Frenkie Zothanpuia 29

[LILY24]

CHAPTER-29

Ka chhungte'n ka rai thu an hriat aṭang chuan inchhung khur boruak hi a dang hlawk a ni ber. U Hluzuala a khirh zual em em a,ka nu leh pa lahin a mawi ah hnial ve bawk mahse an dodal ngam hek lo. Hna ah pawh ka kal a phal lo va,pawn chhuah a phal lo a ni ber. Ka chunga a chet dan zawng zawng chu Duata hrilh vek mai ka duh ṭhin a mahse ka unaupa neih chhun a ni a,ka thisen zawmpuiin ka chunga a chet dan hi va hrilh ngat ila chuan ka u a ngaihdan a dang anga, kum khua pawhin an inhmel mak ve thei tlat. Mipa ve ve an ni a,a ṭha leh ṭha lo pawh thliar lek lovin kut an thawh thei bawk. A hma zawnga u Hluzuala lakah tlawm duh ngai loh kha tunah chuan naute tan ka tlawm a ngai a,engkimah ka dawh thei a ngai ta bawk. U Hluzuala pawh mi nunna hial la duh tur mihring a ni lo va, chhungkua venhim a duh luatah tiin a ṭha zawngin ka ngai hram hram ṭhin. Ni e,kei hi chu ka nu leh pa tan hian inchhuanna tham ka ni lo ve em a, ka unau dangte nen tehkhin phak pawh ka ni lo. Chutiang karah chuan pasal ka ṭhen a,nau ka pai leh bawk si a,pasal tel lo a fa pawm chu kan khawtlang titi tui ber a ni a,ka chhungte tan chuan zahna bak thlen ka neih lo a ni.


Inah ka awm chawt a,chuti rualin Duata nen erawh phone ah kan inbe ziah tho a, lo kal a tum paw'n chhuanlam siamin ka hnial thei hram hram a,min hmu a chak thei lutuk hi ka lo khawngaih leh ringawt ṭhin. Ka nau paiin thla a la tlin loh miau avangin indim ka ngai em em a,ze zawi taka awm hi ka awm dan ṭhin a nih loh avangin ka tan chuan a harsa takzet. Zing kar luak chhuak ka neih reng a,chaw lah ka ei lui thei tlat lo. Ka thil ei awm chhun chu chips leh thil thlum lam hlir a ni. Thei erawh ka ei hram hram ṭhin a, ni khatah pahnih khat chu ka ei ngei ngei zel.


Duata bula awm chak viau mah ila tur vak chi a ni si lo va,tunah rih chuan an chhungkua an la buai ve a,dawhthei taka an thu lo ngaihchan tawp bak tih thei ka neih rih lo.


A chang chuan ka tan kawng a pin zia ngaihtuahin ka ṭap leh ringawt ṭhin a,naute hi hrehawm leh zahna tuar ve turin ka hring chhuak dawn nimaiin ka hre ṭhin. A êng lam ngaihtuahka tum pauh leh thim lam buk a rit a,thil ni lo lo ngaihtuahin kâr khat chuang chu kan hmang ral leh ta!


Naute tihtlak chungchang an sawi tawh lo va,min ngaihtuahna ṭawngkam an chhak chhuak chuang hek lo. Midang rai te chu an ṭhat leh ṭhat loh te,thil an ei leh ei loh te an zawt ṭhin a ni ngai a,kei chu ka rai hma nen khan danglamna a awm lo. Naute chu awm ve lo ang hmakin keimah chauh chu min bia a,nu tan chuan a lo va rilru nat thlak tak.


Thla a tlin dawnah chuan khawsik ser ser te ka nei a, awm nuam lo in ka awm reng bawk. Chhung lamah hian pawttu nei ang maiin ka tai bawr vel hi a inṭham kual reng a,thil pawi a thlen hlau in check up tura chhuah chu ka tum ta a, nawm sam loh nen buapuitu neih ve ta lo chu rilru a no duh khawp a,a changin Duata chu ka va dem leh ringawt ṭhin. A muangchang lutuk te chuan naute a duh lo a niang tih ngaihtuahna te min put tir a, thil a ṭha lo lam hlir ngaihtuah hi nau pai tirh zawng zawng te hian an ti vek a ngem le?


