1 HEART 1 LOVE (CH-2)

[Kennelly Bawitlung]

1 HEART 1 LOVE

Chapter-2

By

Kennelly Bawitlung

---------------------------------


Ka hmaa thu mipa sang leh lian tha tak, hmai fang tha leh hmeltha zet chu ka en reng a, "Bawihi... Chhangta che" ka nu chuan ka nakah min rawn kheuh zeuhva, ka phu zawk nghe².



"Aa.. Aw. Ka dam tha e.. Nang zawk?" ka ti deuh he haw a, nuisuk chungin a lo bu nghut a. "In inhmu tawh thin thova, pangngai deuhva inhmelhriatna inla nei si lo va heti hian rem kan ruat ta a nih hi" tiin ka pa chuan min rawn en a, min hrilh bik niin ka hria..



Nia, ka hmaa thu hi ka U thian a ni a, University pawh an kal dun thin. Kan ina a rawn kal chang hian ka hmu ve leh zeuh thin a, college ka kal tan lai vel kha niin chhelo ka ti thei hle a nih kha.. A hming erawh tunah khan ka hre ve chiah.



U Bawihpuia nen an inrual vel anga, an len dan leh san zawng pawh a inrual khai viau. Mahse U Bawihpuia ai chuan a hmeltha zawk.. U Bawihpuia a hmelchhia ka tihna a ni miah lo a nia. An that dan a in ang lo.




"Rose hei U Remruat tiin i ko dawn nia" ka U chuan a lo ti leh a, eng nge maw thil awmzia hi le.. A tuna taka hetianga min in hmelhriat tir.. "Eng nge thil awmzia hi..?" ka insum thei tawh thlawt lo chuan ka ti chhuak tawl mai.



Ka pa leh ka U te chu anin melh zawk a, ka thinphu a rang nghal dut² ngawt nia mawle..! "A.. Hei Bawihi, I U Remruata nen hian pangngai taka in hmelhriatna nei ula kan duh a, mi puitling i ni ve tawh bawk a ka pehhel kual lo mai anga. Chhungkhat a insiam mai tawh tur kan ni a-"




"E.. Eng nge i thusawi awmzia chu? Chhungkhat a? U nupui i nei dawn a mi?" ka U chu ka en nghal ha a, "Mai mai ah!" tur khaia min melh chung hian a lo ti hluk a. U Bawihpuian nupui a nei dawn lo a nihchuan unau dang kan nei lo va, keimah chiah ka bang tawh..




"Remruata hi tlangval fel leh taima tak a ni a, a pa nen pawh thiantha tak kan ni bawk a. Chhungkuaa kan sawi ho hnuin-" "Ngawi lawk ngawk lawk..! Ih... Min rawn miah lovin he thil hi in lo sawi ho tawh tihna em mi?" ka pa thusawi tur chu ka man thiam vek tawh. Ka lung a awi lo hle bawk.




"Lo pawt chat zel lo la maw le..!" U Bawihpuia chuan a lo ti leh hluk a, "Eng nge sawi belh tur awm..? Pasal min neih tir intum tiraw..? Chupawh min rawn hmasa miah lo lehnghalin.. Inthil tihdan hi ka duh lo khawp mai" ka ding nghal vut a, ka chhungte chu ka melh kual nghal dan² a, ka nu pawh chuan engkima hriat pui ve vek tih a hmel atang ka hre thei..




"Bawihi han thu phawt la kan sawi ho dawn alawm.. " ka pa chuan dam dapin a lo ti a, mahse ka inbengdai thei tlat lo. Min rawn hmasa miah lo lehnghalin tuna a hming ka hriat ve tak chiah hi min neih tir an tum a, ka chhungkua te chu an ni meuh a maw ka ti rum² hial a ni.




"Ka duh lo..! Engmah sawi tur a awmlo pasal ka nei dawn lo!" ka thaw lak a rang sawt hle a, tah te lam lam a chhuak nghal ngawt nia.. "Zonunsang thu rawh" ka U chuan chang zetin a rawn ti hrawk a, min melh no lo khawp mai. Mahse hlauhna ka nei rih tlat lo.




