My Hopeless Dream chapter-2

[Lianhna nubawihi]

MY HOPELESS DREAM


CHAPTER-2








"i inpeih tawh em,a hmun kan thleng tawh a nia,kawngka an khar ṭep" tiin felin minlo tur ve chhen a,ka pheikhawk bun ka tawt avangin kei lah chu ka kal chak thei der lo.
Fresher day kan hman na tur lah chu ka la kal ngai lohna ni in,kawng peng neuh neuh a tam bawk nen,bo lova a hmun ka thleng thei chu lawmawm tak a ni.Hall ka thlen chuan ka ṭhian ten kawt ah minlo nghak ṭhap a Thaw hluam hluam a ka va thleng chu minlo fiam zui nak nak a,lalmuanawma te thian ho pawh an lo awm.Felin a kawm ṭhin avanga inhria kan ni a,kei phei chuan ka nel em em hran lo.Mahsela,zana a thil sawi khan ka beng a verh em a,zawh chhuah ngei pawh ka tum.






Hall chhungah kan lut a,an lo ṭhu khat deuh vek tawh.Kan ṭhian ho chu kan tam tham em a,duty ho chuan a chungah min chhoh tir ta daih mai,a chhungah kan vaiin kan leng lo a nih hmel.Ṭhutna kan rem fel chiah tihah felin zunchhuak a sawi a,a chep a chep kârah zung turin kan va inhnawh lui a,thaw a chham lek lek.Feli zung zo inchhunga kan lut leh tur chiah chu Jerry nen kan intawk hlawl a,min lo nuih nghal sen sen."khawnge i kal dawn?" tih ka zawhna chu zaizira min chhang in a kal leh mai a,a hmanhmawh hmel khawp mai.Inchhunga kan luh leh chuan kan ṭhutna ah khan midang an lo ṭhu vek tawh a,kawngka bul stepah chuan kan ṭhu ta ringawt.Programme an ṭan a, keini chuan engmah kan hmu ve thei lo,ninawm duh tak a ni.



Vanneih thlak deuhvin lalmuanawma te thian za ho chu rawn chhuak in kan bul ah chuan an rawn ṭhu ve a,ka hriat chak em em kha zawhna hun ka nei dawn ta,lawm rilru tak ka ni."Nizan ami kha sawi tawh la " ka lo ti vat a.
"a ti leh dawn ta , game khel ila min hneh chuan ka hrilh ang che " a va han sual thiam tak.Ka beng a ti vir ting tang a,min hrilh ṭha leh duh silo.Mobile legend khelh ah min cho tlat a,tih tur a awm em em lo bawk nen kan in tum chiah chu hneh lo vai vai tak ka ni."min hrilh ṭha ve mai la " ka tih chhen takah chuan a ning deuh aniang.
"ka fiamthu a nih kha,jerry bulah pawh tiang tho khan ka sawi che " te chu a la ti deuh deuh.
"engtin maw min sawi?" thil nilo lo a lo sawi ang tih ka hlau."in in ngaizawng em ka ti" a ti sam leh et a,"eng tin nge a tih?" ka tih leh chuan " ngaizawng lo a ti" tih zawngin min chhang.Engvanga hnual rawih nge ka nih ka in hre lo,eng chhanna emaw tak a lo pek ka beisei a,mahse chu chu ka beiseina chauh a ni.




Freshers day kan hmang zo va,class pawh a pangai leh viau tawh.Thil pangai lo tak erawh a awm,engvanga jerry hian min be duh tawh miahlo nge a nih ka hrelo.Ka text min seen zone a,be chak viau mah ila ka be zui ngam tawh lo.College a kan in hmuh pawhin ka biak hmasak loh chuan min be ngai meuh lo.Chutianga a awm teh thut chu ka hrethiam lo,min hua nge tih sual ka nei zawk?





Internal exam a ni chawpchilh nghal mai dawn a, keipawh in zirlaiah rilru pêk ka duh tawh.Ngaihtuah lutuk tawh rih lo ila a ṭhat ka ring.Lehkha thiam thei ti a sawi ka ni ngai lova,keima tawkah erawh theihtawp ka chhuah ve ṭhin.Zan menrei ka theilo erawh buaina tham a tling, phone khawiha meng rei thei hle si kha lehkha ka chhiar chuan mutchhuak in min man nghal zel a,a rei berah zan dar10 ka thleng ve hram ṭhin.Engtin nge mi te hian tlaivâr ṭhaka an zir theih ka hre lo?an rilru ah a luh tak tak ka ring lo,mahni inhrem na mai a ni,chutiang ngaihdan chu ka nei ve tlat.Kei aiin an ti ṭha em em ngai bik tlat lova,an zir ang zat chiah hi zir ve ta ila ka bawn viau in ka ring.





Zan khat chu Jerry message ka dawng hlawl a."Naktuk chu ka ring che ania " tih te hi a rawn thawn a.Rei tak a message ka dawn tawh loh hnua a thil rawn thawn chu thlum lem lo mahse minti phur tak zet.A tuk maiah kan exam tawh dawn a,ka bulah ṭhut a tum anih hmel.
Zinga heleni ka hrilh erawh chuan a lawm lo nasa mai."I ṭhian nu nge i star i thlan dawn?" a ti mauh mai si a.Jerry nena ṭhutdun chu chak viau mah ila Heleni chu ṭhutpui ngam loh chi pawh zuk ni suh,a ṭhian aṭang min ban duh hial ang.





