Politician Nupui S2

[Cck Lalchhuanawmi]

Politician Nupui Hring nun
S-2
Chapter-7
Ziaktu: Cck Lalchhuanawmi


"Ka hmangaih che", mit chhingin ka nui sen sen.


Inawihmut nan a ṭha dawn tlat, mut a chhuak mai ka ti. "Vawikhatin", ka ti zel a, min hmangaih thu min hrilh ve zel bawk.


Siamtea Exam zawh ni kan thleng a, kan helhhawlh a ni chêk ang chu, chaw a ei ṭha hleithei lo.


Siamtean Anthursen tui a hâwp ri hruih hruih reng a, chaw a ei lo tih theih a ni. Kan en ṭhap.


"Siamte, Exam Hall-ah zun i ngah bik lutuk ang e", Sammy-an a ti a. A lu thingin, "Ngah lo ang, a ho lutuk", Siamtean a ti mai.


"A u, tumahin kan hâwp pui dawn lo che, hmanhmawh suh", Lal Fanuin a ti a. "I hmanhmawh em mai i fail dawn", khi vur vurin Freddy-an a ti pek.


"Lawmawm, khatin i u sawi ṭhaih suh", ka ti thuai. "Bawiha, buh kha ei pah rawh", ka ti a.


Freddy-an, "Anu chu, A U i duak bik ee, a hmingin i ko ve duh lo a, kei chu Lawmawm min ti bik", a ti chul ruih.


Lal Fanu lo inrawlh thuaiin, "Dik chiah, a u Siamtea i duat bik. A sual sual nen, Thawnthu pawh min hrilh duh lo", a ti nuah nuah.


"A mang a chhe si", Freddy-an a ti leh. "A hnar ring thei si", Lal Fanuin a ti veleh.


Anni unau hnih hi inngeihlo viau ee ti mah ila, an inṭan nghet tlat ang lawi a. Siamtean engah mah a ngai lo, a Anthur tui a hâwp mial mial.


Sammy-an min lo en a, ka dar ka sân ak ringawt.


Freddy-a leh Lal Fanuin Siamtea ka duat bikzia ringawt sawiin an ri hlut. Ka sawifiah peih lo, ka duat bikna ka hre lo.


Sammy-a lah a fate pahnih titi chu ngaithlain a kiai leh sak ṭhin. Siamtea a ngaihtuah tawh lo.


"Math tiraw?",


"Ni e, ka thiam vek", a zâm avanga khûr lo chauh chungin a thiam vek thuin min chhâng chu a nia.


Ka ring tho, a subject thiam ber a ni tlat.


Hmun ka tihfel chhungin an insiam pafa hlawm a. Siamtea chu amahin a insiam.


Sammy-an, "Amahin awm rawh se, a mamawh", a tih avangin kan pindanah Lal Fanu leh Freddy-a a hruai.


Ka makeup an tichingpen leh ngei dawn e.


Thleng ka sil dawn chiah tihah phone a ri, Hmingi ni rengin.


"Chhuanpui", ṭap ṭuain a lo ti leh. "Eng nge ni ta?",


"Zan khuain kan inbia a, nichin lawkah thutlukna kan siam fel thei chiah",


"Chuti maw? Thutlukna eng nge ni ta?", ka nghakhlel lutuk.


Sammy-a sawi danah Hriatpuia a beidawng dawn lo, Hmingin 'Aw' a ti ngei ngei dawn tih ka hria.


An insût faih, "Ih maw", a ṭap ṭuau, "Kan innei dawn", a ṭap nui ta put put. Keipawh chu ka nui ar ar.


Ka rin a thleng dik.


"Hming, ka mopui i ni ta e, min U hle ang che, i hria maw?",


"I chawh, khawia U chu sawi loh, ka hêk char char ang che", a lo ti chu, "Nang aiin ka Mark a sâng tawh aw", ka ti a.


"I chawh a nih chu a", a ti hlar. "Khatiang ṭawngkam hman chhuah loh i insum deuh a ngai ang", dam takin ka ti a.


A insum a ngai rih ang.


"Ka tum ṭhin a, hrehawm ka ti thei a nia aw. En teh, u Hriatpuian hnathawh a phal dawn lo, Inpui a nghak a ni si a, inah awm tawp turin min duh a; a ṭha ang em?",


"A ṭhat ring ang, Hriatpuia tih loh chu hmun dangah kan awm vek si a, Dawr i hawntir dawn nia", a lo nui huah huah.


