KA HMANGAIH CHE CHAPTER-17

[Judy chhakchhuak]

LALHLIMPUII POV

Ismaela ten School an ṭan leh tawh a,Patea thawh na School leh Ismaela te School hi a in ang a.An School lamah Zirtirtu an indaih loh avang in pate'an min sawm ve ngei a,keipawn kalo hnial biklo.





Tilai ah engmah thawh chhuah neilo a awm ringawt chu anuam siloa,an School ah hian pâwl riat thleng a awm a.English medium ani ve thlap thung, zirtirtu an indaih loh avang in vawiin aṭang ka kal ṭan ve dâwn a,ka phur rualin ka huphurh ru ve tho mai.





Nalh ka tih dan ve ber chuan ka inchei a,mahse kapa hnathawh hre ran in zahawm tak tho siin ka inchei thung.Ismaela ten an School ah ka thawk dâwn tih an hria chu an lawm khawp a,an sawi deuh reng mai.





Kani hian an in kawtah pangpar tlêm a nei ve a,tui pek ve reng a ngai a.Damdawiin lama hmeichhe pahnih chho chu ka en deuh vawng vawng,an inchei bawk em ani in entir tur ti ila an inchei nasa bawk sia, "i zo tawh em Nu'i,Dinsangi te ṭhian dun chu an va kal hma ve" kani in inchhûng aṭanga lo chhuah pahin ati deuh bawrh bawrh a.





"Ni i hria ami" ka ti chu a ner deuh nang nang a. "Dinsangi kekawr bul deuh ha khi pu Chalthanga fanu anih khi,Chalthanga chu kan khua a dawr nei lian ber te an nia,a ṭhiannu khi an inbul a awm anni erawh an khawsa thei vaklo" ati ve mawlh mawlh a.





"An zaklo reuh ka tia,ti khian zing leh tlaiah Hminga inkawt a pangpar tui an han pek sak ṭhin a,Hminga phei chuan ka bulah a sawi tawh a nin zia,a ngailo ati chungin an han tih sak ṭalh a,an mak ve ania an hman ngawt mai" ati leh duah a.





"Va insiam rawh,chaw va ei ula keichu nakinah ka hman hunah ka ei ang,ka ril ala ṭam lo em mai,kalo tih chhunzawm ang" atih takah chuan ka lût ve mai a.Chaw eikham ah ka ni in insiam tura min tih deuh tlat avang in chaw ei na pawh tih fel pui lemlo in ka insiam a.





Zingah thawmhnaw vel chu ka hak sa vek tawh avang in makeup vel ka hnawih ve thuak thuak a,ka sam chu sang deuh ah ka bawk a.Ka hmai a lang fai bawk nen mawi ka inti ve takzet,ka room aṭanga ka chhuak chu "au i mawi lutuk" Helen'i ten anlo ti ve nasa mai.





"Kha maw ka sawi kha,ila nula i la chhelo lutuk ka tih reng kha,ka vahnu hi amawi mange ka mitah chuan naute ang reng kha ila ni ve ania,pasal ineih dâwn pawn ka phallo viau kha ania ipa ka hnial hneh ngang siloa" tih pahin ka sam te chu a tuai mâm a.





"I sang zer zawr sia,i pian te hi analh reuh sia ti daih ila i u hian pasal neih a tumlo ami,i URuthi hi chu a tetlai aṭang reng reng in a sual reuh lutuk a,ka awm peih vak ngailo a kan inhau nasa thei teh asin aw" atih chuan asawi dik chiah,tûnah pawh ala ni reng.





"Pasal neih a tumlo aniang,a buaithlâk ania mite hi a hrethiam lo thei ania aw ni,ahma pawn tumloh deuhin ka period thut a,a pads hman lawk ka dil a,a phal ṭhak lo ala ngai reng" ka tih chuan a bu nghat nghat a.





"Ani ang,i u hi chu a danglam bîk alawm,Duata nen hi chuan in mizia in ang reuh a.Inu nen pawh khan kan sawi nasa thei ṭhin asin aw,inu hi sawichhuah loh theih ani siloa,a ngaihawm anih hi" tih pahin thawk ala halh a.





"Hlimpuii te in hman tawh em, Ismaela leh Helen'i te" pate'an atih chuan pawn lamah kan chhuak ve vat a.Helen'i hi naupang zawk tih takah a rilru hi a no ve deuh ṭhin a,a hming sawi tel ve kher loh chuan a titau ve bur bur ṭhin reuh a.