Exam ni ah meuh chuan heleni pawhin min kal khalh ve ta,thil mak tak a ni.Jerry erawh a tlai ngai thovin a ni a rawn tlai ni.Ka hnungah ṭhutna ka lo hauh hlauh zawk a,nilo se chuan a hmasa berah a ṭhut a ngai ngei ngei ang.Ka rin ai takin ka zir a rawn chhuak fuh a,ka thiam ang ang chu jerry ka hrilh ve bawk,a ni pawh a lawm ve viau in ka ring.




Exam chu ṭha deuhvin kan zo va,rilru pawh a thawveng ve leh deuh tawh.Ka rilru kam tu pakhat erawh a awm,jerrya induh ta lutuk chu a ni.Min be zui ta miah lova,kei pawhin ka be duh ta biklo.Ṭhian anga min entu chu ṭhian nihpui mai kha a ṭha in ka hria,ṭhian satliah ang chauva en erawh a harsa, mahsela, ka ngaihzawng tur anga en pawh chu ka ngam chuang lo, duh neih pawh hi hmeichhe tan chuan a buaithlâk takzet.Inngaihzawnna ah hi chuan a bul ṭantu tur chu mipa tih hi khawvel kal dan hmang pakhatah kan ngai vek hlawm a .A be hmasa tu zawk hmeichhia kan nih chuan zaktheilo nih kan hlawh a,kan duh loh zawng deuh te kan biak ṭhat loh deuhvin induh kan ni leh a,mipa hi an vânnei ngawt in ka hria.




Thlasik a rawn in her a,thla tam a vei meuh chuan a hma ang em em khan ka vei ta lo.Beisei tur a awm lo miau va,ka ngaihven reng ta bik lo.A chang chuan amah ngaihtuah miah loh chang pawh ka nei, college a ka hmuh erawh chuan a ngai te bawkin a zunah ka uai thar leh a,ka rilru ah erawh a cham reng tawh lo,a hahdam thlan phian in ka hria.




December thla tawp lamah chuan khua pawh a vawt ṭha tawh kher mai.Thlasik boruak leh tlai ni tla tur te chuan lung a ti leng ruih tawh a,zan boruak pawh vawt hle mahse a nuam tho mai.Kan ṭhian ho chuan kawn chei fan ve ngei kan duh a, college kan chawlh tawh dawn avangin kum thar leh hma a kan in hmuh tawpna tur a ni bawk.Han haw leh rih turin kan veng a in hlat hlawm em a,a hnai ber heleni te inah kan phei a,a chhungte awm kim lai alo ni bawk nen,inchhungah pawh lut lovin an inhnuai la luah lovah chuan min luh pui a,ni tla tur a lang chiang si,nuam tak a ni.Tlai chaw atan pawh noodles kan ring a,ka puar ve tho mai.Kum tluana han inzui takah chuan hun reilo te mah nise ka ṭhiante ka hmu lo vang vang tur chu ka lung te pawh a leng lawk hial in ka hria.


Khua a thim ta maw tih ah in aṭang kan chhuak a,Mission vengah vântirhkoh lem lian zet hi an chhi eng uai a,chu ber chu ani kan hmuh chak ni.Kan kal tumna hmun kan thleng chu a lo thim ṭhiap a,Kan hrilh a hai tlang ngang mai.Nu ho inkhawm pui a awm avangin mipui an tam thei em a,an lo off daih chu niin,kan kal hah ve tawh tehreng nen,kan kal thlawn chu a ni ta der.Kan kal tumna ber kan kal theih tak siloh ah chuan tiin veng dangah kan in zui phei a.




"Enteh u,nichin aṭang khan min la en char char min star chiang " helenin a rawn tihna lam kan hawi thla chu heleni bawk chuan min khap leh reuhva.Kan thlang deuh lawka tlangval rual lo ṭhu khawm chuan kan lam chu an rawn hawi ṭhup a,"Nang an en lo che,keimah lawm min en ", tiin felin a lo fiam zui a,chhelo zawk nih inchuh in an inhnial an inhnial a,keimah min zawt thul.Kawngpuia kan thleng thla chiah chu kan nuih a za tlang ngang mai.Kawng chhaka kan awm laia min lo thlir ṭhup emaw kan tih te khan minlo thlir awzawng lo.Kawng chhaka ar bawp zuar nula chhelo deuh deuh awm khawm ho zawk kha an lo thlir chu ni in,kan ṭhian thum chuan kan in en a,kan nui kan nui ta ringawt,khang tlangval ho khan hria se zawng an nuih a za ve viau in ka ring .





Zan dar 9 a ri tawh a,haw a hun tawh tih kan hria.Nakum daiha inhmu tawh tur kan nih avangin inthlah pawh kan hreh tlang ngang mai.Feli nen kan haw na lam a inang hlauh va,heleni erawh amah chauhvin a haw hna hna dawn anih hmel.Chhunah nilenga kan inzui tawh hnuah ,zanah kan leng tlang a,thil kan ei tlang a, thla kan la a,kan nui nasa hle bawk.Heleni kan thlah liam a,feli nen pawh rei kan kal dun lo,ka ṭhiante nen kan in ṭhen hrang chian chu khua a har nghal.Kum chu thar vat se,in hmuh leh vat ka duh.





