By CVL.Awmpuii
Chapter 32
In ka thlen meuh chuan khúa a thim lek lek tawh a, duh aiin haw kawngah hun kan hmang rei hret. U Liansanga khan "Hmanhmawh a ngai lo" tiin a hla zawngin min tlan kual pui tlat pek a. Hnial nasa viau mah ila motor khalh tu zawk a ni miau si a, a thû thuin min awm tir a ni ber. A tlai tawh deuh avang leh a hmanhmawh tawh avangin kan inah chuan a lo lût kawi lo law law a. Zana a rawn lên tur thû erawh min hrilh thung a. "In exam thuai dâwn sia, ka lo lêng reng thei dâwn si lo. A hnaih tak tak hma hian ka lo lêng tlut tlut dâwn" a ti ve ngei a. Ka lo hnar lêm lo.
Ka inthlak zawhah eirawng ka bawl nghal sawk sawk a, in ka thlen tirh aṭangin U Ruth-i chu a room-ah a la inkalh hnan char char a. A lo muhil anih ka ring, chuti chu ni lo se ka thâwm hria in min lo chhâwn tawh ang. Chawhmeh ṭhing rin tur a awm nual avangin eirawng chu ka bawl zo thuai a. U Ruth-i lo thawh chhuah hun ngaichâng in ka room-ah phone ka khawih ve melh melh a. Ka haw aṭanga darkar thum dâwn a liam hnu ah pawh a lo la thawh chhuah loh cheu avang chuan ka ngaih a ṭha tawh chiah lo. A room bulah chuan va kalin a kawngkhar chu ka va kik a "U Ruth" tiin ka ko zui zat bawk a. Min lo chhang mai lo leh nghal. A aia ring leh nasa zawk chuan a kawngkhar chu ka chûm ta dawt dawt a, ka ko tuarh tuarh bawk a. A tawpah chuan a lo hawng ta hram e.
Tho phang hmêl leh sam thur bur bum chung hian a rawn hawng a, "Awi ka harh ṭha thei miah lo anih chu" a rawn ti hluai a. Kei erawh ka lo thaw huai mai. Eng emaw hlekah ngaih ṭhat lohna ka nei nghal ṭhin a, min lo tihlauthawng zing malh malh ve tawh bawk nen dem theih pawh ka ni lo. "Min ti mangang alawm" ka lo ti ve hluai a, choka lamah chuan inzui phei in eirawng ka bawl peih tawh thû te chu ka sawi zui zat a. U Ruth-i chuan "Min ko ri kha ka hre reng a, mahse ka harh thei miah lo va, ka chesawn thei lo ani ber. Ka maimizial nge pawh ka hre lo. Chiangkuang lo deuh hian ka awm" a lo ti ve mawlh mawlh a. "I muhil satliah ah ngaiin ka lo ko lawk duh lo che a, mahse i rei ta lutuk a, ka ngaih a ṭha lo va" ka lo ti ve luam bawk a. Zanriah chu kan ei zui a, pangngai takin kan inbia a. Ka awm loh laia zu a lo in lo hlauh chu ka lawm tih piahlam a ni.
"Zaninah ka bulah mu leh la" a tih chuan ka lo duh veleh mai a. Mahse lehkha zir hmasak phawt ka ngaih thû te chu ka hrilh a, exam la hnai lutuk lo mah se inbuatsaih lawk a sual viau tawh lo vang. Ka lehkha zir hma in U Liansanga nen kan inbe zuai a, kan inbiak laklawh laiin ka chhungte'n min lo call a, ka sawi chuan "I chhungte chu be phawt la, kan inbe leh dâwn ania" a ti a, phone chu kan dah zui nghal a. Ka chhungte ka va biak leh chuan an lo la vat a. Ka Nu chuan "I U Liansanga nen in inbia em ni?" a rawn ti chat a, ka meng nghal hra ringawt a. A rawn ring dik chat chat lutuk chu chhan mai ngaihna pawh ka hre lo. Ka Nu bawk chuan "Ngaihzawng neih pawhin fimkhur tak zelin aw Mate" a rawn ti leh deuh deuh a. Ka phone chu ka thlauh lo chauh tawh.
U Liansanga nen kan inkar hria ang hrima a rawn awm chuan min ti hamhaih a, a hre hial zawk emawni? Mahse vawikhat pawh ka sawi ngai lo va, hriat chhan tur a awm bawk si lo. U Liansanga zawk lahin engmah min hrilh lo va a lo hrilh tawp ka ring chuang bawk si lo. Nge ni a, hepa pui hian a chhungte awlsam taka a hrilh ang mai khan a lo hrilh leh tawh zawk ni? Ngaihtuah thiam a har khawp mai. "Ka ṭawng i hre thei em?" ka Nu in a rawn tih leh lang lang takah chuan "Aw...hre thei, hre thei e" ka lo ti bah nuaih a. U Liansanga chungchang chu rawn sawi zui tawh lo hram sela ka ti kher mai. A dawr chungchang vel a rawn sawi tâk ah chuan ka lo thaw huai a. Ka zirna chungchang min rawn zawt luam bawk a. Kan exam hun tur ka hrilh vek tawh a, inbuatsaih nasa turin min rawn fuih sauh sauh a. Kan inbiak tawp dâwn lamah chuan U Liansanga chungchangah bawk a rawn lût leh a, eng emaw tak chu a hre chiang a ni.