"I inenkawl uluk hle a ngai ang!Nau pai dang ang I ni lo a,chet vak vak te,lirh thei a chuan te pawh i tih loh hram a ṭha. Nu hi in pawimawh a chuvang chuan i rilru leh ngaihtuahna te kha a hahdam a ngai,pawn lam chauh hi a ni lo a nia aw..sawi tawp mai ila I case ang chi ah hi chuan fimkhur viau chung paw'n a chhiat thei a nia,mahse beidawng lo la,kan ṭang rual anga,naute hmelṭha deuh i neih thei turah ngai ang" Dr David a'n a ti a, hawina lam a piangah hian rilru hahna hlir a ni. Hospital kawta ṭhutna awmah chuan ka ṭhu a, fimkhur viau chung paw'n a chan theih a tih khan min tihlauthawng a ni.

Ka inchhung khur boruak zawng zawng nen hian ka pai puitling thei dawnin ka inhre lo va,rilru hahna ka ngah bawk si,chung ka rilru hah a vang te chuan ka naute in a lo tuar ve zel bawk si,khawiah emaw tu mah tihbuai lohna hmunah awm ka chak.

"Duataa.."Call a chhan rualin ka ti hap a,tunah rih chuan a bulah bak hahdamna ka hmu thei dawnin ka hre lo. Ka rilru hahna te pawh ani'n tihzangkhai dan a hre ber bawk a,ka innghahna awmchhun chu amah chauh a ni.

"Uh huhh?" A rawn tizangkhai vah a.

"Damdawiinah ilo kal hman em?" Inthlahrung zet chuan ka ti a, ka pasal mah ni se ka tibuai thei lutuk a,atan lah ṭangkaina ka nei tlem si a,ka inthlahrung ve takzet.

"Hman lutuk e,I awmna hmun lo sawi la?" A tih takah chuan damdawiin hming ka hrilh a, a lo thlen vat tur thu sawiin kan inbiakna kan titawp a,mi veivak chu ka thlir a ni ber. Damdawiin chu lutchhuak an awm reng a,reh ṭhuap lai hi a awm thei meuh lo.

Chutia mi veivak thlir a ka en lai reng chuan zuan zang tih hriat zetin Duata chu step ah a rawn chho a,parking na aṭang a rawn chho a nih hmel. A mi tawh apiang chuan an en duh hle a,ani lahin n enna chu a zam phah lo tih hriat zetin keimah chauh chu min rawn en ran a, polo tshirt brown a ban phuar lek lek a ha a, kekawr vun rawng a ha bawk a,a inhmeh a ni tawp mai. A kutzung chal a chahbi vai vir pahin min rawn nuih suk a.

"Doctor i hmu dawn ami?" Ka bul a rawn thlen rual chuan a ti a,ṭhutna awlah chuan a rawn ṭhu nghing dawt mai.

"Ka hmu tawh zawk a" ka tih chuan zawhna mitmengin min melh a.

"Ka hmu zo tawh a mahse dr chuan.." sawi zo lovin thawk ka la leh hap a, chutah ka kut chelhin min thawhpui a, a lo kalna lamah khan min pheipui lehnghal zat.

"Mahni chauh a kal tur a ni hlei nem,min hrilh mai tur che alawm" Seat belt min hren tir pahin thinrim ni si lovin min hrilh pah mawlh mawlh a,thla tam ka kal a la ngai dawn a,tun aṭang min kalpui chu a nin ka hlauh vang a ni.

"I ril a ṭam em?" Rawn ṭhut luh pahin a ti a, car a tinung zui zat.

"Ṭam lo" Engmah sawi zawm tawh lovin parking aṭang kan tlan chhuak a, khawi lama kal nge a tum pawh hre chuang lo chuan ka ṭhu ngawi reng.

"Saidinga te inah peng lawk ang aw" Tiin remchang lai ah car a tiding a,helai hnai ah an awm a nih ka ring ringawt.

"Muan Saidinga a awm em?" Dawr lian deuh chhunga hmeichhia lo awmah chuan a zawt a, nu lian deuh mai a ni.

"Aw a awm,han chho rawh u..hei ka tihfelpui anga,ka lo chho ve ang" tiin calculator ah no. a chhu lut mawlh mawlh a.

