DOCTOR FANU CHAPTER-2

[Judy chhakchhuak]

Chapter-2

MELLANIE LIANSANGZELI POV

Zing ka tho chu ka mawng leh kawng vel ana ṭhem ṭhum mai,vuak hrep ang vel kani. "Ilo tho tawh maw,intifai la sawtah chaw kan ei leh dâwn ania,nizan ah minlo phone a eirawng kan bâwl kep dâwn che u ania an rawn ti leh ringawt a,kan Vc te chhûng nge nge an ti lawmawm tak tak ani," kanu in ati luam a.





"Intifai vat la,va phei rawh aw Liani,eirawng bâwl vel puih a ngai ang,zah i hre vak lemlo a nangmah pawn i ngaihtuah awm loh,mahse ṭawng fimkhur viau ang che" kanu in atih leh chuan ka peihlo tak tak ani.





"Inchhung rem fel vel i thiamlo sia,a theih theih kalo ti ang," atih leh chuan ka hawi kual thuak thuak a. "Khawnge kapa te hi," ka tih chuan "pu Ding'an alo sâwm a,bazar velah an va tei chhuak ve anih kha,i u erawh bathroom lamah a awm aniang," atih takah chuan ka roomah lutin ka hmai vel ka phih thuak thuak a.





"Va phei vat rawh,puih a ngailo ti mahse pui tho ang che" kanu in arawn tih leh takah chuan ka phone la in in aṭang ka chhuak vat a.School mai bakah college chawlh hun lai vêl ania,naupang pawn lamah hmuh tur an tam khawp mai,an infiam chu an ri deuh laih laih a a ṭhen in pawn lamah thawmhnaw an pho chhuak a,ka hmêl an hmuh vawikhatna a ni hlawm bawk a min en zui ve vawng vawng zêl.





"Chuan avan nawm hmel em em," ka ti chu min en zawk a. "I chuang ve chak ami," mipa pakhat zawkin atih chuan ka aw rang khawp mai. "Kan Vc te in thleng saw minlo nawr law law teh u,khawnge in kal dawn a" tih pahin an tawlailir nawr laiah chuan ka ṭhu vat a.





"Tui kan chawi dâwn a," ka bula ṭhu hmeichhia zawk chuan alo tive thung a. "I hmel hi ka van hmu ngailo em em," ka bula ṭhu nu bawk chuan ati leh a, "nia hmu ngailo ang,nimin ah khan kanlo thleng ve chiah alawm," tih pahin ka bula bur ho chu ka rem ṭhat sak a.





"Mikhual nula ami inih a," atih leh chuan "kala mikhual maithei,mahse hetah kan awm ve reng tawh dawn a,kapa hi hetah anlo sawn a doctor ania," ka tih chuan hrechhuak thut niâwm takin a meng phâwk khawp mai.





"Khawnge i kal dawn a,nute" kapa te rawn phei nen kan in tawk ve chiah, "e pa pu Dinga te inah chaw kan ei dawn a,kanu in eirawng va bâwl pui rawh atia ka phei dâwn" tih pahin ka ṭhutna ṭang chuan ka dingchhuak vat a.Kapa bulah chuan nizan a lo leng zînga la ṭhalai ve ber kha a ding a,anui ve vur vur mai, "a ṭhat chu va phei rawh" atih takah chuan ka kal veleh mai a, "ilo chuang leh dawnlo ami" nichina min nawr tupa khan alo ti a,minlo la nghak ve reng amawni.





"Va kal rawh u,kalo chuang tawhlo mai ang a hla tawh chuanglo," ka tih takah chuan anni pawn min kalsan vat a,pu Dinga te gate pâwnah chuan kapi te kha alo vei leh thauh thauh tawh a,a bulah nu Ngaihzual'in a tupa alo pawm ve bawk.





"E... Mellanie lo kal rawh" min hmuh rualin alo ti nui leh sang tawh. "Eirawng kalo bâwl pui dawn chu a," an bul ka thlen rualin kati nghal Tlawng a, "a ngai rere hleinem,kan buailo Van'in a hnehsawh lutuk eirawngbawl te mai mai chu," ati vei luam a an tupa pawm mai ka tum chu a duh lo nasa mai.