Krismas hmang turin kan khaw lamah kan haw khawm hlawm a,chhungkaw kima kan han awm khawm leh thei te chu nuam tak a ni.Ka nu phei chuan kan haw tuk aṭangin kan kal leh hun tur mawlh a ngaihtuah a,min thlahlel ve thei em a,keini lah kan cham rei ngai silo.Chhungkaw kima chaw han ei ṭhap te chu kan tih zen zen loh thil anih avangin a hlimawm ka ti,chaw ei pawh a tui duh.Kan khua ngai viau e tilo chuan Aizawl lam in ka lung min len mah zawk.Ka kawm ve ber ten pasal min neih san tawh a,ṭhian kawm tur mumal tak pawh ka nei tawh lo.




Kan advance krismas hmang tur pawh chu ka phur vak lova,kal loh zet ka tum a,ka u in min sawm tlat vang chauhva kal ka ni.Zanriah eikham veleh phut lo zet hian ka insiam a,ka kuthlei chuan status ka update mawlh mawlh bawk.Ka insiam zo phone ka en leh chuan jerry message a lo awm reng mai.Rang lutuk in ka mood a inthlak nghal,a message lah chu " i va induh ve " tih zawng hi a ni a."Nang alawm induh" tiin a rul tawk lek hian ka chhang a.
"i ngaihawm hle mai " tih a rawn thawn leh chu ka awih chiah lo."dawt i sawi,min ngaih loh kha " ka message chu a seen tawh lo.Rei lo te hnuah a phone call ka dawng a,a tirah chuan ka la mai ngam lo,ka thin a phu leh dut dut tawh tlat.



A vawi hnih nan a rawn call nawn leh chuan ka la ngam ve hram.
"hello,cindy,enge i tih ?" ṭhalai in advance kan hman dawn thu chu ka hrilh a,"ava nuam dawn ve" a ti tak na in,ka thusawi a ngaithla chiah pawhin ka hre lo,a bulah chuan a ṭhiante ni awm tak an ri hlut a,an thusawi erawh ka hre chiang theilo.An lo chhaih fiam vel niin ka hria.Programme an ṭan tep tawh avângin rei pawh kan in be lo, Biakin lama hun kan hman chhung zawng pawhin amah bawk ani ka ngaihtuah ni.




Khua chu a vawt deuh tuk a,ka mut lah chu a chhuak lek lek,kan thenawm naupang ho haw tur ka hmu fuh hlauh va,ban hma in ka haw ru hna hna.In ka thleng a,ka inthlak zawh veleh khumah ka lawn nghal vat, mut lum thuai thuai ka chakna a rei tawh bawk a, nuam tak a ni.
"in haw tawh em " tih message jerrya rawn thawn chu ka chhang ve chiah a,ka chhan rualin a rawn online nghal vat.Ka message a chang emaw tih mai a awl.Kan haw tawh thu leh ka mut tawh thu ka hrilh a,a ni chuan thil dangin min chhang lo.
"Bialpa i nei em cindy ?" chu zawhna chuan ka thinphu a rawn ti rang nghal.Mipa in chutiang zawhna chu hmeichhia te hnena an zawh chhan ka hre ve miau va.Eng rilru pu a chutiang chu min zawt ve nge maw anih le?ka beisei erawh ka ti sang ngam lo.



"Nei lo e "
"Ka bialnu i ni duh em?" a message chu ka mit vai nge ka mumang zawk? Zawhna a zawnga zawhna duhawm ber a ni hial ang!
"min duh em ni?" min duh ve ang tih ka ring ngai lo,ka mumangah takngial pawh a thleng ang tih ka suangtuah pha lo tlat.
"ka duh che a lawm,in ngaizawng ve tawh mai ila" lalpa leh!!min tih der anih loh vek pawhin min fiam a ni ngei ang.
"min fiam a ni lo maw?" rinhlelhna in ka khat a,min fiam mai mai tur erawh chuan ka ring phal leh lawi si lova.




"Tûnah hian i thutak a nih phawt chuan kei chu ka thutak khawp mai " a thusawi chuan a ni ka thin phu ti rang em em mai ni,thlasik khawvawt pawhin min hmet vawt zo tawh lo,ka lum ti lutuk ka va tho va,tui vawt ka lem kalh kalh.
"i ti tak tak em?" engvanga aw ti nghal mai lo nge ka nih ka in hre bik lo.Min duh tak tak ka ring thei thlawt lo a ni ber.
"Min duh nge duh lo?" chu zawhna chu ka chhan ngei a ngai tawh ang,min zawt nawn tawh kher in ka ring lo tlat a.Hun ṭha bawh pelh chu ka phal bik teuh lo mai.
"Aw duh e" in ngaihtuah buai miah lovin ka chhang a.
"Tun aṭang chuan ka bialnu i ni tawh " ka ta ni tura ka suangtuah phak ngai loh,beisei en pawha ka en loh leh ka cho phak rual lova ka lo dah ṭhin,ka mipa duh em em kha ka bialpa a ni tawh tihna maw?a va mak ngai em!


"kan in ngaizawng tihna maw?" ka chian loh vang pawh ni tawh hauh lovin, a tawngkam ngei a min duh thu hriat kha nuam ka tih em vang a ni.
"Jerry ramthanpuia bialnu chu Cindy vanrohlui,ti khan i chiang em ?" khi vur vur chungin ka chhiar tih hi min hmu se chuan ka luanliam em em zia hi ala hrethiam chuang lo ang.





"Engtik aṭangin nge min duh ?" ka hre chak lutuk tlat.
"A rei tawh,ka hre tawh lo"
"eng tik bawr vel khan nge?"
"ka hmuh tirh che khan" chu erawh chu ka awih lo hulhual.Mipa hian duh an neih chuan an bawhzui vat ṭhin tih mi sawi ka hria,tunah erawh kan inhriat aṭangin kum khat dawn a vei tawh tlat.
"ka awih lo,min duh pawh hi ka la awih lo,min fiam a niang ".
"Awih rawh,midang i duh lai pawh khan ka duh reng che" tu chungchang nge a sawi ka hre hauh lo.




