*Simple Dimples * ch~5 by~Natasha Hrahsel

[Natasha Hrahsel]

*Simple Dimples * ch~5





"Hmingmuanpui, ngaihtuah rawh.Engtin nge pahnih leh pahnih belh chu panga anih theih ang? Arte pahnih inei a,keiin pahnih ka pek belh che a,avai in engzah nge ineih?" Ka ti hlak.







"Arte ka hlau alawm" atap zui nghal bai bai! Awi! Engtin nge ti em em a khawlhkham hi anlo pian theih? Ka nau ala ni zui bawk si, ka tah te hi achhuak daih zawk asin.
"Nû...ka beidawng"ti vakin ka tho nghal hmak.Vawin tlai ka haw tlai deuh vangin min hauhlohnan Hmingmuana lehkha ka zirtir ve ngei a,hauh tawrh kha ka thlang fe tawh zawk.A thiamloh dan chu abawn lutuk ringawt!






"Vîn vak vak lo khan tha te te in hrilh ve mai tur che nia, Hmingmuan nangpawh ho te te ah tap chhen teh suh" ka nu chuan a rawn ti lang lang a, "ka vin hma khan rei ngial dam thlapin ka hrilh tawh,athluak a lîk aniang" ka tih chuan "Vanlalnunpui" a rawn ti thawt.A tan hler hlur si, ka ning.

"Va zirtir zawk mai teh, ka chau ka damlo dawnin ka hria...hahchhiau" ka hahchhiau zui mawlh mawlh.Nimin lam leh vawin lam field khu ah ka awm a, tlai lamah tawh kan inphur thawleng bawk a.Hritlang kai hma chi kalo ni ve hrim hrim bawk nen ka hritlang lehpek dawn niin alang.






Hahchhiau bur bur e tilo chuan boruak uap zual em vangin ka thlan atla nasa a,mutdawn ah ka la intleuh leh zuai zui a, coldaid ka in eikhalh deuh tawp.Ka nu hian 'kan na dawna kan inhriat chuan damdawi in eikhalh vat tur, kan lo na talo anih pawhin a thawh lohna turah athawk bik lo ang' hi a ti hmak zel a.Hritlang dawn a ka inhriat tawh hi chuan hritlang damdawi ka lo hmawm hmasa hmak zel tawh mai thin.Kawng tam tak ah chuan min veng ve bawk nge nge ang.






Dindini khuma lukham la phei in,ka khum lu ah ka dahthuah vak a naktuk lama naupang ho ka zirpui tur chapter chu ka in enlawk thuak thuak.
Ka chhiar zo tep tih in ka ph chu a rawn ri tleng tleng a, U Raymonda ani.

"Hello"






"I muhil tawh ami?"a rawn tih chuan "muhil ila ka chhang dawn che mi?" Ka ti let a,a tawngkam ka hawhsak hi ni ringawt.Ka chhân dân kha aman sawi se a inhmeh daih zawk ang.





"Ka rawn ph chhan che chu.." a ti ri chu ka hria a, ri deuh nawk nawk in a rawn zui a,"khawmaw tunge i biak?" Hmeichhe tawng ri ka hriat chuan ka lo inhûm ruh ve ringawt.
"I mak ê Raymond tunge i biak kan hre ve châk alawm" dah mai lo in an tawng chu ka ngaithla ve reng.

"Khawmaw kalsawn teh" U Raymonda'n a ti ri chu ka hre leh a, muthmunah kalo tang teuh ringawt.







"Hello ila awm em?"






"Ka mu dawn" ti hmakin ka dah zui hmak.Ka thinrim ve ngawt chhan ka hrelo a, hmeichhe bula a awm vang kha anih ngei ka ring.U Raymonda hi en tawp chuan râlkhat ngaihzawn kei chauh lo tân pawh a awl ngawt ang.A chanchin ka hriat tlângpui dân ah mi fel tak anilo tih ka hrethiam a, mahse a bula ka tâl ka tâl takah chuan mi sual tak ani theiin ka hre bawk silo! Ruihhlo khawih nasa ti dawn ila ataksa leh hmel hmang thlengin a tha in avun a lang hrisel suah a, alang thei chinah damdawi a han inchiu na hnuhma engmah alang miahlo bawk.Nilo! Damdawi akhawih an tih loh kha, tinge maw kei apawh chu damdawi khawih tur anga ka dah tlat ni a! A thianpa thihchhan vâng te pawh kha ani mahna.