"Ni e Bawihi inbengdai hram hram teh.. " ka nu chuan ka banah pawtin min thut tir a tuma, ka tang teuh thung. "Nu nangpawhin pasal ka nei duh lo tih te chu i hriat vek kha.. Tinge min rawn hmasak loh?!"



"Zonunsang thu rawh ka tih chu!" ka U chu a rawn ding nghal hluai a, "Danny tisuh, a awm awmin awm tir rih rawh" tiin U Remruata chuan a lo chelh ding vat a, ka U pawh chuan min rawn melh hrawkin a thu tha leh ta ngawt a.




"Bawihi, a puitling zia lo em mai, tihian tha takin kan zo ho dawn alawm..Han in bengdai phawt la" ka pa in a tihchuan ka thinrim zual sauh "Nangmahni hi a lawm puitling lo zawk chu. Mi pawh rawn hmasa lo leh ka ngaihdan leh duhdan pawh min zawt hmasa lova induhdanin thil tih in tum a..?Hei hi tirawh chu chu tirawh! Khawngaihin ka duhdanin min nun tir ve teh u!"




Hmanhmawh zetin inchunglamah ka tlan chho va, ka U min koh zuina pawh chu ka hrelo der hmak. Ka room-ah lutin kawngkhar ka kalh zui a, khumah mu in blanket chuan ka in lukhuh zui nghal zat.




Ka tah a chhuakin ka lungawi lo takzet a, fanu laktlak lo leh zahna thlen tu chauh ka ni a, min dah bo vat² an duh a nih hi tiin ka ingnaihtuah lungpuam a, ka mittui chu ka bekah a rawn lum thla palh mai.Ka tap khat hle tawh asin...




Rei vak lo hnuah, "Zonunsang lo hawng teh..!" ka u chuan ka room kawngkhar chu a rawn chum ri dawt² a, hawn chu ka tum lo bur. Banglam hawiin ka sei sir hmak a, blanket chuan ka invur tha sauh² bawk.




"Khatiang te a i chet a, mi iva han ti zak em em ve.. Mi ngaihdan tur te pawh dawn ve ta che.I rilru a awm apiang hi sawi phawng² zel suh" vin hauh si lo chang zet hian a ti thum dut² a, ka beng chu ka chhu ngawng lui ve tlat. Amah hian ania ka pa te a sawipui hmasaa ka rin ni.




Minute 20 dawn chu hawng turin min tia, vawikhat pawh ka chhang lo. "Khawi lo zuk chhuk rawh keiman ka lo bia ang" ka nu aw ri ka hre zui a, U Bawihpuia tawng bul² ri pawh chu ka hria.. A kal sawn ta niang.




"Bawihi.. Lo hawng la..kan sawi dun dawn ania...Remruata kha mi fel tak a nia, a nu leh pa te pawh mi tha tak an ni. Khatia i chungchang engkim a hriat hnu pawha a rilru a thlak loh avang khan keichuan amah aia tha midang i tawng leh kher pawhin ka ring tawh lo asin.. I U thiantha tak a lo ni bawk nen ka ring ngam a, i hma hun kan ngaih vanga i pa leh i u te nen he thutlukna siam pawh kan ni asin.." dam dap chuan a ti sap sap a, ngawireng chuan ka ngaithla ve kar.





"Lo hawng phawt la kan inbiak hnuah i duh lo viau a nihchuan keichuan ka nawr lui lovang che.. Mahse sawi dun ve phawt i la.. Eng nge i ngaih dan?" ni e, ka nu hi tha takin hrilh ila, ka pa leh ka U te chu a lo sawi pui thei ang.




Kawngkhar chu ka va hawng a, a lo luh hnuin ka kalh lehnghal zat. Khumah chuan kan thu dun ran a, "Eng nge ni i duh lo chhan ber chu han sawi la..?" a ti dam thluam a.




