It Ends With Us : Chapter - 2

[Tlantlani Fanai]

Lucy, ka roommate zai nuam ti tak chu living roomah chuan a vei tawn sek a, a chahbi, pheikhawk leh a sunglass te chu a la khawm a. Thutthlengah thu in ina ka awm laia thil ka dahthatna thin pheikhawk bawm hlui chu ka hawng a. Ka pa vui ni a ka haw khan ka la let chauh a ni.

"Vawiin hna I thawk dawn em?" Lucy chuan a rawn ti a.
"Aih. Monday thleng leave ka la a."
A kal lai chu a tawp chat a. "Monday maw? Vannei lel lawl ve."

"Nia, Lucy. Ka pa thi chu ka vannei tak tak." Uang deuh hian ka ti chhuak a, mahse uang deuha sawi anga ka langloa ka hriat vang chuan ka tim uai uai thei.

"Ka sawi awmzia chu I hriat kha," a rawn ti chhuak a. A purse chu ban pahin a pheikhawk khing lehlam chu a inthawlh mawlh mawlh a. "Zanin chu ka lo haw dawnlo ania. Alex te inah ka riak dawn." Chhuah pahin kawngkhar chu khar nghal a.

Sawi dawn chuan inanna tam tak kan nei. Mahse kan kawr hak size inang leh, kan kum zat inrual leh, kan hming hi thumal pali ve ve ni a L atanga intan a Y a tawp leh a nih ve ve na lo ah hi chuan roommate aia ril kan nihna a awmlo. Mahse tha ka ti vek tho. A zai peih lutuk tihloh hi chu a tawrhhlelhawm vaklo. Roommate tur atana tha tur quality pahnih a nei a,a che thianghlim a, a chhuak nasa bawk.

Ka phone a rawn rik lai chuan ka pheikhawk bawm hlui chhin pakhat chu ka lo hawng mek a. Ring fan chunga ka laka ka en chuan ka nu call alo ni a, lukham a ka hmai phum pahin ka'n tap der vel phawt a.

Phone chu ka beng bulah ka la kâng a. "Hello?"
Second thum vel chu a ngawi vang vang a, --- "Hello, Lily."

Thaw hakin thutthlengah chuan ka thu tha a. "Hey, nu." Min rawn bia chu mak ka ti kher mai. Invui ni atanga nikhat lek ala liam sia, min lo biak ka rin ai daih a hmaah min rawn bia.

"Enge I an?"

Over deuh hian a rawn thaw chhuak hak a. "Ka tha e," a rawn ti a. "Tukin zing khan Nebraska-ah I nutei leh I patea te an haw leh chiah a. Zana keimaha ka awm vawikhatna tur ania..."

"I tha ang, ka nu," inrintawk hmel tak hian ka ti chhuak a.
Rei fe a ngawih vang vang hnuah chuan a rawn tawng chhuak leh a,"Lily, nimina thil thleng avang khan zah tur a nilo tih hrilh che ka duh a."

Ka ngawi vang vang a. Ka zak lo. Chhete pawhin ka zak lo.

"Mi tamtak pawh tawng chhuak theiloin an awm ve thin alawm. I tana a harsat dawn tehreng nen khatiang ti tur khan ka lo ti lui che a. I patea lo tih tir mai ila a tha tur ania."

Ka mit ka chhing vang vang a. *A ti leh tan dawn ta e.* A thiamloh pawh niloa a thiamloh anga a ngai tlat mai thin te hi. Ka tawng chhuak theilo angah a ngai der chawp leh ta a nih hi. A thiamloh a nilo tih ka hrilh tep a. Tawng chhuak theilo ka nilo. Ka pa ni tura a thlan chungchang tha hi sawi tur ka hrelo mai zawk a ni.

Mahse tlem chuan inthiamlohna ka nei ve deuh - a bik takin ka nu hmaah khatiang kha ti tur ka ni miahlo - chuvang chuan a ngaih ang anga ngai tur chuan ka ti ta zawk a.

"Ka lawm e, nu. Tianga ka awm vang khan ka tihpalh."
"A tha vek e, Lily. I pa thih chungchang velah insurance office ah kal ka ngai a. Naktukah minlo be rawh aw?"
"Awle," ka ti chhuak a. "Hmangaih che, nu."