"Midang ka duh lo,nangmah chiah ka duh che " hre ngei ngei se ka duh.
"Lalmuanawma kha" a rawh tih chuan sawi mai tur pawh ka hre lo,a awm in a ang lo ngawih ngawih."A teuhlo lutuk, engtin nge chutianga i ngaih theih?".
"in ṭhutdun kha " kan ṭhutdun vang ringawt in engtinnge ka duh a rin theih.
"eng emaw a rawn sawi a" hmana ka thil hriat chak deuh lalmuanawman min hrilh duh tak loh kha a ni ngei ang .
"Enge a hrilh che ?"
"Hnaih suh tih te mawle",
"Chuan "
"Chuan ka hlat che " engvanga chutiang thu lo hrilh ringawt nge maw anih le?amah ngei sa naklaiin,ka ngei zual sauh mai.





"Ava han zak theilo,ka bulah pawh chutiang deuh chuan a sawi che, ngaizawng suh a ṭhalo ang a ti che " ka sawi zawng pawhin ka thin a ti rim thei.
"A sawi dik mai thei"
"Maw?" min chhanna chu ka rin loh lam daih a ni.
"Min hrechiang lo tiraw?"
"Aw"
"Min hriatchian hunah chuan min duh tawh kher lo ang " hetiang thil vel hian alawm ka awm ti nuam lo ṭhin chu.Eng ang mi pawh lo nise,ka rilru erawh a ngai reng ang.




"Ka duh che,engmah in a thlak danglam lovang " hmeichhe sawi atan a mawi chiah em ka hrelo, mahse thudik ka sawi mai a ni.
"i la hre mai ang,nakinah ka hrilh dawn che nia" a sawi tum chu ka ngaihruat thiam lo ,mahse ka thusawi zawk hi a dik zia hi hre vat vat se ka ti.
"Tunah sawi la".
"Aih"
"Ka hre chak alawm"
"Nakinah" a zawh luih theih loh hmel,hre chak deuhvin ka awm reng dawn a nih hi.




"Anih chuan min rawn bem ringawt chhan hi ?ka duh che tih i hriat vang a nilo tak tak em?" zawhna hlirin ka khat riha,a chhanna hriat vek pawh ka duh.
"A chang chuan in ngaihbel ve ṭhin e,mahse ka chiang ngam lo,min duhlo mahla ka duh tho ang che " a in ngaihbel pawh chu a awm lo hran lo ve.
"a nih enge min duh chhan ?" dilchhut min ti tawh viau in ka ring,ka hre chak miau mai bawk si.
"ka hmeichhe duh zawng tak ini,chu zawng chu " a chhanna tam tak min pe lo, mahse ka lungdam nan a tawk em em si.



"Nangpawh ka hmuh tirh phat che aṭang khan ka vei nghal che alawm,chu chiah chu ka hrilh ve ang che " a hriat belh ve chak ani chek ang chu.
"Engtin nge min duh theih ? "


" Thawnthu leh movie vela changtupa te ang maia ka suangtuah ṭhin mipa kha inia" tih bak han sawi vak dan tur ka hre bik lo,a ni reng a,ka dream boy dik tak a ni.A mize cool leh ngainatawm em em si te,a ngaihawm tawk leka a induh thiam dan te hian a nimahna a zunah min uai tîr.





Kan ti ti tui viau a ni ang "khua avar ṭep ania,mut a hun" a tih chuan zing dar2 lai alo ri tawh tih ka hre ve chiah.Muttui tia kan in thlah hnu pawhin kei chu ka la muhil theilo,ka suangtuahna ka kawm a,tuna thil thleng zawng zawng te hi zing ka thawh ruala bo leh mai tur,ka mumang mai mai a lo ni ang tih ka hlau.



Krismas tuk a ni a, Inkhawm tura kan insiam zawh vek tawh hnuah chhungkua in thla kan la a, chhungkaw kima kan vawi khat lakna a ni nghe nghe.Kum dangah chuan a tu emaw ber hi hmun dangah mas hmangin an zin ziah a,kan kim ve ber ṭum a ni.Kum tir aṭangin thil a kal tluang chho ve parh a,ka tan tak hian kum ṭha a ni bik in ka hria.





Chawhma in khawm ah chuan ka muthlu lo ve teh mial a,zana ka menrei nen mak tak a ni.Kohhran zaipawl in hla nalh deuhvin an rem a,ka mitthla ah chuan jerrya ka hmu daih nia mawle.Khang hla rem ho zingah khan amah hmu ang tlatin ka inhria,ka vei lutuk a,amah hlir ka ngaihtuah vang pawh a ni maithei.Han tel ve ngat se chuan a inhmeh ngawt in ka ring.


Krismas boruak avangin kan buai dun em a, kan in be zeuh zeuh a ni ber, programme a tam em a,ani lah inkhawm leh zaikhawm ṭhulh duh miahlo a ni bawk nen,kei ai pawhin inkhawm a taima zawk.Chu tak chu ka duh zual chhan pawh a ni in ka hria.Kan in be tam lo na a,kan in biak chhunah erawh kan inhmuh hun tur mawlh mai hi kan sawi a.Ka chhungte ngai in thlahlel viau mahila,atakah inhmuh vat vat ka chakna a lian zâwk.Kum thar hun hetiang em em a ka nghahhleh hi ka hre ngai lo reng reng,a hiptu a na bawk a ni.





