawn ti ta reng a, chhan pawh ka chhang lo.




"Sweetheart" Evan chuan ka ti mai mai lo a ni tih a hrethiam ta aniang zawi supin a phun a, ka sirah a rawn țhu thla a, mahse a rin loh dan deuhin ka che ta tlat mai. "Amber Liebregts!" Ka nu chuan a rawn ti nghal țhawt a, ka duhtawk ve ta hram. "Shit Sweetheart." Evan chuan a biang khaih pahin a ti a, dingin rum zetin ka melh chhuk a, "Hnaah chuan va kal vat rawh." Tiin room lamah ka tlan chho a, ka nu chuan min au zui lang lang. Room-ah ka lut a, ka inkalh khum nghal daih. A chhan ka hriat miah lohin ka mittui a luang a, ka thinrim em em bawk. Thinrim tih țawngkamin a sawifiah thiam lo hial awm e.




Evan's pov:



"Kal duh suh, a thinrim laia thlemin awmzia a awmlo. I tlai ang e i hnaah chuan kal rawh." Ka nu.... aw, ka nu chuan a ti a, nu tia koh tur ka nei ta chu a nia... huh. "A nih ka kal ang e." Amber-i va thlem ka duh viau nâ a, vawiinah hna pawimawh chinfel ngai ka nei si a, chawl thiang ka ni lo. "Breakfast i ei em?" Kawngkhar ka hawng tawh chu ka nu chuan a rawn ti a, a soup min siam sak ka in thu leh office a ka ei mai tur thuin ka chhang a, in chu chhuahsanin office lam pan chuan ka inkhalh chhuak ta a ni.




"Sir, damdawi hnawih tur i duh em? Zawhte tih em ni?" Gabriel chuan a rawn ti du du a, a hrilhhai hmel hle bawk. "Zawhte lian chi tih a nih hi, chuan damdawi chu a ngai lem lo ang." Tia nui ruh ruh chuan ka chhang a, file chu ka keu hawng nghal zat bawk. Ka biang chu a la thip vung vung mai. A sira ka țhutthlak rual khan ka chungah rawn lawn thutin ka samah min rawn kek a, ka hmai ka biang vel a ham tel bawk. Ka darah lah ni se min chum deuh pawp pawp a, a nu kha lo țawng lo se chu he khawvelah hian ka awm tawh pawh ka ring nek lo. Mahse a chet dan vang khan ka thin a rim eih lo hrim hrim a, thinrim a hnehin ka hmangaih zual sauh thung. Khatia a awm khan a duhawm tak zet. La tih thinrim zeuh zeuh tur a ni. Min hmangaih vanga khatia min ti kha a ni tih ka hai lo. Ka khua a sik sia, hnaa kal ka tum țalh kha min ngaihtuah vangin tikhan min ti ta a....




"Sir." Ka hma zawna kut a rawn tihrik vang chuan ka ngaihtuahna ațangin ka harh zawk a, ka lo khi reng tih ka hriat rualin ka nui tawp nghal hmuk. "Hepa hi a nia, kan bank lei tak min rawn tihtawp sak tum tu chu." Tiin tablet hi min pe a, ka en nghal vat.



Harry Cox, kum 37, Texas a cheng, fa pahnih nei.... chhiar chhunzawm tawh lovin tablet chu ka pe let a, engatan mah ti lo zet chuan, "Timmy kha hrilh la kan main company building hnuai warehouse-ah khan him piala lo dah turin. Vawiinah ngei hian." Ka ti a, "Yes sir" tiin office ațang chuan a chhuak a.




Ka computer chu ka tinung a, Flynn, Amber-i bodyguard thla thum chhung leka lo ni țhin chanchin chu ka chhiar a, ka hriat theih chin a tlem hle. Chawhma zawng chu Flynn ringawt chu ka buaipui a, rei fe a en hnu pawhin a biodata kimchang engmah ka hmu chhuak thei lo. Ka phone a rik chuan ka chhang a, Timmy a ni. Timmy chuan warehouse a an awm tawh thu min rawn hrilh a, kiai sukin call ka titawp a, computer chu off in ka hna thawhna building ka chhuahsa a, car chu khalhin ka company based awmna lam ka pan a, ka thlen meuh chuan dar khat a pel thuak tawh.