"En teh maw, ka huphurh lehna deuh chu, an upa ber hi. A senior tawh si a, ka hlau",


"Hlau suh, a fel lutuk. Ih maw, ka hrilh ru ang che", ka hnung ka en.


Sammy-a a ding run ang tih ka hlau. Tumah an awm lo. Zawi tein, "Ka nu leh pa ai mahin i bel chawt dawn nia, ka nu leh pa biak ṭhat loh tur tihna ni chuang loin. I hrethiam mai em, i kawmngeih ṭhat a, thil ho te teah pawh a thu i ngaichang zel a nih chuan a duat viau ang che", ka ti sû sû.


"Tak tak maw? Engtin nge i hriat?",


"Lalfela nupui Robawihin min hrilh alawm. Robawihi pawh i ngaina thuai mai ang, a fel lutuk. Keini aiin kum khatin a upa a, kan inchhang bung vel tihna a nih chu. I chhungte va hrilh rawh, Siamtea Exam zawh ni a nia, kan kal ṭep",


"A ṭhat nasat chu. A nih, ka nu te ka han hrilh ang e. Pasal nei turin min nawr chhen a, an lawm ngawt ang chu", a ti seuh seuh.


Hmingin chanchin min rawn hrilh chuan min tihlim veng veng.


Nuam ka va han ti tak.


Thleng ka sil leh dawn chiah tihah phone a ri leh. Hmingi tho emaw ka ti chu, Taiṭita a ni thung.


"Ka tibuai che em?", a lo ti nghal thawr a, a inthlahrun hmel lutuk.


"Buai lah lo e, eng nge ni i duh a? Contract thawh tur i duh em ni?", a nui hak hak a, "Uang lo teh aw", a ti a.


"Chhuanpui, Manoi chungchangah a nia",


"Han sawi ta che", Pu Hrekiman a enkawl mek a, a nat zual thu a rawn sawi ang a, Sammy-a ṭanpuina a mamawh tih a rawn sawi ang tih mawlh ka hlau.


Taiṭita chuan, "Beram Pathumte nen reilote hun hman duntir i phal lo'm ni? A tan a ṭhat thu Doctor-in a sawi a, ani pawhin a ngai em em si a", a lo ti ta a.


Ka hlauh ang ngeiin a thleng ta.


Beram Pathumte chu chhuanlam mai an ni. Anmahni maiin ka phal lo tih a hria, kei tel a rem chiah lo, Sammy-a a tel a ngai.


"Taiṭit, ka lo ngaihtuah ang. A thuhrimah, Sammy-a be ta che, kei min lo bia hi a ṭul lo e", ṭul lo tak a ni.


"Nang biak hi a ṭul lutuk zawk. Ti daih ila, misual an awm tawh lo tiraw?",


"Awm tawh lo, Siamtea exam thlah a ngai sia, ka dah mai aw".


Phone ka dah, ka hlim tawh tehreng nen a chhe vek. Sammy-a an hrilh a nih ngawt loh chuan ka hrilh duh lo.


Engmah thleng lo angin ka awm hmiah hmiah.


Siamtea chu, School Uniform a inthuam zawh meuh chuan inringtawk tawh tak a ni.


Pindanah ka lut a, ka makeup an tichingpen tak tak. "Haw hunah kan intifai mai dawn nia, kal ang u", wipes-in Freddy-a leh Lal Fanu hmai ka hru thuak thuak.


Sammy-a lah kekawrbul nen a la awm.


Track pant la chhuakin ha turin ka ti a. Peihlo tawkin a ha sawk sawk. A tihngaihna tak ka hre lo.


School kan thleng a, "Exam dawna tih ngei ngei tur ka hrilh che kha i la hria em?",


"Hria e",


"Ṭha takin aw", ka ti a. Kan inkuah a, rilruin ka Ṭawngṭaisak mawlh mawlh.


Sammy-an, "I nu hrilh ang kha che ni mai", a ti a. Fiamthu thawh a ang. A naute pahnih pawhin duhsakna an hlan a.


Dawrah reilote kan kal.


Hmingin Sammy-a a hmu ṭha ngam lo, kei thlengin min en ṭha ngam lo. A va han zakzum mai mai tak.


A inhmeh lo em mai.


Kan awm rei chuan a che chhe lutuk ang ti rilruin, ka hawpui thuai thuai. Dawr aṭanga kan chhuah hnuah a thaw huaiin nia ka rin.


Taiṭita thu mi lo hrilh lah chuan awm a tinuamlo.


Doctor meuhin chutianga a tih, Sammy-a an hrilh loh chuan ka hrilh duh bik si lo. Keiin ka sawihmuh hmasa dawn reng reng lo.