Diktak chuan a hmel leh lan dan te chu han sawisel tur ka hre hauh lo,mahse, "Hriat pawh kan inhrechiang lo va, tunah khan kei phei chuan a hming ka hre ve chiah lehnghal. Khatia min rawn hmasa lo va thutlukna in lo siam ngawt kha ka duh lo, bakah pasal neih ka duh lo." in hrut faih chunghian ka ti a.




Ka nu chu a bu nghat² a, "Ni e, keipawhin in inhrechiang si lo va a tirah kha chuan ka hlauhthawn pui ve deuh che a..Ama'rawhchu i U hian a hrechiang em a, i pa pawhin an chhungkua a lo hrechiang ve leh zel nen ka ngaih a ngam te deuh va. Bakah i U hian mi thaa a hriat loh chu then turin a tih hmak² thin che hi, a ni berin tha a tih chu kei pawhin ka pawmpui ve a.. " a ti leh dap² a.




"Aa.. Nu, tunah ka nunhlui te kha enga tan mah ngailo mahse kan hanin nei anga min iai anga a hma ang tho khan kan tawp leh ang tih ka hlau.." kei thawhchhuah pawh nei lo, chhungte chawmhlawm leh nuthlawi ve mai hi engtin nge a ni ang tlangval fel leh chhungkaw tha tak atanga lo chawr chhuak chuan thinlung taka min pawm theih ang ni..? Amah mai bakah a chhungte chuan engtin nge min pawm theih zawk?





"I U leh i pa te chu ka lo sawi pui dawn a nia. Mahse i tana tha ber tur kan dawn vanga hetianga ti kan ni tih min hriat sak reng la,kan hmangaih em em vek che a, i pa nen kan la damlai ngei hian pasal tha tak neia chhungkaw hlim tak i neih hi kan duh ber a ni" ka kut pahnih chu vuanin a beng thak² a, ka thu ngawi reng ringawt tawh.





Ka nu in mu tura min chhuahsan hnuchuan ka thu ngawi reng a, a thusawi tekha ka ngaihtuah let chuan, a dik alawm. Ka U hian mipa tha leh fel a tih tawh chin hi chu mipa fel tak an ni thin.




A farnu leh unau neihchhun ka ni a,min ngaihtuahin ka tan chuan a tha ber min duhpui tih pawh ka hria..Hmanah khan an thuawihin Hriata kha lo then chu ni ila, hetiang nunhlui sawi tur hi ka nei lo mai tur. Ka thuawih loh leh luhlul rah chu ka seng a, mi min hmuh dan pawh keima thlak ngei a ni.





A nihleh tunah hian an thu awihin pasal chu nei ta ila, hlim takin ka awm thei angem? Zankhua chuan ka ingaihtuah tluk² a, ka muthilh ve meuh chuan zinglam dar 3 a pel thui tawh viau..




Tukthuan kan kil ho lai pawh chuan kan ngawi thap a, U Bawihpuia takngial pawhin engmah a sawi lo. Ka nu khan a lo sawi nghal em mawni dawn chu aw ka ti deuh.
Mahse dawhkan a thawhsan rual chuan, "I eikhamah ka pindanah rawn kal ang che" tiin a kut a va sil zui a.





A thutlukna chu kal tlangpui ngei a tum dawn tih chu hrechiang ve tak ka ni. Mahse keipawh engtiang chiaha luhlul nge ka nih in hriat kha.



"I U ti thinrim zawngin tawng lo la, tha takin i hrilh dawn nia" ka nu chuan dawhkan ka thawhsan hmain a lo ti sap a, ka bu nghat ringawt. Ka U pindan kawngkhar ka kik hma chuan thawk ka han la kawk a.




"U ka lo lut dawn.. " kik dat pah chuan ka ti zui a. Lut tura min tihrual chuan kawngkhar chu ka hawng them² a, tukverh bulah dingin zial a lo zu khu hlat² a. Va lut pheiin khumah chuan ka thu kai tharh a.




