Perfect (Chapter-6)

[Rebec Nunziri]

Chapter-6



Lalchhandami POV




In kan thleng a, ka chhungte chuan chanchin min lo zawt vat, Tlanchhuahi chu room ah a awm thung, ka chhungte bulah thil awmdan vel ka sawi chuan an thinrim khawp mai. Tlanchhuahi chu room atang a rawn chhuak a, hun a kal zel avangin police station lamah kal chu kan tum ta a, U Zonuna pawhin min la zui ve zel, thil thlen dan chu police officer hnen ah ka sawi a, min lo lak serious sak hle, a rang lamin Pi Nghaki te inah chuan an va kal ta a, police station ah kan lo nghak thung, Tlanchhuahi chuan a unaupa hrawn hmuh chu a hlau in a hreh hle a, kan la haw thei bawk silo nen ka khawngaih viau. An rawn let hnuah Mama chu an khung hrang nghal a, Pi Nghaki leh a fanu te chuan Tlanchhuahi an hmuh chuan rum zetin an en a, Tlanchhuahi thung chuan en pawh a en let ngamlo.




"Laltlanchhuah engvangin nge i unaupa chu dawt a i puh?" a nuhrawn chuan thinrim takin a ti a, Tlanchhuahi chuan ka kut ah nghet takin a vuan a, Pi Nghaki chu en pawh a en let ngamlo, "Kan en liam mai mai che a, ka u hi nangmah zawk hian tenawm tak tak in i ti fo, mahse chuti chung chuan kan ngawi a, hetiang hian engtinge i tih theih zawk, kan enkawl na zawng zawng che min rulh let dan chu heihi maw?" a unaunu hrawn pawh chuan a ti ve tuar a, "Hetah buaina siam suh u, chuan thudik chu kan hria, chuvang chuan huai sar takin in che theilo" police officer chuan a ti nghut a. "Dawt kan sawi hleinem, a ni hian ka u hi tenawm tak tak in a chhaih a, mahse chuti chung chuan chhungkaw mualpho aiin tiin kan ngawi liam a, Laltlanchhuah kan ngawi mai mai tawh dawn biklo tih hria ang che" A u bawk chuan a ti leh tawn tawn a.




"In duh duh chu ti rawh u, Tlanchhuahi hian dawt a sawi lo tih kan hria, i unaupa sawn a thiltih sual man chu a hmu dawn khawp" U Mami chuan a ti hlak a, "Lo ngawi rawh, mi hrang i nihkha, kan chhungkaw buai naah hian rawn in rawlh turin eng dikna mah I neilo" Pi Nghaki chuan a ti that a, "Kan ngawih nachhan tur kan hrelo, chuan chhungkua tih kha sawi chhen suh, nangni hian Tlanchhuahi hi in fanu leh in unaunu angin in en ngai reng reng em ni, in en ngailo, ni lawm ni, chuchu keini aiin in hrechiang zawk, chuvang chuan chhungkua kha chu sawi ri ve tawh suh u, chuan heihi hre bawk ula, in in saw Tlanchhuahi pa khan a boral hma in Tlanchhuahi hming in a dah tih in hriat ka ring, chuvang chauh a la hnawt chhuak lo in ni a ni lawm ni, a zirna senso te pawh amah a in tum turin in ti a, tleirawl chhuak tir mai a la nih avangin engmah a la hrethiam lo pawh a ni mahna, mahse a pa khan a tan thil tamtak a dah a, a pa boral hnua a pawisa hmuh tur ang pawh nangni hian in laksak vek tih kan hria, chumi avang pawh chuan nangni pawh hi khin theih in ni bawk" ka pa chuan a ti nghet charh a.




Pi Nghaki leh a fanu chuan chutiang thleng thleng kan hriat an ring lo a nia nge, ka pa thusawi avang chuan an meng kawk a, Tlanchhuahi hnenah an zep a, a hminga pawisa a pa in a dah zawng zawng kha a nuhrawn leh a fate hian an laksak vek a ni, chuti chung chuan amah in a zirna senso tum turin an la ti ngam a nia. "Tikhan in duh chuan in haw thei tawh ang, Lalduhsanga chu kan la kawl anga, thu te kan zawh fiah hnuah a in puang duh lo a nihchuan court hial thlen a ngai maithei, chuti nilo a tha taka a in puang a nihchuan a vanneih thlak a nimai, court thlen pawh ngai mahse finfiah na a tha tawk a, a phu tawk hremna chu a hmu dawn tho tho tih ka tiam a che u" Police officer chuan a ti a, thla a muang sawt mai station atanga kan chhuah dawn chuan Pi Nghaki chuan Tlanchhuahi banah a rawn man a, "I FIR thehluh hi la let ang che, chutiang a I tihloh chuan enge I chungah ka tih theih chu i hriat kha" a ti kha fak a.