Sual nih hlawhna a nih pawhin, lawm takin ka pawm chiang bal.


Keimah chauhin Siamtea ka hruai tawh. Kal lamin Taiṭita leh Manoi inzui ka hmu lehnghal.


Mahse, an hnungah Duhsakan a zui tlat!


"Ding rawh, ding rawh", Driver hnenah ka ti chul. Ka hawi chhuak a, Taiṭita leh Manoi chu ka hmu mai, Duhsaka erawh ka hmu ta lo.


Chhuk ngatin ka hawi kual leh, Duhsaka ka hmu reng reng lo.


Taiṭita te lah an kal hla tawh si, motor-a ka ṭhu lut tur chu hnung lam aṭangin, "U Chhuanpui?", tih a lo awm.


Duhsaka a nih ringin ka inher a, a ni chiah reng bawk.


A taksa chhe lutuk chu hmuh a nuamlo kher asin. "Lo lut rawh", motor-ah ka hruai lut a.


Tui te ka intir, "Tlan rawh le", Driver hnenah ka ti a. Duhsaka chuan a thlan te a hru a, a lu a buk si a, a pawr chhip chhep bawk si.


"Eng nge i tih ṭhin?", ka rilrua awm hmasa ber a ni tlat.


A thiltih ṭhin hriat ka duh.


Ka zawhna chhâng ta loin, "Fim khur rawh, u Chhuanpui; Manoi hi ring miah suh. I ṭhianpa hi chhanchhuah a ngai, Chawngkawrin a zial â mek a ni. Kan pahnih chauhin inbia ang", a ti zung zung.


"Siamtean exam a zo ṭep tawh, naktukah aw",


"Ni lo, tunah ngei hian", thinrim takin a ti ta mai.


Min tihhlauh ai mahin inbiak ka duh, Sammy-a nen an inbe tawh a, kan pahniha kan inbiak a ṭul ve.


"School kan thleng", Driver-in a lo ti a. Duhsaka chu ka inrin hma hmain a zuang thla tharh.


"Duhsak? Lalduhsak?", ka ko a, motor aṭangin ka chhuk ve thuai. A bibo rang kher mai. Ka hmu tawh lo.


Siamtea a lo lang veleh bawk nen, ka ngaihsak zui duh ta lo.


In kan thleng a, Siamtea a lut hmasa.


Driver hnenah, "Nichina kan mipa phurh kha i hmuh hunah lo hruai teh aw, ka be duh", ka ti a.


A bu ve nghat.


Exam kan zo bawk a, Siamtea a khi vur vur reng mai. Pawl sawnna tur exam ni mah se, kan lungngai lo.


Picnic an rawt reng mai bawk.


Office-ah ka kal ve a, "Sam, mut a hun tawh a nia",


"E, aw, ka lo kal", a ti a. Lo kal tumin a lang chuang lo.


"I lo mut dawnah va mangṭha theihnghilh suh ang che",


"Yes, of course!".


Sap ṭawng an hman tawh hi chuan, Alien emaw ka inti ṭhin.


Duhsaka nena kan inhmuh chungchang hrilh tumin ka inbuatsaih nasa mai. A chhan chu, Taiṭita leh Manoi inzui sawi a ṭul dawn.


Sawi lang loin a hrilh theih tho mai bawk.


Manoi chu Chawngkawr, Taiṭita chhan a ngai maw ni a? Hriatthiam a har mang e, Duhsakan dâwt a sawi nge ni dawn?


Taiṭita leh Manoi pawh ṭhen a tum te hi a ni mai ang em?


"Muhil ta che", tia ka biang a rawn tawk chu ka phu nasa lutuk. Ka rak deuh nghe nghe.


A thle bak a, "Eng nge i ngaihtuah vung vung a?", a lo muthla a, "Hrilh tur che ka nei a",


"Min lo nghak tihna maw?",


"Nghak e", ka tihniam raih a. Sawi turin min ti.


Taiṭita leh Manoi inzui pawh ka sawi ta nge nge, sawi lan loh chuan Thawnthu a buai dawn tlat.


Sammy chu a ngawi vung vung, "Dâwt a sawi i ring em?", zawhna ka zawh loh chuan a ngawi reng palh ang.


"I High School bialpa nen an inzui maw?", Taiṭita a sawina. A va han ngeiawm tak.


"Ngeiawm thiam hle mai", ka phun sep.


"A nih loh chuan buai chûng suh, an buai buaiin buai tir la; keini pawh kan buai em hi",


"Ka bialpa a nih i ring tak meuh em ni?", lung a awi thei lo.