"Hello, Mr. Cock i dam maw?" Warehouse a ka luh rual chuan chair a phuar beha lo țhu mek mipa nuih khum sang chung chuan ka ti a, a mitmeng a ling hlar mai. "Zahmawhin min ko reng reng suh, nang ve mai mai khan." Seh chilh nawkin a ti a, vei nuih sukin, "Kei ve mai mai..." la nui reng chunga tiin ka kekawr ipte zen ran chung tho si chuan a lamah ka pen hnai zel a, nakinah lawk chuan saw a mitmeng saw min hlauhnain a khat tawh ang.




"I zahmawh kha nei tawh lo ta la i la zun theih tho i inring em? Lawm viau zawk rawh 'cock' tia ka ko che kha. A chhan chu nakin lawkah 'cock' tih sawi tur i nei tawh dawn silova..." ka tih chuan a meng tal nghal tawp. Kan phuarna hrui ațang chuan tal chhuah a tum a, a hma zawnah ka ding fel ve chiah bawk. Ka kut chu ka dawh a, chem min rawn pe nghal zat. A bek tawn tawna ka kut khata hmerin a nghawngah tak a chho zawngin chem chuan ka tin a, chem hmawr zum lam chuan a khabe ruh a si a, thisen a rawn chhuak țiam țiam. "Flynn i hre ngai em?" Ka tichang rawt a, a hriat loh thuin bah zetin min chhang a, a hlauhna mitmeng chu ka tan en nawm a tling.




"A nih Caleb? Caleb tih hmingpu hriat pakhat tal i nei em?" Ka ti leh sup a, an hming tawp ve ve kan hre chhuak thei tlat lo hi buaina chu a ni. An thawk dun tih erawh ka ring deuh a, chupawh ka la chiang ngam chuang lo. "Aih, hriat ka nei lo. Engmah." A tikhur hlawk hlawk. A nep tilukin ka ner nawk a, chem chu chhuatah k theh thla a, a ri bal mai. "Hmanlaia thil tisual an thah țhin dan i hria em?" Tiin ka pen sawn a, banga ngunhnam chi hrang hrang intar chu ka khawih kual den den bawk. "Hmanlaia criminal case nei ho an tihhlum țhin dan i hria em?" Tisupin chem sei zet chu ka la a, a tle nalh hle.




"Bawngpa lem, Brazen Bull tia an koh an siam a, chumi chhungah chuan mihring an khung a, a hnuaiah mei an tialh a..." tiin a lamah ka inher a, a hlauthawng hmel chu hmuh nuam ka ti tak zet. "Chu mihring chu a thih țhak thlengin an ur hlum asin." Tiin ka kiai suk. "I awih nge awih lo, chu thil chu ka nei." Tiin Gabriel chu ka signal a, a lu bu nghutin chu thil la tur chuan a kal a, rei loteah an rawn nawr chhuak a.




"Mei kha tialh nghal bawk ula." Phur zet chuan ka ti a, hethil kan hman loh na chin pawh hi ka hre tawh lo. "Minute nga chiah i inpuan nan hun ka pe ang che. Minute nga hnuah erawh i kang ral vek ang." Mei an chhem lai chu en reng pahin ka ti a, Harry chu meng bial tap tapin a thlan a chhuak nasa hle a, chhuat ka en chuan a zun a lo luang a nih chu! "I hun a ințan e." Tiin timer ka set a, ka mit chhingin ka coat pocket a lighter chu ka la chhuak a, ka hawng a, ka chhin a, ka lighter chhin ka chhin ri chauh chu thawm hriattur a awm tawh.


Hawng, chhin, hawng chhin. Hetih hun apiangah hian lighter hi a thawm a ring ber zel, chuan chu lighter control tu chu kei hi ka ni bawk.