Ngawireng chuan ka thu a, a zial chu nawr hlumin a kekawr ipte a zen nghal tat a. Ngunthluk zet hian min rawn en bawk, "Eng nge Remruata chu i duh loh chhan?" a ti thum dut a, tihian tha deuhvin hrilh ila min nawr lui lo se ka ti hle




"Duh chhan tur ka nei a mi? A hmingpum pawh ka hre lo va. Eng ang mizia nge a neih pawh ka hre hek lo. Inneihna te chu tih mai mai a ni hlei nem, i neih tur chu nise ka hrethiam.A neitu tur zawk duhdan pawh zawt hmasa lo va thutlukna insiam hi ka lungawi lo takzet" thutak zet chuan ka ti ta sap² a, ka sawi zawh chuan a lo nui suk a, mi a ti hamhaih dawn dawn alawm mawle..




"I bialpa te mizia i hrechiang ngai reng² ami..?" sawi zawi hle mahse a reh bawka ka hre phah vek. "Eng maw?" ka han ti ve leh ngat a.




"Remruatfela nen hian kum 10 dawn thian kan lo ni ve tawh a. Ka chikin a ni anga tlangval fel hi i tawng leh tawh kherin ka ring lo.A ni hi pasala i nei a nihchuan ngaihngam takin ka awm thei ang" a ti dam ve dap a, a thutak hle bawk.




"Hna te ka zawng ve anga pasal nei kher lo pawhin ka inchawm ve thei em em ang.Tun atang chuan tha takin ka awm tawh anga ngaihngam takin awm rawh" ka lo ti ve then a, beidawn hmel tak hian min en tawh..




Ka lamah chuan lo hnaiin ka sirah chuan a rawn thu thla ve a. "Ka farnu neih chhun i ni a. I nun ho lam taka i hman ral ka duh lo va. Mipa sual tak i tawng ang tih phei chu ka hlau takzet, chuvanga khuah khirh che a i ngaihzawngte then tura ti ziah che pawh ka ni. Min ningin min ngeitheilo tih pawh ka hria, mahse i mipa kawpte hi ka enthlak a ka chhui zui hnua i tana tha lo tura ka hriat chauhvin a nia then tura ka tih thin che.Chuta karah nang lah hi i lo luhlul ve ang reng bawk si,pakhat chauh pawh hi khap sen i ni si lo"





Ka samah a chuan a rawn chul thuak a, a mitah chuan min hmangaih zia ka hmu thei tlat, chuchuan a rilru ka lo tih hah thin tur zia te, min ngaihtuah zia te min hriat chian tir lehzualin min hneh em em a ni.




"Aa.. A nihchuan nangman nupui nei hmasa phawt la chuan ka nei chuah vang" a ni pawh hi a naupang chhe zawk² tawh lo va, hmeichhia phei chu ala rawn hruai lut lo hrim².A chang phei chuan mipa hian a hip zawk emaw ka ti rum² thin.





Ka thusawi vang chuan a ner sawk a, "Ka ta tur chu a pian pawh ala piang ve lo vang.A hmanhmawh thlak loh, nang hi mi tha tak ka neih tir hunah che chuan thlamuang takin ka awm thei ang.Chumi hnuah te chuan ka zawng ve tan ang chu" fiamthu ti tih deuh tak hian a ti leh a.





Neih hmasak chu tum lo ve bur² tak a ni.
"Naa..Nangpawhin nupui sual deuh i nei ang tih ka hlau ve tho alawm. Sual deuh i neih vaih chuan a nu leh apa an khawngaihthlak awm dawn lutuk" hei hi ka lo ngaihtuah ve fo thin a nia, mo sual deuh kan hrawn ang tih hi. Mahse U Bawihpuia hi chuan ka nu leh pa te hi a ngaipawimawhin a zahthiam bawk a, chutiang chu thleng lo turah ngai phawt ang.





"Teuh lo! Ka nu leh pa te a zah lo a nih chuan then a ni mai then" naupang chhia deuh tak hian a kut tum a rawn lek chhuak ngei a. Ka pasal neih tur chungchang atangin a nupui turah kan pakai daih. Mahse boruak a zangkhai phah ta deuhva a tha ve hranpa hrim².Hetianga unau va han titi na hun hi kan nei ngai mang lo bawk a,U Bawihpuia pawh hi mi thutak leh strict tak a ni reng bik lo tih min hriatchhuah tir leh.