High School bialpa tih kher, a thik tih ka hria; min deusawha ka hriat avang zawkin ka lungawilo.


"Nangmah hi ka ring zawk che. I nunah Achangtupa a lang ngai lo tih ka hria, chuvang chuan chet Changtupa ka tum hle", a kiai sak.


Sawi tur ka hre lo e a.


"I sual em mai aw", ka ti ringawt. A nui ruh ruh a, "An buaiin buaitir ang hmiang, inrawlh lo zawk teh ang", a ti a.


"Taiṭita kha ka High School bialpa a ni lo",


"Ka hria alawm, vawikhat mah ka sawi tawh lo ang", min fawp a. A sawi loh ka ring.


Sammy-an an buai buaia buai turin min ti a, Driver hnenah Duhsaka pawh thlithlai tawh lo turin min ti.


Kan chungah em em a thleng chuang lo.


Taiṭita nen kan inbe zeuh zeuh, an chanchin ni loin Beram Pathumte chanchin kan sawi ṭhin.


Zan khat chu, "Naktukah chhuahna tur ka nei", a ti a. Party Office-ah a nih ka ring hmiah.


"Naupang ho te nen", a tih takah, "Khawiah, ngati nge?", ka ti thuai.


"Doctor-in min lo bia a, Manoi rilru tihdam deuh nan",


"Eng nge awmzia?", ka ti leh ngat. A hmain ka lo hre daih tawh. Min kuahna ata ka tawlh hret.


"Doctor-in a khawhar tihziaawm deuh nan a fate bula hun reilote awm turin a ti alawm mawle",


"Lal Fanu a tel dawn em?", a bu nghat.


Ka mitah tak a en a, nelawm tak ni mah se; ka hnial ngam thlawt lo.


"In lo haw har ang em?",


"Haw har lo ang",


"A ṭha alawm", ka nui thei thlawt lo, a der pawhin.


A tukah, Tukṭhuan ei laiin a sawi ta a, Lal Fanu kaltir ka phal thlawt lo. Sammy-a ka hnial hreh si.


"Yess", Freddy-an a ti tawh mai sia.


Sammy-a chuan kamis vâr ṭha tak a ha a, a kiu thlang hlek thlengin kamis bân a thlep chho ve ve.


A bânrek veilamah sana dum tliang em em a bun bawk. Nawh mar ṭeng ṭawng kekawr dum hain, Smart shoe dum tle tak a bun a. Lu kawlh tih theih ni chiah si loin, a mawi tawk chauhin a kawlhin a buk bawk.


A insiam lai chu khum chungah ke kawkalha ṭhuin ka en reng.


Dik takin, ka luangliam chiang kher asin!


A upatnain a nih tur ang zaihin a lan chhuahtir zawk mahin ka hria. A tlangval lai thlalak ka hmu tawh, a tlangval lai aiin tunah hian a chhelo zawk daih.


Necktie dum lain a nghawngah a vet kual a, a suih a; fel taka awrhin, kamis vâr ṭha tak chungah waist-coat dum a han hak thuah a.


Ka mit tui a tla tawh, a nupui hlui hmu tura nalh taka a inthuam kher chuan thin a tirim.


"Chhuanpui Darling, kan ṭha em?", ka kun tlat. Min rawn pan a, ka hmaah a ṭhu hniam.


Ka khabe a chawi deuh a, "Lal Fanu hian thudik a hriat a hun tawh a ni", ka hmui a khûr dar dar.


"A la naupang em mai",


"Naupang tawh lo e a, midang hnen aṭanga a hriat aiin a ṭha zawk", ka ṭap chhuak chu min kuah vat.


"Midang hnen aṭanga a hriat aiin a ṭha, a hriat a hun tawh", ka phal thei thlawtlo.


"Sam, min hmangaih tiraw?", chelh ka duh.


Amah chauh ni lo, Beram Pathum te nen.


Manoin a lo khung bo daih ang tih ka hlau, "Chhuanpui, min chelh tum suh. Min ring lo em ni? Kan lo haw leh dawn alawm, ngaihngam takin lo awm rawh", inthlahna thu a ang ka ti.


Mit tui kar aṭangin ka en chho a, "Ka zeilo em atin ni, ka tilawm-", a kutin ka hmui a khar vat.


"Khatiang khan insit takin ṭawng suh, i hria maw?", a kut a la thla a, "Min ring la, ka rualin kal zel zawk rawh", ka hrethiam tehhrep lo.


