Love In Bloom (Chapter-14)

[Rebec Nunziri]

Chapter-1



Lalhlimpuii POV




"Yes.. Nu, pa ka tling, ka tling a nia" tiin room atang chuan ka tlan chhuak a, ka nu te tv en lai pawh chu ka thawm avang chuan ka lam chu an rawn hawi vat a, "Ngati teh vak vak nge?" ka nu chuan a lo ti vat a, "Ka hna dil kha ka hmu a nihchu, thlathar atang ka zawm a ngai nghal ang" ka ti zung zung a, ka lawm lutuk chu ka nui var var mai, diktak chuan ka tlin pawh ka in ring ngam lo kha a nia, mahse ka lo tling ve hlauh bawk si chu ka lawm em a ni.




"A va lawmawm ve aw, mahse Bawihte, kan hnen atanga hla takah i awm dawn chu a ni sia, ngaihtuah i va na duh awm ve" ka nu chuan a ti sep a, "Nu.. min ngaituah suh, puitling ka nih tawh hi, keimah in ka in enkawl thei alawm" ka lo ti vat, "Ni e, kan fanu hi puitling a ni tawh a, kan ring ngam tur a ni" ka pa pawh chuan a lo ti ve vat a, zan a tlai tawh avang chuan mu turin room lamah ka lut leh a, mahse ka muhil hleithei lo, hna ka nei ve tawh dawn bawk nen ka phur lutuk chu ka in let kual sek ringawt.




"Bawihte, tha takin I hna chu thawk la, engkim ah rinawm leh diktak a thiltih a tha ber tih ka sawi kha hre reng ang che aw" sumo a ka chuan luh dawn chuan ka pa in a ti dap dap a, ka nu erawh ngawi rengin min en a, a tap mai dawn in ka hria, keipawh ka nu leh pa, ka unau te hlat a ka awm mai tur chu hreawm ka ti a, mahse kan chhungkaw enkawl nan he hna hi ka mamawh bawk si, engpawh nise ka tuar thei em em ang, ka chhungte nuam taka awm tir tluk a chak ka neilo.




Kan tlan chhuah dawn chuan ka chhungte chu ka en a, ka mittui a tling piau bawk, "Kum tawp ah ka lo haw ang, thil tha deuh deuh ka lo hawn vek ang che u, ka thlen hunah ka lo ve dawn cheu nia" motor chu muangchangin a tlan chhuak a, ka chhungte lan theih chin thleng chu ka la hawi let a, an lan theih tawh loh chin ah chuan thaw hak in ka thu tha a, kan khua kan tlan pelh dawn lai te chuan ka lung chu a leng nghal veng veng a.




Ngawi rengin ka thu a, ka chhungte ringawt chu ka rilru ah an awm, tum thum vel kan chawl tih loh chu kan tlan tluang a, kan chhuk tlai deuh bawk nen zan dar 6 dawn ah Aizawl chu kan lut ve thei hram, ka thiannu Aizawl a awm in min lo hmuak dawn a, MC kawt a motor a din rual in ka hawi kual a, ka thiannu Tetei chu a lo awm vang tawh mai, "I chau em, inah haw vat ila i mu hahdam dawn nia" a lo ti zung zung a, kan khua ah an awm thin a, mahse a pa kha an transfer tak avangin Serchhip lamah an awm ta daih kha a nia, tun thlengin kan la in kawm zel thung.




A chhungte chu Serchhip ah an awm vek a, amah ber hi Aizawl ah hna a nei a, a hnathawh naah tho hian ka thawk dawn a ni, thla hmasa khan Aizawl ah karkhat chhung cham turin ka kal a, chuta ka kal chu he hna hi Tetei'n dil ve turin min ti a, ka tlin pawh ka in ring lem lo kha a nia, mahse vanneih thlak takin ka tling ve ta hlauh chu a nih hi, Tetei nen chuan a scooty in a in lam pan chuan kan in khalh haw a, kan cheng dun tur chu a hlim hmel viau bawk.




A in luah hi in mal ding ang kha a ni a, a nuam reuh phian mai, a zau lutuk lo na in a nuam viau tho, inchhung ah kan lut a, nilengin motor ah ka chuang bawk nen ka taksa te hi a kham ve thum mai, thutthleng ah chuan ka thu zawi hnawk a, "Ka pa te chanchin kan hrilh ve phawt anga, ka in bual ang" tiin ka phone chu ka phawrh a, ka pa chu ka call nghal zat, "Pa.. ka thleng tawh a nia aw, hei inchhung ah kan lut chiah" ka ti nghal zung zung a, min lo ngaihtuah leh viau hman tawh.




"I nu in chanchin zawt rawh min ti chhen tawh mai a, kha han be rawh" tiin a ri deuh ruk ruk a, "Bawihte, i thleng thluang maw?" ka nu chuan a rawn ti vat a, "Aw.. thleng tluang e, hei ka thu hahdam a" ka ti sep a, "A lawmawm a nihchu, kan lo ngaihtuah hman lutuk che a, i nau te pawn an ngai nghal viau mai che" a rawn ti leh a, keipawn ka ngai khawp mai, "Ka ngai lutuk cheu keipawn, nu.. kan in tifai ve phawt ang aw, chaw ei te kan la ngai sia" ka tih leh hnuah kan in biakna chu kan ti tawp a.




Inbual turin bathroom ah ka lut a, ka inbual zawh hnuah chaw te kan ei leh a, Tetei chu a tawng barh barh a, ka chhungte ka ngai bawk nen ka mizia chu a cool ruih a, ka tawng vak peih lo hrim hrim, "Awii.. ka phur tawh e, naktuk atang hna kan kal dun tawh dawn a nia" mut hmun ah chuan Tetei'n a ti hliai a, ka lo nui hak ringawt, "Kan boss chhiat loh zia chu maw, i hmu ve anga, I duh ve dawn tih ka chiang, hnathawk hmeichhia ho zawng zawng chuan kan duh vek" a ti leh bawrh bawrh a, ei lo zetin ka lo ner nang, "Lerh lutuk suh, hei vang chiah hi alawm, nutei te pawn haw tura an tih reng che ni" ka ti hlak chuan rum zetin min melh a.




"Ngawi mai mai teh, taka kan boss chu i hmu tawh tak, kha interview ni a a lai a thu kha a nia" a tih leh takah chuan ka ngaituah let a, ka hre ta chiah, nelawm loh zet kha a nih dawn chu, interview ka neih chhung zawng khan a tawng ve miah lova, a bula thu te khan zawhna chu min zawt char char a, amah kha chuan min en ngur ringawt a nihkha, a hmel kha chu tha viau mahse a mizia awm ang tur ka ngaituah hian ka duh dawn lo tih ka chiang, a thutak ren run bawk si.




"Khatiang ka duh chi pawh a nilo, a hmel kha chu a tha a, mahse a tawng tlem hmel emai" ka tih chuan "Kha tak kha alawm hmeichhia te a hip na chhan, a pa daih zawk, mipa tawng zuap zuap ai chuan" a ti leh a, "A nihchu a, keichu ka duh lo, mipa tawng tlem leh thutak ren run bula awm chu nuam pawh ka tilo" a chek tlat tlat a, "I la hrechiang lo mai mai a nihchu, kan ram a milar hmeichhia te hi chuan an duh thei teh mai nia, hnathawh naah pawh rawn kal chilh tu an tam thin mai" a ti leh zung zung a.




"A ho, chutiang ringawt min sawi pui suh, ka chau mutthilh vat ka duh, naktuk atang hna tan nghal a ngai dawn bawk si, muhil tawh ang" ka tih takah chuan engmah a sawi chhunzawm biklo.




Zing ka harh chuan a la hma khawp mai, Tetei chu min khan chungin a la muhil a, a ke chu dah sawn sak in ka tho chhuak nghal, rawng te ka bawl a, room a ka luh leh hnu pawh chuan a la harh lo, "Hey.. tho tawh rawh, a hma tawh lo a nia aw" sawi dat dat chungin ka ti a, "Ninawm e, mut kham lai reng reng hi awm lo mai" ti a phun nang nang chungin a rawn tho chhuak a, ka nuih zui hak hak, "Zan ah i meng rei thei em alawm" ti awlsam then in bathroom ah chuan ka lut nghal.




Ka hnathawh na tur hmun kan thleng a, tlem chuan ka zam ve deuh, "Lut ila kan thawhpui te ka hmelhriat tir ang che" Tetei chuan tiin building lian tak chhungah chuan kan lut a, "Thiante u, heihi ka naupan lai atanga ka thian Lalhlimpuii a nih hi, vawin atang a rawn thawk tan dawn a, Hlimhlimi tiin in ko mai dawn nia" Tetei chuan hmeichhe panga vel lo awm khawm na bula min din pui pahin a ti a, an hming chu an sawi diat diat a, an fel hmel hlawm khawp mai.




"I ni hmasa ber tur a ni sia, boss hnenah i in report phawt a ngai dawn nia, chuan i form tur te pawh en a ngai bawk anga" Tetei chuan tiin boss room lamah chuan min kalpui a, "Va lut rawh, chuan inhnuai chiah ah hian rawn chhuk rawh aw, i form hak tawk tur te ka lo en sak ang che" a ti a, "Min lo luh pui la, keimah chauh chuan ka ngam lo e" ka ti sep a, "I mawl a mi, nangmah alawm in report tur keimah ni lovin, va lut mai mai rawh, a thleng daih tawh ang" tiin a kalsawn nghal nal nal a nihchu.




Hreh tak chungin boss room kawngka chu ka kik dat dat a, chhung lam atang chuan aw nelawm loh zetin lut tura min rawn tih takah chuan thawk la ham ham in ka lut ta a, "Sir, keihi Lalhlimpuii ka ni a, helai hmun a hnathawk thar tur hi ka nia" ka ti sep a, engmah sawi lovin min en reng bawk nen ka kut chu ka sit niap niap a, "A tha a nihchu, pawn lama thut na awl kha i duty na hmun tur chu a ni" a tih chuan mak ti zetin ka en kawk a.




"Mahse..." min en chian em avang chuan ka tawng chhunzawm lo chiang a sin, "Buaina a awm em ni?" a ti nghut a, a aw chu thum lam mah a ni a, a pa em em bawk, "Ih.. customer te lo buaipui tu tur ka nilo em ni?" ka ti ta ringawt a, hna ka dil khan Tetei angin customer te lo buaipui tur angin hna kha ka dil a nia, mahse a ni hi chuan thil dang daih min tih tir a tum hmel bawk si, ka hrethiam lo takzet, bakah a office pawn lamah chuan awm pawh lo ni ta ila, enge ka tihtur ka hre hauh lo.




"Nanghi ka secretary thar tur i ni, chuchu a chiang em?" eng a mah hma in ka huphurh nghal em em ringawt, "Mahse hna ka lo dil dawn kha..." "Engmah sawi chhunzawm a ngai tawh lo, i thawk duh lo a nih chuan i bang thei ang" ka tawng lai chuan a rawn ti leh a, ka rilru chu a buai khawp mai, mahse heta hnathawk turin kan khua ka chhuahsan tawh a, nikhat em pawh ka la thawh hmaa ban chu ka duh teuh lo, ka chhungte pawh ka ngaituah an ngai.




Bakah a secretary ni ta ila ka hlawh pawh a tha daih zawk dawn tih pawh ka hrechiang bawk, "Nilo e, ka thawk ange" ka ti sep a, "A tha a nihchu, I hna tur hrilhfiah tur che in mi pakhat a lo kal ang, va chhuak la, i thut na turah chuan va thu rawh" a ti leh hmuk a, "Sir, ka form tur in hnuai lamah ka lak phawt a ngai dawn a" ka tawng tam a ti deuh nge min nin hmel zetin min en a, a ni bulah hian hna ka thawk dawn chu a ni sia, ka thawh rei hmaa min ban daih mai te ka hlau rum rum.




"Form i hak a ngailo, i thawmhnaw pangai i ha thei ang, mahse taksa lang tam lutuk ni lo se" tha deuh chuan a lo ti ve mai a, bu nghat nghat in a office atang chuan ka chhuak a, kawngka ka pel fel ta maw tih chuan ka thaw chhuak nghal hak a, a office chhunga ka awm chhung zawng khan ka thaw tha ngam lo hrim hrim alawm mawle, ka sawi thiamlo boruak eng emaw takin min chen chilh nimai hian ka hria.




Ka phone chu a rawn ri a, ka en chuan Tetei a ni, rei min ti deuh tawh pawh a ni mahna, "Ka nghak reng che a nia, I va rei ve" a rawn ti hlak a, "Hei ka hnathawh na tur ah ka awm tawh, ka sawi awmzia chu boss khan a secretary ka nih tur thu a lo sawi a" ka ti sep a, "Maw?" a rawn ti vak a nih chu, a au ring bawk nen phone chu ka beng a tang ka la hla vat a, "I bengchheng vak vak lutuk, nge i au chiam a?" ka ti hlar a, "Mak ka ti deuh mawle, engpawh nise a that hlauh chu, keipawh hnathawh na lamah ka let mai ang, chhun ah in biak kan ngai a nia" ti zung zung in phone chu a dah ta daih a.




Mipa pakhat hi ka thut na bulah a rawn kal a, "Keihi Sir Felix-a secretary ka nia, a hlui pawh kan ti thei tawh ang chu, naktuk atang hna dang ka thawk tawh dawn a, thiltih dan tlangpui rawn hrilh tur che in ka rawn kal a" a ti zung zung a, "A nihchu ege tih tur ber ka lo hrelo a" ka ti nghal vat a, "Hun a tam tawh lo bawk nen ka sawi nghal zung zung mai ang aw, let leh vat ka ngai dawn sia" a tih takah chuan ka bu nghauh a, a thusawi chu uluk zetin ka lo ngaithla a a har lutuk dawn loh hi ka ti rilru a.




"Tinge i ban daih a?" ka tih sep chuan nui suk chungin "Ka bang hleinem, ka kai sang zawk a, hetah lo dawr dangah ka thawk tawh dawn a, nangpawh i hna tha takin thawk la, i kai sang ve vat mai ang" a tih chuan ka en haw a, "Hei lo hi dawr dang a la nei maw?" ka ti haw a, "Nei e, Mizoram chhung ah hian dawr 5 lai a nei alawm, Mizoram pawn lamah pawh hmun thum ah a nei bawk a" a tih chuan mak ka ti khawp mai, hemi ringawt pawh hi a len tham tawh tehreng nen, hmun dangah dawr a la nei a nih chuan a hausa viau ang.




A let leh hnuah a sawi ang chuan vawin leh naktuk lama Sir Felix-a hun hman dan tur chu laptop ah ka chhu lut mawlh mawlh a, ka dawhkan chunga phone chu a rawn ri a, ka la nghal vat, "Ka office ah rawn lut rawh" a sawi zawh rual chuan a dah lehnghal hmak a, a mizia hi ka ngaih theih loh chi, peih lo zetin a office ah chuan ka lut a, min melh chiang thin bawk si, "Enge nita sir?" ka ti sep a, "Tun atanga darkar khat hnuah kal chhuah na tur kan nei a, heihi la la ka mamawh tur ho in ziah na a nih hi, lo la khawm ang che, chuan in ei puar hmasa bawk la" a ti a, a sawi tur ang te a sawi zawh hnu chuan ka chhuak lehnghal.




File te ka lak khawm hnuah inhnuai lamah ka chhuk a, Tetei chu ka zawng ru deuh a, ka hmu mai lo lehnghal, ka call ta tawp a, "Hei washroom ah ka kal lawk a, ka lo kal nghal min lo nghak rawh" tiin phone chu a dah a, reilote ah a rawn thleng ve nghal vat bawk a, "Awii.. a mak e, midang pawn mak an ti hlawm lutuk, a secretary kha a kai sang tih chu kan hre vek tho a, mahse a secretary ah i tang dawn tih tuman kan hrelo thung a" restaurant lam kan pan lai chuan a ti zat zat a.




"Keipawn mak ka ti alawm, ka peih loh zia chu, mahse ka hnial thei bawk silo a, kan khua atang hnathawk turin ka lo kal ve tawh bawk nen" ka tih chuan â min tih hmel zetin min en a, "Hmeichhe tamtak in i dinhmun a din kha an chak a nia aw, in ti thei zawk hle rawh, boss secretary i ni bik a nia" a tih chuan ka ner nawng a, "A chak ho chu ni daih se ka ti, a nelawm loh ropui si, hetiang te chuan thin thi in hna ka thawk thei dawn lo tih ka chiang, in ring renga awm a ngai bawk si" ka ti hlak hlak a.




Tetei chuan beidawn hmel zetin min en a, "Huiham.. sawi sawi pawh ni ila i hrethiam dawn chuang lo, chuvang chuan engmah ka sawi peih tawh lo, eitur hi in ei nghek phawt mai teh ang" a ti ta daih a, keipawh chuan ka sawi chhunzawm tawh lo, eitur a rawn thleng a, sana ka en chuan darkar chanve ai tam a liam tawh, "Kal chhuah na tur kan nei sir khan a tia, hmanhmawh ka ngai a nia" tiin eitur chu ka ei zung zung a, restaurant atanga kan chhuah leh hnu chuan sir office lam chu ka pan lehnghal vat.




"I hman chuan kal ang" a office atanga a rawn chhuah rual chuan a ti a, a hnungah chuan ka zui dat dat a, building atanga kan chhuah dawn lai chuan hnathawk ho te chu kan kal pel zel a, hmeichhe thenkhat ten Sir Felix-a mit tla dawn dawn an thlir ka hmuh chuan ka ner nang a, hetiang mipa nelawm loh lutuk hi engtinge an duh theih zawk ni, mak ka ti, a motor ah chuan ngawi rengin kan thu dun a, driver a nei hrang thlap a, a hnungah kan thu dun bawk nen a sir te ah chuan ka thu a.




"Ka sawi chu i hria em?" a rawn ti hluk ah chuan ka ngaihtuah na atangin ka harh zawk a, a lam chu ka en heu a, lawm hmel vak lovin min lo en ve bawk, "Ka tihpalh lutuk Sir, i sawi tha leh thei angem?" ka tih sup chuan a rum nghut a, "Kan thawhpui te nen meeting kan nei dawn a, kan thusawi pawimawh lai anga i hriat apiang i lo chhinchhiah dawn nia, i nikhat na a ni a, i thiam angem?" a tih chuan 'Enge ka thiam loh ang chung te mai mai' ka rilru chuan ka ti sep a.




"Engthil maw i sawi?" keihi ka lo sawi ring leh pek tawh em ni, ka lu ah chuan ka chhu fawk a, Sir Felix-a lam ka en chuan ka chezia chu mak tih hmel zetin a lo en reng a, ka in siamtha vat, keihi a hma atang tawh in ka ngaituah na hi sawi chhuah leh thut thut thin hi ka ching a, ka sawi chhuak lo emaw ka tih pawh in ka bula awm te hian an lo hre hman vek zel, "Awle, ka lo chhinchhiah ang" hrawk thian kharh kharh chung chuan ka ti a.




Meeting na hmun tur kan thleng a, pa upa lam deuh deuh an ni dawn emaw tih laiin Sir Felix-a kum rual pui vel tur an lo ni thluah hlawm a, an landan leh an chezia hrim hrim atang pawh chuan mi hausa tak vek an ni tih a chiang ngang bawk, meeting chu an tan chho nghal mawp mawp a, hmeichhia pahnih chiah kan awm a, an secretary te rawn hruai ve mahse mipa deuh vek an ni bawk nen nuam ka ti teh chiam lo khawp mai.




Sir Felix-a sawi angin an thusawi pawimawh tur anga ka hriat lai chu ka lo chhinchhiah zel a, rin ai takin an meeting rei phian bawk nen ka ning hman lek lek hial, meeting an zawh hnuah chuan kan kal nghal mai dawn emaw ka tih laiin thu khawmuang in an titi leh hlawm a, let leh vat vat ka chak tehreng nen, engmah lah chu ka sawi ngam der bawk silo, mi hausa awm khawm tih takah an fiamthu pawh a sang a, ka awm thiam lo lek lek hial.




"Secretary thar i lo nei a, a chhelo khawp mai a" mipa pakhat hian a ti a, a lam chu ka hawi nghal vat a, min lo en ve reng bawk nen ka hawi sawn leh rang teh a sin, "I hming te min han hrilh ve la, kan secretary dang te hi chu an hming pawh kan hre vek tawh a, nang chauh hi kan hrelo che a nia" amah bawk chuan a ti leh a, "Lalhlimpuii ka ni e" ka lo ti vat a, "I hmelthat ang bawk in i hming pawh a nalh a nih chu" a tih leh chuan chhan dan tur ka hriat loh avang chuan za lo deuhin ka nui ringawt.




"Bialpa i nei em?" a rawn tih leh chuan chil ka lem khalh a, hetiang zawh na min zawh hi ka ring miah lo a sin le, nuam pawh ka ti lo bawk, chhan tum a ka ka ka ang hman zuai tih chuan Sir Felix-a chu a rawn tawng chhuak hlauh a, ka lawm zia chu "Siamkim, ka secretary hi khatiang zawhna zawh vak kha ka duh lo a nia" a rawn tih chuan ka thaw huai thei, "Ka hrethiam e, a chhelo em a, ngaihzawng a neih loh chuan hma a lak chi angem ka hre duh mai mai mawle" tiin Siamkima a tih chu a nui zui hawk hawk a.




"Kan kal tawh mai ange, hmun dangah te la kal kan la ngai si a" Sir Felix-a chuan din chhuah pah in a ti a, rang zetin ka ding ve vat, midangte pawh chuan engmah an sawi zui tawh lem lo, pawn a kan chhuak chiah chu ka thaw huai thei, an thusawi duh zawng te kha fiamthu angin ngai mahse keima tan tak hian thil thar a ni bawk nen dawn sawn thiam a har lam mah a ni, Sir Felix-a car ah chuan kan thu lut a, kan hnathawh na lamah let nghal mai lovin hmundang a a dawr ah chuan kan kal kawi a, a pui hlawm khawp mai.




A sumdawn na hi ka sawi thiam chiah lo, ka hnathawh na hmun kha kawr lam hlir zawrh na a ni a, a to hlawm viau bawk, a awm ve tho, branded vek a i miau a, a hmei a paa hak chi kan kawl a, upa lam leh naupang hak tur thleng in, chuan a dawr dangah erawh eitur lam te a ni thung a, pakhat leh chu motor zawrh na dawr lian tak mai a ni a, an car zawrh te chu ka tan chuan en nawm pui tham tak ang mai a ni, thlakhat a lak luh pawh pui tham tak tur a ni tih ka hrethiam ve nghal mai bawk.




