Frenkie Zothanpuia 13

Episode kal lai dah luhna

Moderator: writers

LILY24
Posts: 49
Joined: February 1st, 2024, 4:32 pm

Frenkie Zothanpuia 13

Unread post by LILY24 » June 10th, 2024, 7:35 pm

CHAPTER-13
inbound2918937515792875006.jpg
Mipa ho zawng thawm ka hriat veleh ka ṭhutna aṭang tho in pawn lamah ka chhuak a,inchhung lama awm te 2 pawh an ngawi zui daih bawk. Mipa ho chu lên leh bucket te kengin thlam lam panin an rawn inzui diah diah a, Duata hmel ka hmu rual chuan pan nghalin a banah ka va vuan chawt a, nelawm em em in min nuih var var a,tuvak mahin min rawn en du du lo bawk.


"Inbe lawk ang" Ka mitmeng chu a hrethiam ve a ni ang hmiang, a hma chiah kal chu au in a thil ken ho chu a ken phei tir a, ka darah min rawn kuahin car dahna lam chu min panpui a, engtia ṭan tur nge pawh ka hre lo.


"Eng nge ni a?" Ka bengah ka sam min zehsak pahin a ti dam dap a, hmui pet fanin ka lo en a, a bawp pahnih inkarah min pawt lut nghal zat. "I nuam lo em ni?Nâ I nei em?" Ka biang rawn khuap pahin a ti a, hre chak tho bawk siin hriat ka hlau a,Remfeli sawi ang kha lo ni tak tak ta se engtin nge ni ang?Duata hi ka ṭhen thei tawh kher lovang,a chhan chu ka duh lutuk tawh!Ngaidam turin ka theihna in a tlin ka ring si lo,khuarei ah chuan lo ngaidam thei ta tehreng pawh ni ila Remfeli hian min ngainep tawh dawn lutuk! A ngaihnep leh hmusit a awm chu ka thei dawn lo chiang sa.


"Sawi tawh rawh le..nuam lo i ti em ni?"A hmel ka en chuan min zawh chhuah ngei a tum tih a hriat a,ka ṭah te lam a chhuak.


"Duata"Ka ti hap a.


"Awiiiiii" A ti fan raih a.


"Eng lo..Remfeli nen in mu dun tawh em?" Ka tih chuan min thlah ta hlawk a.


ZAWMNA...

NORAH POV

Ka hma a ding chu ka melh reng a,eng rilru nge a put?A rilru ah eng nge awm ang?

"Sawi rawh,Remfeli sawi ang khan in awm em?Maw?" Ka ṭawng ring hran lo a chhan chu kan awmna hi thlam aṭang a hla vak lo va, a ṭhiante'n an rawn hriat phak ka hlau a ni.


"Mi hi I ring thlawt lo a nih hi tiraw?" A rawn ti a, a mitmeng chu ka hrethiam lo,thinrim mitmeng leh natna inchawlhpawlh ni berin ka hria.


"A sawi alawm" Ka ti hap, eng hi nge sawi tur ni a?Eng nge sawi loh tur pawh ka hrethiam tawh lo.


"Chuan tu zawk nge i awih dawn?" A ti leh zat a, tinge maw ka zawhna kha chhang mai lova thu dangah a pakai zel le? Sawi chat lova a awm kual vel te chuan keimah rinhlelhna awm chu a tinghet sauh a, hlauhthawnna leh natna in ka khat a ni ber.



"S** in hman leh hman loh chu min hrilh mai rawh! Thu dang sawi kual duah a ngai lo" Ṭawng ring ngam si lovin ha chang ṭhial bap bapin ka ti a, midang veng thawng lo ila chu ka vin chiam tawh ang.