"Min hmangaih tiraw?",


"Min ring em?",


"Min chhâng phawt rawh", ka ti kher kher a nia. "Min ring lo mah la, ka hmangaih che; ka thinlung zawng zawngin".


Ka theihna zawng zawngin ka kuah, Doctor ka ngei ṭum tak a ni ang.


Sammy-an, "Kal a hun hnai", a tih chuan, "Reilote tal", ka lo ti a. Min fawp a, theihtawp chhuahin ka fawp.


Ka thlah thut, "Sam, in mu dun ngai miah lo tih min hrilh teh, khawngaihin", tihngaihna hre lo zetin min en.


Kei aiin a zei dawn, Victoria Secret tih te kha, tunah chuan a dam ṭha leh tawh a; kan pahnihin engmah kan ti ngai si lo.


Tun hmain an lo mu dun lo a ni thei, vawiinah a lo thlêm ngat zawngin a insum thei lo ang tih ka hlau.


"Ka hmangaihna che hi, fiah tum lul suh",


"Min hriatchian em kha", tih bak ka sawi thei lo. An mu dun ngai lo tih chu ka hrechiang.


A ngaitê bawk, a insum theihna a hloh ang tih ka hlau a, vawiin chu ka ring zo ngang lo.


Keimah zawkin ka fawp, ka thlah thuai, "In tlai ang, kal tawh ula a ṭha", ka tho a. Pindan aṭangin ka chhuak, ka inhru nasa mai.


Naupang pindanah ka kal a, "In inpeih tawh maw?", an nalh lutuk ringawt.


"Anu, Noodles ka lo hawn ang aw", Lal Fanuin a ti var a. "Kimchi nen lo hawn rawh", ka ti a. A nui ver ver.


"Fel deuhin va awm r'u aw", ka ti a. An bu ve nghat nghat.


Lal Fanuin, "Anu, i kal ve loh chuan ka kal leh duh lo", a ti a. A khum chungah a lawn.


Ka ṭhutpui a, kal ngei ngei turin ka hrilh.


Freddy-an a lo sawi phur a, a duh leh mai.


Sammy-a a rawn lang, "Pa, kal vat vat ang u, kan haw hma dawn nia", Siamtean a ti a.


Freddy-an, "Nia, ka leng duh", a ti a. "Keipawh", Siamtean a ti veleh.


"A u, ka lo kal ve", Lal Fanuin a ti a.


Sammy-a chuan, "Tunah leng ula, sawmpahnih hmain lo haw r'u aw. Anu hoin kan kal ang a, Hotel-ah Zanriah kan ei dawn nia", a ti ta a.


Freddy-a lawm chu a zuang vak vak.


An inthlak zung zung a, an chhuak dial. "Fimkhur r'u aw", ka au zui a. Min hre chang tawh lo.


Siamtea a awm a, Lal Fanu ka ngaihtuah lutuk lo.


"Sam, engtizia nge?",


"Rilru hah reng renga ina i lo awm ka duh lo", ka lungchhia chu ka kuah ringawt.


Mit tui kar aṭangin ka en chho a, "Ka lawm e", ka ti ṭuau. Ka lawm em a ni. Kawngka a khar ṭha a, pindanah kan inzui lut.


"Naupang awm loh lai i chuh teh ang", a pheikhawk a phelh a, khumah bawkkhup zawngin min nem tlu.


Min bawh a, ka zak hnuai aṭangin ka kawr chhung a zen a, ka hnute a ṭham. Ka nghawng a fawp chap chap a.


Kan tih tur a hriat lutuk.


Min kuai zangthal a, "Zan nghak thleng thei loin min siam ta a nih hi", a khi suk.


"Chuti, zanah ni rawh se", tia thawh ka tum chu, "I cho chhuak tlat", ti pahin, ka dul thlang hretah min ṭhut a. Min ṭhut na chuang lo.


Waist-coat a phelh a, "Ka lo pui ang che", ka tho ṭhem.ṭhem.


Kum sawmthum chuang tawh mah ila, a chet Romantic theih viau. A hmui hnuai ka hne dawk dawk a, mak tiawm pawhin a lang lo.


Hmui insi reng chungin kan thawmhnaw hak kan inpelh tawn sak a, a nuam dangdai riau.


Mite chuan zan emaw zing kar emaw te an chuh ṭhin a, keini ve; naupang kan la tirbo zui.


A zahthlak eee...


Khum khata mu dun reng si a, kum tel teh meuh che dun kan ni lo bawk a, kan duhâm huam huam teh e.


"Chhuanpui, ka tina che em?", ka nghawng a nawr chap chap a, a hnungzâng ka chûl kual ruai.