"Awi heite hi chu a sual reuh lutuk a,duh loh te hi a ngah lutuk a,a chang phei chuan anu lo chuan anla thei ngailo,kan neihchhun ani ve sia kan duat ve bawk sia" alo ti zung zung a.





"UVani chu kava pui ange," ka tih chuan min hnial tawh biklo.Inchhung ka lut chu a reh ruih a,choka lama uVani che thawm bak hriat tur a awmlo,khawnge maw Zosangliana te ho kha an awm vek ni.





"UVan kalo tih pui ang che," a lama phei paha ka ti chu alo hawi phei rang khawp mai. "Awi nang alaw,a ngailo hei ka zo ṭep tawh," tih pahin chawhmeh a chawk rak rak a,a bai siam chu a rimtui lutuk ringawt.





"Kan khua chu a nuam iti em," a bula ka din ve reng takah chuan alo tive ta nge nge a. "Aw anuam khawp mai," kalo tive sep,nizan a an ui hmelchhe reuh zet kha ka bulah alo phei leh tawh,a ha hnuailam phei chu a ka chhûngah a awmlo hrim hrim,a hmul a buk ropui mai bawk sia,a mit pawh a khuh lek lek a hreawm lo nge mawni a hmul te hi meh sak ve awm ania.





"Liani iril aṭam tawh ami," uVan'in atih chuan "ṭamlo" kalo tivat a.A thil chawh lai dah meuhin minlo en haw mai,nitak an ui hi Liani ve tho uVani tih ngaih na hrelo chu anui anui a,keipawh tun ṭum chu ka zak ve reuh lutuk ringawt,an ui vang vek tuin nge mahni ui te Liani ti ngai ni.





"Khawnge kan chhungkaw bus conductor hi ala tho na nge," pu Ding'an ati deuh lang lang a.A hnungah kapa leh ka u ten anlo zui lut ve vat,kanu erawh pawn lamah nu Ngaihzual'i nen an inbia aniang,an ṭawng ring ve reuh lutuk.





"Tho tawp lo ang,kaihthawh loh chuan nileng ṭhak pawn amu thei ang,mumang chhâwng thum na vel anei mek ang,Madin i nau va kaitho teh" nu Ngaihzual'in ati a.





An chhûngkaw bus conductor chu tu tak ni ang maw, "azo tawh tho,hawh va ṭhu phei ve ang" uVan'in atih takah chuan kanu te awmna lamah kan inzui phei vat a. "Bawihi hi i hming ka hre theilo rere," uVan'i bawkin min en pahin ati leh a,nichin aṭang khan min mi mawl biak tawp ka ti rêng ani.





"Mellanie ka nia,i duh chuan ka Mizo hming pawn min koh mai rawh,Liansangzel min ti thei tho" ka ti chu abu ve nghat a,a fapa chu a pawm zui nghal.Room aṭanga Zosangliana leh au te an rawn inzui chhuak chu kanlo en reng a,Liana hi keiai a u na a tam em em in ka ringlo.





"Kan chhungkaw bus conductor chu ilo tho thei maw,ani hi chu in hi bus ang lekah a ngai a,pawisa a hman zawh ah tihian alo haw a pawisa te hi a khâwn khawm nasa thei ania,pêk loh lah hian thing ka pu tawhlo ang a tih loh leh gas ka la tawhlo ang atia,kan thing latu leh ek tu ber ani bawk sia" pu Ding'an nui deuh huah huah chung hian ati a.





Liana pawh a ui bulah a ṭhu a,a phone a khawih deuh mual mual mai. "Vawiin lam chu pu Zorin,dispensary vel tih fel pui tur che Mawii leh Dika kalo tîr ang ka ti deuh a,anni hi damdawi lam hre ve deuh tak mai an nia nangmah ngawt chuan i hah lutuk ang," pu Dinga bawkin ati dap dap a.






"A pawilo khawp ang chu" kapa pawn alo tivat. "Chaw kan ei mai dâwn ami,tih fel tur in nei nual ang" pu Dinga bawkin ati leh a.Chaw ei chu phallo viau mahse ka siam pui ta nge nge a, "Vani Lian'in chaw a ei tawh êm," Lian'an atih chuan uVani pawn "la eilo," alo tivat a.A u nupui ani sia,a u miahlo chu amak kati,an inrual anih pawn au nupui a nih na ang in a u ve tal ka rin nen.