Call chu dahin thutthlengah phone chu ka theh phei a. Pheikhawk bawm hlui chu ka mal a hlang chhoin a chhunga thil awm ho chu ka phawrhchhuak a. A chung berah chuan thing a siam heart lem hi a lo awm a. Ka tuai pah chuan pek ka nih zan chu ka ngaihtuah chhuak tel bawk a. Ka hriatchhuah rual rual chuan ka dah sawn lehnghal a. Lunglenna hi thil nuihzatthlak tak a ni.

A chung lama awm lehkhathawn leh chanchinbu hlui cheh thlak te chu ka dah sawn a. A mawng berah chuan ka thil hmuh beisei tak chu ka hmu ta a. Ka beiseiloh ber pawh a ni maithei.

Ka Ellen Diary te.

Ka'n chul kual thuak thuak a. He box ah hi chuan pathum lai a lo la awm a, mahse a vai chuan pariat emaw pakua vel a awm ang. Ka ziah hnu khan vawikhat mah ka chhiar nawn leh tawh ngailo.

Zahthlak ka tih deuh thin tlat avangin ka naupan lai kha chuan diary ka nei thin tih hi ka sawi duh ngailo. Chu aiah chuan ka thil tih thin chu diary a nih chiahloh bawk vangin cool tak a ni ka ti thin. Naupang te ka nih lai, kum 2003 atanga a show a rawn intan atangin Ellen Show hi ka en tawh a, chuvang chuan diary a ka entry te chu EllenDeGeneres hnena ka ziah angin ka ngai thin. School ban apiang hian ka en thin a, chumi avang chuan Ellen hian min hria se chu min ngaina ngawt ang ka ti thin. Kum sawmparuk ka nih thleng khan a bulah lehkhathawn angin ka ziak thin a, mahse diary a an ziah thin ang zawk hian.

Hmeichhe pakhat journal mai mai chu Ellen tan chuan a thil duh zinga a tawp ber pawh a ni ang tih ka hria. Vanneihthlak takin ka thawn ngailo hlauh a. Mahse a hnena ziak anga ka entry te ziah hi nuam ka tih em avangin ka ziah tawh ngailoh hma kha chu tichuan ka tih chhunzawm char char thin.

Pheikhawk bawm dang chu hawngin a dang pawh ka hmu belh zel a. Kum 15 mi ka nih laia ka ziahna ka hmuh hma chu ka en kual a. Ka hmuh hnu chuan keuin Atlas nena kan intawn ni ka ziahna chu ka zawng a. Ka nun a alo tel hma kha chuan ziah tur vak a awm ngailo, mahse journal paruk chu ka ziak zo vek hman tho.

Ka chhiar tawh ngai miahlo ang ka ti naa ka pa thihna avangin ka nau pan lai nun te ka ngaihtuah chhuak nasa hle a. Heng ka journal te hi ka chhiar chuan ngaihdamna tlemte ka neih theih phah maithei asin. Mahse a hma aia ka huat belhna min siamsak erawh ka hlau tel tho.

Thutna ah chuan mu thluang zarin ka chhiar tan ta a.

.

.


.


.


Ellen Duhtak,

Vawiina thil thleng ka hrilh hma che hian I show a I tel tur thar tha deuh hriat ka nei a. Chu chu 'Ellen at home' tih ania.
I hna piahlam a thil thleng hi mi tamtakin an hmuh chak ka ring. In a nangmah leh Portia chiah in awm a camera engmah a awmloh laia eng ang mi nge I nih hriat ka chak thin. Producer khan camera pe in mi pangngai anga I thil tih thin TV en emaw,eirawngbawl emaw huana I che lai vel te lo la kual thin se. I hriat miahlohin tiang chuan reilote te lo lak ruksak che se, prank I ngaina bawk a,tihthaih tur che in a hnuah ring deuhin, "Ellen at home!" tiin au thin se.

Awle, ka hrilh tawh bawk che a (Hrilh che ka tum thin a ka lo theihnghilh leh zel a) nimina thil thleng ka hrilh ang che. A ngaihnawm dawn lutuk. Mr. Carson-a'n Abigail Ivory hnute alo en avanga a ben ka hrilh che tih lohah kha chuan ala ngaihnawm ber ang.

Ka inhnunga cheng thin Mrs. Burleson chanchin ka hrilh thin che kha I la hria em? Thli leh ruah a thawh vak zana thi kha? Ba a ngah lutuk a, a fanu pawn a in kha a nei theilo ka pa in atia. In kha a chhe tawh lutuk a atan pawh a pawina a awm chuanglo ang. Thil buaithlak mai mai a ni dawn tho a.