"A hma a kan buaina ah bawk! Rinhlelhna ah bawk kan buai leh ta! Duati min ring turin ka ti lo che em ni?Min zawt hmasa lovin Lalremfeli thusawi chu ilo awih a?Mawl a ti ngawt ang che" tiin a nui hak a,ka run kher mai. "Ka zawt reng che alawm,eng thil mah a thlen loh te chuan ṭha takin sawi ve mai ta che,eng amah hmain i thinrim ringawt a nih kha" Ka ti ve kher a, ka dik vek bik lo mahse a tam zawk hi chu amah tih dik lo a ni.


"A hrim hrimin engah nge a telma ah hian min hruai ve kher?Ka mil lo a,nangmah chungchangah phei chuan ka thikzia pawh I hria mahse min la hruai tho. A hmusit leh deuh sawhna tuar turin ami min hruai?" A kutin a hmai a tuai pawk a,min thin nek duh hmel lutuk.


"Chutiang a ni lo,a tel dawn tih pawh ka hre lo..Mary cousin a nia,a lo tel ve a nimai, a thusawi zawng zawng awih suh! Min zawt hmasa phawt ṭhin rawh. Chuan hetiang inrinhlelh tih ang reng hi ka hne tawh tih hre bawk la, mihring kan ni a, zarbuaitu kan tawng reng dawn! Dawnsawn dan zir a ṭha" A thusawi chu 'mipa ka nia, hmeichhia chu an rawn lang reng dawn,chungah chuan pawm thiam zir mai rawh' a ti ni ah ka ngai,inthiarfihlim tum lovin keimah zawk hi dawnsawn dan zir turin min ti a, he pa lakah hi chuan bei hi a dawng ngawih ngawih.


"Chaw a ei thei a nia..Frenkie Norah" Thlam aṭang mipa in min rawn au a, thawk ka la vak ringawt. Engah nge maw shooting na ah te kal lo va hepa hi ka lo zui kher kher ni?


"I buaina a ho thei si,mi lah I ring bawk si lo." A ti a, ka chhanna duh ang min la pe chuang lo. "In mu dun lo tak tak maw?" Ka ti le ngat a, " A mak teh sek! Duati tumah ka la mutpui lo! Kanu leh pa bulah chiah ka la mu" a ti a, a nu leh pa bulah a mut thu a sawi lang kher chu a ṭul lo takzet.


"Kal ang,sangha lian deuh ka mansak che a,ilo titau mai mai..an kham dawn chu" tiin min kai nghal a, min tlanpui a ni ber. Thlam ah chuan ka awm ṭhup a,in angin dawhkan te awm ve si lo,chhuatah chuan chaw ei an siam a, kan ṭhu bial laih bawk. Changel hna ngatin kan ei a, hman harsa ka tih bakah ṭawp ka ti deuh a,midang chu nuam an tih hmel sawr sawr lutuk.


"A tui hi hawp rawh" tiin a no ami chu min pe a, ka duh lo thu hrilh ka tum zet a mahse ka hma zawn chiah a ṭhu nu vang chuan ka in ve ngat a,ner sukin chaw a bar zui a.


Kan kal chhan ber kan tih zawh takah chuan haw turin kan insiam a, hnim kara ka tlat vang nge ka thak sep sep mai. Kan 2 chauhin car ah kan chuang leh a, ka thak chu a reh mai dawn emaw tih laiin a zual zel a, ka inhiahna hnu apiang chu a vual zel bawk.


"Ngati nge?" Zah pawh dawn lova ka inhiah nawk nawk takah chuan motor chu tidingin a chhan min zawt a, a thak lutuk hi awm ngaihna ka hre lo.


"A thak,min hiat rawh" Chawlh hlek lovaka inhiah takah chuan min hiah pahin "Ngati nge?Phur thak I kai ami?" A ti a, thlam kha nitin tihfai a ni lo a, a bang nghenga ka ṭhut lai khan ka kai ka ring ve deuh.


"Min ensak teh..a thak lutuk a niaaaa" Ka ṭapt ti tih a, hetiang hian vawi khat mah ka la awm ngai lo, a hreawm takzet. Ka kawr hak chu ka phelh a, bra leh kekawr ka la ha thung. Zah lam a sawi thei tawh lova, ka awm te pawh a hmu vek! Motor vei vak awm mahse ka insum thei ngang lo a ni. "Engmah a awm bawk si lo, allergy I nei maw ni le?" A ti leh nui nui a, phur thak a nih si loh chuan allergy chu a ni ngei ngei ang.