"Liana vawiin lamah eng nge itih dâwn," chaw kan ei laia pu Ding'an atih chuan Lian chu ka en zeuh a,ani pawn minlo en ve chiah. "Ngatan nge itih," Liana chuan ati deuh nghut a, "tih tur in neih loh chuan in ṭhian ho in vawiin chu pu Zorina te hi va pui rawh u,nileng leng in khawi khawiah emaw in kal mai mai a,a ho thei emai" pu Ding'an atih chuan "a ngai hleinem,midang ilo tirh tawh tho chuan a tawk lutuk alawm" kapa in alo tivat.





"E lo pui che u rawh se,tih tur an neilo lutuk a a buaithlâk zawk,ṭhenawm te kêl mawng anlo hawlh sak loh leh ake anlo ṭawn sak ṭhin a,mi pawisawi ai chuan a ṭha fe zawk ania,nakin ah inla hre dâwn tho tho a anni ṭhian ho hi chu buaina bul pui ber hi an nia,in tih buai awm se an hming ari tel ngei ngei a,an ruih lah hian awm tawk chin an hre bawk siloa" pu Dinga bawkin ati leh a,eng vanga sawi duah nge maw anih le.





"Han in koh khawm se,kalo tîr phei dâwn nia" pu Ding'an atih chuan kapa te pawn an hnial tawh lemlo. "Mellanie te nên hian inkawm tam se,an fel ve deuh mahna Mellanie hi chu a nunchang a ṭhat hmel sia,puitling duah si hian an la mawl lutuk a,kan fate ve hi zawng mi tih buai tur zawng reng reng hian an khawsa a,thil pawi liantham anla khawih lo a azia hlauh zawk" nu Ngaihzual'i zawkin ati veleh duah a.






Liana hmel chu hmuh a nuam vak tawhlo,a thleng chawi in a kham ta daih a.A kut a sil thuak thuak hnuah a phone a khawih mawlh mawlh a,a bengah a chuktuah nghal zât.





Chaw ei khamah kapa ten thingpui hâng an in leh tête a,keini erawh kanu te nên kan phei hma thung.kan in kawtah hian thing lian deuh a awm a,chumi chuan kan in ati dai ve deuhin ka hria,ni a sa ṭan bawk nen naupang hmuh tur pawh an vang pharh tawh mai.





Kanu te nên a theih ang ang kan ti fel a, "kalsawn teh" tih paha ka u in minlo nek deuh nawk chuan ka chair din na nen chuan kan tlu ta rum rum mai, "Zorinmawi ana lutuk,eng nge khatia min rawn tih vak kher a," thinrim zetin kati a ka khel ka sawh na chu ka tuai nghal vut vut mai,ana lutuk ringawt.





"Ni e,eng nge i nau i namthlak kher a,i nam khawlo mai anga sin,sawti lai kawngka bulah sawn alawm perek kheng tura ka tih che" kanu in minlo kaihthawh pahin ati ve hlak hlak a.





"Inla no si" a hmui phun a arawn ti leh kher chu ka run tawk a tling leh em em tawh, "nu inla no min ti ania," ka tih chuan "Zorinmawi i nau ti ṭe reng suh,a bengchheng" kanu in atih takah chuan a ngawi ve hmak a.





Liana leh a ṭhiante pawh anlo thleng harlo,an ṭhian zingah Liana hi a sang ber a,a hmel pawh a ṭha reuh lutuk, "lo kal rawh u,tih tur em em pawh a awm hranlo,bêl rem leh thil dahna tur vel siam hi ani tawh mai, bedroom lam chu nizan khan kan ti zo thuak tawh a," kanu in ati zung zung a.





"In hming te sawi ve phawt ula,hming in hre tawn lo a thawh ho reng chu a hreawm ang,Aizawl lam aṭang eitur kanlo keng nual a chhun ah kan ei dawn nia" kanu in ati a, "Liana chu ka hre tawh tho a,Liana i ṭhiante hming hi min hrilh ve la" kanu in atih leh takah chuan a hawi kual thuak a.