"Tina lo, naupang an lo haw thut chuan a ṭha lo, hmanhmawh hlek teh ang", ka ti a.


Min pawmpui lo nasa mai, "Hmanhmawha thiltih chu a phel phual duh, nautê hmel a la famkim lo", a ti mai a nih kha.


Awihlo zetin ka melh hâ, "I hre ringawt em ni?",


"Experience chu sawi loh, kan expire ṭep chu a nih hi", ka nui hul hak. A âtthlak thei em mai.


"Inring leh tawh rawh", ka lu ka thing nar nar.


Ka inrin hma hmain ka chhungah a lut hrawih chu, ka rak ṭhat. "I timak em mai",


"Inring rawh ka tih kha",


"A tawpna ni tawh rawh se", ka ti chu, a duh lo ngang mai. Na zetin min fawp a, ka hmui hnuai a seh vak.


A bân bulah ka bêng hlak hlak a, min thlah duh lo. A che ṭan ta hrut hrut bawk nen.


Runluih nan tiin, ka rum khum sak sak a, a uar telh telh ta mai. Ka ngawi hmak tawh.


"I va ngawi ve",


"Duhtawk ang", a che a tawp duh lo. Na zet zetin min nawr ṭan ta mai a, "Ka kham thei mawlh lo che", chu a la ti ang zui a.


Min kham thei ngang lo a ni ang chu, a tawp duh bawk si lo a; ka rilru a hmanhmawh tawh bakah, naupang an lo haw thut ang tih hlauhna nen nawmna chu khawi lamah; a zo har lutuk chu ka ngei tawh.


A hnuah zawng, ka ṭanpui loh chuan kan rei dawna ka hriat avangin ka duhthawh ve ṭan ta a.


Ka rum khum khan a phura ka hriat avangin, zak duh map lovin ka rum khum sak sak.


A tihphur piahah, a nui suk suk a; duhthawh taka a chet bakah, a rum chhuak ve ta hial.


Keia zawk chu ka phur ta riau, tawk tih kan ngah thei ta meuh lo.


Inkhamlo tak chungin kan inthlah thei ta hram a, kan insil fai zawhah a insiam lai chu lungchim takin ka thlir leh ngawih ngawih.


"A uiawm", a tih avangin chhuata a paih a thawmhnaw chharin a inbel ṭha leh mawlh mawlh.


Ka hlauthawng tawh lo a, chu ai chuan; ka luangliam lutuk awm ngaihna hre lo chuan ka kut hmawr ka sik niah niah ringawt.


Lehkhabua Achangtupa a ni hawt alawm!


Ka ngaihtuahna a hria nimaw, necktie awrh pahin ka hmaah a ding a, lo kun hniama min hmachhawna innemkhalhin, "Achangtupa nge Misualpa ka nih le?", a ti a nih kha.


Ka meng kual ralh ralh, "Chhuanpui Darling, ka bia che a nia", a tizahthlak thei ee...


"Zawhna ka zawt che", a ti leh. Ka khabe a hmer a, fiah zetin mi en kal.


"Sawi rawh le",


"Mafia Hotupa", ka ti hlak. A nui ruh ruh a, ka hmuiah na zetin a fawp. Ka hmui A lian ang chu aw...


Ka insiam lai min thlir ve thung, mit lasawn lek loin min thlir a; ka lâi chu ka che ṭhelh nasa lutuk.


Naupang ho pawh an lo haw a, an insiam zung zung.


"Apa, Spicy Noodles leh Kimchi ei phal tawh la", Freddy-an a ti a. Sammy-an min lo en, "Ka sawitir a ni lo", ka ti sep.


Lal Fanu pawhin, "Nia, Apa", a ti a.


"Kal ang u, kan tlai palh ang", Sammy-an a ti daih.


Siamtean, "Sawmpahnih a ri tawh sia, thil ei phawt ang u", a ti chu, "Restaurant-ah kan chawl dawn alawm", Sammy-an a ti a.


Restaurant-ah a nih chuan a ṭhat chu.


Restaurant kan thleng a, motor aṭanga kan chhuk hmain, "In nuin Noodles leh Kimchi leina tur a hriat chuan in ei dawn nia", Sammy-an a ti a.


"Keima'n ka hria", Beram Pathumten an ti thuai.


Ka lamah a lo thle bak a, ka dar ka sân ak ringawt.


Taiṭita leh Manoi an lo awm, mak ka ti lem lo.