"Chho ang le" tiin kailawn awmah chuan min kai chho a, veranda zau zetah kan chhuak chho a, kawngka pawh kik lo chuan a pawt hawng a,naupang khek ri kan hre nghal zat.

"Samuel" Duata'n a tih rualin sofa kar aṭang a rawn melh khiau a, Saidinga nen an lo inchai buai nasa bawk sia,a thlan hluam mai.

"Lo leng r'u..infiam tawh awih lo,I pa'n inleng ka nei" tiin mipa naupang chu a ṭhut ṭhat tir a, a thusawi dan chu nuih a tiza reuh takzet.

"Mahni fapa te khati vak vaka lo sawp chu a" tiin sofa ah a ṭhu zui a,ka ṭhu ve nghal zat.

"A pa a nia,a ṭap thei tak tak lo" a la ti zui.

"Khu lamah engtikah nge in chhuk thlak leh dawn?" A ti a,kan awmdun tawh ah a ngai a ni chiang mai.

"Thla tharah kan chhuk ang"a ti a,thla tawp nan kâr khat chiah a ngai tawh.

"Rara chu in pa luck zia ka sawi hnu chuan i thla a phang deuh tawh a ni maw?" Tiin a nui huk huk a,pakhat lah chuan a lo pawmpui hmel em em khawp a.

"A mu thei hlei nem" tiin a lo la tui hnih zui.

"In daw thei lutuk aw" ka ti ta ringawt a.

"Zan zanah min rawn bia a,a ṭap pur lehnghal. Phone aṭang chuan inthlem te hi har deuh mai a nia" a la ti ta deuh deuh a.

"A thawk ṭha khawp alawm kha..khawi maw kan nu pawh chu a va rei ve,thingpui kan in dawn nia,lo ṭhu r'u" tiin a tho tharh a, pawn veranda aṭang an nu a zuk au ngei bawk a,a inla patling thlawt.

"Lo chhuan lawk ve mai tur che alawm" ti hlak hlakin Muani a rawn lut a,nichin khan ka lo hmu miah lo va,nau a lo pai ve reng a nih chu.

"Thingpui kan in dawn nia aw,I bual tawh em ni?" Tiin Saidinga chu a be zui a, lu a lo thing ringawt.

"Thanpui I ṭhianpa hi chu thusawi a zawm ngai lo reng reng..Samuela nen an danglamna a tlem khawp" Nui chungin a ti a, ṭawng duh deuh chi a niin ka hria.

"Pafa kan nihna chhan pawh a nia lawm" Saidinga'n a lo ti then a,a ngaihna a hriat loh hmel khawp mai.

"In nu hming kha eng nge kha?" A ti leh a, ka hming a hriat takah chuan keimah min be deuh reng a, naute chungchang te min zawt a,ka pai ve tawh tu ka sawi chuan a phul hlut mai.

"Ila puar si lo va,in la pai lo emaw ks ti mai asin,a lawmawm e..dam te a kan awm chuan kum khatah an piang anga" a ti a, ani chu a naupai a hrisel hmel bakah a pakhatna a nih tawh loh avangin a ngaih a ṭhat hmel khawp mai.


Saidinga te in aṭang kan chhuah hnu chuan kan haw tawh mai dawn emaw ka tih laiin khaw pawn lamah kan tlan zui a,kawng zau lai ah car tidingin ka lam a rawn hawi a, min melh vung vung ringawt.

"Tinge tah hian kan kal?"

"Ka ru dawn che" a ti ta mai,a ti duh tak tak mai ang tih a hlauhawm.

"Nichina i thusawi kha sawi zawm tawh rawh,tunah chuan tu mitmei mah i ven a ngai tawh lo a nia" a ti dam dap a. Kei paw'n engkim hrilh vek chu ṭhain ka hria.

"Dr in kan nau pai hi nau pai dang ang ka ni lo a tia,fimkhur turin min chah a,a ṭhen phei chu fimkhur..fimkhur viau chung pawn an chan tho a tia" ka tih chuan ka biangah mittui a rawn luang thla pap a, engmah sawi lovin min rawn kuah zui bawk.