"Ka bula sam kîr hi Ruatdika,a bul chiah ami saw Jimmy-a chuan kan hmeichhia te pahnih Nu-i leh pari" Lian'a chuan ati ve mai a. "In vân fel tak,keihi nu Hruaizel minti mai dâwn nia,chuan hei Mellanie ania Liani kan ti ve ṭhin tho a,Liana nen kan koh dan alo in ang chiah a sawlai ami saw kan fapa Zorinmawia anih saw," kanu in ati veleh vat a Liani minti kher chu ṭullo kati tak tak ani.





Mipa ho in electric vel an khawih a,Liana chu a inla boss thei khawp mai,hmeichhe ho in bungbêl vel kan remfel thung. "Zanin khawhar in zaikhawm tawp zan ania,Liani lo kal ve la" Nu'in atih chuan ka hnial hranlo. "Nia va kal ve rawh nute," kanu pawn ati tho a.





"Chawlh chhûng hian eng nge in tih ṭhin a," ka tih chuan minlo en ve zawk a. "Tih tur chu a awm ve reng,thing kan phur loh leh lo lamah kan feh a,in a awm reng hi a ninawm thei sia,chhun velah te chuan kan ṭhian ho in kan leng ve ṭhin,Liani pawh kan bulah i awm tam anga nuam iti ve mai ang class kal hunah pawh kan rualin ikal anga," Nu'i bawkin ati leh a,Pari erawh a ṭawng tam vaklo aniang.





Kapa te va pui tûrin kanu a kal daih sia,bêl kan rem zo tawh bawk nen tih tur a awm vak tawhlo.Kan mipa te pawh phone khawih in an ṭhu mai mai tawh, "Liana vawiin hi eng ni nge i hria em," Par'in atih chuan kan envat a. "Hrelo" alo ti ve sup mai, "Gemma'i birthday anih hi" Pari bawk chuan ati leh a,Gemma'i chu tunge pawh ka hriat ve loh avâng in kalo ngawi kar.






"Tu emaw chu a thih hun a hnai leh sawt animo," Lian'a chuan arawn ti ta daih a.A thil sawi chu a thlamuanthlâk loh mange,inchhung vel zing lamah kanu in alo remfel nual tawh bawk nen kan zo hma khawp mai.Tlai lamah Pari leh Nu'i ten Buh her tîr an ngaih avâng in rei an awmlo,zan lamah minlo sawm hma dâwn anti bawk nen keini pawn eirawng kan bâwl hma a,kapa te erawh an thil rem fel chu an zawh har hmel khawp mai,damdawi atam bawk a a in ang zela rem a ngai bawk nen a buaithlâk ve deuh ang.





"In ti fai vat la,chaw i ei hmasa mai dâwn nia i ṭhian ten anlo sâwm dâwn che kha,nghah ngai reng a awm loh tur ania a sâwm tu tan a ninawm duh ṭhin,chuan zan lamah ilo haw pahin eitur lo lei haw rawh aw nangmah bawkin i duh leh dâwn" kanu in atih chuan ka hnial hranlo.





Uluk deuhin ka inbual a,zanin chu ka in chei uluk ve hle.Ka thawmhnaw neih nalh ber chu la chhuak in ka ha a,chaw ei tura ka chhuak chu kanu in minlo envat a. "Mitthi in ah anih kha aw in kal dawn,kan awmna milh zêl a in chei tur kan tih ṭhin kha,thawmhnaw changkang leh nalh lutuk hak a ngailo a fai chuan atawk,puan i bih ve anga i pheikhawk flat kha i bun dâwn nia," ati a.





Chaw eikham ah kanu duhdan tak chuan ka insiam leh a,ka sam sei ve tak chu bakkilh in ka kilh khawm tawp bawk. "Liani i hman tawh em," pawn lam aṭang Nu'i ten an rawn ti lang lang a,ka room tukverh aṭang hian pawn lama kalte a hmuh theih a,ka hawng bawk nen an inchei dan chu a simple viau mai.





"Lo lût lawk teh u Nu'i" ka tih hnu rei vaklo ah ka roomah anlo lût a, "tihian ka kal dawn asin," ka in chei dan ka entir chu "i kawr hi avan mawi em em" an tih chuan ka lawm ve lutuk.





Nui leh Pari hi nichin lawka ka hriat te mah nise ka nel nghal lutuk ringawt,kan in aṭanga kan chhuah chuan dar ruk leh a chanve vel chiah ani. "Khawnge midang ho hi," Liana te ka hmulo chu kan kimlo riau in ka hre ve ngawt a,an ṭhian zingah ka in chhiar tel der tawh.