Hun a liam a,kum a han thar meuh chuan ka hmabak chu ka huphurh leh deuh va,kan khua te chu ka ngai thar leh velin ka hria.Aizawl lamah kan unau za in kan phei a, college ṭan pawh a hun leh vat dawn.Jerry erawh an khaw lamah ala cham rih a,a tello va class kan han ṭan chu a chanchin hre sa vek mahila ka hrilh hai deuh.Kan rualin ṭan pawh nise kan section a dang tawh dawn a,chu pawh chuan minti hnual deuh.Hmanah khan kan rilru kha lo inhrilh tawn ni ila chuan nitin hlim deuhin hun kan hmang dun thei anga,a nawm dawn tehlul nen.Induh tawn ve ve chung si kha kan lo thup rei mah mah a ni.





Jerrya tel lovin kar khat lai class kan kal tawh a,a rawn haw dawn zan chuan kan ti ti nasa khawp mai.Ani chuan kan nih hnua kan inhmuhna hmasa ber tur anih avangin class kal miahlova inhmuh a duh a,class han ṭhulh ngawt chu thil dik ni in ka hre bawk silo.Kan ni hmasa berah college a han inhmu chu kan in pawh na tur a dal thei dâwn in ka hre bawk si,a fal in kan in hmu thei dawnlo tlat a,ngaihtuahna a buai nuai mai.Ka ngaihtuah fe hnuah erawh a duh dan anga kal mai chu ṭha in ka hre ta zawk a,ka ṭhiante erawh ka hrilh lo.Ka dam loh avanga class kal lo tur angin ka insawi a,attendance minlo dah sak turin ka chah a,min ngai pawimawh em ang chu maw.






Zing khua a rawn var a,ka huphurh na a zual telh telh,ka hmu chak tho bawk si.Kan inhmuh hunah enge ka sawi ang? Phone angin lo ṭawng duh vak lo ta se?emaw sawitur hre lo viau ta se tih vel ka ngaihtuah a, zam chhe tak ka ni.Ka u te pawh hnathawk turin an chhuak vek tawh a,jerrya lo thlen pawh a hun tawh tih ka hria,a hun a hnai telh telh a,ka zam chhe telh telh a ni ber.




Ka phone a rawn ri a,amah ngei a ni.Kan in awmna ala hriat loh avangin pawnah chhuakin kawngah ka lo nghak a.
Zam ru deuh chunga ka thlir reng lai chuan a rawn lang ta!nui var var chungin min rawn pan a,a hnaih pauh leh ka zam telh telh a ni ber.Ka bul chu a rawn thleng thla vat a,sawi mai tur ka hrelo,ka hamhaih a,ka lai em em bawk.Amah zawk chuan min be mial mial a,mahse enge a sawi ber pawh ka hrelo, chutiang khawp chuan a ni ka zam ni.





" in inluah chu a nawm reuh hi"tiin a hawi kual vut vut a.Ṭhutthlengah ṭhu in ka kut a rawn la a,ka kuta a thil rawn dah zet chu sam vialna tur bakkilh ka duh em em ang kha a ni.Engtin nge ka duh zawng hi a hriat chat theih le?lawmthu han sawi vak dan tur hre lo mah ila,ka awmdan aṭang erawh a hriat ngei ka ring.



"A mak tiraw?" tih paha min ṭhut hnaih sauh vin,ka mitah tak min en a.Kei chuan ka en ṭha ngam lo."Eng chu nge mak?" zawi deuh sup hian ka chhang a,ka aw te chu a lawi deuh rut hian ka hria.
Min tih laih tum ni awm hrima min en reng chhan erawh ka hrelo,Chutah rawn nui leh set set in "Heihi mawle "tih pah in ka kut a rawn vuan a.Ni e ,a mak, engkim hi a mak!Tunah hian ka duhthusam a thleng dik mek in ka hria,ka mipa duh em em ka bulah a ṭhu a,ka kut a vuan bawk.A ni chu ka bialpa ala ni zui! Engtinnge hetiang em em hian ka vanneih theih?tunah tak hi chuan khawvela hmeichhia tumah hi ka awh awm reng ka hrelo, chutiang khawp chuan a ni ka hlim ni.




"Nia a mak,eng tin nge?"ka sawi zawh hma a min tawp tir tu chu a hmui vawt ruih mai kha a ni.Engtia awm tur nge ka hrelo,mipa ka la fawt chhin eih silova,ka ṭek chhawk a ni ber.ka thinlung a chi ai mek.
Min fawhna chu chhang let lovin ka dawh tawp a,ka lungphu ran em em zia lah chu,tuna thil thleng mek hian bialpa ka nei ve tak tak tih a ti fiah viau in ka hria.
Thil ri dup dup ka hria,ka thin zawn ka khawih a,ka lungphu ri erawh a ni lo.Jerrya lungphu ri niin ka hria, engtinnge khatiang em em khan a rin theih?keimah ang thovin a zam ve viau ania'ng,a ri ring in a ri lah chu a rang em em khawp a.A rawn thlawh chhuah daih duh hmel,hria ang erawh in ka awm lo.






"Meng tawh rawh " a tih rualin ka meng a,min lo nuih suk in ka samah a chul zui a,engmah sawilo mahse keimah ang thovin a luangliam ve tih a mitmeng ah khan ka hmu.Sawi tur hre lo vin kan in en reng a,a tu a ve ve pawh chu kan lai tih a hriat,a zahthlâk ru takzet.