"10.... 9... 8" second la awm zah chu ka chhiar a, sawi lo na teh se, saw thilah sawn a thi ngei ang. "3... 2... 1, țha e, khung rawh u." Tiin ka ding chhuak a, inherin kawngkhar lam ka pan a, Harry chu țe ring ngang mai. "Min chhuah rawh u! Ka sawi ang ka sawi ang..." Țap hlawp hlawp chung chuan a ti țial ruai a, ka khi sak. "I chance neih a zo tawh." Tiin ka pen zawm leh a, "Caleb ka hria! Tu nge nih ka hria!" A rawn ti leh țhawt a, sva kan perh thla țep tawh e.




Gabriel chu mitmei a, Harry chu Brazen bull kawngkharah a lo inhamtang ngar ngar a, ka nuih a tiza letling tak zet. Gabriel chuan nichin maia a chair an phuar behna ah bawk chuan a ngai te bawkin an țhut tir a, an phuar bawk. "Sawi rawh." Tisupin a hmaa chair ah chuan ka țhu thla a, ka bawp ka khawkherh nghal zat. "Caleb chu gang nge mafia ka hre lo, chumi pawl zinga a hotu pawl a ni a, a takah erawh kan inhmu ngai lo. Mahse min ruai ta a, company lian ve pangngai tk hi ka nei a, mahse loan kan la rulh zawh loh avangin ka loan pukna ten min rawn țhing sek..."

"Caleb chungchang sawi rawh. Nang nilovin." A thusawi lai pawtchatin ka ti kha fak. "Oh... aw... Chumi, ka sum mamawh zia a hriat vang chuan nangni tibuai tur cheu hian min rual ta a ni." Aw khur hlak hlakin a ti chhuak ta hram. "Eng thil nge tih tir che a tum?" Tiin zawhna ka zawt a, thawklehkhatah a hmel rawn inthlak hlawkin, "Hei hi." Tiin rapawm zet chuan a nui sawng a, ka ding chhuak ngjal zawt. Bomb puaktur ri rang zet hi ka hria a, "f**k" tihlukin a lam ka pan a, a kawr chu ka pawt țet a, a âwma bomb tereuh te chu ka hmu nghal. Engkhaw sawi set set lovin a chal darah tak ka silak chuan ka kap a, a thi chawp chilh nghal. Kan sahimna tur pan tumin warhouse ata chu kan tlanchhia a, ka chhuak tur chiah chu bomb a rawn puak a, bangah ka leng nghal lawp. Ka dar ruh chu a na nghal ut ut a, ka mite in saseng ve hman lo, warehouse chhunga thi ta te ruang chu ka en a, ka thinrim lutuk chu ka sa chhuak vek. "Sir!" Tiin Timmy hian min rawn pan a, min dintir nghal zat. "I țha tiraw? Hoslitala kal a ngai em?" A tih chuan, "Caleb zawn chhuah tum phiangsen rawh kei min buaipui lovin!" Ka ti vin țhawt a, thinrim zetin warehouse chu ka chhuahsan a.




Fireproof a nih vangin a kang a zia hle a, mahse kei erawh chu mei la alh reng, thisena tuihal ka la ni. Hei hi ka nihna a ni, engtikah mah ka inthlan ngai lovang. "Caleb, phuba ka la ngei ang, inchhir hluah hluahin ka siam ang che." Pen pawk pawk chung chuan anchhia chi tinrenv chu ka lawh , ka thinrim lutuk hi ka beng a kiu vek thei.




Unknown pov:



"A thi ta." Ka tisup a, ka phone ken lai chu ka hmet thi nghal zat bawk. Kha chu warning chauh ala ni, tu nge ka nih a hre thuai ang. "Amber, ka nupui." Tisupin thlalaka Amber-i hmai chu ka chul a, "Min lo la nghak țang țang rawh, ka rawn hruai thei țep tawh che a nia." Tisupin ka kiai sak.


- End of Chapter 15 -