Scooty in kan kal dâwn a,Pate'an a khalh a,a laiah Ismaela a ṭhu a,a hmaah Helen'i a ding thung.Kan tlanchhuak ṭep tih ah chhak lam aṭang Dinsangi kani in atih te ṭhian dun kha anlo chhuk thla a, "UHming bye" tih paha an hawi chho chuan ka han hawi chho ve kher a, Doctor pa chu kut kuangkuah run in alo ding a, Doctor coat vâr ngei aha bawk a,Dinsangi te chu enlo in keimah zawk minlo en in ka hria.





Patea a tlanchhuah takah chuan ka hawisawn vat a,kan School tur chu ka rinai takin a hla reuh a.Ka hmuh tum aiin ka hmu lian bawk,a building erawh a ṭha vak em em lo.





Office ah chuan pate'an min in hmelhriat tir ve sap sap a,ka thawhpui turte pawh ka rinai takin an fel hmêl hlawm a.Ka kawm rual pui pahnih lai an awm bawk a,a tihzia phian mai.





Dar ari a,pâwl li ho roomah ka lût hmasa ber a, zirtirtu thar an hmu chu mak anti ve aniang.Min en haw haw hlawm mai,in hmelhriat tir nate kan nei zung zung a,tih an nuam reuh lutuk.





Kani hmasa ber chu ka tum aiin ka hmang nuam a,ṭhin thar pahnih lai ka chhar bawk a.Maeng'i leh Rampuia te an nia,School bânah Assembly kan nei leh tête a,Patea te rual pawn ka haw tawh lemlo,ka ṭhian te pahnih in min hruai duhna an nei miau sia.





"Heihi kan in ania,in awmna aṭang a hla vaklo chuan sawti laia rang va inchung sen lo lang saw Maengi te in hu ania," Rampui'an ati zung zung a.





An inah chuan apa te nen min han in hmelhriat tir leh tête phawt a,rei em em erawh kan awmlo.Kan in kawt thleng Rampui'an min thlah a,a ngailo ti mah ila a ti lui ve tlat sia.





"Mate,in School thar chu eng nge a an,a nuam iti dâwn em" inchhûng ka luh rualin kani in alo ti vat a. "Aw nuam dâwn lutuk" tih pahin ka hawikual a, "khawnge naupang ho leh patea te hi" ka ti chu "kawmthlang a tengtere kung khu a zâr an thlak a,in hi arawn vaw ziah a,a hnawk riau mai a a rah duh sia,a zâr chiah thlak mai rawh u ka tia" tih pahin thingpui a thli chhuak a.





"Lo ṭhu hahdam phawt rawh,kha thingpui te kha in la i ta tur anih kha," atih takah chuan dawhkan bulah ka ṭhu ve vat a,kawmthlang lamah Ismaela te pawh an rak leh nasa tawh mai.





"Anu,apa a tla" Ismael'an arawn tih deuh vak takah chuan hmanhmawh deuhin tukverh ah kan dakchhuak a.Dawt a sawilo ve ngei,Patea chu chhuatah a mu bal a, hmanhmawh deuhin ka thawmhnaw pawh thlak hmanlo in inhnuai lamah kan tlân thla a.





"Pate" ka ti chu min chhang lo,a lu a sawh deuh nge a mit a chhing tlat bawk sia. "UBuang,ngatinge harh teh" kani in tih pahin Patea chu a mal chungah a han muttîr a,a lu a sawh na deuh nge mawni le.





"Hlimpui, Doctor han koh mai teh" kani in ṭap pur a atih takah chuan hmanhmawh deuhin kan Doctor pa in lam ah chuan ka tlanchho a.A in chu alo la inkalh zui a, damdawiin lamah a awm anih ring in ka tlân phei leh hlawk hlawk a,amah lo pawh Doctor dang chu an awm tho na chu ka hre ngai siloa.





A tawp a tawp ah chuan varanda a din paha damdawi niawm tak alo en lai chu kava hmu ta hram a. "UHming" thaw hlawp hlawp chunga ka ti chu mak tih hmêl deuhin min en reng,ka hlauthawng tawh bawk si nen ka sawi lawk theilo leh nghal.





"Tui hi in phawt rawh,hahdam la" tih paha tui minlo pek chu kalo ban ve mai a.Ka dang a ro hulh atin ni, "Patea thingkung aṭang a tla a,lo kal lawk teh a hmanhmawh thlâk" ka tih chuan a thil kenlai chu dawhkan ah a dah a,a buai leh buai loh pawh zawh nachang ka hre tawhlo.





"Emergency a awm a, Doctor Ruatpuia kutah lo dah mai rawh u," atih hnuah "ana viau em" tih pahin minlo en leh a. "A harh theilo,alo tla kha engmah a hrelo tawp,alu a sawh na deuh aniang" ka tih chuan damdawi ala khawm zung zung a.