"Tuar hram hram rawh,hospital ah kan kal dawn nia..kawr kha ha la" a ti tak na a ama'n min hak tir a, car chu tinung lehin kan tlanchhuak nghal a, kawng ngilah chuan speed a san sauh ṭhin a, a khat tawkin min en a, a kut pakhatin min rawn hiat ve neuh neuh zel.



Hospital kan thlen chuan ka lei thleng a thak tawh a, vanneithlak takin doctor a hman remchan lai a ni a, damdawi ei i chuan jection a thawk hma zawk ang tiin min chiu zui a, casualty khumah ka mu ta reng bawk.



"A lan dan chuan lui lam sa ah allergy i nei a, a theih hram chuan ei lo la ka ti khawp mai. Pawn lam chauh ni lo chhung lam thleng a thak hian kan tan a hlauhawm thei a, insum a ṭha ber aw...damdawi kan khai hi zo se in haw thei ang aw" tiin min kalsan a, nurse duty te chuan min awmpuitu pa vang nge an rawn hawi deuh chhen a, pakhat lahin ngaihsak lo zetin keimah ah a mit a fu ngur a, eng emaw zawng tak chuan a nuam ka ti.


"A la thak em?"


"Thak tawh lo,helai ah chuan i fans an tam hle mai" ka ti zawi sep a, ani pawh a nui suk mai. Minute 8 vel a ṭhut hnu chuan thla lakpui turte'n an rawn dil a, ka sangha ei sual vangin anni an lo vannei a, a ṭha tho mai.


"Zanin chu ka rawn hmu lo mai ang che,lo hahdam la..dam chuan naktuk lamah kan 1 leh dawn nia,pawimawh awm chuan i rawn call mai anga" Kan in kawtah kan ding vang tawh a,zana a rawn kalloh turthu a sawi chuan ka hnual ruih a mahse ka ngaihtuah a,vawiin lam a chetna vangin hahchawlh te pawh a duh ve ang tiin ka thlakhlelhna chu ka thup hram hram a.


"Hospital kal man te ka hmu dawn em?" Chhuah mai ka tum chu ka barekah min rawn vuan chat a, seat ah ka ṭhu leh rih.
"Man te a awm elo?" Tiin ka fiam a, a nui suk mai.


"Min pe rawh le" tiin min rawn awm hnaih sauh a, zah ṭit ṭet hi ka nei vak lo mahse khaw en lai a ni a chu pawh kan in kawtah a ni lehnghal. "Eitur ka lei ang che" Ka ti ringawt a,"Humm" tih pahin a lu a thing a, a tih loh lamah chuan nawr lui chiam mah ila a ti dawn chuang lo tih ka hriat avangin a biangah chuan ka fawp zeuh a, chu veleh rawn che ve phatin ka bekah nghet zeta min khuap in ka hmui ah tak chuan min fawp ngawng ngawng a, min ei zawh vek a tum ta emaw tih tur khawpin a duh thawh a, mit ka chhin chuan ka taksa chhung hi za chuai chuai a, ṭek chhawk chhawk maiin ka hria.


"!! tawih tawih nu" tih pahin ka mawng a rawn beng pawp a,insum hman lo lekin a hming pumin ka au a, pitar pakhat rawn veiin min rawn melh siah mai.


"Khatia I tih leh chuan kan awmdun hunah i chak dawn lo a nia aw"


"Ka chak lo dan tur chu ka van hre chak tawh" a lo ti a nih chu..melh rum vakin gate inhawng huau ah chuan ka luhsan a, tih tak tak dawnin a ngam leh awm tawp si lo.



FRENKIE POV

Duati ka thlah hnuah dawr lamah u Adiki ka va lam kawi a, ani pawh a lo inkhar fel chiah bawk.