"Pi Lalramnghak, man i duh loh chuan hmeichhe naupang hnaih ah khan awm tawh suh ang che, chuan ka hriat lai ngeiin i vo ngam bawk a, Mami engtia tih nge i duh, man turin min duh chuan kan man nghal thei a nia" police pa chuan Tlanchhuahi chu a en a, "A ngailo ang" a ti sep, "Awle, chuan Pi Ramnghak ka thusawi kha hre reng ang che, khatianga I che leh a nihchuan ka man tawh ang che, chuvang chuan fimkhur hle ang che" Police chuan a ti charh a, a kalsawn zui nghal. Pi Nghaki chu a tawng tawh lo hrim hrim, man a hlau viau pawh a ni mahna, kan let leh lamah te chuan Tlanchhuahi chu a tawng lo hrim hrim, U Zonuna car ah kan chuang a, ka nute leh U Mami te chu ka pa car ah an chuang thung, restaurant zawnah chuan a ding a, ka lo en haw, "Thil ei lawk ang u hmiang, riltam a hun viau tawh a nia, ka treat ang che u" a tihchuan ka hnial duh ta biklo, Tlanchhuahi pawh a riltam tawh viau ang.




Restaurant chhungah chuan kan lut a, Tlanchhuahi ei duh ang chu ka en pui a, eitur kan order hnuah kan ngawi thap mai, sawi tur ka hre hlawl lo a ni, "Tlanchhuah nuam I ti em?" U Zonuna chuan Tlanchhuahi chu a bia a, "Aw.. nuam ti e, ka la kal ngai miah lo" nui seih chungin a ti a, "Helai hmunah hian eitur an siam tui thei lutuk, tam deuh I ei dawn nia" U Zonuna pawh chuan tha deuhin a lo ti ve a, eitur a rawn thleng chuan kan ei nghal mawlh mawlh, kan ril a lo tam tawh ngang hlawm a nia nge. Tlanchhuahi pawh chuan a eitur chah ang chu a ei zo vek, kan thutna atang thawh kan tum chiah chu hmeichhe aw hian U Zonuna a rawn ko a, Kimkimi kha a lo ni, "Enge hetah te i tih a, oh.. nangni chu" tih pahin nelawm lem loh takin Tlanchhuahi nen chuan min en dun a.




"Duhtak, vawin chu I buai tur thu I sawi bawk sia, hnaah pawh i lo kal silo a" Kimkimi chuan U Zonuna en pah chuan a ti sep a, "Ka buai alawm, chuan enge hetah i tih, hnathawh hunlai a ni lawm ni?" a ti nghut a, an thawk dun a ni ngei ang, "Mi hmuh tur ka nei a, kan in hmu zo chiah a nihhi, I hman chuan min thlah nghal la, motor ka keng silo a" a ti leh a, U Zonuna chuan min rawn en a, ka lo en let ve ran. A tawng chhuak dawn chiah tihchuan "Va thlah rawh, keini chu taxi pawhin kan haw thei tawh tho a, kan tibuai tawh che alawm" ka lo tih khalh a, a lungawi loh hmel hle, "A ngailo, kan haw ho dawn nia, Kimkimi hi kan thlah phawt anga kan haw tlang nghal dawn nia" hnial ka tum zet na in a hmel ka en chu ka ngawi leh ta zawk.




Pawn ah chuan kan chhuak ho a, Kimkimi chu a hmaah thut loh hlau niawm fahran in rang lutukin car kawngkhar a hawng a, ka nuih a ti za zawk, a hmaah thut tumna ka neilo hrim hrim, ngawi rengin Tlanchhuahi nen chuan a hnungah kan thu a, U Zonuna chuan darthlalang atangin min rawn en leh zeuh thin tih ka hmu ru reng bawk. Kimkimi chu a tawng siam siam a, U Zonuna chuan chhan pawh a chhang lo, "Duhtak, engtinnge hemi te nen hian in in hriat a?" hnunglam chu a rawn melh zeuh a, kan awm ve tih hre lo niawm fahran in a ti a, ka ner sawk, "Kan tet te atangin kan in thenawm thin alawm, U angin ka en a" ka lo ti nghal a, "A nihchu, keihi Lalrinkimi ka nia, Kimkim tiin min ko mai thin, chuan nangchu Chhantei I ni tih ka hria, midang ka atangin, Zonuna bialnu ka ni e" a ti nghal zung zung a, U Zonuna chu a lo rum nghut, engmah a sawi chuanglo, U Zonuna bialnu a ni tih ka hrelo ang tih hlau awm fahran a a sawi nghal zung zung chu ka nuih a ti za letling zawk.