Ka Nu chuan "Chhungte hmuh phâk lova kawppui nei nih chuan fimkhur zual sauh tur ania. Kan hmuh phâk ah chuan duh ang angin kan zilh thei che a, i awmdan leh thiltih kan hre kilh kelh thei a. Mahse tunah chuan hmuh phak lohah i awm si a, fimkhur takin, inveng ranin awm ang che aw. Liansanga te pawh an fel lutuk tho a, mahse mipa ve tho an ni tih kha hre reng la. Hmun fâl leh puipunna ah awm dun tam lutuk suh ang che u. Hmun falah phei chuan tih loh loh tih a awl a. In tum loh dân deuhin in awm khut mai ang. Mahse ka ring tâwk ve ve che u a, ka hahdam viau tho mai" a rawn ti duah a. U Liansanga nen kan inkar chu a hre vek tih phat rual a ni ta lo. Eng pawh nise a thusawite chu zawm ngei ngei ka tum thung a. Ka Nu a ni a, ka tana ṭha tur bâk a duh dâwn lo tih ka hria.
Kan inbiak zawh chuan U Liansanga ka be leh nghal zat a, phone a lâk rual rual chuan "Ka Nu in a hria ania" ka va ti nghal thawr pek a. Ka hlauthawng nge pawh ka hre lo, ka phili nghal cheng mai. Ka zah vang pawh a ni mai thei a ni. U Liansanga lah chuan "A hriat a hun ve tawh alawm" a lo ti sam thên mai a. Min chhan dân leh mak a tih miah loh danah ama lo hrilh ngei a ni tih ka ring thiam nghal mai e. "Tinge min hrilh hmasa lovin i lo hrilh ve ringawt a?" ka ti hap a. "I duh dâwn hlei nem" a lo ti leh mai a, a sawi dik tho bawk sia. Min râwn hmasa chu ni sela ka duh teuh lo mai. "Ka zak" ka tih chuan a lo nui huk a, "Eng nge? Nui suh, a zahthlak alawm ka la naupang si. Ka chhungte chuan min ngaihtuah phah ngawt ang. Shillong-ah lehkha zir turin min dah a, ngaihzawng ka lo nei daih a" ka ti zui mawlh mawlh a. A nuih a zà zual sauh emaw tih mai turin a nui hawk hawk a. Mahse a hnù deuhah chuan "Zak suh, la upa lutuk lo mah la ngaihzawng nei rual i ni tawh alawm. Ka tán pawh ngaihzawn rual loh ngaihzawn ngawt thû a awm hlei nem. I chhungte khan hriat hun an la nei dâwn tho tho a, inzep sit set ṭul ka ti lo anih kha. Hlauthawng suh, an hau miah lo ang che" pangngai tak hian a rawn ti a. "Engtin nge i hrilh reng reng a?" ka tih chuan a sawi duh ṭhak lo. Vawiin lama a hrilh thû chauh min hrilh a, a bâk chu ka zawh ngat ngat pawhin a sawi duh miah lo anih chu! "I duh leh i Nu i zawt mai dâwn ania" a ti tlat a. Ka zawt ngam dâwn lo tih a hre ve reng âwm sia.
Kan inbiak zawh chuan lehkha ka zir nghal a, rilruah lah chuan a lut mawh hrep lehnghal a. Darkar tam pawh ka zir hman lo, mu turin U Ruth-i room-ah chuan ka va phei ta tawp a. Rilru ah a lût bawk si lo va, zir reng khan awmzia a nei lo em a ni. "I thiam hnem tawh em?" U Ruth-in a lo tih chuan lu ka lo thing nak nak a. "Ka rilruah a lût thei lo" ka ti a, "Rilru pek theih loh châng hi a awm ve ania" a lo ti ve mai a. Ka rilru tê tê chuan U Liansanga zek zawk vang vek ka lo ti thung a. Kan inkar a ṭhat lohin ka ngaihtuahna a luah khat a, kan inkar a ṭhat pawhin a luah khat tho a. Ka lo duh hle anih hi ka ti ta.
U Ruth-i chuan "Vawiin lamte a nuam em? A lo thlah che em?" phûr zet hian a lo ti a. U Liansanga nen kan chungchanga a lo phûr ve lutuk hmuh hian nuam ka ti a, min ti phur ve sawt zel bawk. "Kawng thui zawk aṭangin min lo haw pui a, traffic jam nen duh angin ka lo thleng hma theilo alawm" ka lo ti zung zung a. "In infawp em?" a lo ti leh daih a, chek hlak in a darah ka beng dat a. Ka lai nghal vek bawk a, a man thiam vekin ka ring. "A zei em?" a ti leh deuh deuh a, "Awi U Ruth..." ka ti chiam ringawt a, min chhaih tih hriat lutuk hian a nui zui hawk hawk a. A uang ve peih ta lutuk hi a mak zawk. "Enteh, U Ruth, U Liansanga chuan kan chanchin hi ka chhungte a lo han hrilh anih chu! A ti âwm ang lo asin. Ka Nu nen kan inbia a, a rawn hre ta vek sia ka zak lutuk" ka ti ta mawlh mawlh a. Mahse U Ruth-i chuan "I vannei hle anih chu!" a lo ti leh daih a. A sawi awmzia hre lo lutuka ka en ha chuan "I chhungte thleng thlenga hrilh hriat a pawi tih loh danah a duh hle che a, i lakah a thutak hle tihna a ni mai. Lâwm viau zawk rawh, chhungte beng a thlen tawh chinah hi chuan mipa hian an ti mai mai ngai lo ania" a ti luam a.