"Ka hlau alawm,chhiat ve te ila engtin nge ni ang?" Tiin rawl chhuah meuhin ka ṭap a, ka mittui a luang reng bawk nen Duata kawr ka ti val vek tawh.

"Hahdam rawh..naute chu i pum chhungah khan dam takin a la awm alawm,thil i ngaihtuah nasat chuan a tan a hrehawm zual mai mai ang. Ka awm hi,engmah hlau suh..ka venghim tlat ang che u" Ka hnung chul hauh hauh pahin ka samah a fawp a, ka hriatpui loh rilru hahna tam tak a nei ang tih hre mah ila ka rilru hahna te thlen lovin ka awm thei bawk si lo,keimah a ka tih theih leh sut kian theih te chu ni se ka van ti teh lul em.

Kan kawtah car tidingin min kuah leh vang vang phawt a,a pa te a tur tut tut thei lo tih inthlahrung zetin a sawi a,chuti rualin keini nufa min ngaihtuah bawk nen hahdam leh ngaihngam takin a awm thei bik lo, tunlai tak phei chu a pi a sun bawk nen a tla dawk mai te hian ka hria.

"A harsa ang tih chu ka hria mahse lo tuar ṭang ṭang rih r'u aw" a ti a,rang takin lu ka lo bu nghal zat.

"I thlen hunah min lo be rawh aw" tiin kan inthlah liam a, in chhung ka luh chuan a lo reh duk a,hna aṭang an lo la haw lo a ni maithei.

Ka pindanah chho in ka intifai a, inbual zawh ah phone ka en chuan Duata'n message in a thlen tawh thu min lo hrilh a,zanah ka be zui mai ang tiin ka dah zui a. In hnuai lamah chhukin thei ei tur ka vel a, chaw ei hlei thei lovin thei hlir ka ei a,a hlauhawm em lovang chu maw. Ei lui ngial ka tum paw'n min ṭham zel a, a hrehawm thei em a tin ni.

Thei ei a ka ṭhut reng lai chuan kan nula pakhatin chhuat nawhna tur a lo buatsaih a, inchhung rim tihtuina a hman chu ka ngai thei ṭhak lo va,basin lamah tlan rawk rawkin ka va uak nghek a, nichina Duata nena thil kan ei te pawh ka luak chhuak leh vek.

Hlauhthawn hmel zetin min lo en hlawm a, vin nghek mai te chu ka chak a mahse ka tha neih hian a tlin tlat lo. Ka kam ṭhuah faiin pindan lamah bawk ka chho leh a, khumah ka mu hle hle ringawt.

"Bawihi chaw kan ei dawn" ti a ka nu au lawng lawng ri ka hriat takah chuan tho chhuakin ka chhuk ve a,ei mai theih turin an lo chhawp diam tawh. Anthur thui sen deuh a lo awm tel a,mak deuh maiin ka hawp ṭeuh nghe nghe.

"I hawp duh ngai si lo a,zanin chu i va heh ta ve" Ka pa'n nui hawk hawk chungin a ti a, ka lo ṭhen ringawt.

"Rai lai chuan ei duhzawng te hi a dang ṭhin alawm,hawp ṭeuh rawh..ei chak zawng hriat a har si" tiin ka nu a lo tui hnih ve bawk a, tlem chuan awm pawh a nuam ta deuh. Ngawi renga inngaihtuah ai chuan ṭawng ka tlem te tal pawh hriat hian rilru a tinuam a, a bikin nu leh pa te lak aṭang phei chuan a thlamuanthlak bik.

"Ni 28 ah hian ticket ka book a, u Flo i bulah va kal ang che" Ka va melh chuan min melh ve hauh lo in chaw chu a ei mawlh mawlh a, tunah chuan u Hluzuala hi ka pa emaw a inti tlat tawhin ka hria.

"A teuh lo emai,ka chungchangah lo inrawlh tawh suh ka tih che kha" ka ti tuar a,rai no thinchhiat nen ka dawh peih hlawl lo.

"Ka thu min hnial hlek suh,zahthlak tak taka i awm reng ai chuan khutah va awm la,a ṭha daih zawk" a ti leh khur khur a.

"Eng zahthlak chu nge I sawi ve ziah a?" Kut innem khalh runin ka ti ve nghal zat.