"Chuan lo ngaihtuah nawn leh la, tun tut²ah inneih chu kan ti lo va, han in hrechiang hmasa ve te te phawt ula.Mi tha tak a ni tih i hre chhawm chho ve zel mai ang." ka hnungah chuan a beng thak thak a, tha tak chuan ka aw ve ta chu a nia..






Inneih chu ka duh ta tihna ni lovin, ka U in mitha tak a tih vang chauhvin ka belchiang phawt anga, chutah thutlukna chu ka siam chauhvang.




Ka u leh ka pa te hnathawk tura an chhuah hnuin ka nu pangpar ka han singsak pui ve a, a parmawi deuh leh hnamawi chi te chu inchhunga khawiah tiin kan thiar thla nual bawk. A duh uluk bawk si a khawina lai tur a ngaihtuah chhung ringawt pawhin darkar chanve dawn a liam hman!




Tv sirah leh inchung chhohna step bulah te, kawngkapui sir leh choka te thlengin a hung vang hlawm a.Ka U nen kan pindan ve ve ah min khawi sak bawk.Bathroom lehzel a dah a tum chuan a ni em em tawh lo tiin kan in khap leh rih thin.





Kan han rem fel hnuchuan inchhung chu a ti nung deuh sarh hian ka hriaa, ka nu pawhin lungawi takin a thlek vang² hlawm mai. Sofa a ka thut hahdam laiin Zuali hnen atangin call ka dawng a, ka chhan chuan




"Rose tunah i hman em?" a rawn ti hmasa ber a, "Aw... Tihtur a zirin hman mai thei tinge?" ka ti let nghal zat a. A ni hian bazar puiah min rawn sawm a tum leh pek em mi dawn ni?





"Chawhnu ah class ka nei lo va, i hman tho chuan karleh field trip a ka hak tur leiin min va bazar pui lawk la.. " ka sawi reng kha maw.. "Thawmhnaw te chu i ngha em kha.. " aw ta mai lo chuan ka han ti leh te te a, min sawm luih ngar² avang chuan ka pawm ta hram a. In a tawm chet² a ninawm ve alawm.





"Scooty ka keng thova ka rawn sawm kawi dawn che nia lo inpheih vat rawh" a tih leh hnuah call chu a ti tawp a, keipawh insiam tur chuan ka pindan lamah ka chho nghal zat.




Tank top var leh smart pant dum chu ka haa, sneaker bun lehin puffer jacket chu ka hak thuah leh zat,ni chu sa tha viau mahse a vawt ve deuh ruih tawh a, bakah ka thu vek ka hlau.Ka sam chu a fel fai thei ang berin bakilhin ka tukkhumah ka bawk a. Silver bengbeh kual lian vak lo chu ka beh bawk.





Make up hi chu ka lawm bawka ka nei chikim khawp mai. Mahse ka inchei vak ngai chuang lo, eye liner chuan ka mit chu ka han hnawih ki deuhva, lipstick uk deuh vun rawng lam kai deuh mah mah zawk chu ka inhnawih bawk a, darthlalanga ka in thlek vang² chuan mahni tawkah chhelo chu ka inti ve hle.





Ka'n hanin fak ve lawk anga, feet 5 leh inches 4 a sang ka ni a, cherchhe lutuk ka ni lo. Ka awmbawr pawh a len dan a tawk viau, ka kawng chu fek deuh ratin ka khel leh mawng bawr te pawh sawiselna ka nei lo. Ka chawn te pawh an zen thla zarh a, ka kethiah pawh ka nu ka chhun bawk a a fuh khawp mai. Ka hmel leh pianzia ah chuan han in sawiselna tur ka nei lo a tih theih awm e..




Ka bag ka in inhnuai lamah chuan ka chhuk leha, dar zat ka enchuan dar 12 a la ri lo deuh. "Chhuahna tur i nei a mi?" ka nu in min hmuh rualin a lo ti a.
A chana khehna bulah chuan va dingin "Zuali nen kan bazar lawk dawn a lei tur i nei em?" ka ti nghal zat.