A dawr hi a tlawh kual ve reng tih a hriat a, mahse ka hnathawh na ber ah hian a awm zing berin ka ring thung, meeting naa an sawi dan hmangah khan Champhai lamah hotel sak leh a tum tih ka hre mai a, a sumdawn na chu zauh belh zel a ngai pawh in ka hriat tawh loh nen, tuna a sum lak luh ringawt pawh hi a hmang seng awm tawp silo a, mahse sum a nei a, a ti duh a nih chuan tha ka ti tho, Mizoram pawh hian foreign atangin tlawh tu kan nei ve nual thin a, an thlen na tur hotel changkang tak neih kha a tha ve hrim hrim.




Kan let leh meuh chuan chau tawh tak ka ni, eng vak tilo mah ila kan kal kual nasa lutuk a, a dawr ho kha a lian tham bawk nen floor tin ah khan a kal kual zel bawk nen a hnungah ka zui ve zel a, a pen hlawk bawk si, kal pawh nilo in a um in ka um a, ka chau lutuk ringawt, ka ke te hi a kham thum mai hian ka hria, "I thil chhinchhiah ho kha ka office ah tun atanga minute 10 hnuah min rawn pe ang che" ka thutna zawn a thlen rual chuan a ti a, a office ah a lut tlang nghal daih bawk.




Ka thil ziah te chu ka en nawn leh thuak thuak a, ka ziak fel fai ve viau chuan ka hria, a office ah chuan lut in ka thil ziah chu a hma zawn ah ka dah a, mit ti zim sun hian a en ngur a, lak pawh a tum hmel loh, a kut chu a suih zawm reng a, hrethiam lo zeta ka en chuan a nui suk a, vawin a a nui ka vawikhat hmuh na, ka en reng a, "Lehkha ah hian maw i ziah a?" a ti sup a, a aw chhuak pawh a dam ve hle, lehkha a ka ziak chu a duhdan a ni vak lo a nih ka ring, "Aw.. i duhdan a nih loh chuan ka va ti tha ange" ti a lak let mai ka tum chu, "Ka duhdan a nilo ka tih loh kha, ka lo en ang, chuan i chhuak thei e" a tih chuan ka chhuak nghal vat.




Lalpa leh, keihi ka duh theilo, ka thil ziah na kha ka dairy a nia, ka mimal chanchin ziah ka nei tam mai, a en ang tih chu ka hlau hle, ka dairy kha ka pai tih pawh ka in hrelo, mahse ka bag ah khan a lo awm a, an meeting lai khan han ziah mai na tur ka nei lo khan ka hmang ta ngawt kha a nia, a office ah lah ka lut ngam tawh der bawk silo, ka thut naah pawh thu lo chuan ka vei tawn sek ringawt a, a chhiar zo tawh angem tih ringawt chu ka ngaituah bawk.




Hna ban a hun tep thleng pawh chuan a rawn la chhuak lo, bet lo deuhin naktuk lama a hun hman dan tur laptop a ka ziah luh chu ka en nawn leh a, engmah tih sual ka neilo in ka hria, a duh khirh hmel bawk si, thil tihsual ka neih chuan min ban mai ang tih ka hlau a ni, bang thei ka nilo, ka chhungte chawm nan he hna hi ka mamawh lutuk tlat, ka phone chu la chhuak in laptop a ka thil ziah chu thla ka la a, lehkhabu a ziah chhuah leh a tan ka ti a ni.




Thil eng eng emaw ka tih kawi hnu chuan ban a lo hun ve dawn mai bawk a, mahse keima thu chuan ka haw tawp ngam lo, Sir Felix-a rawn chhuah hma chuan haw thei turin ka bag chu ka siam fel vek tawh bawk, office kawngka chu a rawn in hawng a, rang zet in ka lo ding chhuak vat bawk, Sir pawh chuan haw a tum tih hriat takin a bag chu a rawn khai chhuak a, "I haw thei ang, chuan naktuk atang chuan min thlen khalh tum tawh bawk la" a ti nghut a, nuam lo chu ka ti veng veng mai.




"Sir" kal mai a tum lai chuan ka lo ti a, a pen lai chu a tawp chawt bawk, engmah sawi lovin min en run a, "Ih.. ka lehkhabu kha" ka ti sep a, a ngawih vung vung hnuah "Ka la en hman lova naktuk lamah ka pe ang che" a ti a, ka thaw hak, zanin ah ka mamawh dawn a sin le, mahse ka dil lui ngam bawk silo a, "Sawi duh dang I la nei em ni?" a tih leh chuan "Nei tawh lo ve, tluang takin i haw dawn nia" ka ti ta ringawt a, a hma lama ka thil ziah ho kha a hmuh loh hram ka beisei.




Ka bag chu la in in hnuai lamah chuan ka chhuk a, ka la sawi lang lovin ka hria, ka hnathawh na building hi chhawng thum a sang a ni a, kan awm na floor hi a chung ber a ni, Sir Felix-a office tih loh hi chu hnathawk dang tlem a lal deuh ho an awm ve a, mi hmuh tur an awm mang lo, a chhawng hnih naah hian upa lam leh naupang thawmhnaw hak chi ho an pho chhuak a, a hnuai ber ah nula leh tlangval lam hak chi an pho chhuak thung, hnathawk pawh an tam khawp mai.




Tetei chuan min lo nghak ran tawh a, dawr dang angin an khar tlai lutuk lo a nih hmel, dar 5:30 ah an khar a, zing lamah erawh dar 8 ah an hawng thung, vawin kha chu kan tlai ve deuh hrim hrim bawk a, dar 9 dawn ah kan thleng a nihkha, chupawh Tetei vang vek hian, a in siam rei lutuk a, chuvang vek chu a ni, "A nuam em, awii.. kan thik hlawm teh mai che a nia aw, i nikhat naah Boss nen nileng in in in zui chhuak bik a nia" a bul ka thlen rual chuan phur zetin a lo ti hluai a.





"Sawi pawh sawi lo teh, ka chau teh mai a nia aw" ka ti hlak a, "Chupawh nise mipa chhelo deuh bulah i awm a, chau pawh nila a nuam tho tho ang" a la ti talh a, "Aw.. i sawi tui leh hma in kal phawt teh ang, ka chau lutuk tlat, in thlen vat ka chak" ka tih takah chuan a scooty dah na lam chu kan pan a, haw kawng ah te chuan kan in be zui mawlh mawlh a, scooty a in phur kan ni bawk nen tawng hriat a har bawk si kan in be ring khawp mai, a au in kan au lung lung mai alawm.




In kan thleng a, Tetei chu a in bual hmasa a, keiin rawng ka lo bawl thung, "Va in bual ve tawh rawh, ka lo ti ve tawh ang" Tetei chuan a tih avangin room ah lut in ka thawmhnaw te chu ka phelh a, ka in bual zawh hnu chuan ka hahdam sawng sawng mai in ka hria, boss khirh lutuk bulah khan ka thawk reng thei dawn em ka hrelo, mahse ka theih anga rei chu thawh ka tum nghet bur thung, tha taka hna ka thawh chhung chu min ban lo turah ngai phawt mai ila.




"Awii... i vannei bik e, vawin lamah pawh i chanchin bak hi kan sawi lo a nia, nangmah nih an chak thu an sawi vek, keipawh tiam in, boss hian a secretary tur atan hian a duh tui em em a, a secretary hna a aa rawn kal loh tum pawh in midang a thawh tir ngailo, engtinge maw i lo tih bik ni, a secretary tan a duh bik che a nia" Tetei chuan a ti leh ta zung zung a, ka ning hetiang thil a sawi reng hi, enge maw boss pawh chu an duh hlawm viau ni.




"I ninawm sawi tawh lo teh, ka ning a nia, vawinah pawh hahthlak ni miah silo in a dawr hrang hrang ah a kal a, a lian hlawm si, a hnungah ka zui dat dat a, a pen hlawk bawk nen a um in alawm ka um, a bawp anga sei ka nei turah a ngai nge mawni" ka ti hlak hlak a, kan khua ah khan huan chu kan nei ve ngei a, hlat pawh a hla tham viau bawk, nitin in ka feh ve thin a, mahse vawin a boss nen kan in zui ai pawh khan a hahthlak loh fe zawk.




"Hui... nanghi chu i mak a nih hi a" Tetei pawh chuan a ti ta tawp a, chaw kan ei kham ah ka room tur ah chuan lut leh in khum te chu min siam pui thlap a, kan in luah hi a lian lo ka tihkha, mahse room pahnih a awm ve thlap a, Tetei nen kan in daih chiah bawk, "Naktuk chu kal hma a ngai a nia aw, boss in min thlen khalh tum tawh la a tih khan ka zak chem chem alawm, i in siam rei lutuk a, nangmah vang vek" ka ti leh zung zung a.




A tuk lamah chuan kan chhuak hma tawh hle, tlai ka hlau bawk nen zing atangin Tetei ka tur a, a phun nuah nuah reng bawk a nihkha, boss a lo la thleng lo hlauh bawk a, ka bag te chu dah fel in ka lehkhabu te a boss hun hman dan tur ka ziah chhuah chu ka en zung zung a, engmah fel lo a awm love, "Ka office ah coffee min rawn pe ang che" a lo thlen rual chuan a ti sup a, a lut zui nghal, coffee chu siam zung zung in boss room ah chuan ka lut a, a hma zawn a coffee ka dah hnuah ka thil ziah na chu la chhuak in ka chhiar nghal zung zung a, ka zawh hnua boss ka en chuan mit tla leh lovin min lo en a nihchu, a lung ka ti awi lo a ni ngei ang, a coffee pawh chu in tum hmel a pu lo, keimah ringawt chu min en a, nuam lo ka ti tak tak a ni.


Cont....

A ngaihnawm hmel in tih chuan comment lamah khan in lo sawi dawn nia aw, chuan tuna kan story hi chu dah hun vel a awm lovang, ka hman zan apiangin ka dah dawn a, a tawp note ah hian ka ziah lan thin dawn avangin in lo chhiar vek zel dawn a nia aw..

Ads click hi ti hram hram ang u aw, ads kan click atang hian writer ten hlawh an lo neih ve phah thin a, story min ziahsak man lawmthu sawinan ads kan click theuh dawn nia

[Rebec Nunziri]

Chapter-2



Lalhlimpuii POV




"Heihi i lehkhabu a kha a nia, I la thei tawh ang" ti sup in ka dairy chu a rawn lek chhuak a, ka lo ban rang khawp mai, "Ka lawm e" ti sep a chhuah ka tum rual chuan min ti ding leh rih a, "Nidangah chuan coffee hi tak tha deuh in i rawn siam tawh dawn a nia" a tih leh hnuah office atang chuan ka chhuak a, rin ai takin a sual dawn lo niin ka hria, min biak dan ah pawh khan hriat hreawm tur engmah a awm lova, a duh khirh hmel tih mai loh chu.




Sir Felix-a chu dawr atang a chhuak leh tawh a, zui a ngaih loh tur thu a sawi khan ka lawm zia chu, a bula ka awm hian ka sawi thiam siloh danglam na hi ka nei tlat thin a, "I haw hman dawn tawh em?" Tetei chuan min rawn call a, ban chu a hun tawh, mahse Sir Felix-a a lo la let bawk silo a, ka thu a lo haw ngawt chu thiltih chi ah ka ngai mang bawk silo, "Lo va haw hmasa mai la, Sir Felix-a a lo la let bawk silo a" ka ti ta tawp a.




"I lo haw thei ang maw, a tlai tawh a nia" a rawn tih leh chuan ka nui sak a, "Min ngaihtuah suh, puitling ka nih ve tawh hi, ka lo haw thei mai ang" ka tih takah chuan engmah a sawi tawh biklo, zan dar 7 a pelh tawh hnuah pawh chuan Sir chu a rawn la let lo, haw mai chu ka duh rum rum mai, ka ril lah chu a tam tawh mai bawk sia, "Hlimhlim I la haw nange?" Sir Makima chuan a rawn ti a, a ni hi Sir Felix-a hnuai chiah a awm a ni a, Sir Felix-a nen cousin an ni nghe nghe.




"Boss hi a lo la let silo a" ka ti sep a, "A nihchu mawle, ka u chu a rawn let tawh lovang, i duh chuan haw rawh, tlai lama a chhuah hi chuan a rawn let tawh ngailo" chutiang a nih te chuan a chhuah dawn khan min hrilh ve tur a nia, "Awle, ka lawm e, a nih chuan ka kal nghal mai ang, a tlai tawh bawk sia" ka ti sep a, ka bag chu ka ban nghal vat bawk, a ni pawh a kalsawn nghal mai a, dawr atang chuan ka chhuak a, dawr nghak tu te pawh an haw vek tawh, a khar tu in khar a lo tum mek tawh zawk.




Taxi chu ka chang a, a la vang em em zui, khua a thim ruih tawh bawk nen ka hmanhmawh rilru viau tawh mai, "Ka lo thlah dawn che em ni?" tih ri ah chuan ka sir lam chu ka en a, Sir Makima bawk kha a lo ni, "A ngailo Sir, ka ti buai mai mai ang che, taxi ka hmu vat mai ang" ka tih chuan nui suk in a motor chhung atang chuan a hawi kual a, "Taxi lak tur a vang ngawt ang, a tlai tawh bawk si a, hmeichhia mahni chauh a awm chu a ṭhalo a nia, lo kal rawh ka lo thlah ang che" a ti leh sup a, ka duh chiah lo, ka tawi khawmuang hret hret a, ka tih buai mai mai ka hlau a ni.




"I kalna lam turah ka kal maithei a sin, lo kal rawh, a tlai zel a nia" a tih leh takah chuan ka hnial duh ta lo, a car chhung ah chuan ka lut a, "Khawi veng ah nge i awm?" a tih chuan kan veng awmna chu ka hrilh a, "Ka kal na lam tur tho a nihchu, i veng thenawm chiah ah kan awm ve alawm" a tih takah chuan ka thaw deuh huai mai, a tawng duh em em a, nuam lo ka tih a hlau nge min be reng a, Sir Felix-a ang lo takin a ni chu a tawng duh a, a bula awm pawh a nuam hle.




Kan veng awmna a hla tham ve bawk nen kan in kawm tui ta phian a, keipawh chuan ka nel ve vat bawk, "Ka u bula hnathawh chu enge a an?" a tih chuan "Ka la hrethiam chiah lo, mahse a sual lutuk in ka ring lova, a duh khirh hmel ka ti" ka sawi zawh rual rual chuan a nui chhuak hawk hawk a, "An ti fo a sin, i sawi ang khan a sual hran lo a nia, a tawng duh lo ve a, a hmel lah a lo nelawm lutuk loh bawk nen mi hian an hlau thin reng a nia, kan unau ti tawh mai ila kan cousin kual ho ah hian a upa ber a, tupawh hian kan zah a, harsatna kan neih a kan hrilh hmasak ber pawh amah tho hi a ni" a ti sup sup a.




A thusawi chu ka lo ngaithla kar a, Sir Felix-a ka ngaituah a, in nghah na tlak mipa a ni tih chu a chiang alawm, a unau te tan pawh a thlamuan thlak viau ang, "Hetah hian ding mai la, saw saw kan in a nia" tiin kawng sir a in chu ka kawk a, "Awle, remchang hunah lo len i phal angem?" a tih chuan mak ti deuhin ka lo en a, nui sang chunga min lo en ve reng tih ka hriat chuan ka in siamtha vat, "Tehreng mai, i duh hun hun ah i lo leng dawn nia" ka tih hnuah motor atang ka chhuk a, kan in mangtha hnuah a ni pawh chu a tlan chhuak lehnghal mai bawk.




Inchhung a ka luh chuan Tetei thutthleng a lo thu ka hmu nghal zat a, "I va rawn thleng har reuh ve, ka ngaihtuah hman che alawm" a lo ti vat a, "Nia.. Sir Felix-a kha a lo let leh dawn emaw ka tia, ka lo nghak a, mahse a rawn let tawh silo a, ka lo haw alawm" a bul a thut thlak pah chuan ka ti a, "A nihchuan engin nge i lo haw, taxi chuan a mi, min lo call mai lova, ka lo lam tur che a nia" a tih leh zung zung a.





"Sir Makima rual in ka lo haw mawle, taxi hman tur ka hmu silo a, min lo thlah hlauh a, ka lawm zia chu" ka ti leh sep, "Awii.. nanghi i van vannei thei bik tak, Sir Felix-a secretary i nih mai bakah Sir Makima'n a lo thlah tawh bik che a nia, chupawh ni hnih chiah i rawn la thawh hnuah" a phul deuh hluai a, "A ho emai, khatiang khan awm vak thin lo teh, ka ning" ka ti hlak a, enge maw a phur vak zel ni, ka dar ah min la beng awk awk lehnghal.




"Nanghi chu aw, kan hnathawh naa mipa chhelo pahnih hnaih ah i awm bik a nia, phur loh na chi a ni hleinem, Sir Makima hi Sir Felix-a tih lovah chuan a chhelo a, kan hnathawh naah phei chuan an unau hian hmeichhia ah an tla na a nia aw, hnathawk hmeichhe tam tak te hian nangmah hi nih an chak vek a nia, keipawh tiam in" uang thuang zet hian a ti leh a, "Ka ril a tam rap, chaw ka ei dawn" tia thawh ka tum lai chuan "Keipawh ka la ei lo ka lo nghak che a, ei rual mai ang" a tih takah chuan chaw chu kan ei rual a.




Kan room ve ve ah chuan lut in mu turin ka in tin tuah a, khum a ka lawn hnuah ka chhungte chu ka call a, a la tlai lutuk lo bawk a an mut chu ka la ringlo, "Pa.." ka ti
tawng a, "Bawihte" a rawn ti ve nghal sup a, "In mu tawh em?" ka tih chuan "Aw.. i nau te chu an mu tawh a, hei i nu nen kan la meng a" tiin a ri deuh sut sut a, "Bawihte, min va rawn be har ve" ka nu chuan a rawn ti lung lung a, "Nia.. vawin chu ka haw tlai deuh a" ka lo ti vat.




"I hnathawh chu a hahthlak viau em?" a rawn tih leh chuan a hahthlak loh thu te chu ka sawi a, nu leh pa te han biak meuh chuan ka lung a leng zual takzet, ka naupan lai atang an hlat ah rei tak ka awm ngailo a, min duat bawk nen puitling ve uai tawh mah ila chhungte nge nge chu ngaih an na ngang mai, reife kan in biak hnuah kan dah ta hram a, naktuk lamah hna kal hma leh a ngai dawn bawk nen muthilh tum chuan mit ka chhing vat a.




Sir Felix-a a lo thlen hnu chuan a coffee tur chu ka pe vat a, a hun neih dan tur te ka sawi thuak thuak hnuah ka chhuak lehnghal vat bawk, chhun ah chuan thil ei tura kalsawn ka tum lai tak chuan Sir Felix-a chu a office atang a rawn chhuak a, "Thil I ei dawn em ni?" a rawn tih chuan ka bu nghauh nghauh a, mahse hetianga chhan a duh lo tih hre zawm lehnghal zat in "Aw" ka ti leh vat a.




"Kal ila, keipawh thil ei turin ka kal dawn chiah" ka en vat a, a bula thil ei hi ka duh reng reng lo, bakah a bulah hi chuan engmah ka ei tha ngam lovang, ka boss a nih na angin ka veng thawng lo thei dawn lo bawk nen, "Enge i ngaihtuah kan kal dawn em ni, chawhnu lamah meeting ka nei dawn tih i hriat kha" a rawn tih leh chuan "Sir.." a kalsawn dawn chiah tih chuan ka ko a, ding chungin min rawn en vat a, min melh chiang thei bawk nen ka zam leh vek tawh.




"Sawi la" a tih leh sup chuan "Ih.. ka thiannu in min nghak a" zam ru tak chuan ka ti zawi sep a, "Ok.. buaina tur a awm loh chu kan ei rual vek thei alawm" a ti awlsam leh mai a, a kal nghal nal nal bawk nen a hnungah chuan ka zui dat dat a, Tetei chuan min lo nghak reng tawh, Sir Felix-a nen kan kal dun min hmuh chuan mak tih hmel takin min rawn en hau a, "Min rawn zui rawh u" Sir Felix-a lah chuan ka thiannu zawn a ka din rual in a rawn ti a.




"Enge awmzia?" ka beng bulah Tetei chuan a rawn ti sep a, "Kan ei rual dawn a nih hmel" mak a tih hmel hle, "Mahse ngatinge, nidang ah chuan thil eitur in a chhuak ngai bawk silo a, a office ah a ei mai zel khan ka hre sia" a ti leh sep sep a, "Ka hre tawh bik lo, kal phawt ang" tiin Sir Felix-a chu kan um zui dawr dawr a, restaurant chhung a kan luh te chuan hnathawk dang te an lo awm ve nual a, keini chu min en thup bawk nen nuam chu ka ti lem lo hle.




Table awl ah chuan kan thu a, Tetei pawh nidangah chuan a tawng duh barh barh nen vawin chu a ngawi dak a, Sir Felix-a vang a ni tih ka hria, keipawh chuan sawi tur em em ka nei biklo, "In duh duh chah rawh u" a ti sup a, menu chu a bih nghal daih, momo ka chah a, Tetei'n chow a chah thung, Sir Felix-a erawh in enge tih pawh ka hriat ngai loh chu a chah a, eitur a rawn thlen hma chuan tumah chu in be lovin kan ngawi vek a, a van nuam lo chiang tak.




"Hlimhlim" tih ri ah chuan ka hawi chhuak vat a, chutah Sir Makima chu nui sangin kan table sirah a rawn ding a, "Thil in ei dawn chiah elaw?" a tih chuan nui var var chungin ka lo bu nghat a, "A that hlauh chu, keimah chiah in ka ei dawn bawk nen ka lo zawm ve ang che u" tiin ka sir a thutna awl ah chuan a rawn thu a, "Mama chu i office ah i ei dawn emaw ka tia, ka rawn sawm duh lo che a" thawveng zet hian a ti leh zung zung a, Sir Felix-a ka en chuan chhan tum hmel pawh a pu lo.