Kan vaiin hlim takin kan inkâwm ho a, Taiṭita nen kan inbiak ṭhat hlekin Sammy-an dawhkan hnuaiah ka mal a hmer vak zel.


A sual thiam a nia aw...


Restaurant-a awm reng thu awm suh, Park-ah te kan kal ho a, Lal Fanu leh kei chu Sammy-an min hauh tlat.


A bulah hlir min kaltir.


Zanriah ei hunin kan chhungkaw bil chauhin Hotel-ah kan ei ta a.


Haw kawngah Spicy Noodles leh Kimchi kan lei haw ṭeuh nghe nghe. Zanin aṭang chuan kan ei char char thei tawh.


A ruka ei a ngai tawh dawn lo, a rukin ti mah ila; a hre vek tho.


Chhungkuaa mut ho Sammy-an a rawt chu, "In sual e, khum thar ka nei te te a", Lal Fanuin a ti a. A duh bau lo.


"Nu leh Pa bulah Batman a mu ngai lo", pindan lai taka ding khawng atin Freddy-an a ti bawk.


Siamtea lahin, "Lehkhabu chhiar ka duh", a ti ve a.


Sammy-a chu a lungchhe deuhin ka hria.


"Ka hmangaih che", tia a fate a thlah hnuin a chhuak a.


An Pa a lungchhia tih reng an hre lo.


Ka mangṭha hnuin ka chhuahsan ve leh ta a. Sammy-a chu a inthlak mial mial. A hnung aṭangin ka kuah a, ka kut vawn(vuan) hnanin, la kangin a fawp vang vang.


Inherin a âwmah min kuah a, "Awm lo la chu, ka khua a har zual ngawt ang le. An puitling ṭhuau ta bawk si a, an tet lai ka ngai mang e", a ti thawp sup a.


An puitling zel ang a, tun ai hian kan khua a la har dawn chu a ni si a.


Chutia lungchhe taka a inngaihtuah tur duh loin, "Khawhar lohna tur kan siam zo ṭep, a hmel a famkim tawh a; kut leh ke kan la siam a ngai, lo kal teh", khumah ka tluk pui a.


A chungah ka bawk ran, "Pahnih siam ang hmiang", a ti chu ka phu nasa lutuk.


Thawh ka tum a, min man bet tlat, "Min va han ngaihtuah lo", lungawilo takin ka ti a.


"Pahnih em em enkawl turin ka inringtawk lo, ka taksa a chhe vek mai ang", ka ti deuh hluk a.


A nui ruh ruh, "Ka inringtawk thung alawm",


"A paitu tur i ni dawn lo a",


"Enkawltu tur che u ka ni a", a ti leh chu, ka thaw hap. Sual thiam lutuk hian a.


"Pahnih chu aw, tlaivar pawh ka inhuam", rem taka min muttirin min bawh a, min ngaihtuahna a nei lo reng reng.


Amah bawkin, "Pahnih chu aw", a ti leh. Ka chhâng buai ta vel peih lo.


Phur leh thatho takin ka chetpui a, Eduan Huanah mah Evi leh Adaman Chhia leh Ṭha hriatna an ei hmaa, saruaka an awm pawh an zak lo ang chiahin, kan nupaa saruaka kan awm chu kan zak lo.


Kan inzah tawn zawkin, chu kan saruakna chuan pumkhatah min siam zawk tlat atin ni.


"Chhuanpui Darling, ka tina che em?", thaw hluamin min zawt a, bedsheet ka ṭham khawr vek.


"Tun ṭum chu", ka ti a. A inla hrang thuai. Ka zâng hawkin ka hre mai.


Ka thaw huai huai, dim takin sensitive point a khawih kual a, ka dam sawng sawngin ka hre pek.


Ka bulah sir zawngin a kiuin a innemkhalh a, min hmu chiang lutuk. Ka chhip aṭanga ke ler thlengin min hmu vek.


Taksa chhuan tham nei mah suh i, lungawi tih hriata min khawih chu lung a chhe zawk.


Min khawihna kuta thisen zâm pawng chhuak ṭulh te chuan lûngphu te hi a chawlhtir ṭhelh a ni.


A taksa khauh taka ka mal a nawr leh deuh ka hmuh chuan, a zo ṭep ka chawlhtir tih ka hre thuai.


"Sam, ka inpeih", zawhna leh chhânna pawh awm loin min bawh nghal rawk rawk.


A muangchang tawh lo, ka chhungah a lut thuai a, a rum chhuak hawk.


Ka nghawng a chuktuah ran a, taksa insi chetin kan awm a, nghet takin a nghawngah ka kuah.