Ka chhuah dawn hian ka dil hmasa ngai lem lo va, chhuah dawnah hian ka hrilh chawp leh tawp zel,ka nu pawh hian ngaiah a nei tawhin ka ring, "Bazar a i kal ro ro chuan i nutei te ina kal a rem dawn chu.. Ka pangpar khawina tur lei tha min lo dah saka, ka la lam hman bawk si lo" a tia chana chu a kheh pah mawlh2 bawk.





"A tam viau mi, ka khai zo angem nge taxi hman pui a ngai ang?" nutei pawh hian pangpar hi a lawm khawp a, ka nu nen hian an in pe reng zel. "Tam lo ve rambo polythene ai chuan a te daih zawk ang. Zuali chu a scooty nen a mi a lo kal dawn a?"

"Aw"

"A that khawp chu i rawn pawm hawng thei mai ang chu ti raw..?" ka laksak thei dawn bawka a phur hmel khawp mai. "Mm thei mai ang" Zuali chu a lo thleng a, ka nu nen rei vak lo chu in be ve luamin kan inzui chhuak lehnghal a.





"Khawi laiah nge field trip chu in neih dawn a? " ka ti thuphung ve a, "Ihh.. Khawilai kha nge aw.. Ka lo muthlu deuhva 'field trip karlehah' tih lai chiah kha ka hrechiang hman" a ti nawi niaia, an kalna tur lam ai chuan thawmhnawah a buai leh tawh zawk a ni hi.





Zuali hi chuan thuruk a zep theiin Naom-i tih lovah chuan a ni hi ka kawmngaih ber a, ka ring ber bawk. Chuvang chuan ka chhungten pasal min neih tir an tum chungchang chu ka hrilh ve ta vek a. Thurawn eng emaw tal min pek theih ka rin vang pakhat a ni bawk.





"ih.. Remruatfela chu i U thian hmana chhelo kan tih theih deuh kha a ni em?" Zuali pawh hian vawihnih vel chu kan ina assignment kan tihdun laiin a hmu ve tawh. "Aw ni e.. Mahse hman ai khan a palian daih tawh zawk" tiin ka hmuh dan te chu ka sawi a.





"Mmm ka van hmu ve chak! Enteh mate, chuah miah suh. I U berin a duhpui che chuan mifel tak a ni ngei² ang. A hmel leh pian chu sawi loh hna nghet ala nei zui, hetiang mipa hi chu i tawng zen zen lo tawp ang" a ti ta reuh va sawi tur min ti haihchham der alawm...U Bawihpuia duh chu an duhpui vek a ni ber hi.





"Aaa mahse...chhungkaw tha a mi leh tlangval hnahkhat lehnghal. Lo innei ta pawh ni ila mahni insitna ka neih tlat ka ring, miin ka chanchin an lo hriat phei chuan an chhungkua in sawi sep an kai anga min thlauhthla leh mai ang tih ka hlau.. "




Hei hi ka rilru puthmang dik tak a ni. "Nuthlawi nih vangin mahni insit a trul lo ka tih kha.. Diktak chuan ka dem miah lo che. Hriata kha tih takzetin ka dem zawk, i duh reng vanga chesual pawh i ni lo va.A tuar dan tur te chu ka hrethiam mahse amah chauhvin a tuar emaw a in tia, hnem a hnek che in khatiang khan a khawsa zui bawk a. Fa te chu indam anga Pathianin ala pe leh mai dawn che u a. Keichuan ka la dem tawp thei lo. Tunah lah nupui dang neiin fa an nei leh der tawh a,enge hetia inthlahrung leh mahni insit taka a i lo awm bik chhan tur ka hre lo. Pasal tha tak nei la amah aiin hlim zawk rawh"





A ni leh ni lo angin a thutak ve kher mai, nau ka chhiat hnu khan a rawn leng ve zeuh² thin a, Hriata rui leh min biak dan te thlengin a rawn hmu ve vek a. Amah leh Sawmdawnga te hian a nia hmeichhe dang a phur chhuak lai hmua min lo hrilh tupawh kha ni. A thinrimin min lo nat pui ve thei em em a, ka chhungte hrilh hial pawh a tum thin. Mahse hrilh lo tur khan ka dang bet hram² zel.