Sir Makima a rawn kal hlauh chu ka lawm takzet, a tawng char char a, nichin a kan boruak uap churh pawh kha a zia tawh takzet a nimai, "Hlimhlim, i thiannu hi min han in hmelhriat tir ve la" Sir Makima bawk chuan a ti leh a, "Tetei a nih hi" ka tih chuan "Awle, keichu min hriat tho ka ring a, ka hming chu sawi tawh lo mai ang aw" Tetei en chung chuan a ti a, Tetei pawh a lo bu nghat nghat a, eitur a rawn thlen takah chuan kan ei nghal vat a.




"Muangchang khan ei rawh, tuman an ei zawh khalh lovang che" ka momo ei ka hak a, ka khuh bawrh bawrh lai chuan Sir Makima chuan a rawn ti a, tui min pe nghal bawk, ka in nghal khawlh khawlh a, ka hrawk chu a thip hlar mai, ka mittui a tling pam bawk a, "Fimkhur deuh in ei rawh, naupang ang mai" Sir Felix-a chuan a rawn ti chhuak hluk a, a lam ka en chuan dur khui in min lo en a, lungawi lo hmel a pu deuh in ka hria.




Ka thil ei pawh a tui tawh lo, Tetei ka va en chuan a ni pawh a ti deuh dak a, kan thian dun chuan kan ngawi reng a, Sir Makima hi awm lo phei se chuan tumah tawng tur kan awm lovang, thil kan ei zawh chuan restaurant atang kan chhuak a, kan ei man zawng zawng Sir Makima'n a pe vek a, kan hnial viau pawh in a ti lui tlat bawk nen a in thlahrun awm khawp mai, building lam pan chuan kan kal a, Sir Felix-a pawh ngawi reng in a kal ve zel bawk.




"Hlimhlim i thiannu nen in inah chuan ka hman hunah ka lo la leng dawn a nia aw" Sir Makima'n a rawn tih chuan ka en vat a, a fiamthu emaw ka tih laiin a thutak hmel phian bawk sia, "A.. awle, I lo len duh phawt chuan" ka sawi zawh rual rual chuan Sir Felix-a chu a lo rum nghut a, ka en chuan rum zetin min lo en ve reng a nihchu, "Muang hman kan nilo, min rawn zui rawh" tiin a kal nghal nal nal a, zui mai lovin a che zia mak ka tih em avang chuan ka en reng ringawt.




Ka zui lo tih a hriat rual chuan a rawn hawi let a, Sir Makima leh Tetei te pawh chuan mak ti zetin Sir Felix-a awm dan chu an en ve reng a, "Ka sawi chu i hrelo em ni?" a rawn ti leh nghut a, "A nih ka kal phawt mai ang aw, Sir Felix-a sawn meeting a la nei dawn a" tiin ka kal nghal a, building chhung a kan luh te chuan a ngawi reng a, a pen hlawk bawk si, a hnungah chuan a tlan in ka tlan deuh dawr dawr a, ka hah tawh bawk si, ka thaw deuh hlawi hlawi tawh mai.




Sir Felix-a te meeting nei tur chu kal chhuah ngai lovin a office ah an nei dawn a, a thawh pui te pawh an rawn kal khawm tan a, a hmaa meeting a neih pui te tho kha an ni hlawm, Siamkima a tih pawh kha a rawn tel a, Sir Felix-a office a a luh hma in min fiam leh zawk zawk hman a, a awmdan leh a hmel hmang atang hian a ler ve thawkhat viau in ka ring, mahse misual tak chu a nih hmel loh, min fiam dan pawh kha tenawm zawng a ni lo bawk.




An coffee in tur te ka lak zawh hnuah office ah chuan ka lut a, an lo thutak hlawm khawp mai, Siamkima coffee ka pek chuan a lo nui sang a, ka nuih let ve ringawt, ka in her a, Sir Felix-a chuan min lo en reng a, engmah tihtur em em ka neilo bawk nen ka chhuak leh vat, an meeting chu an rei phian mai, tlai lam thleng in an la meeting a, khua a lum bawk nen ka mut chhuak lutuk chu ka ham leh bai bai thin, min rawn sawi dat dat tu an awm chuan chiang lo riai in ka harh a, Sir Felix-a nen chuan kan in melh tawn ran a.




Ka ding chhuak nghal vat, "Kha i chil thli luan na a val kulh a nia" a tih chuan ka hmui sir chu ka hup vat a, a thiante an awm ve vek bawk nen ka zak lutuk chu khuk ral daih mai te ka duh rum rum, a thiante chu an lo nui tha hlawm bawk si, ka zah na a belh chhah sawt, khatiang te chu ka hriat lai chauh a sawi mai tur a nia, a thiante hriat tur in a sawi kher chu ka ngei hlauh hlauh bawk.




"Hlimpui a ti mai mai a nihkha, engmah a awm lo" Siamkima chuan a lo ti vat a, ka muthilh in chil thli ka thlauh ngailo hrim hrim, Sir Felix-a chu lungawi lo ru deuh in ka en a, nui duh miah lovin min lo en a, ka va han ngei tak, "Kan kal phawt mai ange, Hlimpui nakinah kan la in hmu leh dawn a nia aw" Siamkima'n a tih chuan ka bu nghat a, an kalsawn tak hnuah chuan Sir Felix-a nen chiah kan awm leh ta a, enge a ngaihtuah ni, min en reng bawk si.




Ka lo mutthluk vang khan a thinrim a ni ngei ang, "Sir ka tihpalh lutuk, ka lo muthlu a" min en reng avang chuan ka ti a, "Thleng nawn tawh suh se, chuan heta hnathawk i nih angin ka thawh pui te lakah mit mei engmah hmuh suh ang che" ti hmuk in a office ah chuan a lut a, tuna a thusawi awmzia kha enge, kei hian a thiante mit kha lak tum angah min ngai amaw, ka thinrim lutuk chu ka table chu ka chum deuh pawp a, chutiang ti duh tur hmeichhia chu ka nilo, zaklo lutuk mai.




Hun a kal ve zel a, thlathum lai ka thawk ve tawh, Sir Felix-a chu a ni tel in a khirh ka timai, ka lakah a sual em em a, a chang phei chuan min vin nasa thin lutuk hi ka tah te lam lam a chhuak thin, kar hmasa phei kha chuan hnathawk dang te hmaah min vin hrep a, ka zak lutuk kha ka thi thei mai dawn emaw ka ti hman hial zawk, tunah pawh hna tamtak min pe a, hetiang ti tu tur te chu a hrang in an awm thin sia, tinge kei min tih tir daih hi ka hrethiam theilo.




"Ninawm lutuk, kei lo pawh ti tu tur an tam nen, min chhawr hlum thak a tum emaw ni?" keima hriat tawk leh chuan ka phun hlak hlak a, a ninawm em bawk a ni, ka hna zawng zawng ka ti zo vek tawh, mahse he ka boss khirh lutuk hian a la duh khawp thei reng reng lo, ka thawh pui dang te chu an haw vek tawh, chhun atangin engmah ei lovin hna ka la thawk char char a, chawlh hahdam na hun ka la neih loh chu sawi loh thil ei na hun tak ngial pawh ka la neilo.




File chu ka en mawlh mawlh a, hei te hi ka tihtur a ni pawn ka hrelo e, mahse boss ber in ti turin min ti miau si a, ka pum chu a ri rawk rawk mai, dawr in hawng a awm tawh awm bawk silo, file en fel tur lah chu ka la nei tam em em lehnghal. Coffee la turin ka kalsawn lawk a, ka let leh chuan ka boss khirh zet mai chu ka dawhkan bulah a lo ding ran a, ka file en mek, dawhkan a ka pharh duai chu a lo bih ngur bawk, phur lo zet in ka kal hnai zel a, ka thawm a hriat chuan a rawn hawi vut a, hmeltha hle mahse a nelawm loh leu luau lutuk vang hian ka hmu tha hleithei der lo.




"I zo tep tawh em?" a hmu ve reng sia, ka la zawh dawn loh nasat zia te chu, tun kum chhung zawng a kan thil hralh chhuah na file zawng zawng en fel vek turin min ti a, tunah december thla tir lam kan chuang kai tawh a, kan in hralh na en nan ringawt pawh zankhua chu a daih ang chu, "La zo lo deuh Sir" tha tak chuan ka ti mai a, ka kut a ka coffee in tur ken chu rawn ban in a la in daih zui, "Ka room ah rawn lut rawh" tiin a kalsawn zui a, a hnunglam chu rum zetin ka en a, a rawn hawi let thut a, ka lo in siamtha nghal vat.




A office a ka luh chuan a seat ah thu in min lo en reng a, "Enge nita Sir?" a hmaa ding chung chuan ka ti a, "I la tih zawh loh ho saw chu naktuk ah midang in an khawih mai ang, chuan naktuk chu dawr ah kal lovin zin chhuah na tur ka nei a, min zui ve a ngai bawk ang" a tih chuan ka meng phawk vak a, "Sir khawiah nge kan zin dawn min hrilh thei angem?" ka ti sep a, ka va han phur lo ber mai tak em, Sir Makima nen chuan nise tlem in a dan a dang deuh tur a nia, a tawng duh lo bawk si.




Kan zin na tur hmun a sawi chuan kan khua kan tlan pel a ngai dawn tih ka hre nghal, ka chhungte tlawh kawi pawh a remchang ngawt ang, mahse Sir Felix-a bulah hi chuan ka sawi ngam der bawk silo, "I bag la la kan kal nghal dawn nia, naktuk ah chhuah hma kan ngai dawn a, in thlen vat kha a pawi lovang" tunah pawh a tlai tawh tehlul nen thlen hma tih te a la sawi a nia, ka bag ka ak tha chiah tih chuan a rawn chhuak ve mai a, kan in zui chhuak nghal.




Zan a tlai tawh em avang chuan Sir Felix-an min thlah haw a, kawng tluan chuan tumah mah kan tawng lo, kan in zawn a motor a tih din rual chuan hmanhmawh zetin kawngka chu ka hawng a, ka chhuak nghal, "Sir min thlah avangin ka lawm e, tluang deuh in i haw dawn nia" kun hniam chung chuan ka ti a, in lam pan chuan ka kut zui nghal, a tlai tawh bawk nen Tetei pawh a mu tawh a ni ngei ang, a lo reh thuap tawh a.




Ka la mu ve mai theilo, ka in tihfai hnuah naktuk lama kan zin na turah ka mamawh ang tur te chu ka pack fel leh a, Sir Felix-a kha engtik thleng nge kan cham dawn ka lo zawt bawk silo nen thawmhnaw ken dan tur pawh ka hrethiam lo, mahse kan cham rei lutuk chu ka ring lem lo thung a, tshirt pathum leh kekawr pathum, kawrfual hak nuam zet pakhat nen ka keng a, chuzawng chu a nimai, ka mut ve meuh chuan a tlai tawh lutuk ringawt, naktuk chu mut kham lo deuh a thawh leh ngei a ngai dawn a nih hi.




Ka alarm set a rik rang rang chuan fiah lo zetin ka meng a, ka muhil leh mai dawn a ka hriat vangin ka tho deuh phut a, ham bai bai chungin bathroom ah ka lut leh a, rawng ka bawl mawlh mawlh lai chuan Tetei pawh a rawn tho a, "Nizan I lo haw lai ka hre miah lo" tiin chair ah chuan a thu a, "Vawinah ka zin dawn a nia aw, Sir Felix-a hnaah zui a ngai dawn a" ka thil kan chawk mawlh mawlh pah chuan ka ti a, "Min va hrilh har ve" a ti leh a.




"Keipawn ka hre lawk bik hleinem, Sir Felix-a khan nizan ka rawn haw dawn in min hrilh ve chiah alawm" ka ti a, "Taka nizan I sawi takah chuan Sir Makima a rawn leng a sin" a tih chuan ka en vat a, "Enge a lo tih a?" ka ti sep a, "Aw.. a lo leng ve mai mai a niang chu, a hma pawn ka lo leng ang a tihkha, awi.. nangchu i vannei bik e, i rawn thawh na a la rei loh tehreng nen Sir Felix-a leh Sir Makima te bul hnaiah i awm thei bik a nia" a ti leh tawh, chhan pawh ka chhang peih lo e.




Sir Felix-a chuan min rawn lam thlap a, a driver nen an ni dawn emaw ka tih laiin amah chuan motor chu a khalh a, Tetei chu hnaah a kal tawh avangin chahbi chu ka ak a, a hrang ve ve in kan kawl tho bawk nen engmah buai na tur a awm chuang lo, kan tlan zel a, Aizawl chu kan chhuah san a, zing chaw ei sa a kal kan nih vangin kan ding khawmuang lemlo, chawhnu lam dar 1 a rik dawn takah chuan kan ding ve ta hram, ka ril a tam mai tawh bakah ka zun te a chhuak.




"Sir lo va kal hmasa la ka rawn kal ve vat ang" thingpui dawr a kan luh dawn chuan ka ti a, ka zun a chhuak tawh lutuk chu ka kal tha hleithei tawh lo, ka tai pawh a na vek tawh, "Khawiah nge kal I tum?" a ti sup a, "Ih.. washroom ah kal ngei ngei ka ngai" ka tih takah chuan engmah min zawt zui tawh lem lo, thingpui dawr a ka luh chuan Sir Felix-a ka hmu mai lo, ka hawi kual a, hmeichhe pahnih bula Sir Felix-a lo awm ka hmuh chuan pan mai tur nge ka hrethiam lo.




Ka din na ngaia ka din reng lai chuan amah zawk chuan min rawn hmu a, "Lo kal la, eitur ka lo chah kep tawh che a nia" a tih takah chuan ka pan hnai vat a, "I va rei ve" a sir thutna awl a ka thut thlak rual chuan a ti leh nghut a, "Ih.. washroom hmang tur an lo tam lutuk a, ka nghak a" a ti tha ve mai a, engmah min zawh zawm tawh lo, hmeichhe pahnih te chuan min en duh hle a, ka sawi thiam lo, min ngaih theih loh hmel zetin min en ka ti mai.




"A ni hi tunge a nih a?" hmeichhe pakhat zawk chuan min kawk va pahin Sir Felix-a chu a en a, "A sec...." ka tih lai mek a Sir Felix-a thu rawn sawi vang chuan amah chu rang zetin ka en a, hmeichhe pahnih te pawh chuan mak tih hmel zetin min rawn en a, awmdan tur ka thiam lo lek lek hial, tunah khan a bialnu angin min sawi miau alawm, mak tih lohna chi a nilo, ka hmaa hmeichhe pahnih thu te ai pawh hian mak ka ti zawk fe ang.




"Mahse, bialnu i neih awm kan hre silo a" hmeichhe pakhat chuan Sir Felix-a thusawi rinhlelh hmel fe chuan a ti a, an in hre lawk sa tih ka hrethiam nghal mai, "Mi zawng zawng hnenah bialnu ka neih thu sawi chu ka bat a ni hleinem nilawm ni?" Sir Felix-a chuan nui suk chungin a ti leh a, hmeichhe pahnih te chu an ngawi hmak a, keichu min rawn melh leh rawm rawm thin a, an pawi ka sawi awm pawh ka hre tawp silo a, eng ang pawn min melh rum mahse ka hlau lo ve chiang emai.




Thil kan ei lai te chuan Sir Felix-an a bialnu treat in min treat bawk nen ka ei tui loh phah vek in ka hria, dawr atang chuan kan chhuak a, hmeichhe pahnih te pawh an kal hrang hram e, Sir Felix-a chu biak dan mai tur ka hriat loh avangin a hnungah ka zui dat dat a, a motor dah na kan thleng tep tih chuan khami te thian dun bawk khan kan lam chu an rawn pan a, bag lian ve lam hi an keng ran bawk, "In rual in kan lo kal ve mai ang, kan motor chuan na saw a chhe bawk sia, nghah ai chuan, kan kal na tur a in ang tho a" a sang zawk chuan a ti zat zat a.




Sir Felix-a chuan engmah a sawi lo, a hmaa thut luh ka tum chu a sang zawk chuan min rawn nek sawn nawlh a, amah chu a thu lut nghal thak a nih chu, a chezia chu ka en reng ringawt, a awmdan atang hian Sir Felix-a a duh tih ka hre thei mai, mahse Sir Felix-a hian a duh ka ring lo, "Rami a hnung ah sawn va thu rawh, khachu ka bialnu seat a nih kha" Sir Felix-a chuan Rami a tih nu chet dan chu lawm loh hmel a ti hluk a.




"A ho e, a hma zawng in hetah ka thu thin a, pawi a ti chuang nang, ni em?" tiin keichu min rawn en a, pawi ka tih loh thu sawi ka tum mek lai chuan Sir Felix-a ka va en a, a mitmeng chuan eng emaw tak min hrilh tum a nei tlat in ka hria, chuan chuchu ka hrethiam bawk, Rami hi a hmaa thu turin a duh lo, "Fe.." ka ngawi leh dat a, a bialnu angin min sawi bawk nen Sir tia koh chu a rem chiah bawk silo a, mahse a hming tawp a han koh kha ka tim deuh tlat a ni.




"Felix-a bulah ka thu zawk ange, hei i thiannu nen hian thu dun zawk rawh u, bakah khakha chu ka seat a nia, i hriatthiam ka beisei, ka awm loh hunah i duh chuan i thu leh dawn nia" ka ti a, min melh rum khawp mai, a thutna atang chuan a rawn chhuak a, kawngkhar chu khar dawp in a hnunglam ah chuan a in sawn tau nghawng nghawng a, nula pui tawh chutia a che chu ka nuih te lam lam a ti za zawk.




A hmaah chuan ka thu lut a, Sir Felix-a pawh rawn thu lut ve in kan tlan chhuak nghal, "Felix, kan in hmuh loh chhung khan I lo inthlak danglam tawh zawk nge i hmeichhe duh zawng chu an va dang ta ve" Rami bawk kha a ni, a bula thu a thiannu Seni chu a lo nui hak a, an awmdan atang chuan min hmu hniam leh tih ka hrethiam a, ka thinrim hle bawk, mahse han hnial vak dawn in Sir Felix-a a awm ve bawk si a, ka in sum hram hram a ni.




"A ni mahna, Hlimhlimi hi a danglam a, a rilru a tha a, a nihna ang tawp in a lang bawk a, hmeichhe dang angin ze thup a neilo bawk nen amah ah hian ka duhthusam engkim chu a awm, ka sawi awmzia chu in hriatthiam ka ring, hmeichhe danglam tak a ni, ka tana hmeichhe special tak" tiin ka kut chu a rawn vuan a, ka phu zawk lehnghal, hmeichhe pahnih te chu an ngawi hmak a, Sir Felix-a thusawi kha a sawi mai mai tih hre mah ila ka chhungril ah hian danglam na mak tak a awm tlat.

Cont..

Click leh comment kha aw, chuan naktuk zanah a awm maithei awm lo maithei aw, dar 10-11 hmaa a awm lo a nih chuan a awm dawn lo tihna a nimai..

[Rebec Nunziri]

Chapter-3



Lalhlimpuii POV




Kan khua kan lut a, Sir Felix-a chu ka melh ru leh zeuh thin, kan in hi kawngpui kam maiah a awm vangin han kawi zawk kha a buaithlak lutuk loh bawk a, sawi ve hrim hrim chu ka duh, ka nu te pawh zingkar ah khan ka be tawh a, kan kawi theih mai theih thu ka sawi vang khan lo ah pawh an kal lova, min lo chang ran tawh ang, Sir Felix-a chuan ka kut chu a la hum ran a, ka tih chet zeuh chuan min rawn melh vut a, motor a khalh bawk nen hmalam chu a bih lehnghal bawk.




"Kan khua a nia, ih.. kan inah kan kawi lawk thei angem?" inthlahrung ru zet chung chuan ka ti a, "Khawiah nge in in a awm?" tha deuh chuan a ti ve mai a, "A hla vak tawh lo, kawngpui kam ah a awm a, kan thleng tep" ka ti leh sep a, "Awle, kan kawi dawn nia, a la hma tho alawm" a tih chuan ka lawm ngei mai, ka nui nghal var var a, ka nau te pawh an awm ngei anga, ka hlawh hmasa ber ka lak khan ka chhungte thil tur ka lei a, ka la thawn hman mai loh avangin ka keng bawk nen an hmuh hunah chuan an lawm ve viau ang.




"Kan thleng tep aw" phur zetin ka ti a, a bu zeuh a, "Kawi kher chu a ngai em ni, khua a thim leh vat dawn a, kal vat kha a tha zawk" Rami chuan hnunglam atang a rawn ti a, ka lo ngawi reng, ni e.. a hma lutuk tawh lo bawk nen kei tak pawh kan in a kal ka ti chu nuamlo ka ti ve tho, "Buaina tur a awm lo, in hmanhmawh viau a nih chuan heta tang in khua a hla tawh lo bawk a, motor hman tur in zawng mai dawn nia" Sir Felix-a chuan a ti nghut a.




Ka thawveng huai mai, kan in a kawi leh loh mai a duh thu a sawi ang tih ka lo hlau hman lutuk a, "Saw lai saw a nia kan in chu" tiin ka lawk va a, kan in kawt ah chuan motor a ti ding a, phur zetin ka chhuak a, "Motor hnung hi min lo hawn sak lawk mai la, ka chhungte thil tur ka leisak a awm a, pek nghal ka duh a" kawngkhar a dak chung chuan ka ti a, a hawng ve mai bawk, ka rack sack chu la chhuak in Sir Felix-a chu ka en leh a.




"Lo kal rawh u, ka chhungte pawh an awm vek ang" tiin hma ka hruai a, Rami leh Seni te chuan phur loh hmel takin min rawn zui ve mai bawk a, kawngka a lo in hawn sa avang chuan ka lut nghal mai a, "Nu.." ka ti lang lang bawk, "Awi.. ka fanu, in lo thleng maw?" tiin ka nu chuan min lo buaipui vat a, "A u" tih pahin ka nau hmeichhia leh mipa phir te chuan min lo kuah nghal chung chung bawk, kan chhang a khat a, ka nau te hi kum 8 ka pum in an piang ve chiah.




"Thil tha deuh ka lo hawn cheu a nia aw" ka tih takah chuan ka bag chu min laksak vat a, "Bawihte heihi i thiante em ni?" ka pa chuan a ti dut a, ka lo theihnghilh daih alawm, Sir Felix-a leh Rami leh Seni te chu ka chhungte hnenah in hmelhriat tirna te ka nei a, "Kan fanu hi a buaithlak viau lo maw, a la puitling lo bawk si a" ka pa bawk chuan Sir Felix-a bulah a ti a, "A fel khawp mai, ti tur a ka tih ang apiang tha takin a ti a, sawisel na tur ka neilo" Sir Felix-an a lo tih ve chuan ka lo nui var var a, boss te hnen atanga fak na tawngkam hriat chu a nuam lo hran lo.