Min ngaichanglo lekin a hmatiam a hlen mial mial. A nghawngah ka kuah thei tawh lo, ka nghawng zawk hi a euin a eu. Ka lu chunga lukham ka ṭham nasa, inham tân(tâng) ka tum a ang zawk alawm.


"A rei tawh lo ang", ka beng bulah a phun sup a.
Ka phurpui thiam leh kan zo dawnin ka hre ta mai a, a hma zawng aiin ka intiphur thar sauh sauh.


Chuti chu, keia zawk tuai tharin ka awm leh ta hlauh a. Sammy-a nghawngah a tharin ka kuai a, kan nupaa ngawi hle hle thei ta lo chuan kan han ri awr awr a.


Sammy-a zawh(zo) hnu rei loah ka zo ve leh mai a, a lo mu thla a; kan thaw dun halh halh.


Inenin kan nui dun ta ker ker a, "Zan hlimawm leh âtthlak tak a ni", a ti chu, a hmuia fawp va zauhin ka nemnghet.


"Fuke kan siam kim ta ang chu maw?", a ti vawng vawng.


Ka nui sen sen ringawt tawh.


Insil zawha kan mu leh chu, "Hmar lunglien, ka hmangaih che", a ti dam dup a.


Ngaihthlak a va han nuam mai mai tak, "Sam, min nghak fan fan rawh aw; min hmangaih thu min hrilh ṭhin hi 'Ka hmangaih che' tiin, ka la hlan ve ngei ngei ang che", ka rilruin ka ti mawlh mawlh a.


Ka la hmangaih ve ngei ngei dawn alawm.
*****************
(Hun ngaiah)


Sammy-an ka kâ a tikau a, fiante min sehtir.


"Chhuanpui Darling, muangchangin aw", Sammy-a chu ka melh ṭawk.


Pangngai taka thâwk tumin ka insangmar a, ka ṭang ṭung mai. Sammy-a mitmeng leh hmel hahdamthlak tak te chuan min tithawl ka ti mai.


Ka pangngai leh viau tawh. Hmui hnuai erawh, damdawi hnawih a ngai leh dawn.


Siamtean tui min lak a, Freddy-an tuilum. Rawmawl vâr thianghlim takin ka hmui hnuai chu Sammy-an a hru fai a.


Ṭhutthleng hnung nghengin, ṭhutthleng tlângah ka lu ka nghat a, Sammy-a ka thlêk ngawih ngawih.


Ka tibuai nasa hle a ni.


"Siam, i nu hi tui intir rawh le", a ti a. Min ṭhut ngiltir deuhin, Siamtean ka hmuiah Straw a lo tawk.


Ka dang a ro bawk a, ka in ṭeuh nghe nghe.


"Tv in off elo? Hlimpuia kha", harsa fe hian ka ti a. "A thiam lo em mai, ka en peih lo. Live aiin highlight en ila a hlawk zawk daih, u Hlimpuia inkhel en aiin hmeichhe.insual en ka thlang daih", Freddy-an a ti nuah nuah.


Siamtean, "Hmeichhe insual a lem lem nen, u Hlimpuia inkhel en a thlanawm zawk fe", a ti vah thung.


Freddy-an, "Hmeichhe insual i la hmuh loh avangin khatin i sawi a nih kha, an School pawnfen an han inhlim.chhohsak mai te chu eee", phur fahranin a han ti a.


"Lallawmawm", Sammy-an a ti vat.


A hau dawn emaw tih laiin, "Pafa titi thuruk sawi chhuah loh tur", a ti daih.


Sammy-a chu ka melh ralh, nui sukin min nuih a, "Ka fiamthu a nih kha", a pha a. Ka awih lo.


"Pa, i fiamthu loh kha", Freddy-an a lo ti thuai. Anni pafa hi chhui chian an ngai.


Siamtean, "In hui pafa ka ti, in zak thei lo lutuk", a ti a. Sammy-a leh Freddy-a te ngaihdan ni lo lutukin Siamtea an en kal.chuan ka nuih a tiza a.


Ka nui chhuak ta huah huah.


"Nu, i nui a nia", mak ti zetin Freddy-an a ti a.


Siamtean a tukkhuma hma lama bu lawp khawpa bêng hlakin, "Khati tehvaka mak tih a ngai lo, âng phuau lehnghal a; Khauchher thawveng lam zaw zaw i ang lutuk", a ti nuah nuah a.


A ai nasain ka nui huah huah.


An pafa hoa min tihhlim nana ṭan an lak nasat zia ka hria, zanin hian an hlawhtling ta!