Vawin tlaia min zawh 'O.D te hi vanram an kal ve thei angem?' tih kha ka pa ka zawt lo a, zawh ngai ah ka dah heklo.O.D a nih chuan damdawi khawih ani ngei dawn a,Pathian duhloh zawng anih miau vangin ate emaw alian emaw Pathian hmuh ah chuan sual ani dawn tho tho a, vanram an kai theih ka ringlo.Ka pa ngaihdan tur chiah pawh anih ve bawk ka ring.







Ka alarm ri in min ti harh a, zing dar sarih chiah ani.Zîng thawh hma hi athalo ka tihna nilo in pasal fanau nei a mi ina lawi lut tur kan ni a, kan neih hma tal chu mu âm in mu rei ve deuh mah ila awmlo ka ti hran hauhlo.Mihring pangai kan nih chuan kan awmna hmun azirin kan insiamrem mai zawk turah ka ngai ve tlat.







"Pa khawnge ka nu te?" Choka ka luh rualin ka ti sap a, mai an alo hîk mawlh mawlh.






"I nau nen kâwnah an kal, i putea te'n hmarcha muh tur an rawn chah a an thawn dawn anih kha" alo ti mai a,nizan a fride bula hmarchate inhûng hnûr kha ani ngei ang.Helam ah hian rin ai takin alo tlawm a, keini pawn muh sa lei lo in mût chawp ve tawh ila atha nghe nghe ang.

"Nimin lam enge a an? I naute rual han zirtir chu a nuam viau lo maw?" Nui chung hian a ti a, nimin lama thilthlen dan te chu abula thutthlak pahin ka hrilh nghal mawlh mawlh.







"Naupang hi chu an han intibuai ve rap rap thin tak na in an rilru te hi ala thianghlim em a, an inngaih leh vat mai ang." A ti a, ka ngaihdan chiah ani.
"Vawin lam enge programme inei em?" Ka tih chuan abu nghut a"khaw thenawm ah mitthi vui tur ka nei a, ala naupang viau lehnghal a a uiawm khawp mai"







"Engtia boral nge?" Ka tih chuan "A chhan tak sawitur pawh an hrelo ani awm e, kum sawmhnih mi chauh ala nia.Nimin piah lama khawsik kha nimin lamah amar an hmulo dêr ani ber! A rang khawp mai " a tih chuan ka thaw deuh halh a, kan hma hun kan hriatlawk loh zia hi aw..nat lawk pawh sawitur awm manglo a boral ta thut thut sawi tur tûn hnai ah pawh an awm nuk tawh mai.






"Pa hei miin sual an tih deuh hi lo kawm duh tlat ta ilang i remti angem? Ka sawi awmzia chu ruihhlo khawih ang te, emaw a aia pawi khawih te lo ni ta se" ka ti deuh hluai a, ka pa chuan atarmit kâr atang min melh ang rulh rulh a "remtilo viauuuu ang" a ti dawn emaw ka tih laiin "a lawmawm zawk daih ang chu" a ti daih!

"Engkim siamtu Pathian mahin mi lian leh mite a thliar hranglo a,mi sual leh mi fel te ahmangaih dan a in ang reng bawk.Keini lo thliar hran ve ngawt chi ani ngailo. A fel sa tân rawngbawl turin Pathianin min tir lo a,ahmangaih em em afate ama lam hawilo te hruai kir leh turin min tir zawk." A ti dap dap a, Pastor ni tur diktak ani ka ti rilru neuh neuh.







"Chutiang mi chu kawm ilang mi'n min sawi sep sep awm sia, i zak dawnlo ami?" Ka ti leh a,heng zo zai ka zawhna chhan hi U Raymonda vang ani tih ka rilru chuan a hre ru reng.A sual viau e ka tihna nilo in ka pa ngaihdan hi ka hre duh hrim hrim.