"A u heihi keima ta tur a mi?" Damdami chuan kawrfual ka bag atanga la chhuak in a rawn keng lang va a, "Aw.. i ha tawk em ka lo en chhin ang, room ah va ha la" ka tih chuan phur zetin room ah chuan a lut a, a awmdan chu ka lo nuih hak, Hriata pawh a kawr leh kekawr tur chu la in room ah a lut ve nghal, ka bag chu ka la a, "Nu heihi i ta tur a nia, chuan pa heihi i ta tur" tiin ka nu leh pa te tana ka thil lei chu ka phawrh chhuak a, "A va nalh ve" ka nu chuan ka shawl leisak chu a en chiang a, a lawm hmel viau mai.




"Kan hmu ta che a, kan fanu pawh a ngaihtuah awm loh tih kan hre nghal mai, thlamuang deuh in kan awm ve thei tawh ang, kan hlat a a awm vawikhat na a ni bawk nen ngaituah a na bawk si a, mahse hei i hmel kan hmuh hian i rintlak zia kan hria a, kan fanu hi a la puitling tawk lo nen hauh a ngaih na laiah chuan I lo hau mawlh mawlh thin dawn a nia" ka pa chuan a ti leh dap dap a, Sir Felix-a chu a ring nghal bur a nih hmel.




"Au kan mawi em?" tiin ka naute pahnih chu room atang an rawn chhuak a, an thawmhnaw ka leisak chu an ha tawk chiah bawk, "In mawi lutuk" ka ti a, an mawi tak tak, ka nau te an nih vangin ka hmu tha nge ka hrelo mahse an hmeltha em em a, an vun a ngo bawk a, kan unau hi kan vannei a, thingtlang a awm ni mahila khawpui mi tamtak aiin kan vun hi a nung in a ngo zawk.




Rami leh Seni te chu ngawi rengin thutthleng ah chuan an thu a, an nin hmel tawh hle lehnghal, thingpui te kan in a, ka rin loh deuh in Sir Felix-a chuan ka chhungte chu a be thiam em em a, an in ngaina vat reng bawk, ka nau te pawh chuan Sir Felix-a chu a lian an tih thu an sawi ve bawk, "Nu pa.. kan kal mai dawn asin, kan kal na tur a la hla tham ve sia" ka ti a, ka naute chuan min kuah bet ta tlat a, an la naupang chhia ve thin a nia.




"Kan haw lamah kan lo kal kawi leh dawn alawm, Anu leh apa te thu lo awih ru aw" ka tih chuan an bu nghauh nghauh a, Rami te chu motor ah an thu lut tawh a, Sir Felix-a erawh motor bulah a ding thung, motor lam hawi zawng chuan ka in her a, Sir Felix-a chuan kei leh ka naute in thlah lai chu hmuhnawm tih hmel fe hian min lo en a, a lam pan chuan ka kal hnai vat, "I naute chuan an ngai hle mai che" a ti sup a, "Keipawn ka ngai alawm" ka ti ve mai bawk.




Ka chhungte nen chuan kan in bye bye lauh lauh a, kan tlan liam hnu chuan thaw chhuak hak in ka thu tha a, "I chhungte I ngai nghal mai em ni?" ka ngawih reng vang nge Sir Felix-a chuan a ti sup a, "Chutiang pawh a nilo" ka ti sep a, kan tlan rei tak zel ah chuan mut chhuak in min rawn zem chiai chiai a, ka meng tha hleithei tawh lo, Rami te pawh hnunglam hawi lo mahila an reh tak vang vang avang chuan an muhil tih ka hre mai a, keipawh chu muthilh tum in ka mit ka chhing zui nghal.




Min sawi dat dat tu an awm chuan peih lo zetin ka meng chhuak riai riai a, Sir Felix-a chuan hnai zet ah min lo melh reng chu niin ka thu ngil nghal awt a, "I mu thei hle mai, kan thleng tawh a nia" a tih chuan ka hawi chhuak a, hotel ni awm tak zawn ah chuan a lo ding reng tawh chu niin, hetah hian kan thleng dawn nge mawni, pawn lamah chuan kan chhuak a, "Hetah hian kan thleng dawn a mi?" ka ti sep a, a lu a thing nghut ringawt.




"Heihi ka nau in a enkawl a, kal kawi lawk ka duh vangin ka kai tho che a nihkha" a ti sup a, "Oh" ka ti ringawt, hotel pawh an lo nei tel reng a nihchu, a chhungah chuan kan lut a, hnathawk pawh an lo awm nual mai, Aizawl atang hla hle mahse a thingtlang lutuk lo tih a hriat, an hotel pawh hi a changkang viau bawk, "Ka u" tih paha mipa pakhat kan lam pan a rawn kal chu ka en reng, Sir Felix-a nen chuan an in ang takzet, unau an ni tih a hai theih loh.




"In lo thleng tluang maw, in lamah in tlang nghal lova" a u chu zah takin a bia a, "I hnathawh dan ka hmu hmasa duh mawle" a u chuan a ti sup a, "Ok.. i lungawi ngei ka beisei" a nau pawh chuan mahni in rin tawk hmel tak chungin a ti a, chutah ka lam chu a rawn hawi a, a nui sang bawk, a u nen in ang hle mahse a ni hi chu a nelawm deuh, "Hey... ka u secretary thar i nih ngei ka beisei, keihi U Felix-a nau chiah Jordan-a ka ni e" tiin in hmelhriat tirna te chu a nei nghal a, a kut chu ka chibai theih turin a rawn lek chhuak nghal bawk.




"Lalhlimpuii" tiin ka lo chibai ve vat bawk, Sir Felix-a te nen chuan hotel chu kan kal kual a, a lian tha ve khawp mai, mikhual te pawh an lo awm nual bawk, "I hna tha takin i thawk tih ka hriat hian ka lawm, mahse hmeichhia te zui duang duang I la ching tih ka nu leh pa te hnen atang ka hria a nia" Jordan-a chu a ner nang a, "Teuhlo, hmeichhia te zawk in min zui mawle" in ti thei fe chuan a ti a, a mizia chu a lawmawm a ni tawp, kei aiin a upa dawn tih hre mahila a chezia hi a la naupang chhia tlat.




"Ka nu in a nghakhlel tawh teh mai che ania, keipawh ka haw hman a, haw rual ang u" Jordan-a vek chuan a ti leh a, an khua tih ka hrethiam nghal mai, Sir Felix-a nen bawk chuan kan in phur leh a, "In khua a ni tih ka hre miah lova" ka ti sep, "Ka awm tam lutuk lo, ka nu leh pa te erawh an la awm reng thung a, ka pi leh pute lu nghah na a ni bawk nen chhuahsan an tum lova, keipawh in pawi ka ti chuang lo bawk" tha deuh chuan a lo ti ve mai a.




An in ni awm tak zawnah chuan kan ding a, a lian hle, sawi tawh ang khan an khua hi a thingtlang lem lova, in ding ho pawh hi a changkang ve hlawm viau mai, in lam pan chuan kan kal a, kawngka chu a rawn in hawng a, nu hmeltha tak hi a rawn lang nghal zat bawk, "Ka fapa" tih pahin Sir Felix-a chu a rawn kuah a, Sir Felix-a pawh chuan a lo kuah let vat, mipa upa lam tawh hi a rawn lang ve nghal zat a, sawi lo mahse Sir Felix-a pa a ni tih ka hre nghal mai, an in ang mah mah.




"Lo lut phawt ula, an chau ang, an rawn kal na a hla si a" pawn a kan la din reng vang chuan a rawn ti a, thutkhawm naah chuan kan thu thap a, Sir Felix-a chuan a secretary ka nih thu te a sawi a, an chhungkua chu an fel hlawm khawp mai, Sir Felix-a nu chu Nu Hlimi a ni a, a pa chu Pa Mamuana a ni thung, min be bawrh bawrh a, chaw ei ah min lo la nghak reng bawk nen chaw kan ei nghal a, Sir Felix-a te unau hi pali niin amah hi a upa ber a, a nau Jordan-a lo nau phir hmeichhia a la nei bawk, keipawn nau phir ka nei bawk a, phir nau neih nawm zia a hrechiang ngawt ang, mahse an ni chu Shillong ah lehkha zir in an awm thung, ka room hman tur lam chu min kawh hmuh a, ka in bual fai hnuah ka mu nghal.




Zing ka harh chuan room atang ka chhuak vat a, an lo tho vek tawh chu niin nuam lo chu ka ti takzet, an mikhual zawk ka ni bawk si, thawh hma kha chu ka tum ve a sin mawle, "E.. Hlimhlim i va rawn tho hma ve, i chauh awm tehlul nen" Nu Hlimi'n min hmuh rual rual chuan a lo ti vat a, "Chau lo e, ka tho tlai lutuk zawk a" ka ti zawi sep a, "A ho lutuk, i rawn tho chhuak hma zawk alawm, Bawiha pawh zingkar ah khan hotel lamah a kal a, i chauh a rin deuh vangin a rawn kai tho duh lo che a nihkha" a ti leh zung zung a.




Chaw ei te chu an siam nghal a, kan ei lai mek chuan Sir Felix-a pawh a rawn let a, dawhkan a rawn kil ve nghal, chaw kan ei kham chuan zingkar atang engmah ka la tih pui lo bawk nen thleng sil chu ka chuh a, mahse awmpui an neih avangin engmah tilo turin min ti tlat a, hmun chu ka phiah luih hram kha, Sir Felix-an chhuah na tur kan neih thu a sawi vangin room ah in siam turin ka lut a, ka chhuah leh chuan min lo nghak leh reng tawh.




Hotel ah kan kal hmasa phawt a, hmundang a kal na tur kan la neih avangin kan chhuak leh vat bawk, a thianpa pakhat in min zui ve bawk a, a tawng bawrh bawrh bawk nen kan boruak chu a zia phian mai, ram zau tak hmun ah hian kan kal a, a zawl duai a, tute ta nge ka hre hauh lo, "Chuan hetah hian in chu sak i tum amaw?" Sir Felix-a thianpa Thanpuia chu ka en vat a, "Aw.. ka nau te tan sak ka duh a, hun lo awm tur engmah hriat lawk a ni bawk silo nen" Sir Felix-a chuan a ti sup a.




"Ni e, i theih phawt chuan sa rawh, hun i nei thin silo a, bakah hetiang ram tha hi dah chul mai mai atan chuan a uiawm ve bawk alawm" Thanpuia bawk chuan a ti leh a, a tawng dan kal hmangah chuan he ram hi Sir Felix-a te ram a nih hmel, heta in sak a tum vang hian a haw a ni ngei anga, mahse tinge min hruai ve kher hi ka hrethiam lo, kan let leh a, eng vak tihtur a awm lo bawk nen Nu Hlimi te nupa bulah chuan ka awm ve ta mai mai a, an fel bawk a, nuamlo tih na ka nei hran lo.




Sir Felix-a chu inbual fai tih hriat zetin inhnuai ah a rawn chhuk a, a sam pawh a la hnawm chhup bawk, ka bulah chuan a rawn thu a, a rimtui chem chem mai, "Bawiha, in chhuah lai khan Rami a rawn kal a, vawin hi a birthday a ni awm e, a lawm naah kal ve ngei turin a tih che kha aw, i rawn haw khat bawk nen va kal ve la a tha ang, Hlimhlimi pawh hi hruai tel bawk la, in a awm reng zawng a ning ang" min ngaihtuah hmel takin Nu Hlimi chuan ti a.




Kal velo mah ila pawhi ka tih loh tehlul nen, ka kal duh loh thu ka sawi ngam der bawk silo, bakah Rami te thian dun khan min lawm lo tih ka hrechiang ropui bawk si, Sir Felix-a chu ka en a, keichu kal ve kher lo turin min sawi se ka ti takzet mahse "Awle, kan va kal ve ange" ka hnual nghal rawih, tumah hmelhriat ka nei ve dawn bawk silo nen ka kal peih loh zia chu pui tak a ni, Sir Felix-a lah chuan ka rilru engmah a hrethiam der bawk silo.


Zawmna




Rami birthday party naa kal tur chuan ka insiam a, kawr hak tur ka lo keng lo bawk nen ka kawrfual ken chhun chu ka ha ta ngawt a, mahse a in chei na tlak lutuk loh bawk nen hetia han kal tawp chu ka zak ve deuh, ka room kawngkhar chu a rawn ri dat dat a, ka lo chhawn vat, Nu Hlimi a lo ni a, a kut ah paper bag a keng ran bawk a, ka khum bulah chuan rawn ding in "I in siam peih tawh maw?" tiin min en lawr dan dan a.




"Aw.. ka hman chu a nimai, ka kawr hak hi a hak chi loh viau em?" ka ti sep a, ka confi lo ve em bawk a ni, "I nalh lutuk, mahse heihi ha zawk la i nalh leh zual ang" tiin bag chu min rawn pe a, a chhung ah chuan kawrfual nalh zet mai hi a lo awm a, "Mahse heichu" ka tih lai mek chuan "Ha rawh, i hak tawk chiah ka ring, ka fanu te nen hian in in tiat vel dawn a, Memei ta zawk a nia, hak pawh a la ha lo" chutia a fanu thawmhnaw lo hak sak ngawt chu a tha ber in ka hrelo, bakah a in thlahrun awm bawk si.




"Ha rawh, in thlahrun a ngailo a nia, a ha ngai lo hrim hrim a, a dah mai mai a, ha pawh nila pawi tihna a nei lovang" a tih leh takah chuan lawmthu ka sawi sap a, ka kawrfual hak lai ai hi chuan a nalh daih zawk, Nu Hlimi a chhuah hnu chuan ka kawrfual hak lai phelh in Nu Hlimi kawrfual min pek chu ka ha a, a sawi ang tak tak in ka ha tawk chiah, chuan a rawng pawh hi ka duh chi tak a ni bawk a, taksa lang tam lutuk a nilo bawk nen ka mawi pui ve viau chuan ka hria.




Room atang ka chhuak a, Nu Hlimi'n min hmuh chuan min lo fak ve luam a, Sir Felix-a pawh in siam zo tawh in inhnuai ah a rawn chhuk a, "Bawiha i hman tawh chuan kal nghal mai ula, hei a hma tawh lo a nia" Nu Hlimi chuan a fapa bulah a ti zung zung a, Sir Felix-a nen chuan kan in zui chhuak a, kan kal lamah te chuan kan in be lo hrim hrim, a motor khalh ah chiah rilru a pe tih hriat takin hmalam chu a bih ngur a.




An khua hi a hming chu hre ve fo tawh mahila ka la kal ngai miah lova, Aizawl atanga hla viau siin a thingtlang lutuk lo chu mak ka ti, Aizawl nen a in ang deuh reng in ka hria, a khua hi a lian a, a mi cheng te pawh an tam khawp mai, in ding te pawh ka sawi tawh ang khan a nalh in a changkang hlawm viau bawk, chutih rual in in tha lutuk lo pawh hmuh tur a awm nawk tho a, kan tlan rei tawh bawk sia, khawiah tak nge maw Rami chuan a birthday chu lawm a tum ni.




"In khua hi ka rin aiin a changkang daih, Aizawl nen danglam na a awm miah lo" ngawih reng ka nin vang chuan ka ti a, "Ni e, Aizawl atang hian a hla bawk si a, mite chuan thingtlang viau turah an ngai chawk a nia" a ti a, "Nia, keipawn mak ka ti a lawm, kan khua ai pawn a changkang daih zawk a" ka ti leh a, kan tlan zel a, kan kal na tur chu kan thleng ve ta hram, darkar chanve lai alawm kan tlan hman le.




Inchhung ah chuan kan lut a, a in hi a fal bawk sia, in pangai mai chu a nilo tih ka hmuh atang hian ka hrethiam nghal mai, inchhung lamah chuan kan in zui lut a, "Felix I lo thleng thei maw, kan lo nghah na che a rei tawh lutuk" Rami chuan Sir Felix-a ban a dawm pah in a ti a, keichu awm ve lo ang hmak in min ngai, midang pawh chu an rawn kal khawm a, Sir Felix-a chu an be nghal mawlh mawlh a, hmelhriat tumah ka nei bawk silo nen nuamlo ka van ti tak.




Sir Felix-a chuan min rawn melh leh thin a, a thiante chuan an lo be buai zel bawk nen a hawi sawn leh vat a, thutna awl lam chu ka pan a, ngawi rengin ka thu ta ringawt, mi pawh an tam khawp mai, Sir Felix-a chu khawiah nge a awm pawh ka hre tawh lo, nichin khan mipa pakhat nen an chhuak dun daih in ka hria, chutia ngawi renga ka lo thut lai chuan Rami leh Seni te chu an rawn kal hnai a, ka hmuh ngai loh hmeichhia pahnih an tel ve bawk.




Ka hmaah chuan an rawn ding a, an nui sawng hlawm bawk, "Nangmah hi maw Felix-a bialnu thar chu" sam kir ber nu chuan a rawn ti a, ka chhang lo, "A mak hle mai, nang ang hmeichhia hi Felix-a te duh chi in nilo a sin, nge nia khum lamah i lo zei viau zawk?" pakhat zawk chuan a rawn ti ve leh a, an nui deuh dar dar a, ka tawng chhuak a nih chuan in hnial na ka ti tam mai mai dawn bawk nen ngawih chu ka chuh hram hram a.




"Tun ang laiah chuan hetiang hmeichhia hi chu an tam alawm, ka sawi kha an inah kan rawn kawi a, an khawsak dan reng reng atang khan nuamsa lutuk an nilo tih a hriat nghal a, a ni ang hmeichhia hi chuan Felix-a ang mipa hausa te chu a chhuah phal tawp nang" Seni chuan a ti leh zat zat a, chhang lova an thusawi te ngaihthlak liam mai ka tum nen an tawng duh dan chu ka ngaithla liam mai mai thei tawh hauh lo.




Ka thut na atang chuan ka tho thut a, kei ai an hniam vek avangin ka en chhuk ngar hlawm a, "Eng angah nge in in ngaih bik a, kei ai tha viau ah in in ngai em ni, kei ai in that na hi ka hre vak bik lo, nangni ang hmeichhe puitling rual thah ni tawh si nu leh pa te thawh chhuah a in la lian ve mai mai ai chuan ka tha zawk fe" ka tih chuan thinrim hmel zetin min en hlawm a, ka hlau lo nasa, an ni ang no lutuk hi chu ka ngam ve em, min khawih rawn mahse na tak chuan ka siam ve hman tho ang.




"Nang hmeichhe zaktheilo lutuk" Rami chuan a ti hlak a, ka lo nui sak, "Nangni pawh in zah loh chuan zahna tur ka nei in ka in hrelo" ka ti leh hmak a, an rin ang mai mai hmeichhia ka nilo, keichu midangin tawngkam ngeiawm tak tak a min tawng khum hian ka ngawi liam ve mai mai ngailo, ka thiam lohna leh ka bula tan na a nih loh phei chuan tlawm mai mai ka tum ngai bawk lo, heng hmeichhia te lakah ngat phei hi chuan tlawm tum lo tak ka ni.




"I la hre khawp ang" an tih leh hnuah an kalsawn nal nal hlawm a, min vo ve a, ka engah mah a thawk chai silo, ka thut na ngaih ah chuan ka thu leh a, thei tui ka in bawk, Sir Felix-a pawh a rawn let leh tawh a, mahse ka bulah a awm hman lo, khang hmeichhia ho khan an hual thup hlawm a, pawi tihna pawh ka nei hran lo, an khua ah a haw khat ve bawk nen a thian te pawh hian an ngai ve tawh hlawm ang, a haw leh mai mai tawh dawn rih bawk silo nen.




"Ka lo thu ve thei angem?" mipa pakhat sang tha ve tak hian a rawn ti a, "Tehreng mai lo thu rawh" tih pahin sir lamah chuan ka tawlh phei rawk rawk a, "Mikhual tiraw i nih kha?" a tih leh chuan ka nih thu in ka lo chhang vat a, "Ka hmu che chu ka lawm hle mai, kan khua chu nuam I ti em?" a ti leh a, "Nuam khawp mai, a khaw mite in fel hlawm bawk si a" khang hmeichhe pali te tiam loh khan ka ti rilru a.




"A lawmawm a nihchu, keihi Lalnunsanga ka nia, Nunsang min ti mai dawn nia, Rami cousin saw ka nia" an in ang deuh in ka hre reng a ni, a tawng bawrh bawrh a, boruak pawh a zia deuh, keimah chauh a thut ngawih chawrh chawrh ai kha chuan a nuam daih zawk, fiamthu a duh in zawhna ho te te min zawt reng a, a fiamthu thawh lah a naupang chhia thei bawk nen in sum zo lovin ka lo nui ve leh hak thin bawk.




"Aizawl ah college ka kal a, chawlh lai a ni bawk nen ka haw zawk a, kal leh vat ka tum, ka bialnu ka ngai tawh" ka nui leh hak, a la thutak hmel em em zui, "I bialnu pawh chuan a ngai tawh viau ang che" "Loh theih nang, min hmu lovin nikhat pawh awm harsa a tia lawm, min en la ka hmel chhe zawk zawk bawk silo a, tu hmeichhia in nge min hmu hne thei ang" tiin in la hmeltha fahran chuan a rawn hawi vah a, kei ai a naupang deuh bawk nen ka nau ang maiin ka en thei.




"Min lo hrethiam la, washroom lamah ka va kal lawk ange" thei tui kha no hnih lai ka in bawk nen ka zun chu chhuak tawh tak a ni, washroom atang ka chhuak leh a, ka thut na lama ka kal lai mek chuan Rami thiannu nichin a min hmusit deuh a tawng nu ngei kha min kal pel zawng in a rawn kal a, kan in pel fel dawn chiah tih chuan in chhuih khut khut in ka kawrfual hak chu a rawn pawt a, Lalpa leh ka duh theilo, ka kawrfual chu a pawt tet nghal thawt a, ka mal thla lai chu a thet nghal hnuang mai.




Ka kawr hak hi a pan bawk nen ka kekawr bul hak chu a lang vek a, mite chuan min en thup bawk nen ka zak lutuk chu ka kawrfual hak thet lai chuan in khuh ka tum a, ka che chu a buai vek, Nunsanga chu a rawn kal hnai a, a kawr chung hak chu rawn phelh sawk sawk in ka kawngah chuan a rawn suih mual mual a, engmah a sawi lo, mahse a hmel ah chuan a lungawi loh hmel hle, ka hawi kual a, midangte chuan hmuhnawm thlir tak hian min thlir nimai hian ka hria.