"A nihchu" ka ti ringawt, an hnathawh na hmun thleng kan thlah hnuah kan let lehnghal, Kimkimi chhuah dawn a a thusawi kha ka ngaihtuah let vang vang bawk, "Ka chhungte an awmlo tih i hriat kha, zanah i rawn kal ngei ka beisei" a ti a nihkha, engpawh nise enge ka lo buai na tur awm, an duh duh ang chuan lo awm mai mai teh se, in kan thleng a, kawngkhar chu hawngin ka chhuak nghal, Tlanchhuahi pawh chu a rawn chhuak ve nghal thuai a, "Kan lawm lutuk a nia aw" ka ti a, min en run ringawt, engmah a sawi tak lovah chuan kan in lam chu kan pan ta daih a, a motor ri ka hriat loh vang chuan a la tlan chhuak lo tih ka hre thei mai. Inchhung kan lut a, kan chhungte chuan in an lo thleng daih tawh, "Mate, in lo va haw har ve, kal kawi na in nei em ni?" ka nu chuan a lo ti vat a, "Aw.. thil kan ei kawi leh lawk a, chuvang mawle, nu kan chau deuh a Tlanchhuahi nen hian kan mu hahdam dawn a nia aw" ka tih hnuah room ah kan chho a.




"Miss, engtinge ka awm zel ang le chhungte tumah ka nei tawh silo a, keimah chauh in saw kan inah sawn ka awm duh bawk silo, ka awm ngamlo tihna lam nilo in lo awm pawh ni ila ka nuhrawn hian min rawn ti buai reng dawn tih ka hria a ni" Tlanchhuahi chuan rilru buai hmel zetin a ti a, "Tlanchhuah lungngai mah ta che, i duh phawt chuan hetah kan bulah i awm reng thei dawn alawm" ka ti a, engmah a sawi tawh lo, a hmelah chuan thil tamtak a ngaihtuah tih ka hre mai, engpawh nise a mah chiah a awm tir chu ka tum lo nasa, nizanah a hriat lovin ka nute nen kan titi a, a duh phawt chuan kan bulah awm tir turin thu kan ti tlu vek tawh. Mahse a duhthlan na a ni tawh thung ang. Tlai chaw ei hma deuh chuan kan tho chhuak ve ta chauh inhnuai ah kan chhuk a, ka nu leh U Mami ten rawng an lo bawl zo vek tawh.




"Chaw eikham ah hian kan in be ho lawk dawn nia aw" ka pa chuan chaw ei laiin a ti a, chaw kan ei kham chuan kan che zung zung, sitting room lamah kan thu thap a, "Tlai ah khan Officer Thana'n min rawn bia a, Lalduhsanga chu a in puang duh lo a ni awm e, court hial kan thlen a ngaih hmel a, Tlante enge i ngaih dan ni le?" Tlanchhuahi chu kan en thap a, "Ih.. ka chunga a thiltih man a hmuh na tur a nih phawt chuan court hial thlen ngai mahse ka hnung tawlh theilo" a ti sep, ka pawm zawng tak a ni. "A tha alawm, i ngaihdan ka ngai pawimawh ber a nang berin i hnial loh chuan hma kan la zel dawn nia, a phu tawk hremna chu a hmu em em ang, chuan thil pakhat leh, keini chuan kan bulah cheng zel la kan ti a, fanu pakhat nilo pahnih chiah kan nei a, Mami pawh hi kan fanu ang chiah in kan en bawk, nanghi kan fanu atan kan duh che, i hnial lo a nihchuan" Tlanchhuahi chu a mittui a tling pam a.