U Liansanga chuan kan inkawp tirh phat aṭang khan a chhungte chu a lo hrilh vek tawh a, tunah ka chhungte a lo hrilh leh thlap bawk a. U Ruth-i thusawi avang chuan ka zahna te kha a bo duak mai. Min lo la thutak ve hle tih hriat chu a lawmawm bâk ah a ngaihṭhat thlak hliah hliah. "A chhungte paw'n an hre vek" ka tih chuan "Inneih puiah a sàwm hnai che anih chu" fiamthu ti tak deuh hian a lo ti a. Inneih chungchang chu ka la ngaihtuah ngai loh bakah ka la naupang a, zirlai mai ka la ni a. Ka zirlai zir chhuah a, hna neih ve phawtte pawh ka la duh a. Amah upa tawh viau mah se innei thei dinhmunah chuan kan la ding lo nasa lutuk. U Ruth-i chuan "Tikhan in intih thiam loh châng pawhin chhungte'n hriat chin an nei ve zel tawh ang a. I tih tauh vak vak pawhin U Liansanga chuan chêt ngaihna a hre deuh tawh ang chu" uang thuang zet hian a ti a. U Liansanga rilru chu ka man ve telh telh in ka hria. Kan intih thiam loh hun a lo thlen leh hunah pawh ka chhungte kaltlang a remna siam a hreh hauh lo vang. A phakar ka ti dawn nge a fing ka ti dawn pawh ka hrethiam tawh lo e. Kum upa zawk na nâ nâ chu an lo ngaihtuah kim a, an lo fing anih hi!
Kar tawp kan thleng a, a lo sawi lawk tawh ang ngeiin U Liansanga chuan an ina chawei turin tlaiah min rawn lam a. Kawrfual deh nuam zet ha in sandals ka bun tawp a, inchei dân tur tâwk ka hre mai si lo simple thei ang ber chuan ka kal tawp a. Ka confi loh em avang chuan "Ka kawr hak hi a pawi em?" ka ti thawr a,"I chhelo vêl vek" uar zet hian a lo ti a. Kan in melh no lo teh e, a nui hawk hawk a. "Tak taka engpawh ha la i awm nawm theihna kha a ṭha ber. Ka chhungte chuan an seh lo vang che hahdam deuhin awm rawh" min ti a. U Ruth-in pâwn thleng min thlah a, U Liansanga bulah chuan "Rawn dah lêt leh la aw" a lo ti fiamthu zeuh a, pakhat pa lah chuan "Ka ru nghal dâwn" a lo ti fiamthu ve hlut bawk a. An inngam tlâk ta lutuk hi nuam ka lo ti.
U Liansanga te in kan thlen chuan ka insangmar ṭeuh a, zâm miah lo turin min ti mawlh mawlh mah se a zâm loh theih loh. Inchhung kan luh rual chuan beisei ang he hu in min lo ngaihsak hlut lêm lo va. U Fakmawii erawh chuan min lo nuih sangin "I lo kal thei chu a va lawmawm tak " a lo ti ve ngei a. A sual chuang miah lo na in ka la ngaina thei miah lo hi a mak, U Hlutei nen an inkawmngeih ṭhin lutuk vang pawh kha a ni mai thei a ni. U Liansanga chuan "Min lo inthlak pui ve lawk la" a ti a, keimaha awm ka duh loh avangin ka zui nghal vat a. U Fakmawii bulah chuan eng emaw hi a va sawi a, a lo bu nghat a. A room lam ni ngei turah chuan kan inzui phei nghal a. An inchhung hi pui khup ti a sawi tur ni lo mah se a zau ṭha in an thil neihte hi a simple em em vek a. Thil man to lutuk leh chuang tlai lutuk ang kha a awm hmêl loh a, mahse a fai em em vek zel.
U Liansanga room kan lût chiah chu ka beisei ai daihin a lo zau a, a khum lah chu a han zau em em mai khawp a. A kham phei zawng paw'n mu sela a lêng val val ang. "I khum chu(h)" ka ti ban chalh a, "Nikum hmasa daih tawh khan ka Nu in ka nupui neih hisap in a siam tir a" a ti a, a nui suk suk a. A chhungte chu mo lawm turin engtik lai pawhin an inpeih tawh emaw tih mai tur alawm le. Ka lo nui hak hak a, inbuatsaihna chu nikum hmasa aṭang daih tawhin a kal char char a. An inbuatsaih chhan ber lah hian a la hawi lo mai sia. U Liansanga chuan "Tikhan khumah khan lo ṭhu rawh, ka'n inthlak lawk ang" a ti a. Ka lo bu nghat nghat a, a room-ah chuan inthlakna room hranpa a lo awm vêl thlap a, hmeichhe room ni âwm zawk tak a ni. A inthlak chhung chuan a room chu ka lo enkual a, lehkhabu bawm lian zet a awm a, lehkhabu a la inrem khat dul zui a. Mizo ṭawnga ziak aiin sap ṭawnga inziak a tam zawk a, ṭhenkhatte phei chu Khasi ṭawng niin ka hria. A rawngbawlna atana puitute an nih hlawm ka ring.
"A va hmuhnawm âwm ve" ka hnunglam aṭanga a rawn tih chuan ka lehhawi vat a, a lo inthlak fel diam tawh chu niin! "Lo kal teh" a tih chuan ka va pan ve mai bawk a. A khumah chuan min ṭhut tirin ka kut vei lam chu a rawn chelh a, ka hmaah chuan a rawn ṭhingṭhi titih zui zat bawk a. A kekawr ipte aṭang chuan eng thil emaw hi a rawn la chhuak a. Ka hmuh theih tura a rawn lek rual chuan hmui ka lo pet zeuh a, a hmaa zungbun min pek, ka pek lêt leh tâk kha a ni. Ka kutah chuan a rawn rawlh lût leh a, "Eng pawh thleng se, he thil hi chuan ka hnen thleng tawh lo hram rawh se" a ti sup a. A hmaa ka pek lêt leh kher avang khan a rilru a na deuhin ka hria. "Ka tihpalh" ka lo ti sep a, ka kut chu lo fawp zeuh in "Thianghlimna zungbun hi chu i nulat chhung na nâ nâ chuan bun reng la ka duh" a lo ti nghet charh a. A ṭawng chhuah dân aṭang chuan a ti mai mai lo tih ka hria.