"U Chhante, engvanga khatiang a ti lui kha nge i nih a?" Nunsanga chuan ka kawr pawt thet tu chu a melh ngur a, khawiah nge Sir Felix-a hi a awm ka hrelo, Rami pawh hmuh tur a awm lova, an pahnih khan fian rial ah a awm dun a nih ka ring, "Enge maw i sawi le Nunsang?" Chhantei a tih nu chuan a ti haw a, "I tluk dawn khan ka hmu reng che alawm, i ti lui a nihkha, i kal dan ah khan tluk na tur a awm lo hrim hrim, U Hlimhlimi i kal pel dawn khan a kawrfual ah vuan in i tlu lui tih ka hmu vek" Nunsanga chuan a ti leh nghat nghat a.




"Engthil nge thleng?" Sir Felix-a aw ka hriat chuan chulam chu ka hawi vat a, ka lam ah chuan a rawn kal hnai a, Rami chuan a hnungah a rawn zui ve bawk, ka kawng a Nunsanga kawr in bat chu a en ngur a, "Thil diklo thleng a awm em ni?" a ti leh sup a, "Ka tlu sual palh a, hei Hlimhlimi kawrfual hi ka pawh chhiat sak a" Chhantei chuan a lo ti zung zung a, "Tih luih a nihkha" Nunsanga chuan a lo ti leh hram a, a ban ah chuan ka va hmer salh a.




Chuchu Sir Felix-a pawh chuan a hmu chiang hle, Nunsanga hi chu kum 19 chiah a la ni bawk nen buaina ti pun lun zawng a a tawng vak ka hlau a ni, "Enge i sawi awmzia, chiang deuhin sawi rawh" Nunsanga ban ka chelh na atanga hawi sawn in keichu min en leh ngur a, "U Chhantei leh U Hlimhlimi te an in kal pelh dawn lai khan U Chhantei hi tlu der in tum reng vang tih hriat takin U Hlimhlimi kawr hi a pawh chhiat sak alawm" Nunsanga chu a lungawi lo ngang a niang a tawng bawrh bawrh a.




"Nunsang ka tih luih a nilo, tihpalh vang a nihkha" Chhantei chuan a lo ti vat a, "Ni e, Nunsang engmah lo sawi suh, Chhantei hian a ti lui dawn lo tih ka hrechiang" Rami pawh chuan a nau en ngar chung chuan a ti hlak a, "Ka mit ngeiin ka hmu, a tilui tih ka hria alawm" Nunsanga bawk, ka in rawlh vat loh chuan buai na hi a pun lun mai mai dawn, "Nunsang a tihpalh a nihkha, engmah a nilo, I ngai thutak lutuk a nihkha" ka lo ti vat a, tawng leh a tum lai chuan ka lo mit mei avangin a ngawi leh ta zawk a.




"Sawm loh mikhual a rawn kal ve bawk nen kan buai phah ta hrep chu a nih hi" Rami chuan mei nei zetin a rawn ti chhuak hlak a, nuam lo ka va han ti tak, ka zak bawk, ni e helai hmun a kal ve lo tawp tur ka ni a sin mawle, Nu Hlimi'n kal ve tura min tih lai khan ka lo hnial mai lo kha ka in chhir rum rum mai, "Lalramnghet" Sir Felix-a chuan a ti chang hrawk a, Rami chuan Sir Felix-a chu a en vat.




"Hetianga i tawng dawn a nih chuan engvanga ka nu bulah khan kal tura min ti nge i nih, kei min sawm a nih chuan Hlimhlimi hi a lo kal ve ngei ngei dawn tih i hriatthiam ka beisei bawk, ka bialnu hi hnawk I ti viau a nih chuan kan haw ang" tiin ka ban ah Sir Felix-a chuan a rawn chelh a, "Felix chutiang zawngin ka sawi lo, ka thinrim a ka sawi ve mai mai a nihkha" Rami chuan a lo ti vat a, mahse Sir Felix-a chuan engah mah a ngaih hmel tawh loh, pawn lamah chuan min kai chhuak dawr dawr a.




"He thil hi la thla vat rawh" tiin Nunsanga'n a kawr ka kawng a a rawn bah kha a phelh a, "Ka kawrfual hi a kak vek alawm" ka tih chuan a kawr chung hak chu a phelh sawt sawt a, ka kawng ah a rawn suih zawm nghal, Nunsanga rawn chhuak ve chu a lo en ngur a, "Kha heihi i kawr" tiin a lo pe let a, "Nunsang ka lawm lutuk a nia aw, awm lo la chu ka zak vak dawn a nihkha" ka tih chuan a nui vur vur a, "Awle, keipawh ka haw tawh mai ang, nuam pawh ka ti tawh lo" naupang chhia zet a a tih chuan ka nui leh hak.

Cont...


Vawin chu ka kal kual nileng a, chhun ah ka ti tak nang in ka rawn dah hman ngang lo a nihkha aw, min lo hrethiam hram hram mai dawn nia, chuan zaninah dah lehnghal ka tum a, a awm tlai dawn, a nghak peih tan aw, dar 11 vel ah chuan rawn dah hram ka tum dawn nia, chumi ai tlai pawh chu a ni maithei...

[Rebec Nunziri]

Chapter-4



Lalhlimpuii POV




Kan haw kawng ah chuan boruak chu a uap churh a, Sir Felix-a chuan engtin min ṭawngkhum pawh a nilo mahse nuam ka tih loh dan chu pui tak a ni, boruak chu a tang at nimai hian ka hria, a hmel chu ka en leh zeuh thin a, a lang rum em em a, a thinrim hmel bawk si, hetiang chung chuan ka be ngam lo hrim hrim, a lakah thil tih sual ka nei emaw tih mai tur a ni, an in kan thleng tep tih chuan motor chu a ti ding thut a, mak ti zetin ka Sir Felix-a lam chu ka hawi a.




"Tinge i din a?" kan dinna a rei tawh bawk si, engmah sawi lovin hma lam a melh ngur bawk nen nuam ka ti lo lutuk chu ka zawt ta tawp a, "Rami nau nen khan in in hre sa em ni?" a ti nghut a, "Hre sa love, keimah chauh a ka thu min hmuh khan min rawn bia a, a fel reuh phian bawk sia, a nelawm bawk sia, a bula awm a lo nuam bawk nen kan in nel thuai a" ka tawng tam mah mah a ti nge dur khui in min rawn en a, ka tawng lai pawh ka tawp chawt.




"Nang ai naupang a nih kha, chuvang chuan hnaih lutuk lo la i tan pawh a tha ang" a ti hluk a, enge a sawi awmzia kha, a ni hian Nunsanga kha ka ngaih melh a ring leh tawh tihna em ni, eng ang chiah in nge maw Sir Felix-a hian min ngaih ni, hmeichhe lep chiah tak mipa hrang hrang kawp thin angah min ngai emaw ni, motor chu ti nung in a tlan lehnghal a, inchhung kan luh thleng chuan kan in be tawh lo, midang chu an mu vek tawh a, kan room lam ve ve kan pan ve nghal mai bawk.




A tuk lamah chuan eng vak tih tur ka neih ve tawh loh avangin in lamah chuan ka awm a, Sir Felix-a erawh an hotel lamah a kal thung, helai hmun a min hruai chhan hi ka hrelo hrim hrim, engmah tih theih ka nei a zeng pawh a nilo, hna lam phei chu engmah tih ka la neilo, mahse chawlh pah a ni mai a tiin zawhna ka zawt duh chuanglo, ka chhungte ka hmuh phah thei zawk a, ka lawm tawk a tling em em mai ni.




Zanah chuan Sir Felix-a a rawn haw a, chaw kan ei lai chuan naktuk lama kan haw tur thu a sawi a, zanah chuan ka in siam nghal vek, zing chhuah hma a tih avangin ka muhil vat a, zingah pawh ka harh hma khawp mai, chaw ei kham ah kan chhuak a, Sir Felix-a chu Rami birthday kan kal zan atang khan a mizia a dang leh ta sawt a, a hma ai mah khan a nelawm lovin biak pawh a chakawm loh zawk, kan khua kan lut a, kan in a kawi lam pawh ka sawi ngam tawh lo.




Kan khua kan tlan pel a, thil ei tur leh zun ram thiar tur vel bak in kan chawl lo, Aizawl kan luh chuan khua a la eng a, kan in lamah min thlah hnuah a in khalh haw ve nghal, Tetei pawh a rawn haw vat a, rawng ka lo bawl zo vek tawh, "Engmah lo ti duh mah ta che, I chau awm ropui si" a ti nghal zung zung a, "Ka chau vak lo, nangmah zawk I chau em?" ka ti a, "Vawin chu customer nidang aiin an tam a, ka chau ve deuh, ka thu hahchawl hman lo tluk a ni" a ke chu a hmet niap niap a.




"Chaw ei vat ila kan mu daih dawn nia" ka tih chuan min lo hnial lo khawp mai, chaw kan ei lai chuan kan zinna chungchang te chu ka hrilh ve thuak thuak a, kan room ah ve ve kan lut a, ka chau lutuk lo emaw ka tia, mahse ka muhil vat a, a tuk lamah chuan a ngai te in hna kal turin ka in siam a, Tetei nen chuan kan in phur chhuak leh ta vawk vawk a, building kan thlen chuan kan hnathawh na lam ve ve ah kan kal nghal a.




Sir Felix-a a rawn thlen chuan a office a lut turin min ti a, keipawh chu ka lut ve nghal vat a, "Vawin atang midang angin in hnuai lamah hna i thawk tawh ang" a tih chuan mak ti zetin Sir Felix-a chu ka en a, secretary thar a nei dawn tihna em ni, "I lungawi lo em ni?" engmah sawi lova ka en reng avang chuan a ti leh nghut a, "Ah.. nilo e, ka thawk ange" ka ti a, a office atang chuan ka chhuak nghal, ka bag ka siam mawlh mawlh lai chuan Sir Felix-a secretary hlui kha a rawn kal a, mak ti zetin ka lo en.




"Ka hna ngai ka rawn zawm leh tawh dawn a" tiin a nui vur vur a, "A nihchu" ka ti ringawt, inhnuai lamah chuan ka chhuk a, Tetei hnenah a bula ka thawh tawh dawn thu ka sawi chuan zawhna a ngah hmel khawp mai, mahse customer an awm ve neuh neuh bawk nen han in hrilh na chi a ni bawk silo a, chhun thil ei hunah ka hrilh ang che ka ti ta ringawt a, midang ang bawk in an form hak ang chu ka ha a, mahse ka chhungril ah hian eng emaw hi a awm tlat, ka hriatthiam siloh in min chen chilh ka ti mai.




"Le.. han sawi teh, tinge Sir Felix-a chuan helam a hnathawk tur che in a tih che a?" restaurant ah lut in order kan siam fel hnu chuan a ti a, "A secretary ni turin min duh tawh lo tihna a ni mai lawm, a secretary hlui kha a rawn thawk leh tawh dawn a" ka ti mai a, ka rilru diktak ka sawi chhuak a ni, "Mahse. a va mak ve" a ti leh hram a, "Engmah mak a awm loh chu, i bulah ka lo thawk thei tawh dawn a, i lawm zawk lo a mi?" ka tih leh chuan lu a thing nak nak a.




"Lawm tehreng mai, kan in hmu reng thei tawh dawn a nihchu" a ti leh tho sia, thil kan ei zawh chuan hnathawh na lamah kan kal lehnghal a, kan thu hman meuh lo, mahse customer te lo buaipui chu nuam ka ti takzet, Sir Felix-a secretary anga thawh ai chuan a nuam zawk, Sir Felix-a bulah chuan in ring reng a awm a ngai bawk nen heta min sawn ta daih chu pawi ka tilo khawp mai, a tirah kha chuan mak ka ti deuh kha a nia, thawk ve dang te an fel bawk a, thian thar pawh ka nei nual mai.




Karkhat lai a liam leh tawh, Sir Felix-a nen chuan kan in hmu khat ta hle a, mahse pawi ka tilo, a bula ka awm hian ka danglam thin tlat a ni, Sir Makima nen kan in hmu ngun em em thung a, ka thiannu nen kan bulah lunch pawh a rawn ei ve ta ziah a, Tetei nen pawh an in nel tawh viau, "Zanin chu ka lo leng tak tak tawh ang, a hma khan I lo awm lova, hei i thiannu lah hian thingpui tak ngial pawh min pek na chang a hre bawk silo, nang chuan i hre em ang chu maw?" thil kan ei laiin Sir Makima a chuan a ti a.




"I in duh loh vang a nih kha aw, ka zawt reng che a, min hnial a nih kha, min dem theilo" Tetei chuan a lo ti hlak hlak a, an in ngam tawh bawk nen Tetei pawh hian a hnial bawng bawng ngam tawh, "Sir Makima hi chu a..." Tetei chuan a ti leh a, "A mak thin, Sir min ti tawh suh u ka tih thin cheu kha mawle aw" Sir Makima chuan a ti a, ni e, kan thian dun hian Sir tia ko tawh lo turin min ti ngun hle a, mahse kan thei meuh lo chu a ni.




Sir tiin kan lo ko nasa tawh thin bawk sia, a hming lawng a koh chu a harsa ve deuh chu a ni, "Sir tih tel khan a nalh a lawm" Tetei lah chuan a lo ti zeuh a, an in hnial lehnghal char char tawh mai, Sir Makima hi chu a fel em a, a hnathawk te angin min en pawn ka hrelo, Tetei chuan Sir Makima a hnail hneh tawh bawk silo chu "I tawngthei sia maw.." a ti vawng vawng ringawt, Sir Makima lah chu a nui ruh ruh duh lek.




Zanah chuan Sir Makima chu a rawn leng ngei a, keimah nen tak chuan kan in be zeuh zeuh a, Tetei nen an in hnial a ni ber, an in hnial na lah chu an ho em em khawp a, Sir Felix-a aiin Sir Makima'n ka chhelo zawk a ti a, Tetei chuan a lo helh nasa viau mai, an in hnial char char lai chuan thingpui lum turin ka tho chhuak daih a, an pahnih hian in ngaizawng ta se an in hnial nasa thin ngawt in ka ring, an in ngeih loh em em dan hi a.




Thlakhat lai a liam leh hnu chuan ka hna chu nuam ka ti tawh lutuk ringawt, Sir Felix-a chu a dawr dangah hun a hmang tam zawk a, kan thawhna dawr ah hi chuan a chang zeuh zeuh in a rawn kal a, rei a a ngailo, chuan a mah chauh in a rawn kal ngailo, hmeichhe kawp thar a nei a, Mizo ah chuan model tha pawl Asangi a ni, ral khat atang chauh in ka la hmu a, a fel hmel ka ti khawp mai, a nui sang reng a, a hmel pawh hmuh a nuam thin khawp mai.




"A van chhelo tak, tunlai chu Asangi nen an in zui nasa a, an in ngaizawng tiin thu a thang nasa a sin, Asangi lah in an thlalak dun na a post peih bawk sia" ka thiannu Tetei chuan a ti siam siam a, a thusawi chu ka beng khawn vak lem lo, "Ka sawi chu I hria em?" min rawn sawi deuh nawk nawk chung a a tih leh chuan "Ka hria, a ho emai, ei vat vat rawh, hnathawh na lamah kan let leh vat a ngai dawn a nia" ti hlak in ka hmaa eitur chu ka ei lehnghal mawlh mawlh a.




"I mak ve e, nang chauh hi I ni ngei ang kan boss duh lo tu hmeichhia chu" a tih chuan ka nui ringawt a, ka ei zo a, ka thiannu chu a tawng char char bawk nen a ei ve tan dawn chiah, nghah pah in phone chu ka lo khawih melh melh a, Tetei'n min rawn nghawk deuh sawk chuan "Enge?" ka ti that a, a en na lam chu en ve turin min mit mei zeuh zeuh a, ka en ve chuan boss a lo ni, kan lam chu a rawn en ngur lehnghal, ka en rei peih lo.




"Ei vat vat rawh, kan let tlai tih a hriat chuan a thinrim hmai sen kan hmu leh dawn a nia" zawi te hian ka ti sap a, Tetei pawh chuan a ei hmanhmawh tawh khawp mai, "Boss hian a duh che a nilo maw?" Tetei thu rawn sawi vang chuan phawk zetin amah chu ka en a, "Engvanga ngawt chuan nge min duh anga?" a thusawi awihawm loh em avang chuan ka nui hak bawk a, "Nui ringawt suh, ka thutak viau a nia aw, ka chik alawm, hna kan thawh mawlh mawlh lai te hian a lo en leh reng thin che" ka chhang let tawh lo, Boss hian min duh dawn lo tih ka chiang ve bawk em a ni.




Sir Makima nen kan in tawk a, "Vawin chu ka buai deuh a, in rual in thil pawh ka ei hman ta lo a nihkha" a ti zung zung a, "I telloh vang a nih chiah chu kan ei tui em em" Tetei chuan a lo ti leh zeuh hman a, Sir Makima chuan a ban zuai a, mahse Tetei chu a lo awm sawn hman, "Ka va ei ve lawk ange, chawhnu lamah chhuah na tur ka la nei bawk sia" a hmanhmawh hmel em avang chuan kan in be rei lem lo, kan hnathawh na lamah kan let leh vat a.




Karleh ah Sir Felix-a chuan a dawr kum 5 tlin lawm na atan party lian tham tak a buatsaih a, an phur tlang tawh hlawm hle, kei erawh ka phur vak lem lo, kal loh chu ka duh zawk a, mahse hnathawk ho zawng zawng kal vek tur an ti bawk sia, kal ve leh ngei chu a ngaih hmel khawp mai, Tetei lah chu a phur tawh mai sia, kan thawmhnaw hak tur te chu thui tir a tum a, ka hak tur pawh a man a design vek bawk.




Ni a kal ve beuh beuh a, kan buai hlawm khawp mai, kan kawr hak tur pawh an thui zo vek tawh, ka lo en pui lem lova, ka duh aiin taksa a lang tam mah mah a, mahse engmah ka sawisel ngam tawh der bawk silo, Tetei'n phur taka a thui tir a ni a, lo sawisel chiam kha a tha ka tih loh vangin ka ngawi liam vel ta mai mai a, midang pawn hei aia taksa lang tam hi an ha vek dawn, engah mah ngai suh a tihkha maw.




Vawin chu dawr kan khar tawp a, zan lamah chiah party a awm dawn vangin dawr chu hawn ve awm ka ti deuh a, mahse kan hahchawlh theih phah zawk a, a tha tho tho, chawhnu lam atangin Tetei chu a in siam tan der tawh, kei lah ka la mu mai mai a, a sam te chu a pawt ngil a, in siam ve turin min tur reng a, a la hma bawk nen ka la peih teuh lo, tlai dar 3 ah chuan ka in bual a, ka zawh hnuah rawng ka bawl leh phawt, zanah chuan kal hma em em a ngai lo bawk nen han hmanhmawh vak kha ka peih lo.




Sir Makima chuan min rawn lam a, a ni pawh a chhelo khawp mai, "Wow.. Tetei chu ka hai tep che alawm, I va han chhelo ve, i in chei chuan" a tawng dan avang chuan ka lo nui hak a, Tetei lah chuan ngei hmel zetin a lo en a, "Ka in chei loh pawn ka chhelo, kei te chu ka chhelo ve hrim hrim, min en chiang ngailo a nihkha" Tetei chuan motor a thut luh pah chuan a ti a, Sir Makima chuan nuih za in sum deuh in keichu min rawn en a.




Party na hmun kan thleng a, an lo tam tawh khawp mai, Nu Hlimi te nupa pawh an rawn chhuk a, Jordan-a pawh a rawn chhuk tel ve bawk, kan lo in nel tawh sa nen kan in be ve luam a, Sir Makima leh Tetei chu an awm dun deuh chawt a, han sawi lang lo mahse an inkar ah hian eng emaw tak a awm tih chu ka hriat na a rei tawh, mahse kei a lo sawi tur a awm loh vanga sawi lang lo mai mai ka la ni, Sir Makima'n Tetei a en dan hi ka hmuh hmaih bik lo.




Sir Felix-a chu Asangi nen bawk chuan an in kawp deuh chawt a, ka thiante bulah chuan kal in kan in kawm khawm a, Christy chu a tawng barh barh a, a ni hi kei ai a la naupang ve leh chhawng a, thlakhat chiah hetah hian a rawn la thawk nghe nghe, "Hlimhlim, sawlai mipa sawn a en duh rap che, a chhelo bawk sia, en ve chhin teh" Christy chuan a ti a, a kawh na lam ka en chuan mipa chhelo ve tak hi ka hmu a, ka en tih a hriat rual chuan a nui suk a, ka nuih let ve lem lo, ka hawi sawn leh vat.




"A rawn kal hnai a nia aw" ka beng bulah chuan a rawn ti leh sup a, "Hey.. ka lo zawm ve thei cheu angem? Lalramdina ka nia" tiin kan bulah kha mipa kha a rawn ding a, ka chhan mai loh avang nge Christy chuan "Pawi love, i duh phawt chuan min rawn zawm thei alawm, Christy ka ni e" a ti a, an in be nghal char char a, an bulah chuan ngawi rengin ka ding ve reng a, "I thiannu hi a hming ka hre thei angem?" tiin keichu min rawn en a, "Aw.. Hlimhlimi a nih hi" Christy chuan a lo ti vat.




"I hming chu a nalh hle mai" tiin a nui sang a, "Ka lawm e" ka lo ti mawl tawp, kan bulah chuan a awm ve ta reng a, Christy nen chuan an in be char char a, a chang zeuh zeuh in ka lo tawng ve tih loh chu midang te chu ka en kual a, an nalh hlawm khawp mai, an hlim hmel em em bawk a, kei tak pawn rin aiin nuam ka ti, mi hausa tak tak an rawn kal a, milar rawn kal an awm ve nuk bawk, Mizo milar zing a ka duh em em mai pakhat pawh a lo kal a, thla pawh ka lak pui nghe nghe kha.




"Nuam I ti vak lo em ni?" Ramdina chuan a rawn ti a, "Ti e, hetiang hmunah hian ka kal ngai vak lova" ka ti mai a, "Keipawh hetiang hmunah hian ka kal khat khawp mai" a ti ve sup a, Christy chu ko tu an awm avangin a kalsawn a, keipawh ka ke chu a kham tawh, chuan inchhung boruak hi a uap deuh churh a, chuvang chuan pawn lama chhuah harh chu ka chak takzet, ka kut chuan ka in zap hliau hliau a.