"Engtin pawn awm ila, engang mi pawh kawm ila min sawi duh tawk hi chu an awm reng dawn.Mi zawng zawng ti lawm thei tur khawpin kan thiamna leh theihna in a tlin lo a, thil thalo leh diklo kan tihloh phawt chuan mi thenkhat te sawi sep hi chu kan enliam angai ve bawk alawm" a ti a, ka zâng hawk ten ania ka hriat ni.Ka pa ngaihdan chuan min ti hlim viau mai.







Hmingmuana'n ka nu thlah kher aphût vangin ka chhuak hmasa a, kalkawng ah chuan naupang ho in minlo wish sap sap hlawm bawk.Naupang te te Hmingmuana ang tiat lek lek nu leh pa hruai ngailo a anmahni a an kal ve terh terh te chu hmuhnawm ka tiin a ralmuanthlak hi kan ti khawp a, thingtlang nun chu ahahdamthlak in ka hre thar viau bawk.
Thingtlâng khaw tam tak ah ka pa vangin kan awm kual nasa ngei a, mahse zirna vangin kei tak phei hi chu khawpui lamah ka tâl tam zawk daih thung.Pawlsawm ka nih kum atang khawpui lamah hostel ah awmin ka haw ngai meuhlo a, ka haw chhun chu hunpui chawlh ang chauh te ani thin.Ka naupan deuh lai tak hi chuan ka pa hi khawpui lamah a awm nasa zawk a,thingtlang nun tia han sawi tur ka nei vaklo tihna anih ber chu.






"Miss dimples" school bul dawr atang U Raymonda a rawn chhuak hlawl! A hmai chu akhem neih nuaih bawk!

"Ngati nge i hmai kha?" Ka ti nghal thuai






"Khawvel ka nawrsawk" a ti a, a mitbul chu a pilh phung mai.A bân veilam ah liantham nisilo in a pilh phung bawk.Insualna hnuhma te pawh a ang zawk mah.

"Tikhan i inkhel thei dawn mi?" Ka tih chuan "mitthi an awm vangin inrinni ah an sawn" a ti a,kan inbiak hian ka mitah tak min melh chiang thei kawk lutuk a ka lai lek lek zel.





Nizan lamah hmeichhia a awmpui tih ngaihtuah chhuak thutin "anih chu" ka ti fak a, ka kalpel zui zat.Pen li vel ka pen hman tih in ka bul rawn thlengin ka kal chak leh akal chak a,ka kal muan leh akal muang ringawt!







"Sawi duh ila nei em?" Ding datin ka ti a, "neih awm pawh ka hrelo" mitko sân ukin ati sap.





"Anih chuan ka hmanhmawh ka kal mai ang" ka ti a, "ka tih din loh che hi" alo ti sup.





In be lo in school lam pan chuan kan kalthla zel a, an in pêng leh school pêng hi a in ang tak e.Min zui pawh nilo in haw a tum aniang.






"Zân ah lo lên i phal em?" A tih chuan ka ding dat a, "nula dang rîm zawk rawh" ka ti hmak.





"Kan khaw nula hi chu ka rîm chhuak vek tawh, nang chiah i bâng tawh" thîp zetin ka melh."min rîm tlukah in ngai tawp mai rawh" ti fakin chak zetin ka pên zui.A bawp a sei tha bawk a,ka pên hnih chu apên khat ang vel chauh ani.






"Dimples"





"Tikhan min ko ziah suh"






"Rawn rîm lo che in rawn lên pangai tal iphal lo ami?" Ala ti talh.Pastor fanu ka ni a, kan ina lo lêng lût duh chu eng ang mi pawh nise kalo hnar kha a diklo hulhual, mahse ka ngei ve tlat.Keiin arûka kalo star ve em em laiin nizan lamah hmeichhia a awmpui tih ka hria a, chutah he khaw nula zawng zawng a rîmchhuah tawh thu minla hrilh zui bawk a!

"I thu thu le" chu ka ti ta tho,han hnar tawp kha mawi heklo.