"Le le.. tap suh le han sawi la, kna fanu nihchu i duh em?" ka pa chuan nui sang in a ti leh a, "Aw... ka duh" hnuk ulh teuh in a ti chhuak a, ka nu chu rawn kal hnai in Tlanchhuahi chu a rawn kuah vang vang, "Tunah chuan fanu ka neih belh leh ta" a ti a, a mittui a tlang ve pam bawk, chutia ka nu leh Tlanchhuahi te an in kuah lai chuan doorbell a rawn ri a, U Mami chu a tho chhuak vat, "Zonuna chu lo lut rawh" a ti ri chu ka hre ruai hman. U Zonuna leh U Mami chu an rawn lut a, "Ee.. Zonun I lo kal a nimaw, lo thu rawh, i chungah pawh hian kan lawm takzet ani, nang awm lo la chuan kan buai hle ang" ka pa chuan a ti leh zung zung a, keipawh ka ngaihdan chiah a ni, "Engmah tih ka nei hleinem, kha Tlanchhuahi leh Nu Muani chu in tap em ni?" a ti sup a, "Aaa.. fanu thar ka nei a, ka hlim em a ni" ka nu chuan nui hak hak chungin a lo ti a, "Thingpui ka va lum ange" tih paha U Mami thawh a tum chu "Keiman ka lo lum ang, tikhan lo thu mai mai zawk rawh" tih pahin ka tho chhuak a.




Thingpui ka siam lai te chuan U Zonuna ringawt ka rilru ah a awm, engvanga heta lo kal nge maw a nih le, Kimkimi te inah a kal dawn lo nge, aa.. ngaihtuah tawh lo teh ang, thingpui ka siam zawh chuan ka chawi chhuak nghal, thingpui kan in ho a, kan nui leh dar dar thin, Tlanchhuahi pawh a hlim hmel takzet, a taksa a hliam a neih te a la dam chiang lo a, school pawh a luh tlai a ngaih hmel, amah a tuar chhel em a, na neilo ang maiin a awm a, mahse a dam chiang hma chu school kal ka phal lo. Thingpui kan in zo a, no vel ka seng leh vek, no ka sil zawh hnuah choka atang ka chhuak a, doorbell a rawn rik leh vangin kawngka lam chu ka pan a, ka hawn chuan Christ-a a lo ni a, "Eee.. nang emaw, lo lut rawh" nui var var chungin ka ti a, ka in hmuh lohna a rei ve tawh hle, a nau te exam zawh khan Delhi lamah an zin daih a, phone hmangin kan in be zeuh zeuh ringawt thin.




"Nu.. hei Christ-a a lo leng a" sitting room ah chuan kan in zui phei a, ka chhungte chuan an hre tawh bawk a, an lo be nghal vat, "Thingpui kan in zo chiah a i duh ve em, ka va siam ang che aw" ka tihchuan min lo hnial vat a, "Ka puar lutuk, ka in lo zawk mai ange" a ti sup, Christ-a chu a leng ve ta char char a, U Zonuna pawh a la haw bik chuanglo, ka nu te an mut hnuah pawh U Mami chu a la mi ve lo a, Tlanchhuahi pawh ka bulah a la thu ve reng bawk. U Mami hia Christ-a hi min duh pui hle a, ka bulah pawh a sawi fo, mahse ngaihzawng angin ka en lo hrim hrim thung, Christ-a pawh in thian ang bakin min en bik lo tih ka hria, Tlanchhuahi chu a ham leh bai bai thin a, a mut a chhuak tawh a ni maithei, "Tlan lo han mu la, nakinah ka rawn chho ve ang" ka tihchuan min hnial biklo.




U Mami chu a la awm ve char char thung, "Ka kal ange, hnathawh tur ka la nei a, Bawihte, kan in be lawk dawn em ni?" U Zonuna chuan a ti sup a, min koh dan chu ka duh lo hle, mahse engmah ka sawi buai lo, "Ka lo let leh vat ang" tih pahin ka thutna atang chuan ka tho chhuak a, U Mami pawh chuan min en deuh haw mai, U Zonuna min koh dan kha kan in ngaihzawn laia min koh dan tih a hriat vang te pawh a ni mahna. Pawn ah chuan kan chhuak a, "Khapa nen khan eng in zawmna nge in neih?" pangai takin min zawt a, "Ka thian a nihkha" ka ti sep, a mitmengah chuan eng emaw ka hriatthiam siloh ka hmu, "A tha a nihchu, engpawh nise ka kal phawt mai ang, kalna tur dang ka la nei a, ka hman hunah ka rawn la leng leh dawn a nia" a ti sup a, ka lo bu zeuh, khawiah nge a kal dawn tih ka hrechiang lutuk tlat, ka thin a thip vawng vawng a, a hriat erawh ka hlau viau thung.