"Ka bun reng i duh chuan i pawimawh dâwn ania" fiamthu ti tak deuh hian ka lo ti a. Lungawi hmêl zet hian min melh ta vung vung a, min rawn hnaih a tum rual chuan "A hunlo e" ka lo ti zawi sep a. Mahse min rawn fawp ta tho a, ka lo chhang lêt lo thei lo. A duhthawh zual sauh a, ka lo pawt ve ṭawk ṭawk bawk a. Kan inthlah meuh chuan a khumah ka lo mu fel diam tawh! Ka sirah chuan thaw ham ham chungin a rawn let thlà tap a. Min rawn kuah zui nghal zat bawk a. Ka zak lutuk chu ka sa leh hat hat tawh mai. Kan thawk a pangngai deuh hnu chuan ka tho tharh a, ka inpawtmar nghal zung zung bawk a. Ani chu la mu rengin a mit a chhing vang vang a, a rawn thaw chhuak leh huk ṭhin. "U Liansang" tiin ka va sawi dat a, "Chhuak tawh ang" ka ti leh a, hria ang pawhin a awm duh ṭhak lo. "Chhuak ang" ti a pawh tho ka tum rual chuan amah zawk chuan khumah chuan min pawt thla leh thut a. Ka ṭe chhuak ṭhat mai. Nui hawk hawk chungin ka biangah chuan a fawp thuak thuak a, ka lo tal ve phat phat thung a. Room-a kan awm rei lutuk chuan a chhungte ngaihdan a ni lo palh ang tih ka hlau a ni.
"Khawi maw min thlah teh" ka ti hlar a, min lo kuah nghet sauh thung a. Ka nghawng a min rawn fawh tâwk rual chuan ka îp nghal chawih a. A inlahrang mai dâwn emaw ka tih laiin a fawp ta ngawr ngawr mai. Hetiang hi chu ka hrethiam ve alawm "U Liansang" tiin nem sawn ka tum a, thaw huk chungin a inlahrang ve ta hram a. "Ka ha i ti ziau tlat" a ti sehchilh nawk a. Thinrim vang leh tisa chakna lam vanga sawi a ni lo tih a hmel landan aṭang chuan ka hmù thiam mai. Ka nghawng chu khawih in ka tho nghal vat a, darthlalanga ka va in en chuan a lo duk chur mai. "Awi a zahthlak lutuk" ka ti hluai a, tuai reh tumin ka tuai nghal tâwk a. A zual sauh emaw tih mai tur ani. U Liansanga lah chuan pawi sawi loh hmel zet hian min lo melh a. A duhna ah hi chuan a ngeiawm thiam ṭhin mawle.
Kan inzui chhuah dâwn thleng chuan "Midangin an hmù palh ange" ka ti a, a pa ka zah ber a, a hmù thiam palh ang tih mawlh ka hlau. Mahse U Liansanga chuan "Khatiang an hrethiam ve pha lo" a lo ti liam puat a, ka inrin loh laiin ka nui huk mai. "Ka tih âwm loh deuh deuh hi i bulah chuan ka lo ti leh mai ṭhin a, ka beisei loh dân deuh deuhin ka awm ṭhin. Min tidanglam anih ber chu!" thutak deuh hian a rawn ti leh a. A sawi dik ve reng, a khawsak dân tura ka rin loh dân deuh deuh hian a khawsa leh khut zel a. A hma khan ka lo dah sangin ka lo ngaisang ve em em ṭhin a. Tunah a ngaihsan awm tawh lo ka tihna lam ni lovin mihring a nih ve zia ka hrethiam tawh, famkim lo mihring vek kan lo ni.
Choka lama kan inzui chhuah leh chuan midang pawh an lo awm ve nuk tawh a. Ka huphurh ang he hu in eng thil danglam mah a la thleng lo. Tin, U Liansanga sawi ang tak takin chhungkhat hnaivai tak tak chauh an nih ka ring, sàwmhnih pawh kan tling lo vang tih tur a ni. Mahse piancham lawm tura chawei khawm tur kan ni emaw ka tih laiin piancham neitupa ber âwm ang ka la hmù miah lo va. U Liansanga khan "Ka û fapa" a ti ringawt a, naupang panga vêl an awm a, a tu ber nge ka hre thei lo. U Liansanga zawh ka tum mêk lai chuan U Fakmawii'n min lo ko a, "Lo phei ve daih rawh i duh chuan " a rawn ti a. U Liansanga chuan min lo melh vat a, a lak aṭanga kal hran hreh viau mah ila an chêt buai laia lo ṭhut mai mai ai chuan tiin U Fakmawii chu ka va pui a.
Naupangho chu an ri laih laih a, puitlingin an lo nuih pui dar dar reng bawk a. U Liansanga Nu leh Pa te ka la hmuh miah loh avangin U Fakmawii chu ka zawt ve tawp a, "An chhuak lawk a, an lo haw ṭep ang " a lo ti ve mai a. Pui tura zui ni si kha thiltih tur em em ka hre leh chuang lo va. Chhungkaw hrang hrang hi in enkawl dân inang lo, eirawngbawl dân leh chêt dân te pawh inang lo vek kan ni a. Lo ti ve bawrh bawrh dawn pawh ni ila an tih loh ang puia lo tih ka hlau si a. U Fakmawii bulah chuan "Ka tih tur min lo hrilh ve la, ka lo ti ve ang" ka ti ta tawp a. Min hrethiam ve aniang, fridge-ah chuan tomoto leh thlai eng eng emaw hi a rawn la chhuak a "Salad lo siam la" a tih chuan phur zet hian ka lo la vat a. Ka thiam zawng tak a ni ve tlat a, ka huphurh hran lo.