"Sawtah pi Kapmawii te kawlthei kûng hnuiah minlo nghak dawn,thil tih nikhua vel ah hian an in ve zeuh zel a,nang chu kan ṭhian zingah kan tel tawh che a an mizia ang ang hian i kawm ve angai zêl dâwn ania aw Liani,kan mipa te zîngah hian Liana hi a pangai ber a a pangai ber tih khan midang an mawl e ka tihna nilo in,zu an in hian in tawk chin an hrelo a.Liana chu ani velo thung,zu in ve ṭhin mahse rui hnap khawp in a in ngai hranlo a,lukir'a leh lubuk'a te hi a khap zawk ṭhin a,keini leh nang chu kan in ang theilo maithei,khawpui a seilian inia keini chu thingtlang a seilian kan nia Aizawl pawh kan kal khat lutuk,Liani erawh kum nga vel lai Aizawl ah api te a han awmpui a kan zingah pawh a fing ve deuh kan changkang lo a thil pawh kan hrelo ahma kan Pastor fanu leh nangmah ni inlo awm hma a doctor fanu te khan min hmusit deuh ṭhin a,an in cheina sang mahse an thinlung chu keini ai a ṭhing daih zawk,rethei te mah ni ila kan thinglung a hausa thung a,kan in fak ve duah anih chu" Par'in ati duah a.





"Teuhlo mai,khawi kil kawm kar ami pawh ni ula ka hmusit ngailo ang che u,heta kalo kal a ka ṭhian kawm ve hmasak ber in nia ka ngai hlu lutuk che u," ka tive sep a.





Pi Kapmawii te kawlthei kûng hnuai kan thleng tawh nge an ding deuh chawt a, "bike a kal kher pawh a ṭul lo asin le,a hla chuang siloa tah khan dah ula ke in kal law law ang u,bike park na an neih loh ve em kha" Nu'in atih chuan kan mipa te pawh anlo ding ve vat a.





Nu'i sawi ang tak tak in Jimmy-a leh Ruatdika te chu an meng sen rum mai,Liana erawh zu rim nam ve deuh mahse a harh fim hmel khawp mai. "Khawhar in kal nawm nan in tia,in in leh nghek zel a awmzia a awmlo thei lutuk,zu in dan in thiamlo emai" Par'in ati hlak hlak a.





Khawhar in kan thlen dâwn chuan zairi pawh kan hre ṭan tawh,Aizawl velah kha chuan kan chhûng hnaivai tak tak te an boral anih loh chuan kan kal zen zen ngailo ania.An zai te chu an zai tui tih hriat reng reng a nawm hmel takzet,a chhûng kan lut chu ka hmêl an hmu ngailo bawk nen min en duh hlawm khawp mai,a hnung lamah kan ṭhu a,Liana te pawh kan hnung chiah ah anlo ṭhu ve nghal.





Zai pah chuan ka hawikual thuak thuak a,tum loh deuhin UMapuia a tlar hma lamah chuan ka hmu leh nawlh mai.A zai tui hmel hle a,a chhelo lehpek khawp mai, "uMapuia saw a awmna a rei tawh em in khuaah hian," Pari beng bula ka tih deuh sur sur chuan "la rei vaklo,ngatinge a" atih chuan ka nui ringawt a.





"UMapuia saw i duh animo," atih leh chuan a kutah ka sik vak ringawt, 'Van hmun ropui' tih hla chu mawi takin kan zai dulh dulh a,mitthi chu kum 52 mi ania,Pari sawi danin an chhûngkaw pa ber anih hmel,amah hre velo mah ila zai chu anuam kati takzet.





Jimmy-a leh Ruatdika pawh an rui lungpuam nge ka hrelo,an ṭap deuh pur a,an zai pah te chuan mittui an hru leh zeuh zeuh ṭhin a. "Jimmy-a nge Ruatdika chhûngte ami mitthi hi," ka tih chuan hnunglam an hawi ve zawk a. "Nilo e,an hmelhriat satliah ringawt mawle,an zu in a thawk anih hi ngaihsak suh," Par'in atih takah chuan hmalam ka hawi ve leh mai a.