Engmah sawi tawh lem lovin inchhungah chuan ka lut a, sitting room ah ka lut a, U Mami'n min hmu chiah chu a rawn tho chhuak deuh hluai a, "Ka mu tawh mai ang, ka awm ve reng chuan hnawk min ti lutuk palh ang, Christ la leng ve reng rawh aw" U Mami in la zei thei lutuk hi a chang chuan ka ngei thin, Christ-a nen kan inkar ah engmah a awm lo tih ka sawi chiang reng tawh sia. U Mami chhoh hnuah chuan Christ-a nen chiah kan awm tawh, sawi mai tur ka hriat loh avang chuan ka ngawi vang vang ringawt a, "School luh hun tur i phur tawh viau lo maw?" a ti ta hlauh a, "Phur tawh lutuk, naupang ho pawh ka ngai tawh" ka ti a, "Ka nau pawh naktuk ah a rawn haw dawn a, school luh a chak tawh khawp mai" a ti sup a, an lo haw rual turah ka ngai ringawt a.




"In lo haw rual lo maw?" ka ti sep, "Aw.. haw rual lo, naktukah a rawn haw dawn chauh a, exam naah a tih that loh thu a sawi nasa mai si a, a result hriat a chakawm tawh khawp mai" a nui suk a, "A fail bik em lovang, lungngai suh se" ka nui hak a, a result ka hriat chuan tawh vang a ni. "Chhanchhan sawi duh ka nei a" Christ-a chuan thutak deuh zawk in a rawn ti a, ka en nghal vat, a zam hmel em em lehnghal, "Sawi la" hre chak fe chuan ka lo ti a, a thaw chhuak leh hawlh phawt a, ka lo ngaichang ran, "Ih englo, aaa" a ti vang vang a, enge maw dawi a tum le, "Ka ngaithla che" a zam hmel em avang chuan ka lo fiam zeuh a, "Nakinah a nimai, ka la in peih lo" naupang chhia deuh chuan a ti a, ka lo nui hak hak, "Beng ti vir tawk lek in I sawi a" ka ti a, hriat chak awm tawk lek in a sawi tak tak a lawm.




"Nakinah ka la hrilh ang che, tunah chuan ka la in peih lo deuh a ni" a ti leh sup a, a ding chhuak nghal zat bawk, "Ka haw tawh mai ange, a tlai tawh bawk si a" a tih takah chuan ka ding chhuak ve vat, Christ-a tlan liam hnuah chuan inchung lamah mu turin ka chho ve nghal. U Mami room ka kal pel dawn chiah tihchuan U Mami chu a rawn chhuak hlawl a, "Mate, in be lawk ang hmiang" a tih takah chuan a room ah kan in zui lut a, khumah kan thut hnuah "Zawh chi che a ni em chu ka hrelo a, mahse Zonuna nen hian in inkar ah thil awm a awm em?" a zawhna min zawh chu ka beisei loh lam daih a ni, "Awm lo ve, i hriat chian kha" ka ti sep, a bu zeuh a, "Ni e, mahse tunlai tak chu kan in lamah a rawn kal ngun bawk si a, chuvang mawle" a ti leh a.




"Tlanchhuahi vangte pawh a ni ang, kei nen chuan kan inkar ah engmah a awm tawh lo, i hriat angin Tlanchhuahi harsatna tawh ah khan min pui nasa em em a, chuvang chuan ka tan pawh lo biak chhiat chiam kha a mawilo a, a chungah ka lawm hle bawk, amah chu awmlo se Tlanchhuahi te ina ka kal khan enge ka tih ber ang tih pawh ka hrelo, chuvang chauh a be tha chu ka nia, kan inkar ah engmah a awmlo tak tak a nia" ka ti leh zung zung a. Min en chik hle, "Ka hrethiam e, chuan Christ-a hi enge i ngaihdan?" a ti leh ta daih a, ka lo ner nang, "Engti zawngin maw?" ka hrelo der a ni, ka darah chuan a rawn beng a, "Hrelo der suh, Christ-a hi ka hriatna la reilo viau mahse ka mipa rin zawng tak a ni, a felin a tawng duh bawk a, I tan a ni aia tha hi an awm dawn lo, chuvang chuan chhuah reng reng suh" beidawng zetin U Mami chu ka en a.




"Naa.. U Mam I ngaihtuah na kha kal thui tir vak teh suh, Christ-a nen chuan thian bak kan nilo, kan inkar ah engmah a awmlo ka tih tawh kha" ka ti hlak a, a nui hak hak, "Ka hria alawm, mahse Christ-an a en dan che hi ka hai hleinem, a duh che tih chiang takin ka sawi thei" in la hre fe hian a ti leh a, lu ka thing nak nak ringawt. A ngaihtuah na ang hi kan inkar ah a awm ngai dawn lo, "U Mam engpawh nise mu rawh, i ngaihtuah na kha a buai a nihkha, Christ-a chu ka thian a ni a, chutiang bak chuan ka en lo bawk" ka ti leh ringawt, "Hma hun engmah a sawi theih loh a nia, Pathian in i tan a a ruat pawh a ni thei" a ti leh hram, chhan pawh ka chhang peih tawh lo, khum atang tho in U Mami room atang ka chhuak a, a nui hak hak ri chu ka hre reng tho.