Mrs. Burleson thih atang khan in kha a ruak char char a, kum hnih vel lai a ni tawh. A ruak tih ka hriat chhan chu ka room tukverh atang hian in hnung lam a hmuh theih vek a,ka hriat theih chinah khami in atanga lut leh chhuak tumah ka hmu ngailo.

Nizan hma zawng kha chu.

Ka khumah card ka rem kual a. Mak I ti maithei a, mahse ka thil tih thin ania. Card den dan pawh ka thiam chuanglo. Mahse ka nu leh pate an inhauh hian card rem kual hian min ti hahdam a ngaihtuahna dang neih turin min pui thin a.

Chuanin, pawn a thim vek vangin êng ka hmu vat a. A eng vaklo a mahse in ruak atanga lo chhuak ania. Mawmbati eng a an em vangin ka pa enlenna lain kawt atang thlir turin ka chhuak a. Enge thleng hriat ka tum a mahse a thim lutuk a engmah ka hmu theilo. A hnu lawkah light pawh chu a thim nghal daih.

Tukin zinga school kal tura ka insiam lai khan in bul vela thil che ka hmu a. Ka tukverh atanga ka bihtlak laiin tuemawni chhuak ru lai hi ka hmu a. Mipa pakhat ania bag a ak bawk a. Miin an hmulo tih hriat tum ang deuh in a hawi kual a, tumah a hmuhloh veleh in hrang hrang chu kal pelin bus stop ah a ding a.

Nidangah chuan ka hmu ngailo. Vawiin hi kan bus-a a rawn chuan vawikhatna a nia. A hnungah a thu a keichu a laiah ka thu a biak pawh ka be lo. Mahse school bula bus stop-a a chhuk a school lampanga a kal chuan a lut ve a nih ka ring.

Kha inah khan a riah chhan tur pawh ka hrelo. Electric leh tui pawh a awm silo a. Miin an tihtir a nih ka ring a mahse bus stop ka chhuknaah a rawn chhuk ve leh tho sia. Hmun danga kal tum ang deuhin a awm a mahse kan in ka thlen veleh rang deuhin ka roomah ka lut nghal a. Tukverha ka lo thlir reng lai chuan a hnu lawkah in ruaka a lut lai pawh ka hmu hman.

Ka nu bula sawi chi a ni nge nilo pawh ka hrelo, ka buaina tur a ni bawk silo a. Mahse kalna tur a neihloh chuan ka nu hi school-ah a thawk tho a puih dan tur a hriat ka ring.

Mahse ka hrelo. Ka sawi hmain a haw leh nge haw lehlo ni hnih chhung ka nghak leh phawt ang. A nu leh pate hlata a awm zuai a ngai te pawh a ni thei a. Keipawn ka mamawh thin sia.

Kha zawng kha a ni e. Naktukah thil thleng dang ka lo hrilh leh ang che.

-Lily



.
.
.
.
.
.
.



Ellen Duhtak,

I show ka en in I lam lai kha ka forward a. A tira I lam lai kha ka en ziah thin a mahse a ninawm tan tawh lutuk a I tawng lai chiah ka en peih tawh a. I thin a rimloh hram ka beisei.

Awle, kha pa kha tunge a nih ka hre tawh, chuanin kha in ruakah pawh khan a la awm reng. Ni hnih lai a liam tawh a tumah ka la hrilhlo.

A hming chu Atlas Corrigan a nia, senior ania, chu zawng chu ka hria. Bus a ka bula Katie a lo thut ve in ka zawt a, a hming min hrilh a.Mahse , "A chungchang dang engmah ka hrelo a mahse a rimchhia tih chu ka hria," atia ten hmel deuhin a hnar chu a ti sawi a. A duh vang a nihloh thu leh tui a neihloh thu hrilh a au vak ka tum a mahse amah chu ka va en ringawt. Ka lo en rei deuh aniang min la rawn en leh zui.

In ka thlen hnuah ka huanah ka bulbawk pawh chhuah tumin ka chhuak a. Bulbawk hi ka huan a ka neih chhun an ni tawh. Khua a vawt sia thlai dang engmah a chin theih tawh hrihlo a. Nidangah pawh ka pawt thei reng a mahse thil hriat ka chak vanga chhuak ka nia.