"Sangha chu man khawp a awm em?" A ti a, kan ei khawp chu kan man chuan ka hria.
"Umm a hmuna ei khawp kha kan man a,an fing sawt lutuk a, a man theih tawh lo reng reng" Ka ti zui luam a.



"Sangha chu ka lei dawn mi?I ei chak em?" Kan hawn miau loh avangin an ei ve chak chu ka ring deuh tho a. "Lei lo ang,chutiangin ka ei chak lo sangha chu" A tih vangin sa zawrhna bik chu kan tlan pelh a, thlai zawrhna velah chuan kan ding khaw muang tho. Maian te,mau tuai leh eng eng emaw a lei a, a lei hnem leh phian.



Zanah inbual ka tum zet a mahse kan kohhran ṬKP hruaitu zinga pakhatin min rawn call a, rimawi tum zir zan an hmang dawn a,telpui ve turin min lo sawm a ni. Zanah chhuah ka ngaih dawn avangin thlen veleh ka inbual a, ka inbual zawh ah chhung inkhawm kan nei a, zanriah kan ei zui mai bawk. U Becky eirawng bawl ka ei char char hnuah phai lamah kal leh chiah hian a hreawm ṭhin, chaw pangngai ei rau rau ah pawh ani chuan chawhmeh siam a thiam em vangin sa hmeh lo pawh hian kan ei ṭeuh mai a, phai lam nen chuan inthlau vet vet tak a ni.



"I u nen inkal rual dawn lo ami?" Helmet ka ban rualin Kanu'n a ti a, Kapa nen tv ah chanchin thar an ngaithla a, a tupa duatlai a pawm bawk a.


"Ka hre lo,engmah a sawi lo" Ka ti mai a,chumi rualin u Adiki chu room kawngka ah rawn dakin "Hmingmawia nen kan rawn kal rual ang,va kal mai rawh" a rawn ti lang lang a, Hmingmawia nen na rawn kal chuan ngaihtuahawm a nih loh chu. Hun rei tak an inzui ve tawh a, 'tiam tlat e' an ti hnai ve tawhin ka ring.



"Frenkie ilo thleng thei maw?Zanin chu tlemin an nau deuh a,Kima lah a zin daih bawk sia, drums bikah chuan nangmah kan rawn pun tawp che a nih hi..a inthlahrunawm khawp mai,keini hian vaw ve thiam ila chu ṭha tur" Biak in ka thlen veleh kawtah president nen kan inhmu a, a inthlahrun luatah a sawi zui luam mai.


"Ka hman lutuk alawm, inthlahrunna tur a awm lo" te chu ka ti mawi ve a, biakin chhungah kan inzui lut a, kan la thlen kim lo deuh avangin innghahkhawm pahin kan ṭhu khaw muang leh rih a, ka bula ṭhu phone a rik rual chuan thil ka hrechhuak zawk. Duati engmah ka la hrilh ve lo! Biak in chhungah ka awm bawk nen text in ka tih tur te chu ka hrilh a, ka hman hunah keima'n ka call tur thu hrilhin ka dah a, ṭul lo a khawih vak chu a mawi ka ti chiah lo a ni.



Dat 7:30 a rik chuan kan kim thaw khat a, kan secretary in Pathian hnena inkawltir nan ṭawngṭaina hun a hmang a, ṭawngṭai zawh ah kan zir tur hmun lam ṭheuh kan pan a, keiin a ka zirtir tur ho chu tleirawl 3 an ni a, kum 20 bawr vel an nih ka ring.



Rimawi tum lamah hian eng degree mah ka nei lo, a class ang zawng paw'n ka kal lo hrim hrim. Thingtlang a piang leh sei lian ka ni a, class an kal ṭhin tih te chu hriat pawh ka hre lo. U Adiki inkhualtelemna ah ka zui ṭhin a,engtik lai pawh hian christmas hi a ni reng a, puan bihin an lam suau suau a, tah chuan mil leh mil lo pawh thlu lovin a rem rem min vuak tir ṭhin a,chuta ṭang chuan tih ve chhin chakna te ka nei chho a, biak inah chuan drum 1 chiah kan neih avangin vuak mai mai an phal lo a,steel thleng hi ka vaw ṭhin! Kum 16 ka nihin kan kohhran upa pakhatin min vuak tir a, chuta ṭang chuan ka vaw chho ve ta zel a ni.