U Fakmawii chu a titi zui ta mawlh mawlh a, a hna chungchang leh kohhran chungchang velte chu a sawi luam a. Ka rin ai daihin a ṭawng duh bakah a hma ai ngawt kha chuan ka nêl ve deuh tawh. Naupang pakhatin "Ani, tui" a rawn tih chuan U Fakmawii chuan a lo pe vat a. "Heihi Birthday boy chu em ni?" intibengvar zet hian ka lo ti a. Mahse U Fakmawii hmel landan aṭang chuan a nih hmêl loh. Kan meng buai ve ve a, U Fakmawii chuan "Eng Birthday maw?" a ti hú a,"U Liansanga khan a tia" ka ti ve thawr a. U Fakmawii chu a nui ta hak hak a, "Hruai chhuah theih dân che kawng dapin chhuanlam ah dawt a lo sawi a ni maw" a ti ta mai. Ka lo meng âwk a, U Fakmawii bawk chuan "Chhungkaw chawei khawm satliah alawm, kan awm remchâng êm a amah ber khan a rawt a. A lo hruai ve duh thû che pawh a sawi a, ka û te'n an lo hmù châk ve tho che bawk nen chuvang chu alawm" a ti leh zung zung a. Ka hriat loh a thil a lo ti hnem ṭhin lutuk hi chu kan la buai phah ang tih ka hlau, nakinah ka hau dâwn khawp.
An mo ni ngei turte chuan min rawn pui ve a, nichinah khan ka lo hmù miah lo va. An hmelṭha in an fin hmel em em a, U Liansanga te ina lawi âwm takte an ni. U Liansanga pawh reilotê ah a lo phei ve a, midang hmuh hlau siin rum deuh hian ka lo melh a, a hamhaih hmel te chuan ka thin a tirim zual. An mo te nen chuan min inhmelhriat tir zung zung a, min ngaihven zui chiam lo na in an fel thawkhat viau chuan ka hria. U Liansanga chuan "Hrehawm i ti em?" ka beng bulah a rawn ti a. "I tupa Birthday chu a nuam khawp mai" ka lo ti ve kher a, a hmui pet sawi zeuh in min nuih tlawn ta tawp a. A fala kan awm hunah a châk lo viau ang. A Nu leh Pa te an lo thlen aṭanga rei vak lovah hunserh kan hmang zui a. Pu Sawmliana'n hun a hmang a, eng eng emaw a sawi nual a. "Liansanga te pawh Pathian hre reng chungin fimkhur tak zelin ke pên ang che u" a ti dap dap a. Sawi tlang dawt lo mah se a sawi awmzia kan hrethiam tlâng vekin ka ring. Ka lo zak lehpek hle a, mahse a sawi zui rei lo hlauh zawk a.
Hunserh kan hman zawh chuan zanriah chu kan ei zui nghal a. Dawhkan pahnihah chawei na tur an siam a, kan tam lêm lo bawk nen kan lenh tâwk khawp mai. Naupang panga an awm a, an ri ve reng hlawm a. Mahse châw an han ei chiah chu an felfai khep reuh hlawm a. Naupangchhia pawh an ang lo, an chhungkaw inrelbawl dân a mumal viau anih hmêl. Kei, U Liansanga, a Nu leh Pa leh U Fakmawii te'n dawhkan khatah kan kil ho a. "Ei ṭeuh rawh aw" U Liansanga pa chuan a ti ve ngei a, a vawikhat min biakna niin ka hria. A Nu pawh chuan "I lo kal thei hlauh chu a lawmawm" a lo ti ve ngei a. U Liansanga lah chuan ka beng bulah "Zâm miah suh" tiin min lo fuih ve sauh sauh bawk a. Ka zâm viau chhan tur ka hre lo va, nuam tih viau chuan tur pawh a awm chuang lovin ka hria.
Zanriah eikham aṭanga rei vak lovah U Liansanga chuan min thlah a. Ka beisei ai takin boruak a ralmuang a, kan va buai nuaih nuaih dâwn emaw ka tihna lam pawh ni lovin ka awm nawm lohna tur thil a awm te ka ring a, mahse chutiang chu a awm miah lo. A tu a te pawh kha ka chungah an fel em em vek a, min ngaihsak hurh chuang lo na in min nuih sâng reng hlawm a. A nuam letling phian zawn ka hria. Mahse zanriah ei laia Pu Sawmliana'n kan chhungkaw chanchin vêl min zawh kha chuan tlemin ka tîm ve deuh a. Thil nihna tak erawh ka hrilh chiang viau tho a. U Liansanga tán tling zo lo anga min ngaih ka hlau ve tho a, U Mamuani ang mai khan ka awm ang tih ka hlau ani. "U Mamuani hi a va'n reh" ka ti hluai a, ka ngaihtuah chhuah takah chuan ka sawi chhuak lo thei lo.