"Pawn lamah kan va chhuak harh dawn em ni, balcony nuam deuh a awm a sin, ka kalpui ang che i duh chuan" Ramdina chuan a rawn ti a, a hmel chu ka en vang vang a, a sual hmel lem loh bawk a, pawn lama chhuah pui pawh a pawi in ka ringlo, Tetei leh Sir Makima te pawh nuam an la ti dun khawp mai, balcony lamah chuan kan kal a, boruak ka hip lut vang vang a, a sawi ang tak tak in a nuam reuh khawp mai.




"Nuam I ti em?" a tih chuan "Nuam ka ti lutuk, inchhung boruak ai khan nuam ka ti daih zawk bawk" tiin ka nui var var a, "Hlimhlim kan in hriat na chu a la reilo viau na in ka hmuh che khan ka hmeichhe ngainat zawng tak i ni tih ka hre nghal thei, hriat chian leh zual che a chakawm khawp mai" a ti a, han chhan dan tur mai ka hriat loh avang chuan ka ngawi reng a, "Pawi i tih loh chuan nidangah kan la in hmu leh thei angem?" a ti leh a.




Chhan tum a ka an mek lai chuan "I hnaih thei lovang, a ni kha ka ta a nihkha" ka hnunglam atang aw rawn chhuak ka hriat rual rual chuan hnunglam chu ka hawi vat a, chutah Sir Felix-a hmel rum zet chu ka hmu nghal zat bawk, Sir chu a rawn kal hnai zel a, ka kawngah a rawn chelh nghal chawt a, ka lo ip chawih thei, "A ni hi hnaih tum tawh suh ang che, ka hmeichhia ka ta chauh a nih hi" Eng thu nge maw a sawi hi le, engvanga hetianga rawn awm hi nge a nih?.




Balcony atang chuan min kalsawn pui a, inchhung lama min luh pui leh lai te chuan a tih ang ang in ka awm tawp, a thusawi khan min thawn em avangin ka la pangai hleithei lo, "Nu, pa Hlimhlimi nen hian thiltih tur pawimawh tak kan nei a, kan lo va kal hmasa ange aw, in awm tho bawk a" Sir Felix-a chuan a nu leh pa te bulah chuan a ti a, a nu te pawh chuan an lo rem ti ve mai, inchhung atanga min chhuah pui dawn chuan Tetei'n mak tih hmel zetin min rawn en a, mahse engmah a sawi lo.




Motor a min luh pui a tum lai chuan ka harh chhuak zawk a,, "Sir" tiin ka kawng a a vawn na chu tih tlak ka tum a, min chelh ngheh em avangin ka tal hrang theilo, "Ngawi rengin motor ah hian lut rawh" a ti nghut a, "Mahse" ka tih leh lai mek chuan "Ka sawi nawn tawh lovang, tha takin i lut dawn nge tih luih na hmangin ka thut luh tir dawn che" a ti ṭhawt a, a au rin em avang chuan ka la phu zawk zui.


Zawmna



A motor ah chuan rang zetin ka thu lut a, kawngkhar chu a rawn khar deuh dawp a, tim deuh chunga pawn lam ka en chu a dinna ngai a la ding reng chung chuan chunglam a hawi vang vang a, chutah hmai tuai pawk in motor chu a kal hual a, driver seat ah chuan a rawn thu lut nghal, tuna a awmdan hi a hma zawng aiin ka hlau zawk, a hmel a rum in a thinrim hmel em em mai bawk si.




Khawiah nge min kalpui dawn pawh ka hrelo, ngawi rengin ka thu a, ka hlauthawng hle bawk, jam ah kan tang a, a din lai hian motor atanga chhuah daih mai te ka duh, mahse chutianga ka che a nih vaih chuan a thin ka tih rim belh chhah mai mai dawn tih ka hrechiang bawk si, traffic a thawl deuh hnu chuan a tlan chhuak lehnghal a, a thaw lak a sak tih a thawk rik deuh ham ham dan atang chuan ka hre thei, keipawh ka thaw tha ngam lo, he motor chhung ah hian ka boruak kham khawp tur ka hmu lo mai dawn in ka hre hial.




Kan tlan rei deuh hnu chuan in lian ve tak pakhat ah a motor chu a ti ding a, a chhuak nghal zat bawk, ka thutna lam chu rawn kal hual in kawngkhar a rawn hawng a, chet mai nachang pawh ka hrelo, "Rawn chhuak rawh" min melh chhuk run chung chuan a ti nghut a, muangchangin ka chhuak, a thusawi anga ka awm loh chuan kut min thlak duh hial te a nia ka rin, chuvang chuan a thuawih hi tun atan chuan a finthlak ber.




Motor atang ka chhuah fel rual rual chuan ka banah a rawn man lehnghal chawt tawh, in lian zet mai lamah chuan min kai dawr dawr a, kawngka kalh na chu hawng in min luh pui nghal, kawngka chu chhung lam atang a kalh lehnghal daih bawk, ka lam chu a rawn hawi a, mitmeng sen rawm a min en chuan ka tha a khur dar dar thei, chutah muangchangin min rawn pan hnai chhat chhat a, ka lo tawlh hnung ve zel bawk.




"Engvanga mipa bula awm reng zel nge i nih?" a ti hmuk a, mipa bula ka awm reng zel pawh ka hrelo, a hrim hrim in tu mipa bulah pawh lo awm ila, a buai na tur a awm in ka hrelo, a zawh na chu chhang lovin ka hawi kual a, tunah tak hi chuan a bul hnai a awm pawh hi ka duh lo, ka hlau takzet a ni, "Min chhang ta che, engvangin nge mipa bulah i awm reng zel tih ka zawt che a nih chu, mipa tello in i awm theilo zawk nge?" a ti leh nghek a.




"Sir..." ka tih lai mek chuan "Khatiang khan min ko tawh suh, hnathawh naah kan awm lo, ka hming pangai in min ko rawh" a ti leh hluk a, enge maw zanin hi a hriat le, tim dai in ka melh reng ringawt a, sawi tur reng reng ka hrelo, "Min hlauh hmel tak khan min en tawh suh, mipa pangai ve tho ka nih hi, engvangin nge ka bula i awm apiang hian in veng reng zel nge i nih, ka hlauhawm viau em ni, mipa dang bula i nuih leh i tawng thin ang khan engvangin nge ka bulah i awm ve loh?" a ti chhuak leh hrawk a.




"Ka haw duh tawh" a tawngkam mak tak tak te ka hre zel a nih chuan ka ngaihtuah na hi a buai vek dawn tak ngial in ka hria, "Lalhlimpui, min peh hel dan zawng suh, ka phal na tello chuan helai hmun hi i chhuah san hlek lovang" a ti chang leh hrawk a, "Aih.. tinge helai hmunah hian min hruai, ih.. ka haw duh tawh, ka thiannu in min lo ngaihtuah tawh ang" ka ti bah nawk nawk a, ka thusawi avang chuan a lungawi loh hmel hle.




"Ka sawi tawh kha, helai hmun atang hian i chhuak thei ka tih hma loh chuan i chhuak dawn hlek lo" a ti bul hmuk a, "Sir.. tinge hetiang hian i awm tlat a, min ti hlau a nia" ka ti sep a, chutah min rawn pan hnai leh a, rang zeta lo awm sawn ka tum chu min rawn nang ching in bangah chuan min nawr bet a, a ban pahnih chuan min khuap nghal run bawk nen kalsawn ngaihna ka tan a awm tawh lo.




Hnai zet a kan in melh dun lai chuan rawn kun hniam in ka hmui ah chuan a rawn fawp a nihchu, a chet dan in min thawn em avang chuan ka lo dawh mawl tawp, ka ka chhung a a lei rawn hawl luh a tum rual erawh in ka ngaihtuah na chu a rawn fim thut a, ka tal nghal phat bawk, mahse min vuan nghet lutuk, ka tal sawn lo chiang a sin, ka lo tal ve sek vanga lungawi lo tih hriat zet hian ka hmui chu a rawn thip zawk a, ka ang zawk lai chu remchang ah la in ka ka chhung ah chuan a lei a rawn hawl lut nghal.




Ka hmui chu dimna nei lek lovin a fawp buan buan a, a awm ah chuan ka chum dawt dawt a, reife min fawh hnu chuan a duhtawk ve thei ta hram, nui suk chungin ka hmai zawn a rawn kun hniam khun chung chuan min en a, a thiltih zawh chiah avanga lungawi lo zet chuan ka en ve reng bawk, "Ka rin ang chiah in a tui" tiin a hmui chu a pet zeuh a, "Min thlah rawh" a duh duh dan a min tih avang chuan ka lungawi lo a, ka tah a chhuak hlur bawk.




"Mipa dang tumah hnaih tawh suh ang che" tiin a awm sawn a, mahse ka taksa hlat ah a awm chuanglo, "Engvangin maw, i hnuaia ka thawh vang hian i duh duh in min ti theilo" ka tih chuan a nui rum hawk a, "Ka thei alawm" a ti sup a, nichin a tawngkam vin leh chang a hman ang kha a ni tawh lo, a aw chhuak chu a dam thlup a, "Aih.. i theilo, mihring ve tho ka nih hi, i thu hnuai a min dah turin ka engmah I nilo" a hmel chu a dang leh ta hlawk a.




"Tun atang hian ka ni dawn alawm, i nunah i chhungte tih lova pawimawh ber ka la ni thuai dawn" mahni i rin tawk hmel tak chuan a ti a, tawng tum a ka ka ka ang chiah tih chuan "Ka hmuh hmasak ber che atang khan ka duh tawh che, chuan ka ta tur i ni tih pawh ka hre bawk, tun atang chuan tu mipa mah i hnaih thei tawh lo, kei tih loh chu, i hrethiam em?" a ti leh a, min duh thu a sawi kha mak ka ti takzet, chutiang zawng in vawikhat mah ka la en ngailo.




"I hrechiang em, nanghi tun atang chuan ka ta i ni" ka hmui bul chet ah chuan a rawn phun leh sup a, "Engmah in zawmna kan neilo, chuvang chuan i thu ka zawm na chhan tur ka hrelo, hnathawh naah chuan i hnuaia thawk ka ni maithei, mahse ka mimal nun ah erawh in rawlh tum suh" luhlul tak chuan ka la ti ve fan a, "Ka la sawi chiang tawk lo niin a lang, nanghi ka ta chauh i ni a, i ni reng bawk ang, mahse ka nawr lovang che, zanin i hrechiang maw, zanin hian lo in ngaihtuah la, naktuk ah i chhan na hriat ngei ka duh bawk ang" tiin a kalsawn ta a.




"Ti rawh, ka thlah ang che" a tih takah chuan rang zetin in atang chuan ka chhuak a, motor a kan chuan chhung zawng chuan kan in be lo hrim hrim, ka ngaituah na hi a buai nuaih nuaih nimai hian ka hria, Sir Felix-a hian min lo duh reng chu a nia, awih har ka la ti, min duh ang tih rin ngaihna ka lo nei ngai miah lo kha a nia, kan in zawnah chuan motor a ti ding a, Tetei a haw tawh tih ka hre nghal thei, motor atanga chhuah ka tum chu ka banah rawn vuan leh in min pawt let a, "Ka sawi kha, zanin chauh in ngaihtuah na hun i nei ania, min duh ve ngei turin i rilru siam ang che" tiin ka in rin hman hma chuan ka biang ah a rawn fawp zeuh a, min vawn na a thlah hnuah rang zetin motor atang chuan ka chhuak a, kan inchhung ah chuan ka lut nghal.

Cont...

Zanin dar 11 velah chapter thar zawm ngai lova lo dah ka tum e aw...

Ads kha out hma in click phawt ang u aw

[Rebec Nunziri]

Chapter-5



Felix Lalhruaitluanga POV



Ka in lamah chuan ka in khalh haw a, ka nui leh suk thin, Lalhlimpuii hi hna dila a rawn interview atang khan ka rilru a luah tawh, a hmel pawisawi lo zet ka hmuh khan ka chhungril hi a che dawt nghe nghe a nihkha, hetiang taka hmeichhia ka vawikhat hmuh naa min ti danglam thei tu hi ka la tawng ngailo, diktak chuan hna a rawn dil khan midang chuan lak an duh chiah lo kha a nia, a lehkha pawimawh te a rawn keng kim lo bawk nen hnawl mai kha an tum a, mahse ka duh lo a nihkha.




A rawn thawk dawn tih ka hriat chian em avangin ka secretary pawh dawr danga thawk turin ka sawn nghe nghe a nihkha, ka secretary anga a thawh dawn thu ka sawi khan mak a ti hle kha a nia, a duh lo a nih chuan bang nghal mai tura ka tih khan ka hlauthawng ve hle, mahse vanneih thlak lutuk in ka secretary anga thawh chu pawi a lo ti lo hlauh kha a nia, ka lawm zia kha, ka tan hun tha a awm ta hlauh zawk a.




Nitin a hmel ka hmuh khan ka lawm a, ka hlim thin, mahse a lakah engmah ka la ti lang ngailo thung, hmeichhia tumah hi duh reng vanga hnaih ka nei ngailo a, chuvang chuan han tihdan tur vak ka hrelo, mipa dang bula a awm lai ka hmu theilo a, mahse engmah tih theih ka nei bawk silo, mipa dang bula a awm in a nui a, nuam tih hmel takin a tawng thin ka hmuh te hian ka thin a lo rim ru tun thin, tinge ka bulah mipa dang bula a tawng a a nuih ang khan a awm ve ngai loh.




Kan khua a ka haw tum pawh khan Hlimhlimi rawn kal ve hi a ngai miah lo, mahse nikhat te pawh a hmel hmu lova ka awm theih loh avangin ka hruai ve a nihkha, mahse Nunsanga nen an awm dun lai ka hmuh khan ka rilru kal sual in ka secretary a nihna atanga ban in midang anga hnathawk tawh turin ka ti a nihkha, ka in chhir leh vat reng bawk, a hnathawh na thar chu nuam a tih hmel hle a, hlat ka duh vangin dawr ah pawh ka kal vak duh lo.




Hmeichhe dang ka kawp phah hial bawk, mahse chupawh chu ngaihsak hmel a pu lo, chuvang tak chuan ka thil tum, ka vei tlat na hi bansan ka tum a, ka tum poh leh ka theilo, ka thei dawn lo tih ka hrechiang viau bawk, ka rilru chu ka siam fel ta a, a ni hi ka hlat ah ka awm tir dawn lo, ka ta a nih theih na tur a nih phawt chuan engpawh ka ti mai ang, eng ang pawn min hnar mahse ka ta ah ka la siam khawp ang.




Party na tur hmun ka theng a, Asangi chuan min bawh leh huam tawh, he hmeichhia hi ka hne takzet, min duh na a rei tawh tih ka hria, mahse ka hnar tang tang thin a nihkha, Hlimhlimi ka theihnghilh theih tak mial in tih thu a ka hmanrua atan ka hman mai mai a ni a, mahse a mizia min tih lawm loh hlau a a khawsa reng hmuh te hi ka hne, hnathawh naah lah min rawn kal chilh fo a, a mizia hi ka hne zawng tak a ni.




Hlimhlimi leh a thiannu Tetei a tiin ka hria, ka cousin Makima an pathum chuan an rawn in zui lut a, Hlimhlimi ka hmu chu khaw dang ka hawisawn theilo, a chhelo takzet, a hmai fai sar mai a tawk chiah a make up a in bel te chu a in hmeh hliah hliah, mahse a kawr hak chu mawi pui viau mahse a taksa a lang tam mah mah, mipa thenkhat ten it hmel taka an en ka hmuh te chuan ka lo sa pup pup thei.




Asangi chuan a fal a awmdun pui ah min sawm reng bawk nen ka ning takzet, a awmdan atang hian a rui tawk viau tawh tih pawh a hriat, mi hriat hlawh ve tak a ni bawk nen ka secretary hnenah chuan hruai haw turin ka ti a, Asangi pawh chuan lungawi lo takin a zui chhuak a, pawi tihna chhete mah ka neilo, Hlimhlimi awmna lam ka en chuan a lo awm tawh hauh lo, pawn lamah a awm ring in ka chhuak a, a lo awm ngei bawk.




Mahse mipa pakhat nen an ni, an bul hnaiah chuan ka kal a, a mipa awm pui tawng ri ka hriat chuan ka sa nghal zak thei, ka duh loh dan deuh a che in Hlimhlimi chu ka hruai chhuak a, ka inah ka hruai ta reng bawk, ka duh thu ka sawi khan mak a ti hle a nihkha, ka hrethiam takzet, a hriatthiam turin a lakah that ka chhuah ngai miau lo, mahse ka duhna hi ka thup thei tawh thlawt lo a ni.




In ka thleng a, Hlimhlimi ka fawh lai te chu ka ngaituah chhuak a, a hmui kha a thlum tui takzet, tu hmeichhia mah hi in zawmna siampui turin hma ka la hmasa ngailo ka tihkha, mahse a ni hi chu hmeichhe dang ang a nilo tih ka hria, ka tan a special takzet, chuvang chuan ka hnaih ah lo chuan a awm tawh dawn lo a ni tawp, a bula ka awm hian ka kim tlat a ni, mite hian hmeichhe hrang hrang kawp thin angah min ngai tih ka hria, mahse an ngaih ang chu ka nilo.




Hmeichhe tamtak te hian ka bialnu nih duh in ka hnathawh naah mai nilo ka in lamah pawh min rawn kal chilh fo, mahse an vai mai chuan ka lo hnar thin, party naah ka kal ve fo a, hmeichhe dang te nen kan awm dun fo bawk, mahse tu hmeichhia mah hi tisa lam takin ka la khawih lo, an mahni in in huam viau thin mahse ka duhtak hmeichhia lo chu khawih ka tum lo, hmeichhia te hian zahawm na an nei ve tho a, chu an zahawm na chu tih chhiat sak ka tum lo bur.




Hmalam hun chu ka hrelo mahse tun atan chuan ka in sum theilo tawp a nih pawh in ka nupui tura ka duh ngei lo chu khawih ka tum lo, midang tamtak in hmeichhe lawm tak anga min sawi thin hi ka hrelo a nilo a, thudik hrechiang tu ka nih avangin han in sawi thiam vel ka tum lo a, a ngaih na pawh ka hre hek lo, Asangi nen pawh hian in zui ve fo mahila a hmui tak ngial pawh ka la sik sak lo, min thlem nasa thin hle chungin ka theilo a ni tawp.




Office ah chuan ka thu ran a, Hlimhlimi pawh a rawn thleng tawh ngei ang, min hmuh a hreh viau in ka ring bawk, a chhanna ka hriat duh thu ka sawi a nihkha, eng chhanna pawh min pe se, min duh loh thu pawh sawi mahse awmzia a awm dawn lo, nizan a a bula ka thusawi kha chu ka sawi ve mai mai a tih theih ang, min hnar a nih pawh in ka bul hnai ah ka awm tir zel dawn tho.




Ka secretary chu dawr danga kal turin ka tir a, ka office kawngka a rawn rik chuan lut turin ka ti vat a, rawn thawk thar kha a ni, file sign tur chu a rawn keng lut a, ka sign zawh a chhuah nghal mai a tum chu ka ko ding leh a, "Hlimhlimi kha ka office a ka hmuh duh thu lo hrilh ang che, customer a buaipui lai pawh nise rawn kal nghal turin ka duh" ka ti a, a chhuah hnu chuan ka nui suk a, min hmu hreh hle ang, mahse ka nghak thei tawh miau lo.



Lalhlimpuii POV




"Boss in a office ah kal turin a ti che" Christy chuan a rawn ti sep a, ka phur loh dan chu pui tak a ni, customer buaipui lai ka lo nei bawk nen Christy bulah chuan lo buaipui chhunzawm turin ka ti a, Boss office lam chu muangchangin ka pan a, a room luh na kawngkhar zawn ah chuan ka ding vang vang a, duhthawh taka thawk ka lak ham ham hunah luh ka dil ta sep a, chhung lam atangin aw nelawm loh zetin lut tura min rawn tih chuan ka lut ta a.




A dawhkan hmaa ka ding chu min en run a, nuam ka tilo takzet, theih nise helai hmun atanga kal bo daih rih mai te hi ka duh rum rum hial, "Chuan...?" ti sup in min la en run a, amah pawh en lo chuan ka kut chu ka sik neuh neuh a, "Min chhang rawh" ka ngawih reng vang chuan dawhtheih loh hmel zetin a rawn ti leh hmuk a, "Sir, ka theilo ang" ka aw chu a zawi lutuk, mahse a hrechiang hle tho ang, "Engvangin?" ka chhan na avang chuan a lungawi loh hmel hle a.




"Ka theilo a ni tawp, ka chhan na i hre tawh bawk a, min nawr luih tawh loh hram ka beisei, customer buaipui lai ka nei a, ka kal ange" tiin kawngkhar lam chu hmanhmawh ru zetin ka pan a, "Ding rawh" ka hnunglam atanga a rawn tih hrawk rual chuan ding chiang tak ka ni, chet pawh ka che sawn ngam tawh lo hrim hrim, pen thawm ka hriat danah min rawn pan hnai tih ka hre nghal thei bawk a, ka pawnfen chu ka tham vak ringawt, chutah min rawn kuai her nawk in hnai chet chawt ah chuan min en run a.




"I chhanna kha engmah mah ka ngailo, ka ta i ni dawn tho tho, chuan naktuk atangin ka office chhungah ngei hian ka PA ni turin I thawk tawh ang, min hnial I tum a nih chuan tum buai lo law law rawh, a chhan chu awmzia a awm dawn loh avangin" a ti zawi sup a, "Min nawr lui theilo, khawngaihin hetiang hian ka chungah chelo hram rawh" ka ti hap a, ka thusawi chu a ngaih pawimawh loh hmel bawk si, beidawng zetin Sir Felix-a chu ka en a.




"Ka sawi ang chu a nimai, ka bulah awm nuam i tilo tih pawh ka hria, mahse ka bula awm nuam i tih na turin ka awm ang" ka sam chhawl leng ka benga rawn zeh pah chuan a ti a, "Tinge nangmah chiah i in ngaihtuah a, a hma pawn i thiante hnenah i bialnu angin min sawi tawh a, min ngaihdan kha i hrelo der zawk em ni, min ngaihdan ah chuan sum vanga hnaih angah che min ngai a sin, chutiang bawk chuan tunah hian i sawm na hi lo pawm ta ila mi zawng zawng min ngaih dan tur a ni dawn bawk" ka ti leh a.