Ka nau te ho pawh a mual bo a bo chu an ni lo va, kut leh ke chet rual te kan inzirtir a, an chak lohna lai a ni ṭheuh bawk. Thluak chak lai,thil man zung zung lai an nih vangin reilote ah an thiam nghal a, hla play paw'n kan vaw thiam fu tawh. Zir belh la ngai chu chei mawi vel chauh a ni tawh a,hei hi chu ka ngaih ve danah chuan vuak tam a, inkhawmah te zakzum pawlah ṭang lova vuak ve ṭauh ṭauh a ngaiin ka hria. Haw hmain hla nen kan tum rem a, u Adiki pawh hla thu hrilin a au leh ruai tawh.




Haw veleh ka inphihfai a, light ti thimin khumah ka mu zui a, Duati ka call nghal zat. Reilote a ring hman tih ah aw tham ṭuakin a rawn chhang a,a muhil ka tiharh a ni maithei.


"In bang tawl elo?" A rawn ti a, kan ban tawh thu leh in ka thlen tawh hu ka hrilh a, rin ang ngeiin a lo muhil tawh a, ka call ri ah a harh chiah.


"Vawiin khan engmahka ti si lo a,ka chau ve em em a nih chuxka mutchhuak hi ka rui te'n ka hria" a ti nang nang a, che vak vak lo mahse ni a sa in boruak a uap a, a chauhthlak dawn lutuk.


"Tui deuhin mu rawh aw,kei pawh ka'n muhil ve nge" ka tih chuan "Awle muttui"tiin min rawn chhang nghal a, ka nui suk mai.



Phai lama kal tur chuan kan intiam rual a,naktuk mai ah kan kal tawh dawn a ni. Kanu te'n "In kal hma chu chaw rawn ei rawh se" an tih tlat vangin chaw ei ah ka sawm a, min hnial char char nangin Kanu te zawk ka sawi lan takah chuan min hnial tawh bik lo.



"Ka sam hi ka dum kher ang em?I nu chuan ṭhing a ti ngem?" A tih chuan ka nui huk, nichin aṭang tawh 'eng nge ha ila ṭha ang?Eng nge a ei duh zawng?Eng ang hmeichhia nge a duh chi?'A ti chhen a,"Engtin mah awm a ngai lo" ka tih chung paw'n a ngawi thei der lo.



"I pianpui sam i thlak danglam khan mak ti zawk ang che,Kanu chu mi en chik mi a ni lo..I awm ang ang hian awm tawp rawh" Ka tih chuan ka kut a rawn dah sawn nghal a, "A chik lo emaw i ti nih kha,a fapa duatlai bialnu te chu a en uluk ve bawk lo in" a ti leh ang lawi a, Kanu hi chu a la hrechiang lo ve ngawt mai. Hrechiang tur paw'n an la inhmu lo tak e.



"Kal hmat ka duh" a tih vangin hruai turin ka kal hma a, tlai lam dar 2 chu a ri ve tawh. A hak tur pawh a thlak sek hnuah kawr a taksa phuar lam hret a sen a ha a, pawnfen vâr ke rek thleng a feng a, a lan dan chu a nu lian takzet.



"Nu kan kal aw" A ti lang lang a, a nu pawh room aṭang a rawn chhuak chiah. "Frenkie a chu kan inah pawh i rawn ei hman dawn lo a nimaw?Bawihi zawk in sawm daih sia" A nu' a rawn ti ve luam a, "Nidangah kan ti dawn nia nu Vanes, hun a tam alawm" ka ti ve a,pawn thleng min rawn thlah a.