"i mal chungah ka mut chakna a rei tawh " tih pah hian a tho hluai a,kei chu ka lo ṭhu ṭha sawt sawt.Ka malchungah a rawn a lu rawn dahin,keiin a sam ka lo chul vat.Nuam tih hmel takin a maimitchhîng a,ka en ning thei meuh lo.
"I ril a ṭam em ?
"ka ngai zawk che ,min lo ti buai suh " ka ti buai tawp silova,ka malpui erawh a na ṭep tawh,a rit reuh em a tin ni.
"Mumang a ang ka ti " ka ngaihdan chiah pawh a ni.
"Eng chu maw?"
"Kan awmdan hi"
"hetiang hian awm reng ka duh,i bulah " chu aia thlakhlelh chu ka nei bik lovang.






"Ka rit em?" tih pah in a rawn tho va,"lo mu ve rawh " tih leh min pawh a rual a,khua chu vawt hle lo se long chair ah khan kan leng kher lo vang.A ban chu ka kham a,anin nghet deuhvin min lo kuah thung,ka chalah a rawn fawp leh zeuh ṭhin a,a awm nghena han mut pawh chu lum nuam tak a ni.A thinphu ri pawh ka la hre thei,keimah vanga ri ani tih ka hria a,ngaihnawm ka ti.





Kan lo mutui viau a ni ang,ka harh leh chuan 12 a lo pel duai tawh a,ka ril pawh a ṭam tawh fu .Jerry chu ala mutui ngang mai,hmuhnawm thlira ka thlir reng laiin a mit a rawn meng a.
"i mutui em " tih zawhna min zâwt nghal a,
"Tui e,ka ril a ṭam" ka tih chuan a rucksack kha a ban a,eitur a rawn lei tih pawh ka hre lo.
"i ei duh zawng pawh ka hre lo " min leisak anih phawt chuan ka duh vek in ka ring.
Noodles chu ka duh chi vek a rawn lei a, chocolate a rawn lei tel bawk,ka ei phal in ka ring lo,mipa hnen aṭanga chocolate ka dawn hmasak ber a ni tlat a,hlu vet vet tak a ni.Thil kan ei a,thla kan la a,kan ti ti nasa viau bawk.Hriat loh karin khua a tlai zung zung a,a haw dawn meuh chuan a hreh ve ngang mai.






Zanah pawh chhuna kan inhmuh chungchang ngawt kan sawi a,ka bula awm leh vat vat a chak thu te,min ngaih leh nghâl thu te,chutiang lo chu sawi tur dang a hre meuh lo.Tun thleng hian mak ka la ti rêng,ka duhthusam thleng dik thut hi ngaia neih har ka la ti, engkim chu a tluang parh a,ka nuna ka hun tawn nuam lai ber a ni hial ang.








A tuk zingah chuan College kal turin minlo nghak a,kan veng dawt chiaha awm an nih avangin nitin ka paltlang a,an awmna lai tak erawh ka hrelo.Amah nena class kan kal dunna hmasa ber tur anih avangin ka inchei uluk ve hle a,ka tih ngai miahlo pawnfen ka feng nghe nghe.Kan in aṭang ke in ka chho va,umama thlah ka duhlo tlat chu umama hrilh a hai viau aniang "Nidangah ka thlah tawh miah lo ang che " an ti thla ngawt a,kea ka kal duh chhan hria se chuan engtin tak min ti ang maw?






Muangchangin ka chho va,ka kal chak ngamlo ani mah zawk.Hmuh leh vat vat chu ka chak a,mahse ka la zam reng.Kawng peng kual laia jeerya ding ka va hmu chu ka thaw leh hluai ringawt.Engtin nge mi te hi an in ngaihzawn tirh hian an awm ve ang le?keimah ang hian an lai ve ṭut ṭut angem tih te ka ngaihtuah.





Min hmuh tirh aṭangin a mit ala sawn miahlo."Min lo nghak rei em?" ka zawhna chu peh hel miahlo vin min chhang.
"Rei lutuk,i rei lutuk a ka rawn chhuk anih hi " engtinnge a gentleman em em theih le,nitin hian amah duh zual zel chhan tur ka hmuh belh zel in ka hria.College kan thleng a,helenin min hmuh rualin min lo chhaih nghal,a nuama ,a zahthlâk tho bawk sia.Class la tûrin kan in ṭhen a,kan class inan laia kan lo in ngaizawng daih tawh lo kha ka ui vawng vawng mai.Feli te nen kan class a inang tawh tur erawh ka phur khawp mai.






Heta ṭang chiah hian buaina a inṭan ti ila a dik ber ang.Class hi dar 10 leh a chanve ah kan ṭan a,dar 12-ah lunch break a awm leh a,dar 2 ah kan bang leh a.Lunch break tih loh chu inhmuhna hun kan nei miah lo,chu pawh minute 30 chauh a ni nghe nghe.Lunch break a rawn ni chiah a,jerry chuan kawtah minlo nghak reng tih ka hria.
Mahsela Feli leh heleni'n kal an phal tlat lo.
"Ngaihzawng neih avanga ṭhian te thlahthlam tur a ni lo" tih chu an thupui ber ani tawp a,dik pawh ka ti tho,mahse thiante bula awm reng pawh chu dik bik in ka hre si lo.Kawgka bula jerrya ding reng chu ka va pan a,min hmuh ruala min kuah in "i rei thei lutuk" a tih paha min kuk zeuhvin min kal pui nghal nal nal.Ka ṭhiante bula tiffin ei tura sawm ka tumna chu ka ṭhulh chawpchilh a ni nghal ringawt.