A tlân tak daih ah chuan a hnungah ka zui ve vat,Patea chu inchhung ah anlo zawn lût tawh a.Mi anlo tam tawh khawp mai,inchhûng ah chuan anlo ri nak nak hlawm a,kan Doctor pa room lama a lût chu ka zui ve ta zel a.





Patea chu khumah anlo mut a,a mit ala chhing tlat. "Pu Buang" tih paha kan Doctor pa in a han sawi vel pawh chuan a harh thei miahlo,a mar phu te a en a,kani lah a ṭap ring tawh mai sia.





"A ṭha ania,hlauhthâwn tur a awmlo,nachhawk na in ka chiu anga arawn harh leh mai ang,a harh hunah alu vel erawh khawl a en fel a ngai dâwn a,hahdam phawt sela naktuk velah inlo hruai dâwn nia" Doctor pa chuan ati dam dap a,kani pawh a zia ve ta deuh in ka hria.





"A in sawh na viau lo maw,in sawh na viau lo sela arawn harh daih tawh lo ang maw" Doctor pa chhuak chu ka zui ta zel a.Keipawh ka hlauhthâwn ala reh fello,ka tha te chu ala khur thei hial, "a lu chhûng lampang ah fello a awm deuh a,a diklo tak ka hre thei biklo a,khawl a en a ngai reng dawn a chu chu a taksa pum x-ray te tih a ngai dâwn a,damdawiin ka chiu tawh a,nghâk phawt ang heti lamah khawl duh anga ṭha kan nei siloa Aizawl lamah pawh in chho pui a ngai maithei,alo harh hunah pawh alu vel chu na ati ve viau ang ngaihthah ringawt chi anilo a,heti lamah theihtawp kan chhuah dâwn nia" ati dap dap a.





"Hahdam rawh," ka taksa a enkual dan dan paha atih chuan ka tha a khur tih a hre thei em mawni. "Engzat nge kan pek ang che,i thil khai na man nen sawn" ka tih chuan minlo pawt chat vat a.





"Pawisa kala ngailo,kan pu ten min pe a nangmah ni aṭang zel chuan la tur kan ni hleinem" atih chuan kalo hnial ve vat. "Nangman ila dâwn tihna ani hleinem, damdawiin thil ania,damdawiin thil chu kan lei tur alawm" ka tih pawh chuan ala duh tlat lo a.





"Ka han chho leh phawt ange,an buai lutuk ang" atih chuan a bânah kalo vuan vat a.Kan Doctor pa pawh alo hawi phei veleh vat, "kan lawm lutuk aw" ka tih chuan anui suk a. "Ka kal i phal tawh em" nuichhuah hawk paha ati chu a bânah kalo la vuan reng tih ka hre chiah.





"Awi aw...ka tihpalh lutuk" tih paha ka thlah chuan "a pawilo,harsatna a awm anih chuan minlo phone vat mai dawn nia," tih pahin a number te chu min pe ve a,a kalchho veleh keipawh in ah ka lût leh vat a.





Midang pawh anlo haw ṭhen tawh,kani leh kan ṭhenawm te bak anlo awm tawhlo a.Patea chu a rum leh ṭiah ṭiah ṭhin a,kani in a biak lahin a chhang mumal thei bawk silo,a tlak dan Ismaela te kan zawh lahin thil ari a arawn tla anti mai sia.





A chem ken in a tlak lo hlauh chu vannei tak ani,ka inthlak hnuah rawng ka bâwl a.Kani in Patea a awmpui tlat a, Ismaela te unau in tv an en a,a khat tawkin apa an va en leh zeuh ṭhin a.





"Au,ka rilṭam tawh e" Helen'in arawn ti ve deuh chhen a,chaw ala hmin siloa. "Nghak lawk rawh aw Helen,chaw a hmin veleh in ei hmasa dâwn nia" ka tih chuan a phei veleh mai zel a.





Naupang tih takah a rawn lâwr leh deuh sek ṭhin a,chawhmeh ka tih hmin vek tawh avang in chaw hmin hun nghah pahin kapa te chanchin ka hrilh ve a.Pawi anlo ti khawp mai,Aizawl lama lo chhuk pui turin anti viau na chu a dinhmun te han en phawt ila.





UDuata lah chuan "a upa ve tawh sia,ngatinge thingkung ah te a lawn reng reng ni,midang lawn tur an awmlo ami" arawn ti ve chhen a.Patea hi kani ai kum nga dâwn in a upa a,an inneih har mai bakah fa an nei lawk theilo a,tûnah hian kum sawm nga leh pahnih vel anih ve tawh ka ring ringawt a.