Ka pawh chhuah lai chuan a then a awmlo tih ka hmu chhuak a. Hai chhuah hlim hlawl a ang. Keima tih a nilo a, ka huanah hian ka chhungte dang an kal ngai bawk silo a.

Atlas ka hrechhuak thut a, amah a ni ngei ngei ang. Inbualna tur tui pawh a neihloh chuan eitur pawh a neilo ngei ngei dawn tih ka lo ngaihtuah ngai miahlo a.

Ina ka luh leh hnu chuan sandwich pahnih hi ka siam a. Fridge atang soda pahnih leh chips ka la chhuak bawk a. Bag a ka dah hnuah in ruakah chuan ka tlan phei a inhnunglam kawngkhar kawtah ka dah a. Ring tawk a ka kik rualin kan inah ka tlan let lehnghal daih a. Pawna alo chhuak lai en tuma tukverha ka dah chuan bag chu alo bo daih tawh.

Minlo en reng tih ka hriat phah a. In ruaka a awm tih ka hria tih a hriat vang chuan tlemin ka nervous ve deuh. Naktukah min rawn biak tum ta se enge ka sawi ang ka hrelo.

-Lily


.
.
.
.
.
.



Ellen Duhtak,

Kan president ni maithei Barack Obama I interview lai kha ka lo en a. I nervous ve em? Kan ram enkawl mai thei tur interview chu? Politics lampang hi ka hre vaklo a mahse tiang pressure hnuaiah kha chuan ka uan theih pawh ka inringlo.

Kan pahnih chungah hian thil a van thleng hnem tak. Kan president ni mai thei I interview laiin chenna in neilo eitur ka lo pe ania.

Tukina bus stop ka thlenin Atlas alo awm reng tawh a. A tirah chuan kan pahnih chiahin kan ni sia dawtsawiloh chuan a awkward duh lutuk. Hla deuha bus lo kal ka hmuh chuan rawn tlan chak thut se ka tih zia chu. Bus alo thlen chuan Atlas chu ka bul hnaihah a lo kal a en pawh min en loin, "Ka lawm e," a rawn tia.

Bus kawngka a inhawn chuan min luh hmasak tir a. Ka reaction vang chuan Keipawh Le pawh ka ti lo. A aw khan min ti mur sung sung mai, Ellen.

Tiang khan mipa aw in a siam ve tawh che em?
Oh, ka tihsual. Hmeichhe aw in a siam ve tawh che em?

Kal lamah chuan ka bul hnaihah a thulo hrim hrim a, mahse haw lamah bus a chuang hnuhnung ber ania, thutna tur awl pawh a awm tawh lo. Mahse bus chhunga mi a en kual chuan thutna awl niloin keimah min rawn zawng tih ka hre thei.

Min rawn hmuh chiah chuan rang deuhin ka mal ka en nghal daih a. Mipa bula ka confi theilo lutuk hi a buaithlak, kum sawmparuk ka tlin hnua a reh ve hram ka beisei.

Ka bulah rawn thu thlain a bag chu a ke inkarah a dah thla a. Katie thil sawi kha ka hre thiam chiah. Tlemin a rimchhe ve deuh, mahse ka en hran phah chuanglo.

A tir chuan engmah a sawilo. A jeans pawp chu a khawih chat char a. Jeans tih nalh nana tih pawp ang chi chu a ni chuanglo. A kekawr hlui tawh vanga pawp zawk a ni tih ka hre thei. Chuanin a ke rek a lan theih vangin a te tih ka hre thei bawk. Mahse a cher lutuk a, a ha tawk vek angin a lang.

"Midang hrilh I nei em?" tiin min rawn zawt a.

A tawng lai chuan amah chu ka en a, a hlauhthawn hmel lutuk. Chiang deuha ka vawikhat en na ania. A sam chu a uk khuih a, mahse su se chu tun ang em em hian a uk ka ringlo. A mah dang zawng aiin a mit chu a taklo ve thung. Siberian Husky te mit ang hian a mitmu chu a pawl dal raih a. Ui nen tehkhin tur ka nilo tih chu ka hria a mahse amah ka hmuh a ka hriat hmasak ber ania.

Ka lu thingin tukverh ah ka dak daih a. Ka biak loh vangin hmun danga thutna tur a zawn ka ring a mahse a ti miahlo. Bus stop kan pelh nual hnu chuan tlemin ka huai ve deuh a zawi tein ka tawng a. "Tinge I nu te bulah I awmloh a?"