Ka room ah ka luh chuan Tlanchhuahi muhil chu ka hmu a, ka nui seih, bathroom ah ka lut tlang nghal. Tlanchhuahi bulah chuan ka mu a, ka mit ka chhing nghal hmak bawk mahse ka mitthla a thil lo lang avang chuan ka meng chhuak leh rang ngei mai, U Zonuna leh Kimkimi awmdun lai tur chu ka mitthla a, ka na nghal vawng vawng mai, kan inkar ah engmah a awm tawh lo chungin engvanga la ngaihtuah reng nge maw ka nih le, a ni te chuan hmeichhe dang a nei daih tawh, chuvang chuan ka ngaihtuah na atang ka nawh reh vat a ngai, tuna a hmeichhe kawp mek hi kum 5 kal ta a na taka min siam nachhan hmeichhia ngei kha a ni a, amah vangin min ti na a chuvang chuan tunah hian amah aia kei min thlan nachhan tur ka hrelo, chuvang chuan ka ngaihtuahna a ta U Zonuna hi ka dah bo vat a ngai a ni, a hlat thei ang ber ah awm ila a tha ber ang, a chhan chu a hma anga nat leh kha ka zuam tawh lo.




Ka harh chuan keimah chiah in ka lo mu tawh, Tlanchhuahi chu a tho tawh a ni ngei ang, ham bai bai chungin ka thu chhuak a, nizan ka meng rei deuh bawk nen ka la meng tha hleithei meuh lo chu a ni, bathroom ah ka lut a, tui vawt a ka hmai ka phih hnu chuan ka harh deuh kawk mai, ka inthlak hnuah inhnuai ah ka chhuk a, choka ah ka luh chuan Tlanchhuahi chu ka nu leh U Mami te nen rawng an lo bawl ho a, nuam an tih hmel hle, "Good morning u" ka ti a, chair ah chuan ka thu thla nghal zat bawk. Tlanchhuahi kan in a a awm atanga a nui nasat tum ber a la ni hial ang, dawhkan ah chuan ka thingpui in tur a rawn dah a, lawmthu ka lo sawi sap. Thingpui ka in zawh hnu chuan tihtur tul ang ang chu ka tihpui a, "In va hlim awm dar dar hlawm ve" kan lo nui hak hak lai chuan ka pa chu choka ah a rawn lut ve a.




"Chaw ei kan peih tep a nia, vawin chu I pa nen hian chhuah na tur kan nei a, inah in pathum in in lo awm mai dawn nia, kan lo haw har deuh maithei aw" ka nu chuan a ti leh a, chaw kan ei kham hnuah ka nute chu chhuak turin an in siam a, inah kan awm dawn ta ro ro bawk a, movie en kan tum a, hmani deuh a an tih chhuah thlahrang film chu kan en dawn a ni, keimah chiah a ka awm chuan ka en ngam lo, mahse vawin chu U Mami leh Tlanchhuahi an awm ve dawn bawk a, ka en ngam khawp mai. Ka nute an chhuah hnuah in kan tifel a, kan zo rang khawp mai, mahse kan la en mai theilo, Tlanchhuahi room turin room awl chu kan tifai leh dawn a ni, a zim ber a, mahse chutiang lutuk a zim a ni lo, U Mami hian a khat tawkin a tifai reng thin a, a bal lutuk hran lo, mut bu thar te kan phah a, thawmhnaw bawm ah a thawmhnaw te kan dah luh leh hnuah kan zo nimai.