Ka ṭhiante chuan min ngei viau in ka ring,jerrya lah ka hnial ngam tawh bik silo,minlo nghah rei zia ka hre ve reng a,ṭhiante bula tiffin ei daih pawh chu tih chi ani bik in ka hre lo.College chhak tlangah min hruai chhova,tlang chhipah chuan thingkung sang lo ve tak,mahse buk deuh si hi a awm a.A hnuaia ṭhut chu nuam tawk tak a ni.Keiin tiftin ka pai a,jerryan chawhmeh a lei thung a.Ka chawhmeh pai chu tui a ti ngang mai,a siamtu deuh hian nuam ka lo ti.








"Nitin i chawhmeh siam ka ei chak tawh " a rawn tih chuan ka lo lai leh ringawt.
"nitin ka lo pai ziah anga nimai lawm" a sawi awmzia chu ka lo hre lo der ve tlat a.
"Kan inneih hunah chuan hetiang hlir hi ka duh dawn a nia " tih pah chuan chawhmeh chu a lawngin a ei leh ngat a.Kan inneih hun tur a suangtuah ringawt pawh chuan min ti lawm veng veng.
"Engtikah nge kan inneih dawn a? "
"Kan chhuah hunah " min chhang awlsam khawp mai.
"Nakkumah maw?" a ti awihawmloh ka ti,kan in ngaizawng ve ṭan chauhva,innei tur chuan a reilo berah kum 3 tal kan inngaihzawn phawt a ngaih ka ring.







"Engtin nge?" ka sawi zawh hma hauhvin "kan inru ang " a rawn ti leh a.
"A teuh lo "
"Min nei duhlo maw?" Chutiang lam a ni tawp silo,inneih sawi nan chuan ala hma mah mah ka tih vang a ni.
"Duh e"
"Nih chuan kan inru ang, college chhuah veleh".
"Biakin hawngin mawle " ka tih chuan a lu a thing vut vut a, engvanga inruk pawh chu duh tlat nge a nih ka hre lo, hahthlâk lutuk.
"Aih,Ka ru chhuak ngei ngei ang che" a la ti hram a,"Chhuak duhlo ta ila?" ka zawhna chu nui suk hian min chhang a,"Ka kidnap tho ang che,tumtelek tiat lek te chu ka kut khingkhat pawhin ka zo ang che " a rawn tih chuan ka nuih a za ngang mai,ka ngei tho bawk si.
"i sual emai"
"min duh tho alawm " a inti thei kual vel em maw ni.







Tiffin kan ei zawh veleh college lam panin kan chhuk a,Class lah chu an lo ṭan daih tawh a nih hmel,kan classroom ah ve ve kan lut a.Class a ka luh rual chuan Feli leh heleni ka zawng a,tlar hma lamah an lo ṭhu a,mutthluk daih ka duh nen.An bula ka ṭhut fel rual in "Attendance ala tawh em?" tiin feli ka zawt a, min chhang miah lo."Helen?" ka ti leh a,a ni pawhin min chhang chuanglo.An awmdan aṭang chuan an titau tih ka hre nghal.Lunch breakah ka kal bo daih a,ka bialpa vangin , chuvângin ka lakah an lungawi lo a ni ngei ang.








"Fel,ka lo lut ta lo mai anih kha,min lo nghak reng sia " ka tih leh pawh chuan minla chhang duh chuanglo.Engtinnge ka in sawi fiah ang?"Min ngaidam mai ula " en pawh min en lo,a va han hrehawm tak.Rilru nuam lo deuhvin class ah chuan ka ṭhu reng a,nuamlo duh tak a ni.Class a zo va,Heleni chuan Zung turin feli a sawm a,kei chu awm ve lo ang mai ka ni.Engtia rei nge maw tihtauh an tum ni.







Feli leh heleni te zung zo chu class ah an rawn lut leh a."Fel,helen" kan ti leh ringawt a."Tunge inih a?" feli sual thiam zia chu."Tungea helen i hre ngai êm?" tiin heleni chu a zawt leh zat a,Heleni chu a lo nui put put."Min ngaidam la mawh plizzz" ka beng sik in ngaihdam ka dil leh ta ringawt.Chutah feli chuan " Ka ngaihdan a ni miah lo,i thiante aiin i bialpa i thlang dawn maw?".






"A teuh lo mai,in bula tiffin lo ei ve kha a inthlahrung a".
"A thu thu in awm suh" helenin alo ti ve leh chat.
"Chutiang pawh a ni lo"
"Ka ngaihdan a ni lo tak tak a nia,a thu thu in i awm tak tak a lawm,niminah pawh in in hmu tawh " felin lungawi loh hmel fe hian minlo chhang a,engtinnge a lo hriat daih theih zawk le,ka hrilh ngam lo kha a ni sia.
"min hrethiam ve ula,lunch break chiah inhmuhna hun kan neih hi,nangmah ni ah te khan in chan ve ula " ka rilru tak tak a ni ka sawi ni.An ni nen chuan classroom khat ah kan awm hova,jerry nena kan inhmuh ve theih hun lunch break chauh te chuan min hrethiam ve se ka ti.