"A kal leh tawh a" U Liansanga chuan a lo ti ve mai a, Hyderabad-ah hna zawm turin a kal leh tawh anih dâwn chu! "I va'n hre thei em em" tiin ka lo fiam zeuh a, "A sawi alawm" a ti liam puat a. Mahse ka thinrim a hlau leh deuh aniang "Mahse ka zawt miah lo" a rawn tih zawm leh zat a, ka lo nui hak a, min vengthawng tawh mah mah a ni. "A reh êm a, ka rawn sawi lang mai mai mawle" ka tih chuan hahdam huai hmel a pu. "Tinge dawt min hrilh?" ka ti leh hluai a. Zanin kha tu piancham mah a ni miah lo tih ka hriatchhuah leh thut vang a ni. U Liansanga chuan U Mamuani chanchin ka la sawi emaw tiin "Dawt ka sawi lo, Mamuani chu..." a tih lai mêk chuan ka lo pawt chat a. "Zanin kha alawm ka sawi, borthday kha" ka ti hlak a. Min rawn melh zawk a, rum deuha ka lo melh chuan "I lo kal a, a ṭha mai alawm" a lo ti daih a. "Chu pawh nise i thû in thil hi ti pawp pawp tawh suh. Dawt phei chu min hrilh tawh miah suh ang che" ka ti hmarh hmarh a. "A ṭul dân azir zelin" a lo ti awlsam thên a. Tih vak ngaihna ka hre tawh bawk si lo, motor khalh lai chu ni lo sela chuan ka kek pawp duh ang mawle.
In ka thlen chuan "Lehkha ṭha deuhin zir rawh aw" tiin min thlah a, hriatthiam loh ka neih chuan zawt hreh lo turin min ti thlap bawk a. A thlamuan thlak ṭhin teh e. U Ruth-i hnena chanchin ka report leh zar zar hnu ah lehkha chu ka zir ta chauh a. Zan dang zawng aiin ka rilru a chak emaw tih mai turin ka thiam zung zung a, ka zir tui bawk nen ka duhtawk meuh chuan dár 1 a lo ri ṭep tawh! Ka mut hma in U Liansanga message te chu ka chhang leh phawt a. A lo mut daih tawh ka rin tehlul nen min lo chhang lêt veleh teh mial a. Darkar khat dâwn kan inbiak leh zet hnu ah kan duhtawk ta chauh a. Ka mut dâwn tak tak meuh chuan dár 3 a lo ri ṭep tawh mai.
Lehkha zir a buai chuan hun hi a kal duak duak emaw tih mai tur a ni a. 1st Semester exam chu kan ṭan ta ngei a, ka zir ang angte a lo chhuak ve nual hlawm a. Ti ṭha hluai ti a sawi tur ni lo mah ila ka thiam ve viau chuan ka hria. Dina leh Valtea te chu exam ṭan tirh phat nî aṭangin an rilru a hah nghal em em mai a. Fail an inring nghal ringawt a, "In pass ang" ngaihsam zeta ka lo tihte chuan min melh rum ul a. An zir ṭha peih chuang bawk si lo, fail an hlau leh tho bawk si buaithlak ve tak chu a ni. Exam chhung zawng chuan U Liansanga nen pawh kan inbe tam lutuk lo va. Rawngbawlin a lo zin chhuak ve bawk nen kan buai ve ve a, a tihzia phian mai. U Ruth-i pawh a chhuak veleh ta zeuh zeuh a, zu rawn in haw zeuh a la nei ṭhin a. Ka rilru tihah ṭhin viau mah se U Liansanga sawi ang khan ka awm tlat a. Ka ṭawngṭaina ah hre rengin a rawn ṭhat chhuah tak tak hun ka nghak a ni ber.
Kan exam zawh ni leh U Liansanga zin lo haw hun a in nang chiah chiah a. A tuka lêng chhuak tura min sàwm chuan ka lo hnar lo kher mai. Inchhungah lehkha zirin ka inkhung ngar ngar zel si a, vah harh ka mamawh ve hrim hrim. Ka exam zo ka haw veleh U Ruth-i pawh ka hrilh ve nghal a, "Ni e, vak harh ve rawh. Exam zawh lawmna ni pahfawmin" a lo ti ve. Ani hi chuan engkimah min phur pui ṭhin a, min sawisel ngai lo.
U Liansanga nen lên kan tum ni tak chuan U Ruth-i ber a tal buai ta tlat mai a. A pumna a chhuah avangin chhuahsan thei dinhmunah ka ding leh ta lo. U Liansanga min lo sàwm hnuah lawk ania, kan lo inzui chhuak hman lo hlauh chu a vannei zawk khawp mai. U Liansanga chuan damdawiin kal mai a rawt a, mahse U Ruth-in a duh tawh mai si lo. Reife chu kan buai a, a hma ang em em a buaipui ngai lutuk kha chu ni lo mah se a na thawkhat viau tih a ṭhen leh chak chak ṭhin danah chuan a chiang reng mai. A zu in vang bakah ka puh thei lo, nghei turin vawi tam Doctor te'n an ti tawh a, a tilui zel a. Heti reng reng chuan a chhe ber pawh kan tawng thei tlat. Kan lên chhuah tur pawh chu kan ṭhulh ta tawp a. U Ruth-i kalsan chî ni hek lo le. U Liansanga pawh nilengin kan bulah a awm ve a, damdawiin kal tur chuan kan in thlêm chhuak zo ta bawk si lo. U Liansanga chuan phone kaltlang in Doctor te min râwn sak a, damdawi min lam sak leh thlap bawk a. U Ruth-i pumna pawh chu a ziaawm ve ta hram a. A hnu deuhah chuan a muhil nghal bawrh bawrh mai.