"Lut rawh le" tiin car kawngkhar chu ka hawnsak a, a kiai suk mai. Kan veng panin kan inkhalh chhuak a, kan in a chaw rawn ei chu a huphurh deuh a niang a, a ngawi chet chet a, a kut a sik neuh neuh mai.



"I nu'n eng nge a duh ber" A ti ta reng a,"A ti leh ta!" Ka lo tih chuan "Sawi vat vat rawh,engmah kensak lo te chu a awmang lo emai" a ti nai nai a, chutiang khawpa kensak duh chu tiin pangpar a duh thu ka hrilh a, oangpar dawr zawnah ding turin min hrilh nghal zat. Dawr chhungah a lut a, dinna tur hmun a tam miau loh avangin kei erawh ka chhuak ta lo law law. Reilote ah pangpar bawr lian zet nen a rawn lut a,car chhung chu pangpar rim a nam chek chek mai.



Luh dawn a ruai ah a ding leh rih a, a huphurh takzet a nih dawn hi. A kutah kaiin keima'n ka luhpui a, a ṭang ṭai mai.
"Rara in lo thleng tawh maw?khawi in chibai ang" Kanu'n a rawn ti hluai a, choka aṭang u Becky rawn chhuak ve chiah bawk.



"Hei I ta tur" tiin pangpar chu a pe a, Kanu a ri hlut mai. Khawi turin choka lamah a keng nghal a, u Becky'n thei tui in tur min rawn pe a, Duati zam zia chu a khawngaithlak zawk.



"Tah hian lo ṭhu la,ka han intifai ve lawk ang aw?" Ka tih chuan rang em emin ka banah min rawn vuan nghal a, ka lo nui suk.
"Nakinah ka haw hunah I ti dawn nia" ṭawng rin hlau zetin a ti a, ka ban chuap tawh bawk sia a haw hun chu ka nghak thei kher lovang.



"Duati ka rei lo ang" ti a ka thawh rualin Kanu rawn lut nghalin a rawn be zui a, min chelh hman ta bik lo. Kalsan reng thei ka nih loh avangin ka inbual sawk sawk a, nidang zawng aiin ka zo hma bawk. In hnuai ka chhuk chuan Kanu nen an inbe mek tih ka hmu a, va pawh lawk lovin choka lamah ka phei daih a, u Becky'n eirawng bawl chu thiam leh thiam lovin ka enpui ve a, a nuih a za ngang mai.



"A va naupan hmel ve" Kan pahnih hriat turin u Becky'n a ti a, naupang tihthu ah chuan kei ai kum 4 in a naupang a, kan lan danah kan inthlau viau a nih hmel.



"Naupang ve tho e mahse ka inmil tho ni lawm ni?" Ka ti a, a kiai suk mai. Ka u nupui ni mahse ṭhian angin ka kawm thei a, hmeichhe chungchangah phei chuan ka rawn ber a ni hial ang.


"Mil lutuk tlat mahse dawh theih te a ngai ve ang a, duat pawh a ngai viau ang" a ti a, a vawi khat hmu na ah a mizia awm ang vel a hre thei nghal a, u Becky hi Duati chungchangah chuan a rawn tlak viau dawnin a lang.



Zanriah chu kan ei a, ka bulah Duati a ṭhu ve tawh bawk nen innei tawh te pawh kan ang! Ka chhungte'n an duhsak lutuk a, chawhmeh te chu ka suahsak pawh a ngai miah lo.


"Lui lam sa I ei thei lo a ni maw?Bawiha a hian a sawi a, lui lam sa reng reng kan lei lo a nia" Kanu'n a tih chuan dawhkan hnuai lamah ka mal a rawn sik vak a,a nâ hrep lehnghal. A kut ka va man chuan a lo ṭang nasa mai a, a hmel ka en chuan engmah ti lo angin Kanu zawhna chu a chhang daih a, a nghal thiam ve hle mai maw.