Inhnuai ah kan chhuk a, kawngka kan kalh a, parda kan zar vek bawk, kan in chu a thim deuh ruih a, Netflix atang movie chu kan en tan ta a, a tirah chuan kan hlau em em lo, mahse a rei telh telh a, kan phu leh zawk thin, uluk em em a kan en lai chuan screen ah hmel rapawm zet a rawn lang ta thut mai a, kan au tuar hlawm mai, a hnuah kan nui leh hak hak a, U Mami chuan kei ai mahin a hlauh hmel zawk. A tawp tep tawh, en zawh law law ka duh vangin chet sawn pawh kan che sawn lo, chutih lai tak chuan doorbell a rawn ti thut a, kan phu leh dawrh hlawm mai, U Mami chu chet pawh a che sawn ngam lo, kei ai mahin a dawih daih zawk, nui hak hak chungin ka tho chhuak a, kawngka lam chu ka pan a, ka hawn chuan U Zonuna ka hmu hlawl, tun ang ah enge rawn tih a tum ni, inchhungah chuan a rawn lut a, a hawi kual a, mak tih hmel zetin min rawn en leh a, a awm lo hran lo, kan lo in khar thap a, a thim deuh ruih bawk nen a ngaihdan awm ang tur chu ka hrethiam mai.




"Tinge chhun chhun ah in va in khar thim thep thup ve?" a ti ta reng a, "U Mami te nen movie kan en a, lo kal rawh, sitting room lamah an awm" ka ti a, sitting room ah chuan kan in zui phei a, "Eh.. Zonuna chu hnaah I kal nange?" U Mami pawh chuan U Zonuna a hmu chu mak a tih hmel khawp mai, "Kal e, ka rawn bang hma deuh a nihhi" ti supin couch ah chuan a thu thla a, "Thlahrang film kan lo en a, en ve nghal rawh, nang I awm bawk a, tlem in kan hlauh pawh a zia deuh ang" U Mami vek chuan a ti leh a, U Zonuna chuan ho a ti hmel em em lehnghal. Kan en laklawh em avang chuan ka thutna ngaiah thu thla in kan en zawm lehnghal, "Lalpa" tih pahin ka che hrut a, ka thutna atangin ka tla thla nawlh mai, ka mawng chu ka sawh deuh chawrh lehnghal a na lutuk ringawt, an lo nui hak hak hlawm a, ka nuih pawh a za ve lo e.




Tum bur chungin ka tho chhuak a, ka mawng chu ka tuai neuh neuh bawk, "Nui thu lo khan thu tha rawh u" ti hlar chungin ka thutna ngai bawk ah chuan ka thu leh a, an la nui thu hlawm mai, enge khatiang teh fa ko a chiang khan hmel rapawm lutuk kha an rawn tih lan ni, mawl lutuk mai, tumah pawh en tawh lo chuan screen chu ka en ngar a, tumah ka be peih lo, ka phu leh zawk thin, ka thutna atang tlak leh ka hlauh em avang chuan ka in vuan bet tung bawk a. Movie a tawp chuan ka thaw deuh huai mai, "A va hmuhnawm ve, Matei mawng sawh dawp in chhuat ah a tla thla bawk a, a hlawk thlak viau e" U Mami kher kher chu, "Thil ei ang u, ka ril a tam" ka ti hmak a, ka thut na atang chuan ka ding chhuak a, ka ner deuh sak mai, ka mawng chu ka sawh na reuh hle mai, choka lam pan a ka kal tur chu U Zonuna ka va melh zeuh a, hmuhnawm tih hmel zetin min lo en reng chu niin.




Choka ah chuan ka lut a, noodles chu ka la chhuak nghal zat bawk, an pathum chuan an rawn lut ve a, "U Mam soup lo siam la" ka ti a, soup kher kher hi chu U Mami tluk a siam tui tu an awmlo ka ti ve tlat, ka ngaihdan a nihchu. Noodles chu ka chhum a, U Zonuna leh Tlanchhuahi chu dining chair ah an thu dun a, an in be sap sap a, an tawng zawih em avangin enge an sawi erawh ka hrelo thung. Ka thil chhum lai chu ka hnim vang vang a, a rimtui lutuk ringawt, a hmin hnuah gas ka off a, U Mami pawh chuan soup a lo siam zo ve chiah bawk, soup a awm tho avangin thingpui erawh kan lum lo thung, kan ril a tam tlang a ni ngei ang, tawng miah lovin kan ei nghal mial mial hlawm a, U Zonuna pawn a ei hnem ve hle bawk, kan ei zawh chuan ka puar lutuk a, ka zawi hnawk thei.