"Ka rawn lêng dawn nia" nui sukin a ti a, ka bu nghauh ringawt. "Nilen nuam le miss, kan inhmuh leh hma zawng chhel takin lo awm la.Minlo ngai lutuk ange" ava han over tak!






Class pangai takin ka la a,zirlai ten ka sawifiahna an hriatthiam loh mawlh hlau in "in hriatthiamloh lai chu min zawt hreh suh u" ka ti nawn deuh chhen.Class thum ah ngawt ka lût a, high school section chauh la tur mah ni ila zirtirtu indaihlohna vangin middle section lamah pawh ka luh hrih angaih hmel.An sawi dânin B.A zo hlim zirtirtu ah an la nasa a, a thenin hna dang hmu in a thenin an zirna an zawm rual deuh thup ani awm e.Chuvanga indaihlo zui ta viau an nih hmel.






Chhunchawlh alo hun a, vawin lunch laia ka round kual ni anih vangin ka tiffin pai ei hmasa lo in ka round hmasa phawt a.Naupang ho chuan an tiffin pai anlo ei mial mial hlawm.Phalloh thil an pai tel em tih te chu ka check kual a, man tur phei chu ka hmulo.Thei leh sa lam pai anlo phal lo a,sarang a inpack pai an phallo bawk.
Pawl kaw room ah lût in ka check kual leh a, mipa tiffin eikhawm ho dawhkanah tiffin chhinah hian antam pâr lo awm ruih ka hmu a, mak ka ti viau.







"Antam pâr hi in pai em ni?"ka zawh kher chhan pawh lawh thar hlim a ang em a tin ni.A hel pawh nise tiffin a darkar thum vel a awm chuan tiang hian a thar sarh theilo hrim hrim.


"Sawlai ami saw eiturin kan lo then thin a" tiin tukverh lam an kawk a, ka en nak chuan antam par hmun hi alo awm.
"An phal ami?" Mimal huan anih ringin ka ti sap.





"Yess Miss, apu Dara'n kan ei turin kan school compound lam ami zawng saw a zuah bâng thin alawm" an ti tliar tliar hlawm a, anachang an hria in Pu Dara pawh chu a fel ngawtin ka ring."Tui deuhin ei ru aw" tiin ka chhuahsan zui nghal mai.






Office a ka awm lai te chuan pawl kaw ho antam par ei mawlh chu ka ngaihtuah let a, rilru an ti hlim veng veng reuh mai.







Khua alo thim chuan ka ni deuh sarh mai! Inbual faiin ka awmhmun thawmhnaw hak tur te chu kan thlang uluk khawp a, ava zahthlak zawk tak! Nge maw U Raymonda lo lên tur vanga kalo buai ve chiam ni?






Dar sarih alo rik chuan ka pa committee turin a chhuak tharh a,choka lamah ka nu leh Hmingmuana lehkha an inzir tir bawk.Sitting room ah chuan U Raymonda nghah pahin ph ka khalh neuh neuh a,sana te chu ka en deuh chhen.Hun te chu akal muang riau te hian ka hria a,ka nghakhlel leh lutuk te chu zaklo ka inti rilru khawp.





"Hmingmuanpui ngaihtuah rawh, i ziahlai te tal kha en ve rawh" ka nu dawhtheihna in a tlin bik tawhlo nge an thawm a ring dûn chho tan.






"In awm em?" Ti ri ka hriat chuan ka hawichhuak vat a, mahse choka lam kawngkhar atang anih hmel.Sitting room lam kawngkhar chu kanlo khar ve daih anih hi mawle.





"Lo lut rawh u, enge in duh?" Ka nu'n alo ti var.





"In fanu" tih ri ka hriat rualin ka tho tharh a, hmanhmawh zetin choka lamah ka tlân phei a, kawngka biangah chuan U Raymonda leh midang kala hriat ngailo pahnih hi anlo ding thâm hlawm.
Ka nu chu ka melh a, zawhna mitmeng in minlo melh let kiau "ka thiante an nih hi" ka tih chuan "ko lut ta che " min ti zek!