Engmah ka sawi zawm tawh lo va ka thiannu thusawi te chu ka ngaihtuah neuh² chuan ka thiam loh chu ni teh meuh mahse kan inthen chhanah chuan Hriata lo chu puh tur dang an awmlo. Titakemah te chuan hmeichhe dangte chu ni se an pasal ten ngaihzawng dang an nei tih an hriat chhuah rualin an then nghal duh ngei anga, keichuan ka tuar rei thawkhat viau bawk alawm.





"Tak takin Rose, inngaihtuah chiang la keichuan pasal chu nei mahla pawi ka ti miah lo. I chhungte sawi danah a fel hmelin i pa in a hrechiang bawka a ngaihthat thlak" a ti leh dap dap a. Ni e, ka U sawi ang khan han hrechiang ve phawt ila..





Bazar ah chuan kan han vak kual tak tak mai a.Thawmhawn dawr pawh sawm chuang kan lut tawh! A duh zawng pakhat mah zuk hmu lo a mawle!! "I duhzawng i chiang bawk si lo, darkar khat chuang kan vak kual tawh a nia hei enrawh ka thlan tepawh a tla tawh!" ka ner nang a, thawmhnaw ho enkual pah chuan min rawn thlek zeuh va.





"Saw lai lawkah sawn restaurant tha deuh ka hria,va in eipuar phawt ila kan enkual leh zawk dawn nia" nuisang hian a ti a, dawr atang chuan kan inzui chhuak leh ta hnak². Lalthazuali bazar pui dawn chuan mi dawhthei leh in fit zek zawk nih a ngai..




Restaurant pakhat ah chuan min luh puia, a lian vak lo nain a nuam khawp mai. Customer pawh an tha hnem ang reng lutuk, October thla tawp lam ni tawhin thlan tla meuhvin min han vah kual pui mai chu a nia, ropui tak a ni.




"I duh duh chah rawn ka treat vek ang che" khi thaw chungin menu chu min rawn pe a, min tlawn tih ka hre reng.Ka rawmawl nen a inzap hlap² pahin menu chu ka enkual a.
"Eng nge i chah ve dawn?" ka tihchuan "I chah ang ang kha ka lo duh ve mai ang" a phone hmet mual² pah chuan a lo ti mai a.




Lekha teah chuan ka ziak thla malh² a.Kan bula dawhkan tifai tunu chuan a lo la vat bawk. Han thut takah chuan a uap zualin ka hriaa ka jacket chu ka phelh ta ngawt.Keichu lum hi ka han ti hma khawp a, nipui lai hi chuan fan tel lovin ka awm hlei thei meuh lo.




Zuali chuan a bialpa a text a niang a khi leh vur² thin a. Keipawhin ka phone chu ka khawih ve ta daih.Kan sir dawhkan customer dangin an rawn kil lai pawh chu ka mit sirin ka hmu thei tak naa ka ngaihsak lem lo.




Kan ei tur chah chu a rawn thleng a phone dahin kan ei tan nghal mawlh².Ka ril a lo tam hle a niang ka ei tui khawp lehnghal, "Hey..!" ka thiannu chuan a rawn ti sup a, "Mm" amah pawh en hlei lovin ka thil ei lai ngawtah chuan ka bur.




"Hey! Saw saw i pasal hual a ni lawm mi..?"
A rawn tihchuan ka chow hip lai chu tawp chawtin ka hawi chhuak a. Dawhkan chu rawn bawh deuhvin chiangzet min lo en kara, a mitmei in kan sir lam chu en turin min ti. Ka awm ang ang chuan ka hawi them² a, chuta chiangzet a min lo en kar tu ka hmuh rual chuan ka chow peh uai lai chu ka phuh thawt mai!


******************