Kum nga hnih ai pawn a upa tawh maithei bawk,an kum zât chiah hi kalo hre bîk siloa.Heleni te unau in chaw a hmin veleh an ei nghal a,an chaw ei mawlh mawlh laiin kan Doctor pa arawn lût hlawl a, "pu Buanga chu eng nge a an a,alo harh tawh em" atih chuan room a lut Turin kalo ti vat a.





Room a a luh hlan in thingpui kalo lum sak a,rei vaklo hnuah arawn chhuak veleh mai bawk a. "Lo ṭhu rawh,hei thingpui ka lum a kan in dâwn nia" ka tive ngei a,mipa mumal taka ka biak ve vawikhat na.





Ka naute pahnih chu a chhaih a chhaih hnuah ka awmna lamah alo phei a, "heti lampang hi i ngeih zawk in ka hria,ilo chho tirh aiin i sa a ṭha tawh zawk," atih chuan ka en vat a.Ka en vang nge "ka sawi awmzia chu ahma aiin i hmêl hmuh a nuam tawh zawk" tih pahin alu thak lo pui chu a hiat a hiat a.





"Ka lawm e" ka ti ta ringawt a,a sawi diklo hranlo.Aizawl a ka awm kha chuan rilru hreawm,rilru hah nen ka cher kâwk kâwk anih kha,ka hmêl te kha a ngui bam reng a heti lama ka awm chu ka zia chho ve hret hret.





Thingpui ka pek chuan alo ban ve mai a, "i hah dâwn sia,lo kal kher a ngai hleinem Patea pawh a ṭha zel mai dawn alawm,nichin kha chu ka hlauthawng em a,zah pawh a sawi theihloh" tih pahin ka kun ta daih a.





"Khatiang ang emergency ah kha chuan zah a ngai hleinem,zak la chuan i mawl ka ti zawk maithei ani," atih chuan ka enchho leh ta nge nge a.Alo nui leh sang tawh,a nelawm ve chiang em asin.





Ngawi reng a kan awm vang vang hnuah "biang sum te inei" arawn ti chhuak hlawl a,minlo va en chik awm em em. "Nia tlêm te ka nei ve a," ka biang khawih pahin kati sep a.





"Nangmah chiah in i awm sia,a hreawm ṭhin ngawt lo maw" ka tih chuan a no dawhkan a a dah chu a her a her a. "Hreawm châng chu awm ve ṭhin,mahse Pathian ka bulah a awm tlat a,engkim hi a eng zawng a thlîr phei chuan anuam vel vek mai," ati chhuak sup a.





"Ka hmuh tirh ber che khan Pastor emaw ka ti che a" nuih deuh hak paha ka tih chuan anui ve hawk hawk a. "Minlo va hmu ropui ve,a lawmawm ah ngai mai ang" ati sup a.





Kan bul hnaiah damlo an awm bawk nen kan ṭawng ring lutuk ngam lo, "i lung aleng ṭhin em,Aizawl i ngai lo ami" atih chuan a mitah ka en a.Rei erawh ka en ngam lo thung, "a tîr chuan leng ve tho e,mahse hei a nuam ka ti tawh lutuk a,haw na châng ka hrelo anih hi" ka tih chuan abu nghut a.





"Nutawi,e Hminga ila awm animaw,alo harh tawh a tui ka duh atia,minlo va en sak lawk ta che" kani in arawn tih takah chuan kan Doctor pa pawh chu a ding zui ve vat a,keipawh Helen'i te chaw eina vel chu ka tifai a.





"Ni,i duh chuan chaw ei daih rawh bawihtea te chuan an ei tawh ania," ka tih chuan tui a in tête phawt a. "Nang i ei tawh em mate,ei rawh aw i ril alo ṭam lutuk ange,keichu nakinah i Patea rualin ka ei ang" atih chuan ka chhang tawh lemlo.





Patea en tura room a ka luh chuan Doctor chuan a bp te alo check sak a,kani pawh tui intur keng chungin alo lût leh a. "Ka bp hniam nge,a zâr ka sat tur chiah kha ka lu arawn hai thut a ka tla palh ta alawm mawle" pate'an ati a.





A aw pawh ala hnawk khawp mai, "a tih chi tawh loh reng reng,min ti hlauthawng lutuk alawm,hahdam deuh a i awm char char a ngai atih kha aw Hming'an" kani in ati hlak hlak a.





Kan Doctor pa haw tur pawh pawn thleng ka thlah a, "harsat na a awm anih chuan zanrei pawh nise minlo call dâwn nia," atih hnuah a chho leh a.Amah chiah in a awm sia,a khawhar thlak duh ngawt ang,kei ni ila ka theihloh tawp tur thil ani.