"Lo lût ru" lai zetin ka ti sep a, sitting room lamah hruaiphei mai ka tum "in hming te han sawi ve ula " ka nu chuan alo ti hmanhmawh.U Raymonda ala khem neih nuaih a, a thian rawn hruai te pahnih lah leather jacket an hâ hlûn bawk si, a inthuam pangai ber hmai akhem bawk nen ka nu chuan 'haw rawh u' a tih khum hlak ang tih ka hlauthawng viau.






"Raymond Zoremsanga ka ni e, ka thiante hi Bza leh Siamkima"U Raymonda chuan ati a, "inva ti dek duk hlawm ve, lo va inkawm rawh u" ka nu'n a tih chuan ka thaw huai in ka hria.


"Anu ahmai saw abâl e" U Raymonda rawn kawk va hian Hmingmuanpuia pek chuan a ti a,ava zahthlak thei tak.
"I lehkhabu kha bih ringawt rawh" ka nu'n a tih that rualin U Raymonda thiante pahnih chu an inmelh zak zak.

"Bawiha kan luhna hi a diklo anilo maw ?" Bza a tih zawk chuan zawi te hian a ti a, "adik adik"Siamkima an tih zawk chuan alo ti nawk nawk.






Thutkhawmna lamah kan phei a, "thu ru " ti deuh tawpin athu hmasa berah ka tang thung. Ka bulah chiah U Raymonda a rawn thu thla ve a , kan piah ah a thiante pahnih an thu thla ve zui bawk.
"Thingpui te in in duh em?" Ka sawi tur hrelo chuan kan ti nghal thawr a, "min haw leh tir hma i tum emai" U Raymonda'n alo ti hlak.Ani dawn tak e a, anlo thleng ve chauh a thingpui lo sawi hmuh nghal chu haw leh vat se intihna ang vel ani.






Bza an tih zawk chu ameng sun sun a , ruih anei tih ahai theihloh.Siamkima zawk erawh a meng pangai viau a U Raymonda chu nidang nen danglamna a awmlo.A rimtui inkah rim chu ka hîp pha chem chem a, tâk vût nisilo hian amipa rim bik ngawih ngawih te'n ka hria .






"Dimples i nu saw ava den hmel ve a" choka lam ep a thu kan nih vangin ka nu va thlek zeuhin U Raymonda'n a ti zawi sup a, "nia"Bza chuan alo ti ve bawk.






"A zia ve nihsaw ahlauhawm loh" kan ti a, ka hlauh zia leh athuzawm loh hlauhawm zia an hriat ve kher angai lo.






"T.V te kha on ula " ka nu a rawn au deuh lang lang. T.V en chu atha phian ang sawitur avang emai.






"Kan on dawn mi in en duh em? Chanchinthar pawh anla puang zolo deuh ang ka ring" ka tih rual chiahin current a rawn thim hmuk. "On tum chhin tho teh a" zawi sup hian U Raymonda'n a ti a, ahmel hmu thei ilang chuan anui suk suk ka ring.

"Dimples inverter emaw emergency light in nei lo ami?"a tu zawk nge rawn tawng pawh ka hrelo."lawk aw" tiin ka ding a, ka bânah U Raymonda'n minlo chelh thuai!






"Athim si i chesual ange" tiin a che ruk ruk a, a ph flashlight a rawn ti eng nghal pup."heihi keng rawh" tiin aph chu min pe zui a, ka ban ve mai.






"Ipa pawh hi inverter fit ngaipawimawh hmasa turin ka ti lawm lawm a, thil dang thil dang a ti hmasa a" ka nu chu a ang deuh hlak hlak. "Nunpui minlo chhun teh " a tih chuan ka chhun vat a,a kawr hmawr ah Hmingmuana'n avuan tai bawk.

"Khawnge maw lighter pawh hi a awm ni?" Bombati pahnih keng chung chuan stove bul vel chu a hai rawk rawk.






"Kalo chhi kai ang chu"U Raymonda kan bulah a rawn kal ve tih reng ka hrelo.Lighter talh alhin Bombati chu a chhi zui a, inchhung chu a ti êng phalo kher mai.
Kawl rawn phe nghal zur zur in ruah a rawn baw nghal hawk.Chhûm a zîn vak ka hre silo a arawn thawk chak hle mai.