"Ka ṭhiante aiin ka bialpa te ka thlang ve ngai lo.Kan bulah pawh tiffin te chu a ei theih reng" feli chu a thinrim hmel lek lek tawh.
"Ka thlang hleinem,mi pahnih ah insiam thei ila ṭha tur" mi pahnih ah inti chang thei ila ka ti tak tak.Miss kimi a rawn luh tak avangin kan sawi zui ta lo,feli thinrim chu a reh tawh nge a la thinrim reng tih pawh ka hrethiam lo.Helen-i erawh chuan min hrethiam deuh zawkin ka hria.









Class ban hma chuan jerryan minlo nghak reng tawh tih tukverh aṭangin ka va hmu,ka hmuh rualin a rawn nui suk a,ban vat ka chakna a ti zual.Period khat lai ala awm a, last an off bik a nih hmel.Ka hawi phei leh a,ka hmu tawh lo,a haw nge hmun dangah a kal zawk,ka rilruah zirlai reng reng a lût tawh lo.Hun lah chu nidang zawng aiin a kal muang in ka hria,dar 2 rik hun ka nghahhlelh ber ṭum ala ni hial ang.







Ban hun ka nghahhlelh em vang aniang ,ban dar a rawn ri chiah chu ka lawm khawp mai.Ka hriat tham lek a sawi emaw ka intih laiin ka lo Yes ring viau aniang,min rawn en ṭhup a.Kan sir lah chuan "Tunge yes ti kha,zirlaiah rilru in pe lo mah mah,Zir ṭhat a hun tawh,ban hma te hi chak viau suh u" tiin mei nei deuh hian min hau va.Chhak lama lalmuanawma te ṭhian za ho ṭhu chuan min lo nuih khur ve cher cher,lalmuanawma nui hmel ka hmuh chuan ka ngei thar leh thut,amah vangin jerryan min hlat phah a,ngeiawm tak a ni.






"Fel,helen bye u aw,kan haw kawng a inang chuang lo, ka kal mai ang" ka tih chuan felin min lo ngei leh hmel khawp mai.Thil dang a sawi leh hma in ka chhuak khauh va,inhnial leh vel ka peih tawh tlat lo.
Pawnah chuan jerry chu ka zawng nghal vat a,ka hmuh mai loh avangin ka phone ka phawrh a,call ka tum lai takin hnung lam aṭang min rawn kuah a.
"Nghah reng ngai mai " ka sam chul heuh heuh pah hian a ti a,hetianga ka sam a chul hian nuam ka ti.





"min lo nghak rei em?"
"Ka hawsan ṭep che " min haw san se chuan ka ti tau maithei.
"Ngatinge min lo nghah si"
"Ka bialnu rualin ka haw chak mawle" engtinnge a zei em em theih le?kei lah chu ka lo lai leh em em tawh.
Gate kan chhuak chho va,an hmelhriat ṭha ve tak te an nih ka ring,jerry chu an lo chhaih nghal vat.
"bialnu haw pui tur kan duh ve " pakhat chuan nui vur vur chung hian a rawn ti a.Pakhat leh chuan " rawn ti tu erawh kha chu amah nena ka hmuh dun fo pa kha a ni.
Jerry chuan na lo te hian athianpa chu a hnek fiam a,an nui dun hak hak.





An inbiak zawh hnu chuan Kawng lehlam ah kan phei a,kawn thleng turin a hla deuh hlek a,kawng erawh a nuam zawk.Thingkung lian pui pui kawngah chuan a ding fur a,nisat viau lai pawhin a hlim chu dai nuam tak a ni.In thlengin min thlah a, inchhung ah erawh a rawn lut lo,ka u te an awm dawn a,bialpa te han inzui haw tir chu ka zak deuh tlat a,nuamlo a ti daih zawk mai thei.






Zanriah eikham ah min rawn call a,kei lah in ka u te hriat a phone call hman chu ka zak tlat a,a inthlahrunawm duh tak tak a ni.Call a ka ṭawng ṭhat ngam loh avangin kan in text a,sawi tur pawimawh deuh a nei a nih hmel.
"I rilru i siam fel dawnnia " a tih te chuan min ti bang bo hu mai.
"Eng chu nge sawi i tum a? "
"Ka nihna mawle" a sawi awmzia ka man lo.




"Eng i nihna maw,eng nge i sawi awmzia hi?"
"Min kalsan mahla ka dem miahlo ang che"engvanga chutiang thu chu sawi nge maw a nih le.
"Jerry"
"Kei chu fahrah ka nia,nu leh pa pawh ka nei lo" a nu leh pa te an thi tawh tihna em maw ni le?
"A van pawi ve,engtikin nge an boral a" ka zawhna avâng chuan nuamlo a tih loh hram ka beisei.





"An la thi hleinem,ka tan erawh chuan an thi tawh.Chu chu ka sawi tum ber a nilo. Min en teh cindy,kei chu i hmuh ang zawng hi ka ni,engmah pek tur che ka nei lo.Ka ti hlim thei kher lo ang che, chuvângin kan kal thui hma hian i duh chuan min kal san thei ang ,ka dem lo ang che ka tih kha " chu thu chu min hnarna ṭawngkam te a nih ngawt loh chuan kei chuan iai phahna ka nei hauh lo.
Anihna avanga duh ka ni lova,amah anih vang chauha duh ka ni.



"Engvangin nge ka kalsan ngawt ang che?"
"Min hmuh dan a dang miahlo em ni?"
"Ka duh zual sawt che " ka thusawi chuan eng ang takin nge amah ah hna a thawh ka hre lo.
"Ka hmangaih che" tih te hi a rawn thawn a,a vawi khat sawi na a ni.







End of chapter-2