Min ring ang nge ringlo ang tih ngaihuah ang deuh hian a awm a, mahse min rawn chhang a. "A chhan chu an duhlo a."

A tho nghal a ka ti thinrim emaw ka ti hman a, mahse kan chhukna tur a ni tih ka hre chhuak chiah a. Ka bag la in ka zui ve nghal a. Tun tum chu nidanga a tih dan in bihruk pawh a tum tawhlo. Nidangah chuan kan inhnung lam atanga a kal lai ka hmuh loh nan a hel kual thin a, mahse vawiin chuan ka rualin a rawn kal ve a.

Inchhung ka luha ani a kal tlangna thinah chuan kan ding dun a. Lei chhuih pahin kan inhnung lampang chu a en a.

"Engtikah nge I nu leh pate an lo haw dawn?"
"Dar nga vel ah," ka ti a. Dar 3:45 chiah chiah.

Thil sawi tum ang hian a awm a mahse a ngawi leh a. A lu a buk zeuh zeuh hnuah eitur leh electric leh tui awmlohna lam inah chuan a kal a.

Chuan Ellen, a dawta ka thiltih hi a atthlak tih ka hria a chuvang chuan min hrilh pawh a ngailo ang. Ka au let a, a rawn hawi chuan, "I hmanhmawh chuan ka nu leh pate lo haw hmain I inbual hman ang."

Ka nu leh pate lo haw a kan shower-a chenna in neilo lo inbual an hmuha buaina ka tawh nasat tur zia ka ngaihtuah chuan ka thin a phu dut dut thei. Ka thi chiang ngawt ang. Mahse engmah tihsakloh a let tir chu ka thei bawk silo a.

Hnuai lam a en tlat a, a zak tih ka hre thei. Engmah sawiloin inchhungah min zui lut tawp a


A inbual lai chuan ka nu leh pa te anlo haw hlauin tukverhah chuan ka dak sek a. Anlo haw hmain hun ala tam lutuk tih chu ka hria, mahse kan thenawmte zawk hi a ni. Mahse min la hrechianglo hlauh a.

Atlas chu inthlakna tur ka pe a, ka nu te lo haw hmaa in atanga chhuah tawh chu sawiloh, kan in atanga hla taka a awm a ngai ang. Ka pa hian naupang pakhatin a kawr a ha lai hmu ta se a hre hrang nghal nalh ang.

Tukverha kawng lam thlir zeuh zeuh pahin bag ah thil ka khung mawlh mawlh bawk a. Fridge a dah ngailo eitur te, ka pa tshirt pahnih leh Atlas tana lian deuh tur jeans pahnih leh mawza ka khung a.

Ka khung zawh rualin Atlas pawh a rawn chhuak a.

Ka ring dik chiah. A sam chu huh mah se a hma aiin a dal zawk a, a mitmu pawh a ti pawl sawtin ka hria.

Shower a luh hma aia a naupan hmel vangin a inbual lai khan a in met fai aniang. A lan dan danglam lutuk vang chuan mak ka tia, bag chu ka en leh daih a. Ka hmelah ka ngaihtuahna a hmu vek thei ang tih ka hlau.

Tukverh ka melh leh zeuh hnu chuan bag chu ka pe a. "Miin an hmuhloh nan che inhnunglam atang I chhuah duh ka ring."

Bag chu la in min rawn en a. "Tunge I hming?"tih pahin bag chu a ak a.

" Lily."

A nui a. Vawikhat min nuihna a nih vangin ngaihtuahna mak deuh hi ka nei a. Hetiang a nui mawi hian engtinnge nu leh pa sual deuh a neih theih? Nu leh pa te chuan an fate chu an hmeltha emaw hmelchhia emaw an cher emaw thau emaw mawl pawh ni se an hmangaih vek tur a ni a, chutiang ngaihtuahna ka nei chu ka inthiamlo hle mai. Mahse kan ngaihtuahna te hi kan control vek senglo a. Ngaihtuah lo tura in train deuh a ngai a nimai.

A kut chu a rawn pharh chhuak a. "Atlas ka nia."

"Ka hria lawm," a kut pawh vawn sak chuangloin ka lo ti a, ka chibai loh chhan pawh ka hrelo. Sîk ka hlauh vang pawh a nilo. Sîk chu ka hlau tho, mahse ani ai tha anga ka inngaih vang niloin min tih nervous lutuk vang zawk ania.