Zai lai laklawh in an chhungte lam aṭang thu an sawi leh zeuh ṭhin a, "a zai lo lo chu ka seh dâwn che u ania," hnunglam aṭanga an tih chuan kan hawi phei ve vat a.Tu dang anilo,kan ṭhianpa Ruatdika bawk ani, "ṭhu rawh Lukir i mawl lutuk," tih pahin Par'in a pawt ṭhu zâwk mai,kan bul vela ṭhu te chu an nui huk a.




"Khatia i awm leh dâwn chuan zu kan la tawhlo ang,ngawi reng khan ṭhu ang che," Liana ati deuh khur khur a.





Khawhar in zai pawh dar sawm velah kan bang a,keini ṭhian pawh pawn lamah kan chhuak vat, "ka zun a chhuak lutuk,minlo nghak lawk rawh u kan zung leh lawk" kan kal uk tawh chu Nu'i a tlân let leh vat a, "saw uMapuia te anlo phei ania," Par'in min nghawk zeuh zeuh paha atih chuan ka lungphu a rang ve ringawt,an rawn hnai tulh tulh a ka lungphu a rang tulh tulh a keimah te chu ka hik chhuak vek nimaiin ka hria.





Kan mipa te dinna lam kava hawi chu Liana chuan min melh deuh rûn a, Ruatdika erawh thingkung kuah in a awn a awm mai,a rui hle aniang Jimmy-a erawh a pangai fu tawh mai.





"UMapui in phei tawh dâwn alaw," Pari zawk chuan ati deuh sep a, "aw kan va phei phawt ange,inla haw dawn nange" a ti dam dap a.A aw te chuan min fan chhuak raih raih nimaiin ka hria,a zai ka ngaithlak nasat phei chuan thlâwk delh delh ang hian ka inhre ṭhin a,ka chhungte pawn zaithiam antih thu an sawi ve nasa thei lutuk.





UMapuia lah chu ka be ngam der siloa,a kal chu ka enzui deuh reng ringawt a, "awi ka rei em,bathroom ah mi anlo awm a ka zung thei hram kal ang u,awi Lukira chu leh em em a,ngatinge hetiang em em a aruih a" ati deuh hluai a.






"A in sual anih hi,kal ang u" Lian'an alo ti nghut.Ruatdika chu Liana a kuah a,a hmaah an kal ve tawh thung, "nichinah uMapuia alo kal a,Liani hian a star riau in ka hria," Par'in min chhaih pah zeuh zeuh a.





"A zaithiam em a,ka duh na te chu arei tawh mai" ka tive ta nge nge a, "an khaw lama a haw hma in hrilh vat chi anih chu" Nu'in alo tive thung. "Ka duh teuhlo,ka duh tih chu hre mahse a pawilo a,mahse va ngaihzawn tak chu ka ngamlo,milar te an nia duh tu an ngah dâwn lutuk kei ve mai mai te min duh in ring reng reng amawni," ka tih chuan ka hnungah min chum pawp a.






"I mawl lutuk,khatin an ti ringawt ngailo,milar pawh nise mihring ve tho anih saw,khawvel a kan awm chhûng chuan mihring hian phuloh kan neilo,mi kan va bem a minlo duh loh chuan an mahni lam thiamloh ani,an inla ve deuh tihna animai uMapuia phei chu afel si,kherh ngat ngat rawh chhuah rere suh kan duhzawng an nih chuan hmeichhia pawh ni mahla bem ngat ngat rawh,duh let hun che ala nei ve em em ang tih buai ngat ngat mai tur lungngai rere suh,kan pui dâwn che ania" Nu'in ati duah a.





"Aho aho,mipa hian hmeichhe ti chung chung kan duhlo,ka ṭhian inih na ang in ka hrilh ve ang che,ti chung chung lo la a hmuh ah in lan tam mahla a pawilo mahse va biak reng kher tum duh suh,mihring chu kan inhmuh ngun chuan kan in hmel duh ve mai zel a," Jimmy-an alo ti ve a Liana leh Ruatdika erawh a hma lamah daih an kal a,an pahnih in an phun leh bul bul zêl a.





"Kar thar aṭang class ṭan ani tawh sia,ka peihlo tak tak ani tun semester zawh ah hian Aizawl lama phei kan tum a, college kal ve manah Sawrkar hna te kan duh ve sia,hostel lamah awm dûn kan tum a Pari nên hian" Nu'in atih chuan ka bu nghat a.