A muthilh chhung chuan U Ruth-i chu choka lamah kan phei san a, U Liansanga chu thingpui ka lum zui nghal zat bawk a. A upat tawh vang nge thingpui sen hang hi a ti deuh kher ṭhin a. A patling ka ti ṭhin khawp mai. "Tun hnai eng nge in boruak?" U Liansanga'n a rawn tih chuan U Ruth-i chanchin a sawina a ni tih ka hrethiam nghal mai a. "Nizanah pawh a in a" beidawng zet hian ka lo ti hap a. Nizanah lawk pawh khan a in miau a, a pum nat chhan hi a ni tih hai rual a ni lo. U Liansanga chuan "En liam mai chi a ni tawh lo anih chu" a lo ti sup a. "Engtin nge ka tih ang?" ka lo ti vat a, "Tih vak ngaihna a awm lo" a lo ti leh lawi bawk si. A châng hi chuan ka hrethiam ṭhin lo. "Zanah ka lo kal leh ang" a tih leh chuan "U Ruth-i chu be ve chhin la" ka lo ti vat a. Ngaihtuah chian hmêl fe a a ngaihtuah hnu ah "Chumi tur chuan ka lo kal ang" a ti ta nge nge a. Thil danglam eng emaw tak a thlen theih hram beisei phawt ang.
U Liansanga haw tur chu pâwn thleng ka va thlah a, "Kan lêng thei ta bawk si lo, i hun kan lâk hek sak ṭeuh che a ni hawt a. A zialo ngei mai" inthlahrung deuh chuan ka ti a, a lo rum nghut a. "Ka hun i la hek ngai lo" a lo ti a, ka nuih ringawt a. "Thingpui sen hâng ka hlawh tal alawm" ti a min rawn piai leh zeuh tâk ah chuan ka lo ner nang a. Hawi kual thuak in ka inrin hma chuan ka hmuiah a rawn fawp zeuh a, "Kha pawh ka hlawh a" a ti zui leh zat bawk a. A uang peih ṭhin lutuk hi a hma kha chuan inhmeh lo ka ti ṭhin a. Mahse tunah chuan a mizia a bet ve reng tawh ah ngaiin a uan nasat poh leh amah a ni ngawih ngawihin ka hre ṭhin.
Zanriah ei dâwn ah U Ruth-i chu a rawn harh leh ta chauh a "I ṭha em?" tiin ka lo ngaihven vat a, a lo bu ve nghat bawk a. A lan dân pawh hmuh a nuam ta deuh alawm. "U Ruth, a theih hram chuan ti tawh suh aw" ka ti leh hlawl a, ka insum hman lo a ni ber. Zu hi thlah sela, vawn tur dik tak vuan se a nun hi a nuam nimai tur ania. Khawvelah kha chen hlimna a lo zawng tawh a, tun dinhmun hi a thleng ania. Belh tur dik tak bel se, a nun hian hei ai hian hma a sawn ang mawle. "Keimah vangin in chhuak thei ta si lo va, sorry" a lo ti sep a. A inthlahrung hmel ka hmuh hian ka khawngaih leh vek ṭhin bawk si a hahthlak ngawt mai. A inphih fai hnu rei vak lovah zanriah chu kan ei zui nghal a, "I U Liansanga kha châw lo ei ve nghal se ṭha tur ania" a tih chuan "Zanah a lo kal leh dâwn alawm" ka lo ti vat a. Biak a tum thû erawh ka sawi lawk duh lo thung. A hun lo thleng phawt sela, khunkhan deuhin inbia se ka duh.
U Liansanga pawh chu zanriah kan eikham aṭanga rei vak lovah a lo thleng zui ve mai bawk a. U Ruth-i nen chuan pangngai takin an inbia a, mahse U Ruth-i chuan vawiin thil thleng vêl vang khan nuam lo a ti leh viau tawhin ka hria. U Liansanga chuan a be lui char char zawk a, a hnu deuhah chuan pangngai takin an inbe chho veleh mai bawk a. A room-a titi pui turin U Liansanga chu ka mitmei deuh ṭhin a, mahse a hrethiam lo nge ni thil dang daih a sawi pui reng a. Mahse a hnù deuhah chuan vawiin chungchang te kha sawi chhuakin U Liansanga chuan "Ruth-i, puih i duh chuan kan inhawng reng ania, eng kawngah pawh" a ti ta a. U Ruth-i chu zà lo deuhin a lo nui hak a, a zahzelah a nui mai mai niin ka hria.
"Tikhan lo inkawm rawh u, ka mut san ang che u" tiin a tho ta daih a. Inlâkhran dân a hria ka lo ti khawp mai. Mahse U Liansanga chuan "Harsatna te hi pumpelh a ṭhat rualin hmachhawn ngam a ngaih châng a awm a. I huaisen tawkin ka ring bawk" a lo ti churh a. U Ruth-i mu tur pawh chu a rawn leh hawi leh vat rêng a. U Liansanga nen chuan an inmelh ta rân mai. "Hmalam pan ngaihna hriat loh lai chuan midang puih nih hreh loh tur. Hlimna tawng baw turin pên khat chiah pên a lo ngai mai thei asin. Mahse chu pên khat chu hlauhthawnna avang leh nunhlui indelh rih tirna avangin chân theih a ni a. Hlimna hi kan ban phâk ah a awm reng laiin hla deuhah kan lo zawng ṭhin a. Kan tisual chawk ania" U Liansanga chuan a ti leh duah a. U Ruth-i chuan a melh reng a, a thusawite chian a tidanglam deuh chuan ka hria.