A kut chu a la sawn a, a bu leh zeuh zeuh a. "Kan kal ange."

A kal theih nan kawng ka kian a, choka lam chu kawkin tawngloin kalna tur min zawt a. A ni tih a hriat hnu chuan a kal lai chu hnunglamah ka zui ve zel a. Inhnunglam kawngkhar a thlen chuan ka room a hmuh chuan a ding chat a.

Ka bedroom a hmu tih ka hriat chuan ka zak lutuk. Tuman ka bedroom hi an la hmu ngailo a, chuvang chuan chei pawh ka chei ngailo. Kum sawmpahnih ka nih laia ka puan phah leh tukverh parda senno kha ka la hmang reng a. Ka Adam Brody poster tar te chu a vawikhat nan pawhthlak vek ka chak lutuk.

Mahse Atlas chuan a ngaih pawimawh hmelloh. Inhnunglam lan theihna ka tukverh chu enin min rawn en leh a. A chhuah hma chuan,"Min en hniamloh avangin ka lawm e, Lily."

A kal nghal a.

En hniam tih thu hi chu ka lo hre tawh thin a, mahse naupang ka atanga hriat chuan a mak ve deuh. A aia mak lehzual chu Atlas hrim hrim hi a danglam lutuk a. Engtinnge hetianga naupang inngaitlawm, manner hria, en hniam tih tawngkam hmang thiam hi chenna in neiloa a awm theih? Engtinnge naupang mai hi chenna in neiloa a awm theih?

Ka hriat chhuah a ngai, Ellen.

A chunga thil thleng hi ka hrechhuak dawn. Lo ngai reng rawh.

-Lily.


.
.
.
.
.


Entry dang chhiar leh ka tum lai chuan ka phone a rawn ri a, thutnaa la tura ka vah phei a ka nu a ni tih ka hmuh chuan mak pawh ka ti vaklo. Ka pa a boral a amah chiaha a awm takah chuan a hma aia nasain min rawn call ka ring reng a.

"Hello?"

"Boston ah rawn awm ta ila eng nge I ngaihdan?" a rawn ti chhuak phawng a.

Ka bula lukham chu la in a chhanah chuan hriat theihloh turin ka au vak a. "Um. Wow," ka ti phawt a. "Tak tak maw?"

A ngawi leh phawt a. "Ngaihtuahna mai mai ania. Naktukah kan sawi tha leh dawn nia. Meeting kan tan tep."

"Awl, bye."

Tichuan tiang khan Massachusetts atanga insawn chhuah chakna rilru ka nei chiah. Hetah hian a rawn awm theilo ang. Tumah hriat a neilo a, nitin a bula awm turin min duh dawn sa. Ka nu hi ka hmangaih lutuk, lo ngai kawilo ula, mahse Boston ah hian mahnia awm turin ka insawn chhuak a, kan awmna a in an chuan a hma ang khan ka thawveng thei dawnlo.

College ka la kal lai kum thum liamta khan ka pa hian cancer natna a vei tih kan hmu chhuak a. Tunah hian ka bulah Ryle Kincaid kha awm se chu thudik langtlang hrilhin ka nu ti na thei loa natna in ka pa a tlakbuak kha ka lawm thu ka hrilh ang. An inkar chu ti danglamin ka nu a that leh thatloh hre tura Plethora a awm reng duhna rilru ka put pawh a tihdanglam phah a.

Ka pa a boral a ka nu ngaihtuah renga ka awm a ngaih tawhloh takah chuan ka thla te hi ka zah pharh hun tur ka thlir reng a.

Mahse tumah Boston ah a rawn awm leh si ang maw?

Ka thla te hi phuarbeh tlat an angin ka hria.

Ka mamawh laiin khawiah nge marine-grade polymer a siam thutthleng hi a awm?!

Boston a ka nu a rawn awm chuan enge ka tih ang ka hrelo a ka stress nghal nasa hle. Huan emaw kawt emaw thutthleng emaw hnimhnah pawh tur pawh ka neilo a.

Thil dang tihtur ka zawn a ngai.

In tihfai ka tum ta a. Ka journal dahna pheikhawk bawm ho chu ka room closet ah chuan ka rem thap a. Ka closet chu ka rem fel leh vek bawk a. Ka tlereuh, ka pheikhawk ka kawr.....

Boston ah hian a rawn awm theilo ang.