Kan vai chuan bombati pahnih kan chhit bâk êng awm heklo, sitting room ah kan thu thap hlawm.Ka nu malchungah Hmingmuana abawk nguai bawk a, kawlphe leh trek tla hi ahlau tlat zel.Ala naupang bawk nen awmlo ka ti hranlo , kawlphe hi chu kei tak pawh hian kala hlau deuh.Kan awmtha hle hle lai min rawndeng pawo ang tih te ania ka hlauh ni.






"Bza maw? Enge intih thin a Nunpuii nen te inlo inhre hlawm a" ka nu chuan a ti a , "kan hre ve hleinem, Raymonda kanlo zui ve tawp anih hi" Bza chuan a ti khauh.

"Anih chu mawle, rawn lêng lut fo rawh u " ka nu chuan a ti leh a, "i den e" Bza bawk chuan a ti nang nang! Ka nu chuan a nui hak hak zui a "den emawni? Min hrechiang chuan min hlau tak tak ngailo" ava dawheh tak, a hrechiang ber tu afate'n a rim thak tawh phei chuan trêk pawh kan ti ngamlo ania.






Ka nu chuan thu ho te te sawiin a ti ti pui luam a, Bza tak phei chu abe hnem zual.An inkawm thei viau lehnghal! Ka nu mi khirh leh fekfawn lutukin tlangval hmel en reng reng pawha ruih nei tih hai theihloh pangai taka akawm nasa ber zawk chu mak ka tiin ka chhungte kalo hriatchian tawkloh zia ka hrechho telh telh.






"E Nunpui i pa hi a rawn tâng ang, ruah ala bân hmel mai siloh nihliap i thianpa nen khan va pe lawk ta che u, ahla chuanglo" ka nu'n chuan a rawn ti nawlh a "Zorem Pu Duha te in i hria ang chu tiraw " a tih chuan "aw" alo ti dut.

"Va pe lawk mai ula" ati leh a, Hmingmuana muhil bam chu mut remin an nihliap hlai hlep hlup tak la tur chuan ph light tu êngin an room ah alut zui.






"Thungpui kalo lum ange, in rawn let leh rualin a so hman vel ang" tih pahin nihliap pahnih min pe a, kanlo ban ve mai.






Ruah chu alo la sur nasa khawp a, nihliap pakhat kan inzawn a aparh hlai that em vangin pakhat chauh inzawn chungin kan kâwngachin chunglam chu ahul viau ang, hnuailam erawh ruahin min theh tho tho.







"I chhungte chu an fel hmel hle mai"ngawi dun rauh rauh a kan kal hnu ah a rawn ti sup .






"Engvang ngawt chuan maw ?" Ka ti deuh hâ







"I pa chu ka hrelo a, mahse i nu min biakdan te kha kan tawn zen zen loh anih kha.Thenkhat chuan an ina rui chung ngat phei chuan lenluh an phallo a,min zilh tum ngawr ngawr an awm bawk a, mahse inu kha chu ani velo.Bza kha a rui tih chiang taka ahre chungin pangai takin a titi pui mawlh mawlh a, ka thian te pawh khan nuam an tih ngei ka ring" a ti duah a, kan inhmuh tirh atang athu sawi sei ber tum ala ni ngei ang.






"Ka nu hi chu atawng duh ve hrim hrim a" ti sepin "U Raymond, kan inhmuh tirh ata tawh ruih ineih awm ka hre ngailo a, han rui thin hmel pawh ipu bawk silo" ka ti halh a






"Ka rui ngai hleinem" khi sakin alo ti mai ."Damdawi, zu leh drugs hrim hrim emaw insual, mi kutthlak hrim hrim pawh nise chhan neiin an ti thin" a ti leh






"Anih nang?" Kalo ti hmanhmawh.






"Sual tur hian chhan a awm kher angailo tih entirnan ka sual" a ti nulh! Chulam zawngin ka zawt tawp silo.A hmai khem neih nuih chhan ania zawh ka tum ni.