NORAH POV

"La leng la ṭha tur" Duata nu in ka kutah min chelhin paw'n thleng min zui a, a pa leh midang pawh kan hnungah n rawn chhuak a, kei ve mai hi an chhungin min rawn thlah a, mi an hlut thiamin an duat si a, a u nupui u Becky tan hian a nuam ngawt ang.


"Nidangah ka lo haw leh velah ka rawn leng leh ang" chu ka ti mawi ve a,Duata tel lo chuan ka kal leh ngam tawh kher lo vang.


"Ni e..Bawiha awm loh paw'n lo kal ziah rawh,naktuk kan rawn thlah ve thei dawn si lo che a, khawi in chibai ang" tiin a pa'n kut a rawn lek a, ka lo vuan nghal zat. An chhungkua zawng zawng hi chu a nelawm vek a, ka vawi khat kalna mah ni se vawi tam ka kal tawhna hmun ang maiin ka tlangnel ve a,nuam ka ti takzet.



"Eng nge ka sangha ei sual chungchang kha ilo sawi leh?" Kawt aṭang kan tlan chhuak a, an veng hi chu a tlang sang bawk a,dai a tamin thli a thaw vuk vuk mai.


"An lei palh takin ka ti alawm, thak leh vak vak i duh ami?" A ti daih a nih chu, ka dem hrep a hlauh avangin min ngaihtuah ang chuan a ṭawng leh daih a, ngaihtuah tihthu ah chuan min ngaihtuah lutuk mahse sangha ei sual sawi chhuah kher kha chu ngaihtuah ah ka ngai thei lo. Midang pawh kha nuih a insum na lamah an hmai a sen vek alawm.


"An nuih a zat em kha, I sual eeeee..chaw pawh ka rawn ei tawh ngai lo ang" Tiin ka inkuangkuah than a, hma lam ka melh daih bawk. "Kei pawh ka ei tawh dawn hlei nem" a lo la ti hram a, "Zothanpui!" Ka tih chuan a nui ringawt.


"Duati" a ti dut dut a,ka va han chhang awm lo. "Ka bialnu" a ti leh a, kawng lakah chuan min rawn en zeuh zeuh bawk a. "Duatiiii" tiin ka mal a ṭham tawk a," I kut" ti leh a kut ben ka rual a, a inring lo lutuk nge min rawn en nghal dawrh mai.



In kan thleng a, lungawi lo der pawh hi a bulah chuan a theih loh! Engtin tin emaw hian a awm a, ka nui leh nge nge ṭhin. Ṭha takin kan inthlah a, inah a haw zui tur thu sawiin a inkhalh let nghal a, inchhung ka luh hnuah kei pawh awm khawmuang lovin ka inphih fai a, ka thawmhnaw te ka khung khawm a, ka inkhung kim thawkhat chuan ka hria. Khumah ka mut hnu chuan Duata chu ka va text a, a seen lo reng reng. A online reng a, a seen lo avang chuan ka call ta tawp a, a vawi khatna chu a rawn decline hmak a, ka call nawn leh zat. Rei ngial rik hnuah hmeichhia hian min rawn chhang a, ka awm zawn hi a hik zawk mai.



"Khawi ah nge Duata?" Ka ti nghal zat, a u emaw an monu chu a ni lo tih ka chiang bawk em a ni.


"Duata?" Tiin a nui zui hak a,min tham lo hmel taka a awm kual vel chu tunge a nih hriat hma aṭang hauhin ka ngei nghal a,inah haw tlang tur ang khan a insawi sia,phone a thlauh emaw ni le?
"Zothan an be duh che" a tih chuan tunge a nih ka hre chiah! Tinge maw he nu nen hian an awmdun reng mai le?


"Nakinah ka be mai ang..Remfel rawn ti zo rawh" titu chu Zothanpuia ngei a ni! Zan a ni tawh a, a bialnu hlui nen an awmdun a,eng nge an tih?Ka mittui chu a tla ringawt a, an tihtur awm ang chu ka hrethiam duak a, ka nâ takzet.



Ads click



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)