"Midang ngaihdan ah chuan buai suh, chutiang vanga min hnaih duh lo i nih chuan i bulah ka awm tlat dawn, ka bula i awm chhung chu engmah hlauh tur i neilo, ka veng him tlat ang che, chutiang hmeichhia i nilo tih ka hrechiang bawk, chuan ka kalsan ngai lovang che tih ka hria, ka hlat ah ka kaltir ngai lovang che tih ka chiang" tiin a hmui chuan ka biang a rawn nul kual dan dan a, chumi vang chauh a hnar chu ka nilo.




"I hrethiam lo a ni, kei hian ngaihzawng angin ka la en ngailo che, ka boss ang bak in ka en lo che" ka tih leh chuan kan hnar in si lek lek hian min en a, "Tun atang chuan i bialpa anga min en a ngai tawh dawn a nihchu" a ti awlsam leh mai a, tinge maw thil hi awlsam deuh a tih thei tur angin a ngaih tlat le, "Tinge min hriatthiam duh miah lo a, hetia i awm hian hreawm ka tih zia hi tinge min hriatthiam pui miah lo, zankhat thil thu ah hetiang hian i awm a, ka tan a awm ngaihna a awm loh zia hi tinge i hriatthiam loh" ka ti bah nawk nawk a.




"Ka hria, ka hre lutuk, khang hun chhung zawng khan duh loh che tum in ka bei ve tho a sin, ka bul hnaih a i awm chung khan ka khawih theilo che te kha hreawm ka ti ve tho, mahse tunah chuan khatianga en liam mai mai che kha ka tum tawh lo, ka thei tawh lo bawk, ka duh che tih ka chiang a, ka duh ang chiah che hian hun reilote ah min la duh ve vat dawn bawk, chu chu ka in hriatchian tluk zetin ka hrechiang" confi tak chuan a ti a.




"Nilo nanghi ka duh ngailo ang che, ka mipa duh zawng pawh i nilo, nang ang mipa thu tak ren run thin bulah hian ka awm peih lo" ka in sum hman lo, chutah chiang takin min en a, a kiai suk, "Lungngai suh Bawihi, min duh ngei theih na turin ka mizia chu ka thlak mai a niang chu, chuan nang hi ka ta i ni a, min duh ngai loh tur thu kha sawi mahla min duh ngei ngei turin ka la siam dawn che alawm, chuchu chiang takin ka sawi ngam" engvanga in ring tawk em em nge maw a nih le?...




A room atang chuan ka chhuak a, ka mood pawh a fuh lo vek, nileng chuan awm nuam lo lutuk in hna chu ka thawk a, ban hun a nih takah chuan Tetei bulah haw vat vat ka rawt a, scooty a kan in phur haw lai te chuan nidang ang lo takin ka ngawi reng a, nizan khan Tetei bulah engkim ka sawi a, mak a ti ve hle nghe nghe a nihkha, zawhna tam tak a nei ang tih pawh ka hria, mahse min hrethiam takin engmah min la zawt duh bik lo.




In kan thleng a, Tetei chuan awm hahdam turin min ti a, keipawn ka lo hnial biklo, chaw ei hun awm velah ka room atang ka chhuak ve ta chauh, chaw kan ei kham chuan sitting room ah kan thu a, Tetei chuan min rawn melh leh zawk thin, "Vawinah khan min sawm na ka hnawl thu ka sawi a" ka ti sep a, "Mahse tinge, Sir Felix-a ang bialpa te chu hmeichhia ten an duh viau thin a sin" a rawn ti vat.




"I hriat kha, kan mizia a in ang lo lutuk, a ni chu ka tan a san mai bakah hmeichhe hrang hrang a kawp thin a, keichuan keima ta tur tumah min tawm pui loh tur mipa ka duh, bakah min fiam kual mai mai bak a nilo ang" ka ti sep sep a, "I ngaihdan tur chu ka hriatthiam pui che alawm, mahse keichuan Sir Felix-a nen hian in ngaizawng ula ka ti a sin, han in en la, i hmeltha a, i pian a nalh bawk a, i fel tel cheu bawk nen Sir Felix-a hian a fiam che ka ringlo" a ti ve leh a.




"Kan in mil dawn lo, aa.. ka bialpa ni turin ka la ngaihtuah chhin ngailo hrim hrim bawk a, ka tan chuan a harsa ve alawm, amah hi duhna pakhat mah ka neilo, nilo a bula ka awm hi chuan ka danglam thin ngei a, mahse duhna vang niin ka hrelo, i hriat kha Asangi nen an in zui tih pawh" ka tih chuan a ngawi vang vang a, thil tam tak ngaituah hmel a pu bawk, "Engpawh nise i thuthluk na chu ka pawm pui viau lo chung che in engmah ka sawi buai lovang, i lam ka tang a nia" nui var var chunga a tih chuan ka lawm takzet.




"Tinge zanin chu Sir Makima hi a va rawn lang lo ve" ka ti ta daih a, "Kalna tur pawimawh a nei a" rang zetin min lo chhang a, "Nangni pahnih hi ka hrethiam a nia aw, tinge in in duh tawn thu hi in sawi mai loh a" ka ti leh a, "Keichuan ka duh a, mahse hmeichhia ka ni sia, sawi hmasak ka duh lo alawm" a tih chuan ka hrethiam, hmeichhia in hma han lak hmasak mai hi chu kan harsat thin reng a ni.




"Naktuk atang Sir Felix-an a PA anga ka thawh tawh dawn thu a sawi a, ka huphurh lutuk" vawin a a thusawi ka hriat chhuak zawk rual chuan ka ti a, ka phur lo takzet, ka laka a rilru put hmang leh a chezia vel atang khan a bul hnai a awm tam vak ka duh lo a sin mawle, "Eiss.. a hma in a secretary i nia, tunah a PA ni turin a ruai lehnghal der che a nia" tia min fiam chuan rum zetin ka en a.




A tuk lamah chuan hna kal turin kan thian dun chuan kan in phur chhuak leh a, Sir Felix-a sawi ang ngeiin a office chhung aah ka dawhkan tur a lo awm a, a mah pawh a lo thleng tawh, ka thutna tur hmun ah chuan ka thu ran a, secretary a nei tho bawk nen enge ka lo tih ber tur pawh ka hrelo, bakah a dangdai hrim hrim, secretary a nei a, PA a nei bawk a, hmm.. a thiltih chhan chu ka hriatchian tak kha mawle.




Ka dawhkan turah chuan laptop a awm a, Sir Felix-a lah chuan a thut naa thu chungin min en ngur bawk nen ka che lai zo vek in ka hria, "Sir.. i room ah lo room pawn lamah sawn ka awm thei mai lo em ni?" tiin Sir Felix-a lam chu ka en a, lu a thing nghut a, "Hetah i awm ang, nileng a i hmel hmuh ka duh" ka va han ngei mai mai tak, min ngaituah na pakhat mah a neilo, a hma a sial lutuk chu ka ngei hluah hluah a ni tawp mai.




File pakhat min pe in laptop a chhu lut tura min tih chuan ka ti nghal zung zung a, ka zawh hnu chuan ka hawi chhuak a, Lalpa leh ka thutna atang chuan ka phut nasat lutuk avangin ka tla tep nghe nghe, Sir Felix-a chuan hnai chet chawt ah min lo en reng chu niin, engtinge maw ka lo hriat loh theih zawk ni, ka awmdan a hmuh chuan nuih za in sum hmel fe in min la melh ngur ngur zui a, ka boss chu nilo se ka vin nasa ngawt ang.




"Ka ti phu che a mi?" zawh ngai lovin ka awmdan atang hian a hmu chiang hle sia, "Ka zo tawh e" a zawhna pawh chhang lo chuan ka ti a, "Awle, eitur ka chah a, an lo dah tep kan ei dun dawn nia" a ti sup a, sana ka en chuan thil ei hun a lo ni daih tawh, "Ah.. Sir, ka thiannu nen ei dun kan lo tum tawh a, ka kal zawk mai ang" tih paha thawh ka tum chu ka dar ah raan chelh in ka thutna ngai ah bawk chuan min nawr thu a.




"Keimah nen kan ei ang, midang nen a ei rual a tul na a awm lo" a ti ta hmak a, a aw chhuak a chan em avang chuan ka hnial ngam tawh lo, eitur chu a sawi ang tak tak in a rawn thleng har lo, dawhkan te ah chuan rawn chawi lut tu chuan a dah zung zung a, a zawh fel hnuah a chhuak lehnghal, "I ei duh zawng tura ka rin ka chah a, i ei teuh dawn nia" tiin ka hmaah chuan momo leh rice tih vel chu a rawn dah a.




Momo chu ka ei nghal vat a, ka riltam tawh bawk nen ka zak buai peih lo, ka ei zawh chuan ka puar tawh hle, in tur a chah tel bawk nen a rice chah hi chu ka ei thei tawh lovang, "Rice hi i ei dawn lo a mi?" ka hmui ka hruk fai lai chuan a rawn ti sup a, "Ka puar tawh, nangman ei mai rawh" ka ti a, "Keipawh ka puar tawh, heichu la let leh mai rawh se" a ti nghut a, "Pawisa an pe let dawn che em?" ka lo ti vat.




"Dawn lo" a tih chuan rice chu ka en vang vang a, ka ui tlat, a tui hmel bawk si, "A rawn seng fel tur an rawn kal hunah rice pack na tur hi keng turin ti la, ka pack mai ang, haw hunah ka ei leh mai ang" ka ti a, pawisa pek vek tawh hnua engmah ei loh han dah let tawp chu ka ui tlat, Sir Felix-a chu a nui ri suk a, a lam chu ka en vat, "Enge?" ka ti haw chuan lu a thing ringawt a, phone chu hmet zui in rice pack na tur chu a chah a.




Rice chu ka pack a, Tetei nen ei teuh ila a nimai, ei kan thei dun lem lo bawk a, restaurant kan chawlh ve pawh hian a half bak kan chah ngailo, hei phei chu a full in a nia, tukin khan chawhmeh a la bang nual a, chaw chhum lovin heihi a rin tlang theih dawn a, a zia viau mai, chawhnu lamah chuan hna ka thawk leh mawlh mawlh a, engmah harsa lutuk phei chu a awm lo, Sir Felix-a hian tul lovah hetah hian min awm tir mai mai niin ka hria.




Tuna ka thiltih lai pawh hi a secretary khan a ti fel vek tawh ang tih ka hria, thla thum lai a secretary anga ka lo thawh tawh avangin a secretary thil tih tur ang chu ka hre hneh ve viau bawk, a office chhungah ka awm ve reng bawk nen nuam pawh ka tilo, ka hna ngai kha thawh ka chak zawk fe, hah zawk mah ila Sir Felix-a hnaih ah ka awm lo tal a, tunah tak hi chuan eng vak tihtur a awm lo bawk nen ka hnathawh ve dan hi ninawm lamah a kal mah mah tawh zawk.




Ka thil tih tur ang te ka ti zo leh tawh bawk nen dawhkan chu bawh in ka muhil a, Sir Felix-an min hau lo bawk nen a pawi lutuk lo turah ka ngai hmiah, kawngka in hawng ri chu ka mang hriat ruai ruai a, hmeichhe tawng ri ang deuh te ka hria, ka harh telh telh a, "Tunge saw nu saw?" tih ri ka hriat leh chuan harh chiang tawh tak ka ni, ka thu tha vat a, chutah Asangi ka hmu nghal zat.




A ni pawh chuan min lo en ve reng a, "Ka tihpalh lutuk ka lo muthlu palh a" tiin Sir Felix-a chu ka en a, "Asang, engvangin nge hetah i rawh kal?" lawm hmel vek lovin Sir Felix-a chuan a ti hluk a, "Ka ngai che a, ka lo kal a nih hi, nimin lamah kan in hmu bawk silo a" tiin Sir Felix-a chu a en a, Sir Felix-a chu a lo rum nghut a, "Ka sawi fo tawh kha, hnathawh lai chuan rawn kal thin suh ka tih kha" Sir Felix-a bawk chuan a ti leh a.




"Ka ngaih vang che in ka lo kal alawm, min ngai ve lo a mi?" tiin Asangi chuan Sir Felix-a dar chu a hmet nghal niap niap a, ka lo en reng lai chuan Sir Felix-a chu ka lam a rawn hawi thut a, laptop chu ka en nghal vat, "Ka buai lutuk, lo va chhuak rawh" Sir Felix-a bawk chuan a ti leh nghut a, "I ti mak e, ka hmuh chak vang che in helai thleng ka rawn kal tawh a, let leh turin min ti amaw?" lawm hmel vak lovin Asangi pawh chuan a ti a.




An in biakna lo ngaithlak reng chu nuam ka tilo hle, "Sir min lo hrethiam la, washroom lamah ka kal lawk thei angem?" tiin chhuanlam chu ka siam a, a lo phal ve mai, hun thawl te pawh an duh ve ang chu, washroom ah chuan ka lut a, let leh vat ka peih loh avangin ka awm rei khawp mai, Sir Felix-a pawh hi bialnu nei reng chungin kei min beisei ngam ania, ka rin ai daih in a lo lerh, kawp mai mai atan bak min tih kha ka ring lo reng a, ka thuthluk na siam kha ka siam sual loh zia tunah khan ka hmu chiah.




Minutes 20 lai washroom ah chuan ka awm a, rei min tih ka hlauh avangin ka let leh a, phur lo zetin Sir Felix-a office ah chuan ka lut a, Asangi chu hmuh tur a lo awm tawh lo, "I va rawn let har ve" Sir Felix-a chuan min hmuh rual rual in a ti a, "Nia.. toilet hmang an lo awm a, ka nghak lawk mawle" tiin ka thutna ah chuan ka thu thla a, Sir Felix-a lam chu ka la en lo hrim hrim.




"Nichin a i thil hmuh kha a nihna ang a nilo ania" a rawn ti leh a, "Sir, engpawh i office chhungah hian lo thleng se, in sawifiah a tul hleinem, a neitu ber i ni a, engmah sawi buai theih ka neilo" ka ti tha leh mai a, laptop chu tul lo pui ah ka en ta reng ringawt a, "Ka sawi tawh kha" a ti leh nghut a, "Keipawn ka sawi tawh kha, nang leh kei a inkar ah chuan engmah a awm lo, chuchu kan pahnih hian kan hrechiang ve ve, chuan nangpawh bialnu chhelo tak i nei a, keichu min tih buai tawh loh hram ka beisei" tiin Sir Felix-a chu ka en a.




A lungawi loh hmel hle, "Asangi kha ka bialnu a nilo" a ti hmuk a, "Ka buaina tur a nih loh chu" ka lo ti awlsam then a, "Hlimpui ka sawi tawh kha, ka thusawi te kha nam nul hauh suh ang che, nanghi tun atang chuan ka bialnu i ni tawh i hrechiang maw?" a tih leh chuan ka en reng ringawt, a bialnu anga awm tumna pakhat mah ka neilo, a bialnu tun lawk ah khan a rawn kal zo chiah a, hetiang thu sawi te hi a zak miah lo zawk a mawni?..


Cont ..

Tum angin ka lo dah hma theilo a, min hrethiam hram hram dawn nia aw, naktuk hi tournament kan khel dawn a, a awm hman in ka ring lo bawk aw...

[Rebec Nunziri]

Chapter-6



Lalhlimpuii POV




Zanah chuan Tetei nen tv kan en dun a, thlahrang film a ni bawk nen kan in thut hnaih khawp mai, a dawih chi ve ve kan lo lo ni bawk a, eng emaw hlek ah in sum zo lovin kan au leh that thin a, changtunu ber in kawngka pakhat thawm awm reng na chu a hawng dawn chiah tih ah kawngka kik ri a rawn awm a, Tetei nen chuan phu chiang tak kan ni, hawn pawh tum lo chuan kan in en a, kan hlauhna a la reh lo bawk nen han kalsawn chu kan la ngam mai lo a ni.




"Va hawng rawh" Tetei chuan a ti sep a, "Ka duh biklo" ka lo ti tung thung, "Awle, keiman ka hawng mai ang" tiin a kalsawn a, ka lo en reng, Sir Makima bak a nih ka ringlo, "Hlimhlim, hei Sir Makima leh Sir Felix-a te an lo leng a" Tetei leh Sir Makima te pahnih chu an rawn in zui lut a, Sir Felix-a chu mak ti zetin ka lo en reng, kan in a a rawn len ka beisei lo lutuk ringawt, ka en reng tih a hmuh chuan a kiai deuh suk a.




"Enge in lo tih dawn?" thutthleng a an rawn thut thlak rual rual chuan ka lo ti nghal tawl a, "Mipa hmeichhe in a kan leng a nih chuan kan rim tihna chu a nimai anga tiraw?" Sir Makima chuan nui hawk chungin a ti a, a ngeiawm thiam lutuk hi engtia tih chi nge mawni, Sir Felix-a chuan kan inchhung a rawn pen luh atang ka lak atang a mit a la la sawn lo hrim hrim, min en char char ringawt a, ka awmdan a lai zo leh vek dawn in ka hria.




"Thingpui ka lo lum ang cheu aw" tih paha Tetei a thawh chuan thawh ve nghal mai ka tum a, "Hlimhlim tikhan lo awm rawh, keiman ka lum thei alawm, Sir te hi lo kawm rawh" enge maw Tetei hian a hriat ni, rum zeta ka en na chu a hmu lo der hmak lehnghal, sawi tur em em ka hriat loh vangin tv lam chu ka en reng ringawt a, nichin a hlau em em si kha ramhuai ber a rawn lan pawn ka phu eih lo, mipa pahnih ka bul hnai maia an awm vang pawh a ni mahna.




"I va huai ve, hmeichhe dang chuan thlahrang film an en chuan an au nasa thei a sin, nang ve phut pawh i phu miah lo ania" Sir Makima chuan a ti hluai a, "Huai lam pawh a nilo" lei chhuah zeuh chungin ka ti sep ringawt, "Hei thingpui hi in rawh u, Hlimhlimi ang em em chuan ka lum tui lo maithei" tiin dawhkan te kan dah ah chuan thingpui no chu a rawn hung a, "En mai hi chuan a in ve tlak hmel tho hi" tih pahin Sir Makima chuan no chu a la kang zui a, Tetei chuan a ngei hmel leh nasa tawh mai.




Thingpui te chu kan in zo a, Tetei leh Sir Makima an in biak mawlh mawlh laiin kei leh Sir Felix-a te erawh kan ngawi reng a, a chang in kan mit a in tawng fuh chat thin bawk, "Tete dawr ah min va kal pui lawk ta che, thil lei tur ka nei a" Sir Makima chuan Tetei bulah a ti a, "Nangmah in va kal mai la" ka lo ti thuai, Sir Felix-a nen chauh awm ka duh reng reng lo, "Dawr awmna ka hrelo a, hei ka u a awm tho bawk a, kan va kal lawk ang, kan reilo ang" tih leh din chhuah a rual nghal a, Tetei nen chuan an in zui chhuak nghal.




Sir Makima chu ka ngei hlur mai, dawr awmna chu a hre dawn tih ka chiang, kan in atang hian dawr chu hla ve viau mahse a rawn kal ngun tawh a, hriat loh tur a awm lo, Sir Felix-a hian a tih tir a ni hrim hrim ang, "Ka bula awm chu i va hreh hmel ve" Sir Felix-a hian nui suk chungin a ti a, "Chutiang pawh a nilo" ka ti tawp, chhan dan tur vak pawh ka hrelo, hreh chu ka hreh ngei a, mahse kan inah leh zel keimah zawk kimki lutuk anga lan kha ka tlawm la ve tlat a ni.




"Enge kan inah hian rawn tih i tum?" tawng lova a ngawih char char avang chuan ka ti a, "Ka bialnu chu ka len chilh theilo em ni?" zawhna bawk in min chhang ka ti mai, "I bialnu ka ni bawk lo" ka lo ti let leh vat a, "Oh.. i ni ngei alawm" ngeiawm zetin a rawn ti ve leh, "Enteh min duh thu I sawi pawh a ni maithei, mahse ka duh ve che tih ka sawi miah loh kha, chuvang chuan i bialnu chei a min chei tum ringawt suh" ka ti ta hlak hlak a.




Kan inchhung zawk a ni a, tunah tak hi chuan ka tan pawh ka boss ni lovin mipa pangai ve mai a ni, "Min duh thuai dawn tho alawm, Bawihi min hnar tum eng ang mahla i thei ngai chuang lovang, a chhan chu maw tun atanga reilo teah hian min la duh ngawih ngawih dawn, chuan hetia ka chet avang hian lawmthu min la hrilh duh hial zawk ang" lawmthu hrilh a, hepa han zah loh em em dan hi, lawmthu sawi chu a hmel saw a nimai.




"Oh.. i ngaihtuah na sawi chhuah i ching viau tih i theihnghilh thin niin ka hria" a rawn ti leh zat a, ka lo sawi chhuak leh tawh a nihchu, "Haw tawh rawh, ka mu duh tawh, Tetei te pawh chu an va rawn let har ve" tiin sana ka en a, darkar chanve dawn lai a liam leh tawh, rawn let loh na hun a ni tawh lo hrim hrim, "An rawn let lawk lovang, Makima khan Tetei kha hmundang ah hruai a tum alawm" Sir Felix-an a rawn tih chuan a lam chu rang zetin ka hawi a.




"Khawiah nge a hruai dawn?" ka ti nghal hluai bawk, "Ka hrelo" a ti tawi leh tuk a, khawiah nge maw an kal dawn ni, "A nihchuan haw tawh mai rawh, ka mut a chhuak" ka sawi zawh rual rual chuan a rawn nui chhuak hawk a, "Duhtak, tun hi mut hun pawh a la nih loh hi" tiin banga sana in tar chu a melh zeuh a, dar 8 a la ri lo deuh, ni e tun ang hunah hian ka la mu ngailo, mahse Sir Felix-a hi haw vat vat se ka duh tawh a ni, kan pahnih chiah a kan awm hian ka thaw tha theilo, kan in a te bawk si.




"I mut a chhuak lo tih ka hria alawm, i thiannu te rawn let hma loh chu ka haw dawn lo bawk a nia, Makima nen kan rawn kal rual a, motor lak a keng chhuak daih bawk si, haw na tur ka neilo hrim hrim" a tih leh phei chuan ka thaw hak ringawt, ngawi rengin ka thu chawrh chawrh a, a chang leh ka phone chu tullo pui ah kan en leh thin, eng em em en tur a awm bawk silo, tv ah lah ka en peih loh chi hlir a chhuak bawk si.