"Vawi khat mah inhmu tawh bawk suh u,chhungkua in ni tawh lo,va kal daw daw a ngai lo" tiin a tho tharh a,ti mai mai hian ka tawp hauh lo ang.

"Mi pa ka ngaizawng pawh a ni lo,ka pasal leh ka naute pa a ni alawm" ka tih chuan chak zetin ka lam a rawn pan a, ka biang a ri sawk mai.

"A va mak e aw" titu chu ka nu a ni.

"Rohluzual ramhuai pa,ka haw lutuk che!!" tiin pindan lamah ka tlan chho a, hnung lamah thinrima a inhrosa thawm pawh chu ring tak a ni. Ka unaupa ngeiin kut vawi hnih min thlak tawh! He inah hian ka hahdam lo a, ka unaupa ni lovin ramhuai ka chenpui a ni zawk.

"Bawihi lo hawng teh.In buaithlak unau emai" tiin kawngka an rawn beng dawt dawt a,he inchhung hi ka chhuahsan nal nal ang.

Kawngka hawng duh lo va darkar chuang ka awm hnu chuan an reh ve ta deuh a,sana ka en chuan dar 8 a lo ri tawh. Phone chu banin Duata ka call a,a la thei mai lo lehnghal. Bag ah thawmhnaw lum leh ka mamawh ka khung khawm a, zanin hian Duata'n min rawn hruai chhuak lo pawh ni se he in hi ka chhuahsan dawn khawp! A la hma deuh bawk nen ka ṭhu leh rih a,an mut luh vek hnuah ka chhuak ve nghal ang.

Dar 9 a pelh chuan chhuak ṭhem ṭhemin in hnuai lam ka pan a, rin ang ngeiin an mu lut vek tawh. Thawm dim thei ang berin kawngka ka hawng a,ui chu nei ngat ila a bauh ring tawh ngawt ang. Gate pawnah pawh ding lovin taxi ka tawh hma kein ka phei char char a, boruak lah chu vawt tak a ni. Ka chhuak tih an hriat rual rualin ka pawisa zawng zawng min hrensak leh dawn tih ka hriat avangin ATM hman theihna ka hmu hmasak berah chuan pawisa awm ang ang ka la chhuak a,ka pa'n eng emaw chen min lo dahsak tawh avangin a tam ve viau. Duata lah chuan phone a pick thei si lo va,ka muan lutuk chuan ka chhungte'n min rawn hmuh ka hlau bawk si,taxi pharin hotel ka hriat remchan lam ka pan ta ringawt a.

Hotel chu ka thleng a,ka vanneih asiamin room awl a lo la awm a, Duata ka biak theih hma hetah hian kan awm rih mai ang.
Pawnah ka awm rei deuh a niang,ka hnar a ping ṭan a,intifai vatin ka mu a, puan awm te lah chu a lum lo chi hlir a la ni zui. Tho chhuak lehin banga an switch dah vel te chu ka enkual leh a,heater an dah ka rin deuh vang a ni. Fan on na bul ami chu ka herh chhin a,chu veleh inchung ceiling cheimawi kar aṭang eng emaw hi a rawn de a, a rawn 'beep' zui a, tisang leh hretin ka mutna lamah ka pheisan a,a hma ai thlawt chuan a lum ve deuh tawhin ka hria.

"Ila mu nange?" Call ka chhan rualin a rawn ti a, nichina ka biakna a chhang thei lo te kha ka thinrim thar leh hnuhnawh.

"Tinge call i chhan loh?" Ka ti fak a, mi venthawn ngai an awm lo bawk a,ka aw pawh ring ve hle.

"Ka inkhel a,ka lo haw chiah" a ti a,thin hi a tirim zual ringawt.

"Tun ang hun hi inkhel hun a ni ami?" Ka ti leh hram bawk.

"Eng ngati nge i thinrim vak?Naute in tihrehawm che ami?" A rawn ti dam leh thluam a.

"In aṭang ka chhuak!"

"Eng a?Eng ti turin?" A rin loh lam ka sawi tih hriat takin a rawn ri hluai mai.

"Ka chhuak a ni mai lawm,ka let tawh dawn lo"

"Khawiah nge I awm?Khaw lai ah I awm lehpek em ni?" A rawn ti a,a hlauthawng deuhin ka hria.