U Mami leh Tlanchhuahi chu an che mawlh mawlh a, puih duh hle mahila ka zawi lutuk a, ka che peih thlawt lo a ni, "I va puar awm ve" U Zonuna chu ka bulah a rawn thu a, "Puar tak ka ni, ka ei hnem em alawm" ka pum pawh a puar awk thei alawm, ka pum chu ka chul hauh hauh a, a nui suk. Sitting room lamah kan lo va kal a, ka bul hnai te ah chuan a thu a, nuam ka ti chiah lo, a bul hnai a ka awm hian ka danglam hneh mah mah a ni. Ka tawlh sawn deuh a, "Hnaah in buai lo a mi, I va bang hma ve" ka ti sep a, "Tunlai chu kan buai loh lai tak a ni" a ti tha ve mai, sawi tur a vang leh tawh khawp mai, U Mami te pawh chu an va han rei reng reng ve mawle. Ngawi rengin kan thu dun ringawt, "Mate, Tlanchhuahi nen hian dawr ah kan va kal lawk ang aw, kan reilo ang, thil lei tur ka nei a" U Mami te an rawn chhuah chuan a ti nghal a, "Ka lo kal ve dawn ami?" U Zonuna nen chiah awm ka duh lo tih a hre ve awm reng sia.




"A ngailo, kan rei lovang, Tlanchhuahi pawn lei duh a nei ve tho a, kan va kal zuai ang" a ti leh a, an chhuak nghal daih a nihchu, a hma ai mahin ka zam zawk, "I tha em, tinge I hmel a va diklo ve?" U Zonuna chuan a ti sup a, "Ka tha" ka ti sep, "A that chu, sawi pui duh che ka nei a" a ti leh a, ka en vat, a ni pawh chuan min lo en ve run a, "Sawi la, enge, Tlanchhuahi chungchang em ni?" a rum deuh nghut a, court lamah kan thlen vangin min biak a duh ah ka ngai ringawt a, "A ni hauh lo, kan pahnih chungchang a ni" a tih leh chuan ka meng deuh kawk a, " A nihchu enge sawi la" ka dang a to halh mai. A tawng mai dawn emaw ka tih laiin a ngawi leh vang vang bawk sia ka en chho leh ha, "Kum 5 kal taa i chunga ka chet dan vang khan ka in thiam thei ngang lo" a ti sup a, hun kal tawh chu ka mitthla let zut zut a, "Thil kal tawh a nihkha, sawi chhuak tawh lo zawk ang, kan puitlin hma leh rilru puitling kan put hma a ni a, ka dem reng reng lo che" ka ti sep a.




"Ka damchhung a ka thiltih tawh zawng zawng ah nang nen a kan in zawmna ka ti chat kha ka thiltih sual lian ber a ni" a ti leh sup a, hun kal tawh a sawi vang chuan nuam ka tih lohna a zual hle, "U Zonun sawi tawh lovang, ka sawi tawh ang khan hun liam tawh ania, sawi chhuah in engmah awmzia a awm tawh lo bawk a, hreawm I ti viau a nihchuan i thiltih te kha ka ngaidam che a ka theihnghilh vek tawh tih ka sawi duh a ni, chuvang chuan in thiamlo duh tawh suh" nui lui sang chungin ka ti leh a, min en vang vang a. "A nihchuan kan pahnih hian bul kan tan tha leh thei angem?" ka beisei loh lutuk thil a sawi vang chuan ka meng kawk a, tawng mai nachang pawh ka hrelo, "Bawihte" a rawn tih leh tak sup ah chuan ka harh chhuak zawk a.




"U Zonun, ka laka i thiltih ah khan ka ngaidam che a, i lakah lungawi lohna ka nei lo ka tih vang ngawt khan bul tan pui leh tumna che ka nei tawh lo, tunah chuan engkim a danglam tawh a, hman a hmeichhe tleirawl tir, atchilh em em tu che kha ka ni tawh lo ania, chuvang chuan hetiang thil hi ka hriat ah sawi tawh lo la ka lawm hle ang, chuan nangpawh in bialnu I nei tih ka hria a, a ni nen khan hlim takin awm zawk rawh u, keipawh in mipa dang duh ka nei a, chuvang chuan kan pahnih hi chuan bul kan tan thei tawh lo, ka thusawi chu i hriatthiam ka beisei" ka ti sep a. Ka thusawi chu a hrethiam tih ka hria, min en reng a, tawng pawh a tum tawh hmel loh, chuan ka thusawi kha ka ti tak tak bawk, la duh hle mahila bul ṭanpui ka tum tawh lo bur thung, "Mut hahdam ka duh a, khawngaihin I kal tawh mai dawn em ni?" ka ti leh sep a, min en vang vang hnuah a chhuak ta a, bul ṭanpui ka tum tawh loh zia a hrethiam pawh a ni mahna engmah sawi lova a chhuah tak ni.


Cont....

Mit na chung chung in ka rawn dah a, chuvang chuan click leh comment min tih sak hram hram rawh u aw...