Sir Felix-a chu a thutna atanga rawn tho in ka bulah chuan a rawn in sawn a, sir lam a tawlh sawn ka tum chu ka kutah a lo man chat, "Che reng suh, hahdam takin awm tum rawh, engtin mah ka ti dawn lo che" a ti hluk a, "Min thlah teh" ka tih chuan a lu a thing nghut a, "Sir.." a rum nghut avang chuan ka tawng lai chu ka tawp deuh chawt a, "Sir tih khan min ko tawh suh, mahni bialpa te Sir an ti ngailo" a tih chuan ngei zetin ka melh a.




"Ka bialpa i ni miau hleinem" ka ti hlak a, "Ka ni chiang alawm" a ti ve sup a, kan in hnial nghal char char a, Sir Felix-a hi hetiang em em hian a tawngthei tih ka hre ngailo, a tawp ah phei chuan ka hnial hneh lo chu ka tum hmuk tawh, "I thinrim em ni?" nuih za aw zeta a rawn tih leh te chuan ka chhang duh tawh lo hrim hrim, a ni lah chu a nui suk suk mai bawk si, Tetei te pawh hi enge an tih em em ni darkar khat chuang an kalbo tawh.




"Ka awmdan hian a ti hrilhhai viau ang che tih ka hria, mahse hmeichhia te hi ka duhthu in tumah hi hnaih ka la tum ngailo a, ka thiam bawk hek lo, hetianga ka chet mai loh chuan tihdan tur ka hrelo a ni" thutak deuh zawk chuan a rawn ti sup sup a, "I bialnu anga min treat i tum ringawt hi dawn sawn dan ka thiam lo, keichuan a tir atang khan ka boss ang bak in ka en lo che a, hetianga i awm thut hi ka tan a hreawm zia i hrelo a ni" ka ti ve vat a.




"Ni e, engtin chiah nge i awm ang ka hrelo mahse ka sawi tawh ang khan ka thiam angin ka che mai a ni, mipa dang bula i awm lai ka hmu thei lo, ka ta chauh ni turin ka duh che a ni" a tih leh chuan ka ngawi ta reng ringawt a, mahse thil hriat chhuah thut ka nei, Sir chu ka en a, ka awmdan a hmuh chuan mak tih hmel takin min en ve reng a, "Bialnu i neih kha, chuvang chuan hetiang hian awm tawh lo zawk rawh, i bialnu a chhelo a, kei nen phei chuan tehkhin chi kan nilo" ka tih chuan min en vang vang hnuah a nui suk a.




"Ni e, tehkhin chi in nilo" a ti dut a, a sawi zawh rual rual chuan ka chhungril hi a che dawt maiin ka hria, "A ni ai a letin I tha zawk, a ni khan engah mah tluk na che a neilo" a ti leh sup a, a thusawi ka awih loh em avang chuan ner nangin ka en a, a ni lah chu a la thutak hmel em em zui, a mit hi entir a ngai a niang, Asangi kha chu a hmeltha a, a pian a nalh bawk, mi tamtak in ka pian nalh thu sawi ve thin mahse Asangi ang em chuan ka pian hi a nalh lo tih ka hria.




"Thu awihawm loh deuh deuh sawi lo mai teh" ka tih chuan a nui leh suk a, hetiang em em hian nuih a duh tih ka lo hre ngai miah lova, "Enge i nuih reng a, a hma zawngin nuih I hreh theih tehreng nen" zawi te chuan ka ti leh sep a, "Bawihi, khang hunlai kha chu a liam tawh, nangmah vang hian ka mize nelawm loh zet te hi thlak ka tum mek a nihhi, mahse nangmah lakah chiah a ni thung" a ti leh dap dap a.




"Tetei te chu an van rawn let har em em" ka ti ta daih a, a thusawi te avang khan ka lai vek in ka hria, "An rawn let tep ang" a sawi zawh rual rual chuan kawngka lamah chuan thawm a rawn awm a, Tetei te pahnih chu an rawn in zui lut nghal, "Khawiah em em nge in kal a, in va rei ve" ka lo ti hlak hlak a, "Sir Makima hi alawm, dawrah min kalpui dawn emaw ka tia, hmundang ah min hruai daih alawm" Tetei pawh chuan a rawn ti lut nang nang a.




Sir Felix-a te pahnih pawh chu rei awm tawh lovin an haw vat a, "Awii.. Sir Felix-a awm lai khan ka sawi zak bawk sia, ka in sum hram hram, Sir Makima khan min duh thu min hrilh a sin" Tetei chuan phur zetin a ti a, "Engtinge i chhan?" ka tih chuan "Engtin mah ka la chhang lo" a ti awlsam then a, "Tinge I duh ve reng sia, chhan ve nghal mai tur che alawm, i ti awm ang lo e" ka tih chuan a thaw hak a.




"Hmeichhia kan nih hi, in duh thiam ve te pawh a ngai alawm, tikhan rilru buai deuh in awm rih rawh se, karkhat tal han liam se ka chhang chauh ang" a tih leh chuan "I chan ange aw, Sir Makima te chu a luck zia i hriat kha" ka ti a, "Awi awi, karkhat lek pawh min nghak theilo a nih chuan min duh tak tak lo tihna a nimai, keichuan min duh tak tak lo tu mai ka chan dawn a, a ni chuan amah duh deuh tu a chan dawn alawm" nui hak hak chunga a tih leh chuan keipawh chu ka nui ve tawp.




Karkhat lai a liam ve leh tawh, Sir Felix-a chuan min ngaihsak em em a, eitur te hi ka duh ang tur a chah ziah a, ka ei tui thei hle lehnghal, keipawh hian Sir Felix-a hi ka pawh tawh khawp mai, a hma ang khan hlauh na em em ka nei tawh lo, a sawi ang tak tak khan ka tan inthlak a tum ve hle in ka hria, a lakah chuan a nelawm em em a, mahse a office a hnathawk dang te an lo kal erawh chuan a hmaa a mizia ang tho kha a pu a, a nelawm loh thin viau, a chang chuan ka lo ngei thei khawp mai.




"Sir ka chhuak lawk thei angem?" ka ti sep a, min en ngur lehnghal, "Khawiah nge i kal dawn?" a ti sup a, "Ih.. washroom ah ka kal lawk duh a" ka ti leh a, "Office chhungah pawh a awm reng alawm, pawn lamah chhuah kher a ngailo" a va mak tak, khua a lum bawk sia, chhuah vel mai mai ka duh vang zawk a nia, "Office chhung a mi te chu nangma hman tur chauh a nia, ka lo hman ve a rem hleinem" ka ti a.




"Bawihi nangchu midang i ni hleinem, i duh phawt chuan i duh hun hun ah i hmang thei reng" a tih leh chuan ka en ngar tawh a, "Pawn lamah vah harh ka duh a, i office ah nileng in ka awm tawh bawk sia" ka ti sep sep a, "Awle, mahse reilote chiah aw, minutes 10 hnuah rawn let leh ang che, chuan mipa dang tumah hnaih ka phal lo tih i hriat kha" ka chhuah hma in kan melh rum leh hrep phawt kha.




In hnuaiah chuan ka chuk a, Tetei hnathawh naa ka kal chu Sir Makima a lo awm ve kuk a nihchu, nimin piah mai khan Tetei'n chhan na a pe a, a office ah pawh awm lovin Tetei bulah a tap chawt a, Tetei lah hian a office a kal turin a lo ti ve reng thin a, awmzia a awm lem hlei lova, "Sir Felix-a chuan chhuah a phal ve teh mial che elaw?" nui var var chungin Tetei chuan a lo ti a.




A office a hna ka thawh hnu atang hian a office ka chhuahsan khat khawp mai, chhun ah lah a office ah thil kan ei mai a, ka chhuak ngai miah lo, chhuah ka dil chang hian a phal lo leh thin bawk nen, "Khua a lum bawk sia, tihtur em em ka nei bawk silo a, ka ning thei a nia aw, a chang phei chuan ka muhil daih zel alawm, nangmah ang hian hnathawh ve daih ka chak" ka ti nang nang a.




"I vannei daih zawk alawm le, a ngaihsak bawk che sia, nangmah hi nih ve daih ka chak thin" Tetei chuan a ti a, Sir Makima chuan a lo melh kur a, "Chu ka duat lo che i tihna em ni?" a lo ti nghut, "Min duat in i in hria em ni, ka hnial peih chhung che chu min hnial a, min tih thinrim phet i tum thin kha, I u hi i chhun lo lutuk mai" Tetei lah chuan a lo ti a, Sir Makima chu a lawm loh hmel nasa mai, Tetei chu a melh ngur a, Tetei lah in engah a lo ngai bawk silo.




An in hnial char char a, minutes 10 dawn ka awm hnuah "Ka kal dawn, in hnial reng lo teh u, midang pawn an ning ang che u" ka tih hnuah ka kalsawn a, Sir Felix-a office a ka let leh hma chuan washroom lamah kal hmasak leh phawt ka duh, Sir Felix-a khan minutes 10 a ti tak na in a pel daih tawh, mahse min hau dawn chuang lo tih ka hriat vangin ka hmanhmawh peih lem lo, washroom a ka luh hnuah toilet ah ka lut tlang nghal a.




Ka in hak zawh hnu a chhuah ka tum lai chuan pawn lamah thawm ka hria a, "Awi.. engtinge Sir Felix-a hi a thlem bik le, a rawn thawh na a la rei loh tehreng nen Sir Felix-a lah hian a duat ropui sia, a bul hnaiah lo chuan awm tir a la phal lo zui, ka thik e" hmeichhe aw chuan a ti a, "Khum lamah a zei viau pawh a ni thei a, keichu ka ngaisang lo nasa, a ni ang gold digger lutuk hi chu engah mah ka ngailo, a nun a lem emai" hmeichhe pakhat chuan a ti hlak a, ka chungchang an sawi ni ngeiin ka hria.




"Chuchiah tiraw, bakah a zak miah lo emaw ni, Sir Felix-a te chu Asangi nen an in kawp a, an in hmeh thu miten an sawi nasa a, chute pawh chu a hre ve lo emaw ni, ti hian pawisawi loh hmel taka awm chungin Sir Felix-a a thlem reng tho chu a nia, ka hlauh zawng tak a ni" an thusawi ka ngaihthlak chhung zawng chuan ka lo tang tung a, ka nihna nilo lutuk a min sawi avang chuan ka thinrim hle bawk.




"A ni ang hmeichhia hi chu hnaih duh miah loh tur, bakah a mawl reng reng, Sir Felix-a hian nawm chen nan mai mai bak a ti tawp lovang, a fing viau nangin a fing famkim biklo, keini'n a nachang pawh kan lo hriat loh a ni chuan hun reilote chhung in tih nachang a hre bik a, Sir Makima a hnaih hmasa phawt a, mahse Sir Makima aiin Sir Felix-a a hausa zawk tih a hriat hnuah Sir Felix-a zawk a hnaih lehnghal zat a nia" an nui zui hak hak a.




"Aa.. Sir Felix-a hian enga tan mah a tih loh hunah chuan maw a la in chhir ve ngawt ang, keichu a chan tawk a hmu ka ti mai, mi in ngaizawng tha hle hla lai inkar a a in rawlh ngam ringawt te hi a ngam ka ti tawp, kei ka ngam dawn loh tehlul nen" an ti leh zat zat a, "Chuchiah, a huaisen khawp mai, Sir Felix-a hian engthil chiah nge a tihsak chu hrelo mahila thil tha tak chu a pe thin ngei ang, ks te nen hian an danglam na ka hrelo" ka in sum thei tawh thlawt lo, toilet atang chuan ka chhuak a.




Hmeichhe pahnih te pawh chuan min hmu chu an phu ve dawrh mai, "Ka chanchin khatianga sawi tur khan eng ang taka fel angah nge in in ngaih a?" ka thinrim em avang chuan ka vin that a, "Oh.. i chungchang ka sawidan chuan a ti lungawi vak lo che a ang, mahse thudik kan sawi mai ania, thinrim na vak tur pawh a awm loh khaa" tiin an thian dun chuan an nui dun hak hak a.




"Engmah ka chungchang hriat in neilo, chuvang chuan khatiang thu kha sawi tawh hlek suh ang che u, nangni anga nun lem hmang a nung ka ni ve lo ania" ka ti leh hlak a, "Chu keini ai tha viau ah i in ngai em ni, zaklo lutuk, nang ang taksa mawi na hmang tangkai a mi hausa te thlem kual thin kan ni ve lo, chuvang chuan keini nen chuan in tehkhin lo mai teh, nang te chu ks ang lek alawm i nih" a ti leh ham ham a.




"Oh.. chu nangni taksa chhuan tur pawh nei velo te hian min lo thik viau tihna em ni?" an tawngkam hman ang hmang a ka tih leh chuan an thinrim hmel hle, "Nanghi kan thik hlawl lo che, thik tham pawh i nilo, Sir Felix-a hian a duh tak tak che emaw i tia, hre rawh, nanghi chu a nawm chen nan bak a tilo che" an tih leh chuan ka nui hak a, "Nangni mahni tawk a tha in ti ve tak tak te hi Sir Felix-an en pawh a en ngai loh lai cheu in kei min hnaih bik vang hian min lo thik hle aniang maw?" ka ti leh sak a.




"Hmeli" tih pahin a sang zawk chuan ka sam a rawn keh a rual a, sam a in keh hi ka huat zawng tak a ni, ka sam a a tham mek lai chuan a thiannu chuan ka kut rawn man beh a tum veleh a, chumi rual chuan ka kut chu ka vai pawp a, a thiannu ka kut man beh tum tu zawk chu a thal nghal tawp, a hnar ah ka hnek bawk a, a na ve khawp ang, a te nghal tuar a, ka sam a tham tu zawk pawh chu a hmaiah ka hnek ve leh a, ka sam a tham na chu a thlah hlawk a, ka lu lei a na nghal ut ut thei.




"In la duh em?" tih pahin ka pan hnai leh a, an pahnih chuan rawn tho chhuak in min rawn khawih zawm leh a, ka pet a, ka hnek bawk a, kei ai an te daih avangin min hneh lo hle, ka tha hi a chak ve pangai a, thingtlang nula ka ni bawk nen an ni khawpui nula no lutuk hian min hneh teuh lo mai, pakhat zawk chuan ka sam ah bawk a rawn tham leh a, ka lu chu a thing zui nawk nawk a, ka sam a tla teuh in ka ring.




"Tawp nghal rawh u" ti ṭhawt ri ka hriat rual in min pawm kang nawlh tu an awm a, ka thinrim em avangin ka la tal laih laih thung, "Min thlah rawh, ka la duh tawk lo, saw mi te pahnih saw ka la khawih dawn, min thlah rawh ka tihchu" tiin min pawm kang tu kut ah chuan ka chum dat dat a, tunge a nih pawh ka hrelo, ka thinrim lutuk chu ka sa pup pup a, ka beng te thleng hian a kiu vawng vawng hial thei.




"A tawk, in sum rawh" ka beng zawn ah chuan a rawn phun sup sup a, tunge a nih ka hrechiang tawh hle, zawi muangin ka in thlah dul a, min la chelh reng tho, "Nangni pahnih kha ka office ah tunah rawn kal nghal rawh u" Sir Felix-a chuan hmeichhe pahnih ka in sual pui te bulah chuan a ti hrawk a, washroom atang chuan min chhuah pui nghal, ngawi rengin ka awm a, ka rilru chu a na hle bawk, miin ka nihna lo lutuk a min sawi hian ka in sum thei ngailo.




"Enge thil awmzia sawi rawh u" Sir chuan a ti a, hmeichhe pahnih te chu kan hmaah an ding a, kei erawh Sir Felix-a bulah ka thu thung, an ngawi reng a, keimah zawk hian zawhna ka nei, Sir Felix-a lam chu ka hawi a, "Sir, keihian ka zar buai che em ni?" ka tih chuan min rawn en vat a, "Khawngaihin min chhang rawh, keihian ka zar buai che em ni, nanghi ka taksa hmang hian ka thlem tawh che em?" ka ti leh a.




"Enge i sawi awmzia?" a ti sup a, "Heng hmeichhia te hian nanghi ka thlem thu che an sawi a, chuan nang hian nawm chen nan bak min hman loh thu an sawi bawk, min chang teh, kei leh nang hian hun fal kan hmang dun tawh em, keihian nanghi vawikhat tal ka thlem tawh che em?" ka ti leh a, hmeichhia te chu ka han en a, an lo meng kual zak zak a, an hlauhthawn hmel hle, mahse ka zawhna avang khan ka in chhir lo, min ngaihdan chhe tak tak te hi a dik loh zia hriattir ka tum mai chauh a ni.




"Nangni pahnih khan eng thu chiah nge in sawi?" Sir Felix-a chuan hmeichhe pahnih te ding dun chu en ngur chungin a ti chhuak hrawk a, "Sawi rawh u, nangni pahnih hian Bawihi chungchang engtin chiah nge in sawi?" a ti leh thawt a, "Sir, ih.. Hlimhlimi hian Asangi nen in inkar tih buai a tum tih kan hria a, chuthil kan lo sawi dun lai mek chuan toilet atang rawn chhuak in kan buaina a nih loh thu leh in rawlh lo turin min ti a, a thiltih tum a that loh thu kan sawi khan a thinrim in min rawn khawih a ni" kut rawn thawh hmasa tu khan a ti a.




Engtinge awlsam lutuk in dawt mu hlum kha a sawi theih zawk ni, "Engthil chiah nge in hriat, chutianga ka bialnu chungchang lo sawi tur cheu in enge ni a in in hriat?" Sir Felix-a chuan thinrim takin a ti chhuak leh hrawk a, hmeichhe pahnih te chuan mak an tih hmel hle, "Maw.. bialnu a?" an tih chuan "Ni e, he hmeichhia zah lo taka in ṭawngkhum zawh tak chiah hi ka bialnu, nakin lawka ka nupui tur a nihhi, chuan khatianga ṭawngkhum tur khan eng angah nge in in ngaih hrep?" Sir Felix-a chuan a ti leh thawt a.




Enge tuna a sawi zawh chiah kha, nupui a.. Hepa hi a a takzet tawh a nihhi, a bialnu anga min sawi kha chu ka la hrethiam mahse a nupui tur anga min sawi chu ka ring miah lo a sin mawle, kan in hriat na a la reilo a, bakah kan inkar ah engmah a awm lo bawk, a thinrim lutuk vanga sawi ve mai mai ah ngai in ka lo ngawi reng ringawt a, "Ka nupui tur hi tawngkam chhe tak tak a in ṭawngkhum avang hian enge in chunga thleng tur in hria em?" Sir chuan a ti vawt leh ruih a.




"Sir min ngaidam rawh, i bianu a ni tih kan lo hrelo a, kan rin dan chuan a ni hian a zar buai che.." an tih lai mek chuan "Engmah in thusawi ka ngaithla duh lo, tunah hian helai hmun atanga ban in ni, nangni ang hnathawk hi ka mamawh hrep lo che u, chhuak nghal rawh u" Sir chuan a ti ta mai, hetiang em em hi chu a tih ka ring lo a sin, hmeichhe pahnih te chuan ngaihdam an dil nasa khawp mai, mahse Sir Felix-a chuan a ngaithla duh tawh lo.




Hmeichhia te chu tap chungin an chhuak a, hna atanga a ban em kha ka ring hauh lo a sin mawle, ka khawngaih leh hnuhnawh hle, an chhungkaw dinhmun engmah ka hriat pui lova, an hnathawh lai hi an mamawh hle maithei, Sir Felix-a chu ka en a, "Ban kher chu a ngai em ni?" ka ti sep a, min en chhuk ngur a, a mitmeng chu a thim rup bawk, "I laka an chet dan avang khan ban an phu hliah hliah zawk" a ti hluk a.




"Mahse an hnathawh lai hi an mamawh viau thei a sin" ka tih leh chuan a rum nghut a, "Bawihi chutiang ah buai suh, tumah hian hmusit takin an ṭawngkhum tur che a nilo" a ti leh bur a, a tawng dan vel chu ka ngei tawk a tling em em mai ni, "An chhungkaw dinhmun engmah i hriat pui loh kha, an chhungkaw chawm tu ber te pawh an lo ni thei, chuvang chuan ban kher kha a a ngailo" ka ti leh hlak hlak a.




"I chunga an thiltih avang khan i thinrim lovem ni, keichuan ka hmeichhia hmusit taka ṭawngkhum tu te hi ka en liam ve mai mai theilo, kut hial an thlak bawk che a" a ti leh hmuk a, "Keipawn ka thlak tho alawm, nat pawh ka na hman lo, chuvang chuan ban suh, an rilru a hah viau maithei zawk ania, bakah khatiang thil thlen chhan kha a bul pui ber chu nangmah hi i ni, nang hian i bulah min awm tir tlat tum lo la chu khatiang thil kha a thleng hauh lovang" ka ti hlak hlak a.




Lungawi loh hmel deuh a min en chuan "Sawi dik loh ka nei em ni?" ka ti leh nghat a, a ngawi ta reng a, khang hmeichhia te pahnih kha ka khawngaih tak tak, a hnuah chuan "Sir.. khawngaihin keimah vang talin ban suh aw, keimah vanga hmeichhe pahnih laiin hna an chan hi ka duhlo" tha deuh zawk chuan ka ti leh a, min en vung vung hnuah "Ok.. mahse thil pakhat min tiam ve a ngai thung ang" a tih chuan ka en haw a.




"An ni kha ka ban lo anga, mahse nang hian keihi hun tha min pe thung ang" a tih chuan ka rilru a buai hle, ka in ngaihtuah vang vang a, khang hmeichhia te pahnih khan keimah vanga hna an chan ka duh bawk silo, a hnuah chuan ka bu nghat a, Sir chu a nui suk, a secretary hnenah chuan hmeichhe pahnih te kha ko let turin a ti a, an rawn lut har lo, "Ka bialnu in min ngen na angin hna chu in thawk zawm thei ang, mahse fimkhur hle tawh ang che u" a ti bul hmuk a, chung hmeichhia te pahnih chuan lawmthu min hrilh mawlh mawlh hnuah an chhuak a, "I in tiam na kha hre reng ang che" Sir Felix-a chuan a ti sup a, chil ka lem khalh ringawt.

Cont ..

Karleh atang chuan dah hma hram hram kan tum dawn nia aw...