"Kan inbe lawk thei em?" U Ruth-i chuan a ti ta nge nge a, U Liansanga chu inringtawk tak hian a tho nghal uaih a. U Ruth-i chu a room-ah a lût tlang nghal a. "I lo ṭawngṭai dâwn ania" ti sup in U Liansanga pawh chuan a zui ve nghal zat a. Room-ah chuan reife an va inkhung a. An inbiak thâwm ka hriat loh chu sawi loh, hriat ka va tum em em lo bawk a rilru ṭawngṭaina nen chuan ka lo ngaichâng ve tawp a. U Ruth-i nun khawih danglam thei tur thil ni hlauh sela, hmalam pan nana hmangin tal buai tawh lo se ka ti ber mai. Darkar khat leh a chanve vêl zet an inkhung hnu chuan U Liansanga chauh a lo chhuak a. Ka mitmei a ka lo zawh chuan a bu nghut ringawt a, ring tâwk phawt mai teh ang.
"Zanin chu ka lêng rei lo mai ang, exam chawlh hahdam te pawh i duh ve ang. Hna khawih ngai ka la nei ve tho bawk a, zan dangah ka lo lêng leh dâwn ania" U Liansanga chuan a ti zui zat a. "In inbe ṭha thei em?" ka lo ti thung a, "Ṭha turah ngai phawt ang" tih ringawt in min chhang a. A kutah ka nghat ngam tawh a ni a, a sawi chin bâk chu zawh belh ka duh bîk lo. Pâwn thleng ka va thlah a, a tlân liam thleng chuan ka thlîr zui a, rilru in U Ruth-i tán ka ṭawngṭai pah mawlh mawlh mai. A tuk zing thleng chuan U Ruth-i chu a reh zui vang vang a, a room-ah a inkalh hnan tlat a. U Liansanga ka hrilh chuan tibuai rih lo turin min rawn ti a. "En tawp phawt rawh" min tih avangin ka ngaihsak lo lui a. Eng emaw thil ṭha lo tak a thleng ang tih hlauhna erawh ka ngah viau mai.
Mahse kar khat a liam leh meuh chuan ka beisei loh dân deuhin, ka duhthyaam ni siin thil a kal ta tlat mai. U Ruth-i nunah danglamna ka hmù ta! Pathianni ah chuan inkhawm ve chhin a duh thû a sawi hlawl mai a. Ka lo phûr ngei mai, a kawr hak turte chu phur deuhin ka en pui a. Mahse kan kal dâwn tak takah chuan ṭhulh leh a rilruk hman rum rum a "Ka zak deuh" hreh hmel zet hian a ti chhuak phawng a. Heihi ania pawi em em chu, mi tam tak hi zahna tur ngawih ngawih ah kan zak lo va, zah lohna tur ngawih ngawih ah kan zak zawk zel a. U Ruth-i ka sawina kher pawh ni lovin heihi tunlai ṭhalai tam tak te buaina a ni. Keipawh ka bâng bîk chuang lo.
"U Ruth, i bulah ka awm tlat dâwn, zak reng reng suh" tiin ka fuih sauh sauh a. Hreh deuh chung chuan min zui ta nge nge a. Biakin kan thlen chuan ka ṭhiante pahnihin min lo nghak rân tawh a. U Ruth-i nen te chuan ka inhmelhriat tir nghal zung zung a. "Hmel thar ka hmù in ka hria" kan hnunglam aṭanga rawn titu chu U Hriatpuia a ni. Phûr zetin U Ruth-i nen chuan ka inhmelhriat tir ve nghal zat a. "Lo tel ve ziah rawh aw, a nuam ṭhin ania" tiin U Hriatpuia chuan a sàwm zui zat a. U Ruth-i pawh a pangngai ve tawh viau chuan ka hria. Ka ṭhiante chuan an be nghal bawrh bawrh a, ka koh danin "U Ruth" an ti ve mai a. Chutia harsatna awm miah lo va an lo kawm ve nghal bawrh bawrh thei chu ka lâwm takzet a ni. Vanneih thlak lutukin ka ti dawn nge, U Hlutei kan hmù lo hlauh a. Inhmu ngat ila chu engtin tak nge U Ruth-i a tih ang hriat a ni si lo va. Pathian remruat te pawh a ni ang e.,
Chawhnu erawh U Ruth-i a haw duh avangin kan inkhawm ve ta lo law law a. "I duh leh inkhawm rawh keimah pawhin ka haw thei" ti mah se kan kal rual a, amaha haw tir bîk chu ka duh lo va. Chawhma inkhawm bân veleh kan haw nghal a. U Liansanga nen pawh mumal takin kan inhmu hman lo. Kan haw tur thû pawh message in ka hrilh ringawt a, a hmuh hun hunah lo hmù ve tawh mai teh se. In kan thlen chuan U Ruth-i chu ka inkhawm boruak a ngaihdan ka zawt ve hrim hrim a. "I ṭhiante kha an fel, a nuam ve reng" tih zawngin min chhang a. A lawmawm tâwk viau mai.
Zanah U Liansanga a lo lêng a, hahipin U Ruth-i vanga ka lâwmthu te ka lo hrilh mawlh mawlh a. U Ruth-i chu zanriah eikham aṭang khan room-ah a tawm nghal chawt a. U Liansanga a zah vang chu a nih loh hram ka beisei. "A hma khan eng thû chiah nge i hrilh a" ka tih chuan a nui duh lêk chauh a. Han in dawp vak chi a ni chiah bawk si lo, ka zawt zui duh tawh bîk lo va. Mahse ka hriat châkna erawh a reh miah lo thung. U Ruth-i inkhawm duh thut chhante kha hriat a chakawm êm a ni. An pahnih inkar thû a nih miau avangin lo inrawlh chikim ve vak ka hreh bawk si a. Engpawh nise U Ruth-i hmasawnna hi a ṭha hrim hrim e.
_______*________*_________*_______
(Zaninah hian feedback ka dawn ṭhat viau chuan Last Chapter zanrei lamah ka lo dah mai thei aw
)