"Awm lehpek lo,hotel ah ka awm,phone i la thei bawk si lo"

"Ka inkhel alawm le,khawi hotel ah nge?Ka lo kal nghal ang" a ti leh a,lo kal se ka tih rualin ka tibuai leh tawh tih ka hrechhuak a,ka inthlahrung ve det. Hotel hming chu ka hrilh ta tho a,inbual zawh velah a rawn kal tur thu sawiin a dah a,hmun dangah kal chhuak tawh lo turin min chah hram bawk. Ka mu lum ta bawk nen mutchhuakin min zem a, Duata lo thlen lai ka harh lo ka hlau ve tum hrang a,thei leh thei lovin ka intiharh leh rih. A lo kal dawn tho chuan tiin ka thil ei chak zawng ka ngaihtuah a,min lo ken nghal se a remchang tak ang.

"Ilo chhuak tawh em?" A chhan rual chuan ka ti nghal zat.

"Chhuak tawh,ka lo thleng ṭep"

"Dawr inhawng velah eitur min lo lei nghal aw" tiin ka eichak zawng chu ka hrilh a,a lo lei tur thu min hrilh hnuah kan titawp leh a, zan a rei tawh bawk nen kawng pawh a tawt tawh lo anga,a lo thang rei pawh ka ring lo.

Minute 10 vel a liam chuan room kawngka an rawn kik a,rawn kiktu ka chian em avangin phur em emin ka va hawng a, ka nuih sen sen laiin ani thung chuan rum thei tawpin min melh daih.

"Eitur chu ilo lei em?" Ka tih chuan phun hlukin a rawn lut a, a thil khai ka hmu
chuan ka hlim veng veng mai.

"Eng ngati nge zanah kher i chhuah ṭhin a?Min tihah lutuk" tiin khumah a ṭhu zui a, hahthlak tih hmel zetin min en bawk.

"Khaw vâr hun ka nghak thei tawh hlei nem..ka ril a ṭam lutuk" tiin polythene a eitur awm ho chu ka hai a, ka chah ang ngeiin cup noodles pawh a lo lei thlap.

"Khang tiang te kha ei ei suh,a hrisel loh chi hlir min lo chah a,bawnghnute kha in tel ang che" a ti a,bawnghnute ka ngaina lo asin le.

"Keimah chuan ka ei chak lo,naute zawk hi lawm ei chak" tiin tui lum nen ka chiah zui a, ka thusawi chu a nerpui nasa mai.

"Ngati nge in aṭang chuan I chhuah reng reng?" Tiin a kutzungpui lehlamim a hnar a tuai zauh a.

"Rohluzuala'n u Flo i bulah min thawn a tum alawm" ka tih chuan sawi chiang rawh tih melhin min melh a.

"Kam inhmuh vel hi a suh lo va,chhungkaw zahna thlentu ka nih thu sawiin min beng a" ka tih chuan ka hnuk a ulh leh ringawt.

"A beng che maw?" Tiin dawhkan bula ka ding chu ka bul a rawn thleng chawpchilh a, ka khabe ah dawmin ka biang chu a en kual a, mipa kutthlak chu a nâ em a, ka biang min benna lam pawh zawh hran pa ngai lovin a lang nghal maiin ka ring.

"A ti mah mah a nih chu!" Tiin ka biang rawn khuapin a zutzungpuiin dimtein a chul hauh hauh a, a hmel ka hmuh hian la ṭah a chhuah zel avangin mit ka lo chhing ta ringawt.

"Zanin chu hetah riak ila,naktuk zingah kan in lamah kan phei dawn nia" a ti a, hnial chiah ila chuan min hauh hrep ka ring.

"Ka pa te pawh hi an muangchang lutuk a ni. Tihian kan inkawl leh tawh a ni mai,koh hran pa pawh a ngai tawh lo,kâr leh lamah kam chhuk thla tawh dawn tho..hahdam la,muthilh tum rawh" Khumah inkuah rialin kan mu a, Duata taksa chu lum nuam tak a ni. A malin min khan a,a banin ka awm zawmah nghet zetin min kuah a, a changin min fawp bawk a, a nuam dangdai a ni tawp mai.


Ads click