"Keichu kan in a awm tho a,ka zir duh ber pawh kala chianglo,thil thiam har chi kani bawk sia" ka tive sep a. "Keichu hna ka zawng ve anga,ka tlin theih loh chuan English pasal neih ka tum ang," Par'in atih chuan ka en haw mai.





"Eng nge awmzia" ka ti hap a, "sap pasal neih ka tum ang a tihna anih kha,English a ti kher zêl a,ṭha deuha sawi ve mai tur ania" Nu'i zawkin alo ti veleh a.





"Taka,eitur lei haw ka ngai a," ka tih chuan pi Kapmawii te kawlthei kûng kanlo thleng der tawh, "Lukira hi kan rualin haw mai sela,Liana Liani hi dawrah chuan va kalpui mai ta che,in haw na lam tur a in ang tho a," Nu'in atih chuan Liana chu kan en ṭhup a.





"Lo chuang rawh," a bike start paha atih chuan ka chuang ve vat. "Anih aw,Liani taka khawmaw i number minlo pe teh,kan ṭhian ho group ah kalo add ve ang che" Jimmy-an atih chuan number te kan inpe leh tête a,kan tlanchhuah thleng chuan Ruatdika chu ala thle nguai reng mai.





Liana lah chu ka rinai in a tlanchak a,dawra thil kan lei chuan dawr chhûng thleng minlo zui lut ve zel a. "Liana hei khawilam nula nge irawn hruai luh leh tawh a," dawr nghâk tunu in min hmuh rualin alo tivat.





"Doctor fanu anih hi" Liana lah chuan alo ti awlsam et a,ani pawh a mamawh vel a lâmkhawm zung zung a.Ka thil leina pêk ka tum chu "i ṭhianpa khan a pe vek tawh," alo ti than mai,engtik lai khan nge alo pêk hman ni, "Liana kha pawisa kîr" atih hnuah pawisa chu a ban zeuh a,ka bânah rawn kaiin min chhuahpui nghal.





"Ngatinge min pêk sak ringawt a,kha hei la rawh" tih paha pawisa pêk ka tum chu "ngailo" ati thawp sup a. "Min pêk sak angai hleinem,ka ti tak tak kha hei la rawh" tih paha a ipte a va dah ka tum chu ka bânah alo vuan vat a.





"Ka ṭhiante ṭang pawisa ka la ngailo,kan ṭhian zingah ilo tel duh anih chuan min pe suh" atih takah chuan ka dah veleh zal zal a,kan in kawt thleng min thlah a.





"Lo lût kawi la" ka tih chuan "a ngailo,a tlai tawh muttui le" atih hnuah inher in a tlanchhuak zui nghal,kan in leh an in a in hlat over loh avâng in a bike ri tawp thleng chu ka ngaithla a,a bike hi bengchheng chi ani bawk sia a ring ṭha khawp mai.





Inchhung ka lut chu kanu leh pate'n in ngheng chial in tv anlo en a,tun thleng a hetia rinawm tak leh in hmangaih taka an la awm thei hi an entawntlak ka tia.Keipawn kawppui atan chuan tar kûn thleng a min hmangaih thei tur ka duh a,chutiang mipa chu ka tawng anih chuan ka chhuah ngailo ang.





"Nute eng nge anuam em zanin chu," kapa in ati dam dap a. "Aw nuam lutuk,pa uMapuia pawh alo kal ve a,a chhelo rap" ka tih chuan an nui hak hak a,kanu leh pate hi engkim ka hrilh ṭhin a.Ka tleirawl chhuah tirh a bialpa ka neih pawn ka hrilh vek a,min hau ngailo "pawn lama va inhmuh ruk ai chuan inah te hian lo leng zawk rawh se," anti ṭhin a nu leh pate hriatpui na thlap a bialpa neih chu anuam bik takzet.





"Ka mu ania," tih pahin min chhan na pawh nghak tawh lemlo in ka roomah ka phei a,ka phone ka en chu 'chhungkaw robot' tih group ah hian minlo add a,minlo add tu erawh tu zawk nge anih ka chiang theilo.A dp ah chuan Liana ania,a nickname ah Jimmy-a a inti bawk sia,an awmzia hi ka hrethiam teh nuailo.